#اصحاب_الحسين_ع ١
______

لحسين نذروا رگبهم
لحسين الله خلقهم

انصار ابو السجاد
من الذر للميعاد
_____

من الذر رفعوا للذبح چفهم
و گبل خلق الخليقه الله عازلهم
ميثاق الطفوف اتحنى من دمهم
من تنشف الغيره ايفيض منبعهم

جبريل وقع عهدهم
جبريل سجل عددهم

من سبعين الطف راد
من الذر للميعاد
________

من صلب الصلب ما بدلوا الكلمه
من كاروكه واحدهم صبح زلمه
رادوا تضحيه و انرزقوا ابنعمه
بسماء حسين واحدهم صبح نجمه

مخطوط درب الصحابه
مخطوط بحبر النجابه

و حيدر بين الاشهاد
من الذر للميعاد
________

ما تايه گلب من عدهم ابرغبه
و لا للدنيه مالوا من بدت حربه
بس لحسين واحدهم نبض گلبه
و عن لا ينجرح طيحوله چم رگبه

شلال وشلوله دمهم
شلال چانت گصصهم

وگفوا بالحومه اطواد
من الذر للميعاد
______

محد بيهم ابوكت الحرب يثگل
و ركضوا عالسهم خاف الدرب يطول
و اليلوحه رمح عن ربعه يتفضل
و فصلوها الرگب چن ثوب يتفصل

محظوظ كلمن توذر
محظوظ و ابذبحه يفخر

دگوا للصحبه اوتاد
من الذر للميعاد
________

مو حي الله ناس و رفضت الذله
و لا شغلة حرب للمنفعه اتوصله
چانوا طين بس من الذهب اغله
بحسين آمنوا و اتذبحوا لجله

قاموس كل ثوره همه
قاموس فهرسته حكمه

ما يرهم فوگه اجلاد
من الذر للميعاد
______

من افعالهم هذا الوصل نبذه
و الذاب ابمنيته السيف ميشحذه
العايش بالحسين و يشعر ابلذه
ميفكر جمل هالليل يتخذه

ينبوع حب يجري بالطف
ينبوع زمزم و لا جف

يجري بنهج الامجاد
من الذر للميعاد




حسين الأمين

#اصحاب_الحسين_ع ٢ ( نزله )
____

صاحت افحول الشجاعه
للسبط سمعاً و طاعه
انصار انصار
_____

اتوسط و صاح ابن ظاهر ها يميزان الرجوله
عالعهد لسه اويه حيدر نتبع مهما يكوله
هذا ميدان الشجاعة سطروا شعدكم بطوله
منه واحد لو يموت بحربه باجر باركوله

(( للجنة بهوسات انزفه ))

باجر اتقوم القيامه
نفدي منحر للامامه
انصار انصار
_______

يا برير و باجر انته الزلزله سيفك قراها
من تطب سوح المعارك خلي لجهنم سراها
من تبيع الدنيا تدري روحك حسين اشتراها
ماكو ميت بالشهاده يبقى للمحشر وجاها

(( اخبطاها و أرجع صفيها ))

سبح ابسيفك عباده
شمحله لحسين الشهاده
انصار انصار
_____

يا زهير و هذا يومك بالطفوف ابلا نظيره
اليعوف حسينه تالي عايش بذله مصيره
انته يالكايل اموتن لو الف ما عندي غيره
باجر ابوجه العساكر من ضربتك خلي حيره

(( الموته بيد حسينك تحله ))

لو الف مره كلتها
انقتل بيدك ردتها
انصار انصار
_______

طلبتك فاطم و اجتك بالحلم كلتلها حاضر
باجر اتحنيها بيدك شيبتك من المناحر
مسلم و نعرف ضربتك لكوفه بعلومك تفاخر
انهض و فرع مهرتك و ارهب و زلزل عساكر

(( تنتظرك بالجنه الزهره ))

عالعهد سيفك اريده
وانته خريج الصميده
انصار انصار
______

بعده ما حاجي اويه عابس لنه كاسر بيده غمده
كله ما أصبر لباجر خلي سيفي هسه هده
صد ابن ظاهر لعابس كله باجر موته وحده
للجنان أنطب سويه و تحله يم حيدرنه كعده

(( يروينه امن الكوثر بيده ))

شگه درعك و الملابس
أسس اجنون المجالس
انصار انصار





حسين الأمين

#اصحاب_الحسين_ع ٣
_______

شايب كلما يكبر يحله
ذايب گلبه و عشگه صله

صح تسعين ابعمره
بس روحه شگد خضره
________

شاف الحسين ابوحده
و قله الصحابه ردله شبابه
و السيف شاله ابيمنته
و شد العصابه ردله شبابه
شايب و من گلبه عشگ
بيت النجابه ردله شبابه

كلما صدله ابنظره احسينه
تزغر عشره من اسنينه

ايدگ حسين ابصدره
بس روحه شگد خضره
_________

من سمع گالوا بالحرب
يسهل قتاله سيفه حلاله
طب و لحيته چن گطن
و محد دناله سيفه حلاله
شيخ و يعزب بالرگب
كلمن اجاله سيفه حلاله

يحله ابزعله و عينه اتجادح
و بس لجل احسين امن ايصالح

بالحومه اتشوفه اشزغره
بس روحه شگد خضره
_____

من سمع زينب حاچته
و حس برعبها الحومه گلبها
اغتاض و كسر بيده الغمد
و طمن گلبها الحومه گلبها
گلها الزلم لمن تطب
اتبين ابحربها الحومه گلبها

هاي الحومه و هاي الصحبه
العينچ متظل بالطف رگبه

من يزعل يجدح جمره
بس روحه شگد خضره
________

ديوان فاتح صارمه
ميردله منحر استاذه حيدر
مثل النوارس ينوصف
لو شيبه يكثر استاذه حيدر
اچبير بس بالمعركه
ايشوفونه يزغر استاذه حيدر

عمره ابطول النيل و اكبر
بس من يلزم سيفه يزغر

محتار العسكر بأمره
بس روحه شگد خضره
_______

طاح و كسر ظهر السبط
و يركض گصدله يا عم يگله
و حسين يم راسه گعد
چفه يقبله يا عم يگله
عالم فقيه و مجتهد
من يدنه فضله يا عم يگله

مرقد بالطف صاير وحده
دمه الدينه ماي اتبده

العالم لابد انقدره
بس روحه شگد خضره




حسين الأمين

#ابا_الفضل_العباس_ع ١
________

من الخيم للماي يا وفاي انخيتك
ظل الگلب محتار يم النار تانيتك

يابو الوفه و العاطفه
كلشي طفه وروحي بعدها بنار
_______

انتظرتك و الگلب من عندي يلهب
حرت بين الخيم و النار تنشب
بعدك يابو فاضل ميته زينب

بظلام الليل امشي ابلايه والي
رحت للحومه ادورك هذا حالي
و عطرك بالهوه امن ابعيد اجالي

چف عالثره مگطوع من ادموع
غسلته
من شلته يا عباس عندي احساس
گايدته

و اتحيرت ما حسبت
چفك شفت عالغبره يا مغوار
_________

مشيت و لن شفت گدامي جسمك
اگعدت يم راسك و حاچيني احشمك
شاهد حالتي لو ما اهمك

هاك انظر عباتي و شوف همي
بعدك حرمله يا خويه يمي
و من باچر سبيه يصبح اسمي

عذرك سهم بالعين والچفين
مگطوعه
وعندي گلب مجروح مني الروح
مفجوعه

سوط العدو وابلا اخو
اليحمي منو مني الدمع مدرار
_______

ضعت بعدك يبو الغيره تراني
و بالأيتام حيرني زماني
حرت انته المتت لو ميته اني

سوط اعداك بمتوني ايتلوه
و بحبال اليسر چتفوني گوه
احشمك لو اودعك والله بلوه

خويه تگوم اوياي لو لعداي اتيسر
ميت اگول اعليك والطاريك اتحسر

بموادعه عالمشرعه
و امگطعه ابتوت الگلب باشفار
_________

راح ارجع رقيه تنتظرني
و كل خطوه ابغيابك شيبتني
خذت خدري و دليلي و روحي مني

مو زينب صفيت ابلا وجودك
و بدّاني السهم من بده جودك
الله اوياك يالگطعوا زنودك

امودعتك بآلام عندي اخيام
تنطرني
سوط وهزل شمات و النظرات
تلچمني

يابو الفضل بيد النذل
حرمه و طفل مسبيه و بلا دار




حسين الأمين

#ابا_الفضل_العباس_ع ٢ ( ميمر )
_____

عبست وجوه العسكر
و عباس اجاهم يضحك
______

فات الگمر و الموت خزرة عينه
لاگاهم بزلزال سيف ايمينه
حتى الهوه البطف تره امضيعينه

سد الهوه و ضاع الجيش
و الگمر بيهم يسحگ
___

عاليها للحومه انگلب سافلها
لمن دخل سوح الحرب كافلها
كل گطره برگاب الزلم وشلها

اطلابه و دخلها العباس
ياهو اعله راسه يلحگ
______

صارت الشرده من الگمر يشروها
لافته يم المشرعه خلوها
ادخيلك يسبع الگنطره خطوها

هاگ النهر و اخذ الماي
نرجوا فقط بس صفحك
______

من والده ماخذ شجاعه و غيره
الطف اظن چانت قيامه ازغيره
لو ما أمر ربنه و حسن تدبيره

چا خلصوا بسيف الحيد
ورد منتصر جيش الحگ
_____

حملة علي يوم الحرب صولاته
جيش العدو بس نستمع صرخاته
مدري شكثرها الماتت بنظراته

أية علي و سيف حسين
بالشده يصعب مدحك
____

دمهم وصل من سيفه حد الكوفه
جيش و صفه چالسبحه بين اچفوفه
مات و بعدهم منه ظلت خوفه

ميت و همه يهابوك
يرجفون و انته برمحك





حسين الأمين

#ابا_الفضل_العباس_ع ٣
_______

ردلي من النهر شفته و ظهره مايل
صفگ چفه امن اسألت وين ابو فاضل

گلبي طاح بشوفته
مال ميت ونته
و ظهره مايل
_

يمشي گوه و ايتلوه
ماكو خوه الخطوه عثره

صرت انظره يطگ صدره
بظهره كسره و شيبه كثره

بخيمتي و گلبي اشتعل شفته وحيد
راجع و من يعثر ايطگ ايد بيد
التفت لن خالي ظهره ابلا عضيد

من وصل يم خيمتي روحي هدها
و الخيمة الكافل مشه طيّح عمدها

و طاح ويه خيمته
مال ميت ونته
و ظهره مايل
________

صفگ چفه كثر نزفه
طاح وسفه و صد عليه

راح حيلي و بدر ليلي
طاح ويلي عالوطيه

بداعة امنه گتله خبرني عليه
ايگلي زينب عفته مگطوعات اديه
عالشريعه امن السهام امگطعيه

من سمعته بچف ادي الطمت عيني
صحت بعدك يالگمر ضاعت اسنيني

و دمعي خالط دمعته
مال ميت ونته
و ظهره مايل
______

بسهم عينه امصوبينه
ابلا يمينه يختي عفته

وحدي راجع بالمواجع
كلشي ضايع من فرگته

يحچي و يناشغ ابو اليمه بدمعته
خفت من اسهام صدره ما حظنته
و سهم عينه گطع دلالي بنظرته

حسين مو هوه رجع متروس لچمه
احس تطلع روحه من ينطق الكلمه

و گطع گلبي بحسرته
مال ميت ونته
و ظهره مايل
_____

من سمعته الخد ضربته
گلي عفته هناك وحده

عالشريعه چف گطيعه
يا فجيعه خالي زنده

شگد ردت وياي يرجع للخيام
بس يزينب گطعوا جسمه اللئام
آخر انفاسه بعث ليچ السلام

بحظني صعدت روحه وانه الطم جبهتي
طحت يمه و ارد اموتن من عبرتي

شيبت من طيحته
مال ميت ونته
و ظهره مايل
______

هاي هيه ابلا تچيه
للمنيه وحدي رايح

ابلا عضيدي ولا وليدي
سيفي بيدي و دمعي طايح

امودعچ گلي الخيم حان الرحيل
ساعه و اتشوفني بالحومه قتيل
و استعدي للسبي دربچ طويل

ساعه و اتشوفين خيل اترضه جسمي
ساعه و اتجيب الحوافر ليچ عظمي

و شفت موتي بطحيته
مال ميت ونته
و ظهره مايل




حسين الأمين

#ابا_الفضل_العباس_ع ٤ ( نزله )
______

يجري الماي بچفوفك
يا وفاي و يطوفك
________

ينابع من شريعه ويا فرات و يزمزم
نهر يجري بچفوفك يا عطش بالمخيم
يروّي الدنيا كلها لو حيائك تبسم
ولمن ينبض جبينك بين ادينك يطفح الدم

أصل النار من سيفك
تطلب ثار و بكيفك
_______

لون مو ضي وجنتك باهت ايصبح الضي
تره هالخوه دونك والله ما تسوه أي شي
عطش نهر الفرات و انته رويته بالمي
و من جودك يبو فاضل خلقنا كلشي حي

ابماي الجود رويته
يجري زود خليته
______

رمز حريه چفك للعساكر أطلق ارواح
اليجيك بكل قضيه للمنيه اترده مرتاح
حصدت الطف مناحر بالحرب ثاري انته فلاح
و رسمت الغاضريه بلوحه و انته رايد الواح

عينك ليش باللوحه
بسهم الجيش مجروحه
______

صلت مثل الصميده و للسبط جنت الابهر
الحصن چان العساكر و انته صرتلها حيدر
اقلعت جيش بيمينك خاطر اتساوي خيبر
مهر عرسك شريعه و للعرس انته مضطر

عهدك ذاك وافيته
وچف يمناك خليته
________

علم شالت يمنتك لو شلت هالثريه
جوادك چن سفينه و يبحر اعله الوطيه
عجب واحد نحسبك و انته جيش و سريه
الوكف شاهد حسامك يگتل بكل ضربه ميه

منك راس ظل عالي
يا عباس للتالي
_____

ينيشان الاخوه امن آدم الحد آخر انسان
يكعبه للوفه و التضحيه صرتلها قرآن
الكلافه خرسه چانت و انته بالطف سيفك السان
خطب فوگ الجماجم مو حرب چن عنده ديوان

چن طوفان بتارك
بالميدان هل ثارك





حسين الأمين

#ابا_الفضل_العباس_ع ٥ ( شور )
_________

عباس جيتك ركض يا خويه تانيني
عباس لتسدها عينك يا بعد عيني
عباس ابلايه اخو وحدي تخليني
______

من اسمعت خويه تنادي ادركني
عالغبره
گلبي گبل جدمي رگضلك مني
بالحسره
كل خطوه لجلك چم سنه شيبتني
چم عثره

گضه الشوف ظهري انكسر
شفت چف يم النهر
من ابعيد شفتك وذر

عباس أگعدت يمك و السهام بعينك
عباس افتح اعيونك مو ذبحت احسينك
عباس راسك بحضني فدوه حاچيني
_________

راسك بحضني فدوه احچي اويايه
لتردني
ما عودتني شلون ترضه بهايه
تتركني
لتلوعه گلبي و گول اي احچايه
طمني

للعيون چنت الضوه
بالانفاس انته الهوه
اذا اتروح نرحل سوه

عباس طشرت حيلي و بعد ما يلتم
عباس و منين اشمك يلي ما تنشم
عباس جامد الدم ابعينك و عاميني
_________

گوم الحگ احسينك و شاهد حالي
يا ذخري
هالگوم خويه استوحدتني و خالي
ظل ظهري
الموت يمك خويه والله اشوالي
من عمري

يعباس ما ظل أمل
بلا حيل متني انهدل
ارد بيش صوب الاهل

عباس هاك اخذ عيني و گوم ويايه
عباس شلون ارجع الزينب خلي مگفايه
عباس يحزام ظهري گوم لا تحنيني
______

وشلت عيني و ضيعت كل دربي
بآلامي
مودّعك خويه و راح ارد ابتعبي
لخيامي
اتوسلك تنهض يلبة گلبي
و ايامي

يخي بيك والله حرت
اظل لا امدوهن صرت
بالحسين شنهو اعملت

عباس حالي اختلف و الشيب ياكل بيه
عباس من ارجع ابدونك شحاچي ارقيه
عباس امتانه الرباب الرجعتك تاذيني
_________

بالله دگلي شلون اصبر اونيني
يم زينب
و اتشوف حالي و دمع تارس عيني
و امشيب
منكسر طولي و دمك امحنيني
و امترب

بالچفوف دمك جمد
و اخيتك تنشد بعد
يخويه كفالي رد

عباس شرد احچي زينب خايف اعليها
عباس لو خبرتها اتموت ادريها
عباس راح الامان الچان يحميني




حسين الأمين

#القاسم_بن_الحسن_ع ١
_______

بالاحلام بالاحلام
صارت زفتك بالاحلام

من شفتك يبني بالدم متحني
صارت زفتك بالاحلام
_____

سوح الحرب ما حسبت هالتالي
تاخذ رباي و مهجتي و دلالي
أحضرها حنتك يبني كل آمالي
تالي دمه حنتك صفه يبرالي

دمك سال دمك سال
حنه اچفوفك دمك سال

منظر ذبحني بالدم متحني
صارت زفتك بالاحلام
______

جابك إلي عمك صريع بدمك
و اتوسد اوياك الترايب عمك
يا هرش گلبي شعنده موتك يمك
السيف اليذبحك ريته ذابح امك

روحي اوياك روحي اوياك
ماتت بالطف روحي اوياك

و ميته عسني بالدم متحني
صارت زفتك بالاحلام
_______

خليتك ابحظني و گعدت احچيلك
ذاكه سهر تعب الربه اشكيلك
بس فگلي عينك يمه فدوه اغديلك
حنتك جبتها لا تموت ادخيلك

يالعريس يالعريس
فگلي اعيونك يالعريس

صمتك لوعني بالدم متحني
صارت زفتك بالاحلام
_______

ارسومك الحلوه الترب تاذيها
و دمك ييمه جمد تالي اعليها
لعميها عيني الما اشوفك بيها
و ابچي الشبابك دنيتي اگضيها

دمعه و نوح دمعه و نوح
اگضي اسنيني دمعه و نوح

و لا يهجع وني بالدم متحني
صارت زفتك بالاحلام
_________

حسبتك الشيب الكبر يوليدي
و انظر اولادك حلمي چان و عيدي
تالي ابوريدك سيف گبل اوريدي
اطفوف المنيه أخدتك من ايدي

طف الموت طف الموت
باگك مني طف الموت

بموتك دوهني بالدم متحني
صارت زفتك بالاحلام




حسين الأمين

#القاسم_بن_الحسن_ع ٢
____

حنتك و الشموع بالدم و الدموع

ابحر الشمس صار العرس
والزفه صارت مأتم
______

فرحانه بثياب العرس يا مهجتي و عاطفتي
گتلك زفافك بالحرب گتلي الحرب سالفتي
أمنية عمرچ گرّبت اشمحلاها بالطف حنتي
واهنانه إني اتيقنت وحضرت دمعي و ونتي

هاجرت الافراح و حضرت الانياح

اتحولت دمع مو بالشمع
والزفه صارت مأتم
____

مو گلبي بغيابك رجف من مشيتك كلشي اهتز
ابلياك عمري چن حرف بقلم المصايب ينچز
بعدك هواي ابلا طعم يالچنت بيك اتعكز
لو بيدي ابدل موتتك ليك العمر ما ينعز

ضيعت الاحلام و رافگت الآلام

يا غربتي يا محنتي
والزفه صارت مأتم
_____

ما عاينتلك بالحرب غطّه الدمع كل شوفي
اسمع احروفك ترتجز و تصعد دعاء احروفي
لن صوتك ادركني يعم اهنانه متت من خوفي
شايلك عمك من رجع و مددك بين اچفوفي

يا ترف الاحساس ما عندك انفاس

ضاع الصبر مات العمر
والزفه صارت مأتم
______

زفتك يجاسم بالدمع و الحنّه صارت دمك
طبع النده ليش ابعجل سافرت يا بعد امك
مو للحرب مثل الورد يوليدي كون انشمك
ياريت يمك موتتي مو دمعي اهلن يمك

يا فتشة العين ضيعت السنين

بعدك تهت مثلك متت
والزفه صارت مأتم
________

جاسم يتربات الگلب يا روحي يا كل تعبي
يالچنت لعيوني نظر تيهت بعدك دربي
يا وسط ريتي انته النفس يا نبض دگة گلبي
افراگك ابد ما حسبت و كربله غيرت حسبي

نايم عالتراب يا كل الاحباب

ردتك ذخر مو للگبر
والزفه صارت مأتم





حسين الأمين

#القاسم_بن_الحسن_ع ٣ (عگيلي)
________

من دمك حنتك يوليدي
______

يبني و يا شمعة آمالي
يا ذخري و لبة دلالي
ما حسبتك ترحل تالي

و بدمومك تتخضب ايدي
من دمك حنتك يوليدي
________

بين احلامي و صرخة عمك
بين الحنه و نزفة دمك
محتاره ظليت ابهمك

و لتگلي من بعدي هيدي
من دمك حنتك يوليدي
______

من شفتك نازل للحومه
گلبي ظل يخفگ بهمومه
ضيعني هالطف و يومه

و خلاني بحزني تعويدي
من دمك حنتك يوليدي
______

بحربك مثل الوالد حربك
سيفك باشط للي ايچهبك
يرجع منحر ياهو ايگربك

يالنابع من نبض اوريدي
من دمك حنتك يوليدي
________

طحت و صرخة عمي ادركني
شيبت حالي و هدت ركني
بعدك لتظن يهده وني

بعدك موتي يصبح عيدي
من دمك حنتك يوليدي




حسين الأمين

#القاسم_بن_الحسن_ع ٤
____

رسمتك من على الناكه
بدمع وبلهفه مشتاكه يجسام

ارسمت وجناتك الحلوه
يمن بالطف كمر ضوه يجسام
________

من على ناكتي اذكر بدمعتي
يوم كالولي عرس جاسم يرمله
بالسبي و ارسمت بسمتك و افرحت
من الكمر وجنات ابني هوايه احله

بالدمع اوصافك أرسم وشل اعيوني الدمع
بالخرايب من اذكرك اعلك بروحي شمع

جنت محتاجتك فرحه
اصد راسك على رمحه يجسام

عتب دهري فلا يسوه
يمن بالطف كمر ضوه يجسام
______

ليلي يكضي سهر وارد لحله الصور
الشبابك من كبرت و عيني تربه
بحضن عمك عشت والدك ما شفت
يل خذت منه جماله و طيب كلبه

جنت كلما شوف وجهك جني شاهدت الحسن
كلمن ايشاهد جمالك ساعه بعيونك صفن

الورد من وجنتك يختل
الكمر لو شاهدك ميهل يجسام

لون يوسف نظر يهوه
لمن بالطف كمر ضوه يجسام
_________

واعبرت بالزمن من اخذنه الظعن
جانت النيه العرس يا جاسم ايكون
عمك الكال الي رمله ادللي
انزفه بالكوفه يرمله و قري العيون

وسفه لن الدنيا دارت كبل لا يكضي الدرب
انكلبت الكوفه علينه وجونه طلابة حرب

الزمن يا يمه دولبني
نشف من الدمع جفني يجسام

الحرب مني خذت سلوه
يمن بالطف كمر ضوه يجسام
_______

حسين بالقافله من وصل كربله
و استقر بيها طلب من عندي عرسك
استبشرت عمتك و حضرت حنتك
و كل عمامك حضرت و حنتها جفك

هناك لن عاشر محرم عمك بوحده صفه
والحسن عنده وصيه وسيف حربك كلفه

عرك هاشم على جبينك
نبض وانته بصواوينك يجسام

صحت ياعم الك فدوه
يمن بالطف كمر ضوه يجسام
______

ادخلت خيمتك والبست لامتك
و رحت ميدان الحرب و بسيفك اتصول
سيل من الركب اتعزب ابلا حطب
عاد صولات الحسن تربات الفحول

والله لو ما شسع نعلك ينكطع محد دنه
الراسك و لا جان ضلت ميسره لا ميمنه

اندهت ياعمي بالحومه
ركضلك روحه مهدومه يجسام

يكوم بركضته و يهوه
يمن بالطف كمر ضوه يجسام





حسين الأمين

#علي_الاكبر_ع ١
____

علي ضوه شع و انتشر
علي روه بالطف نهر
علي هوه علي گمر
_____

مو بشر ينشاف آيه امن الجلاله
ماخذ الاوصاف من طه و كماله
و سورة الاعراف تشهدله بجماله
بالحرب سياف تربات البساله

علي كتب سورة مجد
علي عذب ماي و ورد
علي وهب بالطف نحر
_____

ريشة الرسام مو سيف ابچفوفه
و للحرب احلام بانيها ابطيوفه
هدم الاصنام و العسكر يشوفه
خندق الضرغام رجعها ابطفوفه

من كربله علي رمز
للبسمله علي حرز
صوره إله وسط النظر
______

بكل ظلام النور شعشع من جبينه
و بالجنان الحور أسمه امطرزينه
للحِسن دستور و الجوهر سنينه
ليلى اعلگي ابخور ليحسدوها عينه

علي شذر جوهر لمع
علي بدر نوره سطع
علي وتر ذهب درر
_________

ليلى من ابعيد تنظرها الوجنته
يرتجز هالحيد ما ثنى ضربته
بالحرب صنديد يذبح من خزرته
چن هلال العيد للحومه طلعته

علي طلع من الخيم
علي لمع مثل النجم
علي صنع مجد الدهر
_________

من يصد العين لحسين و يناظر
يفدي لجل الدين و وليده يفاخر
بعينه چان حسين ايوضيها المشاعر
الاكبر و بالبين فارس ما يحاذر

علي برز عين و رمش
علي ارتجز صاروا نعش
علي نجز وعده و ظفر




حسين الأمين

#علي_الاكبر_ع ٢ (( 3 دگات ))
_____

حان الوداع ابين ليلى اويه الاكبر
و الشبگه و الدمعات بالخيمه تحضر
______

تگله يضي عيناي من تمشي عني
بعدك اعيش اشلون وانته اتركتني
يبني لون اتروح موتك ذبحني

ريت أنتظر هالموت و امره تأخر
______

ما عندي بس الله و انته يغالي
كبّرتك بحسبات ذيچ الليالي
يا يمه حگ ارباي تالي صفالي

ما مش ابن بعدك لحظه تنطّر
______

هاي المنيه شلون خلتلي هظمه
والله يالاكبر صار كل عمري لچمه
بعدك يروحي اتموت چلمة ييمه

شلون احتمل فرگاك بيش انتّصبر
_________

لا يا حلاة الروح بعدك تراني
للگبر من اتروح موتك خذاني
يا ريته هذا الموت يلفيني اني

و تسلم يگلبي الروح منك يقسور
______

هذا ابوك حسين حاله انظره
شگد يكبر ابلياك يا يمه عمره
من هسه يبني اعليك يجذب الحسره

ما يحتمل لو شاف جسمك امعفر
_________

كل ام ييمه اتشوف هيبتها تزداد
لمن شباب اتصير خلفتها تنراد
بس انته عندي موش عشره امن الاولاد

ما ودعك للسيف يا يمه مگدر
______

عون الابن يالحيد من تكبر امه
مو للحرب ينراد تاليها جسمه
الشيب الكبر مريود حاسبته زلمه

وانه وحيده ابقيت بعدك تصور
_________

ذاخرتك الميعاد موتي و منيتي
بيدك اطب لحداي يبني وصيتي
تاليها دمك سال و انهدم بيتي

بيه العمه و لا شوف تعبي اموذر




حسين الأمين

#علي_الاكبر_ع ٣
________

جمالك وحي للمشاعر
تشوفك محمد نواظر

النوارس فوگك اطوف
تحيرت بيك الطفوف
تشوفك محمد نواظر
_________

حرز قل اعوذُ قريت ابطلعتك
شفت عينك و لاحظتها غربتك
علي يبني اعرفك لتخفي نظرتك
اظن ناوي تمشي يغالي الذبحتك

يعوني ييمه و عيوني
كياني تهدم يكوني

يالاسمك احله الاحروف
تحيرت بيك الطفوف
________

علي يا وجودي و يكلشي بحياتي
وضوئي عيونك ضحكتك صلاتي
هرش گلبي انته يكل امنياتي
حياتك حياتي مماتك مماتي

يسبحة صلاتي و دعائي
يحفظك الهي رجائي

و يبعدك عن الاحتوف
تحيرت بيك الطفوف
_________

گمر ضاوي نورك يشع الليالي
يغالي برحيلك رخص كلشي غالي
الحرب يمه چنها تفرهد دلالي
اموت بحسرتي و حزن يصفه حالي

الحرب يمه منها لچمتي
يروحي بغيابك غربتي

أمر يمه معروف
تحيرت بيك الطفوف
______

على الحومه طالع تزتك حسرتي
و لا ماي ارشلك ارشلك دمعتي
لمن سيفك انسل شفت بي كسرتي
انغمى اعليه يمه و تفطرت مهجتي

ييمه و افز من منامي
دمه نحرك ايهل امامي

وذر من السيوف
تحيرت بيك الطفوف
تشوفك محمد نواظر
_________

وذر والدك ردك امن الحرايب
تعب عمري تالي صفه للترايب
گضيت المناحه و گضتني المصايب
الربه هم إله حگ ييمه و يحاسب

شحلاة المنيه تجيني
بعد ما يرجعك حنيني

انعميت و بعد ماشوف
تحيرت بيك الطفوف




حسين الأمين

#علي_الاكبر_ع ٤ ( شور )
______

يا علي يبني كسرته الطهري
يا علي بعدك شسوي بعمري
______

طحت اعله جسمك و گلبي تفطر
و شيبي صبغته بدمك يالاكبر
يا روح ابيك بعدك تحير
يبني و اشاهد جسمك توذر

يا علي يوليدي لا تتركني
يا علي موتك تره يكسرني
________

بيدي المك و الحيره حيره
اموذر جمعتك يبني ابحصيره
اوليدي وگعتك كلش چبيره
گلبي كسرته و روحي كسيره

يا علي شگد صيحالك صوتي
يا علي يمك اريدن موتي
_________

خدي اعله خدك يبني وضعته
يلي تعفر من دم رگبته
يوليدي هالموت يقبلني ردته
بدالك اموتن و التسلم انته

يا علي يا اكبري و يا گلبي
يا علي بفگدك تفرهد تعبي
_______

حاير اردك الصوب امك شلون
و دمك يلالي و مطبوگه الچفون
خوفي اعله ليله اتصدلك بالعيون
تنظر ضناها ردلها مطعون

يا علي خوفي امك ابملگاها
يا علي لتموت يا رجواها
_____

للخيمه يبني لو جبته جسمك
اتگطع گلبها و تذبحها لامك
اوليدي أسألك حالي يهمك
يبني دخيلك رد فدوه لاسمك

يا علي بعدك تموت احلامي
يا علي بيش ارد صوب اخيامي




حسين الأمين

#علي_الاكبر_ع ٥
_ - _ - _____

موت يفتر بخيامي
موت ياخذ احلامي
موت يفجع أيامي علي
________

بخيامي حط طير الحزن
يحوم اعله تربات الحظن
رايدله اقدمله الابن يروح

استأذن واجه صوب الولد
گله الحرب لهل الشدد
اهنانه صفيت ابلا سند انوح

لحظه لن ينده حسين و يطلب وليده
و انه منتظره و احسن موتي بالهيده

راح و أنظر لعيونه
راح خاف ايحسدونه
راح البنفاسه غرامي علي
________

لحظات لن رد للخيم
بوجهه ملامح للألم
اعرفت بي من احتزم يموت

ظليت و ابحيرة طفل
ام و أبنها ينچتل
گدامي مر طيف النبل يفوت

لبس لامة حربه و انه أنظر و أدعي
نگلة اچدامه بعدها او وشلت دمعي

صاح يا يمه ادعيلي
صاح و انه انهد حيلي
صاح و اتخيل دامي علي
_______

من شفته طب سوح الحرب
وانه الزمت بيدي الگلب
كل دمعه بعيوني تصب تطيح

ارجع يبعد امك الي
رايده عيوني تمتلي
بنظرات وجهك يا علي تصيح

كثر شوگي انغمه اعليه وضاگت انفاسي
اصحيت لن اوليدي بيده يحضن براسي

صوت منه يناديني
صوت گلبه يواسيني
صوت ذوب آلامي علي
________

گتله ييمه امروتك
ماريد اشوفن رگبتك
تجري دمه و مخضبتك تريب

معتازتك وكت الكبر
بيدك توسدني الگبر
يوليدي ذاخرتك عمر حبيب

كلشي لا أشوفك صريع و منحرك دامي
أقسم بداعة شبابك حقق أحلامي

طيف يمه يراودني
طيف اوداعك شيبني
طيف عشت ابأوهامي علي
________

لحظه و ينادي والده
هد يا علي صوب العده
مو ابن گلبي فاگده وراه

من صلب قالع خيبره
اعله الموت لزمهم سره
احتاروا محمد حيدره عداه

من محمد شبه خلقه و يشبه إحساسه
ومن علي ضربات سيفه و حرگة انفاسه

غيظ خزرات عيونه
غيظ خاف ايغدرونه
غيظ من هد ضرغامي علي





حسين الأمين

#عبدالله_الرضيع_ع ١
________

آخر ليله و بيها اوداعچ يحله
شميني ابنحري باچر بي نبله

آخر كلمه لولي ابيمه
________

خلينه نتوادع غصن و يودع اوراگ
ضميني هذا آخر مسه باچر تره افراگ
باچر تره فوگ الرمح هالرگبه تنباگ
و الملتقى بحرگ الخيم و ادموع الاشواگ

ابنچ يمه باچر يفرق وضعه
عوفي الماي و حفظي ارسومي بدمعه

يگطر نجمه لولي ابيمه
______

گطريلي من عينچ نظر للفرگه ضميه
و المهد لو مني خله ابدرب السبي اخذيه
خافن يتعبني الرمح و النحري ياذيه
نحري يجيچ و بالمهد يا يمه لوليه

ترسي اعيونچ ليل الوحشه ايتعب
و خنگة روحچ ما يحملها المغرب

ضمي النسمه لولي ابيمه ______

بحظنچ ادفنيني حلم لو بين الاضلوع
باچر تره مني النحر بالنبله مگطوع
اتمنى من ارجع الچ غسليني بدموع
واعله المهد طاري الذبح خل يبقى ممنوع

هزي بمهدي و بعيونچ ناغيني
مذبوح و انفاسچ يمه اتسليني

انسي الهظمه لولي ابيمه
_________

لو طفحت اشواگ الگلب بين اليشمتون
و كلمة دللول الولد ماتت بالضعون
ناغيني من فوگ الرمح تضحكلچ اعيون
و كلمة الأم عالمنذبح يا يمه متهون

لو صعبه اعليچ اتشبگين اوليدچ
حظني رمحه ايّوصل حنيت ايدچ

نحري ايضمه لولي ابيمه
________

ادري الهجر ما ينحمل و ادريه ميطول
ست اشهر و منچ گلب بالفرگه مچتول
بالجنه باچر نلتقي و انفاسچ اتگول
و ترجع ييمه اعله المهد كلمة دللول

فتره اغيابي ولتضنيها امطوله
باچر بالجنه هواي احلى عبدالله

بخير و نعمه لولي ابيمه




حسين الأمين

#عبدالله_الرضيع_ع ٢
______

هوه مو هوه كل خطوه
انظر للرمح
منخطف لونه و عيونه
مو مالت ذبح
_______

كلما التفت صوب الرمح
يلچمني جرح نبلة منحره
عبدلله تره نحره ترف
مو مالت نزف ست اشهر تره

شكد حاولت اصد عنه
بس مشتاكه اشبكنه
هلبت لو نزل مره ردت من ابني شبكه
من رمحه نزف دمه
و المتبدي شيلمه
بوجهي يبتسم وانه انهظم بكليبي حركه

يافرح روحي و جروحي
ياوجه الصبح
يا تعب حظني كل ظني
مو مالت ذبح
_______

برمحه ما ثبت نحره يكع
و من دمعي نكع كل الدرب اليسر
من كثر الجرح وجهه دمه
و شفته من الضمه صارت تنفطر

راسه ما ثبت خطوه
كلسا عالارض يهوه
راسه ازغير وخشن الرمح كدما يلجمه
شدوا بالحبل راسه
و بنحره الرمح جاسه
واصل حد لهاته و النزف ما خله دمه

اسمع اهاته شهكاته
ما يكفي الشرح
ميت وشفته يا ونته
مو مالت ذبح
_______

حظني يالولد فارغ صفه
و جفنك من غفه عيشني السهر
انظر وجنتك كلها دمه
و عالخد لاطمه يولدي بقهر

ما تنزل يبعد أمك
خلي لهفتي اتضمك
مافاركته حظني من اديه الايد الحسين
هسه برمحك انظرلك
ماكو چف اليحملك
نايم عالرمح يلي جنت مهدك رمش عين

ما برد صدري يا عمري
بعدك يتضح
يخلص ابنوحي يا روحي
مو مالت ذبح
_________

امشي و الدمع مني رسم
لوعات السهم ذابح ركبتك
من خالي رجع چف والدك
عني بعّدك انطاك العمتك

ساكت رجعك يبني
اميه شربك ظني
ماكو امناشغك ثاري السهم كاطع لهاتك
عالهزّل وانه اتصور
تلجم كطعة المنحر
كون انه المتت يبني كبل ساعة مماتك

وانه عالهزّل اتخيل
نحرك ينجرح
ريته ذابحني موش ابني
مو مالت ذبح
________

بعدك ماكو ظل عن الشمس
ولا تهوه النفس وانته منجتل
ست أشهر كضه منك عمر
و انه بهالگدر عندك ارتحل

يا عيشه بعد تحله
و رايح مني عبدالله
ماتت كل دللول المهد بعدك يغالي
ادعي كون اجي يمك
يلي ما سلم جسمك
رضّوا بالرمح وانه الذبح بعدك هنالي

انهظم بيها امن احجيها
مي عنك يشح
هظمة الهظمه يا يمه
مو مالت ذبح





حسين الأمين

#عبدالله_الرضيع_ع ٣
_ - _ - _ _____

ماتت دلول المهد والجفن غافي
ما اكعدك ياعلي نوم العوافي

وليدي نايم عالرمح
يضوي لو غاب الصبح
________

جنت انتظر طول العمر
منتظرة اشوف سنينك
آ يالولد هذا المهد
فارغ يظل چا وينك

ماعندي غيرك يا ضوه عمري و تعب سنيني
يافتشة عيوني علي تتركني من تجيني

چنت منتظره الولد يوگفلي خيمه
ماچنت اظنك ياعلي تمر بيه غيمه

كون لا طاب الجرح
يضوي لو غاب الصبح
_________

بطول المسير انه احير
ست اشهر يگتلونك
بعدك رضيع اترف صريع
بالترب طايح لونك

شفت الكبر من انحفر و گطعوا نحر ضنايه
فوك الرمح راسه غفه مو طفل جنه ايه

بهيده مشيكم لا يفز من هذا نومه
الله لا ينطي الشمس غيرت رسومه

ريت وياك انذبح
يضوي لو غاب الصبح
_________

عمرك شمع عمري دمع
و النبله چانت فرگه
ما جنت اظن يبرد حظن
و اشتاگ يمه الملگه

چفي يهزن بالمهد و اتذكرك يغالي
بنومي وگعدتي يالولد ماترحل اعله بالي

يالعمرك بعمر الشمع لا تمشي عني
ذاخرتك لشيب الگبر موتك فجعني

ما يلچمك يبني الشرح
يضوي لو غاب الصبح
______

چبير الجرح خشن الرمح
يلچمني من ايجرحك
شدوا حبل بجرح النبل
خافن تكع من رمحك

نبتوا راسك بالرمح وانه انظر شبديه
شفتك تون من الألم وانه انغمى عليه

چنت تبجي بالحظن وانده يغالي
هسه تبچي عالرمح والحظن خالي

يا وكت گلبك يشح
يضوي لو غاب الصبح
_______

كلبي انمرد سمعت الولد
تجري دمعته بكيفه
بحالي شجره من منحره
ما ينكطع نزيفه

للراس واصل هالرمح وانه بدمع اناظر
من شفت عبدلله بچه بكلبي ترض حوافر

ذابلات من العطش ذيچ المعاني
عبدالله ما تگعد بعد موتك سباني

موتي بعدك يتضح
يضوي لو غاب الصبح





حسين الأمين