لسان حال مولاي عبدالله الرضيع (ع)

من شفتك وگفت اگبالي حيران
ناديتك تـجـي وتاخذنـي قربـان

لسهم المنية ارفعني
ليش العطش يكتلني
---------------
ما اريـدن هيـج اشوفـك بويه حايـر
هاك نحري وحطه ويه ذيج المنـاحـر
خاف اتحسر علـى هل النصرة بـاجـر
ليش اعيشن باقي عمري بگلب حاسر

يـم منّحـرك وسّدنـي
ليش العطش يكتلني
----------------
العطش ظب حباله يابويه اعله جيدي
فـدوه اخـذنـي السيف مايرهـم بأيـدي
چفك اشگد شال دم ظل بـس وريـدي
حلـمـي بچفوفـك امـوت وهـذا عيـدي

خلي السهم يذبحني
ليش العطش يكتلني
-----------------
بعمر ست اشهر واجتلي وياك فرصة
وبـعـد مـا اريـد اكبر وانعاك  غَـصـة
كون عگبك ما يظل هالشوف فـصـة
من وراك العيش بـس للحـزن حصـة

بعـمـري فـلا متهنـي
ليش العطش يكتلني
------------------
عمري كلـه صـار سفـرة ويـه رحـيـلـك
بوية لا مو من عطش جاي اتشكـيـلـك
ردت اسـنـد ظـهـرك الـحـانـي كفـيـلـك
طفل هد حيلي العطش ومواسي حيلك

مابيدي حيلة اعذرني
ليـش العطش يكتلنـي
------------------
بوية نيتي نصرتك ما اريد اجرحك
شفت بعيون أمي گرّب وكت ذبحك
وسولفلّي عني سبي وخيالة تضحك
راسي خله يطيح لـو راسك برمحك

راسك يشيخ ايهمني
ليش العطش يكتلني
-------------------
حسين علي التقي

عطش موت.. صار عبدالله ايتلظه
عطش موت.. والعطش هذا شيفضة
عطش موت.. چفنه ايفتحه ويغمضه .. وأمه گالت

زينب أخذي الطفل بعدي عـنـي
خاف اشوفه يموت أبني بحظني
وغـارت اعيونه وصـفّـار بـخـده
طـفـل بعـده بكلشي ما متهنـي

يمه.. تروه ظنك وآنه عكس ظنونك
يمه.. علـى گـطـرة مـاي ويذبحـونـك
----------------
يمدلول.. أمنيّـتـك بـأيـد عُـودك
يمدلول.. تشرب بدمعك اخدودك
يمدلول.. ماكو حيلة وذبل عودك.. ياوليدي

زينب أحتارت واجت لحسينه
تگـلّـه طفلك ذبل عود سنيـنـه
اطلبله شربة وهلبت ايرحمونه
شالة للحومة وتهل دم عـيـنـه

بويه.. أدري هاي الناس مايروّنك
بويه.. على گطرة ماي ويذبحونك
----------------
خذه وراح.. يطلب من الگوم شربة
خذه وارح.. بس علي محترگ گلبه
خذه وراح.. والسهـام تطلبـه رگـبـة

انذبح بيده وضمّه جوه اعبايّتّه
جابته الحيرة وسكيـنـة تلكتـه
شافته ساكت تلگله بويـه نـام
وگلها لا نامـت النبلة بـرگـبـتـه

خوية.. عمتي وامي بخيمتي يتانونك
خوية .. علـى گطـرة مـاي ويذبحونـك
----------------
يزينب.. أخذي عبدالله دهاني
يزينب.. مات بيدي وحيراني
يرينب.. وأمه بالخيمة تتاني.. وشكللها

تموت لـو شـافـت ابـنـهـا منـذبـح
بي احتارت من عطش ذاك الصبح
صبريّها يـا أم عـون اعـلـه الـولـد
وخبريها يطيح راسه امن الرمح

يمه.. اعبايتي حمرة صفت من لونك
يمه.. عـلـى گطـرة مـاي ويذبحـونـك
----------------
دللول.. طلعت بـ ليل الأعادي
دللول.. يبني در صدري تنادي
دللول.. يـمـه يالمـآخـذ أفادي.. يمه وينك

شلون ذيـچ الساعة ما روّيتك
چف حليبي يبني گوه نطيتك
گلـت أبني زغير شعلي بالحرب
لو أدري بحظني متت خليتك

يمه.. بليل أظلم وين اشوف عيونك
يمه.. علـى گـطـرة مـاي ويذبحـونـك
------------------
حسين علي التقي

وصية مولاتي فاطمة الزهراء(ع)
الى مولاتي زينب الكبرى (ع)

شمِّيهِ في نحره ، قبِّليهِ في صدره .
بنتاه يازينب .. بنتاه يازينب
-----------------
يمه زينب.. گلبي ينحب.. سمعي يبنيتي
أخذي مني.. هل الوصية .. لو تغربتي

يبنتي الـوصيـة هاي احفـظـيها
وترچية بأذانـج يـمـه علگـيـهـا
هناك بكربلا لو طاحو اخـوانـج
من يبقى الحسين لوحده نفذيها

شمي نحره آخ يانحره
ينطبر يمه ثنعش طبره
وبعد نحره قبلي صدره.. الحافر يكسره

شيلي همه باجر بهمه
گباله جيش وتعطش اخيمه
كل انصاره تموت يايمه.. وينحني هضمه
بنتاه يازينب.. بنتاه يازينب
--------------------
صدره هذا .. الچان يقبله .. سيد الكونين
يمه باجر .. بالحوافر .. ينطحن مرتين

باجر غصة يوگف وحده وينادي
راعـو قربتـي من النبي للهـادي
انسوبنـي انا مَن ما تعرفـونـي ؟
وصدى صوته يرد ياوسفه بالوادي

يعرفونه وهاي المصيبة
وبالسهام الوادم تجيبه
بدمه تالي ينصبغ شيبه.. هاي المصيبة

عالترب محد حفظ گدره
آخ وشموس الفلة تصهره
يصيح ويلاه يمه يازهرة.. الخيم مستعرة
بنتاه يازينب .. بنتاه يازينب
----------------------
بدون اخوته .. يبقى حاير .. وحدچ بصفه
بلا عَمامة .. والـعـمـامـة .. بالترب تصفه

ويازينب تقدميلـه المهر انـتـي
اسندي بالصبر ويطيح لو طحتي
يزينب لـو بـقـى يتلفت لـوحـده
بهاي الحيرة حسبي بكربلا ضعتي

وحـدچ بحاله تعينينه
حاولي بسرعة تودعينه
ولو بقى أكثر تعطيشنه .. وتطلع سكينة

لاتأخرينه على المصرع
حيرة وبنياته لو تطلع
ينكسر برقية من تدمع .. وحـالـه يتفجّع
بنتاه يازينب.. بنتاه يازينب
------------------------
كلشي بالطف .. تالي حيرة .. لو رجع مهره
يمه عالتل .. تشوفينه .. ايطيح عالغبرة

بهل الحاله يزينب مـن تنظريـلـه
ييمه مـن عـذابـه يخلص ادعيله
اذا شفته الشمر صاعد على صدره
رگضـي اعلـه بناتـه ولا ترگضيلـه

بالظليمة من يرد مهره
صعبة يمه طلعتچ بره
وبره خيل وناس منتظره.. تدور العثرة

والمنادي ينادي طلعوهن
كل خيام حسين حرگوهن
وكل بنات الزهرة سلبوهن ..بهيمة رگضوهن
بنتاه يازينب بنتاه يازينب
----------------------
حسين علي التقي

وخرجت مولاتي العقيلة (ع) في ذالك الظلام

يا آخر هلـي وروحـي
اجيتك حيرة بجدامي
تره الهيمه خذت حيلي
وجبتلك دمعي ياضامي

وين.. أشوفك والجثث بالحومة مگلوبة
گـوم .. دليني تره أختك حيل متعوبة
حيل.. ماظل بيه والبر أمشي ياصوبة

تگوم وتطيح
بليل أختك گصّدتك وتگوم وتطيح
بين المذابيح
تالي بـجمالك تهـيـت بين المذابيـح
خلف الله عالريح
ودّالي من نحرك عطر خلف الله عالريح

آه ..يبن أمي ياحسين
------------------
خويه شصاير بحالك
ضايع بالحجر رسمك
ذبـحـك مـا يكفيهـم
رجعو سلّبو هـدمـك

ليش.. چاا فوگ الذبح تالي يسلبونك
كون.. على هاي الشمس لازم يغطونك
بخيل.. وره ظيم الطعن رجعو يدوسونك

اكرامه دفنه
ندري كل واحد يموت اكرامه دفنه
والخيل اجنّه
بس اخوي من انذبح والخيل أجنّـه
مابقه منه
كلشي مسلـوب و رسم مابقه منه
-------------------
الولا فد لحظة فارگته
أجيته وتالي معرفته
ما گتله شردت مـنـي
لأن متفطـره شـفـتـه

طاح.. ادري من العطش تعبان ضي عيني
ماي.. زينب گـلـي مـا عـنـدج ترويني
آآخ .. گلته وانه هم عطشانه يحسيني

الماي جاري
ابن امي من عنده انحرم والماي جاري
اسود نهاري
طلب گطرة من العذب واسود نهاري
عطشان عاري
ما شفت قبله منذبح عطشان عاري
-----------------
عفت بالخيمة ايتامك
بضمه ياخويه تتلـوة
گلت لازم أجي لحالك
واجازيك بجزه الخوة

شلون.. حرت يا بوعلي بمخيك حيرة
ليل .. چاا هذا الظعن غيرك منو يجيرة
جيت.. اكلك خوية باجر رايحة ايسيرة

جارحني وضعك
ياخويه من نوم الترب جارحني وضعك
وشلون اسمعك
ملچوم تتگلوب تون وشلون اسمعك
جاية أودعك
باجر نروح اعله الهزل جاية اودعك
----------------
تره صبح السبي گرّب
وما أگدر أظل يمك
رقية تنتظرني ارجع
وانته حيرة شيلمك

راح.. ارجع للخيم بس خويه مجبورة
خوف.. وانه اعله الحرم هالليلة ناطورة
وصار.. أمري بـيـد غيرك وأطلع بشورة

بيد الأجانب
شوري تره بوجه الصبح بيد الأجانب
صرنـة غرايب
خوية عگب فيّك بعد صرنة غـرايـب
سوگ وخرايب
وبالشام ايتانيني تره سوگ وخرايب
-----------------
حسين علي التقي

ظعن الفواطم فارگ دلاله
وطول العقيلة بين خيالـه
عافت اخوها بيا حالة حاله .. مصيبة
ظعن اليگفلة بدر العشرة
ديرة تبشر بيه اعله ديرة
وسفه العلاوي صارت أسيرة .. غريبة

قبل چـان امانه الگمر يفّرشه
وعطش ظعنه من النهر عَطّشه
اختلف حته مشيه بغرب من مشه.. ويوادم حشه
بشر مو بشر

انگلب عگب ابو فاضل اسم الظعن
اجه فاطمي ومسبـي فـره الـزمـن
فـواطـم عـلـي انچتفن و بالعـلـن .. بنظر ينعـمـن
وسهام النظر

طلعن طلعه بـذاك الظهر
بوجه الهيمة شبعن هطر
مچويـات بحيرة وجمر.. ويلاه ويلاه
بـ لليلة تغيّر اسم الظعـن
مسبي صار بساعة زمـن
بنوگ الهَزلة يتـصـعـدن.. ويلاه ويلاه
-------------------
ياطف هضمها ويوم المصيبة
اشسـوه بگلبها وطلع نحيـبـة
مـا ظلـت الها خيمـة عجيبـة .. العقيلة
خيل وعطش وبخوف العقائل
اوجـوه اليتامـة مثل السنابل
بس هيه ظلت عگب ابوفاضل.. كفيلة

كفيـلـة بعليل ويتـامـى وحـرم
العصر طيّح اعليها سگف الخيم
وكلها تون من عطش لـو ألـم.. ومحد سلم
من العايّلة

اجـه الليل وضيّع عليها الـزغـار
وتـعّـب جدمها الركض بالـنهار
ولا بيها حيل انـچـوت بالـفرار .. بقت بيها نار
ومشت مايّـلة

ااه يا ليل الـحـادي عشـر
شبّع زينب ظـيـم وقـهـر
مضيعة ايتام بوادي الكِدر.. ويلاه ويلاه
الما شافته بلليل اهدعش
بحافر يعني گلبه انفـرش
والباقي ينوح امن العطش.. ويلاه ويلاه
-------------------
اتغرب ظعنها بلليلة وضحاها
لا هـودج ولا بـيـرغ عّـلاهـا
الجايبها اخوها شامي حداها .. أسيرة
وين الكفلها بـدر الـهـواشـم
طـاح وخدرها صبّح غنايم
بالهيمة طلعت كل الفواطم .. حَسيرة

على الهزلة شافن اخو منصرع
يويلي الظعن غـرّب بيـا وضـع
وطلع وسفه صوت الي مامنسع.. بگلب منشلع
هضيمة وقهر

هضيمة العقيلة بلا فَـي مشت
ولا رآيـة فـوگـاهـا مـن انسبت
او چلـمـة سبية عليها انحجـت.. لمن ودّعت
اخو اعله النهر

ومـن راحـت بيديها الحبل
مـا شالتـهـن فـوگ الـهـزل
شلون اوداع ايشيب الطفل.. ويلا ويلاه
ممشه الحادي ماتدري وين
اوداع الخوة وذيچ السنين
فوگ الناگة وصاحت حسين.. ويلاه ويلاه
---------------------
مـن ودعتهم حسرة جبيرة
وحادي ظعنها ماعنده غيرة
والناگة عرجه والحيرة حيرة.. بمشيها
صوب النجف گالو واهيه گالت
الـدنيـا يحيدر ويايه مالـت
يم بيت ابوها وحيطانه ناحت .. عليها

وجرحو صبرها الظعن من عبر
على بيت ابوها وگلبها انكسـر
مر ملگة كوفتها والحـال أمَـر .. وشبعت قهر
بموقف صعب

بنسوة ظعنها العشاير خـذت
ولطمت وجها الغريبة وبچـت
وبنات الرسالة لوحدها بقـت.. بخرايب صفت
تبات برعب

كلها اداعـي بنسوتهـا ليـش
بس ام عون يگودوها جيش
مسكن ماعدها وبـي تعيش.. ويلاه ويلاه
غير الخرابة ما ظل مكان
تـگـعـد بي زينب يا زمـان
بهاي الكوفة بيت الها چان.. ويلاه ويلاه
---------------------
حسين علي التقي

باجر آ يحسين افگد خوتـك
اصفن بعيني يخويه بداعتك
ليلة اوداع وعظيمة فرگتـك
وراح تخلص عشرتك ويايه

آ يحسين ياخويه
----------------
باجر افگد ريحة الزهرة وعلي
وبعـد ما اسمع حجاية ادللـي
تدري وي طلعتك زينب تنولي
من الخيم طلعتي كلفه هوايه
----------------
شنفعه عگبك بعد يحسين الهوه
وبعد عينك يعثر بطولي الضوه
بـاجـر اتفرقنـه خـويـه نيـنـوى
والله يستر من ايامي الجايه
----------------
يل مودع كل عزيزاتك لـچـن
اوداعي كلش يختلف عالودعن
تدري ما فارگتك بطول الزمن
وادري فرگة موت باجر هايه
-----------------
لا تسولفلي اعلـه باجر نفترگ
الليلة قبل خيامي گلبي محترگ
كون ايطول الليل عن صبح الطبگ
فراگك ايخلي الگلب دماية
------------------
كلشي هيّن بس وداعك معضلة
شجاب زينب ويه حيرة كربلا
أنه بجالك جبت عمري مـدللـه
وباجر ايصبّح دلالي حجاية
-------------------
هسه يمي وحسرة باجر شوفتك
خيول أمية تغطي عني جثتك
طرف عينك من تديره لخيمتك
تشوف نـار وتنهب الگصاية
--------------------
خويه باجر شوفتك فوگ الترب
راح تشلع گلبي يا لب الگلب
راح عنك ارتحل خويه غصب
و تنزف اجروحك عالمسناية
--------------------
لأن باجر راح اودعك عالهزل
وچفي منك مستحه يظمه الحبل
شلون اجيلك بعد وجروحك أشل
وتدري ظعني ماخذينه سبايه

اللهم عَجّل لوليك الفرج

على السجاد حگنه لو نون و انوح
لمثل مصابه ياكون الچفن مقروح
ياهو المثله وي عماته مسبي يروح
مـن أهلـه دفنله ثمنطعش مذبوح

على السجاد أويلاه.. على السجاد أويلاه
----------
خلي نعيش حزنه العاشه ذاك اليوم
يوم الظل غريب حسين بين الگـوم
سمع واعيته بس ماعنده حيل ايگوم
و ردته لخيامه عمته بـس مهـظـوم
-----------
حگه هم عليل وما يظل بـي حـيـل
وسمع اضلاع ابوه مكسورة چوه الخيل
ويا حال السده بحاله الظهر والليـل
من غارت على خيامه الزلم وصهيل
-----------
فرّن عمه صاح بنبرة بيهـا مصاب
طلـعـن للبـراري لا يـجـي الـسـلاب
حاميچن يعمّه ومن خيمچن غـاب
گصادة الناس جاية تحرگ الأطناب
-----------
يعمه لرگضتچ بالهيمة شد حزام
هاي الناس ماعدها صلة بـ أسلام
ماتعـرف حـرم لا تعتـرف بـ أيتام
ذاكة راس ابوي اعله الرمح ينضام
------------
غـيـر الهيمة مالـچ عـمـه طـريهـا
و عينـچ يـم بنات احسين خليها
و رقيـة بالرگض بأيديـج لزميهـا
اذا عفتـيـهـا ما تبقـى تـراچيـهـا
-------------
وبغـضـاً بعلي هل الناس اينهبونـه
وعلى نـوگ الهزل باجـر يركبـونـه
يعمه وبالحبل تدريـن ايچتفـونـه
أسُارى لمجلس ابن زياد ايودونـه
--------------
سولف لأبو حمزة مصايب الأخبار
يگـلـه يـوم عـاشـر طلّعلنـه أسـرار
شما اصد اعله عماتي الدمع مدرار
و اتذكر رگضهـن بيـن خـيـل ونـار
--------------
ابچيله بچي المفجـوع بـ أولاده
لليصبن عيونـه شما كـلـه بـزادة
يبو حمزة القتل لآل النبي عـادة
لچـن سـامـع مرة مسبية للسـادة
---------------
يبو حمزة اسمعت علوية بين أزلام
يچتفوها بحبل واعله الهزل تنضـام
اليچبي دم على مصايبنه ما ينلام
كلهـا كلفـة بـس الشام آه يـالشـام

اللهم عَجّل لوليك الفرج

لمولاتي رقية (ع)

بـليلة من ليل الخرابة طفلة فزت من ألمها
ترتچف بفراگ ابوها وحيل مرعوبة بحلمها
ندهت الطفلة يعمه ..
وين ابوي اخذيني يمه..
توه لآگيته بمنامي وعيني ما فتحت عسنها

ضمني وبچينه وگتله.. فراگك يبويه شخله
ونيت واعله ونيني .. بچيت حـتـه الهزلـه

يابويه من ذيج الحرب
عيني بوداعك دم تصب
تعبانه مـو مـن الـدرب.. من شوگي الك
يل كاسر بعمري غصن
گلبي بخرابة منسجن
خليني يمك أطمئن  ..  و اتوسلك

بابا حسين.. بابا حسين
------------------
توه لآگيته وحظنّي بمملكة حظنه احتواني
شگد سوالف ضامتله شفته وتلعثم لساني
شگد هموم محظرتله..
وغير اريـدك ما گلتله..
شگد كرهت الموت بويه لأن يمك ما خذاني

الفارگني عنك غثني .. يابعد حيلي وحزني
ماريد ارد للدنـيـا .. بويه بحنانك ضمني

جرحي الك ينزف وفه
وجرح الگلب شينشفه
حزني بغيابك ماطفه .. طول الدرب

فراگك امغيرلي رسـم
ردتك تجي مو بالحلم
يل فرگتك دون الزلم .. تجرح گلب
------------------
گتله بويه ضعت بعدك وانچفه بهيمة دلالي
الدنيا ما تنجرع صارت دون حنيتك يغالـي
من رحت يابويه عني..
حته اسمي ضاع مني..
ضاع كلشي من ايدي تدري والبگت بيها حبالي

يل جنت ابوي وامي .. لمن رحت من يمي
صاحولي يل مسبية .. وعگبك تغير أسمي

تـدري العزيزة رقيتـك
غيـرو اسمها بروحتـك
ويآذوها لو بس صاحتك .. يابو علي

يالعيشتني ايامي حب
جرحولي گلبي بالدرب
من اسأل اعليك أنضرب .. حيل انولي
-------------------
تلث سنين احنان ليش بـيوم ضيعهن دلالك ؟
من الخيم للشام أدورك والرمح ضيّع  خيالك
من الحلم فزيت أريدك ..
واشتياقي الزمت أيدك ..
البلحلم مو انته شفتك وانه اعرفنّه جمالـك !!

فزيت أون مرعوبة .. و أبچي بچي منهوبة
ورجعلي راسك يمي .. مبچه اليتم بي حوبة

وصاحتلي عمتي يابنت
التردينه راسه بالطشت
من نحرك حچايه سمعت .. يا فاطمة

وحظنت راسك بالدمع
وعمري طفه طفيت شمع
والشمعة تطفه من وضع.. نزف الدمه
--------------------
حسين علي التقي

ضايع بدنية متاهات و نخـيـتـك
و أفتحتلي باب رحمة حُسينيتك

أجيتك ضايع وندمان
لگيتك للعشگ نيشان
نبع تروي لچن عطشان.. حبيبي ياحسين
-----------------
روحي سلعة بلايا قيمة و املكتها
مثل نبتة بصحرة غيمة وظللتـهـا
عيني جانت حجر ضايع بس صغتها
وحـسـرة لأيامـي البدونـك بللتهـا

علگتني بعشگ مذبوح وهويته
ودمع حسرة وحيرة لمصابك بچيته

دمع للرحمة فك بيبان
لگيتك للعشگ نيشان
نبع تروي لچن عطشان.. حبيبي ياحسين
------------------
هبة من رحمة حنانك هيج أجتني
مدري رضعة أمـي حبـك علمتـنـي ؟
مدري نية من الطفولة وگايدتـنـي ؟
من بديت وجان زنجيلي اعله متني

سبب حبك ماعرفته بس احبه
مثل سهل الممتنع لمن اكتبه

يالمحيّر الأنس والجان
لگيتك للعشگ نيشان
نبع تروي لچن عطشان.. حبيبي ياحسين
------------------
لكلشي نية لچن حبك سبق نيتي
ياوطن جارحني بس بيّن هويتي
وگمت أحسك انته بيتي وأهل بيتي
الخدمة ذلة وخدمتك علتلي صيتي

مدري أبچي مصيبتك مدري رحمتك
نيتي أحييها وحيت گلبي خدمتك

يخالق بالحجر وجدان
لگيتك للعشگ نيشان
نبع تروي لچن عطشان.. حبيبي ياحسين
------------------
ياشعور الخدمة من زغري عشگته
عاش بيه من البداية و كبر سكته
منازع انه وياه سنين وما وصفته
الما اتوصف بالـزغـر تـالـي كتبته

ردت اكتب حزنك وقلمي كسرته
ياحزن اليوصف الباذل مهجته

حزن منه بدت الأحران
لگيتك للعشگ نيشان
نبع تروي لچن عطشان.. حبيبي ياحسين
-------------------
ليش ايدلل جرحك وعشناه مأتم؟
وليش حزنك يجّذب وعالناس غيّم؟
شلون الاعمة يتبع آثارك على الشم
گلبي يسأل كلشي عاشه وياك مبهم

جاذبيتك حيرتني من البداية
وعرفت دربك بعد ماله نهاية

درب حبك يسوي أنسان
لگيتك للعشگ نيشان
نبع تروي لچن عطشان.. حبيبي ياحسين
-------------------
لمن باعتني الخلگ گلبك شرانـي
وعلگتني بحب مصيبة و احتواني
وصرت ادور حزنك وماريد ثانـي
يمن أسمك احلى اسم گاله لساني

غارگ بدنيا وايديك استعطفتني
من وحَل وادم رخصية طلعتني

شراعك دله چم غرگان
لگيتك للعشگ نيشان
نبع تروي لچن عطشان.. حبيبي ياحسين
---------------------
حسين علي التقي

يا اباعبدالله ..

مدلي أيدك ..
غطي عيني بفي رحمتك بالدموع
خلني ويه ذكر اسمك اتجرح وألوع
روحي شمعة وتبقى ميته
اذا ما تگعد بموگها الشموع
دمعي خيكبرلي حبك
فارغة الدمعة بلا حب
ما تدلي اعله الخشوع
سوي مني انسان بالدمعة يفيدك
مدلي أيدك ..

سوي مني انسان جمرة
وگلبي كسره
ولو برد لحظة بلهيب الخمية شعلة
ولشگة الطف حيل جرّة
ولو مشة لوادم رخيصة برمح عثرة
گلبي لايلتهي براحة
وانته نايم على الغبرة
اكسرني حد ما ترضه بيه
ولعبوديتك أنه امسلّم أدية
خلي گلبي فوگ جمرة قبل لاتسحگ رقية
خلني أفهم كسرة أگفاك لعضيدك
مدلي أيدك

مطّر عيوني برحمتك
خل يغيّم حزني، جرحك
خلني اتخيل وداعك ويه زينب
ومنو البيكم طاح ينحب؟
ويا جبل ظل بصبرها
وشافتك للخيل ملعب
وشسلبت بعافيتها
من لگت جسمك امسلب
خلني اضيعن حيرة لأجلك
رخّص ادموعي لمصابك
عيني غيمة بلا مطر رادت رعيدك
مدلي أيدك..

بسم الله الرحمن الرحيم
* يَا أَيُّهَا الَّذِينَ آمَنُوا إِنْ تَنْصُرُوا اللَّهَ يَنْصُرْكُمْ وَيُثَبِّتْ أَقْدَامَكُمْ * صدق الله العلي العظيم

–نُصرةً لِأُمِّ أئِمَّةِ الهُدى وَحَلِيلَةِ صاحِبِ اللِّواءِ وَالكَرِيمَةِ عِندَ المَلاءِ الأعلى التي على معرفتها دارت القرون الأولى وبولايتها كمال التصديق والايمان بمحمد و علي صلوات الله عليهما وعلى آلهما اجمعين
–وإحياءً لِليالي شهادتها المَروعة ومقتلها الفجيع ستقام حملة لنشر راية الحزن على الزهراء صلوات الله عليها
إظهاراً لإمرِها ومُصابها وظُلامتها ،

وَلْتَكُنْ سُنّةً شعائرية لرفع راية السيدة الزهراء صلوات الله عليها سنوياً على البيوت وفي الشوارع كما الحال في محرم الحرام ولله عاقبة الأمور ومنه التوفيق وعليه الإتكال .

اللهم عجل فرج ولدها وكن الطالب لها ممن ظلمها

#الراية_الفاطمية

لك العزاء ياصاحب الزمان

هاي الليالي مصيبة أمك
ثار الضلع صوته يندهك .. يبن الحسن
دم محسن بعتبه تبده
بنار وترب ياويلي خده .. يبن الحسن

أصل العذاب الشفتة بالغيبة .. هـاي المصيبة
بصوت الألم نادتك البضعة
منها اسمعت أدركني يامهدي .. والمدمع ينّدي
من الفاجعة منتظرة كل جمعة

من ساعة الهجمو عليها تعيش بألم الأنتظار
يامدرك الـثـار وتـنـادي يـامهـدي يبني البدار
ومن حمرت الباب ودخانه بعينك بده الأحمرار

يا مُنقِذَ العوالم .. إثأر لضلعِ فاطم
-----------------------------
امصاب البدت منه دموعك
من اغيّابك يتاني رجعوعك.. يبن الحسن
ونت يتامى الزهرة بأذنك
ونتهم المن عدها حـزنـك .. يبن الحسن

دموع الحسين لفاطمة الزهرة.. ومدمع الحرة
خلّف دموع الحمرة بعيونك
امصاب الي ضچلته السمه السبعة.. حق اله تنعه
ومنه تشّيب سيدي چفونك

صورة بجي ايتام الزچية بذهنك توّرث حزن
چتفو علي وقبضة فقاره بصابيعك اتظل سجن
ولليوم تلچمها جـروحـك يـاويـلـي چـلـمـة وإن
-----------------------------
مخفي قبرها أكبر ظلامة
هـاي لـحـزن ثآرك علامة .. يبن الحسن
بظلمة شعجب ليش ادفنوها
ومثل الخلگ ما شيعوها .. يبن الحسن

ما رآعو لبنت النبي حرمة .. وخاتم الأمة
چاا ليش ذيج الأمة ظلموها
حجاب أم حسن كللهم حجابي ..وبابها بابي
دفعو عليها وتالي حرگـوهـا

وثالث سبط سالت مهچته بفعلة نذل ياحرام
بچف الغدر بأبشع جريمة وهالدم يريد أنتقام
ولو ما دماه بالعتبة سالت عبدالله عاش بسلام
------------------------------
يمته تـنـادي يا شهيدة
وثآر الضلع بيدك تعيدة .. يبن الحسن
عالكعبة من ظهرك تسنده
تبيّن منو اعليها تعدّه .. يبن الحسن

وكلمن ظلمها تشيله من گبرة.. تصلبة بالشجرة
وللناس ايبين سيدي شصاير
الخله متون ام الحسن زرگه.. تطلّعه وتحرگه
تبرّد گلبها البل حزن فـايـر

لهسه گلب أمك يمهدي عايش بألم و أنكسار
مضيعة وتدور بالمآتـم ملچومة مدمعها حار
ياربـي بالمهدي أنتقملـي ندبـتـهـا ليل ونـهـار
------------------------------
حسين علي التقي

أستنهاض مولاتي الزهراء (ص)
غوثااهُ يابنَ الحسن

أدركني يمهدي صحتك بصوت
يابو الثار بيدك باقي عهدي

يفزّعك صوتي يبني من وره الباب
ويكسرك لو على سمعك يعدي

الله لهاي رادك يبني طلاب
او وي ساعة ظهورك ثاري يبدي

ندهتك ردت اشُوفك حالي ياحال
لمن رفسو علي بابي يمهدي

هوة اعليه الجذع والحيرة أشكال
اصد عن ظلعي ثگله يطيح ولدي

ندهتك ردت اكلك محسن انصاب
بساعة ماتهنة وحلمه وردي

شايفلك طفل مولود بالنار ؟
لا نام بحظن لا عاش بعدي

ندهتك و أسمع شكاسر البسمار
ذاك العاب صدري وظل يندي

دمه اعله الباب والعتبة نزل حار
وشاغة روحي ما گتلها بردي

الأشد چلمة وإن گدامي تنگال
والگايلها وسفه يدوس حدي

بين الباب والحايط وانه خيال
ومن ضيمي صحت يافضة سندي

بدخان وشفتها تركض ام عون
وبالي ويـن ظل يـاخذ ويودي

نار گبالي و أولادي يرگضون
لاذو بيه بس حيلي أعله گدي

بس من شفت حيدر منچتف راح
گمت محنية گامة وسوط ضدي

ورمتني السياط وفدوه ما دام
يرد سالم علي ويفداه زندي

ومن ردلي علي وآنه على الگاع
درت وجهي عكس ليشوف خدي

يامهدي الجرة اعلية ولا صار
أبد بحرمة قبلي ولاهي بعدي

آنه بت رسول الله أنضرب ليش
من أمة رسول الله الهضيمة

بعمر ثمنطعش واتواره بتراب
وبظلمة يدفنوني المصيبة

مقهورة اندفن ومخلية أيتام
وگبري ينخفي هاي العجيبة

غريبة يابو صالح مالي زوار
وباجر بنتي هم تصبح غريبة

اللهم عَجّل بثأر الزهراء بالفرج للمنتقم

يـگلـبـي لا تحيّر بنـاس حيرانـه
ذبها وي الحسين الدنيا خلصانه

جذبة الدنيا بس بيها الصدگ حبه
تضيعك لو مشيت بدرب مو دربه
عزائاتـه الوطن بره العـزه غـربـة
الغربة لو هجرت حسين ومچانه

تذبك عالسراب الناس بس هـوّة
نبع دربه يترسـك غيرة ومـروة
كلشي بدونه ثق لا حول ولاقوة
طريق الله طريقه وهذا عنوانه

وهم كلشي يگلبي بدون ابواليمه
والدمعة بعزائه نعمـة مـن نعمـة
تره الماباچي لمصابه يظل اعمه
عيون الما بچتله تبقى عميانه

اليچلب بالحسين بعمره مايخسر
المشه بدربه عدل يتخلد ويكبر
عاين عالخدم بأخلاص هالمنبـر
بعد موته تخلّد و ارتفـع شـانـه

لا تنغر تـره شما طـالـت اتگصّر
أهي شمرت نفس والكيّس ايعبّر
الدنيا شما تچلب بيها تجرع مر
وأذا ويه ابو اليمة تصير حليانه

يهنياله الفنه عمره وقـف طَفّـه
وظل ويه الحسين وماترك صفّه
شمس حزنه تظل للدوم ماضوّانه
وگـمـر بغروها عـبـاس ضـوّانه

شگد دورنه مثل حسين ماشفنه
وياهو الغير گلبه بكلشي قابلنه
يطشرنه الزمن وخيامه تجمعنه
يملنه بخيمته وبالهيمة نسوانه

ياهو المثله لمنه وجسمه متطشّر
ويدعي لشيعته بس صدره متكسر
فاتح باب گلبه القبل مثل الـحـر!
بوجه أمثالي هم مفتوحه بيبانه

ياگلبي خليلك جرح وابچي اعله يومه
للظل ثلاثة اعله الثرى إمسلب هدومه
بـالـك تـطـولـك أمـل بالـدنــيـا هـايـه
خليـك صاحي و لاتـجـرك ناس نومـة

أبچيله و أنويها دموعك أنتظـار
وضيعة ظعن غيرة وطلعته بالنهار
فر لخيامه الصار من عدها الفرار

لوذ بخيمته وأبچي اعله حاله
وحددلك جـرح صـيـر ابدالـه
عيش مصيبته وطلعت عياله

حسين آه .. حسين آه
------------------
ياگلبي فرزن بالحچي المـو يـمـه عـوفـه
مثل الفراشة اعله الضوه هيچ ابقى طوفه
كـيّـس فـطـن صير بدمعتك ويـه الحسيـن
و اعـظـم خسارة تنسلب دمـعـك أشـوفـه

من كلشي اطلع للعزاء لمن تطب
حـاذر يگلبـي وبالبچـي لا تنغلـب
سلبان دمعك يعني ضيعت الدرب

سواجي العين مامنها سواجي
بمعبر دنيتك فـوز البواچي
للطفلة الخذو منها التراچي
--------------------
ياگلبـي أفـطـن للعزاء و أفهـم قضية
شگد ناس خلدها الحسين بصدق نية
واليبتعد عن مـركـبـه بروج الوهم راح
ومـا يبقى بـس المنجـرح للغاضـريــة

ثابت قدم ظل بقرارك مبتصـر
تعرف رضا الزهرة عيونك من تدر
القابض دمعته بمعرفة قابض جمر

خلودك ويه دمعتك وانته قرر
تسحگ عالجمر لو عنه تشمر
درب كله وعر بس لازم اتصر
---------------------
ياگلبـي خلـي بمهجتك جـرح السبـايـا
وحاچي ضميرك يانسه الـفـرن ضمايـا ؟
مـو أي نساء الطلعت بذيـچ الصحـاري
ذنـي ربيبـات الشـرف و اهـل العبـايـة

هذا الجرح خله بضميرك مشتعل
الحرمة الچبيرة ابد مو مالت هزل
وتالي بنات الزهرة نزلن يا نِزل

شماته وليل أسود من عبيهن
والاكلف بعد من لوعة سبيهن
بنات الزهرة محد داعة بيهن