منو الفي الدِنيا ما فاكر
شوارع الثورة جيّابه
وشنو البِيَتِش شمش باكر
تظاهر ناسها و إضرابها
مجرد فرضِ يا قاصر
و إرادة الشعبِ غلاّبة
إذا سديت دروب الأرض
وإنطامَن علي أبوابه؛
فكيف تضمن سما السودان
سماه الماها كضابه ..؟!

#مليونية31أغسطس
#لاتفاوض_لاشراكة_لاشرعية
#تسقط_بس

ها مرةً أخرى
سنخرج للشوارع
شاهرين هتافنا
ولسوف تلقانا
الشوارع بالبسالات
المضادة للعساكر
والمساخر والخنوع

خالص تحايا المجد والخلود لشهداء الحركة الطلابية ، خالص المجد لشهداء الثورة السودانية
سنخرج نحن طلاب جامعة النيلين مرة أخرى من اجل اقتلاع حقوقنا كطلاب في المقام الاول ثم ك ثوار مرة اخرى وقد ذكرنا سلفاً أن إنتهاكات المليشيات العسكرية لن تمر مرور الكرام و ها نحن نطالب بتسليم ومحاسبة الجاني الذي ارتكب جريمة دهس طالباتي جامعة النيلين .
كما نقف مع جماهير شعبنا وقوي الثورة الحية المتمثلة في لجان المقاومة والنقابات والكيانات الثورية من اجل اقتلاع حقوق الشعب السوداني المتمثلة في دماء الشهداء والحياة الكريمة للطالب و المواطن السوداني التي تتمثل في مجانية التعليم والصحة .
كما لا يخفي علينا
الواقع الطلابي و الرسوم والغرامات التي تُفرض علي الطلاب من غير منهجيه واضحه و تحويل الجامعة إلي مؤسسة ربحية ؛ حيث ان الادارة تستغل غياب الاجسام الثورية والطلابية والروابط والاتحاد فأصبحت تتعامل مع الطلاب كصراف آلي .

ندعو كافة الطلاب الى المشاركة في مواكب جامعة النيلين يوم الثلاثاء الساعة الواحدة بتوقيت الثورة من اجل اقتلاع حقوق الطلاب

*دمتم ودام نضالكم*
#عاشت_الحركة_الطلابية
#الدم_قصاد_الدم
#مليونية31أغسطس

إيدين بنيات الفريق
قادرات على
صد الحِدَيْ
جاسرات على
صقر النكد.
إيدين بنيات الفريق
بتهدهد الطفل الرضيع
بتعدي شيخ
دومة الحفير
تشلخ لبق..
تسقي الخدير
بتعوس
وتفرك للملاح
بتورِّق اللوبي
وتحش
تمسك مراح..
تحلب، تخُش
تغسل هموم أيامه
في طشت الحلم
تنفض تشر الشوق
هِدِم
تنشل من البير
أم تلاتين باع
تعتِّل..
تفزع الطيّانة
لو ما تجدع التبّانة
بتجيّه بيوت..
تغزل خيوت..
بتطرز المنديل
تخيِّت لي طواقي العيد..
صبر..
بتَتَبِبْ السجاج
مع الفجاج
تقوم
إيدين بنيات الفريق
بتحش تمر..
تخرت سبيط
بتعتِّق الدكّاي..
وتخبز للصفاح
بتكفّي عيزومة
وضيوف..
بتغني قيدومة
وتطوف
بتهني..
بتودي وتجيب
بتحني..
بتدلك حبيب
بتولِّد الأمات..
تربِّي على الصلاح..
زي ما بتضمِّد للجراح
إيدين بنيات الفريق
إن داهم الحلاّل
خطر
قادرات على شيل السلاح

#تسقط_بس
#لاتفاوض_لاشراكة_لاشرعية
#الحرية_للمعتقلين

والشّارع قارِنْ في الشّارعْ
وأنا واحد من شعبِ مضارع
سمِّيت ومشيت ما متراجع
ستِّين أبدين ما متراجع
رغماً عن عَنَت الأيام
والزّمن الَجهْجَاه الفاجِعْ

بالنّفس النّازل والطالعْْ
غنيتك
يا عشقي وتيهي
يا بلداً
كم سمحِة وجيهي
لو لِقَتْ النّاس البتدورا
الأيدي التنفض كِنديكَا
ترتاله .. تكوس لها في الجيهي

#مليونية31اغسطس

هبة سبتمبر ✌️🏾✊🏽🔥

يا ثائر نبضك حي يا شايل هم الامة !

كان ضحوية ... وكنّا نسنّد في المحروت
فجأة يدوي مكبر صوت
قال الريس مار بي فوقنا
من شغلتنا قلعنا عروقنا
إن شغلتنا بلا ماروقنا
فكّينالو حبل واسوقنا
وإنماسكنا يطمّن روقنا
قمنا جميع الحلة مرقنا .. البيشوفنا يقول وا شوقنا
كان ضحوية .. وكانت عين شمش الله قوية
وكان الريس في عربية .. واقف طولو تحت شمشية
هللنالو وهلجنالو .. ولوحنالن بالطورية
فرّ عبايتو وهزّ عصايتو .. وهزّو بنادقن الضابطية
صفقنالن صفقة قوية
زغردنالن .. وهّدن عندنا خمسة دقائق
قدمنالو كتاب الله درقة وسيف .. تبروقة هدية
قفة تمودة .. وفاس دهبية
وكنا قبل بيّتنا النية
وبين بنتين علّينا اليافطة .. اليافطة ام زيق الدمورية
وانعبينا هتافاً واحد :
( الجابرية تحي الثورة ..
دايرين بوسطة ومدرسة وسطى
والشفخانة وسوق منضبطة )
روح باسم .. قام خاطبنا بنهج الثورة الصارم وحازم
أمّن لازم من شفخانة والتعمير بالعون الذاتي
أمّن لازم من شفخانة ومدرسة وسطى
والتعمير بالعون الذاتي .. إلا البوسطة دي ينظر فيها
اما السوق .. السوق منضبطة
وبالتأكيد .. للتجار الأسعار واضحة
للمستهلك باينة وواضحة .. وإن جاملتوهن تبقى الغلطة
إنكيفنا .. رفعنا إيدينا وهزيناهن بالتأييد :
( لا تفريط في قوت الشعب ..
سحقاً سحقاً للرجعية
الجابرية ضراع الثورة ..
بالإنتاج حا نبني بلدنا )
وكانوا في جيهة ونحنا في جيهة
هُن إنهببو بالكابات .. وما همانا الصيف وعرقنا
فات الريس وانفرتقنا
انفرقنا على الجابرية .. كلنا ننضم وما صدقنا
بالجابرية تجيها البوسطة
الشفخانة ومدرسة وسطى
قلنا يا ريت لو زارنا فطور
وانحزمنا ضبحنا التور
كنا اقلاّ ضمنّا النور
أو ياريت لو زدنا الصفقة وعاش .. ويسقط ويوية اليوية
كنا أقلاّ ضمنا الموية
كنا بننضم بي إيدينا .. ( ده أحسن ريس مرّ علينا )
من الله خلقنا وشُفنا خلقنا .. ده أول ريس ذاتو يجينا
وكونه يجينا يقنّب بيننا .. يشوف البينا .. كفاية علينا
آ الجابرية يجوكي الحكماء
آ الجابرية تواصلي البرة
آ الجابرية ولادك تقرا
نمشي الليلة نصاقر الرادي
نمشي الليلي نحضر النشرة
كنا نرجع في كلماتو
إلا في ستة من الجابرية .. قالوا تعبكم خارم بارم
يذهب حاكم خلف الحاكم
والجابرية تظل في حالا .. حلة حياتها تسر الظالم
صدفة تموِّت وتحيا اطفالا
لا جلكوز لا تقرا رسالة .. لا راح يطلع منها عالم
ما بينصفكن إلاّ ضراعكن .. عبّو ضراعكم يا رجّالة
وخلو بصركن دغري وسالم
حكم العسكر ما بينشكّر
كلّه درادر .. كلّو مظالم
ما هو قدركن تحيو همالة
مقصودين والقاصد فاهم
وقاطعناهن .. حاربناهن
تمّيناها البينا شتائم
حالَتُن احسن ناس في الحلة
إيدا نزيهة .. عقولا نبيهة
وقلنا يفرزوا وقلنا فواهم
يطلعوا فالصو وقطاع رحمة
عينة شماتة وخارم بارم
وإحنا القصّر واثقين فيها
وقطعناها معاهم جملة وقاطعناهن
وصاروا في جيهة ونحنا في جيهة
مرّ اليوم .. الشهر .. الحول .. والجابرية بلد في حالا
قواسي شيوخا .. مآسي أطفالا
عذابات ناسا .. حلة تعافر ومقطوع راسا
من القُرّاصة ولي قَرّاصا .. حلة تعافر ومقطوع راسا
عشرين كيلو من الجابرية .. صبية تساسق بي كرّاسا
آ الجابرية عذابك فينا .. لاكي القرية ولا كي مدينة
وفد في وفد يقوم ويجينا
عايزة دراسة واجراءات
عون امريكي قرض ألماني وحاحاءات
وحد ما نشوفلنا مسعولين .. مسعولين أو خواجات
نجري نلم قدحاتنا عليها .. ترطن ترجع زي ما جات
الشفخانة وعايزة دراسة .. ومدرسة وسطى وإجراءات
لما المطوحة طالت بينا .. إنذكرنا العون الذاتي
إنحزمنا وقلنا برانا .. نبني نقوم لي الشفخانة
طوبة في طوبة .. وقومناها
ويوما التمت جات السلطة عربي وعجمي ومرة رطانة
الشفخانة ده ما هو بُكانا
هاك يا تلتلة هاك يا ورطة
وغصباً عنك يا الجابرية .. غصباً عنك يا أحوالا
وحمياتا وموت أطفالا
وحمرة عينكن يا رجالة
قوة إنشكت بيننا النقطة
وفي الجابرية تحوم الشرطة
هووا كلاب الحلة وصنّوا
ومن يوم داك ما شفنا الستة
وفد الحلة السافر جانا .. قال إنأكد شاف الخرطة
ونحن بدل نبني الشفخانة .. إنسرعنا بنينا النقطة
الشفخانة ده ماهو بُكانا .. وكانت غلطة إنقلبت ورطة
إنفاهمتو مع المسعول ؟؟؟ إنفاهمنا مع المسعول
وقال حا يقوِّم للشفخانة ؟؟؟ أو يدفع لنا حق الطين
مع إنو النقطة وكت بُنيانا قومتوها بلا زنزانة
في تقديرنا كلام معقول .. كون يقوِّم لي الشفخانة
حاجة تضحك .. محرقة ... هانة
انتو تقيفو مع المسعول
واللا الكنتو تقيفوا معانا
وقلنا وخفنا نصد الجاي .. خفنا نفشل باقي الخطة
فضلت جايي .. هي فضلت خطة
وانفرقنا على الجابرية .. وانعلقنا تجينا البوسطة
ومدرسة وسطى والشفخانة قصاد النقطة
تجينا .. تجينا .. تجينا ... تجينا
وما إنيقنّا ..
ناس إنولدوا وواحدين ماتو

لمّا الريس ودوشتو فاتو
فاتو العسكر .. وجو الأحزاب
ونفس الحلم إنجدد تاني
نفس الوجع الراح تحتاني
حتّلناهو جمعنا رفاتو
نفس اليافطة في نفس الحتة :
( الجابرية تحيي الشعب
دايرين بوسطة ومدرسة وسطى
والشفخانة بديل النقطة )
فينا إنكلم شيخ الحلة
صنقع .. دنقر .. سلم وصلّى
وكانوا كلاب الحلة بهووا
وقال كلمتنا تكون فد واحدي .. شان ننقوى ما ننزلا
شان مشهادنا وعدل الحلة .. نحن نفوِّز حاج البلة
وزاد هوهيو كلُّوب الحلة
وبعضنا عارض .. ردّ وفاوض
شيخ الحلة القام حمسنا .. بلة الحمش الزول ما دلة
أول فاهم وقبلوا ولدنا .. وراح يحكملنا بي شرع الله
هو .. هو .. هووا كلابنا .. لمّا استغرب شيخ الحلة
وانفرقنا على الجابرية
انفرقنا ويوم الليلة إنجمعنا عموم الحلة
شيخ الحلة قرا القرآن .. صنّوا كلاب الحلة وهووا
وبلة إنقدم سمّ وصلّى .. صنّوا شوية .. وهو هو هووا
وقام إنكلم .. وعند إنكلم كان بينقسم
النسوان الجاي تنهامز
الصبيان الجاي تنغامز
وكان بينبسّم
وكانو كلاب الحلة بهووا
شكّر وشتّم .. هو هو هووا
حلّل وحرّم .. هو هو هووا
هود سابنا .. وفات ودانا الآخرة وجابنا
قاطعناهو وصوتو إنوطّا
اصلاً واطي وتاني إنوطّا
دايرين بوسطة ومدرسة وسطى .. والشفخانة بديل النقطة
التموين وزيادة الحصة .. كهربا موية وسوق منضبطة
بلة انبرع وقال ببنيهن .. هو هو هووا كلابنا واستغربنا قبل بالمرة
لامن نهتف ترسى كلابنا .. لامن ينضم بلة يهووا
بلة انحمس وقال بسقينا .. وبي إذن الله يضوّى الحلة
هتف الشيخ وهتفنا وراهو :
لا تبديل لشرع الله .. هو هو هو
ولا ولاء لغير الله .. طاء طاء طاء
عاش الفارس امل الحلة .. بلة الطاهر علي حسب الله
بلة الطاهر علي حسب الله
كبر فينا وقام إندلّى
ولسة كلاب الحلة بهووا .. وزاد هوهيون
كبشاً ضاع .. من مرحاتو وفاقع باع
بلة الطاهر على بلاّع
كانت أول مرة نشوفو .. يومنا الشفنا اللاندكروزر
اللونا مخطط .. والبنوت الراسا مربط .. التنبوبر
لوري مكوش أقمشة .. سكر .. حتى الفوفو
وعتِّل تؤجر .. وامحى المنكر بي معروفو
بلة الطاهر علي بلاع .. اكرمناهو .. اكرمنا ضيوفو
يشبة مَرَتْ الشيخ في وشيو .. لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول برّانا نغير قولنا
إلا كبار الحلة بقولوا .. بلة ده هولنا .. بلة ده أصلاً من ها الحلة
إلا إنربّى وقرا في الخارج .. ورافق جدو الفتح التركي
وسيرتو انقطعت في المهدية
ومرة سمعنا استوطن برة .. وقام إنزوج من مصرية
جابت علي .. علي جاب الطاهر .. حتى الطاهر خلّف بلة
جدو اشيطن اخير ما لانا
وبلة انسركن جاء وبرانا
أقرب واحد لي حاج بلة .. أقرب واحد شيخ الحلة
بلة الطاهر علي حسب الله
أول مرة يصلي معانا .. قدمناهو وقام أمانا
صوتو مرخرخ لمن يقرا
يقرا ويقطع زي البطرا
لامن يركع جسمو متختخ
عند السجدة سجودو ممخمخ
شيخ الحلة يقول عن امرو
زول غرقان في الدين من عمرو
ستة سنين قابض في جمرو
ما فكاهو طريق الله .. صوتو وِدِرْ من كترة ذكرو
وجسمو التختخو شدة صبرو
قلنا حقيقة .. الزول بي عذرو
وفتنا قناعة .. ومانا قناعة
إلا الستة الصارو جماعة
قالوا ده زول ترباتو مياعة
ما بيشبهنا ورفعو وضاعة
زول زول دنيا ودنيا صياعة
قصة دينة ودقنو بضاعة
واحنا اصواتنا .. يا إما مضاعة
يا إما جهالة وناس متباعة
وفي الحالتين آمالنا مضاعة
وخارم بارم
كونها بوسطة ومدرسة وسطى ..
والشفخانة وموية نور
كونو يجينا ده ما منظور
وزيادة الحصة .. الزول زول سوق .. زول من جدو يلف ويدور
ويا الجابرية ده مطلب عادل كونو تطيبي تكاتبي وتقري
ضوك يشلع .. دشك يرشع .. واحنا دفعنا ضرائب بدري
ولسه بندفع .. لسع .. لسع
بس يا جماعة .. إن قضينا حياتنا تباعة .. وصنّيت رادي
وقول في الفاضي .. خوفنا نقوم ما نلقى أراضي
ونحنا أساسنا وراسنا زراعة
والجابرية إن دايرة شفاعة
ما بيشفع لها إلا ضراعا عبو ضراعكن يا رجالة .. وخلو بصركم دغري وسالم
عبو ضراعكن يا رجالة
شيخ الحلة أضلّ وضلّ
واسألوا بُرّة وحاجة السُّرة
عن التيبان وحكاية الصُّرة
اللمّ البلة وشيخ الحلة مع شرع الله
والناس ديل العارضين برة
جرّبناهن كمين مرة
تاني نجرب شان ننضرّ
ويا الجابرية معاكي سلامة .. كان الفوقك ما فات مرة
كان كلماتن ناشف ريقا .. وكانت مرة
إلا حقيقة .. غلبنا نطيقا .. وين في الصرمة وقل القدرة
سكتناهن بس ما صنّوا .. وقاطعناهن تاني المرة
وبلة طريق الناس وخيارا
فوزناهو وجانا زيارة
كرمنالو التور وعرضنا .. وخليناهن برة الدارة
دايرين بوسطة ومدرسة وسطى
موية وكهربا والشفخانة .. زيادة الحصة وسوق منضبطة
وصدوا كلاب الحلة يهووا .. ينضم بلة يهووا معاهو
نهتف نحنا يزيد هوهيوا
مافي شهر جاتنا الخرسانة .. جان السيخ .. الطوب .. الرملة

جا الأسمنتى شكارة شكارة
عديناهن ألف شكارة
كرمنالن خيراً جانا
وكل كلاب الحلة الهوّن .. طفشنالن بالجبخانة
وفي صنانة تدودي الزانة
انغالطنا كتير في بعضنا .. أولى المدرسة ؟ واللا البوسطة
أولى المدرسة والشفخانة .. الشفخانة محل النقطة
ونان النقطة .. نحنا أهالي .. وودنا صافي
بينا معزة جرائم مافي
وما بنحتاج لي شرطة ونقطة
تحصل علة .. في شيخ الحلة وناس السلطة
نحنا الإيدنا بنت لي النقطة .. والجيرنا زبالة اطيانا
ناس السلطة إن دارو النقطة .. شي بُكان أرض الشفخانة
وما طالبانا خلاف زنزانة
مدرسة بوسطة
ستين طلبة وعشرين اوسطى .. شغالين ما ملو سخانة
مدرسة بوسطة .. وقلنا غُنانا
يا الجابرية .. الله أدانا
حاج البلة المبروك جانا
جاب المدرسة .. جاب البوسطة .. وبكرة يرجع للشفخانة
نصحى نصابح موية الدُّش .. نمسى نلاقي الضو عمانا
مدرسة بوسطة .. مدرسة بوسطة
وتاوق .. تاوق .. تاوق ..تاوق .. تخ
وفجأة تبين في السطح الخرطة .. وكب تنتصب الميضنة أخ
أخ من حظك يا الجابرية
سابع جامع بالجابرية
وصدوا كلاب الحلة يهووا .. أخ يا الناس الحالُن قطّ
هو .. هو .. هو .. هووووا
في البلدان الحظها فاجع
بق يا الصاح الماك متراجع
حرِّق دبش الدنيا الغلطة
بق وانفرق في الجابرية .. بق في ارحامنا في شافع نافع
ترفعوا امو في حيطة الجامع
يكتب يسقط دجل السلطة .. يسقط بلة وشيخنا التابع
وكشفناك وكشفنا الخطة ..
تحيا كلابك يا الجابرية .. يحيا ضراع الزيتُن طالع
غُلب يصارع مر الواقع
يحيا ترابك والطورية .. الجابرية تحيي الشارع
دايرين كهرباء دايرين موية .. دايرين سلطة وسوف منضبطة
دايرين هسة زيادة الحصة .. الشفخانة بديل النقطة
دايرين بوسطة ومدرسة وسطى

-حميد

الي البرهان 💔💔💔💔💔💔💔
حتقول شنو ؟
لما الخلوق تتلاقى تطلب حقها
قصاد الكريم يوم الحساب؟!
«
حتقول قتلت عشان شنو ؟!
شان تحمي أرضك من شنو ؟!
شان تحمي شعبك من منو ؟!
حتقول شياطين وسوست ؟
هو الجاب شياطينك منو ؟!

فلنفترض في الدنيا دي
صدقنا كلنا قصتك
شفعنا و الناس الكبار ..
صدقنا انك في جهاد
وانو القصاص واجب عليك
وانو المخرِّب بيستحق
يتصفَّى شان رفضك وثار..
وأنك أمير المؤمنين
وأنك بتعمل بالكتاب
والسنة وأعوانك خيار ..
وأنك كما بتقول دوام
شايل شديييد هم البلد
وانو المواطن جد عزيز
ما بترضى لو حقه اتفقد
وأنك نقي ومسؤول شديد
وأنك بنيت
وأنك شقيت
وأنك بسيط على قدر حالك
والقريشات بالعدد
حتقول شنو ..؟!
لمن يجو الأمات جميع
واقفين جوار قرة عيونهم
وما عفو الدم الزمان
حللت ينزل بالرصاص
حللت ينزف للأبد ..

حتقول شنو
لمن يقابلوك المساكين
البطونهم سكتوها
بموية بي كسرة وبصل
و اكلت انت و جاع بلد..

حتقول شنو ..؟!
لمن نقابلك كلنا
نحن الرعية الما رعيتنا ..
رقصت فوق أوجاعنا ياما
عصرتنا و طلعت زيتنا ..
صرخت فينا الله أكبر
و جيت بإسم الله أذيتنا ..
أمرت جندك يقتلونا
بدون إذن يقتحموا بيتنا ..
هضمت ياخ أبسط حقوقنا
و جينا طالبينك أبيتنا ..
بهتَّنا
و شهَّرت بينا..
قتلتنا..
و مثَّلت بينا..
و الله ولا يوم خفته فينا ..
مليتها بلدك بالخراب..
رخصتنا برخص التراب..
سديتها أبواب أي خير
و فتحت للشر ألف باب..
وريني بس يوم الحساب
حتقول شنو ؟!

يا شعبنا الوقاد
يا صاحب أعتى جهاد
يا ابن الغلابة الحر
يا جيهة يا مشهاد
كتر السكات بيضر
وقت المهادنة فات

#تسقط_حكومة_الذل ✌️🏾

كسبة وضلاليين لي بنوكم الخربة
تحيو وحلاليين وللغير حرام وربا
السلطة للاحزاب الشعب ساقا غبا
ولحزبكم ده ثواب جاء من الله جابو هبة
بجيهة الله الجاب وبجيهة الله ابى
لي بيتو انتو قراب من بحرى بقببا
تنفرج امدرمان والمهدى في الكنبه
تنشايت ام ضبان ود الترابى وباء
فوق تربة السودان في ضرايحو كم غرباء
يا ملعبة كيزان دنيا وبلاش غلبة
وجيتاً ظهرتي بيان يا اتبرا التعبة
ما ضاقت الاديان والدنيا كم رحبة
وفي حضرتك فتيان ما بدلت جببا
الدروشة الغليان الهمهمات غضبا
وكم دوبت بمبان بمواقفا الصلبة
يا ملطشة فرعون
موسى الشوارع عاد

وعلى مين تحلقوا دقون كان اتخلقتو جداد
الشعب كلو عيون الأمة بالارصاد
اللي ضميمتو يخون ما امنوهو بلاد
وكان بيحكمونا بيوت لو بيحكمونا افراد
يا شعبنا الوقاد يا صاحب اعتى جهاد
يا ابن الغلابة الحر يا جيهة يا مشهاد
كتر السكات بيضر وقت المهادنة فات
بيك يا النضال المر تحلى البواكر هات
ايدك لعالم حر والتنهض الكلامات
طول ما الضلالة تضر زي ما هى جات بتمر
يا مفدر الظلمات يبقى اللقى بيسر
والمهدى حي ما مات
يا اتبرا الِبرة يا منجم الثورات
اتبرا ……. اتبرا

اتبرا الطيبة يا منجم الثورات
كيفك بعد غيبة وغربة ووطئ جمرات
رجالتك الهيبة … نسوانك الحارات
قالن لي قولا تسر … تنفع زمان الضر
كل البلاد أم در .. والمهدي حي ما مات
الخطوة في الشارع منبثة ثورية
بق الغضب طالع .. أبرول وطورية
شافع ورا النافع .. طلبة وأفندية
الجوعو كان دافع .. لي هبة شعبية
ما الصبر ما نافع في أيام كركية
ذات وضع همباتي .. وأحوال متل دية
كهان وجهدية .. وكابات هي ما هيّ
حموني اغرودة والدنيا عيدية
حرموني زغرودة في فرحة عادية
حظروني من عودة .. أو مرقة ليلية
منعوني من ذاتي .. واخواني جندية
للقمع يوماتي سدوبا وردية
شك في هوياتي .. فتيش وسخرية
لكناتي .. لهجاتي .. شلخاتي .. عينيا
أوكير وحمداتي .. باعوضة سل فيا
تحتاج معاناتي لبطاقة شخصية !
يا مسخ بعاتي .. وقام لجنة شعبية
لي حضرة الآتي .. شايل الفرح ليا
عبيت مساماتي .. من غيمة منفية
وعلى أرض مأساتي .. فرغت ما فيا
وضل الوطن شاطيء .. وشمسو المراكبية
النيل ديمقراطي .. والقيفة جمعية
بردت غنواتي .. بي نمة مغلية
بقت هتافاتي .. دوديتا بي إيديا
في دقن همباتي .. وعسكر حرامية
طارت حماماتي .. وركت سلامية
غدروها شماتي .. وكتل الرصاص فيا
لكن يا مواتي .. يا ذمة مشرية
يا عسكراً فاتي .. مافيا وطفيلية
من شرفة الآتي .. وبي كل حنية
أخدني أماتي .. بي طرحة و أمنية
ربطن لي جرحاتي .. وبي مرتق واغنية
سدن لي آهاتي .. فوق وقفة صخرية
سنن لي إيديا .. وصاحن بي صد صارع
يا عيش وحرية .. وانغير الواقع
يا ميتة دغرية

نار التكل ماتت .. نار فينا شن حية
و روحك إذا فاتت .. روح الوطن جية
أماتي يا أمات .. كل الغلابة الجات
من حلفا لي نمولي .. من بارا لي سنكات
غضب الخلا اليغلي .. صرصيرة الغابات
في عب ضلوع النيل .. جيب القلب غيمات
أشواقا تالا الأرض .. والأرض شوقا نبات
أماتي يا أمات .. ود الحياة الصنديد
قولاً لكل عنيد .. وصاحب دقن همبات
قولنلو نحنا حديد .. زي المرمة شداد
اللي ضميمتو يخون .. ما أمنوهو بلاد
يا مستبداً بات .. حارساهو دبابات
كضاب وكضابات .. هواب وهوابات
شن حزبك الويحيد .. وضرعاتك ام حجبات
طظ .. جبهتك وين سيد ... الإشتراكي الفات
لا البوت ولا النبوت .. لا التوت ولا الكهنوت
ونقل الفلاشا أفاد
وكان يحكمونا بيوت .. لو بحكمونا أفراد
حارين حديث الموت .. والبعث والميعاد
كل لحظة روح بتفوت .. وكل لحظة كم ميلاد
وعلتنا يا مسخوط .. مو اسم الله واحنا عباد
علتنا كيف القوت .. والجيهة والمشهاد
ما مر قطراً توت .. ما طال للبراد

الى رفاق قد جمعتنا بهم ارض الاعتصام الطاهرة الى جمهورية اعلى النفق الى كولومبيا و مسرح الكهرباء ... ، ان وعداً قد قُطع و إننا على تحقيقه لماضون ، بحق دماء إخواننا و بحق هذا الشعب في الحياة بنزيد و نقول :

قتلوك الناس القُّصر
الناس المأفونين
الناس البالا مغّطى
الساسة المبيوعين
كتلوك خدم الراسمال
يازول يا عادي يا زين
الفرحوا الامريكان
والربحو تجار الدين
كتلوك وكان قاصدين
في ذاتك ناس تانيين
الناس ام عرقًا يجهر
السرها يوم ح يبين
يا عادي كما العمال
والريح الفينا دحين
يا صاحب ها الآمال
في صدور المحرومين
في عيون المحرومين
*****
ماشين في السكة نمد
من سيرتك للجايين

#مليونية17سبتمبر

#تسقط_بس

إيدين بنيات الفريق
قادرات على
صد الحِدَيْ
جاسرات على
صقر النكد.
إيدين بنيات الفريق
بتهدهد الطفل الرضيع
بتعدي شيخ
دومة الحفير
تشلخ لبق..
تسقي الخدير
بتعوس
وتفرك للملاح
بتورِّق اللوبي
وتحش
تمسك مراح..
تحلب، تخُش
تغسل هموم أيامه
في طشت الحلم
تنفض تشر الشوق
هِدِم
تنشل من البير
أم تلاتين باع
تعتِّل..
تفزع الطيّانة
لو ما تجدع التبّانة
بتجيّه بيوت..
تغزل خيوت..
بتطرز المنديل
تخيِّت لي طواقي العيد..
صبر..
بتَتَبِبْ السجاج
مع الفجاج
تقوم
إيدين بنيات الفريق
بتحش تمر..
تخرت سبيط
بتعتِّق الدكّاي..
وتخبز للصفاح
بتكفّي عيزومة
وضيوف..
بتغني قيدومة
وتطوف
بتهني..
بتودي وتجيب
بتحني..
بتدلك حبيب
بتولِّد الأمات..
تربِّي على الصلاح..
زي ما بتضمِّد للجراح
إيدين بنيات الفريق
إن داهم الحلاّل
خطر
قادرات على شيل السلاح.
#مليونية29سبتمبر
#القصر_حتى_النصر✌️🏾✊🏾🔥

العساكر كانو بغيرو تكتيكهم كل فترة بدوها من الدفاع عن القصر في مربع صغير يبدأ من البنك الفرنسي وبعدها حولوهو لمربع كبير من شروني وبعدها جابو الحاويات للكباري وبعدها عملوا استراتيجة الترس المتحرك من السلك الشائك البختوهو فجأة بعد الموكب يبدأ تاني عملوا حنك الساتر الدخاني بحرق اللساتك في شروني لحظة وصول الموكب تاني اتقدموا في المربع شوية وبقى من زين وبعدها بقوا يضربوا الموكب في باشدار ضربة خفيفة لكن من بعد 30 يونيو وجاي تكتيكهم بقى وااااحد م اتغير نهائي وبعتمد على المدرعات لاختراق صفوف الثوار وانهاكهم ومن ثم صنع صناديق لاعتقال الثوار ودا الحنك الاشتغلوا بيهو التلاتة شهور الماضية لدرجة انهم استغنوا عن قوات ابوطيرة لانهم ماعايزين عدد كبير، من القوات في ظل وجود المدرعات عشان كدا اي تغيير في تكتيكنا ح يجهجهم شديد لانهم استكانوا خلاص للتكتيك دا خصوصا لو نقاط التظاهر كانت جوة العربي ...

سلام ومحبة

نحن اخترنا طريق الشهداء رغم الفيهو مشينا عديل
نحن صنعنا اطول ثورة من ديسمبر ل أبريل
و تاني حنصنع اطول ثورة من ديسمبر و بعد أبريل

✊🏾🔥عارفين طريقهم صعب .. نهايته حقهم كامل بدون نقصان
✌️🏾ابقوا الصمود

عايزين يوم 25 دا يكون من الصباح ماعايزين الساعة 1 بتوقيت الثورة والشغل المكرر دا ليه ماتكون 10 بتوقيت الثورة ؟ دايرين زمن كافي لليوم دا .
صباح 25 اكتوبر يعني الساعة 5 صباحاً لازم كل الشوارع تكون مترسة فوق تحت علشان تساعد الناس انها ماتمشي الشغل ويكون عندها عزر وتقدر تشارك معاك يوم مليونية 25 واليوم دا مانهاية المواكب ولا نهاية الثورة ياريت كل الناس تبداء تعلن لليوم دا عن طريقة المواكب الداخلية للاحياء ومن الليلة لحدي يوم 25 اي زول يشتغل علي الاعلان في كل صفحات الميديا🙏💙 .

نحن ماانتهينا نحن يادوب ابتدينا✊🏿.

#مليونية25اكتوبر
#لاتفاوض_لاشراكة_لامساومة
#ضد_السلطة