لسان حال السيده زينب(صلوات الله عليها)

گطعوا یمین العباس، یا فاطمة الحزینة
تلطم غدت علی الراس، من اسمعت سَكِينه

_____________________________________

يام الحسن تعالي ، وشوفي اشجرى على حالي
يوم الهوت على الگاع چف الكفل دلالي
وعضيده من شاف الحال، ظهره انكسر وجالي
ويلاه نِدَب يزينب، راح الأخو امن ادينه..

____________________________

بيا حالة رد وبلا روح، ما يگدر إعلى الگومه
ظهره انكسر من بلواه ، ومغيرات رسومه
ومن أمّنت خيل إعداه، دارت عليه الحومة
راح اليرد ذيچ الخيل، وعلى النهر چفّينه..

____________________________

توه العطش بين بي ، يا يمه من طاح الجود
وتعنه خيمة عباس ، طيّح بديه العامود
يعني الگفلچن بحماه، راح او تروحلنه حدود
عگب العلم عگب العين ، تُهوى الخيم علينه..

____________________________

وسكينة صاحت بالويل، ريت العطش ما ناديت
وادري ابحميتك يا حيد، ما تنطفي لو شبّيت
شيرويني بعدك وشلون، يُبگا ابغيابك هالبيت
نبچي وفلا چف كفّال يمسح هظم بچينه..

_____________________________

يا يمه وحسينچ طاح ، بين الخيم ينادي
يابو الفضل يالوياك ، ذبحوا جميع اولادي
عگبك فلا يگوه الشوف، واظلم عليه الوادي
وبيمن بعد يحچي حسين ، وبخوّتك حچينه..

_____________________________

الشيخ منير السعد

https://www.tg-me.com/hxzeu1

عبااس ،، عباااس ،،،، عباااس،، عبااااس
،،،،،،،،،،،،،،،،،،،،،،،،،،،،،،،،،،،،،،،،،،،،

بسمك عليناهه الرايه
يمطيح چف الرمايه
والشط ناشف ريجه و مايه
والله مسوي بجرفه اسوايه

لو مية طف ما ينساهه
انته ابن الوالي الرداهه
شمس الله وترجع خلاهه
هنيال امك وانته رباهه

عبااااس ،،،، عباااس ،، عباس ،، عباس
،،،،،،،،،،،،،،،،،،،،،،،،،،،،،،،،،،،،،،،،

يا قائد وچفوفك ديره
يمأسس عباس الغيره
صارت بيهم خوفه وحيره
يا كافل يصعب تفسيره

ياهو الطب الحومه بزوده
ذل الجيش بهاي زنوده
وگفات الكافل مشهوده
خيمة زينب ندري حدوده

عباااس ،،، عباااس ،،، عبااس ،،، عباس

،،،،،،،،،،،،،،،،،،،،،،،،،،،،،،،،،

خلي الفارس فوگ الفارس
للحومه انته مسوي الواهس
يم حيدر يلكافل دارس
لاختك زينب حامي وحارس


يا ظهر حسين وعنوانه
يا قائد جيشه وذرعانه
صاح الكافل انه هنانه
والجيش انخطفت الوانه

عباااس ،،، عباااس ،، عبااس ،، عباس
،،،،،،،،،،،،،،،،،،،،،،،،،،،،،،


يا ساگي الموت بجف أيده
ما طارت بچفوفه الصيده
هذا الموت وياهو ايريده ؟
يخلص والعباس ايعيده

قادتهم بالطف غطاهه
لمها وطشرهه ولماهه
شردت والطف ما كفاهه
للبرزخ راح وذلاهه


عباااس ،،، عبااااس ،،، عباااس ،، عباس

،،،،،،،،،،،،،،،،،،،،،،،،،،،،،،،،،،،،،،،


صاحت زينب هذا الهيبه
عباس وحيدر ترتيبه
خله ابگلب الحاقد شيبه
يا كافل عنوان النيبه


وصلهم للشط رداهم
ما شافو راحه وخلاهم
چنه الموت ويحچي وياهم
يطحنهم بيده وذراهم

عباااس ،، عباااس ،،، عبااس ،، عبااس

،،،،،،،،،،،،،،،،،،،،،،،،،،،،،،،،،،،،،،،،،،،،


جاب الماي أوشط أوغيمه
مد أچفوفه وصارن خيمه
ضم روحه الطف ماي بهيمه
صاحت زينب يا رب ديمه

هذا الكافل فدوه الطوله
وفى الزينب هيچ احچوله
يا دمعة شوگ وهلهوله
مشتاگه اختك بس گلوله

كلمات خادم الحسين
رعد الفريجي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

تلگيني يزينب طاحت الراية
تلگيني يزينب طاحت الراية

***

طاحت والنواظر طاحن اوياها
وگبل الگاع فَر گلبي اوتلگاها
يا خويه بعد چا بيمن أتباها
وهاشم عالأرض هالطايح الواها

بعد ياهو الخدرچن يختي حَمّايه
تلگيني يزينب طاحت الراية

طاح واليهه.. خیمچن ها يزينب

***

طاح إعلى النهر يا زينب الحامي
وبگلبي أحسهن طاحن سهامي
بعد المن تظل خل توگع إخيامي
وخليها الحوافر تاخذ ايتامي

ولصدري تجيه الخيل عنايه
تلگيني يزينب طاحت الراية

ما يهابونه، الما عنده ابوفاضل..

***

ها يم الخدر زينب تلگيني
وعلى دروب الخيم ياخويه دليني
ترا سهم لمثلث نابت بعيني
والطاحن على التربان چفيني

ومن ذاك العمد هامِتي امدمايه
تلگيني يزينب طاحت الراية

تيه دروبي.. يا سهم إلِمْثلث

***

وين أنطي الوجه يا خويه گليلي
تراه الحيل راح وما يرد حيلي
إجيتچ والجرح عباس يا ويلي
ما يگطع دماه شما تشديلي

ومن جرح الگلب هالطلعت حچاية
تلگيني يزينب طاحت الراية

تنزف جروحي.. من صواب أخيچ

***

هم عاش الفگد يا زينب اخوانه؟؟
لو بعد الفگدهم هادت احزانه؟
أنه العباس شفته بلايه ذرعانه
نايم عالنهر بس يابس السانه

ما ضاگ الفرات وعيلِتي إضمايه
تلگيني يزينب طاحت الراية

راح ساگيهه.. عطاشا البل مخيم

***

يا خويه تهت وتحيرت بامري
معميه النواظر والدمع يجري
طاح احزام ظهري وانكسر ظهري
بعد شصبر يزينب وانذبح صبري

ياهو الچن بعد لو داسوا الثاية
تلگيني يزينب طاحت الراية

الطايح حزامه ، تدوس الخيل ظهره


الشيخ منير السعد

https://www.tg-me.com/hxzeu1

حرم ننشد بعضنه . مايه خونه
وعد والوعد حاشه . مايخونه
تبده الخدر لمن . ماي اخونه
تبده و انكتب زينب سبيه

سيد خضر الزاملي

لسان حال الإمام الحسين ( صلوات الله عليه ) في وداع أخيه قمر العشيرة..


يا ستر كل هاي الِخيام
لو رحت من عدهه تنضام..

البسملة أقرا لسؤالي
واسألك يالعندي غالي
يا گمر ذيچ الليالي
ويا شمس كل هاي الأيام

گلي يا خويه بغلاتي،
اشتسوه من بعدك حياتي؟
موادعك يرعب بناتي
لو رحت ، يتسمن أيتام..

خويه وفراگك عليه
أشد ما بالغاضرية
گلي شنگول لرقية
لو تناشدنه يضرغام..

تمشي ودموعي على خدي؟
گلي غيرك شنهو عندي
فَطَّرِت يا خويه چبدي
وفطُّرَت بجروحي الآلام

يالخذاك الماي عني
وأخذ كل اخواني مني
بلا عشيرة اصفيت چني
او صفّت لملگاي إلِسهام

الدنيا بعدك ما ردتها
من عفت چفك عفتها
وروح أخيّك ضيعتها
وضاعت بفرگاك الاحلام

يالچنت من الله ذخري
اتطشر ابفرگاك عمري
خويه رد يحزام ظهري
لظهر أخيك ما بُگه حزام..


الشيخ منير السعد

https://www.tg-me.com/hxzeu1

... يا رجائي ....
قصيدة شور

                ( 1  )
عوفها الجربه حبيبي كوم عباس
خيام ماظلت يكافــــل كـوم عباس
النهر مو اغلة مني النهر
يمي اريدك يخوية الكمر
بلا ضوه خوية خيمنة والظلام علينة حل
كوم يا هيبة عمامة صحـنة والمدمع نــزل
من الخدر من طلعونة شافنة الحادي وخجل
وين اخوتج صاح وين
لا كفــــيلچ لا حســـين
گصــــت ويــاج السنين
يا عباس ياخوية ... ياعباس يا خوية
............................................
                 (  2  )
وين وجـهك يبو فاضل غـربه الوجـوه
وين طولك يــبو الغيرة غربه الـــوجـوه
عليه صعبة اوبعــــــيد الدرب
عگب اخوتي يوسفه انظــرب
عالشريعه اشلون طايح گوم ياحامي الظعن
صحنه حيهم يخو زينب گـصه ويانه الـزمن
بشاربك يابخت اهلـــنا ردنــه خـوية للـوطن
نار تجـــــوي بينه نــار
احتركت اجدام الزغـار
دار بــينه الــــوكـت دار
يا عباس ياخوية ... ياعباس يا خوية
............................................
                (    3  )
عطشت اعيوني عله جيتك ياضوه العين
عالـدرب منتظرة روحــــي ياضــوه العين
ذبلت احلامي ماصح مطر
الغيم طبعة يحــب الســفر
عالـــــدرب شابح نظرنة ننتظر راية تــرد
حاره الگاع وچـــوتنه ورفــت الراية بــرد
منو غيرك لجل زينب وياهو للخدر يــهـــد
ويـــن كــفـــالي أصيح
عــالنـــهر گــالوا ذبـيح
وانه گمت أعثر وطيح
يا عباس ياخوية ... ياعباس يا خوية
............................................
                  (  4  )
بعــيد مويمــــي وودعك والــدمع نـــار
وللشريعة اشلــون اجيلك والــدمع نـــار
بطيحتك خويه ظهري نكسر
ما رحمنا حــــبيبـــي الـــدهـر
اليل للفارگ حبيبة ما يغمض بي چـــفــن
يعيد كل ذكره جميلة وللصور يبقى يحن
والدمع يجري علة خده وحزنه واضح عالجفن
يمــي يالغــــــالي تعال
ردني ليـــــــام الــدلال
والفرح عن روحي شال
يا عباس ياخوية ... ياعباس يا خوية
............................................
الشاعر خالد جودي العارضي

نعي جديد.. عندما وقع ابا الفضل العباس عليه السلام نادا ادركني اخي يا حسين وكأني بالامام الحسين عليه السلام خرج محني الضهر من الخيام وهو ينادي الآن انكسر ظهري وقلت حيلتي وشمت بي عدوي

الحسين عليه السلام
===============
اجاه الصوت يندب خوية يحسين
طلع محني الظهر من الصواوين
ما يدري بطريجة وين ما وين
يصيح بصوت اشرلي باليدين
====================
إذا تسمعني خوية ارفعلي ايدك
يبو الغيرة انكسر ظهرة عضيدك
اسمعك من صحت بس ما افيدك
وحيد ابگيت من گطعوا وريدك
====================
من صوب الشريعة الصوت اجاني
اعله شاطي الماي ناداني مچاني
مذهول الفكر عباس ماني
كسر ظهري الدهر خوية وعماني
======================

كاني بالعباس عليه السلام يجيب اخاه الحسين عليه السلام
================
العذر لله والك چفيني ماهن
أأشر بيش يحسين وتراهن
وعيوني السهم خوية طفاهن
اخذ من النضر وسفة وعماهن
=====================
علامة اطيك جثة ابلاية چفين
والراس انفلكَ والسهم بالعين
وجربة اعله الصدر وسهام صوبين
وجسمي من الطبر صاير نياشين
====================

الحسين عليه السلام
================
دليني على چفوفك يعباس
وين بيا كتر گطعوهن الناس
اويلي عليك خوية شصار بالراس
تلاگف بالهوة وتجر بالانفاس
===================
راسك ارد احطة بحجري وانعاك
ودمك ارد امسحة بطارف لواك
عد راسك اخيك فكلي عيناك
نويت تروح عني الله وياك
===================
عمت عيني يخوية تلوج عطشان
يحزام الظهر يا تالي الاخوان
راح ابقى وحيد ابين عدوان
حرمنة اتظل يخوية بغير وليان
=====================

عندما وصل الحسين عليه السلام و وقف عند رأس ابي الفضل والعباس عليه السلام ولم يعرفه وكأني به

يمن گاصد علية الصوت اسمعة
احلفك راسي خلة ولا تگطعة
تمهلني اريد وحالي ترعة
لما اخيي يجيني وارد اودعة
==================
اخير وداع هذا ابين الاخوان
عزيز الروح گلبة اعلية لهفان
ما اشوفة اخاف وعمري خلصان
يبو اليمة اخوك عليك عطشان
===================

جواب الحسين عليه السلام
===============
عد راسك اخيك انة الحسين
اشوفك لا عيون ولا الچفين
لواك بيا كتر طايح والايدين
تتانيك الاطفال وتربي العين
=================
متانينك يبو الغيرة على الماي
وسكنة تصيح ها عمي يوفاي
حاضن جربتك وسهامها هواي
مثلك ما حصل عباس سگاي
==================
امدد والسهم طفاها العيون
احط ايدي وشيلك مدري شلون
مطبر من أشوفك موش بالهون
حرم واطفال بالخيمة يتانون
==================

أسالكم الدعاء رائد

((الفاگدله))





الفاگدله اخوّ خل يبچـي ويــاي
بچي كون اعله صدره اتسيل الخدود

بچي كون بجنون ويـلفت انضار
خيـــــام الطــــف بچـتله أتگلبن سود

أنه الونيت ونــه اتشيب الكون
عــلى الطاحت چفوفه ولازم الجود

يـرايد تـــون اعـله الاخو الزين
كــون اعــــله الـــونين تعــلم الدود

أنه العلمت حــتى رمال الطفوف
اونــــن والرمـــــال تصــيحلي عود

أنـــه يــم النهر خليته مطروح
بــــس خلــيت گلبي بصفه ممدود

اعلمك عالبچي شو دگرب احذاي
علـــى راســـك اريدك تـــلطم بفاس

أنه الرايحلي زلمه يخوف الخوف
الشــمس تطفه منصيح بصوت عباس

شفــــــت العلگمي متعجب بهاي
گـدام العـــضيد ويلــــطم الراس

شفـــــتك والحنين بصفك تلول
وبـــللت النهر من كثر الاحساس

ضهري أنكسر ياعباس ياخوي
لتلوموني اذا ونيـــت يــــاناس

بستان العشگ عباس ذبلان
ويَبست الورد وميبس اليآس

گوم وياي يالشَيَبت السيوف
نخيتك ياعضيدي ورفعةّ الراس

اگلــبك رت ابوسك خاطر ارتاح
شگلبك وأنته صاير طولك مصاب

بـــينك والخيم ضليت محتار
مـــــثل حـيرةّ علي من دفعو الباب

ابــاوع عالخيم شو بيض الخيام
المخيم مــــــادريت بطيــحتك شاب

راح انعاك خويه بضرب السيوف
افـك صدري مضيف بوجه الاحباب

راح انعـــاك خويه بسحكتّ الخيل
لـحد ما ضلعي اسمعه بكسرته طاب

اردن للـــمخيم زينب شلون
اگلــها الگمر مالچ عالنهر غاب

أنه رديت لاچـــــــن ردتي بظيم
ينــــاز ويــــــرد من دفنت الشاب



عبد زينب
محمد الابراهيمي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

ايست منك راح ارد للخيم
وآنه الهدم حيلي ودليلي السهم

ياحسرتي تگطع بالانفاس
اشلون ارد وبغير عباس
خويه خويه خويه خويه
............................
اجيتك والدليل انعاب من صوتك
لا ترحل يكافل زينب امروتك
يبو طبع الحلو من زغرك الموتك
من گلبي يريته انصاغ تابوتك

مابيه امشي وجيت يمك زحف
نيشان فگدك هاي عيني الترف

يحزام ضهري الكلك احساس
يا حسرتي تگطع الانفاس
خويه خويه خويه خويه
...............................
يحداي الضعينه اشلون من ترحل
ويميزان الاخوه لو رحت تختل
تيهت الدرب عباس ما اندل
غبت وحزام ضهري بغيبتك ينحل

ما شوف دربي يالاخو من طحت
واعليك دورت شكثر يالصحت

اگعد يمن للخوه مقياس
يا حسرتي اتگطع بالانفاس
...............................
سهم عينك يخويه اشلون اجرنه
اخافن جرحك الينزف الچمنه
دم راسك اريد ابثوبي امسحنه
مچانك ما اعوضه وبيش اسدنه

جريت سهمك وانه گلبي انلچم
العين ياذيهه الهوه مو سهم

لو ما تردلي تشمت الناس
يا حسرتي تگطع بالانفاس
..............................
طلعت روحك وسهمك فلايطلع
واقنع روحي ميت وادري ماتقنع
معقوله الگمر انخاه ومايفزع
المصيبه زينبك يابالفضل تسمع


زينب تناطرنه الخيمنه نرد
ياحسرتي لمن عليك انشد


گربو لينه ها يعباس
يا حسرتي تگطع بالانفاس
...............................
صحت ذبي عمدهه يختي هالخيمه
وراح انعيش كلمت حاير ابضيمه
مشه عباس عنه وماتت الشيمه
حزن دنياي تمطر تشبه الغيمه

للضيم آنه اوياج خل نستعد
بيمن ارد اعداي لمن تهد

يرضاهه حده الگمر ينداس
يا حسرتي تگطع بالانفاس


خادم اهل البيت علي الزرگاني

طاح ... طاح ... خيَّ اعله النهـر
صاح ... صاح ... و الظهر انكسر
وين ... وين ... درب المشرعة
دلوني يا ناس
....1....
هيج اليفكد اعزازه ... ما يبقاله كل شوف
يشيَّب بالعجل راسه ... وكسره الوادم اتشوف

عشتها الحاله هاي ابطيحت الكافل
اركض وحــدي بنص كربلاء نازل
اليطيح اكباله اخوه ما يبقى متكامل
ظهرة ينحني ودمـعه يظــل هـــامل

نوح ... نوح .... تخلص دنيته
ويل . ويل ... الوادع خوته
وين ... وين .... درب المشرعه
وين ابو النوماس
.....2.....

من صاح الكمر خوية ... احس بية النفس ضاك
كبل ما كالها الكافل ... يعني حان الفراك

ما كايل كبل يا خويه يحسيني
يبن النبي كوله ويا نظر عيني
تيهت الــــدرب وين الـــيدليني
اريد امشي العضيدي الظل يتانيني

اخ .... اخ ... وين انطي الوجه
اه .... اه ... يا صوب اتجه
وين ...وين ... درب المشرعه
ما ظلت انفاس

....3....

اه يا كـــلمة الخوه ... الما توافيهه كلمات
يحس بيها الفكد مثلي ... اجا طارش اخو مات

الاخو عازته عازة لو كرب يومه
الما عنده اخو من يسمع اهمومه
اليموت امن البواجي محد ايلومه
على الخوان يحله البجي معلومه

موت ... موت ... بجي المنفجع
نار ... نار ... تسعر بالضلع
وين ... وين ... درب المشرعه
مذبوح الاحساس

....4...

يا عباس يا خويه ... صحت ابعالي الصوت
دليني على امجانك ... تيهيتك يمبخوت

كالولي السهم صوب نظر عينك
صحت وفيت يالضحيت لحسينك
الشامت يضحك وراواني جفينك
واتعثر اجيــتك اســـمع اونينك

صوت ... صوت ... ونك اسمعه
ليك ... ليك ... يا جف ارفعه
وين ... وين ... درب المشرعه
حاجيت الانفاس


...5...

على بختك يبو فاضل ... لتخليني وتروح
تدري بروحتك خوية ... اتزيد اعلية الجروح

ياهو اليوكف ابظهري اعله عدواني
ترضاها اظل بالهيمه وحداني
يالصرت انه انته وانته صرت اني
حاجيني الدمع ميطفي نيراني

كوم ... كوم ... يمـكطع وصـــل
شوف شوف .... بحسين اشحصل
وين ... وين ... درب المشرعه
حاجيني عباس

......
تمت
......
موسى الخادم

تدري بطيحتك عباس ... طاحت دمعتي بحركه
انه اوياك موش اخوان ... روح بروح متعلكه
يا كافلي ... يا لغالي

...1...
خوية ابطحيتك عالكاع .. كلشي البية طاح اوياك
انت اعله الوجه مطروح ... وانه ابلا وجه انعاك
حرت ما بينك وما بين ... روحي الفاركت ملكاك
سهم الصــوبك بالعــين .. صوبني بسهم فـــركاك

مو بس انت فاكد شوف ... شوفي اعليك ما تلكه
انه اوياك موش اخوان ... روح بروح متعلكه
يا كافلي ... يا لغالي

...2...
من جاني الخبر عباس ... راسك صوبه العامود
طلعت امن المخيم نار .. تسعر بية يابو الجود
جم عثره اعثرت من صاح..علية حسين اخوك العود
ما يرجع كفيلج مات ... عفته امكطعيله زنود

من طولي اوكعت عباس ... واشتاكيت للملكه
انه اوياك موش اخوان ... روح بروح متعلكه
يا كافلي ... يا لغالي
.......٣.......
لـو ادري النهر عباس ... ياخذ روحـــك الحلوه
جا ما كتلك اعله الماي ... جا من شوفك اتروه
وين ألكـه بعــد يا حيد ... مثلك صاحب امروه
مثلك ما يصح بالناس ... عزب روحه للخوه

ماي العلكمي ابلياك ... مر طعمه شريد الكه
انه اوياك موش اخوان ... روح بروح متعلكه
يا كافلي ... يا لغالي

...4...
راح اشتاك الك كل حين.. مو كل ساعه كل لحضه
ما متعودة يوم ايفوت ... الا بشوفتك احضه
يانهر البخت ذبوحك ... وانه ابمايك اتوضه
جفّت دنيتي ابلياك ... واكليبي وكف نبضه

حزني اعليك ما ينقاس ... حكه يموت اي حكه
انه اوياك موش اخوان ... روح بروح متعلكه
يا كافلي ... يا لغالي

.....5.....
كلشي حاسبتله احساب... بس ما حاسبه الموتك
اتنفس هواك اشلون ... اعيش بدونك امروتك
ربّيتك بدي عباس ... اعرفك من همس صوتك
لا تتركني اترجـــاك ... لا تحرمني من خـــوتك

يالعشت العمر وياك ... مثل انفاسي والشهكه
انه اوياك موش اخوان ... روح بروح متعلكه
يا كافلي ... يا لغالي

.....6.....
التفارك مثيلك يوم ... حكهه ام الحزن تصبح
تغفى اعله الحزن والنوح...تصبح عل الاشد يجرح
اه يا فركت الخوان ... اشد من الذبح تذبح
ما تتوصف الاحوال ... بعدك حالتي ششرح

شبه حسين حالي اعليك... بية اثار جم سحكه
انه اوياك موش اخوان ... روح بروح متعلكه
يا كافلي ... يا لغالي
.....
تمت
.......
موسى الخادم

طاح العباس ... مطبور الراس ... باخر أنفاس
ظل يتعذر
بخيمتي أنعرضت صور ... طيحته بكتر النهر
أمخضب بدم النحر
جسمه أموذر

....1....
بالخيمه امناطرته بدمعي ... تغير وضعي ..
شنهو الصار
بلحضه الدنيا صارت ظلمه ... حسين ابهمه ... شفته اندار

شنهو الحل يالحسين صحت ما سمعني
ركض للمشرعه بنوح لاخيه و تركني
اعايـــله من ابعـــيد يضم جـــفه عني
مـــدري اشايل اوياه رجعلي وفجعني

بالراية حسين ... ردلي وجفين ... واسهام وعين
صاحب خدري
منظر ايهد السمه .... بي تحس بس فاطمه ... راح ابن حامي الحمه
جسمه اموذز
....2....
ردلي حسين ايكوم ويوكع ... من المصرع ...
رد بالنوح
وانه ابلا شوف اتلكيته ... ما حاجيته ...
جي مجروح
من مصرع عضيدة رجع محني ظهره
يا خوية اشهل اوداع يصيح واصبره
ماجن ذاك الحسين صبح ميه عمره
حـــقه اوداع الــعزاز يشيبه ويكبره

ردلي ابلا حيل .... متغير حيل
جن فوكه الخيل ...
جانت تسحك
من وصل يم خيمتي ..صاح ذبحو هيبتي ..
احزام ظهري بشدتي .... راسه اطبر
....3...
راح الجان ايخاف اعليه ... البل حنيه ...
عاش اوياي
لو ادري بسهم يصوبونه ... بذيج أعيونه ...
عفت الماي

ما يرويني كل ماي بعد حامي خدري
يبقى الشاطي مكسور بالدنيه يجري
عباس اعله طاري جبت هذا عمري
من بعـــدك يوفاي يــزيد انه قهري

لو ادري الماي .... يذبح وفاي ... ماكتله حشاي
يبسها الحر
جا بقيت اويه العطش ... حد مينشال النعش ...
لا شفت جسمه انفرش ... لسهام الشر
.....4.....
عباس الما كافل مثله ... دورت شكله
انسه اشلون
يا كلمة خوية أشكد حلوه ... جانت تسوه
هذا الكون

ما صدك مشه وعاف دمعتي اعله خدي
مو من طبعه عباس يخليني وحدي
يدري هو وحسين اعز كلشي عندي
اشلون ايفضل الموت جوابه انه ودي

عباس اشلون ... عاف اخته ام عون ... خاف يكولون ... ناس التكره
مو طبع راعي الشيم ... يترك اوداع الخيم ... واخته مذبوحه بسهم ... افراكه اليقهر

....5...
شلون اتخيل عمري اكبالي ... بدونه وحالي
شلون يصير
اتوقع تذبل عافيتي .... وتيبس ريتي ...
وكلبي يحير

موتي حتمن يحين بعد ليله وحده
الميت عدها عباس تعرف الاقصده
عندي غالي اهواي واعز وحدة عنده
ما ودعني من راح عرف ما اله رده

خاف ابجي اعليه ... ما كال البيه ...
الموت امتانيه ... راح بسكته
من زغر بي هالطبع ... ما يحب مني الدمع ... اشلون اذا بي انفجع
حامي الخدر
.......
تمت
.......
موسى الخادم

عباس يا نبع الماي … اول گمر ينطي افياي
غيره وشهامه ومرجله… حقها تعشگك كربله
عباس ... يا ابا الفضل ... ياعباس
....1....
من ينذكر طاري الوفه بلسان اهل ملكَه وكرم
نلكَه اسمك ابأول مثل واخر مثل يا بو الشيم
احروف اسمك ابين العرب متّربعه براس الهرم
نحجيهه كلمت حظ بخت لومه انته هالوادم عدم

اسمك على الراس انشال...من عنده صاغو العكَال
كشخة مضايفنه الهله
....2 ....
من خوتك ما تنوجد خوه على مر الدهر
لحسينك انطيت النحر واجفوفك وشوف النظر
وكفت الدنيه الموقفك اجلالاً ابعز وفخر
ظنوك تنذل بالعطش يميبس ارياكَ النهر

النهر مذّبحه سيوف ... موقفك ذبّاحه انشوف
گطرة وفه اتغطي الفله
.....3.....
يا كافل الحره التي ما واحـــد الشافلهه ظل
زينب ستر رب العرش كافلهه لازم أبن اصل
لو ما علي ايعرفك كفو ما كفلاك الها يخل
حي الله بطن النكَلتك يا ابا الفضل يا ابا الفضل

لا كافل الا العباس .... خل تستمع كل الناس
زينب تضل امدلله

.....4......
سفرت عطائك للخلق يابا الفضل ما تنوصف
كل حاجه يمك تنكظي مو وحده لو جانت الف
كلمن يزورك سيدي تستقبله بحب وعطف
مشهوده الك تشفي العلل قبل المدامع ما تجف

كل طالب ايريد ادواه .... عباس اسمك ينخاه
والحاجه تكضيهه اله

.........
تمت
.........
موسى الخادم

الحومه صارت ترتجف فرسانها
ابو فاضل من دخل ميدانها

....1....
طب عليهم كمر هاشم غــاير
كلها صاحت صوت الله الساتر
البطل بيهم صار يكسر خاطر
وموته من بعيد صار ايناطر

كل شجاعه بس اله عنوانها
ابو فاضل من دخل ميدانها

....2....
صارت الدنيا ظلام ابشوفه
أرتعد جيش الكفر بصفوفه
الجان بيهم زلمه رد للكوفه
يركض وتركض وراه الخوفه

جيوش امية جفه هد اركانها
ابو فاضل من دخل ميدانها
....3....
نزل شايل ســـيف ابـــوه أبأيده
حالف اعله الجيش كله ايبيده
ادكَول ما داخل حرب جن عيده
يضحك وضحكاته هيبه تزيده

الحومه طباها ولزم بعنانها
ابو فاضل من دخل ميدانها
....4.....
صاح عباس الـــزلم افــنيها
والزلم ظل منها بس طاريها
اذراعه ما واحد كدر يلويها
كَبله بس حيدر علي امسويها

خرس اليحجي وحجو خرسانها
ابو فاصل من دخل ميدانها
.....5.....
تشهد انصار الحسين افعاله
حيل يهــوه المعركه وتحلاله
اكباله صارو هل ألوف اوشاله
لا ســرايا الخــله لا خــــياله

خله من الجيش بس غلمانها
ابو فاضل من دخل ميدانها
.....6.....
طش عليهم خوف ما طش سيفه
وصار يحصدهم الهيبه ابكيفه
الشرد بيهم بّرد ابحر صيفه
حادهم حود الغنهم لمضيفه

ضربته البل جيش ظل نيشانها
ابو فاضل من دخل ميدانها
.....7.....
ختم قصته اعله الفرات بزوده
وافه لسكينه ورقية اعهوده
بجفه شال الماي وانطه زنوده
وجربته التارسهه مي شهوده

تطفي خيمات العلت نيرانها
ابو فاضل من دخل ميدانها
......
تمت
.......
موسى الخادم

بالطف نشوفك واكف استعداد
جن قارعة موت اعله كل جلاد
دخيلك ... دخيلك ... دخيلك يا بو فاضل

.....1.....
جفك يبو فاضل ... مثل الغضب نازل
وكت الحرب انتَ
كل فارس أتلاكيه ... منه يظل طاريه
وكت الحرب انتَ

الف فـارس امـــامك يرتجف
وسبعهم يمشي كدامك زحف
يمــنتك تكلب الجيش وتـلف
وفـقارك ما يتيه كل عــرف
دخيلك .... دخيلك .... دخيلك يا بو فاضل
....2....

يا ويله يا ويله ... العاداك يا ويله
ميت كبل يومه
كل حرب تحلالك ... من يوكف اكبالك
ميت كبل يومه

مثل حيدر علي وكت الشدد
ابد متهـــمك العـــدة وعدد
تفض المعركة وتطلب بعد
نزالاتك عليها الكل شهــد

دخيلك ... دخيلك .... دخيلك يا بو فاضل




.....3.....

يا صاحب الهمه ... ناصر لبو اليمه
وانت بعمر ساعه
بل بسمه لاكيته ... واجفوفك أنطيته
وانت بعمر ساعه

مثل شخصك فلا جابت مرة
صغير انت ولزمت الكنطرة
على الموت العدة ملزم سرة
علي بكبرة افتخر بيك وقرة

دخيلك .... دخيلك ... دخيلك يا بو فاضل



.....4....

يل عالنهر كاتب ... خصمي انتَ مو صاحب
ما انحني المايك
جرفينك امحيها ... لو روحي انطيها
ما انحني المايك

بوكفتك قــدمت اعظم درس
رويت العــالم بعــزت النفس
منو مسويها كبلك يا شرس
النهر شابع عطش يمك يحس

دخيلك ... دخيلك .... دخيلك يا بو فاضل



.....5.....

كل شيعي سالفته ... يا ابا الفضل انت
يا منبع الغيرة
لليكصد احدودك ...فايض كرم جودك
يامنبع الغيرة

اليدك بابك يبن حيدر علي
يقينن كل همومه تنجلي
الحوائج يقضي الك ربنه العلي
ولي نعم الولي نعم الولي

دخيلك ... دخيلك .... دخيلك يا بو فاضل
.......
تمت
.......
موسى الخادم

كلشي انتهى وي طيحتك ... عباس يا ضي عيني
ما ادري اشيلك للخيم ... ما ادري اشيل اسنيني

_1_
جيتك ركض .. من الخيم ..ما ادري خوية بحالي
من شاهدت.. طولك هوه ..صارت ظلام اكبالي
ظهري انحنه .. وي طيحتك ..عباس خوية الغالي

اجيت بكسرتي ... انشف ابدمعتي ...
واصبر عبرتي ... يخوية
على طولي اوكعت ... صحت بسمك صحت ...
عدل بعدك متت ... يخوية


اكعد يحماي الخدر ... لا وحدَّي اتخليني
ما ادري اشيلك للخيم ... ما ادري اشيل اسنيني



_2_

ياابا الفضل ..كوم ابعجل..رد ضحكتي اعله اشفافي
متلوك الك .. هالنومه ابد ... نومك يهد اجتافي
كلشي فداء .. ايروح الك.. بس انت اريد وكافي

يأغله امن الهوه... علي رد الضوه ... يشيال أللوه
يروحي
يعباس الشهم.. حرت منك شلم .. بقى منك رسم
يروحي

ماتسوه دنياتي بعد ... عينك منو يواسيني
ما ادري اشيلك للخيم ... ما ادري اشيل اسنيني
...




_3_

وين انطي يا .. خوية الوجه ..والمن ادير اعيوني
عاين بقيت .. الوحدي ... وهواي الي كرهوني
اكعد ولو .. ساعة زمن ... نرجع سوه لضعوني

اشيلك عالمتن ..لعند ام الحزن .. الك كلشي يحن
يكافل
رقية اروحيتك... تناطر جيتك ... ترد ابرايتك
يكافل

ان جان ظلك جم نفس ... يا بو الشيم حاجيني
ما ادري اشيلك للخيم ... ما ادري اشيل اسنيني
.....




_4_

عين الخيام .. وعين الك ... واثنيكم وي روحي
محتار ارد .. لو انه اضل... يمك أبدمعي ونوحي
يالكطعوك .. اعله النهر ... انت اشد اجروحي

يسفي البي اهد ..الك جفي امد .. اروح وليك ارد ... اريدك
ترد روحك الي ... طلبتك من علي ... يكافل كل هلي ... اريدك

مو صعبه من ترجع عدل ... يالموتتك تاذيني
ما ادري اشيلك للخيم ... ما ادري اشيل اسنيني

.....




_5_

انطيني حل... يابو الوفه .. منك اريد جوابي
زينب اذا .. رد للخيم ... خافن تشوف اصوابي
شنطي عذر .. لو سائلت ... عنك يأغله احبابي

ينايم عالترب ... خبر موتك صعب ... يحمله كل كلب ... اخبرك
يالمكطع وذر ... جفوفك عالنهر ... خذت مني النظر ...اخبرك

عباس كل هذا النهر ... بعدك فلا يرويني
ما ادري اشيلك للخيم ... ما ادري اشيل اسنيني
........

تمت

كلمات
موسى الخادم

نزله

والنعم ... والنعم ... من ابو فاضل

...1...
أسوايته ما واحد السواهه
جيوش اميه اويه الارض ساواهه

ما واحد الراسه رفع
كدامه خيرهم ركع
ساترهم بزوده هدم
بقبضت يمينه الكل وكع

حاداهم ... مثل الغنم ... حاداهم
بجاهم .. ما جن زلم ... بجاهم

والنعم ... من ابو فاضل


.....2.....
من دخل للحومه ذل ارجالهه
بكيفه يستنكي ابركاب ابطالهه

يم سيفه ما واحد وكف
كاع الحرب بيهم خسف
المنه شرد زلمه انحسب
خطَّاف الارواح انعرف

جن حيدر ... بالمعركه ... جن حيدر
باد الشر ... عالمشرعه ... باد الشر

والنعم من ابو فاضل




....3...

فارس ابطبته الحرب يكضيهه
اتموت كلهه بصولته اليبديهه

عباس ابو الغيره الشهم
تاريخه حافل بالحسم
يا ويله كلمن كابله
من عنده يبقى بس اسم

خزراته ... كبله تهد ... خزراته
صولاته ... عده وعدد ... صولاته

والنعم .... مو ابو فاضل



...4...

صار ملك الموت كافل زينب
منة ما صح لا يصح كل مهرب

موت احمر اتعرفه العده
سبعين فارس وحده
كابلهم ابكل مفخره
والشاهد اعليه ساعده

بركابهم ... سيفه انطبع ... بركابهم
ماهابهم... صيته ارتفع ... ماهابهم


والنعم .... من ابو فاضل


...5...

هيبته هيبة علي وأفعاله
كربله شهدتله والخياله

ما خله روس اعله الركب
امن الدنيه أسماميهم شطب
راوهم انجوم الظهر
لا مو عجب وين العجب

منَّ أسمه ... اتخاف الكفر .. من أسمه
من عزمه ... فنه اليفر ... من عزمه

والنعم ... من ابو فاضل
......

تمت


كلمات
موسى الخادم

نزله


عباس ... عباس

...1...

الف السلام اعليه ... الضحى الاخوه جفيه
محد وصل طاريه ... بدر الهواشم

ما مثله بين الناس ... اجاب الحجر عالماس
واحد فقط عباس ... وجه الله راسم

من دورت اعيونه الكمر غار
من يوسف احله سيد الأقمار

عباس .... عباس



...2...
حامل لواء حسين ... غيرة وشجاعة ودين
عزب لاخيه العين ... وانطاهه فدوه
وكفه اله عالماي ... بينت معاني هواي ...
عن كلمة الوفاي ... الوافه الاخوَّه

شابع عطش والشاطي يمناه
ما شرب كطره ظل على اضماه
عباس ... عباس
...3....
اسمه انكتب صنديد ... عنده الحرب كالعيد
وحده السراية ايبيد ... شاهد فقاره
صولاته كلهه اثكال .... مو كلمة التنكال
منه تفر الابطال .... توجع يساره

تاريخه حافل بالبطولات
قائد فلا خاسر نزلات
عباس ... عباس
.......4......
من معجزات الكون ... ما نلكه بالمي لون
بس غيرهاه شلون ... كافل خواته
بالعاشر احمر صار ... هذا الجره والصار
بي كلشي ضل محتار ... غير صفاته

بالدم صبغ عباس الاجروف
هذا التسولف بيه الاطفوف
عباس ... عباس
...5...
بي كربله للدوم ... تتباهه مو بس يوم ...
ابشباجه كل ملزوم .... تتشافه علته
باب الحوائج غير ... يمه الكصد ميحير
يشهدله حتى الطير ... ما منة بخته

شافي العلل ومهيَّد الاوجاع
بصحنه الحوائج تنقضي ابساع
عباس ... عباس
.......

كلمات
موسى الخادم

شور


ابو فاضل .... ابو فاضل
......1.....
باب الحوائج عدنه عباس
كعبة الناس
راعي الاحساس
كلمن اتعنه الضريحه بحاجه معروف
يجلي كل همه ويرده رافع الراس

عباس ... حلو الرسوم
عباس ... يجلي الهموم
عباس ... كافل الناس
عباس ... باقي للدوم

يشهدله كلشي ابفخر
لحسينه جان الظهر
ما مثله بين البشر
عباس

صار اسمه مضرب مثل
المات بحضرته عدل
يسمع كلامه الاجل
عباس
.......2.......
عباس قبله االكل الاحرار
غيره معروف
ضحه الجفوف
سيفه كطاع الركب كطاع الانفاس
بي يلوذ الخايف الطايح بالاخطار

عباس ... زين الارجال
عباس ... يعرف الحال
عباس ... ناصر حسين
عباس ... كل شرف نال

كبه ومناير ذهب
وبصحنه صار العجب
ذكر اسمه يجلي التعب
عباس

كافل خواته بعزم
ما مثله بين الزلم
لايك عليه هالاسم
عباس
......3.....
فاتح مضيفه المايرد ضيف
سفرته الخير
شبعت الطير
بالكرم مثل الحسن مثل ام الحسين
غيمته ياناس تمطر كل شته وصيف

عباس ... عزَّب الروح
عباس ... شافي الجروح
عباس ... لليجي ضيف
عباس ... بابه مفتوح

تشهد ألة كربله
ميرجع اليسأله
يستقبله بيا هله
عباس

تاريخه حافل وفه
عطره امتزج عاطفه
اسمه العلي امشرفه
عباس
........4......
بشباجه نشتم عطر الحسين
بوم عاشور
حسين اله يزور
بس نحر يكصد عضيده الراس مكطوع
ويمكن بشباجه يكعد يوم يومين

عباس .... عشك الحسين
عباس .... شوفت العين
عباس .... سيد الماي
عباس ... ضحه جفين

اهل السماء حيَّته
واتباهت بصورته
وافه الشهم لخوته
عباس

نجمه ارتفع بالسمه
بي تفتخر فاطمه
قائد رسم ملحمه
عباس
.......
كلمات
موسى الخادم