#_قصيدة_للقاسم_ابن_الحسن
محرم 1447 هـ 2025 م


عريس عدنا ابن الحسن..
گومن نشعل شموعة
======================
يلله يعماتة بعجل  كَومن نشعل شموعة
عريس رايح للاجل  كَومن نشعل شموعة
ويلاه يا دهري شعمل  گومن نشعل شموعة
واسني بوليدي المشة  وانة اصبحت مفجوعة
عريس عدنا ابن الحسن  گومن نشعل شموعة
=====================
ثوب الشهادة يلوك الة  كَومن نشعل شموعة
وارثها من عودة وهلة  كَومن نشعل شموعة
خنزفة زفة معــــــدلة  كَومن نشعل شموعة
وليدي واعز من الهوة  واليوم ازفة ابلوعة
عريس عدنا ابن الحسن  گومن نشعل شموعة
============++++++++++++
محظرتلك ثياب العرس
يالعندي اغلى من النفس
اهدومك بدم تنتــــــرس
للموت ازفك يالــولد والونة ما مسموعة
===================
ها يبني يا لب الگلب
زفيتك بثوب الحرب
ودموعي يالغالي تصب
گلبي طلع لمن رحت بس لازماتة اضلوعة
====================
اتهنة يبعد ارويحتي
وخليني انة ابمحنتي
تفت الصخر يا ونتي
ما حسبت تالي العمر عرسك نطفي اشموعة
======================
أسالكم الدعاء رائد الاسدي

من  نزل للحومه
چن علي بعلومه

هذا الأكبر............هذا الأكبر
******************************
يسل بتاره.....يشن  غاره  صگر  سيفه غضب
هذا ابو الشيمه..يحط غيمه فخر شيخ العرب
ماخذ الشاره...دوت ناره.....زعل  يوم  الحرب
ياهلا بزوده...يجي بجوده....زرع  بيهم  رعب

نبع طاهر يومه
چن علي بعلومه
*******************************
رايته الخضره...وفه ابعمره.....فخر جده علي
هاي حملاته....علي ابذاته....  شبه طه   جلي
وافد ابدينه....رضا اسكينه...علي اشگد معتلي
يكتب افكاره ....بده  ابثاره....رفع  چفه علي

حلوه چنهه ارسومه
چن   علي   بعلومه
*******************************
رد علي بيها ..تره احچيها... شبه موته  حمر
بيرغ الساده...جزه القاده...علي واسمه فخر
حلوه بزنوده..وفه اعهوده....ترس خيمه نهر
غيره مشهوده...اجه بجوده....مثل عمه  گمر

تضوي حتى انجومه
چن علي بعلومه
*******************************
خيبره ردها...وصل حدها...رحم  سيفه لطف
رافع الرايه...يدك  ثايه.....يصف  سدها حلف
هذا ابن طه....سمه اتباها....رسم  سوح الشرف
ذل مياديها......علي وبيها.......رجف ركن النجف

سيفه يجلي اهمومه
چن علي بعلومه
*******************************
صارمه بكيفه....اخذ حيفه...مطر  غيضه وصل
حلوه بطباعه....على اذراعه....مثل عمه  حمل
مصدر الغيره...حلو سيره...وفه احسينه نزل
وفه ابسنينه....نصر دينه....حذف صوت الجهل

صرح نحر ادمومه
چن علي بعلومه
*******************************
تمت بعون الله تعالى الشاعر____يوسف_الفتلاوي

ذكرياتك يوجعني
كون أموت وياك يبني

حالي جن حال الأيتام
صحت عالدنيا السلام
ــــــــ ❁ ❁ ❁ ــــــــ



من رحت من عمري أبشرك صار ظلمة بلاضوه
والولد عند امـه غالي وأغلى حتـى من الهوى
وگــلبي لـمـن ودعـتني بـنـار فرگـاك انـجـوه
ومـــن رحــت حيلي بغيابك بيد دنياك الوه

راح اضل عالانتضار
وسـهر بلــيل ونــهار

وعيني بعـدك مـاتنام
حالي جن حال الأيتام

ــــــــ ❁ ❁ ❁ ــــــــ

حلــم جــان اغلى بحيـاتي من اشوفن زفتك
وگــلبـي منــي ايريد يـبني هسه حضر حنتك
اخ حــلـــمــي الماتحقق والله يـمة بغيبتك
ونـكـسر گلبي وي ضهري بيوم صارت طيحتك

مـاتحقق هل حلم
زفة صارت كلهه دم

ودنيتي صارت ظلام
حالي جن حال الايتام

ــــــــ ❁ ❁ ❁ ــــــــ

روحي خلص كل صبرهه وبعد ماضلي صبر
عـيني مـذبـوحـة بغيابك والسهر قاسي السهر
والعيون بلاية وجــهــك خالايات من  الـنضر
ومن رحت صحت بغيابك بعد مايسوه العمر

گلبي من ضاك الحزن
صـاح بـعد المن احن

البـعد مثل للــسهام

حالي جن حال الايتام

ــــــــ ❁ ❁ ❁ ــــــــ

الـــيالي بلا محنة ايمرن اعله الفاگدة
وانته تدري بي محنة ايصير گلب الوالدة
ونكسر گـلبي بغــيابك والـعدة يمة الـعدة
كسرو هواي الخواطر والگلب ثق ماهدة

انته ماتدري برحيلك
انكـسر گـلبي دخيلك

مثل جـنحان الحمام
حالي جن حال الايتام

ــــــــ ❁ ❁ ❁ ــــــــ

حضني لو حن اعله طولك انكسر يمة انكسر
ومــــن تــأذيك الســوالــف نـام يـمة واعــتذر
لئن گلبي امــفارگ بني ونـارة تـتنخه بجمر
وللي تــدفن هيــة أبـنهـه ويــاه تـدفـن هل عمر

يبني. يالقاسم عذاب
افراكهم هيج الشباب

والگلب متروس آلام
حالي جن حال اليتام

ــــــــ ❁ ❁ ❁ ــــــــ

الشاعر محمد البنداوي

نزله


ماخذ من علي شويه
شاب وفارس الدنيه
هذه هذه جسام
———-

نزل غاضب عليهم ما تدنوله
من الخوف ارجع همه صاحوله
وحساب الزلم ضلوا يحسبوله
انته الفاطمي العابرهم بطوله

نزل تجادح عيونه
يخوف مايخوفونه
غضب گاموا يشوفونه
عليهم من نزل

ماخذ من علي شويه
هذه هذه جسام
ــــــــ ❁ ❁ ❁ ــــــــ

برز روح الحسن ومحضر اجفوفه
من صطراته بيهم عاود الكوفه
علي ؟ لو گمر هاشم ياهو النشوفه
خله الجيش منه مجتف بخوفه

عليهم يلعب بإيده
زلزل بيهم البيده
شهم ويلوح البعيده
عليهم من نزل

ماخذ من علي شويه
هذه هذه جسام
ــــــــ ❁ ❁ ❁ ــــــــ

رووس القاده ترجف بيده خلاهه
وجثث ابلايه رووس أمتار مشاهه
حگهه ام عون زينب بيك تتباهه
سلمت يمنتك وتصيح محلاهه

نزل بس مانزل راسه
الجيش مگطع انفاسه
شاب وعالي نوماسه
عليهم من نزل

ماخذ من علي شويه
هذه هذه جسام
ــــــــ ❁ ❁ ❁ ــــــــ

متربي العجيد بيت ابو الشيمه
صاح بصوت عالي وفزز الهيمه
فنه الينظر اعله ام عون والخيمه
اليوم الجيش سيفي يعيد تصميمه

كلمن يمنته اتسطره
بقالع خيبر يذكرى
تحرسك فاطمة الزهرة
عليهم من نزل

ماخذ من علي شويه
هذه هذه جسام
ــــــــ ❁ ❁ ❁ ــــــــ

واحد جنه ألف ضلو يشوفونه
ومثل عمه ابو فاضل غاضبه عيونه
بيمن من نزل بيمن يشبهونه
القالع خبير براسك يلجحونه

ابد ماجلت ايمينه
علي وي خزرته بعينه
شاب مضحي بسنينه
عليهم من نزل

ماخذ من علي شويه
هذه هذه جسام
ــــــــ ❁ ❁ ❁ ــــــــ

الشاعر محمد البنداوي

يبني ولچمة جروحي
        رايح يانبض روحي
اعاشر ونتي ونوحي.......  يجاسم

      اذا ناوي   السفر  عني
      اشمك وانته الاتشمني
يبني الخيبت ضني......... يجاسم
..........................
حگي من ابچي واعاتب يالدلالك تعب امك
يبني لو يحصل بديه بالگلب يايمه اضمك
يلي زغرك تعباني وفدوه اندار اعله  اسمك
انته يالساكن دليلي وگاعد ابنص عيني رسمك

        ياجاسم ويوميه اناطر
       تعوضلي تعبي يمه باجر

       شركه البينك وبيني
       نفسي وشوف البعيني
وحيده لا تخليني........ يجاسم
........................................
يمه والام عدهه ميزه يصير ابنهه اغله غالي
وآنه يبن اضناي اطلبك تعبي وسهر اليالي
رحت كلما تمشي خطوه الموت احسن بيه دنالي
حال طير انكسر جنحه من فركتك هذا حالي

        يا هضمتي ولچمة دليلي
        من فرگتك مانمت ليلي

         دورتك وسط گلبي
        لگيتك شمعتي بدربي
طلبتك يمه من ربي........ يجاسم
..........................
لچمة جروحي الغميجه ويا ثمر روحي ودليلي
يمه من ساعة رحيلك ماگمت وگفه اعله حيلي
واحد وما عندي غيرك بعدك ايموتني ليلي
تدري من كالولي ميت دمعتي ترست شليلي
      تتركني يالماعندي غيرك
      ماظنتي يقبل  ضميرك

        ليلي اشلون اخلصنك
         تگضي ابمدمع اونك
يبني وما اشوفنك........ يجاسم
.......................................
ام ولد ضلت تناطر وتدري مايرجع ولدهه
اخوه ماعنده ابمچانه وتمسح الدمعه اعله خدهه
شنهي ذنبي الويه طفهم والسيوف اعليه حدهه
ناخذ البيه دربي اشوفن وروحي ضلت بس وحدهه

      يالجنت يمي وآنه اشتاگ
    ياجاسم ويكتلني الافراگ

       يالرايح  خذت  كلشي
       المدمع عشره وي رمشي
يالذاخرتك النعشي........ يجاسم
   ........................................
آنه چفك چنت اذخره لو دنت مني المنيه
تحضر ابساعة مماتي يبني وتسبلي اديه
ومثلي يايمه ابمماتك ردتك اتهل دمعه اليه
بس شسوي ابهل مصيبه ويامصاب  الغاضريه

      طبعك حنين وماتجافي
     كافي البعد يايمه كافي

      يمه وداعة عيونك
      شلي  بالعمر دونك
    عايش بيه مضمونك... يجاسم



خادم اهل البيت علي الزرگاني

رباك الحسن وشلون رباك
دله وسيف بالديوان انطاك
گلك دله للضيف  بيدك سلمك سيف
يم حسين عزب
::::::
كرام الضيف واجب هذا معلوم
يگعــــد بالهــــــــلا وبآهلا ایگوم
باچر واجبك يكبر بعـــــــــد حيل
للحسين انت باچر يبني مقسوم
صار دگله عمي   الك مرخوص دمي
نفذها الوصيه
الواجب يبقه واجب  عين وهو حاجب
عليك وهم عليه
اريدك كون ما تبخل عله حسين
صار دگله عمي وموش بعدين
اريدك تاخذ الحيف   بيدك سلمك سيف
يم حسين عزب
::::::
اريدك بعد ابوك تشد الحزام
وأريدك كون تطبگ هام بالهام
شما يطلب حسين دگله اخذ هاك
بيض وجهك هاك اسمع يجاسم
يومك ادري بالطف  كف يبني الزلم كف
ابوك الحسن وصاك
خيشوفك بيه  ادخل چن منيه
اريدك يبني هناك
باچر يبني زفتك وانه فرحان
باچر سيف بيدك هسه فنجان
مثل حرورة الصيف   بيدك سلمك سيف
يم حسين عزب
::::::
باچر کون اريدك مثل عباس
اريدك كون يبني الراس براس
قتال العرب جدك ابو حسين
ولجل حسين كون تعلم الناس
البس ثوبي باچر   واگطعها المناحر
گدها  انت گدها
يبني الصعبه سهله   يم حسين گله
چف ايدك يحلها
اعزب بيك باچر موش بالزاد
تنراد المـــــواقف يبني تنراد
مر بوالدك طيف    بيدك سلمك سيف
يم حسين عزب
::::::
يبني وهاك اسمع مني مــــوضوع
باچر زفتك مــــــــــا ريدن شموع
اريدك كون سيف ودرع والطاس
مشروعي انت يكمل يبني مشروع
بالطف ونعزب   باچر قصص نكتب
ونحب الشهاده
حار وتچوي اريدك   باچر يبني عيدك
القتال والنه عاده
لا تبخل بدمع يبني جاسم
اريدك بالقتال تكون حاسم
صار بدون اي كيف   بيدك سلمك سيف
يم حسين عزب
::::::
هاي اخر وصيه واستمع هاك
هاك احتفظ بيها لباچر ویاك
بيض وجهي يم حسين جاسم
باچر  كون توجع يبني يمناك
انه ابن الحسن گول  فحل يا ابن الفحول
جدك علي الكرار
يالكلك شهامه   لترد بالسلامه
اريدك تاخذ الثأر
راح اختم كلامي من اسمع
اريدك كون مثل الأسد تطلع
جدك حيدر مخيف   بيدك سلمك سيف
يم حسين عزب
::::::
علي جبار الكعبي
الفاتحه لوالدي

#قصائد_الامام_القاسم_ع

حي زودك بالحـرب يا حلاتك من تطب
هاشمي وهيبه
حگــك اتجيبه
ـــــــــــــ
نازل زود سيـــفك بالـحرب ايه
يا ضـــرغام يالماتثني الحجايه
يبن الصيت خل اترفرف الرايه
جاســــم ها يا نهر الوفه ومايه
يا حلاتك يا شهم من وفائك والنعم
هاشمي وهيبه
حگــك اتجيبه
ـــــــــــــــ
يا جـســـــام يمخلي الزلم تبـلد
حي يمناك زودك بالحرب يرعد
صگـر وهاد هاشم بالوغه تشتد
وي عباس سيفك باشط ويمرد
ويه عمـك يا هله تحلــه هاي المرجله
هاشمي وهيبه
حگــك اتجيبه
ـــــــــــــــــــ
جن عباس وبظهرك شفت عمك
شنهي الجيش هذا الجيش ماهمك
يا جسام يمحـلي الحرب بأسمك
ترهب خـيل من دم الحسن دمك
يالجمالك للحسن حتى خصمك هم صفن
هاشمي وهيبه
حگــك اتجيبه
ـــــــــــــــــ
سيفك جاع وبروس إلزلم ياكل
يبـــــن احيود يا رداد كل عايل
هد يا حــيد لازم ظهرك الكـافل
سيفك حـــار ليثني ولا يجامل
يلا بيهم يا صــگر رمـــــله امك تفتخر
هاشمي وهيبه
حگـك اتجـيبه
ـــــــــــــــــــــ
شد واختار ويـن الروس والقاده
سل السيف خيبر عيده وامجاده
ياهو يــــــعيل ما ينعـال بالساده
فـــوت ابزود ادب جيش التماده
خـــل ترفرف رايتك خــــل تهلهل عمتك
هاشمي وهيبه
حگــك اتجيبه
ـــــــــــــــــــــ
يا جسام يا شبـــل الحسـن كبر
هذا الــــــيوم رادك والدك تظهر
راوي الگوم سيفك بالرگب يفتر
يبن الصيت حكك بالحرب تفخر
هذا يومــك والعـزم ها يجـــاسم لا تهم
هاشمي وهيبه
حگـك اتجـيبه
ــــــــــــــــــــــ
الخادم المقصر ناجي ابو كيان الصالحي
ونسألكم الدعاء لي ولوالدي 2025

#قصائد_الامام_القاسم_ع الليله ٨

يلا حيهم يجسام يلا حيهم
_
يلا يا ابن الحسن طب ليها
يلا وبسيفك غــضب بجيها
حربك وانته الحرب راعيها
كل شده انته بعزم تكضيها
يلا حيهم يجسام يلا حيهم
_
جاسم وهيبه عــلي بعيونه
نازل ابعزم الكمــــر تدرونه
هاشمي وضربت فحل بفنونه
ونس الحومه الشهم ايقونه
يلا حيهم يجسام يلا حيهم
____
نازل وطالع شمس محـلاها
جاسم وصولة علــــي رداها
زلمه ومعدل زلــــــــم بچاها
تيهت حــــتى الدرب خلاها
يلا حيهم يجسام يلا حيهم
_
يزعل وحيل الزعــل يحلاله
بكر ابن غانم بجه من أخياله
بهذل الجيش ولعـــب بحواله
ماكو خيل وشـــردت الخياله
يلا حيهم يجسام يلا حيهم
___
يا هلا بهذا الفتــــى النرواني
خله الجيوش ابهجمته اتعاني
ابن المبجي زلــــــــم هذا اني
أفزع وعًــــــمي السبط قرآني
يلا حيهم يجسام يلا حيهم
_
وصفه يصعب ياحلاة ارسومه
نازل وريحة نبــــــــي بهدومه
هذا المبجي الكـًـــفر من يومه
سيفه بيده ويكضــي الملزومه
يلا حيهم يجسام يلا حيهم
_
الخادم المقصر ناجي ابو كيان الصالحي ونسالكم الدعاء لي ولوالدي وللمؤمنين والمؤمنات

#قصائد_الامام_القاسم_عليه_السلام
#الليله_الثامنه



جاسم لاوين جاسم لاوين يمه ناوي السفر جاسم لاوين
شيصبر العين شيصبر العين بعدك اشبع قهر شيصبر العين
___

يوليدي طافي الشمع مات الفرح بس دمع
ضليت انه والوجــــع جاسم يبعد امك
يا غربتي مـــن رحت يا يمه احسب متت
ارجعلي فدوه صحت جاسم يبعد امك
مات الورد والنـــــده بيك افجعوني العده
تعرف گلـــــــب والده جاسم يبعد امك
يا سهم البين يا سهم البين يمه يكسر ظهر يا سهم البين
شيصبر العين شيصبر العين بعدك اشبع قهر شيصبر العين
_

عريـس اشـوفك ردت تالي رحت من وكت
عرسك صدگ ما شفت جاسم يبعد امك
يبني الفــــرح ما كمل يبن الحـسن يالأمل
دمعة اعيٕــــــوني تهل جاسم يبعد امك
زفيتك ابدمــعتـــــــي ضليت انه وحسرتي
طفو صــدگ شمــعتي جاسم يبعد امك
واصفگ چفين واصفگ چفين يمه راح النضر واصفگ چفين
شيصبر العين شيصبر العين بعدك اشبع قهر شيصبر العين
_

يبــني يـــطولك ورد لحــضاني ترجع بعد
ترجعلي يــوم السعد جاسم يبعد امك
يالحنــــتك من دمه جرح اشـــفاك الضمه
يا نجمه تضوي السمه جاسم يبعد امك
وجهك يچــنه الگـمر يولــيدي انته النضر
حاربني يبنـــي الدهر جاسم يبعد امك
ياحلم اسنين ياحلم اسنين يمه جار القدر ياحلم اسنين
شيصبر العين شيصبر العين بعدك اشبع قهر شيصبر العين
____

گلبي انجوه ابفرگتك ليش انحرم شوفتك
كسرتــني يا طيحتك جاسم يبعد امك
يا حلمي مال الامس ماتت احلام العرس
جاسم يبعد النفــــس جاسم يبعد امك
رد ليه يا فرحتـــــــي انته الضوه ابدنيتي
ونت فگـــــــــد ونتي جاسم يبعد امك
يغله الغالين يغله الغالين يبني انته العمر يغله الغالين
شيصبر العين شيصبر العين بعدك اشبع قهر شيصبر العين
__

ليل ودمــوع وعتـب ضليت احاچي الدرب
بخدودي دمعي كتب جاسم يبعد امك
گـــلبي ييمه امـتحـن عذبنــي حيل الزمن
تمشي واضل للمـحن جاسم يبعد امك
باجــــر اروح ابيسر والــحادي يمه الشمر
هجرك كسرلي الظهر جاسم يبعد امك
دمع الخدين دمع الخدين يبني مثل الجمر دمع الخدين
شيصبر العين شيصبر العين بعدك اشبع قهر شيصبر العين
____
الخادم المقصر ناجي ابو كيان الصالحــــــي ونسالكم الدعاء لي ولوالدي

#قصائد_الامام_المهدي_عج


ذاب الگلب بغيابـــك
ارحم حنين احـبابك
يالمــــهدي يا غالينه
فدوه لعبيـــر اترابك
_

يالمهدي عطشانه الگلوب الشـوفك
ندعيلك وندعي تجينـــه اطيـوفك
نكتب عجل والدمع خط احـروفك
اقبلنه يبن الحسن فدوه اضـيوفك
يالمهدي طـول يومـك
خلي نـــــشم اهدومك
يالمهــــــدي يا غـالينه
فدوه لعـــــبير إترابك
__

يالمهدي جــا يمتـــه ترف الرايــــه
ندعي العجل يالمهدي صار اهوايه
ويانه تگــــــصد هل ســــنه مشايه
وفايه حــــــــد گطع الــنحر وفايه
يالمهدي شنهي اخـبارك
يمـــــته تنــــــــور دارك
يالمهـــــــــدي يا غالينه
فــدوه لعبير اترابـــــك
____

كل جمــــــعه نتأمل ظـهـورك بيهه
عطشانه الگــــلوب وتجي اترويهه
عين التحبــــــك ما سكت جاريهه
انته الحنـــــــين ورايـــــتك عليهه
يبن الحــــــسن يا غالي
ارحـــــــم دمعنه الهالي
يالمهــــدي يُــــا غالينه
فـــــدوه لعــبير اترابك
___

يالمهدي العيون وعلـــي مشــتاگه
دمعـة الــــــــفرگه ابغيبتك حراگه
طال الهـــجر والگلـب نار اشواگه
ما ينحمل طــــــبع البُعد وافراگه
دمعة عتـــــــب نجريهه
عين المحـــــب مر بيهه
يالـــــــــمهدي يا غالينه
فــــدوه لعبــــير اترابك
____

يا جمعه تــُظهر مو تعبنه وعينك
ذبل وردنـه وانته تحيي اسنـينك
وينك يمهدي يـــــبو صالح وينك
عطشان مذبوح وغريب حسينك
يمته تســــــــل فــقارك
ليهـــــُـــــسه تلهب نارك
يالمهــــُــــــدي يا غالينه
فــــــدوه لعـــبير اترابك
___

يمته تجينه يا ربيــع احساســـك
حزنك طويل وصار ابيض راسك
تنعى الحسين ابكـــربله وعباسك
مر بينه ها يبن الحسن مر ناسك
مر بينــــــه لوبــس ليله
نار الدمــــــــع ونســيله
يالمهـــــــــدي يا غالينه
فـــدوه لعبير اترابـــــك
_

الخادم المقصر ناجي ابو كيان الصالحــــــي ونسالكم الدعاء لي ولوالدي

#قصائد_جسام_ع
#محرم



يا زماني راح الولد راح
يا زماني شيفيد الاصياح
جسام راح امنيدي
جسام راح امنيدي
____

ابني العزيز ومهجتي خلاني اجر ابونتي
بعده اعيش ابغربتي يمه الولد يا محنتي
يالماشفت كلشي بعد طولك مثل غصن الورد
لحضاني ماضنك ترد يمه الولد يمه الولد
اسهر واعد بفركته ساعه اعله ساعه
ميته عسني ولا شفت لحضة وداعه
يا زماني وين الصبر وين
يا زماني ما تنشف العين
جسام راح امنيدي
جسام راح امنيدي
___

يوليدي مو وكت السفر رايد عمر هاك العمر
شيضلي يا ماي النضر بعدك ييمه اشبع قهر
يا فرحتي ووجه الصبح خلالي فكدك يا جرح
يرميني دهري بيا رمح يالماشفت لمحة فرح
يا سلوتي وشم الهوه جسام يبني
شيفيد عمري من رحت والهم غلبني
يا زماني مجروح الاحساس
يا زماني مختنكه الانفاس
جسام راح امنيدي
جسام راح امنيدي
_

بحلامي جن حنه وعرس يوليدي يا حلم الامس
ماادري دهري شكد شرس جسام يا بعد النفس
جنت احلم بعرسك صدك ما ادري يبني نفترك
عايفني كل لحضه احترك يا شهكه كل ونه اختنك
يا يمه احسب للعرس واحلامي راحت
يالشوفتك صارت حلم والاه بانت
يا زماني مات الحلم كيف ؟
يا زماني رد ابني لوطيف
جسام راح امنيدي
جسام راح امنيدي
_

جنت احلم ليوم الكبر بيدك تنزلني الكبر (القبر)
عاشرني يا يمه السهر جسام يا اجمل عطر
عريس اشوفك بالخيم يوليدي بس هذا الحلم
فوكي ترف مثل العلم يا يمه كل حلمي انهدم
عاشرني دمعي والحزن بعدك يغالي
شيفيد دمعي والبجي حزني بقالي
يا زماني شيفيد الاعتاب
يا زماني هم يرجع الغاب
جسام راح امنيدي
جسام راح امنيدي
_

انته الهوه وضاع الهوه جسام يالوجهك ضوه
لجروحي يا يمه دوه عايفني وي حزني سوه
يالماشفت حنه وشمع بفراكك احساسي انفجع
عاشرني يا يمه الدمع لمك بعد من يستمع
يا طولك الجنه كمر ما كمل بدرك
يا فرحتي وكل العمر مبيوك عمرك
يا زماني نار الهجر نار
يا زماني شتفيد الاعذار
جسام راح امنيدي
جسام راح امنيدي
_
تمت بحمد الله واهل البيت ع
الخادم:ناجي ابو كيان الصالحي ونسالكم الدعاء

#قصائد_جاسم_العريس_عليه_السلام



ماكو شــمع لاحـــــــــنه نـــــام ابرغــــد واتهنه
مقســـــوم ماشـــــوفنه عرســــــــك يالــــوليد
___*
ماتت احلام امـــك الچانت زهيـــه
رحت مــــن ايــدي يجاسم للمـــنيه
بعد شيفيد البچـــــي مــــــترد اليه
احلام يمه اتفرهدت فوگ الوطـــيه
يالفرهدو كل عمرك كسرو ضلع من امك
تبقالي بـــس الونه والــــــــونه شتفــيد
___*
راحت احلام الـــعمر يبنـي وتبــدت
ونبلة افراگك طوت حلمي وتعــدت
دنيا لمك يالوليـــد اشــلون لچمــت
من خذت بدرك ييمه روحـي سلــت
سلتني يبني الحسره وبگلبي تچوي الجمره
گلي اشبــــــعد اتمنه يالرايح ابعــــــــــــيـد
__*
يمه يا جاسم بعــــد شـــترجــه گلي
ايست مــــن الرجـــوع ومّــــا تردلي
يا بعد عــــــمر امــك ويا بعد اهلــي
الدنيا عگبك لا تضن يمه صـــحـتلي
حيرني بـعدك دهـــــري ماخذ افــــراگك عمري
ليه الهـــجر يـــــــتعنه گـــــــبل الـــــمــواعيد
_____*
صفنة اغروب ابخيالي وليلي چلچل
من وكت جسام يبني ليش ترحـَــل؟
ورده روحي ابفرگتـــك يا يمه تذبل
ياهو يمه بغيبتك عن حــــالي يسأل
يا وردة امك ويــــــنك؟ مشتاگه عـيني لعيــنك
نضرت اعيونــــــك جنه يوليــــــــــدي الوحــيد
___*
الوالده تعرف گلبها اشـــــگد حنـينه
گلبي بفراگــــــك كثــــر يبني ونينه
يا حلم عمري صدگ رحــت امندينه
صدگ ما تلحگ بـــعد يمــه انسبينه
امك يــــــــجاسم تـندب بعــــــدك ظهرها امحدب
يبني الوكـــت عــــطشنه مــــــــن عــــــدنه شيريد
__*
اتفردهن كل ذكرياتي وحـــلم عمري
وامنيات امك مشـــــن جسام تدري
ردتـــك اتنزلنــي يبنـــي انتــه گبري
بس جزه يمه الحلم اه اعـــله صبري
راح الحلـــــــم يـــالغالي مــــذبوح تالي اگــــــبالي
يبنــــــــي الزمن حارمنه چان الحلــــــــــم عيــــد
__*

تمت بحمدالله وتوفيقه: الخادم المقصر ناجي ابو كيان الصالحي ونسألكم الدعاء لي ولوالدي

#قصائد_الامام_سيد_علي_الحسيني_السيستاني_الله_يحفظه





انصارك ونطلب امر تنطينه يا سايد العايل نطب ابعينه


____*

يا ســــيد السسـتاني احنه ابأمرك
هد بــــينه هايه ازلامك التنتّـظرك
لا تلتفت زلـــــمك تســنده الظهرك
حشدك فدائك سيـدي واسنـينه
____*

فتوة جــــهاد انصيحلك عد عينك
يا سيـــد الــــفتوه الزلـــم بيمينك
للشـيبه فدوه سيــــــدي واسنينك
لجل الصعاب ازلامك وهد بـينه

____*

بينه الـــعزم مـــن الگـــمر وازنوده
زلم الحـشد يا سـيـــــدي موجوده
هذا الوطن محروسه بيك احدوده
يا بونـــه انـته وفتـــوتك لبينه

_____*

ثوريـّـه هـــايه الفتــــوه اي ثوريه
مـــن الكفــــيـــل ازلامـــنه حربيه
نگلـــــــبها والله حـــــرك الخاچيه
داعش سحگنه وبعد وينه وينه

__*

يا سيــــد السســتاني بـس تامرنه
بدمّـــــانه يابو مــــحمد اي وقعنه
مــــــن غـــيرة العباس هد منبعنه
واحدنه عابــس جنناه حسينه

__*

واحدنه شايل غـــــيره من عباسه
رغم النواصـب ما تضعضع سـاسه
نار وحمــيه تطـــلع مــــن انـفاسه
يا ناصبي يبقه وعلـي امـربينه

__*

فتوت جهـادك تبــــــقه ثورة غيره
لولا جـــهودك چا بقـــــينه ابحيره
يا عالم وحـــبك صــــــعب تغييره
سيد علي قائدنه واحنه انعينه

___*
تمت بحمدالله وتوفيقه: الخادم المقصر ناجي ابو كيان الصالحي ونسألكم الدعاء لي ولوالدي

#قصائد_جسام_ع
#الليله_الثامنه

يوم الطبها جسام
اسقط كل الاعلام
ابن المجتبى جاي
شردت كلها للشام
_
ما همه العدد ما همته اجــــنود
يستنگى الطريده تگول صايود
من يغضب عليهم نـــــار نمرود
يمشي ابكيفه ابن الفخر والزود
انطي العمي العـــــيون
واحرس خيمة ام عون
وصاني الحـــُــسن گال
يبني تـــحمي الضعون
____
نشمي وزين اشواربهم الحـــيد
وين الزلمه گام ايلوحه ويصيد
ينزل عالكتايب صــاقعه ارعيد
حي الله الابد ما يقبــــــل يهيد
يوم الطب على الگوم
شردت كـــل الخصوم
ساگيهم رعــب خوف
ضيع كــــــــل الرسوم
___
يوم الطب عليهم دخــــلو انذار
جن الگاع مــــالت والهوه اندار
يا ستار اجــه الما يـــقبل اعذار
خربط كل خططهم واضمر النار
يمشي ابكيفه مـرتاح
يسمع بس الــــصياح
وين المـــــشرد لوين
طبها وصــارت انياح
__
گل العــــمه انتـــــه ارتاح مولاي
هاي انطيها الك وتروح الك هاي
ميهمني عددهـــــم واهزم اعداي
من عمي ابو فاضل مأخــذ الراي
انه ابـظـــهري عبـــاس
الـيوم اخنگها الانفاس
بــس ارخــــصلي والله
اسحگ كـــل الارجاس
____
يقره الزلزله ودگ رجلــــه بالگاع
ماكو اسباع بالطف مالگه اسباع
حي الله الشفيه وحـــلو الاطباع
ضاع اللاحه سيـفه ابكربله ضاع
عن جســــام شنگـول
گام ايصول وايجـول
غيم وامــــطر الكـون
جاسم حــــير اعقول
_

الخادم المقصر خادم الحسين ع: ناجي ابو كيان الصالحي ونسالكم الدعاء لي ولوالدي