#قصيدة_للامام_الحسين عليه السلام منهاج محرم 1447 هـ 2025 م نزال



كربلة طباها والزلم بچاها
=====================
انة ابن فارس بدرها وابن داحي ابوابها
وانة ابن فاتح حصنها اواگف اعله اعتابها
حسين انة وزودي حيدر ذو الفقار الطابها
سيفي بتار بيميني والحرب ما هابها
ترتجف خلاها والزلم بچاها
=====================
برز للحومة بيمينة لامتة والراية
بالعدد انة مقاتل وانتو جيش هواية
باچر التاريخ يكتب ياهو دكَ الثاية
انة من سادات هاشم بالوعد وفاية
رايتة علاها والزلم بچاها
==========================
حسين بالميدان وحدة والجيوش احتارت
خيل ورماح وبواتر كل كتر بي دارت
ثبت بالمركز يقــــاتل هاي ابد ما صارت
يگلب الجيش ابحملتة وال مية انهارت
كالغنم سواها والزلم بچاها
=========================
بالحرب سيف الله نازل ياهو يدنالة
ما يهاب ولا يبالي شما اجت خيالة
هاشمي وتدرون فعلة يصير گبل اقوالة
بالحرب گوم ال مية تخاف من اخيالة
بالرعب صاباها والزلم بچاها
===================
فگد عباس واخوتة وفگد كل انصارة
ظنوا وحيد وسهولة ايسلبون ديارة
صال بالعسكر وهمة اطشروا طشارة
كفر وارجاس ونواصب ماكو الكم چارة
الرگب گصاها والزلم بچاها
====================
ابكربلة سطر ملاحم منها ناخذ عبرة.
بطل والسيف بيمينة من يصلة ويجرة
مثل لمح البصر طبهم حيراهم امرة
اليوم گاع الغاضرية من دماهم حمرة
الارض رواها والزلم بچاها
===================
أسالكم الدعاء رائد الاسدي

ابوسط جيش الاعادي هالسؤال اندار
علي الاڪبــــر برز لــو احمد المختار
جيش الحومه مرتاب     يسأل رايد اجواب
علي الاڪبــــر برز لــو احمد المختار
🔴🔴🔴🔴
شخص چـــنه النبي ياسين     دخل لرض الحرب يثأر
تنـــادي الــوادم المخـــــتار    اجـــانه لو علي الاڪبر
ضجيج اصبح على الميدان     رجعنه المعرڪـة خيبر
وگطع ڪـل النزاع وصاح     انــــه شــبل البطل حيدر
علي ابن الحُسين وشبل أبو الحسنين
أنه نجــــل الهــمام الضــارب ابسيفين
جدي القالع الباب    يسأل رايد اجواب
علي الاڪبــــر برز لــو احمد المختار
🔴🔴🔴🔴
أنه شبل العرش واللوح      وابن مكـــه ومـنه وزمزم
ابن هـــاشم وابن عدنان      وانه جـدي النـبي الاعظم
ابد لا مــا اعوف حسين      امـــوت ابدربـــــه واتخذم
اطـــب ابهــــيئة الڪرار    ابعزم راڪب على الادهم
اريد ابڪربله نحـري يضل مذبوح
واريدن تعتلي الرب السماء الروح
سيف الغيره ماهاب    يسأل رايد اجواب
علي الاڪبــــر برز لــو احمد المختار
🔴🔴🔴🔴
يســـبح درعي للقــــــيوم      وعلى سيفي اسم جدي
وأريد ابدمي هــــذا اليوم      ملاحم ڪــــربله تبدي
دخلـــت ورافـــــع البــتار     وابن غـــانم صبح ندي
اصرعه وارجع ابكل زود     شهم وابقه على وعدي
وابد لاماتفر من صارمي الظلام
لخلي تشهـد ابطف ڪربله الايام
ودمع اخدوري سچاب     يسأل رايد اجواب
علي الاڪبــــر برز لــو احمد المختار
🔴🔴🔴🔴
ربيت ابغــــيرة العباس    اريد اليوصــل اخيامي
نزل ويــايه ملچ الموت     دخل للحـــومه جدامي
اقاتل عسڪــر العدوان    واحامي ابدمي اسلامي
تضل مرسومة بالميدان    دمـو؏ وصورت ايتامي
اصيح المـــاعرف منهو النزل يانــاس
أنه الرابي ابحضن عمي الگمر عباس
عمي العني ماغاب     يسأل رايد اجواب
علي الاڪبــــر برز لــو احمد المختار
🔴🔴🔴🔴
نزل للمعرڪه الجيدوم      ابيمينه شـــايل الصارم
حمل حمــلة علي الكرار     يفر من عـنده كل ظالم
تحولت محڪمه الميدان     وحسامه اصبـح الحاكم
وابد من صـولت المغوار    ولاڪـــافــر طلع سالم
ابحسامه الديره زلزلها على العدوان
ابرعب عاشـوا جحافلها البني سفيان
وجيش الطاغيه ذاب     يسأل رايد اجواب
علي الاڪبــــر برز لــو احمد المختار
🔴🔴🔴🔴
شجا؏ وحيّــــر الاكوان      يشع وســط الحــرب بدره
يصول ابصولة الفرسان      وسف بي غــدرت الطبره
وگع واشفـــــافه ذبلانات     وعطش گلبه اشتعل جمره
واجه يركض عليه حسين    واجتي فاطــــــــمه الزهره
طفت شمعت شبابه وعمره عمر ازهور
وتنـــــادي امــه ياويلي اشجره ابعاشور
جدك يبن الاطياب     يسأل رايد اجواب
علي الاڪبــــر برز لــو احمد المختار
🔴🔴🔴🔴🔴🔴🔴🔴🔴🔴🔴🔴🔴🔴
وليد المندلاوي

يوليدي يالاكبر ** من تمشي للعسكر
شيل العلم بيدك ** وبكيفك اتبختر
                    ::::::::::::::::::::::::::::::::::::::::::
يوليدي مـا ناخيك * هاك أسمع اعتابي
بـاچـر تغـير الخيل * وأنته أول  أحبابي
تسوئ أمن ازامط بيك *حاسبلك أحسابي
تفزع تجيب الثار * من توگع أصحابي
بيدك ترد الگوم ×× يومك يلاكبر يوم
منك تضل الخيل ×× بالحومه تتعثر
                    ::::::::::::::::::::::::::::::::::::::::::
  يبني الصبح لـوصار * تتقـدم أبـزودك
زين اعرف الفرسان * ما توصل احدودك
أدريهم ايخـافون * مـن لـمـعت أزنـودك
حته الشجار اليوم *  تتسخر اجـنودك
يلما تهاب الموت ×× فوگ المنايه اتفوت
باچر اذاء مريت ×× وجه الشمر يصفر
               ::::::::::::::::::::::::::::::::::::::::::::::
بيدك تشيل السيف * باچر يضي عيني
إصرخ علئ الفرسان * ويـن اليلاگيني
گلـهم يضل مشلول * چـف اليـلاويني
صيت النصر والزود * بالطف يخاويني
گول انه شبل احسين×× وين العساكر وين
كلما يزود الجيش ×× عندي الـعزم يكبر
                    ::::::::::::::::::::::::::::::::::::::::::::
شفت أبني شد الحيل * وتنخه بالزهره
صار الصباح أوگال* يم الحسن نظره
سـورة نبإ ويـاسين * بين الخيم يقره
قَّبل جبيني اوصال *وتخييل المـهـره
من طب علئ الكفار ×× گالو أجه المختار
من عنده شفت النور ×× بين الزلم يضهـر
                ::::::::::::::::::::::::::::::::::::::::::::::
ضنـو عـلـي أبصفين *  بيهم رعـب خلـه
حيدابضـهـر عـاشور * جيش الشمر ذله
كلمن يشيل السيف*  شـل الجـرح شلّـه
گامت تطيح الروس * من سيفه لوسله
منهم تطير أرگاب ××  گالوملك موشاب
كله المعسكر صاح  ××جده القلع خيبر
              :::::::::::::::::::::::::::::::::::::::::::::::
             فاخر علي الشبيبي

‏(قصة موت)
‏
‏خطابات مباشره بين الحسين (ع) وعبد الله الرضيع
‏
‏شلونك ع الفراغ المحد يسده
‏شلونك من كلب مايعرف اشبده



‏كلما طال
‏ .شيب الراس اتاني بخيمتك هلبت يرد حكها
‏رحت بعيد
‏.بس تدري الرساله الما تجيب اخبارك نشكها
‏
‏من كد ما رسمنه عيونك انلاكيك
‏يبعد عيون ابوك الما رضت تجفيك
‏ضميتك وره خيامي ونفسهم بيك
‏شمعتازه الرماح وياهي ال ٍتكفيك
‏
‏بوجهه ناسك ...شفت راسك..جنح مايدري وين يطير
‏هله& اصمله... حرت والله ...شگلك من علينه ادير
‏
‏انهجم بيته السهم يمك ولا عده
‏شلونك من گلب ما يعرف اشبده

‏∆∆∆∆∆∆∆∆∆∆∆∆∆∆∆

‏صح اوحيد
‏، بس خيط الفجر يكبر  اذا شمسك عليه تكرب
‏عبد يبني
‏.اليضيع اوليده من حضنه بحلاته الليل ظل يشرب
‏
‏تجاعيدي ..وضحكتك كبرن ابسرعه
‏تعال اكرب لبوك الخلصوا ربعه
‏وره عيونك ذبل عودي ونشف دمعه
‏الشمس طاحت،، يبويه، شتنفع الشمعه
‏
‏وره خيامي .حلم دامي .زغير اوليدي شمسوي
‏ الشمس مالت .الك طاحت ...ترف مو مالت اتچوي
‏
‏من يبعد هواك لريتي شيرده
‏شلونك من كلب ما يعرف اشبده
‏
‏∆∆∆∆∆∆∆∆∆∆∆∆∆∆∆∆∆∆∆
‏يوليدي
‏شمعزك والوجع بين عله كلـوب اليحـبونك
‏يتوك حيل.
‏يالمزيون ناس اليمي شمقصره ويذبحونك
‏
‏من كتر الخيم تتكلب اشحسيت
‏ابوك بنص حرب ويسولف اشتاكيت
‏مثل خيط السهم وبموقف انحطيت
‏رحت عنك يبويه ابلا گلب رديت
‏
‏الخيم شابت..حرگ شافت ..بين هجرك ابوجهي
‏بعطش وبحر. اجيت اخضر ...عله ترابك ذبل كلشي
‏
‏يالمسافر ذبح هلبت الك رده
‏شلونك من كلب مايعرف اشبده
‏
‏∆∆∆∆∆∆∆∆∆∆∆∆∆∆∆∆
‏
‏شيلاكيك.
‏رسمو موتك بكاروك ماشالك گفه الحيطان
‏سمه اشتاكت
‏ .نثرتك دم يـ أخر لون شمرته اعله السمه عطشان
‏
‏شيْـردك لبوك وكسرتك حاجب
‏يمن خليته كلبي من العطش لاهب
‏مو مالت عتب وياك وتعاتب
‏بس شيخلصه ليلك  جن،، شمع ذايب
‏
‏سمعت اصياح ..ابنكم طاح.نساوين الخيم صاحت
‏واجت خيمه. . تكوم اطيح  عبد امك تره ااطاحت
‏
‏اليشمره الوكت يتزامط ابولده
‏شلونك عالفراغ المحد ايسده
‏
‏∆∆∆∆∆∆∆∆∆∆∆∆∆∆∆∆∆∆∆
‏موتك حار
‏.جبيره الدنيا ماكدرت تشيل افراكك اشكبره
‏مو محتار
‏ بس غير اليكوم احزامه  ناس مجلبة بظهره
‏
‏الوكت ما خله حيل بركبة الصايح
‏عطشنه وخيمتك رادت نهر طايح
‏تره السبعين خلصت والوجه شابح
‏نهايتنه الحـنين يونـس الذابـح
‏
‏يقصة موت..اصيح ابصوت...حنين ابصف حنـــين ادفن
‏اظل مخنوك ..احس ابشوك..لخوتي وربعي كلبي يون
‏
‏الذبح سد عين ابوك وجيب اليسنده
‏شلونك من كلب مايعرف اشبده
‏

‏
‏✍️ليث كريم جحالي
‏

يبني علي يالأكبر ... جسمك لكَـيته امطشر
من يا كتر أشمك ... من صدرك امن المنحر
بويه علي .. بويه علي
.....////////////////////////\\\\\\\\\\\\\\\\\
١=
أشلون اردك للخيم محتار أني
كلما شلت منك جزء يوكَٓع الثاني
شيلمك امن الكَـاع يا زهرة زماني
جنت احسب انته اتصير دفان ابمكاني

كبرني حيل امصابك .. شيب لحيتي اخضابك
اكَـعد علي محتاجك .. يذبحني بويه اغيابك
بويه علي .. بويه علي
..........////////////////\\\\\\\\\\\\\\\\\\
٢==
عالغبره مثل السبحه بويه امطشرينك
وليش السهام امشكَـكَـه اجفونك وعينك
وبصوب رجليك انظرلهه وصوب ادينك
والخاطر الله اصبر بعد يالذابحينك

كلشي الي راح امن ايدي.. وأصبر بعد يوليدي
موتك فجع دلالي .... وغيَّب اهلالي بعيدي
بويه علي .. بويه علي
.....///////////////////////\\\\\\\\\\\\\\\\\
٣===
لابيه اشيلك لا اعوفك عالوطيه
اكَـعد وحاجيني يمذبوح الرزيه
اشلون ارجعك لامك المنتضره جيه
مو هينه تنظرلك ذبيح ابين اديه

من طلعتك تدعيلك ... سالم ترد ادخيلك
افتحلي عينك بويه ... وللخيمه خل اشيلك
بويه علي .. بويه علي
...../////////////////////////\\\\\\\\\\\\\\\\
٤====
يابوية كَـوه المصرعك جاباني دمعي
جبت الدرب عثرات يبني وشوف وضعي
غالي انته مو بس عندي لا حتى اعله ربعي
موتك تركني ابلايه روح اعليك انعي

فكَـد الولد شيعوضه .... ايموت ألأبو كل لحضه
وبعدك مصيري اني .... بدموع عيني اتوضه
بويه علي .. بويه علي
...../////////////////////////\\\\\\\\\\\\\\\\
٤====
بعدك على الدنيه العفه يبني وحبيبي
اصبح نصيبك موت والهم من نصيبي
جرح الكَـلب ما يشفه بعدك يا طبيبي
وحزني يضل دايم عليك ابكَـد نحيبي

جرحك أشَد اجروحي . يا نبض كَـلبي وروحي
بعدك حياتي اشبيهه .بس حزني بويه ونوحي
بويه علي .. بويه علي
//////////////////////////=====\\\\\\\\\\\\\\

✍️🏻 كلمات #موسى_الخادم ٢٠٢٥

علي الأكبر علي الأكبر
على إركاب الزلم سيطر
نزل بيده فقاره ... وأخذ دور الصداره
///////////////////////
١=
مثل جده علي من ينتفض
نزل واختل توازنهه الأرض
خذتهم صولته ابطول وعرض
ولا زلمه وكفله يعترض

ساعت ما علي طبهم
ابسطرت يمنته أرعبهم
حد السيف بركبهم '' ابو الزود

علي الأكبر علي الأكبر
رسم لوحت نصر تُذكر
نزل بيده فقاره ... وأخذ دور الصداره
٢==
///////////
بطل ما همه ابد كثرة عدد
على عالي سواترهم صعد
علي الأكبر منو المثله صمد
يلمهم سيفه ويطشهم بعد

بيهم روح ما خله
صفطهم على التله
وخله بكل كَـلب عله … ضنه حسين

علي الأكبر علي الأكبر
ابنزاله حير العسكر
نزل بيده فقاره
وأخذ دور الصداره



٣===
/////////////////
دخيلك كلهه صاحت من نزل
وضلام الدنيه صارت بالعجل
الشرد من سيفه بالخوف انقتل
ملك موت ويوزع بالأجل

عزرائيل طب خلفه
يحسب موته البصفه
وشكد شَمّر ابجفه … علي الحيد

علي الأكبر علي الأكبر
بجثثهم خله ترس البر
نزل بيده فقاره
وأخذ دور الصداره

٤====
////////////////
وضع خطت حرب ما تنغلب
بحيث أتحير الجيش اليطب
وكف عل ميمنه وأعلن حرب
وتركهه الميسره السيف الشطب

ألّحصَّل من علي الشرده
ذو الفقار اله أيرده
يكطع راسه ويهده … على الكاع

علي الأكبر علي الأكبر
قسم يفني جموع الشر
نزل بيده فقاره
وأخذ دور الصداره


٥=====
////////////
تسيّد عل جهات الأربعه
وعليه ينظر أمير المشرعه
ترك جم فارس بنص مصرعه
يدور عل مفر ويرجعه

خله القاده في حيره
الكلش كلش اجبيره
ابن حسين ابو الغيره '''' محه الجيش

علي الأكبر علي الأكبر
رعبهم ساعت الكَبّر
نزل بيده فقاره
وأخذ دور الصداره
///////////////////
✍🏻 كلمات موسى الخادم ٢٠٢٥

نزال الاكبر

نزال الاكبر

الحومه طلبت ونتخت راعيهه
وعلي الاكبر سيفه شاخ اعليهه
-------------------------------------
طلع من صوب الخيم مثل النجم
يشبه المختار بفعاله الشهم
مايهم للجيش لحدوده يهم

وللشاهده گاصد وشاريهه
-------------------------------------
برز ليهم قسوره ابن الفحول
كوور الجيشين وندهشت عقول
ميسره ولميمنه بيهم يجول

وخله عاليهه صبح ناصيهه
-------------------------------------
صاح بيهم جفل الخيل وزلم
طشر الفرسان وبسيفه يلم
إلخلص من ضربته شبهه الحلم

اشجع الشجعان ضل يرميهه
------------------------------------
قال قوله المشتهر يوم الطفوف
انه ابن شجعان وربات السيوف
صاح بيهم ماتگابلني الالوف

اليوم ناوي اعليهه الا افنيهه
------------------------------------
برق سيفه اعليهم وصار الرعد
وزلزلاهه الگاع جن يوم الوعد
فتك بيهم ولشرد منهم شرد

ويردم الاول غده ابتاليهه
------------------------------------
صال بيهم هذه بن عقد الوله
حير القاده بقت متذل له
جائزه صاحو لمن يوصل اله

وهذه الاكبر موت ضل يرويهه
------------------------------------
علي سليم الحسناوي

اخر ليله الليله اوياهم
الله يرحمني ابفركاهم
 
*
 
عِشـت كـل الليالـي اللْيلة العاشر
ما بـيـن اليگلـي إدللـي او حاضر
شفت من إخوتي الما صاير اوصاير
يليل الفركه جَيتك تكسـر الخاطر
 
الله اليدري اشكد اهواهم
الله يرحمني ابفركاهم
 
*
 
يليل العاشر إرجــع لا تمـر بيـنـه
نـريـد إنظل عمر وي والد اسكينه
اذا تنـشـر سـوداك شامـت اعلـيـنـه
بعد جيتك اشوف الدنيه تسبينه
 
جنك صاير وي اعداهم
الله يرحمني ابفركاهم
 
*
 
إجاني الليل ما چنه سمع بيه
يريد إيگلي باچر اِنتي مسبيه
رحت يم الكفلني ومن دره اشبيه
طاحت دمعته اوظل ينظر اعليه
 
ما أرتاح إلا بملكاهم
الله يرحمني ابفركاهم
 
*
 
ليل الما أشوفن بي كمر عالي
اشوفه شامت امودينه عذالي
مو حلوه الليالي ابلايه كفالي
باجر بيدي أگبع روحي وخيالي
 
باجر مسبيه ابلياهم
الله يرحمني ابفركاهم
 
*
 
يليل الفاجعه ليل اهدعش جارك
من باجر تگله الحره خطارك
لا تهضمها باجر من تطب دارك
كله بت علي مو تنچوي ابنارك
 
روحي اِتحن وماتنساهم
الله يرحمني ابفركاهم
 
*
 
باجر بالخيم جم شمعه مطفيه
اوليالي الشام مني تنتظر جيه
اصيح احسين بس صوتي يرد ليه
اخوتچ عالرماح أيسيّ يعلويه
 
چانو وياي اشمحلاهم
الله يرحمني ابفركاهم
 
*

سليم الغزالي

يمهدي ... تاسع لــيلة هـــاية
يمهدي … عِبر بيهة ورواية
يمهدي … علي الاكبر بطلهة
……… ..
ليلة التاسع بــسم راعــي البسالة
اليشبه الهادي محمــد فــي جماله
علي اسمة ومن علي ماخذ خصالة
محلة شمرت يمنته بساعت نزالة

يمهدي… شبيه الهادي خــيّم
يمهدي… شجاعة عل المخيم
يمهدي… ما واحـــد وصلهة
******
هـــاي ليلة علي الاكبر ابــو الكلفة
بيهة حاظر طه جـــده وشاف حتفة
اعليه خل ندمي الصدر وانصيح وسفة
سالمات اصدورنه وبصدرة خسفة

يمهدي … خيول بصدرة داست
يمهدي … كسر بظلوعة عافت
يمهدي … فـــلا عرفت خجلهة
……
جم جرح هالليلة نازف بالغــضنفر
على اولــيده الاكبر الشاهـدة أمطبر
اشما عليه نبجي ونون والليل نسهر
ما نوافي طعـــنة من طعنات الاكبر

يمهدي … علـــيه لو دم بجينه
يمهدي … نحـس تقصير بينه
يمهدي … وحك راس الكفلهة
****
عظم الله اجـــرك يمهدي ياولينه
جم جرح شايل ابكلبك رد علينه
صرنة يعكوب ابغيابك ما تجينه
شوف عدنه ما بقى كد ما بجينه

يمهدي … قميصك لسة مارد
يمهدي … متى انشوفة لمحمد
يمهدي ... انت الـــكل أمــلهة
**********************************
الحمدالله رب العالمين
اللهم صل على محمد وال محمد
موسى الخادم

شبيه الهادي جدي… تركني بهمي وحدي
ودعني ياليلة ابوداع الغايب
… .
يليلة مات الاكبر … فرح كل هاي الاسنين
ترك دمعة ابجفوني … صعب تحملها هالعين
ترك جمرة بدليلي … فلا يطفيهة الاونـين
شسولفلج يليلة … تركني أنه والبيــن

اذكرة من شبكني… ابدمع عينة حركني
المن اوجه شكوتي واعاتب
…
شبيه الهادي جدي… بعد لينه ميرجع
عليه دارت اعادي… من الجّهات الاربع
تعنيـته يليلة… خالي الفكر للمصرع
شفت حلو المعاني… وصل جسمة تكطع

شده فكري مصابة ... عشت لوعت عذابة
وجه الرسول اموسد الترايب
… ..
وحك رب الجلالة… كسرلي ظهري الاكبر
عزيز وغالي عندي… اعز من روحي واكثر
ردت للخيــمة اشيلة... خفت لا يحركة الحـر
حضنتة وشلتة بيدي… وكع نــــصة وتبعثر

على جسمة يليلة… الف طعنة قليلة
توذر بالسيوف ابن الاطايب
……
جرح كلبي وداعة… وعرفتة ما يـردلي
وسط عينة سوالف .. انه مـــيت يـكـــلي
رسملي ابدمعة صورة... عليه واكف اصلي
عرفتة ايموت كبلي… حبيبي الجان خلي

همس بذني وصيته … عرف ساعت منيته
رحل عن دنيتي وخلاني شايب
. ..
يليلة افراك الاكبر ... مثل سيف اعلى نحري
امن اذكره ايحزلي راسي ... وحك عباس ذخري
وداع اوليدي غالي … كسر يكسرلي ظهري
يريت انه بـــــدالة… دماي انظرهة تجـــري

عسن گبلة ذبحني … سهم فكدة الجرحني
على الاكبر صبح دلالي ذايب
… .
شلي بعمري وحياتي… بعــد موتت حبيبي
اريد الساعة تمشي … تـــوصلني الطبيبي
صبر مابية اصــبر … ثكل حزني ونحيبي
تعودت اعلى شوفة… علي الاكبر نصيبي

عمر من غير الاكبر… ينّزل دمعي كوثر
فلا تنشف دمعتي عل الحبايب
……
الحمدلله رب العالمين
اللهم صل على محمد وال محمد
موسى الخادم

يالاكبر أعليك ارتفع نحيبي ...
بعدك على الدنية العفى حبيبي
ما يشفيه نحيب ... جرحك يالحبيب
بعدك على الدنية العفى حبيبي
"""
يبني يالاكبر يغالي ... اكعد وشوف الجرالي ...
منكسر ظهري أصبحت محد الية
يا ضوة اعيوني أعتنيتك ... بالدمة أمخضب لكيتك
اه من هذا الزمن ما حن علية
اكعد اكعد يا حبيبي ... واستمع وني ونحيبي
بوية رتك عون الي بهاي الرزية

سامعني يالاكبر يراعي الغيرة ...
طايح تراني بطيحتك بالحيرة
ناطر لا تغـــيب .. جرحك يالحبيب
""
امصيبتك مو هينة يبني ... المتني وشيبتني
راسي ابيض صار لفراكك يغالي
يا شهم أكعد دخيلك ... للخيم ما بية أشيلك
حيل ما ظل بية أشيلك يا وصالي
منكسر ظهري المصابك ... يالطفت شمعت شبابك
ما يسرك لو تشوف الساعة حالي

حزن الكلب ما يوصف الغيابك ...
الله أكبر من عظم مصابك
نازف ما يطيب ... جرحك يالحبيب
……… ..
يبني ياألاكبر أكلمك ... يا جرح أكثر يلجمك
خل أضمدة بدمعت اعيوني التراهه
جسمك أمكطع أشوفة ... موسهل أمشي وأعوفة
تبجي الك عين الارض يبني وسماهة
لا تخليني أبغربتي ... وحدي يا كاشف كربتي
دنيتي بدونك فلا ينفع ضواهة

غالي انت غالي يالخذت أحلامي ... وحشة ابغيابك ما تسر أيامي
ما يخفي النصيب .. جرحك يالحبيب
"""""
يالخذت فرحة زماني ... خبر موتك أللماني
يومي كبلك ريتة ياليث الاضاحي
ولا نظرتك عالوطية ... يا شبل حامي الحمية
كلي بعدك منهو اليضمد جراحي
وحدي ما ظلالي ناصر ... عكب موتك يبني حاير
اشلون اردأ للحرم تسمع نياحي

يوليدي يالاكبر يسلوة روحي ...
شيّهود أعليك الدموع أونوحي
. أفجع ما يصيب ... جرحك يالحبيب
"""
يا شبيه الهادي احمد . حزني بعدك مالة كل حد
بوية يالاكبر وداعك هدلي حيلي
جنت اشوفك كل حياتي . وجنت اظن تحضر وفاتي
ما حسبت المصرعك اوصل يويلي
وجهك اصفر انه انظرة . اوراسك المحزوز نحرة
شوفتك مذبوح حيل اذت دليلي

راح ابدماك اخضب وجي ولحيتي ... يالحسبت كبلك تحل منيتي
يسمعني المجيب
جرحك ما يطيب
"""
الحمد لله رب العالمين
اللهم صل على محمد وال محمد
موسى الخادم

نزل سوح الحرب… كلب طفهم كلب،
علي الاكبر نزل
كلب طفهم كلب
*******
نزل والساتر الله صاحت الناس
الشرد منهم يلاكف ظل الانفاس
حارو منهو هذا احسين عباس
نفس الهيبة والهمة والاحساس

علي الاكبر علي … شبه ذاك الولي
مثل خير العمل
علي الاكبر نزل
… .
جيش ابكثره ماهماهة مــــوجود
كلبهة الميمنة اعلى الميسرة بزود
ظـل يحصد فقارة الروس و ازنود
عيشهم رعـــب وفاي الاوعــــود

دخيل الله اصرخو… هــدمهم ملخو
سبعهم ها جفل
علي الاكبر نزل
…… .
أعليهــم طــيّر اطــيـــور الابابيل
تحت امـــره ترامي الحجر سجيل
وراواهــم انجــوم الظهـــر والليل
شـردهم مـــثل ما تشـرد الخــيل

هجم طفهم هجم … رعب كل الزلم
فحل نعم الفحل
علي الاكبر نزل
……
كل بركان ثار ابوجه الاشرار
بيهم صال صولت علي الكرار
اكبالة اتراجفو ما جنهم اكبار
اخذ منهم ابدال الثار الف ثار

شهدله الكل شهد … شبل ذاك الاسد
سراياهم عزل
علي الاكبر نزل
*******************

علن ثورة غضب عالظالم الحيد
تولاهم ابسيفة ابن الاجــــوايد
نساهــــم أسماهم والمـــــواليد
وخلة الشمر يصفك ايـــد بالايد

ترس طفهم دمة… امير الغانمة
عليهم سيفة سل
علي الاكــبر نزل
********
طب غاير عليهم ليث الاسلام
يحود ابكيفه بيهم مثل الاغنام
ساتر سوه بيهم يحمي الخيام
ثلثت انعام منه فخــر الازلام

الهوه اعليهم كطع … امامه الكل ركع
خبر عاجل وصل
علي الاكــبر نزل

الحمد الله رب العالمين
اللهم صل على محمد وال محمد
موسى الخادم

(( شبه جدة طلع … علي الاكبر علي ))
جمال الكل جمع … علي الاكبر علي
سلام الله على اوصافه
ملاك ايكول من شافه
علي الاكبر علي
*******
بحسنه وجمالة حيّر النواظر
شوفت عيونه تجبر الخواطر
ما واحد الغيرة بجمالة صاير
من الكـمر احلى علي المثابر

جمالة ابلا وصف… علي الاكبر علي
ترف كلش ترف… علي الاكبر علي
ورد مزروع بجتافه
ملاك ايكول من شافه
علي الاكبر علي
…… .

مثل البدر لاح وسطع بنوارة
حيّر جميع العـــالم ابأخبارة
سيد جمال العالم الله اختارة
يشبه محمد هذي من اسرارة

الشجاع الطالبي… علي الاكبر علي
طلع شبه النبي … علي الاكبر علي
فيض الباري والطافه
ملاك ايكول من شافه
علي الاكبر علي
.........
بي كل صفات الانبياء منجمعه
من ادم ونـــوح ومحمــد طبعه
من طينة احسين انخلق والبضعه
سيرت حياته اهوايه طيب السمعه

ورع ديّن تقي… .علي الاكبر علي
كلب صافي نقي… علي الاكبر علي
الذكر ميفارك اشفافة
ملاك ايكول من شافه
،،،،،،،،،،،،،،
جم قل اعوذ ابوجه ليلة تقرة
من جان يطلع وي ابوه بزغرة
ياهيبته وعزمة وجلالة قدرة
يا طيبته اعلى حسينة روح الزهرة

الحسد ما فاركة … علي الاكبر علي
لحد موته بكة… علي الاكبر علي
حتى بموته ما عافة
ملاك ايكول من شافه ... علي الاكبر علي
……… ..
بالجنه كل دعوه بكلب حورية
تصبح نصيبة وتنكتب علوية
نسبة جمالة تفوق حتى المية
من يوسف واحمد اخذ كل ضية

يسبحان الخلق … علي الاكبر علي
جميل الكل نطق … علي الاكبر علي
العسل ما يحلة بخلافه
ملاك ايكول من شافه ... علي الاكبر علي
......
الحمدالله رب العالمين
اللهم صل على محمد وال محمد
موسى الخادم…

يبني ياعلي ... يازين الشباب
ترجع للخيم ... انطيني الجواب
بالموت لا تحجيلي ... ادعيلك وتدعيلي

...1...
يالعازم اتريد الحرب ... عينك ييمه اعله الدرب
لاتفجع الروح بخبر ... موتك يالاكبر شي صعب

خوفي عليك امن الاجل... ادعيلك اتردلي بعجل
يالعندي اغله امن النفس ...انطيني كلمه بيها امل

يا حلو الوجه ... يلتشبه حُسين
لطّول البُعد .... بعدك امشي وين
يا نجمه وتضويلي
ادعيلك وتدعيلي

....2....
يالوجهك احله امن الكمر... عاين علي دير النظر
راسك ارفعه يا علي .... خليني اشمك بالنحر

يالشوفتك عندي دوره .. بعدك حياتي ابلا ضوه
بالك ييمه امن الغدر ...اعليك انه اخاف امن هوه

لو تحصل بدَّي ... ماعوفك تروح
جا ويه النفس .. ضميتك يروح
بعدك اساهر ليلي ... ادعيلك وتدعيلي

...3...

اجل وداعك ياعلي ... ساعة زمن ظل يبني الي
وياك اريد اكعد اون .... يا اغله كل ناسي وهلي

راح ادعي لك دعوة نبي ... سالم ترد يبني الابي
اوداعك يعيشني الغرب ... وينقل حياتي للسبي

بوداعك احس ... كلشي البية مات
بعدك ياعلي .... ادموعي جاريات
يمي انت وانهد حيلي ... ادعيلك وتدعيلي

...4...

يالعمرك بعمر الورد ٠٠ كل خوفي تمشي وما ترد
يالتحمل اوصاف النبي...اعليك اشكثر جنت انحسد

لاجمني كلبي امن الصبح ..شو جني اشوفك منذبح
من مصرعك جتني صور.. مو جرح بيك اجم جرح

جاي انظر الك .... مو نفسك هذاك
مهشوم الصدر .... واسهام بكفاك
ياجرح اشد يا ويلي ... ادعيلك وتدعيلي

...5...

يا طلعتك من الخيم ... تترك وراها شكد ألم
كل خطوه تخطيها برمح .. يرميني هجرك مو سهم

اعليك المنية امحزمه ... وامك عليك امعلمه
ما ادري اعوفك مدري اضل .. بيدك ورجلك لازمه

يبني لا تروح ... يمي ابقى ارتجيك
كلشي ابداخلي .... ظل يبجي عليك
بعدك منو ايتجيلي .... ادعيلك وتدعيلي
.........
تمت

كلمات
موسى الخادم

.....

بجماله وهيبته .. طلع من خيمته .. يرف برايته
علي الاكبر
....1....
يا سلام الله عالاكبر ... من نزل سوح الحرب
دكول حيدر علي طبهم ... كَلب ساترهم كَلب

طب غاير .... ما واحد ... من سيفه سلم
طشرهم ... لماهم ... ساترهم هدم
بالمهره ... يتمايل ... ويرف بالعلم

رسم اعظم صور.. مثل عمه الكمر..على الكل انتصر
علي الاكبر


يا سلام الله عالاكبر
بيده شايل عزم حيدر


....2....
كالاسد غاير عليهم ... طب شبيه المصطفى
صاح هل بيكم مبارز ... كلشي كدامه اختفه

كل فارس ... كدامه ... ما شال النظر
خيرهم ... بالحومه ... ايدور عالمفر
عيشهم ... بالخوفه ... وركضهم شهر


طبر روس العده ... بقيادتهم بده.. أجاهم وحده
علي الاكبر

يا سلام الله عالاكبر
سيفه عالظلأم يفتر


...3...

زلزل الكاع ابمهرته ... علي الاكبر من نزل
سرفن اردانه وترجل ... على كل ظالم حمل

ماهمه ... كثرتهم ... لا همه العطش
كل فارس ... يدناله ... عالكاع انفرش
من صوته ... وخزراته ... ما واحد رمش



وكف مثل الجبل .. لزم بيده ألاجل
على العالم وصل ..
علي الاكبر

يا سلام الله عالاكبر
على كل الجيش سيطر
....4....

لا سرايه ولا كتايب .... وكفت ابوجهه علي
طشر الحومه بزلمها .... ولي يا نعمه الولي

صح واحد ... بس عزمه ... ايعادل جم الف
للكوفه ... رجعهم .... يا سامع زحف
ميثني .... بضرباته ... عالكل مختلف


عليهم كل الهوه.. كطع ويه الضوه.. شبَه راعي اللوه
علي الاكبر

يا سلام الله عالاكبر
اعليهم الميدان زغّر
.....
تمت
.....
موسى الخادم

#نزله_للاكبر
……………………………………………………………

علي الاكبر شهم  •• صگر كل نينوه
بگت خيل وزلم  ••  تدور عل الهوه

……………………………………………………………


كاشخ ابغيره عمامه  لابس اعمامه هله
شافته وفكت حلكها وصاحت( الله)كربله
يوسف بأيه جماله ابد ما يوصل اله
حسين خايف على اوليده عين حاسد تكتله

الفلق والناس . بالاحساس . قراها حسينه
بطل عاشور  . گمر نور  .  يشع بجبينه

نزل بالطف نجم ••  يوزع بالضوه
على الاكبر شهم •• صگر كل نينوه

……………………………………………………………


مصلصل من اجدادي انه حيدر وطه النبي
علويٌ   هاشميٌ   قرشيٌ    طالبي
وجدتي زهره وخديجه الله گصلهن عبي
فاطمه وارضه لرضاج واغضب ولو تغضبي

ابن الحسين . ضوه العين . اشوف ابنوره
عمي عباس .  بالانفاس . اشم اعطوره

بعد ساعه ايهجم •• يهد شايل لوه
علي الاكبر شهم •• صگر كل نينوه

……………………………………………………………


اتخورسو لو تذب ابره بالمعسكر تنسمع
ماعوا من الخوف كلهم نار تحرك بالشمع
ربع شارد ربع حاير ربع مخلوس وربع
بطّل من الحرب كلها وباعو السيف ودرع

صاحو الگوم . تره اليوم . اظن يگضينه
هذا كرار .  غضب نار  . يشب من عينه

يطش بينه ويلم •• مثل طش النوه
علي الاكبر شهم •• صگر كل نينوه

……………………………………………………………


دوّروا واحد يطبله كون مقدام وكلف
ابن غانم عود عدهم ينعد ابميه والف
روح بارز علي الاكبر بلكي منك يرتجف
تالي رد ليهم بطلهم ماكو راس وبس جتف

راسه جاباه . يحياه .  هداه للوالد
رفعة الهام . يضرغام . ذبحت القائد

حضن ببنه ويشم  •• وعلي منه ارتوه
علي الاكبر شهم  •• صگر كل نينوى

……………………………………………………………


اثنين فوگ اثنين يطبگ سيفه ابدن ما فُرد
نار وتشب ابيادر خلّص ابساع العدد
وشمر كلساع وينادي يا عُمر رايد مدد
ولن ابو فاضل يصيحه وشبقه لعمك بعد

عمي يالحيد . يصنديد  . كظيت الوادم
قسم خليه  . انه اگظيه . وقسم للقاسم

واذا رايد عزم   •• نطب ليهم سوه
علي الاكبر شهم •• صگر كل نينوه

……………………………………………………………


اولسنا على الحقي نعم كال حسينه
مو مهم عالموت طحنه لو يطيح علينه
اخذ شاب مخلي روحه وقف بس لدينه
علي وكون الخدم كلهم صاروا امقلدينه

ايريد الحسين .ابو الدين . خُلق تربيته
مو حجي لسان . بالاعلان . يدوَّر صيته

ابد ما ملّچم    •• ولا گلبه انجوه
علي الاكبر شهم •• صگر كل نينوه

…………………………………………………………
✍️ ( سيد خضر الزاملي )
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي