قصيدة علي الاكبر ع

طلع يوسف كربله ـ امن الخيم للحومه
كلّه غِيره ومرجله ـ وحان بالطّف يومه
°°°°°°°°°°°°°°°°°°°°°°°°

هاشمي وعالحق ثباته وسيفه يعدل لو شطر
كربله شــاهد عَيـَــانه ترك بيها اروع صـــور
تحت امره الموت صـــار وكلمن ايشوفه انبهر
ضاگت الوسعه عليهم مايصــــح درب المفر

صوته شِبه الزلزله  ـ  وياحـــــلاة اعلومه
كله غيره ومرجله  ـ  وحان بالطف يومه
°°°°°°°°°°°°°°°°°°°°

ســـــيفه ابابيل وعليهم چنه سجيل ونزل
دخنت ســوح المنايه لعلي الاكبر من حمل
ذكّر اشــــــباه الرجال بعلي ومعركة الجمل
كل مخطط فشل عــدهم لمن اعليهم زعل

مـــات كلمن قاتَـلَه  ـ  وذل يزيــــد وگومه
كله غيـره ومرجله  ـ  وحان بالطف يومه
°°°°°°°°°°°°°°°°°°°°

غُبْره صارت بالمعاره حين هب چن عاصفه
ونجَلَت لنّه ايتبــــــــــختر والرجال امچتفه
من هتف هل من مبـــارز بكر عن عينه اختفه
خاف من شاهد جثثهم حدر جدمه امخالفه

الگابله اليوم ابتله  ـ  روحــه تبقه تلومه
كله غيره ومرجله  ـ  وحان بالطف يومه
°°°°°°°°°°°°°°°°°°°°
سطّر اعجوبه بمشيته وجْهه شمس الله وضوت
زمهرت عينه عليهم حـــــــدره گاع الله انطـوت
والجيــــوش الگابلها اندهشـــت وعــنه انزوت
روج يردم روج دمــــهم كربـله بيـــــــه ارتوت

بيرغه ابچـفه عِلَه  ـ  ومايهاب اخصومه
كله غيره ومرجله  ـ  وحان بالطف يومه
°°°°°°°°°°°°°°°°°°°°°

ابد ميهاب المنايه ويطــــــبگ العشره سوه
اضطراب وقلق مرهم ضــجه صارت نينوه
علي براسه اومن يقاتل يفني ابن غانم نوه
ونطلق مثل الشراره السلِم من سيفه انجوه

نينوى صـارت اله  ـ  والحـرب محسومه
كله غيره ومرجله  ـ  وحان بالطف يومه
°°°°°°°°°°°°°°°°°°

✍الخادم
كامل السعيدي

نزله للاكبر ع…… عن لسان جيوش الاعداء


دُهش القادات حينا ،،،، طلعَ البــدرُ علينا
               چنه حيدر من حمل
       ـــــــــــــــــ ❁ ❁ ❁ ــــــــــــــــــ

ناده ابن جوشن بخوف الوسعه ضاگت بينه
طلــع البـــدر علينا مــن خيــام حســــــــينه
رايــــته اترف ابيمــينه وعاگدتهه اسكيــــنه
ما يرد لحســـــــين خــالي حالف يصفيــــنه

    بِـمُلاقاه انثنينا ،،،، طلعَ البدرُ علينا
              چنه حيدر من حمل
   ـــــــــــــــــ ❁ ❁ ❁ ــــــــــــــــــ

ماكو بيــهم زلمه حـوك اليوصــله ويـدناله
الجيش فر اگبال وجهه ايخاف من اخياله
اشـجع الفتيـــان بالطـف قله مــن امثــاله
چنــه حيــــدر مـن يقــاتل ضربته چتــاله

   وإلى البرِ إلتجينا ،،، طلعَ البدرُ علينا
              چنه حيدر من حمل
     ـــــــــــــــــ ❁ ❁ ❁ ــــــــــــــــــ

طلع غاضب والمنيه انشوفهه بصمصامه
گطع الروس ابســـاله وداسهن بجـــدامه
بكر ابن غانم تجـــندل ما صمد گـــدامه
گطــع راســـه ورد لبوه بزود رافـع هامه

صوتُـهُ نادَ حسينا ،،، طلعَ البدرُ علينا
            چنه حيدر من حمل
    ـــــــــــــــــ ❁ ❁ ❁ ــــــــــــــــــ

موش الاكبر موت احمــر گامو ايســمونه
المايلوحه السيف. مات ابخزه من اعيونه
هــذا تربات الهواشـــم عجــزو ايلاگــونه
حساب ذل فقار سيــفه گامو ايحســبونه

ومعَ الموتِ إلتقينا ،،،، طلعَ البدرُ علينا
              چنه حيدر من حمل
     ـــــــــــــــــ ❁ ❁ ❁ ــــــــــــــــــ

كون عند حسين مثله ثلاثه چاصار العجب
واللـه چا خســفو الگاع ونارهـم تلهب لهب
عمهـم العبـاس كـون اوياهـم ايهد ابغضـب
ينصدم وتصيبه دهشه الراوي لوعنهم كتب

    عجباً منهُ رأينا ،،،، طلعَ البدرُ علينا
            چنه حيدر من حمل
   ـــــــــــــــــ ❁ ❁ ❁ ــــــــــــــــــ

        الخادم
✍كامل السعيدي

عتاب .ليلى.. لولدها علي الاكبر.. 
:ــــــــــــــــــــــــــــــــــــ

يبني علي .... يبني علي      يلّ طولت بغيابك
ابقه انتظر...... ليلي اليمر    يمّه واشم بثيابك

راح  .... فرحي بروحتك
راح .... واهس جيتــــك.

يلّ طولت بغيابك
ــــــــــــــــــــــــــــــــــــــــــ

طّولـــت يبني بغيابك جن غياب بــلا رجــــوع
وانكطع واهس حنانــــك وانفتح باب الدمـــوع
ياعلي بدونك حياتي اصواني فرحه أبلا شموع
بالنظــر عايش مصابك من طحت بين الجموع

يمـه صحت ..... لمـــن شفـت     مبسم ابوك اتغير
جاني العلم ....راح الحلــم        وي ذبحتك بالاكبر.

راح .... حلمي بذبحتك
راح .... واهس جيتــك
يل طولت بغيابك
ـــــــــــــــــــــــــــــــــــــــــ.

عاشت بروحــــي المآســـي والكلـب غيـــم حزن
ليـــل وانهـار اعله فكــدك حاضنه اثيابـــك واون
افز مرعوبه اعله صوتك لو غمض لحظة الجفن
يمــه يتراوالـــي جسمــك وذرر من گـــد الطعــن.

اغفة بدمع ..... يالمنصرع       صورتك تغفه بعيني
اتصـــورك ..... جنك ملك        عايش بدار اسنيني.

راح ..... احضن صورتك
راح .... واهس جيـــتك .

يلّ طولت بغيابك
ـــــــــــــــــــــــــــــــــــــــــــ

يبني من فاركت عينك احس ضّي عيني انطفه
وجردتني من المشاعر رغم نــار العاطفـــــــــة
يمه احس دمعات عيني مو دمع دم نازفــــــه
من سمعت حسين نادة يبني عالدنيـــا العفــــه

  طّب خيمتك ..... شم ريحتك    ويقبل بجثمانــك
  جيتــك نعي ..... وبـــلا وعي   العن غدر عدوانك

راح .... انعي مصيبتــك
راح .... واهس جيتــــك

يل طولت بغيابك
ــــــــــــــــــــــــــــــــــــــــــ

صار عندي احساس فرگــة احساس هجران وبّعد
من دخلت الغاضريـــــــة وكَلبـــــي بالهم منمــــرد
اشلـــــون يتكامل جمالــــــه هالربيع بـــــــلا ورد
هيج احس الحـــــال بعدك يمه لــــــو صار الفگــد

يالوعتـــي....... ياحسرتي          من فركتك يـاغالي
شفت البله ....... من كربـله     رحت وخذت امالي.

راح ..... صبري بغيبتــك
راح .... واهس جيتــــك

يلّ طولت بغيابك
ـــــــــــــــــــــــــــــــــــــــــــ

خلصّت عمري بغيابك نــّوح واهموم وعذاب
تنزف اجروحي مشاعر لو شفت لمت شباب
يّمه ماصدكت عيني عنها غطاك التـــــراب
ياعلي بسمك أنــادي والصدى يرجع جواب.

شخصك رحل....... نورك افل       وامك بقت للونه
ماضل ولي  ..... يبني علي         بيمن بعد اتهنه  .
    
راح .... كلشي بموتتك
راح .... واهس جيــتك

يل طولت بغيابك.
ــــــ ــــــ ــــــ ــــــ ــــــ ....

✍ ابو منتظر الحجامي

الوداع الاخير. بين ليلى وعلي الاكبر.
ـــــــــــــــــــــــــــــــــــــــــــــــــــــــ


يــمه بوداعك يلاكــــبر ريت اودع دنـــيتي
اوياك يبني أتروح روحي ونــار تنزل دمعتي

لــوعفتني.
ضيعتني.
سلمتني الغربتي
,,,,,,,,,,,,,,,,,,,,,,,,,,,,,,,,,,,,,,,,,,,

يوم ترحل عني تاخذني المنيه.
لان ماعندي صبر تبعد عليه
يمّه احلًفك بالحميه الهاشميه
روح..بس لاتـــترك امك للاذيه.

لـو رحت لا ما أمانع بس أموت بروحتك.
مــو جنت ساكن دليلي شلون أحمل فركتــك..

فارگتني
ضيعتني.
سلمتني الغربتي
,,,,,,,,,,,,,,,,,,,,,,,,,,,,,,,,,,,,,,,,,,,,

لحظت اوداعك شفت حاله غريبه.
بينك وبيني شفت صورت مصيبه
شـــــلون كَلب الوالده يبـــرد لهيبه
وتـــنتظر بوليدها الساعه الرهيبه

أنتظر ونــه اعله ونـــه وصوتي بسمك يعتلي
بعيني الف صوره المصابك تحجي يبني ياعلي.

حيرتني.
ضيعتني.
سلمتني الغربتي
,,,,,,,,,,,,,,,,,,,,,,,,,,,,,,,,,,,,,,,,,,,,

گلبي يبني من رحت راح الونينــــه
وانه ...للباري اندعي بدمعه حزينه
يلًي منيت اعله يوسف منً عليـــــــنه
مثــل.. ما.. رديته لهله ردّ علينـــه..

بيـــن لحظــات التوسل والصبر يدفع صبر
ردك الباري اليـــه وردت أسنين العمـــر.

من صحتني.
ضيعتني.
سلمتني الغربتي
,,,,,,,,,,,,,,,,,,,,,,,,,,,,,,,,,,,,,,,,,,,

لحظه وحده والجفن عاود مسيله.
صحت ثاني هل گلب فارگ خليله
من جفه اوليدي( علي) واعلن رحيله.
واللــه من أوداعه جن روحه طويله .

من مشه واعلن رحيله. عن حنان امه ابتعد
والله من ممشا عرفته مــا يعــاود للابد

ودعتـني.
ضيعتني.
سلمتني الغربتي
,,,,,,,,,,,,,,,,,,,,,,,,,,,,,,,,,,,,,,,,,,,,

من رجعت الخيمتي اتـلاگـاني همي.
ياعلي بكل كتر صوتك صاح يمّي
منين ما دير النظر جــن انت يمي.
ريت مــــيته وگبل دمك سال دمي.

ريت ميـته ولاأشـوفـن جسمك أمكَطع وذر
ومـا أشـوفن يبني جسمك سابح بدم النحر.

شيبتني.
ضيعتني.
سلمتني الغربتي
,,,,,,,,,,,,,,,,,,,,,,,,,,,,,,,,,,,,,,,,,,,
✍️ ابو منتظر الحجامي 2025

عكَيلي . .الخدمه .
.............................

مـــا تسوه الدنيه ابلا خدمه.
........................................

بدون حسين الدنيه شتسوه
هوه. الظل والسد والتجوه.
وايـــام الخدمه شكَد حلوه.

نتمــــِّنه كـل عام
يقــبلٌّنـــــــه خدام

نعمه وندعي ادوم النعمه.
.....................................

محلاهه الدمعه اب ايامه.
والاحله انجمعت .خدامه.
درب حسين انشد احزامه.

نجمعهـــا الادموع.
للصـــدره موجوع

يـــــا باب الله الباب الرحمه.
.......................................

كلمن هالليله يدك صدره.
يطلب حاجاته من الزهره.
كـل خاطر مكسور اتجبره.

والخدمته اجروح.
عافيتـــه بالنــوح

يتــــوقر تاريخـــــــه واسمه.
.........................................

درب الخدمه الــــبي تربيتي
اغله.من .اولادي. ومن بيتي.
من ابجيــُله تـــرد عـــافيتي

والعنــــده الحسين.
مــــاعنده وجهيـــن

وتعيش أبـــروحه اطهر كلمه.
......................................

بس لجل حسين ابن البضعه.
حلوه الخدمه وحلوه الدمعه
والخـــــــادم . بجفوفه . ايرفعه

من يلٌّبـس التاج.
متهّمـــه الامواج

يوصل صيته الحــــــد القمه.
.....................................

متعاهد وي گلبي. وروحـي.
اروي حسين.بدمعت نوحي.
تنزف يم عاشوره اجروحي.

والگـــلبه مجمور.
كل عمره عاشور

يـــّم كل سحكت حافر لجمه.
ـــــــــــــــــــــــــــــــــــــــــ

لازم درس الخدمه أتحفظه.
بـــــدموعك ليـليـه اتوضـه
ادعي من الله حسينك يرضه

دار اليــــخدمون.
يم. عابس. وجون

كـــــــل خادم مخلص يلتزمه.
ــــــــــــــــــــــــــــــــــــــ
✍ أبو منتظر الحجامي . 2025

موشح للقاسم.
لسان حال أمه رمله.
...............................


غالي يل وجهك مثل ضي الشمس.
حضرت حنتّك واهدوم العرس..
...........................................

فرحه بحساسي.لجن سال الدمع.
وبزفير الحسره طفيت الشمع.
يبني صوت افراك سير عالسمع.

جن عجنت الحنه بدمومك احس.
.............................................

عاندت روحي وكلت عرسك يتم.
وافرح واتباهه يم ذاك النجم.
يبني ما حسبت كَلبي ينثلم.

والفرح مايصل روحي ولا يجس.
...........................................

بين اوهامي ومشاعر زفتك .
لن طلبت السيف مني ولامتك.
يعني صارت يبني ساعة فركتك.

وسيف هجرانك بده يحز بالنفس.
............................................

بس رحت فوك الورد جف النده.
يل عزيز وموسم أحزانك بده.
استعجلت يازمن ليش اتفرهده.

بروحي تكطع جذر غصنه المنغرس
............................................

رحت يمه وانطفه بعيني الضوه.
والله من جابوك الي ضاكَ الهوى.
آنه ..وين . اوين وادي نينوى.

بعرسك شكَد يمّه سولفنه أمس.
..........................................

رحت وتفطر دليلي من الحزن.
والدمع احمر نزل من الجفن.
ضايعه ارسومك الحلوه من الطعن.

وعظمك امكسر ييمه من الرفس.

.........................................

✍ أبو منتظر الحجامي 2025

ميمر وصية خدام خل نعتني بخدمتنه.
.......................................

خل نرفع اطباع الانه من انفسنه
وخل منهج حسين الذي يدرسنه.
ثق وحك دمعة فاطمه يحرسنه.

نظف شوائب هالروح ثق تستمر نعمتنه.
.......................................

عوف التبجح لا تظل تتمرجل.
بهاي الصفات حسين لا مايقبل.
من تبقى بعنادك يواهم تنذل.

ماتنحسب عالخدام ماتكعد بخيمتنه.
........................................

اترك الغيبه والحقد والغيره.
هذب الفاظ الكلمه تحله السيره.
لا يـــاخذك شيطانك ابتعبيره.

تستصغرك هاي الناس ما توصل الغايتنه.
........................................

خلي الحسين اكَبالك بكل ساعه.
واستخلص الخدمه بدروس اطباعه.
حسين السفينه وصير انته شراعه.

اجمل صفات الخدام تتوحد احجايتنه.
.........................................

نتكاتف وخل نتحد ونحاذر .
من كل منافق ينوي فتنه الباجر.
خل نقسم بكل ضلع داسه الحافر.

نتعاهد بثوب حسين عالحكَِ نشد رايتنه.
..........................................

هاي الايام ايــــام ماتتعوض..
باجر ابهــــــام الندم نتولاه عض.
دمعة ليالي حسين لا مـا تنفض.

نجمع رصيد انه اوياك يوم الحشر دمعتنه.
......................................

نغسل اذنوب المعصيه بدمع العين.
ونصير خدام ونسر گـلب حسين.
تنـــــزل مـواكب بالوفه متحزمين.

ونصفي بسم ام عباس واخت الكَمر نيتنه.
.......................................

✍ ابو منتظر الحجامي.. 2025

خيالهه الاكبر واجاهه
خله الزلم بين گفاهه
هالشارد وي الطايح
والحومه صارت صايح خيالهه

-----------------------------------------

ثنى اعله ارض المعركه وكضهه بيمينه
گللهه حضري المگبره البتاره اجينه

اول مقاتل قدم حسين
خلى النهر يصبح براكين
يچوي الشمس لو دخن الراس
ما درو درب الشارد منين ؟

هذا الاكبر شد حزامه
ما تخطي الصطره اعله الهامه
هاي العركه ابدون گوامه
لو يرفع چفه يصفيهه

نازل للميدان بزوده
والقائد ضموه اجنوده
راية عباس ومشدوده
شيحلهه وحالف يگضيهه

صار الترب بالطف غطاهه
خله الزلم بين گفاهه

--------------------------------------

سولف سوالف هاشمي وما يعتنونه
من طبرة السيف العدى ظل يعرفونه


ما صح مقاتل شايل سلاح
ميخلي جندي بحرب يرتاح
ها يا علي واسمك تواريخ
اتذكرهم ابقباض الارواح

چا غير الطف چفك بيهه
ها يا حاضرهه وماضيهه
يا چلمة حگ من نحچيهه
طب الحومه خيال الحد

والنوب الوجه النوراني
واعجاز الشاب الرباني
گللهم ديني وقرأني
هذا حسيني قرأن الطف

سورة فجر حيدر قراهه
خله الزلم بين گفاهه

-------------------------------------


نعم المقاتل والامر من الامامه
خله السيوف الشارده تفهم كلامه

لا راجل ولا حتى خيال
يگدر يواجه واقع الحال
اعداد كثره گبال يمناه
بس هوه سيفه شقرر وگال

هذا انه الواحد بس ديره
جيش وزارع بيهم حيره
لازمني الغيره ابن الغيره
ما هد چفه ولا هداني

سوينه بگاع الطف روجه
يا بحر الدم ياهو ايفوجه
ما ظلت خيل ومسروجه
يا رجفه بگلب الخياله

صارت صدگ من اعتناهه
خله الزلم بين گفاهه

--------------------------------------

تسكت ألوف بدخلته وهيبة حضوره
يشبه حسين وحيدره ومن جده صوره

نسل النبوه التحكم الكون
يا كنز من حسين مكنون
اعظم سلاله واطهر اصلاب
أهل الملاگه الما يثنون


ما يسكت صوت الثوريه
وچفوف الاكبر حربيه
والچانت كلهه اعزوبيه
هم ردت تطبر بالهامه

سواهه وهذا ابن الساده
فارسهم ما فاده اعناده
خلى السيف بنحره اگلاده
موش بسيفه بچفوفه ايطگ

عين اليضد طگهه وعماهه
خله الزلم بين گفاهه

-----------------------------------

راواهم فنون الحرب علم البساله
من يخلص الفذ النقي لله تعالى


يفتح آله الكون الابواب
ولاجل النصر تتسبب اسباب
يخلي الدماء تقود الاجيال
يخلي الطفوف اتصير محراب

ما دامك علحگ صيح آنه
واضح بالتاريخ امچانه
مسكين اليتبع شيطانه
يا تاليته خسران الشر


انتم أول وآخر والغايه
بالدنيا انتم احلى حچايه
ما تنزل وتطيح الرايه
ما دام بچفكم مرفوعه

ليوم النصر عالي لواهه
خله الزلم بين گفاهه

رعد الفريجي _ محرم 1447
ثوابها الى روح والدتي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

يمه الولد للشده ينراد
يمه الولد للعيله رداد
امك يبعد امك سبيه
مو تدري هاي الغاضريه يمه الولد

------------------------------------------

يا بعد سهر الليل وارباك
ها يلولد خليني وياك

نايم على تراب الحرب ومغمض العيون
حشمتك أگعد يا علي ما تسمع شلون ؟
آنه امك وهاي العدى وين اليحامون
وصلت زلمهم للخيم چا ما تگعدون

كلفه وعلي بالهيمه نسوان
مامش اهل ما عدنه وليان
ها يلولد عينك عليه
مو تدري هاي الغاضريه يمه الولد

-------------------------------------------

اسم الله اعله طولك من التراب
يشبه محمد والوجه شاب

تعبانه اجيتك يلولد صد لامك وشوف
يايمه من ضيم العلي والحسره والخوف
ما بيه اصد اعله الولد لا شيل الچفوف
مو ذاك الاكبر لا صغر من طبر السيوف


ساعدني اريد أكعد واحاچيك
شنهو المتعبك والمآذيك
حار الرمل نام اعله اديه
مو تدري هاي الغاضريه يمه الولد

---------------------------------------


نايم حبيب امك يمدلول
وآنه السكنت خلافك الچول

ماريد دار بلا علي ما طب عليهه
هو الوطن وادم ترى تغفى اعله اديهه ظلمه البيوت الفارگن بالطف وليهه
المن بعد هو اليظل هلدنيا بيهه


غم الحياة بدون الاحباب
كون التراب يرد للتراب
ونتلاگى يمدلل سويه
مو تدري هاي الغاضريه يمه الولد


-----------------------------

عالو علينه ونومك شلون ؟
گوم الوجع واصل للعيون

جبناهه من خيمه لنحر للباقي ممدود
ياخذنه سوط اعله النهر ونباوع الجود
توجعنه جثه اموزعه توجعنه الخدود
كلما ننوح اعله الاهل تولينه الجنود


اول بواچي بدون دمعه
ضيم الگلب ياهو اليسمعه
تخنگ ترى الونه الخفيه
مو تدري هاي الغاضريه يمه الولد

-------------------------------------

صارت بعد للشايل سياط
وصار الحچي من دون رباط

متصدر الخادم صبح من يحچي وياي
وسفه وبعد لا ما يصح للچلمه شراي
مات الحسين وهلصفت للمالهم راي
ايست من صار الشمر بضعوني حداي


لا بعد ما تسوى الملامه
دنيانه ما بيهه سلامه
خل ننجمع حدر الوطيه
مو تدري هاي الغاضريه يمه الولد


رعد الفريجي _ محرم 1447
ثوابها الى روح والدتي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

من الخيمه راح ادعيله
ويه الدعاء آبچيله
يمه الولد يمه الولد
يم الحسن حضريله

---------------------------------------

هاي الحرب ،، محد يرد من عدهه سالم
هاي الحرب ،، تبدي بعلي من الهواشم

سلمت روحي بساعة وليدي أندار
يشبه محمد بالحرب مامش غار
ودعني رايح والگلب يلهب نار
ما أدري چني استشهدت مدري شصار

ربي ابحبيبك رده اليه
بس انته الترجعه عليه
مديتلك گلبي وأديه
حرمه وضناهه بهالمنيه


راح الحبيب اگبالي
حال الجنايز حالي
ها يا علي ها يا علي
ها رحت يمه الغالي

----------------------------------------


وينك علي،، من الخيم ابچي ونعيتك
وينك علي،، چا غير حظني وليدي بيتك


باوعت لحسين وعرفته بيا حال
وجه الحسين يگول واقراه شگال
لا أبني بعده بخير راجل خيال
بس بعده ضامي وهالعطش اي چتال

عطشان الاكبر بعده ضامي
وطبع الحديد هواي حامي
لا ماي موجود بخيامي
يا حيره گليبي وكلامي

بعيوني مامش دمعه
كون اليروح انرجعه
طول علي طول علي
ما رد اليه بسرعه

------------------------------------

لونه انخطف ،،وجه الحسين وحيله رايح
لونه انخطف ،، يمشي اعله طوله وگلبه طايح

ما اريد أساله اعله الولد حي لو مات
وما أكدر اصبر گمت أزيد الونات
يا ربي رده بجاه ذيچ الدمعات
يعگوب رد أوليده وبحظنه ايبات

رد الولد لاحضاني رده
مو دمعي لا عيني أتبده
بعده الحرز غافي اعله زنده
بعده حلو لو خرب خده

بعده الضوه البعيونه
لا چنهم إيطفونه
لا ما رجع لا ما رجع
خافنهم أيذبحونه

--------------------------------------

يابو علي ،، ها شو علي طول علينه
يابو علي ،، لتگلي رايح من ادينه

حاچيني تكتل نظرة التحچي أجروح
ها رد عليه وليدي ؟ خافن مذبوح ؟
يحسين الاكبر ما وصل؟ ها بيه روح؟
خيال بعده الغالي لو لا مطروح

ياهو اليظل للروح سلوى
محتاجته الشيباتي تچوه
هذا أبني مات شلون بلوه
يسوى البچي والنوح يسوى


شفت الحسين وآني
مات الحچي البلساني
يابو علي يابو علي
هذا الخبر دفاني

----------------------------------------

چنهه انتهت ،، خلصت اليمه وميت رباي
چنهه انتهت ،، راح ابقه وحدي ومحد وياي

ماتن أجدامي وما اريد ابقى هناه
ودوني لابني الما أعيش ابلياه
يا حيلي بس ساعدني أوصل ويلاه
اغفه اعله طوله وبالحرب ابقه وياه


يا موت اخذ دلالي مني
ما ريد اعيش الطف كتلني
أبني انذبح يا دنيا ابني
من ريت ذباحك ذبحني


يوليدي آه يوليدي
يلچنت عمري وعيدي
بهاي الحرب بهاي الحرب
راح الولد من ايدي


كلمات الخادم / رعد الفريجي
محرم الحرام
ثوابها الى روح والدتي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

علي الاكبر يا علي
فارس الحومه علي
ابن الحسين ابن الحسين

*****

سجل التاريخ فارس للقتال
آية الموت انوصف وآية جمال
أسمه وحده بكربله ايذل الرجال
علي يحسم كل حرب قبل النزال

علي وتم ،، يزيل بطلعته الهم ،،
يسيف محنى بالدم ،، علي علي علي

هوى وريح ،، علي طبراته تسبيح ،،
تطيح الدنيا ميطيح ،، علي علي علي


يا حمد يا قل هوه
بكربله امخلص الهوى
ابن الحسين ،، ابن الحسين


*


فارس الهيجاء قتال الالوف
وين كل ذيچ الزلم وين الصفوف
هذا اول هاشمي بارض الطفوف
دنگتله الروس واتطيح الچفوف

زلم خيل ،، يدوس ارگابهم حيل ،، يدگ الروس مو هيل ،، علي علي علي

يمغوار ،، يچف اليحرگ النار ،، يچنك علي الكرار ،، علي علي علي


يا صعب لا مو سهل
بيده ينشال الحمل
ابن الحسين ،، ابن الحسين

**

وارث الاعجاز والكف الشديد
نازل بهيئة علي فارس عنيد
ما تكضه اسيوف ميكضه الحديد
هذا قالع خيبره حيدر جديد


سلب روح ،، بخيت الطلع مجروح ،، ابد ميعيش مسموح علي علي علي

وكت موت ،، بعد ما يرتفع صوت ،، الشرد بالحومه مبخوت علي علي علي


يا سلام الله عليه
منوجد مثله شبيه
ابن الحسين ابن الحسين

****


يا مصير الراد يوصل للخيام
يدري بالعباس واگف بالامام ؟
يدري بحسين وعلي موت انتقام
هذا يوم الطف مثل يوم القيام

گطف روس ،، عليها الحافر ايدوس ،،
هواهم ليش محبوس علي علي علي

صدگ ليش ؟ ،، نگص ثلثين بالجيش ؟
ماكو صواب بالريش علي علي علي

بني هاشم بالقتال
هلا برجال النزال
ابن الحسين ابن الحسين

**


بسمُ مَنٌ اعطى لعينيه الضياء
بده نجل حسين وقعة كربلاء
يا نداء الجيش بالخوف النداء
ما تضمنه الارض لا حتى السماء

والرگاب ،، تطيح وحاسب حساب ،، يميز الشيب علشاب علي علي علي

غصب جاي ،، يحيره وما يصح راي ، لأن يبدي بالهواي علي علي علي

گمر بالحومه انوصف
خلى قائدهم رجف
ابن الحسين ابن الحسين

كلمات الخادم / رعد الفريجي
محرم الحرام
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

بين الحلم ،، بين الصدگ
خيل وزلم ،، ظل تنسحگ
علي بالحومه علي

***

يا حلاته ،، يا غلاته
هاشمي وطب الحرب نومس خواته

اي عليهم ،، اسوى بيهم
طاحت اسيوف وبقن ميتات اديهم


هلاه أهلاه صاحو تره الاكبر اجانه
بعده يم حسين لكن تعبانه
الله ما يسترنه لو سرفن ردانه

دخيلك يا علي ،، ومن هسه گالوهه
يلزلمه الكلف ،، والحومه عافوهه

شنهي الحصل ،، لا ما درو
ياهو الوصل ،، گلهم حچو
علي بالحومه علي

****


ياهو جده ؟ ،، من يرده ؟
هيه طبره وما يثني شلون شده

دمه حامي ،، سيفه دامي
گلهم اتحلمون تدنون الخيامي

وين وين القائد العدكم أشوفه
وداعت العباس الا أگطع چفوفه
الجيش ضم رجاله ما تطلع سيوفه


بدت هاي الحرب ،، بس ما اظنهه تفض
العدل والمات ،، من طب الشهم تركض


گول وفعل ،،، والله ونعم
هذا علي ،،، ذل الزلم
علي بالحومه علي

*


كلشي بيده ،، من يريده
تصير يم چفوفه لو گالو بعيده


كض رسنهه ،، هد متنهه
الدنيا طاعت للأمر ما تحچي فنهه

شلون؟ وين؟ أوياهو؟ كلمات العبرهم
هذا صگار الحرب چنه وصلهم
همه شو عدلين چا ياهوه الدفنهم


أبد ما ينحمل ،، والغيره بعيونه
يخيال الحرب ،، گامو يسمونه


بيده انتهت ،، صاحو علي
يم الشهم ،، اي هلهلي
علي بالحومه علي

**


هذا قائد ،،، اي مجاهد
بالحرب عباس واحد هوه واحد

كل عددهم ،،، تم حصدهم
ميمنه التاهت أگباله وميسرتهم


ناس شردت يا علي وصاحت دخيلك
يا ثگيل ويا حرب تگدر تشيلك
جيب روس القاده يله اترس شليلك

صدگ صار الحچي ،،، والزامط اتعرفه
تغير اعله الچبير ،،، البيهم اتحذفه


ما ينذكر ،، لا ينتهي
حتى العدو ،، يهتف علي
علي بالحومه علي

***

لا يجارى ،،، كالغيارى
يا بعد حيل الهواشم سيفه ناره

كربلائي ،،، بل فدائي
هاشمي وصاح الحرب هيه ردائي


كشخة الساده وتصدر كله نخوه
ناس صاحت هم علي شنهايه بلوه
حسين والد والنعم والحره لبوه

من اهله وخواله ،، تبين افعاله
لزم بيده الفرات ،، وصبح وشاله

صار النهر ،، خادم أله
ركعت تره ،، كل كربله
علي بالحومه علي

كلمات الخادم / رعد الفريجي
محرم الحرام
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

ليلى أم علي الاكبر عليهما السلام
*

حياتي ولا حياتك
ييمه ويا غلاتك
ذبلت هواي متغيره المعاني
علي يوليدي اليه الموت آني غلاتك

****

تريد تروح أروحن وين ؟
ييمه ويا نبض بحسين
يوجه العافيه اترجاك
درب الموت اريده منين

ييمه ،، اظل بعدك غريبه بهاي الطفوف
ييمه ،، تره الغرگان يذكر كل الچفوف
ييمه ،، العمه البعيوني رايد طولك يشوف
ييمه ،، يا طبع النده المتفهمه السيوف

تروح شيبقى عندي
واظل بالخيمه وحدي
بدونك ما رحم بيه زماني
علي يوليدي اليه الموت آني غلاتك

***

علي يا نعمه من الله
يل تشبه رسول الله
تراني اتعذب بلياك
اليشوفك كبر وصله

وحيده ،، اذا متعود اليه وليدي يلماي
وحيده ،، أموت بكربله وما اريد دنياي
وحيده ،، علي لمن تروح اتوفى بهداي
وحيده ،، تظل امك غريبه ومحد وياي

البعد يخنگ وجودي
واگل لايامي عودي
الهوى حتى الهوى راح ونساني
علي يوليدي اليه الموت آني غلاتك

***

عجيب الطف يذبحك راد
ابد ما يحفظ الاولاد
يحيرت گلبي يا بلواي
بچيت بخيمتي وما فاد

مصيبه ،، تعب عمري اشوفه بكربله ايموت
مصيبه ،، المهر شايل حبيبي وچنه تابوت
مصيبه ،، توادعنه ودفنه الدمع والصوت
مصيبه ،، بعد محد يجيهه انطيح البيوت


يرايح ردلي لحظه
بعذابي شلون ترضى

العطش مر بيك لكن موتاني
علي يوليدي اليه الموت اني غلاتك

**


لچمني گليبي ها مولاي
علي ما رد نطرته هواي
اخاف من الهوى يأذيه
شخبار الحرب والماي

يحيره ،، الصبر خلصته كله اباب الخيام
يحيره ،، بالف حسبه بقيت وگلبي محتام
يحيره ،، صدگ مامش رحم والناس ظلام
يحيره ،، الوداع بكربله وما يخلص بشام

يجيني وما يجيني
علي يا ماي عيني
تره التفكير بعدك ذبلاني
علي يوليدي اليه الموت اني غلاتك

***


يرد لا ما يرد ليه
بعد كل حيل ما بيه
احس بگلبي راح يموت
واحس بروحي مسبيه


اخيرآ ،، رجع مشيول وآنه أوميله بلأيد
آخيرآ ،، كسر گلب الحسين الموت شيريد
اخيرآ،، اليعيش بنص دليلي أمغرب ابعيد
اخيرآ ،، وصل لخيامه ذاك اليشبه العيد

رجع مذبوح دامي
متت آنه وكلامي
خذاني الگبر من ريته خذاني
علي يوليدي اليه الموت اني غلاتك


كلمات الخادم / رعد الفريجي
محرم الحرام
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي