الذاك السهر ذاك .. شيرجع الايام
مشتاگه أناديك .. يٌمه الولد نام
-----
أتمنى يرجعلي الزمن ياضنوتي بيك
واسمع بچيتك من تفز واگعد واحاچيك
مشتاگه الّعبك يالولد تضحك وناغيك
يامَحله كل ما گَمّطَك وتّطَلع أيديك
محتاجه ملگاك .. لوبس باالاحلام
مشتاگه أناديك .. يٌمه الولد نام
-----
چنت آنه أخيط كل صٌبح لرسومك أثياب
واگعد أرتب بالمهد ياأغله الأحباب
لويوم تتمرض چنت دلالي ينصاب
هاياشمس روحي صحت مو وكته الغياب
مَر بيه الغروب .. يابَدريّ التام
مشتاگه أناديك .. يٌمه الولد نام
-----
عبدالله غيرك ماألي يالغالي مولود
ياوردتي اللي تختلف عن باقي الورود
لاعني رايح يالولد واتئمل إتعود
ياهيه مثلي بهل عٌمر غاليها مفگود
بعدك يمحبوب .. حاطتني الآلام
مشتاگه أناديك .. يٌمه الولد نام
-----
مجبوره أنام أتئملت بيك التقي أبطيف
تندهني ظلت دمعتي ويجرحني الف سيف
بعدك أخذ مني الزمن يوليدي چم حيف
وديوان مهدك ينتظر تگصدله لو ظيف
ماظل بعد حيل .. واللحظه چن عام
مشتاگه أناديك .. يٌمه الولد نام
-----
راحت لياليك ومشت شمعه بوسط نار
وبروحتك ظل الحزن بس هوه بالدار
كل ماأعاين عالمهد يجرحني تذكار
بعيوني ظلمه أحتاجت إمن إخدودك أنوار
حِزنك ياالوليد ..من جدمي للهام
مشتاگه أناديك .. يٌمه الولد نام
------
سيد مرتضى الموسوي

هله هله حسين وينه /// بالسيوف امكطعينه
===========================
١/
طلعت امن الخيمه زينب .. شابجه العشره اعله اخوهه
شافته مرمي اعله طوله .. ويمه انصاره اذبحوهه
صاحت ابصوت الفجيعه .. حسين روحه طلعوهه
ندبت ابدمع الرزيه … قالع البيبان ابوهه

هله هله حسين وينه … جسمه ويلي امسلبينه
==================
٢//
من على التله وتنادي .. بويه يا حامي الحميه
حسينك اعله الكاع مرمي .. و فوكه تلعب الاعوجيه
احضر ابساعك نشيله .. لا تجي أتشوفه رقيه
وحدي هالساعه تراني .. طرك الحبال البديه

هله هله حسين وينه … ابساعك احضر يا علينه
=================
٣///
صاحت الحره العقيله .. وصاحت اوياهه اليتامه
هله هله حسين وينه … وليش مسلوب العمامه
دمه جاري عالوطيه .. بيا ذنب سيد الكرامه
ليش ما واحد فزعله ..الفاكد اخوانه وعمامه

هله هله حسين وينه … ما بقاله من يعينه
=====================
٤////

ويه زينب يوم عاشر .. صاحت الدنيه بكبرهه
كبَّراهه اهواي موته … وهي خمسين بعمرهه
اومن كبر هول المصيبه .. ضيعت زينب نظرهه
وحيل ما ظل بيهه ويلي … اتشيل بي صاحب صبرهه

هله هله حسين وينه … بيوم عاشر ذابحينه
===============
٥/////

كلشي وي زينب تغيَّر .. والسمه أتغير وضعهه
على حسين المات ضامي .. نَزلَّت احمر دمعهه
والزجيه بكسر خاطر… كصدته ابكسرت ضلعهه
شوفت المكسور ضلعه.. رادت وشوفه الفجعهه

هله هله حسين وينه … فجعو الزهره الحنينه
==========================
✍🏻 كلمات موسى الخادم ٢٠٢٥

ليلة وداعك على اختك جبيره
باجر تشاهد ذبحتك يغيره
وتشاهد العين ... ذيج الحوافر
وخيل التدوسك ... وي ظهر عاشر
..1....
يليلة ... وداعك ...
كبل لا تبتدي مني خذت كل العمر
يغالي ... على اختك
ابد لا تعتقد سهله اعله زينب هالامر

باجر ابئيدي المهر ليك انه اقدمه
ومنحرك ياخويه ابوسنه واشمه
اوصيِت امنه فاطمه يابو الأئمه

للموت اودعك يخويه بديه
موش برضاتي غصب ها عليه
يا سلوة الروح .... يبن الاكابر
وخيل التدوسك ... وي ظهر عاشر
===============
٢..
يخويه ... شيَّصبر
دليلي امن انظرك جوه الحوافر تنسحك
والمك .. بديه
اظلوع امكسره وما بيك شي باقي صدك

ياكتر منك اشيله الثاني يوكع
وماكو منك صوت يبن الزهره اسمع
وابقى كدامك ابحيره اوكف اركع

واسجد على ادمومك البيهه سابح
وأقره بسجودي منو نحره ذابح
وافرش على الكاع … دمع النواضر
وخيل التدوسك ... وي ظهر عاشر


==================
٣...
جبيره .. المصيبه
بقت جم ساعه واطلع صوب تل الزينبي
أنظرك .. حبيبي
تلوج امن العطش والحر يروح الطالبي

والشمر جاثي يويلي فوك صدرك
و ١٢ طبره يطبرك على نحرك
وأنه من أبعيد يبن أمي أنظرك

ساعتهه روحي احس مني تطلع
لا تذبح حسين أصيحه ومينفع
كدامي يحسين .. ذبحك يباشر
وخيل التدوسك ... وي ظهر عاشر



===============
….٤....

بعيده … المسافه
باجر بينك وبين الخيم يابن علي
تجيني .. أجيلك
لو تبقى بكتر وانه بكتر محد الي

انته مشغول بذبحتك خويه ضامي
وأنه اظل مشغولة البال ابيِتامي
هذا كله ايصير وي حركَـت خيامي

وامراكض خيول جثيره ورايه
ولا حامي عندي طركَـ هالعبايه
بهذا العمر راح … أختك تناظر
وخيل التدوسك ... وي ظهر عاشر




…..٥.....
والاصعب .. عليه
أعوفك عالثره مكطع وصل عاري الهدم
واروحن … أسيره
وتضل أنت بشمس ما واحد الجسمك يلم

ويمك يمروني بنياك الهزيله
مجتوفه يا خويه والدمع اسيله
ومن خجلتي راسي يمك ما اشيله

منظر سبيتي يخويه يجرحك
كافي عليك أنت سيف اليذبحك
من يمك امشي .. ممشه اليحاذر
وخيل التدوسك ... وي ظهر عاشر
==========================
✍🏻💔 كلمات موسى الخادم

چنت آنه ألولي وحظني دافي
نام الولد نوم العوافي
هسه أبسهم ياوسفه غافي
يمه الولد يايمه
———
چنت آنه ألوليك وأحن هايالولد ليليه
ومكحل اعيوني ألسهر والنومتك محنيه
حلوه الدللول الولد لَمّن چنت بيديه
هسه شگلك حايره وآنه أصبحت مسبيه

وينك صحت ياشمعة أمك
ماي وطحت وشلون ألمك
عطشانه ردتك ماي صافي

يُمه الولد يايُمه
———
تسعه الشهور أمناطره جيتك يبعد أسنيني
غطيتك بجلد العمر وانتظرك أتغطيني
تتبسم أنتظرك چنت يوليدي مَتبچيني
تتنفسك عيني ضوه ماتت أبفگدك عيني

يوليدي أتاني أحله كلمه
تحچي وتگلي يمه يمه
الذاك السهر أنطر توافي

يُمه الولد يايُمه
——-
يوميه أعاين وأنتظر يوليدي أشوفك تكبر
وأسم الله أگلك لوگمت وكت المشي تتعثر
بملوحة أدموع الجفن عودك سگيته وخَضّر
هسه أصفگ أيدي بغيبتك والشوفتك أتحسر

ماشابعه أعيوني بوجودك
أصفر أعاين ليش عودك
حزنك يضل مابيهّ كافي

يُمه الولد يايُمه
———
وياك حلوه دنيتي وبعدك تعذب حالي
لو ماتشيلك هالارض شلتك وسط دلالي
عبدالله يالتسوه التعب غالي انته وابن الغالي
أتمنه مَيته اولا شفت يوليدي مهدك خالي

مابيه لو لحظات أعوفك
هسه ذبيح أگبالي أشوفك
هايا گمر وبليلي طافي

يُمه الولد يا يُمه
———
ودعتك أبحظن الابو وكلش جرحني إغيابك
وأبالي أشوفك مرتوي مو ترتوي بمصابك
شميت عطرك يالولد بيده الابو من جابك
ماتت أديه من شفت لون الدمه بثيابك

ليش السهم يمه أعله نحرك
والدم نهر يجري إعله صدرك
مو وكته يوليدي التجافي

يُمه الولد يايُمه
———
خليتك وشفت أبرمح راسك يشيبة راسي
يالماشبعت إمن الهوه گطعوها كِون أنفاسي
تندار أشوفك وألتفت حزنك يّجرح أحساسي
ياطفل گبلك منذبح منظر منيتك قاسي

كلما يديرونك عليه
أتمنى توصلني المنيه
والجرحي بس موتي اليشافي

يُمه الولد يا يِمه
———
سيد مرتضى الموسوي

عبد الله .... ييمه
......................::::....................
١=
كل ما حاولت أنساك
تعرضلي صور فركَـاك
يا عبد الله يوليدي

روحي اتروح كل ما شوف
طفل ابكَـدك وملهوف
ودي اخذه ابأيدي

هلبت من اشيله ايخفف آلامي
واتخيلك ييمه الانته كَـدامي
بعدك كل فرح ما شافت ايامي
يالعمرك شهور ومنذبح ضامي

عبدالله /// ييمه
............................
٢==
كل ليله انوح اعليك
من يومك الهذا ابجيك
آه يا سلوة اسنيني

كبرني وداعك حيل
وسهرني عليك الليل
باكَـ النوم من عيني

شيب البيه كله من بعد موتك
وحسره بكَـلبي ضلت اسمع الصوتك
جنت احسب الي تكبر مثل خوتك
وازفك بيدي عرسك موش تابوتك

عبدالله /// ييمه
.......................................
٣===
ما أنصف زماني وياي
خذاك وعافني بلا راي
يا سباح دلالي

بعدك عمري ضيم بضيم
يالعفتك ابنص الهيم
وراسك عالرمح عالي

ريت الموت اخذني ابكربله يمه
ولا جابوك اليه المنحر امدمه
بالخيمه جنت ساعتهه منهضمه
عطرك كَـبل شوفك صرت اشتمه

عبدالله // ييمه
......................................
٤====
كاروكك الي خليت
ذكرى وللمنيه امشيت
ليل انهار اهزنه

هلبت ليله اشوفك بي
يالخالي إلي امخلي
واكَـماطك اشمنه

تعبني غيابك حيل يوليدي
ما خلالي فرحه ولا شفت عيدي
وكل ساعه اهزن مهدك  ابأيدي
وي روحي اسولف بالحزن زيدي

عبدالله … ييمه
===========================
✍️🏻 كلمات موسى الخادم ٢٠٢٥

حَگَّك من تون...عبدالله ييمه
مَكانك بالحِظن...عبد الله ييمه
ضاعن وانتهن حِلمي وحنانك
مو عالرمح يوليدي مَكانك
مَكانك بالحظن
..................................
يعبدالله يكاسر خاطر حسينك
يون گلبي ييمَّه امن اسمع اونينك
المفروض الورد يغفه اعله چفينك
مو فوگ الرمح ودموعك ابعينك

زغير اعله الرمح...يازهرة حياتي
يالفگدك جرح...يلچم أمنياتي
يالما تعرف الموت ابزمانك
مو عالرمح يوليدي مَكانك
مَكانك بالحظن
..................................
امن الحَر والضِّمَه مِتغيِّره ارسومك
ومن دم الوريد انصبغت اهدومك
ناديتك عَسن يومي گبل يومك
يايمه وحرام اعله الرمح نومك

مِنِّي اتفَرهَدِت...ياثمرة فؤادي
وآنه اتعذَّبِت...بمصابك وانادي
مايحمل قهر يبني جِنانَك
مو عالرمح يوليدي مَكانك
مَكانك بالحظن
....................................
معقوله انتهينه اهنا يعبد الله
وابچتلك فجعنه الما يخاف الله
سهم هجرك ييمه ابمنحرك صلله
وحرمني امن المناغه وچلمة اسم الله

ابغيابك يالولد...شَيَّبت الليالي
أهزَّن بالمهد...لن المهد خالي
أحسِّب بعده ماحاين أوانك
مو عالرمح يوليدي مَكانك
مَكانك بالحظن
....................................
بأمان الله يروحي ويانظر عيني
خسرتك وانگظه المابينك وبيني
لا ناغيك يبني ولا تناغيني
كون امن البواچي ادموعي تعميني

يالمصابك كلف...ويذبح بالمشاعر
وابد ماينوصف...ياكسر الخواطر

يارب اندعي إبني ابأمانك
مو عالرمح يوليدي مَكانك
مَكانك بالحظن
....................................
عندك جاه اكيد وراح تدعيلي
على فرگاك أصبر يابعد حيلي
خِنَگ صدري الحنين ومن يجن ليلي
أدعيلك ييمَّه وانت تدعيلي

گلبي المنهُظم....ماينسه المَشاهِد
واعله اهل الضلم...نحرك يبقى شاهد
يبني والعطش يبَّس لسانك
مو عالرمح يوليدي مَكانك
مكانك بالحظن

سيد علي الموسوي

زينب كعدت ابساعات الاوداع
تسولف عالنحور التترس الكاع

تكل لحسينهه اشلون
عدله ابقه وتموتون .... يخوية

1؟؟؟؟.......
بإجر إذا صار الصبح
بعيوني اشوفك تنذبح
وراسك يعلكَونه ابرمح ... واعيوني اتنظره
باجر تموت امن العطش
وجسمك يضل ابلا نعش
وينطبر نحرك بثنعش .... طبره بأثر طبره

وين انطي الوجه بعدك يبو الأكبر
وانه انظر شمرهم ركَبتك ينحر
مني اتريد انه اصبر بيمن اتصبر

شيصبرهه روحي من انظر أعليك
شمر جاثي اعله صدرك حيل ماذيك

وتنظر هاي الاعيون
عدله ابقه وتموتون .... يخوية
...2...
باجر كفيلي اعله النهر
طوله يسوُنه وذر
ومنه يبوكَون النظر .... وانه انسبي بعده

عبدالله باجر ينفطم
بسهم الغدر سهم الهضم
ومن ضحكته الحلوه انحرم .. وانه انسبي بعده

اعله عبدالله وكَمر هاشم يهل دمعي
اكَابلهم واضل انحب واضل انعي
وما واحد يخويه اليرحم ابوضعي

لا خدري اليضلي ولا يضل صوت
عكَب عباس ياخذ صورتي الموت

وبية اعداي يمشون
عدله ابقى وتموتون.... يخوية

......3......

باجر شبيه المصطفى
اسيوف العده تتلاكفه
ما يبقى شي منة اوصفه .... أيساعد كَلب أمه

باجر اذا طلعت شمس
جاسم ابحافر ينرفس
ولا تضل زفه ولا عرس . .. أيساعد كلب أمه

شباب ابعمر الاورود ويذبحوهم
ابدمه المنحر يخو زينب يحنوهم
ويضل يبجي عليهم من يحبوهم

تضل أجسامهم من غير دفان
واضل ابجي عليهم بجي اللهفان

الأحبهم ما يضلون
عدله ابقه وتموتون.... يخوية

.. ..4.....
باجر ولا خيمه تضل
والظلمه تلفينه بعجل
وانه أضل ابلا اهل .... بعدك يمذبوحي

باجر حبل باجر سبي
باجر حركَ هاي العبي
ويحدي بضعنه الأجنبي .... بعدك يمذبوحي

باجر لو طلع فجره اضل وحدي
بس ايتامي تبرالي ودمع خدي
لا كافل يضلي ولا اخو العندي

مابين الشماته اوبين سلاب
اضل محتاره حيره المالهه اجواب

وسبية اعلي يصيحون
عدله ابقى وتموتون.... يخوية

.....5.....
باجر ورانه اشكد ركض
ابطول وعرض هاي الأرض
ما واحد النه ينتفض .... صعبه اشكثر صعبه

باجر نتيه ابكربله
وما تبقى وحده امدلله
وتنسبي كل العايله .... صعبه اشكثر صعبه

وتضل امن الركاض ايتامكم تزحف
ورقيه ارياكَهه من العطش تنشف
وانه بحبل الشمر للشام أجتف

وبذيج الخرابه انبات يحسين
اوسادتنه الترابه يا ضوه العين

ونطب السوكَ يردون
عدله ابقى وتموتون.... يخوية
......
كلمات : ✍️ موسى الخادم

ليلة الوداع .... حسين جمَّع عيلته بخيمة سهر
ليلة الوداع .... وكعَّد اكباله بناته وحسره جر
وزينب اتعاين عليه
كاعد ويفرك بديه
....1....

اول ما بدا يسولف ... شراح ايصير اله باجر
ركضتله رقيه بشوك ... ودمعهه تكسر الخاطر
كالتله يبويه اشلون .... وليش ايدوسك الحافر
ضماهه اعله صدره وصاح .... مكتوبتلي بالعاشر

نشفَّي الدموع ... غاليه ادموعج علية غاليه
نشفًّي الدموع ... يالحبيبه يم سوالف دافية
تبتعد عنه وتجيه
كاعد ويفرك بديه

...2...
كل ساعه ويدير العين ... صوب ام الخدر زينب
مثل الضايعه اسينه ... يدورهه وعليه تنحب
يكلهه اشلونج اختي ام عون ... باجر حالتج اصعب
ضمي حيلج الباجر .. جدمج بالركض تتعب

ابحركة الخيام ...حيلج ايروح ويضل بيج الضمه
ابحركة الخيام ... ايتعبج كثر الركض بت فاطمه
الشوك جدمج تعتنيه
...3...
والصورة الاشد تذبح ... من عبدالله جابوله
شمه بركبته وكلهم ... باجر ما تلولوله
ينصاب ابسهم والدم ... يتناثر على طوله
يرد ليكم بلا روحه ... بقت ساعات احسبوله

بالعطش يموت ... ما يروّنه العذب يروه بسهم
بالعطش يموت ... والكماط يصير كله قطعه دم
وينكطع صوته وبجيه
....4....
والكافل بديه رايه ... ولازم باب المخيم
كلما يحجي كلمه حسين .. صار اشوية يتقدم
ومن كال ابرو ذمتي اهنا... الكفيل ابغيرته اتحزم
وحشم وي دمع عيناه ... اشما عنده عزم حشم

ناده يالكفيل .... انت كبلي اتموت يم المشرعه
ناده يالكفيل.... اوصلك والكه الجفوف مكطعه
سهم عينك ارتجيه
....5....
اوصيكم بعد موتي ... على ايتامي اوصيكم
اني ادريهه يحبابي ... وصيتي الموت تاذيكم
علي انه الذبح مكتوب ... اومكتوب السبي اعليكم
يهل بيتي طريق الشام ... راح اهوايه يسبيكم

عالرمح واشوف ... ياهي بيكم تعطش وياهي اتعثر
عالرمح واشوف ... اسياطهم فوك المتن تترك حفر
والعليل الوجع بيه
........
كلمات
موسى الخادم

عبدالله حيل اذاني .... سهم بركبته اجاني
جلمة دللو يبني .... ماتت وظليت اني

...1...
العطش أذى ابني يا ناس وخذيته
العمته زينب بلكت اتهود بجيته
يابسه اشفافه يويلي ودعيته
كلبي حس ما يرجع ايروح المنيته

فتح اعيونه اكبالي .... ناغالي بس مو عالي
مبحوح صوت اوليدي ... حاله اشد من حالي






.....2.....
بي مشت زينب لخوهه تشتكيله
خوية عطشان الطفل برد دليله
اخذه بلكت ماي يروه ويرد حيله
من العطش عبدالله ساهر كضّه ليله

ذبلان أبنك شوفه ... كوه يحرك اجفوفه
كوه يجر بنفاسه ... يحسين لا تعوفه
....3....
راح فوك اجتاف ابو يطلبله ميه
رجع متروي بغدر سهم المنية
مني راح ابساع ابني شلون بيه
وانه جنت احسب ازفه ابهاي اديه

حسبَته اشوفنه اكبر ...كد قاسم ابكد الاكبر
ماحسبت موته اهنا ... بعمر الاشهور امطبر

...4...
الله لا يحرم كَلب ام من ضناهه
المات ابنهه اتموت من ونهه وبجاهه
وثوب الاحزان ابد ميفارك ضواهه
ليل وانهار وصبح يركض وراهه

ما ينتهي حزنهه ... الدفنت بديهه ابنهه
تكضي العمر مفجوعه ... حد ما تطب جفنهه
...5...
كربله من عندي باكت احله عِشره
طفل مثل الوردة ست أشهور عمره
صابته بسهم المنيه الكطع نحره
ولية عافت مهد خالي البيه عطره

واكماط بالدم غارك ... امفارك حبيبه امفارك
هذا الشفت بعيوني ... غير الحرك والساحك

.......

كلمات
موسى الخادم

يوليدي يالغالي ..... ظل المهد خالي
عبد الله يبني بموتتك
ذبحولي امالي

...... 1 ......

يوليدي تدري بموتتك باكو فرحتي
ما ظلي كلشي بدنيتي تشهد عبرتي
ما حسبت تمشي وتخليني ابحسرتي
خابت ضنوني يلولد بالغاضريه

يا فرحت ايامي .... باكوهن احلامي
من رجعوك الخيمتك ... مذبوح كدامي



..... 2 ....
سهر الليالي والتعب ذاكه التعبته
من عندي راح ابفركَتك ماي وشربته
من الله بس انت بدمع عيني طلبته
حاربني دهري وباكَك بسهم المنيه

بعدك يمحبوبي ... اسود صبح ثوبي
رحت وعفتني للمحن ... هذا انه مكتوب

.... 3....
اه شكثر مشتاكه الك بيك افجعوني
بكماطك اثار الـدمه تنظــر عيوني
ريت انه كَبلك بالسهم يمه اذبحوني
ولا شفتك ابدمك تخضبت المسيه

من جرحك اجروحي ... يا مصدر النوحي
سهم الي صابك بالنحر ... صوبني ابروحي


...... 4 .....
كل ساعه اصد المهدك وما بيه اشوفك
لا بيه اصدك ذبحتك لا بيه اعوفك
متعوده اناغيلك جنت والزم جفوفك
وبحضني اضمك يالولد بثنين اديه

موحش صبح ليلي ... موتك اخذ حيلي
جلمت دللوه يالولد ... حرموني يا ويلي
....... 5 .......
لو أدري ما ترجع ألي ما عفتك اتروح
جا بالدمع يبني رويتك وانت مطروح
شنهو الجنيته بروحتك يا سلوة الروح
فوك العطش ذبحوك يا فرحت رقيه

كل ضني يرونك ... مو نبله يرمونك
ما حسبت هيج الحقد .. بالما يحبونك

... تمت ...
......
موسى الخادم

يل كلشي منك داسته الخيل
ما بــيك جيه وكــرب الليل
عطشانه خويه الشوفتك مو للماي

...1...
تسألني اليتامه اعليك وانه اعليك هم اسأل
جيتك انتظرهه بروح لاخر ليل واتوسل
أذا ما بيك جيه انخاك تنطيني يخوية الحل
لا خيمه البقتلي ولا كفيل ايعدل المحمل

بالهيمه وحدي امكابله النوح
الجيتك اتاني بطلعت الروح
وين انطي وجهي ابغيبتك يا رجواي

...2...
خويه اعليه هذا الليل جلجل وانه منتظره
كل ساعه واكول ايعود سالم وارث العتره
أصبر روحي اكول المات مو انت ونزف نحره
اونه بعيني شف الخيل تسحكَ ضلع للزهره

عالتل نضرتك باخر انفاس
بالاعوجية صدرك انداس
ملعب صرت للرايح انته و للجاي
....3....
مابية اقتنع ذبحوك يا سلوة علي الوالي
حال الضيم خويه حسين بعدك ما يسر حالي
وين انطي الوجه بالليل والشماته تبرالي
أخ شكد الك مشتاكَ كَلبي ومنشغل بالي

ما تنحمل ساعات الافراكَ
باكَت حياتي والصدر ضاك
ماضل فكر لا شوف عندي ولا راي
....4....
اول ليلة عني ابعيد كلي اشلون اكضيها
وانه الامس جنت وياك من اول التاليها
هسه الوحدي ظليت روحي اشلون اواسيها
ريت الموت اخذني اوياك كلشي الدنيه ما بيها

بعدك اعيش ابدنيتي اشلون
يالمني ماخذ شوف العيون
المثلك تفارك كون متعيش اهواي
...5...
يا جرح الأشد اعليك رد اجواب يبن امي
جرح الرمح لو الاسهام لو حافرهم المدمي
بحرك الخيمه اعاين ليك وانت بعيد مو يمي
من حشمتك اتوجيت برماح وشلت همي

مهدود حيلك من الاسهام
واتريد تطفي ناري الخيام
كمت وطحت جم مرة شافت عيناي

....6....
باجر لو طلعت اشلون من يمك امكَيديني
وانته اعله الوجه مكَلوب يبن امي ونظر عيني
ما بين الغرب يحسين أمشي اشلون حاجيني
ريته الصبح لا يطلع عليه وشمر يسبيني

درب السبايه اعليه ميلوكَ
والأشد منه صعدت النوك
صار الزمن بعدك عكس يمشي وياي

......
تمت
......
موسى الخادم

هاية اخر ليله وية حسين تجمعنه
لا تعلون البواجي خاف يسمعنه
اتوادعو اوياه أبلطف
حسين محبوبي ترف .... لا تلجمونه لا تلجمونه

....1....
من بده اللــيل وظلامه ... ونامت اعيـــون البشر
العيله كلهه بخيمه وحده...انجمعت ابوكت السحر
ما حجو بس على حسيني ...اعيونهم تربي النظر
الحرة وصتهم بواجي ....اكباله ماكو ابهل السفر

كالتلهم خل نضم ادمـــوعنه الباجر
من نشوف حسين وحده ما الة ناصر
وعينه لخيامه ترف
حسين محبوبي ترف .... لا تلجمونه لا تلجمونه


.... 2 ....

قصت الموادع بدتها ... الرباب اوية الطفل
صارت اتناغي ابدمعه.... جنها تعرف ينقتل
جم سهم رسمت بديها .... مصوبه واكماطه يحل
اه يا نار المصيبه .... البلمخيم تشتعل

ينذبح عطشان ابنها وعمره ست اشهر
الها ابو اليمه يـــردة ونحرة دم يكطر
دمه ما يبقى يجف
حسين محبوبي ترف ..... لا تلجمونه لا تلجمونه

.....3.....

رمله وي جاسم تسولف ... يبني يا حلو الطبع
وليلى عل الاكبر تنادي ... بيك ما اريــد انفجع
بالبــواجي الليل خلصو .... دمع متلاكي بدمع
من كــثر ما ظلمه جانت ... روحهم شعلو شمع

التقو مثل الحمامه ابعش الملاكه
واحد يصبر بالاخر يابسه ارياكه
موقف ايعادل الف
حسين محبوبي ترف ... لا تلجمونه لا تلجمونه

......4.....

عـــاين العباس لخــته ... امكدرة وما الها حـــس
كعد عد رجليهه يبجي ... وصار يحجي الها بهمس
خوية شنهو الضاك خلكج ... صبح باجر لو امس
فـــدوة دمعــاتج امسحي....اعليج رداد الشـــمس

عنده اعز من كلشي اخته حتى من روحه
يزعل ويرضى الــرضاها تشهد اجروحه
ودّاعاهه ابلا حرف
حسين محبوبي ترف ... لا تلجمونه لا تلجمونه
.....5.....

بخيمت الـــوالد رقية .... كعـــدت الحد الصبح
منة رادت شوف تشبع ... كبل ميعــاد الــــذبح
اتعاين اعله حسين ابوها ... والكلب نازف جرح
منظر ايهدي الراوسي ... مثله منظر ما يصح

ساجد بمحرابه يدعي وهي شابكته
حكها كظت كل عمرها وما مفاركته
يمه صارت ترتجف
حسين محبوبي ترف .... لا تلجمونه لا تلجمونه
.....6....

بس اشد اوداع يذبح .... جان الاوداع الاخــــير
حسين من جمع عياله... وحجه عن ذبحه اليصير
الخيمه ضجت بالبواجي ... من زغير الحد جبير
حين كال ابروها ذمتي .... كلمن ايلاكـــيه مصير

اهنانه ساعتها انه كتله بوية حاجيني
ياهـــو الية لو عفتني يا نظــر عيني
سكنه انه اعترف
حسين محبوبي ترف .... لا تلجمونه ... لا تلجمونه
.....
الحمد الله رب العالمين
اللهم صل على محمد وال محمد
موسى الخادم

شُبّه لهم عبدالله ما مات .... لحسين ابو رد بالسلامات
عن الوعي غاب اي نعم
بس ما كطع نحرة السهم

.....1....
واقع تسولف لو حلم امه الرباب
عبدالله فطموه بالسهم لو وعيه غاب
دمه الترس ارض وسمه شنهي سراب
واكماطه المكطع وكع فوك التراب

موته فلا خلت على البال .... ظنتهم ايرحمون الاطفال
عيشها فركاه بوهم
بس ما كطع نحرة السهم

.....2.....
معذورة ننطيها العـــذر ام الـــرضيع
مصدومه من عظم الخبر حقهه تضيع
عبدالله مــو اين طـــفل حـجه وشفيع
ما حسّبت يروه بسهم ويــرد صريع

ما جانت اتحسب يذبحو.... والخيمته ميت يرجعو
جـــانت تسولفها ابألـــم
بس ما كطع نحرة السهم
....3....
اصغر طفل عاش الضمه بحضان ابوه
ابدمه رسمها لوحته وبسهم الرموه
شاهد على الصار وجرة مي ما روه
ابدال العذب رووه عطش ما انصفوه

صورت ذبحته العالم ايشوف .... اصغر شهيد ابراية ملفوف
يجذب خبر يحجي العدم
.....4.....
حسين انطه قربانه ورضا ابكل اليصير
بين حقيقة هالعـــده ابطـــفله الــزغير
للعالـــم بأسره تـــرك قــصت مصير
ياهو الي مظلوم انكتب يحجي الضمير

حرمله لو عبدالله مظلوم .... ياهو الي بيهم حقه محروم
ياهو الي بالنبله انفطم
بس ما كطع نحرة السهم
.....6......
يا كلمه بالحق اعتلت يا كلمه زور
عبدالله ثــار ابكربلــه ضــد الفجور
صح عمرة ست اشهر لجن جان الة دور
كل طفل يسمع قصّته كبرة يزور

اعظم طفل تاريخه خالد.... عبدالله ست اشهور قائد
لوحت بطولاته رسم

........
الحمد الله رب العالمين
اللهم صل على محمد وال محمد
موسى الخادم

سهرت أشكد على ارباك
يماخذ روحي وياك
*****
يعــبد الله… المهد خالي … اسمعــنّه يـــون
يمحبوبي… على افراكك ... ييمة راح اجــن
صور رسمك… على بالي… اكلبهة واحن
خلص صبري…ركد ثوبي…عليك امن الحزن

هويتك وابقى اهواك
يماخذ روحي وياك
***
خذك مني…غصب دهري … تركني بلوعتي
بعد مـوتك ... فـلا نشفت … يغــالي دمعــتي
شسولفلك… سهم فكدك ... رمــاني بحيرتي
عليك اكظي ... العمر انحب ... يصاحب قصتي

ابد ما لحظة انساك
يماخذ روحي وياك
***

جـرح فكدك … يظل نازف … فـلا يشفة ابــد
بعد عينك … ذبل غصني ... يـ أحله امن الشهد
الك يبني … اريد امشي … وحك ربي الصمــد
حياتي بلا ... وجــــودك ما ... اريـــدنهة بعــــد

اريــدأ يبني ملكاك
يماخذ روحي وياك
***
دعاء ميت ... الك اقـــرأ ... صعب كلش صعب
رحت مني ... بعمر وردة ... يسباح الكـــلب
اجر ونه … والف حسرة ... الغرفتك من أطب
فلا يكفي … دمع عيني … عليك اشما يصب

لخلّص عمري أنعاك
يماخذ روحي وياك
****

امنذكرنك … يعبد الله … اصير ابلا فكر
المهد خالي ... عفت عندي ... امن شوفنه انعصر
عسن ميته… كبل موتك… شلي بهذا العمر
ليالي الهم … وراك اشكد … لفتني يا بدر

ذبح ذابحني فركاك
يماخذ روحي وياك حظة انساك
يماخذ روحي وياك
***

ج


الحمد الله رب العالمين
اللهم صل على محمد وال محمد
موسى الخادم

يمهدي … عاشر ليلة هاية
يمهدي … نــزلت بيهة ايـة
يمهدي … ليالي العشر تُذكر
***
ليلة العاشر حسين ايودع اخـــته
اموادع ابلا حجي حاجاهة بدمعته
بالبواجي سولفو والحجي سكته
السمة رادت توكع الشدة كسرته

يمهدي … الله اشـــمصيــبة
يمهدي … محبوب و حبيبة
يمهدي … بيهـــم نار تسعر
****
حضن زينب واختنك بالعبرة صوته
باليتامة وصة اخـــتة قــــبل موته
حـــكة اليوادع حبيبة اتروح قوته
اشحال بالـــودع حبيبة وي اخوته

يمهدي ... كبل عاشر محرم
يمهدي … مات حسين بالهم
يمهدي … بعـــيالة تحـّـــــير
… ..
تختلف هاليلة عن باقي اللـــيالي
بيهة جم غالي اليودع راح غالي
شي اكيد البجي راح ايصير عالي
والمــــفارك يصبح بأول وتــــالي

يمهدي … يا مصعبهة لــيلة
يمهدي … كل خل وي خليلة
يمهدي … يـــتوادع أمكــــدر
****
نسألك يالمهدي عن اعظم مصيبة
الشافت اعيونك ابهل اليلة الكئيبة
اموادع العـــباس لحسين بنحـــيبة
لــو موادع زينب الحرة الغــــريبة

يمهدي ... يا مـــوقف تـــركــــلك
يمهدي … جرح نازف على اهلك
يمهدي… جاوب لون تكــــدر
**************************************
الحمد الله رب العالمين
اللهم صل على محمد وال محمد
موسى الخادم

هاية ليلة وداعك ... يعني باجر ضياعك ...
يا جبير العشيرة … .ياجبير العشيرة
……… .
يصعـــــب أعـلية وداعـــك يالحمية
مـــــثل ما تصعب علي موتت رقية
خوية باجـــر امشي من يــمك سبية
وألاديــــن مكيــدة بحـبل الــرزية

زينب انه الحبيبة ... راح اصبح غريبة ... باجر أطلع أسيرة
"""
ليلــة أوداعـك صعب يحملة كـلبي
لا وحـــك الخالــق القــــيوم ربـي
انت يحسين النهار اليضوي دربي
يا نسيم أحزاني يلـة الساعة هــبي

ما بكت عندي حيلة ... حالي حال العليلة ... والله محتارة حيرة
""""
خوية أحلفك بالظلع لا تمشي عني
جز منك انه وانــت جـــزء مـــني
لونويت تروح أخذهة سنيــني ذني
لورحت بعدك يظل بس عندي وني

فدوة بطل هجيرك ... روحي ماعدهة غيرك ... تكصدة بهل الجبيرة
"""
كل أخت تتـــشيم بخـــوان عـــدهه
من تضيج الدنية بيه هـــم ســندهه
ترفع الراس وتصيح أخواني كدهه
روحي بعدك يا أمل تبقى وحـدهه

ياحبيبي أعلى بختك ... أرحم بحالت أختك ... لا تخليهة كسيرة
""""
انه زينب يالجنت تبجي البجـيهه
ومن شمس حر الظهر أتفي ليهه
كلي باجر من شمر يجسر عـليه
هم تجيهة وايــدك تشوف أبأديهه

تكسر ايد الضربهة ... والحرك ها كلبهة ... خلة يلعن ضميرة
"""
خوية ريت الليلة هـاية أبــلا نهاية
ما تخلص كون تبقى بروحي غاية
حتى اشبع شـوف منــك يالـــهداية
واحضن ارسومك بدي يا أحلى أيه

يا أمــير امنياتي ... فدوة الك كل حياتي ... راسك أعلية ديــرة
""""
هاية الية اوياك اخــــر كعدة أعــلم
باجر يذبحونك ويـــرموني بالـــدم
خوية من سيف الشمر ماراح تسلم
مثل ما راح أســـــلم بحرك المخيم

احترك والهضيمة ... ما تظل عندي خيمة ... وانت تدري راعي غيرة
""""

خوية ضمني أعلى الصدر ارد أغفى ساعة
وارد أشـــم عطـر الاخـــوة والشجاعة
ما بــقى شــي للـفجر بيـــن شـعاعة
والكمر جنــة ارتحل اعـلن وداعـــة

وي منيتك منيتي ... كربت هــا سبيتي ... زينب انه الاميرة
""""
كلي باجر ياهــــو يتـــفكد وضعنة
وانت ظلعك ينكسر يوصل سمعنة
من تهل يلــيلة الحادي يهل دمعنة
وبالخرابة أنام هــــذا مو طبعـــنة

ترضى يابو الحمية ... عالترب خد رقية ... تجرحك هالزغيرة
""""
الحمدلله رب العالمين
اللهم صل على محمد وال محمد
موسى الخادم

چم غالي ابغالي .. باجر يودع دليلي
چم غالي ابغالي .. مذبوح اشاهد يليلي
… ..
ويـــة الحبايب هــاذي اخر ليـــلة
باجر اروح المن اهمومي اشكيلة
حاجني يا رمــــــلة ورباب وليلة
عن يوم عاشر حملي ياهو ايشيلة

تتغــير احــــوالي … عكب الهواشم يويلي
… .
ما تنحمل ليـــلة وداع اخـــواني
تكسرلي كلبي وبي تهيج احزاني
يا صبح عـاشـــر لا تصبح تاني
شوف امن اخوتي مشبعت لساني

يا دنية تحلالي … والحزن صاير خليلي
… ..
جـم غالي اودعنة ويظل بعيوني
ياموت اخـذ روحي كبل لْيَجوني
مابية اودع حسين اخوي اوعوني
ولا بـــية اودعنة كفيل اضعوني

صوت البچي عالي… بعد الحسين وكفيلي
… ..
اصعب ليالي سنيني ليلة عاشر
ليـــلة وداع التكسر الخواطـــر
جم محب بيهة اعلى الحبيب ايناظر
جم حرة بيهة الراح تسبى باجر

ما يبقى كل والي… يا دمعة اعيوني سيلي
… ..
يا روحي مو هينة اليفارك خلة
يكظيهة كل ايامة نــوح وعـلة
عيشة بلا خــوان عيشت ذلـة
وحشتهة تـذبح للبواچي تحلة

دمعاتي التلالي … اشكيلهة اوتشتكيلي
… .
مصباح عاشر ريتة لا يلفيني
بي تنذبح كـل اخوتي وأبنيني
ريت البُعد ما بينه ومــا بيني
بعد الشرق والغرب عن اسنيني

بي منشغل بالي ..كالساعة طاريه يجيلي
.......
الحمدلله رب العالمين
اللهم صل على محمد وال محمد
موسى الخادم

((#بس_هالليله ))  .    #محرم_الحرام
……………………………………………………………

بس هالليله .. النه اويه اوجوه السادات
بس هالليله .. و باجر هيمه ابلا خيمات
باجر صعبه .. وحشه و غربه
و أتيهن يا علويات

……………………………………………………………


باچر والينه امن المگفه  .  وبهيده اينحره الذباح
يظل بس راس ايصد اعلينه . ومعلياته الفوگ ارماح

عباس يروح وما يرجع
يم الشاطي ايظل امگطع
من يشوف الجود اتصوب . روحه اتسيل ابحسره وتطلع

باجر يصبح جسم الاكبر
فرهود اعل الكاع امطشر
باجر جاسم يرجع النه . شابع طعنات امن العسكر

خل كل وحده .. اتودع واليها ابدمعات
خل كل وحده .. تدعي اظل هاي النجمات
صُبح الكُربه . وحشه و غربه
و أتيهن يا علويات

……………………………………………………………


لو رد الميمون اعلينه . ابلايه حسين ويصهل حيل
ايريد ايگلچن ذيج اياها . راح اتهد نيران و خيل

باجر والسجاد ايگلچن
شردن وبهذا البر هيمن
مامش گعده ومامش ممشه . يا خيّاتي ويعني اتركضن

ابخمسين وهم اركض آنه
مو خوف ولاچن حيرانه
ابقه اعل التل يم ابن امي . لو يم اخيام السعرانه

أكبر حيره .. منا خيل ادوس حسين
أكبر حيره .. و اطفال وتصرخ لاوين
شتمه و ضربه . وحشه و غربه
و أتيهن يا علويات

……………………………………………………………


الخيمات السووها الساده . النه و چنها اقصور أكبار
همّه اسيوف التذبح بيهم  . و هنه التذبح بيهن نار

لو نار اگتربت شفتنها
كل خيمه ابسرعه اتركنها
لو حرگوهن وانتن جوه . وحدتچن ما تطلع منها

اتسحگن لو شوج ولو جمره
و رجليچن من الدم حمره
ولو ما شفتني آنا احذاجن . صيحن وينج يمنه الزهره

إلچن تفزع .. بس امحنبه امن البسمار
إلچن تفزع .. هم ترجع تتچوه ابنار
هم متعذبه . وحشه و غربه
و أتيهن يا علويات

……………………………………………………………


حسين امدللچن گل عمره . ومن الكافل محميات
باجر سوط اعليچن يفتر . بعبيجن يرسم طبعات

الذابح عبدالله امن اوريده
سهله ومن تطّاول ايده
سوط الضربوا بيه الزهره . شمر اعليجن راح ايعيده

عمه اسكينه و عمه ارقيه
من چفوفي و چلبن بيه
عمه وحدر اعباتي اطبن . وخلن ضرب السوط اعليه

انا أتحمل .. بس انتن يا عمه شلون
آنا أتحمل .. خل ايشل من عندي امتون
سوط اللهبه . وحشه و غربه
و أتيهن يا علويات

……………………………………………………………


يضوَن بدرين ابهل الليله . آل امحمد  والاصحاب
ليلة باجر ظلمه و حارس  . لو چتّال ولو سلّاب

طول الليل انظل بالهيمه
مكشوفين ومامش خيمه
هالاطفال و شبه أگلاده . ابخوف وحولي الكل ملتمه

اطفال وعل العز معتاده
ابلا فرشه اتبات و لـوساده
يهتز عرش الباري امن يصد . جوعانين ايتام الساده

كسرة خاطر .. شافوا ماي الهم جابوه
كسرة خاطر .. عگب حسين ولا شربوه
اتفطر گلبه . وحشه و غربه
و أتيهن يا علويات

……………………………………………………………


و الاصعب بعده امتانينه . من الضيم انشوف اشكال
خشنه اظل تحفر بيديجن . من هسه امحضرين احبال

هزله النوگ وهل تنطرنه
واهنانه اصير اكبر محنه
اجفوف وظلت برض الحومه . ماكو ولا چف ايصعّدنه

حسبنها وياهم ماهيه
بعد انسن جلمة علويه
ذبحاها الشمر اويه الكافل . و بدلها ابچلمة مسبيه

فوگ الناگه .. وانودّعهم من ابعيد
فوگ الناگه .. امودّينه انگلهم ليزيد
الشام و دربه . وحشه وغربه
و أتيهن يا علويات

……………………………………………………………
✍️ ( سيد خضر الزاملي )
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي