وخر يسلاب.. خليـــني وحـــدي
خل حر الاتراب.. يجويلي خدي
الخيل اجت من كل صوب
ساعه وتعال اعله الثـــوب
ـــــــــــــــــــــــــــــــــــــ
ثوبي يالسلاب عوفه.. الخيل اجت من كل درب
ودوسة الحافر ثگيله..  تكطع ابتوت الگــــلــــب
روح من بعيد بـاوع.. يمـــــي ابـــــد لاتــــقتــرب
راح تتطشر اضلوعـي.. وبالحجــر راح انظــــرب

هوه انه مـــرتيـــن.. داسـو عليــه
ضلت عله الثوب..  سهله القضيه
للوادم انه اشــمـــطلـوب
ساعه وتعال اخذ الثوب
ـــــــــــــــــــــــــــــــــــــ
حسين آنه رحمة الله.. تچوي بخدودي  الشمس
يچوي التراب بصفحتي..وانچـــوه گلبي احــــس
مابقــــــه حيل وأگــــومن.. حيلي هداه الرفـــس
والرمح فتـت دليلي . بوسطـه نابـت  منغـــــرس
وانه اعله هالحال: فايض بدمي
هاك اخذ شتريد: لاتبقى يـــمــي
مطعون گلبي ومتعــوب
ساعة وتعال اخذ الثوب
ـــــــــــــــــــــــــــــــــــــ
ساعه ويگطعون اصبعي .. ويجمد  اعليه الدمه
ارد اسبح واذكــــر الله.. ذِكر امـي فاطـــــــمــــه
شلون اسُبح وانه اصبعي.. منگطع وي خاتمه
كافي مو يبست  چبدتي.. وريجي طگ من الضمه

عالمحبس الگوم .. انظر ينظرون
صح بس التراب.. يترسها العيون
والقــــــدر هذا المكتـوب
ساعه وتعال اخذ الثوب
ـــــــــــــــــــــــــــــــــــــ
شويه واتدوس الحوافر. ضلعــي وادوس الظـهـر
وتسحگ الخيل اعله صدري.. من بعد ضــرب الحجر
وينگطع نفسي وتسوي.. بصدري طعنــات وحفــر
والسيوف تحـز وريدي .. وانذبـح من  النحـر

وزينب بالخيام . منتظره الاخبار
وادري بگلبها.. مثل الجمـر حــار
خليني اموتــن فدنـــوب
ساعه وتعال اخذ الثوب
ـــــــــــــــــــــــــــــــــــــ
ساعه وايظل عالترايب.. جسمي وي ذاك الرمح 
وخلو زينب من تجـــينـي. هلبـت اداوي الجـرح
يساعد الله اختي لمن.  تشوفني اهنا منـــذبـح
وراس ماتلگه اعله جسمي.. والدمع منها يسـح

وتتلاگه الاوجوه.. بس راسي مگطوع
وزينب سبيـــــه.. والگلب مــــــفجوع

وحساب هذا ومحسوب
ساعه وتعال اخذ الثوب
ـــــــــــــــــــــــــــــــــــــ
حيدر بشار الدراجي

مطشر وشي لمه جسمك
مشلوع گلبي اوداعت أمك
يحسين بس هل ليلة يمك
راح امشي يحسين
ــــــــ ❁ ❁ ❁ ــــــــ


حمره الحوافر خويه حمره
من صدرك وضلت تطشره
ومابيه حيل اوداعتك گوم
خاطر نسولف حسره حسره

مابيه حيل وانضرب حيل
ايطول النهار ويگصر الليل
ليش الزمان ويه أختك يميل
ويعيل ضل باليوجع ايعيل

ليش الحوافر بيها دمك
مشلوع گلبي وداعت أمك
ــــــــ ❁ ❁ ❁ ــــــــ

خليتني مكسوره خاطر
هل ليله يمك امشي باجر
عايفني وحدي وگلبي ملجوم
وبس يم بناتك گوه أكابر

والحيل انته ومن رحت راح
من امشي خطوة بكض الاصفاح
ومن رووسكم خلوها برماح
حسيت بس بموتتي ارتاح

ريتك جرح وبروحي أضمك
مشلوع گلبي وداعت أمك
ــــــــ ❁ ❁ ❁ ــــــــ

اشلون ألمك گبل الوداع
وجاليش لحمك تارس الگاع
مهظوم گلبي هواي مهظوم
التارس عيوني اتطشر بساع

بس البواجي متعبه الراس
لا انته يمي ولا جه عباس
والگطعوكم هسه حراس
مهظوم طولي وتضحك الناس

ماريد أعاتب حتى أهضمك
مشلوع گلبي وداعت أمك
ــــــــ ❁ ❁ ❁ ــــــــ

ماعندي أخو ولا عندي خيمه
وگلبي اعله ضيمك زاد ضيمه
وسهرانه عيني وعايفه النوم
وصارت عگبكم روحي هيمه

وينشلع گلبي بطلعت الاه
ومتعوبه من الصار والله
وهوى الجره يحسين أنساه
ودلالي حالك حيل جواه

ويحسين ماريدن ألجمك
مشلوع گلبي وداعت أمك
ــــــــ ❁ ❁ ❁ ــــــــ


بلوه توديني اعله بالوه
ولحد يضن دنياي حلوه
وانه الگلبهه هواي محروم
وصارت مشيتي هسه گوه

وجا وين وجهي هسه أديره
ولا يمي اخوتي ولا عشيره
وطحت بعرب ماعدها غيره
يفرون بختك ديره ديره

گبل السبي خليني اشمك
مشلوع گلبي وداعت أمك
ــــــــ ❁ ❁ ❁ ــــــــ

الشاعر محمد البنداوي

زينب تسأل ابن اخيها علي السجاد .عندما عاد من دفن اجساد اهل بيته ..

گعــــــده.
ــــــــــــــ
...............................................


غاب عن انظاري وأبـعد (علي) السجاد.
گلت راح اوليد اخوي الدفن الاجساد.

يل .جنت  بـــــالغاضريه
احجيلي عن اهل الحميه..

گلت راح اوليد أخوي الدفن الاجساد..
.............................

عمه سولفلي اعله خوتي شحالهم من فاركَتهم.
حار ... رمل الحومه ادري والاعادي سلبتهم.
عمه هم عتبوا عليه جي مشيت وماشفتهم

مجبوره عنهم من رحت.
تمنيت  وياهم متت..
مــا دروا بيه اتجتفت..

              الهل السبب ماودعتهم.

ياعلي سولفلي عنهم گلبي مشتاكَ.
الله يدري بحالتي شمسوي الافراكَ.

والمصاب  البيك  بيــه
احجيلي عن اهل الحميه.

كَلت راح اوليد اخوي الدفن الاجساد.
....................................

عمه سولف عن جروحه جم جرح بحسين نازف.
ياعلي  الگيته  بمكانه لـو أثر عالخيم زاحف.
أنــه للحومه من اجيته.استقبلاني بريج ناشف

ياعمه حــاجـاني بهمس.
غطيني من حرّ الشمس.
بس حاذري أسياط الرجس.

             وضليليته بكل عواطف.

لاحظت خط بالارض من سهم جبده..
شالته  الغيره   وزحف  يتلگـه  اخته.
.
عــالنحر دمعات الــــيه
احجيلي عن اهل الحميه..

كَلت راح اوليد اخوي الدفن الاجساد.
....................................

احجيلي عن حالت كفيلي ورايته وكَطعت ازنوده.
هم صدك عالوجه طايح خــافي حدر الصدر جوده.
ناشدك عن الكفلهه  الجانت  أمأمنه بزوده

هم كَلت عذبها زجر.
وحارك عبايتها الجمر.
هم كَلت مسلوب الخدر.

             وعتذرلك عن عهوده..

شفت راسه عالرمح صوب اخته يندار.
عمه  ويعاين  عباتي  وحركت  النار..

يـــــــاعلي ويبجي عليـه
احجيلي عن اهل الحميه..

كَلت راح اوليد أخوي الدفن الاجساد.
...................................

والله ماتنعقل ذاك الجان بعيونه مكاني..
يعتذر ما يجي الزينب عمه معقوله نساني.
ياعلي هم سولفتله عن شمر لمن ولاني..

هم كَتله جتفّها بحبل.
هم كَتله لوعها النذل.
هم كَلت ركبت عالهزل.

               والشمر عنكم سباني..

والله عاذرته الفده عينه وجفوفه.
بس تمنيت اعله طوله بعيني اشوفه..

نسولف ونكَعد سويه
احجيلي عن اهل الحميه..

كَلت راح اوليد اخوي الدفن الاجساد.
.....................................

ياعلي هم سولفتله من اجه الحادي السبينه.
وصاح زينب طلعوها والشمر يحدي  الضعينه.
كتله ذيج اللحظه ذكرت من جبتها من المدينه.

هم كَتله خويه اتمنتك.
اتضلل عليها برايتك.
وتركب الناكَه بهيبتك

           يدري مجتوفات ادينه...

لحظت السار الضعن واعلن رحيله.
خـــويه ركبني العليل  اعله  الهزيله..

مجتفه والبيه بيـــــــه
احجيلي عن اهل الحميه..

كلت راح اوليد اخوي الدفن الاجساد..
....................................

✍ ابو منتظر الحجامي. 2025

قصائد السبي

ندبتك والجفن غيمة .. ..تخوف نومت الهيمة

إذا ميدان ..بلايه اخوان

تخوف نومة الهيمة
………..
من انتهى خوف الحرب ..بينه ابتده خوف الليل
وماترحم الغارة التجي ..الگدامها تسحگنه الخيل

متعوبات وحده تصبره ابوحده
وحرنه الليل يگضي وگفه لو گعده
ظلمه وسوطهم عالحرم يتعده
ما نعرف يجينه امنين ونرده

چف ابچف لزمناها .. التطيح انطيح وياها

ونعي النسوان .. بلاية اخوان

تخوف نومة الهيمة
…………………
الدخان وي ليل اهدعش .. من عيني باگنه الشوف
وضل سوطهم بيه يطش.. ويلمنه ياخويه الخوف

ظلمه والحزن ضل تارس الريه
ولن صوت الينادي ضاعت بنيه
واسمع وحده تهمس مدري ياهيه
تگول الريح لو هب يلچم ايديه

بنتك بيش اداويها .. وانا الماذيني ماذيها

الگلب تعبان .. بلاية اخوان
تخوف نومة الهيمة
……………………… .
جف محترگ چف منجرح .. بيمن اصد سوط الجاي
واثنينهن ياذن تره ..………… من يوگع اعليهن ماي

اجيت ارد اشتكيلك لا تضن اعتب
خوف الليل اشد من الحرب يرهب
ما بين الصحاري والهوى المترب
شفت ريح السموم برسمك اتسلب

الچنت تمسي وتصابحها .. تغير كل ملامحها

بلا صيوان .. بلاية اخوان
تخوف نومت الهيمه
…………… ..
ماندري واقع لو حلم…  يرعبنه كل ساعة اخيال
گدامنه ايروح ويرد…  تعّبنه خويه الچتال

متن لازم متن بالليل نگضيها
ورقية  من تون بالنص نخليها
بيّه َيهدد الچتال سكتيها
اهد الخيل من اسمع بواچيها

اخيتك هاي حيرتها ..اسكت روحي اسكتها

صعبة امچان .. بلاية اخوان

تخوف نومة الهيمة
…………… .

تعبانه من كثر الركض .. گد ما اگوم واعثر
بالليل ياذينه البرد .. والظهر ياذينه الحر

بردانه وندهتك ماغفت عيني
تعال برايتك عباس  غطيني
ما اندل واجيت اعليك دليني
اخاف من الغرب لا تسمع اونيني

منّه السوط اخذ حيفه .. يلم ويطشر بكيفه

عتب بلسان .. بلايه اخوان

تخوف نومة الهيمة
………………………… ..
ايوب يوسف الطوگي

#قصائد_زينب_والسبي

ضيم درب الشام والسبي ما بيه حـــيله
ضيم درب الشام ياهو يخواني اشتكيله
ـــــــــــــــــ
من حده حادي الضعن
روحي يخـــواني تحن
ما ترك روحي الــحزن
ما مصيبه احجيها
عله الناكه شكد صعب
اشطوله يا هذا الدرب
امشي واعيوني تصب
دمع ماضــــل بيها
حدي ضعني ابلا أهل
زحمه اصــعد عالهزل
والاهـل خلـصو چتل
ضيم روحي البيها
حدي حادي الـنوگ سفرتـــي كلش طويله
حدي حادي النوگ ياهو يخواني اشتكيله
ــــــــــــــــــــــــ
حيرتـــي ما تنـوصــف
حيرة الجرحــــه كلــف
علٕـــــــــي بويه للنجف
ياهــــــو اليوديني
بويــه عدواني اشـكثر
بالضعن حــادي الشـمر
وأنه وبــــــــهذا الـعمر
شد حبل جفيني
لا خــــــــــيام ولا زلم
طــــــــاح شيال العلم
بــــــويه دخان الخيم
علي تارس عيني
مره وبالخمسين ركضتي بالطــف ثگيله
مره وبالخمسين ياهو يخواني اشتكيله
ــــــــــــــــــ
حيره المــن يا طـفل
وأنه مجـتوفه بحبل
يا دمـــــع يهلي أهل
من بـــعد عيناكم
نضرت الشامت سهم
ريت مـــو واقع حلم
بس حرگ يهلي أشم
عذباني اجــفاكم
يهل زيــــنب باليسر
مره كل ساعه انهطر
سوطهم خــــــله اثر
وين يا ملــــگاكم
وين اروحن ويــــن روحي يخواني عليله
وين اروحن ويـــن ياهو يخواني اشتكيله
ـــــــــــــــــــــ
هلي يا عز وفــــــخر
بقت زينـــــــب للقهر
تعرض بعيـــني صور
خــــيـل والخياله
راح صـــيواني هلي
حرمه انه وياهو الي
بويه اصيحن ياعلي
حالتــــــي ياحاله
ايتام عنــدي بكربله
حـيرتي بهل معضله
شمر حــادي القافله
دمعي ضل اوشاله
عطش نار وخيل يا دمــــــع الكم اسيله
عطش نار وخيل ياهو يخواني اشتكيله
ــــــــــــــــــــــــــــ
الصعبه حداي اجنبـي
والتراب اعــله العبـي
من التعب نحبي حبي
حشــــمت ولياني
زينـــب ابوليــة عــدو
ما بقــــه الهـا اخـــــو
ياهو يحضرها ومــنو
باليتامـــه اتعاني
ياهو يســمع شكـوتي
حيــــل تكلف محنتي
من بــعد فيي اخوتي
امشي وي عدواني
صعبه أطـــــــر السوگ ناگتي كلــش هزيله
صعبه أطــر السوگ ياهو يخواني اشتكيله
ــــــــــــــــ
الخادم المقصر ناجي ابو كيان الصالحي
ونسألكم الدعاء لي ولوالدي 2025

#قصائد_الامام_الحسين_ع


يالخنصرك مكطوع. سوده عليه
يالخنصرك مكطوع. بالغاضـريه
ذبلت يالغالي اشفاك. بالونه يمه انعاك
بالغاضـريه
…………
اجيت ابلــيل ادور تــــــعثر اجدامي
اويلي اعليك يبــني يالمتت ضامــي
اجيت م‌ـــِْن المــدينه لزهرة ايامــي
ادور وين اصبــعك منكطع دامــــــي
م‌ـــِْن المدينه اليوم. جيت بحسرتي
م‌ـــِْن.المدينه اليوم. سالت دمــعتي
كل لحظه انه وياك. بالونه يمه انــــعاك
بالغاضــــريه
…………..
اشو ماكو جــــمالك يــمه متــــــغير
فلا صــدكت انــته وعقــلي متــحير
لكيتك يبني طايــح دامــي المنــحر
علـّۓ هاي المــواقف يــمه ما اكــــدر
ما صدكت مذبوح. فوك الوطــــــيه
ما صدكت مذبوح. يبن الزجـــــــيه
حر الشــمس اذاك. بالونه يمه انعاك
بالغاضـريه
………….
عزيز الروح انــــته يمه حاجينــــــي
سكوتك ه‌‌َـَْـُذآ يبني حيــــل ياذيــني
اليٱلمــــك يا جــرح يا يمه دليــــــني
اخذ من عِنـ.‌‌‌‌‌ـديّ كلشي يمه يحسيني
حار الترب يا حيف. ويجوي خدك
حار الترب يا حيف. ياهو اليضمدك
حاجيني يبني ارجاك. بالونه يمه انعاك
بالغاضـريه
…………
اجيت بضــــــلعي يمه وتــــستعر ناري
اجيت الطــــــم وانوح لجسمك العاري
انه كل ليله يــمك مدمــــــعي جــٍّــاري
عمت عيني اعله صدرك يا رضه الباري
ون كلبي يمه اعليك. كل لحظه تدري
ون كلبي يمه اعليك. ما يطفه جمري
اشلون الترب غطاك. بالونه يمه انعاك
بالغاضـريه
…………
اشم ريحة انفاسك يبني بنفــاسي
انه م‌ـــِْن المدينه وهايج احساسي
الكطع نحرك ييمه جن كطع راسي
يبو الاكبر اويلي هل زمن قاســــي
اسمع ونين ونوح. وانحب يويلي
اسمع ونين ونوح. يلجم دليــــلي
كــــلبي بٱلم ناداك. بالونه يمه انعاك
بالغاضـريه
…………
سمعــــتك من كلت اه العطـــش يكتل
شفت نــــــحرك ييمه ايه م‌ـــــــِْن رتل
وشفت زينب اخيتك صعدت اعله التل
بمســــيرتها تــــون وتنــــوح عالــــهزل
شفت الشمر بالصوط. طك زينب اختك
شفت الشمر بالصوط. تحــــضرها رتك
راوتها الم دنــــــياك. بالونه يمه انعاك بالغاضـريه
…………
الخادم المقصر ناجي ابو كيان الصالحي ونسألكم الدعاء لي ولوالدي

#قصائد_زينب_ع

اشلونج ام عون يزينب
اشلونج ام عون يزينب
ـــــــــــ
يا غـريبه وغربتـــج ما تنـــحمل
انتي زينـــب وينـج ووين الهزل
اخوتج بالطـــف گضو كلهم كتل
صعبه زينب والحـمل زاد الحمل
اشلونج ام عون يزينب
اشلونج ام عون يزينب
ــــــــــــــــــــــــــــ
يا وحيده ورايحه صوب الغرب
درب عثرات اشعظم هذا الدرب
صعبه درب الشام يازينب صعب
دمعج تصبين بـس سكته يصب
اشلونج ام عون يزينب
اشلونج ام عون يزينب
ـــــــــــــــــــــ
والله دنيا زينـــــب بأيدج حــبل
رحتي للغربه بعد عيـــــن الكـفل
بعد اخوتج مـات يم عون الامل
بيمن اتحيرين يا طــــفله وطفل
اشلونج ام عون يزينب
اشلونج ام عون يزينب
ـــــــــــــــــــ
والله دنيا وحده حـداي الضعـن
زينب الله يساعدج كثره المحن
رايحه لديرة غرب عفتي الوطن
وادري سوط العدو ماخــله متن
اشلونج ام عون يزينب
اشلونج ام عون يزينب
ـــــــــــــــــــ
رايحه لديرة غرب ماكــو عــرف
وادري يازينب جرح گلبج كــلف
علي وينه يفزع من ارض النجف
دمع عينج يصـــب لسه ما نشف
اشلونج ام عون يزينب
اشلونج ام عون يزينب
ـــــــــــــــــــــ
ادري درب الشام تــكلف مشيته
يعين گلبج زينــــــب ويا محنته
قصـــــة الشام اشيوصف قصته
حامي خدرج مات طاحت رايته
اشلونج ام عون يزينب
اشلونج ام عون يزينب
ــــــــــــــــــــ
الخادم المقصر ناجي ابو كيان الصالحي
ونسألكم الدعاء لي ولوالدي 2025

يادفّان ياعمه
سلملي اعله ابو اليمه
وكله أختك مشت ما بين الاجناب
>>>>>>>>>>>>>>>>>>>>>>>>>>>>>>
١=
من توصل حبيبي الشابع اجروح
سلملي عليه بالدمعه والنوح
وكله اختك وراك امفاركه الروح
وليل انهار بيك اتهم يمذبوح
 
يا دفّان وبنحره
أريد أتقبله وبصدره
ومن كَـبره تجيب اشويه الي تراب
 
 
 
//////////////////////
ما وصيك يا مكسور الاِشراع
لا تترك ظلوعه امطشره  عل الكاع
لمهن زين واحضنهن بالوداع
ولا تنسه تدور خنصره الضاع
 
بلكت باقي بالهيمه
ابجاه ادموع الايتيمه
وّتردّه اعله جفه الفاكد احباب
٣===
احلفك عمه وسعله اللحد زين
هواي امن السحك متأذي الحسين
كلشي البي يلجمه وصار نصين
وبحر الشمس صاراله يومين
 
ما واحد وصل صوبه
الجثته بخيل مكَـلوبه
ما واحد فزعله وليه جفن جاب

===٤
من اتنزله كبره أتذكر اهواي
عطشان انذبح ما شارب الماي
رش كبره ابدموع اعوينتك هاي
هم عطشان مات وظل بلا افياي
 
بحر ذيج الشمس عمري
خليته ودماه تجري
مكطوع النحر مسلوب الاثياب
٥======
كلشي البية يوجعني اعله فركَـاه
وليل انهار ما فاركَـته ذكراه
لو صح بيدي اروح أوياك أنعاه
وابجيله بكثر ما روحي تهواه
 
أبن امي المنذبح شفته
لو صح بيدي ما عفته
جا يمه بقيت امسحله الخضاب

ً
كلمات موسى الخادم
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

إنّي أنَا المهدي
🍂🍂🍂🍂
عَيني دماً تبكي
حزنَاً عل جَدِي
يا كلَ أحزاني — إنّي أنَا المهدي
———————
يظل عمري محرم والجرح يدي
اظل طول العمر عايش حزن جدي
بس انظر قميصه والطم بخدي
انَه كلشي بحياتي بكربله يبدي

أبكي على الظامي
ويومهُ الدامي
للطفِّ أشجاني — إنّي أنَا المهدي
———————
انَه طفك جرح ليلية اعيشنه
مو ذكره انكضت ماضي واعيدنه
هلالك بكلب ما حاجة انطرنه
نحرك كل وقت ينزف اشوفنه

ممّا جرى ويلي
قد أحلكَ ليلي
من يُطفِي نيراني — إنّي أنَا المهدي
———————
اموتن واشتعل وجروحك انته هواي
باسمك لو نعه الناعي تبيد اعضاي
اشوفن صورتك كل ما امر بماي
واذكر زينبك تركض ذهيلة راي

في الرَحلِ والحِّلِ
أبكي على التلِ
قد غيرَ ألواني — إنّي أنَا المهدي
———————
تمنيت ابطفوفك جندي واتوذر
وادگ روحي فده لجسام والاكبر
تحت چدم الفواطم انفرش معبر
وريت ابدال راسك راسي المطبر

نارٌ بيَ تسري
لمْ يسحكوا صدري
للثأرِ أبقاني — إنّي أنَا المهدي
———————
انه لكبره اجي بجروحي ازورنه
وبدموع الخجل يا شيعة ابخنه
ويا جرح البعد بالثار اضمدنه
وانه بنعله يا هو اللي اقيسنه

في كفِّي فَقَاري
حَنَّ الى الثأرِ
والصبرُ أذانِّي — إنّي أنَا المهدي
———————
انه صبح ومسه اندب حبيبي حسين
وعلى الف وتسعمية اغمض العين
واندب كل وكت ذاك الفده الجفين
وعلى درب السبي تاخذني روحي لوين

ما أقسى دمعاتي
تجري لعماتي
والنزفُ أعياني — إنّي أنَا المهدي


ابو علي
عبد الحسن القريشي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

#يحيا_الخدر . #يخسه_السبي

……………………………………………………………


رمل الطـ فوف . اجه ازحوف . ركع يم زينب
و النهر جاي . طلب ماي . ابعطش يتعذب
والنخل خاف . حِنه اچتاف . عليها و حنّب

والنجف من خوفه . الها شال اجفوفه
ومن بعيد ايسلم . اعليها نخل الكوفه

ادخيلج صرخ . بت النبي
يحيا الخدر . يخسه السبي

……………………………………………………………


خوها ينداس . بلا راس . اعل رمح اتخله
جسم الحسين . باليدين . ابصلابه اتحمله
هذا قربان . يمنان . الاهي اتقبله

دين الله الواحد . صُبح بالطف شارد
بيه تلحگ ركضت . خلفه ركضت قائد

الها النصر . ثورة عبي
يحيا الخدر . يخسه السبي

……………………………………………………………


باتت ابليل . بلا حيل . ظلام وهيمه
سوت ام عون . بالمتون . عبايه الخيمه
الشرف عريان . بلا شان . اله انطت قيمه

زينب اشجع فارس . عالحرايم حارس
چنها اخوها الكافل . ريشة الحگ لابس

اشحده و يصِل . كل اجنبي
يحيا الخدر . يخسه السبي

…………………………………………………............


راس ليفوگ . على النوگ .  شموخ و هيبه
ادموع كفّن . ولا جن . تعيش امصيبه
اسهيل البـ عيد . اذا تريد . بشاره اتجيبه

نبي ويشع نوره . فوك هِزّل دوره
ارسلاها الباري . خدر للمعموره

بيها افتخر . كل طالبي
يحيا الخدر . يخسه السبي

……………………………………………………………


خطبت و صوت . شِبه موت . نزل بالكوفه
كطعت انفاس . والاجراس . الهوه بي خوفه
وگفت اطيور . على الفور . جنح مچتوفه

وذيج زلم الحومه . روسهم مضمومه
روح واحد منهم . وصلت البلعومه

يا كوفه لا . تتعجبي
يحيا الخدر . يخسه السبي

……………………………………………………………


رعدت ارعيد . على ايزيد . جمد بمچانه
احتال شيگول . بالذ هول . شلل بلسانه
يبن الانجاس . والارجاس . وأنه السلطانه

الهند اصلك راجع . الرِده ابوجك طابع
امي الها اعبايه . الله بيده الصانع

كال اغضب او . لو تغضبي
يحيا الخدر . يخسه السبي

……………………………………………………………
✍️ ( سيد خضر الزاملي )
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

(( #طفين ))

……………………………………………………........

طفّين سيف و نبل  • والثاني سوط و حبل
عالرمح راس اعتله • خدر أعتله اعل الهزل

……………………………………………………………


شاء الله معبود الوره
طفين مو واحد يره  . طف اقسه من طف
طف الشفاه الذابله
حكم العطش في كريله . نبض الگلب جف

طف ثاني هم بيه الماي . بس مو شرب جريانه
سال ابجبين النسوان . من النظر خجلانه
زينب خدر عاش اسنين . ما عايناه جيرانه
وصارت سبيه وياحيف . بت النبي السلطانه

تمشي وتحاچي الخدر • متنه اويذاك الظُهر
مـن طاح بيرغ هلي   • و يمّه الگمر منچتل

……………………………………………………………


طف السيوف الذبحته
واسهام شتلت جثته  . وارماح نبتت
سيف انتهى وسوط ابتده
ضرباته تلسع جالده  . واخطوط طبعت

سوط وابد ما يرتاح . يفتر ابليل وصبحه
كل ضربه وابظهر ام عون . تنذبح مية ذبحه
واطول امن ارقيه السوط . تنرعب من اتلمحه
يرقيه و اكثر ماذيج . جرح الاذن لو جرحه

سوط وعليهن فرض • ايركضن وهو ايركض
ماخله سالم متن  •  لا من مره و من طفل

……………………………………………………………


من خيل مخصوصه السحگ
صدر ابظهر طبگت طبگ . حافر يوذر
للنوگ و شصعب الرِچب
صعدتهن ابشتم و ضرب . والحبل يحفر

بين اعوجيه وهزلات . ويلات عتره طه
والهزله من تمشي اتميل . وزينب اتميل وياها
چدامها روس اخوان . ازغار ونسه ابمگفاها
تتجه واتصد الوين . حيره ابوسط عيناها

ليل و نهار المشي   • ممنوع صوت البچي
والتبجي سوط الشمر • يدمي المتون و يشل

……………………………………………………………


طفين للبوگ ونهب
ثوب الذبيح المنسلب . عاري ابو اليمه
ومحبس رفضهم ما طلع
سلابهم خنصر گطع . ماعنده رحمه

السلاب كلش طماع . رد سلّب العلويه
ابكل قوه وابلايه احساس . ظل يجر بالترچيه
وي الدمع دم اتسيل . اذن السبيه ارقيه
طفله وبگت بس اصيح . ياعمه الحگي اعليه

بيمن تحير و تهم • بالاذن لو بالجدم
و اثنين بيها اثرن • شوچ وجمر بالرِجِل

……………………………………………………………


و اثنين ايام انچون
تحت الشموس اتعذبن . جثه وعبايه
جثه وسواد اتحولت
وحمره العبايات اگلبت . ابروس السبايه

من رجعت محمد كال . منين المره المتكتره
اصور اشكبر الضيم . وهيج اصبحت متغيره
لو صارت ومثل اخيال . من اعصروها الزهره
زينب صفت مثل العود ومنكسر مية كسره

بس جثه زينب صفت • والروح عالتل بقت
من فزّعت بالولي  • ميت يخيَ لو عدل

……………………………………………………………


عد الامام المنتظر
طف الخدر اقسه وامر . كاسرله ظهره
عماته نص سوگ و زلم
ما بين الحجار و شتم . بمهن الزهره

عماته وبلايه ابساط . لا فرشه ماكو اوساده
وسط الخرابه وتربان . كعدن بنات الساده
من القصر سمعن صوت . يشتم علي واولاده
واطفال عاشت بالخير . مو عالضرب معتاده

وارقيه متحمّلت • لروح الابو سافرت
بلايه الحسين العمر • ابدن فلا ينحمل

……………………………………………………………
✍️ ( سيد خضر الزاملي )
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

الف انعم الله لدمعة العين
       مرتبطه بيني وبين الحسين
                الف انعم الله
      
     دمعتي الاجله      تجري وتگله
     عمري مامله        مجلسك نعمه  
     انت موضوعي      ومالك دموعي  
     ونت ضلوعي      من قريت اسمه 
      ويلي على مكسور الاضلوع
       ملچومه من تطيح الدمـوع
      معذوره فوگ الوجن تجرين
     الف انعم الله لدمعة العين

  هو بس انته         بالگلب شفته
بروحي سولفته      وفزت الدمعه
  جرحت رمشي     وختلف كلشي
   وين ماامشي       ضايگه الوسعه
         كل راحتي يم اليونون
        وتسله بس بدموع العيون
       حسرات خلصن كل الاسنين
       الف انعم الله لدمعة العين

مصنع الامي         والله يالضامي
صارت ايامي        كـلهـا ايامـك
ياسبب حزني       وبس الك وني
لو ردت مني        عمري گدامك
     يابوعلي كـل عمـري وياك
    لوردت روحي تصيحلك هاك
   والگه الي مثلك بالبشر وين
   الف انعم الله لدمعة العين

انا لومنته            ماشفت علته
بيك سالفته          ويلهج بأسمك
يانفس بيه           معاشر الريه
روحي يوميه         روحها يمك
ياروح روحي الهايمـه بيك
    كل صفنه بين عيوني الاگيك
    وبيك انا اشوف الدنيا والدين
     الف انعم الله لدمعة العين

مجلسك خيمه         والله يديمه
والكثر ضيمه         تخففه الونه
الونه لمصابك       معاشره احبابك
نوكف ابابك         وبيتك يلمنه
     عالباب ذله الوگفه ياناس
    بس اعلى بابك ترفع الراس
    وبس انته الك مديت الايدين
       الف انعم الله لدمعة العين

بالعزاء اكبر           وهيبتي المنبر
واعرف التحضر      فاطمه الزهره
تحب لمتكم           ولون دمعتكم 
حاضره امكم           وعينها حمره
    ويلي على المذبوح ابنها
    ومابطلت ونها وحزنها
   وخلص عمرها نوح وونين

هاني ناصر السعيدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

بالطف دفنت عيوني الثنين
وسلّم عليچ هواي الحسين
يا عمه وبكلامه
وصاني باليتامه
عيوني الثنين
..
من امس ما نمت ليلي و جفن ما لاگه جفن
وهالتراب الفوگ وجهي بقه من تراب الدفن
شلته بيدي وشفت صدره الخيل طاحنته طحن
عمه من سهم البالچبده والدي لسه يون

لميته بيدي لم الدموع
ساعه الم چبده وساعه الضلوع
المتهشمه عضامه
وصاني باليتامه
عيوني الثنين
..
حسين ابوي وما عرفته مملي طعنات وطبر
من اشيلن كتر بيدي يطيح من ايدي كتر
بالرمل متروس نحره وچان رمل الطف جمر
بكل جرح الگالي نبله بكل عظم الگه كسر

عالرمل نايم والرمل حار
مدفون جسمه بنبل وحجار
الفوگ الرمل منامه
وصاني باليتامه
عيوني الثنين
..
من النحر وياي يحچي وخذت روحي حچايته
يا علي عبد الله خلي فوگ صدري نومته
منذبح عطشان مثلي ومثلي ذبلت شفته
يرتوي يابويه گلبي من اشمن ريحته

ملچوم يحچي من النحر چان
عبد الله ليش يموت عطشان
البچاه حرگ خيامه
وصاني باليتامه
عيوني الثنين
…
انه ابچيله وبچالي وگال غربه غربتك
بويه شو رديت وحدك وين زينب عمتك
ليش ايدك دمه تنزف ليش تنزف رگبتك
ليش محني وفوگ راسك ليش ما هي اعمامتك

گتله يبويه بغربه الضعون
واسياطهم ما خلت متون
بمتني بقت علامه
وصاني عاليتامه
عيوني الاثنين
…
گبل ما هيلن ترابه حچه ونزلت دمعتي
بويه سلملي اعله زينب ريحة امي وشمعتي
بوسلي بنيتي سُكينه وشم رقيه ابنيتي
هواي مشتاگ لبناتي فراگهن فت مهجتي

رد لخواتك كافي الوداع
الليل اجاهن ارجع بساع
چان الحچي ختامه
وصاني باليتامه
عيوني الثنين
…
خادم الحسين ( عليه السلام)
كرار حسين الكربلائي
( ابو كميل )
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

علئ العلويه ويلا
علئ العلويه ويلا
،،،،،،،،،،،،،،،،،،،،،،،،،،،،،،،،،،،،،،،،،،،
طلعن والركاض يريـــد جـدم مامحترگ توه
طلعن لاچن بياحال ركضـن والركض گـــــوه
يحشمن وين اخونه حسين جوه الخيل يلوه
،،
ركضلك لچــن عثرهـــــن الصاح
ردن جبنه اهلچــــن فوگ الرماح
ماالچــن بعـــد يـم عون كل راي
راح اليحمي خدرچ يم خدر راح
،،
مذبوح وبچفه غـــــــــده يلوح
ردن لاتجن مذبــــــوح ولايچن
يم عون ماضلالي كــــــــل لون
دافتني الحوافر وانه اهم بيچن
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الچانن بالخيم وحسين عينــه وگلبه تحميهن
ماالهن بعــــد ياناس غيــــــــــر اليل وعبيهن
وين تروح هــــــل نسوان درات كربله عليهن
،،
يبچن والبواچــي مغرگه العيون
وبلم الحسيـــــــن حتارن شلون
مطشر والحوافـــــر دايره اعليه
هاي المنها چانت خايفه ام عون
،،
بالعيـن شفــت شلون الحسين
لازم بيــده شيبه شلون ذباحه
فوگاه وصار حسيـــــــن جواه
ومتچي الرمح ياناس بصفاحه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
شالو راس اخوي حسين وانه عيوني بعيونه
وهوه اعله الرمــــــح مذبوح مايرتاح يردونه
ماخلو كتــــــــر بحسين ماركضــــو يذبحونه
،،
گامت ناس بالطف تنــــده بناس
كل شويه واحـــــد بايــك الراس
خوفي من الرمح لاينذب حسين
وخوفي من السهم بعيون عباس
،،
طاح حسيني والخـــــــــدر راح
بالهيمه العلاوي وحيره حيرتــها
شاب راســـــــي والگلـــب ذاب
لچمنــــي يناس بهاي ركضتـــها
،،،،،،،،،،،،،،،،،،،،،،،،،،،،،،،،،،،،،،،،،،،،،،،،
اتعب روحي ميخالف ماريــــــــدن اتعبنــه
اركض وبعباتي النار ودفعتنـــي الزلم عنــه
شفت حسين گام وطاح اثاري الخيل شالنه
،،
مايطينـــي گلبي حسيــن اخليه
طايـــــــح والحوافر راح تگضيه
الگلبه مــن السهم داروه المگفاه
طايـــــــح والرماح التمت اعليه
،،

اه لـــــــــو ذبحونـــــــــــه وياه
ولا باچـر وراچــن سوگ گالولي
كـــون ميتــــــــــــــه ولا يگولن
ها شفناها زينب ونفضح طولي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

تراث دهري ذبني            احمد العكيلي

عمه .. زينب
 بيدي دفنت احسينج الغالي
ــــــــــــــــــــــــــــــــــــــــ
بـ عله وجرح ملجوم ياخذني ليلي
ادفن حبيب الروح واصرخ يويلي
بنار الابو المذبوح يسعر دليلي
يا خنصره المكطوع موتلي حيلي

عمه .. زينب
 بيدي دفنت احسينج الغالي
ـــــــــــــــــــــــــــــــــــــــ
شفت الرضيع هناك ينزف وريده
ليهسه ينطر ماي يوميلي بيده
جنه يكلي الماي ياخويه اريده
شخلاهه امي اليوم عني بعيده

عمه .. زينب
 بيدي دفنت احسينج الغالي
ــــــــــــــــــــــــــــــــــــــــــــــ
ظهري انكسر ويلاه من وضع الاكبر
صعبه واجمعه شلون جسمه التوذر
والقاسم العريس انظرله مكدر
وجفوفه متحنيات من دمه الاحمر

عمه .. زينب
بيدي دفنت احسينج الغالي
ــــــــــــــــــــــــــــــــــــــــــــــــ
للمشرعه اتعنيت عباس اشوفه
زيّد ونيني اونين منظر جفوفه
كاتب عذر عالماي يشرح ظروفه
معذور اذا بالموت خدرج اعوفه

عمه .. زينب
 بيدي دفنت احسينج الغالي
ــــــــــــــــــــــــــــــــــــــــــــــــــ
 ياعمه من اليوم محد يكفلج 
جوه الترب ياحيف مدفونه اهلج
ادري الشمر ملعون رايد يذلج
احسينج وعباس ماتو يكلج

عمه .. زينب
 بيدي دفنت احسينج الغالي

ـــــــــــــــــــــــــــــــــــــــــــــــــ
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

السجاد                   احمد العكيلي

كربله خبريني .. اشبينج ومابيني
من يمر ابالي .. ذكرج ايأذيني
خذتي كل احبابي .. وفاركتهم عيني
ــــــــــــــــــــــــــــــــــــــــــــــــ
انه من اذكر مصايب  اهلي برض الغاضريه   وجهي الطمه
غالي بعد الغالي اودعه  نورهم يضوي الليالي  وهسه ظلمه
والمرض هد حيلي بيهه    لكن الهد حيلي اكثر    والله همه

ما تطيب جروحي .. والطبيب امهاجر
بعد ابوي ايامي .. كلهه صارت عاشر
والدفنته ابأيدي .. ادري ما يلفيني
ـــــــــــــــــــــــــــــــــــــــــــــــ
نجمه نجمه من سماهم   طاحو وعيني تشاهد   فاجعتهم
عالشريعه عمي طايح   واخوتي اوداع المنيه   ودعتهم
والدي وباقي الغوالي    كلهم بدرب الشهاده     شيعتهم

لا اخو ولا والد .. حملي هد اركاني
باني بيهم زودي .. وانهدم بنياني
من الم فركاهم .. دمعتي تواسيني ــــــــــــــــــــــــــــــــــــــــــــــــــ
من زمن اجدادي واحنه     قدّمينه شكد مناحر    للقضيه
طبرة الكرار جدي    وكبله من كسرو ضلعهه    يالزجيه
والحسن مسموم جبده    لكن اعظمهن جريمة   آل اميه

صرعه كلهه احبابي .. والخيم حركوهه
وعمّتي والعيله  .. بلا رحم سلبوهه
وبالسناسل انه .. امشي وامكيديني
ــــــــــــــــــــــــــــــــــــــــــــــــ
كربله شكبره هضمنه   وطفّج السبّب المنه   وكل جرحنه
للسبي حمّل ضعنّه    وعفنه اصحاب الحميه   عندج احنه
عذبت حالي رقيه      من تكلي عن اهلنه      ليش رحنه

تختنك عبراتي .. وناري توجر بيه
من ينادي الشامت .. زينب المسبيه
عظّم الله اجرك .. ياعلي تناديني
ـــــــــــــــــــــــــــــــــــــــــــــــ
يستمر طبع ال اميه  ومن غدرهم دوم اعاني   ومن ظلمهم
الدنيه حالي ما ترحمه   وكفت اوياهم عليه     موتي همهم
للحكم الله خلقنه    وباطل ومو شرعي اصلا     كل حكمهم

دنيتك غداره .. لا تأمن بيهه
هو مو اي واحد .. يكدر يجاريهه
وانه اتحداهه .. تكدر اتجاريني
ــــــــــــــــــــــــــــــــــــــــــــــ
دمعي  لحظه ماتركته  وحزني عاشر كل حياتي   وذكرياتي
يعلم الله اشكبره جرحي  والصخر يبجي عليهن    نايباتي
اعمي عيني من البواجي  وتبقه اثار المصيبه    لحد مماتي

لو كظت ايامي .. يمكن الكه الراحه
والفرج ادريبه .. بالكبر مفتاحه
من اودع روحي .. والتقي بحسيني
ـــــــــــــــــــــــــــــــــــــــــــــــ
 #جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

يالدفنت حسين عندي حجايه
تلگه جفين اعله الامسنايه
كله زينبكم مشت
يبو فاضل حشمت
......................................
يالدفنت حسين سولف بالجره
اشلون دفنه وهوه فاگد منحره
اشلون لميته وذر فوگ الثره
اضلوعه من السحگ كلهه مكسره
بالطفوف اتوزعت
گله زينبكم مشت
طاح والعدوان اجت عنايه
.........................................
اشلون ينشال الي ماعنده جسد
شده هاي ومحنتك هيه الاشد
عمه من حشمته عودك ما گعد
ادري جسمه ابخيل عدوانه نمرد

بيه خصمه مارعت
گله زينبكم مشت
وغاب شيال الحمل والرايه
.........................................
تلگه جفين الگمر فوك التراب
واشكي همي وعذابي و المصاب
ادموعي اوزعهن لبو فاضل ثواب
ضلمه دنيانه الگمر يوم الي غاب

يدري اخيته اتيسرت
گله زينبكم مشت
وآنه اعرفنه الوعد وفايه
.........................................
فزعه ياكافل ضعنه ترضه هاي
دربي تيهته ابمغيبك يا ضواي
امنين ما ادير الهضم يفتر وراي
ردت ترجع ماردت عباس ماي
بالدمع روحي ارتوت
گله اخيته اتيسرت
يا كفيلي والضعن حدايه
.........................................
مطرت الدنيا هظم لمن رحت
هجمت الخياله بس سمعو طحت
ريت ميته ولا يبو فاضل شفت
ركضو وحرگو خيم واتشتمت

ونار گلبي الماطفت
گله زينبكم مشت
ما ايطفيهه الفرات ومايه

خادم اهل البيت علي الزرگاني
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

(( ذكـــريــــات ))
ذكريات ضلت من اخواني
ذكريات هيجتهه احزاني
ذكريات...ذكريات

*@@@@****
والله عشت ايام حلوه ابعز دلالي
اويبچي حالي بذاك وكتي لهذا حالي
ها يدنيه بغيرهم محد صفالي
امشي واتعذر يدنيه من خيالي
ذكريات وينهم خواني ..
ذكريات هيجتهه احزاني ..
ذكريات....ذكريات
@@@@
صعبه لو گلت الغريبة يالغريبه
اوذاك عزي ها يروحي آمنين اجيبه
وينكم حيهم يخوتي اشهل مصيبه
آمنين اجيب الگال يختي يالحبيبه
ذكريات يحچي بيهه الساني ..
ذكريات هيجتهه احزاني ..
ذكريات..ذكريات
@@@@@***
انه أذكر بين اخوتي چنت اميره
نظر عيني ما يصدگ من اديره
شلون زينبهم وحيده اوتمشي أسيره
بالبحبل مچتوفه اديه والله حيره
ذكريات روحي هسه اتعاني ..
ذكريات هيجتهه احزاني ..
ذكريات.. ذكريات
*@@@@*
لو غفت عيني اومنامي چنت اذكره
حسين من ضي الشمس خلالي ستره
هسه لون اعبايتي من عدهه حمره
ياگلب زينب بعدهم فاض صبره
ذكريات والشمر يبراني ..
ذكريات هيجتهه احزاني ..
ذكريات...ذكريات
*
من بعد ذاك الكفل صرت الكفيلة
شلون يرضى عالهزل تمشي العقيله
أذكر اودمع المواجع گمت اسيله
اوشوفت الراحو يزينب مستحيله
ذكريات والبعد اذاني ..
ذكريات هيجتهه احزاني
ذكريات. .ذكريات
****
ذكريات اوهيجت عندي الخواطر
شلون اعوف حسين وحده اوعنه اسافر.
شلون اعوف الداست بصدره الحوافر .
ريت من بعد الاهل تعمه النواضر.
ذكريات اخوتي عنواني ..
ذكريات هيجتهه احزاني ..
ذكريات...ذكريات

للشاعر
ابو عبدالله الشمري

احسين ابخدمتك اگضيهه تدريني
ويم  باب العزه  بس كلمه تحييني

آه يحسين ومصابه
*******************************
يحسين  العمر مايسوه من دونك
والهذا السبب صرت انه مجنونك
خادم  وافتخر  فدوه انه لعيونك

حبك دنيتي وكل هذا  يكفيني
*******************************
يحسين  الخدم  عينك  تباريهه
ومنك   رايده مد  ايدك  اعليهه
اهناك ام الحسن نعرف توصيهه

وباچر كوثرك يا محلى  ترويني
*******************************
معروفه اليخدمك هيبه بين الناس
عنوان الكرامه وبيها رفعت راس
باچر   يالخدم   يحضركم   العباس

ومن چفه الكرم معروفه ينطيني
*******************************
انه ابدونك حياتي لا طعم لا لون
معناته   اليحبك  يعترف  مجنون
يحسين بخدمتك رابح ومضمون

من هول القيامه اسمك ينجيني
*******************************
عشرتنه  المجالس  والطم  والنوح
وماتخلص جروحي حي عالمذبوح
مرحومه عبرتي  كربلائي اجروح

ومخلوق الدمع من يوم تكويني
*******************************
متفضل  عليه    وبالعشگ   باريت
ويا محلاته  خادم  آنه لاهل البيت
كل هاي المجالس بيها انه تربيت

وعشگ احسين هوه دنيتي وديني
*******************************
شكرآ  من  گلب ولسان  نحچيهه
روحي ابخدمتك يحسين خليهه
عمري ودنيتي بس يمك اگضيهه

بالوحشه اتحضرني هناك يحسيني
*******************************
تمت بعون الله تعالى الشاعر_يوسف_الفتلاوي