عليچ بداعت اليمه
وعيني القربت تعمى
تعالي ،، تعالي ،، ييمه ،، ييمه

------------------------------------------

عليچ الليل ذاك الما غفيتيه
وتعب ذاك الربى امحدبه و حملتيه
ترى گلبي اليريدج وين أوديه
أبن عندچ يتيم شلون عفتيه

يا حيلي الخلص من غمضت عينچ
انتي گبالي ميته وصيحت وينچ ؟
وين الحظن يمه شبيهه چفينچ ؟
ما شبگني ليش ضلوعي ناخينچ

اول تالي يا جنه
جفنچ انه اغمضنه !! ؟
تعالي ،، تعالي ،، ييمه ،، ييمه

--------------------------------------

اشم بچفوف اديچ التعبت اهواي
اموتن والله اموت بروحتچ هاي
المن عايفتني شباقي وياي ؟
خبر موتچ يشل انفاسي بهداي

ثگل حتى الكلام أگبال تابوتچ
اريد الموت ياخذني ويرد صوتچ
الصدمه شوكت تخلص وافتهم موتچ
صعب يلچنتي كلشي البيه ميفوتچ


اذا حزنان تبچيلي
بعد ياهو اليتچيلي
تعالي ،، تعالي ،، ييمه ،، ييمه

---------------------------------------

صدگ صارت ييمه وعينچ تنام
چنت آنه الانوح لحال الايتام
صرت منهم بعد والحظن ما دام
يمن شيبتي راسي وحتى الاعظام

يمن چنتيلي ام وچنتي صاحبتي
احاچيمن بعد يا ملح سالفتي
آخ تراب غطى عيون والدتي
عمت عيني عدل وانتي بلحد انتي

سوده بوجهي مدفونه
دشوفي وليدچ شلونه
تعالي ،، تعالي ،، ييمه ،، ييمه

-----------------------------------------

تعالي وشوفي حالي وعوفي التراب
بعدني إزغير ويني اوين الانگاب
اليباوع بيه يلگى ارسوم شياب
خرب واهس گبل وملاگى الاحباب

ادورچ وين وانتي هناك مدفونه
شنو نفع البشر لو راحن عيونه
تره الما عنده أم واضح يعرفونه
يگوم بيا علي الوادم يعينونه


ناحل جسمه وي روحه
حتي انفاسه مذبوحه
تعالي ،، تعالي،، ييمه ،، ييمه

--------------------------------------

هاي الدنيا تگضي شلون ما چان
اذا من عدنه تمشي الناس الاحنان
اليحب من دون غايه يطمه تربان
الصدگ بس گلب أمي المات تعبان

مشيتي وبيت اهلنه الظال مذبوح
خلص كل الكلام الچان مملوح
ييمه الروح انتي وراحت الروح
العليل بدون چفچ يبقى مطروح


يشفى بدعوه من عندچ
يا يمه على بختچ
تعالي ،، تعالي،، ييمه ،، ييمه

كلمات الخادم / رعد الفريجي
25 / ربيع الاخر / 1447
ثوابها لروح والدتي

@HxzEU1
#قناه_نشر_القصائد_المنبريه
#الناشر_مصطفى_المياحي

بعيني شچابين البواچي
وحفنه علحفنه الحيل راچي
لتلوگ بمتونه الخواچي
من بنته چروها التراچي

صبرچ يروحي گمت أگلهه
صح شده بس الله اليحلهه
زينب كفيله بروس أهلهه
__
چرو تراچيهه ومشتله
بسوالف التوچع شكتله
من گلبي شلعو شتله شتله
ولخاطرك كل مر جرعته

جدمي زغير وطر حماده
متحفي نار وموش عاده
تنطگ علاويكم يساده
_
من محمل الناگه التودني
المحمل هزيله وكتي ذبني
وكلسا حبل ينعت يجرني
ياهو الهلي يگوم ويردني

خيل العده ماكو ألها چاره
هاشم حرمكم چتهه غاره
وسجادكم كون ايتداره
_
سجادكم محتار ويلوب
اليطلب الثار يصير مطلوب؟
شلعان گلبه وكت الغروب
متعوب يتچه علمتعوب

شال أيده ويحشم عمامه
يحـيـود يشيوخ الشهامه
هاشم حسين بلا عمامه

رسول رياض

@HxzEU1
#قناه_نشر_القصائد_المنبريه
#الناشر_مصطفى_المياحي

بعیونه دمعات الحزن
مكسـور رد من الدفن
جاب الدرب كله يون
عالزچیه
ـــــــــــــــــــــــــــــــــــــــــــــ
رجع للبيت حيدر والظهر حدب
رد يفــرك ابچفينه علي وينحب
ياويلي بتراب المــگبره امـترب
بعذاب الفرگه خلص ليله یتعذب

والعــــــــاش وياهه سوه
الشاركها بأنفــــاس الهوه
ظهره اعله فـرگتهه التوه
وشاف اذيه
ـــــــــــــــــــــــــــــــــــــــــــــ
عادتـــها الـــعرب من يرجع الدفـــان
تتلگـــــاه کل الاهـــــل و الـــــخـوان
واتهوّن مصابه من گلب ولـــــــــسان
الحامي الجار شو ماطلعت الجـيران

الناس شــــو متغِيره
ماطلعت اويه حيدره
ومحد الطيب خاطره
بهالرزيه
ـــــــــــــــــــــــــــــــــــــــــــــ
متعوب الصميده وحاير ابـــــــــأمره
ومن الباب ابد ما وخّر الــــــــــنظره
يگـــــلـه شلون تعـصر فاطمه الزهره
صدگ ياباب انشدك خلصت العشره

الكون ظـل بلا شمس
بفراگ جوهرة القدس
اليوم وين اوين امس
وشبديه
ـــــــــــــــــــــــــــــــــــــــــــــ
الكلو من زاد فاطم ليش عافونه
والمثلي وســــــــافه مايواسونه
ماعون الوفه صارو ينكــــــرونه
واحدهم بقه ايعــــاينلي بعيونه

وحدي جليس بمنزلي
عالزهره دمعاتي اتهلي
محّـــــــد يگلي ياعلي
وحن عليّه
ـــــــــــــــــــــــــــــــــــــــــــــ
اجتمعو عالوصي والدمعه سچابه
زينب والحسن وحسين احــــبابه
ننشدك واللهيب الكــــل گلب ذابه
شلون ادفـــنت امنه بذيچ الترابه

حيدر شبگـــــــــهم وانفجع
ظل يبچي عالخدهه انصفع
والصوت بالــــــــــدار ارتفع
والعزيه
ـــــــــــــــــــــــــــــــــــــــــــــ
بدايات النوايب هاي يـــــــــــولادي
وباچر يجري دمي ابسيف الامرادي
وانت يالحسن مسموم وتـــــــــنادي
لايومَ كيوم حسين بالــــــــــــــوادي

اسبعطش كوكب ينچتل
وتصعد بناتي اعله الهزل
ومن هسه دمعاتي تهــل
عالسبيه
~

حيدر بشار الدراجي

@HxzEU1
#قناه_نشر_القصائد_المنبريه
#الناشر_مصطفى_المياحي

يازهراء .... يا مصدر كُل نعمه
يازهراء ....مشكورة اعله الخدمه
خدمتج يامحلاها
البيها عايش يتباها
......
مشكورة يا ام الوفه .... مجلسج من جبتيني
تايه جنت مثل الطفل ... عالخدمه دليتيني
لو الف عام اخدم الج .... امقصر اشوف بعيني
لا شي جنت كبلج انه .... وانتي الي سويتيني

يازهراء ... ما وافيج افضالج
يا زهراء ... لو كل عمري اقرالج
قيمتي من سواها
خدمتج يا محلاها


....
ممنون الج يم الحسن ... من جدمي والحد هامي
من غيرج انتي فاطمه ... للخدمه شد احزامي
مطلوبلج دين ابكبر ...طف الحسين الضامي
ماوافي حقج لو الج ... اخدم جميع ايامي

يا زهراء ... يا مفتاح الجنه
يا زهراء ....الخادم بيج مهنه
يا هديت الله الطاها
خدمتج يا محلاها
......
يافاطمه الزهرة الج ... افضال كثرة اعلية
لو ريد اعدهن بالضبط ...احتاج الف لطمية
خيرج امغركني اعترف ... هالخير بين بية
شكرا الج شكرا الج .... يم زينب العلوية

يا زهراء .... شكراً يم العتره
يا زهراء .... اعليج اقبلتيني اقره
كل قصيدة امن اقراها
خدمتج يا محلاها
.....
الف انعم الله يم حسن ... احجيها دوم ابالي
لو ما خدمتج جا تهت .... والضيم اصبح حالي
شلي بحياتي ودنيتي .... المابيها مثلج غالي
ياسر وجود اهل السمه ... واهل الارض للتالي

يا زهراء ... تسبيحت كل حيدر
يا زهراء ... تنفع يوم المحشر
بالمواقف خصّاها
خدمتج يا محلاها

.....
هنياله كلمن صار الج ... خادم امسجل اسمه
اهل السمه واهل الارض .... تحسدة على هالنعمه
مجلسج مو ياهو اليجي ... يحضر اله ويخدمه
محتاج توقيع النبي .... ومعصوم من اليمه

يا زهراء .... خيراتج ما تنعد
يا زهراء .... كل العالم يشهد
اسمج الدنيا احياها
خدمتج يا محلاها
......
كلمن يبغضج فاطمه ... الله بعضمته ايبغضه
ما يحصد الفرحه ابد ... كلمن بدالج رفضه
بس اليحبج من صدك ...هذا الي كاعد حضه
للجنه يدخل كل الملك ... أبتوج الذهب والفضه

يا زهراء ... رابح كلمن حبج
يا زهراء ... راضي العترة و ربج
كلمه بالحق كلناها
خدمتج يا محلاها
......
الحمدالله رب العالمين
اللهم صل على محمد وال محمد

موسى الخادم ..

@HxzEU1
#قناه_نشر_القصائد_المنبريه
#الناشر_مصطفى_المياحي

لعن الله ظالميكِ فاطمه
....
الهجمو اعله الدار والشبوها نار ... ذوله موش اسلام ذوله ناصبية
الله لاعنهم على اللسان الرسول ... وحيدر الكرار حماي الحمية

هله .. هله

ما يصح الة الصحيح ...
وهمة اساس الكل غلط
للفتن رفعو شعار ...
وعاشو بهذا النمط

لعن الله قاتليك فاطمه
........
مو زلم نسوان ذوله الحاربوج ... الزلمه ما يضرب مرة فشله بسلفنه
غيرة ماعدهم ولا عدهم حياء ... الايده مدها عليج هذا ايده عفنه

هله .. هله

بختج ايعثر مضيف
ويشهد التاريخ الج
بالسعير الحاربوج
وانت جنه منزلج

لعن الله جاحديك فاطمه
......
الدفع بابج والدخل عنوا عليج ... هذا مو طاهر حليبه هذا ناصب
الروحه نصبّها خليفه ابلا قرار ... هذا خان العشره ما تلكاله صاحب

هله ... هله
باجر القاضي الالاه
ويحكم ابكلشي الج
حق ظلوعج والجنين
ياخذه من عاذلج

لعن الله عاذليك فاطمه


......
سيدة كل النساء ابهل وجود ... مثلج ابهل كون
ماكو يالعفيفه
انتي سر الله العظيم الحاربو .... بحركت الدار ونصب ذيج السقيفه

هله ... هله
باجر المهدي يثور
ثارج امربع يرد
بيده شايل ذو الفقار
على ظلامج يهد

لعن الله باغضيك فاطمه
.......
الحمدالله رب العالمين
اللهم صل على محمد وآل محمد

موسى الخادم

@HxzEU1
#قناه_نشر_القصائد_المنبريه
#الناشر_مصطفى_المياحي

كلما اشوف   ام وابن  ابچي
كلما  يمر  بيه  المسى  ابچي
كلما  اطب   الغرفتچ   ابچي  يمه

-------------------------------------

راح    الدلال   وحظنچ    الدافي
آنه الچنت   فوگ   المتن   غافي
ماتت   اليمه   وسكتن     شفافي
هسه المرض من جدمي  لچتافي

اتنفس بيابو الحسن واتشاهد بكل خطوه
رديلي شوفي الفارگچ هذا  الوداع اشسوه
يا حلوة اطباع  شعجب تحت الرمل مو حلوه
عفتي  اليريدچ  منتهي  من البعد يتلوى


يا يمه خاوي من الدمع   فدوه
رديلي   ساعه  اتعذبت   فدوه 
يا  يمه     شيردچ  بعد   فدوه   يمه  

---------------------------------------

مو سهله يمه   ادريهه   لا  شده
الحظن  الحنين   الراح   شيرده
انه اليتاني  اعله   الدرب   بعده
آنه  اليموت  بكل   نفس  وحده

آنه اليسموني العدل  من چان طولچ خيمه
آنه الچنت عايش گبل  من رحتي صارت هيمه
مو دنيا لا ضيم وعلي خل گلبي يحچي بضيمه
يا يمه  لا ماي بنهر  لا بيهه مزنه الغيمه

عطشان  وچفوفچ  نهر     يمه
وحشت فراگچ ما تفض    يمه
ظليت  انه  بطرگ  الدمع  يمه  يمه

-------------------------------------

يم الحسن  ها  يمه   خلصانه
جبتي العمر   يا يمه     تعبانه
يمچ  اجيت   عيوني   ذبلانه
خليت  گلبي اعله   الگبر   آنه


يا يمه بسمار  الضلع  صاباني  لمن صابچ
شحچيلچ الضيم العلي لمن اشوفن بابچ
موتني ما احمل ترى  كلش ثگيل غيابچ
حاچيني  يربات  الهلا  خليني ازيح اترابچ

خليني انامن    باللحد   ساعه
خليني  ارد   الشبگتچ   ساعه
سوده الحياة   بفرگتچ   ساعه   يمه

----------------------------------------

ارجع  وحيد  وادخل  الغرفه
اشتم عباتچ  وانحب   واغفه
يا يمه  بردان  وبعد  شدفى  ؟
كلفه اليتم  يم الحسن  كلفه

يا يمه  بفراشچ   نمت  وبشيلتچ  غطوني
تنزل دموعي بصفنتي ابچي بسواد عيوني
من متي يا يمه وعلي منهه وتغير لوني
صرت انحسب علشيبو   محني الظهر شافوني

ماشوفچ  وخلصت تره    حيره
صوتچ  بعد  ما  ينسمع    حيره
وحدي وظلام بلايا  أم    حيره يمه

-----------------------------------------


وجه   اليتيم  وكسرته  وخوفه
وضحكة دليله  التبقى مچتوفه
وبعض المشاعر  ماهي معروفه
وكل  المآسي  الگبل   موصوفه

شافوهن  بدمعي النزل  وبحيرتي أوناتي
بالخطوه  من ثگلت بعد  وحزني بلفظ چلماتي
بعيوني  چادر  منرسم  دورة سنه بنظراتي
من وكت كبرني الزمن وتسابگن شيباتي


ثاري   اليفارگ   تنتهي    روحه
أمه التحبه  من  خذت     روحه
هلروحه  صارت  للگبر     روحه   يمه


كلمات الخادم /  رعد الفريجي
24/ ربيع الاخر / 1447
ثوابها  لروح والدتي

((مشهد يويلي))


آنــــه اكبرت والليل جـــــازي
ومن حزني صار اسود جوازي
چــــــا يمته يبن الكاظم انزور
يطبع بــــــــدربك يمته جازي

بس آنه ظال بعيني اديرن
وَيّ المشولك يمـته اسيرن
مو خوش زاير چني مـولاي
نوبه آنه اعاتب نوبه احيرن

ها يالمشيتوّ
گلوله عالصياد غثني
ومـــا تيهيتوّ
گلوله تايهّ بين حزني

ضلمه آنه عايش مامش ضوى
گلــــوله حتى يخنگه الهــــوى
يمته بطـــــريقه ونمشي سوى .. گلوله

گلوله حيره ونـار وهجر
مچويه روحه ومامستقر
گلوله كافي ماظل صبر .. گلوله

ياعلي ابن موسى الرضا ...

"""""""""""""""""""""""""""""""""""''''''''''

خيط الدمع غافي اعله خدي
والعبــــره مثــــــل النار تبدي
ويــــــن الرضا الينضر دمعتي
ماعندي غيره وهـــــوه عندي

وَيّ الصور چندوب اسامر
وسنين مرت ماكــو باچــر
يــامشهد المـــاخلت عيون
وحتى انگضت بيه الگناطر

مشهد يويلي
مرسومه بنفاسي وغرامي
ويانــوم ليلي
كل لحضه افز هذا منامي

حتى بمنامي حلمي الصحن
يَــم اهلي آنـــــه بغربةّ وطن
تمشي القوافل راح الضـعن .. ميسوره

تلچمني روحي ويجري الدمع
وگلبي وصـــراخه ظل ينسمع
زيـــــن وبقــــــالي ومـاينـشلع .. ميسوره

ياعلي ابن موسى الرضا ...

"""""""""""""""""""""""""""""""""""''''''''''

والبي دمــــع بالشوگ ينعد
وضلمه الليالي بدون مشهد
محروم حالي ليش مـــولاي
ومشتاگ حــالي وانته تشهد

بس گلي يمته ألمـس الخير
يمته يطريقك جنحي ويطير
شيصير لو هـــسه آنه بالباب
يبن الكرم بس گلــي شيصير

اقسملي نضره
لو نضره وحده للمناره
والفـــرگه مره
چايمته مولاي الــزياره

واليمه اتاني وعمري گضه
بسود الليالي عمـري مضه
يدريني احبه هـواي الرضا .. مولايه

يــــدريني احبه ورايد قرب
مشايه وامشي بذاك الدرب
مو مستحيله وماهي صعب .. مولايه

ياعلي ابن موسى الرضا ...

"""""""""""""""""""""""""""""""""""''''''''''

ارد انعه يمك والعشگ سال
وأذكر هزيله واذكــــر احبال
ومنك اريدن حرگه للشــــام
ومنك اريدن للخيمه بالبــال

بضلوعي اريدن سحگةّ الخيل
كون ابچي لمن ينتهي الحـيل
ماتســـــوه ساعه ألطم حسين
كــــــــون ألطم بليلين مو ليل

طايــح رميه
يابو الجـــواد حسين طايح
وزينب سبيه
وضعن العقيله الغرب رايح

گوطر ضعنــها بس تلتـفت
راحت اختكم بس يا اخـت
بضهر الهزيله ياهي الشفت .. مسبيه

راح الدلال وصار الحــبل
خدر العقيله وسفه بهـزل
من السوالف شاب الطفل .. مسبيه

ياعلي ابن موسى الرضا ...

عبد زينب

محمد الابراهيمي

@HxzEU1
#قناه_نشر_القصائد_المنبريه
#الناشر_مصطفى_المياحي

لحن
(مشهد يويلي)
بصوت
خادم الامام الحسين
سيد مجتبى الجابري
بصره

ليل الغوالي ----

ليل الغوالي -- يبقى خالي -- وانه سهران
يلضلمه بيتي-- من مشيتي -- صارت احزان
-----------------------------
ها يكل ناسي وهلي --- رحتي ضل وحده علي
مدري احير ابروحي انه لو باليتام
اعليه لو ليلي يجل---- بيه مايبقى عقل
وليتيم الليل علته اعله امه محتام
أعيون الحسين انعمن---وبقى أصبر بالحسن
ومن بواجيهم يزهره انهد ابو الثام
ليل اخلصه بس بجي--- بصدري غص كل الحجي
وياعذر احجي حتى اعيالج اتنام


ابجي البجيهم -- وبحجيهم -- الگه الفراگ
جايمته ترجع -- بويه اسمع -- لمنه نشتاگ
-------------------------
الحيره مو گيد وحبل--- حريتي تكتل كتل
خاف اجيج وتفز زينب فارغه الدار
وضعي لا ماينحمل --- اشلون اصبرلي طفل
غير اصبر روحي حتى اتهوود الزغار
انضر الزينب توون--- بويه وين ام الحزن
اشلون اگلهه ماتت. امج گلبي محتار
والحسن ينضر الي--- وين امي ياعلي
ولسؤال اهواي يكثر بألف بسمار


هيه المصيبه -- بالحبيبه -- زينب اتنوح
ازغير عمرهه -- وياقدرهه -- تشبع اجروح
------------------------
شفت بحسين العجب--- بحجرتج شفته نحب
شابگ ثيابج ينادي راحت امي
گاعد وياه الحسن--- ابنيتج تبجي مزن
حدب اگافي الوضع وزاد همي
رحتي والبيت انطفه--- ولاجفن ليه غفه
اتكاونت بيه المصايب مات حلمي
العيون امجمره--- انتي لا مو اي مره
احتجن اعضاي برحيلج باد جسمي


يوميه نلتم -- انسوي مأتم -- نذكر الصار
اه ياعذابج -- ويه بابج -- وبيهه بسمار
-----------------------
الگبرج اشتاگ اواحن--- هدمه صارت بالمتن
اتوچه عالحيطان عكبج يم الحسين
حيلي راح اويالنعش --- والكتلني اثمنطعش
عمرچ انتي ومن اديه باكج البين
اشلون اصبر عيلتي --- وانه تفضح دمعتي
اشما اضمن حزن كلبي تنزف العين
بلسم اجروح ودوه---بغيبتج گلبي انجوى
من مشيتي بيه ماتت احلا الاسنين


انتي مشيتي -- انهدم بيتي-- وضلمه الايام
كسر الخواطر--- للمانطر --- علته مينام
------------------------
رحتي رافگت الدمع--- اعيوني تبجي اعله الضلع
ياحبيبت كلبي ليش ايعصرج الباب
ورده ليش وتنكسر --- هيه للشم مو عصر
ذبلوج ابلايه رحمه وشنهو الاسباب
اه يلوعت حسترج---- لسه اذكر عصرتج
ولعزيز الطاح منج فوگ التراب
گمت ادعي للصبر--- الحمد لله والشكر
القدر راده الجليل وصار المصاب

اخر كلامي -- وجهي ضامي -- الملگه الاحباب
ماباقي كلشي-- حتى رمشي -- امن الجفه شاب
------------------------

علي سليم الحسناي

@HxzEU1
#قناه_نشر_القصائد_المنبريه
#الناشر_مصطفى_المياحي

استشهاد مولاتنا الزهراء (عليها السلام)

شلون ليله... كل سوالفها دمع
شلون ليله... وجارح الريِّه الضلع
گاعدين وننظر أمنه شكبر همها
نريد نحضنها ونخاف يزود ألمها
شلون ليله

الشمس تنحب لمن غربت... واجه المغرب ينحب اكثر
والظلام اليخفي كلشي... الليله جاي ودمعه أحمر
والنجوم الحلوه صارت... بالسمه مفجوعه تفتر
كلشي ما ظل بمكانه... وكلشي صوت الله اكبر
الزهره تتنفس تحاول... من الكسر ما چنها تگدر
وتخنتگ وتضم ألمها... حتى لا يتأذه حيدر

عنه تخفي...بچفها خدها المنسطر
عنه تخفي...وچفها أزرگ يِنِظّر
كل نفس تشهگ لأن تشعر لچمها
نريد نحضنها ونخاف يزود ألمها
شلون ليله
ـــــــــــــــــــــــــ١ــــــــــــــــــــــــ

من النهار المر علينه... بينه لوعه وبينه لچمه
أمنه چا يضربها قنفذ... ياهو يحمل هيچي صدمه
قنفذ الأهل المدينه... كلها تستزغر تكلمه
ايلَوّع أمنه بسوطه ننظر... وحتى محد گله زحمه
وخالد وحطاب وأول...اوين واحد ماله حشمه
بيهم تلثميه هجمو...وضربو أمنه والله هضمه

أمنه تنحب... ويضحك الجاوب وإن
أمنه تنحب... ويضرب اكثر من تون
اركضنه ليها وتشعر الاكثر هضمها
نريد نحضنها ونخاف يزود ألمها
شلون ليله
ـــــــــــــــــــــــــ٢ــــــــــــــــــــــــ

ننظر لحيدر أبونه... عينه مَتفارگ جفنها
وهذه أول مره أمنه... ما تسولفله بحزنها
وينهض ويگعد نشوفه... ويطلع نباوعله عنها
ومن وراه نطلع نشاهد... تهضم الونَّه اليونها
وتمشي محنيه وتگله... عيوني تحتاج لوطنها
من تفارگني يحيدر... روحي تطلع مني چنها

ابلا وجودك ... ما يظل يمي هوه
ابلا وجودك... تعطش عيوني ضوه
بهالحچي الدافي السمه تنادي بأسمها
نريد نحضنها ونخاف يزود ألمها
شلون ليله
ـــــــــــــــــــــــــ٣ــــــــــــــــــــــــ

سكته كلشي وبس دمعنه...يگدر يسولف ألمنه
نباوع لإيديها زرگه...ونختنگ من گد هضمنه
وننظر لنظرتها نعرف... ايديها تتمنى تلمنه
بس ضلعها مهشمينه... بيا حضن تگدر تضمنه
واحنه ننظر ليها صارت...تنلچم كلما تشمنه
ما نوِّن نكتم نحاول...وگوه تطلع لو كتمنه

الينظر أمه...گبال عينه وتنضرب
الينظر أمه... ينشلع منه الگلب
وصرخه تبدي الونَّه ما ينفع كتمها
نريد نحضنها ونخاف يزود ألمها
شلون ليله
ـــــــــــــــــــــــــ٤ــــــــــــــــــــــــ

شمثگل ايام التجينه...وأمنه وي كل لحظه تذبل
ونسمع الباب اعله محسن... من عذابه يقره مقتل
من خشب بس عنده غِيره... احسن من الويه الأول
دفعو وقاوم ولكن...بالحرگ مجبور وانحل
وهذا حال امنه بظلمهم... بكل نفس نشعرها تنحل
يغضب الباري ورسوله...ال بالجره اعله الزهره يقبل

دينه زائف...بهالظلم كلمن رضه
دينه زائف... الما يحب المرتضى
خصمه جدنه المن فدك كلمن حرمها
نريد نحضنها ونخاف يزود ألمها
شلون ليله
ـــــــــــــــــــــــــ٥ــــــــــــــــــــــــ

أحمد البصراوي العبادي

اخر ليله ... كعدو سوه يم امهم
اخر ليله ... ايكلموهه وتكلمهم
بجه حسين ونظرهه
وعلي ايعاين كسرهه
اخر ليله ... اخر ليله
......
منظر ياخذ روح الشافه . مو بس زينب
حسين مكدر كاعد يبجي . وحيدر ينحب

شابح لونه ... هدله امتونه ... الله بعونه
حيل امعذب

ماجن حيدر هذا الواكف . باقي اخياله
مره ايكوم ويوكع مره . اكبال اعياله

شهكة ريته ... وكل عافيته ... اتفارك بيته ...شيضل حاله

باجر ماكو ... ابيته الزجية الزهره
باجر ماكو .... صاحبت اجمل عشره
يضموهة بكبرهه
وعلي ايعاين كسرهه .
......
متوسده اعله افراش العله . وتنظر ليهم
ماهمت بألام البيها . همّت بيهم

دكلهم يمه ... ما متألمه ... وهي ابظلمه
امن تحاجيهم

خافن تفجع كلب العيله . جرعت كل مر
وبسكته اتوصيه بحيدر . كالتله اصبر

حيدر يسمع ... منهه ويدمع ... كلبه اتكطع
لمن يحفر

يا عافيتي .... امسح دموع اعيونك
يا عافيتي .... من فدوه اروح اللونك
تواسيه ابعمرهه
وعلي ايعاين كسرهه
......
وحال الحسن يم جدم امه . ايبوس بيهه
ويكلهه الدار ابلا شوفج . ما طب ليهه

اوياج اخذيني ... لتعوفيني ... دمعت عيني
اعليج اجريهه

ماعندي افراح ابهل دنية . انتي افراحي
يايمه ابموتج تدريني . تزيد اجراحي

رحمي ابحالي ... يا اَمالي .... كعدي اكبالي
سمعي انياحي

يمه بدونج .... دارج تسكنه الدمعه
بمه بدونج .... اكضيهه ابجي وانعه
مصيبه يا كبرهه
وعلي ايعاين كسرهه

.......
اكثر صوره اتألم جانت . عل شافاهه
حسين امدد طول اويمه . وما عافاهه

يصرخ يمه... وهيه اتضمه .. بهيده اتكلمه
روحه انطاهه
من كثر امناشغته اعله امه . وكثر اوجاعه
خفت عليه لا تطلع روحه . بهاي الساعه

اسماء اني ... حسين اذاني ... زاد احزاني
عطشت كاعه

يشبك بيهه .... ويعاين اعله اعضيده
يشبك بيهه .... ويخلي اديها ابيده
وي شمشم ابعطرهه
وعلي ايعاين كسرهه
.......
كلهه بصوب وزينب جانت . هاي الليله
تجري ادموع الفركه وتشكي . الحامي ادخيله

ادكله امنه ... امن اتفاركنه .... يكثر همنه
ياهو يشيله

بوية ازغيره انه ومحتاجه . الحضن الزهره
مابية اتيتم من زغري . واجري العبره

من بعد امي ... يكثر همي ... ويصير اسمي
ايتيمه ابكسره

محتاجتهه ... كللهه لا تتركني
محتاجتهه ... اشمحلاهه من تحضني
تتخيل صورهه
وعلي ايعاين كسرهه
.......
كلمات
موسى الخادم

بين الحايط وبابه  ... امي الزهره عصرو
دمهه انتثر .. خدهه انسطر .. هذا الشفت
بعيوني
.......

انه الحسين اروي ما صار وجره
من هجوم الدار حد الكسر
امي جانت كاعده اويانه بهنه
لحضه والباب انطرق بالغدر
اعتنتله امي الحبيبه وهو صاح
دفعو باب الزهره ما ظل عذر
اتلكته ابكل حيلهه المابيه حيل
لحضه والبسمار ضك بالصدر

صار ابحيله يدفعه .. عالحايط انظره
كلشي عصر ... خدهه انسطر ... هذ الشفت
بعيوني
.....
ابعصرت امي عاينت محسن سقط
على العتبه ابلا ذنب دم جره  
صاحت امي فضه سنديني ابعجل
مني محسن طاح فوك الثره
الحيل ما بيهه على الكومه بعد
حكهه كل اظلوعهه أمكسره
اركضت ليهه بلايه راي ابلا فكر 
ومثلي الهه هم ركض حيدره

صاحت ياضوه اعيوني ... لا تبجي علية
زال الخطر ... خدهه انسطر ...
....
بعد حرك الدار كادو جف علي
وامي طلعت خلفه تجري الدمع
هو يمشي ويلتفت ليهه بحزن
بشريني شنو اخبار الضلع
خلو ابن عمي تصيح ولامجيب
حالهه بجه العرش  والشرع
صورة من اذكره ما تبقالي روح
وانهضم حيل ابذكرهه انفجع


تمشي اعله الجدم كوه ... امي شاهدتهه
تمشي اتعثر ... خدهه انسطر ... هذا الشفت بعيوني
......
امي من هالحادثه سلهه المرض
حسره صارت عدهه جرت النفس
ليلهه امساهره اتكضيه بالونين
والنهار اعليهه يخلص همس
كوه تركع كوه تسجد للصلاه
ما تبين الوجع خافن نحس
شابحه اللون امي غيرهه الكسر
وين هسه اواوين جانت امس

وردة امفتحه ابنصنه ... وسفه ذبلوهه
شبعت قهر ...خدهه انسطر ... هذا الشفت بعيوني
........
اخ ياليلة وداع امي الاحب
هاي اشد ليلهص علي بالزمن 
كلميني صحت الهه بعبرتي
وهي طلعت ايدهه من الجفن
نادت جبرائيل ياحامي الحمه
نحَّي ايتامك امن ام الحسن
بجت املاك السمه ايتامك علي
ساعد الله كلبك ابهل محن

ما انسه الجفن احمر ...ساعت ودعتهه
بالمختصر ... خدهه انسطر ... هذا الشافت اعيوني
........
كلمات
موسى الخادم

استشهاد مولاتنا الزهراء (عليها السلام)

جنيني گبالي دامي
وحبل چَتَف إمامي
منو لبنتك يحامي
يبو الزهراء..يبو الزهراء
وجواب لكل كلام..سياط من اللئام
يبو الزهراء..يبو الزهراء
ــــــــــــــــــــــــــــــــــــــــــــــ

ابيتي وچنت اتذكر... ذاك الحنان الأكبر
وإجت ضجه وصوايح..وبشر تهوى المذابح
بدت تتحضر
إوَدَعِت محسن إبني...ايموتونه أدري بحضني
وانه المشتاگه أشمه..أشم يا خوفي دمه
ويهضمي وحزني

اتمنيت أوِلدَه...وحيدر يشوفه ويگول
يا هلا بثالث...ولدي من عند البتول

وسگط بالضربه تالي
التِعَبت اعليه ليالي
الإبن يا بويه غالي
يبو الزهراء..يبو الزهراء
وتجي لأهل السلام..سياط من اللئام
يبو الزهراء..يبو الزهراء
ـــــــــــــــــــــــــ١ـــــــــــــــــــــــــ

يجمع حطب عالزهره...الما منطي خبزه لفقره
واجانه لسيفه شاهر..الولا جارحله كافر
بحرب كل عمره
گتله انه بنت الهادي...گال أمري إستبدادي
وعلي اتمنعه الوصيه...ومحمد ماله جيه
واجينه انعادي

ومن ربعه جايب...وين الامحزم عِداء
والسهله عنده...يكسر ضلوع النساء

جِمَع وين المعاند
وشعل نار ويهادد
وانه الما عندي والد
يبو الزهراء..يبو الزهراء
وبدت فزعة ظَلام...سياط من اللئام
يبو الزهراء..يبو الزهراء
ـــــــــــــــــــــــــ٢ـــــــــــــــــــــــــ

بالحقد حرگو بابي...وانه بجميع احجابي
الزمت بابي وأرده...وطعني بقوه غمده
وفرح لمصابي
يطعني وايحشمهم...ضِربوها حيل ايگلهم
واجتني سياطه قنفذ...واحسها لگلبي تِنفِذ
ولا مِن رَدهم

واعليه بابي...برِجله ويدفعه الحقود
ولوْ سِمع ونّه...مني بعد اكثر يزود

ونبت بسمار احسه
وگلت يتركني هسه
وصبح أكثر يرفسه
يبو الزهراء..يبو الزهراء
وصحت والله حرام..سياط من اللئام
يبو الزهراء..يبو الزهراء
ـــــــــــــــــــــــــ٣ـــــــــــــــــــــــــ

صحت اعله فضه اخذيني...مات ابني بس دركيني
اسندت روحي إعله حايط..واجاني بحقده شايط
وسطرني بعيني
وحيدر هِجَم عالهَاجم...وسواه درس للوادم
خذاه وبلحظه شفته...بغضب ساحگ رگبته
ونِحَب هالظالم

ورَدلي وعيونه...مو دمع تجري دِموم
ولِحيتَّه السوده...ابيضت بهذا الهجوم

وگعد يمي وگلتله
مَدامك يمي سهله
أضحي بكلشي لاجله
يبو الزهراء..يبو الزهراء
ولا يثني الوئام...سياط من اللئام
يبو الزهراء..يبو الزهراء
ـــــــــــــــــــــــــ٤ـــــــــــــــــــــــــ

اليذبح خَزر بعيونه...أنظرهم ايچتفونه
إمامي وروحي أشوفه...الحبل گيَد چفوفه
يحالي شلونه
انسيت ابني طايح يمي...لحيدر ركضت بدمي
ولا اشوف ابعِيوني...بسبب هُمَّه اسطروني
ويَمصعَب همي

وشمعة شبابي...بويه طفوها اعله باب
بهايه موتوني...وجيتك ابعز الشباب

گضيت ابهم حياتي
لحد ساعة مماتي
عليك أفضل صلاتي
يبو الزهراء..يبو الزهراء
واحس ويه السلام..سياط من اللئام
يبو الزهراء..يبو الزهراء
ـــــــــــــــــــــــــ٥ـــــــــــــــــــــــــ


أحمد البصراوي العبادي

بين خدمه ودمعه نبدي الحزن
بين خدمه ودمعه نبدي الحزن
🔥🔥🔥🔥🔥
بده شهر الدمع   وگلبنه ينشلع
على يوم الضلع    يعالم
مصـيبه مؤلمه   ليالي فاطمه
جرحـــنه تلچمه    يعالم
قبلة الله ابهل ليالي منها مخسوف الصدر
ام ابوها تمشي گـوه امأثر اعليها الڪسر
اتذوب مثل الشمعه واحنه نون
بين خــدمه ودمعه نبدي الحزن
🔥🔥🔥🔥🔥
خَدَمنهَ اتوكلت   مجالسنه بدت
مدامعـنه انزلت    يفاطم
والاسود انتشر   مثل مجره النهر
وسط هاي البشر   يفاطم
والله واحــدنه يزهره ابقصـــــتچ لمن سمع
شالته الغيره اعله اسمچ بيده زنجيله وطلع
وبالبچي يالبضعه انغرگ الجفن
بين خـــدمه ودمعه نبدي الحزن
🔥🔥🔥🔥🔥


ابألم يالطاهره   تذكرنه الجره
على اشرف مره    وسافه
نذل وگع صبي   شرف مايبقه بي
حرگ باب النبي    وسافه
والغضبها الله يغضب وصه بيچ المصطفى
ذبحوا ابضلعچ محمد والغـــدر عدهم صفه
ابكل صلافه المجرم يصرخ وأن
بين خـــدمه ودمعه نبدي الحزن
🔥🔥🔥🔥🔥

 
على امصابچ متت   اضل احسب شوكت
تجينه ابيا وكت    روايه
السنه چنها دهر   نموت من القهر
نريد ابكل شهر   روايه
اتلث روايات احنه عدنه والله متكفي ابد
من محــرم نلطم الذو الحجه وانَادي بعد
ابمجلسچ ڪل دمعه الها وزن
بين خدمه ودمعه نبدي الحزن
🔥🔥🔥🔥🔥 🔥🔥 🔥🔥🔥🔥🔥
وليد المندلاوي

[[شوط كربلائي ]]
>>>>>>>>>>>>>>>><<<<<<<<<<

ياصاحب الثار اشلون.....تنسه الظلع ومصابه
ماچانت ابد عالبال.....هجوم الطاغي وحسابه
*******
تدري ابهجمة الأصحاب.......يوم العصرو الزهره
ابگلبك چم جرح موجود....ولسه عايش الجمره
الله  يعينك  ابيا  حال......شفت ابعينك العصره

كلها   اتوافدت   للدار
صارت هجمة الأشرار
تدري  ابلوعة البسمار

بيدك تصلب  الجبتين.........وصل للدار  بطنابه
*******
هذوله زمرة الأشرار ....هجوم الدار  ما تنسه
معروف الدفعهه ايصير........جهنم قرر  ابنفسه
يم حيدر يضيع اشچان.....والله ماطلع حسه

معروف   الحقد   بيهم
اسود   كله     ماضيهم
بغض نعرف اساميهم

اثنين الهجموا اعله الدار.....استغلوا طه ابغيابه
********
جرحك  ما برد  لليوم.......آثار  السقيفه  اجروح
يالمهدي تعيش الآه.....بيك اشگد نعرف النوح
ياهي الأكثر  الچمات.......يومك ما نسه المذبوح

شفتهه الصوره مرسومه
ماتت    والله  مهضومه
تعيش   الونه   مظلومه

يمچيد  النوايب وين......تدري الظلع وصوابه
******
نهار المر  عليك  ادموع.....ليالي الحسره والوعه
شفتهه الدنيا ظلمه اتصير...بيها الزهره المفجوعه
وحيدر ما نساها  الباب.......يمهه صبن ادموعه

بنيت من الدمع احزان
صعوبه  فرگت  الخلان
مصيبه يشرح الوجدان

كل هذا اليصير انشوف....صارو صحبته اذيابه
*******
بعدهي الدمعه ابعيونك......تشرح قصة البسمار
عاده العرب بيها انشوف.حرمه وماتطب لدار
لازم من يجي استئذان..الله اوصى بيها اسرار

تعيش  ابنايبات  الهم
ظلع من عندك اتهشم
ونينك  ماخلص مأتم

عجل سيفك البتار.........يريد  الثار طلابه
*******
گلبك  يمتلي بجروح.....عايش لوعة  اونينك
لسه ابروحك الظلعين.....ظلت جمرة اسنينك
صارت كربله  الآهات....تبچي الغربة احسينك

يومك ما نسه المذبوح
وايامك تعيش اجروح
الآه اشگد ثگيل النوح

ابروحك عايش المذبوح....ويمه جملة اصحابه
*******
تمت بعون الله تعالى

الشاعر_يوسف_الفتلاوي

@HxzEU1
#قناه_نشر_القصائد_المنبريه
#الناشر_مصطفى_المياحي

حنت وآنت ثم نادتني
يحسين يمه أدنى شمتني
حدر الضلع ما ظن يدگ ماااااات
حاچيتچ حبيبه سلاماااااات يمه

*****

آنه الما شابع من امي آنه الحاظن عبايتهه
آنه المحروم من عدهه انتهت عشره ابدايتهه

تون وبعينهه اتلولي
حنينه تباوع الطولي
ييمه شيوجعچ گولي تون

ألم بضلوع والدتي
تصدلي وهم تصد لختي
شسولف كلهه سالفتي آلم

نضرة وداع بحسره مدفونه
يا شدة التحچيلك عيونه
يحنينه مو هاي البدايااااات
حاچيتچ حبيبه سلامااات يمه

-----------------------------------

حاچيني الگلب تعبان فتحي عيونچ شويه
وداعت ضلعچ المكسور لا حيل البعد بيه

اريد ال يمه گوليهه
آخر مره احس بيهه
يمه وشنهي تاليهه اظل ؟

ما متعود بدونچ
ردي الينشد شلونچ
وين الغاليه عيونچ طفن

حظنچ تركني وچفچ گبالي
هذا انه يمه حسينچ الغالي
صعبه العمر من يبدي لچمااات
حاچيتچ حبيبه سلامااات يمه

-----------------------------------------

ها يمه الضلع ما طاب يلما نايمه بليلچ
بشريني ودگومي وياي گعدي وراح اتچيلچ

شنهو الصار شو سكته
لا صوتچ ولا ونته
حتى النفس ما شفته خفت

هيچ امدده وآنه
احس بضلوعي بردانه
الگبر دليني بمچانه متت

ما ادري ياهو المات يمه آني
فدوه رحتلچ لزمي ذرعاني
ما اريد احس بيهه النهاياااات
حاچيتچ حبيبه سلامااات يمه

-----------------------------------------

ميته ومدت الذرعان رادت امي تشبگنه
ونت واليون جيريل الله ايعين والدنه

بعمر اثمنطعش ماتت
حانت يم حسن حانت
چني اسمعهه من صاحت علي

تبديت وصعب شلتم ؟
على عيوني انصب مآتم
ها يوليدهه اتحزم مشت


ياهو اليواسي الفاگد الليله
اليبچي اعله امي بگبره اتچيله
عينوني خلص عمري ونااات
حاچيتچ حبيبه سلامااات يمه


-------------------------------------------


ماتت وانتهينه بساع خربت چلمة اليمه
چا عدمن بعد نرتاح ياهو يشمنه ونشمه


غطاهه الترب وسفه
تالي تعوفني وتغفه
تحت الگاع ما تدفى صعب

خلصت للاسف قصتي
ودوني اعله والدتي
ما متعوده ما تبطي تجي


تسمع بابنهه الليل ما نامه
ميته وترد وتصير گدامه
وتگله يمه اليتم شوغات
حاچيتچ حبيبه سلامااات يمه

كلمات الخادم / رعد الفريجي
26 / ربيع الاخر / 1447
ثوابها لروح والدتي

@HxzEU1
#قناه_نشر_القصائد_المنبريه
#الناشر_مصطفى_المياحي

شور

يايمه تعالي
**
كل ساع اختنگ وشتاگ. وكوه الليل اخلصنه
عيوني ما يجيها النوم. امنين النوم اجيبنه
اشمالك يا كلب شتريد. مره امرورة الفرگه
ادور بالجفن ضليت. غير الدمعه ما تلگه

يايمه. تعالي
**
ما ترجع ليالينه وهذيج ايامنه الحلوه
الكعده الما تلم احباب. هاي الكعده ما تسوه
اشعندك يا دهر وياي. كافي تهيج جروحي
من اشتم هواهم ليش. اشتاگ وتحن روحي

يايمه تعالي
*
عايش عالكضت واشلون. والدمعه بطرف عيني
انه الما كسرني افراگ. بفراكج كسرتيني
ياريت الخلگ ينباع. حته اشري خلگ منه
من اسمع بسمكم ليش. كلبي بساع الزمنه

يايمه تعالي
***
عفتيني بوكت موخوش. وتكتل فرکتج يمه
حرت اشلون اطب للبيت. صارت حجرتج ظلمه
ما اكدر انوش الكاع. تعبان ونحل جسمي
نشدوني الخلگ شتريد. وانه اصرخ اريد امي

يايمه تعالي
*
صوب ضلعج البسمار حيل ونزل دموعج
من عدها وكرهت الباب. ليش امكسر ضلوعج
هذا انه الحنين حسين. بالكوات اكض ضهري
انتي الطحتي يم الباب. لو انه الطحت مدري

يايمه تعالي
****

تمت
تحسين الخفاجي

@HxzEU1
#قناه_نشر_القصائد_المنبريه
#الناشر_مصطفى_المياحي

‏
‏ياعلي المرتضى اعان الله قلبك
‏
‏
‏مَالِي أُكَتِّمُ دَمْعَتِي بِفِرَاقِكِ
‏أَوَخَشْيَةً حَتَّى الْأُنَاسِ يَرَوْنِي
‏أَيُلَامُ عَنْ دَمْعَةْ عُيُونِهِ فَاقِداً
‏حَتَّى تَلُومُ النَّاسُ دَمْعَ عُيُونِي
‏مُهَرَّاقٌ لَا يَدْنُو إِلَى مَا دُونَهُ
‏كَادَتْ تُشَقُّ لِجُرْييِ دَمْعِي جُفُونِي
‏خَدًّا لَطَمْتُهُ حُرْقَةً لِفِرَاقِكِ
‏يَا وَالِدِيَ لِلتِّينِ وَالزَّيْتُونِ
‏حَسُنٌ وَأُخْتُهُ وَ أَخُوهُ وَفِضَّةٌ
‏قَدْ حَاوَلُوا لَكِنْ لَا يُنْسُونِي
‏مَالِي وَقَفْتُ عَلَى الْقُبُورِ مُسَلِّمًا
‏عَطْشَاً لِرُؤْيَتِهِمْ فَلَا يُسْقُونِي
‏كَفْكَفْتُ دَمْعِي فِي رِدَائِي حَسْرَةً
‏أَنْعَى الْقُبُورُ وَأَهْلُهَا يُنْعُونِي
‏وَرَجَعتُ مَكْسُورًا بِخَيْبَةِ خَاسِرٍ
‏وغَفَوْتُ مَهْمُومًا كَما الْمَدْيُونِ
‏نَادَيْتُ زَهْرَاءَ وَلَا مَنْ صِيَحَتاً
‏يَا ضَيْعَتِي مَنْ ذَا الَّذِي يَلَقُّونِي
‏وَشَكَوْتُ مَشْيِيَ إِلَى السَّمَاءِ مُسَلِّمًا
‏أَمْرِي إِلَى مَنْ فِي السَّمَا مَكْنُونِ
‏وَرَجَعْتُ دَارِيَ وَالْمَهْمُومُ بِجُبَّتي
‏أَشْكُو لَهُمْ فَقْدِي وَهُمْ يَشْكُونِي
‏
‏

علي ميران

@HxzEU1
#قناه_نشر_القصائد_المنبريه
#الناشر_مصطفى_المياحي

گوم الهه ياطلاب الحگوگ
يبن الحسن سكتهه الحلوگ
چف أمك من الباب محروگ
گوم افزعلهه گبل الشروگ

أتنخت ببنهه ونته أبنهه
يالمهدي عجل هدي ونهه
العجل// العجل//العجل

@@@@@@@@@@@@@@@

خلي الثنايه بدمهم تسيل
ولو عسعس عللعاديه الليل
بطگ الخواصر جفل سهيل
بزينب بعد ماواحد يعيل

الشام الگصه بحال العقيله
خل يعتلي صياحه وعويله
العجل// العجل//العجل

@@@@@@@@@@@@@@@

لرض البقيع أرخِ الهه العنان
والبيده طرهه وهز الأكوان
هاشم يساده وزلم عدنان
يصيح اليبشر ثاركم حان

يهل البخت وهل العمايم
بچه الزلم فذكم يهاشم
العجل// العجل//العجل

@@@@@@@@@@@@@@@

عمتك تموت وشامهم عيد
الشام التسكنه موش أجاويد
حرمه وغريبه وماتت بعيد
يشيع نعشهه واحد تريد

يالمهدي مامش يمهه عوان
يشيع نعشهه الماله خوان
العجل// العجل//العجل

رسول رياض

@HxzEU1
#قناه_نشر_القصائد_المنبريه
#الناشر_مصطفى_المياحي