مشتاگين   لذيچ  النظره
وچلمة يا يمه من الزهره
محتاجين الحظن الدافي
ليهسه حسينچ  ما غافي  مشتاگين

----------------------------------


محرومين    امن   الربتنه
الچانت  تعبانه    وشالتنه
راحت    للموت   وعافتنه
خلتنه  امنه   ومن  خلتنه
 
تعبانين  ،،   محرومين
يا زهراء  ،،  يم حسين

شحلاة   الوالده   ومحله  محاچيهه
الدار     بدونهه     لا   ما نظل  بيهه
يتراب       الگبر     لا  لا      تغطيهه
اخذنه  اعله اللحد بس هيه  خليهه

تعبانين     بلا      شوفتهه
نرتاح   بساعة    ضحكتهه
هاي امنه ام گليب الصافي
ليهسه  حسينچ   ما غافي  مشتاگين

-----------------------------------------

هونك      يا جناز    وتاني
لا تاخذ     حظن    الرباني
ما  تسمع    ونات  اخواني
ما  تدري بضيمي  ونيراني

تاني شواي  ،، گرب جاي
لا لتروح    ،،  فاطم هاي

نزل     الغاليه     وخلينه     نحظنهه
هاي   الوالده     الما    ينشبع   منهه
نضمهه     بروحنه   ومنريد   ندفنهه
راحت من  وكت  چنهه انتهت چنهه

ماتت   ايام    الحنيه
بنتچ هلظلت  محنيه
يا گلب الدونچ   متعافي
ليهسه حسينچ  ما غافي مشتاگين

---------------------------------


يا حيل    الرايح   تانينه
علتابوت    شگد   ونينه
ياهو الشوفتهه يرد بينه
ونعيش براحه    يخلينه 

يا جناز      ،،  آخ  اعزاز
امنه اليوم  ،،  اي  نعتاز

سولفنه  ويه  امنه   وهيه  ممدوده
ها  زهراء  وكتچ    بله     شيعوده ؟
يمه  ارواحنه  وي  اليمه   مشدوده
لا  تمشين    بيتچ    شابع     بروده

ما دافين    بلا  احضانچ
هاي التربه وهذا مچانچ
ظل  البيت  ونوره  الطافي
ليهسه  حسينچ     ما غافي مشتاگين


------------------------------------

سافر  يا حيل  وي احبابي
من  ترجع  لا  لتدگ   بابي
تدري بهذا الباب   امصابي
ارجع بس  ردني   الغيابي 


حيلي  هناك   ،،  دفنوه ذاك
منهه  انفاس  ،،  جيب وياك

خلف الله  اعله    شيلتهه   وعبايتهه
يجينه    الليل    وتنومنه     ريحتهه
بس  نشتاگ حيل    انريد    شبگتهه
احضر  يا  علي     چتاله      فرگتهه


الغرفتهه  الشوگ   ايودينه
نغمض ونحسهه اتشم بينه
تعبانه   وما    گالت   كافي
ليهسه   حسينچ    ما غافي  مشتاگين

------------------------------------


بيت     بلا صوتچ    منريده
يلغربتي    وصرتي     بعيده
العايش بعدچ شنهي  ايفيده
لا يمشي    ولا  يرفع    ايده

علغياب       ،،   ذاب  وذاب
لا ميعيش    ،،   صار اتراب


بسك    يا هوى   لا  لا تمر     بينه
ما  نگدر  نشمهه   انموت    خلينه
دمعنه اعله  الگبر  هوه   اليودينه
نروح  انرد  نفس همنه  وبواچينه


شده  الما تگدر  تحچيله
الما تبرد لو  دم   تبچيله
التعرف وياه لا   متوافي
ليهسه حسينچ  ما غافي  مشتاگين


كلمات الخادم /   رعد الفريجي
ثوابها الى روح والدتي  (الفاتحة )

حنيتلچ   مدري  شكثر
من اذن  بوكت   الفجر
مشتاگلچ    مر   الصبر   يمه

--------------------------------------------

مو  سالفة     أم   وأبن
مو  سالفة  عين وجفن
انتي  الوجود  المندفن  والله

خليتي  عين   بلا ضوى 
تعبان   محتاجچ  دوى
مخنوگلچ وانتي  الهوى   والله

ما ينحمل ،،  يمه  الفراگ ادخيلچ
ما ينحمل  ،،  بيني الگبر  ما بينچ
وين اتجه  ،،  ضيعت شوف عيوني
وين اتجه  ،،  وين  الدرب    دلوني

دمعاتي  بغيابچ    جمر
من اذن  بوكت   الفجر
مشتاگلچ    مر   الصبر   يمه


----------------------------------------

تنام البشر  بس  آنه أظل
هذا  الوداع   الماله  حل
تايه   وآنه   بدار    الاهل   بلوه

تگومني   چلمة    يا علي 
واتوچه  ما ظل حيل ألي
ميته وأحس  ماتو    هلي  بلوه

يمه الالم   ،،  بالگلب    ياكل     بيه
يمه الالم   ،، خشبه ابوصط  جمريه
ما ظل حچي ،،  هذا   الدهر    سواهه
ما ظل حچي ،،  ضم ضحكتچ ضماهه

راح الدفو   وراح العمر
من اذن   بوكت   الفجر
مشتاگلچ    مر   الصبر   يمه

------------------------------------

ما نمت  ساعه   ولا هِدت
أذن     بچيت       وكبرت
بدموعي وين أمي صحت  حيره

حاچيني   مو  حيلي  إنهب 
تعبانه  ؟   لا  شنهي   التعب  ؟
نوم  الفجر    يمه   شعجب   حيره
 

حان الفرض ،،  السبحه وتربتچ هايه
حان الفرض ،،  واضلوعي  المصلايه
تحت الرمل  ،،   ما ينسمع تسبيحچ
تحت الرمل  ،،   گليلي  يمه  دخيلچ

آه   يا   دليلي   المنكسر
من اذن    بوكت   الفجر
مشتاگلچ      مر   الصبر   يمه

----------------------------------------

ما   ينحمل  يمه   البعد
توجعني  چلمة  ما  ترد
يم گعدتچ أوصل   وأرد  وينچ

واحظن  عباتچ  وانتچي
ويخلص بعيني    البچي
واحچيلچ وكل  الحچي  وينچ


ماتت تره  ،،  صوت الوداع أذاني
ماتت تره  ،،   جثه بنعش  خلاني
امك مشت ،،   شيرجع    المدفونه
امك مشت  ،،  آه  يا  اللهي  العونه

مو  شده  ايام      وتمر
من اذن    بوكت   الفجر
مشتاگلچ    مر    الصبر   يمه

----------------------------------------


راحت بقت بس اسئله
ليش  اليفارگ  أم   أله
يبچي  بسماع البسمله   صعبه

لن بيهه   يومه    اليبتدي
لو  صاحت الغالي  إولدي
يلطيبه  أگعدي     ورددي  صعبه

وين الحظن ؟ ،، وين الهلا  البعيونچ ؟
وين الحظن ؟  ،، مو مالت ايدفنونچ
عمري انتهى ،،   يا يمه    بس     رديلي
عمري انتهى ،،   خلصتي شوفي وحيلي


ظل     الونين    المستمر
من اذن    بوكت   الفجر
مشتاگلچ      مر   الصبر   يمه


كلمات الخادم  /    رعد الفريجي
ثوابها الى روح والدتي

شوررر
........

بين اضلوعي يمه وضلعج الآم
وصيحة غالي يم غالي
انه اوياج نتشابهه بالجروح
وكلشي ابالج ابالي
بالبسمار انتي عمرج يضيع
وانه الرمح جتالي

كربله اشبع منهه طعنات
الحالي تظل تبجي السماوات
يمه اموتن وانه عطشان
و زينب تضل ابين  شمات

بعدج ما تضل روح
من هسه انه مذبوح
فوك احلامي مطروح
ودمي اكبالي مسفوح
.......


كل جرت نفس ترميج بسهام
وانه انفاسي افاركهه
بابج محترك يايمه بالنار
ونار اخيامي تحركهه
هاي الصورة اشوف ابطارف البال
وسوط ابنيتي لاحكهه

بعدج ييمه حالي يا حال
حزني اعله طولي امفصل افصال
فتحيلي عينج بيج ما بيج
لو بالنعش وياج انشال

اليدفن امه بتراب
يخلص ايامه بمصاب
يجيبه وياخذه أعتاب
وتظل عينه على الباب
.........
بين الباب والحايط دمه يسيل
تنظر عيني يايمه
كل ما التفت كدامي الكاج
ويه احزانج امحزمه
كضيتي ايامج اعله الونه والاه
ليل انهار متألمه

ارتاحي يمه وغمضي العين
ما شفتي راحه ابهاي الاسنين
مو سهل يمه افراكج الموت
من عندي ياخذ يمه روحين

بعدج ظلمه دنياي
كعدي وسولفي اوياي
عطشانه الج عيناي
مثل ما اعطش الماي
.......
ما حسبت اودعج يمه للموت
لا عالبال ابد جانت
جنت احسب سوية الكربله انروح
بس احلامي ما صارت
الي مكتوب اروح الكربله اوحيد
ومن هسه الأخت حارت

يا يمه باجر كربله تريد
تكطع وريدي وكبرج بعيد
تحتاجج ابنياتي الاصغار
وزينب أخيتي المالهه اعضيد

تبقى ابوليت الكوم
وانه بذبح ملزوم
علي سيف العده يحوم
ومن ملكاج محروم
.......
باجر أبني عبدالله يذبحون
وانه انظرله بعيوني
مثل المحسن اوليدج يزهراء
ابموت اوليدي ياذوني
تنعاد القصص باجر بالطفوف
ساعة ما يذبحوني

حركة الباب وحرك الاخيام
وبسمارج ورشكات الاسهام
يتشابهن وأدموع الاصغار
بس اختلاف بطبت الشام

جبيره طبت السوك
على اخت الجسمه مسحوك
غريبه وصاعده النوك
ومنهه الحيل مبيوك
.......

كلمات
موسى الخادم

@HxzEU1
#قناه_نشر_القصائد_المنبريه
#الناشر_مصطفى_المياحي

لاتحسبن رقصي بينكم طربا

فالطير يرقص مذبوحا من الالم

واني حسين ذابحني والوج اعليه

ومثل الطير اذا سچينه مرت بيه

اكمز جمرتي جوه الضلع تچويه

ماتعرفني يالبطران

وسولف كلها عدها اللسان

الجارحني ولا مر بيك

جرحي المنذبح عطشان

من الكفه امثلث يطر گلبه

ضامي وسليب ومحد ايشربه

والحافر إِيروح إويِجي ايكلبه

///////////////////////

ابقى اهل دمعي جمرةً لهبا

فالنوح يكثر مرحوما على الخيمِ

الخيمه وبيها زينب توج بالنيران

عله هاي المصيبه كون اموت الآن

عندي منذبح و مسلب وعريان

احس راسه ينكط دم

وبذني صوت المخَيَّم

وبالخيمه عله الدخان

وريتي بالحرگ تشتم

وجمر العقيله ابضلعي يچويني

طلعت تِدَوِر خنصر حسيني

اتگله لون خويه عمت عيني

///////////////////

هذا حسينُ ضامي قطعَ اربا

والعين تجري دموعا من الدم

والعباس عينه طاحت ابچفه

هو اشراد راد منل نهر غرفه

اكو شچم نار بيه وابد ماتطفه

زينب شارده من النار

تركض لو تطفي ازغار

ولا ماي الاكو اترشه

احتركوا والدليل احتار

إلمن تطفي وياهو الي اتطلعه

جوه الحوافر منكسر ضلعه

ابهيده يحرك شفافه متسمعه

///////////////////////////

لاتحسبن قولي انكم عربا

والجيش يهجم فرحانا على الحرم

بالخيمه اشبقه بس هندس اوحشه

زينب دورت شي رادت اتفرشه

لخد حسين حار الرمل ويهرشه

شلون اعلَ الترابه اينام

وزينب رايحه للشام

ومامش وصله من خيمه

بس ارماد موش اخيام

متروسه چانت من بني هاشم

وبيها الحسين وخيرة الوادم

وانطفت بيها شمعت القاسم

////////////////////

لايخرجن نسوه بيكم عجبا

للالَ تخرج ارباباً من القيم

وطلعت زينب ومستحيه مهظومه

وتمشي امچتفه ابمشيتها ملچومه

ومخليَّه اخو متسَلِبَه اهدومه

وخلت كافل امكطع

كالت خويه ماتسمع

دكوا طبل والهوسات

وانه منل خيم اطلع

خويه الخجل عباس كاتلني

هذا يصدني وذاك يشتمني

وازرك تراهو منل ظرب متني

/////////////////////


نسالكم الدعاء

احمد الطيب الحلي

@HxzEU1
#قناه_نشر_القصائد_المنبريه
#الناشر_مصطفى_المياحي

يحسين الكبر ضيگ وريدنك
مو تنساني بدمعاتي احلفنك
———-
انه الگضيت عمري بمجلسك كاعد
جي ليلة الوحشه وياي متواعد
يبو كلب الحنين الما طرد واحد

اول ليله كون وياي اشوفنك
—————-
ضلمه المكبره ومامش عرف بيهه
بس دمعة مجالسكم تضويهه
تنسه اصويجبك ما ظن تسويهه

صح مذنب ولاجن حيل احبنك
———
هنياله اليشوفك ليلته الاولى
خاف المثلي باجر ما تروحوله
تنكر خادمك يحسين معقوله

ماتنطي بصديجك والله اعرفنك
——————
منك ابتعد وانت التجر إيدي
حنين ومن اجيك تكلي يوليدي
ما احسب ليالي الفرحتي وعيدي

بس احسب ليالي الشهرك وحزنك
—————-
يا واهس دمعتي وفرحتي وحزني
اجيلك منهضم وارجع ولا جني
وين الگالي واحد مثلك يحبني

يل مدللني وانه اذنب وازعلنك
—————
خدمتك مو لاجل شهره ولاجل سمعه
لگيتك تسوه عيني شما بجت دمعه
اليمي ايسولف بغيرك ولا اسمعه

غمهه السالفه الما بيهه اسمعنك
—————-
انت اول جرح من تنلجم تنحب
ساتر دنيا وانت اعله الثره امسلب
احلفك بالغريبه ام الحزن زينب

تحضرني الگبر ضيگ واريدنك
—————

الخادم موسى البطلي

@HxzEU1
#قناه_نشر_القصائد_المنبريه
#الناشر_مصطفى_المياحي

الحسن ناده ياحسين.
راحت الزهره.
گلب ابونه اشگد حزين.
راحت الزهره.

بلاية ام زينب حزينه.
يصعب افراگ الحنينه.
راحت الزهره
،،،،،،،،،،،،،،،،،،١،،،،،،،،،،،،،
راحت الچانت دوه
واختلف طعم الهوه
الچانت اتلمنه سوه.
راح تمشي للگبر.

شصاير بحال الحسن
چبده من هسه انطحن.
عيون امه غمضن.
ظل يتيم من الزغر.

علي مكسور الظهر.
مثل ابنه ال علنهر
كوكب امفارگ گمر.
تمطر عيونه شذر.

سيدة كل النساء.
اعداهه ظلموهه.
مثل ابنهه بكربلاء
. اعداهه ظلموهه.

الأم لهله اعظم سفينه.
يصعب افراگ الحنينه راحت الزهره
،،،،،،،،،،،،،،،،٢،،،،،،،،،،،،
الحسن يعلم بالظلع.
حسين اله ظل يستمع
كل سوالفهم دمع.
هدت اركان السمة.

ايگله يحسين الكسر.
بالظلوع البصدر
واكو بسمار بكتر .
گلب أمي فاطمة

امي شمسويه وظلم.
شاهدت من الخصم.
امنه هم ماعدهه ام.
وراح ابوهه العالمه.

بيدهه اصياط العذاب. لسه مطبوعه.
بخدهه ايد الدفع باب.
لسه مطبوعه.

بعد ما ظنهه تجينه.
يصعب افراگ الحنينه
راحت الزهره.
،،،،،،،،، ،،،،،،،،،،٣،،،،،،،،،،،،،
ينهض شلون الولي.
علي ناده ياعلي
تنطفي شمعة هلي
وتشمت بحالي العده.

وسفه فاطم تنغدر
التقره قرآن الفجر.
العاشت اوياي العمر
اگبال عيني امدده

تاملت زينب ترد
امهه البعمر الورد
اتگلهه أكعدي وچفي أمد.
ليش ايدچ باريده.


اتگلهه گومي الصبح صار. ياضوه عيوني.
بعدچ ايموت النهار.
ياضوه عيوني.

ازغيره ليش اتودعينه.
يصعب افراگ الحنينه
،،،،،،،،،،،،،،،،،،،،٤،،،،،،،،،،،
علي اخذهه للگبر
اعليهه ظل يبچي الصبر
هالظلع ماينجبر.
خله حسره بكل گلب.

بليله ظلمه اتشيعت
فاطمه عنهم مشت
شكثر زينب حشمت.
اعليهه ضلت تنتحب.

النور هلدنيا انطفه
والگبر ليش اختفه
هالجرح ما اله شفه.
والدموع اتظل تصب.

بگلب كل مؤمن جريح. تسعر الجمره
ليش ماعدها ضريح.
فاطمة الزهره.

على الزهره اشگد بچينه.
يصعب افراگ الحنينه.
راحت الزهره
،،،،،،،،،،،،،،،،،٥،،،،،،،،،،،،،،
شيشفي بسمار الگلب
هالالم يبقى صعب.
انعزي غايب بالغرب.
نعزي امام المنتظر.

طاحت امه من الالم
مثل ماطاح العلم
وراس عباس انهشم.
انهشم ظلع من انعصر.

عينهه الحمره مثل.
عين عباس النفل
جروحهه الماتنحمل.
انعادن اگبال النهر

من أثر باب الدماء
ينولد طف البلاء

يسبي زينب وي سكينه.
يصعب افراگ الحنينه راحت الزهره
،،،،،،،،،،،،،،،،،،،،،،،،،،،،،،

حيدر موسى الرميثي

@HxzEU1
#قناه_نشر_القصائد_المنبريه
#الناشر_مصطفى_المياحي

للرواية الثانية لشهادة الزهراء عليها السلام على طور (اوكف الك مادحه) لملا باسم

يم باب ام الحسن .. نار وزلم نار وزلم
وبرفسه صَدر انطحن.. لا مو حِلم لا مو حِلم
والحَطَب يتوجر .. رَادَو حَرِك
الزهره وي حيدر .. مِن العِرِك
............
ليل المصايب دهر .. والدمع لو هَل نَهَر
احسب جروحي شِجَر .. ويه الجروح البل الهوى

هالليله منهو الرِضَه .. بكسر الضلع لو رَّضَّه
مو خبر جان ومُضَه .. كسر القلب ماله دِوه

والدمعه تِحرِك جِفِن .. اي صوت بيهه تِوِن
وثياب من الحِزِن .. تِطفِي الشمس ويه الضوه

بنار الكلب يحتِرِك .. كل الزَمن كل الزَمن
دمعتي بعيني تِدِك .. بين المِحَن بين المِحَن
وايام البعيني .. كِلهَه صِدِك
الزهره وي حيدر .. من العِرِك
............
لازم يبايع علي .. بعد النبي مو ولي
بالحقد مَملِي مَلِي .. كلب الي خَالَف حيدره

لو جان كِلَّه جَرِح .. بلا بيعه لو ينذِبِح
لو حتى جان الصُبِح .. كالو تَرَه الزهره مَرَه

لا بيعه جَانَت إله .. ينذبح هو وهَلَه
لانبي إله بعد أُوصِلَه .. وهذا الحطب وشمكثره

ويَّاهُم الكُل فِزَع .. لآل النبي لآل النبي
حَبل المَوَّدَّه انكطع .. ابغض الولي ابغض الولي
مو الله آمِرنَه .. مانِفتِرِك
الزهره وي حيدر .. من العِرِك
............
جابو حطبهم واجَو .. والزهره جَّوَّه دِرَو
بحقد الكلب واشعِلَو .. نار التِوِج حِقد وحَسَد

أَشَّر عليهم وِمَه .. كلبه الثاني بضِمَه
حِركُو وإن فاطمه .. ان جان حيدر بَعَد

فرحان حيل النَذِل .. وسيُوف يَّمَّه تِهِل
العتره جَتِلهُم سَهِل .. حقد الكلب عنده صِعَد

يوم الغدير إنِسَّه .. بكرسي الحكم بكرسي الحكم
بالشَّر صِدِك مَدرسه .. ماظل يِضُم ماظل يِضُم

كَصَّوهه للنَخله .. وطاح العِثِك
الزهره وي حيدر .. من العِرِك
............
رفسو الباب ابرَفِس .. يعصُرهَه حتى النَفِس
ويلي عالزهره اشتحس..باب الكِسَر ثِكلَّه الضِلِع

حايط وباب الرَحَه .. تطحن بلا مسحته
كلبي النبي تِجرَحه .. من كَبره ون الينسِمِع

سِطرَو عيون ام حسن .. بيديهه سوط المحن
والضلع حيل انطحن .. بالحايط وباب ورَبِع

جم مره بيهه اندفع .. بأم الحسن بأم الحسن
حقد الي بيهم طلع .. هواي الاجن هواي الاجن
والحطب جن لَسَّه .. ظَل يِعتِلِك
الزهره وي حيدر .. من العِرِك
............
محسن المات بغَدُر .. مذبوح وبلا عِذُر
مو يَمَّه ذاب الصَبُر .. لا رحمه عدهم لا شَرَف

اليبغض علي بن زِنَه .. حجيي النبي مو أَنَه
الداس بابه ودِنَه .. بي مشكله بأصله انعرف

الساكت جبان وقِبَل .. يترَّضَى لام الجَمَل
من علي ماظل خَجل ..والبعض شيعي انوصف

ايجامل بدم وضِلِع .. اكبر ذنب اكبر ذنب
والزلمه لو مو سَبِع .. ماينعتِب ماينعتِب

جن هَوَى بيدينه .. وهَّم ينصِفِك
الزهره وي حيدر .. من العِرِك
............
ابو

مريم الاسدي ..
20/10/2025

@HxzEU1
#قناه_نشر_القصائد_المنبريه
#الناشر_مصطفى_المياحي ..