هد مغتاض كفال العقيله
بعيونه الزعل بين دخيله
طب عباس يسواله قبيله
طشت ماي طشاها الثجيله

بركان بعيونه شتعل
طلاب طبلها وزعل
يازود هاشم من حمل

~~~~~~

دمعه بماي ضيعها العساكر
بس عباس واكف بلمخاطر
سوه الروس معبار وگناطر
حار بحار يذبح بالمناحر

خلاس شايخ عل زلم
مهيوب من زغره الشم
صكار كاسر جم خشم

~~~~~

كام يصول ريال المراجل
كلها تخاف محد ضل ينازل
دخيل دخيل صاحو من يقاتل
ملك الموت نازل لو أبو فاضل

عباس يكتل بال نضر
جيدوم تدرونه الكمر
ياحيد عابر عل خطر

~~~~~~

حيل حسين طشرهه الكتيبه
فوك الخيل صولاته عجيبه
مو بالسيف بجفوفه اليصيبه
جف عباس طكاته رهيبه

مغتاض سوه الملحمه
والروس طارت السمه
كفال ما مثله ازلمه

~~~~~~~

طبت موت طبلها بجساره
ناجح دوم ما حب الخساره
شيخ الكوم يكتل بيده شاره
هيبه طويل ضيعها المناره

خيال صاعد عالمهر
والكوم من عنده تفر
بالغيم واكف جن صكر

~~~~
عقيل مسلم العيساوي

حرك الباب وحرك الخيمه
ناتجهه اجم طفله ايتيمه
جم ظلع مكسور
.......
أبعاد الهجمه المشؤمه اهواي ... لوردنه نحجيهه
انطت ضوه أخضر لليكطع ماي ...والعيله يسبيهه

ناتج حرك الباب الحره اتشوف
سطرت عين الزهره
وناتج حرك الخيمه ارقيه بخوف
تنظر كسرت ظهره

من يفكد حيله اعله إخوانه
ويبس من اضماه السانه
بيام عاشور



........
أكبر غدر أبتاريخ الاسلام ... صار بسقيفتهم
طه ابكبره ما صايرله ايام .... علنو خيانتهم

سلبو روح المحسن وجه الخير
كدام اهله وناسه
مارعو حق حرمه اهل التكفير
كلمن بيّن ساسه

كشفو كل مستور العدهم
ما واحد ملعون بكدهم
انذكرو بالسطور

.......
النظم ذيجه الفعله الكسر اظلوع... مهد كسر ظلعه
نفسه الأفته بركضت احله شموع ... بالهيمه متوجعه

صورة دفع الباب اعله ام حسين ...
تشبه حيل اهوايه
صورة خيل ادوس ابصدر حسين ...
واظلوعه أمدمايه

البسمار ابظلع البضعه
والحافر يا ناس ابظلعه
ودمه البقى يفور

.......
غصب الحق الاول اصعب جان ....
حق الخلافه أعني
نصَبو ظالم من ربع الشيطان ....
لا شيعي اولا سني

من ذاك اليوم الهل يوم أمصاب
عايش مهدي الامه
ساعه يون عالخيمه وساعه الباب
ذاك العصر امه

الله يساعد كلب الحجه
ما شاف الراحه ولا بهجه
بحزانه منحور

.......
كلمات
موسى الخادم

كلشي من عندج نعمتي وخيري
ابخدمتج عمري شفته تقصيري

يازهراء...............يازهراء
*******************************
اسمي بالخدمه  طلع محلى الخدامه
اتشوفه  بين  الناس عايش بالكرامه
واضح وكلشي امتلى يبني إحترامه
ينول   محلاته  الفخر  يوم  القيامة

عمري  خليته  حزني  ودموعي
المجلسج اسعى هذا موضوعي

يازهراء...........يازهراء
*******************************
خدمة   الزهره   ذخر   بيها   العجايب
اتشوف بيها الغانمه وتمحي المناصب
كلها   تتساوى  الخدم  شفنه  المراتب
باچر  الطمه اتحچي ابجرح المصايب

دمعتي تحچي اتوضح احساسي
ذخري   بالخدمه  مرتفع   راسي

يازهراء.........يازهراء
*******************************
تبقى خدمتهه  شرف رحمه وكريمه
باب  من  الله  الوفه  وياها عظيمه
خدمتي ابيوم الزغر فطره سليمه
رحمة   الله  ابفاطمه  أمنه رحيمه

خدمة  الزهره  بيها  عافيتي
من الزغر چانت انه ابمنيتي

يازهراء..........يازهراء
*******************************
شكرا  من  الزهره  يا ناس  اشكبرها
والتوفقه الزهره شوف اشگد شكرها
دمعته  ناحت  جرح  يبچي  العمرها
ايعيش  دمعة  فاطمه ولوعة صبرها

دمعة احزاني اجروحي تحچيلي
واشكبر   حظي  الزهره  تدعيلي

يازهراء........يازهراء
*******************************
فاطمه الزهره التوفقه ايصير  خادم
والله محلاته الفخر   يخدمهه فاطم
اعلى رتبه انشوفه  خط بيها العوالم
بالخدامه   ايصير  هايم والله  هايم

خادم وعندج فدوه  سجليني
بكوثرج  باچر والله  ترويني

يازهراء..........يازهراء
*******************************
اتقدم واسمك طلع بالخدمه مقياس
خادم  الزهره تظل بس رفعة الراس
ايلوك بعيونه الدمع لو نازل احساس
تگله  يا يمه  اتحضرهم يبني عباس

ابراحتك  تمشي العاشر الونه
ابكيفك اشرايد اترحب الجنه

يازهراء...........يازهراء
*******************************
تمت بعون الله تعالى الشاعر_يوسف_الفتلاوي

شوط كربلائي

جف الي حرگها الباب باجر يحرگ اخيمنة
واليكسر ضلوع حسين كاسرها ضلوع امنة
__
مِن باب الحزن ينشاف طف وكربلة وعاشور
وينعاد الزمن مرتين بي محنة وقلب مكسور
وتتكرر لليالي الموت وايامِ الحياة قبور
أول جمرة من هالباب
صارت طبرة بالمحراب
وقبر الحسن منها اتراب

من غيظ وحقد هالناس بالدنيا تلوعنة
ــــــــــــــــــ
من كثر الأمان الجان يغفى اعله الديار الطير
وهسة احنة يتامى نخاف جي ما هية اُمنة نحير
من طبع الطفل يشتاگ للأم والمحنة تصير

بس ام المحنة تروح
خنگة والقلب مذبوح
دار التبقى بيها جروح

من يرحل ضواها الدار تتغير ملامحنة
ــــــــــــــــــ
عشت لكربلاء مرتين نفس العَبرة والاقدار
دم امي على التربان نفس الدم غداً يندار
وعبدالله بسهم ينصاب وصوب محسن البسمار


تتشابه محنها هواي
ما طفة اللهيب الماي
محنة تصير هاي وهاي

جرح أمي مثل عاشور عالدمعات يجمعنة
ــــــــــــــــــ
ترجع زمرة الطاغوت ناس بلا ضمير ودين
ونفس الي حرگها الباب يحرگها خيام حسين
يبقى يورث الاجيال لو مرت عليها سنين

ترجع خلفة النمرود
كلما مر الزمان تعود
والاحقاد بيها تزوز

كل فترة بمشاعل نار حقداً من تهاجِمنة
ــــــــــــــــــ
هاي الدنيا بس ساعات وعنها ذكر القرآن
وعمال الخلق تنشاف من آدم لأخير انسان
وتتقسم فرق واشياع اهل الكفر والإيمان

من توگف جميع الناس
يوم الحشر والمقياس
وتُسئل حتى عالانفاس

وتتحاسب على الأفعال زمرة الي جرت دمنة
ــــــــــــــــــ
ظهر المرتضى المكسور من كسر الضلع والحيل
نفس الكسرة ظهر حسين من طاح العلم بالويل
ضلعِ الي يرضة الباب بالطف بسنابك خيل

ضلع امي واخوي ضلوع
واحد عالجذع مطبوع
والثاني بنزف مشلوع
كل مدة وضلع مهشوم من البشر ظالمنة
ــــــــــــــــــ
الشاعر زين العابدين الشمري

ميمر مجنس               


خلينا نقره الفاتحه       بدار الزجيه النايحه     
ياشيعه خل نمشي هناك   نشبع بجي ونقراها 


ــــــــــــــــــ

أَول خلق ربِ العُلى سواهـا          (خلقها) 
بـس هـيه فاطم ما خلق سواها       (غيرها) 
ساوى السمه وحتى أَلارض سواها    (بسطها)

لأم الحسن هذا الزمن   سبعه طباق أتقسمن  
وهاي النجوم البلكون       الها أنخلق مسراها   

ــــــــــــــــــ


فاطمة الزهراء النبي سماها       (اسم)  
قدسها الله بمنزلة وسماها  (اعطاها شأن)
سورة الكوثر حيدره سماها    (بسمله)  

بسم الضلع نشعل شمع   ونردد بصوت الدمع
يم الحسن يم حسين  صوت ويضل وياها  

ــــــــــــــــــ

الناده بقتلهـا ومن فرح مـن باهـا     (اتباها)   
مـا يعـرف أَمهـا فاطمـه ومـن باهـا    (ابوهـا)    
الـراد الخـلافـه بالغصب مـن باهـا  (من بيها)  

حقداً أَجوا و أَترأسوا     خيبر قبل لا مانسوا   
أَهل الجبت والطاغوت  حيدر علــي داواها  


ــــــــــــــــــ
أهل الحقد رادو فقط منفاها     (نفيها)   
چلمة بخت گال النـبي من فاها  (من حلقه)
حتى ترابك يا گبر مـن فاها   (ما خفاها)

أَي يا گبُر  كل العمُر     تبقى الزجيه أَم الصبُر  
رغماً على كل ملعون   تبقى ويضل ذكراها    


ــــــــــــــــــ
الله رفع فاطم اله وبعلاها     (رفعها)  
لا مو وسط جنه عدن بعلاها     (فوقها)  
يبجي عليها الرتضى بعلاها     (زوجها)  

ثار وبقى للملتقى    باجر يجي أَبن التقى    
وبيده يشيل الفقار       زمر الضُلم يفناها     

ــــــــــــــــــ

ويلٌ لمن عن فاطمه منساها    (ساهي)  
مثل الصلاة الواجبة منساها     (ذكـرها)  
كل شيعي يندب لا أَبد منساها   (ما انساها)

لاخر نفس گلبي التمس  أَمنا تضل ما ننسى بس
كسر الخواطر والروح    معنى الظلم معناها  

ــــــــــــــــــ

زين العابدين الشمري

مجالس فاطمه .... تحبهه اهل السمه
تحبهه اهل السمه .... مجالس فاطمه
......
رابح البيهه حضر هاي المجالس
اعليهه حتى الأنبياء صارت تنافس
والملائك تكَصدلهه  كالنوارس
والمنابر تشهد ابهاي القضيه
.....
هل مجالس نعمة الله ومن حضرهه
ما تمس  النار عينه ولا تضرهه
جنة الله اتصير اله دار بكبرهه
ياهو اليحصل مثل هاي الهديه
....
كل حوائج ما تظل ابهل مئاتم
كلهه توكع بيد امنه الزهره فاطم
الف هنيالك يمن عالصدر لاطِم
هل وسام يصير الك اعظم هويه
.....
فاتحت ام الحسن ألهه اهلهه
موش ياهو الجان يكَدر يوصلهه
بس التحبه الزجيه يحضرلهه
ويا كبر حضه العلي ترضى الزجيه

......
باجر ابسجل الزجيه ايشوفه اسمه
كل شخص محروك لم حسين  دمه
وبكثر دمعاته الهه وكثر لطمه
أجره ياخذ اي وحق حامي الحميه
......
✍️ كلمات موسى الخادم

ورده وعمرها ثمنطعش     ياناس ماتحمل عطش
امُ ابيها فاطمه    معقوله تنشال بنعش
***
جانت بسمها بكل الوكت     تسبح ملائكة السمه
وجبريل الله فضله             وختاره خادم فاطمه
خالقها الله بقدرته               ويحبها من اتكلمه
شاف الها يرهم بس علي      ودالها حامي الحمه

اقرء محمد مايلي                فاطمه اختاراها العلي
النورين اجمعهم سوه     وصوت الصلاه خل يعتلي
***
قال النبي عن فاطمه       هي حياتي وبضعتي
الناس تكشخ بالولد           وانه الزجيه كشختي
    ارتاح بس يم فاطمه     هي مهجتي وراحتي
سيدة نساء اهل الارض      وبين الخلايق هيبتي

اعظم مره وخير النسه     الكل العوالم مدرسه
الله هديه انطاها الي       وهيه الهوه الاتنفسه
***
من نور الله ام الحسن             وهيه تره ليلة قدر
صحنه عله نعمة فاطمه             الحمد لله والشكر
الفاطر وهيه فاطمه           شگد الله بيها يفتخر
الي يصلي على النبي     يصلي على الزهره شكثر

من مغربه الحد مشرقه      كلشي لجلها خالقه
ابمهده عيسى اذا نطق      الزهره بالذر ناطقه
*
باب الله باب ام الحسن      من عنده يستأذن نبي
وشلون يم الباب اجه         وبيده يدفعه الناصبي
الله يحبها لو دعت                وفاطم يكلها اتقربي
انتي رحمتي الواسعه               يابت محمد اطلبي

انتي الحبيبة الطاهره         مثلج فلا خالق مره
وكلمن يحبج فاطمه            ارعاه دنيه وآخره
*****
الزهره حجه على الارض      بضعه المحمد مُنزله
صاغاها الله برحمته              والكل اسمها اترتله
قرآن لازم تنحفظ               وهيه حروف البسمله
ومن كثر حبه للنبي                 ام وبنت راداها اله

ياطه ابتر شانئك             انطاك كوثر بارئك
اعظم نبي واعظم بشر     وبالزهره الله كافئك
*
تمت
ميثم العمري

🔴 گــعديه :





ليش المرتضى ما سل فُقاره
يوم الهجمو الگوم اعله داره
نسأل شنهي الاسباب
ساكت ظل ابو تراب
يوم الهجمو الگوم اعله داره

ــــــــــــــــــــــــــــــــــ

أول الاسباب چانت من رسول الله وصيه
ياعلي فحواها تصبر ، من يدفعون الزچيه
والفحل وافق لَچَنَّه ٱشترط ما تتنخه بيَّه

عن هلحچي شاهد إلي
ساعة هجوم الجاهلي
ما حشّمت فاطم علي حشّمت يافضه هيّه

صاحت ها يَفضه سنِّديني
ضلعي اتكسّر وميت جنيني
وچي گلبه ابقهر ذاب
ساكت ظل ابو تراب
يوم الهجمو الگوم اعله داره

ــــــــــــــــــــــــــــــــــ

ثاني هلـ أسباب چانت علي ما دوّر مطامع
وكت چان اعله الخلافه الثاني بالأول يدافع
علي راد انصار يثأر وما لگه ابگد الأصابع

معذور حلال الشدد
لا عُدّه چان ولا عدد
لَوَّل علي الباري شهد والسقيفه اتگول رابع

علـ أعقاب كلها انگلبت ابـ شر
الظل مقداد ، سلمان وابو ذر
من قلة الأصحاب
ساكت ظل ابو تراب
يوم الهجمو الگوم اعله داره

ــــــــــــــــــــــــــــــــــ

ثالث الاسباب تبعد عن علي حچي الملامه
داحي خيبر چان خايف ينگطع نسل الأمامه
علي ضم احسين للطف ينذبح لجل الڪرامه

حيدر جرع مُر الصبر
حتى الأمامه تستمر
حد ما تصل راعي الأمر الياخذ الثار ابحسامه


حيدر ما شهر علگوم سيفه
يدري المُنتظر ياخذله حيفه
شبله ابثاره طلّاب
ساكت ظل ابو تراب
يوم الهجمو الگوم اعله داره

ــــــــــــــــــــــــــــــــــ

رابع الاسباب حيدر مصلحة لسلام قدّم
حقن دم أُمة محمد ما رضا اتصب قطره من دم
( ولا رأي للـ ماله طاعه ) حيدره المصداق الأعظم

لو للحرب دار الرحه
چا كل الاسلام انمحه
شاف اعتزاله المصلحه المهم الدين يسلم

علي صاحب فضل تشهد العدوان
لولاه چا هلك فلتان وفلان
ومن شاف العدل غاب
ساكت ظل ابو تراب
يوم الهجمو الگوم اعله داره

ــــــــــــــــــــــــــــــــــ

خامساً ما سكت حيدر علتجاسر واعتناله
كض تلابيبه الروايه تگول ومن الأرض شاله
ومدده فوگ الوطيه وقرر ايذبحه ابخياله

لكنّه غيّر موقفه
وعرضت وصية المصطفى
وبالحزن شب گلبه وطفه للجره ابنت الرساله

حيدر من مشت زهرة سنينه
لآخر عمره ما بطّل ونينه
من يوم اندفع باب
ساكت ظل ابو تراب
يوم الهجمو الگوم اعله داره

ــــــــــــــــــــــــــــــــــ

وعلـ وصي اعظم مصيبه فاطمه من غسلاهه
متن اسود ، أثر سطره ، جفن ازرگ شاهداهه
والاشد كسرت ضلعها ابچفه حين اتلمساهه

معذور اذا عاف الغُسِل
وادموعه فوگ الخد تهل
فگد ام حسن لا مو سهل ولكسرها ابگلبه كسره

ــــــــــــــــــــــــــــــــــــــ

سيد علي عبدالزهره الناجي

حُزني على الزهراءِ سَرمَدْ

والليلُ في عَيني مُسَهَّدْ

وابگلبي جرح ام الحسن لاخر سنيني

ــــــــــــــــــــــــــــــــــــــــ

بـــــگليبي شبت نار ما اظنها تبرد
حين ادفنتها ابليل بضعة محمد
تخنگني سكرة موت وانفاسي تخمد
من اذكر ام احسين سطروها علخد

مثلي ويظل عايش عجيبه
الدافن حبيبه وبت حبيبه
علذڪره عايش والدمع لِيچوِّي عيني
وابگلبي جرح ام الحسن لاخر سنيني

ــــــــــــــــــــــــــــــــــــــــــــــــــــــــــــ

اگبالي تِبين ابخير چانت وضعها
ومن اطلع امن الدار تلزم ضلعها
رغم الڪسر والآه تخفي ابوجعها
اتخاف انلچم لو شوف هامل دمعها

تبعد اذا اتدنه منها
تخفي الزراگ اللي بجفنها
ونّتها بالسر زيّدت نوحي وُ ونيني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــــ

غَسِّـلنِي فوگ الثوب وصَّت وِصيَّه
ڪسر الضلع ماجيس رادتني هيَّه
شفت ابمتنها آثار زرگه وشِجِيَّه
سطره وضلع ومتون ضَـمَّـت عليَّه

ياكسرة اوداع الأودها
اتمنيت انام ابنص لحدها
كل لحظه الها وللنبي يشتد حنيني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــــ

بيها الگبر وصّيت وادموعي تمطر
گبلك عصرها الباب ماحاجه تعصر
وسط الـ لِحد يَـتراب أَمّـنـتك الدر
ادفنها بالسر جيت حافظ على السر

عندك أمانه بت محمد
لاتلچم الها المتن والخد
دين ابرگبتك فاطمه واحفظلي ديني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــ

ولداري من رديت حيره اشعُظمها
أمشي وأرد اردود والگاني يمها
خوفي ابغيابي ايزيد فاطم ألمها
خوفي الچفن لا جاس ضلع ولچمها

صوت اسمعت زيد نحيبي
لـــزينبنه أرجع يا حبيبي
ابمحرابي گعدت وارجع الڪُم ترتجيني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــــــــــ

زينب شفتها شلون تنحب يَـ يُمه
من دمعي عيني اعليچ تاليها تعمه
لحضانچ امن اشتاگ ياحُضن اضمه
رديلي لو لحظات عطرچ أشمه

يلـ عُمر الورود ورحلتي
بعدچ حرام اتهيد ونتي
علـ ونّه عهدي ليوم عاشر من تجيني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــ

سيد علي عبدالزهره الناجي

بنت المُرسل ليش وترحل بثمنطعشها
سر ظل مُبهم وبليل اظلم شالو نعشها
يقبل يادين وشرع
ترحل مكسورة ضلع
بثمنطعشها

ــــــــــــــــ

نسأل ليش اتموت الزهره وشنهو الأسباب
ونكشف اوراق اللي انقلبو من الأصحاب
ناس الگالو يهجر طه أصل الأرهاب
همه البغيابه اعله البضعه ايدفعون الباب

طه ابفگده خانو عهده لحامي الحميه
ظهرو غلهم والزهره الهم اول ضحيه
والناتج كسر ابجمع
ترحل مكسورة ضلع
بثمنطعشها

ــــــــــــــــ

حق ندري الموت اعله ابنادم بمر القيوم
يفنه الكون وُ وجه الخالق بس هو ايدوم
فاطم ما ماتت نعلنها كتلوها الگوم
شاهد بسمار ومحسنها وضلع المهشوم

اتموت الزهره ابأقصر فتره نسأل علاما
صطره اعله الخد والمتن اسود اوضح علامه
علحايط من تندفع
ترحل مكسورة ضلع
بثمنطعشها

ــــــــــــــــ

يهل التاريخ وكُـتّابه يهل الوجدان
عدنا استفسارات ونطلب الها التبيان
دوست بيت الزهره و حدها ابيا دافع چان
بيش انبرر قتل المحسن جور وطغيان

ظالم أمنه تكشف عنه ردّت فعاله
عن الجاني اتگول الثاني كشف الدلاله
حين اعله الخد تنصفع
ترحل مكسورة ضلع
بثمنطعشها

ــــــــــــــــ

لوما زعلانه اعله الحرگو بالباب النار
ليش التمسوها اتسامحهم وانطوها اعذار
تُدفن سراً ليش اتوصي ابحمّاي الجار
تتشيع نص ليل اتأكِد فعل الاشرار

وسفه البضعه اتموت ودمعه تجري لولِدها
تنظر زينب تنعه وتنحب دمعه اعله خدها
تنظر لـ اُمها ابياوضع
ترحل مكسورة ضلع
بثمنطعشها

ــــــــــــــــ

ماتت فاطم بفجع حادث واعظم مأساة
أول شيعيه ابحب حيدر تفنيها الذات
فضحت بالبخطبه الفدكيه اهل الغايات
وخلّت راية حيدر تبقه اعلى الرايات

دمها الطاهر اول ثائر ضد النواصب
صوت اترفعه أنَّه ودمعه بيهن تحارب
للمذهب صارت درع
ترحل مكسورة ضلع
بثمنطعشها

ــــــــــــــــ

عن مولاتي اختمها ابياتي ابّيت القصيد
مظلومه الزهره ومحسنها اول شهيد
مولاتي وتعرف شتمنى وگلبي اشيريد
اتسجلني اخويدم للحزو منه الوريد

رايد حسره وحرگه وجمره للغاضريه
للحرگو خيمتها اعليها وطلعت سبيه
زينب مثلچ تنفجع
ترحل مكسورة ضلع
بثمنطعشها

ــــــــــــــــ

سيد علي عبدالزهره الناجي

من فاطمه كسرو ضلع كسرة غصن
والتهظم أكثر ياخلگ كلمة (وإن)
هـل يا دمـع والمنفگد أم وأبـن
لاذت ورة الباب أبحذر....وتدافع أوياهم قهر
وبالعصرة محسنها وگع.. ويلي وضلع منها أنكسر
مابي روح،، محسن على العتبه وگع
وأمه تنوح،، بشهگة نفسها امن الوجع
مامذبوح،، من صدمة الباب أنصرع
////// /////
كسر الضلع لا مو سهل أصعب كسر
لا يـنـفـع أضماد ودوة ولا ينجبر
لو شافه حيدر مايظل عنده صبر
لو شاهد أبعينه الضلع .. أيهد حيله ويطيح الدمع
يبچيها غيرة ومرجله.... وينحب عليها وينفجع
غربه وليل،، مو بالعلن صار الدفن
دم يسيل،، من حيدرة دمع الجفن
مابي حيل،، خاطر على الزهراء يون
////////////

بيا حاله توصف حالته گلب الحسن
مامر على عيونه بغياب امه الوسن
مهظوم مكروب ونواعيه بـشـجـن
ينعى ونواعيه بألم...العظم المصاب دموعه دم
فاگد أحن أم وأخو... وبعيونه الفراگ أنرسم
وآ أماه،، ينعى المصيبه بيا حزن
دمعه وآه،، شيصبره گلبه الممتحن
وا ويلاه،، لمن يحن يبچي ويون
////////////////

بيت وبلا أم مگبره أيحسه الولد
ظامي الحنان أمه وبعد مترد أبد
تتألم أضلوعه الحسين شما نـهـد
الفگد أمه بگليبه جرح.. وباچر ورا خيل وذبح
وبسمار المصوب ضلع.. باچر يرد بالطف رمح
بدمع العين،، باب أمه كل ما شاهده
يعلى أونين،، هل حاله كلش تضهده
حال حسين،، مامر على أنسان وسده
///////////////////
لا يا زمــن لا تمتحن صـبـر الگلب
دمعه غريبه من جفن زينب تصب
باچـر وراهـا كربله وطـف وغـرب
النار الـ عله الباب أسعرت.. حسبة وقت من أنطفت
باچـر تـرد تحرگ خـيـم... أتفر الفواطم لـو دوت
نفس النار ،، باچر بالمخيم توج
والكفار،،، اليسبوهه من نفس العرج
عالأطهار،، هذا الحقد عدهم نهج
~~~~~~~~
حسين حمدان الدلفي ✍🏻

(يافاطمة)

.      عــالــم خــدمـتـچ عــالـمــي
       وابـقـه بــعزائـي الـفـاطـمــي
        
       عـهـد  عـهـد  يــافــاطـــمـــة

                   *---------------*---------------*

فـاطـمـة ذاب بـمـحـبـتـچ كـلـشـي بيه
واحـمـد الله بـهـالعـقـيـده الـفـاطـمـيـه
شـايـل اوسـام الـخـدم اشـرف هـويــه
بـعـالـم احـسـاسـي أهتفت آه يالزچيـه

     عــاجـز اســولــف بالـشـكـر
     فـضـلـچ عـلــي مــايــنــكــر

                    *---------------*---------------*

شــاكــر الـنـعـمـه وأضـل دايـم ولائــي
وألـعـن الجاب الحطب وارفـع دعـائـي
رافـضـي ويعني الرفض انصب عـزائي
خـل يـگـولـون البـعـض ياللطم مـرائي

      مـاعـرفـوا بـحـزنـي وحچوا
      مـالـحـظـه بـالـنـار انـچــووا

                    *---------------*---------------*

عـمـري دمـعـه بمجلس احزانچ جريته
أنــه هـذا الـخـدمـتـچ صـارت هـويـتـه
تـيـهـت دربـي وعـلـى اعـتـابـچ لگـيتـه
خـادم وأشـعـر ملك ومـعـلـيـه صـيـتـه

      هـــذا الـنـهـج والـمــعــتــقــد
      مــا هــمــن الـعــاده وحــقــد

                    *---------------*---------------*

عـالـم ايـحـيـر الـعقل عـالـم خـدمـتـچ
مـايـعـرفـه اللي حچـه وشك بعصرتچ
دمـعـه دمـعـه جفني واسـاچ بـدمعتچ
وعـرفـت مـعـنـى الـعـزه لمن عـرفـتـچ

      أذكــــــر الـــصـــار وجــــــره
      بــاب وضــلــوع امــكــســره

                    *---------------*---------------*

حـنـت الـثـكـلـه الـچ ابـقــه بـحـنـيـنـي
هـذا طـبـعـي وعـالدمع متعلمه عـيـنـي
أمــنــت دك الـصــدر ديــنـي ويـقـيـنـي
وانـتـي فـاطـم حـاشـه والله اتخيبيني

      يـالـزهـره ارجــو بـخـدمـتـي
      لـجـلـچ امـوت بـحــســرتــي

                    *---------------*---------------*

دفعت الباب أشـأسولف وحجي عنـهـه
تجرح احساسي وشعوري وبيه چنـهـه
ويـشـهـد الـبـاري بـقـت خـالـد حـزنـهـه
دمعتي تجري بـحـزن واعـرف ثـمـنـهـه

      غـصـبـاً عـلـيــه الــمــارضـــه
      أبـچـي وأعــزي الـمــرتـضــى

                    *---------------*---------------*

   ✍خادم الزهراء ع
الشاعر رعد الجريخي