قصيدة مسلم ابن عقيل
محرم 1447 هـ


مااهـم بيكم ــ زودي عنـواني
عن بطولاتي ــ سيفي برهاني
وحدي اخلد وگفتي
وما اثني ابضـــــربتي
     ـــ.  ما اهم بيكم  .ـــ
     ــ⊱☆☆❀☆☆⊰ــ

لجل ابو اليمه اميـــري اليوم اسوي المســــتحيل
الكوفه لو تنجــــمع كلها ابعيني اشوفنكم قليل
ابــد ما ارحــــم رگبــكم حتى لو صحتو دخــــيل
حطب روس اعداي اشوف وسيفي ناره تكفي جيل

ماشفت بيكم     ند يجي اگبالي
اليوم ميــداني   من الزلم خالي
وحدي اصول بساحتي
وما اثني ابضـــــــــربتي
      ـــ.  مااهم بيكم  .ـــ
     ــ⊱☆☆❀☆☆⊰ــ

يلي بعتوها الضماير مال اســـامحكم محال
سيفي ارويه من دماكم وآنه يشهدلي القتال
راح ادور بالرســـــــايل بصمه يشباه الرجال
اله اگص ايده الختـــمها ولكتب كلمة تعال

الخان ابوالسجاد   والله يتنــــدم
اترس التاريــــــخ   من رگبكم دم
مثل حيــدر حملتي
وما اثني ابضــــربتي
   ـــ.  مااهم بيكم  .ـــ
     ــ⊱☆☆❀☆☆⊰ــ

دوم اشد بحسين ظهري لو ردت بالحومه اصول
وانتو غير المــــــوت الكم ابد ماضلت حلول
حســـــين علمني الشــجاعه الما تگابلها الفحول
مـن اقصر عـن نصــــرته شعتذر منه وشــگول

مااعوف حسين    وانتو عفتوني
غيره ماعـــدكم     يالغـــدرتوني
ابروحي شايل بيعتي
وما اثني ابضــــــربتي
     ـــ. مااهم بيكم .ـــ
     ــ⊱☆☆❀☆☆⊰ــ

يالخذلتو ابن الزچيه ابيا ثمن بعتو الضمير
حسين باب الجنه بابه وهوه بخت الله الچبير
هالك اليترك طريقه ورابح الوياه يسير
وسيفي مسلول النصرته وضد كتايبكم يصير

يشهد التاريخ ــ لصارمي البتار
بيـــــه اذلنكم ــ يا ربات العـــار
بسيفي صارت شارتي
ومـا اثـني بضربـــــــتي
ــ. مااهم بيكم .ــ
     ــ⊱☆☆❀☆☆⊰ــ

جيشكم مهزوز كله وبس الي ايلوگ الثبوت
او مو شرط بالسيف ابيده قادر امحيه ابقنوت
خصمي ما اتركله فرصه لويموت اولو يموت
وآنه اول مره اشوفن جيش خايف ماله صوت

اتحزمت بالموت     ضد كتايبكم
اشما يزيد الجيش.  وحدي انازلكم
الحرب عيدي وفرحتي
وما اثني ابضـــــــــربتي
ـــ. مااهم بيكم .ـــ
     ــ⊱☆☆❀☆☆⊰ــ

✍الخادم
كامل السعيدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

نزال لمسلم ابن عقيل ع… محرم 1447 هـ

   اليوم صاير زلزال بالكوفه

      ــ⊱☆☆❀☆☆⊰ــ

الجيش حفنه ارماد صار وذره مسـلم بالهوه
ومن حرارة غضب گلبه الواگف بصفه انچوة
شـاد بالعبــــاس حيــــله لمــن اعليـــهم نوه
نشـــمي مثل الجبـــــل ثابت لا اهتز ولاهوه

حتى اليخزره ايموت من خوفه
اليوم صـــــــــاير زلزال بالكوفه
          ــ⊱☆☆❀☆☆⊰ــ

ازغار وكبار اتراكض مــن عله صـوته ورعد
نفخت اســــرافيل ضـنو وقترب يوم الوعد
على اصدور الزلم وحده اتربع اليوم وگعد
وساحگ اخشوم الرجال الما التزمت بالعهد

اگباله كل نيه اليوم مكشوفه
اليوم صـــــــاير زلزال بالكوفه
         ــ⊱☆☆❀☆☆⊰ــ

من توســـط بالمعاره ابين كل ذاك الجمع
بس صليل السيفه تسمع صوتهم ماينسمع
اتراصفـــــــت يمه الرگاب وگال لاز تنگــطع
ايچيل بالميزان سيفه بروسهم من تنجمـع

عنده صولات اكبار معروفه
اليوم صـــاير زلزال بالكوفه
       ــ⊱☆☆❀☆☆⊰ــ

هيبة القران عنــده وتعجـــز اتوصــفه الكتب
مــن كثر خوف ال آميـــه ابجيلهم ورث رعب
اشما ازدادو زاد عزمـــه محــزم اعليهم يطب
اشتد وطيس الحرب يمه ساعه والكون انگلب

الگابله ايشوف الموت ويشوفه
اليوم صـــــــــــاير زلزال بالكوفه
          ــ⊱☆☆❀☆☆⊰ــ

سعف وتهزه الرياح اتگوم وطيــــح الزلم
اتصيح من شدة رعبها هـذا واقع لوحلم
وحده والعدوان كثره وبيهم ايطش ويلم
ثلمت الحايط اليوم الجيش اصـبح منثلم

وصفت يمه الفرسان مچتوفه
اليوم صــــــــاير زلزال بالكوفه
        ــ⊱☆☆❀☆☆⊰ــ

✍الخادم
كامل السعيدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

ليلة عاشر الوداع

ليلة ادموع او وصيه
تنجمع هاي المسيه
بين مذبوح.وسبيه
بالاوداع
++++++-+----
هالليله بخيامه حسين يفتر داخل وطالع
الحان النعي وكلسا ونّت ام ولد سامع

عنهم يخيفي دمعه بطارف اخيامه
راسه ايميله يبچي إتميل الاعمامه
يرفع راسه يلگي ارقيه گدامه
اجت تمسح بديها دمعة الامه

عينه صارت عالتراچي
وخانگه انفاسه البواچي
سكته ابو حلو المحاچي
بالاوداع
++++++++
چبيره ادموع ابو فاضل بلل بيها ثوب اخته
وزينب تمسح ادموعه گالتله الحچي وكته

ياعباسي ارفع عينك ابعيني
مد اچفوفك إلزم بيها چفيني
يا مولاتي آخر مره ناديني
بزينب باجر الوادم تسميني

الشاغلك يا خويه خدري
طولي يظهر باجر ادري
انضرب وبهذا عمري
بالاوداع
++++++++
إلاكبر من وكت لغروب فرش سجادته الليله
ييمه اوصيج ابوي حسين من نتوادع ادعيله

والساني بلسانه بلكي يتبلل
خشبه امن العطش وفراگي يتحول
ادركني اصيحه شلون يتحمل
من ياصوب اجاله الصوت مايندل

يمسح اجروحي ابضلوعه
ايبلل اشفافي بدموعه
حسبي جم عثره برجوعه
بالاوداع
+++++++
لبس ثوب الحسن جاسم الرمله واعتله مهره
نزل وايگلها يُمه الثوب هسه لازم انگصره

من يحملني عمي حسين مايگدر
خوفي اطرافه ثوبي بيها يتعثر
حسباله الحسن من دمه صار احمر
يتمدد عليه بصف علي الاكبر

راح اموت بالي عندج
انتي عالنوگ اشيصعدج
دمعة اشموعي اعله خدچ
بالاوداع
++++++++
مثل دوي النحل لخيام كلمن عيلته اتودعه
يم خيمة حميده حسين يخطي جدمه ويرجعه

تتوادع يتامه ازغار وي امهم
عن حرگت خيمهم توصي وتگلهم
احمد يمه اخوتك بالك اتهدهم
من حدر الحوافر حاول اتلمهم

آني مشغوله ابخماري
انتوا ركضوا بالبراري
امن الجمر يمه حذاري
بالاوداع
++++++++++
بدللول الولد عطشان رباب اتودعه عبد الله
لو سلهم يفز مرعوب تحضنه وصاحت اسم الله

يفتح عينه يشيبع شوفه من امه
ليش اگماطه ينفل لو رجف جسمه
يوگع من حضنها وترجع اتلزمه
الها ايشيل ايده اشرايد اتفهمه

جنّه يعلم بالي يجره
حط شفاه امه اعله نحره
امن العطش ماعنده عبره
بالاوداع
++++++++
ثائر الربيعي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

طب خبر عاجل مسلم اعله الكوفه
القصر واهــــل القصر بيهم خوفه
حي الله مسلم
&&&
يودون العدد ما يرد بس واحد
مسلم هذا خـــلاه الهم الشاهد
ماكــــو قائد وبس مسلم القائد
قائدهم وظل نص القصـــر لابد

جا وين قائدكم ابــــــــد ما شوفه
القصر واهــــل القصر بيهم خوفه
حي الله مسلم
&&&
متربع وشيخ ودخـــــــل ديوانــــه
نص الكوفه مسلم صاح هذا انـــــه
كلمن يحچي مسلم يگطع السانـــه
مثل الحمزه هم يسطر بذرعانــــه

ضربات مسلم توجع من اچفوفه
القصر واهــــل القصر بيهم خوفه
حي الله مسلم
&&&


طب إنذار مسلم ســـــــدو البيبان
مسلم چــــــان وضح يشبه الاذان
تحچي الكوفه لكن تشبه الخرسان
وادم باطــــــله بس تقــــره القرآن

وگفتك مسلم واضحه ومعروفه
القصر واهــــل القصر بيهم خوفه
حي الله مسلم
&&&
ما يحتاج مسلم جيش مـــــا راده
المو سيد ابد لا يوصــــــل الساده
هي القاده تهوه ســــــوالف القاده
خله الجيش مسلم مثل الگلاده

الجرح مسلم بيده هـــــــو يروفه
القصر واهــــل القصر بيهم خوفه
حي الله مسلم
&&&
ماكو زلم چانت طوعــــــــه الزلمه
انطو كلمه بس مـــــــا وفو الكلمه
صح طوعه مره بس تمتلك همه
بطاسة ماي طوعه وصلت القمه


معزبه طوعـــــه چانت ومضيوفه
القصر واهــــل القصر بيهم خوفه
حي الله مسلم
&&&
علي جبار الكعبي
الفاتحه لوالدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

مثل موج البحر ما حدّته اجروفه   
مسلم  صال  بيها وحيّر  الكوفه

*
برز شمّرتْ علي    العدو ظل مبتلي
      اسد يزأر
ينــادي  اتدللــي     الحرايب بس الي
     مثل حيدر

أعيـــد الـَكـــّرهْ والكــوفـــه أحاصــــرها
وضـــربات الصميـــده اليــوم أكـــررها
وَاشَوّف أجيوش أميه الرفضتْ أتشوفه
مسلم صـــال بيها وحيّـــر الكــوفـــــه

*

نزل ليـث الحــرب     تـولاهــا ضـــرب
     كتــابيهــم
لبس درعه الڴلب    حمم سيفه يصب
     يحاصرهم

بــركــان وتفجــر بـــس حـمم ينثــر
الحرب عنوانه مسلم مــا قبــل يغدر
مسلم هاشمـــي وتربيتــه معــروفه
مسلم صـــال بيها وحيّـــر الكــوفـــــه 

*

تحّيــرْ صــولتـه     الجيــوش ابيمنته
       يطشرها
بحيدر نخــوتــه       بعزمه وضربته
       يذكرهـــا

ورث عمّــه الكتايب سيفـه يخلسها
ورايـــات الكفــر بالكـوفــه نكســها
ومثل صولات عمه الصوله معروفه
مسلم صـــال بيها وحيّـــر الكــوفـــــه

*

طوعه أتحشمه       هــا يالمـــوزمه
        تعنـــاهــا
بعمّه أتحـــزمه        مثل حامي الحمه
       تـــولاهــا

صاح الجيش حيدر هــذا حاضــرهــا
ذو الفقـــار دمـــر كـــل عساكــرهـــا
مــا ثنـــه بيمينه وضــربت اجفوفــه
مسلم صـــال بيها وحيّـــر الكــوفـــــه

*

رغم اهــل الغدر      تخلد كل عصــر
       نزف دمه
زرع مسلم نصر       رخص كل العمر
      حيِّه الامه

ﮔــوم انظــر ضريحه وشاهد انــواره
كـــريم  ومـــا يـــرد ابيـوم خطـــاره
وباب الحاجه بابه وهـــاي معروفه
مسلم صـــال بيها وحيّـــر الكــوفـــــه

*
الشاعر
موسى البديري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

خوفي كلما تبطي يكبر وگلبي كل شويه طالع
متانة الي تضيع ولدها بهوسة الطف جنت اباوع
انه گلبي شگد لجمني ليش مهرك وحدة راجع
گلبي يقنع باليسمعه ومن متت ماشفتة قانع

يمتئ روحي تموت ويهود بجيها
حسين لا يرضئ تموت ولا يجيها
بالخيم واسمع كسر ذيج الضلوع
جا شحال اليوصل ويدنه ليها

بالحومة ادور هلبت تجيني
لو ميتة احسن من هالعذاب
وين الهواشم محد فزعلي
بس روس اشوفن فوگ التراب
----------------------------------------------------
واگفة بصفك وادور وين اليدليني جسمك
عطرك مخلي دليل من الحرگ ماجاي اشمك
موذر ومحتار گلبي وفوگ ذبحك خذوا هدمك
هسه لو موجود هدمك جا كلت بهدوم المك

حالي حال الفاگدة المايگضي ونها
حيرة تمشي لياكتر يلجم حظنها
اجدامها احتارت تروح بيا طريج
بصوب عدها خوان ميته وصوب ابنها

ليا صوب اروحن هاي الهظيمة
واعزازي كلهم فوگ الترب
وين الحنين اليسوة دمعتي
طاح وبقت بس الغرب
------------------------------------------------
خايفة يموتون كلهم مايضل بالخيمة والي
غالي واحد كسر ظهري شلون اذا كلساع غالي
مرة ابجي اعله الچفوني ومرة اضل ابجي اعله حالي
الصبح كلنا سوية والعصر صيواني خالي

سالفة تجر سالفة وكلساع كسرة
وهاي كل لحظة اعلئ واحد بيها حسرة
ندري باليفگدلة واحد ماينام
جا شحال الفگدت بنص يوم عشرة

يحسين اجيتك گوم اعله حيلك
ماضلي واحد من هلي
ياهو الالزمة مذبوح اشوفه
واصرخ دخيلك ياعلي
--------------------------------------
ادري راح تموت كلها وادري محد يبقئ يمي
حسين اكبر همي انت ولو متت شيگضي همي
اني اسمي مدللتكم هسه اخت الماتوا  اسمي
من العطش نشفت لهاتي مدري المن يجري دمي

مدللة ووي الغرب يبن امي اسيرة
وي الخدم مجتوفة التصيحلها اميرة
بهيبة جنت امشي لان وياي اخوي
هسة لا خوان عدي ولا عشيرة

عگب الدلال اسكن خرابة
وسوط اعله متني بلا عفو
جانت عشيرة وكدامي تمشي
وصبح صباحي بلاية اخو

--------------------------------------
الگلب زالف من مچانة والوجع كل صوب احسة
وگالوا اليرتاح ينسة واني اذكرك لمن انسة
حيرة اوخرة من الحوافر مدري من جدم اليرفسة
ودمعي راهم ع جفوفك عگب جفك من يحسة

ويني ووين البچي وكسر الخواطر
شاردة النسوان واني لوحدي اناطر
صح مرة ومن هجمت الخيل اعله اخوي
خلصتها امدافع بنص الحوافر

ماريد اعاتب والچم دليلك
تعبانة اجيتك من البچي
لو تسمع اختك بس رد عليها
باقي بگلبها شگد حچي
---------------------------------------
علي حالوب العگيلي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

رايــته الـعــباس مـــاذباهـا
نــزل جــبرائيل وتــلـكَـاهـا
                     +-+-+-+-+-+-+-+-+
لو هووت للكَاع مايبقى بـشــر
تنكَلب كل الخلكَ مثــل الحجـر
الهلسبب جبريل بلعسكر حضر
من يساره أعله الجتف شالاها
                +-+-+-+-+-+-+-+-+-+
كَله ملك الموت بسمك يحترف
شوسبكَني أبسيفه أبوفاضل كلف
لايصــير أبالــك الرايــه تــرِف
صيـتـك السابع ســـمّا علاهــا
              +-+-+--+-+-+--+-+-+-
كَله ياجبريل تدري أبغايتي
أكَطع ألجفين وحفظ رايتي
ثلث ترباعه المعسكر حصتي
حتى بــيه أم الــخــدر تتباهــا
                    -+-+-+-+-+-+-+-
شافه شال السيف بسنونه أوغضب
تشب ناره أوجيشهم صاير حطب
كال أخلي أدمومهم فوكَ الركب
والجثث كون الدموم أغطاها
                    +-+-+-+-+-+-+-+
كَله أدري أبرايتك للحره ضلِ
لاتظن بجفوف غيرك تنحمل
بيهه كل هاي العشاير تفتصل
يخسر المايــفــتهم معــناهــا
                  +-+-+-+-+-+-+-+-+-+
صاح ياجبريل سلّمــهه أبعجــل
بيد أبوي المرتضى خير العمل
خبره بــيه أوكَله وفاه الاجــل
هاي ألــك يابوالـحسن وداهــا
                   +-+-+-+-+-+-+-+-+

   ✍️ فاخر علي الشبيبي

ادگول مو مسلم علي
چان بارض الكوفه
~
ابـو طـاهر يالتــريد أخباره
للسفاره حسين هو اخـتاره
رغم إبن ازيادهه وأخطاره
أرسل الطف كربلاء أنصاره

حَشَّد انصار ابعزم
للحرب ملهوفه
~
راح للكوفـــــه يــمهدله الـــدرب
ايجـــهز الناس ويـعلُمها الحـرب
والمثل مسلـم ابــــد ماينغــــلب
عمه حيدر بالحرب كلش صعـب

چانت اجيوش العده
توگع امن اتشوفه
~
حسين من خاطب الكوفه ومنطِقه
گالهم مسلم اخي ونعم الثقه
البايعه منكم يهل ناس ارتقه
وينطر اعلومه ابو اليمه بقه

بحر چان ولوزعل
ماتكظه اجروفه
~
اي وحگ سورة تبارك والضحه
الحومه داراها مثل دور الرحه
وبضربته شافو انجوم الضحه
صولته بالكوفه چانت واضِحه

وعلى الجيمه حملته
بالحرب معرفه
~
چنه حيدر من نزل للحومه
اتغيرت من طبّته المنظومه
هذا ابوطاهر الطيبه اعلومه
الگابلاه يعني تگرب يومه

على القوه امدربه
من زغرها اچفوفه
~
حيدر بشار الدراجي

‏مقطع صوتي من حيدر بشار الدراجي

هلا بمسلم ياهلا
هلا بمسلم ياهلا
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مسلم تحـــزم عليها وشـــــــــن عليها الغاره
ابـــــو ثار وماتنخــه بزلمه ياخـــــــــــذ ثاره
القصر والبالقصر ضلت خايفـــــــه ومحتاره
اليله ابن عــم الحسين اليله شــــــــد اوزاره
اليله كـــــل البالقصـر يتنخون
بلكي مسلم يتعب ويرتاحـون
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
غطت الكوفه بكبرها وطاح ثلمه مــن القصر
صارت الحيطان حمره من الذبـح ذاك العصر
شكثر ذابـــــح زلم مسلم محــد يعرف شكثر
مگبل مگابلها چان الغـــــدر بس لهل الغــــدر
الله حــــي البألحرب مايرتاح
تذري گام يذري مثل المرواح
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
ابــــن هاشـــم وال هاشـــــم تغلب وماتنغلب
الحرب كل ماگضت مسلم يرجــع يرد الحرب
الهوه راد يگطعه مسلم اشــوه اذا بس الدرب
حيله من حيل ابو فاضل والگلب نفس الگلب
ناس مسلم گالت وگالت ناس
هذا مــو مسلم الطب العباس
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الكوفــــه شبــت نار بيها ونار ابـــد ماتنطفي
وزلـــم مثـــــل الماي گامــت بشوارع تنچفي
تتعـــب وتكتفي الوادم هوه ابــــــد مايكتفي
المايموت يگول مسلم لبو الاكبر مـــــو وفي
خاف عابس گالو اعله مجنون
انه اكثـــــر منـــه يل ماتدرون
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
نزال المسلم
،، مصطفئ الصالحي

عبدالله مــوتك مو تتي
بالنبله ذبـحـوا ضحكتي
ياريت سـهمك من گرب
گـــبلك يـــــيمه برگبتي
عبدالله يمه
-----------------

ياريــت گبـلك يمه انه مذبوحه
شيبت عمرين الي بهل روحه
گلبي نـصـين انثلم من نوحه
من سمعت عطشان طلعت روحه

عبد الله بُعدك بي جرح
وياك اخــذ راسي برمح
ماأرهــــــــم انه بغيبتك
يل شوفتك نسمة بصبح

ليهسه شاغل صفنتي
بالنبله ذبحوا ضحكتي
عبدالله يمه
-----------------

من صار گبرك يمه يم الخيمه
كل ماأزوره بعيني تعثر غيمه
يل كبرتني وگلبي يوجع ظيمه
صار العمر لمن رحت جن هيمه

عبد الله يلجنك هوى
مناغاتك اذكرهن دوه
لمن رحـت من الگلب
بــنار فــــرگاك انجوه

المـهــد يـسمع ؤنتي
بالنبله ذبحوا ضحكتي
عبدالله يمه

------------------

ضليت ألولي اعله المهد كل ليله
كلـمااشــوفه الكلب يـنهد حيله
طلــعـت ثـوبـك رايـــده تلوليله
روحي لعفتهه بهل زمان ادخيله

مــن الســـهم گص رگبتك
ومن حمره صارت وجنتك
صـار الـهوى بنـص النفس
مـثل الـجــمر مــن فرگتك

ماجاك صوتي وصرختي
بالنبله ذبـحوا ضحكتي
عبدالله يمه

--------------------------

مات الورد لـمــن متـت وعيونك
يانسمة الله شمال الي يذبحونك
شمسوي يبـني وخاطر يكتلونك
وبلحظه اشوفن صار أحمر لونك

مـاكــفه نحرك للسهم
من شــفته دلالي انثلم
من شفته گاطع رگبتك
دلالـي والـبـيت أنهجم

وبعيوني ماتت دنيتي
بالنبله ذبحوا ضحكتي
عبدالله يمه

----------------

در الحليب أبغـيـبتك يوليدي
وذكرت ليل المضه وهز ايدي
ريت السهم گبلك گطعلي وريدي
عبد الله يگلادة حياتي ألجيدي

عبدالله مــن جــفنك غفه
حيلي وضوه عيوني انطفه
ومن گمت ألولي اعله المهد
أتـگـــطــــــع بـيد الجفه

وطفوو بموتك شمعتي
بالنبله ذبحوا ضحكتي
عبدالله يمه

---------------


الشاعر محمد البنداوي

لحن الكلام بقناة الشاعر محمد البنداوي

من الخيمة ركّضت للتل
أدورك ويــــــن ما أندل

بــس عطر امي بيك وهوى دلاني
مگطع بس احس دكول هذه اني

………………..

وعيــــــني هلبت تلمحك
ترد وبيدي اشــــد جرحك
بس شفت الشـمر يضحك
أثاري گاضي مـــــن ذبحك

صحت ويلي وعظم ظهري نكسر خوية
لطمت راسي وصحت وينك علــي بوية

تعال بعينك انت وشاهد اخواني
مگطع بس احس دكول هذه اني

………………..

لمحتك من خطف لونك
وباوع مـــــن يگطعونك
صـحت غمضهن عيونك
بطــــــــولي لا يعيرونك

نزلـــت اركــض ردت بيدي ألمنك
وردت أوصـــل واشبگنك وشمنك

ومدري اشلون حيلي شوية جاباني
مگطع بــس احس دكول هذه اني

………………..

عثرت جم مرة يم ابني
لجــن ياخويه ماهمني
يمهّ والشـــــمر طگني
ردت أوصـــل لليحبني

عفت عون الشلع گلبي وبقيت أنحب
ردت يمك اجـــي واسمع هله بزينب

يخويه وداعت أمـي الظيم أذاني
مگطع بس احس دكول هذه اني

………………..

احـس بأخـــــر النظرة
عليك بداعـــت الزهرة
تحاجيــــني والوو مرة
عليك ظلوعي متكسرة

وشفت راسك بعد راسي يضربونه
وظلع أمـــــــك يبو الأكبر يسبونه

حيل تغيرت مـــن شدت احزاني
مگطع بس احس دكول هذه اني
………………..


وشفت حافر سحگها إيدك
ونعت ياروحــــــي وتريدك
وصحـــت ياگلبي شيهيدك
يخويه ومـــن دمى وريدك

شلت دمــك أنه بإيدي وصحت يمه
ثمــــر گلبج طلــــع گلبه ونزل دمه

تعالي الوحدي يمه حسين خلاني
مگطع بـس احس دكول هذه اني

………………..

الشاعر محمد البنداوي

السلام على جبل آل محمد زينب

اليدفن احبابة ويرد ينجرح گد انفاسه
وظهره يحدب من وكت والشيب يلفي الراسه

وتموت العيون
لمـــن يرجعون

ــــــــ ❁ ❁ ❁ ــــــــ

الدافن احبابه بترب ينسى الفرح والراحة
يعيش العمر ها ماأجوا يوجعني گلبي نياحة

وكلــما يـــطلع صوره بليل
أحلامة ويـه دمــعاته أسيل
لــيدفـن احبابة يدفن الحيل
من نّذكر ابوي السحگته الخيل

يبقى الدمع مثل النبع يجري على الخد
باب الجفن كلما أحن ألگاء مينسد

وشيب الضنون
وتموت العيون

ــــــــ ❁ ❁ ❁ ــــــــ

ليش ألنحبهم من وكت وي الجرح عافونه
واحدنه مشتاگ شكثر والشوگ عامي عيونه

وشمابجينه أشيب الجروح
موتي بوراهم موتي يالروح
الفارگ احباب يعاشر النوح
ليش الـــنريدة رئسن يروح

هسه الگلب من الغرب صافن على الباب
وضل ينكسر ضل ينعصر من رحتوا يحباب

جـــاماتضلون
وتموت العيون

ــــــــ ❁ ❁ ❁ ــــــــ

الدافن ابو طول العمر يذكر اتراب الهله
ولمن يرد ها ياگلب بل يوجعنه ايگله

تــراب الگبر مابي محنه
مامــره حـــن ورد أهلنه
حسيــن بـي واليوجعنه
بگد التراب بصدره ؤنه

من الهظم شاب العظم وجروحي و العين
بگلبي جرح ليل وصبح يبجي اعله الحسين

محتار واشلون
وتموت العيون

ــــــــ ❁ ❁ ❁ ــــــــ

حسين بيدي بالگبر ياعمة من خليته
والحسره ضلت بالصدر عل عافه اخته وبيته

وياعمة لـــن حاجاني نحره
گـلالــي انا المكـسور ظهره
ليفدگ عضيدة يموت عمره
وتـنكـسر روحـة من يذكرى

اعله الگمر ظهرة أنكسر ومشيب الراس
حيلة أنهدم مثل الخيم و تشاهد الناس

المامنهّ بالكون
وتموت العيون

ــــــــ ❁ ❁ ❁ ــــــــ

ياعمة من شفت الصدر ممرود من الحافر
كلشي انتهى وذابل صبح جيتج بكسر الخاطر

وماگلت زينــب مــن الانياح
تكــسر الـخاطر يـم الرماح
انته الامل جوه الترب راح
من تمشي هسه تكض الاصفاح

عگب الأخو مات الدفو ومحتارة واشلون
والكافلي وداعت علي بغيابك ام عون

بــــيه يعيلون
وتموت العيون

ــــــــ ❁ ❁ ❁ ــــــــ

الشاعر محمد البنداوي

للأمام السجاد عليه السلام

لحن بقناة الشاعر محمد البنداوي

مولاي مسلم

شـجـاهـه الـنـاس ماتـقـبـل ..  تجاره
ودمـع عـيـنـه لـبـو الـيـمـه  ..  تجاره
تـاجــر خـوش وي ربــنــه  ..  تجاره

اشتره ابـدمـه رضـه الباري ونـبـيـه

                                        *---------------*---------------*

الـشـهـاده ابيوم گـصـدتـلـه .. مردهه
شـجــاع وطـلـگ الــدنـيــه  .. مردهه
لـچـن كـل روح بــحــزانــه  .. مردهه

رمـوه امـن الـقـصـر گـوم ال امـيـه

                                        *---------------*---------------*

✍خادم مسلم ابن عقيل (ع)
الشاعر رعد الجريخي

كل سنه وكل عام    اصغر الخدام
هيچي خليني اعله حالي
اصغر الخدام
֍֍֍֍
تضل دعـــواتي اسمي لا ترفعه
اريدن حالي  يبقالي اعله وضعه
مـــدام ابنيتي يابـــــو اليمه دمعه
اريد اصغــر اسم اسمي توضعه
يابو عبدالله   ما اريدن جاه
هاذي امنيتي يغالي
اصغر الخدام
֍֍֍֍
تضل هالخدمه بيها البخت والحض
يمن اسّـــودك ســــوه وجهي ابيض
يمن صدره ابحــوافرهم ترضرض
حنانك سيــدي اعلـــــــــــينه تفيض
خدمتك يحسين   دمعه وسط العين
علمت تبقه عيالي
اصغر الخدام
֍֍֍֍
محبتك بالگلب يحسين فطره
مُلك مـــاريد رايد اني نضره
فقير ابقه اريــــدن يبو العتره
اعرفنك تحـــــب وادم الفقره
هيچي ابقه اوياك   ابكل مكان الگاك
هالاسم كلش حلالي
اصغر الخدام
֍֍֍֍
منو مثلك يقــــــــدر الي يخدمه
خدمتك نعمــــة الله واحلى نعمه
طعم بيها الي يصبح خادم اسمه
وهنيئاً للذي صــــــــدره يلـطمه
شكراً وممنون   چي صرت مجنون
كون ابقالك موالي
اصغر الخدام
֍֍֍֍
يالمغرّگني مـــن خيــرك وزايد
يمن صيتي يضل بسمك الماجد
غيرڪ مانطــــاني قيمه واحد
ممنونڪ بعــــد ڪلشي مرايد
ابقه يمك كون   خادم اصغيرون
انقبل يبقه سؤالي
اصغر الخدام
֍֍֍֍
إمام الخادم اتصـير وصديقه
اريد اتعاهد واڪـــتب وثيقه
اريد ابني على نهجك طريقه
لأن كلها چذب وانت الحقيقه
علمتني اعليك   وليه طيت ايديك
وآنه ابقالك يغالي
اصغر الخدام
♦️♦️♦️♦️♦️♦️♦️♦️♦️♦️♦️♦️♦️♦️
وليد المندلاوي
 

الرساله الاخيره من مسلم ابن عقيل الى الحسين بن علي (عليهم السلام ) أما بعد.....

البذره طاهر لو تدفنه يصارع التربه ويگوم
وناس ما دركت أملها بحجة عبادتها نوم
فرق بالمكفاهم انطوا واليدكون الصدور
تنوخ بيا هيمة ركبك والعطش فوكك يحوم

مهضوم...... كل فكري يمك مولاي
مهضوم.... وتريض امشي اعله هداي
مهضوم.... بلكي الله ويعدي الموت
مهضوم....ويم راسك الرايه فياي

شأرد اخبرك
خطوه خطوه الموت يدنه اعله نحرك
وع الشريعه ينذبح ضمام سرك
وادري بيها الغربه تاخذ من حنينك
الماي ينفذ لجن فايض يبقه صبرك
.....................................................
تلكة وادم كلشي تملك لجن ما تملك ضمير
واليعجبه ريش جنحه هذا للذه اسير
سيدي خوفي اعله ضعنك من تجي وما تلكة في
تلكة نحري اعله الترابه هنانه بيمن تستجير

محتار..... البيه سده يجري وياك
محتار........ جا بيمن تسنده گفاك
محتار....... والقلق شت بالي هواي
محتار.... من تطلب وما مش هاك

دمي ديه
ويا ضجيج أفكاري ماخذ كلشي بيه
ليش احس كبالك خيول اعوجيه
والتوتر يطرق أبواب المتاهه
حبال تتراوالي بيد الهاشميه
............................................................
هو مو كلشي يتكاود مگاود الفانوس امان
انجان ما شعلوا جذبهم منين اجه هذا الدخان
عقروا الناگة الجبتها الامس كالولي تعال
قله تلكة امرك تطيعه  الوعد لعق اعله اللسان

مجهول.... ع السجه ما شفت اثار
مجهول.... من يا حطب هاي النار
مجهول... الجيش انذبح دون سيوف
مجهول..... ثاري الذبحهم دينار

لسه خايف
وانفت كل الرسايل بالمواقف
ما اكو مدت ايد من هاي الطوايف
هنانه طلعت عين أحكام البغيه
للأماره تباً وتحيا الصرايف
....................................................
طبع النفوس الدنيئه تنكر الفضل الجميل
واليعبدون الله كثرة واليطيعونه قليل
المصحف المحد يفتحه يصير رزق العنكبوت
مسلم اهنا وحده حاير لحيرتك هذا  دليل

مولاي....... ناس افتحت باب الريح
مولاي...... وسدوا اذنهم شتصيح
مولاي..... انته اعرف بحق الدين
مولاي..... وحجيك على العله يطيح

لا تسافر.....
أصعب من الموت يا كسر الخواطر
هنانه وحدك باجر يخلوك حاير
تلتفت مره يمينك مره لشمال
كلها عنك تبتعد واليدنه حافر
..........................................................
هنانه تلكاها الخناجر ماخذه دور السيوف
سيدي والأعمة رأيه بمنحرك تلكاه يشوف
وادم مضيعة الحقيقه وللغنيمة هنانه دور
الغنم كالوا ذيب أكلها ودوروا للحجه صوف

أسرار.......... ياهو اليأدي التكليف
أسرار........ والرغبة الدنيا يعيف
أسرار..... محد مشه بأمر الله
أسرار......... يمشون بأمر التخويف

يا خساره...
الباع دينه يشتري حكم الاماره
وينفي كلشي ويتبع رأيه وقراره
ثاري اليطيح اعله حبك يبقه شامخ
لجن تدري بحسره المتروك ثاره
.................................................

مرتضى عامر الشمري

(سيدي يامسلم)

يبن عمي افتقدناك
ولا لحظه نسيـناك
وي حسين ردنـــاك
يمسلم.. يمسلم
~
اليطيح ابضيج يبقه ايدير بعيونه
يتاني اخوانه وكت الشده يلفونــه
يـزيـحــون الكدر عنـه ويسنـدونـه
والمـثلك الهاي الساعه يـردونــــــه
آنــه ام الخدر هاي
اريدك توكف وياي
غيمه وجايب الماي
يمسلم .. يمسلم
~
يبو طاهر ابن عمك عله اونينه
لاناصر بقه لحــسين ويـعيـنـــه
حـــلم واتعود يامـسلم تــمنـينه
ومثل كفالي كونك تكفل اسكينه
تكفلهه أمن الاعيون
تحامي عن الامتون
وإتكوم اليعثـــــرون
يمسلم.. يمسلم

~
عوف الكوفه واگصد كربله ويانه
سمعنه اخبار بيها اهواي خوانـــه
وي عبـاس اريـدك تـــــرفع الوانه
الاخـو مـحـد يسد فيـه ولمچانــه
تعال الناس موناس
تعال وارفــع الراس
اريدك ثــاني عباس
يمسلم. . يمسلم
~
انت الما تقصر ساعــــة الشـــده
اريدك هسه بالطف حيدر اتقلده
تسكت شامتـي والعايـل اتــرده
وبـرگاب الاعادي سيفك تحــــده
حلم عايش بالاعيون
ترد من السفر كـــــون
وتكص چف اليعيلون
يمسلم .. يمسلم
~
يبـــو طاهر اخوتك عالرمل نــــومه
وابو السجــاد وسفه سِلبو اهدومـه
وگطعو خنصره والخاتم ايــــسومه
ظهر عاشر محرم شفت أنه انجومه
ولـو ماتـــــرد هيـهـات
وبعيوني الحچي مات
عشت ساعات مُرات
يمسلم .. يمسلم
~
حيدر بشار الدراجي
1446