قصيدة طور اهوازي بحق علي الاكبر عليه السلام


يالاكبر وداعك موت.. اودعك گوة تدريني

هذا اخر وداع وياك.. اشمك بوية خليني

وا ويلي اويلاه وا ويلي اويلاه

======================

صعب تدري الوداع اشلون.. يا بوية اودعنك

هد حيلي يالاكبر حيل.. وضعك وانة اشمنك

على خدودك نزل نهران.. دمعك بوية اشوفنك

الموت بطريجة تفوت.. ما يگطعلك ونيني

وا ويلي اويلاه وا ويلي اويلاه

========================

تريد الماي بوية منين .. يالغالي اجيبنة

كَلبي من العطش نيران .. يلهب بوية احسنة

مثل جمر الغضا تلگاه .. لا يمكن احر منة

تحمل جدك متانيك .. واصبر يا بعد عيني

وا ويلي اويلاه وا ويلي اويلاه

=======================

تريد اتروح الله وياك.. روحي بروحتك تطلع

يصوبني بدليلي جفاك.. وعيني تسچب المدمع

تتوذر وذر بالسيف .. واشوفن جسمك مگطع

تناديني وجيك اشلون.. اصيح وما تحاچيني

وا ويلي اويلاه وا ويلي اويلاه

========================

يا سيف اليصيبك گام.. گلبي يالولد ينصاب

گمت اتعثر ابممشاي.. عن عيني جمالك غاب

على الدنيا العفا بجفاك.. يالغالي دليلي ذاب

انضرلك جسد مطروح.. يمة اتبدن سنيني

وا ويلي اويلاه وا ويلي اويلاه

=======================

فجعني يا عزيزي اليوم.. دهري وخابت ظنوني

عني من رحت وياك.. خذتهن مني عيوني

اشيلك وارجع انة اشلون.. ميتة بفگدك متوني

امك تنتطر بالدار... كل ساعة تناديني

وا ويلي اويلاه وا ويلي اويلاه

***

اسالكم الدعاء رائد  الاسدي

#_قصيدة_لعلي_الاكبر منهاج محرم 1447 هـ 2025 م


عمت عيني عليك يا ضي عيني
ضلمة صارت من مشيت سنيني
===================
انة اريدك يالولد يايمة گوم
موش يحلالك يالمدلل النوم
العساكر عالخيم گامت تحوم
لا تطول نومتك حاچيني
====================
اليروح اوليدها ايصيب الگلب
وما تبطل اعيونها مدمع تصب
راح مني الاكبر بديرت غرب
ماي وتبدة وفلا يلفيني
===================
للحزن والنوح عفت امك علي
يا بعد روحي يبعد انة وهلي
يبني لو ماجيت يفرح عاذلي
كون وياك وسوة موذريني
===================
آه يا فگد الولد مالة مثيل
لون اعمي العين بغيابك قليل
حزنك اعله الروح يالغالي ثجيل
للگبر حزنك ترة ايوديني
======================
لحسرتي بفرگاك ما ينفع صبر
من رحت بجفاك ما يسوة العمر
بالگلب فرگاك تسعر چن جمر
صبت گلبي وروحتك تاذيني
======================
الحزن بجفاك ما يبرد ابد
وثوبي الاسود ما اذبنة بعد
يا علي يبني ترة گلبي انمرد
ما حسبت اتروح وتخليني
=====================
أسالكم الدعاء رائد الاسدي

قصيدة بحق علي الاكبر عليه السلام


انخاك يارب العــــــرش يعالي
ياربي رد الغالي لجل الغالي
بجاه الحُسين اتوسل   يارب دعائي أتقبل
__
الچان الهوة الاتنفـسه  وشايلتة بصبي عيني
بالطف يبس عودة وذبل  شوفة علي تاذيني
فراكَ الولد نار بحطب  ابنص الكَلب تچويني
يالرايح لكَطع النحر   شبكَة وداع اطيني
لله بحبيبة اتوجهت نخيـتة
سالم علي الاكبر يـــرد لبيتة
اعله ابني دليلي اتزلزل   يارب دعائي أتقبل
___
ياكَلبي اصـــبر والصبر   مُر وتجـرع مُـرة
لـبني بخيالي تنـرسم  اجمل صور للعشرة
تاذيني لو حن الكَلب   هلبت اموت بحسرة
شيبني توديعي لعلي   وجرح البكَلبي شكبرة
ام التودع للـمات ابـــــــنها
تنلف يكون ابطلعتة ابچفنها
ابموتي اللاهي اتعجل    يارب دعائي أتقبل
__
امك واطلبك بالربه   وسهر الليالي وتعبي
طول وداعك يالـولد   ما دامك انته بكَربي
اترس عيوني بشوفتك   واتـــوجه ادعي لربي
ياربي بوليدي اللطف ارحمني وارحم كَلبي
مكــــسور كَلبي وخاطري يـــــيمة
كل ساعه نحرك اختنكَ واشمة
ما عندي لغيابك حل   يارب دعائي أتقبل
___
يالرجعت شمس الضهر  هذا ابنك اصفر لونة
يابس لسانة من العطش  وهد الحديد امتونة
ردلي علي بجاهك علي  شمسي واموت بدونة
لاحت علامات الهجر  يمشي ويدير عيونة
لب الكَلب عني مـــــشة لمنية
خاف الولد يتفرهد من ادية
شلون لغيابة اتحمل   يارب دعائي أتقبل
_
شمعة حياتي شاهدت   بريح القدر مطفــية
انظر للحسين اختلف   وجهة ويصد اعلية
شيصبرة كَلب الـوالدة    افرك كَمت بيدية
تييه طريــجة والدك    من سمع الحكَ لية
ايكَوم ويطيح وماعرف طريجة
لوما الشماتة چا يـــشكَة زيـــجة
ثوبة ابدموعة اتبلل    يارب دعائي أتقبل
_
ماي وتبدة اعله الترب  راح الولد من ايدي
رد محني الحسين الظهر   وينادي بوية وليدي
جدامي اشوفن جثتك   ياروحي لا لتهيدي
تشبع هوة ما لحكَت   صار الحزن ترديدي
جـدامي اشوفن جثتك خظــــيبة
ايموت بحزن كون المشة حبيبة
موتي ويأبني اتأمل     يارب دعائي أتقبل
_
أسالكم الدعاء رائد الاسدي

قصيدة بحق علي الاكبر عليه السلام


مايعرفونة     يجدح شرار
مايعرفونة     تاه القــــــــــرار
علي هــــذا      لو علي الطباها
-------------------------------------------
مادرة الجيــــش وتحير    ياهو من عدهم حمل
حيــــدر الكــــــــرار هــــــــذا    لو علــــــــــي الاكبر نزل
ماجت الطــــفت باهلهة    بطل ظل يــردم بطل
من نزل لــــــيهم كلبــــــها     وفعل بيهم مافعــــــل
من تعلاها        سوح القتال
من تعلاها        بچــة الرجال
علي هذا          لو علي الطباها
-----------------------------------------------------
شرجــــــعة حيدر علينا    موش ميت من زمن
والنــــــجف عنا بعيــــدة    وبكبر بيــها اندفــــــــن
من بعيد الصوت نادة     انة الاكبــــر للمحــــــن
علي وابن حسين انة      للــــــــــعدو بيــــها علن
ارتجز بيها         ابــن الحــــــسين
ارتجز بيها         اعلى الظالمين
علي هــــذا         لو علي الطباها
-------------------------------------------------
من عــــــلي الكــــــــرار زودة  فارس ابوكت الحرب
فقــــــــط كــــــــــــرار ويــلاكي  ما يفــــــــــــر او ينغــــــلب
مايحط درع اعلى صدرة   اوكت الملاكةصعب
ما يخــــــــــاف من المنيــــــــة    صامد وميـــــت كلب
شافة جدامة        خاف الشمر
شافة جدامة        صاح ابذعر
علــــــــي هــــذا        لو علي الطباها
----------------------------------------------------
يكلب الجيــــــش بحملـــتة الميمنة اعلى الميسرة
تســــــــمع صيـــــاح العســاكر   شردوا جاكم حيدرة
الجيش خل يكشف عورتة  ماكو بالطف مغفرة
ودوا لبــــــــن زياد طــــــارش  ما نحارب معــــــــذرة
لا تلاكونة        يشطر شطر
لا تلاكونة        ويــــن المفــر
علي هــــذا       لو علي الطباها
-----------------------------------------------------
من علي ماخذ صفاتة     وبالحرب منة شبه
زلزل الجيش وتبختر      ظل يراقب منتبــــه
سدها ابواب القــــــتال      اوين صاحوا نتجه
منين ما تشرد جنودة      لا كتة وجه ابوجه
كلمن ايشوفة        ظل يرتجف
كلمن ايشوفة        يشرد زحف
عــــلي هــــــــذا          لو علي الطباها
---------------------------------------------------
تفتــــــــر عليه العســــــاكر       وهوة واكف بالوسط
ادور المــــــشــراد منــــــــــة        ايمين بيسار انخبط
ياهو متعني اعلى موتة     خل يجيني لو زمط
ابموقفة ويالجيش خلة    فوك الحــــروف النقط
يزمخ عليها        غيض وزعل
يزمخ عليها        حــل الاجــــل
علــــي هــــذا         لو علي الطباها
----------------------------------------------------
أسالكم الدعاء رائد الاسدي

قصيدة شور بحق علي الأكبر عليه السلام



ابيوم الودعـــــتني يمة يمة
ابنص گلبي صبتني يمة يمة
آه يالاكبر آه يالاكبر آه يالاكبر آه
----------------------------------
من طبيت للخيمة أبأخـــــــــــــــير وداع
ماظليت اشوفـــــــــــك شو مشيت بساع
صفكَت ايد اعلى ايد وصحت الاكبر ضاع
ودمـــوعي اعله خــــدي وتنثر اعله الكَاع
من رحت وعفــــتني يمة يمة
ابنص كَلبي صبتني يمة يمة
آه يالاكبر آه يالاكبر آه يالاكبر آه
-----------------------------------
بعد ما شوف طـــــــولك يا نـظر عيني
وصوتك ما اسمـــــــعة وما تحاچـيـني
ياهو ايصــــــــيحلي يمة ويناديــــــني
فدوة وياك اخـــــــــذني ولاتخلـــــيني
رحت وماخذتــــني يمة يمة
ابنص كَلبي صبتني يمة يمة
آه يالاكبر آه يالاكبر آه يالاكبر آه
---------------------------------
من شــــفت يـــيمة للخـــــيم رديت
حمدت الله وشـــكرتة يبني وصليت
يظل سالم واشـوفة يا الاهي ادعيت
تودعني وترد يولـــــــــيدي ماظنيت
والله شيبـــــــتني يمة يمة
ابنص كَلبي صبتني يمة يمة
آه يالاكبر آه يالاكبر آه يالاكبر آه
------------------------------------
روحت موت چنـــــــها گلبي ايگلي
ولو مني رحت چا بالعـــــــمر شلي
من بعدك يالاكبر ياهو ايظــــــــلي
چم لچمة ابدليلي وداعك ايخـــلي
ابحــــچيك محنتني يمة يمة
ابنص كَلبي صبتني يمة يمة
آه يالاكبر آه يالاكبر آه يالاكبر آه
-----------------------------------
شو رديت لية اعلى المــتن مشيول
ومدد اشوفك يبني ومچـــــــــــتول
وياك اتمددت يوليـــدي طول بطول
منك ما شبـــــــــعت وداع يا مدلول
ابموتك موتتـــــــني يمة يمة
ابنص كَلبي صبتني يمة يمة
آه يالاكبر آه يالاكبر آه يالاكبر آه
=======================
أسألكم الدعاء رائد الاسدي

نزال بحق علي الأكبر


ياعلي يبني ترة كَلبي انمرد
هذا اخير وداع ماشوفك بعد
---------------------------------------------
بوية خلي وداعنة كلش طـويل
وخل تفيض الكَاع من دمعي اليسيل
راح عني تروح يالمـــالك مثــيل
يالچنت بوية الي ذخــــر وسند
-------------------------------------------------
عيني تـــبرالك على طول الدرب
اشلون للمــــــــيدان تنزل للحرب
بوية دمع العــــــين مابطل يصب
وحيل ادكَ صدري بعد راح الولد
-----------------------------------------------
بوية خذت الكَلب وياك ومشــــيت
شلون اصبر الروح لو عني بطيت
شــرد اكَل لمـك يبوية تحـــــيريت
چنة طولك يبـني بالحومة انفــــكَد
------------------------------------------------
وياك فوكَ الكَاع يوليدي نمـــــت َ
بوية عالدنيا العفا بعدك صــحت
تنتظر بالخيمة يبني امك بقـــــت
كَــــوم رد وياي ماعـــــدهة احد
-----------َ --------------------------
من ارد لمك شكَلها اعله الجرة
ونارك ابنــــص الكَلب متوجرة
سالم اترد الهة بويـــــــة ناطرة
طاح من الخيمة ياليــــــله العمد
-----------------------------------
نايم اعله الكَاع مـتوسد التراب
فتت افوادي يبــــوية هالمصاب
يا الف ياحيف طوك عني غاب
حزنـــــك بــــدلالي باقي للابـــد
-----------------------------------
بوية عد راســـك تفك عينك يحيد
فوكَ طعن الســيف هم ثكَل الحديد
رحت يابوية وتخلـــــــــيني وحيد
فراكَك من الموت بوية اعظم واشد
---------------------------------------------
يا ثمر عــــمري يســـــباح الكَلب
بمرمرتني وظلــت دموعي تصب
عمري بس ساعات بعدك ينحسب
ونــــــلتقي يم الجـــــــليل وننسـعد
-----------------------------------
أسألكم الدعاء رائد الاسدي

قصيدة بحق علي الاكبر عن الامام الحسين عليهما السلام


كَلبي صاح بصوت بوية
چنها روحة موت بوية
بوية اكثر عذبتني من مشيت اودعتني
---------------------------------------------------
ودعتك وادري اتخلــــيني وللموت اتروح
يوليدي اشكَد صاح خلافك كَلبي المجروح
يابوية اخذ الروح وامــشي مــااريد الروح
يالاكبر رايح ماترجـــــــع بالطف مذبوح
من شبكَت عليك بوية
كَلبي حسب بيك بوية
وبوداعك حيرتني من مشيت اودعتني
---------------------------------------------------
احسب يابوية بخطواتك وكل لحظة اتفوت
من تبعد عني ابكل خطوة تـكَرب للموت
يوليدي وهاي آخر نضرة وهذا اخر صوت
احذر من تنزل ميدانـك جيــش الطاغوت
كَلبي يلهب نار بوية
ايحسب ومحتار بوية
للمنية سلمتني من مشيت اودعتني
---------------------------------------------------
اتكَطع من ودعتك كَـلبــي اظلمت دنياي
من طولك ماشبعت عــيني يا ظي عيناي
ما اندل دربي من اسمعتك تـــيهت الراي
اتعثر نوبة ونوبة انهـــض ولصـوبـك جاي
كَلبي فر وصاح بوية
مني الاكبر راح بوية
يبني كلش مرمرتني من مشيت اودعتني
---------------------------------------------------
ارد امتد عالغبرة وانحب وي طولك طول
لحظات وانتة امودعنــي ما عندي حلول
دور ايدك واحظني ابلهفة و وداعي ايطول
كَمت اتراجف لمن شفت يبني ومذهــول
حالك اصعب حال بوية
للگلـــــب چـــــتال بوية
بنص دليلي صوبتني من مشيت اودعتني
---------------------------------------------------
فك عينك يبني وحاچيني جرحك ماذيك
لو اگدر ظمـــدتة ابروحي ويهود عليك
كون ابايدي ايصح يوليدي بالعمر اشـريك
مترد شو بجوابي اعلية امدد رجليك
لاتغمض العين بوية
انة ابوك حسين بوية
من رحت شو ماخذتني من مشيت اودعتني
---------------------------------------------------
من ارجع لمـــــك شخبرها بالخيمة هناك
وعيون لصوبك مشــبوحة طول فرگاك
وتدري اشكَد يصعب يوليدي لو ما تلگاك
شلون ارجع وانت ابهالحالة مغمض عيناك
ما شبعت اوداع بوية
لا ترحل بساع بوية
وبسكتك محنتني من مشيت اودعتني
--------------------------------------------------
أسألكم الدعاء رائد الاسدي

نزله للامام علي الأكبر


وين وين * هلزلم منواها
صال صال  *علي يشبه طه
…………… 
وَدّع أمه الأكبر أوشد حيله
گال اشوفي ابنچ زعل ياليله
هاشمي اوما يسكت اعله العيله
موت موت * من هجم سواها 
… .…………………… 
صعد علمهره اوتعنه ابزوده
گال اخلي اوجوه بالطف سوده
تلمع ابين السيوف ازنوده
نار نار * تلتهب خلاها
         … .…………………… 
علي الأكبر نار والعسكر حطب
من أجاهم ضنو الكون انگلب
مثل حامي الجار لوصال اوغضب
ليل ليل من * نزل غطاها
… .…………………… 
نزل من المهر والسيف ارتعش
حيد بس ياحيد عمره اربع طعش
ما يخاف امن القتال أولاعطش
گام گام * للنهر رداها 
………………… 
وَدّعه الوالد اودگ اعلئ الچتف 
گله اعرفك ياعلي الأكبر كلف
جاب راس الفارس الينعد بالف
گال گال ليه * خل تتباها
… .…………………… 
ليله صاحت هلأ ببني أوهلهلت
هاي ساعتهه يبعد امك حلت
يبني شفت الرايه بچفوفك علت
راح راح * لَمه وتلگاها
… .…………………… 
للشاعر فاخر علي الشبيبي

بناتي بناتي باجر بيهن اشلون
خواتي خواتي راح اتروح المتون
حيرتهن جبيره ما عدهن عشيره
**
حاير ما نمت ليلي بناتي تحيرت بيهن
يروحن وين اذا باجر الخيم يحترگن عليهن
تجلب بيهن النيران وما واحد يطفيهن
وباجر من يجي السلاب ياهو بعدي يحميهن

مصيبه مصيبه يرحن لو متت وين
غريبه غريبه تصرخ زينب حسين
باجر والله حيره ما عدهن عشيره
**
بناتي ازغار ما يدرن من بعدي يشوفن ويل
حر نار وحبل وسياط وجروح وعذاب وخيل
تعبانات عطشانات وبيهن ما يظل كل حيل
وين وخيمه ماعدهن ينامن من يصير الليل

يتامه يتامه وبيهن زينب تحير
علامه علامه حزنهن واختي شتصير
وحدتهن اسيره ما عدهن عشيره
**
وراهن باجر شگد ضيم وكل وحده جرح بيها
هاي امتونها ايروحن وهذيج احبال بيديها
وهاي عله الجمر تركض ومحترگات رجليها
ورقيه راح اذنها اتروح لو سلبو تراجيها

رقيه رقيه من المها اتگوم وتطيح
أديه أديه بويه احترگن اتصيح
هيه اشگد زغيره ما عدهن عشيره
**
بناتي مدللات اشلون باجر راح يسبوهن
وما بين الزلم والخيل راح اشگد يوگفوهن
ويظلون العده بالسوط يمشوهن يگعدوهن
ما متعودات شلون عالهزل يصعدوهن

سبايه سبايه يمشن راح للشام
ضمايه ضمايه وكلها اجروح وآلام
وحدتهن اميره ما عدهن عشيره
*****
يلعبن بالخيم وشلون راح الليله اودعهن
ما يدرن شمر باجر بسوطه اشگد يلوعهن
يضربهن وبويه حسين متنه ايصيحن اسمعهن
يركضن بس ركض اطفال وعالخد يجري مدمعهن

صحتهن صحتهن بناتي وتجري عيناي
ردتهن ردتهن يجن واشبگهن اهواي
يا شمس الظهيره ما عدهن عشيره
*
الخواتي والبناتي انظر شلون بحالهن مدري
باجر من يشوفني الشمر صاعد عله صدري
لازم لحيتي بيده وبسيفه يحز نحري
ويرفع عالرمح راسي ودمي من النحر يجري

تنظره تنظره زينب نحري مگطوع
يكسره يكسره گلبها وراسي مرفوع
ناظرها تديره ما عدهن عشيره
**
تمت
ميثم العمري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

شال الأكبر سيفه
وخذ منهم حيفه
هلهلي ياليله
هلهلي ياليله

نزل يشبه طاها 
رايته العلاها
أمه بيه تتياها
خيلهم رداها
ماتشيله أكّحيله
هلهلي ياليله

يازلم تـدناله
هـجـت الجمّاله
سبكَت الخياله
والحرب يحلاله
واليمر ياويله
هلهلي ياليله

من يشمر أزنوده
علي يحجي أبزوده
واليمر بحدوده
داره تصبح سوده
مارضه أعله العيله
هلهلي ياليله
كل ركَبهم ضيفه

كلهه تغرف يومه
مثل حيدريومه
كَمر بين أنجومه
راس فارس كَومه
عله جتفه أيشيله
هلهلي ياليله

خافو أمن أعيونه
ماتخيب أضنونه
حيدره أيسمونه
منهو يوكَف دونه
جده حامي أدخيله
هلهلي ياليله

للشاعر فاخر علي الشبيبي

‎مات العلي الاكبر حلم بعيوني يا ليل
‎اتـنطر اباب الخيم والـمدمع ايسيـل

‎شـيـهّود التـفـگـد ولـد
‎ضلتچ يروحي المن بعد
————————
‎يلوجهك امحلي الصبح — مو للذبح - تتركني وتروح

‎شمّيتك وگلــبي انمرد — مات الورد -
‎وامترس اجروح

‎عايفني طير ابلا غضن — امـك تـحن -
‎رد سكت النوح

‎بمچانك اشتم العطر — يسوه العمر -
‎يمعذب الروح

‎ماتت أماني بروحـتـك واتـوزع الشـيـب
‎يا جرحك ابنص الگلب شنحطله ويطيب

‎لا يـهـده يـمـه ولا بــرد
‎ضلتچ يروحي المن بعد
————————1
‎بشفافي يتبده الحچي - بطعم البچي -
‎يوليدي حنيت

‎بالمعركه وجسمك ذبل — طعنه وخجل -
‎بس جثه رديت

‎متـحـني دم جابـوك الي - يـمـه عـلي -
‎اتحاچيني ياريت

‎يـوليـدي يا فيّ الخـيم - شلـتـك علم -
‎بچـفـوفي رفيت

‎هـلـيـله ليلى فاگده وامحـملـه اعتاب
‎يشبه رسول الله علي بعده الولد شاب

‎يا يمه چا ويـن الـوعـد
‎ضلتچ يروحي المن بعد
————————2
‎يا بعد العيون العمت - لمن رحت -
‎عذبني فرگاك

‎مو چنه نتسامر سوه - ريــه وهــوه -
‎يا محلى ملگاك

‎حسبتك اتردلي عدل - ما تـنـقــتـل -
‎وانرد انه وياك

‎شو غافي ومخضب دمه - ولون السمه -
‎اضلم بلياك

‎يا ضيـمـها التـفـگد ولد هيهات ترتاح
‎شتـأمـل بـهـذا العـمر وابـني علي راح

‎متــعذبة وحـيـلـي رگد
‎ضلتچ يروحي المن بعد
————————3
‎اليشـبه محمد بالواصف - ما ينعرف -
‎راجـع الـيـه

‎ويـن الجمال الـيـوسفي - يـمـه علي -
‎شسويت بيه

‎صاعد على عيوني الوجع - گلبي انشلع -
‎بالغاضريه

‎ماتـت امـاني بـروحـتك - محـتـاجتك -
‎تلزم اديه

‎تـرضـاها باجـر يا عـلي امشي سبيه
‎تـتركني ما بـين الغرب مچتوفه اديه

‎والحادي لو بينه استعد
‎ضلتچ يروحي المن بعد
————————4
‎بيش انتخي بليل اهدعش- وطاري العطش -
‎بالسان اليتام

‎يمه علي بسمك صحت - ما ضل وكت -
‎واتموت الحلام

‎مـنـك اروح ونـفــتـرگ - يگضي العشگ-
‎تفرقنا ليمام

‎كل واحد يروح ابدرب - اكبر صعب -
‎من ادخل الشام

‎يا ليل المسامر گضه وي روحتك راح
‎والحادي باچر يا عـلي ما يرضه نرتاح

‎عـالنـاگه من بالـد البلد
‎ضلتچ يروحي المن بعد
————————5

✍️عقيل زيدان الفريجي

‎#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

راح وكسر ضهري وخاطـري وگلبي
راح وحرت بعــده وضيـعت دربي

البلخمسين عمره    هذا  شلــون يعثر
مو مال اركض اني     بس ركضني الأكبر 


***

رايح راد مشــدوه انتــــظرتـه
ومن هالروحه مايرجع عرفته
صاح وكمت أحس الشيب أخذني
بركض مو مال عمري من گصدته


اركض واعثر    طاح الاكبر    مالمها البر    روحي
كسرة ضهري  غصة صدري   شصاير مدري         روحي


طاح  البي اشـــدن حـــيلي واحــزامي
الزلم والخيل اشوف تسحگه گدامي

من اسمعت صوته   احس گلبي تفطر
مو مال اركض اني    بس ركضني الأكبر 

**

طيحت  علي الاكبر كبرت تعبي
ومن هالطيحه كل شلعان گلبي
واگف من سمعت ادركني صاحالي
غواش ابعيني صار وتيهت دربي

تذكرت امي *من صاح اسمي * تغير رسمي * هوايه
طلعت روحي *وسمعو نوحي * عله ابني جروحي هوايه


شي بالسيف شي با رماح مطعون
و كتلنالك علي الاكبر يصيحون

مات وليد گلبي    الدنيا براسي تفتر
مو مال اركض اني.  بس ركضتي الكبر
**

ركض من اعتنيت ادموعي غلبني
صح خطوات بس الموت راوني
امشي وخيل اشوف يسحگن بصدره
وگلبي ايصيح  عوفنه واسحگني

بجدمي الضايع * رايح راجع * ابني واگع ** گبالي
طعنه بصدره * عبرت ضهره * خلص عمره * گبالي


مــشيب  لكن اركــض خايف وحايــر
چبير حســـين صاير عرضــه للحافر


بس لمن وصلته  ** شفت الاكبر ازغر
مو مال اركض  اني    بس ركضني الأكبر 

**

ساكت ماحـــجيت وكاتم نياحي
بس ابداخلي  شلون اكتم اصياحي
طاح وايدي لزمت گلبي لا موت
وايدي الثانيه امخليها بصفاحي


*  اركض جيته  * ما حجيته  * بس لميته *  بيدي 
  بحضني ويوكع * مايتجمع * روحه التطلع * بيدي


ورجعت  على المــخيم جايبه اجنازه
اوليدي  البيدي ميت حيـل معتازه


رجعت عله المخيم     صاير وجهي اصفر
مو مال اركض اني     بس ركضني الأكبر 

**

هويت اعليه شاب ومن كمت شايب
الاكــبر مـات بس اميه ماشــــارب
بيش ارجع لزينب تنتظرنه نعود
حيره عله المخيم ارجع اشجايب


و الشيبني *  والعذبني  بجروح ابني  راجع
بحيرة روحي  * بحزني ونوحي  * بهاي جروحي * راجع


اخت وتشوف اخوها  من رجع مايل
فــهمتني وبـــعدني احجايه ما گايل


يزينب يختي الحگي    بعد ع الممشه مگدر

مو مال اركض اني    بس ركضني الأكبر
 
**

الحمد لله شكرا لله
خالد عبد الساده البديري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

نعي مفجع
الحسين(ع) يرجع بعلي الأكبر ع
للمخيم ويخاطب السيدة زينب (ع)


زيـنـب يـخــويــه اظـلــم الــكـون
ابـعـيني وتـهـل دمـعـات الـعـيـون
جـبـتـه واجـيـتـچ لاچـن اشـلــون
مــاچـن عــلــي مـتـغـيّـــر الـلـون


ظـهـري انـكـسـر يـخـتـي تـعـالـي
غــالـي الــولــد تــدريــن غــالــي
الأكـبـر مــشــه وألـهــم بـقــالــي
وأنظـر على ايـمـيـنـي وشـمـالـي


هـذا الـعــزيــز الــجــبــتــه ويـاي
دامـي اشــوفــه اگـبــال عـيـنـاي
بــيّــه يـزيــنـب شـمـتـت اعـداي
ظهري انـحـنـه ونـگـطـع رجـواي

                                        *---------------*---------------*

✍خادم الحسين (ع)
الشاعر رعد الجريخي

ابو ذيات بحق علي الاكبر(( ع))


الدهر يم الاعادي بحـــــــزن .. يبني
خلص صبري و صدك  مليت .. يبني
ردت چـفــك عـلــيــه گــبــر .. يبني

و  تـجـازي اربـاي سـاعـات  الـمـنـيـه

*------------------*------------------*

يالاكبر  رخصت دمعي .. وياريت
وقست دنياي بغيابــك .. وياريت
كبل موتك ردت  موتي .. وياريت

مـثـل مـا صـار بـيـك ايـصـيـر  بيه

*------------------*------------------*

تركني الموت  مدري شلـــون .. وياك
ترف عودك و اشوف العطش .. وياك
عـسانـي مـگـطـعـه بسـيوف .. وياك

و  لا  مـيّـت  يـجـيـبـونـك  إلـيّـه

*------------------*------------------*

✍ خادم الحسين ع
      الشاعر رعد الچريخي

يامهر شنهي الحصل گول
بس لاتگلي حسين مكتول
بشوفتك گلبي نعصر
جايني وعندك خبر
....................................................
خالي راجع ليش والمدمع يسيل
فطرت گلبي يخايب بالصهيل
لاتگلي راح مو راح الكفيــــــــل
وين اروح بهل يتامه والعليل

والله دلالي نهضم
اعداي ماعدهم رحم
ياريت كون الكون مشلول
...................................................
يامهر هل صوت ارجاك منعه
خاف رقيه صهيلك تسمعـــــه
هيه طفله وهاي صعبه الفاجعه
هذا ابو الاحرار طيب مرضعه

شلون عفته الوحده
يامهر بين العده
عتاب عندي وياك ويطول
...................................................
عليك امي فاطمه وذاك المصاب
من اسئلك ليش ماعدك جواب
اشوف بعيونك حجي وشكد عتاب
هذاحنه بكصتك هالو خضاب

جنه دم هذا من خوي
خبر مايوصل الابوي
يلحگ العصمه البين الخيول
.................................................
ناده زينب راد يبيـــن لوفاء
كلهه كومي وكام يسحب بالعباء
خل نطلع السهم يلله من كَفاء
حسين راد الماي يلمحد ســـكَاء

عفت عينه الخيمتج
حسين ينطر جيتج
مذهول عگله عليچ مذهول
.......................................
يامهر شيفيد للمثلي الصبر
تگلي نمشي خاف مايرضه الخدر
لونشد عباس گلي شعتذر
اتمنه كل نكلت جد اليه كَبــــــر

جدامي تسحك عالجمر
العمر ماريده العمر
الموت كون رويحتي ينول
...................................................
وياك امشي وياك وسحگ عالجراح
ومن كفيلي يامهر خذ السمــــــــــاح
الموت وينه يادهر خل استــــــراح
هذا اخوي حسين لو كومت رماح

ريته عيوني نعمت
ولاشفت عين الشمت
تسبينه جنهه تريد محصول
...........................................
خادم اهل البيت ع
فلاح طالب الماجدي

مدلي زندك ارد انام ...
بويه حركوهه الخيام
جيتك اركض حافيه ...
لحظه ابد ما غافيه
ــــــــــــــــــــــــــــــــــــــــــــــــــــــــــــــــــــــــــــ
بويه حركوهن خيمنه
البيهن يلوذ الستر
تراكضن امدللاتك
ولنه يتبعهن شمر
كربله عنه غريبه
وبيهه مانندل شبر
كاع وعره وشوك بيه
انكوم كمنه وننهطر

صحنه يا وادم حرام ...
احنه ايتام الامام
وسلبونه العافيه ...
لحظه ابد ما غافيه
ـــــــــــــــــــــــــــــــــــــــــــــــــــــــــــــــــــــــــــ
بويه حضنك موش الاول
جن احس بيه مختلف
راس ماكو وصدر ماكو
من الحوافر منخسف
حيره ياجرح الاضمــــده
بكل كتر طعنه ونزف
ما متت والله عجيبه
وشكثر كلبي صلـــف

شفت مهشومه العظام ...
وانته قران السلام
الجلمه منك دافيه ..
. لحظه ابد ما غافيه
ـــــــــــــــــــــــــــــــــــــــــــــــــــــــــــــــــــ

خايفه انه عتنيـــــتك
شفت جسمك ومنت
من صحتلك سلبوني
شلون بويه تحملت
جيت ملهوفه اشوفك
ونته مثلـــــي تسلبت
بكربله ظاعن خواتك
وانه وياهــــن ظعت

تشوفنه بهذا الظلام ...
جنه سرب من الحمام
وناسهم متعافيه ...
لحظه ابد ما غافيه
٠٠٠٠ ٠٠ ٠٠٠٠
جيت اشكيلك جروحي
الگيتك محمل جروح
بويه هاي رقيه يمك
شبعته الدنيه نوح
للسبي هاي الهضيمه
شلون عوفنك وروح
خنصرك بويه التسلب
خله جسمي بلايه روح

من فعل ذوله أللئام ...
كلبي ياهم بويه ضام
وانه يمك لافيه ...
لحظه ابد ما غافيه
٠٠٠٠ ٠٠ ٠٠٠٠
الليل صح مظلم علينه
لاجن يهون الامر
مدري شمحضر دهرنه
علينه لو طر الفجر
ننكشف وأنصير فرجه
وراح ننصاب بذعر
عمتي هاي الاميره
وينها وين اليسر

هيه بت ذاك الهمام ...
تشرفت بأعظم مقام
وهل مصايب كافيه ...
لحظه ابد ما غافيه
٠٠٠٠ ٠٠ ٠٠٠٠
خادم أهل البيت ع
فلاح طالب الماجدي

الاكبر يانضر عيناي
يسعر جبدك عله الماي
٠٠٠٠ ٠٠ ٠٠٠٠
يوليدي العطش جتال
خايف ياخذك مني
يل جنك غصن ريحان
فراكك يبني دوهني
اذا عني غبت لحضات
عيوني عليك تسألني

يل وجهك يزيح الداي
يسعر جبدك عله الماي
٠٠٠٠ ٠٠ ٠٠٠٠
هذا اخر وداع وياك
ومدري شلون اودعنك
عزيز عله الگلب يبني
يل ماينشبع منك
اگبالي والسيوف اشلون
اصبر من يگطعنك

مشدوه الفكر والراي
يسعر جبدك عله الماي
٠٠٠٠ ٠٠ ٠٠٠٠
ودعني علي ومن راح
وياه جن اخذ روحي
خلاني ومشه للموت
وعليه تنزف اجروحي
صحت ياليله ابنج راح
َنوحي عله الولد نوحي

ندعي الباري كومي وياي
يسعر جبدك عله الماي
٠٠٠٠ ٠٠ ٠٠٠٠
دعينه وستجاب الله
ورد الاكبر بحيله
گلبي عليه ظل يرجف
جاشنهي گلب ليله
انه وياهه من شفناه
گمنه ابنوح نشكيله

ويگطع وداعه جلاي
يسعر جبدك عله الماي
٠٠٠٠ ٠٠ ٠٠٠٠
راح والني اسمع صوت
يابويه الحك عليه
من الگاع اشبعت اعثرات
ماشالني رجلئيه
وصلته ومن الگيته اشلون
كل رسومه ماهيه

متغير يناس هواي
يسعر جبدك عله الماي
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي

رثاء #علي_الأكبر


كان الله في عونك .. حبيبك علي راح
المصاحب عيونك .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
يابحر ضيم وكَمَد ،، ها ياصبر ماله حد ،، بس الهجر أذاك
الفجر ذاك انطفه ،، وجرحه بدليلك غفه ،، راح وتون خلاك
ضميت دمعك عسن ،، ميشوفه الاكبر لَچن ،، اتفجر حزن عيناك
من شفته صاير وذر ،، ماي العيون انهمر ،، ومددت طوله اوياك

وونيت يم طوله .. وعِله الون والنياح
چن نوح مثكوله .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
صدره سهام انمله ،، وضميته واتقبّله ،، چنّك ردِت تحميه
وحطّيت خد اعله خد ،، واصرخت آه يالولد ،، وچم آه صحت اعليه
عالدنيا صحت العفه ،، يالتشبه المصطفه ،، كون الله لا ينطيه
الگطع رحمي وگطع ،، عمري وسلوتي وفجع ،، زهرة محمد بيه

واتصوب الهادي .. على اللي يشبهه ناح
يواسيني وينادي .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
عن وجهه تمسح دمه ،، وايد ارفعت للسمه ،، وتحچي اويه ربك صار
گتله بوتر گلبي حز ،، اشهد يرب قد برز ،، شبه النبي المختار
جده النبي ورحمته ،، لا ما رعو حرمته ،، العسكر على ابني دار
بسيف ونبل وبرمح ،، ينبت جرح في جرح ،، بكل جسمه اشوف آثار

اي عظم الله اجرك .. كثر ما بي جراح
وزاد الله في صبرك .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
يَمّه حِنيت الظهر ،، وبحسره درت النظر ،، لفتية بني هاشم
عينوني ها ياهلي ،، خـ نشيل جثة علي ،، ودمعك جمر ساجم
وگدام جثته سِرت ،، بدخلة خيمكم حِرت ،، ما رد علي سالم
ولن زينب اتلگتك ،، وليلى بنحب شبگتك ،، وضجت حرم فاطم

چن صيحة اقيامه .. المخيم ويلي صاح
وشيجبر آلامه .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
بعين الله گلت الحصل ،، يهون العلينه نزل ،، يا ليلى يا زينب
يا سكنه يا فاطمه ،، مو هذا آخر دمه ،، هذا اول مخضب
ساعه واظل وحّدي ،، بذبحي الشمر يبتدي ،، والعيله تتسلب
جمعي النسه يالإخت ،، اي هسه من كل وكت ،، صار السبي اقرب

ودعته ودموعك .. بعد ما تستراح
يا لچمة ضلوعك .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••


ياسر حسن
محرم الحرام ¹⁴⁴⁷
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

#ليلة_العاشر💔

مولاتي زينب (عليها السلام) بعد مصرع سيد الشهداء (عليه السلام)

يلتمن بناتي بنشقه لحذاي ـ خويه
چوانه الجمر ممشانه حفاي ـ خويه
شيطفي الخيم ومگطع الماي ـ خويه

رحت لحسين أشوفه وحيل محتاره
أگله أشكيلي بلكه الگه الجرح جاره
يگـلي أجروحي كلهه أتهون يم عون
بس المثلچ يضل ماله كل چاره

أنه أخته وعرف أشبيه وعرف الحيل ياذنه
يــــأشـرلي عللبنيات بويه الحگ يندهنه
ودمعته بعينه دم أطيح من گامن يحشمنه

00000000000000000000

هوه شضال منه وخاطر نعيش ـ خويه
محترگه الخيم چاا نلبد أبيش ـ خويه
مـــــو چنه سويه ننفرد ليش ـ خويه

گلبي من المصيبه والله يوجعني
وطگ اسياطهم يبن أمي تعبني
أضيع بالبنات ودنيه صارت ليل
وتيه بالزغار أنته أبنه لو أبني

مايسكت صهيل الخيل والأطفال مذعوره
وعمتهم نحيله أشلون تمشي بحيره مكسوره
الماعرفت أسمهه الناس تتطلع هسه مجبوره

00000000000000000000

أضل الوحدي والوادم شلون ـ خويه
حيل هواي زحمه ترگض أم عون ـ خويه
الهضمه أگبالي من فوگك يسحگون ـ خويه

حگي أتراگض وي الخيل وتعثر
أثاغب حگي ونته أگبالي تطشر
شتسوي بقميصك خيلهم يحسين؟
بحوافرهم خذنه أتقاسمنه أبر


تهد الأعوجيه عليك أه يا كسرت العاشر
أميضعتك ودور عليك گلي بيا كتر صاير
الخير أدريه تلمه الناس مو يطشر بحافر

00000000000000000000

بين المستحه والخوف رديت_خويه
گعدت أگبالهن وبحرگه ونيت_خويه
زلمچن ذبحوهه ماكو أهل بيت_خويه

ماوصيچن عليچن گضه الحيل
مابياش أدور جايچن ليل
تعالن لاطلعن تمشن بعيد
لبوچن رحت أشوفه وهدو الخيل

عمت عيني شكثر تعبان شفته وصاير بحيره
أخــر گعده هاي وياك گتله ورايحه الديره
ديره الماكو في عباس بيهه ولايصح غيره

رسول رياض