قميص النبي يوسف رد واجه بليل
قميص حسين صار بحافر الخيل
يوسف غربه موضوعه حسين مكسره ضلوعه
بالخيل بالخيل
:::::
فعله وفتعلوها اخوته وهو مو يم الخطر
حسين شنوصف احواله جسمه چم طبره نطبر
يوسف وسالم قميصه حسين بي حافر عثر
بقصر يوسف جاب عمره حسين يرمونه بحجر

سهله السجن ما متعذب هواي
ظل يسحگ حسين الراح والجاي
كسرة ضلعه مسموعه حسين مكسره ضلوعه
:::::
دم قميصك مو حقيقي هذا مو دمك نعم
حسين من السحگ تدري دمه واصل للخيم
التقى يوسف بأهله شافهم حيل ابتسم
حسين مطشره عياله وگلبه نصين انجسم

موجودين اهلك كلشي ما صار
حسين عياله كلهم صفو طشار
چانت كلها مجموعه حسين مكسره ضلوعه
:::::
انسجن چم سنه يوسف تالي من سجنه طلع
حسين داست خيل صدره وراسه برماح نرفع
حسين مسبيه عياله يوسف بأهله نجمع
النبي ما متعذب اصلا خنصر حسين انگطع

طلع من السجن رد يحكم شعوب
حسين انذبح حتى الثوب مسلوب
تلگه بصدره چم لوعه حسين مكسره ضلوعه
:::::
قحط مر بهله يوسف هيچ مر بأل النبي
حسين محترگه خيامه عياله كلهم بالسبي
بسوگ ما دخلن خواته وما نظربن عالعبي
بسوگ تمشي الحره زينب وبقه يباوع اجنبي

يوسف اخته ما دخلت دواوين
بنص الزلم وگفت اخت الحسين
نظرها ونزلت دموعه حسين مكسره ضلوعه
:::::
التقى يوسف بخواته شافهم طاب الجرح
حسين ما طابن جروحه وراسه مرفوع برمح
عاش يوسف كل حياته وعمره ما شاف الذبح
عالرمح راس الحقيقه ويفتر لحد الصبح

سالم جسم يوسف حتى الاضلوع
حسين بدون خنصر رأسه مرفوع
جرح يترسله موسوعة حسين مكسره ضلوعه
:::::
علي جبار الكعبي
الفاتحه لوالدي

محد يسكت الطفل غير امه
عبدالله من يبچي انه افتهمه
يسكت اذا شمني  يعرفني غير ابني
:::::
ابني النبله أطول منه   طير من طيور الجنه
بس ذبحو هذا الطير
سلمته انه بچف حسيني   عينه وصدت نص عيني
اعرف ميرد بخير
اعرفت من عينه ما يرجعلي سالم
گلت مـــــــا گعده بید حسين نایم
گلت يوليدي نــــوم العافیه ارتاح
ناغيته بس مــــا شفته يتبســـــم
گماط ابني ابيض احمر من الدم
بعده الدهر ذنبي     يعرفني غير ابني
:::::
عبدالله وذبلانه شفافه     عطشان ابني محد شافه
ليش ومنعو عنه الماي
حسين تاخر ما ردالي   ظل يلچم امك دلالي
جدمي بخيمه رايح جاي
يـــــــم المهــــــد عبدالله واتاني
فراگك يمــــــه كلش مــــــــوتاني 
تعـــــال وشوف امك حال يا حال
در صدري عبدالله انه در صدري
مـــــــا ترد سالم للخيم ادري
جرحك ويلچمني   يعرفني غير ابني
:::::
شفاف وكلهم يردونك   باچر بالنبله يذبحونك
چا ما ذبحوني وياك
شنهي الماي اشرب من عيني     بس الوحدي لتخليني
ما اتحمل فرگاك
هزيت المهد بس خالي مهــــدك
دمك شفته نازل وصل خـــــدك
در صدري وأريدك يمه ترضع
يكبر وگـــــلت الـــــولد یسندني
بعــــدك طفــــــــــل يمه وفارگني
بهجرك وجارحني  يعرفني غير ابني
:::::
رد حسين ودم بأيده  عبدالله ومعقوله وليده
وديته ويشرب ماي
امك حاچیها تناغيلك   احچي وياها جاي تشيلك
عينك حطها بعيناي
اجاني حسين يم الخيمه گـــــوه
مو مــــــاي بسهم ابنچ تــــــــروه
مـــــاتن حتى ادي وشلون اشيلك
اربع شهــــــــور وفطمتك نبله
صدري انه در ارجعلي عبدالله
ناغيته يسمعني   يعرفني غير ابني
:::::
للعازه وضميتك انه    برباك امك هم تعبانه
خليتك لجل الشيب
يا بعد امك وحشه الخيمه   ارجع وانه اصبحلك غيمه
بيك جروحي انه أطيب
شنهي الماي عوفه وهاك عيني
انذبح يا يمه ما بينك وبيني
ما ادخل الخيمه وضلمه ضلت
بس جسد امك روح ما بيها
تالي بفراگ امــــــك تخليها
غير ابني يسعدني  يعرفني غير ابني
:::::
علي جبار الكعبي
الفاتحه لوالدي

رايحه رايحه عنكم يخوتي رايحه
:::::
عفتكم جثث فوگ الگاع مرمیه
بعد ما چنت یمکم هسه مسبیه
گدامي الشمر ظل يضرب ارقيه
مــــن گد الضرب عباس محنيه
چنت تلزمني هسه الحبل بیدیه
يا عباس تـــدري شبيه مـــا بيه
نايحه نايحه صارت بعدكم نايحه
:::::
راسك عالرمح بس ينظر العيني
عندي انه حچي ما بينك وبيني
ترضه الشمر يا عباس يسبيني
بسم الخارجيه وظــل يسميني
بعدك يا ابو فاضل غرب تحديني
اموت وشوفتك عباس تحييني
صايحه صايحه الناس اعله زينب صايحه
::::::
انت أعلى النهر وانه اركب الناگه
هـــذا اخــر لقاء مـــا بعد نتلاگه
يمك وانـــه الك عباس مشتاگه
احچیها الگمر مـــا احمل فراگه
حراگـــه  فرگتك حيل حراگــه
مات حسين بس الماي ما ضاگه
سابحه سابحه جثتك بدمك سابحه
::::::
دخلت السوگ يا عباس مكسورة
مجبوره عفتكــم خويه مجبوره
تبچي أطفالي بس الشام مسروره
بيا صوره تعال وشوف يا صوره
معـــذور اختكم تبچي معذوره
مذعوره يخوي أطفالي مذعوره
طايحه طايحه انظر دمعتي طايحه
:::::
جثه اعله الأرض بس راسك ويانه
خويه حسين اختك حيل تعبانه
مـــو للماي انــــه اعليك عطشانه
مـــا معقوله گلت الاخو ینسانه
تمنيت الگمـــر يمتلك ذرعانـــه
حتى يشوف بينه شسوت اعدانه
لايحه لايحه سهام البصدرك لايحه
::::::
خمسين العمر بس اركضت گوه
ظــل سوط الشمر بمتونـــي يتلوه
ظل يشتمني وين اليسوه ما يسوه
ماتت يا ابو فاضل بعـــدك الخوه
خويه حسين چانت خوتك حلوه
هسه انتخت زينب رادت النخوه
جارحه جارحه الشام لختك جارحه
:::::
علي جبار الكعبي
الفاتحه لوالدي

(اخر مسيه ) السيدة تتحدث مع اخوتها في اخر ليلة
___

هاي وي الاهل اخر مسيه
باجر عالهزل يحدون بيه

كعدتي ابين الاخوان
تصبح كان ما كان

باجر عالهزل يحدون بيه
_

اريد ابنصكم اكعد يالميامين
بلكت شوف منكم تشبع العين
باچر يمي بس انتم بعيدين
وعني امتار اشوف اليذبح حسين

باچر عالرمل تتبده ضويات
واحنه بلا ضوه وي ادموعنه انبات

ودلالي ابين الاحنان
يصبح كان ماكان
باچر عالهزل يحدون بيه
____

اريدن هالمسيه ادلل اهواي
ومن هسه العتب ابديه ويالماي
باجر بس دمعتي التبقى وياي
وحدر ظل الرماح اندور افياي

باجر كلمن ادور اعله ابوها
وتلوذ الخايفه بسد رمح اخوها

الخيمه اتصير دخان
وتصبح كان ما كان

باجر عالهزل يحدون بيه

_

باچر قصتي ترويها الاخيام
ومن كثر التعب عالهزّل انام
اريد العذر منكم غاد بالشام
تصعب وگفتي محترگه الاجدام

باجر قصتي ويل الحزن تكمل
واضل انشاف من ابعيد عالتل

وقصتي ابين الاوطان
تصبح كان ما كان

باجر عالهزل يحدون بيه
_

باچر كلنه موته بطبت السوگ
انتم عالرماح واحنه عالنوگ
علينه اعيون تنفك وي الحلوگ
وتشوف الناس طگته الجاي مطگوگ

باجر روحي ميته وي الاعزاز
ويزتني من الرمح سبعين جناز

الميته بدون دفان
تصبح كان ما كان
__

باجر عالهزل يحدون بيه
حلوه اوجوهكم خلوني يمها
باچر عالرمل ياهو  اليلمها
اختكم بالشمس يشتد عزمها
وتفيي لروسكم تبقى بهدمها

باجر بالشمس يزداد نوحي
افيي اعله الغوالي وانسه روحي

ودمعتي بخدي عنوان
تصبح كان ماكان

باجر عالهزل يحدون بيه
__

ايوب يوسف الطوگي

الليلة العاشرة

چنك طير جنّه وفـــــارش جناحك
شلتك مادريت السهـــــــــم ذباحك
من ابعید صـابك حـــــرمله ولاحك
وحــسّيت الـنبله بدلّالــــــي

شفتك بالمهــد عطشـــــان يوليدي
گلت بلچـــــي احصل ماي ياعيدي
سامـحني اخـــــــذتك للذبح بيدي
واتطشر نحرك باحضــــــاني

وي خوّاني هـــــاي الليله مجتمعه
اودعـــــهم وداع ومـــــابعد رجعه
باچـــــر عالتراب جسومهم صرعه
ومحّـد يانــــــــاس يباريني

عدوي الچان یحلم یلمــح اخیالي
هوه اليحــــــدي بيه عگب کـفّالي
واروحن للخـــــرايب واليسر تالي
والشامت ادخــــــل ديوانه

فراس المحمداوي

ماينتهي هذا السفر
راس الرمح شايل گمر
كل لحضه اموتن موته
وحسين اسمع صوته

لأ يوم اگول وينگضي ويرتاحن العلويات
يگضي النهار عله الهزل وعالهزل كمنه انبات
يل ماكو راحه بهل درب شنترجه من الشمات
كل ساعه اموت من الفشل گمت أحسد البالطف مات

صار الحجي بكيف السهم
عينه أنطفت راعي العلم
يل ماكو زينه تفوته
وحسين اسمع صوته
ماينتهي هذا السفر
؟..........
لو ميته مابين اخوتي ومرتاحه من هذا الهم
من تبجي علويه شفت أحلوك الزلم تتبسم
عباس هضموني صحت وعيونه غرگن بالدم
ياخوي اشرار البشر عله ختك صفت تتشيم
صاحولي يل مالج اهل
من الكفل گطعي الأمل
صار الرمح تابوته
وحسين أسمع صوته
ماينتهي هذا السفر
.........
سويت ماتم لخوتي وأنه عله ضهر الناگه
اليشيع اخوانه بسبي ليش بحجر يتلاگه
كل ديره اطبلها شفت المحنتي مشتاگه
يشمرون عليه حجي وتيبس دليلي ارياگه

وعيوني وي عينك بجت
وأسمع الوادم صيحت
درة علي المبخوته
وحسين اسمع صوته
ماينتهي هذا السفر
........
اني الچبيره بالعمر جاغير كون ادلل
طريت سوگ عله الهزل بسبيي ياهو الحلل
شگيت راسي وأنطبع دمي عله هذا المحمل
الغثتني ياخويه وعلي بالحادي كمت اتوسل
بلكت ينزلي الرمح
راسك اصدله منجرح
نخيت النجه من حوته
وحسين أسمع صوته
ماينتهي هذا السفر
...........
خويه الخرايب والقصر ذني ابد موليه
احچايه بحلوك الزلم زينب صفت محجيه
شيبت يخواني بعجل من جلمت المسبيه
الشام كله وكل هله اصبح يأشر عليه

هاي العقيله ام الخدر
بمجلسه صاح الشمر
يلماكو خوه بخوته
وحسين اسمع صوته
ماينتهي هذا السفر
.................
خادم اهل البيت ع
فلاح طالب الماجدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

#قصيدة_ليلة_العاشر

#ياصاحب_الزمان

هذه انته المندفن جوه الحجر
هذه انته المابقه منك اثر

ما اشوفه وينه جسمك
ليش ضايع خويه رسمك
هذه انته
---------------------------------
وين طولك ياحبيبي وين ضايع ياعمر
وين جسمك خويه گلي وين انته ييا كتر
خويه ادورك بالحوافر انه اشمن بس عطر
انه اريد ابچي اعله جثتك گلب اختك چن جمر

وينك انته ماشفت بس الدمه
وشفت اثار الضلوع امهشمه

گمت المن بيدي عضمك
ليش ضايع خويه رسمك
هذه انته
-------------------------------
دوريتك خويه وينك مالگيتك عالارض
بس بقايه انسان خويه ولعده بيهن ترض
شي مشن ويه الحوافر راحن بطول وعرض
جم فرس عاثر بصدرك جم رمح صله الفرض

هذه انته خويه لو شوفي انطفه
لاملامح باقيتلك لاصفه

حرت من ياصوب المك
ليش ضايع خويه رسمك
هذه انته
-----------------------------
ردت احضنك خويه اضمك بيك ماباقي صدر
امطشر ابدوس الحوافر امطبر وصاير وذر
گلت اخلي بيدي راسك انته باقي بس نحر
حسين وينك ياحبيبي گلبي ياخويه انفطر

اشلون احضنك يالضعت في كربله
وهذه اوصالك تطشرت بالفه

گمت اسولف ويه دمك
ليش ضايع خويه رسمك
هذه انته
----------------------------
شنهو صاحي بيك باقي كلك انته منهشم
ماكو طعنه وطبره خويه ماشفته عله الجسم
وين امك كون تحضر جثتك خويه تلم
ابيا گلب زينب تلمك يلي متخذم خذِم

البيك شفته عمره ماصار ويمر
الضهر مطبوگ شفته اعله الصدر

ياهواي الجنت اشمك
ليش ضايع خويه رسمك
هذه انته
---------------------------
غير خلصت ولنهايه ولدفن لازم يصح
فوگ هذه الصار كله زادو اجروحك جرح
مارضو دفنك حبيبي عاري ولدم منسفح
وراسك اگبالي اشوفه يعتلي صار برمح

ونته تدري بزينبك تنطر يسر
اترافج ارسومك على رمح الغدر

واني ادري اجبير حلمك
ليش ضايع خويه جسمك
هذه انته
-----------------
علي سليم الحسناوي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

عندما وقعه مولاي الحسين ع
من ظهري جواد وحاطت بهي العداء
كني به يقول

راح راح
حزام الظهر راح
......
خويه وينك ليش عني تأخريت
خويه وينك حاربوني وما أجيت

الخوه يا عباس تدري تريد فزعه
وانه حاير بالسهم وأشلون اطلعه
وعين زينب ذيچ هل تربي عله أخوك
تصيح لي العسكر فزع ياهو اليرجعه

اخيامك حرگوها خويه وفرهدوها أخيامك
ايتامك بنار هاي او لوعوها ايتامك
طاح طاح
هيبة علي طاح
.....
تدري خويه ينولي الينعاف وحده
تدري خويه شدتي عباس شده

انه طايح عالارض وهمه أجوني
خويه يا عباس خويه أستوحدوني
ظهري خالي ولا اخو يهد وراي
صرت كعبه وبالرماح يحاوطوني

احسينك عباس ماتلحگ تره احسينك
وينك تشمتت بيه العده وينك
صاح. صاح
عليه العدو صاح
........
روحي طلعت وانه انتظرك تجي
روحي طلعت من السهم وين انتچي

شفافي فطرهه العطش رايدلي ماي
الروح اقنعها واگلها اخوي جاي
مو لچتفك عالتراب توسديت
والمثلث خويه كسَّرلي گفاي

حيره عباس انه أتحيرت حيره
غيره ماعدها كل هاي البشر غيره
ناح ناح
عليه الحجر ناح
..........
عالغريبه عيوني اتصد من بعد
عالغريبه. خايف العسكر يهد

العشره اسمع للسحگ من حضروهن
بين كل الخيل خويه تخيروهن
موش مره عبرن عله ضلوعي شوف
بلا عدد فوگ الصدر من عبروهن

زينب تنطي وجهه لياكتر زينب
تلهب نار بگلبها والخيم تلهب
لاح لاح
راسي برمح لاح

خادم اهل البيت ع
فلاح طالب الماجدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

لو بالگلب لو بالمهد
ياهالخلگ نوم الولد
عبدالله ليش اعلى الرمح نايم
هذا المـچـان اويـاه مــــاراهـم
ــــــــــــــــــــــــــــــــــــــــــــــــ
احچي ويه روحي.. والچم بجروحي
گلبي مفجوع.. والادموع.. ابد ماتستچن
يعتلي نحيبي.. من يدر حليبي
وانعه بالچول.. دللول.. على اوليدي اون
واسكن البراري.. واشيطفي ناري
تحرگ الروح.. هالاجروح.. صعب فگد الابن

اليسولف ضيم گلبه ايهود اشويه
وآنه امن النوايح حيل مابيه
اريد امشي العزيزي الكله حنيه
واگمطه ابدمّعِتي واقراله لطميه

وانعاله كون امن الگلب
ازغّير ونايم عالترب
ليش الزمن وي الولد ظالم
هذا المچان اوياه ماراهم
ــــــــــــــــــــــــــــــــــــــــــــــــ
اشهور عمره سته.. وفارگت ضحكته
اوليدي عطشان.. والالسان.. يبس من الضمه
لن ابوه اجالي.. واخذ مني الغالي
وبيده خلاه.. اويلاه.. وحيلي هدّمه
ابصوته ضل ينادي.. وتسمع الاعادي
اوليدي اسگوه.. تعرفوه.. غصن من فاطمه

اذكر من خذاه حسين للحومه
لزمته وگمت اشم اگماطه واهدومه
اخذ وياه روحي وصرت مصدومه
ومن شوف الولد تاليها محرومه

احاه ينبلة حرمله
ذبحت اوليدي ابكربله
مات ولحگ عمه گمر هاشم
هذا المچان اوياه ماراهم
ــــــــــــــــــــــــــــــــــــــــــــــــ
عالگلب مچانه.. نومته وأمانه
وابني حرموه..الدللوه.. شني ذنبه الطفل
الفارگت ضحكته.. بيد ابوه رگبته
والولد مات.. حسافات.. سگوه حر النبل
وچف ابوه تدمه.. ودمّعِته اعلى هدمه
رجع محتار. والانظار. سوالف تختزل

ريت اويه الولد عبدالله دفنوني
وگبل عينه يريت انسدت عيوني
وبتراب الگبر ياريت غطوني
خذاه الموت وسفه وخابت اظنوني

وحسين دلاّله انكسر
ودموعه چن سيل المطر
واعله الولد گلب الابو هايم
هذا المچان اوياه ماراهم
ــــــــــــــــــــــــــــــــــــــــــــــــ
اوليدي اشغلاته.. اوليدي اشحلاته
اعيونه حلوات.. صلاوات.. اومحله بسمته
ابحظني ابني ريته.. ساعه مانسيته
ينّسي اشلون.. والعيون.. تحن الُشوفِته
الغالي مهده خالي.. وينبچي اعلى حالي
ابمهده خِلوه.. دشوفوه.. تِمّوت نومِتّه

بگماطه الولد هلبت يشدونه
تره اخيوط الحبل خشنه ويأذونه
الرمح يوجع رگبته الولد يدرونه
ومن حر الذبح شينوم اعيونه

ازغيرون مو مالت سبي
لاچن اعليمن معتبي
شتريد من آل النبي الوادم
هذا المچان اوياه ماراهم
ــــــــــــــــــــــــــــــــــــــــــــــــ
للسبي مشينه.. وانظر اعله عينه
وذيچ الانسام.. يالاسلام.. تلاعب گِذلته
شوفي مااديره..رحلِتي گصيره
وآنه ياريت.. تمنيت.. ابوسه ابگِصته
اوليدي عوده ذابل.. والدمع يهامل
كون اناغيه.. واحاچيه.....وانشّف دمّعِته

مثل الطير ابني ورگبته ترفه
اشلون اعلى الرمح ياهل خلگ يغفه
يابويه اشحلاها بوسته ابچفه
خذاه الموت ابني والله ياوسفه

الموت تالي فرهده
وادموعه تمطر كالنّده
حزن الولد وسط الگلب دايم
هذا المچان اوياه ماراهم
ــــــــــــــــــــــــــــــــــــــــــــــــ
حيدر بشار الدراجي

يُمّه يُمّه يالولد ٠٠ گلبك برد ٠٠ لوبعده نار
ــــــــــــــــــــــــــــــــ
يمــه يـوليـدي يـســبـاح الـگـلـب
من خذاك حسين ظل دمعي يصب
اشهور عمرك وينك اوّين الحرب
يـمه گالولي ابــرگبـتــك منضرب

رجف گلبي وارتعد ٠٠ گلبك برد ٠٠ لوبعده نار
ــــــــــــــــــــــــــــــــ
ازغِير انـته والنَهر كـلـش چـبـير
لو سگوك الماي چاشنهي اليصير
ينگص الشط لو رُبع منه يطير؟
يمه والذبحوك ماعـدهم ضمير

دين ماعدهم أبد ٠٠ گلبك برد ٠٠ لوبعده نار
ــــــــــــــــــــــــــــــــ
يمه جـابولك الـنّــبله امّفصله
نحرك ازغيرون چان ابــكربله
من عساها انشلت ايده حرمله
الخله دمعاتي المصابك سايله
غيرك اشعندي بعد ٠٠ گلبك برد ٠٠ لوبعده نار
ــــــــــــــــــــــــــــــــ
يمه لودر صدري يم مهدك اروح
بيدي اهز مهدك يعبد الله وانوح
صورِتـك بـعيــــونـي ليليهِ تـلوح
بعد عينك ابـد ماتـهده الجــروح
يمه الوولي للمهد ٠٠ گلبك برد ٠٠ لوبعده نار
ــــــــــــــــــــــــــــــــ
متت من النـبله لو مـن الضــمه
احرورة اصوابك الحيل اتّهدِمه
رفرفت روحك مثل طير ابسمه
اوداعة الله الملتقى يـم فاطمه

اوليدي ياطير السعد ٠٠ گلبك برد ٠٠ لوبعده نار
ــــــــــــــــــــــــــــــــ

يالرحت عطشان ماصحلك شراب
هالمصاب امنين اجـانه هالمصاب
يُمه هم رشـو الماي اعلى التـراب
كـون هذا الشفته يـوليـدي سراب
گلبي يوليدي انمرد ٠٠ گلبك برد ٠٠ لوبعده نار
ــــــــــــــــــــــــــــــــ
حيدر بشار الدراجي

بالطيف صوبني سهم
مرعوبه صحت أسم الله
گلتلها يادنيا الحزن
عندي آنه چم عبدالله
———
رَضعتك وبيها نمت بس مو طويله النومه
يوليدي ماأدري شحس من كل كتر مالومه
مَر بيه طيف وبي سهم وبگلبي أحس ملچومه
ياساتر الله أعله الولد بس لاتغيب أرسومه
گلّبتك وروحي تِحن
والدمع عالخد صَلّه
گلتلها يادنيا الحزن
عندي آنه چم عبدالله
——-
شهگه اعله شهگه وحيرتي صارت ييمه أبكٌبري
ضليت أجر گوه النفس چنها الگبور أبصدري
لله أبدمعتي أتوجهت وبحالي هوه اليدري
يابعد عمري وكل هلي وشيسوه بعدك عمري
يالبعدك أبعمر الورد
مثلك ولد ما حَصلّه
گلتلها يادنيا الحزن
عندي آنه چم عبدالله
———
ليش الوكت يازهرتي بالسرعه صاير يمشي
ياكلشي أنته أولورحت من عندي يرحل كلشي
ردتك كحل مو بالحزن تترك الدمعه أبرمشي
يالشلتك إمن أول خبر شيل أنته بيدك نعشي
بيدك يبعد أيدي ردت
ثوب المنيتي أتفصَلّه
گلتلها يادنيا الحزن
عندي آنه چم عبدالله
———
گلت آنه سهلات اليجن وآنه اعبرت چم صعبه
وبس عالجروح المالحَه گلبي الچبير أتربه
عبدالله چنك مو ألي والزمن عالن حَربه
هايبني أشوف أبصورتك حيره ومناحه وغربه
وگماطك أتراوه ألي
وصلّه ويفارگ وصلّه
گلتلها يادنيا الحزن
عندي آنه چم عبدالله
——-
يوميه أشم عطرك وأحن بيك أشكثر ولهانه
بس يبني من طيفك تره ظليت أشم دخانه
ديره أسمها كربله شلتك لچن حيرانه
وأنظر رگبتك حومرت وأشفايفك ذبلانه
وچني أبسبي يبني صحت
عني الأجل شِمعَطلّه
گلتلها يادنيا الحِزن
عندي آنه چم عبدالله
———
ولمن سمعت بكربله هاي الارض گلولي
أبكاروكك أسمع يالولد صوت المنيه أيلولي
من عندي شالك والدِك والخوف صار أبطولي
عمتك وابوك أبخيمتي صيحت حزن صاحولي
شفتك ذبيح وبالسهم
ناديت يٌمه أسم الله
گلتلها يادنيا الحزن
عندي آنه چم عبدالله
——-
سيد مرتضى الموسوي

عزيز امه انسحك بالخيل
واجته اخته تلمه بليل
ماخذهه التعب كل حيل ما بيهه
__1__
من سابع سمه وينظرهه رب الكون
كعدت يم اخوهه ابلايه شوف ام عون
حارت جسم اخوهه اتلمه مدري اشلون
مسحوك اعله طوله وما بقتله امتون

حارت … تجمع ،،،
جسمه ابيا حيل
صاحت … يارب …
طشروو بالخيل

طشروو خيرك اعله الكاع ... وكل حافر اخذله امتاع
من اضلوع اخوي الداست اعليهه
............2............
أجت بس ما اجه وياهه يويلي الحيل
وخطوات الدرب كظتهه عثره بليل
متّربه العبايه وساحكتهه الخيل
كوه اجر نفسها والطريق اطويل

لطمت ،، ونت ..
لحسين اهواي
أوصلّت … وحشه ..
الموته ابلا ماي

توضت زينب بدمعات
اوقرتله الفاتحه لوعات
وصلاة الوحشه صلّتهه بنواعيهه


_3_
من بعد الدواره الدورتهه اهواي
وصلت يم اخوهه الفاكده اجم راي
اجته وجايبه وياهه طاست ماي
تكله اكعد اروي اضماك عوف اضماي

جيتك .. خويه ..
اتكله بعنوان
اكعد … واروي…
الجبد العطشان

جبت الماي إلك يحسين
بس راسك أجيبه امنين
اشربك ماي من النحر تاليهه


==4==
بدت تجمع بخوهه الما بقاله امعين
واول شي تجمعه رادت الضلعين
ما كدرت تلمهن مارديهن زين
ظلت بالأرض تحفر تدور حسين

بلكت … تلكه …
أشويه من المات
حفرت .. شافت ..
ضلعه ولجمات

يصب نحره اعله طوله دموم
وجرح شابك جرح ملجوم
يفز حسين كل ما مدت ايديهه
...............

5
فرشت شيلت امهه ابمصرع المذبوح
وكل ساعه تشد منة جرح مفتوح
واتوخر التراب البل نحر وتنوح
ومن كد ما بجتله منهه طلعت روح

صورت .. زينب ..
تبجيله عيون
خلت ،،، كلشي ..
ينوح اويه ام عون

حزنهه اخته اعله ذبحه اهواي
بكثر ما عطشوه للماي
لذلك بجت الكون ابواجيهه
...............

__6__
ابسرعه الليله عدة عالعقيله ابساع
ما لحكت تودع حسين خوش اوداع
ولا كدرت تعوفه امطشر اعله الكاع
الوكت من عدهه ضاع بخنصره الي ضاع

خلَصت .. ليلة
حادي المقتول
أدور … خنصر
ضايع بالجول

عليهه ابسرعه طر الانهار
أتعبت بس ما لكتله آثار
ضاع الخنصر وظلت مآسيهه
::::::::::::::::::::::::::::::::::
✍🏻💔 كلمات موسى الخادم

الذاك السهر ذاك .. شيرجع الايام
مشتاگه أناديك .. يٌمه الولد نام
-----
أتمنى يرجعلي الزمن ياضنوتي بيك
واسمع بچيتك من تفز واگعد واحاچيك
مشتاگه الّعبك يالولد تضحك وناغيك
يامَحله كل ما گَمّطَك وتّطَلع أيديك
محتاجه ملگاك .. لوبس باالاحلام
مشتاگه أناديك .. يٌمه الولد نام
-----
چنت آنه أخيط كل صٌبح لرسومك أثياب
واگعد أرتب بالمهد ياأغله الأحباب
لويوم تتمرض چنت دلالي ينصاب
هاياشمس روحي صحت مو وكته الغياب
مَر بيه الغروب .. يابَدريّ التام
مشتاگه أناديك .. يٌمه الولد نام
-----
عبدالله غيرك ماألي يالغالي مولود
ياوردتي اللي تختلف عن باقي الورود
لاعني رايح يالولد واتئمل إتعود
ياهيه مثلي بهل عٌمر غاليها مفگود
بعدك يمحبوب .. حاطتني الآلام
مشتاگه أناديك .. يٌمه الولد نام
-----
مجبوره أنام أتئملت بيك التقي أبطيف
تندهني ظلت دمعتي ويجرحني الف سيف
بعدك أخذ مني الزمن يوليدي چم حيف
وديوان مهدك ينتظر تگصدله لو ظيف
ماظل بعد حيل .. واللحظه چن عام
مشتاگه أناديك .. يٌمه الولد نام
-----
راحت لياليك ومشت شمعه بوسط نار
وبروحتك ظل الحزن بس هوه بالدار
كل ماأعاين عالمهد يجرحني تذكار
بعيوني ظلمه أحتاجت إمن إخدودك أنوار
حِزنك ياالوليد ..من جدمي للهام
مشتاگه أناديك .. يٌمه الولد نام
------
سيد مرتضى الموسوي

هله هله حسين وينه /// بالسيوف امكطعينه
===========================
١/
طلعت امن الخيمه زينب .. شابجه العشره اعله اخوهه
شافته مرمي اعله طوله .. ويمه انصاره اذبحوهه
صاحت ابصوت الفجيعه .. حسين روحه طلعوهه
ندبت ابدمع الرزيه … قالع البيبان ابوهه

هله هله حسين وينه … جسمه ويلي امسلبينه
==================
٢//
من على التله وتنادي .. بويه يا حامي الحميه
حسينك اعله الكاع مرمي .. و فوكه تلعب الاعوجيه
احضر ابساعك نشيله .. لا تجي أتشوفه رقيه
وحدي هالساعه تراني .. طرك الحبال البديه

هله هله حسين وينه … ابساعك احضر يا علينه
=================
٣///
صاحت الحره العقيله .. وصاحت اوياهه اليتامه
هله هله حسين وينه … وليش مسلوب العمامه
دمه جاري عالوطيه .. بيا ذنب سيد الكرامه
ليش ما واحد فزعله ..الفاكد اخوانه وعمامه

هله هله حسين وينه … ما بقاله من يعينه
=====================
٤////

ويه زينب يوم عاشر .. صاحت الدنيه بكبرهه
كبَّراهه اهواي موته … وهي خمسين بعمرهه
اومن كبر هول المصيبه .. ضيعت زينب نظرهه
وحيل ما ظل بيهه ويلي … اتشيل بي صاحب صبرهه

هله هله حسين وينه … بيوم عاشر ذابحينه
===============
٥/////

كلشي وي زينب تغيَّر .. والسمه أتغير وضعهه
على حسين المات ضامي .. نَزلَّت احمر دمعهه
والزجيه بكسر خاطر… كصدته ابكسرت ضلعهه
شوفت المكسور ضلعه.. رادت وشوفه الفجعهه

هله هله حسين وينه … فجعو الزهره الحنينه
==========================
✍🏻 كلمات موسى الخادم ٢٠٢٥

ليلة وداعك على اختك جبيره
باجر تشاهد ذبحتك يغيره
وتشاهد العين ... ذيج الحوافر
وخيل التدوسك ... وي ظهر عاشر
..1....
يليلة ... وداعك ...
كبل لا تبتدي مني خذت كل العمر
يغالي ... على اختك
ابد لا تعتقد سهله اعله زينب هالامر

باجر ابئيدي المهر ليك انه اقدمه
ومنحرك ياخويه ابوسنه واشمه
اوصيِت امنه فاطمه يابو الأئمه

للموت اودعك يخويه بديه
موش برضاتي غصب ها عليه
يا سلوة الروح .... يبن الاكابر
وخيل التدوسك ... وي ظهر عاشر
===============
٢..
يخويه ... شيَّصبر
دليلي امن انظرك جوه الحوافر تنسحك
والمك .. بديه
اظلوع امكسره وما بيك شي باقي صدك

ياكتر منك اشيله الثاني يوكع
وماكو منك صوت يبن الزهره اسمع
وابقى كدامك ابحيره اوكف اركع

واسجد على ادمومك البيهه سابح
وأقره بسجودي منو نحره ذابح
وافرش على الكاع … دمع النواضر
وخيل التدوسك ... وي ظهر عاشر


==================
٣...
جبيره .. المصيبه
بقت جم ساعه واطلع صوب تل الزينبي
أنظرك .. حبيبي
تلوج امن العطش والحر يروح الطالبي

والشمر جاثي يويلي فوك صدرك
و ١٢ طبره يطبرك على نحرك
وأنه من أبعيد يبن أمي أنظرك

ساعتهه روحي احس مني تطلع
لا تذبح حسين أصيحه ومينفع
كدامي يحسين .. ذبحك يباشر
وخيل التدوسك ... وي ظهر عاشر



===============
….٤....

بعيده … المسافه
باجر بينك وبين الخيم يابن علي
تجيني .. أجيلك
لو تبقى بكتر وانه بكتر محد الي

انته مشغول بذبحتك خويه ضامي
وأنه اظل مشغولة البال ابيِتامي
هذا كله ايصير وي حركَـت خيامي

وامراكض خيول جثيره ورايه
ولا حامي عندي طركَـ هالعبايه
بهذا العمر راح … أختك تناظر
وخيل التدوسك ... وي ظهر عاشر




…..٥.....
والاصعب .. عليه
أعوفك عالثره مكطع وصل عاري الهدم
واروحن … أسيره
وتضل أنت بشمس ما واحد الجسمك يلم

ويمك يمروني بنياك الهزيله
مجتوفه يا خويه والدمع اسيله
ومن خجلتي راسي يمك ما اشيله

منظر سبيتي يخويه يجرحك
كافي عليك أنت سيف اليذبحك
من يمك امشي .. ممشه اليحاذر
وخيل التدوسك ... وي ظهر عاشر
==========================
✍🏻💔 كلمات موسى الخادم

چنت آنه ألولي وحظني دافي
نام الولد نوم العوافي
هسه أبسهم ياوسفه غافي
يمه الولد يايمه
———
چنت آنه ألوليك وأحن هايالولد ليليه
ومكحل اعيوني ألسهر والنومتك محنيه
حلوه الدللول الولد لَمّن چنت بيديه
هسه شگلك حايره وآنه أصبحت مسبيه

وينك صحت ياشمعة أمك
ماي وطحت وشلون ألمك
عطشانه ردتك ماي صافي

يُمه الولد يايُمه
———
تسعه الشهور أمناطره جيتك يبعد أسنيني
غطيتك بجلد العمر وانتظرك أتغطيني
تتبسم أنتظرك چنت يوليدي مَتبچيني
تتنفسك عيني ضوه ماتت أبفگدك عيني

يوليدي أتاني أحله كلمه
تحچي وتگلي يمه يمه
الذاك السهر أنطر توافي

يُمه الولد يايُمه
——-
يوميه أعاين وأنتظر يوليدي أشوفك تكبر
وأسم الله أگلك لوگمت وكت المشي تتعثر
بملوحة أدموع الجفن عودك سگيته وخَضّر
هسه أصفگ أيدي بغيبتك والشوفتك أتحسر

ماشابعه أعيوني بوجودك
أصفر أعاين ليش عودك
حزنك يضل مابيهّ كافي

يُمه الولد يايُمه
———
وياك حلوه دنيتي وبعدك تعذب حالي
لو ماتشيلك هالارض شلتك وسط دلالي
عبدالله يالتسوه التعب غالي انته وابن الغالي
أتمنه مَيته اولا شفت يوليدي مهدك خالي

مابيه لو لحظات أعوفك
هسه ذبيح أگبالي أشوفك
هايا گمر وبليلي طافي

يُمه الولد يا يُمه
———
ودعتك أبحظن الابو وكلش جرحني إغيابك
وأبالي أشوفك مرتوي مو ترتوي بمصابك
شميت عطرك يالولد بيده الابو من جابك
ماتت أديه من شفت لون الدمه بثيابك

ليش السهم يمه أعله نحرك
والدم نهر يجري إعله صدرك
مو وكته يوليدي التجافي

يُمه الولد يايُمه
———
خليتك وشفت أبرمح راسك يشيبة راسي
يالماشبعت إمن الهوه گطعوها كِون أنفاسي
تندار أشوفك وألتفت حزنك يّجرح أحساسي
ياطفل گبلك منذبح منظر منيتك قاسي

كلما يديرونك عليه
أتمنى توصلني المنيه
والجرحي بس موتي اليشافي

يُمه الولد يا يِمه
———
سيد مرتضى الموسوي