الليله كلشي بروحي مات
الليله ذابحني الفرات
الليله دمعاتي تصب
وشيبت حتى الگلب
الليله ذابحني الفرات
....................................
الليله حتى النفس هم يثكل عليه
الليله جن بحبال مجتوفات اديه
الليله اول مره هيج يصير بيه
وجني فوك النوك يا عالم سبيه

الليله جن بالخيم نار
وتركض اكبالي الزغار
وانه بالسوط انضرب
وشيبت حتى الگلب
الليله ذابحني الفرات
...................................
الليله صارت روحي بالعباس وايده
الليله بين اخواني بس جني وحيده
الليله اشوف حسين جن فاكد عضيده
الليله ما صح ماي ويشرب اوليده

الليله جن يم النهر
مكطعه اجفوف الكمر
الليله موقفنه صعب
وشيبت حتى الگلب
الليله ذابحني الفرات
...................................
الليله احس بروحي جنها تريد تطلع
الليله من عباس هلبت شوف اشبع
الليله يمهم كاعده وكلبي ايتكطع
وباجر المسبيه كلها تصيح واسمع

الليله جن فوك الهزل
مجتفين ايدي بحبل
وامشي وي وادم غرب
وشيبت حتى الگلب
الليله ذابحني الفرات
....................................
الليله ليلة فاجعه وليلة وداع
الليله هاي الليله احس بعمري ضاع
الليله ما تنطي صبر تركض بساع
الليله جن دم اخوتي تارس الكاع

الليله كلشي بعمري راح
الليله بس دمعه ونياح
وبالخيم خوف ورعب
وشيبت حتى الگلب
الليله ذابحني الفرات
............................ ....
الليله مدري اشبي من دون الليالي
الليله كلش يختلف هالليله حالي
الليله اخر ليلة من عزي ودلالي
الليله بعيون الكمر مشغول بالي

الليله جن حامي الخيام
عينه تعميها السهام
ودمه سايل عالترب
وشيبت حتى الگلب
الليله ذابحني الفرات
...................................
ابو حسن الجعاري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

شور

الليله وحيده الليله
.............................................
الليله وحشه تشيب الراس
وليش بخيمنه تحرك الناس
وحسين راح وراح عباس
الليله وحيده الليله
............................................
يا حيل ضل عباس يا حيل
وابن امي فوكه تهوس الخيل
ومنه وصل بالحافر اتشيل
الليله وحيده الليله
...........................................
فوك الجمر يحسين ممشاي
وارماد من الخيمه فوكاي
وين امشي سوط الشمر وياي
الليله وحيده الليله
...........................................
من الركض شبعينه عثرات
وسوط الشمر جايبنه طكات
عباس بعدك تكضي شوغات
الليله وحيده الليله
.........................................
ما عندي خيمه اتلم الايتام
بالهيمه خويه تقبل انام
وباجر ورانه الكوفه والشام
الليله وحيده الليله
..........................................
بيا حال باجر نركب النوك
واحبال بيدي وكلبي محروك
والحادي عمده ايطبنه للسوك
الليله وحيده الليله
............................................
ابو حسن الجعاري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

واحسينا       واحسين
،،،،،،،
حسين ياروح الزچيــــــه
ياذبيح الغاضريــــــــــــــه
وداعت ابنيتك رقيـــــــــه
العطّشك ما عنده ديـــــــن
،،،،،،،،
ويلي يامهچت الزهـــــــره
الداست الخيل اعله صـدره
گبال اخيته انذبح نحـــــره
ذابحك شمرُ العيــــــــــــــن
،،،،،،،،
فوگ صدره الخيل جـــالت
وكربله من الحزن مالـــــــت
وبت علي دمعته سالــــــــت
تصيح چا عباس ويـــــــــــن
،،،،،،،،
خل يجي العباس وينــــــــه
الجابني من ارض المدينــــــه
حسين اخونه مگطعينـــــــــه
ونتخت بسم الحنيــــــــــــــن
،،،،،،،،،
هوسوا بالراس يمهـــــــــــــــــا
واكبر من الكون همهـــــــــــــــا
يغلي ضل ام عون دمــهـــــــــا
بت امير المؤمنيــــــــــــــــــــن
،،،،،،،
حرگوا الخيمه عليهــــــــــــــــــا
وشبگت ارقيه بديهــــــــــــــــــا
لا ابو فاضل لاوليهــــــــــــــــــــا
خوانها متذبحيــــــــــــــــــــــــن
،،،،،،،،،
تلگت الگوم الاجوهــــــــــــــــــا
بحزن أمها وصبر ابوهــــــــــــــا
مات اخوها وچنها اخوهــــــــــا
هوه عين وهيه عيــــــــــــــــــن
،،،،،،،،،
خذت دور الكمر نفســــــــــــــه
الخايف اتأمنه وتحرســــــــــــه
هل صبر واجب ندرســـــــــــــه
منه نتعلم يقيـــــــــــــــــــــــــن
،،،،،،،،
هاي بت حامي الدخيــــــــــــــل
صاحت بصف القتيــــــــــــــــــل
ما رئتُ الّا جميــــــــــــــــــــــــل
يا اله العالميــــــــــــــــــــــــــــن
،،،،،،،،،،
لخادم الحسين ع
محمد الفهداوي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

تفجري انهارا ،، دمائنا مدرارا
شعيرة التطبير ،، ليس لها نظير
تفجري ،، تفجري

*****

بالعشگ كلشي مباح
بالتعب اي نستراح
سيدي ردنه السماح يا حسين

دمنه وي دمك قليل
والنزف يخجل ذليل
كل حزن لجلك طويل يا حسين

نلزم القامات ونشيل السيوف
وندري امك فاطمه تبجي وتشوف
حيل فوگ الهامه دگات الچفوف
نواسي زينب والدمى تسيل وتطوف

حيدر علي حيدر علي


لا ندرك الاسرارا ،، دمائنا مدرارا
شعيرة التطبير ،، ليس لها نظير
تفجري ،، تفجري

***

انه الجرح القديم
يا سراط المستقيم
واهب النحر العظيم يا حسين


صاحب القلب الحنون
حينما كان نكون
يا ضياءً للعيون يا حسين

من صبانا وياك ولحد المشيب
بينه حب حسين يحسين الغريب
صاحب الطعنات والشيب الخضيب
ظهر عاشوراء يا وقت العصيب

حيدر علي حيدر علي

نحن له انصارا ،، دمائنا مدرارا
شعيرة التطبير ،، ليس لها نظير
تفجري ،، تفجري

**


نطبر الراس ونصيح
حسين يحسين الذبيح
منطق الدم الصريح يا حسين


كل جرح اي كربلاء
ثوره سالت بالدماء
حان يا ناس العزاء يا حسين


يا حبيب الله مرمي اعله الرمال
كله طعن سيوف ورماح ونبال
يسيل دم الغيم بل دم الرجال
لا يزال الثار دائم لا يزال

حيدر علي حيدر علي


ستملئ الامصارا ،، دمائنا مدرارا
شعيرة التطبير ،، ليس لها نظير
تفجري ،، تفجري

*

انته اضوى من الشموس
يا بعد كل النفوس
وكل نزف هاي الرؤوس يا حسين

ثورة الحق ما تهيد
تبقى لحسين الشهيد
بالنزف هذا النشيد يا حسين

يا شعائر اهتفي طول السنين
ويا دماء الشيعه لابن الاكرمين
من دمى الهامه يشع لون الجبين
تنتهي الايام والباقي الحسين

حيدر علي حيدر علي

يا سيد الاقدارا ،، دمائنا مدرارا
شعيرة التطبير ،، ليس لها نظير
تفجري ،، تفجري

***

نبتدي وما ننتهي
يا ابن اعظم ولي
يا حسين ابن علي يا حسين

نهتف لحد الممات
انته يحسين الحياة
صوت ما بعد الوفاة يا حسين

اول وآخر عشگ هو النبض
يا صلاة احساسنه وصار الفرض
كل سبات بذكر دمك ينتفض
يا حسين وانته المحلي الارض

حيدر علي حيدر علي

يا خامس الانوارا ،، دمائنا مدرارا
شعيرة التطبير ،، ليس لها نظير
تفجري ،، تفجري


كلمات الخادم / رعد الفريجي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

حيا على الدماء
يا يوم كربلاء
حيدر حيدر حيدر حيدر

***

على الشيب الخضيب
على نحر الحبيب
صوت علا حزين
دمائنا تجيب

يا هامه تسلم والحسين اتطشر
تطبير يا شيعه واهتفو حيدر
هذا العزاء الباقي حد المحشر

يا صرخة السماء
يا يوم كربلاء
حيدر حيدر حيدر حيدر

**

على الدامي الصريع
على اليوم الفجيع
سنبقى لاطمين
على نحر الرضيع

فوگ الرمال حسين داسو صدره
والجسد عاري ودامي ينزف نحره
مأجوره هذا اليوم ها يلزهره


يا عاشر البلاء
يا يوم كربلاء
حيدر حيدر حيدر حيدر

**


سنرفع الكفوف
ونأتي بالالوف
ونطبر الرؤوس
بهذه السيوف

ما تبرد الجمرات تحرگ بينه
ليهسه من خيامهم تچوينه
فرض الدماء وعلجسد صلينه

يا عالم البكاء
يا يوم كربلاء
حيدر حيدر حيدر حيدر

****

يا عاشر النحور
رؤوسهم تدور
يا شاهق الرماح
يا حامل البدور

من فوگ رمحه وسابح بفيض الدم
راس الحسين اعله القنا واتكلم
والجسد من الطعن ذاب اتثلم

يا وقعة العناء
يا يوم كربلاء
حيدر حيدر حيدر حيدر

***

رؤوسنا تصيح
نفديك يا ذبيح
عزائنا دماء
سيفلح الجريح

هاي الشعيره وعالي ظل ألوانه
تطبير باقي وللممات ويانه
حتى بقيام الساعه تجري ادمانه

للعز والاباء
يا يوم كربلاء
حيدر حيدر حيدر حيدر



كلمات الخادم / رعد الفريجي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

حي على التطبير والشعائر
قد قامت الرؤوس والمناحر

**

يا شيعه هذا حسين وسط الحومه
مذبوح نحره أمسلبين اهـــدومه
عباس غيرهه التراب ارسـومه
زينب وحيده وحايره وملچومه

اين الكفيل الفارس المناصر ؟
قد قامت الرؤوس والمناحر

**

واسو العقيله وخل نشيل القامه
هاليوم لاجل حسين نطبر هامه
فوگ الرمال اضلوعه والعمامه
يا خير بعد حسين يـــــا سلامه

أن الحسين كعبة الضمائر
قد قامت الرؤوس والمناحر

***

بهدوم بيض نروح نرجع حمــــره
ونتمنى كون تشوفنه أمنا الزهره
ونگلهه فدوه حسين كلنه النحره
يم الحسن سجلينه يم الـــــــعتره

يا ليتنا ارض لها الحوافر
قد قامت الرؤوس والمناحر


****


يا عاشر الموت الجرح مــــــا ينشد
كل مـــــــــا تمر سنيـــــن هم يتجدد
بينه اعله زينب نار فنهه التبـــــرد
من شافت حسين اعله وجهه امدد

والسيف يذبح عالم البصائر
قد قامت الرؤوس والمناحر

*

هلنار مـــــــــــــا تبرد اذا مو بالدم
جرح الحسين بكل نفس تــارك هم
لو ماكو حرگه اعله الذبيح الاعظم
ألمن بعد نتسمى شيــــــــعه ونلتم

حب الحسين يغفر الكبــائر
قد قامت الرؤوس والمناحر


رعد الفريــــــــجي
محرم الحرام
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

اليوم يوم الحسين كلهه تدگ علهامه
اليوم يوم المذبوح محد وگف گدامه


يا يوم المصايب عاشر الموت
هذا اليوم بالطف صار تابوت
اخذ طول الحسين وهدم بيوت


يا شيعه طاح العباس نخسف صدرنه الليله
هذا الكفيل اعله الگاع وام الخدر تبچيله


خلي دموعكم تنزل على الطاح
على الفوگه الحچر وسيوف وارماح
بعد صدر الحسين شلون ينلاح


هاي الحوافر يا ناس داست يويلي عضامه
وين اليدگ فوگ الراس خل تفزع اللطامه


عمت عيني اليطيح ومحد وياه
ويلاه يلحسين بصوت ويلاه
يا نحره الشريف اليوم ننعاه


الله واكبر مذبوح والعطش ماخذ حيله
فوگ التراب بلا روح وام الخدر توميله


رعد الفريجي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

هوسات ليلة العاشر

زينب واگفه ابهليل وتعاين عله اخوتهه
بچت من شافت العباس نزل رايته شدهه
سمعت صوته من ايصيح يشبه صوت والدهه
تدري الضهر من ايصير باچر تضل وحدهه
ليل اهدعش بين الخيل خيمه ماتضل عدهه

(ومحتاره بت حيدر باچر محتاره)


طلع بين الخيام احسين شاف الخيل تسعترض
من كثر الهضم والغيض جفنه مارضه أيغمض
شال الشوچ من الگاع خاف اطفالهم تركض
نظر لخته العقيله اوگال الله اليستر اويحفظ

(لميهه من هسه اطفالچ لميهه)

فاخر علي الشبيبي

#قصائد_الامام_الحسين_ع


يا مـــهيوب يمبجي الزلـم كـلها
هاي الگوم تلها من الـــعرج تلها
ـــــــــــ

شد اعله الزلم والخيل والعـسكر
عيد امجاد ابوك المرتضى حيدر
ياهو الگابلك يحــــسين ما يكدر
ممنوع العبـــور اشحـــده اليـعبر
يا مهيوب يمبجي الزلـم كــــلها
هاي الگوم تلها من الـــعرج تلها
ــــــــــــــــــــ

هلا يابعد اخيتك اسرج الشگـره
دوس اعله الزلم يا ريحة الزهره
هذا الجيش اريدن تقلعه بخزره
اعرفنك سبع واعمامتك خضـره
يا مهيوب يمبجي الزلـم كــــلها
هاي الگوم تلها من الـــعرج تلها

ــــــــــــــــــــ

يبن امـــي التماده اگطع الـسانه
ادبهــــــم ابســــــيفك يا بعد انه
ما يرجــف گلب ما دامك اويانه
هلا بريـــحة ابوي البچه عدوانه
يا مهيوب يمبجي الزلـم كــــلها
هاي الگوم تلها من الـــعرج تلها
ـــــــــــــــــــــ

يلا انزل عليهـــم واذبح بكيفـك
سيفك جن علي ماينكسر سيفك
من هاي العساكر اخذ كل حيفك
من المرتضى يبـــن امي تكليفك
يا مهيوب يمبجي الزلـم كــــلها
هاي الگوم تلها من الـــعرج تلها
ــــــــــــــــــــــــ

حگها العدها مثلـك يخي تتشيم
من طرف الخيام ودرعك اتبـسم
زودك من علـــــي والاگتك تنـدم
لزمهم ســــــره عالسيف واتـقدم
يا مهيوب يمبجي الزلـم كــــلها
هاي الگوم تلها من الـــعرج تلها
ـــــــــــــــــــــ

تختـــار الچبير وتقتني الصـيده
مثل المرتضـى والمـشهد اتعيده
يبن امـــــي اريد العسكر اتبيده
انته البلحرب مــيثني طگ أيده
يا مهيوب يمبجي الزلـم كــــلها
هاي الگوم تلها من الـــعرج تلها


الخادم المقصر ناجي ابو كيان الصالحي ونسألكم الدعاء لي ولوالدي 2025

#قصائد_لسان_حال_ايتام_الحسين_عليه_السلام
#طور_يخيمات
،،،،،،،،،،،،،،،،،،،،،،/////////،،،،،،،،،،،،،،،،،،،،

معانات. بعدك يالابو عشنه معانات
نمشي عالجمر نكطــــع مســــافات
وحده اتـــٌلوذ بالوحـــــده اليتيمات

———————————///////////—————-

بين الصحاري. ابلا حمه. نمشي ودمع سبايه
وسفه. بنات. ال النــبي. يمــــشن بلا حمايه
فوك الجمر. داس الجدم. لا كافـــــــُـل ولرايه
ضلينه بس حيره. وعتـــب. ومشمسه العبايه
عالاتراب. عفنه الاهل يا ويلّي. عالاتراب
احنـــــه ازغــــــار يســـــبونه بلا أسباب
بس رغـٰـــــــــم الجره ما طاح الاحجاب

———————————////////////—————-

بين الدمع. بين الالم نشـــكي قصص المنه
نكتم بجينه. من العدو. لمن سمـــع شتمنه
منهم ولا. واحد حضر. كلهم مشــــٰــو زلمنه
والغالي نايم. عالترب. من شـوفته انحرمنه
الحسين. نام وعاف ايتامه الحسين
ضلت بالدمـــــع تتســـٰــله هالعين
راحـٰـٰـــٰـٰــــو بالغدر كـــــل الميامين

————————————///////////————-

جرح الليالي. والحــــٰــزن. ما فارك العقيله
عمتنه زينب. ياوضــــُٰـع. بس الدمع تسيله
ضلت وحيده. ابكربله. هيه البـــقت كفيله
عمنه الكمر. يم النــــهر. واكـــع منو يشيله
الاجفوف. طاحن عالنهر منه الاجفوف
ياهو اليحــــــضره ولحـــــــاله ايشوف
ويلّــــــــــــــي ما بقه واحد بالاطفوف

————————————////////////————-

وحشه الدرب. ما ينحمل. واحنه نون يتامه
بينه الزمن. قاسي اشكثر. خله الدمع علامه
يعثر جدمنه. من التعب. ماكو بعد سلامه
اهل الحميه. سافرو. ماضلو..... النشامه
يعودون. ماضنهم بعد لينه يعودون
ضلو عالترب غموضها .....العيون
اشكد نادينه بس ماضن يسمعون

————————————/////////////————

ضلينه بس. طرك الدمع. واحنه حرم بقينه
ويه الغرب. نمشي صعب. ومجتفين ادينه
تضربنه ناس. ابلا رحم. .تنشدنه عن ولينه
من نامو. اهل المرحمه. ضَل العدو يحدينه
من الاخيام. ماضل اي اثر باقي من الاخيام
راحـــــــــــــت كل زلمــــــٰــنه ذيج الاعلام
واحــــــــــــنه بالســـــــــبي ولديرة الشام
————————————/////////////————-

الخادم المقصر ناجي ابو كيان الصالحي
ونسألكم الدعاء لي ولوالدي

#قصائد_الطفل_الرضيع_يوم ١٠

ويلاه ويلاه عبد الله يذبحونه
ويلاه ويلاه عبد الله يذبوحنه
_
عبد الله ازغير طفو شمعــــة عمره
ما واصل عام ضامي بحسرة گطره
ميت عطشان غمض ابني اعـــيونه
ويـلاه ويلاه عـــــــبد الله يذبحونه
__
مومال أسهام نحري اوليدي بسكم
اسگوه عطـــــشان مالــحگ يتبسم
ورده إبلا ماي ذبلن شفـت اجفونه
ويلاه ويلاه عبــــــد الله يذبحونه
____
بس ستــــة اشهور ماكملها اسنينه
طٕـــير وعالماي دار اوليدي عيــــنه
شمسوي وهيج عطشان اتنحرونه
ويلاه ويلاه عبــــــد الله يذبحونه
_
ابني اعله الكاع طشو كل أحلامه
ليش إبلا مًــاي مات ولوعـه ايامه
ليـــــًـل العدوان بايگ صـوته لونه
ويلاه ويلاه عبــــــد الله يذبحونه
_
ماريد المـــاي بـــــس سالم اتــمنه
لحضن ام ايعود وبـشوگ اشتـمنه
شمعة دنياي ماعيشين مـــن دونه
ويلاه ويلاه عبــــــد الله يذبحونه
____
انه ام اوليد ذبحو كـــل فـــرحتهه
بالطف لجمات عاشت كـل قصتهه
من رد حسين محنــــــيات امتونه
ويلاه ويلاه عبــــــد الله يذبحونه
____

الخادم المقصر ناجي ابو كيان الصالحي ونسالكم الدعاء لي ولوالدي وللمؤمنين والمؤمنات

#قصائد_السيده_زينب_ع


ضلام ضلام مولاتي الله يعينج
_

عن يا جرح اكتب الج واجروحج اهواي
مفروض يم عون وعلي اعميها عيناي
ليل الشماته اشكد صعب يالفاكده الراي
من الله لا ينطي الشمر حارمكم الماي
عذاب عذاب جبتيها كل اسنينج
ضلام ضلام مولاتي الله يعينج
_

داست عله حسين اشكثر يا زينب الخيل
وانتي وحيده ابكربله مايبقه كل حيل
يا ليل بفراك الاهل يا و حشه هل ليل
يم النهر طاح الكمر و ادموعج اسيل
ونين ونين ينسمع من احسينج
ضلام ضلام مولاتي الله يعينج
_

ليلج يزينب يختلف ليلج معانات
يالفاكده اوجوه الاهل اهاتج آهات
من جاج يم عون الخبر عباسج المات
شفتج ركضتي من الخيم زينب مسافات
ركض ركض صوب الشريعه عينج
ضلام ضلام مولاتي الله يعينج


جم طفله منج تايه وانتي تلمين
مذهوله واعيونج تصب ماعندج امعين
محتركه الاخيام وشفت زينب تركضين
عالهزل بغياب الكمر شفتج تصعدين
هظم هظم وين اليسر ووينج
ضلام ضلام مولاتي الله يعينج
_

مولاتي معذوره الدمع لو طر الاخدود
عباسج ابصف النهر مكطوع الازنود
صاب السهم عين الكمر لا حتى والجود
حكج تونين المشو كلهم ترى احيود
وكت وكت شد الحبل جفينج
ضلام ضلام مولاتي الله يعينج

_
تمت بحمد الله واهل البيت ع
الخادم:ناجي ابو كيان الصالحي ونسالكم الدعاء

((اوداعك))


عثـــرتّ اوداعـــك بانـت بنضرتك
عطشان بس تارسـها حب خيمتك

تمســــح عـلى روس العيال بلطف
ومّفطـره مـــن الضــــمه شفــــتك

وللصحبه دور وللمحــبه عشــــــگ
ولا ماكو صحبه الشابهت صحبتك

وللخــوه مـــوقف للكـــلام الجـرح
والجرح چان الواضـــــح بدمعتـك

رغــــــم العدد مكسور بس اليحب
يتحمــل اليـــــولــــونه بمحــــبتك

نـــوعيه چـــــانت صحبتك سيدي
خــــــيريين جبرو بالعشك كسرتك

وتيممــــــــو بتــــراب ذاري الخيم
وشالو حســــرتك سيدي ومحنتك

شافو اعيالك تلتوي مــن العطــش
عصـــرو عيـــــــون وجابو العيلتك

ومــــــن وگفــو اگبال الخدر دنگو
يحسين فـــدوه وگالو الشيمــــتك

عبد زينب
محمد الابراهيمي

هله هله حسين وينه /// بالسيوف امكطعينه
===========================
١/
طلعت امن الخيمه زينب .. شابجه العشره اعله اخوهه
شافته مرمي اعله طوله .. ويمه انصاره اذبحوهه
صاحت ابصوت الفجيعه .. حسين روحه طلعوهه
ندبت ابدمع الرزيه … قالع البيبان ابوهه

هله هله حسين وينه … جسمه ويلي امسلبينه
==================
٢//
من على التله وتنادي .. بويه يا حامي الحميه
حسينك اعله الكاع مرمي .. و فوكه تلعب الاعوجيه
احضر ابساعك نشيله .. لا تجي أتشوفه رقيه
وحدي هالساعه تراني .. طرك الحبال البديه

هله هله حسين وينه … ابساعك احضر يا علينه
=================
٣///
صاحت الحره العقيله .. وصاحت اوياهه اليتامه
هله هله حسين وينه … وليش مسلوب العمامه
دمه جاري عالوطيه .. بيا ذنب سيد الكرامه
ليش ما واحد فزعله ..الفاكد اخوانه وعمامه

هله هله حسين وينه … ما بقاله من يعينه
=====================
٤////

ويه زينب يوم عاشر .. صاحت الدنيه بكبرهه
كبَّراهه اهواي موته … وهي خمسين بعمرهه
اومن كبر هول المصيبه .. ضيعت زينب نظرهه
وحيل ما ظل بيهه ويلي … اتشيل بي صاحب صبرهه

هله هله حسين وينه … بيوم عاشر ذابحينه
===============
٥/////

كلشي وي زينب تغيَّر .. والسمه أتغير وضعهه
على حسين المات ضامي .. نَزلَّت احمر دمعهه
والزجيه بكسر خاطر… كصدته ابكسرت ضلعهه
شوفت المكسور ضلعه.. رادت وشوفه الفجعهه

هله هله حسين وينه … فجعو الزهره الحنينه
==========================
✍🏻 كلمات موسى الخادم ٢٠٢٥

عزيز امه انسحك بالخيل
واجته اخته تلمه بليل
ماخذهه التعب كل حيل ما بيهه
__1__
من سابع سمه وينظرهه رب الكون
كعدت يم اخوهه ابلايه شوف ام عون
حارت جسم اخوهه اتلمه مدري اشلون
مسحوك اعله طوله وما بقتله امتون

حارت … تجمع ،،،
جسمه ابيا حيل
صاحت … يارب …
طشروو بالخيل

طشروو خيرك اعله الكاع ... وكل حافر اخذله امتاع
من اضلوع اخوي الداست اعليهه
............2............
أجت بس ما اجه وياهه يويلي الحيل
وخطوات الدرب كظتهه عثره بليل
متّربه العبايه وساحكتهه الخيل
كوه اجر نفسها والطريق اطويل

لطمت ،، ونت ..
لحسين اهواي
أوصلّت … وحشه ..
الموته ابلا ماي

توضت زينب بدمعات
اوقرتله الفاتحه لوعات
وصلاة الوحشه صلّتهه بنواعيهه


_3_
من بعد الدواره الدورتهه اهواي
وصلت يم اخوهه الفاكده اجم راي
اجته وجايبه وياهه طاست ماي
تكله اكعد اروي اضماك عوف اضماي

جيتك .. خويه ..
اتكله بعنوان
اكعد … واروي…
الجبد العطشان

جبت الماي إلك يحسين
بس راسك أجيبه امنين
اشربك ماي من النحر تاليهه


==4==
بدت تجمع بخوهه الما بقاله امعين
واول شي تجمعه رادت الضلعين
ما كدرت تلمهن مارديهن زين
ظلت بالأرض تحفر تدور حسين

بلكت … تلكه …
أشويه من المات
حفرت .. شافت ..
ضلعه ولجمات

يصب نحره اعله طوله دموم
وجرح شابك جرح ملجوم
يفز حسين كل ما مدت ايديهه
...............

5
فرشت شيلت امهه ابمصرع المذبوح
وكل ساعه تشد منة جرح مفتوح
واتوخر التراب البل نحر وتنوح
ومن كد ما بجتله منهه طلعت روح

صورت .. زينب ..
تبجيله عيون
خلت ،،، كلشي ..
ينوح اويه ام عون

حزنهه اخته اعله ذبحه اهواي
بكثر ما عطشوه للماي
لذلك بجت الكون ابواجيهه
...............

__6__
ابسرعه الليله عدة عالعقيله ابساع
ما لحكت تودع حسين خوش اوداع
ولا كدرت تعوفه امطشر اعله الكاع
الوكت من عدهه ضاع بخنصره الي ضاع

خلَصت .. ليلة
حادي المقتول
أدور … خنصر
ضايع بالجول

عليهه ابسرعه طر الانهار
أتعبت بس ما لكتله آثار
ضاع الخنصر وظلت مآسيهه
::::::::::::::::::::::::::::::::::
✍🏻💔 كلمات موسى الخادم

يا خيل ... اتمنيت مثلي اخوان عندج
يا خيل ... يموتون وتضلين وحدج
وما واحد بحالج
امن اسأل على احوالج
........................................
١=
لو عندج اخوان وعرفتي معنى الاخوان
جا ما سحكَـتي بضلع واحد جبده عطشان
ولا عالترب خليتي جسمه يبقى عريان
ولا طشريتي ضلوع صدره ترس الامجان

يا خيل /// شهكَـت الخوه الما شهكَـتي
يا خيل /// لو شاهكَـتهه ما سحكتي
حد كَـطعت اوصالج
امن اسأل على احوالج
...........................


ياخيل لو ضكَـتي حنان الخوه تدرين
جا ما عليتي صدر اخوي وهيبتي حسين
ولا حافرج كَـلبه مرد وانتي تسحكين
بس للأسف بالجاي اسولف ما تفهمين

ياخيل /// بس ما يفيد اوياج عتبي
ياخيل /// مثل الشمر ورمتي كَـلبي
أحزاني تحلالج
امن اسأل على أحوالج
٣===
ياخيل كلشي ابالي هسه يدور ويدور
كلهن بصوب وصوب سحكَـج هاي الانحور
تدرين ياهو القبلاهه قبل عاشور
وياهو اليجيهه البيتنه ابكل لهفته يزور

يا خيل /// جدي رسول الأمه طه
يا خيل /// أبهذا النحر طبعه الشفاهه
بس داسه خيالج

///////4


4/ يا خيل مو كافي السحكَـ فوكَـاهه الامتون
عل الأقل خليه اعله طوله اعياله يردون
حاجيني نيتج شنهي بله بغاليِ ام عون
تنثرين جسمه بكربله وتشوفه الاعيون

يا خيل /// مات وشبع موت الأحبه
ياخيل /// كافي عليه رمح اعله كَـلبه
اعله ابن امي اشجالج
٥=====
ياخيل هم منهم طلعتي رحمه ما بيج
شنهو الجناه أبن امي ليج وبيش ما ذيج
ما كسر كَـلبج حالته ولا هانت اعليج
ريت الله لا ينطيج لا ينطي الموديج

يا خيل /// كلشي الأحبه بي خذيتي
يا خيل /// أكبر ذنب والله جنيتي
يا شينت افعالج
امن اسأل على احوالج
/////

✍🏻 كلمات موسى الخادم ٢٠٢٥


//////

يا جداه ... حسين فوك الكاع جسمه امطشرينه
يا جداه ... بالرماح وبالسيوف امكطعينه
حيلي راح اوراح حيله
اوياي ما واحد يشيله
......1......
يا جد بحماك ... هالساعه انخاك
تحضر للطف بهمه
حسينك ذبحوه .... حسينك سلبوه
عالتربان ايصب دمه

ياجدي عطشان انذبح والنهر جاري بصفه
بجفه السده اعلية يجد وحسين وحده بجفه
امن الخيمه اعاينله يجر كوه النفس محبوبي
يا ويلي من كثر العطش مابي يحرك جفه

عالتربان .... امدد اعله الكاع ويعاين علينه
عالتربان .... اشما يريد ايكوم حيله ما يعينه
طيحته كلش ثجيله
......2 .....

داسو بالخيل ... وبرمح اطويل
طعنو كلبه وعاينته
لخيامه ايدير ... لرقية ايشير
هذا المنظر شاهدته

ما همه حافرهم كسر ظهره وكسرله اظلوعه
كل همه جان ابنيته ارقيه العلي مفجوعه
حاول يجيهه بس وكف ما بينهه وما بينه
جم ظالم المابي رحم مثل الشمر موضوعه

اه واه ....حاول اشكد يوصل الشبكت رقيه
اه واه .... بس عليه دارت خيول الاعوجيه
والرمح صوب دليله



.....3.....

متعوب اهواي ... الرايح والجاي
صار ايضربه اعله جبينه
لا وين اندار ... يرمونه احجار
حسين الدم صار بعينه

من كثر ما صابو حجر اتغيرت حيل ارسومه
من كثر ما دمه نزف اتروت ابدمه الحومه
ياجدي لو شفت الجره ماتبقى عندك دمعه
حسينك رمية اعله الترب سلبو حتى اهدومه

ريت اتشوف..حسينك بحر الشمس ظل جسمه عاري
ريت اتشوف ... دم نحر محبوبي حد الخيمه جاري
اشما اسولفلك قليله




...4...

ياجد حسين ... طفوله العين
وبدم المنحر سابح
مرمي اعله الكاع ... والخنصر ضاع
بين البايك والذابح

راسه بكتر جسمه بكتر فوك الترب اذاني
من كثر ما بي مثلو حسَّبته واحد ثاني
يا ويلي من كثر الرفس لحمه اختلط وي عظمه
بالحافر ابن امي انسحك والحبل سبي امتاني


ما ينشاف ... من كثر ما سحكت اعليه الحو افر
ما ينشاف ...انطبك صدره اعله ظهره بيوم عاشر
المن امشي واشتكيله


....5....

بخيامي النار ... اركض واندار
كل الخوف اعله ايتامي
خفت الجمرات ... تجوي ابنيات
حسين الذبحو كدامي

خفت العبايه تحترك والغرب تنظر حالي
ماهمني بالنار احترك الستر كلش غالي
راية كفيلي عالنهر ياجدي جيب الراية
خل بيهه اطفي المحترك واجمع بقايه اعيالي

درب الشام ... باجر امشيله وحيده ابلايه اخوتي
درب الشام ... بي شماته هواي فرحانه البلوتي
عندي ما ظلت وسيله
......
تمت
كلمات موسى الخادم

محد فزع زينب الــج ... ليش
فرهد زمانج كل هلج ... ليش
ليلة الحادي مساهره ...
يازينب المظلومه
....1....
يا ذنب بله الجنيتي .... بالحبال اتكيديتي
واخوتج مو يم خيامج
لحضه الي اتيسريتي

ياكبر صبرج يزينب ... شفتي ابو اليمه تسلب
وللخيول الاعوجية .... صار اخيج جسمه ملعب

يمه وصلتي ابيا تعب ... ليل
عالكاع طحتي مو عجب ... ليل
كل هذا شفتي وصابره ...

.....2.....
حرمه بين ازلام كثره ... شابجه العشره اعله عشره
عجب ايدج ما رفعتي ... يالدعائج الله يقره

ركضتج موسهله صعبه ... عثرتج معناهه ضربه
انتي ستر الله يزينب ... وسفه صرتي ابين غربه

ما لايك اعليج الحبل ... دوم
لا لايكه اعليج الهزل .... دوم
خدر الله انتي الطاهره
....3....
يل عليج الخيمه حركو ... ومتنج ابلا رحمه طكو
هذا كله اتحمليتي... الصعبه جانت صدره سحكو

غالي جان اهوايه عندج... ابن امج خال ولدج
حسين ابو سكينه ورقية .... ابطيحته خلاج وحدج

يا حيرتج بعد الذبح ... موت
ما ردتي يطلعلج صبح ... موت
يفجع دليلج منظره
....4....
صعدت التل ماهي هينه .. بس سمعتي حسين ونه
كلشي مامر اعله بالج .. غير كلمة يا اهلنه

من شمر كرب ينحره ... صحت حضريلي يزهره
حسين راح ايروح مني... الشمر جاثي اعله صدره

عالتل وكفتج تنحسب ... عام
كل لحضه بيهه تنكتب ... عام
شيبج كطعت منحره
...5...
من خلص عاشر محرم ... البيه كل امصاب ملتم
المصرعه ابيا حاله رحتي .. شفتي طوله السابح ابدم

رمح البكلبه سحبتي .... يالعقيله لو تركتي
وسهم المثلث يزينب ... جبده طشر ما عرفتي

لملمتي جبده والظلع ... اه
رويتي شفته بالدمع .... اه
ايعينج الباري عالجره

...6...
لوعت الحادي اشكبرهه .. مو سهل يصعب امرهه
جم مصيبه وكسره شفتي.. بيها ما يصعب جبرهه

حالج الله ايعينه حالج ... امجمعه اكبالج اعيالج
وكلهه صوت اتنادي عمه ... انريد ابونه ما اجالج

جان الجواب بصفنتج ... نار
تشبه الحركت خيمتج ... نار
وسط العيون مجمره

.......

تمت

كلمات
موسى الخادم

كاعده واحسب جروحك
روحي طلعت ويه روحك
امن السهام اشلون الوحك
يابن امي ... يابن امي

...1...
من خلص عاشر الدم وجلجل الليل
اطلعت ادور اعليك ما بين المجاتيل
اوصلتك وعاينتك امطشرتك الخيل
ردت الم طولك لكيتك منمرد حيل

يا كتر منك اشيله
يوكع الثاني واجيله
لملمت لحمك بشيله
يابن امي ... يابن امي

....2...

جيت ادور اعليك يبن امي أجيتك
ليك جابتني الحوافر تيهتك
سابح بدم منحرك خوية لكيتك
ابلايه راس ابلا عمامه شاهديتك

عالترب طايح رمية
بعيد عن خيمة رقية
اشد موقف مر عليه
يابن امي ... يابن امي

...3...

جيت الم جسمك يخوية شرد الم بيك
كلشي بيك امكطعينه وحيل ماذيك
تيهت نحرك امنين امنين رجليك
حرت من ياصوب اجيك اشلون الاكيك

وين صدرك وين ظهرك
ماكو راسك ظال نحرك
عندي ما ظل راي اخبرك
يابن امي ... يابن امي

...4...

جروحك هواي وصعب ياخوية عدهه
وموش مالت وصله يبن امي تشدهه
مسلبيك اعداك والمن هذا ادهه
مفتحات اجروح كلبك بيش اسدهه

كاعد الرمح اعله كلبك
خاف اسحبنه ويعذبك
ياكتر ت رتاح اكلبك
يابن امي ... يابن امي

...5...

كلشي منك ما بقى سالم حسافه
شاهدت جسمك على طول المسافه
ساعد الله كلب جدك حين شافه
عالترب نايم ومتغيره اوصافه

حركت الخيمات سهله
الصعبه جسمك بيش اغسله
الماي كلي اشلون احصله
يابن امي ... يابن امي

...6..
يالجنت من الشموس اتفي عليه
وينه طولك ذاك رد اجواب الية
كاصر اهوايه اشوفك يبو ارقية
اشويه منك باقي جا وين البقية

ودعيتك طولك اكثر
هسه اشوفك حيل اكصر
مكطعينك يبو الاكبر
يابن امي ... يابن امي

...7...

خوية شنهو اليوجعك حاجيني فدوه
سهم جبدك لو سهم فكد الاخوه
واكفه اكبالك تراني تشوف كوه
حيلي راح اوياك يا راعي المروه

بس جسد كدامي اشوفك
منسحك والدم يطوفك
الحافر امخلع أجتوفك
يابن امي ... يابن امي
.........
تمت

كلمات
موسى الخادم