كلمة يا علي واسمحلي أحچيها
صلاة العصر چنت شلون تنويها
وكلما تقره بالكوثر
شكثر مولاي تتحسر
يا علي
___
راحت فاطمة وظلّيت
بس شظال من عندك
علي وتدفن علي شتعود
بيش المگبرة تردّك
داحي الباب إنتَ وليش
بالباب انگطع وردك
ما قامت صلا لولاك
وصلاة العصر اتهدّك
بعدك بالإقامة وتنحني بكسرك
شحالك بالرّكوع شيعدل لظهرك
إنكسر وشلون يتجبّر
شكثر مولاي تتحسر
ياعلي
___
بعد الفاتحة مولاي
بصلاتك حيدر شتقره
يقره العصر بالله شلون
علي وما ينحني ظهره
گبل ما للقدر تختار
تون القدر عالعصرة
ترتّل إنّا [أَعۡطَيۡنَٰكَ]
الزّهرة وردّت بسطرة !!
بيا سورة لصّلاتك إنتَ تتقوّه
والقرآن كلّه ام الحسن هوّه
بيمن راح تتصبّر
شكثر مولاي تتحسر
يا علي
___
إحچي ويانه خلّي البير
بهمك ردنه نتشارك
شـ تسرّه ولسّابع جار
وصل دخّان أسرارك
بوصيّة ملتزم مولاي
وتسكت عالحرگ دارك
إلتزم بيمن يحامي الجار
لمّن ما فزع جارك
مولاهم بامر ربهم ولا چنّك
بكبر فضلك عليهم قصّروا عنك
من هالامّة يا حيدر
شكثر مولاي تتحسر
يا علي
___
لان كلمة عصر مولاي
الگلبك يا علي تجرح
(بعد الظهــر) كون نگول
كلمة (عصر) ماتصلح
حيره والله يا مولاي
ومثل هالحيره ابد ماصح
شتقره ورتّل البسمار
بصدر الزهره إلم نشرح
مع العسرِ يسر بس عصر البضعه
ما ويـّاه يسـر شو ختمته الصفعه
وبالمحسن مصابه اكبر
شكثر مولاي تتحسر
يا علي
___
الدّمع من يحجي بالأحزان
أفواه الفرح تسكت
شفتها بعينك الزّهراء
من تدعي ودمعها يكت
لإن مكسورة الأظلاع
رفعة إيدها تموّت
بصلاتك جنت بالله شلون
ترفع إيدك وتقنت
من اتشوف اديك وكَلبك بشوكَه
تتذكّر إدين الزّهرة محروكَة
ودمعك عالوجن يكثر
شكثر مولاي تتحسّر
يا علي
___
طحن الرّحى بيوم الكون
يطاحن روس قادتها
الرّحى امن تشوفها بالبيت
هضمتك تبدي قصّتها
تذكر بضعة المختار
يالما تنسى عشرتها
التَّنَفُّس يلجم الزّهراء
تدير شلون رحتّها
الله يعين كَلبك يا كُبُر جرحه
إذا تنظر لفضّة تديرها الرّحة
جرحك بالكَلب يكبر
شكثر مولاي تتحسّر
يا علي
___
الباب، النّار، والدّخان،
بيتك، محسن، وفضّة
كلشي يذكّرك بالصّار
فقدها ياهو اليعوضه
الزّجيّة حُجَّة الرّحمن
بسمائه سيّدي وأرضه
الف موته بألمها تموت
من تريد تتوضّه
بحياتك عشت آلآم وغصص مُرَّة
كل هذا وبادينك دافن الزّهرة
حزنك باقي للمحشر
شكثر مولاي تتحسّر
ياعلي
علي العابدي النّجفي
حيدر الموسوي

هاي الليله لو ردتو تگومون
لا تگولون : ياعلي
وي الزهره راح الحيل وشلون
يالتندبون : ياعلي
ياشيعه وليكم
انتو انطوه اديكم
يا علي
...
للحضركم انتو حضروا
واليمركم بيه مروا
الليله حيدر ما يدگ عالفقره باب
عالگبر خله العمامه
اليمسح الروس اليتامى
فزعوا انتم مسحو عنه راسه التراب
توه رد من دفن روحه
ووصل سابع سمه نوحه
شنو سابع جار وي هذا المصاب
هاي الفزعه لو ردتوا تفزعون
بالنعي كون : والدمع
وين العنده بيت يطيح العيون
لليلطمون : عالضلع
تظل عينه عليكم
انتو انطو اديكم
يا علي ..
...
على الكسروا من صدرها
ضلوع وتغيّب گبرها
خلوا حيدر يسمع اللطم الصدور
طلع شايل للزچيه
وشرجع من الرضيه
بيده صم تراب من ذيچ القبور
صيحوا يا الله اكبر
بلايا عثره يطيح حيدر
انطوا اديكم علي ظل بلايا نور
الرد الشمس رد خالي الايدين
من ام الحسين : والحسن
وين الطبر مرحب والرجع وين
بين الاثنين : شگد زمن
بالشده اليجيكم
انتو انطوه اديكم
ياعلي ..
...
منهو راح الليله هيه
لو مشه حامي الحميه
هذا ياهو الرد ولا چنه الامير
اليگول الدنيا غربه
من بعد فگد الاحبه
من بعد دفن الزچيه شبيه يصير
شگد غريب وهذا امره
يحچي وي الترب مره
ومره يحچي على مصابه ويه بير
يعني بدنيته ما ظلت احباب
وصار التراب : صاحبه
الگلب البير يشكي داحي الباب
شگد المصاب : عذبه
شظل منه علِيكم ؟
انتو انطوه اديكم
يا علي
....
سورة النور بدفنها
طفت ويلاه ياحزنها
فزعوا للقران بدموع وشموع
الليله جبرائيل كبّر
خالق لخاطرها قسور
ومشت مكسورة الخاطر والضلوع
كعد يم حامي الحميه
وقره بيت الابوذيه
وين محسن سگط ياب الدموع
(( لبست الحزن طول العمر يالباب
وفكري تاه ما بيه عقل يالباب
انشدج وين محسن سگط يالباب
يوم العصروا الزهره الزچيه))
ونوا لحيدره لو بيها تقرون
يالتخدمون : فاطمه
الليله القسوره بعازة اليبچون
والينادون : فاطمه
والفزعه ابچيكم
انتو انطوا اديكم
ياعلي ..
....
للبقيع الليله انظروا
وبالسلام عليه كثروا
يا دخيل جروح حماي الدخيل
من دفن باللحد كوثر
يعني حيدر دفن حيدر
فوگ روحه تراب ياميت یهيل
وصاح وينك هذا وني
(ايها الموتُ ارحني)
شلون اسد خلة الزهره بيا خليل
عجّل ببن ملجم يا وكت ريت
هالفجر جيت : بالقدر
اندل السمه وتيهت للبيت
شعندي خليت : يا دهر
كل البقه بيكم
انتو انطوه اديكم
يا علي ..
...

علي العابدي

يا فاطمة نظريني
...
بعيوني .. سطرتچ
بضلوعي .. عصرتچ
وبروحي لوعتچ : تقره آهاتي
امالي .. عالمچ
انفاسي .. ماتمچ
حسبيني .. خادمچ : هذي غاياتي
اظل يم بابچ واعتابچ بعيوني
تطيح دموعي والمحسن بچفوني
الدمعتچ وفقيني .. يا فاطمه نظريني
...
كل روحي .. بالنعي
وترقب .. مدمعي
حتى الگه بسمعي .. علي وياكم
تگوليها .. من اون
واسمعها .. بكل حزن
مو حگي من اجن .. لمن اقراكم
اهد الحيلي .. بكل ماتم .. واتامل
الي تعديني .. چن طايح .. من هزل
وبرحمتچ شمليني .. يا فاطمه نظريني
...
كل ماتم .. انتظر
چن قابض .. عالجمر
ماعدها من العمر : بعده ايامي
تزكّيني .. ونتي
تنجّني .. لوعتي
كل منبر .. كعبتي : ودمعتي احرامي
اطوف بوني .. وتلبيتي .. يازهره
عبد بالماتم .. كل همي .. بس نظره
اتلطفي ورحميني .. يافاطمه نظريني
...
والمحسن .. من هوى
وعبد الله .. الماروه
عندي اغلى .. من الهوه .. ماتم الوالي
ما عندي .. اي عمل
لا دنيا .. ولا اهل
بس دمعي .. للاجل : منتهى امالي
نذر لدموعچ .. ظل دمعي .. يتجارى
يطيح الغيرچ .. كون ادفع .. كفاره
قاسم قسم تدريني .. يافاطمه نظريني
...
من الدمعـــــــــه .. ما امل
وي جفني .. تمشي ظل
چن اني .. بالاصل : من حسينيه
هاي امي .. والعهد
ربتني .. والوعد
من لولت .. بالمهد .. تقره لطميه
تطيح الونچ .. دمعتها .. ودموعي
وسكن بسمـارچ ..من ونها .. بضـلوعي
من الخدم عديني .. يافاطمه نظريني
...

علي العابدي

توسطهم علي من خيم الليل
وبدوا يقرون ماتم يهدم الحيل
ايتام الزچيه وابو الايتام
ينتظرون فزعتكم يخدام
ــــــ
فزعوا يا خدام امهم
وگدوا شمعات الهضم
راحت الچان بضواها
خيط الابره ينلظم
ولو شيسوي شمعنه
شراح يظهر وشيظم
لو نخلي الشمس بيها
الدار وحشه بلايا ام
عمت عين الزمان الخله هالدار
بعد نور الزچيه بحاجة انوار
واويلاه من دورات الايام
ينتظرون فزعتكم يخدام
ــــــ
وينكم يهل التعازي
اتحشموا لهالمظلمه
حي على الظلوا بعدها
بدل الدمع دمه
ليل وايتام وابوهم
عقد بيهم ماتمه
وصار بيت النعي اسمه
الچان بيت الفاطمه
كل المانخاهم لا يجي يزور
الما حاضرله حيدر هذا معذور
وعلى الباقي توجّب فرض الالام
ينتظرون فزعتكم يخدام
ــــــ
مو بلال اليوم اذن
حي على فرض المحن
اكبر ايتام الزچيه
يعني افزعوا للحسن
يصيح يمه اشهد انّه
الفجر بعدچ جفن
والليالي بعد نورچ
گبر بعيوني بنن
الامس الچانت تگله بعد العيون
خدت منهن ضواهن يالتسمعون
دارت حيل بيهم والامل غام
ينتظرون فزعتكم يخدام
ــــــ
وهذا حال اللي تشمه
امه وي شم الهوه
انكسر چنه ضلعها
وراحت الچانت دوه
اليوم امسى بدار ظلمه
حسين مدري بنينوى
فرش سجادتها بلكي
يطيح من عدها ضوه
كلما يندب الها رحتي لاوين
يتدنّه البقيع لكتر الحسين
بس طبع الگبر ما يوصل ارحام
ينتظرون فزعتكم يخدام
ــــــ
وشبعد من اليتامى
وين بت راعي الشيم
مستقرها بهالعزيه
هناك يم باب الالم
توسدت بالعتبه بلكي
منها تشتم عطر دم
هذي زينب بعد امها
شلون بيكم ياخدم
على المنبر عجب عالزهره تقرون
يم الباب اصح يا من تلطمون
عدها العتبة كعبة والبچي احرام
ينتظرون فزعتكم يخدام
ــــــ
علي العابدي

قلع الباب مو اعجازه لا قدره
معجزته يهيل تراب عالزهره

ولا فد مسأله بفراش ابوها يبات
مبيته بصف گبرها المسأله الكبرى

العلى خد الشمس بصمات اديه ، لساه
على خد زهرته بصمات للسطره

كسر ظهر المعاجز يوم ردت ليه
بس ردة الباب الكسرت الظهره

علي بضربة الخندق عادل الثقلين
على سطرة الزهره شعادل بصبره !

الـ بأبعد سمه سهله يدلي الناس
اذا تيّه الداره بفاطمه انعذره

يخورس صوت مرحب حيل سهله عليه
الصعبه يسكت نوحها الحره

علي الغالب امس هالليله لا ، مغلوب
وخسر بس يا خسر حيدر خسر عمره

علي العابدي

يبني يحسين البيك صارن بيه
محني ضليت وانه هــم محنيه
الهد علخيام نفسه هـــــد اعليه
،،،،،،،،،،،،،،،،،،،،،،،،،،،،،،،،،،،،،،،،،،،،،،،
يالنايــــم بلايــــه ثياب
ودم اعله وجهك وتراب
شفرق الحوافـــر والباب
حاچيني حاچيني
يوليدي ياضـي عينياي
يالمثلي ميـــــت بهداي
ومتوارد بكلشـــي وياي
يحسيني يحسيني
اي وحگ طولك ييمه ودورت عيونك
الباب والحافــــر الغيـــر لوني ولونـك
شلوني يالتنشـــــد عليه انته الشلونك
گالو الناس ابنــــــچ متعبينه
وفوگ الرماح راسك مخلينه
التوجع هواي ثوبك مسلبينه
ياتعبنه ياتعبنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
سولفلي يحسين شصار
بالخيمه مــــن شبت نار
هم وحده طكها البسمار
وذاها يوليدي
هم مثلي ركضــن حفاي
هـــم الجمر چـان هواي
وياعين تشبـــــه عيناي
يالرايح منيدي
ياتعـــب روحي وسهره ياهـــــوه الريه
كلشي مر عليك بالطف نفسه مــــر بيه
  نچـــــوت نسوانك ييمه وانـــه مچويه
حرگ الخيام يبني شفته بعيني
شتم وسياط والجمــر چاويني
شويــــه يحسين بينــك وبيني
ياحبيبي ياحبييي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
منيتي يبني يكبرون
ابنك واخوك يشبون
وگبلك ييمه يهدون
وليدي ووليدك
چنت انتضرهم ايام
وگلبي اعله محسن محتام
فرحانه جنت ومانام
فرحانه بعضيدك
تالي بالبسمار يبني ذبحــــو احلامي
شلون مدري شلون بعده يخلصن ايامي
ردته عود حزام ضهرك يبني يالضامي
الچنت اتانيه بعيني ماشفته
بعتبت الباب وليدي ضيعته
تشيـــب الراس يبني سالفته
فارگني فارگاني
،،،،،،،،،،،،،،،،،،،،،،،،،،،،،،،،،،،،،،،،،،،
يالباقي بالطف محتار
لامن عشيره وانصار
وكلساعه عينك تندار
للخيمه للخيمه
يالمثلي محـــــــد وياك
من طحت ياهو الشالاك
مذبوح وكتـــــك خلاك
بألهيمه بألهيمه
يالطحت كوم اعله حيلك يابعد حيلي
خلي اتچيلك ييمه وانتـــــــــه تچيلي
شلون من ضليت وحدك عنك حچيلي
شصار وياك يبني الله يعينك
مدري مرتاح مدري متعبينك
بحر الشموس گالــو مخلينك
ياجرحنه ياجرحنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
ثگيل،،،،،،،

رسمت ابالي موضوع// حديث اضلوع وضلوع

سوالف بين الاثنين//ضلع الزهره وحسين
◯◯◯◯◯◯◯◯◯◯◯◯◯◯◯
بخيالي اضلوع متهشمه -ضلوع ام وابن كلفه
الزهره الباب عاصرها-وابنهه الحافر مچتفه
‏
‏عل الزهره ابچي لوعل الحسين حيره
‏الخيل سحگت جسمه مرتين  حيره
‏وانتي الدفع بابچ سطر عين حيره
          
الدفعو بابج انجاس//الحاظر كون عباس

كمر يملكله چفين //ضلع الزهره وحسين
◯◯◯◯◯◯◯◯◯◯◯◯◯◯
  عيني اتصورت منظر- ضلوع وباب متكسره
عمرها اثمنطعش ياناس- ليش بخدها اثر سطره
 
البسمار يخنك خنگة اليل صعبه
من الالم شافت اچم ويل صعبه
‏طاحت الزهره طيحت الحيل صعبه

انعصر  محسنها ع الباب // وصار موادع احباب

وترست بيتهه ونين //ضلع الزهره والحسين
◯◯◯◯◯◯◯◯◯◯◯◯◯◯
اتلث اشهر عله هالحال - بقت بالالم تتلوه
تگوم  تريد ماتكدر -الصلاه وتصلي بالگوه

اتحضر ييمه وشيله نعشي  يومك
اصعب ييمه اشوف كلشي يومك
الخيل متبقي الك شي يومك

تشوف الحرگ وصغار//وذكر حرگت الدار

وانت تنطي  ضلعين //ضلع الزهره وحسين

◯◯◯◯◯◯◯◯◯◯◯◯◯◯
يذبحوك بهذيج الكاع - التطشر بيهن اعيالك
ويسلبونك ييمه هناك - ولاواحد اجه وشالك

صح انه طاح اعليه هل الباب  يمه
‏يساوونه جسمك  وي التراب  يمه
‏كلهه سببها ابن خطاب  يمه
اليذبحك هم عمر راح //اجي وايدي اعله الاصفاح

ييمه نفس الاسمين //ضلع الزهره وحسين
◯◯◯◯◯◯◯◯◯◯◯◯◯◯
من دفعو عليه الباب -مات المحسن بطني
مالحكت اشوفنه -ولانومته انه بحضني

شمحلاته حضني لويرد كون  ابني
يكبر ويمشي بناكة ام عون ابني
يكبر اشوفه يكحل العيون ابني


كافل ردتك اصير //بوجهك احله تعبير
   
انت تعب الاسنين //ضلع الزهره وحسين
‏◯◯◯◯◯◯◯◯◯◯◯◯◯◯
سيد ‏محمد الهاشمي

أخوو ردتك لخوانك
ويصير بنصهم أمچانك
مهظمومه ييمه عليك
وتهظمني أدري مو شانك

أخيتك زينب أتاني تريد أتسمعك امناغاه
وعزيز الأخو حيل يصير علخيته ومو سهل فرگاه
تنشدني عليك هواي شبعد ونهزه كاروكه
أجتني ويمه گالتلي مو ميت عدل نتناه

زينب رادت تشيلك
وتناغيك وتلوليك .. بس ماقاسم الله تصير
ماواصل لحضن أمك
وسبحت بدمهه وبدمك .. بمصابك حالي موش بخير
000000000000 000000 000

يمحسن يادوه جروحي
بيك أتعلعت روحي
ضلوعي مايلچمني
بكثر ماأنته مذبوحي

تمنيته عدل ياريت وما ينشال تابوته
مو سهله علبوك تصير موتتنه فرد موته
يمحسن يلولد يبني بيه ولا تصير وياك
يامحله الطفل بالبيت يمه لو طلع صوته

ميت كلشي ماشايف
غده الشر يالمتت خايف .. من باب الخشب والنار
طمني يبعد الشوف
عليك ومو عليه الخوف .. بس لاجاسك البسمار
000000000000 000000 000

صوابك مايشبهه صواب
يالبعدك طفل مو شاب
وياأم هاي أبنهه يموت
أبطنهه وموته عصرت باب

يالطايح گبل لاطيح محسن خلصت حيلي
ماضل حيل للگومه وصحت يافضه لحگيلي
مو ضلعي ألي لاچمني ولاعيني الجرح أكبر
مابيه أدور الطاح علمحسن گومي دوريلي

مو ضلعي ألي لاچمني
يرفسوني وأصيح أبني .. بهيده بهيده يالوادم
سطرو عيني وبچيلك
ينرض ضلعي ودعيلك .. أموت أنه وتضل سالم
000000000000 000000 000

يلب گلب أمك أسم الله
أسم الله يبني أسم الله
يالميت رفس مو ماي
الله يعين عبدالله؟

ميته وياك وبچيلك وكثر شي هضمني أنته
ماميت عطش لاخوف وأحسن گلبي گطعته
شحاله حسين أخوك يشوف يموت بچفه عبدالله
وخوك الحسن هاظمني يجي يشمني ويون سكته

خافو لايلچموني
گامو ما يشموني .. بهدوم أمهم يشمون
أونن من جرح عيني
أون ولو هده اونيني .. من أسكت يخافون

رسول رياض

مولاتي فاطمة الزهراء عليها السلام كأني بها لمولاي المحسن عليه السلام

جنة الله   جوه رجلــيها ودفوا شـايل حضنها
جنة الله  هاذي باب الحاجه طلبوا امراد منها
امي من ترفع اديهــــا للدعاء
يفتحلها الباري ابواب السماء
⭕⭕⭕⭕⭕
آنه زينب بت علي وبت ام الحســين
يالمــوالي وارد اوصيـــك ابوصيتين
صلي لله وشيل امــك شــوف بالعين
وكل صباح اتبـوس رجليها والايدين
 
تدري بالبيت   جـنه امـــك الله خــــلاهـا وجعلها
تدري بالبيت   بي دفوا وحنيه من اتشوف ضلها
تدري لمك كل صباح وكل مساء
يفتحـلها الباري ابـــواب السماء
⭕⭕⭕⭕⭕
افــــا الامكــم يــوادم لا تگـــولـــون
اتبرڪوا ابشيلتها بيها مسحوا العيون
كل تعبها التعـــبت اعليكم تذكـــرون
يم مـــهد اطــــفالكم لمــــن تسهرون
 
امك اليوم    هيه لو موجـــوده خليها ابعيونك
امك اليوم    ليك جنه وعالسراط اتصير عونك
لو دعتلك اقسم ابحگ كربلاء
يفتحلها الباري ابواب الســماء
⭕⭕⭕⭕⭕
لمست امــك عافيه وبلسم للجروح
يلي لو تمرض تضل تبچيلك اتنوح
تدري لو مـن بين ايدك امك اتروح
ويه انفـــاسك تحسها طلعت الروح
 
شمعت الدار   امــك وبالك تطفيها ابچفوفك
شمعت الدار   تطفه لو امك تخليك وتعوفك
هاذي لو يرتفع من عدها النداء
يفتحلهـا البـاري ابــواب السماء
⭕⭕⭕⭕⭕
لا تهز ايدك عله الهــزت الكاروك
حضن تسهرلك اذا شافتك مضنوك
ماتردلك طلـب لــو ڪــلها يردوك
وباللحد يشفع رضــاها مــن يخلوك
 
امك احساس   كلها طيبه وكــلها حنيه وترافه
امك احساس   بالك اتعاملها هالورده ابصلافه
لو تمـرضت ودعتلك بالشفاء
يفتحلها الباري ابواب السماء
⭕⭕⭕⭕⭕
انت لو امـك بعـدهي عـدله مبخوت
تنحني ڪون الها لمـن يمـك اتفوت
ربي عين الينظر امه الغاليه اتموت
وام حظن دافي تنــام ابوسط تابوت
 
 
امك اتغيب   يعني صــــار ابلا ضـوه طلـعت نهارك
امك اتغيب   اتصير هاي الدنيه وحشه وظلمه دارك
هاذي من تطلب مراد ابكل بلاء
يفتحلها الباري ابـــواب السـماء
⭕⭕⭕⭕⭕
آنـه لمــن كسروا ابصـدر امي لضلو؏
طفــوا ابعمري وحياتي كــــل الشمو؏
وگلـــبي مـــاتطفه لهيبه ونـاره بدمو؏
والله صعبه البل عزيز اتشوفه مفجو؏
 
 
راحت الخير   والمـن آني راح اصيحن يمه يمه
راحت الخير   راحت الچانت على الاكوان رحمه
راحت الچـــــانت دعاء الاتقياء
ويفتحلها الباري ابواب السماء
💢💢💢💢💢💢💢💢💢💢💢💢💢
وليد المندلاوي

لا ضل ولد لا ضلت ضلوع
بيبان كلها مطوگه جذوع
ما عندي غير الباب موضوع
يا فــــضــــه. سنديني
................
يا فضه من بيتي حترگ ضليت الوذ ابابي
الحق يفضه ينحجي ياذيني حيل صوابي
بسمار ينبت بالضلع ما جان ابد بحسابي
طاح الولد مني لجن. يا فضه ضل حجابي

ضلعي انكسر بس ضل الحجاب
لــجـــن امـــانه يـــوجع الــباب
يطگني الصنم وبأرذل اسباب
يا فــــــضــــه. وبعيني
،،،،،،،،،،،،،،،،،،
يا فضه من ذاكَ الدفع محتركه لسه جفوفي
من غير سطرات النذل الفارگت منهن شوفي
نكرو ابوي اعظم نبي وتــجاهـلــو مـعـروفـي
سباهن احروفي الوثن البيهن قداسه حروفي


ما شفو من ضربوها المتون
بأشرف نبي گامـو يـسـبـون
بيمن بعـد يا فضـه يشــفون
يا فــــــضــــه. ومنعو ونيني
...........................
من كُنت مولاه السبب يا فضه حركو داري
جي طه نصب حيدره وبأمـر مـن الـبـاري
جعلو سقيفه وخططو للـبابِ والبـســمــارِ
حاوطو كل داري بحطب وبهاي ربنه الداري

فضه بحــقـد مـليانه الگــلوب
ومن هالحقد محسنه مَصيوب
چا بلا طـــفلي بيــش مـطـلوب
يا فــــــضــــه ذبحو حنيني
.....................
بفراشي خليني بعــد يا فضه وشـل حـيـلي
كل ما اصد البابي احس فضه الولد يوميلي
هستوه عمري ثمنطعش هذا الكسر مو جيلي
بنهاري يوجعني الضلع وتلوه منه بليلي

تدريــن تـرفه فضه هالروح
صغيره وجبيره عني الجروح
والدمع من صوابي مفضوح
يا فضه ياذيني



حسن يونس التميمي 📝

لحن يا فضه ملا معد الكعبي

(موشح)


أيـعـينـك الله يا علي فـحل الـفـحول
يوم عــينـك شـاهـدَت ضـلـع الـبـتول

                                     *---------------*---------------*

أشـكبر صبـرك سـيـدي يا بو الحسن
أخـذ مـنـك فـاطـمـة بـسـاع الــزمـن
فـتـح باب اعـليـك حزنـك والـمـحـن

وصار دمع العين بخدودك هَطول

                                     *---------------*---------------*

ادري هــد حـيلـك يـكــرار الــضـلــع
وخـتـلـط مـاي الـغـسـل وي الـدمـع
راحت الچـانـت ضوه البيتـك تـشـع

ولتهب گلبك على بنت الرسول

                                     *---------------*---------------*

اثمنطعش عـام الـعـمــر مـثـل الـورد
خـلـوا بخدهه عـلامـه اهـل الـحـقـد
اشـلـون لـو خـليّـتهـه بـوسـط اللحد

وتدري بحزانك بعد ما ضن تزول

                                     *---------------*---------------*

يا علي بـحزنـك تـره ايطول العمر
مـن بـدايـات الـضلـع حـد الـطـبـر
ألبس بفـگـد الـطـهـر ثـوب الصبـر

اسنين عمرك بالجرح والهم تطول

                                     *---------------*---------------*

الـفـاطـمـة گـلبـك حـمـل نـار وألـم
وصـار بـسمـار الضلع مـثـل السهم
أصـبـر ورب الـعُلـى هـوه الـحـكـم

بغير صبرك سيدي ماكو حلول

                                     *---------------*---------------*

انـت حـامـي ادخيلهه وليث الحرب
الصـار شـفتـه والـجـره كلش صعب
بـاقـي بـالـزهـره أثــر مــن الـضـرب

وما رضت ام الحسن يمك تگول

                                      *---------------*---------------*

الـلـه يلـعـنـهـم تــره الـگـالـوا وأن
الـخلـوا بـروحـك يـكـرار الـحـزن
بعينك الدنيه صفت تـشبه سجن

والسبب كلمن اجه الدارك جهول

                                       *---------------*---------------*

✍خادم الـزهـراء ع

الشاعر رعد الجريخي

@HxzEU1
#قناه_نشر_القصائد_المنبريه
#الناشر_مصطفى_المياحي

اليالي الفاطميه ثگيل

ياروحي گلبي نسحن . حاجيني يم الحسن
مو وكته موتج
بالگوه گمت وطحت . يافاطمه شما صحت
ماسمعه صوتج
،،،،،،،،،،،،،،،،،،،،،،،،،،،،،،،،،،،،،،،،،،،
يالزهره شسويتي بحالي  متحير ودموعي تسيل
هاذ انه المحد يگدرله   خليتي من يمشي يميل
مايعرف بيه المو عاشگ  والماعايش سهر الليل
من تحب ابنادم ويعوفك  جيب الي داينلك حيل

يالزهره تالي الوكت  . شذره بصحاري ضعت
وجروحي بيه
عشرتنه جانت عشگ . ويلمنه حب الصدگ
ها يالزجيه
،،،،،،،،،،،،،،،،،،،،،،،،،،،،،،،،،،،،،،،،،،
خليتيني بحسرت روحي  ومااندل جروحي منين
لو تدرين شلوني خلافج  يالزهره خلافج موزين
يالعمرج مو مال اموادع  يل مامتعديه العشرين
شلي بدنياي الما بيها   شمت عطرج يم حسين

وداعج فلا ينگدر . يلجم دليلي الهجر
والفرگه صعبه
بعيوني دمعي يهلي . خليتي حيدر علي
ايده اعله گلبه
،،،،،،،،،،،،،،،،،،،،،،،،،،،،،،،،،،،،،،،،،،،
وياج الدنيه اشمحلاها  كل ماشوفج ارجع شاب
هسه ابلا راي ومتحير  لجمه بگلبي وجهي تراب
عافيتي بفگدج منهوبه  ضل ينزف جرحي وماطاب
لو ادري يطشر عشرتنه  وعيونج جاشلت الباب

خيمتنه عگبج هوت . وايامي كلهن طفت
هاي المصيبه
يم بيتي راح الفرح . نبض الحنان انذبح
روحي غريبه
،،،،،،،،،،،،،،،،،،،،،،،،،،،،،،،،،،،،،،،،،،
مابيه التشييعج خطوه  ثگلانه جدامي وذبلان
اليسندها الدنيه بعافيته  تاليها تسنده الحيطان
مخنوگ ورايدها انفاسج  وينج يا عطر الريحان
مو ورگه المگطوعه الليله من حيدرگطعو شريان

من روحي طايح وتد . شحمل يفاطم بعد
غربه امنياتي
مشتاگ اشمج عطر . ومنين اجيب الصبر
خلصت حياتي
،،،،،،،،،،،،،،،،،،،،،،،،،،،،،،،،،،،،،،،،،،،،،
هاي اخر لحضه بعشرته ونتوادع بدموع الشوگ
مثل الباب التسعر ناره  دلالي اخلافج محروگ
غسلتج بدموع عيوني  وتشييعج فارغ ميلوگ
شلتج وتنفس بالگوه  مخنوگ يشيع مخنوگ

اخر وداع ابدمع . والكسره جانت ضلع
ينزف مواجع
للبير ابث الحزن . ذابل يزهره الجفت
بكثر المدامع

العبد ابوفايز الرافضي
الفاتحه على روح والدي

@HxzEU1
#قناه_نشر_القصائد_المنبريه
#الناشر_مصطفى_المياحي

يالعايش قليل وميت هواي
يموت النهر من يودع الماي

والحيل والليل يخلص وي الادموع
وميت هواي
ــــــــــــــــــ
تضيگ الوسعه بيك وللگبر تمشي
وكم عثره بدرب واعليك من يغشي

يالرايح وراد وحاير بأمرك
يالدمعك متاع شباقي من عمرك
الشيب وياگ رفگه وصاير شبكرك
الله ياعلي يعضملك بأجرك

يم سابع سمه ومسموع الاونين
ينفت الحجر اهاتك اسنين


والحيل والليل يخلص وي الادموع
وميت هواي

ــــــــــــــــــ
تتلفت صرت لا زينب تشوفك
النزف من كل مجان وحته بحروفك

متلثم ولكن موش للفقره
متلثم ورايح كاصد الزهره
الروحه تنكسر ماينجبر كسره
المفارك الشوف الظلمه متعذره


حدب حته ضلك من يماشيك
متألم علي ومبين اعليك


والحيل والليل يخلص وي الادموع
وميت هواي
ــــــــــــــــــ
متعود تشوف الزهره يوميه
تذكرك بالنبي شوفت العلويه

تصبح بالزجيه ولصلا رايح
الله بفاطمه للعالم يصابح
يسامح والضلمها ابد ميسامح
ودمعك ياعلي من الجفن طايح

اذوك بفكدها بحزن والالم
واذيت هالمصيبه بقلبك اسهام


والحيل والليل يخلص وي الادموع
وميت هواي
ــــــــــــــــــ
خلص شوف عينك غيم وتلاشى
وحزنك وي عمرك كام يتماشى

قريبا ياعلي هم شفت المرايه
شفت وجهك بحزنه تارس ولايه
لعزائك ولمصابك ترتفع رايه
وصوت الكون كله لفاطمه اقرايه


دم تبجي السمه لو مات مظلوم
والقلبه حجر هم يبجي هاليوم


والحيل والليل يخلص وي الادموع
وميت هواي
ــــــــــــــــــ
مايدري البشر والله بوجع غيره
الالم بس صاحبه يعرف تفاسيره


ماياذي الجرح بس صاحب اجروحه
ومايلام فاگد من يجر نوحه
المودع عزيزه شاضله بروحه
تلجمه ادموعه مثل الجرح وملوحه

تره التفكير ويا يكثر الشيب
لان حسبات تبقه تودي وتجيب


والحيل والليل يخلص وي الادموع
وميت هواي
ــــــــــــــــــ

زين العابدين الشمري

@HxzEU1
#قناه_نشر_القصائد_المنبريه
#الناشر_مصطفى_المياحي