أخبرچ يالحبيبه .. عشت بعدچ غريبه
تشاركنه المصايب .. مصيبه اتجر مصيبه
~
ضلعچ المكسور بوّابة حزن
مثل ونّاتچ غده گلبي يون
الهجم صوب الدار والجاوب (وإن)
طب عله خيامي وشعلها بلا إذن

نفس نار الرزيّه .. دوت بالغاضريه
المخيم شب لهيبه ٠٠مصيبه اتجر مصيبه
~
مثل محسن يُمّه عبد الله انچتل
اشتاگ چنه العمه مذبوح ارتحل
بين بسمار وسهم فكري انشغل
عودي من هاي النوايب هالذبل

طيور الجنه الاثنين .. المحسن وابن الحسين
مصيبتهم رهيبه ٠٠ مصيبه اتجر مصيبه
~
اذكر القرط الوگع فوگ الترب
وعله خدود الارض ظل دمچ يصب
شفت منظر منه ايشِيب الگلب
شافت اعيوني رقيه تنسلب

بمدامع وابواچي .. اذكرت ذيچ التراچي
رقيه اتظل سليبه ٠٠مصيبه اتجر مصيبه
~
ابنچ السجاد بحبال انچتف
مثل ابوي الحيد متچتف وسف
عيني وي عينچ دمعهه يمه جف
وانتي محنيه العلي حنو السعف

ذكرت بگيد ابويه .. گطع چفين اخويه
غيور وكله طيبه ٠٠مصيبه اتجر مصيبه
~
اتوارثو نفس السياط اهل الغدر
چنه نفس السوط والدم والكسر
السوط گنفذ يمكن اهداه للشمر
وگال خل يضرب امتون ام الخدر

وعله متوني تراهي .. سياط أهل الدواهي
اختنگ صدري بنحيبه .. مصيبه اتجر مصيبه
~
يمه بسمارچ كُبر واصبح سهم
والهشم ضلعچ رجع شگ الخيم
وانرسم بعيوني منظر كله دم
امن المدينه الكربله حيلي انهدم

الاجاچ بناره هاجم .. سطر خد الفواطم
ابو الغيره شيجيبه .. مصيبه اتجر مصيبه
~
حيل لو عندچ تعالي النينوه
شوفي گلبي شلون بالنار انچوه
صار بس دخان من شح الهوه
وابو عبد الله ضامي ماروه

انطبگ ظهره اعله صدره .. بسحگ خياله عشره
بگت جثته خضيبه .. مصيبه اتجر مصيبه
~
حيدر بشار الدراجي

فاطميه انفاسي 
بس حُسين ابراسي 
......
انه كل عمري حسيني وفاطمي ابجلماتي
مِبحِر وحزني السفينه والشراع اهاتي 
دربي من باب الزجيه وابتدي خطواتي 
و اوصل المشايه وامشي لكربلا بدمعاتي 

واعتني لنوماسي 
بس حسين ابراسي
...
لو كتبت اعله الذبيح بصدري يسحك حافر
ولو كلت عصروها فاطم انعصر ما اكابر 
صحت يامهدي تعال وخلصن جم باجر 
بروحي باين انكساري وبيه كسرة خاطر 

وبيه لامت ناسي 
بس حسين ابراسي 
...
الزهرة حصني وكل اماني وانا لايذ بيها
حته يومي يبدي بيها وينتهي ابطاريها
الها عايش كل حياتي وعايش انه اعليها
غاليه عندي الخدامه وبالعمر شاريها
خدمتي نبراسي 
بس حسين ابراسي
....
هوايه سألوني اعله كلبي بيا سبب وناته
وانه شاعر  بيه عاشر ماطفن جمراته 
شاعر و ذبحو حبيبه و هوسو شماته 
يعني ثوره  ابروحه صارت والسلاح ابياته

وانه هذا احساسي 
بس حسين ابراسي 
....
كلت  اريد  اكتب جروحي اعله  النهر والضفه 
وارسم بصفهن مخيم عالعطش بي لهفه 
آسمعت صوت امن الزجيه ايكلي اكتب وفّه
أكتب العباس جرح ابفاطمة ومايشفه 

ومنهجي عباسي
بس حسين ابراسي 
...
لوكتبت اعله الزجيه بالدموع اتوضه 
ولمن اوصل للمصيبه وللضلع والرضه
كلبي يتخطه المسافه وبيه يسرع نبضه
يوصل الباب الزجيه ويوكف ابصف فضه 
وابقه الها امواسي
بس حسين ابراسي 
..
من اگظي الليل اكتب والمدامع جمره
دمعي  رادود  وجروحي الخادم الدك صدره 
كلبي منبر  نبضي شاعر  بالمخيم  يقره  
مجلس وللزهرة حتما تعتني وتحضره
بالمجالس ساسي
بس حسين ابراسي 
......
... زهير الابراهيمي 

[[شوط كربلائي ]]
>>>>>>>>>>>>>>>><<<<<<<<<<

ياصاحب الثار اشلون.....تنسه الظلع ومصابه
ماچانت ابد عالبال.....هجوم الطاغي وحسابه
*******************************
تدري ابهجمة الأصحاب.......يوم العصرو الزهره
ابگلبك چم جرح موجود....ولسه عايش الجمره
الله  يعينك  ابيا  حال......شفت ابعينك العصره

كلها   اتوافدت   للدار
صارت هجمة الأشرار
تدري  ابلوعة البسمار

بيدك تصلب  الجبتين.........وصل الدار  بطنابه
*******************************
هذوله زمرة الأشرار ....هجوم الدار  ما تنسه
معروف الدفعهه ايصير........جهنم قرر  ابنفسه
يم حيدر يضيع اشچان.....والله ماطلع حسه

معروف   الحقد   بيهم
اسود   كله     ماضيهم
بغض نعرف اساميهم

اثنين الهجموا اعله الدار.....استغلوا طه ابغيابه
************************
جرحك  ما برد  لليوم.......آثار  السقيفه  اجروح
يالمهدي تعيش الآه.....بيك اشگد نعرف النوح
ياهي الأكثر  الچمات.......يومك ما نسه المذبوح

شفتهه الصوره مرسومه
ماتت    والله  مهضومه
تعيش   الونه   مظلومه

يمچيد  النوايب وين......تدري الظلع وصوابه
******************************
نهار المر  عليك  ادموع.....ليالي الحسره والوعه
شفتهه الدنيا ظلمه اتصير...بيها الزهره المفجوعه
وحيدر ما نساها  الباب.......يمهه صبن ادموعه

بنيت من الدمع احزان
صعوبه  فرگت  الخلان
مصيبه يشرح الوجدان

كل هذا اليصير انشوف....صارو صحبته اذيابه
*******************************
بعدهي الدمعه ابعيونك......تشرح قصة البسمار
عاده العرب بيها انشوف.حرمه وماتطب لدار
لازم من يجي استئذان..الله اوصى بيها اسرار

تعيش  ابنايبات  الهم
ظلع من عندك اتهشم
ونينك  ماخلص مأتم

عجل سيفك البتار.........يريد  الثار طلابه
*******************************
تمت بعون الله تعالى الشاعر_يوسف_الفتلاوي

حُزني على الزهراءِ سَرمَدْ

والليلُ في عَيني مُسَهَّدْ

وابگلبي جرح ام الحسن لاخر سنيني

ــــــــــــــــــــــــــــــــــــــــ

بـــــگليبي شبت نار ما اظنها تبرد
حين ادفنتها ابليل بضعة محمد
تخنگني سكرة موت وانفاسي تخمد
من اذكر ام احسين سطروها علخد

مثلي ويظل عايش عجيبه
الدافن حبيبه وبت حبيبه
علذڪره عايش والدمع لِيچوِّي عيني
وابگلبي جرح ام الحسن لاخر سنيني

ــــــــــــــــــــــــــــــــــــــــــــــــــــــــــــ

اگبالي تِبين ابخير چانت وضعها
ومن اطلع امن الدار تلزم ضلعها
رغم الڪسر والآه تخفي ابوجعها
اتخاف انلچم لو شوف هامل دمعها

تبعد اذا اتدنه منها
خافن اصد لطمة جفنها
ونّتها بالسر زيّدت نوحي او ونيني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــــ

غَسِّـلنِي فوگ الثوب وصَّت وِصيَّه
ڪسر الضلع ماجيس رادتني هيَّه
شفت ابمتنها آثار زرگه وشِجِيَّه
سطره وضلع ومتون ضَـمَّـت عليَّه

ياكسرة اوداع الأودها
اتمنيت انام ابنص لحدها
كل لحظه الها وللنبي يشتد حنيني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــــ

بيها الگبر وصّيت وادموعي تمطر
گبلك عصرها الباب ماحاجه تعصر
وسط الچفن يَـتراب ودَّعتك الدّّر
ادفنها بالسر جيت حافظ على السر

عندك أمانه بت محمد
لاتلچم الها المتن والخد
دين ابرگبتك فاطمه واحفظلي ديني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــ

ولداري من رديت حيره اشعُظمها
أمشي وأرد اردود والگاني يمها
خوفي ابغيابي ايزيد فاطم ألمها
خوفي الچفن لا جاس ضلع ولچمها

صوت اسمعت زيد نحيبي
لـــزينبنه أرجع يا حبيبي
ابمحرابي گعدت وارجع الڪُم ترتجيني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــــــــــ

زينب شفتها شلون تنحب يَـ يُمه
من دمعي عيني اعليچ تاليها تعمه
لحضانچ امن اشتاگ ياحُضن اضمه
رديلي لو لحظات عطرچ أشمه

يلـ عُمر الورود ورحلتي
بعدچ حرام اتهيد ونتي
علـ ونّه عهدي ليوم عاشر من تجيني
وابگلبي جرح ام الحسن لاخر سنيني

ـــــــــــــــــــــــــــــــــــــــــــــــــــــــــ

سيد علي عبدالزهره الناجي

يَــباب الــ لاذت ابــسدَّه العفيفه
وراك اشسوت اصحاب السقيفه
سولف يباب اشصار
من هجمو اعله الدار
اصحاب السقيفه

ــــــــــــــــــــــــــــــــــــــــ

حَــــدِّثْ يَــــباب البتوله ، بعد الرسول وغيابه
عَـــــلزهره ياهو التجاسر من صُحبته المو صحابه
باب ام حسن ظل يسولف ودموعه صبت سحابه
گال ابــــــــحطبهم اجوها ما رعو حگ القرابه

گبل لا يندفن جُـثمان ابوها
ولوها وُ لوعوها وُ روعوها
بـَـعتابي شبّو نار
من هجمو اعله الدار
اصحاب السقيفه

ــــــــــــــــــــــــــــــــــــــــ

اصعب واشد المواقف من لاذت الزهره بيّه
دفعوني حد ما جذوعي كسرت اضلوع الزچيه
بسماري صــوّب گلبها وانظرها طاحت رميه
محسنها مات وتشوفه فوگ الترايب ضحيه

يَـريته ابگلبي بسمار الفجعها
ولا يلچمها وايهشِّم ضلعها
موتها هلــــــ بسمار
من هجمو اعله الدار
اصحاب السقيفه

ــــــــــــــــــــــــــــــــــــــــ


كون الله لا ينطي قُنفذ ابلا رحمه بالصوط اجاها
يضرب متنها وُ وجهـها واتسمعه يشتم أباها
خالد شريك الــجريمه بالــــغِــمِد حيل ألماها
والثاني علـــــــ خد صطرها والقُرط شاهد تراها

قسم أقسم وحگ شيبة مُحمد
التعده اعله الطُهر عن دينه مُرتد
خل ما فزع لا جار
من هجمو اعله الدار
اصحاب السقيفه

ــــــــــــــــــــــــــــــــــــــــ


من خذو حيدر وليها متگـيِّد اهل الـغُوايه
محنيَّـه طلعت تدافع وحدها صـارتله رايه
خلّـو ابن عمي والا ادعي وتكون النهايه
معناها اول مُطالب فاطمه ابـحق الولايه

يَــبت الرحمه سلمان اليگلها
دعائچ يفني هاي الدنيه كلها
يــــــــــا عازة الفقار
من هجمو اعله الدار
اصحاب السقيفه

ــــــــــــــــــــــــــــــــــــــــ


بعد الجره ومر عليها ايام عاشت قليله
مثل الخيال الروايه توصفها صارت نحيله
مَعصُوبَةَ الرَّأسِ حُزناً ، مِنهد ركنها وعليله
بيت الحزن يشهد الها غارگ جفنها ابمسيله

تشم بتراب ابوها العدها غالي
وتگله ايامي من بعدك لـيالي
يابويه شحچي أخبار
من هجمو اعله الدار
اصحاب السقيفه

ــــــــــــــــــــــــــــــــــــــــ


گبل المنيه اعتنوها الغصبو فدك والـخلافه
بالچذب لبسو ندامه واعتذرو بكل صــلافه
ماقبلت الهُم عذرهُم الجاني اشيفيد اعتـرافه
وكلمة الـ ( آسف ) مُحَالاً بيها الضلوع اتّــشافه

يَرب نادت يمن تعلم شجوني
هذوله العذبوني وأغْضُبوني
ايطلبوني چنهم ثار
من هجمو اعله الدار
اصحاب السقيفه

ــــــــــــــــــــــــــــــــــــــــ

سيد علي عبدالزهره الناجي

يا فاطمه احروفچ نور
بيها الگلب يتوضه

ــــــــــــــــــــــــــــــــــــــــ

يافاطمه ابمجلس عزاچ اتوسل
اخويدم لخادم خادمچ اتسجل
تاج المُلك ، ثوب الخَدم منه اجمل

ومعذوره اذا مريم يوم
علخدمه تغبط فضه

ـــــــــــــــــــــــــــــــــ

يَـ ام الحسن طُوبى لَهُم خدامچ
باچر تدخليهم عَدَن گدامچ
اتلث تشهر النصبو عزاء ايامچ

انتي الـــعليهم ترضين
والباري عنهم يرضه

ـــــــــــــــــــــــــــــــ

يَــزهره وابحرگه اليصبلچ مدمع
شافع يجي ابيوم القيامه امشفّع
فوگ الصدر لطماته كلمن تطبع

فوگ الصراط امن ايفوت
يعبر بقل من لحظه

ـــــــــــــــــــــــــــــــ

عن مثلچ المثلي اشيسولف محتار
شحچي ابمقامچ وانتي كلچ اسرار
بولايتچ لا ما تمس جسمي النار

جنه وقصور وانهــار
للحبچ الله ايعوضه

ـــــــــــــــــــــــــــــــ

يافاطمه الدفعو على اضلوعچ باب
دورنا بيهم واكتشفنا الاسباب
عدهم مشاكل بالرحم والاصلاب

يَـــــــــزهره مو شرعيين
أنفُس حقوده ومرضه

ــــــــــــــــــــــــــــــــــ

يَــــزّهره نفس الحرگو اعليچ الدار
باچر خيم زينب يحرگوها ابنار
باچر عساكرهم على ابنچ تندار

نحره الــــــسيوف اتحز بي
وصدره الخيول اترضه

ـــــــــــــــــــــــــــــــــــ

باچر حراريكم يرچبوها اجمال
وكلمة خوارج عن ضعنكم تنگال
زينب تطب سوگ وبالچفوف احبال

المحد نظر منها اخيــــــال
لعين الاجانب عرضه

ــــــــــــــــــــــــــــــــ

سيد علي عبدالزهره الناجي

ابيا ذنب بت النبي ايعصرونها
وقنفذ ابسوطه يورم امتونها

ــــــــــــــــــــــــــــــــــــــــ

ابيا ذنب بضعة رسول الله الـطُهُر
بين باب وبين حايط تنعصر
ابيا جريمه اعله الجفن من تنسطر

وشاهِــد لهسه زراگ اجفونها

ــــــــــــــــــــــــــــــــــــــــ

ابيا ذنب من يهجم اعليها الجمع
وباب الجذوع اعله فاطم يندفع
ابيا ذنب من عدها مكسور الضلع

وموتت المحسن تشوف اعيونها

ــــــــــــــــــــــــــــــــــــــــ

علــزچيه الموقف الــكلش صعُب
من دخل بسمارها ابنص الگـلُب
وزينب اتصدلها چانت من قُرُب

امن الرعب مذهوله واصفر لونها

ــــــــــــــــــــــــــــــــــــــــ

ابيا ذنب قنفذ يطگ منها المتن
وتبقه بس تهمل مدامعها وتون
ماتت الزهره ابسبب كلمة وأن

شجره والحطّاب گص اغصونها

ــــــــــــــــــــــــــــــــــــــــ

من فدك حرموها ليش ليا سبب
وبيها ما راعو لبو القاسم نسب
بـتّـه ما چنها ، ولاچَـنّـه إلها أب

ورث ابوها وما رضو ينطونها

ــــــــــــــــــــــــــــــــــــــــ

ابيا ذنب تحچي الدموع الهامله
١٨ عــــــام وتموت امعلعله
عاشت الزهره اليصير ابڪربله

بس فرق وصتهم ايدفنونها

ــــــــــــــــــــــــــــــــــــــــ

ويلي علچثه البُقت وسط الفلا
ابلا دفن ومن الدموم امغسله
احسين ابنها الهوَّن امصايب هله

امصيبته اتْـهُون المصايب دونها

ــــــــــــــــــــــــــــــــــــــــ

شحچي عن امصيبة احسين وشگول
گبله ياهو اتگـلُّـب ابجسمه الخيول
اسهام وارماح وحجاره اعليه تلول

واخته شمر وحرمله الـــيحدونها

ــــــــــــــــــــــــــــــــــــــــ

يحدي بيها الاجنبي لديرة غُرُب
تنسبي ومچتوفه للشامت تطُب
ومن تمر ابسوگ هاي اكثر صعُب

صعبه بت حامي الحمه اينظرونها

ــــــــــــــــــــــــــــــــــــــــ
سيد علي عبدالزهره الناجي

ورده بثمُنطعش شيعوها ابنعش
وبالترب غطاها حماي الحميّه

....................................

ورده عاشت بين آهات ودموع
والسبب بسمارها وكسر الضلوع
علجفن صطروها والحادث مَروُع
والعليها انطبگ باب امن الجذوع

لَسّه فوگ المتن أثر كلمة ( وأن )
والسياط انطبعت ابمتن الزچيه

....................................

دارها البي لاذ فطرس واستجار
جنّه والثاني شعل بعتابه نار
ذبلت الورده وبده اعليها الصَفار
والضلع كل شهگه يلچم بیها صار

مو ضلع وانكسر ماتت امن القهر
چي نظرها ابلا خمار ابن الدعيه

....................................

من گبل موتتها اسماء التگول
تقره بالقُرآن بالحُجره البتول
سكتت ، ويا فاطمه صحت ابذهول
يا وسف ما جاوبت بنت الرسول

للنبي امسافره تشكي من حبتره
اتگله هذا وهذا التجاسر عليه

....................................

ساعه لن حسنينها ابلهفه وحنين
رجعو وسألوني اسماء أُمنه وين ؟
نايمه ، گتله ، وزعل مني الحُسين
فهمو وركضو لَـمير المؤمنين

حافي حامي الحمه اينادي يا فاطمه
يلحَنينه ابسرعه شو رحتي امن اديه

....................................

غمّضت عين الضوه وحلِ الظلام
وبيّن ابحيدر كُبر الفين عام
يُمّه يا يُمّه الحسن ينعاهه گام
ويبچي الحسين ويقبل بالجدام

علولد مو سهل امّه من ترتحل
لوعه ما تتقارن ابلوعه ورزيه

....................................

زينب ابكل دمعه چانت تحتضُر
بيها نيران اليتم تلهب جمُر
يا ڪسر فگد اُم حسن ما ينجبِر
امن امها ما شبعت حنان ام الخدُر

ابـ يمّه يا فاطمه بچّت اهل السمه
وشاغت اعله الزهره چن شوغة رقيه

....................................

سيد علي عبدالزهره الناجي

‏يا فجر   بالله انتظر وي طلعتك مصيبه
‏يا فجر  نايم علي وحاضن گبر حبيبه
‏يكسر الخواطر       عالم المقابر
‏ 
‏ 
‏
‏عاصفه وريح ومطر مر عالمدينه
‏الناس نيام وعلي بعده بأنينه
‏السمه ترعد والمطر بلل جبينه
‏بشارع المقبره يمشي وتجري عينه
‏ 
‏فاطمه   من عافته كسرت علي او شعوره
‏فاطمه   صارت گبر  هسه علي يزوره
‏يجرح المشاعر      عالم المقابر
‏ 
‏ 
‏ 
‏ 
‏اجه وذياله علي يجرها او يضيمه
‏وگام يتعثر بالگبور القديمه
‏يمشي بس ما يلتفت وعيونه غيمه
‏نزلت ادموعه على اللحيه الكريمه
‏ 
‏ 
‏ياجبل    هزه الهوه ؟ شو هز علي او كيانه
‏ياجبل   شايف جبل يوگع على مكانه
‏دارت الدوائر      عالم المقابر
‏ 
‏
‏
‏
‏
‏عالم المقبره ماينراد ليله
‏هذا عالم فرّق الخِل او خليله
‏الخطوه بين المقبره خطوه ثگليه
‏من بعيد الگبر ما يگدر يجيله
‏ 
‏ياقبر.  رايد علي مابيه ولا علامه
‏ياقبر  مخفي يظل جرحه إلى القيامه
‏قبر ماله جابر        عالم المقابر
‏ 
‏ 
‏
‏
‏
‏
‏
‏
‏
‏ليش مستعجل يفجر الله تأخر
‏تحاول إطّلع الشمس وتأذي حيدر
‏الشمس ما تندگ تره وي چفه الاسمر
‏ردها بيده بس عليها مره أشر
‏ 
‏طاوعت   من شافته شمس الله عدها غيره
‏طاوعت   چف حيدره وصارت شمس چبيره
‏رفضتك تكابر    عالم المقابر
‏ 
‏ 
‏ 
‏
‏
‏
‏
‏
‏
‏ 
‏وصِل للزهره او عثر يمها اعله طوله
‏وعلي من يبچي علي تبچي الرجوله
‏اكو حچي ابگلبه مايگدر يگوله
‏النفس مايگدر يجره بالسهوله
‏ 
‏عالرمل.  نايم علي يتلمس البروده
‏عالرمل  يم فاطمه حيدر وضع خدوده
‏ماحسب مخاطر    عالم المقابر
‏ 
‏ 
‏ 
‏ 
‏ 
‏شاف فاطم بالحلم صاحت حبيبي
‏هلا يعيوني هلا ابجرحي او طبيبي
‏هلا بالخلاه اللي ربي نصيبي
‏هلا بالفرحني والزيّد نحيبي
‏ 
‏ياعلي.  اگعد علي زينب بقت وحيده
‏ياعلي  بهذا الوقت عطف الابو تريده
‏هم يجيها باچر      عالم المقابر
‏ 
‏ 
‏للشاعر محمد الظالمي

يا ختام العتره     ابني گبر الزهره
💢💢💢💢💢
ندعي يا عصاة موسى كل صبيـحة جمعه
يا سفينة نـــوح وينك اظهــر النه ابسرعه
انريد منك يابو صالح تبني گـــبر البضعه
تبني شــــباﭺ الزﭼـــيه حته نجري الدمعه
يالذي ننتظره     ابني گبر الزهره
💢💢💢💢💢
خـــاتم اسليمـــــــان بيــدك ســيـدي يالقائم
انت يا محي الشــــريعه يا طليـــــعة هاشم
ابـﭼف كتاب الله ترفعه ابـﭼف تكض الصارم
وامـبــراطـــورية الحــــــق تنـــبني للوادم
وابشهامه وعبره     ابني گبر الزهره
💢💢💢💢💢
عندك اتلثميه واثلطعش ذوله اصحابك
وعندك اولاد المواڪب سيـدي احبابك
ڪتبــوا اسمك عالبنادق عجـلوا بغيابك
سيدي ومن تضـهر انته ايقبلـون اترابك
رايه بيدك خضره     ابني گبر الزهره
💢💢💢💢💢
ذولـــه هالخـــــدام ڪلهم يالإمام اجنودك
انته طــولك ابوفاضل همه صاروا جودك
ذوله خليهم يمهــدي اﭼفوف فوگ ازنودك
زلم عالڪـلفات اخذهم أي وحگ معبودك
يلي يسطع بدره     ابني گبر الزهره
💢💢💢💢💢
ذولـــــه واحــــدهم يبين عالسواتر صبحه
امعـــزبين المــــوت ذوله ذوله ولد الملحه
شوف كل جندي يمهدي ايداوي بسمك جرحه
وطلعـــت المحجوب الهم تبقه اعظم فرحه
بالفتح من تقره     ابني گبر الزهره
💢💢💢💢💢
انته يالطالب ابدم المنـﭼتل عالرمضه
انت تيجان القــياده يمته بسمك نحضه
يابقــــية الله انته انتـاني لحضه لحضه
انريد ويه الخدم تبني للزﭼيـه الروضه
يلي حلمه ابصبره     ابني گبر الزهره
💢💢💢💢💢💢💢💢💢💢💢💢💢💢
وليد المندلاوي
 

ياثگل البــاب الهد حيلي
باب وكـــلها اجذوع
عالزهره انطبگت ياويلي
وكسرت منها ضلوع
يابير الآلام .. ماظلت احلام
ظلت بس ادمــــوع
ـــــــــــــــــــــــــــــ
غضب رب الجلاله القابض البــاسط
عله العدوان واعليهم يظـل سـاخط
خذو مني هواي ومختنـــگ ظلـيت
وذبحو حلمي بين البــاب والحـايط

لا يهده البـال ولا يسكــن
من كثــر التفكـير
ومن اتذكر صورة محسن
امشيلك يـــــابير
شلون عيوني تنام .. ماظلت احلام
ظلت بس ادموع
ـــــــــــــــــــــــــــــ
بيني وبينك احچي وهـــذا موضوعي
وسامحنــــــــي اذا تــــرسنّك ادموعي
الفاگد ضوه عيونه شلون بالله يشوف
عساها اتكسرت بالفــــــاجعه ضلـوعي

وشحال الفارگ عافيته
وظل مشدوه البال
نيران الانفــــاس بريته
وهمّه ايزيل اجبال
غدرتني الأيام .. ماظلت احلام
ظلت بس ادموع
ـــــــــــــــــــــــــــــ
مشت عنّي الزچيه وســــــافرت يابير
والمسافر حبيبه شلون حـــــاله يصير
اعاين للرحه واطحن حـــــزن وهموم
صرت اية مصاب ومــــــــا الي تفسير

چم ذكره اتحطّمني من اتمر
واجرع مـــر الآه
چندوب اجذب ونّه واصبـــر
ما اگـــــدر والله
امفارگ بدري التام  .. ماظلت احلام
ظلت بس ادموع
ـــــــــــــــــــــــــــــ
بصحن الدار امشي واظل رايح جاي
وگولن شلي بعمري وفاطمه مـــوياي
بعدني بعز شبابي وفرهداني الشيب
ذبل عود الشباب ومات طعم المـــاي

چاوين الموت الياخذني
والحگ بام حسين
ولا هاي الدنيــا اتعذبني
وابقى بچلمة وين
ولا شمّن انسام .. ماظلت احلام
ظلت بس ادموع
ـــــــــــــــــــــــــــــ

خذتها بليـــل روحي وشيّعت روحــي
جبل بس الكسر بين علـــه اسفــوحي
وجه فاطم دوه بشوفتها تعبي ايروح
راح ادفنها بس ما ادفـــــــن جروحي

يارين اتوسدت وياها
مابين التــــــربان
ولا ظل مذبوح بفرگاها
وتوليني الأحزان
وبعين الايتام .. ماظلت احلام
ظلت بس ادموع
ـــــــــــــــــــــــــــــ
فراس المحمداوي

وجهتُ وجهي .. لفاطمه الغريبه
انوي الزياره .. للطاهره النجيبه
عمري خلّص ما وصلت اعتابها
گبل المنيه كون  اشم اترابها
.
-----------
.
عذبت گلبي النوايب
             والهظم بنفاسي بان
والمصايب دولبتني
           وفرهد ايامي الزمان
توجهت اقرا الزياره
             الفاطمه ام الحنان
حرت وجهي وين اديره
             لياكتر وليامچان
گبر الزچيه  .. ابيا ارض مكانه
الحيره حيره .. للي طلب عنوانه
وين اليدليني اعله عتبة بابها
گبل المنيه كون اشم اترابها
.
-------------
.
توجهت صوب المدينه
              ذايب بگلبي الأنين
گلت بضعة طه يمكن
               لاذت بكتر الامين
لچن حيدر بالمنايه
             عالم وعنده  يقين
يندفن بتراب ابوها
          اثنين من المجرمين
ابن السقيفه ..  ذاك  السفك  دمعها
وثاني خليفه .. الـ  عالوجه صفعها
والگرب منهم يزيد اصوابها
گبل المنيه كون اشم اترابها
.
------------
.
توجهت للكوفه روحي
          وجمرت المدمع تسيل
نقل حكمه الهه حيدر
              گلت هذا اول دليل
كون مثوى الزهره بيها
         عجب مسلم بن عقيل
ليش مالاذ بگبرها 
         وطوعه صارتله بديل
.
ماظن دفنها .. حامي الحمه بالكوفه
يدري العقيله  .. بحبل السبي مچتوفه
الها تدخل وي ركب سلابها
گبل المنيه كون اشم اترابها
.
-------------
.
للطفوف عيوني صدت
           گلبي وي كل نبضه ناح
گلت گبر البضعه يمكن
              خضبه فيض الجراح
ويمكن حسين بنزيفه
           فوگ گبر الزهره طاح
سَحگت الحافر غميجه
       وضلعه يم ضلع امه راح
.
وي كل مسيه .. اذرف نزيف ادموعي
للغاضريه .. محنيه دوم اضلوعي
فاطمه اشعر تون  لـ احبابها
گبل المنيه كون اشم اترابها
.
------------
.
آنه ما املك دليل
           وگلبي للزهره لهوف
ولاكو آيه ولا روايه
         تگلي مثواها الطفوف
ادري مثكوله بولدها
        من مشو درب الحتوف
والترك دمعه بدربها
         لابد ابداره تطوف
.
اخفت گبرها .. دمها بضلعها زاجي
زغير عمرها .. عطشانه للبواچي
فاگده وصار اللحد محرابها
كبل المنيه كون اشم اترابها
.
------------
.
غابت ومخفي گبرها
         وكل وكت اشعر معي
فاطمه كلش قريبه
              لوهملت بمدمعي
لو ذكرت الغاضريه
           بأول احروف النعي
تنطوي الحزني المسافه
        وتغدي نبض بأضلعي
.
تحل السكينه  .. جذوت الم بحساسي
تمر الحزينه   ..  شهكت هوه بأنفاسي
تحظر  وتنفي زمان   غيابها
گبل المنيه كون اشم اترابها
.
------------
.
الها گمت اقرا الزياره
         بكل كتر وشما اريد
فاطمه بغربتها اقرب
          ألي من حبل الوريد
هي مختاره الغياب
           والها مرقد ماتريد
الا يوسفها ينادي
          يال ثارات الشهيد
لوحل ظهوره .. والها بنى المناره
ندري بحضوره .. ابيا جهه الزياره
نزورها ونذرف دمع لمصابها
گبل المنيه كون اشم اترابها

حسن الموالي الفاطمي

امن يجيب المضطر ضلع البتول اتكسر
طاحت مثل عالي الماي
صبرك يحيدر جتال من صاحت ابذاك الحال
ياحيدر احظرني ابهاي
....
امن يجيب حامي الحمه مضطر يواري فاطمة
وصابر علي بهاي الرزيه
ويلٌ لِمَن سنَ السُنُن في ضُلمهِ ام الحسن
كاصدها اجه وحامل اذيه
الدنيا تصبح موحشه عنك اذا كلبك مشه
عاش ابغرب حامي الحميه

فرصه استغلوا هايه يدرونه منطي احجايه
بوعده علي ايضل وفاي
منطي النبي وعد ارجال من صاحت اذاك الحال
ياحيدر احظرني ابهاي
.......
حزنك افق طول وعرض حملك كسر ظهر الارض
جروحك ولا مبدع رسمها
امنين اجيبنلك امل يالزهرتك عالمغتسل
بناره ابتشر كل من ظلمها
حيلك دفنته بيمنتك تمشي وتخذلك خطوتك
يل روحك اتنازع المها

محد مسح دمعك ليش روحك تصبرها ابيش
وانت لدموعك شجاي
مثل السعف طولك مال من صاحت ابذاك الحال
ياحيدر احظرني ابهاي
.....
تبت يدا ابي لهب واليجمع ابابج حطب
خصمه النبي بيوم القيامه
الي حرك باب النبي هو الفتح باب السبي
كلمة وأن اكبر علامه
ما اغنى عنه ما كسب سيصلى نار ذا لهب
ماتنفع اهناك الندامه

هناك الرأي للكرار بيده الامر جنه ونار
خل ننتظر باجر جاي
وبيا ذنب دمها السال من صاحت بذاك الحال
ياحيدر احظرني ابهاي
......
جرح الحسد ماينشفي نار الحقد ماتنطفي
نكلو حطب محد طفاها
كادت تحل القارعة هزت عرش هالفاجعة
الكاع انطوت هيه وسماها
والي قلع خيبر تره نار اعله بابه اموجره
وبكل قلب طاهر لظاها

شوف الزمن من يندار محد ينصره الفقار
وسوك الضماير شراي
وابلا ذمم شفنه افعال من صاحت ابذاك الحال
ياحيدر احظرني ابهاي
......
الماعنده فاطم تنعصر لايحجي بفنون الصبر
اه ياعلي اهمومه اشكبرها
الباب الله بابه وينكسر هم يحرك اخيامه الشمر
وبنته السبي لازم يمرها
ياحيدر اشسوه الدفن بالهم اشوفك منطعن
ياروحك اشمعظم صبرها

دمعك عتب لو احزان تبجي بحزن سبع الوان
وادخيلك انت الحماي
حملك ولاتشيله اجبال من صاحت ابذاك الحال
ياحيدر احظرني ابهاي
......
بالجاهليه وبالجهَل اعلو هبل اعلو هبل
وضحت تره وبانت شمسها
كسر الظلع لو مو سهل محد ذبح بالطف طفل
فتوى العطش ناتج امسها
لو بردا النار اصبحت بالخيمه والباب انطفت
بردا على الزهره تحسها

كلوله يفرح نمرود وهوايه صارتله جنود
لكلمة وأن صار الراي
هوايه الحجي الماينكال من صاحت ابذاك الحال
ياحيدر احظرني ابهاي
......زهير الابراهيمي

شوط كربلائي




يربان الدهر ولكون ونته للعلم بابه
عرش بلقيس من جاباه اضن بيك انتخه وجابه
-------------------------------
اشلون ابدارك ايطبون يضرغام الوغى ياحيد
ونته الكعبه طلگت بيك وجابت سورة التوحيد
سرجت اضهور المنيه وغرت عالموت ياصنديد


ميدان الوكت ونته
لجمت الكون وصعدته
يحامل للعرش بخته
اشلون اتجاسرت هالناس وبيتك داسو اعتابه
---------------------------
عجيبه اشلون هاي الناس حطت عينهه ابابك
يسر امبطن ابنص سر ولمكنون بحجابك
اليفهمك فاطمه وانته لذالك داسو اعتابك


مافهموك ياكرار
وماعرفو شنو بالدار
لجلهه انخلقت الانوار
لجلهه صرتو ياكرار الحديث المصطفى جابه
----------------------------
يحيدر ارد انشدنك اشلون ابابك التمووا
مافتحوو كتاب الله للأيات مافسرووا
ما اوحى الى عبده الحجي ال بنور مافهموا


بيوتاً ترفع وتسمه
وبيهه ينذكر اسمه
يعني فاطمه النعمه
دارك تقصد الايه القدير ايعضم احبابه
----------------------------
اكيد المعركه جانت بين النور ولضلمه
وحشد ابرهه جيشه قصده الدار ويهدمه
وبيهه انصابت الكوثر طفه نور السمه نجمه


انصابت اية التطهير
وحق من انزل التكوير
تسوي المايصير ايصير
لو ما بالوصايه الزوم تعرف اتعالج اسبابه
-------------------------
الكساء اشلون مافهمو وهوه محتوا ايه
وسأل ربه الملك جبريل منهو الغايه والغايه
گله فاطمه ولنوب ذكركم ياعلي ابرايه


إذن فاطم اصول الدين
ومن عدهه ابتده التكوين
النبآ ولكوثر وياسين
هم انصابن بدارك كلف جرح السمه اصوابه
-----------------------------
اتناست ياعلي الكرار اهنانه صارت العجبه
نسوو اية وحي الرحمن الموده گال بالقربه
ماطالب اجر منهم شو ردو على العقبه

نسوو شنهو حقيقتكم
الخلق كله صنيعتكم
وهي فاطم اصل كلكم
الشجره ولفروع انتم اصل كل معرفه وبابه
------------------------
اشلون النور يتكور حدر الباب ياحيدر
وسور العفه يابو حسين ضعله اباب يتكسر
اوعرش الله تلوحه النار وتنزف سورة الكوثر

صابوو مركز الايمان
يحيدر خانت الصحبان
گبل ماصاير ولاچان
على مر الزمن لليوم ذكر للعالم امصابه
---------
علي سليم الحسناوي

عالزهره اتهل دمعة عيني
ــــــــــــــــــــــــــــ
امصاب البضعه اهواي أذاني
هـيّـج دمـعـاتـي وبـچـانـــي
اليوم المحشر تبقى احزاني

ومابطل عالزهره اونينـي
عالزهره اتهل دمعة عيني
ــــــــــــــــــــــــــــ
عايش بيه امصاب الزهره
وتتراوالي جروح السطره
عين الجنه انگلبت حمره

جمره بطاريها اتچــویني
عالزهره اتهل دمعة عيني
ــــــــــــــــــــــــــــ
ابمولدها المختار استبشر
ونزلت ايـه ابحـقها واكثر
إنـا اعـطيـنـاك الكـوثــــر

والكوثر ليش اتجــافيني
عالزهره اتهل دمعة عيني
ـــــــــــــــــــــــــــــ
منهو المثلي اثگال همومه
وبالدمعه ايخلص كل يومه
مـظلــــــوم وفاگد مظلومه

الچــانـت عالهم اتـسلیـنــي
عالزهره اتهل دمعة عيني
ــــــــــــــــــــــــــــ
اتظل تسعر جمرات الفرگه
وبس انظر للباب بحرگه
تتگطع بانفاسي الشهگه

واحتاج النسمه اتخليني
عالزهره اتهل دمعة عيني
ــــــــــــــــــــــــــــ
شمعة عمري وفرحة روحي
زادت من فرگتهه جروحي
والمرمر فـتيـته ابنـوحـــي

وذكر الزهراء ايـأذيـنـــــي
عالزهره اتهل دمعة عيني
ــــــــــــــــــــــــــــ
حيدر بشار الدراجي
١٠ ربيع الآخر ١٤٤٧ هـ

حال مولاي ابا الحسن علي عليه السلام

فاطمه ومُستَودَع السِّر العظيم
صار حالي ابغيبتچ حال اليتيم
واكثر امن انفاسي هَمَّي
ابروحِتِچ چن راحت أمِّي
يازهراء...يازهراء
.......................................
علي بس مو علي ذاك البالحرب ماينكسر
امصيبتچ هَدَّت قِواي ومالي طاقه ولا صبر
فاطمه اغيابچ حِنانِي وأثَّر ابحالي اشكثر
واحس راح اوياچ عُمري وبعد شيفيد العُمُر

أبقه انوح ابحسرتي وسيل الدمع
ويلي عالماتت ومكسورة ضلع
أنحب ومحروگ دَمِّي
ابروحِتِچ چن راحت أمِّي
يازهراء...يازهراء
.......................................
أَشَد مِن كل النِّوايِب نايبه التاذيني
هجمت الگوم اعله داري وآنه اشوف ابعيني
والله لوما هالوصيه امچَتَّف اتخلِّيني
ماجِسَر واحد عَلَيَّه وحيدر اتعرفيني

هاي أول تالي حيدر ينولي
وصحتي فضَّه وماتصيحين العلي
وآنه يَمِّچ وانتي يَمِّي
ابروحِتِچ چن راحت امِّي
يازهراء....يازهراء
.......................................
جمرة امصابچ يفاطم تسعر ابدلاَّلي
غِبتي عَنِّي وغاب كلشي والحزن يبرالي
رحتي لكن ذكرياتچ ماتروح ابَّالي
وآنه مثل الفاجِد امَّه هيچي صاير حالي

گلبي مالومه اعله فگدچ ينجرح
راح اعيش ابدنيا مابيهه صُبِح
مثل شمعه وذاب حلمي
ابروحتچ چن راحت أمِّي
يازهراء...يازهراء
.......................................
وين ياوجه البراءه اخلافچ اشيبقه إلي
راح مِنِّي الچنت اشوفه وهَمِّي كِلَّه ينجلي
أهمس ابحسره وانادي فاطمه آنه علي
آنه ذاك العگب عينچ بالمَواجِع مبتلي

مو دمع عيني عليچ اتصب دمه
والمُصابچ أنتحب يافاطمه
هالمُصاب الگلبي يِدمِي
ابروحتچ چن راحت امّي
يازهراء...يازهراء
..........................................
راح اكظّي ايام عمري ونار حزني اموجّره
وآنه بوداعچ أنادي الله يرحم حيدره
ماتجف ادموع عيني وتجري عالصار وجره
سهل كسر العظم لاچن كسر گلبي اشيجبره

لآخر انفاسي أصيح ابدَمعِتِي
وين يازهرة حياتي وسلوتي
فرگتچ للعين تِعمي
ابروحتچ چن راحت امّي
يازهراء...يازهراء

سيد علي الموسوي