O‘rganishlarim natijasida ushbu oila yosh oila bo‘lib, ikki nafar farzand bilan yaqinda yangi uyga ko‘chib kirgan. Ularning yashash sharoiti o‘rta darajada. Oila boshlig‘i — Shermatov Ahmadillo xususiy tashkilotda rasmiy band bo‘lsa-da, oylik maoshining kamligi sabab, qo‘shimcha tarzda mavsumiy ishlar bilan ham shug‘ullanib turadi.

Turmush o‘rtog‘i — Shermatova Odina esa farzand tarbiyasi bilan band. U ayni paytda 2015-yilda tug‘ilgan, bolalikdan nogironligi bo‘lgan farzandi Shomurotov Omadbekni doimiy parvarishlab keladi. O‘rganish davomida ushbu ayolning o‘zini band qilish va barqaror daromad manbaiga ega bo‘lish imkoniyati yo‘qligini, farzandi esa doimiy ravishda uyda parvarishlanayotganini aniqladim.

Shundan so‘ng, ushbu oila holatini hisobga olgan holda, Vazirlar Mahkamasining 2024-yil 25-yanvardagi 46-sonli qarori — “Alohida ta’limga ehtiyoji bo‘lgan bolalarning ta’lim olishini tashkil etish va ularni reabilitatsiya qilish tizimini takomillashtirish chora-tadbirlari to‘g‘risida”gi qarorga asosan, farzandining hujjatlarini Pedagogik-tibbiy-psixologik komissiya (PTPK) ga tayyorlab, ariza topshirish jarayonida amaliy yordam ko‘rsatdim.

Natijada, bola PTPK xulosasiga muvofiq Qo‘rg‘ontepa tumanidagi “Muruvvat” uyi qoshida tashkil etilgan ʼʼKunduzgi g‘amxo‘rlik guruhi”ga jalb qilindi. Farzandi Omadbekni onasi har kuni muntazam tarzda muassasaga olib borishni yo‘lga qo‘ydi.

Dastlab oila bilan ishlash biroz murakkab kechdi. Biroq men, ijtimoiy xodim sifatida, onaga farzandini muassasaga yuborishning foydasini to‘g‘ri tushuntirishga harakat qildim. Ya’ni, bu orqali u boshqa farzandiga ham ko‘proq vaqt ajrata olishi, hatto o‘zi ham mehnat bilan band bo‘lishi mumkinligini tushuntirdim.

Shunday qilib, bola muassasaga jalb qilindi. Oradan vaqt o‘tib, farzandining o‘zi kabi bolalar orasida bo‘lib yuziga tabassum yugurgani, ijtimoiy muhitga kirishayotgani ota-onasini nihoyatda quvontirdi.

Shuningdek, 2025-yil 3-fevraldagi O‘zbekiston Respublikasi Prezidenti Sh.M.Mirziyoyevning 41-sonli qarori — “Nogironligi bo‘lgan bolalarga ijtimoiy xizmat va yordam ko‘rsatish tizimini yanada takomillashtirish chora-tadbirlari to‘g‘risida”gi qarorga asosan, ushbu bola Jalaquduq tumani Tuyalas mahallasida tashkil etilgan “Kunduzgi parvarish guruhi”ga PTPK xulosasi orqali qabul qilindi.

Hozirgi kunda bola mazkur muassasaga muntazam qatnab kelmoqda. Ota-onalari davlatimiz rahbari va tegishli tashkilotlar rahbarlaridan cheksiz minnatdorliklarini bildirib, farzandlarining hayotga bo‘lgan qiziqishi va quvonchi ortayotganini faxr bilan ta’kidlashmoqda.

Bugungi kunda Shermatovlar oilasi kichik tadbirkorlik faoliyatini yo‘lga qo‘yib, penablok ishlab chiqarish ishlarini boshlashgan. Oila asta-sekin kambag‘allikdan farovon hayot sari dadil qadam tashlamoqda.

Men, ijtimoiy xodim sifatida bu oila hayotiga biroz bo‘lsa-da yorug‘lik va ishonch olib kira olganimdan, kasbimga bo‘lgan fidoiyligimdan faxr tuydim. Chunki har bir oila taqdiri ortida insoniy quvonch, farzand baxti va jamiyat e’tibori mujassamdir.