يا شوكَي وفرحتي ودنياتي ولوني
وعذابي ولوعتي وشكواي وظنوني
ياخي عونك علي َّوبيك خيعوني..

اوديلك طيوفي يرجعن مدنگات
استحن لمن لگنك تحلم بغيري..

صديجي الچنه اظنه بير بيريش
فتح جرحي وملح ياحيف بي رش
فرح من شاف جنحه طلع بي ريش
صفگ جنحه ولا نشاد بيه..

وكلت ما يحجي سري وشاوريت الناي
حچه جروحي وفضحني وسولف اهاتي..

يمكن اغلبنه سامعين هذا البيت للشاعر سمير صبيح، لكن هلمره راح اتركم ويه تكملة القصيده .

بين ارفض واريد واقتنع واحتار
ذبلت الورد بأغصان رغباتي
امد ايدي عله صدري واكتل الفلاح
واكول الكاع بارت وانهي زرعاتي
لو اصبر واتاني وابني عالمجهول
واحللهه اللجام تغيّر نزواتي
اذبلهن قليل الروح بيه تلوم
تخلص حنطتي يطيرن حماماتي..

تمنيت الإصابع كون الف بالايد
لان بيه ندم مو مال اعض خمسه..

مابين جفي الخالي
وما نفترگ حسبالي
كل راي ماظل باليد
مرات تلكَالك جرح
بس بي الخنجر ينحد..

شد عين النوارس للشواطي تروح
شد عين الغراب يروح للموته..

هذاك اني نبع صافي يخايب دغش مابيه..

طحت ما خذت النصيحه
و هي مو كل طيحة طيحة
فرق بين اطيح صخره
والجبل كله يطيح..

فتركنة بليل ونايمة الناس
خفنة من النهار الناس تعلم
تركنة ارواحنة المايرضن انروح
بالدمعة العزيزة نريد نسلم..

يا فكة عيون الگلب ياميزتي البيها انغر
مو رايدك واتنفسك لا يا نفس شي اكبر..

يل كلك جرح ومنين تراف
اذا خيط اليروفك رايد الروف..

انا بره القصر وقالق السلطان
وانت ويه العبيد الواگفه تهفي..

شدينه الجرح وانگطع حبل الخوف
وكحلنه الجفن وانسدت العبره..

مثل الخيط عايش والحياة حظوظ
لو تسكن شمع لو تسكن بسبحه..

مانغلط بعد ونصير مثل الخيط
تحطنه على الجرح وتعوفنه الابره..

متانيتك گهوتي تمرها شرّاب
وانه خلافك لكسرهن ادلالي..