بالسلامة

غريب الگلب محد يعرف شلونه

يأملونه بيردولك….
ويظل منتظر جيتهم

يزرع باب ينطر چف الي تدگه

ويحضن روحه ويتاني…..
وينام ودمعته تخنگه…

ازهر كريم

ذكرياتك ؟

وردة مزوعة بحرب .


ازهر كريم

انا متعود احبك

وانت رايح ما اكرهك…

ازهر كريم

من تغيبين ،

الحزن يفتح شبابيچه بغرفتي

والدمع يسرج مهرته فوگ خدي.

ازهر كريم

ارد من اي حرب مكسور ما أهتم

اليهمني انتي التجبريني

واطيب بين ادياتچ.

ازهر كريم

يزخ المطر فوگ ترابنا الدافي

ونخضر بوسة للموعد

بوسة ترمم الظلمة
وتطش ضحكات ماتبعد

أحنا اثنين واحد ينشتل گمرة
والثاني بغنى بوساتنا يورد.

ازهر كريم

الحضنة رسالة روح
بردانه

بالحضنة تظل انت

واذوب انا…

ازهر كريم

من يمتى تعرف تحب

شغلتك تجرح وماشي.

ازهر كريم

يضوگني العمر بوسة ع خدك

وارجع صغيرون.

ازهر كريم

الاسامي مو مهمة الملامح تنحفظ

والطيور الحلوة تبقى ،
والالوان بدون لون عيونج الحلوات ؟

نقاصهن فرض

.
ازهر كريم

أنت مرة تعيش سجل موقفك

الصمت وكت الموت ذل

جملة وحدة گبال سيف

تعادل آلاف الجمل.

#أزهر_كريم

بالخسارات تعرفني!!!!

ازهر كريم

مرة متتلك صدگ

مو دوم ميتلك!!!

ازهر كريم

صوبك ندى
وصوبي صحاري من التعب

صوبك حرير بضي شمس
وصوبي حرگ لمة حطب

عطشان كسرني العطش
وأنت المفيض بالعشگ
چنك شلب

هلبت تنث بعتبتي
هلبت تطيح أنت عرف

مو ليلي طگ بيه البرد
وليلك حلو وكلش ترف

يا أحلى من لون الخجل
ياطير ..ياغنوة ثمل
مر بيه ماخذني النزف…

.
.
#أزهر_كريم

الوان لاگيت البشر

بس ماكو لون يلوگلي..

ازهر كريم

بالسلامة لكل غصن ماراد چفي..

ازهر كريم

وين الله والم الشوگ بين أحضاني وادفه

وأحط چفك على چفي ولك ياشوگ

وشفه تناغم بشفه.

ازهر كريم

الروح أنتي….

ودون لون عيونچ الدنيا ظلام

انتي نهر العمر ، والبسملة الحلوة

وأنتي نشوة خمرة ، وطيور الأحلام

أنا أحبچ…

گبل مايبدي الكلام.

#أزهر_كريم

من بعيد تقراني الخلگ تعبان
انا الضايع الميت من احبابه

انا البالسوالف ماخنتلي انسان
ولاأذكر حچيت حچاية چذابه

أذبل صح.. بس بگلبي ماسد باب
خاف تگول عني الناس سد بابه.

ازهر كريم