للمشاية

الكون يهتف ياحسين.
اقترب يوم الأربعين

،،،،،،،،،،،،،،،،،،،،،،،،،،،،،،١،،،،،،،،،،،،،،،

ربنه رايد هالزياره العالمية.
ربنه وي حسين عنده اعظم قضيه
الماكو عنده حسين ماعنده هويه..
خل نشارك بالرساله الفاطميه.

جابر الأنصاري، وين.
اقترب يوم  الأربعين  

،،،،،،،،،،،،،،،،،،،،،،،،،،،،٢،،،،،،،،،،،،،،،،

كلنه نتعنه مشي نزور ابواليمه.
راح يرجع راس ابو الأكبر لجسمه.
بكربله منتظره يرجع گاعده أمه
راح تتلاگه ويه زينب هم تشمه.

وي دموع الصابرين
اقترب يوم الأربعين
،،،،،،،،،،،،،،،،،،،،،،،،،،،،،،،،٣،،،،،،،،،،،،،،،،،،،،،

راح ترجعله السبايه بلارقيه
وهو مشتاگلهه شتگله السبيه
ايگلهه وين بنيتي راحت ماكو جيه
اتگله برض الشام لاگتها المنيه.


اسمع يزود الونين.
اقترب يوم الأربعين

،،،،،،،،،،،،،،،،،،،،،،،،،،،،،،،،،،٤،،،،،،،،،،،،،،،،،،،

سكنه عالعباس تنشد وين عمهه
سكنه من بعد الگمر محد رحمهه
من الصياط من الضرب ضل يجري دمهه
غير ابو فاضل منو يعالج ألمهه.

انزور أبن أم البنين.
اقترب يوم الأربعين

،،،،،،،،،،،،،،،،،،،،،،،،،،،،،،،،،،،،،٥،،،،،،،،،،،،،،،،،،

ليش هل أيام نسمع بس،بواچي
رجعن السلبوهن احلام وتراچي
ورمله وي جاسم  بگبره من تحاچي
ليش،ساكت مايرد حلو المحاچي

رغم الاف السنين.
اقترب يوم الأربعين.


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


حيدرموسى الرميثي.

للمشاية



الله يتقبل. يزاير. الله يتقبل.

،،،،،،،،،،،،،،،،،،،،،،،،،،،،،،،،،،،، ١

هله بالگاصد لبن خير العمل.
بحب ابو السجاد بس گلبه انشغل
مايعرف التعب مايعرف ملل.
مايخاف من المرض ومن الأجل.

كلشي تتحمل.  يزاير.  كلشي تتحمل.
الله يتقبل  يزاير.  الله يتقبل  

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ٢

مو بكيفه العاشگ بكيف الگلب
روحه تمشي بوحده يندل الدرب.
واليحب حسين مايعرف صعب
يوصل الكربله للحضره يطب.

شوفتك أجمل. يزاير، شوفتك أجمل.
الله يتقبل  يزاير.  الله يتقبل  

،،،،،،،،،،،،،،،،،،،،،،،،،،،،،،،،،،،،،،،،،،،،،،،، ٣

ياحسين زيارتك نور وأجر،
زيارتك ماتنحسب من العمر
يطول عمره الزاير ومايفتقر
حسين يحضر لليزوره بالگبر.

ابد ماتنذل، يزاير،، أبد ماتنذل
الله يتقبل  يزاير.  الله يتقبل  

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ٤

بالمشي تواسي الشفيعة فاطمة
وللحسين تروح أملاك السمه
بحضرته تلگه الملائك خادمه.
زيارته معناهه حسن الخاتمه.

والعمل يكمل. يزاير،،والعمل يكمل.
الله يتقبل  يزاير.  الله يتقبل  

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،٥

التزم بخلاقك ولاتنفعل.
عين ابو السجاد تنظر كل فعل.
والتعصب عوفه وامشي بالعقل
والأخلاق بدربه لازم تكتمل.


كل أجر يوصل. يزاير.،كل أجر،يوصل.
الله يتقبل  يزاير.  الله يتقبل  

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


حيدرموسى الرميثي.

للمشاية


اجيتك.اجيتك. زاير اجيتك.

،،،،،،،،،،،،،،،،،١،،،،،،،،،،،،،،،،،،،،،،،،،،،،،،

جيتك وناگع بالدمع ضل رمشي
گالولي لاتمشي وگلت أله أمشي
گتلهم اني حسين عندي كلشي.
ماگدر يمنعني الشمر لا وحشي.

هويتك.  هويتك.  زاير اجيتك.
اجيتك.اجيتك. زاير اجيتك.

،،،،،،،،،،،،،،،،،،،،،،،،،٢،،،،،،،،،،،،،،،،،،،،

كلشي عفت لجلك يبعد عيوني.
مشاي اجيتك لاتخيب ضنوني
حاجات عندي   وادري متردوني
عليكم أمشي الزهره لتعوفوني.

بچيتك.  بچيتك.   زاير.اجيتك.
اجيتك.اجيتك. زاير اجيتك.

،،،،،،،،،،،،،،،،،،،،،،،،،،،٣،،،،،،،،،،،،،،،،،،،،
عفت الأهل مولاي  واعتنيتك.
شفت العراق بناسه صاير بيتك.
فاتح مضيفك كل وكت لگيتك
مرتاح يبقى العايش،بثنيتك.


نخيتك   .  نخيتك.، زاير اجيتك.
اجيتك.اجيتك. زاير اجيتك.

،،،،،،،،،،،،،،،،،،،،،،،،،،،،،٤،،،،،،،،،،،،،،،،،،،،،،،،
والقلم بيدك لو كتبت الزوار.
سجلني زاير ياحبيب الانصار
مستعره من يوم الخيم بيه النار
ابچي اعلزينب والوكت بيهه اندار.

.
نعيتك. نعيتك.،زاير اجيتك
اجيتك.اجيتك. زاير اجيتك.

،،،،،،،،،،،،،،،،،،،،،،،،،،،٥،،،،،،،،،،،،،،،،،،،،،،،،،

بالدرب أمشي وگلبي يذكر زينب.
مسبيه راحت  بالغرب تتعذب،
تعبانه كلش  بالسبي تتغرب 
بيمن اواسيهه. وگلبهه مصوب

.
بحميتك. حميتك. زاير اجيتك
.اجيتك.اجيتك. زاير اجيتك.
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،



حيدر  موسى  الرميثي

للمشاية


بعيوني   بعيوني..  اخدم المشايه.

،،،،،،،،،،،،،،،١،،،،،،،،،،،،،،،،،،     

ربي خالقني أخدمه. حسين اغله من العمر.
صرت للمشايه خادم.  الهم بشوگ. انتظر.
هله بالزوار اصيحن. ياهله بهذا العطر،
للحسين الكل يزوره. المهدي يمشي والخضر

بعيوني بعيوني.  أخدم الوفايه.
بعيوني بعيوني..  اخدم المشايه.


،،،،،،،،،،،،،،،،،،،،،٢،،،،،،،،،،،،،،،،،

ابلايه ابو السجاد تبقى    الدنيه ظلمه ابلاشمس
المايحس بحسين عوفه.  هذا كلشي مايحس.
المادرس وصط المجالس .  لايسولف بالدرس.
ظرف مايحبسنه عنه.  والدمع ماينحبس،


بعيوني    بعيوني. امسح انه الرايه.
بعيوني بعيوني..  اخدم المشايه.


،،،،،،،،،،،،،،،،،،،،،،،،،٣،،،،،،،،،،،،،،،،

الف ميت هله بيكم.     هله بزوار  الولي،
انتو من تمشون اگلكم  . ياعلي وياكم علي،
اتفضلوا ابموكبنه كلشي،، كل همومك تنجلي،
رايت العباس تعله.      اعل كل رايه  تعتلي

بعيوني   .  بعيوني.،، حسين اغله احچايه.
بعيوني بعيوني..  اخدم المشايه.


،،،،،،،،،،،،،،،،،،،،،،،٤،،،،،،،،،،،،،،،،،،،،،،،،،

الگلب يرتاح ابمشيكم.، هله بالجايين اله.
وصلوا لحسين السلام. ولو وصلتوا كربله.
سلمولي اعله ابو فاضل. هذا أمير المرجله.
هناك وتواسون زينب. من تجي ويه العايله .

.بعيوني.بعيوني.  اقره هاي الأيه.
بعيوني بعيوني..  اخدم المشايه.


،،،،،،،،،،،،،،،،،،،،،،،،،،٥،،،،،،،،،،،،،،،،،،،،،

تحصل بكل خطوه جنه. كلشي بحسابه تره
تكبر الغيره بكيانك.   زور سبع  الگنطره.
نواسي ابو السجاد بالدم. النه ضحه ابمنحره.
والأمام المهدي يحزن. كون نجبر خاطره.


بعيوني.بعيوني. حسين هوه  الغايه
بعيوني بعيوني..  اخدم المشايه.


،،،،،،،،،،،،،،،،،،،،،،،،،،،،،،،،،،،،،،،،،،،،،،،،

حيدر موسى الرميثي.

للمشاية
بجاهك يمولاي.
تكتبني مشاي.
،،،،،،،،،،،،،،،،،،،١،،،،،،،،،،،،،،،،

بلا زياره الگلب مايرتاح أبد
شما ازورك ودي هم ارجع بعد
وبربعينتك اجيك اعله الوعد.
ما اعوفك سيدي هذا عهد.

لو وزعت ماي
تكتبني مشاي  

،،،،،،،،،،،،،،،،،،،٢،،،،،،،،،،،،،،،،،،،،،،،

فدوه الك عمري وحياتي ومهجتي
ياحسين انت العقيدة وجنتي.
وصاروا  الخدام. كلهم  اخوتي.
ياحبيب ارجوك سجل زيارتي.

حبيتك هواي.
تكتبني مشاي  

،،،،،،،،،،،،،،،،،،،،،،٣،،،،،،،،،،،،،،،،،،،،

بالدرب چنهم ملائك هالبشر.
غيره واخلاق وأدب بيهم كبر
حسين عبره وعبره والكل اعتبر.
حسين للعطشان يتحول نهر.

غصبن على أعداي
تكتبني مشاي  

،،،،،،،،،،،،،،،،،،،،،،،،٤،،،،،،،،،،،،،،،

والمعازيب  وفرحهم باليمر
تشوفه للزاير يجيله ينتظر.
اتفضل ينادي يزاير بيك أجر
تراب زوارك نشمه بي عطر.

ليك الگلب جاي
تكتبني مشاي

،،،،،،،،،،،،،،،،،،،،،،،،،،،،٥،،،،،،،،،،،،،،،،،،،،

لازم اوصل وانتظر يم الصحن
راح ترجع زينب وياهه الضعن.
ترجع من الشام  ماعدهه وطن
تجيب راسك وانت ماعندك چفن.

خل تبچي عيناي.
تكتبني مشاي.

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

حيدر موسى الرميثي.

.للمشايه



عالميه  الزياره  عالمية

........................1
بدرب  الحسين  المواكب .. مثل   ديوان  الحسن  ..
كلها  بالزاير  ترحب  .. كلها  تهتف  مرحبن
كلمة  اتفضل   يزاير  .. نسمع  ايصيح  الوطن  ..
من  جميع  الدول  گصدوا  .. للزياره بكل زمن

فاطمية الرساله  فاطمية
عالميه الزيارة عالمية
.......................2

ياحسين  بهالعوالم  ..  احلى شي بس خدمتك
وبالعمر ماكو يغالي ..  احله من  زيارتك
نواسي زينب  لو مشينه  .. الكربله من گصدتك
وبگلبنه  اتفور لسه ..   نار جمرت خيمتك

زينبيه  المسيره  زينبيه
عالمية الزيارة عالمية

.............
....................3..
البشر  والجن  والملائك  .. كلشي بلكون  اعتنه  ..
ياحسين  ايزور گبرك .. بربعينك  كل سنه  ..
گبرك  وگبر  ابو فاضل  .. كالصفا ويه منه .
ابينهن  زوار نسعه  .. فايز اليمك  دنه  ..

حيدريه  ..  العقيدة .. حيدريه
عالمية الزيارة عالمية
.....................4
القلم بيد ابن مظاهر .. واسمه  مكتوب  الحضر  .
حسين من تنظر  سجلنه  .. وتقره اسامينه فخر  .
تگول  زواري عددهم  .. ادري  بيهم چم  نفر .
كل فرد عندك ملفه .. واسمه محفوظ وصور

مهدويه    الرساله   مهدويه
عالمية الزيارة عالمية
.     ............... .  ....5
جينه  فرض  الحب  نصلي  .. يم ضريحك يادوه  .
اليوصل الكربله  لازم  .. الك  يتوضه  بضوه  ..
من وفه  العباس ياخذ  ..  ضوه  ومن حبك هوه
بيك نتنفس  كرامة  .. وبيك  نقره  القل هو

عابسيه  المحبه  عابسيه
عالمية الزيارة عالمية
..............


حيدر موسى الرميثي..

جنح جبريل انكسرمن هالرزية
ماگدريتحمل دموع الزچية.
تبچي بحزن فاطمة  .  وي علي حامي الحمه
،،،،،،،،،،،،،،،،١
نزل جبرائيل حاير   .نشف دموع  ا لوديعه
تبلل اجناحه بدمعهه  .وشاب راسه من الفجيعه
محد ايشيع نبينه   .بس علي وتبچي الشفيعه
ربنه نصب علي والي   .للأسف محد يطيعه

انكسرظهرالمرتضى بهاي المصيبة
صعبه عالواحدبديه يدفن حبيبه
تجري الدمع من الدمه .  وي علي حامي الحمه
،،،،،،،،،،،،،،،٢
گعد يم حسين ينحب.دمع جبريل التفجر
شاف الحسين وحسرته.يبچي ينظرله وتحير
ياحسين اسكت يگله.تبچي اشوفك إني مگدر
ونتك تذبحني احسهه.عليك دلالي تفطر

شبگ نعش المصطفى حسين بدموعه
بعبره گلبه يريديطلع من ظلوعه.
عالهادي متألمه .  وي علي حامي الحمه




،،،،،،،،،،،،،،،٣
اعله الحسن تتوچه گامت.    تعثرالزهره بمشيهه
من بعد رحلت ابوهه.       اشچم مصيبه اتمرعليهه
بالصياط شلون بيهه        .بس تضل تشگف بديهه
اعله الوديعه الأمه هجمت.      من بعدغيبت نبيهه

فاطمه روح النبي واذوهه روحه
انكسرگلب المصطفى وزادت جروحه
تمطردموع السمه .  وي علي حامي الحمه
،،،،،،،،،٤
على باب الزهرههجموا .وحرگواالباب بحطبهم
عنهه جبرائيل دافع    .احترگ جنحه من لهبهم
ناده ميكائيل الحگ.      احترگ دارالي نحبهم
الحگ المحسن تچوه    .الگوم من شنواحربهم

شوف خاف ثياب زينب نارشبت
كلهه نارالدارما شفناهه شردت.
زينب وسف لاطمه .  وي علي حامي الحمه
،،،،،،،،،،،،،،٥
هذاظلع الزهره اسمعه   انكسر واتفطرصدرهه
ونه من العصره اسمع   .بقوته الظالم عصرهه
منگلبهه دموم تنبع       .شكبره  بسمارالغدرهه
الوحي يصرخ ليش صطروا .فاطمه وصابو انظرهه

شلون قنفذ يضرب الزهره بعصاته.
ليش محد رده لوكلهم شماته
تتلوع العالمه .  وي علي حامي الحمه

،،،،،،،،،،  ،،




حيدر موسى الرميثي

صبي بحزن. يادمعتي.
لم الحسن يادمعتي
ـــــــــــــــــــــــــــــــــــــــ١

تموت مظلومه الزچيه. ابلاذنب خدهه انصطر.
شسوت الزهره يعالم والظلع منهه انكسر.
وره الباب تصيح فضه. طاح محسن وانعصر.
بعد ما أگدر أگومن. متني بالصوط أنحفر.

طاحت تون ياحسرتي.
صبي بحزن يادمعتي.
ـــــــــــــــــــــــــــــــــــــــــــ٢
لسه باب الزهره يبچي. ويجري دمع المنتظر
الزهره ماتت من المهه وبگلبنه ظل أثر.
گبر ماعدهه ألزچيه. والكسر لا ماجبر.
أبد مايزغر جرحهه. كل زمن بينه كبر.

يبچي الجفن. ياحسرتي.
صبي بحزن يادمعتي
ــــــــــــــــــــــــــــــــــــــــ٣

بين باب وبين حايط. ماتت احلام البشر.
اغتالوا الرحمة البريئه. والقهر طول الدهر.
والحطب ماعنده ذمه. اعلم الحسين أنسجر.
حرگ دار الچان يهدي. لليتامه مستقر.


مثل الغصن. ياكسرتي.
صبي بحزن يادمعتي
ــــــــــــــــــــــــــــــــــــــــــــــ٤

الله لاينطي الي بچوا. زينب وبچوا علي.
علي من غسل ظلعهه. ونه أصبح يعتلي.
چان مايدري بكسرهه. وانكسر گلب الولي.
ظلوعهه مكسوره شاهد. بالمصايب يبتلي.


بكبر الزمن. يالوعتي.
صبي بحزن يادمعتي
ــــــــــــــــــــــــــــــــــــــ٥

قصت البسمار ضلت بينه تجرح ماهدت.
ونار باب الزهره تسعر بالگلب بينه چوت.
على الما خلوهه تبچي. على أبوهه اتصوبت.
ليش أخذوا فدك منهه. بالمصيبه اتعذبت.

مصاب الظلع يامحنتي.
صبي بحزن يادمعتي
ــــــــــــــــــــــــــــــــــــــــــــ

حيدر موسى الرميثي

تجري دموعي. ونار ظلوعي.
من بعد عيون المختار.
ـــــــــــــــــــــــــــــــــــــــــ١


حرگوا داري وكسروا ظلعي. من هاجر سيد الأكوان.
ما واحد يرحمنه اخلافك. غربه اتحاوطنه العدوان.
صطروا عيني وطاح المحسن. وزينب تسبيهه الأحزان.
صوبني البسمار وابچي. ودمي الينزف علحيطان.

ظلمه أيامي. وتبچي أحلامي.
وبفراگك يبچي الكرار.

ــــــــــــــــــــــــــــــــــــــــــــ٢

عذبني فراگك يابويه. ويبچون وياي الحسنين.
اعلمصابك ما خلوني أبچي. منعوني انحب يا ياسين.
من بعدك هلناس أذوني. ومن عندي كسروا ظلعين.
ومن حگي الگوم ايحرموني. ما أقبل ينصاب ألدين.

چتفوا حيدر. وانه أتحسر.
عدواني الدخلوا للدار.
ــــــــــــــــــــــــــــــــــــــــــــــ٣


ما چني أبنيتك يالهادي. ضربوني بصياط الگوم.
قنفذ يرجعلي أيعذبني. بصوطه وفت گلبي المالوم.
محد يرحمني ويحميني. وشافو عيني اتصب دموم.
والكرار ايعاني ابوحده. راعي الحگ ايضل مهموم.

وصيتك راحت. وبنتك ناحت.
وينحب سلمان وعمار.
ـــــــــــــــــــــــــــــــــــــــــــــــ٤



من أسمع بلال ايأذن. اتذكر من چنت وياي.
مااتحمل نار غيابك. بعدك مانشفت عيناي.
لوترجعلي لو تاخذني. وياك وارفض دنياي.
لو ترجع وتشاهد حالي. مثل الورده ابغير الماي.

كليوم أذبل. عنك أسأل.
وگلبي وبيتي ايشبن نار.
ـــــــــــــــــــــــــــــــــــــــــــــــــ٥

مت ولا واحد شيعني. وحفروا گبري بنص الليل.
مت ومحد يندل گبري. وبس حيدر تابوتي ايشيل.
مت وما نصرتني الأمة. ودموع الحسنين أتسيل.
مت وما رحموا أولادي. داستهم من بعدي الخيل.

نار افادي. وذبح أولادي.
اصعب من جرح البسمار

ــــــــــــــــــــــــــــــــــــــ

حيدر موسى الرميثي

يارفعت راس الخادم.
ياثوره بوجه الظالم
يارايتنه الما طاحت
تتنطر چف القائم
،،،،،،،،،،،،،،،،،،،،،،،،،١،،،،،،،،،،،،،،

طلعت بالحق اتطالب ماتت مهظومه الزهره.
ماتت بس رفعت راية دين الحق بكل فتره.
ماتت بس ضلت تحضر. بكل مجلس تجري العبره.
كل موكب تدخل صارت. تواسي الذبحوه من نحره.

ثار الظلع متانينه
يوم اليظهر مهدينه.
اعلحسين دموع السالت.
تتنطر چف القائم.

،،،،،،،،،،،،،،،،،،،،،،،،،،،،،،٢،،،،،،،،،،،،،،،
تعرف كل خادم شسمه. وعنوانه وتعرف حاله.
واليخلص أسمه أتسجله. وربك يقبل أعماله.
الخادم لوطاح بشده. متعوفه اتضل تبراله.
توگفله الزهره بعسره. تشفعله تصلح باله.

فاطم يامعظم سرهه.
بس المهدي يفسرهه.
أول ثوره ومن صاحت.
تتنطر چف القائم
،،،،،،،،،،،،،،،،،،،،،،،،،،،،،٣،،،،،،،،،،،،،

ظلوع أشگد تطلب صارن. يلمهدي ظلوع هوايه.
ظلوع حسين وظلع أمه. وعلباب أثار دمايه.
وعين الزهره المصيوبه. وعين العباس ومايه.
كلهن ينتظرن تطلع. تظهر يا أعظم أيه.

مكسوره ظلوع الزهره.
تتنطر ثار العصره.
امك يالغايب ناحت.
تتنطر چف القائم.
،،،،،،،،،،،،،،،،،،،،،،،،،،،٤،،،،،،،،،،،،،،،

الظلع المكسور ايسولف قصت محسن من ضحه.
أغتالوا محسن من زغره. مايبرد عايش جرحه.
دم البسمار الينزف. خضب يالمهدي السبحه.
الچان الهادي يوصيهم. خانوا يالمهدي الملحه.

مايبرد جرح البضعه.
بينه يوج مثل الشمعه.
بينه الحسره وماراحت.
تتنطر چف القائم

،،،،،،،،،،،،،،،،،،،،،،،،،٥،،،،،،،،،،،،،،،،

تودع زينب وتوصي. وحسين اصبح يسمعهه.
يعرف هاي أخر لحظه لازم أمه يودعهه.
يندب يازينب أمنه. لو راحت شيرجعهه.
شو ماسكتت ونتهه. ظلع أمنه ظل يوجعهه.

ياوسفه تموت الرحمة.
وتعيش أبذله الأمه.
من بعد النعمه الغابت.
تتنطر چف القائم

،،،،،،،،،،،،،،،،،،،،،،،،،،،،،،،،،،،،

حيدر موسى الرميثي

. اسم الزهراء، خير الأسماء
بيهه موصي المختار.
طاعتهه واجب صار.

ــــــــــــــــــــــــــــــــــ١

الله وصانه ونبينه. گال من بعدي الوديعه.
گال لا تاذون فاطم. فاطمة روح الشريعة.
واليحب الزهره رابح. هناك تشفعله الشفيعة.

واجب نحب ام الحسن.
موجوده هيه بكل زمن
تنقذنه من نار الفتن.
لأن صرنه الهه شيعه.

ام الحوراء. وام الأضواء.
تنقذنه من النار.
طاعتهه واجب صار.

ـــــــــــــــــــــــــــــــــــــ٢

الدفع باب البضعه ظالم . ماتمسك بالوصيه.
كسر ظلع الزهره بيده . وغدر حماي الحميه.
طاح محسن بين اديهه. وضلت الدمعه جريه.

مصيبت المحسن ماطفت.
بكربله نيران اصبحت.
زينب الحره أتعذبت.
وبقت نار الغاضريه.

فاطم قرآن. كل الأزمان.
ام اليمه الأطهار.
طاعتهه واجب صار.
ـــــــــــــــــــــــــــــــــــــــــــــ٣
فاطمة متريد فاسد. يحكم الناس بظلامه.
رفضت الأحزاب كلهم. وبايعت راعي الأمامه.
بس علي هو الخليفة. عينه رب الكرامة.

البايع الزهره واعتقد.
ميبايع الفاسد أبد.
وميخون ويحب البلد.
ويحترم أمنه ونظامه.

فاطم اسلام. والباقي اوهام.
ثوره الكل الأحرار.
طاعتهه واجب صار.
ــــــــــــــــــــــــــــــــــــ٤

النذل طگاهه اعلخدهه. طگته كلش قويه.
طاحت اعلگاع تبچي. تصيح ياسيد البريه.
بعينهه يرجع صطرهه. بصوطه يضرب بالزجيه

يرفسهه ماعنده رحم.
ويلچم ظلعهه الي أنهشم.
الزهره تصيح من الألم.
بضربته تشوف المنية.

حرگوهه الدار. زينب تحتار.
يبچي اعليهه الكرار.
طاعتهه واجب صار..

ـــــــــــــــــــــــــــــــــــــــــــ٥
ماتت الزهره بحزنهه. والحسن وحسين يمهه
الحسن يمهه يصيح يمه. حسين ظل ايحس بألمهه.
يگلهه فدوه ضلوعي كلهن. الظلعچ ويبچي ويشمهه.

حاچيني يزغيرت عمر.
ماتحچي كاتلهه الكسر.
البسمار ينزف بالصدر
من العمر ظالم حرمهه

بيت الأحزان. يبچي بأحزان.
ومهدينه يريد الثار.
طاعتهه واجب صار.
............................................
بلليل راحت للگبر.
شيعهه حيدر بالصبر.
لليوم ماعدهه گبر.
البسمار يوجع بالصدر.
ــــــــــــــــــــــــــــــــــــــــــــــ

حيدر موسى الرميثي

من يوم الظلع. ظل يجري الدمع.
كل حسره ابتدت. من فاطم بچت.
................................ ١

ابدفعت الباب انفتح باب المصايب
الدنيه صارت وحشه حسرات ومتاعب
اقوى من جرح الرمح فگد الحبايب
شلون ترتاح وحبيب الروح غايب

من طاحت تون. وانصاب الجفن.
الرحمة اتصوبت. من فاطم بچت.

................................... ٢

ليش حرگوا دارهه وكسروا ظلعهه
شعجب مايرحمهه من تون سمعهه
على خد الزهره چفه من طبعهه
طاحت الترچيه واتغير وضعهه

ماطاب الجرح. فوگه ايذر ملح.
الدنيه أتعذبت. من فاطم بچت

..................................... ٣

طاح محسن بين أديهه من عصرهه
فاطمة المظلومة أبد محد نصرهه
ناگع البسمار بالدم من صدرهه
ماتگوم اظلوعهه الظالم كسرهه

يچويهه الجمر. كاتلهه الكسر.
الرحمة اتحيرت. من فاطم بچت
.................................. ٤

زيتب اتنادي ييمه گومي ليه.
شيطيحچ علگاع أكعدي يالزچيه.
طاح گلبي وطيحت المحسن سويه.
ليش يالنعمة نويتي اعله المنية.

زينب بالقهر. يسبيهه الدهر.
بالحسرة ابتلت. من فاطم بچت

................................ ٥

ظل ينوح حسين بفراگ الحنينه.
تمطر دموع السمه شما جرت عينه
يبچي جبرائيل من يسمع ونينه.
الفارگ أمه يابشر الله اليعينه.

الفارگ فاطمة. جروحه أتألمه.
والفقره اشتكت. من فاطم بچت.

..........................................

حيدر موسى الرميثي

وفاة السيدة زينب عليها السلام


بليل امي اخذهه الگبر.
وطبروا ابوي الفجر
وذبحو اخوي الظهر
وحرگوا خيامي العصر.
،،،،،،،،،،،،،،،،،،،،١،،،،،،،،،،،،،،،،،،

انه زينب كل وكت عندي مصيبه
التفگد امهه من الزغر تصبح غريبة
عمري خلص بس انوح اعله الحبيبه
وجرح ابوي الماگدر يشفيه طبيبه

مثل الظلع مايصح.
كل دوه الذاك الجرح.
راس الوصي ينطبر.
وحرگوا خيامي العصر.

،،،،،،،،،،،،،،،،،،،،،،،،٢،،،،،،،،،،،،،،،،،،،،،

بليله ظلمه شيعوا نعش الزچيه
امي ماتت بالوداع اتصد عليه.
من بعدهه احمل مصايب تدري بيه
تدري كل احبابي اودعهم بديه

أمي وعلي والحسن.
وطشتين بچن زمن

طشت الچبد والأسر.
وحرگو خيامي العصر

،،،،،،،،،،،،،،،،،،،،،،،،،٣،،،،،،،،،،،،،،،،،،،،،،،
بكربله ماتوا اخوتي وكل بنيني
بالشمس ذبحو عزيزي أگبال عيني
تفطرت سابع سمه وسمعت ونيني
وماكسر گلب العدوا نوحي وحنيني

اصحاب الكساء ودعت
وكلهم جرحهم شفت

بلباب شفت العصر.
وحرگوا خيامي العصر
،،،،،،،،،،،،،،،،،،،،،،،،،،،،،٤،،،،،،،،،،،،،،،،،،،

نفسه بسمار الجرح صدر الوديعة.
صوب عيون الگمر يم الشريعه
نفسه يتحول رمح نفس، الفجيعة
حمل راس حسين ومصابه يذيعه

يقره الكهف علرمح
راس الولي المنذبح

وظلوعه هم تنكسر
وحرگو خيامي العصر
،،،،،،،،،،،،،،،،،،،،،،،،،،،،،٥،،،،،،،،،،،،،،،،،،،،

اتعنت الخيل الخيامي بنار أجوني
گمت اصيحن وين أخوتي الفارگوني
حرگو خيامي الأعادي ولو عوني
اطفالي تبچي من الصياط وسلبوني.

طويريج لو ركضتي
ماعادلت طيحتي

يركض وراي الجمر
حرگو خيامي العصر

،،،،،،،،،،،،،،،،،،،،،،،،،،،٦،،،،،،،،،،،،،،،،،،،،،،،،،،،

امشي علناگه واودع بالأطايب
لادفن لاروس مطروحه الحبايب
بكربله ماعندي اخوه ولاگرايب
تالي مچتوفه بحبل بيد الأجانب.

ابچي الرقيه المشت
ورده بخرابه وغفت

عذبهه صوط الشمر
حرگوا خيامي العصر

،،،،،،،،،،،،،،،،،،،،،،،،،،،،،،،،،

حيدر موسى الرميثي

الى الأمام الكاظم. ع
ــــــــــــــــــــــــــــــــــــ

مات الحق بسجن الظالم.
ــــــــــــــــــــــــــــــــــــــ١

مظلوم الكاظم وجروحه
ماتخلص لاشمس تلوحه.
شيطيب روحه المذبوحه.

خل نبچي اعلمصاب الكاظم.

ــــــــــــــــــــــــــــــــــــــــــــــــ٢

مايرحم ظالم سجانه.
اذه المظلوم وآذانه.
الكاظم ماتخلص أحزانه.

مولانه الراهب والعالم.

ـــــــــــــــــــــــــــــــــــــ٣

ماگدروا نوره يسجنونه
ترهبهم نظرات عيونه.
ليث الحق هذا يعرفونه.

والگال الحق ينذل واهم.

ــــــــــــــــــــــــــــــــــــــــــــ٤

تشتاگ الجنة السجداته
مسجون وتشهد اياته
ماميت عاشت كلماته.

بالطاموره بصبره يقاوم.

ـــــــــــــــــــــــــــــــــــــــــــ٥

علفاسد قام أكبر ثوره.
لجل الحق ايضحي بعمره.
مثل حسين بعبره وعبره.

والراية التنتظر القائم.

ـــــــــــــــــــــــــــــــــــــــــــــــــ
حيدر موسى الرميثي

چنت انت مهدي لأمتك .. بسرداب سجنك غيبتك
يالكاظم اتعجل الفرج   تدعي بدمعهه شيعتك.
،،،،،،،،،،،،،،،،،،،،١
وادم گبل تشبه تره. بهذا الوكت وادمنه
مثل احنه نقره بكل زمن. . عجل فرج قائمنه.
ويقرون  چانوا بالفرج. . عجل فرج كاظمنه
ياربي خلصه من السجن. موسى بعباته ايلمنه.

مادروا بيك بياسجن.    يالكاظم احبابك تحن.
بزنزانه ظلمة تنحبس  والشمس تنطرطلعتك
،،،،،،،،،،،،،،٢
كل جمعة يقرون الفرج. مو بالمساجد همه.
يقرون الك فوگ الجسر. ياربي فرج الغمه
يرج عولينه من السجن. ويتخلص من الظلمة
طالت ياموسى غيبتك. من البچي عيونك نعمه.

بعدك فلا يسوه الحچي  . ورم چفنه من البچي.
من غير امام الشيعي ضل  . تتعطل انته بجيتك.


،،،،،،،،،،،،،٣
تگظي النهار بسجدتك. ونگظي النهار اندورك.
ويه الله تسهر ليلتك. حد مايصبح فجرك.
وشيعتك نگظيهه بچي. يايوم يسهل امرك.
بيدك سلاسل لو حبل. وشدوا ايديك بنحرك.

يايوم ترجع للأهل. گلب المحب تدري انكتل
يبن النبي يمته تهل   . والأمة تسمع صيحتك.
,,,,,,,,,,,,,,,,,,,,,,,,,,,,,,,,,,4
عمر الزچية اثمنطعش. واثمنطعش هم سجنك.
اثمنطعش عام انته تون. اعله الزهره امك ونك.
ماشفت كلشي من العمر. بس بالسجون او حزنك
الحظنك تره اشتاگ الرضا. الأيتام رادت حضنك 

نوحك تسمعه فاطمة. وتنزل الك من السمه.
عجل تگلك يالغبت. جنة عدن منتظرتك
،،،،،،،،،،،،،،،،٥
يوميه مسبيه البلد. زينب يراعي الغيره.
ويومية مسبي انته بسجن. يومية تمشي الديره.
چتفوكم بنفس الحبل. هالحبل مامش غيره.
من چفوفك ايسيل الدمه. والنظر لله اتديره 

تنتظرك ايتام شكثر. بفراگك ايضيگ الصدر
واحبابك اشتاگت الك. مشتاگة تسمع كلمتك.
،،،،،،،،،،،،،،،،،

حيدر موسى الرميثي

هله هله. بيك مهدينة
هله هله بيك مهدينة
ـــــــــــــــــــــــــــــــــــــــ١

ننتظر تظهر يبن خير البشر
يالظهورك رحمة واتداوي النظر
دوم ندعي وننتظر أجمل خبر.
ربي عجل في ظهور المنتظر.

هله هله. بيك والينه.
هله هله بيك مهدينة
ـــــــــــــــــــــــــــــــــــــــــــــــــ٢

تاخذ، بثار الرسول وعترته.
وطف ابو الأحرار ترجع ثورته
وتنصر الأسلام تعله رايته
وعمك العباس ترجع صولته

هله هله.. ياضوه الدينه
هله هله بيك مهدينة
ــــــــــــــــــــــــــــــــــــــــــــــ٣

الأرض فرحانه بوجودك والسمه
تصيح اهلن بيك يابن فاطمة
انت تسگي گلوبنه من الضمه
ياهله بجيتك يبن حامي الحمه.

هله هله. كلنه نادينه
هله هله بيك مهدينة
ـــــــــــــــــــــــــــــــــــــــــــــــــــ٤

يابو صالح بسمك ايدگ النبض
طاعتك مولاي علعالم فرض
انت يامولاي تملك هالأرض
واحنه خدامك نريدك تنتفض

هله هله. نوره يضوينه.
هله هله. بيك مهدينة
ـــــــــــــــــــــــــــــــــــــــــــــــ5

سيد الكون البطل لمن يهل
بيده يملي الأرض قسطا وعدل
جندي اريد بجيشه ياربي انقبل
يظهر الموعود ويلم الشمل.

هله هله.. حبه يملينه.
هله هله بيك مهدينة
ــــــــــــــــــــــــــــــــــــــ

حيدر موسى الرميثي

عجل فرج مهدينه .. ياربي يارب.
نوره يهل أعلينه .. ياربي يارب.
ـــــــــــــــــــــــــــــــــــــــــــــ١

ندعيك يارب العرش ياخالق الناس
تسهل أمر مهدي البشر.وتداوي الأحساس
يالرحمتك ما الهه حد. ما الهه مقياس
ارحمنه بالمهدي يجي. ويعطر الأنفاس.

مهدينة يرجع لينه . ياربي يارب.
نوره يهل أعلينه . ياربي يارب
.
ـــــــــــــــــــــــــــــــــــــــــــــــــ٢

بطلع المهدي وبالعدل يحكم هالأكوان
ويتطبق بهاي الأرض منهج القرآن.
مايبقى جائع لا ظلم. مايبقى حيران
نعيش بأمان بدولته. والخير عنوان.

للمنتظر تانينه. ياربي يارب
نوره يهل أعلينه. ياربي يارب

ـــــــــــــــــــــــــــــــــــــــــــــ٣

ياربي بيدك كل أمر والشيعة تنخاك.
علكون تنشر رحمتك يارب الأملاك
يايوم ننظر حجتك. هل وجهه بسماك.
احنه عبيدك ياملك. كليوم نرجاك.

ياربنه ياحامينه. ياربي يارب
نوره يهل أعلينه. ياربي يارب.

ـــــــــــــــــــــــــــــــــــــــــــــــــ٤

وذنوبنه هيه السبب. يارب يغفار
وذنوبنه اتأخر الفرج. وتأخر الثار.
وذنوبنه أكبر جرح. وصط الگلب نار.
ننحرم من أعظم بشر. متشوفه الانظار

سامحنه يابارينه. ياربي يارب.
نوره يهل أعلينه. ياربي يارب.
ــــــــــــــــــــــــــــــــــــــــــــــ٥

تفرح الزهره ابطلعته. ويفرح محمد
بالعدل ينشر رايته. والعدل غرد
مسكين مايبقى بعد. واخلاقه تشهد
ماتبقى فقره بدولته . والخير يمتد.

ترزقنه نظرت عينه. ياربي يارب
نوره يهل أعلينه. ياربي يارب.

ـــــــــــــــــــــــــــــــــــــــــــــــ

حيدر موسى الرميثي