ТЕАТР -- ИБРАТХОНАДУР
Кеча Жиззах вилоят мусиқали драма театрида "Аёл" номли спектакль премьероси намойиш этилди.
Миллий адабиётимизнинг таниқли вакили, шоира Halima Axmadнинг "Яримта олма" номли асари асосида яратилган ушбу спектаклни Ўзбекистон санъат арбоби, таниқли режиссёр Бахтиёр Тураев саҳналаштирган.
Аёл муҳаббати, садоқати, унинг ожиза эмас, чинакам мўъжиза эканлиги яна бир бор моҳирона режиссура, моҳирона ижро орқали қалбларга сингдирилди.
Спектакль таъсирчанлигини оширувчи рамзий кўринишлар - қуроқ кўрпача тикаётган аёл, фаришталар ва иблислар ҳатти-ҳаракатлари асар мазмунини очишда ўзига хос жозибадорлик касб этган.
Муқаддам, Алишер Навоий ҳазратларининг "Ҳайрат-ул аброр" асари асосида ишланган спектакль режиссёр Бахтиёр Тўраевнинг санъаткорона маҳоратини тўла-тўкис намоён қилиб, санъат ихлосмандлари томонидан қизғин қарши олинган эди. Бу асар ҳам ўзига хослиги билан томошабинни жалб эта олди.
Театр - ибратхонадур, демаган бекорга улуғларимиз. Ушбу асар қаҳрамонлари бошидан кечирган синовлар, аёл садоқати ва матонати барча макон ва замон хотин-қизлари учун ибрат мактаби, ҳаёт сабоқлари бўлиб қолади, деб умид қиламиз.
Зеро, ҳар бир яхши асар ана шундай тарбиявий аҳамияти, таъсир кучи билан инсониятни эзгулик сари бошлаб бораверади.
Спектакль намойиши олдидан сўзга чиққан Ўзбекистонда хизмат кўрсатган артист Раъно Ярашева ва Ўзбекистон Ёзувчилар уюшмаси Жиззах вилоят бўлими раҳбари Меҳрибон Абдураҳмонованинг дил сўзлари ҳам айнан аёл мавзусида бўлди.

Меҳрибон Абдураҳмонова.

20 Май, 2025 йил.

1-iyun — Xalqaro bolalarni himoya qilish kuni munosabati bilan
31-may va 1-iyun kunlari Jizzax viloyat musiqali drama teatrida soat 15:00 hamda 18:00 da "Ertaklar mamlakatida" nomli teatrlashtirilgan ertak shou tomoshasi bo‘lib o‘tadi.

Ushbu ertak shou tomoshasiga barcha bolajonlarni chorlab qolamiz🤗🤗🤗
Bayram kunlarini biz bilan yanada qiziqarli o‘tkazing!!!