Qashqadaryo viloyati ichki ishlar boshqarmasi Axborot texnologiyalari sohasidagi jinoyatlarga qarshi kurashish boshqarmasi xodimlari tomonidan Qarshi davlat texnika universitetida kiberjinoyatlarning oldini olishga qaratilgan profilaktik tadbir o‘tkazildi.
Tadbirda universitet professor-o‘qituvchilari hamda talabalari ishtirok etishdi. Unda axborot texnologiyalari sohasida sodir etilayotgan turli turdagi jinoyatlar, ularning oqibatlari hamda ulardan himoyalanish usullari haqida batafsil ma’lumotlar berildi.
Shuningdek, ijtimoiy tarmoqlardan oqilona foydalanish, shaxsiy ma’lumotlarni begonalarga bermaslik, turli onlayn firibgarlik holatlariga uchmaslik, ishonchsiz manbalarga o‘z shaxsiy yoki moliyaviy ma’lumotlarni kiritmaslik zarurligi alohida ta’kidlandi.
Uchrashuv yakunida talabalar o‘zlarini qiziqtirgan savollar bilan murojaat qilishdi va soha mutaxassislari ular uchun foydali maslahatlar berdilar. Mazkur tadbir yoshlar o‘rtasida kiberxavfsizlik madaniyatini shakllantirish hamda internetdan xavfsiz foydalanish ko‘nikmalarini mustahkamlashga xizmat qildi.

Қашқадарё вилояти ички ишлар бошқармаси Ахборот технологиялари соҳасидаги жиноятларга қарши курашиш бошқармаси ходимлари томонидан Қарши давлат техника университетида кибержиноятларнинг олдини олишга қаратилган профилактик тадбир ўтказилди.
Тадбирда университет профессор-ўқитувчилари ҳамда талабалари иштирок этишди. Унда ахборот технологиялари соҳасида содир этилаётган турли турдаги жиноятлар, уларнинг оқибатлари ҳамда улардан ҳимояланиш усуллари ҳақида батафсил маълумотлар берилди.
Шунингдек, ижтимоий тармоқлардан оқилона фойдаланиш, шахсий маълумотларни бегоналарга бермаслик, турли онлайн фирибгарлик ҳолатларига учмаслик, ишончсиз манбаларга ўз шахсий ёки молиявий маълумотларни киритмаслик зарурлиги алоҳида таъкидланди.
Учрашув якунида талабалар ўзларини қизиқтирган саволлар билан мурожаат қилишди ва соҳа мутахассислари улар учун фойдали маслаҳатлар бердилар. Мазкур тадбир ёшлар ўртасида киберхавфсизлик маданиятини шакллантириш ҳамда интернетдан хавфсиз фойдаланиш кўникмаларини мустаҳкамлашга хизмат қилди.

O‘zbekiston Respublikasi Prezidentining 2024-yil 19-iyuldagi PQ–274-sonli qarori, ya’ni “Voleybol sport turlarini yanada rivojlantirish chora-tadbirlari to‘g‘risida”gi qarori ijrosini ta’minlash maqsadida Shahrisabz shahrida “Shahrisabz shahar IIB boshlig‘i kubogi” uchun voleybol musobaqasi tashkil etildi.
Mazkur qaror asosida voleybol sport turini yanada ommalashtirish, yoshlar orasidan iqtidorli sportchilarni saralab olish tizimini takomillashtirish, ushbu yo‘nalishda zamonaviy sport infratuzilmasini yaratish hamda milliy terma jamoalarimizning nufuzli musobaqalarda yuqori natijalarga erishishini ta’minlash maqsad qilingan. Shuningdek, iqtidorli sportchilar, jumladan, sportchi ayollarni aniqlash, tanlab olish va ularni professional darajada tayyorlashga alohida e’tibor qaratilgan.
Madaniyat saroyining sport zalida o‘tkazilgan musobaqada shahar maktablarining o‘g‘il va qizlar jamoalari ishtirok etishdi. Jami 25 ta maktabdan 50 ta jamoa (25 tasi o‘g‘il bolalar, 25 tasi qiz bolalar) qatnashib, 400 nafardan ortiq yoshlar musobaqada o‘z mahoratini namoyon qildi.
G‘olib jamoalar diplom, medal va esdalik sovg‘alari bilan taqdirlandi.
Tadbir yakunida Shahrisabz shahar IIB boshlig‘i Nuriddin Meyliev yosh sportchilarni tabriklab, ularni sog‘lom turmush tarziga rioya etishga, muntazam sport bilan shug‘ullanishga va yurt sharafini munosib himoya qilishga chaqirdi.

Ўзбекистон Республикаси Президентининг 2024-йил 19-июлдаги ПҚ–274-сонли қарори, яъни “Волейбол спорт турларини янада ривожлантириш чора-тадбирлари тўғрисида”ги қарори ижросини таъминлаш мақсадида Шаҳрисабз шаҳрида “Шаҳрисабз шаҳар ИИБ бошлиғи кубоги” учун волейбол мусобақаси ташкил этилди.
Мазкур қарор асосида волейбол спорт турини янада оммалаштириш, ёшлар орасидан иқтидорли спортчиларни саралаб олиш тизимини такомиллаштириш, ушбу йўналишда замонавий спорт инфратузилмасини яратиш ҳамда миллий терма жамоаларимизнинг нуфузли мусобақаларда юқори натижаларга эришишини таъминлаш мақсад қилинган. Шунингдек, иқтидорли спортчилар, жумладан, спортчи аёлларни аниқлаш, танлаб олиш ва уларни профессионал даражада тайёрлашга алоҳида эътибор қаратилган.
Маданият саройининг спорт залида ўтказилган мусобақада шаҳар мактабларининг ўғил ва қизлар жамоалари иштирок этишди. Жами 25 та мактабдан 50 та жамоа (25 таси ўғил болалар, 25 таси қиз болалар) қатнашиб, 400 нафардан ортиқ ёшлар мусобақада ўз маҳоратини намоён қилди.
Ғолиб жамоалар диплом, медаль ва эсдалик совғалари билан тақдирланди.
Тадбир якунида Шаҳрисабз шаҳар ИИБ бошлиғи Нуриддин Мейлиэв ёш спортчиларни табриклаб, уларни соғлом турмуш тарзига риоя этишга, мунтазам спорт билан шуғулланишга ва юрт шарафини муносиб ҳимоя қилишга чақирди.