السجن يالمهدي اشد بچاك/لو طاف
ولهيب الخيمه لسه وياك/لو طاف
بصحن الكاظميه الجدم/لو طاف

اذكرني بدعائك هالمسيه


يبو رمش الذي دموعه/طفت بي
ابداعت كل جدم جمره/طفت بي
اذا صحن الرضا الليله/طفت بي

يبو صالح اذكرني هالمسيه

ثائر الربيعي

اثنين ايشبهـن الـجدي/بچتلاي
السلاسل حيل بعضامي/بچت لاي
ومثل ارقيه معصومه/بچت لاي

او لو تحضني هم ماتت عليه

خروج الضعن من المدينه

آنه وعلّتي وآلام الهجر
يرقيه البعد رايدله عمر
ابدي بغربتي. وي طرت الفجر
++++++++
والله وكبرنه وصرنه انسولف
بالفرگه وينچ وين الفرگه
توه ابونه استانس بينه
علمنه توه اشلون انشبگه
متبسم وتدمعـلچ عينه
مدري شبگتچ ليش اتحرگه
يفتح ادييـنه لـبنـياتـه
علمنه من يدخل عالملگه

اتبسملي شكثر/ودموعه جرن
راح اشبگ منو/لو سار الضعن
لفراگ الابو/ماينفع صبر
++++++++
ماتكفي يختي اوداعچ دمعه
عيفي دمعتچ يختي ارقيه
شبعيني نظره عيفي دموعچ
صيحيلي يختي بكل حنيه
اترجعيلي واترد بيچ عيوني مابيها دمعة عينچ جيه
ابقى عليله وانتي بغربه واشيجمع الما بيچ او بيه

هذا اخر نظر/من عينچ الي
اخذي شوفتي/ويبرالج علي
ما انساچ ابد/كل ليله التمر
++++++++
هالگعده هاي الما تتكرر
ليله الاخيره البيني وبينچ
رفعيلي راسچ عيفي دموعج
خليني اقره الطف ابعينچ
طبعت اصابع جاي اقراها
مرسومه من هسه بخدينچ
هم مثلي لو ونيتي الحالچ
لا والي يسمع صوت اونينچ

خدچ ينضرب/يوصلني صده
اسمع صرختچ/صوتچ لو بده
يبچينه الم/من سحگ الجمر
+++++++++
بلساني هاي آخر يحبيبه
يرقيه هالليله اتسمعيها
واهمومي عن فرگاكم كلكم
الگبر الزچيه انوب احچيها
اهنا يم حسن اختي العافتني
انطيني يُمّه اخبار اعليها
عطشانه لو تركض بالهيمه
ضربوها مسلوبه اتراچيها

واسمعها تون/ونّتها الم
ماتت شوفتچ/دلالي افتهم
بيدينچ اثر/لحبال اليسر
+++++++
نتشابه احنه ونفس القامه
اثيابچ حجمها نفس اثيابي
هاج اخذي ثوبي الي تلبسينه
العبد الله لو حس طال غيابي
بحضاني لو شلته اترد روحه
ايمد ايدي وايعدل بحجابي
يم بابي راح اگعد انتظره
مهده ارسمه فوگ اعتابي

ما واحد يرد/دلالي يحس
الوان العبي/تگلبها الشمس
مذكور السبي/واعرف هالامر
+++++++
ثوبچ البسه واستر وجهي
اوگفلي يختي اگبال مرايه
اتصور انتي الاحچي وياها
صوتچ اسمع يحچي ويايه
ارحم الچ ماجيتي اويانه
شوفيهن اجدامي مچوايه
صدره اليظمنه چان بشوگه
ضاعتله منه ضلوع اهوايه

لمدلل بقى/عاري اعله الترب
كل وصلت جسد/مليانه ضرب
شيباته الابو/هم صارن حمر
+++++++

ثائر الربيعي

مولد الحسين. عليه السلام

شعندك يجـبريل اخبار
طاير فرح شنهي الصار
يافطرس ايگلي ارتاح
صار اليطييب لجناح
++++++++++++
مختبصه املاك السمه
والحور اشوف امحزمه
وحده لوحده اتبشّرت
مبروك جابت فاطمه

يابشر صحت المنولـد
تنـزلّـه افــواج اوتـرد
فرحانه تصعد والعجب
بيها عطر مـثل الورد

ادري بمحمد موجود
فهموني ياهو المولود
منهم ملك ابشر صاح
صار اليطييب لجناج
++++++++
ماتدري يافطرس شكو
صار الحسن عنده اخو
ايسمونه رحمه الواسعه
مو بس حلو كلش حلو

جبريل الف رحمه الهلك
اوگف الي وگفت ملك
توسطلي يم رب العرش
هالوگفه ما انساها الك
امنيتي بس هلجنحين
امسحهن بمهد حسين
يم مهدي ترجع لرواح
صار اليطييب لجناح
+++±++++
تدلل اشـرايد بـعـد
ويايه انزلـك للـمهد
مايوگف گباله طلب
عد الله غالي هالولد

مايمنع الباري محب
لحسين اذا يگطع درب
بس انوي توصل حضرته
ما يوگـف گبالـه ذنـب

بالفعل رد جنحي المات
احسن من اول قاطات
ابهزّت مهد كلشي طاح
صار اليطييب لجناح
+++++++++
لو بيدي ما اصعد ولن
ودي اتخذ مهده وطن
والمشكله من الهوى
اتغار اعله ابنها ام الحسن

گالتلي ارجع عـالأثـر
لهل السمه شع الخبر
احباب اله بآخر زمن
تعشگ حسين ابلا نظر

والثالث ابكل شعبان
كل شيعي تلگا فرحان
ميلاده عطره الفواح
صار اليطيـب لجناح

ثائر الربيعي

مولد لأبي الفضل

بچفوفه/عنده ميزه امن الزغر بچفوفه
ملفوفه/امشمّرات اگماط ما ملفوفه
+++++++++
صار عباس الي حته صياره غير
حته بصياره انولد چن مو زغير
الماي فرحان الله سواله اليصر
ساقي وابأسم الگمر صيته چبير

موصوفه/الغيره صارت بالگمر موصوفه
بچفوفه/عنده ميزه امن الزغر بچفوفه
++++++++++++
مايمد روحه ابحظن نومه قيام
الجييت اخته منتظر كله اهتمام
للخدر اده التحيه والسلام
اخته من اتبسمت بعيونه نام

إتشوفه/اتحس بمان الحره من اتشوفه
بچفوفه/عنده ميزه امن الزغر بچفوفه
+++++++++
بالرضاعه اتشوفه خلگه مو طويل
امخوّف الكاروك من وحده يميل
مو ثگيل ابوزنه بس زوده ثگيل
عمره يومين ومشه شگد عنده حيل

بچتوفه/بالمهد والجربه فوگ اچتوفه
بچفوفه/عنده ميزه امن الزغر بچفوفه
+++++++++++
يبتسم عالفطره ويشمّر لدين
من تناغيلي الحنينه بياحسين
مشرعه حسباله حضن ام البنين
اول احچايه النطقها سكنه وين

ملهوفه/ارويحته للمشرعه ملهوفه
بچفوفه/ عنده ميزه امن الزغر بچفوفه

ثائر الربيعي

عشق ابا الفضل..عايه السلام

العين بس بحروف اسمك تعني عين
يابــو فاضل انــت كتله امن الضوه
الرئــفه والغــيره او وفائك والامان
نــور وجهــك شــايل اشگد محتوه
عاشــگ ازغيير علــه گــد مستواي
وانــت رحمــه وتقبل بكــل مستوه
مــن عطر انفاسك اروينــي حــنان
انــت مو بس مــاي سقــّاي الهوى

كلشي بيك واني عاشگ كلشي بيك
وانــت متفضل علــيه ابهل امــر
حتــه سحگة جدمك ابطين الفرات
منــها مخــلوق اليحــبك يالبــدر
اكفلني بس ابنظره ماميل السواك
الدنيــه غربــه واعتبر گلبي خدر
بكلشي ممدوح الستر وتعرفه زين
الا دمــعي اعليــك ما رايد ستر

بس گلب ماعندي غيــره اولا اريد
البي عشگ عباس منّه الگالي وين
بنظره لا والعشك مو من نظره صار
ابــو فاضل انــت ما تحتاج عــين
مــثل ما حبيتك انــي ابلايه شوف
انــت حاضني ابهواك ابلايه اديــن
غــرفة الچف مــاي لا ماچنها ماي
اگــلوب شامر بيها بــين الحرمين

ضــامي دمعــه جيتك بطاست يتييم
ادخيــل والمــا داخل ابخــتك نــدم
ابعينك امخلي السهم چي ضيف اجاك
واني جيتك دمعــه مــو نبله ابسهم
اقبلني صرخه بمجلسك طلعت عليك
مــو تباكي الدمــعه رايدها ابــألم
الــك موتني عشك خاطــر اعيــش
علم يبقى اسمه العشگ راعي العلم

ثائر الربيعي

ميلاد زين العابدين ع

اجانه زين الاعباد
بخشوع احييله ميلاد
كريم وبالحشر يذكرنه لابد
نهديله الصلاة بصوت واحد
+++++++++++
نزل للدنيه بس امذبله اجفونه
ابطن امه عباده مساهره عيونه
المن من بچه چنهم يعرفونـه
تربه وسبحه جابوله يسكتونه
علي السجاد من صار
بجبينه شافوا آثـار
تسع اشهر حمل خلصها ساجد
نهديله الصلاة بصـوت واحـد
+++++++++
دلّاعة الولد من صار جابوله
امصلايه لان شيريد عرفوله
كاروكه بشكل محراب صنعوله
بصلاة اعلى محمد من يهزوله
ساجد ليلته ايبات
آيه واهله آيات
سادات البريه والله شاهد
نهديله الصلاة بصوت واحد
+++++++++
امـه بـالمهـد مستغربـه الأمـره
محتاره الولد شيتمتم ابثغره
اصابع ايده بيهن يحسب اتنظره
اثاري ايسبح بتسبيحة الزهره
بكلشي ابن الميامين
يشبه والده حسين
ملك نازل يقبله وملك صاعد
نهديله الصلاة بصوت واحد

ثائر الربيعي

افراح شعبان

خمسه انوار الجلاله
الكل يتباهه بجماله
الشعّ ابنوره علينه
بشهرك شعبان

+++++++++++
جمالي ..جمالي
ساطع وآنه حسين ونوري شع بالاكوان

جمالي ..جمالي
چي تشبه للزهره اوصافي انه احله انسان

والأمه الزهره/هنياله بعمره
وشيطلع عطره/ هنيالي بهاي

من هاي اوكافي/افخر بوصافي
وبرمشي الغافي/هنيالي بهاي

حلوه البسمه الي بيه
بيها اشبه للزچيه
يافرحتها الحنينه
بشهرك شعبان
+++++++++++
عيوني عيوني
وسعه ونظرتها المعروفه آنه العباس

عيوني عيوني
من حيدر وارث دورتها ومليانه حساس

حيدر ناطيني/هل خزره بعيني
وشمرة چفيني/من الكرار

وطولي شمحلاته/وارث شمراته
وطاسي وريشاته/من الكرار

والكل سامع خبرها
هاشم آني گمرها
واحمد الله التقينه
بشهرك شعبان
+++++++++++
بسجودي..بسجودي‏
معروف آنه السجاد واشبهلك يحسين

بسجودي.. بسجودي
انت التشبه امك وآنه اشبهكم لثنين

امن الزهره وعودي/نور البخدودي
وارثها اورودي////من الاطهار

وردات چفوني/تشرح مظموني
وبدمي ولوني//////من الاطهار

وارثهم بالعباده
هذي اشرف سياده
ربنه خصصها بينه
بشهرك شعبان
+++++++++++
ولكبر ..ولكبر
صاح اتعذروني امن احچيها وعدكم لخبار

ولكبر ..ولكبر
ياهو الاكثر واحد يشبه جدنه المختار

خلقي واخلاقي/وتصويره الراقي
من عنده شباقي/سيد الاكوان

من حسنه ونوره/وبنفس الصوره
واخلاقه ودوره//////سيد الاكوان

بشخصي جدي تجدد
صوره بيه المحمد
چن مولوده نبينه
بشهرك شعبان
+++++++++++
سماري..سماري
آنه المهدي المنكم جامع كل الاوصاف

سماري.. سماري
چني حسين وچني الكافل مرات انشاف

شماعدكم عندي/بس شامة خدي
مخصوصه الوحدي//بيها الاسرار

ومنتظره الشيعه/مهديها اتطيعه
اتجددله البيعه/////بيها الاسرار

المهدي الكل بنتظاره
الهم آنه البشاره
بيدي شراع السفينه
بشهرك شعبان

ثائر الربيعي

هوسات ولادة علي الاكبر

من صار وكمل وجه الفرح لحسين
علي والگمر صاروا رفرفت جنحين
طير حسين فنها تلوحه يا جفين
جنحينه بالطف اترفرف

_
صار وإجت تتبارك لخوها ام عون
شمس چنه نضمه امن الاعيون شلون
هذا بكربله موجود راح ايكون
يادور الاكبر تنطيله
_
عن الطف حجيهم حچو والقادم
مثل كلمن يصير وينذكر لازم
الاكبر سمع سيف وطاري ابن غانم

فل اگماطه گال انه الها


علي ثائر الربيعي
____

ميلاد صاحب الزمان

ما اگدر اذكرك عندي عذري
ماناسيك گلي شلون ذكري
انت بكل مكان
يا راعي الزمان
+++++++++
وسادة نومي گامت تسئل عليك
منو هذا التكتبه فوگي عاده
گد ما اكتب اسمك فوگ الفراش
وسادة اتغار ضلت من وساده
اذا يشغلني شاغل فتره مولاي
اشوفك بالصلاة وكل عباده

ياماي الوضوئي بكل صلاتي
يالمهدي رزق كلشي بحياتي
يالكلك حنان
ياراعي الزمان
____
ماغايب جمالك تارس العين
غير انته ضواها وكلشي اليه
تبقى بكل وگت امنيتي مولاي
تجيني وتمسح ابچفك عليه
مجنون اني صح بحب الحسين
وانته حسين ثاني ايعيش بيه

تعرف لنتظار وتچوي ناره
بس انته حلاوه بانتظاره
يالذكرك امان
ياراعي الزمان
___
قدسيتك عظيمه الطاف للروح
مو كل واحد يشاهد ضهورك
مابيين حملها امك اشلون
چانت امك امضويها نورك
هيچ انته ضوه بكل المزارات
كلهن لو دخلت الهن ازورك

بكل حضره اذكرك وانت شاهد
دعائي الربي ادري بيك صاعد
واتحرك اللسان
ياراعي الزمان
__
حته لو غطاني روج الاذنوب
يمي الگاك من اغرگ سفينه
بشر انت نعم واسمعنه مولاي
لليعشگ بشر ضيع سنينه
بس انت السنين ابدونك اتضيع
اعيش ابحب وجودك ياولينه

المايعشگ امامه ماله عيشه
شنو نفع الجناح بدون ريشه
لصيامي اذان
ياراعي الزمان

ثائر الربيعي

اربعينية السيده زينب ع


ابأربعينچ نوفي ذيچ الاربعين
الليله يمچ يالعقيله اني وحُسين
معتنيلچ هالمسيه
موكب اهل الغاضريه
اني وحسين
+++++++
اعيوني مديونه بواچي اعليچ من گد مابچيتي
بيوم رديتي بضعينه خويه والگبري اجيتي
اشگد حچي چان بلسانچ بي هظيمه وماحچيتي
حافي يا زينب اجيتچ كل درب فوگه مشيتي

انه اخوچ ابابچ استاذن دخول
وبضريحچ وگفت الكافل تطول
يا حچي اتعرفينه بيه
موكب اهل الغاضريه
اني وحسين
+++++++++
فوگ خطواتچ هذيچه اتبعنه اثارچ واجينه
كل مسافه وبيها عثره ونعثر اعليها ابمشينه
الليل صادفنه بخرابه البيها نومتچن درينه
هم مثل ليلچ مناحه وللصبح نبچي بقينه

اشخلّصه الكم والدرب كلش طويل
چم طفل يبچي ومتن مابي يشيل
لابچت يمنه رقيه
موكب اهل الغاضريه
اني وحسين
++++++++
بعده وجه الشام غربه ما يهلّي باليجيكم
والقصر بعده او وگفنه ابابه واسمعنه بچيكم
اهنا وگفتو انهار قاسي حجار يتشامر عليكم
ماشگفتو هوايه منها چانت حبال اباديكم

اهنا اشدهن چانت الآم العليچ
اهنا دخلتي مجلس احبال اباديج

صاحو اعليچ السبيه
موكب اهل الغاضريه
اني وحسين
+++++++++
الحضرتج من اقتربنه احسين خف رجله بمشيته
عطرج اشتمه بحنانه وسبگت اجدامه دمعته
اتاخرت عنه مسافه وادخلت بس مانظرته
ثاري متمـدد لگيته تـارس الحضـره بنحبته

چلمة الياخويه من گلبه يصيح
اشما رفعته بأيدي من ايدي يطيح
ترست ادموعه اديه
موكب اهل الغاضريه
اني وحسين
+++++++++
مجلس بصحنج وحدنه والطم ابحيلي اعله صدري
بالمكان البي ادگه يوم گلتي اكفلي خدري
خويه مو تقصير وانتي بطحيتي جفوفي عذرتي
لكن اهنا وحده گبرج وانه يم حسين گبري

الكربله عذريني عنچ راح اروح
باقيه ام حسين وحدها تنوح
تنتظر من عدنه جيه
موكب اهل الغاضريه
اني وحسين

ثائر الربيعي

صيام مولاتي الرباب. ع

صايمات/ونحچي بيك آنه وسكِينه
صايمات/و أذّن المغـرب عليـنه
الليل يا عبد الله حال
افطـر اويانـه تعال
صايمات
+++++++++
هل يوليدي شهر الصوم والوادم تصومه ابعِز
هسّه جروحي مو بالليل گامت بالنهار اتفـز
وحرورة عطش لحسين الظهاري بنحري تبقى تحز
واتمايل مثل كاروك خالي وريح حزني اتهز

اهواي مات/من قبل گطعت وريده
اهواي مات/حسين ذبحوك اعله ايده
اصيامكم يا يمه طال
افطر اويانه تعال
صايمات
++++++++
اعيش اويالعطش الآم ضامي بنبله يتروه
الظهر وسكينه تلگاني اعله عتبة بابي اتلوه
جوّه اتفضلي واتگول بيتچ ماكو بي جوه
لسه ابلا سگف چم دوب الصوم بحالچ شسوه

رايحات/اعيونچ ابمجره دمعها
رايحات/مثلي هم سكنه وضعها
الخاطر اختك والدلال
افطر اويانه تعال
صايمات
+++++++++
دموعي امسحها بگماطك وكت اغروبي بيها افطر
يالبالطف نشفلك عود بلكي بدمعتي اتخضر
ما گول اعطش اعله الماي. الماي ابّالي مايخطر
ضامي حضني لمناغاك لو نسمة بروده اتمر

راويات/اجروحي بس ذبلانه عيني
راويات/وجسمي يتغذه بونيني
من اون تال الليال
افطر اويانه تعال
صايمات
+++++++++
تفرش سفره من دموع سكنه وبيّه بس تقنع
رحمي بحالچ اتموتـين گـطع الزاد ماينفع
الخاطرها امد الايد وترجف خاليه ترجع
مستحيه تلوح الزاد اضل باليسره بيها ادفع

خايفات/چفوفي من الزاد الوحه
خايفات/الگلبي لو هاجت جروحه
ليش عمري الهسه طال
افطر اويانه تعال
صايمات
+++++++++++
وادعيلك توالي الليل كافي ارجعلي يمدلل
تكتل بالسحر شوغات ليل الوحشه ذاك الحل
طلعتي بالظلام وخوف ادورك وين ما اندل
وره الخيمه وخيمنه ارماد عنك بالرماد اسأل

وين مات/وعطرك اشتمّه بسؤالي
وين مات/گبرك امن الگيته خالي
ذاب جسمك بالرمال
افطر اويانه تعال
صايمات
+++++++++++
اصيام ويخلص بطرواك انه وسكنه من نگعد
ماتترسهن الچفين شهوره عمرك امن انعد
ياعبد الله جاي العيد ثياب الوادم اتجدد
واحنه ذكريات السوگ من طبينه لينه اترد

طابات/السوگ وحبال ابادينه
طابات/اتأشر الوادم علينه
الخدري اذا عندك سؤال
افطر اويانه تعال
صايمات

ثائر الربيعي

وفاة السيده خديجه

يفاطم يُمه بحضاني تعالي
اودعچ راح اموت بهالليالي
اول دمعه هاي
وهواي الي جاي
اودعچ راح اموت بهل ليالي
++++++++
خلصت ايام العمر كلها عشتها
وانتي يالما تكمل اوياچ عرفتها
امن الرسول امصيبتچ كلها اسمعتها
اوداعچ ابچي بدمعه ام تبچي اعله بتها

يالينتهي عمرچ قتل/
بسماره بابچ مو سهل/
من عندي ايطيح الحَمل/
العصره ابوكتها

يتيمه لا ابو لا ام تجيلچ
تنهضين وتطيحين اعله حيلچ
لو يمچ عساي
وهواي الي جاي
+++++++++
يا بداية دمعه وهواي اليجيلچ
من فگد امچ لحد وگعت جنينچ
ماتجف من البچي يالزهره عينچ
واليتم مايرحم ويكثر ونينـچ

ما لايگ اعليچ اليتم/
لاگلبچ اليحمل هظم/
يافاطمه اچبير الحلم/
متشوفه عينچ

اودعچ يمه اوصيچ بوصيه
يزهره قللي ادموعچ عليه
ترب باچر غطاي
وهواي الي جاي
+++++++
راح اموتن والرسلول ابگلبه حسره
منظر ادموعچ يخلي بگلبه كسره
غاليه ادموعچ عله الوادم يزهره
لا اخو عندچ تسندين اعله ظهره

انتي وحيده امن البزر/
لو بيين ابگلبچ كسر/
من البچي عيونچ حمر/
ياهو اليصبره

خديجه امچ فده تروح الدموعچ
اموت اولا تلطميهن ضلوعچ
ينكسرن وراي
وهواي الي جاي
++++++++++
نامي اخر نومه الچ يمه اعله اديه
تالي خدچ ماكو اله نومه هنيه
والوساده اتلچمه وتشوفين اذيه
وعينچ المجروحه ما تغفه الزچيه

اادار الحزن ظمي الدمع/
والحسره تلچم بالضلع/
والگبري صوتچ ينسمع/
شيصير بيه

چفوفچ وحده بس تمسح جفونچ
يُمه ياخديجه كل ونينچ
لمصابچ بچاي
وهواي الي جاي
+++++++++
الوحدج وشهرچ يتم يخلص صيامه
وادري اسم العيد يجرح باليتامه
شلون اگلچ راح اروح وبالسلامه
بچوية الباب ابأديچ اتضل علامه

نعشي يشيعونه اشكثر/
بس انتي يمه ابلا گبر/
والمهدي لمن بي يمر/
اسمع كلامه

بيدي ابني يالزهره المناره
واليوم الضلع اخذله ثاره
والطف يروه ماي
وهواي الي جاي

ثائر الربيعي

مولود الحسن...عليه السلام

اهواي انگول عالخير
بس لم الحسن غير
بيها اشگد تعابير
+++++++++
يا عالخير للزهره بضناهــا
وجه الله الحسن هالليله اجاها
بشهر الخير خيره الله نطاها
خاطر ترضى يرضى الله الرضاها

لجل الحسن اللَّــَه
شهر الخير سماه
رحمه خاطر ايصير
بيها اشگد تعابير
+++++++++
اول تهــنئه ابــهاي المســيه
بلمبارك علــي ناده الزچيــه
خجل غطه ابتسامتها الرضيه
ابتسامة حيدر الها اعظم هديه

ام اعظم مقامات
يحچيها ابتسامات
نظره تريد تفسير
بيها اشگد تعابير
+++++++
الزهره نادته بكلمه خجولــه
حلو ابني الحسن ما بيه لوله
زغير وشايل اوصاف الرجوله
يوگــف بالمهد للــي يجولــه

بهله يفتحها ليدين
بسم الله امن العين
كريم ابعمره لزغير
بيها اشگد تعابير
+++++++++
وعنده ابنك بعد حاله شفتها
كلمة ضيـف اذا يـمـه جبتها
الباب الدار يزحف لو گلتها
الناس بزمن ابني يابختها

هنياله اليظيفــوه
امعزبهم يشوفوه
يابخت الخطاطير
بيها اهوايه تعبير

ثائر الربيعي

مولد الامام الحسن ع

بأسم الغالي اهتف عالي
مولاي مولاي مولاي الحسن
++++++++++++
نور الجلاله شع بجماله
رفعو الصلاوات / لحمد وآله

اول ولاده بهجه وسعاده
بسم الحسن صيح /بيها عباده
شهر الطاعه
هوّه شراعه
مولاي مولاي مولاي الحسن
++++++++
گلبي مظيفك واحسبني ظيفك
ياصاحب البيت سَيّرَه اعله كيفك

شهر الله جينه ليك اعتنينه
يابــو شـريفـه خادمك عينه
تمحي ذنوبي
يامحبوبي
مولاي مولاي مولاي الحسن
+++++++++
ايدك سخيه مدهه عليه
ارويني الطاف يبن الزچيه

تدريني اعاني الصاحب زماني
مهدينه مولاي حبه ملاني
شوگ العندي
ايصيح المهدي
مولاي مولاي مولاي الحسن
++++++++++
بمحفلنه كلنه للمهدي املنه
يبن الحسن وين ماترجع النه

صوت الموالي ناداها عالي
عينه للدروب / لمتاني غالي
هاي الليله
الكل تدعيله
مولاي مولاي مولاي الحسن
++++++++++
+++++++++
ثائر الربيعي

حس گلبي وصوت آذانك ضل شاغل بالي
الزينب ماترجـع سالـم يعلم دلالي
ما سمعه امن السانك
واشتاگ ال آذانك
+++++++++++++
ابطلعتك والاوز من صاح ينعاك بكلامه
وانحل مئزرك بالباب اشتعني هالعلامه
تقره اشدد حيازيمك ما تحصل سلامه
ادعي اترد الي ورديت مطبور اعله هامه

سيف الطر راسك واصل مابين اعيونك
نزف الدم نازل بويه اواصل لمتونك
واشغييرها الوانك
واشتاگ ال آذانك
++++++++++++++
الفجر متغييره الوانه لجلك وال عجيبه
الصبح مختنگه انفاسه من جرحو حبيبه
ملك صاعد ملك نازل ينعون المصيبه
اغسلها بدمع عيني شيباتك خضيبه

مو دم تنزف من راسك ايتام وفقره
وبيني وبين حسين ابنك لو درت النظره
واتظمنه الاحضانك
واشتاگ ال آذانك
+++++++++++++
اگبالي طولك امدد آنه اعذر ظروفك
بس ايتامك اعله الباب ماتقبل تعوفك
اعتادت روسها كل يوم تمسحها بچفوفك
ما رادت رغيف وزاد عطشانه اعله شوفك

ياخيمتنه وحنيّتك لتداوي جروحي
ما ادري ابچي الايتامك لو ابچي الروحي
لو ضل خالي امچانك
واشتاگ ال آذانك
+++++++++++++
بجفوفك شمس ردت رد روحك اليه
زينب يابعد زينب بعطفك صد عليه
تعرف عيدي باچر جاي وآنه بيا رزيه
امسحها بصباح العيد دمعاتي باديه

شنطيها انوب ايتامك من ايعيدوني
انثرها ابوجه ايتامك دمعات اعيوني
وتجدد احزانك
واشتاك ال آذانك

ثائر الربيعي

وين رايح/انت مظمون الوصيه
وين رايح/يانظر عين الزچيه
انت نفس حسينها
يابو فاضل عينها
+++++++++
ياكتله امن الاحساس/ماقصدك يعباس/
يبو الرايه.بالحچايه.اقصد تطلع الناس

طالع يالگمر وين/يهدل ظهر الاحسين/
اعز غالي.عله اعيالي.وانت الفاطمه العين

تعال ارجع عيون حسين بچتافك تصيح ارجع
اول ماگمت عباس زينب هلت المدمع
مو من جرحي من ونيت الحالت زينب اتوجع

كون تدري/اشوصت الزهره بچفوفك
كون تدري/ماتت وتتمنه شوفك
اسرار بينك بينها
يابو فاضل عينها
****
غالي بروحتك هاي/تسمع ارجع اهواي/
امن الخيمه. ينادونك.ارجعك واترك الماي

لرجع تفرق اهناك/سكنه بطاسه تتناك/
يتعثر .يجي حسينك.يمتد يبني وياك

يل كلشي انته ذاك اليوم يطيح بوگعتك كلشي
عاين جرحي راسك هيچ والدم جامد برمشي
بس انه امن اجاني حسين مو محني وگدر يمشي

ومو غريبه/هسه زينب لو عفتها
ومو غريبه/اهناك تذكرني بوكتها
امدلـله امركضينها
يابو فاضل عينها
+++++++++++
ابدي اوصيَتي بيك/واولهم احاچيك/
ثگيله وانت گد الها امانه رايد انطيك

خدر اختك تحاميه/بعيونك تخليه/
حد ما بالسهم عينك يسر ودروبه تمشيه

تعال اگبالي ياعباس ارفع عينك ابعيني
چف ام الخدر ييدك لزمه وچلمه تنطيني
حد ما توگع الچفين يحترگن صواويني

انه يمها/ليلة الوحشه امن اجيها
انه يمها /ياكل بروحي حجيها
حرگو اصواوينها
يابو فاضل عينها
+++++++++++
كلما الها صديت/زينب منها ونيت/
يوحشتها.يضل خالي.لام لا ابو البيت
باچر تطلع الروح/اختك تبقى للنوح/
عن اعظم.جرح بالطف.احچي وكلشي مسموح

شوفت عينك المجروح الجرحه مابقت چاره
لعياله يدير العين ويكشف بالحچي اسراره
بالطف لا اخو الحمّاي وبعيلتها محتاره

كلها يمك/غربة ارقيه وضماها
كلها يمك/التركض وسوط بگفاها
ابسطره لمأذينها
يابو فاضل عينها
+++++++++
باقي كلمه تنگال/انه بنعشي انشال/
تشيعوني وتدفنوني ولا ابقى اعله لرمال

تدفنوني وتردون/گلي بزينب شلون
يم اختك يبو فاضل عليه لاتنوحون

يبني اعرف شعورك زين ترى فگد الابو يكتل
انته لو بچو عباس دمعه اعليه لاتهمل
تحسب زينب الف حساب من تسمع بچيك ايحل

لاتسمعك/اخفي عن زينب ونينك
لاتسمعك/احضن الحره بيمنك
انحرح بونينها
يابو فاضل عينها


ثائر الربيعي

نزله للاما علي ع

حبك يالامير… مو صدفه يصير
واجب عالجميع.. لزغير وجبير
____
الله من نوره خلقها طينتك
الهذا وده البيته امك جابتك
ياعلي والكعبه صارت مهد الك
الحجّت وطافت تراها طافتك

بالكعبه اليطوف..چن زارك يشوف
واجب يالامير…لزغير وچبير
____
شخصك انت ماكو ناس الوصفته
اشنعرف احنه من علي بس لافتى
الله شنهي البيك حط من غايته
الزاير ابنك الف عمره زيارته

لحسين اليزور..انت بگلبه نور
يالخيرك چثير…لزغير وچبير
____
ياهو مثلك بيته مسگوف بسمه
وانت من ضهرك طلع بس الازلمه
الرايد ايناجي الله انت تعلمه
وابلحن صوتك الاهه ايكـلمـه

بمعراجه الحبيب..من صوتك قربب
بالعرش تدير..لزغير وچبير
___
الگاع مالت ونحنت من طيحتك
حگها هاي الدنيا من ما كفتك
شلون ما رديت حيدر طبرتك
وانت شمس الله تردها بيمنتك

كلها من تطيح..ياعلي اتصيح
وتلگاك النصير..لزغير وچبير
____
انت ماعندك هزيمه اويه الكفر
انت سيفك دومه نسمع منتصر
وعلي چا لو ماعلي شايل صبر
مابقى صلب وطـلع منـه شـمر

حيدر من زمان..حدد هالمكان
الاول واخير ..لزغير وچبير
____
بالحرب عنك ردت اسأل بعد
مختصر كالولي عباس العدد
وعرفت عنك صفه توفي الوعد
عالنهر من صوت ابو فاضل رعد

صولته الكفيل…چن حامي الدخيل
بصولاته يحير…لزغير وچبير

خادمكم علي ثائر الربيعي

نزله. لاستشهاد الامير ع


عشرتنه والغايه..يالكافل الرايه
يجمعنه عامل مشترك
زينب. زينب
+++++++++++
ودعني يبني ببتسامه ونظره
لو شافت ادموعك تخاف الحره
من تبتسم گلب العقيله اتسره
مثلي انه من چنت ابتسم للزهره

يبني الگمر حاذر..لاتنكسر خاطر
مسروره خلها بشوفتك.
زينب زينب
++++++++++++
هالراية سر وبيها گرت عيني
همزة وصل مابينك اومابيني
چانت ترف يم النبي بچفيني
انطيها حقها مثلي يم حسيني

وترفرف الزينب..والطول الامحجب
خل تحچي دوم بوگفتك
زينب.. زينب
++++++++++
إخلفني يانعم الخلف عباسي
خصصتك الزينب ستر من ناسي
بالگنطره بفعلك ملكت احساسي
لليوصل احدودك عرفتك قاسي

عندي ثقه بسيفك..من تبرز بكيفك
انت الكفيل اختارتك
زينب. زينب
++++++++++++
يالغيرتك واوصافك امن اوصافي
موقـف اذكره للـدلـيل اوكـافي
خيبر قلعته بچفي والله العافي
انت بگفاي اشصعدك لچتافي

هيچ انته بصلابي..واعله الحرب رابي
والهاذه يرجف شارب
زينب زينب
+++++++++++++
مثلي اعله زينب هيچ كون اوجودك
خاچيتي اخذها منها فصل جودك
من تحمي عنها تحمي هيبة عودك
معذور اذا طاحت قبلها زنودك

زينب وسط عيني.الياذيها ياذيني
من تضمه بيه اتذكرك.
زينب زينب
+++++++++
خليني اموت وراحه كون ابالي
دگ الصدر واكفل خدرها اگبالي
دامك عليهم مطمئن لعيالي
عالي ويضل خدر العقيله العالي

عالمشرعه اتشوفك..من تغرف چفوفك
اذكرها يبني بغرفتك
زينب زينب

ثائر الربيعي

جرح الامير ع

ناظر اختك يالحسن لينه وصل
نـزلـوني منـها اذانـي الخـجـل
+++++++++
اتباعد ابنظراتـها ومـتألمـه
وگفت اعله الباب تشبه فاطمه
مسحو عن الشيب يولادي الدمه

حيل خطفت لونها شلتني شل
***
مـن بعيد ابنـظره تحچيها الي
انت محمول شعجب حيدر علي
حته لو چان اليشيـلك كافلي

ما اصدگ عيني غير انت الفحل
++++++++++
سولفت نظراتها اسوالف دمع
ينفهم حچي الدمع ماينسمع
چنها نظرة فاطمه بكسر الضلع

من تصد لعيوني مدمعها نزل
++++++++++
نزلوني خل اسير اعله الجدم
الخاطر اختك گادر اتحمل الم
ابگلبي احسها نظرة الحره سهم

ابقى اشبع موت من قبل الاجل
+++++++
سارع الها واحضن اختك يالگمر
يبني روح وخفف اعليها الخبر
گلها مامات الفحل بس انطبر

راجع الها خل يضل عدها امل
+++++++
هلّله كل هلله باختكم والخدر
كونه سالم مو مهم عدنه العمر
ليلة الوحشه تألـمني اشكـثر

وينه كافل خدرچ اتگلي انكتل
+++++++
گلها ذيچ الساعه تلحگ عالبچي
عالهزيله ماكـو تچوه وتنتچي
تحچي المن ياهو ليسمعه الحچي

ماكو راي ايصير للماعدها اهل
+++++++++

ثائر الربيعي