ذكرى استشهاد الحسن ع

راس القاسم شمبچيه
يارمله اتعرفين اشبيه
  جاوبتهِن دمعه ينثر عالضعن
  ايثوّب بذكرى وفاتك يالحسن
     ++++++++
يبچي جاسم وآنـه اعرفـها القـضيه
اسمعته يحجي الوالده وينظر عليه
نفذتها واهـذي ناتجـها الوصيه
راسي هذا عالرمح وامي سبيه

     عاده وماينساها الراس
     صادف موتك عنده حساس
ذكرياتك يالحسن ماينسن
ايثوب بذكرى وفاتك يالحسن
        ++++++++++
امن الرمح عينه تصد صوب المدينه
ابّاب دارك ربعه شاهد معتنينه
هسّه دارك يالحسن وحشه وحزينه
لليجيها اتگله فتره ومـر علينه

    ضعن الخدر فتره وجاي
    مايتأخر عني هواي
عود اذا جاسم يرد ويه الضعن
ايثوّب ابذكرى وفاتك يالحسن
     +++++++++++
گالت اوّل ما بچه القاسم عرفته
گبرك ابهذا الوكت يعلگ شمعته
يالحسن لو تعرف بحاله عذرته
هذا راسه بكربله دفنوها جثته

     بعيالك ماتدري شصار
     من شبت بخيامك نار
المات والعايش اجدامه تحرگن
ايثووب بذكرى وفاتك يالحسن
    ++++++++++
عالهزل وانصبنه ماتمنه الوفاتك
بالسبي وذل اليسر ما ناسياتك
يالحسن يُرثى لها حالة خواتك
لسعه مثل السوط بيها ذكرياتك

     ازغار اكبار اوياي تنوح
    وروس اخوانك تبچي جروح
وجاسم اعلينه دموعه ايگطّرن
ايثوب بذكرى وفاتك يالحسن
   +++++++++++
اختك الگتلي الطشت عنها اشيله
يالحسن شافت اشد منه العقيله
موچبد بي راس اخوها وتشتكيله
والاشد من كلها صعدتها الهزيله

     اتمنه اوياك انسمّيت
     لا مجلس شامت طبيت
اعيوني لمتون العقيله شگد بچن
ايثووب بذكرى وفاتك يالحسن
     ++++++++++
سهام نعشك شاهدتهن وحده وحده
واحد ابنحر الطفل مگبل تعده
وثاني فات امن الخرز وبراسه چبده
ثالث ابعين الگمر لكثرهـا شده

     لارد بزنوده اولاماي
    ضل سهمه بعينه الوفاي
غاية الچفين من اتگطعن
ايثووب بذكرى وفاتك يالحسن

     ثائر الربيعي

استشهاد الامام الحسن ع

عذابي ومماتي اعله جرحچ يهون
وغربتچ يزينب ابهذيچ الضعون
مثل هيچي ليله
اعله ظهر الهزيله
بهذيچ الضعون
++++++++
تودعين الحسن وانتي دمعتچ هسه مستوره
چبير اخوانچ واعرف بدمعتچ يختي معذوره
عزيزه انتي ونظرتي اعليچ اشوف بدمعتچ صوره
ماتبجيها يم حسين دمعتج هايه مجبوره

بحرگهن خيامچ يشغلچ يتيم
يلوذ بعباتچ وصياح الحريم
حسرتچ طويله
اعله ظهر الهزيله
بهذيچ الضعون
+++++++++
مو آخر طشت هذا يخيتي اتشاهده اعيونچ
ولا آخر چبد مفتوت تخطف شوفته لونچ
هسه اگبالي من تبچين واخوانچ يسكتونچ
تجيلچ فتره من تبچين سوط ايدگ عله امتونچ

اموت ابدياري وعيالي ابأمان
يزيتب غربتچ تحير الزمان
العظيمه العقيله
اعله ظهر الهزيله
بهذيچ الضعون
++++++++
قبل موتي اريد العين عليچ دموعي تهملها
يزينب دخلتچ للشام شده وياهو ليحلها
تذكريني وعليچ اتصيح هاي اخت الحسن كلها
ادموعچ لو اجه طرواي لثيابچ تبلـلها

زمن مايرجعه اليدفنه التراب
يريت انه يمچ بهذاك المصاب
عذابچ اشيله
اعله ظهر الهزيله
بهذيچ الضعون
++++++++
يصادفكم سنة وانتي وفاتي بناگه تحييها
اعله رمله تنظر اعيونچ بالنظره تعزيها
اشلون الحرمه تلطم عاد اذا مچتوفه ايديها
بين احسينچ وجسّام نظراتچ تديريها

يعين الله گلبچ چثيره الجروح
اعله اخوتها زينب تخلصيها نوح
ولا تبقى حيله
اعله ظهر الهزيله
بهذيچ الضعون
++++++++
يشيعوني الاهل باچر اخوتي الي يشيعوني
على طولي جسد والراس ملتحمه يدفنوني
اعليه ماتم ايعزون وادمهم ينوحوني
وتجيني انتي بظلام الليل اويه اخوانچ تزوروني

لچن يالعقيله اضل تالي وين
بعيده دفنتي اعله اخوي الحسين
طويله الرحيله
اعله ظهر الهزيله
بهذيچ الضعون

ثائر الربيعي

گيض وياي جبت العمر ماشت
انه الي ادموعها بالحبل ماشت
وي چتال اخوي الجدم ماشت
واجيت الگبرك وراسك بديه

نزله للمشايه

چلمه وحچبناها ورفعنه الرايه
يالمهدي هاي جنودك المشايه
يالمنتظر وانت المدد
+++++++++
جددنه بيعتنه بطريق حسينك
عهد الزياره يبقى بيني وبينك
ويانه تمشي وتنظر النه بعينك
شايبنه من يتعب تمد چفينك

واليتعب مولاي اتعينه

من البحر گصدت اله عنايه
يالمهدي هاي جنودك المشايه
++++++++++
ثار الله ثارك واحنه نطلب ثارك
ابگلب المحب يالمهدي تسعر نارك
هاي المواكب كلها صارت دارك
وياهم اتنادي هله ابخطارك

واتعزب كل زاير بينه

اسوايتنه ماصارت مثلها سوايه
يالمهدي هاي جنودك المشايه
+++++++++
هاي الشعايـر بيها نعقـد هِـمّه
هنياله كلمن بيها خاطي بجدمه
واشحده للرايـد يمسنه ابچلمه
اسم الحسين الدنيه حلوه باسمه

بس حب حسين اليحيينه

واحدنه من يحچيها انته الغايه
يالمهدي هاي جنودك المشايه
++++++++++
يمته الفرج يمته ويرف الوانه
والرايه بيدك وانته تمشي ويانه
والحضره من ندخلها يا مولانه
يروي الرضيع امن العطش مبچانه

والكافل ترجع چفينه

انصاره مو سبعين صرنه اهوايه
يالمهدي هاي اجنودك المشايه

ثائر الربيعي

الاربعينيه

عمه الرباب اشمالها
اگبور اهلنه اگبالها
وماتقبل اتزور
ما ادري شنهي ابّالها
گعده بعيده الحالها
وتحسب بالاگبور
+++++++++
الها چم يوم الدرب جابته سكته
اتحضر انواعي ودمعها امجمعته
تفـرك ابأيديها والبـيها عـرفـته
يمته توصل گبر ابنها الغالي يمته

عبد الله چان احسابها
طوّل عليه اغيابها
من عشره عاشور
يمسح تراب اشيالها
گعدت بعيده الحالها
تحسب بالاگبور
++++++++++
الكربله من نوخت بينه الضعينه
ركضتلهم هيه اول وحده بينه
هاي ماظن كربله صاحت علينه
كون هاي اگبور اهلنه ابني وينه

اشويه هاي اگبورهم
واشلون اگول انزورهم
دلالي مكسور
مـا مـقـتنع دلالـها
كعدت بعيده الحالها
تحسب بالاگبور
++++++++++
كل گبر تركضله بلكت گبر ابنها
اتراب منّه اتشيله واتنثره بحضنها
اتعرفه مو عبد الله لو مادر لبنها
يم گبر ثاني تجي يسبگها ونها

لمضيعه گبر اوليدها
تمشي وتشومر بيدها
بالمگبره اتدور
من صاحته وماجالها
گعدت بعيده الحالها
تحسب بالاگبور
+++++++++
عمه انتي احچايتچ مسموعها عدها
ليش ساليها شعجب گعدت وحدها
ماتزورين اشعجب من ناشدتها
اتگلي ياسكنه الولد روحي مردها

الماينلگي مدفونها
المن تدير اعيونها
ماضل بعد نور
والمثلي هيچ احوالها
اگبور اهلنه اگبالها
وماتقبل اتزور
+++++++++
تعبت وصاحتله يالسجاد
تالي
اعليك امشي ام الحسن ارحملي حالي
انته بيدك دافن اجساد الغوالي
وين دليني ادفنت ابني وحلالي

گلها ابحصيره اثنينهم
مامددت ايدينهم
ملتحمه لصدور
من وگعت اتدنالها
اگبور اهلنه اگبالها
وماتقبل اتزور


ثائر الربيعي

وداع الرسول ص

يُمه حسين أخذني الجدي وياه
وگله اشلون اودعك زينب اهنا
ناداني انتي بعدين
اتركيني اويه لحسين
+++++++++
يم الحسن منظر شفت ياريت ماشايفته
شغلة وداعه المصطفى ماتنتهي آخرته
لحسين اخذني انودعه وارجعت ماودعته
من شافنه ادخلنه سوه وحسين لازم اخته

عله فراش المنيه والنبي گام
هله براعي المصيبه وام الاخيام
وتلـگّانـه ابدمعتين
اتركيني اويه لحسين
++++++++++
خليني گلّي الوحّدي روحي انتي زينب لمّي
من شافني بعبره اطلعت بدموعي يعثر جدمي
ويتوسل ابجدي بقى خليها زينب يمي
مو انت گتلي من قبل هيه شريچة همي

هاي آخر طلبتي اعذرتي يمولاي
نتوادع سويه وزينب اوياي
گلي اهنا تكعدين
اتركيني اويه لحسين
+++++++++++
مو مثل الاول والدچ متغيره حيل اوضاعه
يالزهره مو موته النبي خلص دموعي اوداعه
صارت سوالف بالنظر يبچون ضلو ساعه
مو نحره هالمره اشعجب شفته يقبل اضلاعه

كلساع او يبلـل شفَته ابماي
شو گلبي عطش من فعلته هاي
وانه بگلبي نارين
اتركيني اويه لحسين
+++++++++
لهلك حنوطي وزعت كلمن وحصته الباچر
ماكترتلك اي سهم لاينكسرلك خاطر
لو حته اخليلك چفن يتمزك امن الحافر
لرماد سدرك والرمل كافور يوم العاشر

من يبقن ثلاث ايام الاوصال
كافور وسدر بس ذارب الارمال
بچيت وگلي تبچين
اتركيني اويه لحسين
+++++++++
وتوادعو تالي همس مارادو ايسمعوني
وثنينهنم نظره بدمع يافاطمه ينظروني
لجفوفي اشرله النبي واشرله صوب امتوني
ابجي وركض صوبي اجه حسين ومسحلي اعيوني

من خوفي اجيتچ فاطمه بساع
مافاهمته هذا اشيعني لوداع
اشتاليهن هالايدين
اتركيني اويه لحسين
+++++++++
اكثر حچيهم بالرمز بس همه ليفهمونه
شال ايده شفته المصطفى وبحرگه صك اعيونه
ما ادره قصده ياجفن يايُمه ليسطرونه
للباب والحايط نظر بدموعه واصفر لونه

اسمع گله إخوك وحايط وباب
ياهوَه امن اخوتي يرضع تراب
ياهو المحسن او وين
اتركيني انه وحسين


ثائر الربيعي
++++++++++++

استشهاد الرسول ص

هم يرد بينه الزمن
نلتقي يم الحسن
باچر ايلمنه القدر
انه وانتي اعله النحر
نلتقي يم الحسن
++++++++++
بحزنچ ومجره دموعچ فاطمه اتأذيني
اقره الامچ عليها ابنظرتچ رحميني
وانتي تدرين العلاقه بينج اوما بيني
اوداع ام لو بنت ابوها بيمن اتودعيني

اثنينهن بيهن الم
بابچ وحرگ الخيم
ومنهن الاكثر وامر
انه وانتي اعله النحر
نلتقي يم الحسن
++++++
الدمعه قدر المستطاع اگبالي لاتبچيها
ابدار الاحزان اعله كيفچ عبرتچ ونيها
اعليچ بابچ نار بيها وناس تدفع بيها
يالزچيه وهايه عينچ للسطر حضريها

اشينحمل ذاك الوجع
حته محسن لو وگع
اكثر ايموتچ قهر
انه وانتي اعله النحر
نلتقي يم الحسن
++++++++++
انتي روحي ال بين جنبي عندي كل اخبارچ
ينكسر ضلعه محمد فاطمه ابمسمارچ
لو هويتي اوياچ اطيحن فوگ عتبت دارچ
سطرت الچف اعله عينچ بجفني الگه اثارچ

الباب لمن يندفع
مني هم يكسر ضلع
وينحني مني الظهر
انه وانتي اعله النحر
نلتقي يم الحسن
+++++++++++++
تالي ارجع يالزچيه ابعمر الاكبر انه
حسين يحضني واخلي الساني فوگ السانه
وانتي بحجاب العقيله تنحنيني اويانه
ايجيب بابچ يالزچيه للخيم نيرانه

جسمي مرمي بالترب
حته ثوبي منسلب
وخنصر الچف انبتر
انه وانتي اعله النحر
نلتقي يم الحسن
+++++++++++
حسين مني وانه منه كلكم اتعرفوني
ويه جسمه بالحوافر فاطمه ايسحگوني
اندفن راسي اعله جسمي هسه وتشيعوني
لكن هناك ابحصيره بكربله ايلموني

حته صوتچ من يون
اهناك اسمعه بالدفن
ونّه لتفسر الحجر
انه وانتي اعله النحر
نلتقي يم الحسن
++++++++++++
دنيه مابيها محمد تختلف بغيابي
رايح انه اوداعت الله بلغيها احبابي
اليحضر بذيچ المجالس والبچه لمصابي
طمنيهم يالزچيه لليحبني اجوابي

ما اعوفه بالحشر
ابكوثرچ لمن يمر
وكاس حيدر عالنهر
انه وانتي اعله النحر
نلتقي يم الحسن

ثائر الربيعي

استشهاد الرسول ص

راح راح. .الهوّه منـي وانـه مـنه
راح راح. .يالحسن راعي المحنه
راح راح. . حضنه ذاك الي يلمـنه
راح راح
+++++++++++
راح ابو الروح الحنينه المالي ناظرنه بضواه
راح الايظمنه اعله صدره ياحلاته ملتقاه
راح لترد روحه بينه عنده اغله من هواه
راح ليحبني اعله نحري
شلون حالتنه وراه

مات مات/وضلت اعله الزهره روحه
مات مات/ابگلبه خافيهن جروحـه
مات مات/وعينه جدي اتعاين النه
++++++++++
بالگبر نايم حبيبي هسه خد جدي تريب
والدي اشدافن محمد لو دفن روحه عجيب
حيدر اول تالي منه ينسمع صوت النحيب
مرّه ياخويه بونينه ومرّه ياروحي الحبيب

مال مال/حيله ابوي وعينه صاحت
مال مال/ راح اخوي وروحي راحت
مال مال/ الهوّه ابونه وهوّه امنه
+++++++++++
وامي هم حالتها حاله امن الحزن خايف تموت
الليله يخلص بويه وينك لحظه ما مرها السكوت
بالاشاره صبحتني امن البچي ماعدها صوت
امناشغ وشمّة هواها بالنفس گوه تفوت

آه. آه..هيچي انفاس الزچيه
آه آه..اتجرها من تنظر عليه
آه آه..ونّت امي شلون ونّه
راح راح
+++++++++
صارت اازهره يتيمه واليتم تعرف عذاب
چن بنت دار الحزنها وناشره الوان المصاب
ماتمل من عطر ابوها باقيه اتشم بالثياب
عدها بس هالثوب الاسود گاعده بي عالتراب

نوح نوح..وتنعه اثاري الابو خيمه
نوح نوح..يالعفت بنتك يتيمه
نوح نوح..ماخذتنه ورحت عنه
راح راح
+++++++++++
الگبره من گتلك اخذني وامسحت دمعي باديك
وگتلي يحسين اعله كيفك خويه خفف من بچيك
اتموت گبره لو حظنته الهالسبب خايف عليك
ومن نمت بالطيف اجاني جدي گلي آنه اجيك

اهناك هناك .عالرمل عاري اجيلك
اهناك اهناك. .اوياك امتد جوه خيلك
اهناك اهناك. .نحري ليگطعونه چنه
راح راح
+++++++++++

ثائر الربيعي

الامام الرضا غليه السلام

حاجتي انت العليها معتنيك
يالرضا الغالي سهل لليشتريك
دمعه عالخد كافيه
حته لو مو صافيه
كلشي تتقبل رحمتك ادري بيك
يالرضا الغالي وسهل لليشتريك
++++++++++++
ابابـك اليستأذن ورايـد دخـول
ابرورقة عينه بدمع يعني القبول
هيه دمعة عيني منكم شرد اگول
ياحلات الوگفه يم بابك تطول

انت مقصودي الك بيك استعين
سهّل امري وخل ازورك يالحنين
ناس لتحبونها
انتم اتطلبونها
بلكي تطلبني بهواك وحتى اجيك
كلشي تتقبل رحمتك ادري بيك
+++++++++++++
بس قليلك يكفي يالخيرك چثير
ما اكلفك سيدي مطلب زغير
سهل امري خل اطوفك واستدير
عبد عدكم تقبل وخادم اصير

يا امان ازرقني من لطفك امان
سيدي اتوسطلي يم راعي الزمان
خل يلمني بصايته
وانحسب من رايته
بلكي اسمعه من يجي ايسلم عليك
كلشي تتقبل رحمتك ادري بيك
+++++++++++
يحتويني احساس وتراوالي اشوف
كل خرز شباچك ايصيرن چفوف
واگف وتمسح عله راس اليطوف
مو غريبه الرأفه غير انت الرؤف

مو عجيب ادموعي من تنزل خشوع
مو حزن تنزل عشگ ليك الدموع
ادري ما استاهلك
ليش اضل اشتاقلك
عطشتني اعليك چا يمته ارتويك
كلشي تتقبل رحمتك ادري بيك
+++++++++++
والسمع يفرق عله الشافته عين
ماتت المعصومه مامچتوفه ادين
وين هاي وزينب الشافته وين
اشصار بحسين اوتسأله أنت الحسين؟

ليش ماعرفت اخوها اشتعني هاي
اتقرح اجفوني مثل جفنك عساي
شلون جثته وحالها
وگعدت اخته اگبالها
اتگله زينب آنه خويه مدلي اديك
كلشي تتقبل رحمتك ادري ييك
++++++++++
يالخلص عمرك تنوح اعله الحبيب
يمك اعله احسين اريد انوي النحيب
وصلتنه احچاياتك لبن شبيب
لو چنت باچي صدگ ابچي الغريب

انت زيد اوجاعي وارزقني الدوام
بالبچي اعله حسين والحرگ الخيام
اچوي گلبي بنارها
وابقى اطالب ثارها
اويه ابو صالح يالرضا بهاي ارتجيك
كلشي تتقبل رحمتك ادري ييك

ثائر الربيعي

الزهراء ع

علميني/معرفة صاحب زماني
علميني/شلون احبه شلون اتاني
علمني/يمته اموت بدونه اني
علميني
++++++++++
ابـابچ اتوسـل هويت
طامع ابلطفچ اجيت
يروه مسكينچ دريت
لو اجالچ

يا هله ابملگه اليجــيچ
تنفتح وحده امن اديچ
والضلع ثانـيـها ذيـچ
صعبه حالچ

اتنفسي اعليه بحرارة آه من انفاسچ
لو شفت مظلوم امامي يحتويني احساسچ
اتجيسني عصرة غيابه شويه من الجاسچ

ما اشوفه/لكن اتحسس غربته
ما اشوفه/اهواي اجاني وماعرفته
ما اشوفه/چم ذنب صگني وعماني
علميني
++++++++++
ابمجلسچ يم الحبيب
جرحي رايد ما يطيب
وللفرج ادعي بنحيب
وحرگه بيه

لو ترفظيني اعيد
طامع ابعتق العبيد
لو عليچ اقسم اريد
يالزچيه

امنيدچ التوجع الزمچ بالغريب الضامي
ابداعت ال عالتله صاحت حرگوها اخيامي
نظره من عينچ عليه ولو جفنچ دامي

سامحيني/لوجرح گلبچ كلامي
سامحيني/انه لمضيع امامي
سامحيني/لو نسيته ما نساني
علميني
+++++++++
خل اعيش الانتظار
بين بابـچ والـجدار
مختنگ وبجدمي نار
هيچي حالي

بصدري بسمار اشتياگ
ويصطر اعيوني الفراگ
والنفس لو بـيه ضـاگ
ما ابالي

علميني ما اصيحن آه من اجروحي
حته ما اجرح شعوره مثلچ اخفي بنوحي
المهم يبقى بسلامه وخلها تطلع روحي

اشگد يحبني/ياوسع گلبه وحنانه
اشگد يحبني/وهوّه هوّه وآنه آنه
اشگد يحبني/ودمعه لمصابچ نطاني
علميني
+++++++++
لو شفت گلبه جريح
طيحت المحسن اطيح
هل وفيت اوياك اصيح
ياحبيبي

واحچي بعيون وخشوع
انسولف سوالف دموع
يمته مولاي الطلوع
ياطبيبي

ماكو دار واگصد الها حافي امشي الداره
يفتح اذراعاته اليه ويفرح بخطاره
امنيتي هاي وخاف اموت وما سمعت اخباره

هسه وينه/يم حسن ابنچ اريده
هسه وينه/راسي فوگه تمسح ايده
هسه وينه/يمته محبوبچ يجيني
علميني
++++++++
گلبي كل ما يحتــويه
وحده بس يالزهره بيه
من يمر جرحچ علــيه
يبجي اسمعه

يا مصاب ام والجنين
ماتت ومسطوره عين
الجرحچ وجرح الحسين
بيه وجعه

مو طمع دنيه وطلبتي فاطمه اتعرفيها
ضايعه الروح وعليكم كل وكت دليها
شلون تشتاگ المجالس عالبچي علميها

اخذي بيدي/اخلص بدرب الخدامه
اخذي بيدي/وانحسب خادم امامه
اخذي بيدي/لو رضيتي انتي رضاني
علميني
+++++++++
وحده بس وارجو السماح
مني وصليله الجـراح
الشيب بان وعمري راح
يابو صالح

والحچي اهواي ويطول
كلمه بس اعذرني اگول
وين مدفونه الـبتـول
حچيي جارح

حضره ماعدها ومناره الغاليه ام الغالي
من بُعد اقره الزياره وما تريح بالي
يمها كون ادعي الظهورك واشكي عدها احوالي

ياهظيمه/ام حسن ضايع گبرها
ياهظيمه/لامحب زاير يمرها
ياهظيمه/الها يا شوگي وحنيني
علميني
++++++++++

ثائر الربيعي

استشهاد الزهراء ع

اشرح الأمي اعله گبرك ما اجيت احتج
يا ثگل بابي بعصرته كله جسمي ارتج
وانطفت عيني بسطرته بجفني سوت فج

يارسول الله
+++++++
اسوالف اعيون وحچيها
ينزل اجروح ابچيها
يارسول الله اعله گبرك
هاي آخر جيه اجيها

نار وصيحه يم الباب بدايات الجرح هايه
متحجبه بحجاب البيت بخماري مامغشايه
من الطارق اله ناديت جوابه بسطره ويايه

من ركل بابي لزمته وحاولت مارد
ويه لسعة سوط الاول چفي منه انهد
انه حرمه وهمه كثره ماعرفت شگد

يا رسول الله
+++++++++
مو الم ضلعي وعذابي
آنه كل همي بحجابي
امنين ما اندار احيرن
الحايط اخشن مدري بابي

خجل والخوف والدخان مريت بظرف قاسي
عالحايط اسند ايد بالاخره سترت راسي
مااگدر اصيحن آه احس انگطعت انفاسي

روحي تطلع وانه اردها محسن ابّالي
انه ام تعرف حناني والولد غالي
مختنگ مثلي عرفته حاله من حالي

يارسول الله
+++++++++
لسعه لبچفي سببها
الباب صار احمر خشبها
النار كل ماجاها تعله
ياكل بثوبي لهبها

لا عندي مساحه وكون يگدر عالركض جدمي
انحلت واعيوني عالبسمار بده تسلل بجسمي
فوگه اتنگط ادموعي وبده يتلون ابدمي

من وصل مگفاي احسها انشلت ايديه
وسوطه مافكني بقساوه ينزل اعليه
بوحده من سطراته وگعت مني ترجيه

يارسول الله
++++++++++
من شفت ماعندي چاره
خطرت ابالي العباره
كل صبح تسألني زينب
اشگد بعد محسن صياره

جنيني الاغله من روحي الكل الشوفته متاني
فز من طگت اضلوعي صاح وصوته اذاني
اودعچ وانه ماشفتچ سلميلي عله اخواني

صارت الوگعه سويه انه ووليدي
السوط عن محسن احاول اشگف بايدي
ميت ومد ايده رايد يشبگ بجيدي

يارسول الله
++++++++
غمضتها اعيوني فتره
فتّحت عيني وانظره
علي مچتوف وعليه
نظرته مليانه عبره

خلو عن ابن عمي اصيح بكل حرف ذبحه
لو اكشف لربي الراس ادعي بجفني وبجرحه
آمر عبده ردلي انوب تولاتي بچعب رمحه

والحسن وحسين اجوني منه يحموني
فوگي وگعو من ضربهم اكثر اذوني
و زينب هنا يمه صاحت ضربو امتوني

يا رسول الله
++++++++++
صعبه ليام العشتها
والليالي المانمتها
كل نفس اشتمه يلچم
ضلعي وال آه احبستها


اون بخفيه بفراشي عن حيدر اظم صوتي
جيتك اكشفلك همومي من شفته گرب موتي
افتحلي الگبر بويه وگلي للگبر فوتي

تبقى آثاري اعله گبرك وآني راح امشي
مابقت چم شعره منه امن البچي رمشي
جسمي ناحل مايتعبه اليحمل ابنعشي
يا رسول الله



ثائر الربيعي

جينه ننشد دار حيدر وينها
بيها گالو فاطمه امبچينها
      +++++++++++
بين جرح العين وملوحة دمع
الآه لــو جرتـها تلچـم بالضلـع
المنعرف بالليل كل ون ينسمع
    شلون تخفي الونه عن احسينها
+++++++++++++++
ارد انشدچ ويـن وگعت فاطـمه
الزهره تنزف طيب ما تنزف دمه
ابچفها ما شمـرت دمعها للسمـه
     امن الضلع وصوابه شل ايدينها
++++++++++++++
اويه الدفع  للباب بيش اتدافعت
ايد فوگ الراس والاخره انثنت
ليش ما عن عينها بچفها حِمت
     لو شغلها احجابها عن عينها
++++++++++++++
طافي لو محروگ باب الي اندفع
نابــت البسـمار لـو مگـبل طـلـع
ويـن يا هالـدار محسنها  وگـع
    وحاجب الدخان بينه وبينها
++++++++++++++
ضل كسرها اتلچمه كل شمة هوى
وعينها المجروحه يلچمها الضـوه
تگضي ذاك الليل وي زينب سوه
وحده عـن وحـده يزيـد اونينها
+++++++++++++++
عندك اسـرار ابدمعها يا نــزل
المن ام حسين مدمعها يهــل
من وجع كسر الضلع لو للطفل
    لو ابچلمة جارحه محاچينها
++++++++++++++
الزهره مو بسمار جرحتها ال وإن
ما وگع سگفه شعجب بيت الحزن
للحسن وي امـه من يگعــد يـون
      مـن يقبّل عيـنها الطافـينها

ثائر الربيعي

استشهاد الزهراء ع

محتاره بخدري ومحتاره ابأبني
اشما ادفع روحي والباب ايردني
حاولت اشگد
كل حيلي انهد
++++++++++
قبل ما يلتقي المسمار بضلوعي
محسن والحجاب وستري موضوعي
ابذلت مجهودي كله ونزلت ادموعي
الوع ابسكته ما واحد سمع لوعي

اشد الايد.لچن شيفيد
عالباب ابرفسته ايزيد

تطلع اتمنه وما طلعت روحي
مو عيني وضلعي اكثرها جروحي
ايسبني اتعمد
كل حيلي انهد
++++++++++
بين العصره والدخانه والخنگه
ادور عالهوى وما تحصل الشهگه
بقت فتره عليه بابي والطبگه
امد ايدي اعله تچوه بصفي ما الگه

ولهيب النار .اعله وجهي وحار.
وين انطي الوجه احتار

بيتي ومحتاره وما اندل دربي
تطلع لحگوني من دگت گلبي
ماجاني احد
كل حيلي انهد
++++++++++
اكثر من وگعتي اتألم النهضه
بسطرته ادموعي عالجدران تتشضه
اصيح وصوتي من النشغه بي كضه
طلعت گوه بس لحگيني يافضه

تعالي بساع.كسيره اضلاع
ضاع اوليدي محسن ضاع

مافكني بسوطه هم رد يضربني
انهض بالگوه وللگاع ايذبني
صحته وما رد
كل حيلي انهد
+++++++++
سطرو عيني وبعيني الوكت ظلمه
الخنگه والهوى البالگوه اشتمه
صوت اسمعته وينچ فاطمه يمه
زينب والحسن وحسين اجه ابهمه

شبگ ليدين .عليه حسين.
وين ايگلي جرحچ وين

گتله انته اكبرها جروحي وآلامي
يومك عن يومي يفرق يالضامي
الزينب من صد
كل حيلي انهد
+++++++++
عليه التمو اولادي يحاموني
شگف السوط لا يوصل عله متوني
وهگ بيهم ضرب يايمه نادوني
من وگعوا عليه بضلعي لچموني

اون بهداي.وجروحي اهواي
اضمه وما طلبت الماي

اعطش واتحمل واتذكر خيمه
محترگه وزينب تركض بالهميه
وكلشي اتفرهد
كل حيلي انهد

ثائر الربيعي

استشهاد الزهراء ع

آنه الوصيت.قرآن.يم گبري اقرالي
نامتلك عين.متعوب.اگعد يالغالي
ياعلي زينب بچت
دورتني وما لگت
+++++++++++
هوّمت عينك عالگبر آنه اعرف ابحنيتك
بالطيف اجيتك واعتذر من نومتك صحيتك
اتركها جيتك للگبر البيها جنت وصيتك
وهسه اريدك ياعلي مسرع ترد البيتك

يم زينب روح .بالدار.وحشه محتاره
توصل للباب.واتعود.مدمع يتجاره
اهواي احسها اتعثرت
دورتني وما لگت
+++++++++++
بترابك ارجع ياعلي ثوبك تضل اتشمه
بي ريحة امها تطمئن لو شمته بالظلمه
دخلت الداري وناشدت وينج يفاطم يمه
اخوتها گعدو عالبچي ضمها الحسن وتظمه

گعدت عالباب.وحسين.يمها ايتانيني
يمه اترجعين.لو عاد.وياچ اخذيني
العشره وياچ انتهت
دورتني وما لگت
++++++++++
زينب زغيره اعله التعب شلون وتباري اخوتها
عينك عليها لو بچت انت امسح بدمعتها
توها يتيمه وكل مسه عنك تظم ونتها
تلگاها بثيابي تِشم تتنفس بريحتها

تكبر واتشوف.الام .اكثر من كلها
وحدها اشلون.للشام.شده وشيحلها
لو مشت واتيسرت
دورتني وما لگت
+++++++++
من غسلتني وكفّنت من اهمستلي ابأذني
انه علي يافاطمه من عدها ادري اشتعني
يابعد فاطم ياعلي احچيها ماتسمعني
وياك اميل اعله النعش من تمشي واتشيعني

صاحتني اوياچ.مدفون. اسمعها دموعك
من عندي امشيت.مكسور. گلبك وضلوعك
اتلگّتِك مدري شحچت
دورتني وما لگت
++++++++++
الله يعينك ياعلي صبرك اشد من امري
تگطع عليه ازيارتك مو سهله حيدر ادري
اشتاگ الك يا با الحسن مهظومه حته بگبري
اتمنه لو زاير يجي وبدمعه يجبر كسري

حسرة مجروح.كل يوم.تتمنه احبابي
تتعنه اتزور.وهواي.تسجد يم بابي
كلها تتمنه غدت
دورتني وما لگت

ثائر الربيعي

رد يبن حذلم لعد طف الحسين
اصعد اعله التلّه وانعه ام البنين
++++++++++
رد يناعي وتعرف ابروحي اشتريد
مو بنيني مطلبي حسين الوحيد
ايلوح فوگ التله گبره مـن بـعـيد

لا تعيد اجروحه واسمع مني زين
+++++++++++++
نادي بس عالراس لا تشبچها اديك
امن الحصيره ايلملم ضلوعه ويجيك
يوگف ويوگع ترى ويزحف عليك

يذكر الصاحتله سلبوني بأنين
+++++++++++
بالنيابه اگباله عني احچي بخـشوع
مو منيتي گله كتلتني الدمعوع
اتواكلت لضلوعك ابصدري الضلوع

مو عطش گلبي التفطر بالحنين
+++++++++
غمّضت عيني الك گد مابچيت
وسبّلوها البيها ترجعلي دعيت
من قميصك وصله لو ترجعلي ريت

والبصر يرجع وانوحك مرتيني
+++++++++
هاي اخير احچايه مـني بيها اگول
اعليك طلعت روحي والزهره البتول
ودي ما اموت العمر لجلك يطول

بين دمعي ولطمي وابني گبور طين
++++++++++
صد يناعي للنهر واحچيها حيل
ابعبرة المهظوم نادي اعله الكفيل
ماتت امك والنعش رايدله شيل

عن دفنها صاحو العباس وين
+++++++))))
ثائر الربيعي

ام البنين. عليها السلام

صدفه واعيوني غفن
وامنياتي ابطيفي اجن
علي جاني ابرايتك
وچفك ابأيد ام حسن
++++++++
ياعباس ابأول غفوه وجزارتني انوار
شفت چفوفك بيد الزهره وناده الكرار
وجهج ابيض ماقصرتي يم الاقمار
ولدچ راحو جينه انبشرچ لبّالج صار

ذني چفين الگمر
ما شرب من النهر
بس غرف ضل بضماه
رطبه چفينه الهون
++++++++
شكرتني الزهره وخجلتني ونزلت العين
شمرضعه اولادچ من صدرچ لو دم حسين
واتلعثم بعذاري الساني وترجف ليدين
خجلانه اتلاثه الماطاحت منهم چفين

ابقى مطلوبه نذر
اطش لچفوفك عمر
الوفائك يالكفيل
بروحي ابنيلك وطن
++++++++
حيدر دگ اچتافي ابعفيه الربت عباس
يا نخوه العنده ويا غيره ومليان احساس
من عطشت سكنه ونادتله يابو النوماس
متحزم ابني بچفيته وامفرع الراس

شايل ابچفه اللوه
خانگ بصدره الهوى
ياهو ليمس الخيام
الا من يتگطعن
++++++++
مرسالك جابته الزهره وشفت المظمون
نفذت اوصيتج يالحره واني الممنون
لعيونچ وعيون حسينچ طفيت اعيون
ما ضگت المايه او لو شارب ماي افني الكون

ابرودة الماي المست
ذِكَرت طفله وصحت
نفسي هوني للرضيع
والشفافه اتفطرن
+++++++
نفذت الگتلك وزياده وبالغت اهواي
گتلك لا تشرب ما گتلك اشمرلي الماي
شمرة چفينك يالكافل وصلت ليجاي
شكراً يالرافع راس امك وگفاتك هاي

إلحمد لله والشكر
انته رزقي يالبدر
هالواقف يالكفيل
للابد ما ينـسن
+++++++
لكن موقف كدّر حالي وكدّر لحلام
آنه اعرف من دونك زينب تبقى بالام
گطع اچفوفك يسبي الحره ويحرگ لخيام
اچبيره وشيصعدها الهزله وحيرة ليتام

من تردلي بالحرم
لا كفيل اولا علم
هيه اميره وبت امير
تنسبي بآخر زمن



ثائر الربيعي

ام البنين


ما اتمنى اكثر عندي عباس
وتلاثه امن اخوته ترفع الراس
لو بس الگمر
كافي اعله النهر
++++++++++
أتمنّى ولـو. لـو حـته اتمـنى
للطف عشره مني اولاد تتعنه
بواحدهم طبع مثل الگمر چنه
لكـن ابـو فاضل ويـن اكو منه

حته لو جبتلي حفنت اولاد
مثل ابني الگمر ماظنه ينعاد
بس هوه الظهر
كافي اعله النهر
+++++++++++++
يحسين آنه اعلمك بالگمر قابل
واحد ماكو غيره امن السمه نازل
زينب يمها لو مية اخو حاصل
مايكفل خدرها غـير ابو فاضل

الغير امتونه لا مايرهم الجود
حيدر والحسن بالگنطره شهود
چم فارس سطر
كافي اعله النهر
+++++++++
ودع مـن بـعيد ومـا تـدنالي
مارادك تشـوف ادموعي لتلالي
لا گلبك تكسره النظثره يالغالي
لو شفته يودعني واجه اگبالي

ابني من بعيد اتوادع اوياي
مايجرح شعورك يحذر بهاي
الگلبك لو فطر
كافي اعله النهر
+++++++++
حسين بنظره اعرفك والمس احساسك
من گد مـا احبك اقـره لبراسك
كثره اعزازك انته اهلك وناسك
وظهرك ما يكسره غير عباسك

واشيقنع سكينه ابغيره سقاي
غير چفوفه ياچف يشمر الماي
يكفيني فخر
كافي اعله النهر
+++++++++++
آني اويه الحراير كون تاخذني
يم باب الخيم وي سكنه اضل اتني
بچلمه استقبلك لـمن تـرد محنـي
راسك شيله فدوه ايروح الك ابني

كون سالم انته الكافل ايهون
بيش انعوضك ياماي الاعيون
ظهرك لنكسر
كافي اعله النهر
++++++++++
روح امودع الله واگعد ابابك
ما ادعي البنين همي لغيابك
اذا لا سامح الله وي حزن صابك
گلبي ايحس يغالي وداعت احبابك

ابقى اعله الوعد وبخدمتي اتدوم
اطب دارك واضل اشتم بالهدوم
بيهن الگي اثر
كافي اعله النهر


ثائر الربيعي

ام البنين ع

حسرة وبقت بگلوبنه
لو رد الچ محبوبنه
گوليله ماتت بانتظارك
باقي اثرها اباب دارك
+++++++++
يُمه العليله الوالدچ هلبت وصارت جيه
انه اعرف اول ما يجي يسأل حسين اعليه
خوفي بجوابج ينصدم خففي اعليه شويه
ساعه وتجي والمشكلع يعرف الشوگ البيه

احچي الصراحه شمالها
گوليله شحچي احوالها
ماتت عله شوفة سمارك
باقي اثرها اباب دارك
+++++++++++
امنيتي جانت بالعمر عيني تصد لعيونه
افزعله واركض حافيه اتلگه هيچ ضعونه
وينزل ابو فاضل الي والرايهرفوگ متونه
اول احچاياتي اله بشر حسين شلونه

وايگلي رد وجابلچ
صوغة اشكثر مشتاگلچ
ياگلبي موت ابأنكسارك
باقي اثرها اباب دارك
+++++++++++
گوليله دمعات الوفه يم عتبتك تلگاها
من المسه الحد المسه گعدتنه انه وياها
ماتت عليكم بالبچي وانت سبب مبچاها
حد ماخذوها للگبر لا ولد يمشي وياها

بمتون الايشيعونها
الكم تدير اعيونها
يالماخذ الروح ابمسارك
باقي اثرها اباب دارك
+++++++++++
لو رجعوا وعرفو متت عباس يفتح بيته
للوالده ينصب عزه كلها اتحضر تعزيته
ودموع زينب لو بچت يمسحن بچفيته
وايثوب بأسمي الگمر بس للزچيه بنيته

التبچي عليها اولادها
ميته ويريح افادها
لو بالعزاء حسين شارك
باقي اثرها اباب دارك
++++++++++
هاي امنيات وما تصح بس فكري ماينساهم
بس موتي حل وبالگبر اتلاگه بلكي وياهم
اولادي وحسين وحسن والزهره تتعناهم
كل الهله ابأم الگمر هم بي دمع ملگاهم

والزهره اتلگاها
اگعد سويه وياها
وللمهدي ندعي يمته ثارك
تلگي اثرها اباب دارك
+++++++++

ثائر الربيعي

استشهاد السيده زينب
عليها السلام
++++++++++
موقف التلّه رجعلي موتي هم طف ثاني
بعازت اليغمضلي عيني وانتظر يخواني
الفظ انفاسي بديت
يابو فاضل ما اجيت
وانتظر يخواني
++++++++
الفظ انفاسي الاخيره ما حصل عدكم خبر
عيني خل تنظر لخوتي حالي حال اي مُحتضر
هيه مو قصت عطاشه ومستحي اتضل عالنهر
خل يجيني حسيني منك حته لومحني الضهر

هسه مو بالخيمه ناري سهله صارت هايه
اليحفر ابگبري غريب وتفتهمها الغايه
هذا حال الماله بيت
يابو فاضل ما اجيت
وانتظر يخواني
+++++++++++++
راح اموت وما اسدها اعيوني ما اگطع امل
بلكي بآخر لحظه واسمع هذا ابو فاضل وصل
العازه تجبرني واجاني بديرة الغربه الاجل
الناس تتثاقل حملها جنازته الماعنده اهل

بيه ماعدها اهتمام الناس ماهم ناسي
يبقى وياي المماتي خويه جرح احساسي
خوفي اجرحك لوحچيت
يابوفاضل ما اجيت
وانتظر خواني
++++++++++++++
صعدت التل ابمماتي احساسي بجروحه رجع
وكسرت الخاطر كفيلي من صحتله وما سمع
اهناك روحي من خجلها الماي من گصتي وگع
وهسه رشحت للمنيه والنفس بيه انگطع

والگبر ارحم اليه النومته مشتاگه
من سنه وآنه اغفه گعده عودتني الناگه
حته بالممشه انحنيت
يابو فاضل ما اجيت
وانتظر يخواني
+++++++++++++++
ابذاك ظرفي حسيني يمه بالمنيه انه حضرت
من رجع خالي جواده حزّمت حيلي ورحت
اعليه نظراته الاخيره ويّه عينه غمضت
هيچ كون ابحجر اخوتي راسي بالموته ردت

تنزل ادموعك عليه تجري فوگ خدودي
ينكسر خاطر وجودك لو فگدت اوجودي
واسمع الزينب بچيت
يابو فاضل ما اجيت
وانتظر يخوّاني
+++++++++++++
راح اموت اوداعت الله والنعش مثل الضعن
ماكو رايه من اخوتي فوگي تتفصل چفن
والگبر هم بي بواچي امن التقي بأم الحسن
من تناشدني شجاها اعيونچ ادموع انملن

راح اگلها الي هظمني واليبچي عيوني
ما اجه امن اخواني واحد والغرب شيعوني

حته بالموت انسبيت
يابو فاضل ما اجيت
وانتظر يخواني

ثائر الربيعي