وفاة السيده خديجه

اودعچ فاطمه يُمه  تعالي
الخديجه هايه آخرها الليالي
       اول دمعه هاي
      وهواي الي جاي
الخديجه هايه آخرها الليالي
       ++++++++
خلصت سنين العمر كلها عشتها
وانتي يُمه اسنينچ اگليله اعرفتها
ازغيره بس اهمومچ بدمعچ شفتها
امن الرسول امصيبتچ يمه سمعتها

يالينتهي عمرچ قتل
لثمنطعش هم مايهل/
وابطنچ ايموت الحمل
العصره ابوكتها

يتيـمه لا ابـو لا ام يتـيمـه
هظيمه بروحچ اتعيش الهظيمه
      لو يمچ عساي
      وهواي الي جاي
      +++++++++
دمعه تفصل فاطمه ما بيني بينچ
من فگد امچ لحد وگعت جنينچ
ماتجف من البچي يالزهره عينچ
واليتم ما يـرحم ويـكثر ونينچ

ما لايگ اعليچ اليتم/
وگلبچ عليَه ينهظم/
يافاطمه بموت الحلم/
  يكثر حنينچ

هذا اول جرح هاي البدايه
لدموع الحزن ماكو نهايه
       لا صل لا فياي
       وهواي الي جاي
       +++++++
راح اموتن والرسول ابگلبه حسره
المرّه والحلوه گضينه اعليها عِشره
يُعرف اغيابي يطر گلبچ يزهره
الحالتچ والفرگتي بدلاله جمره

انتي وحيده امن البزر/
لو بيين بگلبچ كسر/
من البچي عيونچ حمر/
ياهو اليصبره

آنه ودمعتي فدوه الدموعچ
اموت اولا تلطميهن ضلوعچ
       ينكسرن وراي
     وهواي الي جاي
     ++++++++++
نامي اخر نومه الچ يمه اعله اديه
باقي عمرچ يگضي يالزهره اذيه
والرسول اخلافي صيريله تچيه
ام ابوچ انـتي تصيرين الزچيه

يذكرني ويهل الدمع/
والگبري من يعلگ شمع/
من يبچي صوته ينسمع/
   ويحن عليه

ابأدينچ فاطـمه نشفي دمعته
ترد وحشة خديجه الزهره بنته
      الحالتكم بچاي
      وهواي الي جاي
      +++++++++
هذا شهر الخير تگصينه صيامه
وادري اسم العيد يجرح باليتامه
راح اودعج راح اگلج بالسلامه
وادري باقي الليل عينج ماتنامه

يبقى الجرح اكبر جرح/
للضامي ذاك الينذبح/
راس العزيز اعله الرمح/
    وحرگةخيامه

مصيبه ما اشد منها مصيبه
من ام الخدر تمشي غريبه
     لا ضل عدها راي
    وهواي الي جاي

ثائر الربيعي

مولود الحسن...عليه السلام

اهواي انگول عالخير
بس لم الحسن غير
بيها اشگد تعابير
+++++++++
يا عالخير للزهره بضناهــا
وجه الله الحسن هالليله اجاها
بشهر الخير خيره الله نطاها
خاطر ترضى يرضى الله الرضاها

لجل الحسن اللَّــَه
شهر الخير سماه
رحمه خاطر ايصير
بيها اشگد تعابير
+++++++++
اول تهــنئه ابــهاي المســيه
بلمبارك علــي ناده الزچيــه
خجل غطه ابتسامتها الرضيه
ابتسامة حيدر الها اعظم هديه

ام اعظم مقامات
يحچيها ابتسامات
نظره تريد تفسير
بيها اشگد تعابير
+++++++
الزهره نادته بكلمه خجولــه
حلو ابني الحسن ما بيه لوله
زيغير وشايل اوصاف الرجوله
يوگــف بالمهد للــي يجولــه

بهله يفتحها ليدين
بسم الله امن العين
كريم ابعمره لزغير
بيها اشگد تعابير
+++++++++
وعنده ابنك بعد حاله شفتها
كلمة ضيـف اذا يـمـه جبتها
الباب الدار يزحف لو گلتها
الناس بزمن ابني يابختها

هنياله اليظيفــوه
امعزبهم يشوفوه
يابخت الخطاطير
بيها اهوايه تعبير

ثائر الربيعي

استشهاد الامام علي ع

شافت عيني بابين-لچمن گلبي مرتين

فتحت مأزرك بويه وكسر ضلع ام الحسين
++++++++++++++
زغيره اني چنت*بحجر امي اسمعت
باب اندگ رجف گلبي اعله حيله

اشأجه الروحي گلت*وره امي اطلعت
ثگل جدمي ولا بيه اشيله

سنّدني حسن وحسين للزهره مشينه
وصلنه ومالگيناها وينچ يالحنينه
وصلت ثوبها امن الباب هاي امي درينه

اجر بقوتي بالثوب-لن صوت امي متعوب

بسمار بضلع نابت تنادي لاتجرين
فتحت مأزرك بويه وكسر ضلع ام الحسين
+++++++
اجه ثاني جرح*ابشهر الله السمح
الابو ضايف عله ابنيته الحبيبه

افطرت گرصه وملح*وقبل وجه الصبح
نمت ساعه اگعدت تنعه المصيبه

سلام الله عليك اهواي شاغلني بنظرتك
لزمت مأزرك بلباب ماتسلم عرفتك
تقره اشدد حزام الموت من ايدك لزمتك

مدري المسجد إتروح-لو ترجعلي مجروح

راح ابقه انتظر ترجع واعيش بروحي نارين
فتحت مأزرك بويه وكسر ضلع ام الحسين
++++++++
خذت گلبي ورحت*اعرفت من رجعت
اكو بگلبك حچي اظهر كلامه
احس گلبك بچه*نظر عينك حچه
الحمد لله الخدر هسه بسلامه

من باب الخيم للماي من يطلع كفيلچ
ترجف خيمتچ وياچ ينهد كله حيلچ
يتاخر يروح حسين بس محني يجيلج

من يلفظها بحساس-راح امن ايدي عباس

جمره تنزل ادموعچ قبل حرگ الصواوين
فتحت مأزرك بويه وكسر ضلع ام الحسين
+++++++++
حسين آخر ظِهر* تقدميله المهر
ويأشرلچ عله ثيابه القديمه
تصيحينه انتظر*وتحبين الصدر
ومثل صيحة أوز صيحة حريمه

باب الخيمه مو مسمار تلزم ثوبه سكنه
ارجع لو اخذني وياك بعدك ياهو النه
يمشي ويلتفت بهداي آخر نظره منه

من گدامچ ايروح-واتعرفينه مذبوح

خالي لو رجع مهره تسألينه وگع وين
فتحت مأزرك بويه وكسر ضلع ام الحسين
+++++++++
الچ زينب وعد*عله كلهن اشد
يم باب القصر ذيچ الظهيره
اليمر بيكم نشد* اشمنتظره بعد
دخلو بت علي ايصيح الهظيمه

كلها لو دخلتي اتصيح اجت بت الزچيه
عليچن تلتفت لنظار تلتمن سويه
ياهي امن الحرم زينب يصيح ابن الدعيه

راس اگباله موجود-يضرب شفّته بعود

شيل ايدك تصيحينه اكسرت من عنده سنين
فتحت مأزرك بويه وكسر ضلع ام الحسين

ثائر الربيعي

جرح الامير ع

ناظر اختك يالحسن لينه وصِل
نـزلـوني منـها اذانـي الخـجـل
+++++++++
ابنيتي واعرفها شكثر متألمـه
وگفت اعله الباب تشبه فاطمه
مسحو عن الشيب يولادي الدمه

حيل خطفت لونها شلتني شل
***
السؤال ابـنظره مـتوجـه الي
انت محمول شعجب حيدر علي
حته لو چان اليشيـلك كافلي

ما اصدگ عيني غير انت الفحل
++++++++++
اقره من نظراتها سوالف دمع
ينفهم حچي الدمع ماينسمع
چنها نظرة فاطمه بكسر الضلع

من تصد لعيوني مدمعها نزل
++++++++++
نزلوني خل اسير اعله الجدم
الخاطر اختك گادر اتحمل الم
ابگلبي احسها نظرة الحره سهم

ابقى اشبع موت من قبل الاجل
+++++++
سارع الها واحضن اختك يالگمر
يبني روح وخفف اعليها الخبر
گلها مامات الفحل بس انطبر

راجع الها خل يضل عدها امل
+++++++
هلّله كل هلله باختكم والخدر
كونه سالم مو مهم عدنه العمر
ليلة الوحشه تألـمني اشكـثر

وينه كافل خدرچ اتگلي انكتل
+++++++
گلها ذيچ الساعه تلحگ عالبچي
عالهزيله ماكـو تچوه وتنتچي
تحچي المن ياهو ليسمعه الحچي

ماكو راي ايصير للماعدها اهل
+++++++++

ثائر الربيعي

عندما قرب الاجل لامير المؤمنين ع طلب من الحاضرين الخروج والبقاء لولد فاطمه ع فخرجوا وقام العباس ع معهم فقال له امير المؤمنين ع


وين  رايح/انت مضمون الوصيه
وين  رايح/يانظر عين الزچيه
      انت نفس حسينها
      يابو فاضل عينها
      +++++++++
ياكتله امن الاحساس/ماقصدك يعباس/
يبو الرايه.بالحچايه.اقصد تطلع الناس

طالع يالگمر وين/يهدل ظهر الاحسين/
اعز غالي.عله اعيالي.وانت الفاطمه العين

تعال ارجع عيون حسين بچتافك تصيح ارجع
اول ماگمت عباس زينب هلت المدمع
مو من جرحي من ونيت الحالت زينب اتوجع

كون تدري/اشوصت الزهره بچفوفك
كون تدري/ماتت وتتمنه شوفك
      اسرار بينك بينها
     يابو فاضل عينها
     ****
غالي بروحتك هاي/تسمع ارجع اهواي/
امن الخيمه. ينادونك.ارجعك واترك الماي

لرجع تفرق اهناك/سكنه بطاسه تتناك/
يتعثر .يجي حسينك.يمتد يبني وياك

يل كلشي انته ذاك اليوم يطيح بوگعتك كلشي
عاين جرحي راسك هيچ والدم جامد برمشي
بس انه امن اجاني حسين مو محني وگدر يمشي

ومو غريبه/هسه زينب لو عفتها
ومو غريبه/اهناك تذكرني بوكتها
      امدلـله  امركضينها
      يابو فاضل عينها
      +++++++++++
ابدي اوصيَتي بيك/واولهم احاچيك/
ثگيله وانت گد الها امانه رايد انطيك

خدر اختك تحاميه/بعيونك تخليه/
حد ما بالسهم عينك يسر ودروبه تمشيه

تعال اگبالي ياعباس ارفع عينك ابعيني
چف ام الخدر ييدك لزمه وچلمه تنطيني
حد ما توگع الچفين يحترگن صواويني

انه يمها/ليلة الوحشه امن اجيها
انه يمها /ياكل بروحي حجيها
      حرگو اصواوينها
      يابو فاضل عينها
      +++++++++++
كلما الها صديت/زينب منها ونيت/
يوحشتها.يضل خالي.لام لا ابو البيت
باچر تطلع الروح/اختك تبقى للنوح/
عن اعظم.جرح بالطف.احچي وكلشي مسموح

شوفت عينك المجروح الجرحه مابقت چاره
لعياله يدير العين ويكشف بالحچي اسراره
بالطف لا اخو الحمّاي وبعيلتها محتاره

كلها يمك/غربة ارقيه وضماها
كلها يمك/التركض وسوط بگفاها
       ابسطره لمأذينها
      يابو فاضل عينها
     +++++++++
باقي كلمه تنگال/انه بنعشي انشال/
تشيعوني وتدفنوني ولا ابقى اعله لرمال

تدفنوني وتردون/گلي بزينب شلون
يم اختك يبو فاضل عليه لاتنوحون

يبني اعرف شعورك زين ترى فگد الابو يكتل
انته لو بچو عباس دمعه اعليه لاتهمل
تحسب زينب الف حساب من تسمع بچيك ايحل

لاتسمعك/اخفي عن زينب ونينك
لاتسمعك/احضن الحره بيمنك
       انحرح بونينها
      يابو فاضل عينها


ثائر الربيعي

جرح الامير عليه السلام

يابو فاضل حيل ما مرتاحه
عن ابوي اشگالك جراحه
ليش/نزّلت النظر
ليش/ساكت يالگمر
يابو فاضل
+++++++++
تفضـح الساكت دموعـه اشما تماثل بالصـبر
ليش بعد اعيوني اشوفك بنظرة اعيونك كسِر
مو عله خدودك تهلـها تشمر ادموعك شـَمِر
حسره لبصدرك چبيره عــن سؤالي اعتذر

السكته ياعباس هدت حيلي
شگالك جراحه عنه احچيلي

ليش/لو بالمختصر
ليش/ ساكت يالگمر
يابو فاضل
+++++++++
مثلي منتظره اعله بابه ايتامه تسأل بالحسن
مـن بچه بوجه اليتامه اتبدت الطوس اللبن
شافني وصد وجهه عني مني نظراته استحن
قرّبت وجهي اعله وجهه ادموعه بعيوني جرن

ساكت ودنّگ الي حب راسي
اتيتمت يعني فهمها حساسي

ليش/حسيت بخطر
ليش/ساكت يالگمر
يابو فاضل
+++++++
حسين اخوكم ما اجاني ولا سأل عني شعجب
ما إله مهجـه دمعتـي ايصدها والهذا السبب
من صحتلك هذا صوته اعرفته كل حيله نحب
من زغر روحه حنينه مني مايحمل عتب

دمعت حسين شكبرها ابعينه
تروح روحي لو سمعت اونينه
ليش/صوته بي اثر
ليش/ساكت يالگمر
يابو فاضل
++++++++
هسّه لو امي الزچيه يم ابونه اتدلـله
اتلـِم جرح راسه بترافة بأيدها لمعدله
من يشم ريحتها يصحه العافيه ترجع اله
تراب لو بس من گبرها بجرح ابونه اننّزله

من يشم عطر امي ترجع روحه
هيه بلسم چانت اعله جروحه

ليش/خاطرها انكسر
ليش/ساكت يالگمر
يابو فاضل
++++++++
عنـدي كلمـه اوياك لازم يم ابونه نجتمع
خدري اسأله عن مصيره والوصيته نستمع
چفك ايحطهه اعله چفي واعرف الچف ينگطع
واصبح الجراحه آنه زنودك اغسلهه بدمع

واشيشد چفوفك اعله زنودك
لوجرح راسك اضمده بجودك

ليش/اعتب عالنهر
ليش/ساكت يالگمر
يابو فاضل
++++++++++
هسّه اسألك عـن ابونه جاوبتني بالصدگ
امأ مّنه مابيـن اخـوتي ويّـه حيدر افترگ
مايصعدوني اعله هزله وبيتي هم مامحترگ
بكربله اسألمن عليكم وسوط بمتوني يدگ

بهيمه ابـات الوحّدي چم ليله
بروحي محتاره وحراسة عيله
ليش/اگضيه بسهر
ليش ساكت يالگمر
يابو فاضل

ثائر الربيعي

لقاء مولاي الامير مع الزهراء ع

مشتاگ وجيتچ يالزهره
امتانيتك بعيونچ اقره
نفس اعيوني
اصفـر لـوني
++++++++++
نظرة عينچ وملگاچ منتظرلها صارد اشگد
يالتارك غيابچ ذاك خلّه ابگلبي ماتنسد
لمسي طبرتي بهداي احرورة سمّي خل تبرد
وجروح الگلب بعدين بيهن نحچي ماتنعد

شبعيني اشلونك يالغالي
ما رايح صوتچ من بالي
من طبروني اصفر لوني
++++++++++
احچي عن صفار اللون وتحاشه الحچي القاسي
مو من طبرتي والسيف موتي بجرحي لحساسي
عظيمه اتطيح يم حسين آنه عمامه من راسي
وگعتي الوجهي بالمحراب واسمچ يمشي بانفاسي

واگع واتمنـيتچ يـمـي
چفچ چان اليمسح دمي
ودمع اجفوني اصفر لوني

+++++++++
ليهسه عليچ حسين لابس اسود ابحزنه
للمسجد اجه ومن شاف دمي الشيبتي اتدنه
يمسحها واگله اتهون يومك ماكو اشد منه
گلي اعرف ولكن كون امي اتشوفك اتمنه

اسمچ يالزهره اعله اللسانه
هم مثلي اتغيرت الوانه
من شافوني اصفر لوني

+++++++++
گطعي يم حسن مبچاچ خل سالفتي اكملها
من جابوني وسط الدار وانجمعت علي كلها
كونچ شايفه العباس ليش دموعه يهملها
زينب لو سمعها اتصيح يايمه
ركض الها

امگابلها ويمسح دمعتها
وكل حيله ايون من ونتها
هالخلوني اصفر لوني

+++++++++
عدها ام البنين اهواي من البيني وبينيچ
تشد عصابتي وتنوح وينچ يم حسن وينچ
حيدر جرحه ما يلتام الا اتلزمه چفينچ
اثنين اعيوني معميات كون اولا سطر عينچ

صحتلها ادموعچ ضميها
لو ردت زينب لاگيها
بذيچ اضعوني اصفر لوني

++++++++++
بموادعنه ساعه ازمان طابع صدري من ظمهم
عدهم حچي ما يحچون بس بنظره افهمهم
اقراها ابدمع لعيون اسلملهم عله امهم
كلهم غمضو وياي يوم الغمضت يمهم

مشتاگيلچ حيل احبابچ
اذاهم يالزهره اغيابچ
وهم فگدوني اصفر لوني

ثائر الربيعي

استشهاد الامير ع

مابقت بس كلمه بيه..وداعاً وداعاً
گمت اشم عطر الزچيه..وداعاً وداعاً
من علامات المنيه..وداعاً وداعاً
+++++++++++
منتظرها وهاذي امكم
تغمض اعيوني اجت
فرحت بلحظة لقائي
وشافت حسين وبچت
ومن بدت تحظني زينب
والزچيه مارضت
خافت اتموت اعله راسي
فاطمة بزينب درت

ودّعوني بكلمة وحده..وداعآ وداعا
اوداع الاكبر هسّه بعده..وداعا وداعا
هناكَ بارض الغاظريه..وداعا وداعا
++++++++++++++
انتهت عشرتنه واسمع
مني هذا اخر كلام
يالحسن بوس اليتامه
وعني بلغهم سلام
الماغفت عينه عليهم
باچر ابگبره ينام
خلهم ايزورولي گبري
اشعر براحه وسلام

واليتيم الدمعه يجري..وداعا وداعا
خل يبلل بيها گبري..وداعا وداعا
وابثوابي انطي هديه..وداعا وداعا
+++++++++
راح اموت وهذي اخر
نظره مخلوطه بدمع
بسكته زينب لو بچيتي
خوفي صوتچ ينسمع
من تشدون الضعينه
كثّري امتاعچ شمع
ليلة الوحشه ظلامه
من اجيچ ابيا وضع

رايح امن الركضه حيلچ..وداعا وداعا
الملتقه بليلتها اجيلج..وداعا وداعا
احرس بذيج المسيه..وداعاً وداعاً
++++++++++++++
والله لمتكم عزيــزه
كون مو گعدت وداع
عيونكم واضح نظرها
كلها توحيلي بضياع
حسين تجرحني دموعك
ردها قدر المستطاع
ابجيها لو ناح الفقير
او لو يتيم ابيته جاع

وعالنهر ابچي دموعك..وداعا وداعا
لو وگع گل الضلوعك..وداعا وداعا
ومن تناديلك رقيه ..وداعا وداعا
+++++++++++++
وانت ياعباس اريدك
وانتي يازينب تعاي
مو قضية اخ واخيته
يابوفاضل ذمه هاي
ساكن ابروحي خدرها
لايمسّه احد وراي
كون اريد اتگصها ايدك
من تشيل ابچفها ماي

لحره لاتغفل ذكرها..وداعا ودعا
لو طحت صيح الخدرها..وداعا وداعا
اوعدني حط ايدك بديه..وداعا وداعا
+++++++++++++++
ثائر الربيعي

مناجاة صاحب الزمان عج

قبل اعمالي ابديك
يالمهدي واناجيك
شهر الطاعه شارف عالنهايه
شفاعتكم رجائي امن البدايه
++++++++++++
وي روحي اگعدت احسبهن اعمالي
من طاعه اشجنيت وخلصت اليالي
اقل مـن القليل وكثرة اهمالي
نعم خيراً يرى بـس ويـنه مثقالي

بس املكلي مثقـال
حبكم خير الاعمال
منكم سامع اكثر من روايه
شفاعتكم رجائي امن البدايه
+++++++++
نعم من كُل امر ليلـة قـدر بيها
عليك اتنزّلت ادري انتـه راعيها
يا راعي الامـر واعمالي تدريها
وي مطـلع فجرها انته تمضيها

مولاي انته ماذون
بأمر الكاف والنون
انته الأب والي حق الرعايه
شفاعتكم رجائي امن البدايه
++++++++++
حاشه الرحمت الله اتكون محصوره
اليجهد بالعباده اذنوبه مغفوره
منو للمثلي اظنها واضحه الصوره
بتسويف وهواي اوقاتي معموره

رجائي الحضرتك جاي
كل اعمالي بس هاي
رافع ابعترافي ابذنبي رايه
شفاعتكم رجائي امن البدايه
++++++++
الشياطين اعرفت ايديها مغلوله
شني عن العباده المثلي ليحوله
شبيها بالدعاء اچفوفي مشلوله
حته الساني يخجل من الايگوله

اريد الجنه وشلون
اناجي اويه اليناجون
لكن انتم اصحاب العطـايه
شفاعتكم رجائي امن البدايه
+++++++++
شري صاعد وخيرك نزل صوبي
يرحمة الله انته الساتره اذنوبي
عليك ابداعة امك غيير ادروبي
اريد بهالگلب بس انته محبوبي

وابدِل عيني إبّعـين
مثلك تبچي لحسين
دم ادموعي تـنزل للسبايـه
شفاعتكم رجائي امن اابدايه
++++++++++
قبل ما ينگضي اصلحلي مضموني
خادم للخـدم مـولاي حسبوني
ازور احبابي بالـعيد ويزوروني
عيدي ابصبحه لجلك تهمل اعيوني

وين اتصبّحه العيد
ياهـو ايقـبّل الايد
يمته ولليجي اتوزع هدايه
شفاعتكم رجائي امن البدايه

ثائر الربيعي

هدم قبور البقيع

يابقيع اهل الُـعـله
صاحت الـها كربـله
اليا وكت وحشه قبور الطاهرين
عندي الهم ساحه بين الحرمين
++++++++++
بذكرى تهديم القبور
وحشه مايمچ حضور
وانتي گاعچ تحتويها اربع ايمّه
الواجه اسيوف وجراح
يمكن ابگبره استراح
لكن الميت صعب جرحه تلچمه
الينهدم گبره عليه
يعني جسمه مرضرضيه
اليختلف بس مندفن راسه اعله جسمه
الگبه فوگاه من تطيح
مييت وگلبه جريح
نار هظمه ابروحه مو بس ابخيمّه

وضعج اهواي اختلف
عني لو عن النجف
حته مشهد غربه چانت هسه وين
عندي الهم ساحه بين الحرمين
++++++++++
فتره مرت مو قليل
والحسن ذاك الاصيل
گبره صعبه ينلفظ اسم الخرابه
ابكربله ابنه وعضيد
وعن شريفه مو بعيد
شمله يلتم لو ترك ذيچ الترابه
گاعي اله استر مكان
جْورة الكافل امان
ابحنّة القاسم نجيله انحنّي بابه
اهواي يسمع صلوات
الما سمعها السنوات
تنحني زواره ملهوفه ابعتابه

كلمن بگلبه حچي
الماشبع گبره بچي
هواي عطشانه المشيته الزائرين
عندي الهم ساحه بين الحرمين
++++++++++
وصلي صوتي للعيل
منه خجلانه انه حيل
خل يجيني هسه مو جيّة اساره
افتح اذراعاتي كون
مو اسير وعالضعون
ابهيئة العوچيه ابنيله مناره
اسجد اگباله اعتذار
مني اذا لاحته نار
من ذهب مو من رواگ ابني الستاره
عندي اله موضع مريح
يسكن بنفس الضريح
بين الاحسين وعلي الاكبر مزاره

هنا ابد ما ينهدم
الگبره اختار الاسم
هذا قبر الدمعه ماجفتله عين
عندي الهم ساحه بين الحرمين
+++++++++
الباقر وآنه ادري بيه
مو غريبه ارضي عليه
لسه موجوده برملها ذكرياته
هذا من ضمن الزغار
اليركض وبذياله نار
گاعي يندلاها راكضها اعله زغره
لا لهب نار وعناء
الخيمگه صارت بناء
بيها گبه تكسر افياي اعله گبره
جده اذا مشتاك اجاه
الخيل ماتركض وراه
اگباله باب القبله ماكو ابدربه عثره

ماكو شوك اولا لهب
ابوجه يتلگا ذهب
ماكو غربه كلهم اهله حاضرين
عندي الهم ساحه بين الحرمين
+++++++++
وحشه كاعج يالبقيع
مثلي هم جرحج وسيع
نار بيته الصادق الرسمتله صوره
عن ركض ذيچ الحريم
ياجرح عمته العظيم
ذكرياته امنين ما وجهه يدوره
الصادق واهله يجون
عالشريعه ويلتقون
وين چان اينادي عباس ويزوره
شگد يحب الهم يلوع
خل يجي ويشبع دموع
هوه مثل الزهره بالدمعه سروره

ناسه خدام اشكثر
يمه كل موكب يمر
امحزم ابنصهم يدگ اعله الحسين
عندي الهم ساحه بين الحرمين
+++++++++
الماتت امن الانتظار
ليش تبقى ابلا مزار
بفاتحه چم حاجه خلصت لو قروها
خل تجي ام البنين
بين ابنها والحسين
ابكد دمعها الحره راح ايدللوها
تنسه كل ذاك الجراح
ويّه كل طرة صباح
من مراقدهم يجوها ايقبلوها
من ذهب مو من تراب
حضره يبنوها الشباب
ويخدم الزوار عباس اليجوها

تلزم الوادم سره
يم ضريح الطاهره
وبمحرم تشبع انواعي وانين
عندي الهم ساحه بين الحرمين

ثائر الربيعي

الامام الصادق ع

لسان حال بنت الامام الصادق ع

شگد سولفت عن حرگ الاخيام
ودارت علـينـه بـويـه الايـام
شفته الحرگ بعيوني
بس لا بعد يسبوني
+++++++++++
بحرگ الخيم بس الحرم هيچ اسمعت من عندك
هسه الحمد لله عدل بعدك ولذنه بسدك
ماعدنه چويات اطمئن ليش الدموع بخدك
تتمنه اخو مثل الگمر من شفت روحك وحدك

تركض علينه امفرع الراس
لمن صحت وينك يعباس
وآنه الزمتها امتوني
بس لا بعد يسبوني
++++++++++++
بعيوني اشوفك بس گلت عني تظم الآمك
اتهمس بصدرك گمت مامش كسر بعضامك
لا سامح الله لو متت وجسمك تخيطه اسهامك
ماعدنه زينب بالسبي ياهو اليلم ايتامك

بويه اطمئن ما ابچي عالماي
عندي المهم تبقى اننه وياي
لو عالهزل ركبوني
بس لا بعد يسبوني
+++++++++++
تدري آنه من شفت اللهب بالخطوه صارت عثره
ويه الحرم ما روكضت من حجره وادخل حجره
بمچاني اموت احسن گلت لاخدي چف ايسطره
خو هسه اموت اولا رمح راسك عيوني تنظره

يكسر گلب حال النساوين
بالي مشه لعيال الاحسين
بهالموقف وبچوني
بس لا بعد يسبوني
++++++++++++
والكاظم اعليه ركض ياخويه وينك صحته
جاني وصحت بعدك عدل لو بعده ذبحك وكته
لا تگصد الصوب النهر جرح النهر سامعته
اسكينه لا ماي ارتوت لا عمها رد الاخته

خل يحترگ خل يوگع البيت
بس تبقى انته گبالي ياريت

من ترحل ايسلبوني
بس لا بعد يسبوني
++++++++++
مو احنه اهل بيت النبي والواجب ايقدرونه
بيتك مزار اهل العلم شمسوي ويحرگونه
يالصادق ونفرظ متت عندك گبر يبنونه
مثل الحُسين بكربله واحبابك ايزورونه

گبرك بعـد هـم مثلـه ينـزار
بي حضره لو بس رمله وحجار
وزوارك ايذكروني
بس لابعد يسبوني

ثائر الوبيعي

(دموع العهد

      نبدي ابدموع العهد
      ومنك يمهدي المدد
في عاشور هذا وكلّ عاشور
نجددلك دمعنه ولطم الاصدور
       +++++++++++
عهداً وعقداً سيدي عمري ابقه لاخر يومه
النور العظيم المنذبح ابچي اعله سلب هدومه
توراة وانجيل بدمه نحر الطفل مرسومه
مزجور نهر العلگمي ومنه الحرم محرومه

     ضل وحرور وخدر
     والفزعه ذاك الظهر
عله شاخص مره ماشايفه النور
نجددلك دمعنه ولطم الاضددور
       +++++++++
متواصل ابطول السنه مجلسنه وبكل جمعه
لكن محرم تختلف يالمهدي تدري الدمعه
ليهسه يتگاطر دمه الزهره القميص ترفعه
وينه اليساعد بالبچي صوت الزجيه انسمعه

       محنيه من الضلع
      واتلم بديها الدمع
من مجلس لمجلس فاطمه اتدور
نجددلك دمعنه ولطم الاصدور
      ++++++++++
والدمعك الجرح السبي اكتبنه من اعوانك
ومن الدعات المجلسك وامآزرين احزانك
ان لم نكن اهلاً الك رحمه وعطف عنوانك
آجركم الله تنقبل من تطلع امن السانك

      هيّه المصيبه الك
      الماتو عطاشه هلك
واليحضر مصابك هوه ماجور
نجددلك دمعنه ولطم الاصدور
        ++++++++
گلبي اذا فتره قسه وماتت دمعتي بعيني
للنزل ادموعك حمر الذاك الجرح دليني
اندبله كل صبح ومسه مثلك بعد خليني
بالچاوي جدم ام الخدر يبن الحسن چويني

      عييشني ذاك الالم
      وبروحي جمر الخيم
مثل خاطر سكينه گلبي مكسور
نجددلك دمعنه ولطم الاصدور
        +++++++++
ادعي عله عيوني العمه لو گلبي حزنك عافه
الوجه الكريم امن الظمه متفطرات اشفافه
بس بالسمع ما ينحمل ويساعد الله الشافه
انت ابن امي النادته اخته وامضيعه اوصافه

    دم ورمل عالجرح
    واتلچمه من ينمسح
بحجر موضع سجوده الغالي مفطور
نجددلك دمعنه ولطم الاصدور
        ++++++++
ما اوفي گطعت خنصره لو ابچي لاخر عمري
عهدي بحياتي اولو متت احچيها وآني بگبري
ربي ارجعون اقضي دمع ماباچي زين بزغري
شاهر دموعي امن الگبر اطلع ولاطم صدري

     اسود اصبغه الچفن
      لبيك يبن الحسن
ننصبها المجالس بين الاگبور
نجددلك دمعنه ولطم الاصدور
      ++++++++++
يمته وتكحّل كل نظر مشتاگ الك ناظرنه
طلعه الرشيده وللفرج ندعيلك ابمجلسنه
باقي عهدنا بكل عزه يالحاضر وتسمعنه
آخر ثلث دگات الك تفهمها بايدي اليمنه

     عجل بحق فاطمه
     والماتو امن الضمه
واحدنه اعله ثارك گلبه مجمور
نجددلك دمعنه ولطم الاصدور

ثائر الربيعي

واحد محرم

هيه هيه/اشچان اسمها كربله لو غاضريه
هيه هيه/البيها ذبحي وغربة اختي الهاشميه
بهاي الارض عدنه وعد
اشـريـها يـا بنـي أسـد
+++++++++++
اشتريها بدم رضيعي وآنه بيدي شايله
مالي غايه غير حفره الدفني منها كربله
لو لگيتوا من ثيابي اوصال ضلت بالفله
بيها شدو خنصر ايدي للگبر لو نزَله

ماهي خشنه/حضروها كون من هسه الحصيره
ماهي خشنه/اولا چبيره اتلمني لو حته زغيره
وعبد الله وياي الولد
اشريـها يابـني اسـد
++++++++++++
ياهو مثلي يشري رمله بيها جرحه وذبحته
بيها اشمر دم رضيعي وراح ادفنه ابنبلته
ضامي الاكبر لو اجاني الساني يجرح شفته
وعالشريعه ايطيح ظهري وراسي تكثر شيبته

مو بعيده/ذيج هيه من اصد الها الشريعه
مو بعيده/وجدمي يثگل لو وگع تصبح وسيعه
لليمشي خطوات وگعد
اشـريـها يا بـني اسـد
++++++++++
كلها فتره ايام عشره وتخلص اوياي بضمه
والنهايه لو نظرتوا نار صعدت للسمه
گولو يعني حسين مييت واحترگله امخيمه
ركضت اخته وهسه صعدت فوگ تل بت فاطمه

لو سمعتو/طفله تبچي بحرگه عِرفوها رقيه
لو سمعتو/اصهيل عالي خيلهم داست عليه
فهموها ضل عاري الجسد
اشريـها يا بـني اسـد
++++++++++
اشلون جسمي اتميزونه بالدفن راسي برمح
مدري اگلكم حفظوا ثوبي وثوب فوگي مايصح
ياعلامه بجسمي تبقى بيها ما واصل جرح
وحده بس من ظهري ذبحي ميزوني امن الذبح

اهوايه يمي/احجار باقي امشمّر وصابغها دمي
اهوايه يمي/آثار گعده حرمه هاي الزهره امي
متفارگ الغالي ابد
اشريها يـا بـني أسد
++++++++++
ابو فاضل خيمة اخته حطها مابين الخيم
لو گضينه ومحد الهن يمها تلتم الحرم
باب ثاني فاتح الها حته لو عسكر هجم
منه تركض للبراري وجمره ماتچوي الجدم

احبال خشنه/من نصبها غايه اله ماخله بيها
احبال خشنه/هنه ذني تالي تَنشَد ابأديها
بچف العقيله اتسوي حد
اشـريـها يا بـني اسـد

ثائر الربيعي

العليله

اوياي ترحين آنه باچر رايحه
اقره يم گبر الزچيه الفاتحه
اهناك يا ام البنين
اعرف اخبار الحسين
++++++++++
حاولت دلّالي اقنعه گتله اتاني وما قبل
ليش اچذّب جفني وآنه حالي حال الماله اهل
عالدرب ليله ونهاره
من الامباوع ذبل
غير ازور الزهره واشكي همي عدها ماكو حل

اهوايه لبگلبي سوالف بايته
يحچي يم گبر الزچيه حچايته

اوياي اذا ودج تجين
اعرف اخبار الحسين
++++++++++
آنه اندلها الزچيه بين گبره ومنبره
ارد اگلها يالحبيبه سافر اوليدچ ترى
گلي ارجع ما رجعلي مدري شنهي الاخّره
هم مثل ضلعچ ييمه بصدري عبره امكسره

عيني من كثر البواچي طافيه
بعتبة الباب اشبقت من عافيه

وين زينب هسه وين
اعرف اخبار الحسين
++++++++++
انتي يم عباس اذانچ قربيها اعله الگبر
سمعي ونّتها الزچيه زين اذا بيها گصر
كون ونتها طويله گولي معناها الشمر
لازم الشيبه العظيمه وگاضيه ضلوعه كسر

ليش اتاني ابابي والمن گاعده
كون هسه ارقيه بالبر شارده
لو كثر منها الونين
اعرف اخبار الحسين
+++++++++
نادي إم عباس آنه الگاعده يَم الحسن
كون عندچ يالحبيبه اخبار عن راعي الضعن
كونه سالم كلها سلمت لو وگع چفه انسبن
اخته وين ابيا خرابه هسه وين ابيا وطن

يم حسن طمنيني عن اخيامهم
سالـمه لو بالبراري ايتامهم
كون مگطوعه الادين
اعرف اخبار الحسين
++++++++
طيف والطيف اشيجيبه والجفن ماينغمض
تخطر افكار اعله بالي طول تاخذني وعرض
ماتوا حسين وإخوته هيچي خل نفرض فرض
والضعن گالو رجعلچ واطلع اتلگاه ركض


صوت اسمعه الناعي ذاع اخبارهم
اهله يثرب لا تضل ابدارهم
بالسواد امگبعين
اعرف اخبار الحسين
++++++++++

ثائر الربيعي

ليلة العاشر

متروسه حچي نظرات الاوداع
ويّه ام الخدر بس خلصت بساع

بالوگعه من ميموني
فاتحها چنت اعيوني
++++++++
أول حجر لآخر سهم
ياخويه اسمع بالخيم
كلش گلب زينب عِلَم
وصورتها تمشي اگبالي

كل جسمي لچمات انترس
وبيا علي اسحب نفس
نزَّلني من ظهره الفرس
رد اعله زينب خالي

رايح للخيم فزّاع بس ياهو البقه ايفزعه
ياهو عن سحگ لخيول جسمي الخيمته ايرجعه

إلما عنده اخو من يوگع ابضيج
گد ما يلتفت يتنشّف الريج
يندارن اعله امتوني
فاتحها چنت اعيوني
++++++++++
من رد للاخيام المهر
خطرت عله بالي اشكثر
صورة ركض لأم الخدر
ومني ترِيد املاگه

صانع وساده امن الترب
لاحت سواده اعله الدرب
مشيتها يقراها الگلب
جيّيت اخت مشتاگه

اموت اتمنه لو ماموت عليه اثنينهن كلفه
مشتاگ الهه بس شلون نايم عالترب وسفه

لاعندي حيل ايحرك الايد
ويّايه من تتسالم اتريد
وشباقي بعد ابلوني
فاتحها چنت اعيوني
+++++++++
كل دمي بعروگي نزف
حدما احس جسمي نشف
كل حيلي ما يرفعله چف
ايئأشّر لزينب ردي

بس فتحت اعيوني بقت
عن كل حچي الساني سكت
يا وسفه زيـنب مـن اجت
حيل الهله ماعندي

حگها استغربت ملگاي ما انهض والاگيها
ترجع خطوه عني انوب عطر امي يدنيها

تسألني بقت هذا انت يحسين
بعد اختك مشه ذاك الحِسِن وين
ابنظره قرت مضموني
فاتحه چنت اعيوني
+++++++++
هسه اني غيرني الضمه
واعضامي كلها امهشمه
حاچيني يا بت فاطمه
بنظراتي گمت اسألها

هل انتي زينب ياتُرى
شكلچ شجا واشغيره
لو صعدت التل للمره
اگبال العدو تكتلها

دمعتها حچتلي اهواي يا مصعب حچي النظره
الممشه امن الخيم يحسين للتل هيچي متغيره

گالتلي بيك اهواي الاجروح
گلتلها جرحچ يطلع الروح
بحرگ الخيم اذوني
فاتحها چنت اعيوني
+++++++++++
عني مشت تخطي بحذر
ماناطيه الجسمي ظهر
والراسي چان آخر نظر
موجود بعده بجسمي

وهنا بده صوت اعتله
رِيحوا الحسين ابمقتله
شفت الشمر صدري اعتله
لا باقي واحد يمي

طعنات اثنعش وحساب هوّه اشباقي من صدري
گلبني اعله الوجه ويلاه
واتربع عله ظهري

وارموشي ثگلت گوه تنشال
نظره الاخيره بعيني لرمال
من الظهر ذبحوني
فاتحها چنت اعيوني
+++++++++

ثائر الربيعي

ليلة ابو فاضل عليه السلام

الاااااان.  قلت حيلتي
الااااان.   زادت كربتي
الااااان    نزلت دمعتي
    يابو فاضل
      ++++++++++
انـت غالي ورخـصت كلـشي وراك
دمعِتي وهيبة خـدر مـحمي بلـواك
حســين ياعـباس اگـعـدله  اجـــاك
مـا گمتـلي ويـن ابـو فاضـل هـذاك

مديت.  چفي وللاسف
مديت.  زندك ماكـو چف
مديت.  صوتي بونتي
      ++++++++++
يالچنت تترسني ملگه من اجيك
وين طولك كلشي متغيير علـيك
جوه ظهرك ليـش خافيهن  اديك
مستحي من دمعتي رغم الي بيـك

والعين/حمره بل دمه
والعين/تشبه فاطمه
والعين/ذبحت نظرتي
     ++++++++++++
مالگيتك من وصلتك بس ثياب
وين طولك ذاك ضايع بالـتراب
لنتـظارك تـبـجي مـرتـين الربـاب
للخـدر مـرّه وطـفـل دلالــه ذاب

لطفال/منتظره الوعد
لطفال/عبد الله گعد
لطفال/سمعو صيحتي
      ++++++++++++
گطّعت گلبي وكسر فگدك گفاي
گوم واعدل مشيتي ماريد مـاي
اني اتچيـلك يخـويه ارجـع وياي
مو بعيده خيامي شوف سكينه هاي

بحجاب/اشرتلك ترى
بحجاب/كل همها المره
بحجاب/سكنه حيرتي

          ++++++++++
يل خجل عينك مثل زعلك ثجيل
تنظر الثوبي ودمع عيـنك يسـيل
ينسلب ادري وتدوس اعليه خيل
راح اصيحك حيل وآنه ابلايه حيل

عباس/ وينك يالگمر
عباس/ضلع امي انكسر
عباس/لزمو شيبتي
    
       ++++++++++++
هسّه گلي الزينب بيا حاله اعـود
تسأل امن تشوفني حمره الخدود
إحضـنتـني ولاحـهن دم الزنـود
واضح بعيني كسر وجفوني سود

والشيب/لرمـوشي نـزل
والشيب/بدموعي انغسل
والشيب/يشرح محنتي
     
       ++++++++++

ثائر الربيعي

السبي

ماتت دمعتي/ متأثره بجروحها
ماتت دمعتي/ والشام طلّع روحها
      الما تكفي لحزانه عبرته
       ماتت وسط عينه دمعته
والشام طلّع روحه
        +++++++++
اول دمع عندي انخطف
اگبالي المهر خالي وگف
يفهم نظرتي اعله الدمه
من صفنِتي ابعينه رجف

فحطانه واركضلك صعب
كل خطوه يوگعلي گلب
تبچي حوافر مو دمع
لتلم اخوها امن الترب

مستعجله خوف ورعب والي اگدرت جمعته
انظر خيمنه تشتعل عاري الجسد  تركته

خيل بطريقي/ومنين ارد لخيامي
خيل بطريقي/ تسحگ طفل گدامي
      والاگدرت منهم سحبته
      ماتت وسط عينه دمعته
والشام طلع روحهه
       ++++++++++
يالليلة الوحشه الاجت
بين الجثث ممشه گضت
موقف اخذ حيل الدمع
ابعون ابني جدمي تعثرت

جاب الصبح وجه الهزل
اشرولي كلهم بالحبل
ضليت ارچب بالحرم
يصعد طفل يوگع طفل

والصعده كلفه عالهزل وهوايه كررتها
والدمعه من سوط الشمر وي متني ودعتها

فوگ الهزيله/ تسترني بس چفوفي
فوگ الهزيله/ مذبوح طولي وشوفي
        راس الگمر لمن ندبته
       ماتت وسط عينه دمعته
والشام طالع روحها
      ++++++++
درب السبي صرت بوضع
مايكفي لطمه اولا دمع
من يبچي لجروحي الگلب
دگـاتـه تبـقى تنـسمـع

اهوايه واكثرهن الــم
ليل ويسر وبلا خـيم
اتغطه باحضر يا علي
متغرّبه واكفل حرم

ماتعذر ابهذا الظرف من تشتكي رقيه
ياعمه عيني ماغفت اذّاني حبل اديه

خالي حضنها / اتلولي رباب اگبالي
خالي حضنها / واتگلي نام الغالي
        ليل السبي ذاك السهرته
        ماتت وسط عينه دمعته
والشام طلع روحها
     +++++++++
وضع الشمس ما مستقر
كلساعه تاخذني بكتر
الظهريه تلسع هامتي
واتطول اخيالي العصر

من ينسحگ ضلي يحس
من يبچي هم يطلعله حس
كل ضل يعيش امن الضوه
بس ضلي كاتلته الشمس

إخيالي گضّيت العمر بعيوني مانظرته
وگبالي اشوفه ينسحگ مثلي يون سمعته

درب المشيته/كل خطوه ماتت روحي
درب المشيته/من عنده كل جروحي
         وگبالي راسه كافل اخته
         ماتت وسط عينه دمعته
والشام طلع روحه
       +++++++++++
للشام كلمـا نقتـرب
ياكل ضوه عيوني الدرب
اسمي اسمعه ابدگته
دمامهم من ينضرب

چي اختلف عن كل مره
الكل صوبي فاتح ناظره
عن لا يلاگوني ابوجه
عالناگه اگعد ليوره

ملتمه نسوان وزلم يحچوها بالاشاره
وجهج تديرنه شعجب يا سيدت لساره

حچي الشماته/بسمار طر ضلوعي
حچي الشماته/سيف وذبحلي دموعي
        ماينحمل حچي السمعته
        ماتت وسط عينه دمعته
والشام طلع روحها
          +++++++++++
آخر دموعي الي هوت
من عدها وعيوني انتهت
الديوانه اوول دخلِتي
بت فاطمه صاحو اجت

مابيينت متألمه
ضل كبريائي كالسمه
گتلهم اي ام الخدر
بت حيدر وبت فاطمه

والعنده من عدكم حچي اخت الگمر تراني
لمن سمعني بالطشت راس الگمر حياني

هاي النهايه/وي دمعتي امن عيوني
هاي النهايه/ووصيتي لليبچوني
     واليذكر الشام وغربته
     ماتت وسط عينه دمعته
والشام طلع روحها


ثائر الربيعي

اادفن

ماحچت بس اشرتلي ابأيدها
تريد اسألك عمه عن اوليدها
++++++++
صوت ماعدها الحچي من عدها غاب
هاي ثلث ايام ماتحچي الرباب
گاعده اتلولي الحضنها بالتراب
اتشيل اديها وحيل تحضن جيدها
++++++++
بالبالخرابه چي سگف بيها اعله هاي
اتكترت ماترضه تگعد بالفياي
اشرتلي اتگول ساگي اوليدي ماي
لو بعد جثته العذب شيفيدها
++++++++++
اتگول وين ادفنته چا عبد الله وين
الهسه ملفوفات بگماطه الادين
الوحده دافن ابني لو وي الحسين
والگبر وحشه اعله ابني ايزيدها
++++++++++
نـام ابـنـها بالتراب الغالي نـام
فوگ صدر حسين مابين السهام
شالهن ذرعانه وافهمت الكلام
من بچه عبد الله امه ايريدها
++++++++++
ويه ابوه حسين وبنفس الحصير
حته جسم حسين هم صاير زغير
ما امـّيز بيـن الاول والاخـير
لا تساليني وبعد ماعيدها
++++++++
عمه من عبد الله مگطوع النصيب
خل تبطل من دللول الحبيب
الراح مايرجع ولا حته النحيب
ايرد اهلنه هناك سكنت بيدها

ثائر الربيعي

الدفن

دفنوا العباس يا سكنه تعاي
هذا اخوچ امن الشريعه هسه جاي
دافن الجود
يم ابو الجود
++++++++++
دفني كل آمالچ ابگلبچ سكينه
چلمه وانسيها الگمر يرجع علينه
اتأكدي ابنفسچ تعالي يالحنينه
سلمي عالسجاد وإشتميها ادينه


باقي بيها امن الدفن عطر الكفيل
مايرد عباس هذا اكبر دليل
عطره موجود
وي ابو الجود
+++++++++
خل نسئله ونسمع اخبار الاكيده
من دفن عباس هم بايس وريده
ماسمع كلمة بقت زينب وحيده
من دفنها سادها لو فاتح ايده

چان مفتوحه الي امودي سلام
ومعتذر ياسكنه مارد للخيام
انسي الاوعود
يم ابو الجود
+++++++++
رمله سمعتنه واجت كل خطوه وگعه
ها يزيب مندفن جاسم اسمعه
هذا ثوبه اوياي جبته شلون ارجعه
گلت ادفنه ابگبره واعلگ يمه شمعه

عالاقل يصبح چفن ثوب الزفاف
خاف باچر يرجع ايعاتبني خاف
بمكن ايعود
يم ابو الجود
+++++++++
والرباب البالشمس خلصتها گعده
عالتراب اصبعها يرسم خالي مهده
يالدفنت اوليدي صاحت ضامي بعده
ودي ساعه اينام بحضيني وارده

هوّه اخييك وإعذر ادموع الرباب
وين يتحملها نومه اعله التراب
والضمه ايزود
يم ابو الجود
++++++++++
وين صاحت ليله وين ادفنت الاكبر
اشلون جمعته وسمعت ابني توذر
وانحنه ظهرك لخوك ادفنته تگدر
هوه لو لحسين ياهو اجروحه لكثر

بس گبر واحد كفاهم من اجوه
اتخالطت اوصال الاكبر وي ابوه
وگلبي ممرود
يم ابو الجود
+++++++++
حسين توگع منه وصله اشما رفعته
بالحصيره منجبر جسمه جمعته
وجهت للقبله نحره ومن وضعته
الصدري وسدلي الطفل بويه سمعته

وگال بلغ شيعتي خل يامنون
لا يقصرون بزيارة گبري كون
والعزه ايزود
يم ابو الجود
+++++++++


ثائر الربيعي

ابلا هودچ شلون اصعد اعليچ
يا ناگه آنه ارقيه احاچيچ

خوفي لا تدفعني ريح
مِن يصعدني امن اطيح
..يا ناگه
**
ارقيه انه الچانوا اهلي امدللين
چان ابوي الّه يقبلني اعله عيني
بالضعن چنت العزيزه املقبيني
بالدرب كله ابحجرهم شايلني

محتازه واحد هسه وياي
فوگج يرجبني ردت هاي

شفته ظهرچ مو مريح
من يصعدني امن اطيح
يا ناگه
*****
چنت ياناگه امن افز ابتالي ليلي
ماعرف ياهو القبل منهم يجيلي
هسه وينك بويه ناديت اعله حيلي
جاني بس راس برمح عذب دليلي

راح اقتنع بالغالي مكتول
ما صدگت دم ال بلخيول

ثاري دم صدره صحيح
من يرچبني امن اطيح
ياناگه
***
لو اسولفلچ عله حرگة خيمنه
امطشره ركضتنه واسياط التلمنه
اسكينه وآنه رحنه يم جثه الزلمنه
من ضربنه اگباله بالسوط انهظمنه

ليش ابركضتي اتعاثر بساع
بجدامي تچوي احرورة الگاع

واركضت ركض الجريح
من يصعدني امن اطيح
يا ناگه
***
چنچ استغربتي لمن شفتي حالي
شلون اگول مدلـله وبيدي حبالي
لون ماباين على اعيوني دلالي
صدي ياناگه على ارماح الغوالي

لحسين ابوي وعمي عباس
كلما بچيت ايدنگ الراس

اعليه ضل باله الذبيح
من يركبني امن اطيح
ياناگه
**
عندي يا ناگه بقت طلبه وحيده
احنه مچويات گلمن جرحه بيده
شمس تكتل واحنه سفرتنه بعيده
سرعي ممشاچ السبي يخلص اريده

مامش غطه لا هودچ شلون
وحر الضهاري امغير اللون

كون اموت واستريح
من يصعدني امن اطيح
ياناگه
*

علي الربيعي