نعي( نصاري) لاستشهاد أمير
المؤمنين علي عليه السلام

طحت يابواليتامة بحومة أثنين
بسيف النايبه. ومطالب البين
★★★★★
صوت من العوالي زلزل الكون
نزل جبريل ينعه بگلب محزون
يالون الصبر مايدري يالون
شح الصبر مايدري الصبر وين
★★★★★
اجت مهظومه زينب وگفت تنوح
نادت مووكتها       ياعلي اتروح
يواگف بالشدايد صدگ مطروح
انهض لليتامه. وللمساكين
★★★★★
اجت يم الحسن والدمع همال
صدك چتال جرحه ايعذب الحال
يگلها اي. يزينب جرح چتال
غميج صواب ابونه يلتنشدين
★★★★★
يگلها الحسن يختي ابخنگ الأنفاس
انصبي العزه ونوحي يخت عباس
طبرت موت خويه طبرت الرأس
نفذ بالراس سم السيف تدرين
★★★★★
دنت زينب لبوها بدمع سچاب
صدگ بويه طحت يارافع الباب
اصوابي مايطيب  بهذا المصاب
ولاتنشف دموعي وتغمض العين
★★★★★
على مهلچ يگلها  علتي اتهون
يبويه اليوم سهله باچر شلون
بلطف جسم اخوچ حسين مطحون
مصيبه مامثلها امصيبة احسين

الشاعر حسن لعيبي الحريشاوي

خطاب عن لسان حال  العقيلة زينب  لأمير المؤمنين علي عليه السلام بعد استشهاده

يبوالغيره   العمر حيره
بعد عينك  علي بويه
★★★★★
شوف اعيوني مايسوه   اذا مايوم اشوفنك
اعرفك ماتجافيني   ولا هذا  الطبع منك
يلمبعد عليه اشلون  بويه اليوم اريدنك
شكثر وني    يعذبني
بعد عينك علي بويه
★★★★★
عليه بس حزن تمطر  الدنيا لوصفت غيمه
وهيمه اتصير اشوفنها  واتيه ابوحشة الهيمه
مايسوه العمر بعده   ياناس الأبو خيمه
بلا ملگه    العمر حرگه
بعد عينك علي بويه
★★★★★
ومن العالي للهيمه    الدنيا صارت اتذبني
صرت بعدك يبو الطيبه بحال المايناسبني
سيف الصوبك بالراس ابلب أحشاي صوبني
واتگوه   على البلوه
بعد عينك علي بويه
★★★★★
ريت اندارت ابراسي  بوية طبرت اصوابك
ولااشوفن خلية الدار  موحش ليل محرابك
شوصف حالة ايامي   سنه كل يوم بغيابك
كثر صبري  كسر  ظهري
بعد عينك علي بويه
★★★★★
شنهي المابچالك دم  ولونه اندار وتغير
بوجودك چنت اتمنه   يطول العمر ياحيدر
هسه اتمنه بغيابك    ياريت  العمر يگصر
صعب أمري  وگضه عمري
بعد عينك علي بويه
★★★★★
من الموت لوتنظم ابلب احشاي ظميتك
مثل كل يوم يابويه   اليتامه وصلوا البيتك
گبل زادك يبو الغيره  اجوا يردون حنيتك
يذكروني    ويبچوني
بعد عينك علي بويه

الشاعر حسن لعيبي الحريشاوي

نعي بحق امير المؤمنين عليه السلام

وين المشه ايخبر النبي   من بعد الغياب
صح الخبر حيف وأسف    علهام الصواب
الشيبه الكريمه تخضبت  والدم غده خضاب
اركان الهدايه تهدمت    ياجمر المصاب
ون اليتامى مابطل   والدمع سجاب
شحال العقيله من درت  منها الگلب ذاب
كسرين كاسرها الوكت   ماحسبت احساب
الطبره  وي كسر الظلع من دفعوا الباب
والحسن مهظوم الگلب   والچبد لَهَّاب
وحسين دمعاته جمر   يلهج بالعتاب
زينب تنادي ياعلي  ياشم الاطياب
تكتل يبوية فرگتك  ياشمل الاحباب
ياحيف يابدر السمه   غطاك التراب

الشاعر حسن لعيبي الحريشاوي

يروحي بالحزن زيدي وجودي
جربتي عيوني بلمدمع وجودي
شنهي بلاعشگ حيدر وجودي
خاطر مااون صبح ومسيه

الشاعر حسن لعيبي الحريشاوي

ابوذيات بمناسبة استشهاد أمير المؤمنين علي عليه السلام

حلم علناس  يابوالحسن مريت
فداك اعمارنه للموت مريت
بلساني يدهر الهظم مريت
من أسمع منطبر حامي الحميه
★★★★★
الما حبك يحيدر جهل ونته
مثل ونك عليك الدين ونته
سفينه انته يبو الحملات ونته
الشلتهم من بحور الجاهليه
★★★★★
للمسجد ابوالحسنين  منسار
ابساعه اشحاط رب الكون منسار
گلب كل شامت وغدار منسار
يوم الدنت ساعات المنيه
★★★★★
شكثر روحك من العدوان حملات
علي يامن الك علگوم حملات
غيوم الحقد هاي اعداك حملات
تخضب دمك  بسيف المنيه

الشاعر حسن لعيبي الحريشاوي

استشهاد امير المؤمنين
علي عليه السلام

من ربك المعبود   بهاي الليله موعود
طحت يلماطحت يوم    
بطبرة سيف مسموم
بهاي الليله موعود
★★★★★
منيتك كسرت اگلوب اليتامه
ابسلامه مانظن يابو السلامه
شعجب ماحست الدنيا بندامه
امعاتب لايهمها.  ولاملامه
يوم الطحت مصيوب  
ذابت مهج وگلوب
طحت ماظنك تگوم     
بطبرة سيف مسموم
بهاي الليله موعود
★★★★★
گلتها من عرفت اليوم رايح
صوايح تتبع وياها النوايح
ركن الدين يوم الطحت طايح
من دم جبهتك مولاي سابح
ترضه عيونك تنام    
امسهر عيون الايتام
ولحية مخضبه ادموم   
بطبرة سيف مسموم
بهاي الليله موعود
★★★★★
اجت ساعة الموت شلون تنرد
الليله الواعدك بيها محمد
روحك للجنان اليوم تصعد
لبس دين الهدايه الثوب الاسود
الماخذ منك العيد    
طبرة راسك يريد
هذا الغدر مظموم    
بطبرة سيف مسموم
بهاي الليله موعود
★★★★★★
مثل ناطر محب تنتظر جيه
اجاك الخاسر بفوز المنيه
امتانيك النبي وبنته الزچيه
وتودع دنيه غداره ورديه
بميلة غدر بالسيف     
علباري تحل ضيف
حال العمر محسوم    
بطبرة سيف مسموم
بهاي الليله موعود
★★★★★
شخذ منك السيف وربك انطاك
كلشي نطاك رغماً على العاداك
ذلهم للحضيض وفوگ   علاك
متاخرت رب الكون ناداك
حبيب ونادى محبوب  
شگصرها اتصير الدروب
وعندك صار معلوم    
بطبرة سيف مسموم
بهاي الليله موعود

الشاعر حسن لعيبي الحريشاوي

لاستشهاد أمير المؤمنين علي عليه السلام
وين مثلك ياعلي

وين مثلك ياعلي وين اليحكمون
مثلك بكسرة خبز بالدنيا يرضون ؟
اليسعد الناس وحزين
وين مثلك نلگه وين
وين مثلك ياعلي وين اليحكمون
★★★★★
ياهو مثلك ساهر وعايف منامه
شايل الزاد ويدور عليتامه
يريد كلها الوادم تعيش بكرامه
يريد خير ونعمة للناس وسلامه

مثل تعبك مااظن مثلك يتعبون
حارس وسهران ليلك علينامون
وين حاكم قصره طين
وين مثلك نلگه وين
وين مثلك ياعلي وين اليحكمون
★★★★★

وين حاكم راحته مثلك قليله
مايضل محتاج بالدنيا سبيله
ياهو مثلك خايف وسهران ليله
وگفته يم ربه لاتصبح طويله

مايهم جوعان. لوهمه يشبعون
لامثلهم صرت لامثلك يصيرون
ابليله ماتغفاله عين
وين مثلك نلگه وين
وين مثلك ياعلي وين اليحكمون

★★★★★
ياهو حاكم ماغفه أوودع الراحه
وگلبه حنيه على الناس وسماحه
يخدم الوادم گضه ليله وصباحه
مبتسم وبگلبه ماترحم جراحه

مثل ثوبك ياعلي وين اليلبسون
عشر فعلك كل وكت لا مايگدرون
عالم وزاهد وامين
وين مثلك نلگه وين
وين مثلك ياعلي وين اليحكمون

★★★★★
وين حاكم بالعدل گضه حياته
لاسياسه وغيرها اتغير صفاته
ذابت برب السمه للموت ذاته
احمدي المنهاج من صغره الوفاته

مثل صبره ومنهجه لامايصيرون
مثل حيدر ماحصل وين اليضحون
الباع نفسه والسنين
وين مثلك نلگه وين
وين مثلك ياعلي وين اليحكمون

★★★★★
ياهو حاكم اجه للدنيا ورفضها
عاف حقه وذمة الوادم حفظها
ماتهمه الدنيا لوزادت بغضها
وماتغره الدنيا كلها ولابعضها

وين مثله بالوصف. رادوا يقيسون
ومثل قمبر بالفعل. عجزوا يصيرون
اليرضي رب العالمين
وين مثلك نلگه وين
وين مثلك ياعلي وين اليحكمون

الشاعر حسن لعيبي الحريشاوي

استشهاد أمير المؤمنين علي
بن ابي طالب عليه السلام.  (عگيلي)

شنهي الما ون على غيابك     
هذا العالم كله اتاثر
حيدر    حيدر   حيدر.  حيدر
★★★★★
يمقدم نفسك للباري  
ماهمك جيش ولاسيف
ماتقنع عايش بالدنيا   
لوبالدين ايمر الحيف
ياهو الي رايد ينشدني   
والرايد عنك تعريف
انته النور بهاي الدنيا 
وانته التشفع يوم المحشر
حيدر    حيدر   حيدر. حيدر
★★★★★
غيّرت الموقف والكفّه  
يوم الحال اشتدت حيل
جبت الشمس بنص الظلمه 
عن الوادم زحت الليل
عدوان التشهد وتسولف  
صبيّت عليهم سجيل
ياصوله الماتشهد باسمك 
وين الغيرك گصدوا خيبر
حيدر حيدر.     حيدر حيدر
★★★★★
يمقدم روحك بالشدّه   
بايع روحك للاسلام
مثل ابراهيم بصولاتك   
يوم الكسرت الاصنام
وطبع المختار وغاياته  
تقوه اشماتقسه الايام
ضحيت ابروحك وبمالك.
يلي بسيفك دافع كل شر
حيدر    حيدر   حيدر.  حيدر
★★★★★
اقرايتهم عنك سطحيه  
احتاروا كلهم بالتفسير
شنهي عذر الميعرفونك  
لوبيهم خان التعبير
شلون تصير الرابع عدهم 
وغير الاول لامتصير
كل الي عندك ماعدهم 
يصبح مثلك ياهو اليگدر
حيدر   حيدر   حيدر    حيدر
★★★★★
من يوصل حيدر تفسيرك    
يلبلدنيا ماتتكرر
ياهو الي يستوعب ذاتك
وانته الشرح المايتفسر
لامن معجم لاموسوعه
تلخص مضمونك ماتگدر
ياسر انته الحد الساعه    
بيك العالم كله اتحيّر
حيدر   حيدر   حيدر.  حيدر

الشاعر حسن لعيبي الحريشاوي

ابوذيات لاستشهاد أمير المؤمنين علي عليه السلام

يدنيا ليش بس حقدچ علينه
لان ناصي العدو واحنه علينه
بشهر رمضان صوبتي علينه
فجعتي گلوبنه بحامي الحميه

عليك الحقد مثل المطر منصاب
راسك لواساس الدين منصاب
علي مارايد من الناس منصاب
علي رايد الخير الهلبريه

بحقدهم اسسوا دوله وجبهه
والناتج طبر هامه وجبهه
محبتك ياعلي الباري وجبهه
اساس الدين والاسلام هيه

الك يابو الحسن بالحرب وثبات
ادله بهاي      مايحتاج وثبات
باسمك علولايه     اظل وثبات
لان حبك رضا الباري ونبيه

هامه لكل نبي ترجع وصلها  
سيفه شلون المرادي وصلها
الدنيا إلي گطع حيدر وصلها
عليه صارت حلف وي ال اميه

الشاعر حسن لعيبي الحريشاوي

لاستشهاد أمير المؤمنين علي عليه السلام (وزن تجليبه)

مساهر جفني وفارگ نومي
لمصابك ماتگضي همومي
من سيف الشر آه يا حيدر
لمصابك ماتگضي همومي
★★★★★
دنيا بلطبع وياك نفس الراي
مگاصدها تريدك خاضع وشَكَّاي
تدريها سراب شما تِشَوَفَّكْ ماي
الدين الله شكثر من شافتك وفاي
وغري الغير ياما گلت يادنياي
حرب وياك شَدَّتْ ياعلي مولاي
من شافت كل خير العندك
اتحشم كلمن واگف ضدك
لوتِصَوَّر آه ياحيدر
لمصابك ماتگضي همومي
★★★★★
جازه الطيب بالنكران ابن ملجم
شعنده وياك ذاك الحاقد المجرم
على گلب الحميه بلارحم يهجم
ليل الشر خيانه وموحش ومظلم
سيف النايبه بركن العدل يهدم
بجرح گلب الحبيب المرتضى يلچم
الشامت بمصابك يتهنه
الشاري النار وباع الجنه
شگد تتصبر آه يا حيدر
لمصابك ماتگضي همومي
★★★★★
حگه الخير بعدك لوذبل عوده
ولابيها ضوه ايام الخلگ سوده
دنيا من الهظم بالهظم مگيوده
من بعدك عجيبه شلون موجوده
ياصدر المحبه والحلم زوده
غدر چتال چان السيف مگصوده
گاصد بالدم ينزف هامك
ويحرم من الخير ايتامك
موتك يفتر آه يا حيدر
لمصابك ماتگضي همومي
★★★★★
جبريل انفجع من شافك اتحسر
صاح بصوت بيه گلوب تتكسر
انهدم ركن العلم والدين ياحيدر
يحماي الخلگ بالدنيا والمحشر
يتاج الراس راسك حيف يتطبر
حادث موسهل اصعب واشد كل شر
الدين بدونك ذابل رسمه
الدار بدونك وحشه وظلمه
كلشي اتغير آه ياحيدر
لمصابك ماتگضي همومي
★★★★★
ياغفوة يتيم من الجرح لوفز
قطب روحه صرت ياحيدر ومركز
عجز يرثيك لكن دمعه مايعجز
شعجب ثابت ركنها الدنيا ماتهتز
جمال الدنيا بعدك بيش يتميز
الچان بطلعتك بالنور يطرز
ياخير امغربات ايامه
شيصبرها اتنوح ايتامه
اصعب منظر آه ياحيدر
لمصابك ماتگضي همومي

الشاعر حسن لعيبي الحريشاوي

لاستشهاد امير المؤمنين علي عليه السلام

منهو سيدها العباده. . ومن عشگ محرابها
ومنهو خواض المعارك.      من تحد انيابها
ومنهو آياته الشريفة. صدح باسمه اكتابها
ومنهو من اطهر قبيله   ومن جليل انسابها
ومنهو سيدها البلاغه.  وصاغ. فن آدابها
ومنهو سيدها الفصاحه وبيده خط إعرابها
ومنهو مظمون المدينه  يوم اصبح بابها
ومنهو فرقها الجموع وهزم ذيچ احزابها
ومنهو فرسان الجيوش  بسيفه حز ارگابها
الدنيا ثوب الحزن لبست.  غيرت جلبابها
واليتامه تريد حيدر  نار يحوي اعتابها
وآه ياعترة. محمد.    جمر نار مصابها
راح حماي الشريعه  وكل معاني أسبابها

الشاعر. حسن لعيبي الحربشاوي

لاستشهاد أمير المؤمنين علي عليه السلام على طور قصيدة محمد الحلفي (بعد وكت)

يابوالحسن     يامن طَبرْتَّك عَلَّهام
يابو الحسن   مهموم حال الاسلام

شذنبك براسك تنصاب  أسوَّيت ياداحي الباب
جازوك تالي بالغدر   عن حقد لوغير أسباب
من صَوَّبَك يابوالحسن     آه ياعلي

بسيفك بنيت الإسلام   بچفك كسرت الاصنام
ضحيت للهادي شكثر  بالحرب دومك مقدام
وتحملت نار الفتن     آه يا علي
★★★★★
يابوالحسن    ماكَملَّت  شهر الصوم
يابوالحسن   صابك السيف المسموم

شعدهم وياك الظَّلَّامْ      شدوا الهليوم أحزام
لملم حقد سيف الظلم    والضربة صارت علهام
غيوم السمه لجلك بچن    آه يا علي

الذكر اللَّه مسْرع لَبيَّت   يوم اطلعت من البيت
يابوالحسن يامظلوم   مصيوب راسك رديت مصيوب ياجنة عدن   آه يا علي
★★★★★
يابوالحسن    موحش البيت ومحزون
يابوالحسن     من رحت مفجوع الكون

زينب ابگلب المجروح  لمصابك تون وتنوح
وتنادي مذهوله الراي    يابويه موسهله تروح
وايام الموادع لفن    آه يا علي

مهظومه زينب بالدار  وتنادي جدها المختار
من رحت انته وفاطمه    ياجدي راح الكرار
واصبح مثل غربه الوطن    آه يا علي
★★★★★
يابوالحسن    ياسيف للحق منذور
يابوالحسن   بسيف المرادي مطبور

يابوالعدل والاحسان   الصابك بشهر الغفران
مايغفر الله فعلته     حاير ذليل  وخسران
ويشوف لوعات المحن      آه يا علي

ياسيدي يامظلوم   ماكَملَّت  شهر الصوم
بهذا الشهر حتماً فزت  خسران خصمك مذموم
ثوب المجد صار الچفن    آه يا علي

الشاعر حسن لعيبي الحريشاوي

لاستشهاد أمير المؤمنين علي عليه السلام
(‏فزتُ وربِّ الكعبه )

ناده علي ابهلضربه.    (‏فزتُ وربِّ الكعبه )

★★★★★
من تخضب حيدر ابدمه يگول
هاي ليله البيها واعدني الرسول
طبرتي قربان وأتمنى القبول
جرحي لجل الباري أنساه ويزول

شما ليله چانت صعبه.     (‏فزتُ وربِّ الكعبه )

★★★★★
وبمنامي زارني الهادي الحبيب
گال هاي الجنة بوجودك تطيب
بطبرتك لمن تجي الربك خضيب
وياي ياكرار بالجنه  قريب

لونلت هاي الرتبه.   (‏فزتُ وربِّ الكعبه )

★★★★★
گضه بالتهليل وكته وبالدعاء
احشرني ربي ويه خير الانبياء
بهلمصيبه انفجعت أملاك السماء
طبر راس الخير أشقى الاشقياء

حيدر ينادي ربه.     (‏فزتُ وربِّ الكعبه )

★★★★★
اجت زينب والدمع علخد يسيل
گلها  يابويه دنه يوم. الرحيل
صبري يابت فاطمة الصبر الجميل
راح ماظل بالعمر  الا القليل

من بعد جور وغربه.    (‏فزتُ وربِّ الكعبةِ )

★★★★★
الدهر بيك اسوة ياگلب الحنون
عادته وياك كل مره. يخون
گال يارب الفرج بعد المنون
بعد هاي الشده كل شده تهون

بحب الرسول وحزبه.    (‏فزتُ وربِّ الكعبةِ )

الشاعر حسن لعيبي الحريشاوي

ياامير المؤمنين

قليل شماتألمنه وبچينه
ابمصاب الطاهر الروحه حنينه
الماهاب المنايا وكثرة الناس
وين الموت چان يگول وينه
بهجير ايصوم ويأدي العبادات
يناجي الباري ماغمضت عينه
علي رمز العباده ومنهل الخير
نذر روحه وحياته لجل دينه
بسيف الغدر  وبچف الضلالات
تخضب بلدمه ينزف جبينه
ماكمل اصيامه وعَيَّدْ العيد
لفه الموت وأخذ بيده ولينه
من ذاك الوكت مولاي لليوم
مصابك ياعلي شمسوي بينه

الشاعر حسن لعيبي الحريشاوي

لاستشهاد أمير المؤمنين علي عليه السلام

مُغْبُرَةٌ الدنيا وَمِظلمه  الوانها
والعوالم  صفت تبچي أكوانها

★★★★★
الدين حاير صار وينوح الفرض
الصفا والمشعر يون على الارض
مثل ونات العقيله  الماتفض
آه ياعظم العقيله احزانها
★★★★★
صاحت وضجت اليوم الرافضه
وين باب العلم وين المرتضى
نادت اقدار الزمن نحبه گضه
انهدمت اليوم الهدايه اركانها
★★★★★
اركانها اليوم الهدايه اتهدمت
العلم والمحراب  والدنيا بچت
والشريعة بدونه مهظومه  صفت
وناحت سيوف الوغى وميدانها
★★★★★
كاشفت الكربات والهم الجلي
فوگ كل عالي يحيدر معتلي
شيعتك ونت ونادت  ياعلي
ياامام الرحمه ياعنوانها
★★★★★
ابحبك الاعمال ياخير العمل
تنقبل حتماً بعد يوم الاجل
وكل حمل مطروح باچر مايضل
حبك اعمال الخلگ ميزانها

الشاعر حسن لعيبي الحريشاوي

خطاب السيدة زينب لامير المؤمنين (عليه السلام )عند لحظات استشهاده  (وزن عگيلي )

ارحم گلبي ودمعة عيني 
يابويه ادخيلك حاچيني
ارحم گلبي ودمعة عيني
★★★★★
يم وجهك هلن دمعاتي وي ناري ونارك چوّني
زادن لچماتك يلغالي   ناديتك كونك تسمعني
ناوي الفرگه تعذب روحي علفرگه اتريد اتعودني
جرح الزهره بعده اگبالي بويه دخيلك   لاتجرحني

لاتجرحني    بويه ادخيلك   
من بعد امي  چنت اشكيلك
وتزيل همومي من احچيلك
ياجنه ابنار مخليني    
يابويه ادخيلك حاچيني
★★★★★
تدري بكسر ضلوع الزهره  ساعه المرت اصعب ساعه
بفراگك رايد تفجعني  يانور الموسهل اوداعه
ايمرد گلبي تدري غيابك  وللهم روحي برهن الطاعه
لاتفجع زينب يلغالي  يابوالغيره الحلوه اطباعه

من محنة روحي المهمومه
وجروح گليبي الملچومه
الدنيا الصارت مثل الحومه
من بلوة البلوة اتوديني       
يابويه ادخيلك حاچيني
★★★★★
مفجوع العالم بغيابك  وافلاك الكون المفتره
بگد العالم روحك بويه  شوالم راسك وي الطبره       
يلگبل الدنيا ومابيها  والله فراگك نار وحسره
بنيران الروح  بلاشوفك  ما احمل نار المتوجره

مكسورة خاطر متكدره 
رايد ترحل بعد الزهره
بويه بعينك اخر نظره   
بيانار اتريد اطفيني    
يابويه ادخيلك حاچيني
★★★★★
بجالك ماهميت بدنيا  ولاكثرة همي واحزاني
ريحة جدي وامي الزهره  ياراحة گلبي اوجداني
ينعاك الدين واركانه   فراگك هدم بويه اركاني
شلون الموت ايمر بدربك  وتروح بدربه وتنساني

يافرحة گلبي المطويه
بعدك يلكلك حنيه
هاي الدنيا   اسوت بيه
تفرح من يوم اتبچيني   
يابويه ادخيلك حاچيني
★★★★★
علدار ايتامك ملتمه  لاتكسرها گلوب احبابك
كلها اظن مارايح عنهم  ساجد وتصلي بمحرابك
ماظنوا موت اليدنالك  يبعد  مايوصل يم بابك
يلي مناطر هاي الساعه  تفوز بيوم اتشوف اصوابك

شظمت هاي الدنيا بدربي
بعد احبابي وسلوة  كلبي
اسويت بهلدنيا شذنبي
باچر يابلوه اتراويني.
يابويه ادخيلك حاچيني

الشاعر حسن لعيبي الحريشاوي

لاستشهاد أمير المؤمنين علي بن ابي طالب عليه السلام

ألف بعد الألف  لورايد دليل
علي خير الناس حَمَّاي الدخيل
كل تعاليم السمه   تگول حَمَّاي الحمه
علي خير الناس حماي الدخيل
★★★★★
قَدَّمُوا مَا أخَّرَه رب الكرم
كل ضعيف الراي ماعنده قِيَمْ
الينهب أموال اليتامه ابلارحم
والأحق بالامر من حقه انحرم
ومادروها الموزمه   تگول حَمَّاي الحمه
علي خير الناس حماي الدخيل
★★★★★
عن مناقب حيدر الهادي ذكر
گال لواقلام يندار الشجر
ولوحبرللخط صفه ماي البحر
عِجَزْ لَوْ كتَّابْها  جن وبشر
كل فضيله ومكرمه  تگول حَمَّاي الحمه
علي خير الناس حماي الدخيل
★★★★★
استغنى عن الكل عظيم المنزله
لچن هاي الناس محتاجه إله
كل علم بالكون حيدر أوله
ماعجز عن كل جواب ومسئله
وياما چانت فاطمه  تگول حَمَّاي الحمه
علي خير الناس حماي الدخيل
★★★★★
يامذل اهل الكفر  طول الوكت
يلي عنوان البطوله انت صرت
مثل ماراد النبي الهادي ردت
عنه مالحظه غبت وتأخرت
كل بطوله وملحمه   تگول حَمَّاي الحمه
علي خير الناس حماي الدخيل
★★★★★
يااسد مقدام مكي وأبطحي
اطحنت ايام الجهل طحن الرحي
ليث وأمجادك أزل ماتنمحي
وجوه صلفه غدرتك ماتستحي
والمصادر حاكمه  تگول حَمَّاي الحمه
علي خير الناس حماي الدخيل

الشاعر حسن لعيبي الحريشاوي

*بشان الامام علي*
*عليه السلام*

🚩🚩🚩

*جبريل نادى واعلياه*
*جبريل نادى واعلياه*
_
دين الاله اتهدم اليوم
لملاك ضجت بحر العلوم
علي انضرب السيف مسموم
*سابح ابدمه الدعي خلاه*
__
ناحت عليه كل السموات
من غمض اعيونه علي مات
اشلون گبره ضمه وبات
*وسط اللحد الگلب ناداه*
_
بليلة قدر مفقود ابوحسين
الدار وحشه تبچيله العين
حتى اليتامه زادت اونين
*راح الكفيل الصعب فرگاه*
__
والله هظيمه داحي الباب
غاب الگمر ابوسط التراب
جن وانس تنعه هالمصاب
*ظلمه الدنيا بعد عيناه*
__
عالم العلوي ويا الجنان
علنو حداد لصاحب الشان
والانبياء لجله بالاحزان
*والفلك يصرخ واعلياه*



*عاشقة الولايه*
*نسالكم الدعاء*

بهذا الطور

https://youtu.be/5WWZlKyFI6k?feature=shared

لاستشهاد أمير المؤمنين علي عليه السلام (وزن تجليبه )

ماتُبطَل  نيراني التسعر 
من عظم مصابك ياحيدر
★★★★★
ألف آه بدليلي تفور لمصابك
بگد نوح العباده ونوح محرابك
بگد حزن اليتامه الوگفت ابابك
بگد وحشه الدار التبچي بغيابك

بگلبي جروح الماتتفسر
من عظم مصابك ياحيدر
★★★★★
لِلَّوعات بيده الحزن  وَدَّاني
ومكسور الگلب مهموم خلاني
جرح چتال واحد يلچم الثاني
مصابك مايفارگ يوم وجداني

گلبي من اللَّوعات اتفطر
من عظم مصابك ياحيدر
★★★★★
لوينحب دليلي وناح وأَتعَذَّب
فلا مثل الحسن وحسين من ينحب
ومثل نيران من عيني الدمع لوصب
گطره مايعادل من دمع زينب

لون الدنيا بعيني أتَغَيَّر
من عظم مصابك ياحيدر
★★★★★
مثل هذا المصاب بيوم مامرها
تنوح ام البنين ويهل ناظرها
سندها وراح ضل مكسور خاطرها
على فراگك حزينه من يصبرها

وهذا الكون ابكبره  اتحَيَّر
من عظم مصابك ياحيدر
★★★★★
ايام الشمل ماترد شيردها
زينب هلمدامع تحفر ابخدها
لمن رحل عن العين والدها
رِحْلَت أمها معناها ورحل جدها

بالدار اتگوم وتتعَثَّر
من عظم مصابك ياحيدر

الشاعر حسن لعيبي الحريشاوي

لاستشهاد أمير المؤمنين
علي عليه السلام

مومثل كل السنين.  اه ياعام اربعين
طاح حماي الحميه  ابطبرة الشر الخفيه
           اه ياعام اربعين
★★★★★
هذا ياراس انطبر    اليوم سالت يادمه
جناح جبريل انكسر   تمايلت بيه السمه
اتزلزلت أرض البريه  الدنياصارت مظلمه
ضجت املاك المعالي حايره ومتزاحمه

الكون بالظلمه انمله   الدين طاح باكمله  
              اه ياعام اربعين
★★★★★
يازمن گول شجرالك   أتهدم اركان الهدى
تنهي خير الدنيا رايد   وخيرها توه بده
وصرت ياعام المصايب  سيف وي سيف العده
وعاش مظلوم المماته.  ياعلي من مولده

خذت ماتدري شخذيت.  عام ياظالم اجيت
                 اه ياعام اربعين
★★★★★
ريت تقويمك الهجري  انشلت منه وما اجيت
انطيتنه انواع الماسي وكل شي من عدنه خذيت
السمه وافلاك تبچي    يلي مانحت وبجيت
زهره الدين وجماله  يلخذت منه ومشيت

اجروح وي مر الزمن    انكتبن وماينمحن
               اه ياعام  اربعين
★★★★★
شلون ياعام النوايب   من صرت وتكونت
بشهر رمضان فجعتنه   بهلخيانه اتعجلت
طاح تاج الدين سيفك.   مهجة الحق صوبت
ماگلت ظلت يتامه    لاگلت  وتعذرت

النوره نور من العرش  انشال ياحيف بنعش
                   اه ياعام اربعين

*
ليش  ياعام المنايا    امحظر اسيوف الخطر
مارحمت الكله رحمه   بليلة التاسع عشر
تعمدت تاخذ ولينه.     اه يابعد السفر
بالدمه تخضب جبينه.  براسه ابوحسين انطبر

النذر للخير روحه.        طعنة الغادر تلوحه
                   اه ياعام اربعين

الشاعر حسن لعيبي الحريشاوي