#Раддия
#Мақола
#Аудио

Намозлардан сўнг зикр-тасбеҳлар қачон айтилади?

Бисмиллаҳир роҳманир роҳийм!

Ҳанафий мазҳаб уламолари намоздан кейинги зикрларни фарз намозидан кейин келадиган суннат намозини ўқигандан сўнг адо этиш кераклигини айтишади. Бунга Оиша розияллоҳу анҳодан ривоят қилинган ушбу ҳадис далил бўлади:

وقالت عائشة: كان النبي صلى الله تعالى عليه وسلم إذا سلَّم لم يَقْعُدْ" بين الفريضة والنهوض إلى السُّنَّة بعدها. "إلا مِقْدَار ما يقول: اللهم أنت السلام، ومنك السلام"، "تبارَكْتَ يا ذا الجلال والإكرام"، ثم يشتغل بالسُّنَّة.

“Расулуллоҳ соллаллоҳу алайҳи васаллам намозга салом бериб, фарз намози билан суннат намозига туриш ўртасида доим:
اللَّهُمَّ أَنْتَ السَّلَامُ وَ مِنْكَ السَّلَامُ تَبَارَكْتَ يَا ذَا الجَلَالِ و الإكْرَامِ "

Аллоҳумма антас салаам ва минкас салаам табаарокта йаа залжалаали валикроом” дуоси миқдорича ўтириб, сўнг суннат намози билан машғул бўлар эдилар”.
(Имом Муслим, 592)

Ҳанафий мазҳаби уламолари фарз намозидан кейин зикрлар билан машғул бўлиш фақатгина фарздан кейин суннати бўлмаган аср ва бомдод намозларига тегишли дейдилар.
Буюк ҳанафий олим Ибн Обидийн роҳимаҳуллоҳ ўзларининг “Роддул муҳтор” асарларида бу хусусда шундай деганлар : “Намоздан кейин айтиладиган зикр-тасбеҳлар ҳақида келган ҳадиси шарифлар зикрларни суннат намозларидан олдин айтилишига далолат қилмайди, аксинча зикрларни суннат намозларни адо этиб бўлиб қилиш керак деб шарҳланади, чунки суннат намозлар фарз намозларга туташ бўлувчи, эргашувчи ва уларнинг тўлдирувчиси ҳисобланади ва унга (бошқа нафлларга ўҳшаб) бегона ҳисобланмайди. Шунинг учун бу (равотиб) суннатлардан кейин бажариладиган нарсаларнинг барчаси фарз намоздан кейин бажарилди деб айтилади”.
(Роддул-муҳтор 2ж/246 бет)
Шундан келиб чиқадики, ҳанафий мазҳабда фарз намозлардан сўнг суннат намози бўлмаса (бомдод, аср намозларида) зикрлар дарҳол айтилади. Агар (пешин, шом ва ҳуфтон намозларидагидек) фарз намозларидан кейин суннат намози бўлса, бу ҳолда зикрлар суннат намозидан кейин айтилади. Чунки фарздан алоҳида суннат намоз йўқ. Шундан келиб чиқадики, “намоздан сўнг” деган ибора фарз ва суннатдан кейинга далолат қилади.
Валлоҳу аълам биссавоб!

Кўкалдош ўрта махсу ислом билим юрти Матбуот котиби Рустам Охунжонов тайёрлади

@ahnafuz – diniy-ma'rifiy kanal!
📲 Rasmiy sahifalarimiz:
taplink.cc/ahnafuz