الإرادة الجبارة تحطم ما يراه العالم مستحيل ✌💖

مهما حصل ليك وإنت ماشي … إتذكر بس إنو إنت بتقدر 💜✨

#عهــــد_فتح الله 🔏

مرات لمن أقول لزول إتفائل بقول ليك كيف والواقع عكسي ؟ والمشكلة بكون بقولها بعدم مبالاة كدا زي بوصل ليك رسالة إنو إنت بتنفخ في قربة مقدودة!
لكن … واقع شنو الإنت بتتكلم عنو؟
واقعك؟ واقعك دا إنت خليتو كدا بالمناسبة وإنت المسؤول عنو فما تجي تقول الواقع! لو الواقع أصلا بمشي عكس دايما ما كان في زول ناجح …ما كان في زول شغال …ما كان في زول اتزوج …وما كانت حاجات كتيرة ... هل يا ترى الناس النجحت والاشتغلت واتزوجت وحياتهم ماشة في أمان الله عايشين في الخيال مثلا! ولا هم معاك في نفس الواقع؟
حتلاقيهم بشر زيك كدا عايشين في نفس الواقع ويمكن حتى تكون عندك صلة بيهم، لكن الفرق إنو ديل غيرو طريقة تفكيرهم في الواقع ... إستوعبوه بطريقة مختلفة ومميزة ، ف ليه انت ما تغير طريقة تفكيرك في الواقع وتفهمو صاح ؟

#الواقع ما هو الغلط ولا هو الي ماشي عكسك، بل طريقة تفكيرك في الواقع وتصورك ليهو هي الغلط وهي الماشة عكسك ...فما تكون عدو نفسك ..الواقع جميل لمن إنت تقرر تشوفو كدا، الواقع رائع لمن تدرك إنو هو كدا 💜

#غير إدراكك وخلي واقعك زي ما عايز تشوفو 💜

#عــهـــد_فتح الله

ما تقول أنا غبي فالشخص الذكي ما قاعد يقول لنفسو أنا ذكي! لا ...هو بس قاعد يفكر بنفس العقل العندك !

#فمن المخجل أنو تقول أنا غبي وإنت عندك عقل!

#عــهـــد_فتح الله 🔏

♻أسئلة المشاركين ♻

السلام عليكم،انا من كنت صغيره كنت من النوع البقرا اول باول وحتى كنت بحب القرايه لدرجه انو بعد مااخلص دروس اليوم ببدا في الدرس المااخدناه وكان لمن اجي للقرايه بجي بي نفس وحتى كراساتي بكتب فيها التاريخ والبسمله كل يوم علي كل صفحه وكنت من النوع البتكون يدو طول الحصه مرفوعه وبحب بجاوب لكن ده كلو اتغير تلقائي بعد سنه ثامنه اصلا انا من النوع الخواف من الامتحانات وبحس ماعندي ثقه في نفسي بمجرد ما احس انو الناس معتمده علي ومأمله فيني وخاصه اهلي واساتذتي كانو واثقين فيني بس انا كنت بحس انو هخزلهم .لمن جات امتحانات شهاده الاساس كانو الناس متوقعني اتزاع وانا زاتي كنت متوقعه اجيب درجه كبيره لانو في التجريبي جبت٢٧٥ وعلي حسب شغلي كنت شغاله احسن من التجريبي بي كتير بس اتفاجئت بالنتيجه ونقصت من التجريبي بي درجه ومن هنا بدت المشاكل دخلت الثانوي مع انو الناس اول يوم بتكون فرحانه بمدرسه الجديده لكن انا كنت يئسانه شديد وكئيبه وحسيت روحي انغلبت٣٦٠درجه بقيت مابقرا ولا بحب اشارك في الحصص نهائي يعني فرق تماما من زمان وكنت بلاحظ انو مابقيت بحب القرايه زي زمان وثقتي بنفسي بقت معدومه لابعد حدود بسبب خزلان ثامن يريت الحكايه وقفت لحدي هنا لانو لحدي نص ثانيه ثانوي كنت بجيب في التسعينات لكن بمجرد نهايه تانيه وحسيت بأجواء ثالثه واحنا قربنا خلاص مخي بقى رابط حادثه ثامنه بي ثالثه علي اساس انها امتحان شهاده زي ثامنه حتى السنه الاولى كنت بقول لي نفسي انو انا مهما قريت وتعبت فهتخزل زي ثامنه وهخزل اهلي وكنت بحاول انو اعمل روحي مابقرا عشان اهلي مايأملو فيني واجي اخزلهم زي ثامن وكنت خايفه شديد لدرجه انو مرات بحس روحي ماقادره احفظ من الرعب الفيني حتى لمن اماحنت ثالثه دخلت اللمتحانات وعندي كميه حاجات وابواب ماقاريها لمن جات النتيجه كنت عارفه اني ماقريت ومامتوقعه حاجه كبيره فجبت ٨٠فأهلي من درامات والخوف العملتو في ثالثه رفضو انو اعيد لكن انا اغلب الناس البعرفهم كانو عادوا بس انا الوحيده الكنت ماهعيد فجات وحده من بنات الجيران اقنعتني وقالت لي اناي كان ماقريتي السنه الاولى عيدي وانا عشان امون صادقه مع نفسي ماقريت نهائي والله فقررت اعيد فعدت وكنت حابه الحكايه في الاول وماشه كويس بس بي مجرد ما جات الامتحانات التجريبه خوفت و ابيت امتحن التجريبي لانو كنت خايفه انو يحصل زي٨وانقص من التجريبي مع انو كنت قاريه لمن قربت امتحانات الشهاده حسيت برضو انو انا هخزل اهلي وبقيت ضاغطه روحي في القرايه قبل الشهاده بيومين مرضت شديد وحصل نفس الحصل في ٨ مرضت قبل الامتحانات بشويه فهبطت معنوياتي وانا اصلا كنت لمن عدت كنت عارفه انو ماقريت بس ماحليت المشكله الماخلتني اقرا فعشان كده كان قرار الاعاده غلط مني فجبت٨٣يعني لو لنسبه الحاجات الماكنت قاريه السنه الاولى والسنه التانيه فرق كبير وحتى نسبه الشغل في الامتحانات كان فرق لكن النسبه الماكانت فرق وماعرفت الحاصل شنو لكن اول امتحان في الشهاده سنه الاعاده راجعت مع البنات لقيت روحي كنت بقرا اسئله غلط وحتى لمن كنت براجع داخل الامتحان كنت بلقى روحي كاتبه اجابه ماحقت السؤال يعني نادر من مااكتب الاجابه من اول مره صاح فانا ماعارفه الحصل معاي ده شنو ولي مخي ربط ٨ب٣للدرجه دي؟ لانو لحدي تانيه نسبي سمحه مجرد مادخلت ٣مستواي هبط فجأه وهل هي بجد فوبيا تكونت عندي من امتحانات الشهاده عموما؟لانو انا هسي دخلت الجامعه ولمن بجي بقرا بكون مرتاحه ما بنسبه الخوف الضغط بتاع٣ولاحتى هسي بشكك من ثقتي بنفسي كتير ولاعندي هاجس انو مهما قريت هتخزل زي ماتخزلت زمان فعليك الله لوعندك نفسير للحصل معاي وعايزه ثقتي بنفسي تقوى وما عارفه كيف

وعليكم السلام …💜

❄طيب يا صديقتنا ... الخوف شعور طبيعي جدا جدا وممكن يكون عند أي زول ببقى مشكلة متين لما يزيد عن حدو ويتحول لفوبيا من حاجة معينة ...

❄الخوف من الإمتحانات هو فعلا يتعلق بالثقة بالنفس ...
لما أكون واثقة من نفسي ومن قدراتي ما حأخاف من أي شي 😊
في حالة الامتحان البخلي ثقتي تنقص شنو؟ ؟
#يا إما أنا أصلا ما بقرا وما عندي هدف واضح أصلا 🙂

#يا إما أنا بقرا بس ما بقرا كويس يعني قراية عدي من وشك كدا 🙄

#أو شغالة بمبدأ التسويف ...كيف يعني بأجل أي شي حاقرا بعدين وبعدين تبقي بكرة وبكرة تبقي يوم الامتحان الصباح وتكتم فيني بقى 😷

#يا إما أنا بقرا وبقرا كويس بس بسمع للناس وبتأثر بكلامهم😶 👎


كل الحاجات دي👆 بتخليك ماعندك ثقة بنفسك 👎 ليه بقى؟
لو لاحظت ليها حتخلي حياتك مقلوبة حتخليك تساهري وما تنومي حتى أكلك ما حيكون متوازن حتخليك عايشة في ضغط رهيب ما تقدري تطلعي منو👎

❄لكن …

اتخيلي معاي كدا أنا ماشاء الله مذاكرة وكويس جدا وقبل الإمتحان بفترة كويسة يعني ومرتاحة وباكل كويس وبنوم كويس ومريحة جسمي ...إحساسك شنو؟ ؟
مش إحساس سمح كدا؟
#إحساس بالراحة 💜 ولا ما كدا ولو سألتك في اللحظة دي تجهيزاتك كيف حتقولي لي بكل ثقة الحمدلله تمام 😴

❄لمن دخلتي الجامعة كبرتي باعتبارك انو بقيتي أوعى من إنو تنهاري بفكرة امتحان ...ما أكتر يعني كلنا زمان كلنا نزعل ونشيل هم بس لو ما جينا من الخمس الأوائل بس كبرنا وعرفنا انو نخنا ما بنقرا عشان المراكز عشان نفسنا وعشان نفيد غيرنا وفي نفس الوقت دا ما يمنع اننا نكون متميزين ونجي من الأوائل 💜

#كسرة …💜

❄عشان تكوني واثقة من نفسك أعرفيها ..نظميها ...خليها مرتاحة 💜

❄لما تنزلي تقري أقري عشانك عشان تعرفي عشان تكوني متميزة ما عشان درجات إمتحان ...ولو طبقتي الفكرة دي حتشيلي حمل وضغط كبير من على نفسك 💜

❄قبل ما تنومي قولي أنا فلانة الفلانية مرتاحة والحمدلله و واثقة من نفسي جدا ومن قدراتها ، ونومي على كدا 💜


#عــهـــد_فتح الله 🔏

#معنى الثقة في النفس😌

🧤كي تستطيع تحسين موقف ما ، عليك أولا أن تفهمه
فمعرفة مدى تأثير تدني الثقة بالنفس عليك ، وادراك البواعث التي تسبب ذلك ، هي طريقة جيدة لتنطلق بها نحو بناء ثقتك بنفسك


الثقة هي🧣
الايمان بقدراتك وترجمة هذا الايمان في سلوكياتك وافعالك ، فتظهر للآخرين أفضل ما لديك 💜

#للقضاء على الملل وزيادة الثقة في النفس 🎗

🎯ضع تحديًا جديدًا أمام عينك يوميا وسخر كل طاقتك ومجهوداتك في العمل على تحقيق هذا الهدف والنجاح في هذا التحدي💪

✍سلوى عامر

♻أسئلة المشاركين ♻

اول حاجة عايزة اسالك كيف الزول يقرا حاجة من ينساها وتاني حاجة انا بكون عندي حاجات كتيييرة عايزة اقراها لكن بضيع الزمن واتكاسل لحدي بكرة م تجي ويكون نفس الشيء ويكون زعلانة من نفسي شديد وتاني اقول خلاص و الليلة بس لازم اقرا بمسك الشيت حقي بقرا صفحتين بس وبقفل ويمسك التلفون يعني زمني بضيع بس م قادرة اعمل لي جدول عشان اقدر اقسم زمني علي حاجاتي بلقي التلفون شايل كل زمني ويلا م بقدر اقفل التلفون لانو بترجم بيهو يلا عايزاك تساعدني

طيب يا صديقتنا… 💜

عندك تلات مشاكل تقريبا النسيان التسويف والحاجة المهمة وهي الزمن ⏰

❄لي بتنسي عشان بتقري بطريقة مملة 🙂 أقول ليك كيف؟ قاعدة تنسي غنية بتحبيها؟ لا لكن بتنسي معلومة مكتوبة في الشيت بالخط الأسود وبطريقة مملة 🙂
عارفة الأغنية بتتذكريها ليه لأنو الكلمات ما ساي فيها لحن في صوت انتي سامعاهو وفي صورة بترسميها في خيالك وانتي فاتحاها فشكلت عندك صورة كاملة ما ممكن تنسيها 💜

السؤال الحيكون في راسك طبعا هسي انا أعمل شنو ألحن الشيت مثلا؟ ؟

الإجابة ...لا ما تلحنيهو بس خنخليهو هو زاتو الاغنية البنحبها ... يعني غيري طريقة قرايتك ليهو جيبي أوراق ملونة أقلام ملونة أقري الكلام واتخيليهو واقري بصوت عشان تسمعي نفسك وتعالي لخصي ولو سجلتي الملخص في ريكورد وجيتي سمعتيتو تاني ما حتنسيهو أبدا 💜

❄التسويف .... حأقرا بقرا وبعدو وبعدو تبقى يوم الإمتحان الصباح !!

الحل شنو؟ إنك تكوني قدام الأمر الواقع الليلة حأقرا المادة كذا يعني حأقرا المادة كدا لو مهما حصل 👆 أعملي جدول لنفسك ... عشان تحاسبي نفسك ، أنا عملت كدا وما عملت كدا ولي ما عملت وهل السبب مقنع لازم تحاسبي نفسك قبل ما تتحاسبي 💜


❄الموبايل ...حبيب قلوب الملايين 🙂 صديقني ما براك معظم الطلبة يكون السبب في ضياع وقتهم هذا الشيء العجيب ☹ 📲 يلا تعملي شنو تتغدي بيتو قبل يتعشى بيك 🙃 وتستفيدو منو
يعني لو خليتو محور تلفونك القراية حيقى عادي ومع انو بياخد فترة بس حيبقى ...

❄طيب حددي نص ساعة مثلا ترجمي الكلمات العايزاها بسرعة ما تزيد من نص ساعة واقفلي التلفون وخليه بعيد منك والنص ساعة التانية ابدي اقري ما حتحتاجي التلفون تاني والمرة البعديها حاولي ترجمي في اقل من نص ساعة عشان تقللي استخدامك ليهو ...


#كسرة ....💜
❄شكرا على سؤالك أولا 💜...

❄حنتكلم لسى في مواضيعك دي لأنها مهمة شديد 💜

#عــهـــد_فتح الله 🔏

عايزة أحكي ليكم حاجة ... أنا وحدة من الناس كانت عندي نفس المشكلة ففي لحظة من اللحظات كنت مفكرة الموبايل عن واتساب ومسج و صور وأغاني وكدا يعني و طول الوقت زي الهبلة قاعدة وماسكة حبيبي الموبايل وبس دردشات وفيس وغيرو 😂💔 في فترة من الفترات كان قريت كتاب إدارة الأولويات … فاكتشفت انو بقضي نص وقتي بستخدم التلفون والحاجات الكنت بعملها بيهو مانت مصنفة في آخر ربعين التالت والرابع من الأشياء غير المهمة الطارئة وغيرالمهمة وغير الطارئة 🙂 فشنو حاجة كدا زي الصدمة 😂💔 كل حياتي طلعت عايشاها في غير المهم ☹👎 بالجد دا أنا مش عايشة يا جدعان 😂💔💔💔

#في الكتاب تصنيف الحاجات البنقضي فيها وقتنا مقسمة إلى أربع أرباع فشنو من اليوم داك قررت إنو لازم أستفيد من وقتي وأحصر نفسي في الربيعين الأول والتاني بس 👆

#المهم وهسي أنا مرتاحة جدا جدا و راضية عني و قاعدة أعمل حاجات مهمة 💜

#عــهـــد_فتح الله 🔏

♻أسئلة المشاركين ♻

انتي قلتي للبت ديك انو تقرا عشان نفسها ماعشان درجات امتحان
بس اذ انا كدا متملكني الاحساس ده جدا وخايفة وعاوزة اتخارج بس من السمستر ده واعدي ع خير. بجد وفي نفس الوقت كدا برضه عاوزة افرح نفسي بااني عملت شي حلو

كيف اتخلص من الحته ديا! انو مااقرا شان امتحان بس وخاصة الامتحانات فضل ليا اسبوعين

طيب يا صديقتنا …💜

أيوةة قلت ليها ما تقرا عشان إمتحان ... عشان الغاية الأساسية من التعليم المعرفة 😊

❄بنقرا عشان نتعلم عشان نعرف نعرف شنو ؟ نعرف نفسنا ونعرف حياتنا والحاجات الفي حياتنا أيا كانت ...


❄اتخيلي شخصيتين منك 👆 الاولي بتقرا الشيت وبتحفظو عشان الامتحان وعشان تجيب درجات وماشاء الله الأولى مافي زول فايتها 🙃

#والتانية بتقرا الشيت وبتحاول تفتش اكتر عن الموضوع البتقرا فيهو وبتبحث وكأنها مطلوب منها بحث ولمن تشوفيها تقولي اه دي ما عندها موضوع 🙂 وبتكون لاقتك عينة دي وبتمتحن برضو وبتنجح لكن ما الاولى 🙃

#لو انتي هسي حاليا عندك سؤال وعايزة تسألي وحدة فيهم حتسألي منو؟ ؟ ولو جيتي يوم المستشفى والاتنين دكتورات فيها حتمشي لمنو؟ ؟؟

#أنا عن نفسي حامشي للتانية 🙃 ،شوفي انتي بقى حتختاري مين 🤷‍♀


#كسرة. ... 💜

❄ببساطة جدا... أقري بحب وشغف…عشان تكوني مرتاحة ما تقري لمجرد انك ممتحنة وحتاخدي درجات فقط لا عشان تعرفي ربنا بقول لينا شنو: (وقل ربي زدني علما ) 💜

#عــهـــد_فتح الله 🔏

#مافي حاجة إسمها الطريقة المثالية للمذاكرة أو الحفظ أو الفهم 💁

#كلام خطير صح 😂

باختصار لأنو في العالم مافي مثالية فلما بتبحث عن المثالية إنت بتضيع وقت لأنك بتفتش عن شي أصلا مافي 🙃 والمثالية والكمال لله وحده طبعا …

#طيب حنستفيد شنو حاليا من الكلام دا؟
❄إصنع طريقتك الخاصة في أي شي …💜
❄ما قدرت تحفظ او تفهم ما قدرت فتش طريقة تانية تفهم بيها اكتشف اسلوب جديد للحفظ...

حاسي الكلام كبار كبار 😂؟

❄لا أبدا ما كبير ولا شي إنت تقدر تعمل أي شي وما في شي حيغلبك لأنو ربنا أداك من الإمكانيات ما يكفي إنو تسيطر على العالم بحالو ، فأكيد ما حيغلبك تيسيطر على قرايتك 💪💜

#عــهـــد_فتح الله 🔏

مساءُ الخير ، إنهض وبادر بالحياةِ فإنما كسر التعثر يبدأ بالنهوض✊⚡️

♻أسئلة المشاركين ♻

سلام عليكم
معليش حاطول ليكم في قصتي واحكي تفاصيل شخصية عني لانو عندها علاقة بمشكلتي فسامحوني❤

قصتي كاي شخص عادي كنت بحلم باني اكون طبيبة وجدا متمسكة بيو ولكن حصل غير كدا💔
المهم من اولى اساس وانا مستواي كويس جدا ماسكة الاولي والتانية في الدفعة لحدي سنة تامن وانا علي يقين باني حتزاع ولكن جبت 270ما فرحت نهائي بيها وحسيت اني خزلت اهلي ومدرستي الكانو منتظرني لكن دايما انا بحاول اكون انسانة متفائلة فقلت بعوضها واتحسن اكتر في الثانوي والحاجة الهونت علي الموضوع اكتر انو صحباتي الفي الاساس كانو معي في نفس مدرسة الثانوي وعدت اولى وتانية علي خير يعني بجيب كم وتسعين وماشة كويس
يلا في الاجازة من تانية لتالت دخلت كورس في مدرسة غير مدرستنا مع واحدة من صحباتي وباقي صحباتي ما كانو معانا المهم عجبتنا المدرسة وقلنا حنقرا فيها تالتة وخلينا مدرستنا القديمة وانا كان صعب علي اخلي صحباتي الباقيات لانو كان بشجعوني علي القراية مع بعض لكن نسبة لانو صحبتي دي مستواها زي قلت حننجز مع بعض اكتر وفعلا نزلنا المدرسة وكنا بنظم جدول قراية وماشين كويس وانا حلم الطبيبة لسة في بالي وحاسة انو قرب وحااحققو لانو ما حلمي براي حلم امي وابوي الاتوفي واخواني واخواتي الضحو بحاجات كتيرة عشاني
مرّ كم شهر وصحبتي الكانت معي اتعرفت علي بنات عايدات بنسب كبيرة وصاحبتهن وخلتني بقت ما بتحب تدرس معي وانا الحاجة دي اثرت فيني شديد وحسيت اني اتخذلت فيها فبقيت ما مركزة واهملت وبكره حاجة اسمها قراية وجا التجريبي وانا كنت بمثل انو عيانة لانو ما قارية حاجة وكل تفكيري كان في صحبتي دي والعملتو فيني وهي كانت مع صحباتها الجدد وبتذاكر معاهم وظهرت النتيجة ورسبت في معظم المواد وما كلمت ناس البيت كنت بقول ليهم ما ادونا الورق وكان قدامي زي شهر وحاجة ما قدرت اركز فيها بس حاجات بسيطة زي م بقولو لقطها معلومات وجبت 77
ودي كانت صدمة مميتة بالنسبة لي 😭😭😭😭وكل م اتذكر ناس بيتنا بتعذب اكتر
وصحباتي الفي المدرسة القديمة كلهم جابو نسب كويسة ودخلو تخصصات طبية من اول سنة فندمت جدا علي اني خليت مدرستي الاولي فققررت الاعادة في مدرسة تانية ومشيت كويس بداية السنة لكن ما صاحبتاوثقتي بنفسي قلت كتير وبقيت ما بشارك وبرضو تفكيري مشتت وبقارن نفسي بالناس المعي مجتهدين وااصراحة ما اجتهدت زيهم بس دايما بتذكر الحصل وانو انا صحبتي خذلتني ودايما كنت عايشة معركة مع نفسي وتقصيري و جبت 83💔
وزادت الخيبات خيبة وكرهي لنفسي زاد وانا لي اتغيرت سلبا كدا ولكن رغم كدا ما زال حلم الطبيبة جواي وانا مصرة فعدت للمرة التالتة
حاولت ابذل اقصي ما عندي لكن بقيت م بحب احتك بالناس كنت تقريبا وحيدة م عندي صحبة معينة بس علاقات زمالة وبشوف الناس بتتتناقش وبتسأل الاستاذة بس كان عندي خوف دايما وانا غبية وما زيهم وهم احسن مني وانا عايدة مرتين والناس دخلو الجامعات وخلوني وانا ندمانة علي تغيري لمدرستي وكنت دايما في حالة بكاء وزعل ونفسيات وانو خلاص بديت افقد الامل لكن كان عندي بصيص امل انو لسة ممكن ابقي طبيبة وحلمي لسة موجود فكنت بعمل جدوال مزاكرة واحل امتحانات واجتهد بباقي الحيل العندي وامتحنت وجبت89💔وخلاص كدا انا باقي الامل العندي اتلاشي وقنعت من كل شي💔 قدمت ولايات علي امل يشيلوني طب ولو في جامعة بعييدة عني وتم رفضي وما بقدر اقرا خاص قدمت شواغر وشالوني مختبرات في جامعة م بحبها والصراحة المختبرات دي كانت اآخر حاجة ممكن افكر اقراها انا بحبها نوعا ما لكن ما الحاجة الحلمت بيها. طول عمري
المهم نزلت بنفس مقفولة وماكنت بقرا واتراكمت المحاضرات علي وانا اصلا كنت م بركز اثناء المحاضرة ولما ارجع البيت ما قاعدة اراجعها وبشوف نفسي خلاص اصبحت غبية ومابفهم وكل الناس احسن مني وما صاحبت خالص لانو بعتبر ناس دفعتي كلهم اصغر مني واشطر وانا كبيرة واغبي منهم وبقيت وحيدة وما قادرة اكوّن صداقات وبخاف من كل شي بخاف يسألوني وما اعرف اجاوب عشان كدا ببعد منهم وامتحنت مدتيرم والبيبر بجمعا فاضية 😭💔
وكل مااشوف صحباتي الدخلو من اول سنة مجالات الطب والصيدلة ولما اشوف اي طبيب في مستشفي او تلفزيون او الشارع قلبي بوجعنيي وبتحسر وبتخيل لو انا كنت مكانوا وبتذكر اهلي الكاانو خاتين انو انا حاكون ليهم الطبيبة لكن رغم كدا بحاولو يخففو علي وانو دا كلو لخير
وطبعا هسي مع الاجازة دي م حصل فتحت شيت وقريت والجامعة قربت تفتح 💔😭😭انا م قادرة اصلا ابدا وماعارفة ابدا كيف وللان عندي شيتات ما مترجمة حالتي مستعصية بس 😭😭😭 انا ماعارفة هل براي كبرت الموضوع وهو م بستحق ماكان لازم اعمل كدا من اول سنة وكان لازم اتجاوز علما انو انا بتحسس من اي موقف حصل معي في حياتي ولو صغير وما بنساو بسهولة
بس لسة في حاجة جواي بتقول انت بتقدري ونفسي القديمة بتقول حتنجحي بس م عارفة كيف
ارجوووووك ساعديني محتاجة لزول ينصحني ويرشدني 😭😭?

وعليكم السلام يا صديقتنا 💜

❄اعرفي إنو النسبة الجبتيها والحتجيبها في أي إمتحان عمرها ما كانت قياس لقدارتك أو إمكانياتك بس هي بتقيس معلوماتك في لحظة معينة مقدرة بفترة زمنية اسمها الامتحانات 🙃 ...


❄حاجة حلوة إنك عايزة تخصص معين وسعيتو عشان تحققيه وعدتي كم مرة ...لكن برضو اذا ما حققتيه ما تلومي نفسك بل لومي تصرفاتك الغلط في الوقت داك واتعلمي منها في النهاية كدا إنتي حتمشي صاح 💜

❄مختبرات ... 💜 ع فكرة تخصص مختبرات طبية ما أقل من أي تخصص تاني 🙃 مع احترامي لكل التخصصات الطبية صيدلة طب بس انك قاري مختبرات برضو دكتور و دكتور متميز انت محور الحقل الطبي تقرير الدكتور معتمد عليك وتقرير الدكتور حيكون عليه روشتة حياخدها بني آدم فشنو مسؤولية كبيرة يعني مختبرات شي عظيم اذا عرفت معناها وقيمتها وقريتا بحب 💜 فشنو لما تفتح التلفزيون وتلقي طبيب او صيدلي ليه تزعلي إنتي برضو حتبقي دكتورة ولامة جزء كبير من الطب والصيدلة على عكسهم هم ما بقدرو يعرفو أي شي عن مختبرات 💜


❄ربنا لما يختار ليك حاجة اذا فيها خير ليك ولأهلك ولمحيطك العايشة فيهو مين عارف يمكن نسمع بيك في يوم ما أكبر طبية مختبر في السودان 💜


❄تخصص مختبرات طبية دي التخصص الوحيد الي لازم تقريه بحب وبمزاج وتكوني متقبلاهو بصدر رحب 🙃 شفتي نحنا ناس سمحين كيف 💁💜



#عــهـــد_فتح الله 🔏

السلام عليكم ورحمة الله وبركاته… 💜
أنا عهد زي ما وعدتكم إنو حنتكلم عن المذاكرة بالليل وكيف تكون صاحي ومصحصح كمان 😃

💡أول شي لازم تعرفوه إنو المذاكرة بالليل تعتبر قيام ليل ☺
عارف شنو يعني قيام ليل يعني عبادة عليها أجر 💞

ف كدفعة إيجابية كدا 😍👇

💭فكل ما يجيك احساس انو تعبت من انك تقوم بالليل والناس مرتاحة الا انت وكدا اتذكر إنو أنت بتعمل في عبادة حتؤجر عليها 💞


♻النقاط الي حنتكلم عنها دي مهمة شديد وبتأثر علينا بدون ما نشعر 😴👇

1⃣مكان المذاكرة 🏠📚

المكان الإنت بتذاكر فيهو لزم يكون مكان هادي 🔥(هدوءا معقولا 🌚 عشان ما تمشي تتحشر في حجر في البيت وتقول لي بذاكر 🙂) يعني يكون مكان فيهو حياة واصوات عشان ما تحس نفسك عايش في جزيرة أحلامك وتنوم 😅


💫💭


2⃣طريقة الجلوس 🤷‍♀🙇‍♀🤔

لما تجي تذاكر بالله أقعد قعدة محترمة قعدة تحسسك انو انت بتعمل في شي مهم 🙂
🚫فما تمشي تتكي على جمبتك ولا ترقد وترفع رجولك نظام مرتاح وبتاع 🤦‍♀ حتقرا 10دقايق وبعداك حألاقيك في الأحلام 🙂💔
💡ع الطاير كدا كلو وضعية جلوس عندها ردة فعل في عقلك هناك مجرد ما رقدت يعني خلاص نوم فشنو أعمل حسابك +انو كل طريقة تدفق ال blood فيها بختلف إنتبه 🔐❤

💫💭

3⃣القيلولة 😴🙊
طيب نحنا بنحاول نصحى البخلينا ناخد قيلولة شنو؟
🔕عشان عقلك يرتاح 💕
ومدتها ⏱ 20_30 دقيقة
أخدت بالك دقايق ⏱
🚫عشان ما تمشي تلحق أصحاب الكهف وتنوم سنين عددا 🙂

💫💭

#يتبع 💭💜

#عهــــد_فتح_اللّـہ̣̥ 🔏

ومواصلة للمذاكرة والليل 📚😊
كان اتكلمنا عن المكان وطريقة الجلوس والقيلولة …حنتكلم تاني عن تلاتة نقاط مهمة 💡

4⃣الأكل والشرب 😋
الأكل حلو و مافي زول ما بيحب ياكل بس لما تجي تقرأ وخاصة بالليل بالليل ما يصحى عندك أشعب الآكول وتفضي تلاجة بيتكم وماتخلي شي 🚫

✅أكل شيء. خفيف (ممكن يكون سلطة، كباية لبن ، كدا) دايما قبل المذاكرة ولما تتعشى خاصة عشان تقدر تصحصح لأنو لو مليت أمدرمان العندك دي صدقني حتنوم أول ما تقوم (طبعا دا لو قدرت تنوم أصلا) 🙂

🕊💫

5⃣الحركة وتغيير النشاط 🏃

وإنت بتقرا حاول تتحرك وتغير نشاطك 💡
🚫الحركة ما معناها تعمل أزٍعُاجً او تتحرك تطلع برا البيت 😅 لا يعني تكون قاعد قوم اقيف واحفظ اتحرك في مكان قرايتك ما تمشي بعيد كدا ☺

🚫تغيير النشاط مش يعني انت بتقرا تقوم تمشي تتفرج ع التلفزيون مثلا. لٱ 🙂 تغيير النشاط تكون بتحفظ شفوي كدا امسك القلم واكتب ارسم اعمل مخطط للحاجة الانت بتقرا فيها وكدا ☺

🕊💫

6⃣الإلتزام 😃

🚫لو إنت شخص أصلا ما ملتزم وماعندك هدف وما عارف انت جاي تقرا شنو ولا مفترض تخلص الساعة كم ارجع نوم احسن 🙂 ومافي داعي تساهر زاتو

اااي زي ما بقول ليك كدا 🙂💔
💡انت لازم يكون عندك هدف يخليك صاحي طول الوقت 🙂

💡عارف إنت صاحي في نص الليل تعمل شنو ؟

💡ملتزم من جوا نفسك إنو انت حتعمل كدا لو حرق الكوكب 🙂

💡عارف حتبدأ قراية الساعة كدا وحتخلص الساعة كدا⏱

والا امشي اتخمد ونوم 🙇‍♀

🕊💫

يتبع 💭💜

#عهــــد_فتح_اللّـہ̣̥ 🔏

قصص نجاح .... 😍♥👇
#قصص ناقلاها من مختلف المواقع كل مرة حأرسل ليكم قصة جديدة 💜💜

#عهــــد_فتح الله