انه ام البنين اجيت الحضرتك
انوي زيارتك جيتك يا حسين

انه ام البنين
ضحيت بولد
وكلبي منمرد
لجلك ياحسين

بس تدري العمر
مده وينتهي
كضيته بجي
وخلصني الصبر

من اول محطات السفر وياك عمري وياك خلصان
باول خطوه من الضعن نشتاك كومه اشواك وليان
يال عفت العليله بذمتي وتروح ثنين اجروح واحزان

تكلي يمه شو طوله ضعنه
طول والدي وانريده يمنه
لانشاد ينشد لا يدك باب
اشو ماكو ابد اخبار منه


ما منك خبر
يطمنلي الكلب
بس حالي صعب
مكضيتهة سهر

بنتك خلصت
ما تكدر بعد
أدور بالمهد
ويمه سولفت

كسرت خاطري يم المهد يمه وتشم هدمه وتندهك
ليش الوحدي مو بالضعن امشي تعب رمشي علارسمك
وتصيح يبويه ما خذتني شلون مرضي يهون يمك

يا حالي على بنتك جروحي
يا حالي على حالك يروحي
والله دوهنت محتاره وشلون
اسكت بيهة بس ما صبر نوحي


يوم من الهجر
لن صوت اعتله
ردت قافله
اركض وانهطر

ركض متلهفة
بنتك واركضت
عالباب انتجت
تباوع عال ملا

طحنه ثنينه عالكاع من الخوف جاي انشوف صح راجع
ادوهنة ييمه الضعن شو خلصان بلا وليان جن ضايع
واشوف اوجوهم متغيرات هواي حيل هواي  ومنازع

يمه السبي يمه يهد الكلوب
مخلصين الضعن يا يمه مسلوب
ادور بيهن وكوه اعرف وجوه
من رد الضعن يايمه متعوب


من رد الضعن
حزن فوك الحزن
يايمه وأون
خلصنه  الزمن

صح ردو هلي
بس ادوهنت
هوايه تحيرت
واندب يا علي

كون تشوف من دخلن العلويات متغيرات بعيوني
حد ما صيحت دلوني زينب وين زينب وين دلوني
العليه تصيح يمه جا اخويه وين ابويه وين ماجوني

يمه الضعن  رد وزاد بالنوح
تعبانين نحلانين وجروح
من الهزله والديوان والسوك
من حسين راح حسين مذبوح


ادورك يا حسين
واتفكد بعد
اصيح وماكو رد
وين حسيني وين

باسمك من صحت
لن زادو بجي
خلصان الحجي
انغشه عليه وطحت

الضعن ما بي هواشم من رجع خالي ولا غالي شفت الويل
اصيح حسين وين حسين شو ماجاي طال هواي هد الحيل
لن زينب تصيح وبكلب محروك صفه مسحوگ جوه الخيل

بس كلولي نمتو فوك التراب
والأطفال ماتت من المصاب
سوالف طف جبيره تهدل الحيل
سلبت كلشي مني والعمر شاب


سجاد الحيدري

ام البنين .. ام البنين

لو ردت تعرف شنو معنى الوفه
ام البنين .. ام البنين

قمة الايمان هية وعارفه
ام البنين .. ام البنين

مرت حيدر عدهة بالدنيا شعار
خادمة ال محمد بافتخار
وسجل التاريخ هية مشرفه
ام البنين .. ام البنين

صوب علي قراره ..باختياره.. حرمة من اشرف انساب
جاهبلهم الوفيه ..النقيه.. حبهة وسط الگلب ذاب
بيت النبوة دخلت ..ما توصت.. نعم منهة بنت الاطياب

ام البنين .. للإمامة صارت
ام البنين .. للشجاعة اختارت
ام الوفه .. لجل حيدر لبت
ام البنين .. بيهة كلهة احتارت
—————————
شكد شجاعة وعدهة معروف وقيم
ام البنين .. ام البنين
جابت اسباع وتوصيهم خدم
ام البنين .. ام البنين

اربع اولاد ونذر عدهة مبين
نذرت الاولاد خدام الحسين
اختارت العباس شيال العلم
ام البنين .. ام البنين

شكد عالمه وحكيمه ..الرحيمه.. خلصت لاجل الميامين
ولخاطر المشاعر ..عدهة خاطر.. حته لا تدمع العين
فاطم اسمهة لاكن ..بالاماكن.. تتسمه أم البنين

ام البنين .. جبرت شكم خاطر
ام البنين .. جابت شكم ناصر
ام الوفه .. تخدم بكل طاعه
ام البنين .. شاهد الهة العاشر
—————————
ربت الأولاد لجل التضحيات
ام البنين .. ام البنين

زينتهم بأجمل وأحلى صفات
ام البنين .. ام البنين

ما اعلمكم واعرف ولد اصول
الطاعه ثم الطاعه يايمه تگول
احنه ويه حسين نعلنها الثبات
ام البنين .. ام البنين

بالطاعه من توصف .. لو تعرف .. خدام احنه خدام
سلم وحرب تعلم .. لأمره تحتم .. هية ربتله الازلام
بالحب فلا تقارن .. حبه ساكن .. شهدت الهة الايام

ام البنين .. حبهة ما يتوصف
ام البنين .. هيج حبهة تعرف
ام الوفه .. جابت الوفايه
ام البنين .. بخدمته تتشرف
—————————
ربت اولاد أربعه لجل الحسين
ام البنين .. ام البنين

ثابتين الجأش لحسين ويقين
ام البنين .. ام البنين

نطيح گدامه اذا اشر بديه
يعيش بينه حسين واحنه نعيش بيه
وگالت احنه نموت حد قطع الوتين
ام البنين .. ام البنين

اي علمت ضناهة .. من رباهة .. بغيرتهة طفحت جبال
كلشي فده وتضحي .. كلشي تنطي .. جناهة حبهة لل آل
الهم يرف گلبهة .. هاذ حبهة .. ولحبهة جابت ابطال

ام البنين .. لجل حيدر فاحت
ام البنين .. تجازي بيهم رادت
ام الوفه .. اهم شي مرضاهم
ام البنين .. انطت وما باهت

سجاد الحيدري

كرامتاً ووفاءً الى التي ضحت باولادها
حباً بالحسين وقالت
لا تـدعـوّنـي ويـــك أم الـبـنين
تـذكّـريـنـي بــلـيـوث الـعـريـن
هم ليوث العرين
الذين استأنسوا دون الحسين
انهم بنين ام البنين
——————

حرب والتضحيه رسومه .. الحب والطاعة معلومه
وعد وانتضرو اليومه .. بنين ام البنين

بنين الاربعه وحبهم .. تحت ايدين سيدهم
الطاعة وهاذ واجبهم .. بنين ام البنين

عرگ هاشم طبع من حيدر يصب
الغيرة تجدح وكت الزماط الصعب
وكلمن يثبت قدم بالمعركة
نزل عبد الله الى سوح الحرب

ذلك علي الخير في الفعالِ
أنا ابن ذي النجدة والإفضالِ
سيف رسول الله ذو النكالِ
في كل يوم ظاهر الأهوالِ

وزمام الحرب بيده
شهم ويلوح البعيده
وبضهره اخو عباس
يصيد ياهو اليريده
—————————
العاشو للحسين امتاع .. بفزعتهم تميل الگاع
الحليب الغذه بيهم شاع .. بنين ام البنين

بنين وللضعن خيمة .. وفي صارو وسط هيمه
غيرة هاشم وشيمة .. بنين ام البنين

ماي صارو للضعن لمن ضمه
بالارواح افتدو لجل مخيمه
وبالحرب محد يخاف من العدو
برز جعفر سوه بيهم ملحمة

لما برز القا لهم اقوال
ابن علي الخير ذي النوال
اني أنا جعفر ذو المعالي
حسبي بعمي شرفا وخالي

فاتح بالحرب ساحه
وهبت بيهم ارياحه
ميهاب العده ومهيوب
يقاتل بيهم براحه
—————————
شكر الهة الذي ربت .. بنين الاربعه وتعبت
الدنيه بيهم انعجبت .. بنين ام البنين

جمال الخوه والغيره .. وصف مأمن تفاسيره
بين ذراعهم ديره .. بنين أم البنين

والأمان البيدهم چنة وطن
همة همة بكل زمان وكل محن
بالقاتل بكل عقيده لو برز
هاذ عثمان الامين المؤتمن

شيخي علي ذو الفعال الطاهر
اني انا عثمان ذو المفاخر
هذا حسين خيرة الأخيار
بعد الرسول والوصي الناصر

تفاخر بالحرب غانم
ويرتل بني هاشم
اي انه فداء حسين
لجل يبقه الضعن سالم
—————————
سور ودرع بالنخوه .. كفاله للضعن المروه
جمال ومنبع الخوه .. بنين ام البنين

نسل هاشم نسل ناصر .. طهر من طاهر الطاهر
وكلهم حضرو العاشر .. بنين ام البنين

بيوم عاشر حزمو لجله الهمم
لجل ضعن حسين تنضح هالشيم
طبع هاشم بالحرب ما ينوصف
وجان عباس الذي شايل علم

لا ارهب الموت اذا الموت رقا
ولا أخاف الشر يوم الملتقى
اني انا العباس اغدوا بالسقا
نفسي لسبط المصطفى الطهر وقا

نازل للحرب نازل
بضهرة رايته شايل
عباس ودخيل اسمه
حته بخزرته يقاتل

سجاد الحيدري

هونك يا صبر ولدي مذابيح

هونك يا صبر ما أحمل فراگ
شيخلص الليالي وگلبي مشتاگ
أيامي الأخيرة والنفس ضاگ
ما اشوفن بعد بعيوني الثنين

خل توگف الدنيا ويسكن الريح
اريد اندب وأون ولدي المذابيح
بس صوره بخيالي ودمعي تسبيح
وشفافي ترتل باسم الحسين

ولد ربيت وسهرت الليالي
راحو فدوه غالي بظهر غالي
فده لحسين بس هوة على بالي
فده كلشي يروح وتعب السنين

صوره من الطوف وبيهة الف نوح
بيمن ابتدي وهواي الجروح
تعب سنيني كله بكربلاء يروح
هاي الصوره صعبه وحارت العين

صرخه بكربلا وليها الگلب صاح
فرو من الخيم واليها من طاح
شالو روس أهلنه فوگ الرماح
واحتار الضعن بالمهرب منين

ما خلاني اشوف اضلم يعاشور
مو بس گلبي لا كاسرها الظهور
شكم غالي بترابه ينام منحور
مات حسين لا ناصر ولا معين

تصد عيني العطش لو حرگ الخيام
واطفال العطاشه حارت تنام
من شافو ابوهم شابع اسهام
ما عنده حضن دير الوجه وين

اه يا كربلا تگطعين الانفاس
تركض حرمة بيچ ادگ على الراس
وعطشان الضعن يصرخ يعباس
ابني وللضعن شمرهة الايدن

انه ام البنين يحزني الغياب
بزري وبعد بزري العيش ما طاب
سلاب الدهر بأولادي سلاب
سلب كلشي وتركلي بس الونين

أحزاني اليمة وگلبي مجروح
وسنيني كضت بدموع والنوح
اصرخ يا حسين لمطلع الروح
أنه البكاءَ انه أم البنين


سجاد الحيدري

يوم من ايام الفراگ
مغيمه المدينه وبيهة النفس ضاگ
من شال ضعن حسين سافر
وشايل حنينه والفقره تشتاگ

صوت اعتله بصوت النعاوي
ينعه بشر بلسان راوي

يا أهل يثرب لا مقام لكم بها
قتل الحسين فأدمعي مدرار
الجسم منه بكربلاء مضرجٌ
والرأس منه على القناة يدار

يا مقام اليبقه الكم يا مقام
حسين مات اقرو على الدنيا السلام
رد ضعن سيد الملائك والأنام
بس علي السجاد ضلنه امام

ضجت المدينه ازلام والنسوان من اخدورهم
ضجت المدينه من المصيبه خامشين وجوهم
ضجت المدينه وحرمه اجت رادت تشوف اعلومهم

طلعت من خدرهة تشوف
صوب الصوت تمشي بخوف
والوادم وراهة اطوف
تسمع رادت الاخبار

تشوف الناس كلهة تنوح
ياصوت الترسهة جروح
ومن تمشي وراهة تروح
تسئل شنهو صار ودار

وصلت وصاحت يا بشر
دامك محملك خبر
كونك بشير من الاسم
بشرني عن ضعني بسفر

يسئل بشر ياهية هايه
ونادت الناس ام الضحايه

بالله استعدي للبوچي يم البنين
ردو يتامى وانذبح عباس وحسين

يَـــم الـبـنـين الأربــعـه انـذبـحوا ظـمـايا
و ظـــلّـــوا ثـلـثـتـيّـام بــالـغـبـرا عـــرايــا
و ليتج نظرتي عْلَى النّهر صاحب الرّايه
مـفـضوخ راسـه مـقطّعه شـماله ولـيمين

ما جاي اسئلك عن البنين
يا بشر بشرني عن الحسين

يَــم الـبـنين الأربـعـه تـشـهد لـج الـنّاس
مـاصـار بـلْـيوث الـحـرايب مـثـل عـبّاس
خـلاّ الأرض روس وجـثث ومطهّمه داس
روس الأعــادي وغـلّـق الـمـيدان صـوبين

ما جاي اسئلك عن البنين
يا بشر بشرني عن الحسين

يَــــم الـبـنـيـن الأربــعــه مــحّـد دفـنـهـم
دمـهـم غـسـلهم والـتّـرب صـاير جـفنهم

ومـن الـصّبح زيـنب مـشَت لـلشّام عنهم
فــوق الـهـزل مــرّت وشـافـتهم مـطاعين

ما جاي اسئلك عن البنين
يا بشر بشرني عن الحسين

صوتك يبن حذلم هد ونيني
طيحلي گلبي ودمع عيني
كلما انشدك عن الحسين
تخبرني عن موتت بنيني

فدوه بنيني لو ضحايه
وبردلي گلبي بهالحچايه
حسين راجع للمدينه
ولتگلي مات وماكو رايه

يا موقف وكلش صعب
ومگطع نياط الگلب
من گلهة طايح عالترب
من فوگ مهرة منگلب
وحسين وحده بنص غرب
ما رد ابنهة من الحرب
دموعهة ضلت تصب
للدار ركضت للضعن
متلعثمه متيهة الدرب

رد الضعن ومحمل صواب
محمل دموع ونوح وعتاب
محروم من البچي على حسين
التمو سويه وسدو الباب

دكت الباب وفضه صاحت
ياهية انتي وهية ناحت
انه الشريچة بهاذ المصاب
فتحت الباب وهية طاحت

تبچي وتشخص من العيون
يا علي دخيلك ليش وشلون
تواسي بحزنه وتنشد منين
دلوني بيهة وينهة ام عون

صرخت ييمه زينب بحيل
زينب انه بس شايفه الويل
متغيره صح وحگچ بهاي
انه المشيت انهار والليل

ضل بالضعن بس علي السجاد
والينه يمه بگيد ينگاد
ذبحو زلمنه وبينه يسبون
وحدنه غربه وخوتي بعاد

تبچي وتسولف غصة ايام
من كربلاء والكوفه والشام
وشلون ماتو كل زلمهم
وضلت وحيده وي الايتام

من الحزن تنعه المدينه
يا دار هاشم يا انينه
ومعاشرين دموع العيون
لحسين ومصابه حزينه


سجاد الحيدري

شفنه كلشي موتانه
بالعطش محد روانه
لا اخو لا عدنه حامي
والعدو يركض ورانه

وال مصيبه العذبتنه
طول العباس شفنه
هيمة صارت واحنه صحنه
طاح اخونه وكلنه طحنه

صعبه صعبه يا ناس
تكيد ايدين ألعدهه الحسين
والعدهة عباس

صعبه صعبه يا ناس
بيت الامامه حركو خيامه
وبلايه حراس


هاذ يوم مخلي لجمه
بنص دليلي مخلي سهمه
بلا خيال وكله واقع
كل طفل مذبوح حلمه

يا عذاب الي جرعته
طاح اخوي بعيني شفته
والمصيبه من وصلته
مخضب ودم تجري شفته

نبجي نبجي ونياح
من ودعانه ودع امانه
كال الضعن راح

نبجي نبجي ونياح
وصه وصايه باجر سبايه
والروس بامراح


مو طبعنه علا النوايب
هسة ضكانهة المصايب
هاي اول مره صارت
بيتونه بنص خرايب

المن اشكي هالقضيه
ألكل هوت بالغاضريه
شكم عزيز علا الوطيه
وين اهلنة الهاشميه

شده شده يا حيف
نترجه بالناس وكلهم ارجاس
والهمره مو طيف

شده شده يا حيف
تحاوطنه عدوان ما عدنه خوان
كضاهم السيف


موقف ابالي مصيبه
تركض وتعثر غريبه
تكسر الخاطر اخيتي
هاي زينب يا عجيبه

زينب اختي مرمروهة
تلم بالعيال الولوهة
لو تروح تشوف اخوهة
وتالي ما تالي سبوهة

كلبي كلبي مفجوع
راووني موتي اولاد اخوتي
اجروح وادموع

كلبي كلبي مفجوع
عالصفه مبيوك بالخيل مسحوك
ومكسوره الضلوع


خلصانه الطف هلكنة
جابو الهزله انذهلنة
بيا بخت نمشي سبايه
وعدنه بس زينب أملنه

نمشي بس مشيت عليله
وهايه جانت مستحيله
ندخل السوك الرذيله
والتصد اختي العقيله

غربه غربه بالشام
سبايه كلنة خلص حلمنة
وعزنه ما دام

غربه غربه بالشام
ندخل الديوان ما عدنه وليان
يا ذيج الايام


سجاد الحيدري

يا زهراء أغيثينا

من مات حسين ماتت روحي
عاشرت ويا دمعي ونوحي
ضلت ذكراه نار بگلبي
من فگد حسين هاي جروحي

يا غربه البعيوني
لو عنهة سئلوني
يتيه الما شاف عيونه

عيون حسين الموطن
وعيوني ليه تحن
ضيعني الشام بدونه

حسين بعدك خويه تيتمنة
حسين هم ترجع خويه تلمنة
تعال ما رحمت بينه الدنيا
حسين بعدك خويه تغربنة
—————————
من صار وداع جانت صعبه
بيا وكت حسين يتيه دربه
من درت العين مو من گلبك
شفتك محتار بعينك غربه

بيدي مهره جبته
للموت تقدمه اخته
يا اخت تقدم غالي

زادت بيه جروحي
رادت تطلع روحي
من ردلي مهره خالي

حسين يا اقسه واصعب موقف
حسين من ردلي مهرك ينزف
جروح من ردلي وهدم حيلي
حسين عيالك بالغربه شتعرف
—————————
ما عنده خيام جنت الخيمه
وجوهة بنار يابو الشيمه
والحيره شلون نركض بالبر
ترابه ودخان انطر الهيمه

شكد دورنه بطفه
حسين وكلنه نعرفه
وكلنه ندور بالحومه

دورته ما عفته
شفته ينزف شفته
ياهو مخربله رسومه

حسين يا خويه شصاير بيك
حسين ليش هواي متعبيك
حرام ليش وساده من ارمال
حسين حر التربه يچويك
—————————
ريتك يحسين تشوف العمله
من جابو نوگ جابو هزله
سلبو كلشي سلبو ضعنك
صحنه يحسين ضعنك ردله

مرني الحادي بخوتي
ريت بصفهم موتي
من يمهم كل اوجاعي

مجتفيني بحبالي
اني وكل عيالي
من فوگ الناگه وداعي

حسين ضعنك غربه يگودونه
حسين صعبه بسوگ يمرونه
نروح كوفه وشام تأذينه
حسين خويه بخربه يخلونه
—————————
بعدك يحسين متْ الوحدي
محتاجه اخوان بس ما عندي
وبموتي شلون ياهو يشيع
ما عندي اخوان تنزل لحدي

ياهو الشيع نعشي
ياهو الخلفه يمشي
ياهو يوحد گدامه

كل ذكره تحز گلبي
ما دلتني بدربي
يا گلبي وذيج ايامه

حسين لحگتني الغربه بموتي
حسين ياهو اليحمل تابوتي
بعيد ريت بصفك دفنوني
حسين يا گلبي وروحي وقوتي

سيد سجاد الحيدري

مدد يا زينب

ان الله مع الصابرين مدد يا زينب
ذكر امير المؤمنين مدد يا زينب
هيه ناصرة الحسين مدد يا زينب

مدد يا زينب يا تسبيحة حيدر
مدد يا زينب حيدر بيچ تصور
ظاهر باطن ممسوسة انتي بذاته
مدد يا زينب يا انسية مظهر

يبنت القاهر أعداء الله وقوته
ردعتي الباطل وتنطقين بصوته
فتحتي الشام انتي بكلمة يا علي
ذو الفقار مرة ومرة انتي مروته

مدد يا زينب مدد يا زينب
—————————
كلشي باسمچ منطوي مدد يا زينب
ندبة بالشدة الي مدد يا زينب
اكفيني يا بت علي مدد يا زينب

مدد يا زينب يا سور الله ونوره
مدد يا زينب يا ترتيلة سوره
سيدةً النساء انتي يثاني الزهراء
مدد يا زينب تتجلى بكل صورة

دخلتي الديوان وهزيتي اركانه
خلستي يزيد واتباعه وديوانه
شهامة وعز وخفر وكفتي گبالهم
نصرتي حسين يالحليتي بعنوانه

مدد يا زينب مدد يا زينب
—————————
يا راية وباسم الولاء مدد يا زينب
باسمچ شهدت كربلاء مدد يا زينب
وبكربلاء يعلى نداء مدد يا زينب

مدد يا زينب يا عمة بني هاشم
مدد يا زينب يا فخر الله الدائم
وانه بذكرچ يا مولاتي أتروه
مدد يا زينب من طه للقائم

رئيسة ديوان تجليتي بقاده
حسن وحسين والعباس عم الساده
كسرتي اخشومهم ما دنكني الهامه
عيشتيهم صولة علي وامجاده

مدد يا زينب مدد يا زينب
—————————
ام الخدر وام الضعن مدد يا زينب
الضعن صرتيله وطن مدد يا زينب
تحملتي الام ومحن مدد يا زينب

مدد يا زينب يا غيرة ومروه
مدد يا زينب يا منبع للخوه
وصفهة الحيره و ما يفهمهة الفاهم
مدد يا زينب للضامي ويتروه

يضيغم حيدر من كربلاء الشامهم
لغز بعيونهم صارت رعب ايامهم
وابد ماطحتي چفچ چف الوالي
علي يشوفونچ لو صديتي گبالهم


سيد سجاد الحيدري

غضو البصر

خويه انهض راح اروح
فتح عيونك وصد الحالي
تسمع على الناگه انوح
وما اگدر انزل بديه حبالي
والله صعبه والجروح
گلبي هاضمته وتحز دلالي

ولية يا خويه ولونه والخيم حرگوهة
ما يغضون البصر نسوانكم شافوهة
قبل لا نعبر جثثكم گومو لو يسبوهة

فوگ الناگه انه وانته بنص عذابك
هزله بلايه هودج ومسلوبه ثيابك

اعبر والله صعبه سامحني بطلعتي
بدت يا خويه هسة غربتك وي غربتي
—————————
خويه ما غضو بصر
من طلعنه من الخيم بالهيمه
شكم طفل صاح بقهر
بابا صاحو وين وين الخيمه
لمصرعك ضعنك عبر
مالگالة مچان حار بضيمه

خويه شفناهة المذابح كل هلي وكل ناسك
دورينه جثه جثه ردنه شم انفاسك
شمس طلعت بالوطيه خويه رفعو راسك

بهالحالة لكيتك خويه شلون اعوفك
نزلني اداويك معذبتك طفوفك

لتحاچيني اني حاچي الحادي فدوه
يوگف ساعه وحده محتاجه الاخوه
—————————
خويه لوحلي بديك
فدوه طمن گلبي لتخليني
ادري حيل متعبيك
لكن بنومك تره تئذيني
والله ارد انزل واجيك
ارد أعيداً ذكريات سنيني

ذكرياتي رماد صارت نار شبو بيهة
گوم حرگوهة خيمنه گوم يا واليهة
بالفلة رگضت حريمك والجمر يچويهة

من حرگو خيمنه بالهيمة رگضنه
عذراً لاكن الصار صوط يطگ متنه

سلبو كلشي خويه وانه احمي بديه
سلبو حته القراط من بنتك رقيه
—————————
خويه سمعني كلام
ضاله بگلبي يخويه الحسره
خويه ما شفنه السلام
گلبي المكسور ياهو يجبره
انته والينه وامام
وانه ما اقبل تضل عل غبره

ادري صعبه وبلكي تگدر گوم هاذه مطلبي
شكد حچي خانگلي نفسي قبل لا يبدي السبي
تدري من الصوط خويه ذبت الوان العبي

ما بادي سبينه وحملنه المواجع
شيرجعكم النه شتفيد المدامع

غربه تلم ضعنه وهاي الصرخه ألنه
من يبدي سبينه يمكن موته كلنه


سجاد الحيدري

گلبي الليله مدري شبي
ذكرت أيام يابو ايام
غربه الدنيا بعد حسين
اه الشام اه الشام
مد جفه العطش بيه
واشمً ريح حرگ خيام
من دون الليالي اليوم
عيني ما تريد تنام

نسيت بروحي وين .. واللهف يا حسين
وبگلبي الجروح .. ما تغمضلي عين

مو ديرة علي ليش الغربه الي
الليله ارد اموت وينك يا ولي

الليله بگلبي وج جمر
جية خوتي انتضر
أتلفت منو اليجي
كل خطوة احس عمر

كامت خطوتي تخف
بهاي الشجره الي عرف
يمهة موتي ينتضر
وضعي الليله يختلف
—————————
ها يا موت اخيراً جيت
شگد عندي حچي مضموم
انه استضعفوني هواي
حمل گلبي بس هموم
هاي الغربه صعبه وياي
ابد ما ترحم المظلوم
چي خواني مو يمي
سبيه بشام حد اليوم

نعيد الذكريات .. گلبي والله مات
مل مني الصبر .. ومليت آلحياة

ابدي بيا مصاب .. وانهي بيا عذاب
عيشي بنص دلال .. موش بنص خراب

من دم أامي انهدر
وراس الوالد انطبر
والسم ماخذ الحسن
وكلشي بكربلا انحدر

اه يا كربلا الذبح
اه يا كربلا الرمح
جرحي بكربلا كبر
رشو عالجرح ملح
—————————
اه يا كربلاء وعاشور
منهن بية چم نيشان
طاحت كل زلمنه بگاع
وصار مراگض النسوان
حرگو خيمتي فوگاي
بالبر ما بقه صيوان
من شلنه على ظهر النوگ
صار موادع الخوان

ضليت انتظر .. وبگلبي الجمر
ما ردلي الحسين .. رد خالي المهر

ذبحولي اخوتي .. حرگو خيمتي
بر ومو امان .. ركضت عيلتي

من طاحو على الترب
وطاحت رأيه بالحرب
يعني الغربه والسبي
وجايو هزله للدرب

من شفته شكثر صحت
لتغمض الك اخت
ما بيه انزل واجي
فوگ الناگة ودعت
—————————
ها يا موت جروحي هواي
وكل خطوه بسبي ميتين
من الكوفه حد الشام
ما نكدر نغمض العين
مره بسوگ لو ديوان
صاحو هالغريبه مينين
هنا يا موت اخذ روحي
بهاي الشجره دم حسين

تعبنة السبي .. والحادي اجنبي
والتهضم بعد .. احنه ال النبي

تريد الغربه قوت .. ما ضل عندي صوت
لمصاب الحسين .. لليله ارد اموت

اخر دمعة الي بقت
جمرة حزني ما هدت
موتي بغربه ما ردت
شمعة حزني ما طفت

الليله الليله راحتي
الليله الليله موتتي
بيه اخر نفس بقه
مشتاگة احضن خوتي

سيد سجاد الحيدري