የ2017 ዓ.ም የማእከላት ጠቅላላ ጉባኤ በተሳካ ሀኔታ መጠናቀቁ ተገለጸ

ነሐሴ ፱/፳፻፲፯ ዓ.ም

በማኅበረ ቅዱሳን ወደ 50 የሚሆኑ ማእከላት የ2017 ዓ.ም ጠቅላላ ጉባኤያቸውን ማካሄዳቸው ተገልጿል።

በጠቅላላ ጉባኤያቸው ሊቃነ ዻዻሳት፣የየሀገረ ስብከታቸው የመምሪያ ኃላፊዎች፣ የየማእከላቱ አባላት፣ባለድርሻ አካላት፣የየወረዳ ማእከላት ተወካዮችና የአድባራት አስተዳዳሪዎች ፣ የሰንበት ትምህርት ቤቶችና የግቢ ጉባኤያት ተወካዮች ተገኝተዋል።

በማኅበረ ቅዱሳን ማእከላት አገልግሎት ማስተባበሪያ የሀገር ውስጥ ማእከላት ማስተባበሪያ ዋና ክፍል ኃላፊ ዲ/ን መንግሥት ሰጠው ጠቅላላ ጉባኤ ማኅበረ ቅዱሳን በተሰጠው መተዳደሪያ ደንብ መሠረት መንፈሳዊ አገልግሎቱን በአግባቡ ለማከናወን እንዲያስችለው በተለያየ ጊዜ በተለያየ ቦታ ከዋናው ማእከል ጀምሮ እስከ ግቢ ጉባኤያት ድረስ የሚደረግ ጉባኤ መሆኑን የገለጹ ሲሆን በዚህም ወደ 50 የሚጠጉ የሀገር ውስጥና የውጪ ማእከላት ዓመታዊ ጠቅላላ ጉባኤ ማከናወናቸውን ተናግረዋል።

ኃላፊው አክለውም በመርሐ ግብራቱ የየማእከላቱ የእንኳን ደህና መጣችሁ መልእክት፣ በዋናው ማእከል የተሠሩ ዋና ዋና ተግባራትና አጠቃላይ መልእክት፣ የየማእከላቱ የ2017 ዓ.ም የሥራ አፈጻጸም ፣ የፋይናንስ ፣ የኦዲት አገልግሎት ሪፖርቶች፣ የ2018 ዓ.ም ዕቅድ ቀርበውና ሐሳብ ተሰጥቶባቸው የማጽደቅና የተለያዩ የመወያያ አጀንዳዎች መነሳታቸውን ገልጸዋል።

በውጭ ማእከላት የሚገኙ ኦርቶዶክሳውያንን ቤተሰባዊ አቅም ማጠናከር እንደሚገባ ተገለጸ

ነሐሴ ፲፪/፳፻፲፯ ዓ.ም

የማኅበረ ቅዱሳን ሙያ፣ ማኅበራዊና ኢኮኖሚያዊ አገልግሎት በሥልታዊ ዕቅዱ ትኩረት አድርጎ ከሚሠራባቸው አገልግሎቶች መካከል መንፈሳዊ የምክክር አገልግሎት በመስጠት ኦርቶዶክሳዊ ቤተሰብን የሚያጠናክሩ ካህናትና ባለሙያዎችን አሠልጥኖ ማሰማራት አንዱ ነው።

በሀገር ውስጥ በልዩ ልዩ አህጉረ ስብከቶች ሥልጠና ሲሰጥ የቆየው አገልግሎት ክፍሉ በውጭ የሚገኙ ኦርቶዶክሳውያንንም የዕድሉ ተጠቃሚ ለማድረግ እየሠራ የሚገኝ ሲሆን በዚህም መሠረት በቅርብ ርቀት ከሚገኘው የኬኒያ ማእከል ጋር በመተባበር ለተመረጡ ካህናትና ባለሙያዎች በበይነ መረብ /ቨርችዋል/ የታገዘ የአሠልጣኞች ሥልጠና ተሰጥቷል፡፡

በሥልጠናው የምክክር አገልግሎትን በማጠናከር አርአያ ኦርቶዶክሳዊ ቤተሰብ ለመፍጠር የሚረዱ ክብረ ክህነትና አበ ነፍስ፣ መንፈሳዊ የምክክር አገልግሎት አሰጣጥ፣ ኦርቶዶክሳዊ ጋብቻና የልጆች አስተዳደግ፣ ሱስና አሁናዊ ተግዳሮቶች እንዲሁም ምጣኔ ሀብትና ማኅበራዊ ዕድገት ጉዳዮች ተዳሰውበታል፡፡

በመርሐ ግብሩ ከሃያ ስድስት በላይ ሠልጣኞች የተሳተፉ ሲሆን ሥልጠናው መንፈሳዊውን አስተምህሮ ከሳይንሳዊው ጋር በማስተሳሰር ዘመኑን በዋጀ መልኩ መሰጠቱ ውጤታማ እንደሚያደርጋቸው ተናግረዋል፡፡

ሠልጣኞች አክለውም በሥልጠናው ጥሩ ግንዛቤና ልምድ እንዳገኙበት ገልጸው በተለይ ኬኒያና አካባቢው በስደት ኑሯቸውን የሚመሩ ኢትዮጵያውያን መቆያ እንደመሆኑ በሁለንተናዊ አቅማቸው ጎልብተው ለሀገራቸውና ለቤተ ክርስቲያን ሚናቸውን ለመወጣት እንደሚያግዛቸው ተናግረዋል፡፡

የፍኖተ ትጉሃን ሰንበት ትምህርት ቤት ለ8ኛ ዙር ያስተማራቸውን 32 ተተኪ ሰባኪያነ ወንጌል ማስመረቁን አስታወቀ

ነሐሴ ፲፭/፳፻፲፯ ዓ.ም

የላፍቶ ደብረ ትጉሃን ቅዱስ ሚካኤል ቤተ ክርስቲያን የፍኖተ ትጉሃን ሰንበት ትምህርት ቤት ከደብሩ ሰበካ ጉባኤና ከማኅበረ ቅዱሳን ጋር በመተባበር ከደቡብ ኦሞና አሪ ዞኖች ሀገረ ስብከት የተውጣጡ 32 ተተኪ ሰባኪያነ ወንጌል በማስተማር ነሐሴ13 ቀን 2017 ዓ.ም ማስመረቁን አስታውቋል።

በምርቃት መርሐ ግብሩ መልአከ ፀሐይ ተስፋ ማርያም ነጋሽ የላፍቶ ደብረ ትጉሃን ቅዱስ ሚካኤል ቤተ ክርስቲያን አስተዳዳሪ ፣ ሊቀ ትጉሃን ቀሲስ ዶክተር ሙሉጌታ ስዩም የማኅበረ ቅዱሳን ሥራ አመራር ጉባኤ አባል፣ ርእሰ ደብር ተስፋ ደጀኔ የደብሩ የስብከተ ወንጌል ኃላፊ፣ አቶ የኋላሸት ሽፈራው የደብሩ የሰበካ ጉባኤ ምክትል ሊቀ መንበር፣ የማኅበረ ቅዱሳን ተወካዮች፣ የሰንበት ትምህርት ቤቱ ተወካዮች፣ ካህናትና ምእመናን ተገኝተዋል።

የፍኖተ ትጉሃን ሰንበት ትምህርት ቤት ዋና ጸሐፊ ዲያቆን ዳንኤል ደሳለኝ ከ2009 ዓ.ም ጀምሮ የማኅበረ ቅዱሳንን ጥናት መነሻ በማድረግ አገልግሎቱን ጀምረው እያከናወኑ መሆኑን በመግለጽ አጠቃላይ የተሠሩ ሥራዎችን ሪፖርት አድርገዋል።

ዲያቆን ዳንኤል ደሳለኝ አክለውም በዘንድሮው ዓመትም ለ8ኛ ዙር ያሠለጠኗቸውን ተመራቂ ደቀ መዛሙርት እንኳን ደስ አላችሁ በማለት መልእክት ያስተላለፉ ሲሆን አያይዘውም ሠልጣኞች ወደ አካባቢያቸው ሲመለሱ በተማሩት ትምህርት ወንጌል ባልተዳረሰባቸው አካባቢዎች በቋንቋቸው እንዲያስተምሩና የእግዚአብሔርን ልጅነት እንዲያገኙ ለማድረግ በኃላፊነት እንዲያገለግሉ አደራ ብለዋል።

አያይዘውም ዋና ጸሐፊው በሥልጠናው ለተሳተፉ ባለድርሻ ፣ አጋር አካላትና ምእመናንን አመስግነዋል።