قصیدة:زینب هاي
ـــــــــــــــــــــــــــــــــــــــــــــــــ
زیــنب صوت مـایـنمل
بیــها الــموت یتــمــثّل
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
زینــب هــاي.. یالتسأل
صحره أبماي.. تتـبــدّل للیگصدها

أخت حسین..والکافل
بحر الجــود ..متکامل تلگاه عدها

روح اسأل سواد اللیل..عنها و عن نجابتها
زینب تکــتب الــتاریخ..من تنـکت عبایتها

زینـــــب ثـار مـــولاها
والأیـــــثــــار معـــناها
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
صار الکون.. یتمـثّل
بیــها و راد..یتــعدّل من ممشاها

راس حسین..لمـجرّح
یوم أنــشال...بالمذبح ضل یقراها

آیـه و من ظـهر قـرآن...طلعت بالوصف کلها
وابراس الرمح سمعوه...راس حســین رتـلها

ایرتّـــل چــان أسم أخته
والـــقـــــــرآن ســالفـــته
أخت احسـین یالتـســأل وأخت العباس
ــــــــــــــــــــــــــــــــــــــــــــــ
مثل الـسیل...تتقـدّم
شبه السـیف...تتـکلّم لاگ اعلیها

صح بعزاز...مفجوعه
بس الدین...مشروعه یکمل بیها

ما ذلّــت أخـت عـــبــاس...خلّـت بالـزلم علّه
صاحت من مشت لضعون..لا هیـــهات للـذلّه

ضعن احسین بي زینب
صـوبه العــین ما تچهب
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
یا هو الــگال...مسبیّه
عدها أخوان...نشـمیّه هاي الحیره

کافي انگول...کافــلها
شـد أحــزام...محملها بسم الغیره

غیـره ابگـصة العــباس...من لاح الزعل بیها
خلّت مجلس أبن أزیاد.. تحت أقدام رجلیها

مثـل الـحــید والــــدها
کلـــها اتبـــید من عدها
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
للأجـــیـال...ثورتها
تصنع جیل..وگفتها ضد الظالم

زینب هاي...والعالَم
بیها أیحیر...کل آدَم لبوة هاشم

ما تخضع ربات الجود..ترکت موقف أشکبره
زینب بت علي الکـرار...وأمها فاطمه الزهـره

ضـل عالبـــال مـوقــفها
والأجـیــــــال تعــرفـها
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره

📜 القصيدة: رد الضعن
🎤 أداء: مسلم الوائلي
🖋 كلمات: عزيز الفيصلي
~~~~~~~
واويلي على زينب .. واويلي على زينب
~~~~~~
سمعت ام عباس من رد الضعن
للمدينه وبشر ابن حذلم علن
زينب بلا زلم ردت للوطن
وماكو رايه اعله الضعن منشوره
~~~~~~
الزلم فزعت روسها صوب العليل
والنسه لنسه جرت بالعويل
تركض وتوگع غدت ام الجفيل
الخبر جايد والدرب عاثوره
~~~~
اتگوم ام عباس بالركضه وتگع
اتصيح بسك يا بشر گلبي انگطع
بله گلي ياهو بزينب رجع
عگب ابو اليمه الشمس وبدوره
~~~~~
تركض وگامت تصيح ويه اليصيح
حسين يبني حسين يبني يا ذبيح
وين زينب بالخبر تحجي الصحيح
يمه يا بت فاطمه ماجوره
~~~~~~~
اتعدت ام عباس من زينب تره
وتنشد النسوان ياهي هالمره
يعني زينب هالكثر متغيره
وهيج من هذا السفر مكسوره
~~~~~
هيه عرفت روحها لأم البنين
اتگلها حگج يالعليه اتناشدين
اسبعطعش وگبال عيني مجزرين
وانه من بلد البلد ميسوره
~~~~~
ميسره ومذبوح گلبي من الجسد
وروسهم وياي من بلد البلد
وجفني من ليل الخرايب ما ركد
لو اداوي جروح لو ناطوره
~~~~~~~
انجان نشدج عن اخوتي الأربعه
هله ابدر صدرج الزاجي ومرضعه
لو اجفوف الگمر ماهي مگطعه
ما مشيت ويه العده مجبوره
°°°°°°°°°°°°°°°°°°°°°°°°°°°°°°°°

#قصائد 1446 هـ

ــــــــــــــــ❀○•○•○☆○•○•○❀ــــــــــــــــ

قصيدة : احجي وي روحي
الشاعر : وسام الشويلي
اداء :مسعود النصاري
أحجي ويه روحي .. بس لانسوني
⚡⚡⚡⚡⚡
قاعده إبدار المصيبه
و أحجي وي روحي
دمعتي إتسولف عليَّ
بالأمر توحي
يمكن أحبابي نسوني
زيدوا نوحي
ودعت من ودعتهم
بلسم إجروحي
ظل يقلي دمعي
ما ظن يجوني
⚡⚡⚡⚡⚡
ياقلب بس آنا وانت
النسمع عتابك
تدري بيه إشراح أجاوب
وأعرف اجوابك
أيس من الدنيه أيس
شالوا أحبابك
خله مقفول إعله حزنه
و لا تفك بابك
موتي يافرحتي .. من فارقوني
⚡⚡⚡⚡⚡
طفله مهضومه وعليله
و فاقده الوالي
هذا أول عمري هيجي
إشلون بالتالي
العمر مو غالي عليه
إبفرقت الغالي
يعني صار الموت هين
و أرحم الحالي
ريته اودعه عمري .. من ودعوني
⚡⚡⚡⚡⚡
شفت أبويه الودعاني
يهمل المدمع
آنا من عينه عرفته
بعد ما يرجع
رفع إيده و حجه قلبه
و آنا جنت أسمع
نظرة إعيونه تقلي
إبكربله المصرع
أدري من سفرهم .. لا ما يجوني
⚡⚡⚡⚡⚡
جنت أتمنه رقيه
لو تظل يمي
و الله فرقتها دهتني
نحلت جسمي
شو خذوها و ما خذوني
آه يا هضمي
ليش أحبابي جفوني
و زيدوا همي
حقي من أعاتب .. جيه ماخذوني
⚡⚡⚡⚡⚡
مهد عبدالله إبدمعتي
قمت ألولي له
هو يشكي لي فرقته
و آنا أشكي له
خايفه سهم المنيه
إيظل يباري له
خويه يا عبدالله إرجع
يمي لو ليله
عن قطع وريدك .. جن خبّروني
⚡⚡⚡⚡⚡
بالدمع ليلي سهرته
ما طبق رمشي
و بشرايني أحسّن
بس ألم يمشي
بيه إرحم يا زماني
يالخذت كل شي
جثه مطروحه بألمها
و أنتظر نعشي
ما ردت حياتي .. عقب الجفوني
⚡⚡⚡⚡⚡
أبعث إبدمعي رسايل
و أكتب إحساسي
ياهلي قلب اليحبكم
لحظه ما ناسي
صعبه فرقتكم عليَّ
و شيبّت راسي
خلص صبري و ريت تخلص
حته أنفاسي
وسفه يالحبايب .. خابت ظنوني
⚡⚡⚡⚡⚡
اللهم_عجل_لوليك_الفرج




🌹

شيخ الانصار
إبني دوله للشعائر
شيخ الانصار
يا حبيب ابن مظاهر
علم.. بيده عابس
علم ..للمجالس
...
العمر تاليته الاجل مهما العمر طال
وانت راح تظل درس تقراه الاجيال
ارجال توگف بالقتال
وللشعائر هم رجال
الله يخلق كل زمن لحسين ابطال

يخلق انصار
بالكره الارضيه كلها
يخلق انصار
واحسينا مستهلها
خدم كالنوارس
علم للمجالس
...
يا حبيب وشيبتك تبقه علامه
صاحب الشيبه تعلمه اعله الخدامه
يوگف بموكب يصيح
هله بزوار الذبيح
وذلة الخدمه يسميها كرامه
وبمحرم
انت توگف بالحرايب
وبمحرم
هم خدام المواكب
وفه بلا منافس
علم للمجالس
...
يا حبيب وجون شوفه اسود اللون
بعده راح يصير بالخدمه الف جون
الناس بعده تنتبه
خدمتي اتبيض الوجه
وانه احط خدي على خد اليخدمون

والخدمني
هذا اسمه صاحب الحظ
والخدمني
بالقيامه وجهه ابيض
درس للمدارس
علم بالمجالس
...
يا حبيب وعابس اتعرفه الملايين
اجنونه راح يسوي دوله للمجانين
جيل من هذا الجنون
للمجالس قادمون
ناس لطامه وعشگهم ينحسب دين

اعقل الناس
من تسجل عندي خادم
اعقل الناس
من تجنن بالمآتم
أنه اعليها حارس
علم للمجالس
...
يا حبيب وموقف الحُر يبقه مكتوب
بعده چم مذنب يجيني لبابي ويتوب
اليجي تايب من ذنب
من انصاري ينحسب
انه اسمي رحمة الله واوسع البوب
الماله محبوب
مْن آخر الدنيه اجيبه
الماله محبوب
اني يلگاني حبيبه
فعل مو هواجس
علم للمجالس
...
لو گضت انصاري بالطف تنوجد ناس
تنوح لمصابي تظل لآخر انفاس
شيعتي ليوم الظهور
تبچي لگطع النحور
عالصدر تلطم وتذكر صدري الانداس
عندي موعود
ياخذ بثاره السبيه
عندي موعود
ينصره اليبچي عليه
غداً تلگه فارس
علم للمجالس
...
خادم الحسين ( عليه السلام)
كرار حسين الكربلائي
( ابو كميل)

سيفك ورسمة حاجبك بالمعركه اخوان
هذا الجمال لمذهبك قدمته قربان
عظيمه صفاتك
حسيني بثباتك
تسلم يجسام
...
شهالوسامه شهالفخامه
انته جنه بخدها شامه
انته نسخه من القيامه
يا چبير البي تباهت كل عمامه

اگبالك جيش تضحك ليش ما احلاك موت ويضحك للموت

من تندار يصير انذار
واليدناك يرجع لهله بتابوت

ما تطب عقلي اتلتطعش عمرك يجسام
خبرتك چانت بالحرب خبرة الف عام
چبيره امنياتك
حسيني بثباتك
تسلم يا جسام
...
شهالمهابه الحيدريه
شهالقيافه العسكريه
رتبه عندك عالميه
من تمر القاده تاخذلك تحيه

يالتختار روس كبار
انت استاد ويمك صارو صناع

مرتبكين مختلين
حته الگاع شردت يم سابع گاع


يچوي الشمس حر كربله شبيهم يرجفون
مدة عمرهم خلُّصت لازم يموتون
يناذر حياتك
حسيني بثباتك
تسلم يجسام
...
انت مبدع بالشجاعه
الجيش امامك عمره ساعه
الطف يگلك عن قناعه
عالرگب خل سيفك يصلي جماعه

بعد الحيل شِد الحيل
واقلع روس يالجدك قالع باب

بيدك سيف مو أي سيف
بالميدان مختص بگطع ارگاب

بكربله عزرائيل اجه يتوسل وصاح
مولاي ما الحگ بعد اقبض بالارواح

الشجاعه اويه ذاتك
حسيني بثباتك
تسلم يا جسام
...
انت حمزه انت جعفر
انت عباس انت حيدر
انت جاسم انت الاكبر
ها هنا شفنه الحسن بالطف تكرر

قائد عام عالي الهام
يا جسام بالطف اسمك زلزال

گالب خيل فوگ الخيل
ذاك الجيش ساويته بشسع نعال

بالحرب شديت الشسع موقف يشوفوه
البجدامي گلتلهم اهم من هاي الوجوه
يعالي شعلاتك
حسيني بثباتك
تسلم يا جسام
...
الهواشم كلها قاده
الله خصهم بالسياده
من الولاده للشهاده
الكم لوحدكم تلوگ القياده

اهل البيت اعظم بيت
الله يگول محد بيكم ينقاس

يا مولاي عالي هواي
ما تنلاح رايه بچف العباس

من شافك حسين انحنه وظل ينحب عليك
عريس وبإيدك دمه
مو حنه بيديك

تعيش بمماتك
حسيني بثباتك
...
خادم الحسين ( عليه السلام)
كرار حسين الكربلائي
( ابو كميل )

ان تنكروني يصيح الزمن
انت الحسيني وابن الحسن
تمشي الغيره بدمي
انه الكافل عمي
وابن الحسن
...
من اول نفس وآني
گلبي لكربله يتاني
نبضي كربلائي

بالطف موعد احلامي
وهنا تبدي ايامي
ويتخلد بقائي

يبدي من الحسن عمري وللحسين النهايه
باچر تنقره حروفي بقرائين الولايه
من ينزف ضوه دمي يدگ للغيره ثايه

تبدي المواقف من كربله
بعمري هواها ما ابدله
والطف يحچي بإسمي
انه الكافل عمي
وابن الحسن
...
شاب بكربله مغرم
عمري بلا حسين اظلم
شمس العالم حسين

لو ينطوني الف جنه
ما بدل ظفر منه
هو الدنيه والدين

هو العنده مثل حسيني شيخلي بمكانه
اليگضي سنينه يم بيبانه سلطان بزمانه
ابوي الثاني ابو اليمه الترس عمري بحنانه

عشت بسمائه مثل النجم
ما خله روحي تحس باليتم
بعيون حسين اسمي
انه الكافل عمي
وابن الحسن
...
مراقب موعد جروحي
شايل كربله بروحي
واگف بين الخيام

من سيفي الحرب ترجف
من گبره الحسن يهتف
عفيه وليدي جسام

يوم الطف اقاتل عن ابويه بالنيابه
يدورون الهوه ابن الحسن لو شد نگابه
من ازعل تره سيفي ايتزاعل وي گرابه

هاشم حربها مضرب مثل
للحومه تگلب وكت الزعل
منهو اليگرب يمي
انه الكافل عمي
وابن الحسن
...
هاجت بيه عاطفتي
ثار الاكبر بذمتي
ومربع اجيبه

صولاتي بالف خيبر
عمري اتلطعش عسكر
كل عام بكتيبه

عسكرها وتراب الطف اذريهم سويه
والسبعين الف كلهم اغربلهم بديه
من گبل المنيه اليوم اراويها المنيه

يوصل نداها لسابع سمه
لمن انادي يا فاطمه
اكشف همها وهمي
انه الكافل عمي
وابن الحسن
...
ساعة موتي من تدنه
زفة عرسي بالجنه
ما اخسر شبابي

امي خل تودعني
بدمعتها تشيعني
وتتحنه بخضابي

چانت امنية رمله بديها تزف ابنها
تبدي رحلة غيابي ولا يخلص حزنها
امي الغاليه تبقه مدامعها بجفنها

والدتي عنها تغيب الشمس
وتبچي لمصابي بيوم العرس
تنزل دمعة امي
انه الكافل عمي
وابن الحسن
...
خادم الحسين ( عليه السلام)
كرار حسين الكربلائي
( ابو كميل )

يبن عم العباس والافعال معروفه
الك يوم بصفين الك يوم بالكوفه
رسول الله يحب والدك حبين
لأن من صلبه انته وتنصر حسين
يمسلم يمسلم
...
افعالك تحلالك
مسلم تقبل الله اعمالك

يا مخلص للمخلص
اسمك ثقه عند حسين هنيالك

انت معلم الكون قانون الامانه
منك عرفت الناس مو حلوه الخيانه
العايف درب الحسين ما يندل مكانه
الما عرّگ ظهر خيل ليگول انه وانه

بطل عمرك خمسين والف شاب مو مثلك
وحّدك بس الجيش يبوسون برجلك
ابو طالب يگلك كفو ونعمين
لأن من صلبه انته وتنصر حسين
يمسلم يمسلم
...
يا مُلهم كل مسلم
يالعندك الدين حسين يا مسلم

يا داعي لكل واعي
جيل المشه بدربك جيل متقدم

اسمك ينعرب چان مفهوم الرجوله
حيدر صوغه منطيك سيف من الطفوله
خطواتك عله الگاع كتبت هالمقوله
اللازم ظهره الحسين خل يمشي اعله طوله

بالسمه مو بالگاع يكتبون امجادك
انت خيال الخيل علي چان استادك
عقيل اتباهه بسمك بالميادين
لأن من صلبه انته وتنصر حسين
يمسلم يمسلم
...
طب ليها وافنيها
الوادم لهلها بلا روس وديها

اجه عيدك هز ايدك
اضحك يمسلم والگوم بچيها

روس القاده الكبار راويها المنيه
خليهم يختلون كل عشره بزويه
اخزر اول الجيش ما تلگه البقيه
ما تخطي الرگب دوم ضربه حيدريه

يا سفير التاريخ علي وياك شد حيلك
انصر ابن الزهراء والزهراء تدعيلك
يسولف مضر عنك بالدواوين
لأن من صلبه انت وتنصر حسين
يمسلم يمسلم
...
اتصور هالمنظر
بالكوفه عباس وياك اتصور

ثنيناتكم بيناتكم
حته الهوه يصير هناك لونه احمر

مسلم طبتك موت محد يرفع ايده
وصوت الكافل يصيح هله يا بو حميده
وانت تحاچي عباس شد يبن الصميده
خل يفرح علي اليوم سوينه اليريده

مسلم وبيدك سيف يلاگيك يا عاقل
الكوفه تشرد للشام اذا صال ابو فاضل
نبي آدم ويشكر ربه مرتين
لأن من صلبه انت وتنصر حسين
يمسلم يمسلم
...
انحچه عنك كفو منك بالكوفه قائد قوات علي چنك

وبموتك عله صوتك
چذب الرسايل يحسين رد ضعنك

بحجار وبالسهام يرموك بجهلهم
محد شربك ماي وانت الغيمه الهم
مسلم وانت مجتوف شمروك من قصرهم
انت المبتدأ ليش جروك بحبلهم

ما متت والعقول بقت بيك محتاره
ما يموت الحسين ولـَ تموت انصاره

سجد عمر العُله وصله ركعتين
لأن من صلبه انت وتنصر حسين
يمسلم يمسلم
...
خادم الحسين ( عليه السلام)
كرار حسين الكربلائي
( ابو كميل )

يا دنيه عاشور الظهر ظهري انكسر مرتين
مره اعله طيحة كافلي مره اعله اخوي حسين
واحد جفوفه مكطعه
واحد ذبيح بمصرعه
يدنيه
...
انه زينب چنت زينب
هسه مو زينب بعد توديع اخوتي
الدنيه ضدي وانه وحدي
ريتهم عدلين ويسمعون صوتي

الماعدها اهل بالطف يسلبوها
چبيره السالفه زينب يشتموها

شگد صعبه امي فاطمه واعثر اكبال الناس
وشامت يسمعني حچي ما يرجع العباس

وبكربله حيلي انهدم
ماهو شيال العلم
يدنيه
...
گمر عدنان بالخيم چان
وچانت بخير الحياة وهو موجود

آخ يالماي بچه عيناي
اخذ مني اخو ورايه وجود وزنود

چنت بعين اخوي وسهم صاب العين
وطاح اعله الشريعه مگطع الجفين

وانهدم عامود الخيم بالعمد من صابوه
چف اليعدل محملي فوگ النهر گطعوه

لمن وگع راعي اللوه
بيتي على راسي هوه
يدنيه
...
رد الحسين بدمعة العين
وصاح يا زينب يخيتي راح اخونه

كافلج راح عالنهر طاح
راح ابو فاضل البي ريحة ابونه

تره الفاگد اخو ما ينجير كسره
يظل للموت يبچي ومنحني ظهره

ما يرجع الراح وبعد وحدي بغرب ظليت
اسمع ضحكهم عالنهر عالنهر من ونيت

من وگع سبع الگنطره
صف مِن اضلوعي كسره
يدنيه
...
موقف جروح يشعب الروح
حسين اخذ طفله وطلع يروي اوليده
صاح بحزان طفلي عطشان
وحرمله صابه وذبح
عبد الله بيده

رخيص الماي ما قبلو يشربونه
طفل وبعمر ست اشهر يذبحونه

عاينت اخوي لوحده وسبعين الف عدو
انصاره يمه مذبحه وما ظل ولا اخو

كل ساعه كل لحظه جرح
حته رضيعه ينذبح
يدنيه
...
راح الحسين آه يحسين
ساعه لن شفت المهر خالي يردلي
سرجه مگلوب
وجهه مخضوب
گتله يالميمون وينه حسين گلي

‎دم  يـا  هـالميمون.. وجهك خضابه.. والگلب عطب
‎مـن وريـد حـسين.. لومني صوابه.. وجهك تخضب
‎گلـهـا سـهـم البين.. بالگلب صابه.. شمالج يزينب
‎دم أخـوج حـسـيـن.. مـا تعرفينه...راح من إدينه
اركض رحتله والشمر فوگ الصدر گعد
حز منحره من الگفه وراسه برمح صعد

خلاني وكتي بغربتي
راح الخدر ويه اخوتي
يدنيه
...
خادم الحسين ( عليه السلام)
كرار حسين الكربلائي
( ابو كميل )

يا قصر واجبك تنحني يمي
هاشمي فاطمي حيدري دمي
سجل بدفترك موقفي و اسمي
يا قصر
...
قصر الظالم لا بد يوگع وانه العايش
وانت الميت
احنه الساده اهل الغيره نحچي وكلشي لازم يسكت
احنه الكلمه الما تتبدل لمن نزعل فنه اليثبت
هاي الدنيه وكل البيها بينه تسولف بينه تصيت

ما اذل بالحرب هاشمي اصلي
وبيرغي بالسمه غالي مثل اهلي
وگفتك هييتك عالارض مثلي
يا قصر
...
كل بنيانك كل جيوشك وانت وعرشك ذره اگبالي
جيت بهمة حيدر عمي غالي ومرسل من الغالي
فت بزودي وما گدرولي وكل قادتهم ما تدنالي
من جابوني بقصر العالي يدري العالي يحب العالي

بصعدتي عالقصر هزت اركانه
بصعدتي جان اكو غيمه عطشانه
گالت لمنحري ارويني مولانه
يا قصر
...
هاي الديره الما نصرتني باجر لازم تدفع ديه
يوگع جسمي وتوگف رايه تسولف صوتي وكل ماضيه
انه القمه الفوگ القمه ابقه هوايه وهمه شويه
حسين الخيمه الزهرائيه الكل الدنيه تلوذ بفيه

يا قصر مو قصر تنحسب هيمه
والحسين كل وكت للبشر خيمه
بذمتك دمعته وحسرته وضيمه
يا قصر
...
شفت حچايه تدور بگلبك رايد تسأل عن دموعي
لا تتوقع خفت بموتي ظنك اكبر من مشروعي
دمعة عيني لجل حسيني حسين الكاسر كل ضلوعي
جايب اهله وكل اصحابه واعليه ذبلن كل شموعي

عائلة فاطمه جايه للكوفه
لهالسبب يا قصر روحي ملهوفه
منذبح منحري ويحچي بحروفه
يا قصر
...
عندي اوصيه ولا تنساها يالما سامع هيچ اوصيه
لمن تسمع ذبح حسيني هنا نسوانه تمر مسبيه
ابابك يوگف ضعن العصمه وبين اضعونه عندي بنيه
گلها يسلم عودج مسلم وصل صوتي بكل حنيه

يا قصر فاجعه ونايبه كبره
يا قصر تنسبي زينب الكبره
يا قصر ارحم ابضعة الزهره
يا قصر
...
خادم الحسين ( عليه السلام)
كرار حسين الكربلائي
( ابو كميل )

كسرو ضلوعك ورفضت الانكسار
واقره بدموعك رسايل انتظار
عايش الطف مشاعر
عندي ثار المناحر
رسايل انتظار
...
أيا جدي أَنه المهدي عشت ايامي اندب واحسيناه
بظهر عاشر چنت حاير
العشيره قدمتها قربه لله
الأخو الوفّه انگطع چفه
انحنه الطف اعله كلمة وا أُخياه

بجيشك كسر بان من طيحة الكافل
ومنطيها قربان چفين ابو فاضل
يا جدي لله گلب ألم شايل

رايته الطاحت تسمت رايتي
آخذ بثاره امانه بذمتي
يمك بدمعي حاضر
عندي ثار المناحر
رسايل انتظار
...
رسم وكتي بمخيلتي
طفل ست اشهر وگطعو وريده
الدمع صله اعله عبد الله
السهم لاحه وشُبَگ منحرك بيده
بظهر محني صحت يبني
جمالك للعرش ربك يريده

يا دم رضيعك ظل ساكن بعيني
وكلما ازورك نحره يبچيني
طفلك المذبوح شيّب الي اسنيني

يا گلب يصبُر ويكف من النياح
طفل ست اشهر صعد راسه برماح
وامه مكسوره خاطر
عندي ثار المناحر
رسايل انتظار
...
طلعتلهم تقاتلهم
غريب استوحدوك وكلشي ضدك
يبو اليمه تظل قِمه
السهم عطشان اجه وروّيته چبدك
الرمل شفته خِجَل وانته
طحت لجل الرمال تبوس خدك

دين الله عريان وبس انته غطيته
رادو تطخ راس وبرمح عليته
سلابك يريد محبسك وانطيته

عالم احساسك خلق معنه الامان
ومن اعتله راسك عِله صوت الاذان
يوم تبلى السرائر
عندي ثار المناحر
رسايل انتظار
...
بمحرمنه مخيمنه
احترگ فوگ الحريم وفوگ الايتام
گلب زينب حچه اويه الرب
تِقَبّل يا إلـٰهي هاي الخيام
مصايبها تشيبها
مَرَه ومتانيتها غربة الشام

بت فاطمه اشلون مشوها مسبيه
ويا ذيچ المتون من السوط مدميه
هاي اخت عباس خلوها محنيه

صعبه عالساده الحرم مچتوفه ايد
والاشد منها تطب مجلس يزيد
وحگ دمع الحراير
عندي ثار المناحر
رسايل انتظار
...
موالينه محبينه
مجانين الوفه امربيها عابس
يتانوني يريدوني
اجيهم حته يخضر كلشي يابس
ولائيه حسينيه
أَنه أنصاري اصحاب المجالس

بساعة ظهوري انصاري لطامه
لو اگبل الموت يمشون گدامه
بكل الميادين ما تنزل الهامه

زلم وتنادي الك فدوه العمر
ذوله ويلادي اليلطمون الصدر

بزود اهل الشعائر
عندي ثار المناحر
رسايل انتظار
...
خادم الحسين ( عليه السلام)
كرار حسين الكربلائي
( ابو كميل )

يا هله بزعل الساده
رجّف گلوب القاده
الكوفه ذلها وكل اهلها دخلت بإنذار

يا علي هذا وليدك
بالحرب ترباة ايدك
هو واحد مثله قائد بالزمن ما صار
...
رسالة شجاعه بسيفه
مدار الحروب بكيفه
توكل يداعي بحيفه صال وجال

يسمونه قائد ملهم
معاجز ملاحم يرسم
تجهّز عليهم مسلم
راد رجال

ركب مهره والجيش ارتد من رهبة خطواته
بعدهي الحرب ما قامت شردو من خزراته
كفو ونعم خلفة هاشم من ينكر صولاته

من بدت اول حمله
من الزلم ظلت قِله
يا علامه من القيامه الگابلك للنار

اليوصل حدودك فنه
اسمك نسولف عنه
هو واحد مثله قائد بالزمن ما صار
...
الزعل سيد وطگ عرجه
بكتايبها صارت ضجه
اجته الزلم تترجه
ومنه تخاف

نزل وارتبك قائدهم
اخذهم ركض ويردهم
ضوه ولو يمر من عدهم
ما ينشاف

تِوسط بنص العسكر
عالي ومحد لاحه
التسمه سبع بالحومه شفنا ذب اسلاحه
لذبحهم رگب مدوها والموت الهم راحه

بصارمه طشها ولمها
وغرگت الكوفه بدمها
كله هِمه اليدنه يمه راسه تلگا طار

خَلّه بالعسكر خِله
ذلها ما شاف الذله
هو واحد مثله قائد بالزمن ما صار
...
كتب للمفاخر قصه
ولاها وتدور فرصه
العله راسه راسه يگصه
وحيهم صاح

فريضه وعليهم يفرض
الگلب بالمراجل ينبض
يحي الله مسلم يقبض بالارواح

الالف عالالف يشمرها بالموته انحط ساتر
الارض كلها گامت تدعي يا حافظ يا ساتر
بمهرته الكتايب طرها وظل يسحگها الحافر

يرعب الجيش بظِله
ودنگت باست رجله
يالتوافي تگله كافي بداعة الكرار
لساعة الموت اتّاني
مثله ما شافو ثاني
هو واحد مثله قائد بالزمن ما صار
...
بجهنم حلف يحرگها
يشيل الزلم ويدگها
مدد تطلب ومن حگها
هز الكون

بجهات اربعه من يقاتل
غضب عالعساكر نازل
صديقه بزغر ابو فاضل
شيسوون

يگلهم اليوم امحيكم بسم الكافل ناده
الوحي صرخ يهل الكوفه منهو مزعل الساده
تره يغث عترة حيدر ما يغفه اعله وساده

يحچي والعسكر ساكت
ترجف ومحد ثابت
كلها تجفل كلها تختل عينه من تندار

المنه يشرد باعجوبه
كلها گالتله التوبه
هو واحد مثله قائد بالزمن ما صار
...
حسيني لأخير سنينه
يبيع الحياة لدينه
وابد ما يبيع حسينه لا والله

بشر من قصرهم اعله
رفض كل طقوس الذله
بمعاني الرجوله اتجله
يا محلاه

لقصرهم يدوس برجله لكل العالم يوحي
السفير لأخير انفاسه گال حسين بروحي
حياته اهم من عمري لا ما هِم وجروحي

عالي لآخر انفاسه
للعدو ما طخ راسه
نسخه وحده وماكو بعده بالبشر تكرار

قمه وايظل عالقِمه
بالدهر كاتب اسمه
هو واحد مثله قائد بالزمن ما صار

...
خادم الحسين(عليه السلام)
كرار حسين الكربلائي
(ابو كميل)

مدد مدد صوت من سبعين الف ظل يعتلي
مدد مدد انهُ العباس ابن حيدر علي

هز العلم موت وهجم
حي الله عباس
...
رفت رايه عله چفوفه
حيدر ثاني اجه نشوفه
ما ينولي يشبه علي

اول كلمه بده بيها
يا زهراء وگصد ليها
طر الفزع بسم الضلع

دمدم سيفه ويهزم كل كتايبها
صارت ساعة محشر ظل يحاسبها
فارس نعم الفارس سيفه ادبها

هجم هجم والقياده صاحت انريد المدد
هجم هجم وعله العباس لا يعلو احد
من الخيم
موت وهجم
حي الله عباس
...
من خزراته العده احتارت
هد وبسيفه رگب طارت
شد العزم ذل الزلم

مرعوبه والزلم تركض
قائدهم گلبه ما ينبض
راعي الهوه سد الهوه

عسكر قاده تسمع بس بواچيهم
الكافل طب وضاگت كربله بيهم
هو وحافر مهره يسحگ اعليهم

هله هله باليسمونه الهواشم مفخره
هله هله من الزغر صاحوله سبع الگنطره
لا مو وهم
موت وهجم
حي الله عباس
...
اول گمر علم شايل
شتت جمعها ابو فاضل
طب زلزله في كربله

هل من مبارز يگلها
من سمعوه بدلت كلها
ظل مبتسم ماكو زلم

موت ونازل بالطف والوحي ناده
مهلاً مهلاً منهو مزعل الساده
الكافل حالف ياخذ منهم مراده

بده بده موت من اربع جهات بكربله
بده بده
خزرة العباس هي الزلزله

صارت عدم
موت وهجم
حي الله عباس
...
عالي الگمر منو يلوحه
وطم روحه العلگمي بروحه
اگبال النهر مات النهر

شاف الگمر غضب نازل
ناده دخيل ابو فاضل
گال العذر من البدر

دنگ راسه الشاطي ايقبّل جدامه
گبل الكافل يركض راح لخيامه
رد والعسكر كله طاح گدامه

گمر گمر كربله ظلمه وطلع بيها الگمر
گمر گمر جنه وجهه وسيفه بي لهبة سقر

العاداه نِدَم
موت وهجم
حي الله عباس
...
حاچه نفسه يا نفس هوني
لو زلم خلهم يلاگوني
كل العده تضوگ الرده

ما اهمن توگع چفوفي
يا خلگ عالقربه كل خوتي
الچف مو مهم والماي اهم

گطعو مني چفوفي وانهشم راسي
لكن باقي حسيني ملك باحساسي
اوفي بعهدي وانه لعهدي ما ناسي

اظل اظل عدل لو ميت انه الكافل اظل
اظل اظل صوت يصرخ حَيْ على خير العمل

زودي انرسم
موت وهجم
حي الله عباس
....
خادم الحسين (عليه السلام)
كرار حسين الكربلائي
(ابو كميل)

قال الامام الرضا شهر المحرم
يحرگلي گلبي مثل حرگ المخيم

بهلاله اشوف بعيني
مذبوح نحر حسيني
يحرگلي گلبي مثل حرگ المخيم
...
عاشور يا اكبر جرح يبدي بدمع عليله
واخر محطاته حزن قصة سبي طويله
طالع الشيب بلحيتي من طلعت العقيله
والعمته داست عالجمر ما ينگطع عويله

شهر المحرم من يهل
بي غيمة دموعي تهل
منّ البواچي ما أمل
ليله اعله ليله

هل من جزوعٍ يجي واگبالي ينحب
محد يحس بالجرح بس عمتي زينب

من حگي ابچي سنيني
مذبوح نحر حسيني
يحرگلي گلبي مثل حرگ المخيم
...
ما بين دمعي وكربله عشرة عمر جبيره
اليفگدله واحد ينهظم وانه افگدت عشيره
لحسين ما يحصل نعش واتشيّع بحصيره
الاصعب علينه من الذبح بت فاطمه اسيره

عمتنه للعفه نبي
وساعه اعله تل الزينبي
وساعه غريبه بالسبي
بغربه چبيره

تلچمني كلمة سبي وابچي عليها
واتخيلت عمتي مچتوفه اديها

طاري السبي يبچيني
مذبوح نحر حسيني
يحرگلي گلبي مثل حرگ المخيم
...

يهلال اشوفنك جرح واتهيج المواجع
صيحة الا من ناصرٍ متفارَگ المسامع
عالذبلت اشفافه بعطش ما تنشف المدامع
ترسملي راس اعله الرمح وچف بربعة اصابع

يم النهر مات بضمه
وسلّبو چفه وخاتمه
وتلطم وجهه فاطمه
بين المصارع

كلما شفت ماي بنهر دم تبچي عيناي
واذكر شفاهه الذابله ما شربت الماي

والماي ما يرويني
مذبوح نحر حسيني
يحرگلي گلبي مثل حرگ المخيم
...
يهلال عاشورك يجي وتتجدد الرزيه
واذكر گمر عالمشرعه چفوفه هون سويه
وحسين رد لمخيمه محني فگد اخيه
لحگيلي يا زينب صرخ راح الاخو منديه

چفه وگع فوگ العلم
ويلي وطفو عينه بسهم
الغالي بعمد راسي انهشم
گبل المنيه

لو چان ابو فاضل عدل وبچفه رايه
منذبح جدي ولا حرم تطلع سبايه
بچفي لطمت اجبيني
مذبوح نحر حسيني
يحرگلي گلبي مثل حرگ المخيم
...
يهلال نيران الخيم كل لحظه تچوي بيه
وكلما شفت ناگه وحبل اتذكر السبيه
معصومه بنتي شما بچت اذكر بچي رقيه
عمتي بخرابه نايمه وسموها خارجيه

عاشور يومك مو سهل
ضيمك جبل ما ينحمل
بيك انذبح حته الطفل
بچفوف ابيه

لإبني الجواد شما شلت اذكر رضيعه
ذبحوه ضامي وما شرب ماي الشريعه
جمرة عطش تچويني
مذبوح نحر حسيني
يحرگلي گلبي مثل حرگ المخيم
...

...
خادم الحسين ( عليه السلام)
كرار حسين الكربلائي
( ابو كميل)

يا بعد عمري وهلي
تدري غيرك ما إلي
وين رايح يا علي
وين رايح
…
يبو طول الحلو والعيد ملگاك
حياتي بشوفتك والموت فرگاك
سكت وصاح دمعي الله وياك
يبعد الروح روحي اشلون تنساك

ردت اشبع شوف منك يبويه
ما ترد لخيامي چنك يبويه
كربله تبعدني عنك يبويه

آنه ودموعي طحت
تروح روحي لو رحت
گلبي لاچمني وصحت
وين رايح
…
شبگتك والگلب سولف بالوداع
وبچينه اثنينه وطحنه عله الگاع
يتعب سنيني انته و التعب ضاع
بعد وكتك يبويه تروح شبساع

گلبي شيّب وانت يمي يغالي
ويبس بالشريان دمي يغالي
اكبر من الدنيه همي يغالي

لو ضوه الدنيه ابتعد
بعيني ما اشوفن بعد
وين رايح يالولد
وين رايح
…
انه اباب المخيم رايح وراد
صعب والله صعب يفراگ الاولاد
اصبّر روحي بس الصبر ما فاد
علي بويه الولد للشيب ينراد

گلبي خليته اعله درعك يگلبي
بكربله خايف اضيعك يگلبي
بلا گلب ابقه من اودعك يگلبي

الدنيه دارت بالعكس
اليوم ما يشبه امس
ظلمه وعيونك شمس
وين رايح
…
تره اليفگد ولد شماته يحچون
رحت وبروحتك ما ظلت عيون
واحاچي الروح اذا ما يرجع اشلون
خواتك وامك بفگدك يموتون

صحت بدموع المصيبه يليله
اندعي لله بحبيبه يليله
سالم وليدچ يجيبه يليله

خطوة وداعك ألم
صاب گلب امك سهم
الگاع صاحت والخيم
وين رايح
…
انه اباب المخيم واسمع صياح
علي يا بو علي من المهر طاح
وتوذر جسمه بين اسيوف ورماح
وراحت روحي من گالو علي راح

شفته فوگ الرمل جسمك يلاكبر
تمددت بالگاع يمك يلاكبر
موذر وبچفوفي المك يالاكبر

حزني بغيابك بده
اتشمتت بيه العده
عفت ابوك لوحده
وين رايح
…
خادم الحسين ( عليه السلام)
كرار حسين الكربلائي
( ابو كميل )

يهلال الشهر
هم عندك خبر ؟!
الليله بيا عزه
يبچي المنتظر
...
يا محرم من تجي وانظر هلالك بالمصيبه
اذكر المهدي ‏الغريب اشلون يبچي اعله الغريبه
كل سنه تمر بعذابه وشيبه يكثر شيبه شيبه
شما ذكر طاري المخيم گلبه يسعر من لهيبه

دموعه الهامله
ترسم كربله
وعيونه اشكثر
ذبلها السهر
...
من يشوفك ياهلال اتذوب روحه وتغفه يا عين
اتميل العمامه عله راسه
لو تذكر اعمامة حسين
يگله ياجدي اعله راس الرمح راسك والجسد وين
لياوكت مذبوح وانه دموعي حمره مرت سنين

كاتلني الحزن
وانت بلا دفن
للشيب خضيب
شيبني الدهر
...
يا هلال اسأل سؤالي وبيمن ابدي والحچي هواي
ما تگلي شيحچي گلب المهدي لمن يشرب الماي
يذكر العباس لو يذكر سُكينه وحيرته بهاي
لو ذكر عبد الله ضامي الف موته يموت مولاي

شما يذكر هله
يلعن حرمله
يبچي لوحده
مكسور الظهر
...
بهاي ايامك اشوفه لكربله يروح بيا رزيه
يطب لخيام الحسين ويذكر النار يم رقيه
مثل زينب روحه تركض فوگ تل الـ زينبيه
يصيح يا عالم هظيمه انشاف طول الهاشميه

الضربو عمته
يبچي بحِرگته
يذكر بت علي
لو جدمه عثر
...
من يشوف النوگ يتذكر سبايه ما رعوها
مدللات ام الحسن بحبال خشنه چتفوها
طفله طگوها بمتنها ولون تبچي شتموها
وطفله حرموها من ابوها والتراچي سلبوها

يا شهر السبي
بچيت النبي
ايامك حزن
وساعاتك قهر
...
خادم الحسين (عليه السلام)
كرار حسين الكربلائي
(ابو كميل)

انت اكبر من الزمن يا بالفضل
عندك امانه الضعن يا ابالفضل
عينك لخيتك وطن يا ابالفضل
...
بكل المسافات اترك علامات
علّيها فوگ السمه الرايه بيدك
ربيتك اسنين لعيون الحسين
بداعة حليبي تضحّي لعضيدك
اسمك يعباس للخوه مقياس
ترفعلي اسمي اذا توگع ايدك

حسين اغله من الذهب يمه الولد
وفّي الربه والتعب يمه الولد
يالانته مالك مثل يا ابالفضل يا ابالفضل
...
يچبير الاولاد هالوگفه تنراد
إحذر تدوس التراب اليدوسه
بسمك يناديك واتگلّه لبيك
اتدنگ اريد اعله چفه و تبوسه
ابطول الدرب كون لحسينك امتون
انته عصاته وابو اليمه موسى

هارون اريدك اله نعم الاخو
وايگلك بكربله نعم الاخو
بكل ليله گمره تهل يا ابالفضل يا ابالفضل
...
اوصيتي المهمه زينب ييمه
هاي الامانه الچبيره برگبتك
بين المحامل صيرلها كافل
هذا الهوه تعوفه واتنفس اختك
يا بو الفضايل صيرلها كافل
بيضلي وجهي ييُمه اعله بختك

بالك تحس بغرب بت فاطمه
صير لجدمها ترب بت فاطمه
دللها دامك عدل يا بالفضل
...
لمن تقاتل هب يا بو فاضل
اطبگ سماها وارضها سويه
بين الميادين اشّر للحسين
دگ صدرك وگله ذوله عليه
يا سيد الماي من توصل الماي
اتذكر اعيون سكينه رقيه

دگ رايتك يا گمر فوگ النهر
صير اعظم نهر فوگ النهر
واذكر شفاه الطفل يا ابا الفضل
...
يتهشم الهام وبصدرك اسهام
فدوه يسارك يمينك والعيون
يا شيخ الرجال يبني اعله كل حال
زينب والحسين اريدن يرجعون
ادري بإبائك ادري بوفائك
راح ابقه اتانيهم بدرب الضعون

لو عندي عشرة ولد فدوه اله
وبالدنيه كلشي أعد فدوه اله
انت التعدل الحمل يا ابا الفضل
....
خادم الحسين(عليه السلام)
كرار حسين الكربلائي
(ابو كميل)

يا ابالفضل روح والروح فدوه لفاطمه
امك واناديك ادريك ليث الموزمه

تجيب الفرات ومايه
منك اريد حچايه
يعباس
...
گبل توديعي يبني تعال اتدنه مني
يبو فاضل صحت ارد اوصيك

تكفل بالضعينه هله بنجم المدينه
تسد عين الشمس رايه بيديك

علي چنك علي
ولي ونعم الولي
ييمه هذا يومك شد الحزام

اريد اسمع خبر
وفه عهده الگمر
اشيلن راسي بيك بطول الايام

يعصابة الراس عباس يا اغله ولد
حان الوعد حان آذان ساعات الشدد
ادري توّفي ويايه
منك اريد حچايه
يعباس
...
نبض گلبي وحنانه
الك زينب امانه
مكان ام الخدر بين العيون

تحط عينك عليها
الهوه ما يمر بيها
ردت هذا الضعن شيخ الضعون

يسلطان الشيم
تحجبها بعلم
يظل محملها يا عباس مهيوب

اريد بهالسفر
تغطي كل اثر
اثر ناگتها امسحه عن الدروب

زينب ضوه العين وحسين عيني والضوه
هودجها معصوم كل يوم غطي باللوه

تغطي الخدر بالرايه
منك اريد حچايه
يعباس
...
اعله گاع الطف اريدك
مخيم تبني بيدك
عليه توگف حرس اربع اركان

مخيم چنه كعبه
مثل زينب تحجبه
ابد ما ينلمس ينحسب قرآن

تطوف اعله الخيم
يشيال العلم
وتضويه يا گمر لو چلچل الليل

تنادي بكربله
بأمان العايله
حلم توصل اله الخياله والخيل

يا بت علي صيح والريح ما توصل الچ
بالغيره معهود موجود يمچ كافلچ

گلها الخيم بحمايه
منك اريد حچايه
يعباس
...
اذا يضمه المخيم
اريد اتصير زمزم
تشد اعله الحرب يا بو فاضل

تذل هيبة زلمها
وتطشرها وتلمها
تذكرها بعلي لمن تقاتل

اريد الزلزله
تصير بكربله
الزلم فوگ الزلم والموت عالموت

ونعم يا ابالفضل
تذل وما تذل
اريد الخيل للخياله تابوت

من توصل بزود بالجود يم المشرعه
لو رفرف الواك وهناك يوم الواقعه
للموت صير مرايه
منك اريد حچايه
يعباس
...
يبو فاضل اريدك
تضحي بدم وريدك
تره چفوفك نذر للزچيه

بوفائك يغله ناسي
اشيلن دوم راسي
نذرت اربع ولد بالغاضريه

بنيني تنذبح
ولا حس بجرح
الجرحني حسين فوگ الرمح راسه

عمت عيني گضه
ضلوعه مرضرضه
يريت يدوسني حافر الداسه

بعدك يعباس والناس تسبي زينبك
بين العده تروح بالنوح تبقه تندبك

ماقصرت ويايه
منك اريد حچايه
يعباس
...
خادم الحسين ( عليه السلام)
كرار حسين الكربلائي
( ابو كميل )

انتم اعز من روحي وعيوني عليه
عذروني لو بيدي ازفكم للمنيه
عندي المهم حسين متهمني البقيه
يا بنيني
...
سلاماً يا بني حيدر
اعله خدي دمعتي تعثر
ضعنكم عني لو سافر
جرحكم بالگلب يكبر

انه امكم واترس الدنيه بحنيني
اذا ونيتو ما اگطع ونيني
بنيني واعرف بدمكم حسيني
واريد حسين منكم يا بنيني

اعله حسين اوصيكم ولا وصيت بيكم
يا ولدي ماي الوجه صار ابين اديكم
انه اعتمادي صار بالله وعليكم
يا بنيني
...
تروحون والله وياكم
يولدي وروحي تنخاكم
وصيتي حسين مولاكم
تبيعون لخاطره دماكم

وصيتي وياكم احچيها بدمعتين
يهنيال اليبيع العمر لحسين
اريد اسمع خبركم بالميادين
ابد ما گصرو ولد ام البنين

حي الله ترباتي اليشيلون العوالي
ولدي وردت بيرغكم
تخلونه عالي
شما صرتو غالين الحُسين اليبقه غالي
يا بنيني
...
تطيحون دره يم دره
وگمركم ينكسر ظهره
اخوكم جمرته بصدره
يصدكم وذر عالغبره

اخو ويفگد ثلاث اخوان يا ناس
اعله فرگاكم تطيح دموع عباس
وداع الاخوه مثل الموت ينقاس
من ابو فاضل احس تموت الانفاس

عباس اريدك ما تبين دمعة العين
وتگله اخوتي فدوه لعيونك يالحسين
دين بذممكم وانتم توفولي بالدين
يا بنيني
...
المصيبه طيحة الكافل
والحسين منحني ومايل
ونينه ونة الثاكل
ينادي وين ابو فاضل

يعباس انگطع گلبي اويه الچفوف
سهم عينك عماني وبعد ما شوف
اخوكم وحده يبقه بگاع الطفوف
بعد عباس جسمه اتنهبه السيوف

عباس يم چفوفك
دموعي اهلها
عباس حيره حيرتي زينب شگلها
بت فاطمه بعد الگمر يثگل حملها
يا بنيني
...
اويلي لحال ابو اليمه
اويلي ينهدر دمه
اويلي ينسحگ جسمه
اويلي ينسلب هدمه

عمت عيني اعله اخته تشوفه مسلوب
قميصه مسلب وبدماه مخضوب
تگله خيام ماكو وجانه الغروب
مثل گلبك يخويه گلبي مصيوب

وتگله يمك يالاخو وباچر سبيه
باچر يخلون الحبل بچفوف اديه
زينب يسموها بعدكم خارجيه
يا بنيني
...
خادم الحسين(عليه السلام)
كرار حسين الكربلائي
(ابوكميل)

بعيونه نور ونار
يشبه علي الكرار
الاكبر يسمونه
فنهم يلاگونه
...
أذّن أذان الموت والمعركه اندارت
والغاضريه اليوم مثل الحشر صارت
ما تدري الاكبر صال لو حيدره حارت
وبصارمه المهيوب روس الزلم طارت

الخياله ويّه الخيل
من عنده شافت ويل
والمعركه فنونه
فنهم يلاگونه
...
اربع جهات الجيش بچفوفه لازمها
معنى الحرب والسيف بالحومه علمها
منه كفو ونعمين طشرها ويلمها
من طبها خل الگاع تتوضه من دمها

حي الله الاكبر راح
منها قبض ارواح
كبّر يسمعونه فنهم يلاگونه
...
من كنز هاشم لاح عالمهر ياقوته
هل من مبارز صاح محد طلع صوته
يحچي وكأن الجيش سبعين الف موته
والبارزه بميدان يحضروله تابوته

كله إبه ونوماس
بي غيرة العباس
لون الگمر لونه فنهم يلاگونه
...
لو ما الغدر هيهات منهو اليصل يمه
راسه انطبر بالسيف ويلي ونزف دمه
ادركني بويه يصيح واتعنه ابو اليمه
اتمدد بكتره ينوح ويشبگه ويشمه

واعله المخيم صاح
يا ليل الاكبر راح
لو ما يغدرونه فنهم يلاگونه
...
خادم الحسين ( عليه السلام)
كرار حسين الكربلائي
( ابو كميل )

سافر ولا تهتم
عالغربه اتعلم
تستاهل دموعي
يالعطشت زمزم
مودعه الذكريات
من دون البنات
...
فدوه لهالدموع لا تحني الضلوع
تفهم حچي النار من تبچي الشموع

من گتلي ارحل لونك تبدل
وشفتك يغالي گدامي تذبل

يعيون العليله تروح خلهن يعمن عيوني
اشلونچ من يسألوني شحچي بفگدك اشلوني
لا تستغرب من تروح بعدك ميته يلگوني

ماخذ ضعن روحي
وآنه ابقه بجروحي
ودموعك تگلي
سميني مذبوحي
حلم اسنيني مات
من دون البنات
...
الدنيه بصراحه ما بيها راحه
وآنه اقره بعدك طور المناحه

كلمة رحيلي تهدملي حيلي
بچف البواچي ينيمني ليلي

آنه ودمعتي والليل نترافگ بعد عينك
الگاع اترسها بغيابك بيمته ترجع اوينك
ضميت العتب بالشيب عن لا اسمع ونينك


وعيونك تگلي
يا فاطمه ظلي
شتامرني بالخدمه
سافر يبعد اهلي
بدموعي ابات
من دون البنات
...
شيخ المدينه تروح بضعينه
ويا بويه تدري ابنيتك حنينه

حلم الطفوله بدمعي اگوله
مودع يغالي بالله ورسوله

گلت مودع الله وياك وانه الهم يظل وياي
بس طيفك يظل بعدك بين عيوني رايح جاي
ما ادري شعجب يحسين يلچم روحي طاري الماي

وبأربع سنيني
ما فارِگ ونيني
راح اكبر بفگدك
ومشيبه تلگيني
تهظمني الحياة
من دون البنات
...
ايامي ضاعن ودموعي طاحن
اخذت حياتي كلمة وداعاً

تودعني المن وعيوني يعمن
خليني مره لعطرك اشمن

ليل الما اشوفك بي مثل المكبره مو ليل
صدرك حصتي هاليوم اشتمه ويردلي الحيل
للطف باچر من تروح بويه يصير حصة الخيل

من تنطفي شموعي
ما تنشف دموعي
ضلعك يهشمونه
وتتهشم اضلوعي
ارسومي ذابلات
من دون البنات
...
غراب المنيه يوصل اليه
يسولفلي عنك بالغاضريه

ويگلي ذبحوه ويگلي سلبوه
ويگلي سحگوه وعالغبره خلوه

ريت السلبك يحسين من گبلك يسلبني
ذباحك يماي العين كون بسيفه يذبحني
واصرخ عيف ابوي وهاك روحي ولا تيتمني

اتخيل ابالي
زينب بلا والي
وتنادي يا عباس
شافو تره خيالي
عمي اعله الفرات
من دون البنات
...
خادم الحسين ( عليه السلام)
كرار حسين الكربلائي
( ابو كميل )