✍️Ustoz – komillikka eltuvchi nur!

Bugun O'zbekistonda xizmat ko'rsatgan fan arbobi, Beruniy nomidagi davlat mukofoti sovrindori, O'zbekiston Respublikasi Fanlar akademiyasining akademigi, fizika-matematika fanlari doktori, professor Sa'di Hasanovich Sirojiddinov tavallud topgan kun.

Ushbu munosabati bilan Urganch davlat universiteti Fizika-matematika fakulteti talabalari ishtirokida “Ustozni xotirlab…” xotira tadbiri o‘tkazildi.

Tadbirni UrDU rektori B.Abdullayev kirish so‘zi bilan ochib berib, matematik olim va jamoat arbobi, Oʻzbekistonda xizmat koʻrsatgan fan arbobi Sa'di Sirojiddinovga xalqparvar olim, jonkuyar rahbar va fan fidoiysi, deya sifat berar ekan, o‘z davrida Vatan ravnaqi va yurtimizda ilmiy salohiyatni yuksaltirish uchun ko‘rsatgan jonbozliklari to‘g‘risida talablarga so‘zlab berdi.

Shuningdek, tadbirda universitet faxriy professori S.Masharipova o‘zining ustoz S.Sirojiddinov bilan bog‘liq xotiralari bilan o‘rtoqlashdi. Xalqaro hamkorlik boʻyicha prorektor G‘.O‘razboyev esa O‘zbekiston Milliy universiteti qoshidagi Sirojiddinov nomidagi xalqaro fizika-matematika maktabida tahsili davrini esga olib, matematika sohasini tanlashida ustoz Sirojiddinov yaratgan maktabning o‘rni beqiyos ekanini taʼkidlab o‘tdi.

Xotira kechasida Fizika-matematika fakulteti dekani J.Xoʻjamov, V.I.Romanovskiy nomidagi Matematika instituti Xorazm bo‘linmasi rahbari A.Atamuratovlar so‘zga chiqib, talabalarga ajdodlarga munosib voris bo‘lish va bugungi kunda davlatimiz tomonidan yaratilgan imkoniyatlardan unumli foydalanish va eng yaxshi mutaxassis bo‘lib yetishishi ham farz, ham qarz ekanini uqtirdilar.

Shogirdlar tomonidan cheksiz sog‘inch va hurmat bilan esga olingan ustoz S.Sirojiddinov haqidagi xotiralar talaba-yoshlarda sohasiga boʻlgan yanada qiziqishni va intilishni oshirishga xizmat qildi. Zero, xotira-muqaddas, qadr esa abadiydir!

Yoshlar tadbir yakunida oʻzlarini qiziqtirgan barcha savollariga javob olishdi.

🌐Telegram|Facebook|Instagram