በሃሎ መምህር ፕላትፎርም ከ300 በላይ ሃይማኖታዊ ጥያቄዎች ምላሽ መሰጠታቸው ተገለጸ

ጥቅምት ፲፱/፳፻፲፰ ዓ.ም

በማኅበረ ቅዱሳን የስብከተ ወንጌልና ሐዋርያዊ አገልግሎት ለሃይማኖታዊ ጥያቄዎች በስልክ ምላሽ ማግኘት በሚቻልበት በሃሎ መምህር ፕላትፎርም ከምእመናን ለተነሡ ከ300 በላይ ጥያቄዎች ምላሽ መሰጠታቸው ተገልጿል።

በሃሎ መምህር ሃይማኖታዊ ጥያቄዎችን ጠይቀው ምላሽ እንዲያገኙ ምእመናን በሚመቻቸው ጊዜና ቦታ ሁሉ አገልግሎቱን ማግኘት የሚያስችል የቴክኖሎጂ መንገድ በመሆኑ ሚናው ከፍተኛ እንደሆነም ተጠቁሟል።

በማኅበረ ቅዱሳን የዋናው ማእከል መደበኛ መምህር ሊቀ ልሳናት ቀሲስ ክፍያለው ጥላሁን እንደገለጹት ከሀገሪቱ ከተለያዩ አካባቢዎች በርካታ የስልክ ጥሪዎች የሚመጡ ሲሆን እንደየ አካባቢያቸው ጥያቄያቸውም የተለያየ መሆኑን ተናግረዋል።

ለሚነሡት ጥያቄዎችም ምላሽ እንደሚሰጥ የገለጹት ሊቀ ልሳናት ቀሲስ ክፍያለው ጥላሁን አክለውም ምእመኑ ከመጻሕፍት፣ ከሰንበት ትምህርት ቤቶች፣ ከማኅበራት፣ ከመምህራን ተገናኝተው የበለጠ መማር፣ ማወቅ እንዲችሉ መንገድ የምናሳይበትም ነው ብለዋል።

በማኅበረ ቅዱሳን የስብከተ ወንጌልና ሐዋርያዊ አገልግሎት የስብከተ ወንጌልና ዕቅበተ እምነት ዋና ክፍል ምክትል ኃላፊ ዲያቆን ዐቢይ ጌታሁን በበኩላቸው የስብከተ ወንጌልና ሐዋርያዊ አገልግሎት የጠፉትን በመመለስ፣ ያላመኑትን በማሳመንንና ያመኑትን በማጽናት የስብከተ ወንጌል ተልእኮን ከግብ ለማድረስ አንደኛው መሣሪያ የሃሎ መምህር ፕላትፎርም ነው በማለት ገልጸዋል።

የስልክ አገልግሎቶቱ ከተጀመረ ስምንት ወር እንደሆነው አያይዘው የገለጹት ዲያቆን ዐቢይ ጌታሁን አክለውም ፕላትፎርሙን በመጠቀም ለተነሡ በርካታ ጥያቄዎች ምላሽ መሰጠቱንም አብራርተዋል።

''ከፈተና ማለፍ መጨረሻው በረከትን ማምጣት ነው!’’:- ብፁዕ አቡነ ገሪማ

ጥቅምት ፳፭/፳፻፲፯ ዓ.ም

የማኅበረ ቅዱሳን ሕዝብ ግንኙነት እና ትብብር አገልግሎት የ12ኛ ክፍል ሀገር አቀፍ ፈተና ተፈትነው ከፍተኛ ውጤት በማምጣት ወደ ዩንቨርስቲ ለገቡ የተፈጥሮ ሳይንና የማኅበራዊ ሳይንስ ተማሪዎች የሽልማት መርሐ ግብር አከናውኗል።

በመርሐ ግብሩ ላይ ብፁዕ አቡነ ገሪማ የጌዴኦ ኮሬ ቡርጂ ሀገረ ስብከት ሊቀ ጳጳስ ፣ አቶ ንጉሤ መብራቱ የማኀበረ ቅዱሳን ሥራ አስፈጻሚ ጉባኤ ጽሕፈት ቤት ኀላፊ፣ ዶ/ር በሪሁን ተፈራ የማኀበረ ቅዱሳን የሕዝብ ግንኙነት እና ትብብር አገልግሎት ሥራ አስኪያጅ፣ የክፍሉ ኃላፊዎችና አባላት ተገኝተዋል።

ብፁዕ አቡነ ገሪማ የጌዴኦ ኮሬ ቡርጂ ሀገረ ስብከት ሊቀ ጳጳስ በመርሐ ግብሩ ላይ ተገኝተው ባስተላለፉት መልእክት ከፈተና ማለፍ መጨረሻው በረከትን ማምጣት ነው ያሉ ሲሆን አንድ ተማሪ ለስኬት ሲበቃ የብዙዎች ማለትም የራሱ፣የቤተሰብ እና የመንፈሳዊ ወንድሞችና እኅቶች ጥረቶች ውጤት ነው ብለዋል።

ብፁዕ አቡነ ገሪማ አክለውም ቅድመ ግቢ ጉባኤ ትልቅ ነገር ያለው እና ለተማሪዎች ውጤታማነት ጉልህ ድርሻ የሚወጣ በመሆኑ ተጠናክሮ መቀጠል እንዳለበት የገለጹ ሲሆን በተለይም ሽኝት የተደረገላችሁ ተማሪዎች ˝ትምህርታችሁን አጥኑ፣ቤተሰቦቻችሁን ስሙ፣ ዘመኑ ክፉ እንደ መሆኑ መጠን በግቢ ጉባኤ መሳተፍ እንዲሁም ጊዜአችሁን በአግባቡ ተጠቀሙበት̏ ሲሉ አባታዊ ምክራቸውን አስተላልፈዋል።

በመጨረሻም ለተማሪዎቹ የላፕቶፕ ሽልማት ተበርክቶላቸዋል፡፡