ــــــــــــ◐◐◐◐◐◐◐◐◐ـــــــــــــــــــــــــ

بسم الله الرحمن الرحيم

باقــــــرعــــلوم المخــتار ثبــــت الـــدين ابعلمه
*
علمه بحــــر نجهل مداه وحدوده
نهج النبي عـــم ابفضل مجهوده
قــــــدم حياته الطاهره المعبوده
عاشـﮔ لسانه التسبيح ذكــــــــر الإلــــه ابدمه
*
إسمه إسم جــده وملك أوصـــافه
تنطق معاني الحكمه دوم اشفافه
ربك علــــــيه نزل جميع الــطافه
معصوم باب الرحمن يـــــشبه محمــد إسمه
(صلى الله عليه وآله)
*

رحـمه وجـــوده وتزهي نورحروفه
فـــــــضله علـــينه ونلهج ابمعروفه
ينضح علـــم ﮔلبه وتخــطه اچـفوفه
دون أحاديث الـــدين معصومه منه الكلمه
*
بالسم ﮔضه وحـﮔنه بدموع نذكره
يبچي اليزوره من يـــﮔصده الـﮔبره
من غــــــــير قبه ولامناره ينظره
وبرغم كل هذا الحال أنـــــواره تجلي الظلمه
*





بالطف حضــرشافت مصايب عينه
مذبوح شاهــدعالــــــوطيه حسينه
ومـﮔطوعه من عمه الـﮔمر چفينه
وبخيم زينــب نيران وبـــــامر الحرم مهتمه
*
شاهد يتامه امن الوضـــع مرعوبه
ومنهم يــــتيم الـــنـار تلــهب ثـوبه
وشاف السبي وحاله ومرار دروبه
مات ويون لجل حسين وبصـــدره يجرح همه
***
تمت بفضل الله تعالى والحمدلله رب العالمين وصلى الله على محمدٍوال محمد
اللهم صلِّ على محمدٍوالِ محمدوعَجل فرجهم ياكريم
حيدركريم جارالله

مصيبة كربله بفكري شفتها بأول سنيني
شذكر شنسه من عدها ويا هي الما تبچيني
..
يالحاضر عزاي اليوم اسمع قصة الباقر
من شبوهن اخيمنه اطلعت من الخيم حاير
زغير ودولبتني الخيل من حافر لعد حافر
وچي اشبه الزهره الگوم سطروني على عيني
...
زغير ومن يضربوني تطلع روحي من جسمي
بكثر ما انضرب بالسوط من متني نزف دمي
المن اشتكي حالي والعباس مو يمي
بعيده المشرعه عني ومنهو الي يحاميني
..
يشيعه والكسر گلبي رقيه اكبالي ضربوها
طلعت تركض اعله النار والعدوان شافوها
ابوها حسين ما يدري ترچيتها سلبوها
غريبه تگلي يالباقر لبويه حسين وديني
..
رحنه يم ابو اليمه ولگينا باخر انفاسه
الشمر گاعد على صدره ومن الگفه يحز راسه
اثنعش طبره طبر نحره وشچم حافر الداسه
اضلوعه اتطشرت عالگاع واويلا عله حسيني
..
ساعه ولن شفت زينب صحت زينب شطلعها
شبگت نحر ابو اليمه تبچي وهو يسمعها
آخ من الشمر يا ناس دفع زينب اوگعها
بعبايتها اشوف تراب واني الطم عله جبيني
..
يحسين صبري البالگلب مات
بالديوان شفنه هواي شمات
يزيد ايصيح وتسمعه السموات
اكشفو وجوهچن يالفاطميات
..
أنه زينب وگلبي انگطع بتّاه
عفه ليل الخرابه اشلون بتاه
راس احسين اجه وشافته بنتاه
شبگت منحره وماتت رقيه


كرار حسين الكربلائي

شهر الحزن شهر الدمع بي تكثر اوجاعي
ينزل دمع عيني اذا اسمع قره الناعي

تجري المدامع چالنهر .. لو هل هلالك ياشهر
عاشور .. عاشور .. عاشور .. عاشور
.............................................

هلال الحزن شفتك جرح لا شافتك عيني
لا تطلع ابوجه السمه رسمك يأذيني
اذكر مصيبة كربله وشوفك يبچيني
يهلال غيب ولاتجي شما طالت سنيني

ترسم صورة فاجعه
انظر عيله املوعه
صوت الحافر نسمعه
يحسين .. يحسين

لمن نزل طف كربله سبط النبي الهادي
صوت المنيه بالفضا للعالم اينادي

خوف و عطش نار وخطر .. لو هل هلالك ياشهر
عاشور .. عاشور .. عاشور .. عاشور
..............................................

يا ويلي يهلال الهضم منك سبب نوحي
كل ما تمر بينه ترد آلامي واجروحي
من اسمع بطاري الشهر يكبر جرح روحي
وارسومك اتزيد الهضم للنايبه توحي

ياريت ماتطلع ابد
گلبي يهلال انمرد
شصبر ما اگدر بعد
يحسين .. يحسين

دمع الحزن والنايبه يتجاره ليليه
لمن اشوفك ماتظل انفاسي بالريه

للفاجعه ترسم صور .. لو هل هلالك يا شهر

عاشور .. عاشور .. عاشور .. عاشور

..............................................

عباس اشوفه عالنهر واگف شبل حيدر
والجربه بيده وتنتظر اطفاله والخدر
من چفه ذب ماي النهر اشرب فلا اگدر
شلون اشرب وسبط النبي يتلوع امن الحر

ما ضاگ گطره امن النهر
معروف بالغيره الگمر
يرسم للخوه صور
يحسين .. يحسين

لا ما قبل يشرب قبل سبط النبي المختار
يا ابو الفضل انته الوفي غيره وعزم وايثار

يخبرنه عن راعي الفخر .. لو هل هلالك يا شهر
عاشور .. عاشور .. عاشور .. عاشور

..............................................

شال الگمر جوده ومشى گاصد صواوينه
يروي عطش نار الظمه منتظرته اسكينه
لاچن وسف شاف الدرب مسدوده صوبينه
وسيوف عدوانه بغدر گطعوها چفينه

والعين صابوها ابسهم
عامود للهامه هشم
ظلت عينه عالحرم
يحسين .. يحسين

لا هل عسه هلال الحزن وسط السمه نشوفه
يرسم گمر عالمشرعه متگطعه چفوفه

والطيحه يم جرف النهر  .. لو هل هلالك يا شهر
عاشور .. عاشور .. عاشور .. عاشور

..............................................

زينب تعاين للحرب لا رايه لا جوده
واتگله مايك يانهر ما شربه ما ريده
روحي تون اعله الگمر واحشائي ممروده
گالو وگع جنب النهر گطعوهن زنوده

وتصيح يا خير العمل
ويلاه عباس الكفل
بسيوف عدوانه انچتل
يحسين .. يحسين

دون الكفيل الهاشمي زينب تظل تالي
واتحاچي عباس ابدمع اگعد يكفالي

طف كربله عَبره وعِبر .. لو هل هلالك يا شهر
عاشور .. عاشور .. عاشور .. عاشور

..............................................

هلالك سهم بين الضلع لو ناظري ينظره
يرسملي صورة سيدي طايح على الغبره
حسين بحوافر غايره هشمو وسف صدره
ويلاه من ثنه الشمر فوگه و گطع نحره

خنصر طايح عالثره
جثته وسفه اموذره
مظلوم يفجع منظره

يحسين .. يحسين

ينادي الظليمه من طحت يالوالي ميمونك
صوب الخيم يصهل ركض گاصدها لضعونك

خَيّاله محزوز النحر  .. لو هل هلالك يا شهر

عاشور .. عاشور .. عاشور .. عاشور

عمار الراشدي

اللحن .. ولي النعمه
محمد الجنامي

#هلاليه


هلال احمر عمه اشوفن بالسمه
ولونه مو كالعاده جن لون الدمه

شنهو راح يصير عمه
اهلالنه املطخ ابدمه
هالسنه
-------------------------------------------
سؤال اشگد صعب هذه وحيرني تره اجوابه
شجاوبهه وهو المگصود ابوهه وذبحه وصوابه
شگللهه ابوج ايموت ابدمه يصبح اخضابه
شگللهه الحجي مجمور الغالي يفارگ احبابه

ابصدري غصه ولحجي بريجي عثر
منين ماريد ابدي خانگني النحر

ولهوه يصعب اشمه
اهلانه املطخ ابدمه
هالسنه
-------------------------------------------
شگلهه ولحجي مذبوح وحاذر بالكلام اهواي
اگلهه عمج العباس اجفوفه اطيح يم الماي
اگلهه الذبحه من مگفاه ابوج وحيل توجع هاي
حرت ولحيره كتلتني سؤال الطفله شل اعضاي

حرت من ياصوب احجي الفاجعه
وهيه طفله وماجزت عمر اربعه

اگبالهه حزني المه
اهلالنه املطخ ابدمه
هالسنه
---------------------------------------------------
شسولف وبدي من ياصوب طفله اتريد مني اجواب
اگلهه بعد جف حسين تالي ايصطرج السلاب
اگلهه التراس اعيونج دمه يختلط بتراب
تالي اترافجين الروس على ارماح ومشي ويه اغراب

حيره بيه وتقره طف ابصفنتي
وگمت اكابر يمهه وكتم ونتي

وگلبي متگبع ابهمه
اهلالنه املطخ ابدمه
هالسنه
------------------------------------------------
إهلال الكدر مرنه وطفله سألت اعله اللون
اگلهه من يروح حسين يرجع فارغ الميمون
اگلهه ايطيح بين الخيل اسكت ماعرفت اشلون
فاض الحزن من وجهي ومن عيني هملت اعيون

الدمعه تفضح شكو سر ضمه الكلب
وسري صدر حسين ميدان الحرب

شمس تاخذ منه رسمه
اهلالنه املطخ ابدمه
هالسنه
----------------------------------------------------
گلتلهه يضي الشوف قصه وصعب محجاهه
بيهه تنسبي نسوان وطبول السبي اوياهه
وبيهه كافل الاخته يمشي وتفگد احماهه
وجثث تتناثر اعله الگاع تبقى املطخه بدماهه

تالي هاي القصه ياعمه صعب
من اميرات اعله هزل وي غرب

اهناك تتفسر الجلمه
اهلالنه املطخ ابدمه
هالسنه
--------------------------------------------
علي سليم الحسناوي

#هلاليه
كلها يحسين بمحرم شدت احزام
نحسب احساب الخدمتك كمنه كل عام
******
احنه حبيناك مو لجل غايه
وسيدي للموت احنه وفايه
كل سنه بعاشور نرفع الرايه
نلطم ولجلك ننصب اقرايه

هاي الايام وغلاتك اجمل ايام
كلها يحسين بمحرم شدت احزام
*
خادمك يحسين دوم تدعيله
ومن يميل الكون جفك ايشيله
المهدي ويانه الليله شد حيله
وصاح ابو الموكب جيبو زنجيله

وصار رادود القصيده الليله جسام
كلها يحسين بمحرم شدت احزام
****
سيدي تعبك هوه راحتنه
كون تتقبل منه خدمتنه
كل سنه بسمك تعله صيحتنه
والمجالس هاي هيه ربتنه

اليوم جم عابس صحت بمحبتك هام
كلها يحسين بمحرم شدت احزام
**


اشما تمر اسنين احنه نبقه وياك
صحنه لو للموت والله ما ننساك
يا عمود الدين بدمنه بايعناك
انته مبدئنه وخاسر العاداك

بيك حكه خادمك من يرفع الهام
كلها يحسين بخدمتك شدت احزام
*
حلوه خدمتنه ونفتخر بيها
وتتعب الرجلين ما نخليها
لجلك الارواح احنه نفديها
والمئاتم هاي دوم نحييها
وتدري يحسين اليحب ما يكدر اينام
كلها يحسين بمحرم شدت احزام
*
هالسنه يحسين كلها متحضره
هذا الي ايعزيك وذاك الك يقره
مجلسك مولاي ينحسب ثوره
ورحبت بالناس فاطمه الزهره

احنه خدام ونظل للموت خدام
كلها يحسين بمحرم شدت احزام
*
تمت
تحسين الخفاجي

.
     هذا العزاءُ دائم ــ حتّى ظهور القائم
         ياربّــي عَجّل لولِـيِّـكَ الفـرج

عاشور ثـورة إصــلاح ــ سبط النبـي قائدهـا
هالثوره تحمل أهداف ــ صوت النحـر رددها
هــذي المبادئ تحتـاج ــ ناس الذي اتجددها
نحيي الشعائر كل عام ــ لجل السبط نعقدها

واضح هدف هالثوره ــ للناس عِبره وعَبره
      
      وابكل عزاء ومأتم لساني لهج
       ياربّــي عَجّــل لولِـيِّـكَ الفرج

إبن الرسول المختــار ــ عالغبـــره دمّـه اتنثـر
بنحره يخاطب لحرار ــ والرمح أصبــح منبر
راد الأمــر بالمعــروف ــ والنَهـي عـــن المنكر
وما نخضع لحاكم جور ــ وامن الظلم نتحـرر

   المنبر لسان الحكمه ــ يحيي ضمير الأمه
    
        مِن الفتن يحميها وأخطار المرج
       يـاربّــي عَجّــل لولِـيِّــكَ الفــــرج

چـان الرضــا ابهالأيــام ــ ايقيــم العــزاء الجده
ودعبــل سفيـر الأشعـار ــ بعاشور حاضر عنـده
وايگلــه جــدك عطشان ــ مــات وفراتـه بسِـده
لو فاطمه تشوف حسين ــ تلطم وجهها لفگــده

    دعبل يردد شعره ــ يندب قتيل العبره

       حتى ظهور المهدي يبقى هالنهَج
       ياربّـــي عَجّــــل لولِــيِّـكَ الفــرج

لحسين كل دمعة عيـن ــ تنجيك يوم المحشر
والباري باچر يسگيــك ــ من عذب ماي الكوثر
والدمعه لحسين هنـاك ــ تحجب النار التسعـر
بالحشر متمسها النـــار ــ عين البچت عالمنحر

  لو گد جنح بعوضه ــ هالدمعه تصبح روضه
 
        منقوله هالأخبار عن كل الحجج
         ياربّــي عَجّـــل لولِـيِّــكَ الفـــرج

إسمع الصادق شيگول ــ اتمعــن حديثه ابدِقّه
إنشدني يابــو هــارون ــ شِعــرَك بطــور الرقه
لــن جاوبــه ابهالأبيات ــ وجّــر ابگلبه الحِرقه
أُمرر على جسم حسين ــ واضلوعـه المتمزقه

      طيل النظر يالزاير ــ عالهشّمو بالحافر

       ويلاه ضلعه من خرز ظهره خرج
       ياربّـــي عَجّـــل لولِــيِّـكَ الفــــرج

موسى الكليـــم وأيّوب ــ نــــــوح وابونـــــه آدم
كل مرسل يسيل دموع ــ يواسي الرسول الأكرم
هالعَبـــره ظلت لليـــوم ــ تسيل المدامع مــن دم
تجريهــا عيــن الموعود ــ عالفاجعــه ابكل مأتــم

      مهدي الزمان الثائر ــ ابكل المآتم حاضر
         
        يايوم نورك سيدي يجلي الدُجَج
        ياربّـــي عَجّـــل لولِـيِّــكَ الفـــرج

عمــار الراشـــدي

ميمر // لاستقبال شهر محرم الحرام

وگفة زلم ياخدام شدو العزم للخدمه
.........

اگبل محرم ياخَدَم شدو الحيل
شهر الذبيح الداست بصدره الخيل
ميهمنه بالمايقبل وقال وقيل
عدنا المهم بس حسين امره عله كلشي انقدمه
........

وگفتكم تسر الگلب ياخدام
ماظل بعد شي عن محرم ايام
خل نثبت احنه عله العهد هذا العام
ونكسر خشم كلمن گال. ماكو بمحرّم خدمه
.........

ذِلّه المنع هيهات منا الذِلّه
نخدم ابوالسجاد حاشه انخذله
خل يسمع المايقبل احنه انگلّه
ما نترك حسين انموت لآخر نفس نلتزمه
.........

ندرك مخاطر هالوباء ونفهم
لكن عزاء، حسين اغله واعظم
فدوه العمر لحسين خل نتألّم
هاي المجالس ياناس ما بيها بس الرحمه
..........

كل المجالس للعَزَه هيّئوها
خدام ابوالسجاد لتعوفوها
من هسه اعلام الحزن نشروها
ليّهمكم القال وقيل كل الحچي نفتهمه
..........

اهل الشماته بهالوضع فرحانين
غايتهم بمنع العزه نعوف حسين
هيهات عدنه عقول ونفكّر زين
نعرف نوايا العذّال والباطل احنه نهزمه
.........

يالله استعدّو للطم والعزيات
وعله المجالس نشرو سود الرايات
اول محرم تبدي كل الهيّئات
نعمه المجالس والله لنفرّط بهالنعمه

سيد زيد الفحام
2020
________________________

بويه بويه وينه صدرك وين اديك
بويه بويه انه اجيت انشد عليك
انه الك مشتاكه ياوكت نتلاكه
$$$
انه من عنك رحت هوايه ضليت التفت
بويه كلي شلون اعوفنك وسافر
ماتضمني على الصدر طفله مااحمل هجر
لوصدر ماظلك بدوس الحوافر
لوتعاين غربتي جابجيت لحالتي
انه مااكدر اوصفهه المشاعر
مره عاين عمتي ومره اصدن لخوتي
هذا حالي اليوم واصعب منه باجر
وينه وينه بويه اسأل هل السؤال
وينه وينه راح وياك الدلال
ابجي فوك الناكه ياوكت نتلاكه
*
تدري بفراكك صعب امشي والمدمع يصب
انه يابويه اعز ناسك رقيه
هاي جم ليله الجزت وانه عيني ماغفت
يلي جنت تكلي نامي فوك اديه
عيني مانشفت ابد بروحي جن هزت مهد
وينه عبدالله انشدك جيبه اليه
انه اريدن شوفته موتتني فركته
جنت اشبكنه ويرد يشبك عليه
مهده مهده خالي وامه عليه تدور
مهده مهده تلولي يمه بلاشعور
جمرته حراكه ياوكت نتلاكه
*
وي مشيهه القافله الدمعه ضلت سايله
حتى مااكد انشفهه المدامع
ايدي مجتوفه واون شلون امسحنه الجفن
وكلبي يابويه انجوه بكثر المواجع
مدري لاوين الكصد الحادي ياريته يرد
هيجي ويكلي لبوج حسين راجع
لكن انه ايست وعنك بعيده صرت
تنسه موتك بويه كون بحالي سامع
كلبي كلبي ماكطع منك رجاه
كلبي كلبي صفت كل دكاته اه
لوتشوف اشواكه ياوكت نتلاكه

انشد وكلي الم وينه شيال العلم
وينه ابوالحملات خواض المنايه
من يروح ويخبره يكله زينب حايره
رايتك جانت سترالهه وعبايه
ادري طاحت يمنتك بس ترفرف رايتك
انته عمرك يبتدي من النهايه
اسمك اشكد انذكر ماوصل ليك الخبر
اشعدهه غير اسمك بعد هاي السبايه
عمي عمي بكل مواقفنه نصيح
عمي عمي لوطفل منه يطيح
الشاطي امن راكه ياوكت نتلاكه
**
من يمروكت العصر تنعصر روحي عصر
ذكرياتك تنجمع كلهه على بالي
والله ذابحني البعد بويه انشدك هم ترد
حتى طير البلسمه يبجي على حالي
انه بعدك من وكت طفله لكن شيبت
من غيابك لا تناشد عاالجرالي
انته يابو العاطفه شكلي ماضن تعرفه
مادريت اشسوت بحالي اليالي
روحي روحي شيبت بعد الرحيل
روحي روحي لون ماتت هم قليل
عذباني فراكه ياوكت نتلاكه
سعد العبودي

#رئيسية_للخدام


حضرنه منابرنه ...ولبسنه احرامنه كلنه
لبسنه اسود نحج حسين
ولبينه بدموع العين
يحسين بضمايرنه
......
نشوف علينه هل عاشور .. برايات الحزن كمنه
نصبنه المنبر وبدموع .. نضمنه مواكبنه
لبسنه احرامنه لعاشور .. كلها اسود ملابسنه
وتوشحنه بحزن واهات .. يحسين بألم صحنه

نلطم ع الصدر يحسين
هشمنا الك صوبين
اليلطم واليرد الصوت
نخط هذا العهد للموت
صوت ومن محاجرنه
يحسين بضمايرنه
......
شعار انطينه للتاريخ .. شيعه وهالعمر عاشور
نظل طول العمر لحسين .. نضحي وماتهمنه نحور
رغم ما سوو اعدانه .. تفوح الخدمه منه بحور
ونظل نمشي عله خط حسين .. ولا همنه الجره ويدور

عقيده وثابته بالروح
العمر كله عزه المذبوح

نواسي المصطفى واله
بحزن ودموع هماله
بفطرت صوت رددنه
يحسين بضمايرنه
.....
نزل بموكب الزنجيل .. ندگ عله الضهر وبصوت
هيهات والف هيهات .. نزل عن هالدرب للموت
مواكبنه تغطي العين .. جنود ومن عليها يفوت
ظلم ما ترضه اله اثنين .. نصر لو علم وي تابوت

حشد واتطوعت افواج
بحر هاجت مثل امواج

عقيدتهم مثل عابس
واحد لاخر ينافس
بطريق الموت كبرنه
يحسين بضمايرنه
......
عله نياط الكلب شلنه .. رايتك يبو السجاد
شلناها بعشگ معروف .. من الذر بينه للميلاد
گبل تكوين هذا الكون .. فرض حبكم صبحله ابعاد
نخلق وسط العرش والروح .. وتجسد منه كلشي انعاد

لذلك حبكم معلگ
نفس وسط الگلب اشهگ
اذا ازل بنفس عنكم
احس صوتي يجي لحبكم
اصيح واركض اتعنه
يحسين بضمايرنه

.....
من عالم الذر والروح .. لبينه ونبايعلك
گبل لا ننخلق يحسين .. مواكبنه ننضملك
تعاهدنه ونشهدكم .. ارواح البينه ترخصلك
الجسد شنو ونعز لطمه .. من كل صوب اوذرلك

الطم واطبر بقامه
اهشم صدري والهامه

عهد هذا العهد محفور
فار بنوح بالتنور

الك ترخص مناحرنه
يحسين ابضمايرنه
.....
حيدر عيسى البديري

ميمر // شجاعة اباالفضل العباس عليه السلام

زينب اجت للعباس. جابتله جربه ورايه
..........

يابالفضل جيتك يروحي ورجواي
اطلب طلب وعرف بطبعك وفاي
اطفال اخوك حسين محتاجه الماي

شده وصعب حلهه يكون إلا عله ايدك هايه
........

گاللهه امري ادلّلي ودگ صدره
ألماي اجيبه لخيمتج والزهره
ياويله واليمنعني اكسر ظهره

امن العلگمي املي الجود. ورَوي الطفل من مايه
.......

گالتله گدها والنعم يا عباس
انت الكفيل وبالشدد رفعة راس
ساقي العطاشة سقينه يابوالنوماس

راية علي ترفرف دوم بچفوفك امعلّايه
........

سل سيفه عباس وهجم عالعدوان
شردت زلمهه وخيلهه امن الميدان
شي ماتت وشي نامت عله التربان

طب للنهر يملي الجود دگ عالشريعه الثايه
..........

ماي النهر بچفوفه لمن شاله
عطشان وجه حسين يتراواله
ماشرب رد بالجود يروي اطفاله

مو غايته يشرب ماي. يرضي الامام الغايه
.........

رد للخيم عباس والماي وياه
لعبدالله راح الضامي شاله وروّاه
وروّه اليتامه العطشت بچف يمناه

وخته العقيله تحيّيـه ما يخلف الهه حچايه
.........

گال ومثل ما گال سوه الكفّال
بالجربه جاب الماي روّه الاطفال
ذل آل امية عله النهر لمن صال
روس وجثث سوه الجيش عالمشرعه مدمّايه

سيد زيد الفحام
_''''____