امام المتقين
شفيع المذنبين
امير المؤمنين

___(1)

يا عشك عاش بدليلي بلون صافي
امي لولتلي اعلة اسمك صوت دافي
كافي كالولي العشك غاليت كافي
لا وحكة شما اعشكة ما اوافي

هو الحصن اليقين
هو النور المبين
امير المؤمنين

___(2)

منالطفولة وعايش بحبة وهيامة
كلشي يبرد بية بس يبقة غرامة
شوكي حافر عالكلب اسمة علامة
لا ابد ميزول الى يوم القيامة

هو الكهف الامين
هو الكف الحنين
امير المؤمنين

___(3)

بالدليل القاطع احجي وبالرواية
الما عرف يقرة علي ما قاري اية
اهدنة الصراط چا شنهي الهداية
الما عرف معناها طايح بالنهاية

السراط المستقيم
هو الحبل المتين
امير المؤمنين

___(4)

والدي وحرزي واميري وكلشي هوة
الدنيا لو ضاكت علية هوة سلوة
عمري اذا مابي علي عمري ميسوة
اني مخلوق العلي چا هية كوة

حبيب العاشقين
دليل التائهين
امير المؤمنين

___(5)

هو كعبت ديني لو انوي الصلاتي
لوما حيدر مني چا ضاعت حياتي
بغير حبة الربي اني شنهو اتي
الفضل لله بحيدرة صارت نجاتي

هوالحق اليقين
ملاذ الخائفين
امير المؤمنين

___(6)

هذا عشكي منالطفولة وهذا وضعة
امي غذتني بمحبتة رضعة رضعة
والدي بس بي يسولف جنت اسمعة
صار يضوي حيدر ابكل دربي شمعة

مجيب السائلين
شفيع العالمين
امير المؤمنين


______________

محمد ابو باقر الحجي

#من_لليتامة_ياعلي




لسة منتظرة .. بلوعة وبعبرة .. على بابة
بكسر خاطرهم .. ياهو ايلمهم .. بغيابة
لسة منتظرة اليتامة .. جفك ايمر اعلة هامة
حيدر .. حيدر

__(1)

بلوعة ركضو كوة ينجر النفس
ماحجو كلشي الحجي كلة انحبس
محد ايترجم دمعهم انت بس
بالالم واحدهم كليبة انترس

صوت منهم يعتلي
اطلعنة يا علي
بدونك احنة يا ولي .. نموت

كمشو بايد الحسين
بالزجية محلفين
خلنة يمة يا حنين .. نفوت

عتبت الدمعة .. لكن شنفعة .. عالراح
سكتت البسمة .. تحولت لطمة .. ونياح
كوة كالو بالسلامة .. جفك ايمر اعلة هامة
حيدر .. حيدر

__(2)

منالسنين الراحت وهاي السنين
من بعد جفك منو الهم معين
من بعد ولدك امير المؤمنين
محد ايمر باليتامة مقصرين

من بعد جف الدلال
محد ايمر بسؤال
عاليتيم وحالة حال .. غريب

ياعلي مامرها عيد
منالزمن ذاك البعيد
لهذا حاضرنة الجديد .. عجيب

ضلت الحسرة .. بالكلب جمرة .. بلا روح
يصعب المنظر .. اصعب واكثر .. بالجروح
بكل جرح تارك علامة .. جفك ايمر اعلة هامة
حيدر .. حيدر

__(٣)

من يجي الليل ويمر يم الفقير
بجفة يفرك بالامر كلش يحير
يحجي المن المن بوجهة يدير
عينة عالباب المجيئك يا امير

حاير ايدير النظر
تانة شخصك وانتظر
لكن ايكسرة الخبر .. بعيد

بعينة تنزل دمعتة
باقي وحدة بغربتة
حيل تصعب حالتة .. وحيد

أيهدي بجروحة .. يقنع بروحة .. يجينة
يمسح ادموعة .. وتشتعل روحة .. بونينة
بالدمع يشرح كلامة .. جفك ايمر اعلة هامة
حيدر .. حيدر

__(٤)

ماكو واحد من بعد شخصك امان
بس امامي صاحب الحق والزمان
هو بس جفة انترس رقة وحنان
ايوزع اعلة الفقرة من خير الجنان

محد بحالة اليتيم
بس ابو كلب الرحيم
جفة ممدود الكريم .. رؤف

لليتامة هوة عون
يمة همة أيئمنون
رقة بحساس وحنون .. عطوف

تفرح الفقرة .. بيوسف الزهرة .. وليها
تدعي منتظرة .. ايعجل بأمرة .. عليها
تدعي تتنطر قيامة .. جفك ايمر اعلة هامة
حيدر .. حيدر

__(٥)

ابنك الله ايعينة مولاي شيشوف
يا جرح عندة اليضمدة واليعوف
كافي بين عيونة مرسومة الطفوف
يفرك بجفة وعلى احزانة يطوف

باقي من جرح الجرح
ليلة يلجم والصبح
محد بحالة يصح .. غريب

حسرة يشهك مو هوى
كلبة باللوعة انجوة
يبدي يومة بنينوى .. نحيب

بدمعة احزانة .. روحة ذبلانة .. مصيبة
والجرح يكبر .. يمشي مايكدر .. نحيبة
ينطر وكامش حسامة .. جفك ايمر اعلة هامة
حيدر .. حيدر

___________

محمد ابو باقر الحجي

الامام الصادق عليه السلام


يا ابو الكاظم سلام
بيك جرحك ما ينام
لكربلة وذيج الخيام

_(1)

بالك اتخيل عمتك عالتل
تركض ابين الزلم تجمع نساوين

تنزل ادموعك تلجم اجروحك
لمة تصرخ خوية حركوها الصواوين

بيك جم لوعة والم واه
لمة تسمع واحسيناه
روحك ملوعها بالنوح
تذكر الطف شنهو سواه

ابدي بيمن يا كلام
بيك جرحك ما ينام
لكربلة وذيج الخيام

_(2)

يجوي بخدك دمعك الجدك
جان خدة اعلة الترب بس الرمل حار

تفزع بروحك يعتلي نوحك
ابيتك وتفتر صحت يا كربلة شصار

تفتر وتذرف بالدموع
كلبك امن اللوعة مشلوع
كربلة ما خلت اعليك
الدمع مو ينشاف مسموع

لوعة شاجر للكرام
بيك جرحك ما ينام
لكربلة وذيج الخيام

_(3)

منحترك دارك تطفي ابنارك
تراكضن نسوانك اكبالك والاطفال

تذكرت بيها محركة ايديها
من كثر ما طفت النار البلعيال

بدارك انت اطفي وتصيح
تلمة حيلك توكف اطيح
اه يزينب عمتي اه
عالوجه دمعاتك اتسيح

مرمروها شكد حرام
بيك جرحك ما ينام
لكربلة وذيج الخيام

_(4)

مجلس اتقيمة للطف وظيمة
يصعد القاري ينعة على امصابة

يقرة لحسينك وتلطم العينك
من يكلك جدك مسلبة اثيابة

من يكلك شربة حرموه
لم تسمع نحرة كطعوه
بجفك وتلطم على الراس
وتبدي تلعن بالي ظلموه

جدك مهشميلة هام
بيك جرحك ما ينام
لكربلة وذيج الخيام

_(5)

والجرح يكبر فاطمة تحضر
بمجلسك من تجي تكعد ابابة

تمشي ماتكدر يجرح المنظر
تون على جدك بدمعة سجابة

الحسرة تلجمها بضلعها
ابد ما ينشف دمعها
ادور المجلس على حسين
تحضر بهذا وضعها

وياها يحضر جم امام
بيك جرحك ما ينام
لكربلة وذيج الخيام

_(6)

تنتظر ثارك وتشتعل نارك
تصيح يا مهدي لو الحك اعليك

لحضرتك خادم يبني يالقائم
يالي كل الفرج منحصر بيك

وتاخذ بجفينك الثار
وبفقارك تلهب النار
تصيح يا ثار الميامين
تنشف جروح الكبار

لحضرتك شوكي وهيام
بيك جرحك ما ينام
لكربلة وذيج الخيام

__________

محمد ابو باقر الحجي

جذب تاريخهم بس انت اول
علي تنصيبك امن الباري انزل
ما ساجد للاصنام
بجفك صار الاسلام
جذب تاريخهم بس انت اول

_____(1)

منزل راسهم كل الي عادوك
لان انت الصدك همة يكرهوك
دورو بالاصل كل اليبغضوك
وعرفو ليش همة ما يحبوك

علي انت المحك سموك الرجال
الما حبك اذا في نطفتة اشكال
ثبتت لجلة الايام
بجفك صار الاسلام
جذب تاريخهم بس انت اول

_____(2)

الينصبولك حقد ياداحي الباب
جي قاتل زلمهم هاي الاسباب
يالمبجيهم انت يا ابو تراب
يقالع روسهم من فوك الركاب

ابطال العرب يم شخصك اطيح
من لمضت فقارك تشرد تصيح
وترفع بيض الاعلام
بجفك صار الاسلام
جذب تاريخهم بس انت اول

_____(3)

بكثر ما حاربوك اكلوبهم سود
حقد مالة نهاية وما الة احدود
على منزلتك انتة هواي محسود
يكرهونك لان بالكعبة مولود

يتربات النبي ونعم الي رباك
اخو ليه او وزيرة الله خلاك
ومنك نسل الاكرام
بجفك صار الاسلام
جذب تاريخهم بس انت اول

_____(4)

شكثر ضموك لكن مايكدرون
نورك كالشمس لا ما يحجبون
بيك شما حجو وشما يطعنون
بشخصك سيدي لا ما يغيرون

شكثر ما حاولو ما يحجبونك
ويأبى الله أن لا يطفة نورك
للحق يا علي اوسام
بجفك صار الاسلام
جذب تاريخهم بس انت اول

_____(5)

خل يسمعها مني الماسمع زين
عالحاجب ابد ماتعلة اي عين
اذا بس انت اول يا ابو حسين
موش الي اجو للدين بعدين

الخلافة تلوك الك مو ياهو الجان
مو للتالي اجو عباد الاوثان
رادت مثلك ازلام
بجفك صار الاسلام
جذب تاريخهم بس انت اول

_____(6)

شما نصبو عداء اهل السقيفة
غصب عنهم تضل انت الخليفة
يحبل الله المتين الما نعيفة
عشكك سيدي مالة وصيفة

الما حبك علي بالمحشر شلون
من ايشوف بس ربعك يعبرون
ربعك فقرة وايتام
بجفك صار الاسلام
جذب تاريخهم بس انت اول

_____________

الخادم محمد ابو باقر الحجي

https://youtu.be/R13gYv_xTcc

اوبريت (لبيك حسين)
اداء 🎙️...
#الرادود_احمد_ذاكر_الفريجي
#الرادود_محمد_ابو_باقر_الحجي
#لرادود_حسام_الفريجي
كلمات 📝...
#محمد_ابو_باقر_الحجي
ألحان 🎶
#الرادود_احمد_ذاكر_الفريجي
#الرادود_محمد_ابو_باقر_الحجي
توزيع🔊
#يوسف_الحميد
مونتاج 🖥️
#حسين_علي

ملمع لشهادة الرسول الأعظم (ص)




انا ثأر الله الاكبر
انا سيف الولد حيدر
ساذكركم في خيبر
اسمي اسم المختار

انا ثار الله ٠٠ انا ثار الله

____(١)

تبت يداه من ظلم جدي المختار
والعذبة والمرمرة باجر يحتار


نفس اسمة اسمي محمد
واني بدعواتة مسدد
وبنصر الله مؤيد
انة القائم

والعال بجد العترة
خلي يحتار بامرة
ما ينفع باجر عذرة
انة الحاكم

وبحكم الله سانزل
وبقول الحق ازلزل
وبسيف علي سارسل
من فقاري للنار

انا ثار الله ٠٠ انا ثار الله

____(٢)

كلمن لجم طه بحجي وضل مجروح
من اظهر بذاك الوكت وين يروح

كلمن محفوضة افعالة
باجر لوصير اكبالة
شيوصف ذيج الحالة
انه الغاضب

والردد كلمة اهجر
خل ايتانيني منظهر
شما يلم هم يطشر
انه الضارب

من غير حكم الباري
فالحق عليه جاري
اصليه بسيفي الناري
مأواه الصقر الحار

انا ثار الله ٠٠ انا ثار الله

____(٣)

والغيرو دين النبي وشكد حرفو
والعارضو حكم الوصي والما قبلو


والغيرو حكم وسنتة
من اول شيخ لحد بنتة
باجر تنصب محكمتة
وانة القاضي

الخالف حيدر تنصيبة
بعد الهادي بترتيبة
جفوفي تحن التعذيبة
وانة الراضي


من خالف حكم محمد
وبسيف علي تشهد
وبدين الله تردد
لن يخطيه البتار

انا ثار الله ٠٠ انا ثار الله

____(٤)

ما اؤذية مثلي نبي طه ايكول
وكلمن ظلم جدي بغضب جفي ينول


ياهو النزلها دموعة
وبروحة تجر اللوعة
باجر ونتة المسموعة
انة الهادم

ياهو الاذى بحجاية
هذا المقصد والغاية
النة المضموم لهاية
انة القادم

قد كان باسمي ينادي
عجل ياروح الهادي
قد اوجرو نار فؤادي
عجل يبن الكرار

انا ثار الله ٠٠ انا ثار الله

____(٥)

ماناسي ابد هلمظلمه كلهم يدرون
الباب المنتقم اني اهلي يسمون


من الهادي لحد الوالد
ماناسي واحد واحد
للثار متاني وكاعد
وانه المهدي

من جذوع الباب وضيمه
لركضه عماتي ابهيمه
بيدي اخذ ثار الخيمه
وانه المهدي


وبرايه شبل القسور
بيميني سيف الحيدر
جبريل ينادي وكبر
خرج المهدي المختار

انه ثار الله٠٠انه ثار الله


__________________

محمد ابو باقر الحجي

السلام على شرف الله الاشرف
فاطمة الزهراء
حجاب الله وحجة على الحجج


أسأل الله وسادتي الاطهار آل بيت رسول الله
اني يجعلنا وإياكم من المعزين والمنتظرين لصاحب الزمان عح

(#خلاني_احتار)


يافاطمة ويلي ويلي لمصابچ

_______(١)

دفع بابي عليي كوة
انحنيت وكامشة احجابي
عصرني الماله امروة
ما اعرف شنو اسبابي

خلاني احتار ٠٠ مابين النار
وبين الحايط وي بابي

والجمرة تفور ٠٠ جنها العاشور
تحضرت لخيام احبابي

جمري لهبني وصوتي يعتلي
بلساني تعثر كلمة يا علي
ضليت ادير بوحهي وحايرة
المن انادي وياهو يصد الي

______(٢)

بقيت بروحي اتلوة
من اللوعة والامي
المن حيلي بالكوة
كوة اوكف على اجدامي

بالوكفة وصار ٠٠ بصدري البسمار
نابت ما بين اضلوعي

اشهك ضليت ٠٠ بانفاسي وجيت
مخشية اوكع بدموعي

بابي ادفعة ويرجع هم دفع
بسماري صار بصدري ومنشلع
ارجف بقيت وحيلي يرتعش
روحي تلوب وهامت بالوجع

________(٣)

ازيحن بابي بايدي
وبالنار استعر جفي
عصرني وطيح اوليدي
عالعتبة صبح مجفي

خلاني اختاض ٠٠ والدم الفاض
ومحسن طايح كدامي

كوة ادنيت ٠٠ لبني وجريت
خامد النفاس ودامي

ضليت انوحن وابجي اعلة الولد
بعدة زغير وما نام بمهد
باحضاني اخذتة وضليت انظرة
ترجيتة يكعد لكن ما كعد

_______(٤)

وي محسن كمت احچي
وكلة اوليدي اسم الله
تذكرت وصرت ابچي
ابن حسيني عبدالله

هم مثلة ازغير ٠٠ بالطف ايحير
كطرت مي ما توصلة

نفس البسمار ٠٠ بالمحسن صار
باجر يذبح عبدالله

كل المصايب يمي اجمعت
من بابي راحت للخيمة مشت
طف المصايب باجر نينوى
كل العشيرة بيها تذبحت

________(٥)

امر عبدة وسطر عيني
ضربني وما رحم بية
من الضربة المني
وطاحت مني ترچية

طاحت للكاع ٠٠ تذكرت بساع
باجر هم مثلي بنية

نفس اللوعات ٠٠ نفس الچويات
ويسلبوها الترچية

نفس الجرالي عليهة هم يمر
سطرة اعلة خدها وجفها يستعر
يوكع ابوها وتبقة محيرة
باجر رقية ادوس اعلة الجمر

_______(٦)

طحت والكسرة باضلاعي
اريد اوكف ولا اكدر
ردت اخفيهن اوجاعي
اكوم وبالمشي اتعثر

كوة توجيت ٠٠ محنية وجيت
وصارت زينب كدامي

تذرف دمعات ٠٠ جتني بركضات
مرعوبة تهم بالامي

كتلها كفي دموعچ زينبي
باجر غربتچ كلفة بت علي
يذبحون اخوتج وانتي بوحدچ
فوك المصيبة ضعنچ ينسبي


___________________

محمد ابو باقر الحجي

(#تعالي)



فاطمة وينچ
غمضت عينج
روحي انتي ٠٠ يا زهرتي ٠٠ مني رحتي ٠٠ تعالي

_____(١)

دموعي سولفلي احساسج الغالي
مشيتي وصارن الدمعات مرسالي

بعدج اني
اضم راسي بضلوعي ٠٠ اسولف وي دموعي
واشهك العبرات

بعدج اني
اجر كسر الخواطر ٠٠ منو اليجبرني اناطر
بالصدر حسرات

بعدج اني
غريب ويا غربتي ٠٠ غصن وبلا زهرتي
والغصن هم مات


دمعتي بعيني
هيجي عفتيني
صدري الضاك ٠٠ من الفراك ٠٠ والله مشتاك ٠٠ تعالي

______(٢)

اردد بسمج واقراج لطمية
تعالي يم حسن يا فاطمه لية

كلشي بية
الهوة الي يمر علية ٠٠ بدونج يالزجية
يخنك بلياچ

كلشي بية
بعد عينج يفاطم ٠٠ بقيت بروحي هاضم
بعدج وفركاچ

كلشي بية
بقيت بحزني اصابر ٠٠ الي ترجعين اناطر
لو اروح وياچ


يقبل احساسج
هيج اعز ناسج
هزتة الريح ٠٠ يمشي ويطيح ٠٠ بسمج ايصيح ٠٠ تعالي

________(٣)

اصبر روحي كوة واحضن بزينب
عليج شكد تدور تسأل وتتعب

شلون اكلها
مشت وردة عمرها ٠٠ مشت منة الكبرها
ما ترد هيهات

شلون اكلها
يزينب يا حنينة ٠٠ بعد لا ما تجينة
وامسح الدمعات

شلون اكلها
ياذيني وضعها ٠٠ ولا بطل دمعها
وهادن الونات


مكابلة الحجرة
وتبجي يالزهرة
كتبت اعتاب ٠٠ كلمة عالباب ٠٠ كافي الغياب ٠٠ تعالي

_______(٤)

المن بالصبر يا فاطمه كوة
اباوع عالحسن باللوعة يتلوة


يا هضيمة
يضم راسة بزنودة ٠٠ دمع غرك خدودة
لاهدة ولانام

يا هضيمة
يكوم ويمشي كوة ٠٠ عليه كلبي تجوة
هايم ومحتام

يا هضيمة
مشة وراح الغرفتچ ٠٠ هوة يقبل تربتچ
منعصر بالام


شايل الشيلة
ومنكسر حيلة
شمها وبساع ٠٠ توسد الكاع ٠٠ من الوداع ٠٠ تعالي

________(٥)

يكل الفاجعة الصارت تاذيني
اغصن بالالم من انظر حسيني

يا حسافة
يلوب وباقي يفتر ٠٠ عليج بكلشي دور
رايد الملكاچ

يا حسافة
يصيح يمة وينچ ٠٠ احضنيني بادينچ
خل انام وياچ

يا حسافة
المشي بخطواتة يعثر ٠٠ يكوم ايرد ميكدر
والسبب فركاچ


يدور حسينچ
يسأل بوينچ
لغرفتج راح ٠٠ والدمع طاح ٠٠ صار الصياح ٠٠ تعالي


______________

محمد ابو باقر الحجي

(#بالي_يمك)



خلصت ليالي الغاضرية الغاضرية
جتي الليالي الفاطمية الفاطمية
باقي من جرح الجرح بالي يمك
يمهدي ٠٠ يمهدي

______(١)

يالعايش بريتي نفس يا اغلة من كل غالي
خليني بجروحك احس خل ينلجم دلالي

تعال وخل اشارك بالعزة النوحك
تعال وخل اقاسم سيدي جروحك
يمن فدوات اروح لحسرة البروحك

لا تبقة وحدك بالرزية بالرزية
خلينا نتشارك سوية سوية
عينك تصب الدمع باقي وحدك
باقي من جرح الجرح بالي يمك
يمهدي ٠٠ يمهدي

_______(٢)

لي هسة ما هاد الجرح لحسين حمرة عيونك
شخلت بكلبك نينوى محنية حيل متونك

تبجي اعلة الخذوهة عالهزل للشام
أميرة وبالغرب يحدونهة الظلام
يوسفة اشلون زينب تشمي بين زلام

مانشف دمعك عالمصيبة عالمصيبة
يردد لسنك يا غريبة يا غريبة
ليل يلجم والصبح ما يرحمك
باقي من جرح الجرح بالي يمك
يمهدي ٠٠ يمهدي

______(٣)

حسراتك بصدرك بقن ما هودن حسراتك
منالباب للخيمة غدن كلهن تعب خطواتك

مصاب الياخذك ومصاب اليردك
تنازع روحك بالامك الوحدك
ومن دم البواجي نازلة بخدك

تبجي لحوافر الاعوجية الاعوجية
لوتبجي لضلوع الزجية الزجية
تبجي لحسين وترد تبجي لمك
باقي من جرح الجرح بالي يمك
يمهدي ٠٠ يمهدي

______(٤)

يالمهدي هذا مجلسك والفاطمة عنوانة
لاتبقة وحدك بالدمع شاركنة وبجي ويانة

نتشرف اذا بالمجلس تحضرة
بينه جروح لأمك فاطمه الزهرة
تعالي يم حسن نقرالك بعبرة

نقرالك بلون المصايب المصايب
نبجي سوية عالاطايب عالاطايب
عالغوالي منجرح من يضمك
باقي من جرح الجرح بالي يمك
يمهدي ٠٠ يمهدي

______(٥)

مجلسنا ننطر جيتك ياسيدي وخدامك
يشرفنة التراب اللذي تسحك عليه بجدامك

يمولاي العزاء الجيتك تحضر
يعطر الجنة كلة يفوح من تحضر
ما نكدر بدونك والله ما نكدر

بالخاتمة نرفع ادينة ادينة
عجل يمهدينا علينة علينة
نسال الله بالفرج ينزاح همك
باقي من جرح الجرح بالي يمك
يمهدي ٠٠ يمهدي


__________________
محمد ابو باقر الحجي

(#تبدي_الحسرات)



باب ودخان ٠٠ وحف ظالم خان
واسمع صرخات ٠٠ ضلع واهات
ضلن للان
كل حجي الدار ٠٠ الثار الثار
ضلن للان

________(١)

تبدي الحسرات
والصبح .. كالملح .. من يطلع يلجم بجروحي

والليل الليل
من يمر .. بي جمر .. ما تهده ولا تبرد روحي

ياوضع البي اتصبر
ضلع امي شلون اتكسر
من اتخيل ما اكدر
الفاطم طبو للدار

ياوسفة ٠٠ شكد كلفة
الظالم من يطب داري

والاصعب ٠٠ دم الصب
من امي صبح جاري


يا حيل الضال ٠٠ عالدم السال
وتجري الونات ٠٠ ضلع واهات
ضلن للان
من ذاك الدار ٠٠ الثار الثار
ضلن للان

________(٢)

ياذاك الباب
بالجمر ٠٠ يستعر ٠٠ وجفوف امي اعلية مطبوعة

شايل شوغات
بي صدر ٠٠ ينعصر ٠٠ ما بين الحايط وجذوعة

مخنوكة بروحي العبرة
ما اتحملها النظرة
شلون ايعصرون الزهرة
صاحت يوليدي الثار

يمتة اظهر ٠٠ ما اكدر
اسمع فاطمة تنادي

يوليدي ٠٠ الحرك بيدي
الحكلي ياخر اولادي


ولهسة الصوت ٠٠ باقي وميموت
وذيج الدمعات ٠٠ ضلع واهات
ضلن للان
ماتطفة النار ٠٠ الثار الثار
ضلن للان

____________(٣)

الجبت وطاغوت
جمهرو ٠٠ وامرو ٠٠ بالنار الباب تحركوها

والصرح كال
والفتن ٠٠ بال وأن ٠٠ فاطم موجودة اطبوها

باجر الاول والثاني
من أظهر خل ايتاني
الروس اسحكهن بجدامي
باجر احكم بالسيف


اصلبهم ٠٠ واحركهم
بسيفي دمهم الجاري

اوذرهم ٠٠ واطشرهم
وابد ما تنطفي ناري


وبجفي الحار ٠٠ ارسل للنار
واكتب بالذات ٠٠ ضلع واهات
ضلن للان
معلوم شصار ٠٠ الثار الثار
ضلن للان

_________(٤)

باجر لو صار
هالاسم ٠٠ المنتقم ٠٠ من ثار الباب وللخيمة

وحساب ايطول
من النبي ٠٠ للسبي ٠٠ للطايح عطشان بهيمة

والمحسن ولعبدالله
الثار مربع اوصلة
سيفي اعلة الروس تعلة
وفوكي يكبر جبريل

والراية ٠٠ وياية
راية عمي ابو فاضل

ارفعها ٠٠ ومطلعها
نصر الله بدي حاصل


لا خيمة وباب ٠٠ ولا جرح احباب
تطفة الجمرات ٠٠ ضلع واهات
ضلن للان
تصفة الاقدار ٠٠ الثار الثار
ضلن للان

__________(٥)

والرجعة تصير
وننجمع ٠٠ ونستمع ٠٠ لسوالف طه المملوحة

والبسمة ادوم
وفاطمة ٠٠ العالمة ٠٠ بالفرحة تضل ما مجروحة

باجر لا تل لا هيمة
بيت الزينب مو خيمة
لا سبي الشام وضيمة
كل الخدر ترتاح

ابو اليمة ٠٠ نضل يمة
بسوالف كلها حنية

وتجي امنة ٠٠ تقبلنة
علينة بشوك محنية

احزان تروح ٠٠ تنشف لجروح
نمسح كلمات ٠٠ ضلع واهات
ضلن للان
محد يحتار ٠٠ الثار الثار
ضلن للان


______________

محمد ابو باقر الحجي

(#ابدي_باللعن)

#نزلة

العن بتكليفي
مو حجي وبكيفي
من نبي ومعصوم جايب فتوتي

_(١)

بالله استعن
وابدي باللعن
العن اللعنتهم الزهرة الزجية

هذي فاطمة
كبرى وعالمة
صدرت فتوة لعن في ال امية

واضحة الفتوى وبعد ماعيدها
فرت السبحة عليهم بيدها
ربي لا ترضة على ذولة الثنين
هاي كافي الكلمة بس وحيدها

___(٢)

واضح مطلبي
بلسان النبي
التخلف والرجع من جيش اسامة

هالقول انسمع
ملعون الرجع
يعني ملعونين همة في كلامة

وهذا واضح بالدليل القاطع
التخلف والشرد والراجع
لعنة الله علية كال النبي
خلي يسمعها الذي ماسامع

__(٣)

ماريد انتظر
منك اي امر
اني عندي المصدر اواضح كلامي

كلمة لاولي
الة بس علي
الباري شرعها لنبينا بحق امامي

يعني هذا القول واضح مصدرة
لعنة الله عاليخالف حيدرة
يعني عالشيخين مادور دليل
همة ملعونين دنية واخرة

___(٤)

احجي وارتجل
بالحق ما ازل
ما اجامل بالحجي وية اليبغضون

ديني المعتقد
ثابت بالسند
هو اظهار الحقيقة لليدورون

ما اجامل فعلي واضح امرة
هاك اخذ بلساني واسمع جهرة
لا عمر لابو بكر لا غيرة
عمي وشتحجون هاي الزهرة

_____(٥)

المهدي المنتظر
باجر لوظهر
ايطلع اجساد الخبيثة من كبرها

وتبدي المحكمة
ويصرخ فاطمة
وبيدة شايل سيفة ويحقق امرها

ويصلب الشيخين فوك الشجرة
بيدة ياخذ ثار كل العترة
واليجامل هسة والماراضي
باجر هناك يحير بامرة


___________

محمد ابو باقر الحجي

(#سادتي)

#نزلة

انا سلم لمن سالمكم
انا حرباً لمن حاربكم

___(١)

(اللهـم العن اول ظالم
ظلم حق محمد وال محمد
واخر تابعاً له على ذلك)

هالرافع ادية
ادعي بهالمسية
يارب البرية
العن ال امية

سادتي في الرخا والشدد وياكم
ثابت بكل عهودي ولا انساكم
اني والله عدوا لمن عاداكم
اني والله ووليا لمن والاكم

___(٢)

(اللهـم خص اول ظالم بالعن مني
وابدء به اولا
ثم العن الثاني والثالث والرابع)

من أول خليفة
لحد ثاني خليفة
واسحاب السقيفة
نطفة المو شريفة

بالبرائة منالعداء صبح عنواني
يصبح اشكال اذا ما نطقها لساني
لعنة الله على الأول وعالثاني
من عمرهم لحد اخر السفياني

____(٣)

(لعن الله امة اسست اساس الظلم والجور عليكم
أهل البيت ولعن الله أمة دفعتكم عن مقامكم
وازالتكم عن مراتبكم التي رتبكم الله فيها)

من ذيج العصابة
لتسموو صحابة
الباري في كتابة
واعدهم عذابة

رب الأكوان هو اختار حجج لعبادة
اية الطهري منسوبة بس للسادة
حكم الاسلام والاركان علي واولادة
والتخلف عليهم جهنم رادة

_____(٤)

(اللهـم اجعل محياي محيا محمد وآل محمد
ومماتي ممات محمد وآل محمد)

ايامي وسنيني
الراحن والتجيني
بحبهم كافليني
وثابت في يقيني

ربي عيشني عيشة على مرضاهم
واختم ايامي كلها على ذكراهم
الدنيا ما تسوى كلها فقط وياهم
للتراب اليدوسونة روحي فداهم

____(٥)

(وأبرأ الى الله وإلى رسوله
ممن اسس اساس ذلك وبنى عليه بنيانه
وجرى في ظلمه وجوره عليكم وعلى اشياعكم)

ايات البرائة
نزلت من سمائة
ثابت في ولائة
المتبري جزائة

ابرئو للعلي العظيم العالي
ما اجامل واميل اعلة ديني الغالي
اليزعل وخلة يزعل ابد مابالي
المهم ربي يرضة بهذن افعالي

____(٦)

(واسأله ان يبلغني المقام المحمود لكم عند الله
وان يرزقني طلب ثأري
مع امام هدى ظاهر ناطق بالحق منكم)

يارب البرية
لعيون الزجية
كل الرافضية
تدعي لهل قضية

ربي عجل ظهور الامام الغايب
صاحب الثار على الثار يجي ويطالب
كلنا ويا اعلة يمنا سوية نحارب
والظهورة وقدومة علينا نراقب


__________

محمد ابو باقر الحجي

(#الجيتك_تانيت)

#شور


يا صاحب الزمان
____

شكد صعب فركاك
كلي وين الكاك
وانظر بعيناك
يابقية عمري وروحي

يابقية الله
كلبي بعدك تاه
سيدي والله
ماكو غيرك يفهم نوحي


تاه بغيابك واظلم دربي
اخرني عنك كلش ذنبي
مدلي اديك ونور كلبي
خليني اصير وياك


وينة غايبي متى يجي
من كلبي شاجر الك حجي
وعيوني ترجمهن البجي
اين ثار الله

_______

سيدي حنيت
دورت ملكيت
الجيتك تانيت
باقي اكول اليوم وباجر

اني اجافي هواي
اعذرني يا مولاي
نادم اني واجاي
كلبي بدونك صاير عاثر


اني النسيتك اجيتك اريدك
مديت ادية واريدن ايدك
اعطف علية احسبني عبيدك
مرر علية ضواك


دمعي يرتجي ليل وصبح
ما حسبت انت تنجرح
افعالي بجروحك الملح
واين ثار الله

__________

الكل عشك اسباب
بية كومة اعتاب
يمتى ذاك الباب
ينفتح وعيوني تشوفة

يطلع الموعود
مو حلم موجود
هيج رقة وزود
تشبح عيوني علية متعوفة


لكن ذنوبي تجرني وتيهن
واركض وافر بروحي واطيحن
وادركني يا مولاية اصيحن
ما ايست ناديت


باقي عالامل ما ايست
عمري الك ناذرة وعشت
بتقصيري اجيتك وتاخرت
اين ثار الله

__________

يا عشك ما مات
عمري كلة الفات
لسة بالهفات
بكلشي ميت الة بشوكك

رافكت لجروح
وكلشي ما مسموح
للكلب والروح
بس فقط مسموحة طيوفك


ادري المصيبة التاخذ روحي
وادري دواها الفركة جروحي
هية المحنة ادور نوحي
لازم اون بالليل


ادري كل حجي لازم بجي
يتلخص بلوعة ينتجي
مقصد دموعة متى يجي
اين ثار الله

________

متعب الخطوات
والتفت مرات
بلكي منا فات
باقي ادير اعيوني بحسرة

بحسرة المتهون
اعرف المضمون
ماصرت مجنون
حتى اجازي عشكي بنظرة


كون اليعشكك يبقة مساهر
شاجر حركتة بلهفة يناطر
كون بجروحة وياك ايسافر
ويقاسم الالام


حيلة ينهدم كلمن سمع
بالغربة معشوكة مارجع
مايرون جروحة لو جزع
أين ثار الله

_______

محمد ابو باقر الحجي

سلام عليكم ورحمة الله

اي قصيدة تحتاج لحنها
التواصل على التلكرام او بقية جهاة التواصل
(٠٧٧٠٧٩١٢٤٦٤. محمد ابو باقر الحجي)