Ётафтонь фкя кой-кодама содаф мор
Рифмась лиссь колаф
Улема, тиемс мокшень кавер морть лангс?

Аф содаса, мезьса тяфта педсь ваймозон морсь.
Но морть мелодияц, лирикац вятихть эсон арьсемс.
Мон – уды гигантан. Эсон ули оцю потенциал. Но мезевок аф тиян, апатиясь и кальдяв мяльхне сяськондсамазь. Якан ошева, мезевок няян и арьсян «мон тиелень лиякс», «а тянь полафтолине», «кальдявста ащи, петелине лиякс»
И, сай пингсь, мзярда вастозон сай кивок лия(улема), мзярда тяфтак семботь кадса.

А мон аф кадса тяфтак. Карман тюрема.)
Но аф тячи. Тячи лия прябалане и тевне. Ваймамска эряви, кочкамс вийхть.
Нинге одан и карман ламос ванфтома эсь прязень. А алкогольда аф симан. Раман Red Bull, тиян тев да молян мадан.

Тячи казине эсь валморонень кельгома кураторозти университетста. Сон кунара учсь эздон, анась автографовок, ёрай лятфнемс, кодама ульсь студентоц.
И печатлань 7 валморотнень, тонатнень, конат мольсть фкя-фкянь мельгя. Казень аф аньцек валморот, а тага, эряфозень пяльксонц.
А фкя вастса кадонь «Кельгома мархта, Илья!»

Лия эряф

Тя кудса мзярда-бди учсесть конакт,
А тячи азорсь апак учсек али кулось коса.
Учсень лямбе киза, од панар кодань,
Аньцек ловнясь нинге ашезь сола.

Футболонь паксяса касы кумбарав,
А трибунаса водкада симихть.
Илада меле кунара сценать урядазь,
Вастозонза мезевок аф тиихть.

Куросон сембонь васьфнезь кшиса-салса,
Кулхцондонь кайги морот эзем лангса.
Лятфнесайне лямбе пинкнень прясон,
Мзярда ни ворьгодян тяста?

Кулень, кода кенярдсть, сотневсть кяльхть,
Тяни кулян, кода пяшкодыхть и сотнихть.
Вальмава няендень кувака кальхть,
Сембонь прафнезь, пенгакс молихть.

Васта ашень полафта, а сембось полафтсь.
Аф революция, аф кризис, аньцек пинге.
Козовок ашень яка, а сембось ётась,
Вдь тяфта улендсь тиньге?

Кати мзярда сельмоне палсть мезе-мезе сёрмадомс. А тячи сёрмадан аньцек тнярда, мзярда арьсян, сай мезе-мезе прязон. Тнярда пряботмоса сембе мяльнень тарксине, аньцек и вешень кодамовок валхт валморос.

Надиян, аф эльбятькшнян, кати-мзярда интервьюса али коса мярьгонь пеедезь: «мзярдовок аф кадса тя тевть». Тячи тяфта аф корхтан. Потмосон ули вий, кона аф максы тейне лоткамс. Содасасть, ломанць шавф, тапсеф, стакаста таргави ваймоц, но таргави!

Кие лувондсы валморонень, няйсы, кода монць полафтонь, колма кизот ни интернетса нолнян мезе-мезе. Ушедонь лиезь, сельмоне палсть, эсон содай сяда лама ломань эрь шиня. А тячи лия тематикась, мяльхне, ломаньда кржа варжаксты валморонень лангс.

Аф тянкса сёрмадан. Мезсь ашезь полафтов? Философиязе. Валмороне аф медиать колга. Тя мон корхтан сембонь мархта. А кие кульсы – ся кульсы

Пинкне полафтовихть? Мезевок аф азан, няйсасть тинць)

You really read this, are you serious??

А, улема, тя сембось он?
Мон сргозян щаскиге. Тейне 17, якан школав. Сембось сетьме…
А мон аньцек ушедонь няфтема пря интернетса, а инголе – зрнянь пантт, валда и сетьме эряф.

Сёрмадан и кулхцондан мор суоминь кяльса. Мяляфтса, кулхцондыне ся пингста, мзярда аноклань экзаметтненди. А тага, покоди ВПН-ць телефонцон, тнярда тянь колга ашень куле)

Мяльне шарсть тона пингти. А вдь, сембось молендяряль лия кигя. Мелавонь эффектть содасасть?

Косолень тячи? Месенделень тячи? Мезе улель мархтон? А шисолень?

Арьсян тянь колга, мезе учендонь. Кой-мезе ули, а кой-мезе аш, пяк аф сатни.

Сюкпря Шкайти сембонкса, кда моли тяфта, лисенди, тяфта и эряви.

Сетьме ве. Ашкордань. Илья.

А вдь тя кизефксть макссине эстейне 3 пингста
1) мзярда сатонь аф кржа сатфкста
2) мзярда ванан семботь лангс, мезе тиендеви масторлангса
3) мзярда кальдяв

Но меквалсь семботи ульсь фкя: тяфта эряви! Тяфтама кись!

Тячи вайбозе тяфтама

Сёксе вдь..

Тячи аф маятаманень колга. Тячи азондан кяльть да ломаттнень колга, конат эздонк ичкозет, аньцек эрямопингсна, эряфсна малат теенк, мокшетненди.

Бретононь кяль, васьфневи Бретань регионца, шивалгома ширень Кранцмасторса(France)🇫🇷
Кяльсна канневи Кельтонь тналти. Вага кода, лия кельттне, кода шотланттне, ирланттне, валлийхне, корнатне (ульсь тага мэнонь кяль, кулось ётай сядокизоста) эряйхть Бритонь цёнгатнень лангса, а бретононь ломаттне шаштовсть кунара Кранцонь мастору. Лятфтасть мокшетнень, минь вдь аф Мокша ляйть ширеса эвондаме, а кяленьке састь Кевть(Уралть) ширеста.

Мольхтяма сяда тов. Кранцмасторонь паспортсь мярьги сембонди: тон кранцонь ломанят, тон – Людовиконь, Наполеононь, Эйфелень, Шанелень, Гюгонь, Монень, Кюринь да лиятнень оцю юромснон эса поладыят. Аф ваномок, кият тон, афкуксонь кранцузат, Марокконь али Алжиронь эмигрантат, равжа ломанят али БРЕТОНАТ, тон – кранцузат. Лия ширеста, кранцонь ломаттне няйсазь бретоттнень, кода рдазу, шава, «вирень» ломанькс. Лятфатсть эсь прянтень, теентьке вдь мярьгихть рузонь ломанькс паспортонь коряс, а сяка рузонь ломаттне лангозонк лиякс ваныхть, кой-коста дискриминация мархта, тяда васькафне, васьфнеде. (Кодамовок кальдяв мяль да сепаратизма аш, аньцек фактат.)

Кати-мзярда Бретань ульсь кирдемасторкс, мзярс ашезь пачкотькшне кранцонь коронась. Миньге тяфта ульсь, Пурешень пингста, кепотьксонди.

Тага. Хуш бретононь ломаньда кржа, а диалекттнень колга аф мярьгат стане. Эрь Бретанень аймакса ули сонцень дилаект, пцтай кода минь, Мордовияса да Равань ширеса. Синьге ули тяфта, мзярда аф шарьхкодсак ялгацень шабрань аймакста. Монга тя пингс аф пяк лац шарьхкодса ару Зубунь корхтамать.))

Еуроняемань моронь пялькстомаса 2022 кизоня Кранцмасторть няфтезе группась, кона моразе марнек морть шачема кяльса. Лемоц – Fulenn. Ванан, кенярдян: катк юромсь емла, аньцек виец оцю.

Мокшетне тяфтапт: кда няйхтяма мезе, мольхтяма инксонза, тихтяма станя, кода эряви, да кода ёратама, кивок аф шоряй теенк. Бретоттненьге тяфтама ули, тянди лемге макссть – Doare. Кранцмасторса содасазь, ня ломаттненди мезевок аф шоряй, кда мезе-мезе срхкасть тиемс. Кода мала теенк, кодама содавикс факт.☺️

Валмороть атмосферац тя пара морть лаца

Да, кадыне каналть, лоткань сёрмадома од валморот, арась сякокс тонафнемать лангс, тейне аф эряви кельгома ломань, лама прябалада, конатнень саворня ётнесайне, но сяка илядонь чиллонь цёракс🤙🏻

Тячи мекольце шись… Мекольце шись 2024-це кизоса. Ковгярьксса полафтови лувкссь, сембот аноклайхть, учихть мезе-мезе од, кати-мезе павазу.
Ули тренд кизоть песта азондомс результаттнень колга, сась моньге пингозе.
Ушедсь кизось лац, вайомсень кудса, максыне сессиять, мрдафтыне стипендиять. А Мордовиять оцюняц казсь тейне казне. Оцю сяськома ульсь, кода мархтон кенярдсть сембе мала ломанне. Бабазень повфтазе фотографиять нежеть лангс, коса ащан мон, Здунов и Ольга Васильевна – «Мокшень Правда» газетса оцю редакторсь, а тянь мархта, пара ломань, кона лама мезти тонафтомань. Ванондонь исяк фототь лангс, кундань ностальгия.

Тяни сяван тяфтама кизонь пакш: Даволков-Марайков-Шудиков. Да, азса, инь цебярь пингсь тя кизоса. Монь палсть сельмоне. Ульсь покодема вастозе, кельгома ломань(ужяль, тусь), а тага, оцю перспективат! Кепотьф мяльса ванонь омбоце кизоть пялькстонц да сай пингть лангс. Лама мезе учень. «Три Дня Дождя» пуромкссь макссесь концерт ошсон, улень тоса васенце ряттнень эса. Синь музыкасна лездсь тейне 2023 кизоть песа.

Сась панжиковсь, а мон сизень, ардсь прязе. Универса машнихть, покодема вастста тунь. Кельгомаса тага аф удалай. Но пингсь пара, лямбе, сетьме. А сяда тов, топодсь тейне 20, од этап эряфса.

Лямбеков–Псиков. Ушедсь кизось. Ётань тёждя сессия, практика. Тянь мархта мольсь Еуропань чемпионат футболса, ваныне сембе налхкоматнень. Ульсь пара тейне, ваймосень, ётафнень пинге лац. Максыне практикать, тейне путсть автомат, нолдамазь сяда рана.

Ваймань аф лама и лисень покодема велеса, кочкань ярмак. Ётась ков шить ала, но покодень лац. Тяфта и кизось ётась.

Но кизоть мекольце шиц ульсь сяда пара. Цебярь ялгазе Мария Маршакова нолдась од коллекция, конань лездонь няфтемс сценать лангс Даньшино велеса. Марнек шись ётась лац, а куду мрдань ни сёксенда, васенце шистонза. Кундань лама пара эмоцияда да энергияда.

И ушедсь сёксесь. Тонафнемс арась стака, путсть тяфтама программа. Якань автошколав. Полафтовсь сембось, арась стака. Тинць няесть, кода полафтонь, кода тейне ульсь стака, кодама валморот нолнень.

И вов, сай од кизось. Палы сельмоса аф ванан. Аф учан тяни мезевок, стабильностьши аш тячи масторлангса. Тяни эсь павазозень инкса карман тюрема. Сембось кядьсон, аньцек инголи. Кда пандсь аф моли Магометти, то кинди молемс? Курок тейне максомс сессиять, тиендемс тефт, а сяда тов – эряфозе.

Ялгат, сюкпря, мес уледе да илядоде мархтон, кенярдян, мес улихть перьфкан тяфтама валда да пара ломатть. Кельгтядязь. Уледа шумбрат, ванфтость эсь прянтень. Павазу Од киза да малаткшни (а кинди, топодьф) Роштувать мархта❤️🎄

I'm back..🤫

Аф содатя.

Одкс маряса содаф ёжать,
Тейне кати-мес мрдась.
Тяфтапт няендень ни тёжят,
А эздост стама аньцек фкя.

Шава вастса тага юмафтонь пря,
Тейне няфтезе, коса лисемась.
Ласькозь ширезонза молян, кенярдян.
Сембе, пачкодень, аньцек эльбядень…

Конашкава ульсь тейне мала,
Тяни кати-мес ащи ичкозе.
Куцень вяри, коволнятне пильгалон,
Курок праян, лиендян, мзярс ашень сргозе.

Аньцек ёран азомс: мон аф содатя!
Кият тон стамсь, мезе эздон эряви?
Кадомак ни, саты, мон аф содатя.
Сокоран, котоце ёжазе аф маряви.

Ламос учень сатфкс, сатонь лазкс,
Конашкава ёнюста кундамазь.
Пара, мес панжемс сельмот макссь,
Сембось одкс уставась.

Кие тя ульсь? Васенцеда няйса.
Афоли, ни васедькшнеме марса?
Содай, мезьда пелян, мезе прясон,
Кода эсон сатомс. Аньцек ёран азомс…

… Мон аф содатя!
Аердт ингольден, листь прястон.
Юкстамак, ваксозон аф нолдатя,
Аф эряви вятемс кядьта.

Васенцеда сёрмадан тяфтама стака валмора. Сон лама кода шарьхкодеви.
А кие васедсь мархтон? Од стирсь, арьсеф ломанць прястон али монць? Тя стака он али афкуксонь эряф? Кинь колга сёрмадонь: тя улень мон али тон?
Меквалсь кизефксть лангс вешеви прясот лувомда меле.

Учеда аф ламняс. Симан сянгяря чайняда да мрдан, 5 минутат!