ОН
/Илья Первойкин/

Семботь, мезть няйсак –тя вдь аф виде,
Тон онозот повоть, сяс ёфси тят пеле.
Вов тон лият и вярде модати ванат,
Но каттядязь вийхне тонь, и тон праят...

Веляда ащат тон копорьцень лангса
И няйсак, кати-кие озада тонь вакссот.
Лезды тейть стямс и мархтот корхтай,
Аф кизефтят мезе – семботь сон содай.

Няфти, ков молема тейть сяда тов,
Тона пандть шири, коса няеви лов.
«Тят кема ломанти, кинь мялец шавомс, –
Мярьги тейть, – эздонза эряви ласькомс».

Но аф кенерят тумс корхтайть ваксста,
Таргасы пееленц, туй мельгат ласькозь.
«Тят веронда мезтивок – куломати, вети…»
А сонць кундатанза тонь и кълдомаце веры.

И вов съргозят тон кельмаза ливозьса,
Вальмяцень ала суви-аварди пинеце.
Онце ётай, но аф каттанза пелемась,
Пелькс оду матодовомась, ононь няемась.

Содасак тяни и шарьхкодьсак тонць,
Няфтекшесь мезе веньгучкань онць:
Аф кармат верондама тон кинди повсь,
Пеельсь аф верыяй эста, аф архтови ловсь.

ТЮРЕМА
Лемтьф Рокки Бальбоа боксёрти
/Илья Первойкин/

Тон няендить, кода прашендонь
И шудесь верозе.
Пикссемстон рингса кадыне
Аф фкя пеезень.
Но кяднень ашине нолне –
Тага молень тюрема.
Теенза стафан, кода пунясь
Панарти сюреса.

Тячи аран мон карань-каршек
Сяськиень карксть инкса.
Аф ужяльдсьса эсь прязень,
Катк куломазон пиксыхть.
Прафтомац вии тюрить мархтон
Тейне аф тёждя.
Стакат кирдемс върьгятеманзон,
Няеви, цёрась ёжу.

Сокор ломань лаца яфиян кядьса,
Виенц аф няян.
Эрьгязе маштсь, верботмосан монць,
Но сяка аф праян.
Ёрдайне копоренц лангс ёжефтома –
Лоткафтозь тюремать.
Сяськись тя веры пикссемаса – мон!
Тон кулемайть?

Ломанень эряфське тяфтама –
Кувака тюрема.
Прясот киртьк тонафты мяльть:
Сяськома – афток кулома!
Кода стака ба тейть афоль уле –
Тюрьхть пети!
Перяф тяфтама сталмоса кись
Павазти вяти.

Седизе лазф.
/Первойкин Илья (Pervojkań Iľgä)/

Тон ащат, монь лангозон ванат.
Мон ащан инголет, учан, мезе азат.
Сембе тонь валхнень кунара содаса,
Сембе тонь мяльхне сёрматфт конясот...

Сави теенк явомс, кельгомать тусь,
Монь седизе лазовсь, оцю ризф мусь.
Семботь тя эряфса ули эсь пец,
Тяфта и мархтонк, сась кельгомать пец.

Мекольце паламась, мекольце валсь,
Мекольце няемась, мекольце ванфць.
А тяни монь эздон ичкози архт,
Мон тяни ётай пингса, инголи ватт...

И тяни мон кулонь потмоса!
Бъта кяжи вень онть потомса!
Тя аф эряф - тя стака маятама,
Маятаф прясон аньцек куломась.

Азат тейне и тядяцти, што алятне фкат.
Азк, мезе мяльсот, мон аф кулхоцондте.
Фкять учса - мзярда сельмингольден туят.
Виде, мон кяжиянь, но нинге кельгте...

Курок тя ётай, пингсь семботь пъчкафтсы,
Эряфсь моли, пингть инголи кандсы.
Стак эсь лазф седицень, мекольцекс азса.
Мон потмоса кулонь, юмань эсь мяльсон...
Сай пингсь учтанза, мархтонза павазсь,
Тят мяляфта эсон, минь ётксонк сембось юмась...

И тяни мон кулонь потмоса!
Бъта кяжи вень онть потомса!
Тя аф эряф - тя стака маятама,
Маятаф прясон аньцек куломась...

Тяса ульсь.

Тяса ульсь монь васенце кельгомазе,
Тяса од пингозень эряфозе шумордазе.
Тя вастть аф мзярдовок аф юкстаса.
Аварьгодан - мзярда сонь юмафтса...

Сембе од эряфозе ётась тяса,
Юмсень най тяса - оцю кудть пряса.
Идькс пингть и школьнай цебярь кизонень
Мяляфтсы тя вастсь - монь ёмла "пизозе".

Тяса мон васенцеда палань оцтерь мархта.
Тясовок эсь оцю кельгомазень юмафтонь...
Монь цебярь ялгане кочксевсть тяса мархтон,
Тясовок мон колаф мяльса ащесь ськамон.

Моли савор пингсь и моли вишкста эряфсь.
Вов и мон кунара касонь, аделавсь школась.
Но мзярдовок аф юкстаса мон тя вассть,
Коса и кенярдень и коса сельмоведне прасть.

Тяса ульсь монь васенце кельгомазе,
Тяса ульсь васенце ламбама паламазе.
Тя вастсь най кармай монь колаф седисон.
Мон тяса касонь и кулсень эсь потмосон...

ЛУВОМА

Моли пингсь, полафты сембось.
Тяни конаце полафтсь кизось.
Минь сембе полафттама, аратама лиякс.
Сиреттяма, бъта аратама шобдавать эзда илядьс.

Историяньке козя, лама мезе минь фталонк.
Сире пингсь туй, одсь сай минь пялонк.
Сембе кизотнень эса минь най лувонттама.
А мезе кармай сай пингть? Тянь эса учтама...

Фкя. Курок минь шиньке мады...
Кафта. Минь мастороньке курок срады...
Колма. Сембось кърьвязи перьфпяле...
Ниле. Кулотама курок, тяфтама мяльне...
Вете. Юмай сембось, мезевок аф иляды...

Пелят?! А мархтонк тяфта въдь кармай.
Арьсек! Мезе тефнень эзда мархтонк кармай.
Мезевок аф юкстави - тянь мяляфтсы сай пингсь.
Учт, тяйть семботь няфтьсы сай пингсь.

Фкя. Курок минь шиньке мады...
Кафта. Минь мастороньке курок срады...
Колма. Сембось кърьвязи перьфпяле...
Ниле. Кулотама курок, тяфтама мяльне...
Вете. Юмай сембось, мезевок аф иляды...

ЮМАФТОНЬ

Туть ичкози тон, монь кадомайть.
Станя же курокста, кода и появать.
Ётась лама пингта, а мон лажадонь.
Прястон аф лисеват - повоть мялезон.

Вешендян эсот мон - аф лисенди кодавок.
Ёрань тонь юкстамс, ульсть седизень ваксса лият,
Но павазозе ашезь са, синь аф тонь кодямот.
Аф сувавихть седизон, кода тон - синь лият.

Тя пингс ужяльдян, мес минь явоме,
Ризфозе монь потмосон аф тушенды.
Кадомс ба тя сямботь, кядьса яфодемс,
Но стака тянь тиемс, кядьне прашендыхть.

Максолине сембозь, аньцек тонь ба мумс.
Кадомс сембе прябаланень и мельгат тумс.
Молемс ба шобда киге, и веть, и шить.
Надиямс, што шобда ковсь тейне валдоптсы кить.

СЯРЯТЬФ КЕЛЬГОМАТЬ ЭЗДА

Пингсь, мзярда улеть монь мархтон,
Кунара юкстаф и ёрдаф монь прястон.
Тя кяжи веня тон ашеть мърда куду,
Кати коса юмсеть, а мархтот тя сюдусь.

Сембе тя "калтатьф" веть ашень уда,
Сембе тя веть мон, шава прясь, эсот учень.
Аньцек тон тя цёрать мархта лацкас "удоть",
Содандярялеть, мзяра тейть интернетса сёрмат кучень.

И фкятьке афи лувить, бъта ашеть няе,
Тонь въдь тефне ульсть тя сюдуть пяле.
А тейне мярьготь, што варжасак тядяцень.
Васькафтыть монь, кельгомазень, ваймозень.

Тяни аш мялезе няемс тонь,
Аш мялезе кулхцондомс эсот.
Тят азонда, кода кельгсамак монь,
Сембе тя историясь ащи ни песа.

Куроконе юмак монь сельмингольден,
Сембось мархтот содави, тук эздон.
Аф ётай тя сярядемась, мзяра ашелень пичеде.
Колавсь монь потмозе, кивок ба лездоль...

ШОБДА ШИРЕСА

Пеель кядьсот - тя аф аралай тонь эсот,
Лама мезе учи эсот тона песа.
Тя аф эряф, тя - оцю тюрема,
Тондейть эряви сяськома - лиякс кулома.

Верцень нардак - ашезь аделав сембось,
Тя нинге ушеткс, пара - пильгце аф пяк керовсь.
Куломашице якай вакссот, фкя аф виде аськолкс - тон кулат,
Кодамовок лезкс тяса косовок аф муят.

Куломать мархта тяса эряй пелемась,
Тяста нинге кивок жифста ашезь са.
Ватт пильгалот, ватт эсь мельгат,
Вакссот пелькссь, коза тон аф ванат.

Тюрьхть и мольхть, тят вана фталу,
Аньцек пелемась тейть шоряй и вяти алу.
Сембось сяряди и пилькне аф кирдихть,
Но тюрьхть пети, мзярс кирди седись.

Курок тя аделави и юкстави кода кальдяв он.
Тя шобда ширесь ашезь эйфте тонь...
Содат тяни - ётавихть сталмотне,
Мольхть най пети, къда кярьмодеть.

СЬКАМОН

Мон ськамон, мес арьсят, што аф павазуван мон,
Мес тон арьсят, што тейне тянь эзда стака?
Тяфтама эряфти мон кунара тонадонь,
Шитне фкя фкянь мельге молихть - историясь тяка.

Моли пингсь, кизотне курокста лиихть,
Полафтови сембось, но аф эряфозе...
Мезе аньцек ашезь няе сельмозе...
Няине, мезе ёжатне ломанть мархта тиихть.

Тяфта ульсь и мархтон, мон маятань.
Сюду кельгомать эзда пяк сярядень.
Но тя сембось фтала, саты тейне пелема,
Мон пяк кунара лоткань кельгома...

Тя стака ёжась тейне аф содаф тяни.
"Исяк" тянь эзда маятань - но сетьман тячи.
Кельгомань ёжатне аф най паваз кандыхть,
Синь кальдявти эряфти тёждяста вятихть.

Кивок тейне аф эряви и монць аф эряван,
Улема, кати-кинь кельгомс мон тяни аф кенерян.
Но тянь инкса мон аф пелян, аф ризнан,
"Шобда ширеса" сембонь эзда юмань.

КОВ ЮМАНЬ?

Масторозе каладсь, кядне алу прасть...
Эрь шиня прязон сувайхть стака мяльхть.
Од ялгазе ули - прокрастинация.
Прябалане сядизон пяк ляцихть...

Простямак, мес ламос монь аф няйсамак.
Кенярьдян, мес нинге васьфтсамак.
Лама пингта ётась, нинге монь учсамак.
А мезе ульсь мархтон – тондейть азондса.

Пингсь моли - мархтонза кядьта сявомань.
Вятемань од эряфти, семботь няфтезе.
Мольхтяма сяда тов – мархтонк прябалат.
Мярьгсь сон тейне, што тя – од ялгане.

А ялгатне, синь тушендыхть-сашендыхть.
Эрь прябалать эсь смузец, синь аф фкат.
Мезе мархтон лиссь, арьсян, шарьхкодить.
Вага мес, мон "модамасторозе" прась.

Вийне эздон тусть, сединязе лазф.
Колаф мяльхне молихть цёрань пряс.
Ульсть мяльхть, што тевозе шумордай,
Аф нолнян кятть, нинге кемоста кирдян.

Корхтань въдь, што эряфсь - тюрема.
Вийти сяськомась, лафчти - кулома.
Молян сяда тов, аф максса прязень,
А тондейть, сюкпря, мес илядоть мархтон.

КИТЬ УШЕТКСОЦ.

Эрь историясь кати-мезьста ушеды.
Ушетксста эсь киганза сяда тов тушенды.
Ламотне шумордавсть, а ламотне нинге молихть,
Ламотне юкставихть, а ламотне седис повихть.

Ушедсь моньге кизе, пинге азомс эсь колган:
Коста мон лисень, ков и менди молян.
Нинге ай содаван, но содан эстейне питнеть.
Аф кадса эсь тевозень, кодапт ба ашесть уле шитне.

Мон лисень Исавелеста - цебярь васта,
Историязень ушетксоц моли тяста.
Мярьгат, тяса мезевок аш? - тяса шачсь ваймозе,
Тяса шачень мон, тясовок кармай калмозе.

Сань поэзияти монць – кельгса тя тевть,
Сон ламотнень кеподезень, кодама кепотькс афи сефть.
Улема, поэзиясь эряфозень полафтсы.
Въдь сон ламотнень ламоти тонафтсы.

Тейне аньцек кемзисем - аньцек ушедонь,
Ламос эсь кизень тя эряфса вешендень.
Инголе лама прябалат и сатфкст.
Монь эряфсон ушедсь оцю пялькс.

Кизонь илядь.

Сетьме кизонь илядь,
Вень шобдаса мархтот юмань.
Тя куроса аньцек кафоненк минь,
Ковнясь валодоптсы теенк кить.

Лиять колга тят арьсе, теенк пяк пара,
Стака тя илядьня аньцек кармай явомс.
Тон туят, а мон юман...
Тя кувака весь тейне пяк нюрьхкя.

Ванан лангозт - седизе лоткай,
Сембе мяльне аньцек тонь колгат.
Мон урмаськодонь мархтот.
Монь сяряди прязе...

Кельгомась тяни эряй минь прясонк.
Кемоста мольхтяма кядьта, кивок аф явсы.
Монь търване пяк палыхть, ёран тонь паламс...
Семботь ба максолине, аньцек тонь паламс...

Кельгтя тонь вииста, кода Дракулась верть.
Содаса, што тоньге прясот тяфтама мяльхть.
Сявомак кядьта - мон курок "ваян",
Тямак нолне, мон въдь аф няян...

Мяльне эряфозень мархта»

Тейне аф эряви сатфксонь ки,
Тейне ба няемс, кода валги шись.
Лама ярмаковок аф эряви,
Мархтост эряфсь аф няеви.

Съргозень. Аф эряви мезевок,
Штамс ба, ярхцамс и молемс.
Шобдава мархтон аф корхтават,
Валга аф азан, аф и ёран азомс.

Лама прясон монь мяльда,
Исяк тёжя, тячи аньцек сяда.
Эряфть и павазть колга монь мяльне,
Лия прбялатка прясон сатнихть.

Илять сизефан, но аф ирецтан,
Тейне аф эряви, мон аф симан.
Мяльсон аньцек ваймамс и удомс,
Но тя пингть мон мархтот корхтан.

Аф удован, сёрмадан валморот,
Мзярда аделаса - матодован.
Кельгса тя тевть, нолнеса мяльнень,
Эрь пяльксса тон эсост няят.

Тейне аф эряви цебярь карьера,
Улема, тейне эряви, оцю кельгома.
Аф мазыян, аш мазыши шамасон,
Сембе цебярьсь ули монь ваймосон.

«Улема, тя аньцек он?»

Тон юмать станя же вишкста,
Кода эряфсон появать.
Эряфстон лама сявоть пингта,
Но лазф седи мархта кадомайть.

Но кода сембось парста ушедсь:
Якань мон ульцява, ульсь пара ушесь,
Молень. Арьсень, кода пара тейне,
Но лоткань – стирня инголен няян.

Арьсень: няине, сяда тов мзярдовок аф няйса.
Но эльбядень, эрь шиня няендихтень.
А къда саян куду, тон аф сельминголен, а прясон.
Ой, менди мон тонь тънярда васьфтихтень?

Фкя шиня тейне павазсь "пеедезевсь".
Ванан ичкозде, а тонь кескавняце сязевсь.
Ласькан тондейть – ёран лездомс,
Тя монь пингозе, аф карман виздемс.

Мон лездонь тондейть, вятихтень кудозт,
Молемста, лац корхтаме, кода ульсь пара,
Ужяль, мес марса улеме аф ламос,
Да и куроса шобда, пингсь ни удомс.

Тя шиста тон арать тейне мала,
Пингта марса ётафнеме лама,
Фкя-фкянди якаме минь инжикс,
Арьсень, улема, мезевок минь лиси.

Эльбядень. Хъть тондейть мархтон пара,
Кельгомаце аф лангозон въдь ваны,
И арьсеть тон аф мархтон ърьвяямс,
А мон тондейть улень аньцек ялгакс.

И фкя шиня аф кирьдевонь и мярьгонь:
"Мон кельгтя тонь, мес тон аф няят?
Маятан, эсь потмосон кулсян,
Тоньфтемот мон курокста юман.

Шарьхкодят? Варжакст, тейне пяк стака,
Мяльхне колгат эрь шиня монь прясон,
Въдь кунара ласькондян мон мельгат,
А тон... Аф няят, монь ваймонязон сельгат."

Мон лоткань корхтама, арась сетьме,
Няян, кода тусть тонь сельмоветтне,
Мярьготь:"Кадомак, тейне эряви арьсемс."
Тотмадемайть, туть эздон ласькозь.

Ётась тоньфтемот колма-ниле шит,
Мон ни юкстайне тонь кудозт кить
Аф няендихтень, бъта эряфста юмать,
Колгат аф марян кодамга кулят.

Фкя илядьня мон мърдань куду,
Улень пяк маятаф, ёрань прамс и удомс.
Но кенкшезень ала аф оцю кагод няян.
Вов и сась колгат куля монь пялон.

Панжине сонь, тоса ульсь тяштьф:
"Кельгомняй, простямак монь тянь инкса,
Тейневок пяк стака, мъзяра шит ризнан,
Ёран тонь юкстамс, но кодавок аф юкстан.

Ся шить, мъзярда тейне лездоть,
Моньге кельгомазе съргозсь.
Мон няине, кода лангозон тон ваноть,
Но мархтот монь сай пингозе аф няевсь.

Сяс мес тънярда мон пяк сялондонь
Од цёразень мархта, но аф явонь.
Арьсень, мърдамс, афток кадомс сонь,
А тяса эряфсон кяти-коста лисеть тон.

Сяда тов шарьхкодень, мон сонь кельгса.
А мезе мон тиян, седицень сязьса?
Аф содань, мезе тиемс, кода улемс,
Ёрань сявомс, кадомс тинь и куломс.

И тяса тон, корхтат кельгомацень колга.
Монць ся шиста ушедонь пяк кельгома,
Ня шитнень мон арьсень аньцек колгат.
Кафта ломатть. Аф содан, кинди молема.

Сань мяльти, тейне мезевок аф эряви,
Аф сон, аф тон. Сядизе пяк сяряди.
Арьсян, тяфта кармай сяда пара.
Простямак, курокста юкстамак..."

Лувине. Монь модамасторозе срадсь.
Седизе лазовсь, мяльне алу прасть.
Но, мезе тиемс? Улема, тяфта кармай пара,
Тяфтама эряфсь, катк кармай тяфта.

(Сёрмадысь):
Ётась ве и цёрась стака мяльса стясь,
Мяленза шоворсть, пяк сярядсь пряц.
Арьсезевсь:"А улема, тя сембось он,
Исяк въдь лия вастса улень мон..."
Стясь вастса, тусь ярхцама и штама,
А вастонц ваксса, сетьме уженяса,
Ульсь кагод...
А кагодса ульсть сёрматфт стака стирень валхт...

Удок.

Ковсь кунара полафтозе шить,
Валдонять вастс сась шобдась.
Удат, онце ламбама, кода медь,
Удат, тейть мезевок аф шоряй.

Перьяфпяльть тон няйсак цебярькс.
Бъта минь сембот эрятама лац.
Няйсак, ня ляпе азксненди аф кеман,
Сяс и аф кельгса шобдава мон стямс.

Ламбама онць арась лисемакс,
Коса модамасторозе арась тёждя,
Коса прябалазти лисема муян,
Коса ваймосихть монь стака ённе.

Но эряви съргоземс и эрямс.
Мезевок козовок ичкози аф туй,
Эсь тефнень сави эстейть тиемс.
Аньцек покодемста ломанць васта муй.

Аньцек эняльдян: тят аварьде,
Сельмоветтнень нолдасайть ков?
Ожу, ляпоняста ашкордате,
И моран тейть нюрямонь мор.

Лоткак, сембось кармай пара,
Лоткак, мон въдь ашень кула,
Ащан вакссот, лямбе вастса.
Ацендть и ляпоняста удок.

«Озондома.»

Мон корхтан, эняльдян, пъшкядян.
Фкя пингста мон тя семботь тиендса.
Кинди корхтан – семботь эса маряй,
И сембе валнень эса Сон кундай.

Сон лезды тейне эрямс, эсон аралай,
Кундасамань, мзярда алу праян.
Ков аф молян – мархтон аськоляй,
Максы тейне кядь, мзярда ваян.

Мон мзярдовок аф улян ськамон,
Сонь кельгомац най ащи вакссон.
Мон корхтан Мархтонза эрь шиня,
Шобдава, шитене, илятене, веня.

И вов, сетьме шобда уженяса,
Мон тага Теенза пъшкядян.
Тага эняльдян пълманжа лангса,
Штоба сай шизе ёталь лацкас.

Мзяра прябалада ётань мон,
Мзяра сталмода тага васьфтян –
Мон аф синневан, мзярда мархтон Сон,
Аф крьвязян, аф юман, аф ваян.

«Лазомс лазф седить.»
(Валморась – Андрю Ламброунь🇨🇾 «Break a broken heart» моронц мокшень кяльс ётафтомац)

Толхне мадсть.
Алу прань.
Тейть сякокс, што мон верыян.
Пяшкодить эряфозень миноронь морняса.
Мон кельгихтень тонь, а тон кельготь тиемс тейне кальдяв.
Лажадонь паламацти, кода бензинти сардоня.
Якстерь толнят, цяткт, мон стяян кулуста...

Мон няйхте тонь, кодамкс тон улят.
Но тейть аф лазови... Лазф седизе.

Кеподьсамак, ёрдсамак ведьгарафкти,
Сязендьсамак и тушендат лияти.
Сязентьфан, но нинге моли эряфозе,
Аф, тейть аф лазови лазф седизе.

Тевне кальдяфт, но кирдян.
Тонь мельгат паваз мон муян.
Тон тиить семботь, мезе маштат,
Штоба тиемс сембодонга сяряди.
Мон тонадонь сембе сярятьфненди,
Калгомазе корхтай, что нинге эряват.
Сотовомшикс арай тонадомань фантастикась.

Мон няйхте тонь, кодамкс тон улят.
Но тейть аф лазови... Лазф седизе.

Лажадонь паламацти, кода бензинти сардоня.
Якстерь толнят, цяткт, мон стяян кулуста...
Кеподьсамак, ёрдсамак ведьгарафкти,
Сязендьсамак и тушендат лияти.
Сязентьфан, но нинге моли эряфозе,
Аф, тейть аф лазови... Лазф седизе.

«Билет фкя пес.»

Мон ащан лоткама вастса.
Нинге ашезь са автобуссь.
Эсь потмосон лама арьсян.
Кода ба курок ичкози тумс.

Вов мон и озань ков эрявсь,
Пиленень сёлгине музыкаса.
Монь сизеф сельмоне коневсть.
Тяни мон ардан сетьмоняста.

Курок пачкодян ни куду,
Саян, ярхцан и карман удомс.
Шобдава съргозян и тага туян,
Станя жа, кода ульсь исяк.

Сявомс ба билет фкя пес
И ичкози мархтонза тумс.
Коса мархтон шиста вес,
Кивок вакссон аф ульсь.

Сетьме и мазы Берлин,
Сяда тов – панжи Амстердам,
Туян тоза, коза няфти кись,
А коза аф – тозовок туян.

Тямак вешенде косовок,
Тонь мезевок аф лиси,
Курокста монь юкстасамак,
Мон максыне седизень кити.

Карман ошева бралгома,
Карман ськамон мон якама.
Сяда тов тейне сайхть мяльхть,
Што пароль ба куду мърдамс.

Мон валгонь эсь вастсон,
Тяни куду ялга пачкодян.
Ичкоздень кись нинге прясон,
Улема, кати-мзярда туян.

«Сембось кармай лац.»

Прябалатнень эзда тага ласькан,
Но синь тага эсон кундайхть.
Прябалатнень эзда тага кяшан.
Но сельмингольдест аф юмат.

Корхтайхть: "тона эряфса ваймат".
Мон нинге аф ёран эсь прязень калмамс,
Питни пингозе нинге ашезь ёта,
"Тона эряфть колга" валхнень ёрдайть.

А азк тейне, кинди тячи тёждя?
Кие аф содай прябалатнень колга?
Содаса, кинди ули тячи тёждя:
Ломаньти, конац кятть аф нолдай.

Сембе кальдявть эряфстот ёрдак,
А сембе таштть курокста полафтк.

I just wanted to tell:
My life is a difficult way,
And you know that well.
But I won't stay...

I'm not bothered by this "rain".
I'm not bothered by the pain.
From now on, don't call me,
Our bridges will be burned.

My life is being cleansed,
My heart has healed.
Don't worry, I'm fine,
Everything will be alright.

P.s. тяда пеле, лия кяльс аф ётан, тя аньцек эксперимент)
[Кельгома мархта, Илья]

«Гладиатор»

Тяса лама кочкавсь ломаньда,
А эсост мезевок аш ломанень,
Пара мяльса марса учихть фкя:
Кода марнек верботмоса ломанць прай.

Штоба ваномс, синь пандыхть ярмакса.
Няемс, кода эряфонкса пандыхть эряфса.
Пандыхть, сеест сякокс, кодама питнесь,
Сяс мес аф содасазь эряфть питненц.

Фалу эрямс тюрезь – тя аф эряф,
Куломать эзда тяни мон аф пелян.
Мархтонза няендян эрь шиня,
Корхтан мархтонза ялгакс эрь веня.

Мярьгат, пелят ётамс карьксть ланга?
Тят рахафта, мон лангсонза кштиян.
Фкя аф стама аськолкс – тон калма лангса,
Шарьхкодят, што сембось лац, мзярда алу лият.

Максови кафта кит: сяськат афток кулат.
Лангозт сембот ваныхть, тон тюрят.
Торать сявк и сяськить сембонь,
Гладиатор, гладиатор!

Мон штаян аньцек ливозьса и верса,
Ломаттнень инголе эряфозень вятьса,
Торать сявса и сяськса сембонь,
Гладиатор, гладиатор.