[ تسمع صوت ]
اداء | #قحطان_البديري
كلمات الشاعر | سيد معتز الحسيني

رابط المشاهدة | https://youtu.be/GBPt-qoQVho

ليالي محرم الحرام 1444 هـ
عزاء التعاون - بغداد

#qahtan_budeiri

*[ مهيوبة ظليتي ]*

أداء: الملا #أحمد_الخيكاني
كلمات: الشاعر #السيد_معتز_الحسيني

https://youtu.be/rBVT2axdtwM

إحياء ليالي شهر محرم الحرام لسنة 1445 هـ - 2023 م
ليالي العشرة الثالثة من شهر المحرم
عزاء هيئة رابع الأئمة عليه السلام - العراق - النجف الأشرف

انتاج وتنفيذ: هيئة الزهراء
إخراج: مصطفى أحمد
مكساج: ليث حازم
مخطوطة: حيدر الزمان
النشر الشبكي: علاء بركات العاملي

#احمد_الخيكاني
#معتز_الحسيني
@ahmed_alkhaiqani

         
                 خل نفترض ماماتت الزهره
                 تموتها باجر ياعلي الطبره
                بالكوفه صعبه تنتهي العشره
                         __
          كسر الضلع لو نفترض عده بسلامه
          وكدام عينك ماشفت ولدك يتامه
           بعد السهر ليل اليمر تكدر تنامه
       وكل شامت كبالك حِجه يسحب كلامه
           
              وجه الزجيه كبالك تشوفه
             وتاخذهه لمن تمشي للكوفه
            من كسره تطلع تدخل بكسره
                      _____
        موعد الك ويه النبي مخضب تردله
       ولو شافت الزهره الجرح ماتبقه عدله
       لو ماتت هناك الجسم ياهو اليغسله ؟
        مطبور راسك والنعش صعبه تحمله
             يدفنوهه ولدك لو يدفنونك
            يودعوها بالله لو يودعونك
               لمن ترد وجرحك شكبره
                      ___
           زينب تنوح ليا جرح وليا منيه
           لو شافت الأم ولأبو ماتو سويه
         نعشك تشبكه لو نعش امها الزجيه
           بالعيد ماتفرح بعد هاي الرزيه
              لاامها لاانته بوسط دارك
              ياهو التكله عيدك مبارك !
             ليل المدامع ماطلع فجره
                    _____
        لو شافت الطبره وكدر يصبر حزنها
       هم باجر تشوف بطشت جبدة ابنها
        مكتوبه كبل الفاجعه تغمض جفنها
      ماتمشي للكوفه وتجي مضيعه وطنها
             لو شافت ابنك ينحفر لحده
          تموت اعله كبره والسبب جعده
             حكه الكلب لمن يمل صبره
                   __
        لو صبرت بجرح الحسن والطف اجاها
        من الكفه تشوف الشمر يذبح ضناها
       تموت اعله نحره البي عطر والدهه طاها
        وزينب تحير المن بعد تنصب عزاها
               
              ابنك تشوفه مكسره ضلوعه
               وكسر الضلع تتذكر دموعه
               شلها بعمرها الينكضي بحسره
                         __
             بكل المصايب حاضره هي والمها
            بس الفرق وجه بوجه محد شتمها
              ماتركض بيوم العدو يحرك خيمها
            امن بعيد تنضر عالثره طاحت زلمها
                حرمه جبيره تصير بالعاشر
                 مابيها تركض تبعد الحافر
               شلون الحسين اتقبله بنحره
                      _____
سيد معتز الحسيني
             

        
             
            شايف لمن امك ميته وتشتاكلها
          هنانه جروحك ماضن كلبك يتحملها
           تتخيل تلاكيها   وبمدمع تحاجيها
                لمن امك ميته وتشتاكلها
                      ____
            ابسدة الباب  لمك تحن ولكلبها
           يبدي العتاب  وروحك تضيع دربها
          تصيح يتراب  فدوه رجعلي الاحبها
                       تصيح يتراب
  
           من تحن لنسان ميت لازم تموت
           وكلمه اليمه جنازه ، بلايه تابوت
         يطول ليلك وهنا ينزل دمع احزانك
           لمن تذكر كعدة امك  يم خوانك
         جروحك ماتداويها   وبمدمع تحاجيها
              لمن امك ميته وتشتاكلها 
                      ____
          عمي سلمان  راحت التدعي اليه
           كان ماكان  امي مو مثل البقيه
           صرت دفان  ودفنت كلبي بأديه
                      صرت دفان
         الجانت النه ولليتامه تدعي كل يوم
         ماتت وخلتني اكضي الليل ملجوم
            لمن ابرد جنت اتغطه بسجادتها
          اضلم بيتي بلاضحكتها ولاشوفتها
           داري بيش اضويها  وبمدمع تحاجيها
               لمن امك ميته وتشتاكلها
                        ____
          رايح وجاي    تبقه يوميه لكبرها
         الوالده هاي   الضحت لعمرك عمرها
         امي مو ماي  بسرعه مايشفه كسرها
                     امي مو ماي    
      جنت من انضرها اذكر طِيب الأجداد
         جان من جفها يعمي طَيب الزاد
         تخيل ترجع رايد امك وتشب نارك
       تشوفه بعينك سرداب اضلم صاير دارك
          نارك ماتطفيها وبمدمع تحاجيها
              لمن امك ميته وتشتاكلها
                        ____
         بغبشه العيد  تغبش وتتعنه الها
       مدري شتريد   وعيدج مبارك تكلها
         ماتحب ايد  ودمعة عيونك تهلها
                    ماتحب ايد

         اتحب التراب الدفنها بسود الهدوم
           ومن كبر امك امترب لازم تكوم
 
        هاي الربت لازم توفي بتعب رباها
      تحجي لبنتك عنها وروحك ماتنساها
       وبسم امك تسميها  وبمدمع تحاجيها
              لمن امك ميته وتشتاكلها
                       
                ____
          امي مرتين  انه اذكر كبرتني
          مره برباي ومره لمن فاركتني
        انه الحسين والمصايب شيبتني
                   انه الحسين
         شفت لمن ودعتها كربله وشام
          نار فركتها بديلي جمرت خيام
         كطعة نحري وليل العاشر من فركاها
       طيحة جود ورايه وكافل طحت وياها
         من كسرو معانيها  وبمدمع تحاجيها
              لمن امك ميته وتشتاكلها
                        ____
سيد معتز الحسيني

           زينب لفت يم حسين لكن بالكلب جمره
          تكله ياضوه عيوني  راحت فاطمه الزهره
                    ____
            طبت كعدت كباله مجروحه وتهل العين
       تصيح الحكلي يبن امي صوت امي اجيبه منين
       بعد ياهو اليكول اسمي وبعد ياهو اليكول حسين
                     سولفلي يبعد الروح
                    بعد الزهره وين نروح
                    بقينه بس نعد جروح
       يتامه واليتم جتال خله بكل نفِس كسره
                        _____
          منها كلشي ماشفنه عافتنه وبعدنه زغار
       طفت شمعتنه ياخويه الجانت تضوي ليل الدار
       راحت والضلع مكسور ونابت بالصدر بسمار
                 ضلع امي اسمعت طكته
                   يخويه وكلبي صبرته
                   تخيلتك طحت انته
        عطشان واجتي الخيل تسحكك والعدد عشره
     
                        __
           جنت لمن تجي للبيت يمه شلونج تنادي
          وهيه تكلك شلونك يروحي واغله اولادي
           هسه منهو يتلكاك وامنه لحكت الهادي
                     امنه الكلها حنيه
                    راحت واني محنيه
                      ياريت الكسر بيه 
          وضلت فاطمه يمنه واخونه المحسن نكبره
                       __
     يكلها يختي شحجيلج موت امي كسر كلبي
       من اليوم المشت لليوم وحكج تيهت دربي
         عاللي منها حرموني باجر اشتكي لربي
                  ليش امي يعصروها
                  وباب الجنه حركوها
                   بعلي بغضا يأذوها
         وابونه موصه ذاك اليوم لمن هجمت الزمره
                        __
           يزينب الله كاتبها واحنه زغار نتيتم
       ونار الحركت النه الباب تحرك يختي المخيم
         ولابد ماتشوفيني وشيبي يكطر من الدم
                     كلشي باجر نشوفه
                   اساسه فلان وجفوفه
                   يختي وهذي معروفه
     السقيفه والشمر واحد نفس الطينه والفكره
                       ___
        تكله خويه سولفلي  بعد جم لوعه كدامي
         يكلها بيمن ابديلج كبالج انذبح ضامي
        امانه بركبتج يختي امشي واترك ايتامي
                    باجر من تودعيني
                   تره بصدري تشميني
                  امانه من امي تنطيني
     ثوب البي اموت هناك بذيج الهيمه والصحره
 
____
سيد معتز الحسيني
تضمين ابيات السيد عبد الحسين الشرع

          شكرا على هذا العزاء   من اللطم حد البكاء
                        ماتكفي كلمات الثناء
                            شكرا على عزائي
                            ___
        فَزعت زلم راد الضلع وهاي الزلم كلها انتخت
     بوجه الحطب وكفت نهر  داست عله النار وطفت
       عين البجت ليه اندعي كون اعله غيري مابجت
        حظ وبخت لطم الصدر وانتو اهل حظ وبخت
      شكرا على هاي الجروح   العوده وعله ضلعي ننوح
                      عطر الجزع منكم يفوح
                         شكرا على عزائي
                            ___
      كبل العزه احضر جنت وايدي عله كسر الضلع
      من يبتدي وكت البجي بجفوفي الم كل الدمع
    جم عفيه من عندي اطلعت بس الحجي ماينسمع
         من اللطم كلما وكع  خادم اشوفه مرتفع
      شكرا على كل الدموع  شكرا على لطم الضلوع
                   كلبي بقه وياكم يلوع
                      شكرا على عزائي
                            ___
       الطم صعب بثنين ادي عندي كسر ماينحمل
      شكرا الى كلمن حضر ولمجلسي جايب طفل
      ويا تره المحسن كعد وبيده مسح دمعه اليهل
     سَجل شكو خادم حضر  وخلالي توقيع السجل
       بعيني شفت كل الحضور  شكرا على لطم الصدور
                     بكدما الي دمكم يفور
                      شكرا على عزائي
                        ___
          اكعد جنت وكت النعي واتذكر سوالف علي
          لمن دفني ابلا كلب رد محني ضهره لمنزلي
          امكم انه واللي خدم اعتبره واحد من هلي
        عندي الدوه لكسر لضلع صوت اللطم من يعتلي
         شكرا على هذا الأنين  شكرا على هذا الحنين
                  انتم مدد طول السنين
                      شكرا على عزائي
                            ___
       بيه شكثر وادم نطت وفوك الكسر خلت كسر
      ونتم ولا همكم حجي صار الحجي بلطم الصدر
        كالوا جذب كسر الضلع كلتو الضلع ماينجبر
          عده الزمن كالوا تره ماينقبل كلتو العذر
       شكرا على هذا الولاء  لضلعي انفدت حته الدماء
                    بيكم حجي من كربلاء
                      شكرا على عزائي
                        ___
سيد معتز الحسيني

     تقول الروايات ان الامام علي ع كان يخرج في القهقره لايعطي ضهره لمولاتي فاطمه
                  
         
           يهل العتب يحله العتب من الدمع يجري
         مامنطي ضهري مره الج ليش انكسر ضهري !
            من عفتي الديار    عفتيني محتار
                      ليش انكسر ضهري !
                     ____
        علي مات  لمن فارك عيونج علي مات
       حرامات  اعيش ايامي من دونج حرامات
   
       انطيتج كلبي يالزهره وصحت بكسرته فدوه
       بس من انكسر ضهري كلت يافاطمه شسوه ؟
        
          للباب ضهري وكلبي الج لمن جنت اطلع
       مشكلته بس يمشي الوكت لايوكف ولايرجع
            جرحتني الاقدار   عفتيني محتار
                    ليش انكسر ضهري !
                     ____
       سلامات  صحت من صحتي يافضه  سلامات
        معانات   علي مكضيها وي حضه معانات
         من كتلج اموت اعليج جنت حاسب تعوفيني
           وتدرين انتي يم حسين بفراكج تموتيني
      
          ياخذني شوكي للكبر بس محد يردني
           ولمن احن لشوفتج الله اليساعدني
               ماتنطفي النار  عفتيني محتار
                    ليش انكسر ضهري !
                     ____
         تردين  ردت بس لحضه كدامي  تردين
          تحنين  بكبرج وادري ليامي تحنين
       احس شال الهوه وياج بس يم كبرج اتنفس
       بضيمي من بعد عيناج ضل يسولف الاخرس
    
        اخباري مو زينه وصحت يافاطمه شلونج
        شيبي اعله كل حِنه زعل من غابت عيونج
            بكل شيبه بسمار  عفتيني محتار
                    ليش انكسر ضهري !
                     ____
             تموتين كبلي ماجنت ادري تموتين
            تونين بكبرج خوفي ياعمري تونين
           سابع جار من اشتاك يسمع ونتي ونوحي
        وبقيت الجمهن بكل يوم لان من عندج جروحي
           اسمج اشوفه بكل جرح يالعازتج عازه
           من شفتج جنازه صرت يافاطمه جنازه
               ماصاير الصار  عفتيني محتار
                      ليش انكسر ضهري !
                     ____
               تمنيت  تطول ايام عشرتنه تمنيت
          طفه البيت بعد عينج يشمعتنه طفه البيت
         بعد ماكدر ابقه هنا وللكوفه نويت ارحل
        يوردة كلبي كبرج ماي من ابعد عليه اذبل
          بسرع وقت موتي يجي اتمنه يوميه
           وايامي بعدج بس رقم مابيها حنينه
             بدمعات الانضار  عفتيني محتار
                    ليش انكسر ضهري !
                     ____
        سيد معتز الحسيني

بعدنه اشما نذكرك تحله كعدتنه
وبعدنه اشما نكتبتك تجري دمعتنه
وبعدنه لخاطر جروحك انسامح ناس اذتنه
هذوله احنه النحبك حيل لحد تشويه سمعتنه
وهذوله احنه السمعنه اشكال وضلينه اعله نيتنه
بدينه وياك من دفعه سره الزنجيل
جنه زغار واخر لطمه لطمتنه
وبقينه وياك
من لاح السره التغير  وبراس السره الخدام خلتنه

احنه الكوه جانت حته عيشتنه
احنه المانعرف الناس حَدنه لناس ديرتنه
احنه المن مشينه وياك
كل الناس عرفتنه
وكل الناس هابتنه
وكل الناس رادتنه
احنه الماطلبنه مراد
اله ونار جدر الخدمه جوتنه
احنه المشتريك جبير وعليك الناس حسبتنه



سيد معتز الحسيني

*[ رد من دفنتها ]*

أداء: الملا #أحمد_الخيكاني
كلمات: الشاعر #السيد_معتز_الحسيني

https://youtu.be/wQ4VjsCXhPs

إحياء ليالي شهر جمادى الأول لسنة 1445 هـ - 2023 م
ليالي إستشهاد موﻻتنا أم اﻷئمة اﻷبرار الصديقة الطاهرة البتول الزهراء فاطمة صلوات الله عليها وآلها
الليالي الفاطمية الثانية
العزاء المركزي لأهالي الحلة - مدينة الإمام الحسن المجتبى عليه السلام

مونتاج وإخراج: ضياء الفياض
مکساج وتنفيذ: دي ميديا للإنتاج والتوزيع الفتي
النشر الشبكي: علاء بركات العاملي

            ربي لاتحرمني نضرت فاطمه
                       ————
          انه ابن عاشر محرم والغدير
        وحمزه عندي مو زغير لا جبير
       لفاطمه بعت العمر وأنه اصيح
        فرق بين الباع عمره والضمير
 
          مثل فرق الكاع عن سابع سمه
                   ———————
         خادم ابقه اندعي وبكل صلات
         وأنه اريد الزهره يمي بالممات
         من يسدون اللحد وابقه غريب
             نور ام حسين ويايه يبات
         اندعي ومن عيني يتجاره الدمه
                     —————-
             غير نضرة فاطمه لامااريد
           والخدمها بصدك يتخلد اكيد
          شفت سيد جاسم أتحول مزار
          وسيد الفالي صبح جار الشهيد
   
          اللي جاره حسين ياهو يكلمه
                        ———-
       بداعه حسين البجه لذبح الرضيع
         وياج خليني وآنه بدونج أضيع
       الناس تسأل انت ابنمن وآنه اكول
        ابن مجلس فاطمه وابن البقيع
            انه ابن كبور ائمه مهدمه
                 ——————
        باجر حساب وكبر باجر وراي
     وبحفرتي بلكي اشوف حسين جاي
        لو سألني منكر شسويت زين ؟
         راح اكله وزعت لحسين ماي

          مايمسني هناك لاضر لاضمه
                    —————
      خادم الزهره يضل اسمي الصريح
       مچلب بمنبرها وادري مااطيح
      شحصلت دوم أنسال من العزاء
        وأنه أكلهم حصلت نضرة ذبيح
        حاشه ينسه حسين دمعة خادمه
                     ———
سيد معتز الحسيني

[امك ميته ]

اداء:[الرادود امير الخفاجي]
كلمات: [سيد معتز الحسيني]

ذي قار - الشطره- العراق
حسينيه ابا الفضل العباس - الرابطه الفاطميه


1445 هجريه
2023م
ليالي استشهاد الزهراء ع

لمشاهدة القصيده كامله اضغط على الرابط أدناه https://youtu.be/CwPT-MMzxfU?feature=shared

              تلاكن بالممات عيوني وعيونج
              وسألتج ياحبيبه حيدر شلونج
              لو عايش وسط كلبي يدفنونج
                           _____
     يروح الروح من كبري اجيت وايدي عالطبره
    واحس بكلبي عاش اجواء تشبه فركه الزهره
     تلاكينه دمع وخدود وتبادلنه الحجي بنضره
    شفتج واذكرت عباس وذكرت الملحه والعشره
           ذكرتج من اجيتي لبيتي بدموعج 
          ركضتي لبابي بلكت تكسر ضلوعج
               ولهذا السبب ولدي يحبونج
                      ___
        جبير الشوك البكلبي بكبر اهات فركتنه
      وكبل عندي صباح الخير وسط البيت كعدتنه
       هاي ابيا وكت نحجي وقبلنه تحجي دمعته
       ولو من نبجي معذورين الدنيا هواي اذتنه
            عشتي والحزن طول العمر رادج
            من فراك وجهي لذبحت اولادج
              عافوج الابد لامايعيفونج
                         ___
     انطيني جروحج التنزف خلي ابسمه اضمدهن
         وليالينه الامس جانت سويه نحاول نردهن
   ارتاحي راح اصيح حسين وبيده جروحج يشدهن
    وبعد ماكو ذبح وفراك المصايب راح موعدهن

          بعد شويه وحسينج تشوفينه
           وبالج لاتلجمي من تشبكينه
       جروحه هواي خاف تطخهن متونج
                      ___
         
      لون عايش كبل موتج  اخلي دفنج بريتي
     واسوي الفاتحه بكلبي واذكرج من اطب بيتي
       يمثل الزهرة بعيوني اشوفج لون عافيتي
      حنيت الكلامي وياج مثل ماانتي حنيتي
         أمسحي دم طبرتي براحت جفوفج
         واكعدي كبال عيني الرادت تشوفج
          اعليه تقربي خل امسح جفونج
                       ___
 
       معالم كبرج مبينه يروحي وماهي مخفينه
       وتغسلتي وتجفنتي وابد مارحتي مسبيه
         ومحد كسر ضلوعج  لكن عشتي محنيه
       صبري روحج بذني وكولي جروحي مكضيه
             ثواني والكمر تلكينه كدامج
             وترجع ويه ولدج احله ايامج
              ويرجعون الولد كلهم يفكدونج
                         _
سيد معتز الحسيني

           مانشفت دمعتها   من داست عتبتها
                      سالت عن قصتها
                           بحسرتها
           هاي الباب شبيها  تجويني واجويها
                        القصه ومابيها
                            عرفتها
                        _____
         بعد فتره   بلا زهره     بقت زينب وابو زينب         
       جبت حرمه  مثل نسمه  حنينه وبالمثل مضرب
          هاي الحرمه ام عباس تتسمه بعد فتره
     كضت ليلت فرحها دموع تبجي بعتبه الزهره
      وعرفت بالضلع مكسور من حيدر لزم ضهره
           كالتله ومتعجبه  حركو باب الكعبه !
                      حيدر  لازم كلبه
                            بليلتها
         يكمل لو ينهيها  تجويني واجويها
                       القصه ومابيها
                            عرفتها
                        _____
      اسمعت بذني   ونين ابني  وشفت نار الحقد لهبت
      بده عتابي    وجَرح بابي  العله ام الفاتحه انطبكت
         بين الباب والحايط انعصرت امي وام بيتي
        اختنكت وانه من يمي ماضل كل هوه بريتي
         امنهد ماراحت الزهره احس مجروحه حنيتي
            من هجمو اذوها  ضربوها وجرحوها
                     وضلوع الكسروها
                            حسبتها
             خافت من تاليها    تجويني واجويها
                         القصه ومابيها
                            عرفتها
                        _____
      بعد شحجي  وصرت ابجي  بغسلها وصبري ضيعته
       ادي وكفت  بكسر حست   بعيوني الكسر شفته
       اصعب لحظه من حسين  شبكها وصاح ارجعيلي
         صحت كدامه راح الحيل وبعد ياهو اليتجيلي
           صفه للنوح مو للنوم بعد ام الحسن ليلي
               اصعب من موتتها  تشيع جنازتها
                      عرفت من دفنتها
                             غربتها
              بكل كلمه يأذيها  تجويني واجويها
                        القصه ومابيها
                              عرفتها
                        _____
      بجرح طلعت  وبعد سالت  نسيت الصار لو بعدك
       يعلم الغيب  خذاك الشيب  واثر دمعاتك بخدك
             ربيت الصبر كلها  وتعلم مني يتصبر
        بعد الزهره ردت اصبر ولكيت جروحي ماتكدر
         ردت انسه ولكيت الروح كل ماتنسه تتذكر
             مااكدر انساها  ميته واحجي وياها
                      يامصعب فركاها
                           وخِلتها
               الماكدر اخفيها  تجويني واجويها
                        القصه ومابيها
                             عرفتها
                        _____
        تحس روحي   دوه جروحي  انتي وجيتج بلسم
         يبنت احزام     اريد ازلام  بيهم ابني يتحزم
         قصه بابي خلتني اعيش الطف كبل وكته
         اريدن منج العباس حته اتطمن اعله اخته
           احس بمحسن حجايه والعباس تكملته
            بس انتي تفرحيني  بعباس تبشريني
                  من الصدمه تطلعيني
                           وَرهبتها
            لغيرج مااحجيها  تجويني واجويها
                        القصه ومابيها
                            عرفتها
                        _____
سيد معتز الحسيني

جنازة امك بنتظارك يا ابا الفضل
————-
عايشه لو ميته امك ياكمرها تريدك
اعتني شيل الجنازه وإنسه كطعت ايدك
الفاتحه يبن الصميده اقراها من وريدك
جروحك هواي ودفنها جروح راح يزيدك

ماطفت بالفركه نارك يا ابا الفضل
————-
امك من الفركه ماتت والبعد اذاها
سهم عينك يابو فاضل تدري بي بجاها
الربت سنين وليالي هذا حلم رباها
من ينزلوها بكبرها تنزل انت وياها

الها لاتبدي اعتذارك يا ابا الفضل
————
بماي جودك روح غسل امك وحاجيها
كلها يايمه احبج وكعد اشتم بيها
من يشيعوها الجنازه برايتك غطيها
ومثل مابجاها فكدك ابقه ابجي اعليها

وياها سولف بنگسارك يا ابا الفضل
————-
امك بعاشر محرم سمعت مكطعينك
شلون لمن تعتنيها مكطعه جفينك
ميته بس تكسر كلبها مثل ضهر حسينك
من توسدها بكبرها اِدعي الله يعينك

اسود بعينك نهارك يا ابا الفضل
————-
الليله ويه حسين امك بالكبر تتلاكه
وتبقه تشكيله بدمعها شسوه بيها فراكه
الليله يحجون وحچيهم عالخيم والناكه
يكلها مشتاك وتكله اني هم مشتاكه

موحشه تكله ديارك يا ابا الفضل
————-
الفاتحه بيا كاع كلي محسب تخليها
بكربله سويها من تقرر تسويها
فاطمه بفاطمه الليله الوادم تعزيها
امك الضحت بدمك ننحني لطاريها

نبجي هاليله بمزارك يا ابا الفضل
————
سيد معتز الحسيني

الامام الهادي ع

لو سم لو ذبح ولدي يودعوني
يوميه عليهم تهمل عيوني
—————-
بكل بلده جرحني وكتي بولادي
واجيت اليوم ابجي لفركة الهادي
بعد حسرة ربيع وحسرة جمادي
بثالث من رجب رد انخطف لوني
————-
انخطف لوني واجيت بكسرة الخاطر
لعاشر ولدي ابجي بمدمعي الحاير
وانه عاشر ابن ذكرني بالعاشر
وذكرت حسين لمن صاح الحكوني
———-
وصلته وعيني شافت جبده مسومه
وعليه انعاد جرح المجتبه ويومه
عمت عيني الولد متغيره رسومه
عله هذا الجرح ياشيعه عينوني
———-
شفت توديعه بس أتمنه ماشفته
لكيت ابنه الحسن ايده اعله خاصرته
وصحت يالهادي حيلي اعليك هدمته
ييمه وناسي بفراكك يصبروني
————
تغسل واندفن وعياله ملتمه
بس حسين ضل ابلا دفن جسمه
يضل أصعب جرح جرحك يبو أليمه
لايوماً كيومه الخيب ضنوني
————
جمره بكلبي وين اليخمد الجمره
واخذت مني ابني الليله سامره
بهذا اليوم احس ضلوعي متكسره
واحس اهل السقيفه اليوم سطروني
———-
سيد معتز الحسيني

              نسالك الدعاء  يازاير العقيله
                         ___
               اريدك من تصلها بدمعة العين
                اليه تدعي وتصلي ركعتين
                واذا ردت الزياره تنقبل زين
                اخذ وياك الها تربت حسين
               تربة كربلاء يم زينب الوسيله
                         __
               سلامي وياك اخذه واخذ العتاب
                  واريدك بالنيابه تقبل الباب
                 وعَله جرح السبي كللها ماطاب
               اذكره اشما يصير كبالي الحجاب
                ياجف الرجاء كللها يالجليله
                            _____
               عله الشباج طوف واخذ المراد
               توجبك مثل مايتوجب الزاد   
              كلها جروح عدنه وانتي الضماد
               واذكر يمها كل اهلك والاجداد
             وابواب السماء لليدعي تنحنيله
                       ___
                عليك الزهره لمن توصل الشام
                 ابد لتجيب يَمها طاري الخيام
                 يم باب الجزع الطم عله الهام
                وصيح بصوت هاي الدنيه ايام
 
                سَيدتْ العزاء والفاجعه الطويله
                         ____
                اكعد بالضريح وعيش الحساس
                  مثل كعدتها لمن راح عباس
                الله مخلي زينب تنطي للناس
                اليدنك يمها باجر يرفع الراس
             
                 يالرايد شفاء حلفلها بالعليله
                           ___
                  طلب اطلبها منك والله حياك
                   رايه بأسم زينب جيب وياك
                    طَوفها يزاير عله الشباك
                   مو تنساني لمن توصل هناك
                 مايبقه العناء من توصل الكفيله
                        __
سيد معتز الحسيني

          اخر سنه بعمري طويله  بيها اركبت ناكه هزيله
                   من تراب السبي لتراب الكبر
                 عندي هاي الفتره مو من العمر
                            __
          من يوم السبي لليوم مدري شبيه مادري
           لمن اذكر العباس ابجي وينكسر ضهري
          تلجمني البكه بعمرج كلولي شبكه ابعمري !
          وانه بكربله المفروض اموت وينحفر كبري
            
      يم النحر لو اني ميته  جان اندفن جسمي بدفنته
               ياهوة شايفله كسر فوك الكسر
               عندي هاي الفتره مو من العمر
                      _____
      عله الله وطاري اخوي حسين عُمر الفركه خلصته
         البقالي من هلي السجاد وكبل الموت فاركته
       احس بدمعي حرمل جان ونار الخيمه حاركته
       واسأل هم اكو مذبوح ؟ يرجع يسال اعله اخته
 
      سيف الشمر ماحز وريدي  بس الدمه لسه اعله ايدي
               من اشوفه ثنعطش طبره تنذكر
                عندي هاي الفتره مو من العمر
                      _____
        خلصت كربله وجرحي بطولي الشافته الودام
           وايام العمر صارت تشبه شمعت القاسم
       كل لحضة اشوف حسين فوك الغبره ضل نايم
         صح ماميته من رديت بس مابيه شي سالم
     حته النفس يبجي عليه  زينب جنت هسة السبيه
               مثل عصره امي ضليت انعصر
               عندي هاي الفتره مو من العمر
                         _____
          من بعد الكمر وحسين لحد يسال شلوني
          يومية اشوف الموت صوره وصوت بعيوني
          رديت اعله كاع الشام بس بلون مو لوني
     وصلت اني اوصلني الموت وردت خواني يصلوني
     وين الاهل شو ماشفتهم  صعبه الغرب تدفن اختهم
               شلون اكول الغايب اوياه العذر
                عندي هاي الفتره مو من العمر
                           __
       بحياتي وموتي ميته هواي ولاريحه اخو يمي
       من الشام لرض الشام المصايب نشفت دمي
        تابوتي يريد حسين العفته اعله الثره مرمي
        هيجي ويحضر العباس وبالرايه يلف جسمي
       كون الكمر كدامي اشوفه  ويحضر الي هوة وجفوفه
              من يجيني اعتابي يتحول صبر
              عندي هاي الفتره مو من العمر
                           __
سيد معتز الحسيني

                زوار قافله تجر قافله
               زوار بيها ريحة كربله
               زوار كصدت لأم الهله
                     زوار  زوار
                  ———————-              
                    خبر عاجل
              وهذا مضمون الخبر
              ختم بجفوفه الكمر
               كل جوازات السفر 
                    خبر عاجل
               جم ابو موكب طلع
                 هوه وزلامه فزع
                 يلطم اباب الجزع
                    خبر عاجل
       
   تجمعت كل المواكب وابد ماهمها التعب
واربعين حسين ثاني صار عدها بنص رجب
       
            زوار ايدها بيد الخدم
           زوار  رفعت لزينب علم
            زوار اهل غيره ومرجله
                  زوار  زوار
               ———————-
                   للحنينه
             زغار وكبار اعتنت
             واكو ناس تداينت
           المهم عدها سافرت
                    للحنينه
            استشهد البعده ورد
              حته الزياره ترد
             انطينه آباء او ولد
                    للحنينه
   ردت بدمنه الزياره وحك عباس الفحل
   وترحلين الكتب الها هوه واتباعه رحل
            
          زوار  زارت بوكت القصف
          زوار  حيرت اهل الوصف
          زوار  صوت بالشام اعتله
                   زوار  زوار
              ———————-
                   مو غريبه
            صرخت الحب تعتلي
              يم گبر لبوة علي
             والصحن من يمتلي
                   مو غريبه
              بكل لغه يمها النعي
             وابد ماخاب السعي
             عله عناد ابن الدعي
                   مو غريبه
  من رقيه لحد كبرها مشي تشيعها الخدم
   واللي محتركه خيمها فاتحتها ابلا خيم
            زوار اتنگبت للنايحه
           زوار  اهل ونه وفاتحه
          زوار دموعها تضل هامله
                    زوار  زوار
              ———————-
                  ابمنطقتها
            تاخذ الناس الصور
            ليوم عشرين بصفر
           موكب وخدمه وسهر
                  ابمنطقتها
              تنزل املاك السمه
              وتنزل أمها فاطمه
             للخدم تنطي اوسمه
                   ابمنطقتها
   رجال حيدر خوش فزعه فزعت لام الحزن
    رداً اعله السوط لطمت بالزناجيل المتن

            زوار خير من الله العدد
             زوار اجه حته البمهد
           زوار  والأسامي مسجله
                    زوار  زوار
              ———————-
                الخدم ترجع 
             والوكت مسرع يمر
            وگلمت العوده جمر
             تضل زينب تنتضر
                الخدم ترجع
             يسد بيبانه الصحن
              تبقه زينب يازمن
              ابلا اهل وبلا وطن
                 الخدم ترجع
            
        بالسلامه تصيح لمن ترد كلها للأهل
     وعام كامل ندري بيها اتاني الزياره تضل
          زوار  ترجع بفيض الدمع
          زوار  الوحشه تگضيها شمع
            زوار  سنه تضل متأمله
                  زوار  زوار
              ———————-
سيد معتز الحسيني