لكل اللي بعت لي أسئلة بخصوص المذاكرة والثانوية والجامعة وتأجيل أو قسمة السنة والشعور بالاختناق والتعب عند المذاكرة.. الصوتية دي لك، فاغتنم ما فيها، نفع الله بكم.

رحمة الله عليه وتقبله في الصالحين، غفر الله له ورحمه وأفرغ صبراً على أهله وذويه، كان نعم الشيخ والمُربي في فترة ندر فيها الالتزام والملتزمين، الشيخ كان من أهل العلم والدعوة المجتهدين، يدعو الناس والشباب إلى الله في كل مكان، على النواصي وفي الطرقات والشوارع، ونحسب أن يوم القيامة تكون هذه الأماكن شاهدة له إن شاء الله..

• رغم الحزن الشديد على موت الشيخ رحمه الله إلا أن دا مش وقت تثبيط ولا كسرة للهمة والعزيمة ولكنه وقت مصارحة، دلوقت أو بعدين: كل المشايخ وأهل العلم اللي حواليك واللي أنت شايفهم ومعاصرهم: هيموتوا وهيتركوا الدنيا دي زي ما اللي قبلهم ماتوا وتركوا الدنيا..
هيسيبوا تراث وكتب ودروس، ودا من رحمة ربنا بينا، وهيكون لك الاختيار ساعتها في حياتها..
يا تبقى شيخ وعالم بحق، أو طالب من طلبة العلم المجدين المجتهدين، أو ناقل وناشر لعلوم المشايخ وطلبة العلم..
أي حاجة برا الـ 3 فئات دي: معناها أنك بيفوتك أجر عظيم جداً جداً وأنت مش حاسس و غافل عن دا..

قال صلى الله عليه وسلم (الخير فيّ وفي أمتي إلى يوم القيامة)، فإلى أي مدى الخير بيُنقل على يدك للمسلمين ولأمة الإسلام؟
ركز على نفع الناس وأنت عايش أكتر من تركيزك على ترك الأثر، لأن بقاء الأثر دا يرجع لله عز وجل وبس بالرغم من جهدك وسعيك.. لكن نشر الخير والسعي إليه والصبر عليه والتحمل والتضحية والبذل لدين الله: هو دا بلاءك واختبارك.

والاختيار لك (وأن ليس للإنسان إلا ما سعى).

»» نافع | Nafe3
»» صوتيات نافع

.

هنيئا لفضيلة شيخنا الدكتور سعيد عبدالعظيم شفاعةَ رسول الله ﷺ ..

قال رسول الله ﷺ: «مَنْ اسْتَطَاعَ أَنْ يَمُوتَ بِالمَدِينَةِ فَلْيَمُتْ بِهَا، فَإِنِّي أَشْفَعُ لِمَنْ يَمُوتُ بِهَا». [حديث صحيح]

إن العين لتدمع .. وإن القلب ليحزن .. وإنا لفراقك يا شيخنا لمحزونون.

🔥 مبادرة جديدة للعشر من ذي الحجة، هنا على قناة (لست وحدك)..
ترقبوها قريباً إن شاء الله..

» لست وحدك | القناة الرسمية

بشرى لكم يا شباب..

بشرى للشباب اللي بيجاهدوا أنفسهم كل يوم وكل ليلة على التمسك بترديد أذكار الصباح والمساء والتحصن بها ومجاهدة الكسل على عدم تفويتها من يومهم وليلتهم: أنتم على خير عظيم جداً جداً، والله عز وجل يرى إحسانكم ومجاهدتكم وصبركم على ذكره وعبادته وسيوافيكم أجركم يوم القيامة بفضله وكرمه كاملاً غير منقوص..

طوبى لكم عبادة الله عز وجل في زمان الهرج والفتن، طوبى لكم عدم غفلتكم عن ربكم.. طوبى لكم..

•
🪴 لو مستني يكون عندك "نِفس" علشان تقوم باللي عليك من واجبات ومهام: مش هتعمل حاجة نهائياً
قال صلى الله عليه وسلم (احرص على ما ينفعك واستعن بالله ولا تعجز)
احرص على ما ينفعك: اقترب من كل مصدر قوة وابتعد عن كل مصدر إضعاف ولو كان في مقطع أو منشور أو كلمات مثبطة.
استعن بالله ولا تعجز: لأنك لن تقدر على القيام بالأمور بقوتك، فإنك بالله عز وجل ولله عز وجل، فسله الحول والقوة والإعانة ثم اشرع في أمورك وابدأ فيها بدون تأخير.

أما كثير الملل والمتردد: فلن يكون له مكان ولا مكانة في الدنيا، وهو في الآخرة (إن استمر على هذه الحال) من فاقدي الأجور العظيم وممن ستفوته الدرجات العلى بسبب تردده وتأخره وتسويفه!

هو حال الدنيا كدا، كبد وتعب ومشقة: لكن عزاءنا فيها أن الله ربنا، نعم الرب ربنا، لا يترك عباده الصابرين المحتسبين وحدهم ولا يكلهم إلى أنفسهم طرفة عين ما استعانوا به وسألوه الحول والقوة.

وأغلب الشباب ما بين يائس ومحبط مكتئب وحزين: لأنه لا يحرص على ما ينفعه ولا يستعين!

»» نافع | Nafe3
»» صوتيات نافع

🪴 مريدي كلية آداب وألسن ولغات وترجمة: أنصحكم بمتابعة محتوى أ. ناصر ريحان

مترجم أول وصانع محتوى ومتخصص بتقنيات الترجمة والـ CAT tools والتوطين والتعريب.

رابط القناة على اليوتيوب
https://youtube.com/@AskforTranslators

🚨هام لمن أراد أن يُضحي هذا العام 🚨
تقبل الله منا ومنكم

🪴 نتوقف عن النشر حتى بعد العيد للتركيز على مبادرة (لنزاحمنهم - قلبي كقلب الفُضيل بن عياض) على قناة » لست وحدك | القناة الرسمية

انطلاقة برنامج (تدارس) لأخي أ. لطفي الطوخي -كتب الله أجره ووفقه لما يحب ويرضى-
أنصحكم بقراءة المنشور والمنشورات التي تليه على قناة (مِنصة نفع) لمن أراد الاشتراك بالبرنامج.

بحاول على قد ما أقدر أني أبعد عن المسائل الخلافية وأركز على محتوى ينفع المسلمين ويأخذ بأيديهم إلى الجادة والتعلم والنجاة يوم القيامة.. لكن صراحةً الموضوع فيه استفزاز شوية وقلة أدب شويتين وتطاول 3 شويات..

خلينا نتكلم عن المجتمعات اللي حوالينا شوية بصورة واقعية، عايزك تبص بصة كدا حواليك وتشوف الدنيا ماشية إزاي..
أنت بتتكلم على مجتمعات منتشر فيها الفتن بشكل رهيب، منتشر فيها سلوكيات بدعية وسلوكيات شركية وتبرج وإسفاف وتصدير للتفاهات وتضييع للأعمار وتفشي للذنوب والمعاصي في كل مكان تقريباً

بتتكلم عن فئة كبيرة جداً من الشباب مش عارفة هي مخلوقة ليه ولا عارفة هدفها من الحياة أصلاً، هو طلع لقى نفسه بتقاله ذاكر ذاكر ذاكر، وفي الأجازة ماسك الموبايل ومش بيعمل حاجة خالص غير أنه يتفرج على الفيديوهات والشورتس والريلز وغيرها، شباب عايشين كدا بدون أي هدف، حتى اللي بيحاول يصيب الهداية منهم عنده مشاكل وتفكير وضغوط لا تعد ولا تحصى!

تمام؟ تمام..

نكمل..
بتتكلم عن فئات كبيرة وكثيرة من الناس، بمختلف أعمارهم، بقى عندهم تصالح مع الحرام وتصالح مع شيوع الحرام والذنوب والمعاصي، ولو تأملنا إحنا نفسنا عن مدى إنكارنا "بالقلب"واللي هو فرض عين على كل مسلم، هتلاقي أن الأغلب من الملتزمين والمتدينين أصلاً عندهم غفلة عن الإنكار بقلوبهم وبينسوا دا خالص..

تعالى بقى أنت في خضم هذه الأزمات والفتن، تعالى قول على علاء حامد أصله مأفون وكذاب وبيتحرى الكذب واعمل هاشتاج علاء حامد كذاب (رأي شخصي: من بين كل الناس يعني ملقتش غير أكثر الشخصيات هدوءً وعملاً في صمت وتقول عليه كذاب، ما علينا!)
ماشي يا سيدي، هشتري منك، علاء حامد كذاب..

• ايه الكذب اللي علاء حامد صدره في دورسه؟ ما تطلعوا لنا مقاطع يا جماعة كدا وورنا والله علشان نرده للحق!
• هو علاء حامد بيتصدر في ايه أصلا؟ ونوعية دروسه ايه؟
• من أول ما علاء حامد عمل قناة على اليوتيوب أو الساوند كلاود، ايه اللي صدر منه أصلاً يكون فيه خطر أوي على شباب المسلمين علشان نحذر الناس منه ونقول آه دا كذاب ومتسمعوش له؟

وأسئلة كتيرة محدش هيجاوب عليها بإنصاف علشان الإنصاف عزيز وعلشان النفوس مشحونة!

بس أنا هقولك إيه المشكلة، المشكلة في ضعف أغلب طلبة العلم أصلاً سواء علمياً أو أخلاقياً، القصة مش قصة مين كذاب ولا مين تابع لكيان ولا مش كيان (علماً بأن المقطع المنتشر فيه كلام يغيظ ويحرق الدم وفيه كلام لا يصح لكن مش هتكلم عنه)، لكن ايه حوار أن طلبة العلم اليومين دول ماشيين بنظام الحالقة، اللي يصدر منه خطأ يلا بينا نشيل تراثه بالكامل ونعزل تراثه بالكلية، ولا نكتفي بكدا وبس، لا.. دا إحنا نسقطه كمان..

والمشكلة الأكبر أنه بيقول: ما هو فيه بدائل وممكن نسمع لناس تانية.. سبحان الله!
هي العملية بأننا نسمع لناس تانية؟ طيب ما فيه ناس ربنا وضع لها القبول في الأرض وبتتكلم بدليل وقرآن وسنة، مختلفين معاهم آه بس بنسمع عن الله عز وجل، فدول معفيين يعني ومستثنين من السماع والاتعاظ بما يقولون؟
وبعدين مش قبل ما ترشح لي بدائل، قولي الأول هو اللي أنا هستبدله دا ماله؟ وعنده مشاكل ايه؟ مش تقولي كذاب ومتسمعش وخلاص كدا!

المشكلة أن العملية توصل أن متصدر للشباب وللتيار الإسلامي يصف شخص هو مختلف معاه بأنه "مأفون" ويوافق على هذا الوصف بدون إنصاف، فيبقى العملية بالهوى مش بالدليل الشرعي، مش بقرآن وسنة، مش بتحكيم أحكام وأدبيات الشرعية وأصول الفقه وأدبيات الخلاف مهما وصلت..

علشان كدا ودا رأيي الشخصي برضة للواقع الموجود حالياً:
طلب العلم في مصر ماشي بالهوى، بالمشاعر، بالمؤثرات الصوتية والبصرية في الخلفيات..
طلب العلم في مصر ماشي بالمشاعر وتغليب العاطفة مش بالدليل الشرعي وتنقيح المواد والتريث والتمهل والإنصاف وإسقاط مواد الدعاة على موازين الشريعة وموازين قال الله وقال رسوله..
طلب العلم في مصر ماشي بنظام: مادام أنت ماشي على اللي بحبهم يبقى أنت حبيبي، لو مشيت مع حد تاني تبقى عدوي..

وطلاب العلم في مصر مش منصفين إلا من رحم الله، وأدبيات الخلاف تكاد تكون منعدمة..

اللهم ارض عن عبدك علاء حامد وافتح له قلوب الناس، فوالله ما علمنا عنه إلا الأدب وحسن الخلق وطيب النفس والألفاظ وحرصه على المسلمين وحرصه على الدعوة إلى الله، واللهم إن هذا الكلام ظلم وبغي وكذب على الرجل لا يرضيك فاللهم براءة من كلمات لا تنصف ولا تعدل..

واللهم من أراد بالإسلام والمسلمين خيراً فوفقه إلى كل خير، ومن أراد بالإسلام والمسلمين فتنة فاجعل كيده في نحره واجعل تدبيره تدميره ولو كان ظاهره من أهل العلم والتقوى وأهل الصلاح ويُبطن غير ذلك فاللهم افضحه في الدنيا والآخرة على رؤوس الأشهاد.

والحمدلله رب العالمين.

»» نافع | Nafe3
»» صوتيات نافع

كلامي واضح جداً جداً وضمن سياق الرد والدفاع والذب عن المهندس علاء حامد علشان المنشور الباطل اللي فوق دا عليه، أما بقية المقطع أو الكلام الموجود فيه: فهو محل خلاف ونظر عندي، ودا رأيي الشخصي برضة وما أدين به لله عز وجل.

في أكتر وقت المجتمعات عايزة إصلاح ومحتاجة مصلحين، تلاقي حد طلع يقولك: أنا مش عاجبني فلان وعايز أسقطه، فهعمل عليه حملة وهاشتاجات!
- هتقولي: ما هو إحنا مش كل واحد هناخد منه ديننا، وانظروا ممن تأخذوا منه دينكم..
- هقولك ممتاز: محتوى الرجل موجود ومتاح للكل، اسمعه وأسقطه على موازين الشريعة والحلال والحرام والصح والغلط وبعدها قولي آه معاه حق وناخده منه أو معهوش حق ونرفضه..

لكن العملية والله العظيم مش قصة إنصاف، العملية نفوس مشحونة تريد إسقاط المصلحين أو بعضهم بأي طريقة لمجرد الخلاف، وسواء الخلاف معتبر أو غير معتبر، فخذوها مني وعن تجربة: لا خير في إسقاط المصلحين، لا خير في إسقاط المصلحين.

من بريد القناة:

1. فين الولاء والبراء في كلامي؟ إلا لو بتعتبر الناس دي كفار فدي نقطة تانية، لكن الكلام كان دفاع عن شخص معروف تراثه ومواده، ليه الإصرار الشديد كل شوية على إسقاط علاء حامد؟ ليه فيه ناس كل شهرين تلاتة مصرة على إسقاطه بالشكل دا؟

2. هي فين جلسات التنمية البشرية دي يا طيب، دا أغلب الصوتيات بتحث الشباب على التعلق بالقرآن والسُنة، ففين التنمية البشرية؟

3. يا راجل، يعني أنت شايف أني مش بعلم الناس غير 20% من دينهم؟ طيب والله نسبة 20% دي شرف كبير ليا عامةً بس أنت إنسان أعمى، ما بين برنامج القوى الخمس وغسيل قلب ولست وحدك وعشرات المبادرات التعبدية والدينية، دول كدا 20%، يبقى خير وبركة والله..

4. فين في كلامي أني وصفت حد بأنه خوارج ولا تكفيري؟ أنت بتقرأ كويس؟

5. بقية الكلام طمسته صيانة لنفسك وخوفاً عليك بس مش أكتر..

6. ما أدين به لله عز وجل أني أدفع عن رجل ما علمت عنه إلا خيراً، ولما أعرف عنه غير ذلك هبقى أطلع أحذر المسلمين منه لأن دا واجب ديني ومفيش فيه عواطف.

7. أنت إنسان قليل الأدب ^^

وعليكم السلام ورحمة الله وبركاته
آه بدافع عنه علشان الراجل واقع عليه ظلم بين وأنا أحسبه على خير ولا أزكيه، بدافع عن محتواه علشان طيب وبدافع عنه في موضع اتقال فيه أنه كذاب وهو مش كذاب، أي شيء آخر أنا مليش علاقة بيه..

أما مسألة الصمت المطلق، فدي قناتي وأنا بقول فيها ما أدين به لله عز وجل، فلو صدر مني خطأ فالبوت مفتوح للتناصح وأنا بقبل النصيحة وبحذف لو وقعت في خطأ شرعي.. إنما مش من حقك تقولي التزم الصمت في قناتي اللي هي بيتي.. دا بيتي، لو مش عاجبك الضيافة اللي فيه: سيبه، وبدائل نافع كتيرة والحمدلله..

ملاحظ انسحاب البعض من القناة، ودا شيء محزن الصراحة لأن الواحد كان يحب لهم الخير والانتفاع بما في القناة لكن الحمد لله أن فيه بدائل كثيرة، وشيء محزن أكتر لأن واضح أن العاطفة مسيطرة على الشباب لدرجة أنه مش قادر يتحمل معنى كلمة "إنصاف" ولو كنت مختلف مع حد اختلاف شديد..
ودا بيوضح قد إيه إحنا عاملين زي "القش"، عددنا كتير لكن بدون وزن ولا ثقل.. اسمنا ملتزمين لكن عاطفتنا فوق ما معنا من العلم، فربنا يصلح الأحوال وينقي السرائر، ودا بيوضح مستقبل شباب التيار الإسلامي وثقله العلمي والمعرفي والنفسي والأخلاقي هيكون عامل إزاي كمان 10 سنين، والله المستعان.

هبقى أحذف الرسائل كمان شوية وأسيب منشور م. علاء بس، لأنه الأهم.