شخص غريب مايسألنيش على اللي فات ولا يحكي معاي على اي شخص .. نهدرزوا على اكلته المفضلة و شن دار اليوم و شن قصته مع اكتر لون يحبه و شن اغنيته الفتره هادي .. شخص غريب يحكيلي على سبب حبه لنوع و طريقة القهوة امتاعه و امتى فاق اليوم و شن سهره امس .. شخص غريب يفكرني بروحي و مايلومنيش على اللي فات ولا يحملني طاقة اللي جاي .. شخص يهون و يمشي معاي الحاضر بكل تفصيل فيه .

مش حايتقبلوك !
مش حايتقبلوا انك متغير على دنيا كلها .. و انك وليت معاش قادر تتفاعل مع الحياة بشكل صح .. مش حايتقبلوا انك معاش تحس وانك متجمد مع دنيا قبل ماتكون متجمد معاهم .. مش حايتقبلوا فكرة انك صايرلك شي مغيرك او ان في شي مريت بيه وصلك لأهني ..

مش مهم عندهم شي .. غير انهم مش حايتقبلوك .. يا تكون متشكل على توقعاتهم و رغباتهم .. يا انت اخي ماتستاهلش معاش نبوك.

انت الدعوة الوحيدة بين الجبهة و الصلايا ♥️

في لحظة تكتشف انك هلبا و ان المكان اللي قاعد تعطي فيه مستحيل يستوعب كميتك و يستوعب اللي قادر و مستعد تعطيه .

ماتخافش لما يمشوا و يخلوك انك مش حاتلقى غيرهم .. او ان حياتك بعدهم حاتكون صعبة حتى لو كانوا هما مسهلين عليك الحياة .. زي ما جوك حايجوك غيرهم .. و زي ماعشت لحظات تفرحك حاتعيش مع غيرهم لحظات احلى و افضل و حاتعيش مع غيرهم سعادة ماكنتش تتوقع انك حاتعيشها ..

رد بالك تحساب اللي جابهم مايجيبش غيرهم بالعكس الشجرة لما يطيح ورقها اطلع ورق جديد ٫ماتقيمش اللي طاح بروحه .

أيعقل أنها لا تستجاب؟
‏وأنت تبوح بها بين الأذان والإقامة
‏ وقبل التمرة وكسر الصوم
‏ وحين السجود
‏وعند المطر
‏وقبل السلام في الصلاة
‏وفي آخر ثلث الليل ..

‏وإن تأخر الجواب، فربما يُدّخر لكِ خيرٌ أعظم مما تظن!

مش عيب وديتك القلب عطيتك
حبيبه و عزيزه و غاليه سميتك
و مش عيب كان بيه الروح فديتك
بكره نلاقي اعزاز بيفدوني
و مش عيب لو جرحك نزف داويتك
بكره كان جرحت بيداووني
و مش عيب كان حفظت صيتي و صيتك
بكره نلاقي اشرف و يصونوني♥️

نصيحة بعد عمر طويل من الاختيارات الغلط .. اعطوا لنفسكم فرصة انكم تختاروا بعناية من هو الشخص اللي تعطوه وقتكم و جهدكم و خبراتكم و ضحكتكم و حياتكم و تفاصيلكم .. اختاروا كويس و مهما صار ماتقدموش خطوة الا و انتو متأكدين انه هدا الاختيار الصح اللي يستحق تقدموه على نفسكم .

سنين ادللتي .. و معايا سنين ادللتي.

إذا افترقنا، وزادت بيننا المسافات تعلمين أنني لا أعود إلا إليكِ، وأنني غريب في كل أرضٍ أنتِ لستِ من أهلها، لذا حينما تحاربنا الحياة كوني في صفي أنا لأني لا أحارب إلا إذا كنتي معي. ♥️

اللي يحب حايعطي وعود مايعطيش شروط
اللي يحبك مايصعبهاش عليك و حايحبك بسلاسه و حايكون ديما اريح جزء في حياتك ..

كلامي ليه كل يوم :
"اني نبي قلب تاني نحبك بيه قلب واحد مايسدش" ♥️

في اشخاص نبي نسامحهم ولكن للأسف ماقدرتش ..
رغم ان رجعت نتعامل معاهم و رجعت نساير و نبصر و ناخد و نعطي ولكن من داخل في حاجه نكسرت بسببهم ماقدرتش نرجعها تاني ..
ماقدرتش نسامح على خيبة الموقف اللي جانبي منهم في عز ماكنت اني شخص هلبا كويس معاهم .. ماقدرتش نسامح ردة فعلهم اللي مانستاهلهاش في وقت كنت اني في عز ثقتي فيهم و في عز نيتي الصافية معاهم ..

في ناس يعتقدوا ان زمان ينسي و زمان يداوي ولكن الزمان مايسامحش .. مانتمنالكمش الا الخير و مانتمنالكمش يصيرلكم اي شي صارلي منكم ولكن لله حكم و للزمان موعد ولو الانسان نسي ربك الموجود ماينساش .

‏وفجأة تأتيك الجرأة لتحرق الصفحة التي كنت تخشى طيّها ..

إياك أن تنسب تيسير الأمور، وسهولة ما كنت تستصعبه يومًا، والفتوحات والأرزاق التي تحفّك، بخبرتك وذكائك، ولا لأحدٍ من الناس!

استشعر أنه لولا الله ما تحركت حركة، ولا تقدمت خطوة، ولا فهمت معلومة، وأن من أعظم أسباب بقاء النِعم ونمائها نسبها لله تعالى.

والله يُحب أن يُذكر ويُشكر سُبحانه

الانسان هو اللي يغلط في حق روحه لما يحط نفسه في مكان او علاقات او اشخاص هو عارف ان هلبا فيهم .

فيك بنتحسب .. مانقدر نتحسب كيف غالي و نضره؟

خليك ديما حاط في بالك ان الدنيا هادي سلف و دين اكتر ماتتخيل .. و ان كل شي حاديره حاتلقاه بخيره و شره ..

ديما احسب حساب الكلمة لما تقولها و الموقف لما اديره كل انسان في الدنيا حاياكل من الشجرة اللي زرعها .. انت بنيتك و تصرفاتك مع الناس حاتاخد زيه ..

اجبر بالخاطر ديما لو كنت تحب جبر خاطرك .. و اوقف و افزع لناس ديما لو ماتبيش تحصل و ماتلقاش حد .. و اعطي لناس ديما لو ماتبيش البخل عليك .. و ماتتكلم على حد لو ماتبيهاش في سمعتك .. و ماتقلل من حد لو ماتبيهاش في قدرك .. حياتك انعكاس تصرفاتك

" اللي يزرع ورد يشمه .. و اللي يزرع شوك حايلمه " ♥️

تمنيت معاك نعيش نكتب في حضنك اللحظات
تمنيت نلود معاك العالم و تصور اللقطات
تمنيت نعيش نحقق حلمك خدمة و سيارات
تمنيت اني تمنيتك .. انت حلمي و القرارات ♥️

اني اهني .. باش نبوس ايديك
اللي الحياة عذبتهم ♥️