...................... الله آوياك ..................

نيـــتك راشــــده يـاناسي آلاحــــباب

................... اللــــه آويــاك يل مني تبرّيــــت

بري الذمـــه وعفاك الله آمن الحساب

.................. عســــاك آبخير ،تلكَه آشما تمنيت

طبع بيك الغـــدر ، والطبع غــلاب

.................... موصوجك أنا بلا عقل حبيـــــت

مالي آوياك لوم او مـــاإلــي اعــتاب

.................... اعذرنّـك وآكَـلـك زيــن ســــويت

خلص وكت العتاب وحـرك الآعصاب

................... رحــت وبماي غيمك ناري طفيت

غبت بس مااحس عـن كَلبي شي غاب

................... لأن مـــــالك مجان آبكَلبي خلّيــت

تـــــوّه الليل نسّم والجــــــــرح طـاب

................... غـفـيت وطيف غيرك بيه تدفيـــت

نـــــــــوم العافيـــه نومــــــي بالغياب

.................... جنت مـاآنام وآنت آمجاور البيــت

برد كَلبي وشفت وجـــــه الله مـن تاب

..................... ونسـيـتك يل تطفي النار بالزيــت

العشك دخـــان راح آويا الهوه الهاب

..................... وآزعلك لو عليَّ النوب ردّيـــــت

لا تســحك عـتـبـتي ولا تــدك بـــــاب

..................... وفضل منك اذا بالطيف مــاجيــت



#عبدالکریم_ألقصاب

سنين الصداع


بصوت محمدلأميري


#عبدالکریم_ألقصاب

* بوسة شمس *

يا بعد خيط النفس ،

ما يخالف .

مر عليّه بغير بسمه ،

بلا شلونك يا حبيبي ،

بغير حس .

مرني جنّك ما اِلك بيّه عِرف ،

لا معاشرني أمس .

مرني ، بس عاين عليّه ...

وآنت ماشي .

نظرة عيونك ضوه يسولف همس .

نظره من شاطي الكحل ،

تمسح مرايات روحي ، ...

تجيسهن بوسة شمس .

#عبدالکریم_ألقصاب

** غيظ الماي **

يموجة ماي ،

مدري بيا جرف خدرت ،

خيالك نجمة التنشاف ما تنكظ .

من أول شرارة غيظ ،

طول الليل صحره وجفني ما غمّض .

يغيظ الماي يمفضّض ،

ولو ما بيك صفنة شوك ،

ولو جنك نسيت هناك ،

بعد بالروح فارش لك حرير آبيض ،

بعدني فاك شباجي لعبيرك ...

بلجي يوم تهب وآشمّنّك .

بلجي الحظ يسويها ...

ويسمّوني سعيد الحظ .


#عبدالکریم_ألقصاب

الباب

بصوت محمد لأميري

#عبدالکریم_ألقصاب

............. الباب ..............

كَالولي تجي وفزيت ،

وبجّاني الفرح ،

صار آشحلاته البيت ،

وآمتدت أديه ،آشلون ....؟

ما ادري !

وآنرسمت الشبكَه بغير ما ادري .....

................................ورحت للباب .

كَالولي تجي آووصّيت بيك الباب .

كَتله الجاي ، بيْه نيشان بوسه ،

.........................ودمعه من تيزاب ،

كَتله الجاي ،

حافظ كل سوالفنه على كَلبه ،

وحافظ كل غنا الغيّاب .

كَتله الجاي رايح ينحني آكَبالك ،

يشبعك بوس ،

ويشاور العتبه آبشفه من عطاب ،

آووصيته ، كَبل ما تنحني له .....

..........................يضحك بوجهك ،

ياخذ بوستي منك ،

يفك روحه ......

.............ويكَول افيش اجونا آحباب .

بيبان العشك مفتاحهن بوسه ....

..............................وهمس خلاب .

كَالولي تجي .

وحطّت عصافير المحله آمتانيه الخطار ،

وآغصان الشجر.....

نفضن ورك حنه وصواني آزغار ،

وعودان البخور اشتهن طعم النار ،

وحرك روحه الشمع ،.....

.......................من سمع بيك وذاب .

وآنا لخاطرك .....

...............رشيت ماي الورد عالعتبه ،

و غشّيت برفيف الكَلب شبّاجي ،......

كَلت يمكن يجيك آتراب .

وبلهفة عطش تانيت ،

تانيتك تجي لكَلبي ،

تجي لعيني ،

مثل جيْة الحلم من غير دكَة باب .

وبلهفة عطش تانيت ،

وآستعجل نبض كَلبي عليك .....

.........................آووكَفت الساعه ،

ومدري شلون ،

غبْت آويا الشمس وتجرّح اللبلاب .

وبلحظة صحو تذكرت وين آنا ،

وعرفت الكَال لي جذاب ،

وجذب نيسان حرك اعصاب .

عرفت الكَال لي جذاب ،

وعرفتك ماتجيني ،

وآنكسر كَلبي ،.......

وكسرت الباب .

#عبدالکریم_ألقصاب

*** شبابيج ***

يا ولك يل ضيّعتني .

يل طحت ورده آمن آديك ،

خايب شمالك شبيك ،

تنزل برمشة جفن من سما روحي ..

وتمشي بالشارع الضيّج ..

والشبابيج الرخيصه ..

ابليسهن يضحك عليك ؟

يل طحت لكَطه آمن آديك ،

طحت من عيني وبعد ما آريد آشوفك .

خاف من تصدف وآشوفك ،

ينكسر كَلبي عليك .

#عبدالکریم_ألقصاب

وآلتقينا ...
وشفتك مجنّح على عشرين نيه

كَلت بويه ، الساترالله ،

هذا بيْه ريحة جرح .

#عبدالکریم_ألقصاب

** نجمة وسوالف **

لا يكَلبي ،

سويعه وتفز الشمس ...

ويزقزق العصفور ...

وآنت ،

أنت طول الليل كَاعد .

فارش الصفنه درب للمايجون ،

للخذوا فد يوم لمساتي معاضد ..

ودار دولاب الهوى وكلّش نسونا .

ليش طول الليل كَاعد ؟

ماد خيط الشوف لنجيمات ..

ما ينلظمن بخيطك كَلايد .

ولا يصيرن لك مراود .

لا يكَلبي ،

لا تظن نجمه تدفّي فراش بارد .

يا مدوهن ،

سويعه ويفز الحمام ،

هلبت سويعه تنام .

لا يكَلبي ،

رحت بالصفنات زايد ،

والله شاهد ،

العلى بالك ما تمر آببالهم ،

ما الك حبة عنب بسلالهم .

ناس شبعت نوم ...

ما واحد يهم بهموم واحد .

كلها نامت وآنت كَاعد .

يمته تنسى الناس والصفنات ...

ومنعّس تجيني ...

ومن حرير الروح آذبّن لك وسايد ؟

آه يا كَلبي ...

يدومك موش يمّي .

آه يا كَلبي يشارد .

آه منك .

#عبدالکریم_ألقصاب

من قصيدة ...
( ابليس فوق المنبر )
*************
وقالَها اِبليسُ للأله ،

خلقتني من نار ،

وآدمَ الأنسانَ قد خلقته من طين .

النارُ لا تسجدُ للتراب .

الموتُ للصحابةِ الساجدين .

لأغوينَّ الناسَ أجمعين .

توعدٌ ، ترقبٌ ، مخاضْ ،

وأُنزِلَ الأثنان في الزمان والمكان ،

وآحتدمَ الصراعُ فوق الكرة الأرضية .

مَنْ يا تُرى سيعتلي ...

قشرةَ هذي البيضة الفاسدة .


#عبدالکریم_ألقصاب

كل هذا العلى وجهي

وتكَلّي الوجع ما ينشاف !


#عبدالکریم_ألقصاب

شي غريب ،

حتى طيفك ،

البارحه كَوّه اِجاني ...

وكَتله ظل يمّي وزعل .


#عبدالکریم_ألقصاب

جمر حزني ولكَيتك فرحـة آطفال

وصار سنين أضحك مــن فرحتي

يمرجحني الفرح حد غمضة العين

وآنام ومـــــــــا تفاركَني ضحكتي


#عبدالکریم_ألقصاب

يا ندى الله ، يا ملَك .

بكَطره منك ...

خضّرت لك ورده بيضه .

والله لو تمطر شويّه ،

جا صرت بستان آلك .


#عبدالکریم_ألقصاب

احفر كَبرك بأيدك

يمكن باجر آمن تموت

ما تلكَه ولا حفار

#عبدالکریم_ألقصاب

اشتهيت آتمر وآشمنّك ولو دخان

آشيضرك من تجي سويعه ؟

ولو جيّه بوجه زعلان .

ولو تكَعد آمغمْض العين

ولو نتكَابل بسكته مثل حيطان


#عبدالکریم_ألقصاب

*** دعاء النجاة ***

يملك الموت ،

شربت هواي من دمنا ...

ومدامعنا وملامحنا ، يملك الموت .

متى ، يايوم توصل للثماله ...

وبأمان نفوت ؟

لآزهار الندى ، لأحلام ورديه ...

عصافير وفراش نفوت .

يا ملك المكَابر جم شمس طفّيت ؟

يا ملك المكَابر جم كَمر واريت ؟

جم كَامة ضوه طاحت بحلك الحوت ،

وجروف النجاة بلا ندى ضحكه ...

ودفو شبكَه ولمع ياقوت .

خنكَه وموت بالبسكوت .

يرب الناس ، يا معبود ،

البراءه لايذه بسدّك .

الضفاير لايذه بسدّك

كل آعزازنا بسدّك يرب الناس .

ينور الكون ،

هواك شكثر بالدنيا ...

ومخنوك العزيز يموت ،

ولا واحد يمد اِيده على التابوت .

خنكَه وموت بالبسكوت .

دخيلك ربي من باجر ،

مدري يا عزيز يموت .

#عبدالکریم_ألقصاب

.................... طعم الملاحـــــــة ................

خفـف مــاي حسنك لا أسولــف بـيك

..................معــذور اليفضحك لـــو فــكَد رشـده

يا خيط السمه ، نســـمة هــــوه تثنيك

.................وتحضنك فراشــــــه ورازقي آمـــندّه

حلو ، من ثوب حسنك يبصر المكفـوف

..................ودفـــو صوتك دعـاء ،الميت آيكَعــده

اذا كــل الجــــــمال اتجـــمع آبانسان

...................أنــــت اعيون وجهه وشــفّته وخـــده

على طعم الملاحـــــه والغرابـه البيك

...................اليلاكَي آمحـاسـنـك يتبســـمر آبحــدّه

يمّي وما أعرفك، تجي بغير آوصـاـف

....................لان ربــك يمـــدّك بآحلى مــا عنـده

مــايع بالمشابك طــــول كـلّه آخصــور

....................خايــف تنكَــــطع يا شــــــدّة الشــده

عجيب اشلون تمشي وآنت كَامة ماي !؟

....................عين الله آعلى طولــــك خاف يتـبـدّه

يلوليلي جمالك وآشـتهيك آكَمـــــــاط

.....................ولولـيلك وآنـــومـك نــوم البمـــهده

أكَلبك نوب هيج ونــوب هيج ونــوب

....................أنكتك على آشـــفافي آمناكت الورده

ســـــواليفك آبكَلبي خيطهن ملـــــظوم

.................... على كَلبي حفظتك ، دفترك ســـــدّه

أعرف آلياخذنـــــك للخــدر وتــــذوب

......................وآعـرف اليوجعنّك وحــدة الوحــده

صـــار اسنين دايخ مثل سـلعه آبســوك

.......................واحـــــد كـاظ كَلبي آوواحـــد آيهده

بس آنـــت خذتـني وبيـك بس مشــــدود

......................مـــــــا خلّـــيت لــحّد خــيط اليشــده


#عبدالکریم_ألقصاب

.............. شرارة بوس .............

ماع كَلبي لشوفتك موعة حرير ،

وجيت بجناح الرفيف لطعم نارك .

بيّه لهفه آبكَد غياري ،

............وبيك شوك آبكَد غيارك .

مدلي شبكَه آكَدار خصري ،

رشني جدحة عين ظبيه ،

وبسمة آكَرنفل وشهكَه من عبير ،

وآفرش لروحي خضارك .

اشعل البوس بشرارك ،

بوسني آبكَد موعتي آبحلّة آزرارك .

وحده وحده ،

موش كلهن مره وحده .

خاف بالبوس آشتعل وآكشف آسرارك .

خاف مانطفه آبخدر ، .......

...............من تنطبج ناري آعلى نارك .

ياعطيْة الله ، آشحلاتك ،.........

وآشحلاة اللهفه والرجفه ........

..........................آبمحطات آنتظارك ! ؟

شنهي سالفتك حبيبي ؟

شنهي سر آلبيك ، .........

.......جن آمن الرضاعه آتدور بيّه ،

شوك مديور آبحليبي !؟

يابعد عمري آبحليب آمي آشدارك ؟

شنهي سر دورة طعم صوتك بروحي ؟

احلى من بوس المطك صوتك بروحي .

شنهي سر دورة نياشينك آبعيني ؟

من سنه آمبخَّر ،........

.......بعد نشعات بيّه من سمارك .

من سنه آمنوّر قميصي ،

بعد من كهرب كَذلتك .......

.........فوك صدري آخيوط نور ،

وبعد قوس آمن الضوه لجدحة آسوارك .

من سنه آمجمّر ،.....

........بعد بيّه شرارة بوس منك .

ياملذ جوية شرارك !

يالذيذ، آفيش ، ......

.....يا البارد مثل غيظك شرارك .

يا آحبيّب ،.....

جيت بجناح الرفيف لخدر نارك .

مدلي شبكَه اكَدار خصري ،

بوسني آبكَد موعتي آبحلّة آزرارك.

وحده وحده ،

موش كلهن مره وحده ......

خاف بالبوس اشتعل وآكشف آسرارك .

خاف بـيـديـك اشتعل وآكشف آسرارك .

#عبدالکریم_ألقصاب

ليش نخاف؟

الشاعر عبد الكريم القصاب

بصوت محمدالاميري

#رسايل_شوك @o1uuoo