باوعت عليه الخوف تارس عيونه ... نزلت عيوني من عيونه .. ودرت وجهي

: اني اعتذر لأن اتصلت بيك .. بس ما اعرف رقم أحد غير رقمك .. والا اني حلفت بعد ما أنزل نفسي الك

بعد ما كان خايف رجع وكف وباوعلي
: لو لسانج مسكور بدل ايدج افضل .. بله لا تمضرطين واسكتي تنزل نفسها الزركة ام عطوب شنو صايرة تدورين كرامة وياي من شوكت ؟

باوعت عليه ضايجه: شنو تمضرطين شنو زركة ام عطوب احترم نفسك ولاتحجي هيج وياي .. طبعا ادور كرامة.. لو نسيت كلامك اخر مرة .. وهسه طلعتني زركة وتصنف على وضعي شحال لو ما جنت ميت عليه

: عليمن ميت شنو قحط نسوان .. وانتي هاي تزوجتي وبعتيني .. الف وحده تتمناني

روحي فارت منه : اني ولله صوجي طاحضني لأن حافظة بس رقمك .. صاير كلش ما تحترم

: هسه انتي مخابرتني شنو ترديين تطلعين حركة كلبج بيه
لو نغثيتي لأن كتلج متزوجة قابل مجذب اني






درت وجهي مزعوجة: كتلك ما اعرف رقم أحد غيرك .. من قلة الخيل

: فوووكاها .. ولج انتي شكد ما يغزر بعينج .. اجيت روحي مفرفحه من الخوف عليج وتاليها هيج تكولي..
عمي انعم الله عليج .. اخخخ اخ شسوي لهذا كلبي الي يركض الج قبل جدامي ..

: شكرا على جيتك اني بس اريد تساعدني تركبني سيارة اروح لبيته..

: وزوجج المصون ويه لعد .. غير افهم شكسرج ووين جنتي ساچة ..

: رحت للطابو.. علمود موضوع العمارة .. عبالي أكدر ارجعها.. بس طلعت السالفة طويلة ويرادلي كوم معاملات ومراجعات .. وطلعت مسطورة .. عبرت الشارع .. واني اعبر الشارع رفعت راسي ادعي .. و ماحسيت غير سيارة دعمتني .. والي دعمني جابني هنا وشرد

احجي وباوعلة وكف فوك راسي متخصر ويستمع ...

:ورايحه تفرفرين وحدج بالدوائر انتي وكنازيعج هاي وثوبج الكلف .. ولله عمي عرمة صدك ...وبعدين اكو اثول بنص الشارع ورافع رأسه .. حصرج الادعاء الا بنص الشارع .. يعني اوكفي ادعي على الرصيف شيصير .. مايوصل الدعاء ؟..

: انتتت شنو جاي ترزلني لو تساعدني .. روح ولي حتى مساعدتك ما اريدها لاخلفه الله عليك ....اني لو عندي موبايل ما جان خابرتك بس حظي مخليني كل ماريد ابتعد عنك يفرني ويرجع يشمرني عليك

ابتسم وحجى : شوفي القدر مصر يجمعنه بس انتي مصرة تفرقينه ..

درت وجهي وابتسمت

: زين انتي عشتو مو على.اساس عروس رجلج الشفية ليش تاركج طالعه وحدج .. وبعدين اكو عروس تطلع اول ايام عرسها .. ما خفتي تنجبسين

: يااا قنادر ياعروس شبيك انت شنو كلام العجايز هذا تنجبسين شنو طرشي اني وانجبس .. تره اي شي من الي ابالك ماكوو. افهم .. وهو اصلا رايح لبيته مو يمي

: هاااا طلع مابي خير مع الاسف مو كتلج سابقا اذا افحصه الكاه منتهى الصلاحية ..

: استغفرالله ربي و اتوب اليك .. عدنان ولله تعبانه ورايدتك بس تساعدني اوصل للبيت كلشي ما اريد منك تساعدني لو لا ؟






: لعد المن جاي اني .. كومي بوية يله .. عمت عيني كون الكسر بجبرية ولا بيج

:لاتحجي هيج وياي مو تكلي انتي مرة متزوجة وخوية خوية

: غير اساعد اختي لعد .. اوكفلج هسه حتى تخدميني بيوم عرسي.. لعد الاصدقاء المن ينرادون ..

وكفت بمكاني احس رصاصة وضربني بكلبي من كال هيج .. باوعت عليه بعيون مدمعة مهقورة .. بلعت غصتي وكتلة

: أن شاءالله اكيد اوكفلك ...

: وشرط تباتين يمنه بيوم بعرسي وتسويلي اني ومرتي ريوك بيدج ..

من قهر كلبي احس روحي صارت تفور كلامة وما الي عين ارد عليه بشي .. بقيت ساكته وهو كمل كلامه..

:اكلج انتي مو تصلين شلون لابسه ثوب لكف ومطلعه كراعينج .. هسه لو حلوات شسويتي لبستي فوك من الركبه يمكن ..

:مالك شغل بيه عود من تتزوج تحكم بمرتك براحتك ..
هسه طلعت كل هل عيوب بيه الله يرحم من جنت كاتل روحك عليه ..

:هسه وبعد

:شنو

:اكول بسمة ست الحسن والحزن

غلست على حجايته بس كلش حلو من حجاها و مشيت بتعب وهو يساعدني بلا ما يلزمني .. كوة امشي على رجلي وأيدي ماذيتني. ومشبكه منها .. مشينه لحد ما وصلنه السيارة .. فتحلي الباب الورة وساعدني اصعد وخله جنطتي بحضني جان شايلها هو ..

:هاج جنطتج .. جنها جنطة الداية ام زكي .. شكبرها
لخاطر الله شحاطه بيها .. يمكن اذا افتشها حتى فطايس اطلع منها

: بلا لا تصنف مخليه بيها غراضي اوراق مهمة .. مو راح تذلني ..

لم ضحكته وراح ركب بالسيارة هو يسوق مادري.اذا هاي سيارتة لو طالبها .. وماردت أسأله حتى لا يكول تريد تفتح مواضيع .. بقيت دايرة وجهي للجامة وهو حرك ومشي ..

كسر الصمت كال وهو يسحب نفس ويشغل جكارة فتح الجامة .. مرتاحة وياه ؟

بلعت ريكي ورديت
: ماشفت منه شي حتى أقرر مرتاحه لو لا .. كل الي اعرفه .. كارها الوضع كله ومنقرفه .. وافكر باي طريقة تطلعني من هل حال .. مجرد اباوع بوجها تلعب نفسي .. اول يوم .. كعد طول الليل يسكر بالحديقة.. وراد يتهجم عليه بس الحمدلله رب العالمين نقذني منه .. ثاني يوم من صبح راح لبيته .. خلصت من خلقته






:عاجبج هل وضع .. الي خليتينه بي .. بعنادج .. شوفي شلون الدنيا تريد تخلينه سوة بس انتي مصرة تخلينه كلمن بطريق...

نزلت دمعتي بقهر
: بس أمن على خواني .. ماريد شي من دنيا ... وكل الي سويته هو لخاطرهم ..

:راح اكولج شي .. واترك كبريائي وكرامتي على صفحه وراح اكلج الحقيقة الي احس بيها ..
لو تتزوجين عشرة .. شايفة شنو عشرة .. ما راح اعتبرج غير بسمه حبيبتي الي شوكت ما ترديني تلكاني حاضر يمها ..
مراح اشوفج بيوم زوجة غيري .. مدام انتي بخيالي زوجتي وحبيبتي وكلشي الي .. لأن هذا مو زوجج بسمة زواجج منه باطل ثم باطل..

بقيت ساكته وبس عيوني تجري .. وكف السيارة يم صيدلية ونزل .. دخل الصيدلية شوي وطلع وخله علاكة بصفي .. هذه مسكنات ..

:بيش صارن ؟

باوع عليه مستهزء وهز رأسه ما راضي

: راح تروح للبصرة ؟

اتنفس بقوى: المفروض باجر .. والمصيبه احس روحي صارت هنا .. وخايف اروح وتحتاجيني وماكدر اكون يمج بسرعة..

:عدنان اريد أكلك شي .. اعتقد عمي صالح هو شامر التهديد بسيارة خالد أو يعني مكلف احد يسوي هيج

ويه حجايتي داس بريك والتفت الي بسرعة ... شنووو

: اي ولله .. بيوم الي خطبتني وره ما طلعتو ..هو كام يصيح .. كلعتهم منا وماخلصت منهم .. وقبلها بفتره هو كالي ادري بيج موكلة أميمة تساعدج ترجعين العمارة ..وحجى تلميحات استنتجت منها أن هو الي مسوي هيج ..

: وليشش هيج يسوووي ليش .. شنو اذيتنه عليه .. جيران عمر احنه .. شنو غايته ؟

: من عرف أميمة جاي تساعدني راح يطيرها هذا خصم الكلام

دار وجها وصار عيووونه تطلع نار .. وصفن كدامه هز رأسه
:.. بسيطه.. بسيطه ياصالح العااار ..
امي ليل ونهار تبجي. على بيتها .. ابوي تمرض من القهر .. اني تركت دراستي وصرت ادك.عماله .. اخوي من الخوف اخذ عائلة وشرد.لسوريا .. وبالاخير يطلع كل هذا سبب صالح .. بس ما اطلع رجال وشاربي مو على زلمة اذا ما طلعت هل سوالف من عينه ..

:أكلك ردت اسالك وبطلت خفت تكول تريد بس تسولف بس الفضول كتلني .. هاي سيارتك لو مشتريها ..






اشو هذا بعد كان عصبي نفجر من الضحك لدرجة صار يكح .. الحمدلله والشكر انفصام مو ستوة عصبي ..

:تره ما كتلك نكته .. سألتك سؤال

مسح عيونه والضحكه بعدها بوجها
: شنو سيارتك لو مشتريها .. متأكدة من تدعمتي ما طحتي على راسج .. وبعدين من شوكت صايرة من تردين تسألني شي تفكرين وياي بهل طريقة ..

:وهو اقصد.يعني سيارتك لو شنو

:لا ماعندي سيارة هاي مال ولد ويانه بالدوام من اتصلتي بيه اخذتها منه ..

: حاولو ترجعون لبيتكم .. مجرد أحسك قريب هل شي كافي يحسسني بالأمان

:راح نرجع ولله نرجع .. والا اعلم صالح درس ماينساه

الطريق صار كلش كصير لأن تمنيته ما يخلص .. بس للأسف خلص .. وصلت للبيت .. بس ما وكف السيارة كلش بالباب .. بس فتحت عيوني من شفت سيارة سمير واكفة بالباب مال بيت .. طلعت مني فجاء ..

: هذا شجابه مو كال بعد اربع ايام يله اجي

باوع السيارة ورجع باوع الي
: شنو جاي للبيت

: الضاهر هيج .. سيارته واكفة بالباب ..
ياربي ماريد انزل وأشوف خلقته ولله

: خل يولي لاتنزلين روحي لبيت جدج ودخلي بغرفتكم يم اخوانج

: اخواني يمي بالبيت لازم انزل .. بقى يباوع الي من المرايا .. وبقى ينافخ..

نزلت بصعوبه وعدنان بقت عينه وراي وطابك حواجبة .. وصلت لباب بيتنه وهو بعده واكف.. قبل ما افتح الباب وادخل باوعت عليه نضرة أخيرة..

دخلت للبيت محد موجود بس سمير كاعد بالاستقبال .. شافني من دخلت كام بسرعه واجاني عاقج وجها من شافني .. سألني

:وووين جنتي دايحة ... شاف ايدي
وهااي شبيج مكسرة

رحت تمشيت للقنفه وكعدت متألمة
: جنت رايحه للسوك اجيبلي كم غرض .. بالطريق سيارة ضربتني .. وشوفت عينك.ايدؤ نكسرت وكل هذا الوقت اني بالمستشفى الناس الغريبه هي وكفتلي ..

:ماااطلع عليه عرسسس هذا اسود ومصخم .. اول يوم عندج عذر وهسه مكسرة وبعد شوف شكد يله تفتحين ايدج ...انتي مصايبج وياي متواعدة ؟






: هذا كله عقاب من الله لان اخذتني غصب وصرتو تبيعون وتشترون بيه انت وعمي

: عمج هو الي باااعج موو اني هل كلام اله كووولي مو الي .. ذبج علية وكلشي ما مستفاد منج .. لعد ما انطاني اختج شو جنها جمارة وين جانت مضمومة ..

فتحت عيوني مخترعة وصرت أتلفت .. سلوووى وين

: اخذت اخوانج وراحت بس شافتني صارت ترجف وشردت ..

:شجابك.انت.اليوم مو كلت ما اجي فد اربع ايام

راح شمر نفسه على القنفه مبين ماله خلك يتعارك : تعاركت بالبيت وطلعت.. اروح هناك ذيج تنك فوك راسي .. اجي هنا الكاج انتي كالبه الخلقة ومكسرة ...

تركته ورحت للغرفة سديت الباب وساعدت نفسي كوة يله كدرت أبدل ملابسي ورحت مددت على الجرباية
حاولت اغمض عيوني .. ارتاحيت من سلوى ماخذة اخواني ورايحة ومابقت كدام هذا ..
بس ارتاح اروح الهم ... غمضت عيوني من تحركت متألمة

هسه منين طلعت الي هذا السالفة مال كسر .. ابد مو وقتها .. لازم اروح احاول اطلع تقرير طبي لأمي .. ولازم اكدر احصل على شهادة وفاة ابوي .. ولازم اكدر احصل على قرار وصاية .. وشلون اسوي كل ذني مجاي اعرف ..

يرادلي فلوس ويرادلي وقت .... لازم اكدر احصل على كل ذني قبل ما أقدم بلاغ ويوصل لعمامي .. حتى اكسب وقت .. الله يعلم يمكن كسر ايدي هذه هو رب العالمين اله بيها اردة .. حتى يكون الوقت بصالحي ..

بس ارتاح يومين .. اروح للمستشفى .. الي بيها امي ..
بس شهادة الوفاة شلون ؟ الاوراق المهمه كلهم بجنطة بغرفة بيت عمي صالح .. لو بغرفة صادق ممكن بيها مجال واكدر اخلي محمد يجبيهن ..

من بين صفناتي غفيت ... هم تعبانه وهم جسمي مكسر ..
فتحت عيوني .. الغرفة ضلمة .. وصايرة الدنيا لليل .. واني كل هذا الوكت نايمة ..

كمت طلعت من الغرفة اباوع بالبيت سمير ما موجود.. طالع .. باوعت الساعة ب8 وربع .. رجعت اخذت علاجي قفلت البيت وطلعت .. رايحه لاخواني .. أعرج من رجلي وأيدي ملفوفة وجسمي كله يوجعني .. كوة وصلت للبيت ودخلت
بوجهي لغرفتنه .. لكيت اخواني وسلوى كاعدين يتعشون .. بس شافوني طفرو بخوف

سلوى: هاااي شنو بسمة شصايرلج ..

كعدت تعبانه
: اسكتي يمعودة ندعمت واني طالعه من الدائرة .. وصار الي صار .. والرجال وصلني المستشفى واختفى






: وشنو ألي دعمج اعمة .. مايخاف الله عافج وراح ..

: لا شبيج هو مبين رجال فقير ويركض على العيشة وسيارته زين منها وتمشي تلكينه خاف يتورط مبري الذمة.. اني هم غلطانه

.. سودة عليه حبيبتي سلامتج .. مددي وارتاحي ..

:لا اريد اتعشى جوعانه ..

جرت الصينيه قربتها يمي وكعدت اكل .. وبعد الاكل شربت مسكن ..

بسمة: شوكت رجعتو هنا

:بس اجة رجلج .. ما بقينه.. بسمة ؟

:ها

: رجلج يخوف.. تدرين يباوعلي هيج مدري شلون بس كلش نضراته مو نضيفة ..

ركزت وياها وهي تحجي وسألتها:احجيلي شنو صار

:من دخل اني تفاجئت لأن انتي كلتي ما يجي .. دخل من باب المطبخ

سمير: منو انتي ؟

اني تفاجئت والصدك حيل ارتبكت ... اني سلوى اخت بسملة

فصلني بنظرته من فوك ليجوة وعيونه تريد تطلع من مكانها
: بسملة عدها هيج اخت وذبوها عليه .. اشو انتي ولا تشبهيها ..

:شلون يعني ..

: يعني انتي بيضة وحلوة وجهج بشوش عكسها هي الي كل ما اشوفها جنها أرملة شايلة هموم الدنيا على رأسها ..

:ليش هيج تكول عليها بسملة حلوة ..

:بس اني احلى بهوواي منها .. احتركت روح صالح وين جان ضامج ..

اني من هذا كلامه احس كلبي وكع برجلية طلعت فوراً من المطبخ وراح يمشي دخل الاستقبال ..
اني بسرعه جريت اخواني حتى اطلع .. هذا صاحني من الاستقبال .. سلوووى

باوعت عليه من الباب .. نعم

:شنو وين رايحة. تعالي كعدي يمي بالاستقبال خل اتعرف عليج اسولف وياج

:لا لا لازم نروح هسه ..

خليته يصيح وراي وطلعت من البيت ركض احس كلبي وكع من الخوف ولله لو باقية أكثر يمكن حتى يسوي بيه شي .. الله يساعدج بسملة هذا شلون راح تعيشين وياه ..

:الله لا يوفقة هل نكس.. زين سويتي من رجعتي بسرعة .. بلكي ينكلع واخلص منه ..

بتت يم اخواني ومارجعت للبيت .. الكل نام الا اني .. متأملة احصل على فرصة وحدة اكدر من خلالها افتح كنتور صالح .. وادور بالاوراق ..

طلعت من الغرفة اتسحب .. بعد ما الكل راح بسابع نومة والي خدمني جبرية تنام بالاستقبال يم رجلها .. والغرفة تبقى فارغة .. صوت الشخير مال جبرية وصالح طالع من الاستقبال.. رحت اتمشى بهدوء حافية .. ودخلت غرفتهم بابها كان بس مردود..

وكفت بنص الغرفة أتلفت اريد ادور المفتاح مال كنتور .. بس ضحكت بلا صوت واني اشوفه معلك بالقفل ما باب .. وما مضموم ..

على كيف كلش وبحذر فتحت الخانة بيها جنطة الاوراق .. الكنتور خانه وحدة وتلث رفوف الرفين الجوة غراض مو مهمة والرف الاخير بي كوم اوراق وصور وأكثر من جنطة .. صعدت على الخانه حتى اكدر اجر جنطة الاوراق .. والحمدلله طولي ساعدني وجريتها فتحتها اتاكد قبل ما اخذها واطلع .. طلعت الغرفة بسرعه ورجعت لغرفتنة سديت الباب وكعدت كومت كل الاوراق وبقيت اقرة بيهم وحدة وحده

دورت أكثر من ورقة لحد ما وصلت للورقة الي أريدها .. بس كانت أكثر من ورقة مطبكات وحده بطن وحدة شهادة وفاة ابوي وجنسيته.. ورقة ثانية قريتها واتفاجئت منها ..

جمهورية العراق
وزارة الصحة
دائرة صحة بغداد / الرصافة
مستشفى للطب النفسي (الشماعية).. الخ

بقيت اقرة واني متعجبة .. تقرير طبي لأمي يثبت أنها غير مؤهله لرعاية ابنائها أو أموالها ..

عمي صالح .. يعني هو مطلع تقرير طبي لأمي.. زين ليش وشنو الفائدة شوكت ..

هل ورقة الي قريتها دفعتني للفضول حتى ادور بعد بالاوراق... وبعد ما بقيت افتح بالاوارق واقراهم .. عيوني أحسها طلعت من وجهي واني اشوف ورقة مكتوب بيها ..

... قرار وصاية ...

يتبع .....

28

---------------------

هي الكبرى،
وسند الصغرى، ودفء الوسطى، وهمس الرُبى.
تحمل على كتفيها عمرًا من التعب،
وفي عينيها ألف حكاية،

لا تشتكي،
وإن أثقلها الليل، تبستم للفجر كي لا يخافوا،
تخيط من خوفها طمأنينة،
ومن دمعتها صلابة.

إذا بكت، بكت وحدها،
وإذا فرحوا، رقص قلبها بصمت.
هي أخت، وأم، وربّان في بحرٍ عاتٍ...
لكنها لا تغرق.
ففي صدرها وطن.

------------------------------

احس عيوني طلعو من مكانهم واني اشوف الورقة .. شوكت وشلون كدر.يحصل على وصاية .. علينه

صفنت احاول اتذكر شي ممكن اكون ناسيته بس ما اذكر ابد بيوم وقعنه لو بصمنه على شي .. تاريخ الوصاية هو بعد.ما خلو امي للمستشفى بأشهر ..

يوم عن يوم جاي أنصدم بكم الحقارة الي شايله هل الإنسان هذا ..

عقجت الورقة بيدي وصكيت على اسناني بغل..
وروح أبوي ياصالح ما راح اخليك تتهنى .. اذا ما اطلع كل هذه السنين من عيونك ما اتسمى بأسمي..

شي واحد بس ريحني من قريت مكتوب اكدر اقدم اعتراض على الوصاية كوني داخلة السن القانوني ..
ومابقى غير شهرين وكم يوم .. وادخل ال19 ..

من بين الاوراق جذب نضري ورقة! .. وصفة طبيب .. بس الوصفه مكتوبة بالإنكليزي ..
بس اسم الطبيب .. جان الدكتور .. (عماد .....) وعنوان العيادة .. واسم المريض ابووووي ؟
صابر مرهون...

مال شنو هاي الوصفة ؟

رجعت كل الاوراق لمكانهم ..بس اخذت الاوراق الي تهمني .. التقرير الطبي.. شهادة وفاة ابوي.. جنسيته .. وقرار الوصاية .. وبطريقي اخذني الفضول حتى اعرف هذه الوصفه شنو وأخذت ورقة الوصفه الطبيبه ..
هل اوراق راح تسهل عليه هواي امور روحه وجيه ومعاملات .. بس لازم اطلع منا قبل ما يفتقدون هذه الأوراق ..

ثاني يوم .. كعدت على راحتي ما كعدت من الصبح .. لحد العشرة يله كمت من الفراش لأن جسمي مكسر وتعبانة .. بس الراحه والنوم مو للمثلي.. ما لازم اخلي الكسر يوكفني .. ادوس على وجعي واكوم ... بعد ما تريكنه اني واخواني.. طلعت جنطة .. لميت نص من ملابسهم .. بيها






سلوى : شنو هاي بسمة شجاي تسوين ليش تلمين ملابسنه .. عزززة بسمة لا راح تسويها صدك وتاخذينه .

صفنت بيها حايرة منها : اكلج شي سلوى ولا تزعلين مني ..

:لا ما ازعل كولي

: خايفه منج .. خايفة بيوم تكسريني وتخذليني وتهدمين كل الي جاي ابني علمودكم ..

باوعت الي وعيونها مدمعة : ليش هيج تكولين بسملة هاي من كل عقلج هيج تضنين بية

:سلوى انتي كل شوي برأي وماعندج حجاية ساعة تكليلي اني وياج بالي تردي وساعة تختلفين علية .. ساعة تفكرين بعقلج وساعة بكلبج .. ثقتج مهزوزة بيه وكلج قناعة أن اني اريد ابهذلكم وافكر بمصلحتي ..

:لا لا بسمه وروح بابا مو هيج قصدي .. اني حيل اثق بيج ولله .. واعرف كل الي تسوي لمصحلتنه .. بس مرات من اخاف اكوم ما اعرف احجي.. اني بس ساعات اكول اذا نطلع منا وين نروح واحنه ما عدنه مكان ..

: لا سلوى رب العالمين مايتركنة وثقي مثل ما راح اطلعكم منا اني مرغمة اوفر الكم مكان وأمان .. سلوى اني اريد ارجع حقنه بس ما اكدر اتحرك واني هنا .. لأن راح ياذوني بيكم ..

: خلص ولله وياج اني

: سلوى فدوة اروحلج .. لاتخذليني وما أريد اي بشر يعرف بأي شي نحجي ..

: اي ولله وعد ..

اطلعي كدامي شوفي وين ذني كاعدات ..

على ما كملت وسديت الجنطه سلوى طلعت ورجعت .. كالت كاعدين بالاستقبال ..
شلت الجنطه .. وطلعت امشي على كيف وحاولت ما اخليهم يشوفون الجنطة بأيدي .. والحمدلله ما صايرة كعدتهم كدام الباب مال استقبال.. وبوجهي طلعت من البيت .. بس وصلت بيتي.. خليت الجنطة .. ورحت احسب شكد فلوس ضلن .. احس تنفست براحة من شفت باقي مليون وميتين .. يعني كل هذه الأيام اني ما صارفة غير 500 بين التلفزيون والستلايت والملابس والكرواي ومصاريف اخواني .. خليت كل الاوراق والفلوس بجنطتي الزغيرة .. ورجعت لاخواني ..

كعدت افكر .. اذا رحت لعمتي راح تستقبلني
اني واخواني .. اربع نفرات هم راح نصير حمل ثكيل عليها ..
وهي أرملة وعدها ولد وبنات واحتمال مزوجة ولدها وعدها جناين.. ويضوجن من وجودنة اني وسلوى

كلشي ما اعرف عنها .. ولا اعرف شكد مخلفة ولا اعرف وضعها ابد .. كل الي اعرفه هي عمتي .. وزوجها توفى قبل فتره أكثر من سنه او سنتين.. لأن حتى ما اسمع بالبيت يسولفون بيها نهائيا..

وهي ما توصل ابد ولاتجي ومقاطعتهم فد نوب ..
زين على سبيل المثال عمتي ما استقبلتنه شلون .. ساعتها ؟
احس الأفكار مثل الارضة تنخر بدماغي ..
وكل عادة تركت امري لرب العالمين هو يتولاني .. وكلي ثقة هو مستحيل يتركني وحدي .. دائما رب العالمين أحسه يوكعني بمطب واكتشف هذا المطب هو باب من أبوابه نفتحلي ..

باليلة زواجي .. ابد ما كان أبالي اطلع عذر واكوله شهرية .. بس الم بطني الي حسيته ازعاج هو جان سبب حتى يخلي سمير يبتعد عني وما يتقربلي
كسر ايدي سبب ثاني حتى يخلي يبتعد عني أكثر وحتى يخليني اشوف عدنان واحجيله أن عمي هو الي هددهم

الاوراق جنت ناوية بس اخذ شهادة الوفاة
بس طلع كدامي تقرير طبي وصفة طبيبة لأبوي وذني والأوراق هواي يساعدني ويخلصني من الفرفرة والمعاملات الي تشلع.الكلب .. بكلشي رب العالمين جاي يكون اله حكمة حتى بالامور الي تاذيني..
أحسه جاي يخليني بامتحان ويريدني اعبرة ...
حتى شخصيتي الي طلعت مختلفه عن امي وأبوي واختي هي حكمة من يما حتى اكون سبب باسترجاع حقهم وأخذ ثارهم .. بعد ما نظلمو ..

كعد.يمي رعد وهو يحاجيني : بسمة .. هم نشتري ملابس للمدرسة راح يبدي الدوام

لزمته من أيده قربته يمي : شنو تريد اشتريلك كولي ..

:ما اعرف انتي بكيفج اني ادري انتي ماعندج فلوس هواي .. باعي اني جنطي بس سحابتها خربانه بس ميخالف تصير سحابه.. بس بنطروي زغير صاير وقميصي هم ..

: حبيبي انت تدلل اجيبلج ملابس وجنطة وحذاء الك و لوعد ..
بس رعد يمكن راح انقلكم من هذا المدرسة اني ..

: ليش عود غير اصدقائي كلهم بيها

:ميخالف حبيبي .. بغير مدرسه هم يصير عندك اصدقاء

: زين ليش غير اعرف

صفنت شنو اكله .. يبقى طفل وخاف يفلت لسانه بحجاية ..
: بعدين أكلك ليش بس هسه اريد تسمع كلامي ماشي حبيبي واني اشتريلك كل الي تريدة

هز رأسه بس ما مقتنع .. رعد رغم تؤام هو و وعد ورغم الشبه القوي الي بيهم .. بس رعد اوكح بهواي من وعد شخصيتهم شلون اني وسلوى .. نار وماي ..

وره الضهر طلعت من الغرفة ادور على محمد .. لكيته بالاستقبال كاعد يسولف ويه صالح .. وكفت بالهول كدام الباب واشرتله .. من انتبلهي.. هو كام واجة يمي بالهول

: محمد ما حجيتلي شصار على سالفه هذا الشيخ الي رحته اشو سكته

: غير خليتهم يما وهو كال لازم وقت وساعة معينة يله اكدر افتح بيها هذا الشغل ..






: اي وشنو شصار فتحه لو شنو غير افتهم..

: ولله مادري .. فد شوي اروحله اذا تردين

: اذا اريد ؟ محمد شبيك اني كلبي مثل النار وانت تكلي اذا تردين .. وشوف اذا يأخذ فلوس كلي

: شبيج ما ياخذ شي ولله .. هو شغله لوجه الله الناس هي تاخذله هديه من كيفها

: الله يخليك محمد روح وطمني .. أو خليني اجي وياك الله عليك .. اريد اطمن بنفسي

:شيوديج يمعودة ..

: اريد اطمن شبيك محمد تره الي مشمورة بالشماعية هاي امي .. الي خبلنها امك وخالتك

حسيته ضاج من كتله امك
: بسملة امي شنو مصلحتها حتى تسوي هيج هسه خالتي بيها مجال بس امي شعليها

ابتسمت باستهزاء ..
: من تريد تروح كلي اروح وياك رجلي على رجلك .. اريد اسمع كلشي بنفسي

: شنو ماعندج ثقه بيه شبيج

:مو سالفة ثقة بس اني اريد اسمع بنفسي واعرف شلون اتصرف ..

:معناها خلي نروح هسه لأن النهار كصران وبسرعه يصير مغرب ..

: تمام .. راح اروح لبيتي أبدل ما اريد يشوفونه طالعين سوة .. صدك أكلك .. تكدر تدبرلي جهاز سعرة يكون رخيص حتى لو صرصور المهم بس يخابر

: اني عندي جهازي القديم شغال مابي شي وما استعمله انيجياه ..

:تمام ..

رحت لبيتي بدلت بسرعه وكعدت انتضر محمد .. ما طول واجه وراي.. وجايب الجهاز وياه جهاز ثلجي .. خليته وياي بالجنطة وطلعنه .. للشيخ .. محمد بالطريق خابرة وسأله اذا موجود ..

بيت الرجال جان جبير وحلو وحوش جبير .. والغرفه الي كاعد بيها معزولة عن البيت .. من بره الحيطان متروسة حنه وبيارغ ابيض واخضر .. مشددات على الشبابيك ..

توتر صابني من دخلت الغرفة .. اول مره بعمري ادخل هيج مكان .. المكان بي رهبه بس بنفس الوقت من كعدت حسيت براحه نفسيه وتنفست بعمق .. التلفزيون مشتغل على صوت القران نااصي بهدوء ...والحيطان مليانة صور .. الائمة .. وصور ايات قرآنية .. وصور شهداء خمسه مخليهن واحد بصف الثاني .. بقيت صافنه واباوع بالصور .. احس صابتني مثل القشعريرة بجسمي

كعدت بالكاع بصف محمد.. واتلفت على الحيطان .. خمس دقايق ودخل الرجال .. لابس دشداشة سودة .. وعمره يطلع بالخمسين .. سلم وكعد ..
وجه كلامة لمحمد ..






: الشغل الي جبته الي.. يكسر الضهر تدري ؟

:خير شيخنه .. وفكيته ؟

:فكيته ابني بس شغل حيل مؤذي حتى اني تاذيت يله كدرت ابطله.. هذا الشغل جزء منه مدفون بمكان ثاني على الأغلب مكبرة قديمة .. وهذا القسم الثاني الي جبته الي .. يعني ما بطل بشكل كامل لأن مانعرف الباقي وين مدفون

حجيت من مكاني
: يعنني شنو امي راح تبقى مخبله وماتعرفنه

باوع الي الرجال
: يعني هذا الشغل لأمج مسوينه

: اي لأمي.. ومن يومها امي فقدت عقلها وصارت ما تعرفنه لا اني ولا اخواني

: زين ما تعرفون أو شاكين منو الي مسوي الها

:نسوان عمي جبرية وفاطمة اسمائهن

محمد بسرعه باوع الي ما راضي وحجه
: شيخ نسبه 90% جبرية مرت عمي هي مسويته ..

دنك يهز رأسه وكمل كلامه
: اني سويت الي عليه .. وبطلت الي جابه الي الولد بس بعد جزء لازم يطلع من مكانه ويبطل .. وهم اذا تكدرون تجيبولي المرة يكون افضل والباقي بعد يم رب العالمين

: زين هذا الي بطلته .. راح يسوي فرق بحالة امي .. يعني ما اكو امل شوي ترجع لوعيها او ممكن تعرفنه

: اكيد راح يسوي فرق .. بس مو ذاك الفرق القوي .. لأن القسم المدفون هو اصعب من هذا الي جبتو الي .. الي جبتو الي كلش قوي .. ومسوينه على اشياء قذرة والمدفون بعد اقوى من هذا .. بس على الاقل ممكن يساعدها ولو قليل ..

هزيت راسي بعد ما خاب املي عبالي امي راح ترجع لوعيها وتكدر تعرفنه .. بس لازم اروح اشوفها بلكي شوي متغير شي بحالها ..

رفعت راسي صارت عيني على صور الشهداء .. وأحد منهم شكله سبحان الخالق .. يجننن شايل جمال مو طبيعي.. وبفضول مني ماكدرت اسكت وسألت الرجال

: هذول الشهداء شنو يقربولك

باوع عليهم ورجع جاوبني
: ذول اثنين اخواني وتلاثة ولد عمامي .. واحد استشهد بحرب إيران ابن عمي
اخواني عدمهم المكبور صدام .. واخذو من يمنا فلوس الطلق الي عدموهم بي

واثنين ولد عمي .. هم عدهم صدام واحد لكينا بالمقابر الجماعية والثاني ماله اي اثر لهسه .. الله يعلم وين صار بالمثرامة لو بالتيزاب .. مات

غمضت عيوني بوجع وقهر .. اترخص محمد حتى نكوم طلعت عشرة من جنطتي وخليتها بسله قريبه من الباب
وطلعت واني خايب املي .. واجر بخطوات الخيبه ..
خليت محمد يمررني بطريقة اشتريت خط ورصيد..






بطريق الرجعه قررت احجي ويه محمد ..

:محمد ؟

التفت إلي بلا رد : انت تحب سلوى ؟

رد متفاجئ:ها ..

:سؤالي واضح .. شنو مشاعرك اتجاه سلوى

:بسملة .. اني اريد اتزوجها .. اني ابن عمها ومحد راح يخاف عليها ويحبها بكدري

: محمد الله يخليك .. ياريت ماتعلقها بيك ياريت تبتعد عنها

وكف وباوعلي طابك حواجبه
: ليشش شنو ناقصني شبيه

:ما ناقصك شي ولا بيك شي .. ياريت لو الضروف غير الضروف.. بس هسه كلشي مختلف

:ماكو شي مختلف .. اني راح اخليها بعيوني ومستحيل اخلي بشر ياذيها بيوم

: محمد سلوى وضعها خاص .. سلوى تعبانه .. ماراح تكدر تكون زوجه لو ام لو مسؤولة عن بيت

: ليش هيج بسمه انتي ليش لاغيتها لهل درجة تره سلوى معدلة انتي من رحتي لبيتج هي الي مدارية اخوانج

ابتسمت اله
: مدارية خواني ؟ شنو سوت سوت الهم عشة و غدة .. محمد اني جاي احجيلك عن أمور انت واني نعرف شنو معناها ما اريد اتعمق بالكلام زحمة .. بس سلوى ماراح تكدر.. تفهم لو لا ؟ سلوى كلبها كلش تعبان

:اني ما راح اتركها راح اخذها لاحسن الأطباء واعالجها

: ماريد تتوقع اني انانيه ولا تتوقع احجي وياك هذا الكلام واني مرتاحة .. اتمنى بيوم اشوفها زوجه وام وعايشه مرتاحة .. بس خوفي عليها اكبر من الحب وهاي الأمور سلوى إذا خسرتها ما راح اتحمل.. سلوى ما تتحمل صدمة
ولا تتحمل اذيه..

: ماراح اخلي بشر ياذيها ابد ولله .. راح اعاملها مثل معاملة الطفل .. وحتى اطفال ما اريد .. اريدها بس هي .. بس اني اعرف انتي مشكلتج الاساسية شنو .. مشكلتج هي ابوي وامي .. لا تعبانه ولا هل كلام هذا

: ما انكر ولا اجذب.. صح امك و ابوك سبب جبير...
بس مو هم بس اني فعلاً اخاف عليها .. واني متأكدة.. امك ماراح توافق على ارتباطكم وحتى لو وافقت مراح تخليها مرتاح وراح تسوي كلشي في سبيل تأذيها .. اني اسفه لأن جاي أكلك هل كلام بس هذا الحقيقه ..

: اني ما اكلج أهلي ملائكة اعرف بيهم ساهمو بظلمكم هواي .. بس اني اختلف عنهم اني مو مثلهم .. سلوى حبيتها ومستحيل اتخلى عنها ولا انتي ولا غيرج راح يمنعني منها .. وبس اتخرج وأرتب وضعي اتزوجها ..






:اذا انت كد كلامك هذا .. وتكدر هيج توفرلها الحياة الي ذكرتها اني اول الي راح يفرحون الكم .. بس حاليا ياريت تبتعد عنها .. واذا صدك تحبها .. اثبت هذا الشي

:شلون اثبت ..؟

:اني اريد اطلعهم منا ..

: وين تريدين تأخذيهم بسمة ومنيلج مكان .. انتي تحجين بلا تفكير .. اذا طلعتي وين ترحين وانتي بنيه وحدج وياج تلاثه .. شنو عبالج العالم بره راح يحن عليج .. عبالج بهاي السهولة راح تلكين مكان وراح تأسسين حياة حلوة الكم .. اذا متوقعه هيج فانتي كلش غلطانه ..

:محمد .. انت زلمة معدل .. واعرف كلش زين ما تريد اذيتنة .. لهل سبب راح اكولك.. اني راح اخذ خواني ونروح لعمتي .. على ما أرتب وضعي وأشوف شلون اكدر ارجع حقنه .. اني ما اريد اخذ حق أحد اني بس اريد ارجع حقنه .. لأن تعبت من المذله محمد تعبت ..

: ومنو كالج عمتي راح تستقبلج .. هي ذيج المره مكسورة وبشدة وماقبلت تطلع وتسلم علينه ..

: اذا ما استقبلتنه ساعتها اشوف شلون اتصرف ..

: اني ما راضي على الي تسوي

:تعرف ليش .. لأن أنت ماعايش عيشتنه انت عايش بنص اهلك ومحاط بالحب والاهتمام.. ما جربت الذل .. ما جربت تشوف اختك تموت كدامك .. ماجربت تتحسر على الهدمة الجديدة ..
ولله ولله لو عمامي مراعين الله بينه جان كل هذا ما صار بس هم الي بدو .. شي واحد أريده منك اذا انت صدك تحب تسلوى وتكول احافظ عليها .. ما اريد اي مخلوق يعرف مكانة ..اريدك تتصرف و كانك ما تعرف اي شي ..

: ماشي راح اجي وياج روحي لعمتي وشوفي.. اهم شي تبقين على تواصل وياي .. واني هم مراح أتركم ابد ..

رجعت للبيت يم اخواني .. باليوم الثاني كعدت ومقررة اليوم اخر قرار الي .. ولازم انفذ .. قويت نفسي ودعيت ربي ما يفشلني ... مشيت بطريق وما اعرف شنو منتضرني بي .. الي اعرفه رب العالمين فوكاني وجاي يتابع خطاي ويعرف شنو نيتي ..

جمعت باقي ملابسنه .. وكل الاشياء الي نحتاجها ..
بقيت اباوع على اركان البيت .. وبكل ركن عشنة قصه ضلم .. بس هذه الغرفه روحي بيها .. احس بيها ريحة ابوي وامي وبيها حنانهم محاوطنة ..

صعدت للسطح.. وبقيت اباوع لسطح بيت أبو خالد..
هنا، بجيت.. هنا، ضحكت.. هنا، عشت لحظات وجعي وفرحي..
صفنت.. اتذكّر أيام من كان عدنان يطير طيور، وصوت الصفير مالته يملأ الشارع ..
أول ما بديت أشب، شلت خشمي عليه، وصرت من يحاجيني، أتعارك وياه..
ما كنت أعرف إنّي أتعارك لأن كلبي بده ينبضله نبض غير الصداقة..
كنت أخاف من عيونه، وأشتاق لصوته، وأحسد الهوا لمن يمر عليه قبلي..
كلشي كان أبسط.. وأصدق.. قبل لا يصير الكلب ساحة حرب، والحلم ينذبح بصمت..






ودعت المكان ونزلت .. وما اعرف اذا القدر راح يرجعني هنا بعد لو لا
شلت باقي الملابس والغراض بجنطه مو كلش جبيرة .. وطلعت اني واخواني .. وياي وهم نفسهم عبالهم رايحين لبيتي ..

وصلنه لبيتي ودخلنه .. اني هم جمعت غراضي ..
وبس سلوى تعرف شنو نيتي وهي نفسها تباوع بعيون ما راضيه بس انجبرت تسكت وتجاريني ..
جمعت كل الي احتاجة وأخذت الجنطه وطلعنه من البيت ..

وعد: بسمة وين رايحين وماخذين ملابسنه ..

وكفت بمكاني ونزلت لمستواى .. وصدرت كدامه وجه بوجه .. جريت رعد وكف بصفه وحاولت افهمهم ..

:حبايب .. انتو تحبوني ؟

ردو ثنيهم : ايي نحبج هواي

: سمعوني .. اني وياكم وسلوى راح نروح ونعوف بيت جدو ونترك عمامي وبعد محد بيهم يكدر يجينه لو ياذينه..

:يعني بعد ما نرجع هنا ..

: مادري.. بس اني ما اكدر اروح واعوفكم راح نروح كلنه سويه..

كمت من يمهم .. وماعرف شلون اشرح واوصل الهم الفكرة بس هم سكتو مستسلمين ..

سلوى: بسمة .. شلون لو لكونه

: سلوى حبيبتي .. خليها على الله .. يروحي

حضنتها من كتفها وبستها بخدها.. اني نفسي أشعر بالخوف بس اتضاهر بالقوة .. ما اعرف الطريق الي رايحه بي شنو راح الاكي بي ..

طلعنه من البيت قفلت بس البيبان الداخليه. الباب الخارجي مجرد طبكته طبك ..
، كأنّي بعد ما متأكدة إذا راح أرجع له لو لا.

أخواني وأختي يمشون وياي واثقين بيه .. ماخذتهم واني المسؤوله عن اي شي يصيرلهم ،
أجّرت تكسي، انطيته اسم المنطقه والعنوان و
صعدنه،
چنت أحچي ويا نفسي وأنا أباوع من الجام، ما أعرف عمتي ، شلون راح تفتح الباب؟ حضن لو غربة جديدة؟

اكيد نست ملامحنا، ورعد وعد اصلا ما شايفتهم
يمكن ضميرها يكون اصحى من اخوانها لأن هي هم شافت الظلم منهم ، يمكن أحن من الكل. بس الحقيقة الوحيدة إنّا ما عدنه خيار، طالعين ندور زاوية نوكف بيها ونبدي من جديد

الهوا يضرب بوجهي من الجام ، وكلبي يدگ مثل طبول حرب… مو لأن رايحة للمجهول، بس لأن كلشي بداخلي خايف يعيد نفسه من جديد.. وخايفه هم افتر وارجع لنقطه الصفر

التفت على اخواني اربعتنه محشوكين ليورة وكاعدين كلنه ساكتين.. رعد التفت إلي وابتسم وخله رأسه على أيدي .. و وعد ياكل بإضافرة وسلوى صافنه بالطريق وترجع تباوع الي والخوف يطفر من عيونها ..






چنت أحس ظهري ثكيل بالمسؤؤلية وبهذا الحمل ،
ومتعلكة بأمل صغير، يمكن نلكي باب ينفتح بوجهنا من دون مصلحة، من دون حكم، من دون ذل.

دخلنه المنطقة وبقيت ادلي بالسايق مثل ما وصفىلي محمد بالضبط .. وصلت النقطة الدالة .. وبقيت اسأل لحد ما دلوني على البيت ..
وكفت السيارة كدام الباب .. والي ميز بيتهم هي شجرة نبكة كلش جبيرة بحوشهم ..
سحبت نفس قوي .. حيل متوترة وما اعرف وره هذا الباب شنو منتضرني .. راح انطرد لو تستقبلني ...

سلوى: هو هذا بيت عمتي ..

:اي هو ..

:بسملة منو يكول راح تقبل تشوفنه

: ما اعرف سلوى خلي نشوف.. واذا شفنه الوجوه ثكيله مانضل نص ساعه ونطلع

حجت بانفعال: وووين نولي اذا طلعنه

:كااافي سلوى فدوة كافي لاتوتريني أكثر .. كلش كلش نرجع لبيتي اذا شفتها ضاكت بينه ..
يله رعد يله وعد تعالو يمي حبايب .. شوفو هذا بيت عمه اخت بابا

وعد:عدنه عدنه عمة ؟

:اي حبيبي عدنه بس انتو ما تعرفوها..

ضغطت على الجرس بتردد بس كان الجرس خربان ودكمته ما تنداس ، فدگيت الباب بأصابعي الراجفة.
دكيت أكثر من مرة .. واجة صوت بنية تصيح

منووو ..
حرت شنو اكلها ..اني ؟ قابل هي منين تعرفني
فضلت السكوت وهي وكفت وره الباب تصيح... منووو
شوي اجه صوت مرة قريب من الباب تسألها منوو ؟
وهي تكلها.. ما يحجي .. والمرة تجاوبها دخلي جوة هدري التمن ..

ويه صوت سركي الباب وهو ينفح احس دكات كلبي جاي تزيد .. وضاغطة على أيدي رعد .. أحسها عركت بأيدي
نفتح الباب بينت منه مرة ..

يعني شكد ما اكول تشبهني قليل .. أو الأصح اني الي اشبهها .. رغم فرق العمر .. بس ملامحها تشبه ملامحي حيل ..

باوعت عليه وعلى اخواني وسألت
: تفضلي يما منو انتي رايدتمن ..

اريد اجاوبها بس صوتي يرجف .. وكوة كدرت انطق ..
:اءءءء انتي .......... انتي . عمه سناء ؟

صفنت بيه ثواني وكأنما تسترجع شي بذاكرتها .. وردت عليه ..
:منو انتي بت منو ؟ اي اني سناء

غضيت شفتي .. فكي يرجف .. رجلي يرجفن .. كلبي يدك حيل .. احاول امنع دموعي تنزل ..






:اني .. بسملة بس صابر ..
قربت اخواني مني...وذول اخواني..

تراجعت خطوة، عيونها توسعت، وبدت تركز بوجهي، بملامحي.. تريد.تصدك ..
چان اسمـي مثل صدمة كهربا بجسمها ..

:صابر ؟ انتووو ولد صابر..

صاحت بصوت عالي طلعت من الباب وركضت علية لزمت وجهي بثنين لديها ..

: يماااا. يابعد روووحي .. انتو ولددد صااابر ؟ صددددك ؟

لمتني بحضنها .. وصارت تبوس بوجهي .. تركتني وراحت حضنت سلوى تركت سلوى وحضنت اخواني وتبوس بينه بلهفه وعيونها صارت تجري دموع

:عمت عيني كون عليكم عمة .. سودة بوجهي ماعرفتكم ..
حبايب كلبي .. يابعد روحي يا عمة .. هلا بيكم كل الهلا

جرتني من ايدي ورجعت جرت اخواني تدخلنه للبيت .. تعالو يما تعالوو تفضلو ..

دخلتنه بسرعه لدرجة نسينه جنطنه بالباب بس هي طلعت دخلتهم واحنه واكفين ..

رجعت لمتنا بحضنها واحد واحد وتبوس بوجوهنه اخواني مستغربين الوضع .. واني ما كدرت امنع دموعي تنزل .. هي عيونها ما وكفن .. ولسانها ما بطل كلمة .

: يا بعد روحي .. عمت عيني عليكم عمة سودة بوجهي .. الله لاينطي.اليتماكم .. يابعد كلبي ..
تعالو من فدوة اروح الكم تعااالو دخلو يما جوة ..

اني وسلوى وحدة تباوع للثانيه براحة .. وعمتي بقت لازمة بأدينة وتمشي بينه لحد ما وصلتنه لباب الاستقبال ..

ملكاها جان حاار .. مليان بالحنيه والدفو .. ودموع الفرح .. كعدتنه بالاستقبال مكابلتنه ترحب بينه .. وتبجي .. وكعدت بنص رعد. وعد وتبوس هذا وتبوس هذا
وهم مستحين .. كل احنه جنه مستحين.. وملكاها خجلنه أكثر ..

: فرحه فروحه يما تعااااي ولج جيبي ماي ..

صاحت على بنتها ورجعت باوعتلي ..

: اي يما كولولي شذكركم بيه .. اخيرا كلتو عدنه عمة .. شلون نديلتوني .. ذيج السنين كلها واني كلبي نار على شوفتكم .. بس اني حالفة وماخذه قسم على روحي ما اوصل ذاك البيت ولا ادخلة ..

بسملة :عمه ياريت لو جيتي وصلتي النه بيوم عالاقل جان حسينه أكو احد النه .. سنين بذاك البيت احنه عايشين بغربه نتحسر على الكلمة الطيبة ..

دخلت بتها .. بنيه حلوة تطلع من عمر سلوى .. جايبه دولكه ماي وكلاص وكفت تقدم النه ..
شربت ماي عمتي وحجة ..






:حقكم شما تحجون وشكد ما تعتبون عليه .. بس انتو جنتو ما صايرين .. وماشفتو عمامج شسوو بيه وبحالي وره موت ابوي ..
شبعوني ضيم ومدكة ... وغصبوني على المرحوم غصب .. بس الله لطف بحالي وطلع رجال خير وخايف الله ..
واكلو حقي .. ونكرو كلشي وكالو ما الج شي يمنه ..
كلت زحمة اوكف اخوتي بالمحاكم علمود فلوس ..
وسكتت .. بوفاة ابوج عمت عيني.. كسرت حلفاني وماكدرت اضل .. ورحت كلت يمكن الكاهم مكسورين بموت اخوهم .. بس طلعو كلوبهم جلدة وكل محنه مابيهم
وهم بيومها طلعت من البيت بعركة

وراها صار عندي ولد مريض ابني الوسطاني .. اسم لله صار عنده المرض الخبيث وهو طفل .. وكتها احتاجيت فلوس علمود اعالجة .. الرجال كام يركض باديه ورجلي
ولازم اضل ابدله دم .. واوفرله علاج ..
رحت لصالح وصادق للمحل .. وروح ابوج الراح وفكس عيني .. هذا صالح دنكت على رجله وبستها حتى ينطيني فلوس .. بوكتها شمر بوجهي مية الف مثل الي جاية اجدي منه ..

ورجلي من عرف بيه رايحه وذاله روحي الهم حلف يمين طلاك اذا وصلت ذاك البيت بعد .. يطلكني ..
ومن يومها بعد ما وصلت .. لعد ما ابني مات ..
و من توفى المرحوم .. بكل عين صلفة جايين هنا صادق وابنه يعزوني .. حتى ما طلعت الهم وطردتهم ماعندي اخوان غير صابر ومات ..

اسمع بكلامها.. وطلعت حتى أختهم دمهم ولحمهم ناكرين حقها ..

:انتي يما شلون نديلتي بيتي .. وشعجب اجيتي.. ولله فرحت بجيتكم .. بيكم ريحة العزيز الراح .. جذب مثل محنته ..

: عمه ضاكت الدنيا بيه .. وماعندي مكان غيرج .. اني ما اريد اثقل عليج بس كم يوم .. اريدج تتحملينه

:يا يما تثقلين عليه شنو .. ولج بعيوني اخليكم .. ولله فلا اخليكم ترحون منا .. بس اريدج تحجيلي .. احس جيتج هاي بعد سنين وراها شي .. بس لأهم شردتي من ضيم ذولاك العارات.. احجيلي حبيبتي ..

:عمه .. اخوانج بدعو بظلمنه ماضل شي ما سوو بيه وباخواني .. عشنه وياهم بذلة .. وره وفاة ابوي عمي جبر امي يتزوجها .. لو يشمرها عد أهلها وياخذنه .. وراها امي صارت تهج بالشوارع وفجاء فقدت عقلها .. وشمروها بالشماعية ..

: ايي سمعت سمعت

:بعد ما تمرضت امي اني بعمر العشر سنين حملت الضيم وحملت مسؤولية اخواني وتركت مدرستي .. سلوى هم مريضة بالقلب .. وتعبانه انذل الهم مذله يله ينطوني فلوس اجيب الها العلاج ..
شغلني خدامة اشتغل واكرب وانضف وساختهم وانضرب اتحمل لأن اذا حجيت يرجعون على سلوى ويكومنها تشتغل وهي ماتكدر اخاف عليها ..
بعدها بالصدفه لكيت ورقه عد عمي صالح ... طلع جدي مسجل عمارة بأسم ابوي .. وعمي صالح ما حاجي ماخذ السند وضامة وفلوس العمارة كلها بجيبه ..
ومن اخذت الورقة وكلفت جيرانه بنيه محامية كالت اني راح ارجعها الكم .. عرف صالح وذب تهديد للعالم وهم. عبالهم مليشيات..خافو الناس وشالو ...واني صار عندي سكر .. وراها عمي صالح طلع مطلوب دين .. ومايقبل يسدد . وكالي لو تنطين السند مال عمارة لو تتزوجين بمكان الدين .. ومن رفضت رجع لزمني بسلوى وراد يزوجها ..
اضطريت اقبل .. وعقد عليه الرجال الي يلطبه .. رجال أكبر من عمي صالح ..
نوب لكيت مدفون باب غرفتنه علامة وبيها سوالف تشيب الرأس .. طلع عمل مسوة لامي ومكتوب عليه جنون وفقدان ذاكرة .. محمد ساعدني وأخذه لشيخ حتى بفتحه طلع هذا العمل جزء منه مدفون بمكبره ولازم يطلع من مكانه يله يبطل ..






رحت وقررت امشي بالمعاملة حتى اصير وصيه على اخواني وارجع حقنه .. طلع عمي مسوي وصاية علية شوكت مسوي هل وصاية مادري ولا اتذكر
..
بس اني ياعمه بعد ما اكدر اسكت أكثر على هذا الضلم ..
اني مو مثل ابوي ولا امي مستحيل اترك حقنه اللهم يلعبون ويتمتعون بي واني واخوتي نتحسر..

اخذت كل الاوراق الي احتاجها من صالح .. وراح ابلش امشي بكل الإجراءات.. وطول ما اني بذاك البيت ماجنت اكدر اسوي شي لا يأذون اخواني .. لهذا السبب اجيتج ..
عالاقل أمن على اخواني .. عمه اني ابد ما اريد احرجج لو اثكل عليج. ولله اذا ما تكدرين عادي وماراح ازعل

تباوع عليه صافنه ومبتسمه ..

:سبحان الله .. رب العالمين خلاج قوية وسباعية حتى تأخذين حق اهلج .. عفيه بنيتي عفيه لاتسكين لاتصيرين مثلي ومثل ابوج .. خليج هيج قوية ورجعي حقج ..
من هاي الحظة انتو بأمانتي .. وحق ربج.االي يوصل منهم هنا ويريد ياخذكم اشهرة وافضحه فضيحة ..
يابعد عمتج عيوني أوسع الكم من البيت هذا البيت جبير وخير من الله ..

باوعت سلوى كلمة ما طلعت منها
: شنو حبيبتي اشو ذابتها صامت

ابتسمت وبقت ساكته حجيت اني : عمه سلوى هادئه وهذا طبعها ويه الكل بس وياي لسانها ..

:بعد روحي ياعمه حبيبتي شهل حسن هذا ..
شوفن يمه من هل دقيقه هذا بيتكم .. لاتتقيدن ..

باوعت لبناتها ولحد الان ما تعرفنه عليهن
لحد ما عمتي هي عرفتني

:بسومة هذا فرح عمرها 16 وهذا سمر الزغيرة عمرها 11 وعندي بعد ولد ثنين كبار .. بالشغل
واحد يشتغل بفرن خبز .. والثاني عماله .. واحد عمره 22 والثاني 21

فرح: امي دوم تذكركم وتسولف النه على خالو صابر الله يرحمه ودائما من تذكره تكعد تبجي وتكول بس هو حنين ..

ابتسمت الها ..ورجعت حجت : تدرين انتي كلش تشبهين امي

: ايي انتبهت لهذا الشي .. حتى نسوان عمامي جانو يكولوي نفس العرامة مال عمتج

:ههههه يا من دهر صابهم لو عرمه صدك جان ماسكتت على حقي الباكو

:صدكيني عمه ارجع لج حقج ..

:يا يما ماريد منهم شي بذمتهم

: لا ولله الا ارجع حقج وحقنه فلا اخليهم يتهنون بي ويرتاحون

:السوالف ما تخلص حبيبتي .. كومي وياي للغرفه تحللي انتي واخوانج وخلو غراضكم وتعالن وياي للمطبخ شلون مسويه مرك دجاج احمر يلوك لهل حلك

احس ارتاحيت حيل بل مكان وبهذا الملكه ..
حمل ونزاح مني واحس نفسي صرت خفيفة ..
اخذتنه عمتي دخلتني للغرفه مال بنات ..

هذه غرفتنه اني والبنات بس اني متعلمه اضل اصلي بالاستقبال وانام بمكاني..
تعالي يما فرحه ضلي ويه بنات خالج .. خل اروح أصب الغدة ..

فرح : اليوم نبقى نسولف للصبح اريد اتعرف عليجن

:أن شاء الله

: هذا ألخانه راح افرغها خلو بيها ملابسكم..
فرغت خانه ألنه من الكنتور .. وتركتنه بالغرفه نبدل وطلعت

سلوى:شكد حبابه عمتي بسمة طلعت تحبنه

: اي الف الحمدلله... حيل جنت خايفة تدرين ادك بالباب ولازمة كلبي .. بس هسه احس ارتاحيت كلش ..

بدلنه بالغرفه وطلعت يم عمتي بالمطبخ كعدنه نسولف وتسأل بيه عن كلشي .. وكل شوي تذكر ابوي ..
بيومها عمتي جانت طايرة بينة من الفرح ومخليه اخواني على كلبها وتشم بيهم ما مصدكة ..

كعدنه تغدينه بوسط السوالف والضحك .. جان احن غدة اتغداء بعد هذه السنين الطويله من الاذيه والقهر ..
بعدين اجو ولدها من الشغل .. استغربونه .. بس عمتي عرفتهم علينه .. سلامي وياهم جان جاف ورسمي حيل لأن كلش استحيت منهم .. وبعد العشى كعدنه بالغرفه ما طلعنه ..
طلعت جهازي كلت اتصل بمحمد اشوف شكو ماكو ..

: هلو محمد شلونك

: الحمدلله .. بسما سويتها صدك ورحتي

: اي صدك قابل اجذب عليك

:عمتي شلون اتلكتج

: محمد عمري ما توقعت عمتي بهل محنه .. تصدك روحها طارت بينه كالت من هل لحظة انتو بأمانتي .. سولفلي شكو ماكو

: لا سلامتج ... بس ابشرج رجلج طلكج ولم الشارع على عمي صالح على فلوسه ..

يتبع ..

29...

---------------

ها هي تقف في منتصف الطريق،
عيناها تحمل ألف سؤال،
وفي قلبها عاصفة من “لو” و”ماذا لو”…
تمسك خيط الأمل بيد،
وتخشى المجهول باليد الأخرى.
ليست ضعيفة، لكنها مُنهكة من كثرة الاختيار،
فكل درب يلوّح لها بثمن،
وهي فقط تريد أن تختار نفسها… ولو مرة.

--------------

وكفت على حيلي مصدومة.. احس كلشي بيه فز من حجايته .. شنووو .. محمد عيد شنوو كلت

محمد:كتلج الحجي طلكج يمعودة

صرت احجي وياه واني افتر بالغرفه بسرعه .
:شلون شلون يعني طلكني واني مو يمه غير افهم .. احجيلي وحده وحدة شنو صار ..

:سمعي .. كاعدين واتصل الحجي بعمي صالح يريدج ترحين للبيت ..

:الوو ابو مهدي .. خلي بسملة تجي كولها اني بالبيت ..

صالح ودة عمران .. لغرفتهم حتى يصيحها .. راح عمران ورجع كال .. محد موجود بالغرفة ..

:لعد وينهم ...

جبرية:خاف رايحه للمحل تشتري

عمران: لا عمو كلهم ما موجودين .. شفتهم من راحو وياهم جنطه جبيرة

فز صالح من مكانه : شنووو يعني وين ولت هي واخوانها

صادق: يمعود وين تروح تلكاها هنا لو هنا

صالح: صادق شبيك .. ماكو لابيتها ولا بغرفتهم واخوانها كلهم ما موجودين.. ويكلك طلعو ماخذين جنطه ...اني اصلا ما من الصبح ماشفت ولا واحد منهم

صادق:بربك صالح هي منيلها مكان ثاني حتى تروح بي شبيك انت

منى :تره هي من الصبح لاهي ولا اخوانها بالبيت .. يومية رعد مشيلنه بوكاحته اليوم ماكو

جبرية:اني شفتهم ماكو كلت اخذتهم يمها .. عبالي ابيتها

صالح: خاااف شردت هاي عرمة كلشي ويطلع منها






صادق: وووين تشرد ؟ اول تالي .. ومثلا شردت تكعد بالشارع شو هي حتى فلوس ما عدها ..

صالح: لعد وووين ولت

صادق: انتضر شوي خل نشوفها وين .. بس انطي صبرررر ثولتني

كعدو بالنص ساعة ينتضرون .. وبسملة واخوانها ماكو .. كام صادق لغرفتهم .. فتح الكنتور لكه ملابسهم وغراضهم مختفية .. هنا شاط وتأكد صدك شاردة وماخذه اخوانها
ورجع لصالح

:هاي صدك ماكو ملابسهم كلها ماخذيها

صالح:شفتوووو شكلت اني شكلتت

رجع دك تليفون صالح الحجي خابر : شنو السالفة صالح ماكتلها خل تجي تسويلي لكمة تعبان

بقى صالح يمتمت ومتوتر وحاير شنو يرد
: اءءء حجي هي بس اختها تعبانه وتكول اريد ابقى يمها

:وشعلي بأختها اني خلي تجي هسه كولها

:كلت الها ما تقبل اني اكول خليها اليوم تبات هنا ..

: صاااالح بت اخوك وينها أكلك خلي تجي هسه

:شبيك حجي على كيفك كتلك اختها تعبانه وباقية يمها

: لالا مو اختها تعبانه بس هي ماتريد تجي .. هاي البومة الي ذبيتها عليه من اخذتها لليوم كلشي ما شفت منها جنها غراب البين.. مكابلتني .. اني اعرف شلون اجيبها ..

سد التليفون بوجه صالح .. وكام حتى يروح يجيبها
وبقى صالح وصادق فايرين وحايرين بأرواحهم

صالح: ولكم الزمها لو ما الزمها.. اذا ما اسود عيشتها واخليها تتمنى الموووت .. فشلتني كدام رجلها هسه شنو اكول اله وشنو احجي

صادق:وحق القران اذا ما اسحك.راسها .. واطلع مخها من خشمها.. تالي عمرنه هاي الزعطوط مانكدر نسيطر عليها .. ولكم شنوو محد شافها من طلعت محد حس بيهاااااااااا ..

فاطمة: وشعرفنه تشرد.نشم ادينه هي من تزوجت صارت تاخذ اخوانها يمها بالبيت .. وهي أساسا اذا تشرد وين تروح ومنو يلفيها

صادق: لا لا الي مثل هاااااي تلكيها مخططه لكلشي قبل ما تخطي بره البيت تلكيها صار ايام تخطط وترتب واحنه نايمين على اذانه .. من جنت أكلكم هاااااااي شيطان انتو كلتو لاااا هاي زعطوط ونسوي ونعمل وبيها ... هااااي شوفو ركعتكم ميت نعال وطلعت والله يعلم وينها هسه ..






بين الصياح والتوتر .. ندك الباب حيل ..

صالح: هذا رجلها اجه شنووو احجي هسه شنو عذري

فاطمة: شلون هسه الرجال يضل يدك بالباب دفتحوله

:نفتحله شنو نكلة مرتك شردت

صادق : نكله ما ترضى تطلع من الغرفه نكلة اي شي بلكي منا لباجر نلكاها

صالح:راح اتخبلللل وين ممكن تروح

الباب بره مستمر يندك بقوة .. طلع صادق فتحه ..
ودخل الحجي عصبي وعيونه بكصته ويصيح
بلا سلام .. وجه كلامه لصالح الي بمكانه متوتر

: صااالح شنو سالفة بنت اخوك فهمني .. صار كم يوم من اخذتها واني مجاي افتهم كلشي منها .. يوميه عذر وهسه ما تقبل تجي للبيت .. اذا ما الكم سيطرة عليها كلمن يروح بدربه ما كاتل نفسي عليها ..

بلع ريكه صالح يحاول يبين طبيعي
: حجي اكعد ارتاح كول يالله .. الابنيه كل ما بالموضوع بعدها جاهل زغيرة وما ماخذة عليك .. وهم متعلقه باخوانها انت بس اصبر عليها شويه .. والي تريدة يصير

: هو. شنووو اصبر عليها .. أكلك ما تباوع بوجهي كل ما تباوعلي أحسها تريد تزوع من كد كل ما لعبانه نفسها ..
اسمع صالح هسه صيحها خل تجي نروح يله .. اني جاي تعبان واريدها يمي

:حجي بس اليوم خليها

: زين صيحها خل احاجيها ..

بقى هو وصادق واحد يباوع بوجه الثاني متبلعمين .. انتبه عليهم وحس اكو شي مو طبيعي
: شصااااير شبيكم هيج خارطين .. بسملة وينها .. أكلكم صيحوها .. تره ولله اني اروح بنفسي واجرها من شعرها وأخذها غصب

صادق: موو حجي بس انت اهدء شوي
: شصااااير

فجرها صادق من كاله : الصدك الابنيه طالعه وماخذه اخوانها وماندري بيها وين

:يعني شنو طالعه وين رايحه مثلاً .. خاف رايحه يم أحد من كرايبكم ..

:لا هي ما تتواصل ويه أحد من كرايبنه اصلا ومو طبعها تطلع .. بس وين تروح قاااابل ؟ اول وتالي ترجع واني بنفسي ولله اجيبها واخليها عندك.وايدك الك شتريد تسوي بيها انت رجلها وحر بيها

:هيججج الحچي صااااار .. تمام سمعووووني زين .. بت اخوكم بسملة مطلكة مني بالثلاث.. والعقد البينه اعتبروا نفض .. كلشي ما استفاديت من هل عقد الاكشر هذا ..
وفلوووسي اريدها ربع دينار ما ناقصه






صالح: حجي بس اهداء ولله نجيبها الك اخذها من هل شارب

:اخرررر****ي على شاربك النكس حسبالك.تكدر تقشمرني لك ذاب عليه بت اخوك جنها غراب .. وتريد تاكل فلوووسي .. فلوووسي اذا ما رجعن الي ياصالح هذا بيتك احركه فوك راسك

كام صادق عصبي عليه
:احتترم نفسك ...ولاتنسى انت دايس بساطنه لاتخليني اسحلك سحل منا اطلعع بره يله ..

طلع سمير وصار يصيح بالطارمه بعلو صوته

:لك صاااااالح .. كوووو** د ترررس عبالك اني قشمر وتاكل فلووووسي ... فلووووسي اذا ما وصلني باجر اندددمك ولله

صالح كام يصيح من مكانه : كل فلس ما الك يمي واركع راااسك بالحاايط ربع ما تشوف مني شنو تسوي تشتكي عليه شنو تكول للشرطه

: اني اشتكي لا غلطان اني ما اشتكي.اني اطلع فلوسي من نص عيونك.. قسم بالله ياصالح الا اخسرك أضعاف هاي الفلوس .. اندمك ولله وراح تشووووف وبتكم مطلكه ملطكه مطلكه وخليها على حالكم ..

بقى يصيح لحد ما وصل لسيارته ونص بيبان الجوارين نفتحت وهو مستمر الصايح والغلط بينه وبين صادق وانواع السمبه والغلط والفشار على صالح وصادق .. طلعهم يشتغلون بالفايض .. و طلعه مضيع فلوسه على الكح** مابقت حجايه ما حجاها .. وصادق يدفع بي
لحد ما ركب بسيارته ويصيح وشخطها وراح ..

صادق : لباااجر لباجر اذا ما بينت .. لو ادري أحفر الكاع. أدوارها...ولكم كوووومة زلم بالبيت ما بينه واحد يكسر ضهرها ويگرممها .. جاااهل بكد اصبعي فااارتنه فرررر. طلعت وأخذت اخوانها واحنه ناااااييمن ... عمياااان طرشااان محد حسسس بيها أبالها شي

كعد بمكانه يفور وهو وصالح وكل الموجودين .. يفكرون وين ممكن تكون راحت .. وهي ما الها أحد ...
...........

: اسمع بكلام محمد وما أنكر خفت .. حيل خفت رغم فرحتي بخلاصي من ذاك الزواج الاكشر .. بس حيل خفت من عمامي .. خاف يلكوني .. خاف عمتي توكع بمشاكل بسببي .. خاف عمتي ترجعني الهم .. الف فكرة وفكرة اجت براسي .. بس بلعت قلقي وخوفي وقررت ما احجي شي حتى لا اخوف اخواني ..






حلفّت محمد اي شي يصير يتصل بيه ويطمني .. وهو الله ينطي لاحاجي ولا كايل مكانه وين ..
بقيت طول الليل افكر وكلبي يدك بالثانيه الف دكة ..
واتخيل باي لحظة يدفرون لباب علينه ويجروني اني واخواني .. لأن اكيد بيت عمتي اول مكان راح يخطر على بالهم ...

سلوى وفرح .. ذبن ميانه وبقن يجرشن سوالف لوقت متأخر من الليل .. يله نامن ..
فرشو لاخواني بصفي .. واني بنصهم .. نايمة على ضهري ومصعم ايدي على كصتي وصافنه بالبنكه ... والافكار تاكل براسي .. ماحسيت على الوقت إلا ماوصلني صوت الاذان مال الصبح .. الضاهر جامع قريب من بيتهم لأن صوت الاذن عالي .. سحبت نفس عميق .. ويه ما كال

إن الله وملائكته يصلون على النبي يا أيها الذين آمنوا صلوا عليه وسلموا تسليما..

: اللهم صل على محمد اله وصحبه اجمعين
حسيت احساس كلش حلو ويه كلمة الله اكبر الله اكبر
رغم هذه الكلمة هواي سامعته وكايلتها بس هل مره بالذات حسيتها دخلت باعماقي وكأنما تذكرني
ماكو اكبر من الله ولا اقوى منه
الله اكبر من كل شئ.. اكبر من عمامي ومن ضلمهم واقوى منهم .. بعد على شنو اني احسب الهم كل هذا الحساب
رب العالمين.. دائما محاوطني بحنانه ...وجاي يسهلي اموري .. اترك امري اله وهو الي قادر يبعدهم عني ..

كمت مكاني .. عدلت رعد وعد بفراشهم ..وغطيتهم .. ورحت توضيت من سنك المطبخ .. اجيت ارجع للغرفة اصلي .. بس شفت عمتي بالاستقبال.. واكفه تصلي .. رحت
دخلت للاستقبال .. وبقيت واكفة انتظرها تكمل حتى تدليني على عبايه اصلي بيها ..
رغم اني جايبه عباية الصلاة مالتي بس صارت ويه الملابس الغرفة نايمين وظلمة ..

هي كملت وكعدت .. سلمت .. وباوعت الي بابتسامة

:صباح الخير.. عمة

: صباح العافية .. ها يما .. تريدين تصلين ..

:اي .. بس ردت شي البسه

:هاي خانه المعرض بيها مصلايات وجادر صلاة مال فروحه صلي بيهن ..

طلعتهن ولبست الجادر و وكفت اصلي وعمتي .. كعدت تسبح بالسبحه ..
واني هم كملت وكعدت أسبح ..

:هم زايرة قبر ابوج

رفعت راسي وجاوبتها : لا .. حتى ما اندلة






: اني اخذج اله .. دوم اروح ازورة ابد ما تركته

حجيت بفرح متمنيه صدك اروح أزوره :صدك عمه ياريت ..

:سبحان الله .. انتو .. رغم ماكو فوك راسكم لا ام ولا اب .. بس شوفو شكد تربيتكم حلوة .. شكد مؤدبين .. تدرين من اجيتو واني بس اباوع عليكم واحس كلبي طاير من الفرح.... ما مصدكة يمه عيني تكحلت بشوفتكم ..
شلون عشتو اخلاف اهلهم .. وشلون هيج طلعتو ...
مأدبين وانتو عايشين ويه ذنيج.الحياية .. شلون كدرتي تستمرين بنصهم وتبقين قوية ..

دنكت راسي أسبح.بالسبحه واجاوبها
: عما.جان ويانه الي احسن من الكل.. رب العالمين .. هو ويانه ..

أشرت بأيدها : تعاالي حبيبتي تعاالي
دگت على رجلها، كمت تقربت، وگعدت يمها، مدّدت راسي، وخليته على رجلها، وهيه بدت تمسّح على كتفي بحنان غريب... حنان نسيت شلون طعمه، كأنه حضن أمي اللي ما عاد موجود.
عيوني غمضتهن، وكلبي گام يدعي، لا شعورياً، يدعي بس تبقى هاي الإيد فوكي، تدفيني، تحسسني اني لحد هسه مو وحدي.

:سولفيلي شلون عبرتي كل هذا وحدج ..

تنفست بعمق من حنان حضنها
:عبرته وصار سوالف .. بس حيل تأذيت عمة حيل
يعني تخيلي .. طفله عمرها عشر سنوات .. تداري اطفال ثنين عمرهم أقل من سنه اغسل لهم اسبحهم اوكلهم انومهم .. فجاء لكيت نفسي مسؤؤلة مسؤولية كاملة عنهم
اطفال بهذا العمر تؤام يراد مرة جبيرة يله تكدر تداريهم .. اني شلون كدرت اربيهم واني طفله محتاجه الي يربيني ..

شلون كدرت اسوي كل هذه الأشياء لو ما رب العالمين زرع بيه قوه وطاقة مال وحدة عمرها عشرين سنة .. صح هواي عانيت وهواي صعبت علية امور .. بس كدرت اعبرها كلها ...

:امي .. امي من تمرضت .. اني جنت اسبحها و امشطلها و اوكلها.. وارجع اطلع اعتني بأخواني واختي المريضة ..
جنت اطلع بالباب اخواني واحد بحضني واحد بحضن سلوى .. وأشوف الي بعمري يركضن ويلعبن بالشارع ..
واني المطلوب مني .. اكون ام ومسؤؤله من تلث نفرات
و عن امي هم .. امي بعد ما حبسوها بالمخزن ..
والصراحة هي قبل ما ياخذوها للمستشفى صارت تأذي كلش .. اني نفسي من ادخل الها جنت اخاف .. لأن صارت تضربني وتأذيني..

و سلوى .. جنت اباوع عليها وهي تذبل يوم بعد يوم .. بسبب كلبها التعبان واني ما اعرف شنو اسوي الها وما أكدر اساعدها ..
عما اني عشت واني اباوع على طفولتي واتحسر عليها ..
بس كلشي يهون وكلشي فدوة الهم .. عندي يقين أن هم سندي وهم عكازي من أكبر ..






انطلقت اشكيلها كل الي بكلبي .. وهي تمسح على كتفي .. وعيونها تجري دموع ..

:اووووف ياحبيبتي كل هذا حملتيه وحدج .. الله يعينج ..

: مو وحدي عمه .. سلوى هم بطلت من مدرستها وعاشت مريضة وحالها حالي محرومة وتتحسر .. بس الفرق .. اني جنت أشيل عنها هواي .. سلوى كلش فقيرة وحساسه وما تتحمل .. ههههه اني جلدي تدبغ وصرت بلا احساس
بس ساعات .. جنت من يفور دمي.. الزم جبرية وفاطمة اكتلهن .. وهن يكتلني.. وهيج مخلصيها ..

:هههه ومن تكتليهن يسكن

:اوووو لا طبعاً بس يجون عمامي يقدمن الهم تقرير وهم ما يحتاجون دفعة يجون عليه ركض .. صح انكتل بس المهم ما أتنازل ..

:هسه عمامج اكيد عرفوا بطلعتج من البيت ..

:صدك نسيت اكلج .. خابرت محمد يكول .. رجلج هد على صالح وتعارك وياه يريد فلوسه وطلكني .. الف الحمدلله خلصت منه .. احس حمل ونزاح من ضهري ..
بس خايفة يجون هنا .. واني ما ريد اسببلج مشكله عمة

:دخلي يجون .. واتحداهم يكدرون ياخذون واحد بيكم ...ولله آكلهم اكل بسنوني .. ما اريدج تشيلين هم ولا تفكرين بيهم .. طبهم الف مرض يركعون رأسهم بأكبر حايط .. مدام صرتو عندي .. انتو بامانتي .. اني بعد المسؤؤله عنكم .. وحملكم اني اشيلة..
ارتاحي ولا تفكرين بيهم ..

يا اللهي على كمية الأمان والحنان الي حسيت بي من كلمات.. مثل الماي الي ينزل على كاع مفطرة من العطش .. غمضت عيوني .. ونمت بعمق واني راسي على رجلها .. مرتااااحة واول مره انام وما افكر بباچر لان اعرف اكو من راح يشيل الحمل وياي ..

فتحت عيوني الصبح الشمس داخلة للاستقبال.. باوعت الساعة 11 الصبح .. كمزت من مكاني اول مره ابقى نايمة لهيج ساعة .. لكيت نفسي مخدة جوة راسي وغطى فوكاي .. والفراش مريحح كلش ودافئ .. وريحة الدولمة مدري تبسي تارسة البيت ترس ..

كمت من مكاني للمطبخ .. لكيت عمتي واكفه فاتحة الجدر .. فرح تغسل اماعين على السنك وسلوى تلكط خضرة .. ورعد وعد يلعبون ويه سمر بالطارمة

:صباح الخير ..

ردت عمتي: صباح النور يما

:ليش مخليني لهسه نايمة .

:لعد شعدنه .. شفتج نايمة ومرتاحة خليتج براحتج .. دخلي القوري وطلعي من الثلاجة جبن مثلثات تريكي على ما يصير الغدة يله ..






رحت سويت مثل ما كالت وسويتلي لفن جبن وكعدت اكل بيها .. وأسولف ويه البنات ..

.........

بيت صالح .. كاعدين يغلون.. وحايرين وين يلكون بسملة واخوانها .. ولاخطر على عبالهم بسملة يم عمتها

جبرية: ماكو غيرررر هذا صاحبها .. هو الماخذها .. قابل وين تروح هو ماكو غيرة هذا المطيرجي لاعب برأسها وخلاها نهبت وياه ..

صادق: انيييي شلون فااااتتني .. اييي صدك قابل وين تروح

صالح: عسى ما تاكلها جلاب الشوارع هل ساق**ة الي كسرت كلمتي وفشلتني كدام الحجي .. هسه اني منين اجيب له فلوسه ..

صادق: انت هذا كل همك .. تريد تكول ماعندك تنطي .. لك انت نايم نوووم على الفلوس .. بس هذا انت وهذا طبعك ما تبطله ..

صاالح: ااااخ ولكم تكسررررت وكعدت لووبحيلي مو اروح واطلعها من جوة الكاع ..

: قسم بالله يا بسملة اذا ما فصلت رأسها عن جسمها هي وذاك السافل بسيطة..

بلا ما يتأكدون من شي ولا يسألون كوم يا صادق وخابر ابو خالد .. جاوب الرجال ومايعرف شنو السالفة ..

صادق : خلي ابنك يرجع الابنيه ابو خالد .. عيب هيج يسوي واحنه جيران عمر ما مرجيه منكم ابد

: ابو محمد فهمني شصاير يا بنيه يمعود

: ابو خالد عدنان مقشمر بسملة ومخليها شاردة وياه .. ماكو غيره.. هو الي يركض وراها .. اذا الابنيه ما رجعت يصير دممم قسم بالله يصير دم ولاتكول ما كتلك .. حدك لباجر اذا ما رجعت بسملة هو وياها وين ما نلكاهم نغسل عارهم .. بنيه متزوجه ماخذها وشارد بيها رجلها طلكها ومن البارحه مختفية هي واخوانها..

انتفض ابو خالد من كلام صادق
:ابووو محمد انتبه لحجيك تره لحد هسه محترمك .. بتكم روحو شوفوها وين هجت من ضميكم وضلمكم .. عدنان هذا بالبيت وما طالع من رجع من الواجب لهسه هو بالبيت .. لاتجون تذبون بلاويكم علينه .. اذا بسمله شردت فأكيد شردت من حقارتكم وياهم ومن ضملكم وجوركم عليها هي واخواتها هل ايتام .. واذا ابني نمس بكد الشعرة لو سيارة بالشارع طختة .. راسك ما يكفيني تفتهم لو لا .. واذا انتو زلم صدك لمو لحمكم وحنو عليهم موبس بالمصايب يطلع صوتكم ..






كوم يبو خالد وسد التليفون بوجها .. وركض للغرفة عدنان ..
:كووووم ولك كووووم

فز عدنان من نومة مايدري شنو السالفة
: شصااير يأبه شكو

:خابرني صادق يتهدد ويتوعد يكول عدنان ماخذ بسملة وشارد بيها الابنيه طالعه هي واخوانها من البيت ومايدرون بيها وين من البارحه

نفزع عدنان خايف : شنوووو .. شبيها بسملة ..

: عدنان اذا تندل وينها احجي ولا تعل كلبي .. بسملة تدددري بيها وين ... احجيييي

طفر عدنان عيونه بكصته صارن من سمع بيها طالعه
: يأبه و القران ما اعرف بيها مو هاي كدامك اني بالبيت ما طالع .. اكيد شردت منهم هل جلاب ومن هذا الشايب الماخذها .. ياااريت اعرف مكانها بيدي اجيبها لهنا ولله ما اخليها يمهم دقيقه

: ولك هو حتى رجلها ملطكها ومن البارحه ماكو لاهي ولا اخوانها .. وهذا مخابر يصيح ويكلي ابنك ماخذها ..

:يااااكل خر* ترس أيده .. زين تسوي بيهم .. بسملة سبعه وبس هي دواهم ... هل سفلة ..

: ولك.عدناااان من يوم ما وكفت عليه وكفه حتى اروح أخطبها الك واني ما مرتاحلك .. لاتجيبلنه مصيبه تفهم لو لا ذول عمامها.. جلاب وكلشي يطلع منهم

: والجلاب ذول لو تنكلب الدنيا بعد ما اخليها بين أيديهم

حجاها وكام فتح الكنتور يطلع ملابسه مستعجل

:وين مولي انت نوب

: رايح لبغداد رايح أدوارها وارجعها لو اعرف ادور بغداد شارع شارع وادك البيبان هم ارجعها

: وانت بصفتك شنو تدورها وترجعها ولك بصفتك شنوووو ليش ما تحترم نفسك وتعوف الابنيه بحالها ..

: اعووووفها شنوو .. بسمله مستحيل اتركها بعد مستحيل اتركها حتى يلكونها ويصيرون شرفاء براسها ويقتلوها .. هم يردون الزله عليها ...

صفك ابو ايد بايد
: لا حول ولا قوه الا بالله... انت مخبل.. ولك.انت شعليك ليش تذب روحك بأمور ما تعنيك ليشش

:يااابه بسمله .. هجت من ضلمهم ما طلعت بطرانه ولا طلعت تريد.تسوي شي مو زين .. بسملة شردت من كد ما جاور عليها وعلى اخوانها واهلها.. واني كلي ثقه هي راح تتصل بيه .. مستحيل تطيح بشدة وما تتصل على الأقل من تتصل بيه اني قريب منها اكون ..






كمل تبديل ولم ملابسه بجنطة الدوام وباس ابو برأسه اخذ موبايل وفلوسه وطلع من البيت .. من رجعت ام خالد من السوك وسمعت الي صاير بقت تدك وتطلم على ابنها ..

وركب عدنان سيارات بغداد .. ورجع لبغداد .. بس ما رجع لبيتهم .. ماراد يتلاكة ويه واحد من عماها.. أجرله غرفة بفندق حتى ما ارتاح .. بس خله غراضة نزل .. وهو بنفسه حاير ويفكر وين ممكن تكون راحت وهو يعرف مال الها أحد .. عيونه ما نزلت من الجهاز متأمل تتصل بيه ..

يومين هو على هذا الحال .. يفتر على الفنادق ويسأل اذا بنيه بهل مواصفات وياها بنيه وثنين ولد نزلت يمهم .. افتر بالمستشفيات .. راح للامام الكاظم سأل لحد ما مل .. .. حتى راح للمقامات الدينيه الي ابغداد على أمل ممكن يلكاها واصله هنا ومالكه اثر الها ..

وعمامها بعد كلام ابو خالد رغم بعدهم شاكين بعدنان .. بس سكتو منه ويعرفون ابو خالد عنده عشيرة جبيرة واذا ندكو بعدنان ماراح يخلصون ..

كعد عدنان حاير صافن ويفكر وين يروح يدورها بعد ..
ومن كد ما تعبان غفة ونام .. وره ساعه فز على صوت رنة الموبايل...

بسملة: احلى تلث ايام عشتهم يم بيت عمتي .. مدلله اني واخواني .. وعمتي تحير شلون تعوضنه من المحنه.. بناتها وردة وكلش حبابات.. ولدها هم كلش مؤدبين ..وخلوقين .. ومحترمين وجودنا بالبيت ..

اتصل بيه محمد .. جاوبتة ..

: هل حمودي شلونك

:الحمدلله اني زين انتي شخبارج

:اني تمام ولله بخير .. وكلش مرتاحه

:سلوى شلونها خووما تعبانه

:لا بالعكس كلش زينه .. شلونها الأوضاع يمك

: ولله الأوضاع متوترة حيل .. وعمامج بس يدورون عليج فايرين ..

:محمد عمامي ما ميتن عليه ولا باقين بقلق .. عمامي حاقدين عليه وهذا فرصه اجتهم حتى يخلصون مني بإسم الشرف .. تعلمني بيهم .. صالح شوفه .. صالح همه الوحيد هسه شلون ينطي فلوس الحجي ..

: ابوي خابر ابو خالد وتعارك وياه يكلة ابنك هو الي ماخذ بسملة وشارد بيها ... ابو خالد لعب بيهم لعب وكال الهم عدنان حتى من البيت ما طلع وإذا نمست شعره من ابني اسوي واعمل ..






: ياااا عزة وعدنان شعلي ..

:هاي بعد تعرفين انتي لأن خطبج ورفضو .. واني الله يسلمج .. بحجه صديق طفولتي.. المهم اني اكلج ديربالج على نفسج .. محتاجة شي ؟

: لا سلامتك .. محمد كلش اشكرك اني على الي تسوي وياي

:هذا واجبي بسمله .. اني لو اعرف بيج مسويه شي غلط اول واحد اوكف ضدج .. بس للاسف أهلي ضالمين وهاي الحقيقه المرة.. يبقون أهلي شسوي ..
انتي ديربالج على اخوانج وعلى سلوى بالذات

سديته منه واني القلق اكلني اكل على عدنان ..الله يعلم هسه شنو وضعة ..
دخلت للغرفه.. وكتبت رقمة واتصلت بيه ..
يدك واني اكل باضافري قلقه ومنتضرته يرد
لحد ما رد صوته صوت واحد نايم وتعبان ..

:الو .. منوو

: اني بسلمة

فز من مكنة ونبره صوته تثبت هو شكد خايف عليه
: بسماااا وينج وينج

: اهداء عدنان على كيفك

: شنو اهدء بسمله صار يومين افتر ما بقه مكان مادورتج بي كلبي نار لكمة ما اكدر اخلي بحلكي وانتي تكليلي اهداء .. على الأقل جان كلتي قبل ما تطلعين..

:عدنان على كيفك.. اسمعني ..اني ما ردت أكلك واخليك.حاير بيه واعرف بيك راح تعارضني وتكلي.تعالي يمي وساعتها مشاكل تصيرلك مراح تخلص .. لهل سبب اني طلعت بدون ما احد يدري

: زين وين انتي هسه وين كاعدة غيررر افهم

:اني يم عمتي .. وكلش.مرتاحة يمها ولله وبإمان

: وانتي تتوقعين ماراح يلكوج يعني .. اول وتالي يلكوج يم عمتج وياخذونج

:ماراح يكدرون عمه كالت حتى لو عرفو بيج يمي مستحيل اخليهم يوصلون الج... اني بس ردت اطمنك لأن محمد كالي .. صادق مخابر ابوك وعرفت هسه الكاك بقلق لهذا السبب اتصلت بيك اطمنك اني بخير

سحب نفس مرتاح من اطمن عليها جر جكارة وشغلها وهو كاعد على السرير منزل رجلي بالكاع وعكوس اديه على رجله ايد بيها الجكارة وايد بيها الموبايل ..
اخذله ثواني ساكت يسحب نفس

:تدرين صار يومين نار ومشتعله بيه ..ولج شسوي بيج شسوي على هذا القلق ..






:اني اسفه..

: تعااالي ولج صدك هذا الشايب طلكج

:اي الف الحمدلله خلصت منه جان مثل الطابوكه على صدري نايمة

:هو اني شخصياً جان طابوكة وعلى صدري نايمة .. بس الوضع والقلق حتى ما خلالي مجال افرح ..

:صدكني احسن شي صار هو طلعتي من ذاك البيت .. اني اعرف ومدركة ماراح يخلوني بحالي.. وممكن يسولي مشاكل.. بس اول الغيث قطره.. وهذه القطره هي طلعتي من ذاك البيت وجيتي لعمتي وخلاصي من ذاك العله
وان شاء الله الغيث جاي .. شوي شوي أرتب كل اموري

:امورنه قصدج

:امورنه ؟

: اي امورنه... بسمله كافي عاد خلي نتزوج ولله طك كلبي

: ابد ابد مو وكته الي جاي تكولة .. اني وين افكر وانت وين ..

: الي افكر بي اريدج تصيرين باسمي وبحمايتي .. بسمه صدكيني ماكو احد راح يكدر يحميج بكدي .. حتى عمتج .. الي عرفتيها صار يومين .. اني الي احميج .. ومحد يكدر ياخذج لو يندك مدامج زوجتي .. بسمة ابد ما اريد تفكيرين اني اريد اتزوجج على مود شي ثاني ابد لاتفكرين هيج ثقي اني اريدج بس حتى تكوني يمي واكدر.اواكف بوجه اي بشر يريد اذيتج .. بدون ما يكولون الي شنو صفتك ..

:ميخالف .. بس ابد مو وكته هسه الكلام هذا .. اتحملني لحد ما أرتب كل اموري وساعتها الله كريم

:براحتج بسمه براحتج .. ماراح افشل نفسي اكثر

:خلي اروح بعد ما أكدر اطول أكثر ..

:بسمتي ؟

:ها ..

: وجعا .. دكولي نعم حبيبي .. أمر كلبي .. جنج عريف شلتاغ هااا

:ههههه ستوك تريد تتزوجني وهسه صرت عريف شلتاغ خوشش .. تفضل عيوووني امررر شنو ردت تكول

:عمتج عدها ولد ؟

: اي عدها ثنين

:شكد.عمرهم .. اكيد اطفال

:هههه لا مو اطفال واحد عمره 22 واحد20

:هلوووو تزين راسي انهبت هسه عمتج تجي وتكلج اريدج من ريحة المرحوم اخوي وأنتي طبعاً هاي عمتج الحنينه ماراح ترفضيلها طلب .. وتوافقين .. وتتزوجين ابنها.. وتحبينه وتنسين عدنان وطوايف عدنان .. اهون عليج مع الاسف

كلبت عيوني بملل
: خلص الفلم مالتك .. تنفع مخرج الصراحه بدقيقه الفت فلم .. خلي اطمنك.. اني على كلبك كاعدة ما تخلص مني .. لزكة بغراء

: احلى لزكة .. اجمل لزكة .. انكد.لزكة

:انكد لزكة شنو هاي

:يعني لزكة نكدية بس احبها

:اني نكدية ؟

: ولج الضحكه تطلع منج بشلاع الكلب والحزن تارس ملامحمج .. بس وعد يابسمتي بس تصيرين الي .. ما خلي الحزن يمر عليج ..

:يله روميو باااي. وهذا رقمي حفظة يمك .. ولا تتصل ابد اني اتصل من اكدر لأن عيب من عمه

:ماتصيرلج جارة هادمة اللحظات الحلوة .. يله حبيبة .. الله يحفظج ..

سديته من عدنان وطلعت بره كعدت يم البنات ..
ثاني يوم .. تفاجئت بمحمد جاي ..
عمتي استقبلته بس جان وجها ثكيل شوي ..

:ولله زين وطلع بيك هدة مو مثل ابوك وعمك

:عمه ولله اني ما قابل على كل الي يسوو بس كولي شنو اسوي وهم ابوي وامي وعمي وخالتي اتبره منهم ؟

:لا يما لا تتبرة منهم بس اوكف بوجهم وبوجه ظلمهم .. حتى لو جانو اهلك .. مابقى أحد ما خلص من ظميهم
اني بس مات ابوي تولوني .. ورجعو على صابر لحد ما موتو ورجعو على مرته خبلوها وحولو على هاي هي واخوانها .. كله هذا على مود الفلوس من أمده الفلوس التخلي الاخوه واحد ياكل بلحم الثاني ..

: واكف بوجهم وما قابل عليهم .. واعرف بيهم باطلين ..
اني اعرف عمه انتي كارهتنه وحقج .. اني بس اجيت اطمن على ولد عمي واروح ..

:شكرا محمد وكفتك ابد ما انساها ولله .. بس ديربالك لا يعرفون بمكاني

:ابد ولله ما جبت طاري كدام.اي بشر .. اطمني

عيونه تدور على سلوى طول ما هو كاعد لحد ما طلعت سلمت عليه يله ارتاح .. وهي هم مابقت بس سلمت وطلعت ..وهو هم اترخص وكام يطلع ..
وصلته للباب مد.ايدة بجيبه سحب منها فلوس خلاهن بأيدي..

:بس اني عندي ولله ما محتاجة

: ميخالف تحتاجين علاج الج لسلوى اخوانج يريدون يشترون خليهن جوة ايدج واي شي تحتاجي اتصلي بيه .. اني ماريد أكثر جياتي ماريد يشكون بشي ..

:ايي ايي يكون افضل ....

بس للي ما كنت محسبه حسابه .. هم شاكين بمحمد مساعدنه.. ومكلفين مهدي يطلع وراه .. كل ما يطلع ..

يتبع ...

30

-------------------

لم أعد تلك الفتاة التي كانت تبكي في الزوايا وتخشى المواجهة.
كبرتُ، لا بالعُمر فقط، بل بالقلب والعقل والوجع.
تعلمتُ أن من يسلبني حقي، يسلبني اسمي، وملامحي، وحتى ظلي.
واليوم... لا أطالب بحقي، بل أنتزعه.
أمد يدي، لا لطلب الرحمة، بل لأسترد ما سُلب.
أنا تلك التي انكسرَت ألف مرة، لكنها في كل مرة كانت تلملم نفسها من رمادها كأنها وُلدت من جديد.
أنا العائدة... لكنني لست كما كنت.
أنا النار التي لم تحرق، لكنها لن تنطفئ

----------------------

محمد خله بيدي مية الف .. بعد ما طلع رحت بسرعة ضميتهم ويه فلوسي .. احاول اقتصد بكد ما اكدر حتى من اتحرك عندي كم فلس جوة ايدي ..
لأن واثقه راح احتاج فلوس هواي .. بين المراجعات والمعاملات الطويلة .. دخل وعد عليه ..

:بسمة خلي نشتري من المحل ..

سديت الجنطة وطلعت خردة من الجيب الزغير
: هسه حبيبي اخذكم للمحل ..

:بسمة شوكت نداوم ...

تذكرت مدرستهم .. فعلاً هل ايام الكل يداوم واني حتى نقل ما ناقلتهم .. وأساساً ما اعرف اذا اني باقية هنا لو راح يصير شي .. ساعات افكر اخليهم هذه السنه يتركون .. بس ابد ما يهون عليه اضيع سنة عليهم ..
بقيت محتارة وافكر .. اخذت وعد من ايدة وطلعت من الغرفة .. صحت رعد ..

تعال حبيبي نروح اشتريلكم ..

رعد:نروح وحدنه هذا المحل قريب ..

:لا اخاف عليكم

:منين تخافين علينه مو كل مرة نروح نشتري هناك

:رعد هسه مو نفس قبل ما ارضى تطلعون وحدكم اخاف يجون عمامي وياخذونكم مني ..

طلعت من باب المطبخ للطارمة .. عمتي بالحديقة تلكط كرفس شافتني اريد اطلع ..

: وين رايحة بسمة

:عمة بس اشتري لأخواني وارجع ..

كامت من مكانها .. هاج سله الكرفس خليها بالمطبخ .. واني راح أخذهم اشتريلهم ..






:عمه ما اريد اتعبج بس اشتري الهم

جرت عبايتها من شباك المطبخ ولبستها
:لا بسمة انتي بنيه حديثة وهذا ابو المحل مو راحة .. كعدي اني أخذهم

ابتسمت على خوفها عليه .. جبت عمري بعز الخطر والإرهاب والانفجارات اطلع للسوك وحدي مايوم أحد خاف عليه .. زين عمه هذا الف

:المن هل الف

:لرعد و وعد

:ضمي الفج وسكتي ..

اخذتهم وطلعت ماقبلت تاخذ فلوس مني .. رجعت للمطبخ الكط بالكرفس وغسلته .. فرح تكنس بالاستقبال وسلوى وياها تمسح بالمعرض من التراب
شويه ورجعت عمتي .. مشتريه الهم ولسمر والي اني وسلوى وفرح .. خلت العلاكه على الكاونتر ونزعت عباتها.. جرت الكرفس تريد تثرمة ..

:بسمة طلعيلي راسين بصل وطماطية خل اثرم كباب
انتبهت الي صافنه وبالي مو يمها

: شبيج صافنه صاير شي ..

:ها عما ..

: شبيج صافنه بشنو تفكرين

:عمة رعد وعد جاي يلحون على المدرسة لأن الدوام كلها اقل الاسبوع ويبدي .. وماعرف شنو اسوي مدرستهم ذيج بعيدة كلش .. وهم ما اكدر انقلهم اخاف يصير ما يصير

:شنو الي يصير ما يصير

:عمة اني اكيد ما راح اكعد حمل عليج العمر كله اني واخواني..

:شنو هل حجي بسمة شنو حمل عليه .. مثلاً اخليج ترحين منا .. مستحيل كتلج بعد انتو صرتو مسؤوليتي ومالكم طلعة منا بعد هذا بيتكم

كعدت كبالها بعد ما رحت فتحت الثلاجة وطلعت الها طماطة
:عما.. البشر عضمة ثكيل.. وانتي بركبتج مسؤولية اجي
اني ازود الحمل عليج .. وبعدين ولدج خطيه هم اكيد.يريد ياخذون راحتهم .. وجودنه يضايقهم .. اني من ضاكت الدنيا بية اجيتج .. بس هم ما يصير نبقى العمر كله هنا ..

:شكيت منج اني ؟ .. منو كالج انتو حمل عليه بالعكس حبيبتي ..

:بس ارجع حقنه .. اعوضج عن كلشي ولله

:تدرين بعد ما اجيتي وشفتج شلون بهذا عمرج وتركضين حتى ترجعين حقكم .. كلت شكد مابيه خير وخفت بساع وتركت حقي .. جنت اكول ما اريد اوكف اخوتي بالمحاكم بس بعد الي شفته والي سمعته منج .. لا ولله اوكفلهم واطلع حقي وحقكم من خشومهم .. خلي ايدج بأيدي واني وياج خطوة بخطوة ..






:ولله ياريت عمه ياريت .. لأن اني وحدي بهل دنيا جنت احس ياريت تكونين وياي عالاقل احس عندي ضهر اتحامة بيه ..

دنكت تثرم وحسيت بحلكها كلام ثاني .. واحساسي كان صح ..
:بسملة يما .. عمامج ما ينشد بيهم الضهر .. ويريدون بس يأكلونكم .. انتي وسلوى يراد الجن سند وضهر حتى عمامج مايكدون يفتحون حلكهم بحجايه وياكم ..
شهادة لله اني صارلي فترة .. ادورلي على بنية حلال .. لماجد اريد افرح بي .. وما الكه احسن منج .. وهم منها هذا يصير بيتج وبيت رجلج وما تبقون مقيدين..
شنوو كلتي ؟

صافنه عليها وهي تسولف والإبتسامة شاكة حلكها .. احتاريت شنو اكول الها .. واستحي اكول الها لا وماكدر.اكول اي هل شي مستحيل .. فضلت السكوت واحاول اغير الموضوع ..