:واني كدام الكل ... ومن هذا المكان وكدام هاي الوجوه الطيبة... اطلب ايد الابنيه لابني عدنان .. والتريده حاضرين بي

الشيخ : ابشر بالخير و البت بتكم أن شاء الله

:وهذا الشيخ الي يعقد الهم حاضر.. نقرة الفاتحة ونعقد الهم بخير..






كعدو يتفقون على حاضر و غايب.. وقرو الفاتحه..
شكد ما اكول كلشي صار سريع وسهل ما اكدر اوصف ذاك الشعور... بوقت قصير الموقف نكلب كله لصالحي... وضهر صالح على حقيقته..
وطلع من الكعدة فشلان مذلول ..

حجت الحجيه ويه جناينها:
كومن ولجن جيبن الها قرأن وكرسي وبركع ابيض بساع..

راحت بنيه شوي ورجعت بايدها كرسي وكعدت

... خلت قران بايدي كالت افتحي ...

سويت مثل ما طلبت فتحته لا على التعيين.. طلعت كدامي سورة النور ...
رغم هي كالت طلعي سورة الفتح ... بس اني ماعرف ليش سورة النور من طلعت كدامي حيل تفائلت بيها
وكلت الها

: هو القرآن كله خير وبركه .. راح اخلي على سورة النور

:براحتج حبيبه ..

راحت شوي ورجعت بايدها بيدها قماش ابيض ..
كالت المره الجبيرة الكاعدة

: هذا البركع كل بناتي وجنايني من يعقدن البسه الهن كلش اتبارك بيه ..

خلته على راسي .. دقايق وكالو راح نعقد ...
اسمع صوتهم جوة الشيخ يعقد لعدنان وصوت محمد موجود هم ..
شوي وارتفع صوت المباركه بالاستقبال ...

عيوني اريدهم بس يوكفن من الدموع مجاي اكدر اسيطر عليهن ..
سلوى واكفه يمي حاصره جفي بايدها من كدا ما ارجف عيونها مدمعة من الفرح .. رعد ووعد واكفي كدامي .. وام خالد وكفت على راسي مخليه أيدها ...

الشيخ گال:من وره الباب .. جاهزين بوية
حجت ام خالد ... جاهزين شيخنه

بسم الله نبدأ... بلش يقره صيغة العقد ... لحد ما كال اذا قبلتي فقولي نعم وانت وكيلي

حسّيت الدنيا صار لونها وردي بثواني...
گلبي يدك مثل طبل ...
وإيدي ترجف، والقرآن بإيدي ،

هزّيت راسي بصمت من الفرحة حتى صوتي ما جاي يطلع ...
الشيخ ما سمعني وكرر العقد

حجت ام خالد: صوتج يمّه، نريد نسمعج..

رفعت راسي بشويّة جُرأة ممزوجة بخجل:
:إي... أقبل .. نعم وانت وكيلي

بثواني، صارت دمعتي أسرع من كلمتي...
والكعدة صاحت بـالرفاه والبنين ومبارك،
، والنسوان هلهلن ، والحجية الكبيرة حطّت إيدها على كتفي، وكالت:
هنيالج يمّه، الله يسعدج، ويبعد عنج أولاد الحرام..

ام خالد وكفتني واخذتني بحضنها : بالعافيه يما الف مبروك ... ولله سواها عدنان ...

:ابتسمت بخجل منها ... درت على سلوى لميتها بحضني

:يعمري يعمري الف مبروووك ولج مجاي اصدك ... سواها ابو الطيور

رعد : يعني صرتي مرت عدنان بسمة

سلوى: اي ولك تزوجو

وعد:الله همزززين تزوجتي عدنان احبه احسن من ذاك الشايب اكرها

سلوى تداركت الموقف وسدت حلكة ..

بس أني برغم الفرررح ... بعدني حايرة،
هاي اللحظة حلم؟ لو صدگ صارت؟
صوت الشيخ، الفاتحة، الدعاء، الدموع...
كلشي كان مثل حلم حلوو صحاني من كابوس طويل....

يتبع ...

34...

-------------------------

حمدت ربي وشكرته .. سهل الي كل هذه الأمور ...
وبعد المباركه والكعدة اترخصو حتى نطلع ..

حجه ماجد : من رخصتكم ..اخذهم ويانه للبيت الله شاهد امي بوجهي ما تباوع .. واني اعترف بلحظة عصبيه وخوف على امي بدر مني تصرف طايش لكن يشهد الله هم بحسبه اخواني والحجي الي حجيته ندمان عليه ...
اني أريدكم ترخصوني .. يجون وياي معززين مكرمين والابنيه تطلع عروس من بيتنه ...

رد ابو خالد : بس يا عمي .. اني الابنيه اخاف عليها أحد يتعرض الها لو يصير شي وهسه هي بأمانتي وصارت مرت ابني ...

:أمانا الله ورسوله محد يوصل ولا أحد يتعرض الهم واذا صار شي اني كدامك ..

عدنان : ماشي .. بس اني بأيدي اوصلهم ... وكل يوم راح اطئمن عليهم .. وهم خلال هذه الكم يوم مدام اني ببغداد نعقد محكمة فد نوب ..

ابو خالد:هاي هي بويه معناها هم صارو بمسؤوليتك وأي شي يصير عليهم .. انت الي تصير كدامي ..

الصراحه اصتصعبت رجعتي لبيت عمتي بعد طردة ماجد .. بس الولد اعترف بغلطة واني هم كلبي نار على عمتي ... واستحيت أعارض مدام هم اتفقوا .. سكتت وجاريتهم ...
سلمنا وطلعنه ... صار بوجهي محمد وماجد وعدنان واكفين على صفحه يسولفون ...
عدنان من شافني طلعت اجه تقرب يمي مبتسم والفرحة طاغية على ملامحمة ... وكف قريب مني وهمس ..

:مبروووك مريتي

دنكت راسي بخجل وجاوبته:الله يبارك بيك

: راح اوصلكم لبيت عمتج .. ماجد طاح بركبة ابوي واعتذر عن كلامه يكول امي تريدها .. شنو رأيج اذا ما تردين ترحين لا تضغطين على نفسج

:لا لا ميخالف ماكو مشكلة .. اني الصراحة اريد اشوف عمتي ... وهم سلوى تره تعبت من الطريق روحة جية

:ماشي حبيبتي ...

صارت عيني على محمد يخطف نضرات من سلوى وهي كذالك ... بس حسيت هموم الدنيا كلها ملتمة بكلبه ومبينه على ملامحمة مقهور حيل .. وهل شي مبين كلش عليه ..






بعد ما طلعنه من البيت ابو خالد وام خالد سلمو عليه .. بعد ما باروكلي ... و صعدو بالسيارة ..
وعدنان بقى لأن عنده دوام و ماتسوى بعد يروح ويرجع ..
محمد جان جاي بسيارة عمي صادق ...
وكف يم السيارة حاجيتة ..

شلونك محمد ..

رد بتعب واضح بصوته و بوجهة :الحمدلله عايشين ..
مبروك الله يتمملج بخير

:شكرا حمودي يوم الالك ..

هز رأسه بلا حتى ابتسامة وصعد .. ماجد صعد بصفه ورعد كعد بصف ماجد ..
وليورة حصرنه نفسنه اني وسلوى ورعد وعدنان
ورحنه لبيت عمتي ... مطلعيها من المستشفى صار يومين .. من وصلنه لهناك .. ماجد أصر على محمد وعدنان يدخلون ...
دخلنه للبيت .. الولد دخلو للاستقبال .. واحنه دخلنه من باب المطبخ .. تلكتنه فرح فرحانه بجيتنه
سلمت عليها .. ودخلت عمتي مخلين سريرها بالصاله
ركضت عليها بلهفه و خوف ..

:عمممه ... حبيبتي الحمدلله على سلامتج ..

جانت زعلانه مني بس ردت عليه السلام وباستني
:هيج بسمة تخليني بالمستشفى... وترحين ليش يمة ...

:عمه .. اني اسفه ولله بس انتي ما تعرفين الي صارلي.. اني ما طلعت بمزاجي عمه ..

:اعرف كلشي كرار حجالي ...ولله من يومها ما اخلي لساني على لسان ماجد.. شكد اعتذر وكال من خوفي عليج هيج حجيت ... بس ابد حلفت اذا ما يرجعج ما اباوع بوجها... ولله ماجد كلبه نضيف بس من يتعصب يضل يخيط ويخربط بالحجي ...

:ما زعلانه منه ولله اعرف حقه صدك اني اجيت والمشاكل اجت وراي مسربه ... وهاي اخر شي لو ماستر الله جان رحتي بيها

:لا ولله مو بسببج... الصار كله لأن اخوتي جلاب يرحون فدوة للجلاب

:هاي هي عمة الحمدلله على كل حال ...

دخلو اخواني وراي سلمو على عمتي وباسوها ..

:مبروك يما على العقد ماجد خابرني قبل ما تجون وحجالي .. تستاهلين زلمة مثل عدنان ...بس هذا الي صدك يحافظ عليج

:الله يبارك بيج عمتي ... الحمدلله رب العالمين نصفني.. صالح جانت نيته يطلعني وصمة عار كدام الناس بس حاشا ربي يظلم عبدة كلشي صار بصالحي وهو طلع فشلان






:عساه بابو زايد ويضل دومة فشلان أن شاء الله..
باوعي انتي بعد تضلين عندي مفهوم لحد عرسج ..

:براحتج عمه مثل ما تحبين ...ولو ملابسنه وغراضنه ضلت هناك ماجبت غير كم قطعه حسبت حساب نبات

:اذا على الملابس سهله عود رجلج من ينزل من دوامة ويتلحق يجيبهن الج بطريقة ...انتي هنا ضلي اجهزج بيدي ..

:ماشي ...

شوي وطلع ماجد كال لعمتي محمد وعدنان يردون يسلمون عليج ... كمت اني عدلتهه ورتبت حجابها وغطيتها ... ودخلو للصاله يسلمون على عمتي ..
بس ما قهرني صدك غير محمد .. من سلم على عمتي حضنها وصار يبجي بحضنها وهي تبجي وياه .. غصب عني دموعي نزلت عليه ..

محمد: عذريني عمه عيني مكسوره منج ولله

:عمت عين ابوك كون الخلاك بهل موقف ... لا حبيبي لاتعتذر انت شنو ذنبك .. شيل راسك حبيبي .. انت زلمة معدل... وما منك كل صوج

:عمه ابوووي دمرني فشلني .. حتى ما بقالنه أحد يريدنه بسببه ... شسوي عمه كوليلي .. يبقى ابوي ومجبور اوكف وياه ...

:ميخالف امي ... لا تتخلى عنه ... انت زلمته هسه .. وعسى هل صار يخلي يصحى على زمانه وينظف كلبه من هل حقد الي ضيعة ...

:وكفت بنص الديوان تمنيت الكاع تنشك وتبلعني من الفشلة ... جبروني اشهد ضدهم بسبب سوالفهم المايرضى بيها رب العالمين...

:ماسويت الا الصح ... ابد لا تضوج انت سويت الي يريح ضميرك ويرضي ربك ...

كام من حضنها وهو يمسح بعيونه ... دك ماجد على ضهرة كاله
:محمد انت الي سويته هو الصح يكفي انت تنام وضميرك مرتاح وتوكف كدام ربك وانت ما ظالم...وذا على ابوك ...هو بايده ودة نفسه للسجن.. وذا على صالح لاراح يموت ولا راح يفلس .. هو الي كان رايدة منك .. توكف وياه بالغلط والباطل...صالح جان رايد يهدر دم انسانه بريئة شردت من ظلمة ..

هز رأسه محمد :الحمدلله الي خله ضميري صاحي وما أشبههم ..

انتبهت عمتي لعدنان ... بالخير وليدي بالعافيه عليك بسمه حطها بعيونك امانه

:توصيني على بسمه... بسمه هي عيوني شلون اخليها بعيوني ...

:والنعم منك ...اول ما شفتك عرفتك زلمة ينشد الضهر بي






عدنان: طبعا اني من عقدت هناك عليها ... ماردت ألبسها الحلقة .. بس مادام جينه هنا .. ترخصوني ألبسها حلقتها
بحضوركم ...

فتحت عيوني مفاجئه ... شوكت أشتره الحلقة ... واصلا شنو عرّفة. كلشي راح يتم وننخطب .. معقول مخطط لكشي سابقاً واني ما ادري .. بقيت صافنه وبس مبتسمه ..
تقدم يمي ... وهو يطلع من جيبه علبه.. فتحها بيها حلقتين ...
باوعت للعلبه ورجعت رفعت راسي اباوعله احس كلبي طاير فرح وما مصدكة الي جاي يصير ...

حجت عمتي : يله بسمه مدي ايدج ولبسي حلقتج

ضحكت وخليت ايدي على حلكي ...ورجعت مديت ايدي كدامه.. وهو لازم حلقتي بأيدة ولبسها بأصبعي ...
غمضت عيوني أستشعر السعادة الي جاي تتسلل لكلبي وهو يخلي الحلقة بأصبعي ... واحس كلبي مسوي احتفال بصدري.. رفع ايدي وباسها ... كهرباء وسرت بكل جسمي ورجفت رجفة قوية ... متت بدمي من عمتي ومحمد وماجد وهو بلا مستحى بأس ايدي .. ورجع باس كصتي

عدنان: الف مبروك بسمة عمري

من كد التوتر والخجل حتى ما رديت عليه

اباوع له الضحكه ما اختفت من وجها... ولا من وجهي .. بعدين طلعت الحلقة اني وهو مد أيده لبسته حلقته ... وبسرعه نزلت ايدي .. والكل تبارك النه مرة ثانية

عمتي : الله يسعدكم ويتمم الكم بالسعادة والخير ويرزقكم الذرية الصالحة كولو آمين

الكل كال آمين ..

بعدين اترخص عدنان وكال لازم يروح ..
طلعت وياه للباب أوصله وكفنه شوي بالطارمة ..
وهو يوصي بيه

: اريد منج ديربالج على نفسج.. وخلي جهازج قريب منج حتى اتصل عليج ...

:تمام أن شاء الله

لزم ايدي الي بيها حلقة يباوع عليها مبتسم ويرجع يباوع بعيوني ... ويسحب نفس قوي

:ولج فرحتي مجاي اكدر اوصفها ... عود صدك صرتي مرتي ؟

:ههههه لا حبيبي صدّك .. انت زلمة من ضهر زلمة ... وسويتها صدك ...

:من فدوة رحت لهذه الضحكة ..

:تعال صدك ... اشو ابوك محضر الشيخ .. وانت محضر الحلقة .. يعني كأنما محضرين كلشي وجايين من البصره مخصوص حتى تخطبون .. يعني جان ممكن ما تنحل المشكله واطلع اني بالوجه الاسود .. شلون هيج محضر كلشي .. تره دخت ...

ابتسم ومسح على ذقنه الي ستوه بادي يضهر بي الشعر بعد الحلاقة .. باوع على باب المطبخ .. ورجع جاوبني






:شنو كتلج سابقاً...

:شنو ؟

:اني مو كتلج خليج وراي .. وثقي بيه .. كتلج مستحيل اخليج تنزلين راسج كدام بشر .. ؟

: ايي ؟

:اني من إخذتج وياي للبصرة جنت حاسب حساب كل الي صار .. وكل خطوة نخطيها اني رتبتها زين قبل ما امشي بيها .. مستحيل اسوي شي يعرضج للخطر ...
باليلة الي بتنه بالمستشفى ... رحت لعمتج ... ولكيت ماجد طلبت منه نحجي على انفراد ..
المهم .. كعدنه حجيته وكلت اله كلشي .. هو أول مره جان قافل بسبب عصبيته على أمة .. لكن اني كتله .. الابنيه صارت دخيله عندي .. واذا صار عليها شي لو طلعت حجايه ... انت اول واحد اطلبك للشهادة .. حتى تبرئهه

:اي ؟

اخذت رقمة وتركته ... وقبلها اني اتصلت بأبوي وهم فهمته كل الوضع ..
وبعد ما عمج سوه الشي الي جنت متوقعة ... اتصلت بمحمد ... واتصلت بماجد ...
كلت لماجد اي شي يصير على الابنيه انت المسؤول لأن الابنيه امانة عدكم وانت طردتها ... هو رد كال امي هم كرار حجالها كلشي و ماتحجي وياي و لاتباوع بوجهي ..

و اجينه للبغداد ... وسمعتي وشفتي الي صار .. صالح طلعت خيسته وكلها عرفته شنو هو ...
الصدك اني ما بالع ضلتج هنا .. بس مجبورين هل فتره نتحمل .. هم حتى نعقد محكمة .. وهم نشوف المحامي الي يمشي بموضوع العمارة...

:اي ولله اني المشاكل حتى نستني موضوع العمارة ..

:حقج وحق اخوانج ديربالج تغفلين عنه ... وخل اكلج شي ... ابوي بعد ما عرف صالح هو ذاب التهديد وهو من يومها ... قرر نرجع لبيتنه هذه الفتره ..

:صدددك راح ترجعون ؟

:اي ولله احتمال أقل الشهر نرجع ... البيت موجود وحتى اثاثه موجود.. والصدك ابد ما كدرنه نتأقلم هناك نهائيا حيل تعبنه نريد نرجع لبيتنه ونرتاح

:اي ولله ياريت ...

: وهسه قبل ما اروح انطيني بوسه

:عااااا ولي لا على حلكك اهفك

فتح عيونه عليه وهو يكلي هذا عليمن ولج اني أولي وتهفيني على حلكي..

أدركت حجم جفصتي. تذكرت هو صار خطيبي وزوجي مو ذاك صديقي الي ارزله شوكت ما عجبني ..
:لا باوع باوع خل احاجيك .. مو شنو اني بعدني ما متعودة عليك زوجي .. انطيني فرصه اتعود حتى اتعلم احترمك ..

:تتعملين تحترميني ؟

لزمني من آذاني ... كووولي اسفه يا زوجي ياحبيبي بعد ما أعيدها ..






:وخرررر ما اكول ...

هو يزيد بلويه آذاني ... كووولي اسفه ولج

:وعلي ما اكول

ضحكت واتفاجئ:: وعلي ؟

:يمعود تعلمتها منك ..

: وعلي التحلفين بي صايرة اذا ما كلتي اسفه هسه اسوي الأكبر من البوسه ..

:دووخر شنو هو الأكبر من البوسه تعرس عليه هنا بالطرمة

:عادي اذا تردين ماكو مشكلة

: أكلك جفيني شرك واكفين بنص الطارمة وانت تدور بوس هسه يطلع أحد وننفضح .. لاتصير مسربت

:نووب مسربت امنعج من وحده تجفصين بالاكبر منها

حاولت اتمسكن كدامه بس حتى يسكت
: يا حبيبي انت مو كتلك اني متعودة عليك صديقي واجفص براحتي بعدني ما متعودة عليك زوجي وبعدين اني بسمتك اهون عليك تلوي اذني.. واحنه اليوم مخطوبين .. بطلت ماريد خل نرجع اصدقاء احسن على الاقل جنت ما اتقيد ...

بسرعة صارت نضرات الندم بعيونة : اسف بسمتي .. اذيتج يعني

:لا ما اذيتني .. فدوة الك .. اني هم غلطانه وفعلاً المفروض افرق وانتبه لكلامي وياك .. صاار تؤبرني تشكل أسي ..

:ديله عيني أم عصام خل اروح .. نكلبنه باب الحارة ...
باجر حضري نفسج الصبح .. نروح نسوي تحاليل بلكي نلحك على المحكمة نعقد

:مستعجل كلش

:اي حبيبتي اريد نعقد محكمة افضل على شنو التأخير وبعدين اني مدام واجبي يبدي باليل..

:تمام لعد الصبح موعدنه

:يله يأبه .. ديربالج على نفسج...
وصل للباب طلع بره وقبل ما يروح كال
: شو عيدي مال أسي..

حجيت واني اضحك :تشكل أسي ابن عمي

ضحك ولزم خشمي بأصابعه وعصرة وجر اصابعة ..
وهو يكلي : سدي الباب لايفوت واحد يصجمج ..

:الله وياك .. راح هو وسديت الباب وراه اضحك .. بس احس بقيت بس جسم واكف اخذ كلبي وروحي وعقلي كله وياه ... اجيت ادخل واني طائرة .. لاكاني محمد هم يريد يروح و وياه ماجد.. طلع كدامه وهو وكف وياي

:ها حمودي راح تروح

:ايي رايح .. بس .. اح حم






يريد يحجي شي بس متردد : كول محمد رايد شي ؟

:بس ردت احجي ويه سلوى قبل ما اروح.. ردتها ضروري

من كال ضروري لعب كلبي بس اول مره يطلب مني هيج طلب ماكدرت اكله لا ..

:تمام ثواني اصيحها ..

دخلت صحتها هي اجتني
:سلوى محمد بره يريد يحجي وياج يكول شي ضروري

بسرعه توترت وارتبكت.. رغم حبها اله بس كلش تستحي لأن ما يصير بينهم كلام غير النضرات

:شنو يريد

:ماعرف ولله كال بس اريد احاجيها .. ومبين عليه كلش مقهور خطية..

:ابقي يمي مو ترحين

:وياج ما اروح تعالي ..

اخذتها وطلعنه بره هو واكف ... من طلعنه تقرب مسافه عنها صار كدامها .. يريد يحجي بس الكلام واكف ببلعومة وغاص بيه ... ويسحب كل نفس أحسه يحرك صدرة حرك
بس القهر صدك من حجه ويه سلوى وكال

:سلوى .. شوفي .. الله يشهد اني شكد حبيتج .. وشكد تمنيتج ... بس ... بس ساعات ننجبر نتخلى عن الاشياء شكد ما جانت عزيزة علينه ... اني قبل جنت اكول اي شي مو مهم المهم تكونين الي ... بس ...

سكت ونزلت دمعة من عينه مسحها ودار وجها انطه ضهره لسلوى الي صافنه بي ... سحب نفس قوي ومسح وجها ورجع دار وجها عليها وكمل كلامة...

:بعد كل الي صار ... ابوي اول وتالي ينحكم ... وامي واخواني مستحيل اكدر ابتعد عنهم ... وبنفس الوقت حتى لو وكفت بوجه الكل وأخذتج اعرف امي شنو .. اعرفها تأذيج وتستغل اي فرصه حتى تقهرج ...
وانتي ... انتي مثل الورده.. ما تحملين أذية ولا ضغط .. اني منا اكلج .. الله يسعدج ... وما أريد تربطين حياتج بيه .. طريقته مو واحد ... الله يوفقج ...

كمل كلامه بسرعة وبنفس الثانيه دار وجها وطلع ...تارك وراه سلوى الي حرف ما نطقت وبس صافنه بي ... حتى دموع منها ما نزلت ...
تقدمت يمها حضنتها لصدري ... وهي بنفس جمودها لا حجت ولا بجت ولا بدر منها رد فعل .. غير تركتني ودخلت جوة .. دخلت وراها ميته قهر على محمد وعليها... هي دخلت للغرفة .. تركتها براحتها .. وكعدت يم عمتي .. نسولف باكثر من موضوع... وسمر مطشرة جنطتها وكاعدة تكتب بالواجب .. واخواني يحوسون ...
سولفت الها كل موضوع محمد وسلوى .. وشكد مقهوره عليهم

:ما تعرفين امي ... يمكن بالمستقبل ربج كاتب الهم نصيب سوة الله يعلم ... ومحمد زين سوة حتى لو يتأذون هسه .. كل جرح اول وتالي يبرة ... سلوى وفاطمة مستحيل يصيرن سوة .. وهسه هو المسؤؤل عن أهله ..
انتي لاتتركينها وحدها هذه كلبها تعبان وخاف تتخربط ..






صدك من كلام عمتي خفت عليها لا تتخربط خليت ورحت دخلت يمها بالغرفه .. لكيتها مخليه راسها على مخده وغامتة روحها بالبطانيه وجها للحايط .. كعدت يم راسها .. شلت الغطه منها ... وبس صوت نشغتها وصلني ..
لزمتها من كتفها درتها عليه ...

صوت بجيها عله وصار قوي شالت رأسها من المخدة وخلته بحضني.. تركتها بجت لحد ما فرغت كل دموعها ..
حجت ...

: محمد لو صدك يحبني جان تحدى الكل علمودي .. بس هو بأول موقف باعني .. اعرف لأن مريضة محد يتحملني .. جنت اعرف هذا اليوم راح يجي .. شفتي ؟ شفتي بسمه شلون بسرعة تخلى عني ..

مسحت على شعرها بأيدي
: سلوتي ... حبيبتي ... إني جنت اعرف هل شي راح يصير اليوم لو باجر... أكثر من مره كتلج لاتتعلقين سلوى .. تره انتي وياه طريقكم مو واحد كتلج أمه فاطمة وأبو صادق وعندج الحساب ...
من شفتج ما اقتنعني بكلامي تركتج للايام هي الي تثبتلج صحة كلامي ...
ومحمد هم الموقف الي بيه هو مو سهل .. هو باقي بين نارين .. مفروض انتي تعرفين كل هذه الكلام شنو الجديد يعني ..

:اي اي حقج ولله كلامج كله صدك واني رحت زايد بمشاعري...

: انتي بنيه ... مجرد شفتي أحد اهتم بيج فوراً تعلقتي بيه .. التعلق هذا بسرعه يروح .. هسه كلها فتره بسيطه وتنسين ... ونرجع حقتنه وترحين لاحسن الأطباء وتتعالجين وساعتها ... الف من يتمناج ..

:هههه الف ؟
بسملة مسحت دمعة نزلت على خدها، وابتسمت بألم:

تره ربج ما ياخذ شي إلا يعوض علينه بأحسن منه، يمكن مو هسه، بس يوم من الأيام راح نعرف ليش صار الي صار... يمكن لأن رب العالمين كاتبلج نصيب أحسن.... راح يرزقج براحة ما شفتيها من سنين.... يمكن مو بحضن محمد ... بس بحضن أمنه ... بحضن ناس تحبج حب حقيقي... مو مجاملة ولا شفقة... وراح يجي يوم تضحكين على كل لحظة بجيتي بيها، وتكولين: الحمد لله ربنا ما نسانا

باوعت الي بعيون مدمعة

:تحجين وكأن كلبج مو مكسور... كأن عمرج ما مر عليج وجع وهم .. وانتي أكثر انسانه تحملت وجع و كسرة كلب

:أنا مؤمنة إنو كل دمعة نزلت من عيني.... الله شايفها... وكل وجع كتمته بصدري هو سامعه... و دامه هو السميع العليم أكيد ما راح يتركنه . دعائي، دموعي، صبري، هاي ما تروح هدر... لأن رب العالمين وعدنا: إن مع العسر يسرا، ووعده حق ... ودامي أتنفس، راح أظل أؤمن بالعوض ...
سلوى... احنا نظن نحب، ونظن نختار، بس رب العالمين أرحم بينا من نفسنا... يمكن نحزن لأن فقدنا شي حبيناه، بس لو نعرف شگد الله يبعد عنّا الشر حتى لو إحنا نتمناه، چان سجدنا شكر بدل الدموع ...






تقربت مني وهي تحتضني..

:ياريت اكون قوية مثلج .. بس اخاف ما اتحمل ..

: تحملين... لأن الله ما ينطي الابتلاء إلا على كد نيتچ... وراح تشوفين، يوم العوض يجي وتكولين: يا ربي شگد كنت أجهل حكمتك..

مسحت عيونها موافقة على كلامي مبتسمة .. وسكتت ..
بقينه اني وياها نسولف ماتركتها خفت صدك تتخربط من كلبها... المغرب كلش إذن كمنه صلينه و وكفنه اني وفرح نحضر العشى.. سلوى بقت بالغرفه اخر مره شفتها واكفه تصلي .. بس اشو تأخرت ..
رحت اشوفها ... دخلت لكيتها لابسه جادر الصلاة..و واكفه كدام المراية صافنه بنفسها ومبتسمة ...

تقربت منها ابتسمت لابتسامتها.. حبيت امازحها
:شنو معجبه بروحج .. وتضحكين لنفسج

:اكلج ؟ هذه المراية تطلعني حلوة ؟ لو اني اليوم معجبه بروحي ..

:حقج تنعجبين بيها ... غير تخبلين اني ولو ولد ومو اختج الا ما املخ روحي عليج

:بسملة ؟
:ها

:لايكلي الحجاب ؟

:انتي كلشي يلوك الج

:كلش احب شكلي من البس الجادر واصلي... احس روحي اقرب لربي و انظف .. تدرين كل ما اصلي... و البس الجادر ومن اكمل انزعه واطلع .. اسأل نفسي ليش نلبس الجادر بس من نصلي؟
يعني، هو ربّ العالمين يشوفنا بس بهالركعات؟ هو شايفنا بكل لحظة…
ليش بس من نوكف نصلي نستحي من نفسنا ونغطي كلشي؟

سكتت، حسّيت كلامها مثل طعنة ناعمة... ما توجع.. بس توخر الستارة عن شي داخلي ما چنت اشوفه. ..
سؤال ابد ما كان الي عنه أجابه بس حاولت ارد عليها بالي اعرفه ...

: يعنني.. اكيد لأن بالصلاة نقابل رب العالمين ونتواصل وياه... وعيب وغلط أن نلتقي بربنه واحنه ما ساترين أنفسنه ..

:يعني رب العالمين الي خلقنه وانطانه كلشي من النعم .. وخلق تفاصيل جسمنه .. نستحي نوكف كدامه واحنه ما مستورين .. بس عادي نطلع كدام.الناس الغريبه.. مكشفين وشعرنه وركبتنه طالعه ويباوعون علينه ..
شنو مثلا رب العالمين يشوفنه بس من نصلي .. لا هو يشوفنه بكل وقت وبكل لحظة .. اللقاء الحقيقي هو بكل لحظة نعيشها؟
هو يشوفنا وإحنا نضحك، نغلط، نطيح، ونكوم…
ليش نخلي الحشمة بس بهاي اللحظات القليلة

ما عرفت شنو اجاوبها .. وكلامها عكد لساني ..

: كل مرّة ألبس الجادر أحسني حقيقية… أحس الله يحبني أكثر…ولما أشيله، أحسني ناقصة






:بس سلوى… إنتي مو ناقصة حتى لو كنتي ما محجبة ..
إنتي تنحبين على نيتچ وكلبج. ورب العالمين يباوع لكلبج

كامت تعدل الجادر على وجها ..

:بس آني أحب نفسي بهالشكل… أحسني محترمة ..وقوية..
مو لأن الناس تشوفني هيچ… لأن أني أشوف نفسي هيچ

سكتت، ما عرفت شگول…
بس حسّيت إن سلوى ما چانت تحچي عن جادر،
هي چانت تحچي عن هوية.. عن كرامة .. عن قرار .. عن حبها لنفسها بهيچ شكل..

بقت سلوى تباوع لروحها بالمراية، تبتسم، وچفوفها تمسح الجادر قصص وروايات عراقية كرار صلاح بهدوء،
كأنها تحضن الطمأنينة.. مو بس قطعة قماش.
أنا طلعت من الغرفة، وكل خطوة أحس بيها أفكاري تنكلب...
سلوى چانت تحچي عن الجادر، بس بالحقيقة چانت تحچي عن شيء أعمق...
چانت تذكّرني إن الحياء مو بس فستان، الحياء سلوك... إحساس... حضور دايم لله بداخلنه...

بقيت اشتغل ويه فرح بالعشى بس بالي ويه كلام سلوى ..
مر تقريبا عشر دقائق .. وطلعت سلوى من الغرفة .. تفاجئت بيها لافه شال على رأسها ... بس شكد ما اوصف شكلها حلو طالع قليل ...

حجت وهي فرحانه تبشر عمتي ... عمه اني قررت اتحجب ..
عمتي طارت فرح بقرارها ..

:فدوة رحت لهل وجه هذا الي مثل الكمر .. حبيبتي الله يكملج بعقلج ...

اجت وكفت كدامي... شنو رأيج ..

مسحت بايدي على خدها فرحانه الها : يخبل عليج .. يعمري .. وهديتج مني درزن شالات

كعدنه نتعشى كلنه سوى واني عيني ما طاحت منها ..
وحتى الولد باركولها بالحجاب .. بس لاحظت شي .. أن عيون ماجد اكلتها اكل ونظرات اول مره اشوفهن بعيونه ... وهي ابد ما منتبها...

باليل فرح خنتكتي خنك الاتحف شورابي وتشقر وجهي .. شلون باجر ترحين تعقدين وانت شورابج داجة ..
استسلمت الها بعد ما اخذت نضرة بالمراية واكتشف صدك شورابي سود ..

:فرح شقريهن تشقير عود بالعرس احف

:ولج ششقر ...بربج شعر وجهج اسود وشورابج صفر صدك تحجين غير تصيرين ميز نصبه

حجت سلوى
:وتطيحين بالسان ابو الطيور وبعد عندج الحساب ..

:خاف يوجعن ؟

:اي يوجعن اجذب عليج اكلج ما يوجعن صدك يوجعن بس اتحملي بسرعة اخذهن الج يله حبابه طلعي حلوة كدام الرجال .. شوفي ماريد تغارين من كلامي ... بس ولله عدنان حلو كلش ومرتب وشخصية.. رتبي نفسج لا ينشفط منج ..






بس سمعت ينشفط مني كعدت مثل الحبابه واتحملت وجع الشوراب .. وبقيت ساعه انفخ شورابي من فوك ساعه اخلي لساني بلثتي ساعه أعصر وجهي ...روحي طلعت لحد ما كملت ... وصدك فرق صار بوجهي ...
رجعت سوتلي خبطة تشقير .. وخلته على وجهي لو احس اشتعل نااار... وكعدت اهفي على وجهي ... شوي وركضت غسلته ...طلع وجهي ابيض كلش ..
نوب راحت ورجعت بيدها صحن جاي بداخله خبطه ..

:نوب هذا شنو فرح لاتضلين تلعبين بخلقتي ..

:مقشر هذا شبيج ..

مديت اصبعي وشلت بي وضكته : يا مقشر هذا تمن

: اي هذا طحين تمن اخلي فوكه عصر برتقال لو شوي حليب .. واخبطه واخلي على وجهج من بنشف فركي وجهج بيه يصيررر ناااعم مثل وجه الطفل ..

:عزة بعينج تذبين مصايب بيج البله كله ..

:ولله كلشي ما اعرف بنات عمي هن يعلمني ...

كعدت تتمعمر بوجهي ... والصدك احس وجهي ارتاح وصار حلو وناعم ... قبل ما انام اتصل عدنان حجينه شويه وسديته ..
ثاني يوم من الصبح .. كعدت حضرت نفسي ..
وتريكنه اني وعمتي سوة

:ولله يما لو اكدر اكوم جان رحت وياج

:حبيبتي عمه ادري بيج متقصرين فدوة لكلبج ..

نطيتها علاجها ورحت بدلت لبست من فرح بنطرون ومانتو شوي فوك من الركبه .. وشعري لميته ذيل حصان ... وقررت اخلي شي لوجهي.. اخذت من جرار فرح قلم كحله ومسكاره .. خطيت عيني .. وخليت شوي حمره سحريه بس لون خفيف .. وتعطرت ... اتصل عدنان كال وصلت الباب طلعي ..
بسرعه سلمت على عمتي وطلعت.. لكيت عدنان واكف ومترجي على السيارة .. يمكن هي نفسها سيارة صديقة ..

:صباح الخير

رد علي بحب: صباح الحب .. شنو هاي شطالعة اليوم

استعرضت نفسي كدامه بغرور: شلوووني املخ مووو؟

:ناقصج شي واحد

:شنو ؟

:ناقصج بس جنحان وتصيرين فراشة..

: مممم خاف اطير منك بعد وين تلزمني

:اصير زبمور واطير وراج

ضحكت حيل على حجايته.. وصعدت بالسيارة بالصدر وهو صعد .. وشغل السيارة

:هذا هم سيارة صديقك

:اي هو كال اخذها عليمن مأجر تكسي






:يله أن شاء الله مستقبلا تشتري سيارة

:قريبا ناوي اشتري بقوة الله

مشينه متوجهين للمستشفى... من وصلنه نزلمه وهو شابك ايدي بين اديه... وكأنما يكول للناس اني صرت اله ..
دخلنه وبلشنه .بسحب الدم والتحاليل .. وكعدنه ننتضر النتيجة لحد 11 الضهر يله طلعت ..
كال مدام بعد وكت خل نروح للمحكمه احسن
وصدك توجهنا للمحكمة... وهم انتظار وإجراءات وهوسه المحكمة شبه فرغت من الناس يله وصلنه السرة ... ودخلنه عقدنة ...

طلعنه من المحكمة لازمين عقد زواجنة وأيدي بأيدة وكأنما طايرين ما نمشي على الكاع .. وأصر الا يدخلني مطعم يغديني ... طبعا المطعم جان شبه فارغ .. وهل شي ريحني أكثر ... طلبنه غدة وكعدنه نتغدى ونسولف ونضحك ... و نخطط للجاي من مستقبلنه ...
وبعد ما كملنه رجعني للبيت ... طول الطريق مشغل سيدي بالسيارة مخلي اغنيه ...ماجد المهندس..

بين ادية. واحس انك بعيد ..
ويردد بصوته ويه الاغنيه بصوت عالي
علم العشاااك كيف الحب يكون ... بلا حواجز احلى طعم الحب اكيد ...

يااابوية شوكت تدخلين لقفصي ..

:ههه ادخل لقفصك شنو اني طير من طيورك ..

:انتي احلى طير واجمل طير واعز طير على كلبي ...

:بس كون ما تنكلب عتوي عليه

حجيتها بقصد بس كون ما تتغير بعدين .. بس هو الضاهر مخة طفر لبعيد ... وطك من الضحك ... ويكلي

:اكيد انكلب عتوي ... انفش ريشاتج ريشة ريشة

:تررره انت كلش صاير مسربت تدري لو لا

:مسررربت نووووب ؟ شحجينه البارحة

:لا يعني اقصد صاير مستهتر

:انوووووب

:اهووووو كافي كافي اسكت احسن الي ... لأن بعدني مجاي اتعود انت زوجي ... بس اتعود اكوم احترمك وعد

:لا فدوة احترميني حبابه احترميني الله يخليج ...
انتي الضاهر الا اخليج بقفصي يله تتعودين اني زوجج ..
حتى كل ما تنسين اني زوجج اذكرج ..

درت وجهي منه بخجل ومبتسمة وهمست : حباية كون

سمعني ثأري : ب ط ...

فتحت عيوني على وسعهم على حجايته مصدومة
ومن صدمتي بقيت الطريق كله ساكته وهو يندن .. لحد ما وصلنا .. ونزلت واني بعدني فشلانه من حجايتة
وهو سلم وراح ...

مرن يومين الوضع طبيعي وماشي عدل .. خليت عمتي تخابر ابن حماها المحامي حتى يشوف موضوع العمارة ويمشي بي ... وطبعا ما تفوتني عيون ماجد الي صارت ما تنزل من سلوى كل ما يشوفها...

بلش المحامي يمشي بموضوع العمارة .. وورث ابوي ..
ورث عمتي هم ...
وشلت اله 500 من الفلوس وانطيتة مقدمة ...
خلال هذه الأيام .. طلبت من عدنان ياخذنه اني وسلوى نشوف امي ... وهو ابد ما قصر ..
اخذنه الها ... سلوى لطريق كله ترجف .. وعيونها مدمعة ما مصدكة راح نشوف امي .. رغم نعرف هي ما راح تعرفنه...
دخلنة ومثل المره السابقة.. عدنان كال راح انتضر بره ..

كنت أمشي بالممر الطويل، جدرانه بيض وباردة، مثل كلوب الناس اللي مرو من هنا ونسوا أهلهم. إيدي لازمة بإيد سلوى، حسّيت بيها ترتجف، ما أعرف من البرد لو من الخوف،
صوت خطانا كان يرن بالمكان، والممر ما يخلص، كأنه يريد يجرّب صبرنا. المستشفى هدوء .. بس بيه أنين خفيف، مثل نحيب مكتوم، يطل من كل غرفة نعديها.

سلوى جانت تباوع بكل زاويةزتسالني

:هنا امي كاعدة .. المكان بارد حيل

مشينه سوى ويانه مره ممرضة .. دخلتنه للغرفة ...
اني وسلوى وحده لزمت بالثانيه كلوبنه تدك سرريع حيل ..
مشينه داخل الغرفه عيونه تدور عليها ...

شفتها ... شفتها كاعدة نفس كعدتها .. بس هل مره شعرها طولان .. ومخليه شال عليه ..
اني و اختي وحده باوعت بوجه الثانيه ... دموعنه تنزل ...وركضنه بلهفه شمرنه نفسنه بحضنها ...
حسيت بيها ... ولله حسيت بيها رفعت أيدها وبادلتنه الحضن ...
وخرت من حضنها حتى اخلي عيوني بعيونها وأشوف عيونها شنو تكول...

بس هي رفعت كف أيدها وخلته على خدي ... عررررفتني والله عرفتني... ..

#الجزء_الاول_من_البارت_الاخيرررررر


-----------------

عررررفتني ...ولله أحسها عرفتني ...
ذيج جيتي ما بدر اي رد فعل منها نهائيا... بس هل مره بادلتنه الحظن .. خلت عينها بعيونه اني وسلوى ... رفعت كف ايديها الضعيف وباقي بس عظام ... خلته على خدي ..

يمكن شبهت عليه وجاي تحاول تسترجع ذاكرتها ... ما اعرف شنو بالضبط...

باوعت لسلوى الي عيونها صارن جبود حمرر من البجي .. واني مو اقل من حالها ... باوعنه لبعض مبتسمين ... وكلت لسلوى ...

:سلوووى امي يمكن عرفتنه ...

هزت راسها فرحانه توافقني الرأي ... اي ولله اني هم هيج حسيت ...
تربعت على السرير كدام امي وصرت احجي واشرلها ..

:ماما .. اني وسلوى بناتج ... ماما تعررفينه ...
حجيتها وخليت راسي على صدرها ... بس هل مره بقت منزله أيدها ..
رفعت راسي اباوع بعيونها .. كانت عيونها تحمل وجع سنين وتعب ما ينوصف ... عيونها تروح بيني وبين اختي ..
بس فجاء صفنت ... وبدر منها رد فعل غير متوقع .. كامت من السرير بسرعة وراحت كعدت على السرير البعيد .. ولمت نفسها .. خلت راسها بين رجليها وصارت تهز بنفسها ...

باوعت لسلوى ... وسألتني ..
:ليش هيج سوت ...

رديت بحيرة:ماعرف .. بس الي اعرفه هي شبهت علينه أو شبه عرفتنه وهذه بداية زينة ..
بعدها حاولنه نتقرب منها بس هي بسرعة خافت ولمت رجليها وحضنت نفسها .. مثل شخص يريد يضربو وخايف.. ما سمحت ألنه نتقرب..

رجعت المررضة .. من دخلت شافتها .. ركضت عليها ..
تصيح عليها وكانما تحجي وية شخص يسمعها ..
وتحاول تفك اديها من نفسها

:شبيييجج شبيج ... باوعت علينه وحجت : شبيها .. شنو سويتو لها

بسملة: ماسوينه شي ولله بس هي احس عرفتنه احنه بناتها وركضت كعدت هذه كعدتها

:لعد شنو هي ما جانت تعرفكم قبل ؟

:هي من تمرضت مثل الي فقدت الذاكرة وصارت ما تعرفنه بس هسه مثل الي عرفتنه ..






:احتمال دخلت بنوبنه هيجان أو عصبيه .. الافضل تطلعون واصلا وقت الزيارة خلص ..

:زين بس سؤال .. الدكتور الي يشرف على حالتها وينه

ردت عليه وهي تحاول تكوم امي وترجعها لسريرها
:دكتورة ايناس .. هي الي تشرف عليهم. ... موجودة بمكتبها اسألي بره يدلوج عليها ...

باوعنه عليها نضرة أخيرة.. وطلعنه .. بس طلعت منها واني كلي امل .. يمكن من فتحنه العمل بدت ترجع لوعيها .. ماعرف ..
بقيت أسأل على مكتب الدكتورة إيناس دلوني بي ..
ورحنه الها ... جان باب مكتبها مفتوح وهي كاعدة تحجي بالموبايل .. دكيت الباب بدون لا ادخل ..انتبهت النه ونهت المكالمة ..

:تفضلو ..؟

دخلت للمكتب اني وسلوى .. وبعد السلام كعدت وسألتها ..
:دكتورة اني ردت اسال عن وضع المريضة .. سمية

دكت بالقلم على المكتب :هااااا ... وشنو تقربولها انتو

:احنه بناتها

:زين ولله من اجة شخص يسأل عنها .. صار فتره كلش طويلة محد جاي وسائل عنها .. عموماً..
سمية بآخر فتره وضعها تحسن عن قبل .. بس صارت عدها حالة ... تلف جرجف وتخلي بحضنها وتدك عليها .. لوتطلع صدرها وتسوي مثل الي مخليه رضيع بحضنها تريد ترضعه.. وقتها عرفت انها ممكن تكون فاقدة طفل أو هيج شي .. صح لو لا؟

:دكتورة امي من تمرضت كان عندي ثنين اخوان تؤام بعدهم يرضعون كلش زغار .. بس عمامي جابوها هنا ومن وقتها هي ما شايفتهم ...

هزت راسها بتفهم ..: هسه عرفت سبب تصرفها .. من الواضح .. تذكرت أن عدها اطفال رضّع ..
اخر فتره صار تحسن ملحوظ بحالتها.. هي عرفتكم ؟

اي ... أول مرة من دخلنه عليها، واحتضناها ...أحس عرفتنه.
بس آني ما أعرف... هي عرفتنه فعلاً أو لا

:والدتچ حالتها معقدة... هي مصنفة ضمن الحالات الفصامية وتحديدًا عندها نوبات تفكك بالواقع.
يعني أوقات تتذكّر، وأوقات تنفصل كلياً عن الواقع والناس، حتى أقرب الناس إلها.

:يعني اليوم كانت تذكرنا، وباجر تنسانا؟

:ممكن... بس هذا مو شي سلبي تماما لأن ظهور أي تفاعل، حتى لو بسيط، هو دليل إن الدماغ ديحاول يرجع يتواصل.
لكن إحنا نحتاج وقت، وجلسات علاج نفسية منتظمة...
والأهم، وجودكم وياها، حتى لو هي ما وعت بشكل كافي، بس وجودكم يخلي عدها أمان.






:إحنا ما تركناها دكتورة... بس الدنيا والأهل والظروف كلها كانت ضدنا وبالذات احنه اطفال وما نمتلك قرار ولا شي وآني، والله، كلشي و لا أشوف أمي بهالحال.

:، والدتچ مريضة نفسياً، مو مجنونة... وهاي فرق كبير.
وأنتِ، من خلال دعمچ إلها، ده تسوين أكبر علاج ممكن تقدميه..

:أن شاء الله بعد ما اتركها ابد ... وراح اجيها باستمرار وبس أرتب وضعي ممكن اطلعها منا ..

شكرتها وطلعنه .. عدنان بره ومنتضرنه ..

: تأخرتو ؟

سولفتله كل الي صار واحنه نمشي واحنة نطلع خارج المستشفى...
رجعنه للبيت .. بشرت عمتي بالي صار وان امي شبه تعرفت علينه ..
ثاني يوم .. المحامي ابن حما عمتي اجة لبيت عمتي .. كعدت حجيت وياه .. بخصوص موضوع العمارة .. كال

: بس سويلي وكال واني امشيلج بالقضية ..كلها بس اذا رادوج بالمحكمة تعالي ..

ارتاحيت من هوسه المعاملات والروحة والرجعة .. وفعلاً ثاني يوم .. عدنان بسبب دوامة ما كدر يجي .. وكوة قبل ماجد هو يروح ويانه..
رحنه لكاتب العدل سويت وكالة للمحامي ... وسلمته كل الاوراق .. حتى يبلش يمشي باول خطوة ..

وهي خطوة رفع قضية استرداد عقار وتعويض عن الإيرادات السابقة طول فترة استيلاء عمي على العمارة واستفادته منها ...

وهذا كان أول ضربه لصالح .... رفع المحامي القضية ..
وبلش بكل الإجراءات...
وبعد رفع القضية بأسبوع وصل تبليغ لصالح ...

ما انكر بيومها جنت كلش متوترة ... ومرتبكه وخفت يسوي مشكلة مثل موضوع الوصية ... وكالعادة من اكون متوترة.. وخايفه من شي اتصل بعدنان ..
دكيت عليه دك ورفضة ورجع اتصل هو ..

:ها بسمتي..

:اووف متوترة احس معدتي مخبوطة خبط

:منين خايفة .. مايكدر يسوي شي

:لا عدنان صالح مايعديها ..

: اذا سوة اي تصرف راح يعم على روحه مو عليج ..
متشوق اشوف وجها هسه شلون شايط ..

: ماعرف ولله .. لله يعيدها على خير ..
شجاي تسوي

: يمعودة مخبوص خبص ابوي ... مدري شجاه يريد خلال هل ايام يرجع






:صدددك تحجي ..

:اي ولله .. يكول البيت موجود واثاثه موجودة.. وهاي اني مخبوص باقي اغسل بالبيت حتى ما اروح للبيت ..
يجيبون بس ملابسهم و اغراضهم المهمه ..

:الف الحمدلله أخيراً..

:يله حبيبتي اني مضطر اروح هسه .. اي جديد بلغيني بي

:الله وياك ..

انتضرت كلت بأي دقيقه صالح يدفر الباب ويدخل يرعد .. بس خلص اليوم وكلشي ما صار ..
المحامي يكول حددوا موعد الجلسه بعد عشر ايام ..
والتبليغ وصل لصالح ...

وبيوم كاعدين بالبيت عصرية .. نسولف وناكل كليجة وچاي .. ندك.الباب .. طلعت سمر فتحته ..
تفاجئنه من دخلت سمر كالت لعمتي .. خالو صالح بالباب ..
بسرعه معدتي خبطت من التوتر .. سيطرت على نفسي .. شلنه الصينيه بسرعه للمطبخ وهو دخل للصالة .. سلم بهدوء ...
ردت عمتي بثكل كلش عليه

:خيرر صالح شرايد ... هم جايبلك طلابه جديدة لو تهيمة جديد لذول اليتامة .. لو خاف اخوك ما خلص عليه انت جاي تخلص..

رد بكل هدوء : لا ...اني ما جاي اتعارك جاي اتفاهم ويه بت اخوج واروح ..

:شرايد منها عوف الابنيه بحالها وكافي

:خلي هي أول مره تعوفنه بحالنه ... وتحط حد لتصرفاتها

:وهي شمممسويه شموووسية

:تفتر بالمحاكم وتوكل محامي وتودي تبيلغ ... وكلشي ما مسوية .. بت بكد النعال تريد تصير مسؤولة على عمارة شكدها وشكبرها وتتعامل ويه تجااار نلبسسسس كرون ونكعد ... بسممملة وينج طلعي احاجيج

قويت نفسي وطلعت اله ... تكتفت وكفت كدامه .. فوراً حجه ..

: انتي شنوو تردين بالضبط فهميني ..

حچيت بثقة :اريد حقنه .. حق ابوي وحقي اني واخواني ..

:اي حق هذا الي تحجين عنه ...ولج انتي شفهمج بسوالف الفلوس والعقارات .. شنوو تردين ترحين كل رأس شهر تفترين على المؤجرين تلمين ايجارات .. عبالج هيج السالفة سهلة تلعبين بكيفك انتي ..

كملت بثقه: زوجي موجود وهو يسوي كل ذني

عفط حيل باستهزاء: زوجج ... هذا المطيرجي الي ضحك على عقلج كال هاي وراها جم فلس خلي انام برأسها ...






: ينام براسي يصرف فلوسي .. هاي تبقى بيني وبينه ..

نطت عيونه بشرار وكام حجه بوجهي
: واذا كتلج الف دينار مال الج يمي ؟

:المحكمه موجودة وهي تعرف شلون تطلع حقنه ..

:ولجج لا انتي ولا الاكبر منج يكدر يأخذ مني شي غصب فهمتي لوووو لا ...

:لااااااا ما فهمت وحقنه يرجع النه براضتك لو بعدمها ... الدنيا ما تايها تره ... واني وياك وجاي أكلك حقنه رااااح يرجع ...

حاول يهدء نفسه فرك وجها
: لحد هاي اللحظة جاي اكول جاهل وساكتلج واحاول اتفاهم وياج ... من الاخير ..
شكد تردين وتسحبين القضية وتصمين حلكج وتسكتين ...

خليت عيني بعينه ورديت: شكد اريد؟ شكد اريد ؟ يعني تدفعه..

:خلصصيني شكد تردين

:اريد العمارة ...واريد ايجارتها من وقت ما تسجلت بإسم ابوي لحد اخر شهر .. واريد ورث ابوي وحصته بالمحلات والبيوت ... شكد يطلعن بعد ما اعرف المحكمه هي الي تقررر..

: انتي من كللللل عقلج اخلي بيدج كل هاي الفلوس باحلامج ولج لووو تموتين

رديت ببرود : عمو اني جاي أكلك ما اريدك تخلي بيدي كل هذا الفلوس .. المحكمه هي الي راح تخليهن .. بيدي

درت وجهي اريد اروح بسرعه لزمني من شعري صرخت بي
: لااا تنسى اكو قضية ضدك... واذا نمست شعره مني لو.من اي احد مساندني هذا راح يصير ضدك وتعم على نفسك .. لو حجارة تضربني انت المسؤول كدام المحكمه ... ترووووح تونس اخوك ...

حجيتها بلا اي خوف وهو فعلاً من كلامي خرط ..

: اسمعي ... تطلكين من ذاك المطيرجي السا*ط ... وترجعين انتي واخوانج لبيت جدكم تكعدون معززين مكرمين ... وكل شهر اخصصلج راتب مبلغ محترم يكفيكم ويزيد .. شرايدة بعد ؟ ...

ضحكت من كل كلبي ولله هل بشر عجيب فعلاً القوى هي الي تخلي يمشي عدل ...

: ولله فات وكت هذا الكلام .. يا عمي العزيز.. لو من الاول مسوي هيج ويانه ومحتوينه ومخلين الله بين عيونكم .. جان كل هذا ما صار .. بس ساعات البشر بيدة يودي نفسه للتهلكه... كل هذا تمردي وصلافتي وياكم .. هاي صنع اديكم .. الوجع والعوز والقهر والحرمان ربوني .. شنو تريد.اكون بالاخير... اكيد راح اكون مثل هسه .. واكفه بوجهك طفله شافتكم شلون تضربون ابوها وتسحلونه وتهينونه بس لان فقير ومن أهل الله .. شفت ابوي شانق نفسه كدام عيني .. شفتكم شلون حابسبنه ورابطي .. شفتك شلووون تعتدي على امي وهي نايمه بنصنه .. وشلون تذلها بينه ...
كملت كلامي بغصة .. حتى بعد ما تمرضت ونحبست بالمخزن .. جنت اشوفك وانت تدخل تسوي بيها الي تسوي وهي لاحول ولا قوة .. كل هذاااا بعييييني شفته ...
.. واحب أكلك عرضك مرفوض ...
وخلي أكلك شي اخير ... اذا فكرت مجرد تفكير تاذيني لو تسوي شي يضرني... فأنت راح تضر نفسك اولا .. وصدك .. تره انت تكدر توكل محامي .. من حقك ..






تركته ودخلت الغرفه .. واسمعه بره يتحاجه ويه عمتي وهي تردة
: كله من ايدكم ... شعبالكم تستغلون صابر وسميه الفقرة ومحد يطلع وراهم ... هاك شوف بعينك ربك جابها مخصوص حتى تطلع حق أهلها ... نصيحه خويه ... كافي طمع.. هل طمع هذا راح ينهينك ولله ...

تركها وطلع ركع باب الحوش وطلع شايط ...
بقيت بمكاني ... كاعدة ما طلعت ... جاي يضحك عليه بكم فلس حسباله مثل قبل اسكت واتقشمر بتفاليس ..

مرت الايام... وصار موعد اول جلسه .... اني ما رحت ولا وصلت المحامي هو الي حضر.. وصلي كلشي اول بأول ..
صالح اضطر يحضر الجلسه ..
قصص وروايات عراقية كرار صلاح وجايب وياه محامي ...
ومحاول قدر المستطاع يبين أن هو ما كان مستولي على العمارة ...وكان وصي علينه .. بس المحامي مالتي جان كلش شاطر ... منين ما صالح يطلع صفح المحامي يثبت العكس ويطلعله بزاغور جديد ..

انتهت الجلسه الاولى بلا حكم .. بس كلشي بيها جان ضد صالح ...
المحامي مالتي بعد ما اخذ عنوان العمارة ... رايح ومتفاهم ويه بعض المؤجرين ... ومتأكد منهم أن كل شهر الإيجارات جاي تتحول بحساب صالح .. وهو الي مأجر الهم .. ومفهمهم أن العمارة هي ملكة .. وقبل أيام جاي يطلب منهم يخلون العمارة لأن يريد يرممها ...

بوقتها اني استغربت ليش صالح طالب من المؤجرين إخلاء العمارة .. وشنو يريد يرممها وهو يعرف عليه قضيه ..

عدنان: مو بعيدة يريد يفرغها من المؤجرين حتى يسوي بيها شي ..

:يسوي شي شنو يسوي مثلا يفلشها

:لا مستحيل ما يكدر ... بس مو بعيدة يودي جماعه يحركوها .. يسوي بيها حريق .. وشكلك تماس كهربائي

:معقووول تحجي صدك

:الي مثل صالح كلشي توقعي منه ... صارله سنين مستفاد منها .. ومن شاف الجلسه كلشي ضدة عرف راح يفلس منها ...اكيد ما راح يسملها الج ويفرح كلبج بيها ... والا شنو تفسرين.. طلبه من المؤجرين إخلاء العمارة بعد أول جلسة ..

:اي ولله كلامك صحيح ... زين شلون خاف يسويها صدك ...

:قبل ما يتعشى بيج تغدي بي ... وخلي المحامي يستغل هل فرصه لصالحة.. ويكول اي ضرر يوكع على العمارة خلال هل فتره صالح هو المسؤول عنه ..

:ولله تفيد تصير محامي.. مثل الطماطه بكلشي ترهم ..

:بالخدمة بسمة عمري ... كم بسمة عندي اني ..






:وانتو شنو يمتى تجون بسلامة لملمتو اغراضكم

:عكب باجر .. لمينه كلشي.. بس الاثاث ما نجيبه.. بس الخفايف .. والبيت اني غسلته ورتبت كلشي ..

:الله يسهل حبيبي ..

:حتى بعد نلتفت لنفسنه .. نشتري غرفه ونجهز ..

:عدنان اني اتفقت وياك ... اكمل من هل قضية وندل طريقي ساعتها نتزوج ..

:اي يا عيوني قابل تجهيزات تخلص بين يوم وليله هم تاخذلها وقت طويل .. غرفتنة اوصي نجار يشتغلها.. قابل اجيبلج غرفه سوكيه شلون ماكان وبالذات الجربايه اريدها تكما وتتحمل ..

:ههههههههه هو انت هذا كل همك ... شكد فاسد

:متفسد.على غريبه .. مرتي واتفسد يمها .. وبعدين انتي شبيج فوراً هيج تفكرين .. يمكن عاجبني اكمز عليها .. وما اريدها تنكسر..

:صدك عمي عرض عليه خوش عرض يمكن راح اقبل بي

:شنوو

:كالي اطلكي من المطيرجي واسويلج راتب شهري.. هههههههههههه

: اكلج لسانج محتاجته بشي

:لا ليش ..
: حتى اكصه واخلص ... تكلي لا الثوله

:اخخخ ولك كنوز الدنيا كلها .. ما ابدلك بيها ...
الكون بجهه وانت واخواني بجهه

:ممممم زين اني لو اخوانج

:اخواني طبعاً

:صدك تحجين

:اي طبعا ... وانت مفروض اصلا ما تسال هيج سؤال .. انت سؤالك مثل الي يخيرونه ياعين من عيونك اعز من الثانيه .. وثنين عيوني ماكدر افارك وحده بيهم .. بس اذا اضطر الأمر ننجبر نتخلى عن وحده بيهم حتى نحافظ على الثانية ...

مر كم يوم .. وبيت ابو خالد رجعو لبيتهم بخير وسلامة ... وهل خبر صدك طيرني من الفرح ... المحامي بلغته بكلام عدنان كالي أساساً اني جنت محسب حساب لهذا الموضوع .. عمتي الحمدلله رجعت شوي بحيلها .. وقوتها .. صح مرات يصير عدها الم .. بس احسن بهواي ..
واجه موعد الجلسة الثانية .. الي راح يقررون بيها ...
جنت بيومها كاعدة على نار ...
معقول الجلسه تنتهي لصالحه .. معقول ما احصل شي ..
والف فكرة وفكرة اجت براسي ... بيومها تمنيت اروح وأشوف وجه صالح .. وهو مهزوم واتشمت بيه
بس عمتي وعدنان رفضو اروح وكالو اتجفي الشرر وكعدي ..
من كد توتري حتى ماكدرت اكعد بس افتر ..
ومنتضرة الجهاز يدك ... صارت صلاة الضهر ..
كعدت صليت ... ودعيت من ربي ما يفشلني وينصرني ..






ب12وربع دك موبايل عمتي ... جانت مشغولة جاوبت اني بمكانها.. بلهفه

:الوووو بشر استاذ شصااااير

:مبررروك العمارة ...وصارت الج ... وانتهت القضيه لصالحنه

من فرحتي عطتتت كل قوتي اجت عمتي وسلوى وفرح يركضن خايفات بس من شافني فرحانه ..

:عمممممة عمة العمارة رجعتتتت النه

:بالخير الفففف مبروك

اجاني صوت المحامي يكمل كلامة ... دسمعني يمعودة حتى تكمل الفرحة ..
خليته بفر بأذانه الله وكليج وبعده ما لحك يصحى من الصدمة الأولى جبته بالثانية ... دعوى رد المبالغ المستوفاة بدون وجه حق ... شكو فلس اخذة من العمارة من يوم ما تسجلت باسم ابوج لحد اليوم .. كل هذا الفلوس راح ترجع الكم ... والقاضي وكل خبير مالي يحسب الإيرادات خلال هذه السنوات كلها ...
عمج هنا نصرع وصار يشيل روحه ويدكها بالكاع ضربتين على الرأس توجع ...

وان شاء الله باجر .. أتوجه لدائرة التنفيذ .. حساب عمج ينحجز وما يكدر يتصرف بأي فلس من فلوسه قبل ما يرجع المبلغ .. واذا رفض حتى سجن ينسجن
الحمدلله حاليا أصدرو القرار ..
عمج مايكدر بعد يتصرف بكد الشعر بأي شي يخص العمارة واني بنفسي اروح وأبلغ كل المؤجرين بهذا القرار ..

:الف الحمدلله يارب الف الحمدلله

حضنت سلوى واخواني بفرحه عاااارمة أن حقنه رجع
وركضت اتصلت بعدنان ابشرة... وفرحته ما جانت أقل من فرحتي ... بيومها عمتي سوت عشى لوجه الله وعزمت ابن حماها هو الولد المحامي ...

:استاذ ما اعرف شلون اشكرك ...

:هذا واجبي اختي ...

:زين بعد هذا القرار خاف صالح يتعرضلي لو يسويلي شي

:مايكدر .. عليه دعوة واي تصرف منه يعتبر جريمة ..
القرار صدر واي تحكم بالعمارة مايكدر يتحكم ...وحتى فلوسه الي بحسابه مايكدر يتصرف بيهن ..
بس اني انصحج أن تسوين حساب باسمج .. تتحول بي الفلوس .. وإيجارات كل شهر .. اسهل بدل الفرة على المؤجرين...

:اي تمام بس شلون اسوي

:يكون حساب تجاري ... حتى المؤجرين فوراً يحولون الايجار لحسابج .. لكن .. لاتنسين هذه الفلوس مو فلوسج وبس هذا فلوس اخوانج هم وانتي وصية عليهم ..






:اي اكيد طبعاً

نمت ليلتها فرحتي ما تنوصف .. اني جنت كلشي ما افهم بسوالف الحسابات والصرف وهذه الأمور كلها .. بس الولد الله يحفظة ما قصر .. بقى وياي خطوة بخطوة..
وراح ويانه اني وعمتي .. علمود نسوي حساب
يكولي سوي هيج وسوي هيج .. وابصمي ووقعي وأملي هذه الاستمارة .. وهذا رقم الحساب .. لحد ما كملت الحساب .. وخليت بي بالبدايه مبلغ 50الف

وصالح بعد استسلم للأمر الواقع وماكدر يسوي اي شي لان المحامي حاصرة من كل الجهات ...
وراح المحامي.. وكمل اجرائات استرداد المبالغ .. ونحجز حساب صالح وكل فلوسه.. وغصبا ما علي استسلم ..

المحاسب الي وكتله المحكمة حتى يحسب الإيرادات خلال هذه الفترة كلها ... حسب عدد المكاتب المؤجرة بالعمارة وشكد ايجار كل مكتب وكل مخزن .. وحسب من سنه 88 خلال هذه السنوات كلها
طلع المبلغ الكلي كحد أدنى .. 410 مليون ... بس صالح ماكان بحسابه كل هذا المبلغ فحولو كل الي بحسابه لحسابي ومابقى بحسابه ربع دينار..

تمنيت امنيه حياتي بس اشوف وجه صالح وجبرية .. بس عمتي .. مجلبه بيه ما تخليني ..
بس ما فاتتني الفرحه ابد... من اتصل بيه عدنان وبشرني
صالح مجلوط وناقلي للمستشفى...

: هههه حقه ينجلط .. اني اذا يضيعلي الف دينار انقهر عليه مو 410 مليون وعمارة هي وايجاراتها ...

: سمعنه هوسه ابيتهم.. طلعت بالشارع .. طلعو صالح كوة يمشي وساندي مهدي وجبريه .. وأخذو بالسيارة ...
للعصر شفت عمران بالباب سألته .. كالو عمو صالح يكولون صايره بيه جلطه .. ومنومي بالمستشفى..

:عساهم بابو زايد أن شاء الله... ابوي انتحر بسببهم كل الي يصير بيهم من اديهم... شعبالهم تدوم الهم لا ولله ابد

:وهسه بعد شنو ناوية تسوين

:ناوية بس تعبر فتره بسيطة هم أطالب بورث ابوي وحصته ..

:خوش بنيه تعلمتي طريق المحاكم بعد

:عدنان هذا حق أهلي.. خل أكلك شي ولله لا تتوقع الموضوع موضوع فلوس وبس .. اذا على الورث يرجع .. بس الدم شنو يرجعة .. ابوي الي خسرته بسبب طمعم شنو يرجعه امي الي نجنت بسببهم شنو يرجع عقلها ..
اني الي اريدة بس اشوفهم مقهورين ومذلولين ..
واني جاي تشوف لا اروح ولا اوصل المحكمه المحامي هو يمشي بكلشي ..






:شكد اخذ المحامي بعد هذا الفرة كلها

:انطيته مليونين .. والصدك يستاهل اكثر

:خوش محامي الله يحفظه

:اريدك تجي وياي باجر اخذ سلوى .. للطبيب

:تمام .. من عيوني ..

:تسلم عيونك ..

بت حمى عمتي اخت المحامي معاونه طبيب ونصحتني بطيب قلبيه كلش زين بالحارثية .. حجزنه يما لسلوى ..
لأن تركتها بما فيه الكفاية ولازم التفت لحالها بعد ...
ثاني اجاني عدنان اخذنه سلوى ورحنه ...

:أخاف .. يطلع بيه مرض قوي بكلبي

:حبيبتي انتي مؤمنه ... خلي ايمانج قوي بربج وادعي يطلع شي مو كلش صعب .. كل الموضوع انتي حالتج مهموله بسبب وضعنه بس هسه الحمدلله تغير الوضع .. واني بعد مستحيل اتركج .. حتى لو احتاج الموضوع سفر ولله العضيم اسفرج وتتعالجين .. خليج قوية ..

اباوع الها وجها اصفر مرتبكة .. واني مو اقل منها بس احاول اقويها .. وصلنه الحارثية .. كانت هي اشهر المناطق الطبيبه ببغداد .. وتوجنها لعيادة الدكتور الي حاجزين يما .. كنه حاجزين قبل يوم .. وحصلنه رقم 3 ..
بس طلع الشخص الي كان يم الدكتور .. السكرتير كال دخلو ..

دخلنه بس اني وسلوى .. وبقى يسأل بسلوى عن شنو تحس وشنو الأعراض ... واني هم جاوبته على كم سؤال .. كتب النه فحوصات ايكو .. واشعة صدر..
وتخطيط.. وتحاليل دم شاملة ..
اخذت منه اوراق الفحص وطلعنه ... بقينه نفتر نكمل الفحوصات وكل فحص ننتضر فتره يله يطلع ... لحد ما صارت الدنيا مغرب يله كملنه .. ورجعت للدكتور ..
وشاف الفحوصات .. وشخص حالتها ..

: تعاني من ثقب قلبي متوسط الحجم .. فتحة بالجدار الفاصل بين الأذين الأيمن والأيسر..
طبعا هذا نوع من أنواع الثقب هو بسيط .. لكن مهمل ..
وعلاجة أيضا بسيط نكدر نعالجة بالقسطرة بلا تدخل جراحي ..

حجيت بفرحة:دكتور يعني وضعها مو صعب كلش

:لا لا ان شاء الله موصعب .. بس اي مرض شكد ماكان بسيط اذا ينهمل يصعب .. بس حالت سلوى .. مو صعبه أن شاء الله بالقسطرة نغلق الثقب .. وتكدر خلال يومين تطلع من المستشفى وترتاح وتمارس حياتها بشكل طبيعي ..

لزمت ايد سلوى الي من الفرحه صارت تبجي ..
:الف الحمدلله ياربي ... زين دكتور شوكت تكدر تسوي الها عملية القسطرة ..






:الفحوصات الي كدامي تشير أن ماكو مشكله تمنع العملية .. اكدر احدد موعد الكم بعد تلث ايام الى اسبوع ..
وبيوم العملية قبل القسطره نعيد التحاليل .. واذا كلشي تمام نبلش فوراً..

:بعد تلث ايام ماكو اي مشكلة..

اتفقنه على موعد العملية بعد تلث ايام .. وطلعنه .. سلوى وجها صار اصفر من سمعت عملية وقصرة ..

عدنان: ها بشرو

:بعد تلث ايام راح يسوي قسطرة الحمدلله وضعها مو كلش صعب ..

:اي الحمدلله... سلاوي ... صيري سباعيه شبيج مصوفرة

:خايفه اموووت

بسملة:شبيج سلوى .. لاتخافين عمري .. ما سمعتي شنو كال الدكتور كال وضعج مو صعب .. والقسطرة مو عمليه جراحيه ولا فتح قلب .. مجرد عمليه صغرى وبسرعة تخلص ..

: مادري يمعودة.. خايفة

:يله عاد كااافي جبن. وخوف صيري سباعية لا اطيح حضج ..

عدنان: اكلج بدل ما تهديها ترزليها شبيج وياها

:متشوفها شلون خوافه ..

:اي حقها تخاف ... بطلي ترعدين .. تعالي سلوى امشي بصفي ماعليج بهاي الخبله ..

: لاتكول على اختي خبله بسملة وردة

:ولله اني هم صوجي ادافعلج

بسملة: شوف شلون بثواني باعتك ..

هز ايدى يضحك .. وكفلنه سيارة .. صعدنه بيها ورجعنه للبيت بالطريق خليت عدنان وكف .. نزلت وياه اشتريت لفات هبمركر للبيت كله .. وحلويات لاخواني .. ورجعنه

:خلال هل فتره محمد مرة وحده تواصلت وياه .. سولفلي على صالح .. وضعه الصحي شوي تعبان .. وصادق نحكم 15سنه ومحمد اضطر يلزم المحل بدال ابو ...

بقينه نحضر .. لعملية سلوى .. رغم هي قسطرة بسيطة .. بس كلش جنت خايفة عليها ...
اريدها تطيب وتمارس حياتها بشكل طبيعي ...
بعد تلث ايام .. لمينه اغراضها لأن تبقى يومين لو تلاثة نايمة بالمستشفى.. ومن الصبح توكلنه للمستشفى.. عمتي وماجد.. جان ويانه وعدنان بسبب دوامة ماكدر ..
الخوف على اختي جان تارس كلبي ترس .. بس احاول اطمنها .. وابرد عليها ... المستشفى جان حكومي بس حجزنه الها بالخاص وغرفة خاصة .. والعملية هم على حسابنه ... ومن بعد ما جيكو وضعها وسولها تحاليل وفحوصات... صارت جاهزة سلوى حتى تدخل ...

حجيت واني ابوس بكصتها
: راح ابقى واكفه انتضرج هنا .. اريدج تصيرين قوية حبيبتي ... وعديني ما تخافين

لزمت ايدي حيل وباستها
: راح اطلع واني كلشي مابيه .. حتى احضر عرسج ..

:يروووحي انتي ...

بقيت ابوس بكصتها ... وابجي حجت عمتي
:كولن ياالله.. وين مودينها كلها ساعة وتطلع بخير وسلامة لاتكلبنها مسلسل حزين .. يله حبايب .. كافي بجي
وانتي سلوى .. شدي حيلج ... تره اكو وحيد منتضرج على نار بس عود يكابر

حجتها وباوعت لماجد الي توتر وبقى يحك بكصتة ..
اخذو سلوى .. ودخلوها للعمليات تاركتني وراها كلبي يريد يطفر من مكانه ويدخل وياها ..

-----------------

يتبع ..

﷽ ♡.

#ميراث_الدم
#البارت_الأخيررررر
بقلمي#يمامة ..

متابعة ممتعه للجميع تفاعلكم للبارت تصويت وتعليق بين الفقرات متابعة الحساب فضلا

--------------------

دخلت سلوى للعمليات .. تاركتني وراها ... أعصر بادية بتوتر وقلق .. شكد ما طمنه الدكتور .. أن العملية سهله مو جراحية ولا فتح صدر .. مجرد قسطرة لإغلاق الثقب .. بس خايفه لأن اعرف سلوى هسه شكد خايفة... سلوى ضعيفة وتخاف بسرعة .. واعرفها هسه قلقة أكثر مني ...

كعدت على كرسي ومن توتري اهز برجلي بشكل سريع ..
وعمتي كاعدة كدامي وماجد بصفها .. اباوعله نفس حركتي يهز برجلة.. وكل شوي وكال

:شو تأخروا مو كالو بس قسطرة

:ولك يمة هاي عملية قلب قلب .. قابل جرح ويخيطو.. غير لازم شغل دقيق.. شبيكم انت وهاي ولله وترتوني ..

باوعت الها وحجيت
: عمة شلون ما نتوتر .. اخاف على اختي
شكد عندي عشرة هي بس هل وحدة ..

:ميخالف امي دعولها .. هسه شوي وتطلع بسلامة ..

اتصل عدنان بيه .. طلعت موبايلي.. الجديد الي اشتراه الي هدية .. كان موديله .. دبدوب ومخلي بيه مداليه حروف اسامينه .. رحت مسافه عن عمتي
وجاوبته ..

:ها عدنان

:ها بسمتي طلعت سلوى

:لا بعدها ..وكلش قلقة

:ماكو شي أن شاء الله.. اطمئني كلبي

:أن شاء الله ماكو شي ..
احجي وياه وشفت الدكتور طلع حجيت بسرعه
:عدنان طلع الدكتور خل اروح باي ..

سديته وركضت للدكتور وكفت يما يحجي ويجاوب عمتي
:الحمدلله كملنه القسطره.. وضعها حاليا مستقر.. شوي وتطلع ترتاح ..

:الف الحمدلله والشكر يا اللهي ..

ارتاحيت بعد خروج الدكتور شوي وطلعوها .. للغرفه مالتها ..
جان بيها ديلاب .. وسرير وقنفه
مخليه اغراضها بالديلاب وهي خلوها على السرير ..
تقربت يمها .. ابوس بجبيتها مرتاحه ...
رفعت أيدها وصرت ابوس بيها ..

:حبيبتي .. سلوتي يروحي .. الف الحمدلله على سلامتج

اجت عمتي يمي خلت أيدها على ضهري وحجت بحنان
: ربي يكومها بالسلامة .. هانت وكلشي خلص..

هزيت راسي مبتسمة ومدمعة وعيني عليها نايمة .. رغم هي ما كانت مبنجة .. البنج كان موضعي






تقريبا كل ساعة تمر يجي الدكتور يتابع حالتها يقيس ضغط الدم .. وقيس الحرارة .. والأكسجين .. كال لازم ترتاح لمدة 6 ساعات ..
وحاولو تنتبهون عليها .. لاتحرك رجلها ابدا.. لأن القسطرة من الفخذ .. مر الوقت وسلوى فتحت عيونها .. عيون ماجد تباوع الها بلهفه .. وخوف ..

سلوى:بسمة ...
ركضت الها بلهفه : ها حبيبتي يوجعج شي .. شنو تحسين

:خلصت يعني .. هاي هي ..

:اي يروحي خلصتي.. وان شاء الله فتره كلش بسيطة وتكدرين تمارسين حياتج .. حالج حالنه ..

:الحمدلله والشكر لله... كلش خفت بسمة

:يولي الخوف بعد... لتخافين من شي حبيبتي ..
ارتاحي يعمري لا تحجين هواي .. ارتاحي ..

مر اليوم كله .. والطبيب ما تركها نهائيا .. وعمتي ما قبلت تروح للبيت ولا توصل .. باتت ويانه بس ماجد راح ..
وثاني يوم رجع .. وعايف شغله وعملة وكاعد ..
مر يومين بالمستشفى.. عدنان باليوم يتصل فوك الخمس مرات ... ماتركني ابد .. واني مدارية سلوى ..
والدكتور متابع حالتها ... لحد ما سمح النه بالخروج ..
بس طلب لازم تنام .. وترتاح أكثر وقت ممكن .. تبتعد عن الماي الحار كلش .. وكل أسبوعين مراجعة لمدة ست اشهر ..
طلعنة من المستفى واختي تمشي وياي على طولها ..
والدنيا ما واسعتني من السعادة ..

وهم لكينه فرح محظرة فراش لسلوى .. ترتاح بيه ..
دخلناها للغرفة على فراشها.. وضعها كلش مستقر بس مجرد تعب من القسطرة وتحتاج راحة ..

اسبوع مر واني تاركة كلشي وبس مكابلتها وكاعدة ..
لحد ما اتصل عدنان كال فد شوي العصر نجيكم اني وامي تريد تتحمد لسلوى بالسلامة .. العصر اجت ..
تاكبلن هي وعمتي صارن حبايب ويثردن سوالف ..

ام خالد: بسمة .. حبيبتي مو طولت سالفتكم انتي وعدنان شوكت ناوين بسلامة حقج ورجع وسلوى سوت العملية نريد نفرح بيكم عاد ...

حجت عمتي : ولله ودي اليوم قبل باجر نفرح بيهم .. وبعد ماعدها كل عذر يمنع ..

حمحمت وحجيت: صح خاله اني هسه ماعندي شي يمنع الزواج بسسس
سحبت نفس وكملت:اخواني

ام خالد:شبيهم اخوانج

: خاله يعني اني من اتزوج اخواني وياي يبقون ؟ لأن اني مستحيل اكدر ابتعد عنهم .. وبنفس الوقت اني هم ماريد اثقل عليكم .. محتارة..

:شوفي امي .. من يومنه نعرف اخوانج شنو بالسنبه الج .. ونعرف ماتكدرين بعيد عنهم وهم نفس الشي ... وبيتنه واسع وفوك غرفتين وحده راح تصير الج والثانيه لاخوانج .. وهاجر كلها ايام وتتزوج ..






:زين واذا خالد رجع .. شلون

:وقتها يحلها حلال يا كلبي ..

:يعني ما اعرف شلون أشكرج .. احد غيركم مستحيل يتقبل يجيب چنه وياها تلث نفرات

حجت عمتي :نفرين مو تلاثة

فهمت قصدها .. صار فتره تلمح على سلوى ..
بعد مااكدر اعترض لو تأجيل لأن صار هواي أجل الزواج .. وعدنان شكد ما هو متفهم وضعي.. بس هم اكل كلبي ..

وراها بأسبوع اخذنة سلوى للدكتور يجيك وضعها والف الحمدلله وضعها كلش زين ...
وبلشت مرحلتي بتجهيزات العرس .. رحنه اول شي اشترينه الذهب .. وحاولت كد ما اكدر ما اخذ ثكيل .. لأن ما اريد اثكل على عدنان .. واعرف وراه مصاريف زواج هواي ..
وحتى ملابس اشتريت نصهن من فلوسي والفلوس الي انطاهن الي ضميت قسم منهم .. وكلت احتاجة بغير شي .. جنت كاعدة اشوف شنو احتاج بعد وشنو ناقصني .. تذكرت علاج سلوى بالمطبخ ولازم تاخذة..
كمت اجيبه الها .. لكيت ماجد واكف على الطباخ منتضر القوي يحمة .. مديت ايدي فوك الثلاجة اسحب علاكة العلاج ..

ماجد:بسملة ؟

:ها

:الدكتور .. طمنكم على وضع سلوى بعد ؟

:اي الحمدلله القسطرة ناجحة وضعها زين .. بس لمدة ست اشهر لازم كل اسبوعين يجيك وضعها .. وبعدها تخلص

:يعني ... هي بعد تكدر تتزوج وتخلف ما عليها خطر ؟

:اي هي تكدر .. بس الدكتور كال اذا صار والمستقبل مثلا تزوجت .. وحبت تخلف لازم تحت إشراف طبي تبقى طول الفتره .. وبجميع الأحوال هذا الموضوع بالوقت الحالي مو مناسب ابد..

هز رأسه ساكت .. تركته ورجعت الغرفه.. اعرف بماجد من يوم ما سلوى تحجبت هو بدأ ينجذب الها ... ومحاجي عمتي عليها ..
مرت الايام طبيعية .. بين تجهيزاتي للزواج وبين تجهيزات عدنان وبين اهتمامي بأخواني .. شكد عمتي توسلت في سبيل من اتزوج اترك اخواني يمها بس رفضت لأن مستحيل اكدر اعيش بعيدة عنهم ولاهم يكدرون ..
سلوى رجعت تتحرك طبيعي وحتى أحسها منشنشه وراجع الدم بوجها ...
صار موعد زواج هاجر .. نهاية شهر 11 يوم 28 .. عزمتنه أم خالد على حنتها ..
عجبني هل مره اكشخ على اخر حبايه واكشخ خواني وياي ... اريد يبين علينه احنه ولد خير .. مو مثل قبل عايشين بنص خيرنه.. بس بسبب الظلم والعوز ما مبين علينه ابد ...
اخذت عمتي وفرح ورحت للسوك ..
دخلت لمحل راقي مال ملابس .. وبعد البحث بالملابس.. لكيت فستان .. متت عليه .. جان سادة مابي هوسه ولا شغل هواي بس احمر .. وقماشته شوي ثخينة ..
اشتريته الي .. واشتريت لسلوى رادت نفنوف محجباب وكالت على ذوقج أخذته الها لون تركوازي فاتح بي تشجيرة كلش ناعمة .. وياه شال سادة يناسبه .. اخذت لاخواني ملابس مرتبه .. واشتريت لسمر وفرح وياي رغم رفض عمتي .. وكالت لا تصيرين تبذرين.. بس اني كل الي اريدة هو اعوض اخواني واعوض نفسي عن الحرمان الي عشناه ..
اخذت احذيه .. النه وعمتي هم اشترت كم شغلة ورجعنه .. ثاني يوم جهزنه نفسنه ... خليت فرح كوت الي شعري بالأوتي .. وبعدين مشطته بمشط حراري .. صار حرير من النعومة وصار اطول من قبل .. خليت مكياج خفيف بس طوخت الكحل و حمرة حمرة ..
وورحنه لبيت ابو خالد ...






اول ما دخلت لشارعنه نبض كلبي من شفت باب بيتنه.. رغم كل الوجع الي عشتة بهذا البيت .. بس ما اعرف ليش حنيت اله .. الشي الوحيد الي احبه بهذا البيت هو احس بي ريحة ابوي ...

دخلنه للبيت .. واتلكنه ام خالد تهلي وترحب بينه .. كان الدنيا ضهر والعروسه بعدها ما راجعه من الصالون ..
لا ارديا بقيت أتلفت عيوني تدورة وحتى بالي مو وية سوالفهم ... تقريبا نص ساعة واتصل بيه عدنان ..
لكيتها حجه حتى اكوم منهن .. ابتعدت وجاوبته

:هلو حبيبي

:هلا بسمتي وصلتي لو بعدج

:وصلنه صار أكثر من نص ساعة .. واني باقيه عيوني تدورك عبالي اشوفك بس انت الضاهر طالع ..

:اريد منج شغلة

:شنو

:اريدج تصعدين لغرفتنه .. تشوفيها .. وتشوفين شنو ناقصها يالون بردة يناسبها وكولي الي ..

:لا گلبي زحمة استحي ...

:منين تستحين .. هو الدرج مو كدام العين .. اصعدي شوفيها وارجعي بسرعة ..

:ماشي راح اصعد

:يله اني باقي وياج على على الخط

كنت كلش متشوقة اشوف الغرفة .. واتوقته طالع .. ما اعرف بي ناصبلي كمين .. وصلت فوك سألته منو من الغرف .. كال الي على ايدج اليمنا ..
فتحت الباب ودخلت للغرفه اباوع الها نجارتها تخبل كلش حلوة وفخمة وبقيت اباوع والجهاز على اذني ..
ما انتبهت اله صاير وره الباب .. وكمزت حيل .. ويه ما حسيت ايدين تنلف على خصري ويحضني من وره

: عجبتج

:يماااا ... جيتها فازة وبسرعه درت وجهي عليه
ضربته على صدرة : عدنان وكفت كلبي .. هاي انت هنا

:لا مو هنا

:لعد وينك

:اني بكلبج بسمتي ..
انتهبت لقربنه مايفصل بينه غير الملابس .. دكات كلبي صارت ترعد أحسها .. حاولت ابتعد عنه بس هو لاف اديه عليه ....

:بس وخر شوي ..

:واذا ما وخرت

:عدنان فدوة .. وخر عيب خل انزل لو ادري بيك هنا ما اصعد ..

ابتسم وبعدني عنه شوي بس باقي لازم ايدي .. وعيونه فصلتني تفصال .. رفع أيده وصار يفرني .. وهو يباوع على طولي ... ورجع سحبني اله خله ايد وره ضهري وايد لازم بيها خصلة من شعري ..
وعيونه تشرح حبه .. أما اني .. احساسي وقتها يمكن اجمل احساس أعيشه بكل حياتي .. واني مخليه عيوني بعيونه .. كلبي يدك بقوة رهيبه.. رجفه سرت بكل أطرافي.. وإحساس ما اريد هذه اللحظة تخلص .. مخليه اديه على صدرة .. واشم ريحة عطر خفيف باقية بملابسه ..
قويت نفسي وحاولت اتماسك ..






:كملت تمعن ؟

هز رأسه بنفسي :لا .. ماكملت ..

يربي احس متت من الحر الحراره صارت تطلع من آذاني .. من الخجل بلعوني نشف .. ردت بس اتدارك الموقف .. كوة ابتعدت عنه وكفت كدام المراية اكله

:شلون طاالعة

اجت كعد على حافه الميز المراية كدامي وبس صافن بيه
: شبيك بس ساكت

:جاي ادور على كلمة مناسبه توصفج مجاي الكه ..
ولج بسمتي .. عود صدك صرتي مرتي وكلها ايام وحضني يصير فراشج ...
حمحمت بخجل .. واجيت اطلع
سحبني من ايدي وهو كاعد قربني منه صارت وكفتي بين رجليه .. بلا مقدمات سحبني لحضنه.. وبلا أي مقاومة لكيت نفسي الف ادي على ركبته ابادلة الحظن ...

:عدنان ..

:بسمة عمرة

:احبك .. اموووت عليك .. اعشقك.. روحي بيك .. كلبي يحبك هووواي كلش هواي

:اشتعلت صفحه جبرية ... ولجج شنو اكلج .. شنوو مخبل بيج .. هم قليلة .. وين انطي وجهي من حبج هذا الي يمشي بدمي ..

وخرت من حضنه باوعت بوجها :انطي وجهك الي ..
حبيبي ..
صفن بيه بنضرات غريبه .. دقائق مرت وهو صافن بيه .. اخر شي كام من مكانه كح وفرك شعره .. وكال
:يله حبيتي نزلي جوة .. واني هم راح ابدل واطلع قبل ما تصير هوسه نسوان ..

:اي اي .. طلعت بسرعه من الغرفه .. لزمت كلبي اجر نفس قوي .. والضحكه شاكة وجهي .. باوعت من محجر الدرج .. همزين ما لكيت أحد نزلت بسرعه .. ورحت كعدت بسد سلوى ... وعمتي فصلتني بعيونها تفصل ...
غلست عليها .. جابو العروس من الصالون .. جانت طالعة تجنن كلش حلوة وهي أساسا حلوة وناعمة وبدلتها ماروني .. وام خالد تمشي وتعرف النسوان بيه .. هاي خطيبه عدنان .. جنت احس بفخر وفرح مو طبيعي ..
من كلمة خطيبه عدنان .. ما مصدكة هيج السنوات مرت بينه وكبرنة وباقي ايام ونتزوج ...

هواي محطات مرت بحياتي وبكل محطه كان عدنان وياي ...
بكل معاناتي هو شاركني .. وساعدني .. ونصحني ..
رغم بعض.نصائحة كانت كارثية .. بس على الاقل جانت تبرد كلبي ... وحدة من هذه النصائح من خلاني احرك غرفة جبيرية واخليها تصرخ .. وهو شهد وياي اني جنت يمهم العب وما الي علاقة الصار ..

الحنه صارت بوسط أجواء كلش حلوة .. وثاني يوم يأخذونها البصره الزفه تطلع من بيت عمها .. لأن مسافه طويلة كلش بين بغداد والبصرة ..

رجعنه من الحنه وبس نسولف ونكص بفلانه وعلانه...
مرت الايام ودخلنه شهر ال12 وقررنه اني وعدنان الزواج يكون بيوم 20 / 12 .. رتبت كل اموري على هذا الأساس .. وما باقي لزواجي غير 12 يوم ..






بيوم 15/12 ... اتصلت بعدنان حتى اتفق وياه على صالون وهاي الأمور .. بس يطلع جهازة مغلق .. أكثر من مره كررت الاتصال يطلع مغلق .. كلت هسه بالواجب واكيد خلص شحن .. وره ساعتين كررت الاتصال وهم مغلق .. اختنكت كلش طلعت بالطارمة افتر .. والجهاز بأيدي ... دخل كرار من بره شافني واضح عليه التوتر ..

:بسملة صاير شي

:لا .. بس من الضهر اتصل بعدنان وجهازة مغلق بقيت بقلق ..

:تلكين جهازة طافي شحن

:اي توقعت .. بس صار هواي اتصل ومغلق ماعرف السبب

هز رأسه ودخل واني على فد فرة سلوى عمتي حاولوا يطمنوني بس ماكو احس نار شبت بكلبي ..
قررت اتصل بأمة.. وأشوف
طلعت رقمها اتصلت بيها ... دك هووواي كلش وهي ما ترد .. وهل شي خلاني صدك فرفحت روحي .. لاعندي رقم ابو واتصل بيه .. ولا اكدر اخابر هاجر واقلقلها ويطلع ماكو شي ... كعدت على بلوكه بالحديقة وما بطلت اتصل... عدنان مغلق وأمه ما ترد ... ما لكيت كدمي غير محمد ..
بسرعه اتصلت بي ثواني وجاوبني خايف وملهوف

:بسمله انتي زينه .. لاتخافين أن شاء الله ماكو شي ..

اريد.اوكف على رجليه بعد ماكدرت طحت من طولي واني اسأله..

:محمد .. محمد شصااااير

مثل الي ادرك شي :ها .. انتي وين هسه

:اني بالبيت ... محمد كوووولي شصااااير عدنان اتصل بي مغلق أمه ما تجاوب بس ردت منك تدير عليهم تشوف صاير شي ...

بسرعه حجه وهو متوتر :بسما شوفي ماكو شي أن شاء الله.. بس .. احم .. سيارة مفخخه مقتحمة النقطه الي بيها عدنان.. وكل الي بيها بين قتيل وجريح ..

صفنت ثواني اريد استوعب .. لااااا لااااااا عدنان .. عددددنان ما يتترررركني ما يترككككني لا ..

على صوت عياطي طلعو الكل من البيت وجت عمتي تركضي عليه : يمااا ستار الله ششصاااااير بسمه

:لااااا ولله ما يتركني عمااااا عدنان ما يموت ما يتتتركني ما يتركنييي عمااااا ولله ما يتركني مستحيل يتبعد عني ...

ماجد : ولجج فهمينيه شصااااير .. جر الجهاز من ايدي بعده الخط مفتوووح .. وصار يحجي ويه محمد .. وخله أيده على رأسه وصار لا اله الا الله...

سد.الجهاز وتقدم عليه. اني راسي بحضن عمتي ...
:ما يتركني ولله ما يتركني ما يموت عدنان ..

تقدم ماجد يحاجيني
: بسمله اطمني ولله العضيم ما ميت بس مصوب ..

:موووو.. شفتو شفتوو كلت عدنان ما يتركني ... كوووم كووووم اخذني اله اخذني اله كووووم
كمت كدامه وبملابس البيت ونعالي .. طلعت للباب .. وماجد يرجع بيه ...






:بسمله ترحين هيج يمعودة بس لبسي شي فوك ثوبج ..

ركضت عليه فرح لبتسني صايه منها وعمتي طلعت تركض لابسه عبايتها ولازمه جواريبها بايدها ...
طلعنه من البيت نركض ركض ... وقتها ما اعرف شنو هذه القوة الي اجتني .. وبقيت ثابته .. بس كان عندي ثقه برب العاملين .. واعرف ما راح يكسرني بعدنان..

بسرعه ماجد وكف تكسي وصعدنه رحنه للمستشفى.. طول الطريق عيني على الشارع ودمعة ما نزلت مني ... بس روحي جانت تحترك من الداخل ..
وصلنه المستشفى ودخلنه نركض وماجد يتصل بمحمد يكله وينكم ومحمد يدلي بي .. لحد ما وصلنه.. لكينه ام خالد كاعدة بالكاع وحتى خدودها مخرطه ... تقدمت الها وهي بسرعه حضنتي وصارت تصررررخ

:ولجج عدنان بحلك المووووت ... عزيز كلبج بخطرررر بسمه... وليددددي لو يطلع لو ما يطلع ...

رديت عليها بكل ثقه .. وثبات .. خالة.. عدنان راح يعيش .. راح يطلع ولله راح يطلع .. اني متأكدة

المستشفى مخبوص خبص وأهله والكل بقلق .. واني كاعده صافنه بالفراغ ... ولساني يهلج بالدعاء ... وبس صافنة الكل استغرب وضعي وسكوتي .. وعمتي تكول الهم مصدومة ...
تجاهلت الكل وبقيت على كعدتي .. لحد ما طلع الدكتور كلنه ركضنه كدامة .. والكل يسأل بيه .. وهو يجاوبهم

:الحمدلله كدرنه نطلع الشضاية من جسمه .. وإصاباته مو حيل قوية بس قوة الانفجار والشمرة الي انشمرها سوت بجمسه رضوض قوية ... ودخلت بجسمه شضايا ..
بس يرتاح وتكدرون تشوفونة ...

مجرد اطمنت من كلام الدكتور .. وكأنما وصلت لمرحله الانهيار ... بسرعه الدنيا افترت بيه وطحت بعد ما دريت بشي ...
فتحت عيوني راسي ثكيل وحلكي ناشف وكانولا بيدي ولكيت نفسي بالطوارئ وعمتي يمي ..
بسرعه تقدمت يمي من شافتني كعدت

:عدناننن عماااا عدنان وينه .. شلونه

:زين ولله زين وروج ابوج ... بس مجرد تعبان ورضوض بجسمه ...

:اريدة ... أريده عمه اريد اشوفة

:درتاحي يا امي سكرج صاعد حيل

:لا لا اريد اشوفه فدوة

ايست مني ساعدتني حتى اكوم ... لزمت ايدي واخذتني لغرفته الي هو بيها ...
اول ما فتحت الباب .. صار كدامي .. بس فاتح عيونه نايم ملفلف وصدره ملفوف ..
بسرعه شهكت بدموعي .. واني اباوعلة ... تجاهلت الكل وركضت اله .. ابتعدت عن جسمه ولزمت وجها بثنين أدية وصرت ابوس بوجها بخوووف ودموعي تجري عليه ..
خليت جبيني على جبينه .. ودموعي تطيح على وجها

:حبيبي عمري ... جنت كلي ثقه بربي وبيك واعرفك ما راح تتركني ... حبيبي انت من عمري على عمرك يروحي






حجه بتعب كلش وصوته كوة يطلع :بسمتي .. اهدي ياروحي هاي اني كدامج بسبع ارواح.. كلشي مابيه .. كلها ايام اكوم على حيلي واعرس عليج

ضحكت من بين دموعي :بس كوملي على طولك واني الي اعرس عليك ميخالف

ضحك موجوع ويحجي بهدوء : تره مجرد رضوض بعدني ما عطلان .. وتعرسين عليه

ضحكت حيل وهو ضحك بتعب .. وأجاني صوت أم خالد
شجاي تتبسبون ما تسمعونه ..
رفعت راسي فشلانه لأن صدك من شفته نسيت روحي ونسيت الكل ...

مر تقريبا ساعة وعمتي ترخصت ... ولله ما كان هاين عليه اتركه .. بس عمتي رفضت ابقى وهو نفس الشي ما قبل .. ابو وأمه بقو يما .. واني وعمتي وماجد ومحمد رجعنه
طول الليل بقيت اصلي واشكر رب العالمين الي ما حرمني منه .. وثاني يوم سويت غدة لوجه الله عن سلامتة
. بس خطيه وياه عناصر مستشهدين
جان كلش مقهور عليهم ...
بقيت اربع ايام اروح وارجع عليه .. لحد ما طلعو للبيت واتأجل العرس .. لحد ما يكوم بالسلامة ..

طول هذه الفتره اني ايدي على كلبي لا يصير شي..
لحد ما بيوم اتصل بيه يكلي ..
صار رمي قوي على بيت صالح .. جماعه رامين البيت وطالعين كبل .. فضولي ما خلاني اتحمل .. شلت الجهاز وخابرت محمد أسألة شنو صاير ..

: شكلج بسمله صالح بهذلنه الله لا يوفقة كون .. ولج مطلوب بكد شعره رأسه والديانة صارت تطلع النه من جوة الكاع ..

: عزززة وديانا مال شنو

:تجار يأخذ منهم بضاعه وياكل فلوسها .. وما يسددهم .. وكل تاجر يطلبه أقل واحد يطلبه10ملايين ..

:وليش ما يسددهم شنو عايز هو مثلا

:كل الي جوة ايدة ما يطلعن 30مليون وهو مطلوب فوك ال100مليون

:وشراح تسوون

:ولله أن شاء الله نارهم تاكل حطبهم اني مليت وهذا ابنه باقي مسربت وبس كبسله وبنات .. وكل مسؤوليه ماعندة .. اني أساسا اتمنى البيت ينباع اخذ امي واخواني ونشوف بيت على كد فلوسنه وابتعد عن صالح ومشاكلة

:لاحول ولاقوة الا بالله..

سديت الجهاز منه وسولفت لعمتي .. أحسها مثل الي نقهرت ... بس ولدها يكولون الها عساه بزايد أن شاء الله وهي ما تقبل يدعون عليه ..

بعد مكالمتي .. ويه محمد بيومين ... صدمني عدنان من كال مهدي مخطوف .. والخاطفي هم نفسهم الي يطلبون صالح وما يقبل يسددهم .. ومهددي أقل حركه منه للشرطة طلقة براسه ويودو اله بكونيه ... وجبريه صايرة مسودنه على ابنها تملخ بروحها وتذب وكل شوي تهج بالشارع تريد تدوره .. وعارضين البيت للبيع ..






رغم كرهي الهم بس كلبي انعصر كلش .. قتل انسان مو سهل ابد مهما كان هل انسان ضالم وحقير ...

هنا خطر على بالي شي ومن سألت عمتي وعدنان ايدوني... بدلت وأخذت عمتي وياي ورحنه.. وكفت التكسي كدام بابهم ... سحبت نفس وقويت نفسي ودكيت الباب .. دقايق وفتحت الباب الي انتضار بت صادق
اتفاجئت من شافتنه بس ما حجت كالت تفضلو ..
دخلت امشي بثبات .. بس دخلت صارت فاطمه كدامي .. متغيرة ومكسورة .. ما حجت شي بس كالت

:شجابكم شنو متيهين الطريق

ردت عمتي عليها :ما جاين عليج .. صالح وين ..

:ذاك كاعد بغرفته وبس ينوح على ابنه

حجيت بقوى واني ادخل لاستقبال:صيحي اريدة ..

رحت كعدت بالاستقبال اني وعمتي .. وهو شوي ودخل.. الشعر واكف .. ومبهذل ومبين عليه الكسره على مهدي .. ومن كد ما تعبان كعد بلا حجي ولا صياح بس تفاجئ بجيتنه .. وعمتي الفطيرة ما تحملت من شافت منضرة كامت حضنته وصارو يبجون ثنينهم ..

ما انكر الموقف اثر بيه .. وعيوني غوركت بس سيطرت على نفسي ما يستاهل أتأثر بيه .. راح كعد وعمتي كعدت بصفه وهو يشكيلها كسرته على ابنه ..

:شلووونك عمووو

باوع عليه وعيونه ما عرفت أفسر نضرتها وحجه بتعب : شلوووني ابني وحيدي مخطوف شلون لوني .. جايه تتشفين مووو

:لا غلطان اني جاي اساعدك ترجع ابنك

بسرعه فز وحجه بأمل: يااااريت ... شلون تنطيني المبلغ انطي الهم وارجع مهدي .. شما كان هذا ابن عمج واخيج..

ابتسمت مستهزاء وكملت:وليش اني انطي.المبلغ ابني لو ابنك هو .. المهم .. انت عارض البيت للبيع ..

:ايي بس يجيب سعر ابيعه بسرعه

:شكد رايدين بي

:شنو تردين تشترينه ..

:انت تعرف أوضاع بغداد .. وتعرف العقارات شلون هابطه بسبب الاوضاع الامنيه .. والبيت قديم ..
شكد رايد بي ..

:اجاني شراي انطاني بيه 90 وراح ابيعة لأن محد اجاني بهيج سعر ..

: ب100 أخذه ..

فوراً فز مثل الغركان جلب بكشاية : موووافق

:تمام .. بس قبل لا تستلم ربع تتنازل عن حصتك بيه ..
اتفقت ويه صالح .. وبقى محمد .. الي من عرف اقتراحي فرح وكال زين تسوين ..
وهم عن طريق المحامي .. بلشنه بالاجراءات بسرعه لان مستعجل ويريد ابنه ..
طلع قسام شرعي .. شاف البيت وقيم الحصص.. وقمسها على تلاث اولاد وبنت .. طلع حصه كل ولد
28 مليون و500 و71 الف دينار
وحصه عمتي 14مليون و500و71 الف ..
وبعد ما أتنازل عن حصته بوجود المحامي وقع تنازل .. وصادق هم وقع تنازل بعد ما سمع بكل الي صار ..
وعمتي وقعت تنازل ... وصار وقت توزيع الحصص هم عن طريق المحامي لأن اني ما افهم بكل هاي الأمور ..






وبعدين طلعت سوالف صفح ماي وكهرباء ورصيف وهاي الأمور هم طار مليونين من الفلوس ..
كعدنه كلنه التمينه بالبيت حتى كلمن يأخذ حقة ..
طلعت حصة صالح .. خليتها كدامه .. وحصه محمد خليتها كدامه .. وحصه عمتي كدامها .. وحصة ابوي بقت عندي
هنا صالح نصدم جان متوقع ال100كلها راح تصير اله .. كام منتفظ

: شنوو انتو تضحكون عليه .. مو منطيني بس 28 ووووين اوديهن ..

: عمو كلمن يأخذ حصته حسب الشرع وانت حصتك من البيت 28 .. تريد.ال100كلها الك وين اكو هيج هيج

:لجج شنو انتي تضحكين عليه ..

:بشنو ضاحكه .. هذا حق

محمد:عمو انت جوة ايدك 30 وهاي 28 ومن حصتنه هم نعطيك 8 هاي صارن 66

صرخ : ولكككم مياااا مطلوب مياااا

حجت عمتي : خويه حصتي ما اريدها اني هاي اخذها
حجت هيج عيون ولدها نطت بس بقو ساكتين ..
وهو كعد أيده على رأسه .. مستسلم ..
للحظة فكرت أسويها لله مو للبشر .. لو ابوي عايش جان سوة نفس الشي .. جليت صوتي وكلت ..

:الثمانيه الفوك من حصتنه .. هم خذها .. وهاي لرب العالمين أسويها ..

صاح بيه:وانتي ما كفاج الي اخذتي .. شتسوين بعد بحصتج .. ولج ابني بحلك المووووت

: عمو هذا مو حصتي هذا حصة اخواني .. قبل من جنت جوة رحمتكم اختي هم جانت بحلك الموت .. تتذكرون شلون انت لو مرتك تذلوني حتى تنطوني فلوس اجيب الها علاج ..

:انتي مو راح تتزوجين وتكعدين أبيت رجلج .. شكو بعد