سندس ـ إن شاء الله ما يوافق وهذا الزواج ما يتم وأولها احسن من تاليها الشفناه والسمعناه منج كافي وزايده ما توقعج هلكثر مغروره وتستنكفين من عيشتنا وزرعنا وحلالنا مع الأسف عليج أنتِ بنت عمتنا والله يا حيف روحي أخذيلج واحد من ثوبج بلكي يترس عينج .

أزهار ـ طلعت وحيل أنقهرت من كلامها حسيت وإدركت بروحي هوايه جفصت بالكلام وقسيت أني شبيه أنهديت عليهم اي شمعرفني كله من ورا أمي من يومها تحلم وتتمنى اخذ شاهين والله يا امي ما اعرف شگول عليج

" مر وقت ومحد بين وسهاد فرشت السفره لونها ماروني وخلن الخضروات وللبن وسلطه وگلشي من احسنه وجابن الأكل ما يباعن بوجهي أبداً حقهن قسيت عـــلىٰ أخوهن وهو حيدتن كبر لفني شبيه

" أجت امي مغسله فرشت سجادتها وصلت وأندارت عليه وكالت

وصال ـ أرتاحي

أزهار ـ شصار

ـ صار اللي تردينه بس السالفه لازم توصل إبوج إحتمال يوافق كلشي يصير بلغوا عصام يگوله

ـ ما يوافق متأكده

ـ أنجبي وصوتج ما اريد أسمعه خزيتيني بين خوالج وجهي أسود منهم بس اروح واخلي أبوج يتفاهم وياج أدبسرز

ـ ما جاوبتها اجت حبوبه وصاحت للبنات

الجده وضحى ـ تعالن يبعد جبدي تعالن تغدن ما عليجن من حجيها الماصخ بنت عمتجن ارعنه ما اداري مصلحتها وكلمن يمدد عـــلىٰ كد غطاه هي متعافيه ما الجن شغل منها عبالي أدامي طلعت مامش منها فايده

أزهار ـ اجن كلهن وكعدن وأمي تسولف وياهن ويضحكن واني ولا كأنما الي وجود كمت وجان حبوبه تضربني عـــلىٰ رجلي بالعوجيه منعتني اطلع

الجده وضحى ـ وين موليه جنج ضابط شرطه وريحتج تعجل ما ترحمين الاوادم شنهي من گلب گلبج يا ملعونه

أزهار ـ سويني شيطانه

ـ رجعي كملي الزاد ما تعبن عليه وطبخنه علمود ينذب أحترمي الزاد ورجعي المكانج النعمه ما ينزعل عليها وسوالفج الماصخه أمج تحاسبج عليهن يله حركييي

ـ رجعت بس بالگوه أكلت كم لكمه من كثر ما انقهرت خلصنه وشالن المواعين وحبوبه حكمت عليه أغسل وياهن واني رفضت والله ما اكوم جايه خطار اشوفج لو أغسلج مواعين مو انتوا دزيتوا عليه والله خوش

"امي هم ضربتني يمه شبيج إيدج اخذت عـــلىٰ الضرب ترى رأسي ما جايزه منه سويتي مخي عصير كوكتيل

وصال ـ شو أستجلبتي فد مره

أزهار ـ والله سألي روحج والله لو أدري هيج تاليها فلا أقنع بابا وتوبة اذا اجي وياج بعد

ـ ميخالف أزهـــــــــــار أني الج بس نرجع بس خل يعدي هاليوم عـــلىٰ خير والله اخليهن بحلك اخوانج كل حجايه حجيتها اذا ما خليت عصام ومروان يكسرونج عـــلىٰ قلة التربيه هذه اني مو أمج .

ـ سگتت وخفت صدك تسويها والله افلت عـــلىٰ أبويه انقهرت هواي وجريت جنطتي ودزيت رساله لـ بابا كتبت اله بابا حبيبي أحبك وأشتاقيت الك تغديت لو بعدك بقيت انتظر واتصل امي خزرتني رفعت شاشه بابا حبيبي غمتني أخذت التلفون وطلعت باباتي حبيبي يروحي

كمال ـ هاا بابا هاا بنية أبوها شلونكم

أزهار ـ زينين الحمدلله

ـ هاا شو صوتج ما يعجبني

ـ أختنكت وجاوبته لا بابا بس أشتاقيت الك

ـ يا روح أبوج واني هم أشتاقيت الكم هسه أخابر عصام باجر الصبح تجون لما امج جان العصر اخلي يرجعكم بس امج أطنكر علينا شيخلصنا من الحكومه

ـ تمام مثل ما تريد

ـ يله بنيتي اخذي راحتج

ـ الله وياك نهيت الأتصال جنت بالطرمه أحجي واجه من بعيد يتمشى بهدوء عبر من يمي بدون ما يباو؏ تجاهلته ولكيت أسيا كومه دازه رسائل خير أن شاء الله

أسيا ـ أزهار وينكم مختفين خاله تلفونها مغلق وعصام حاظرني ضل بالي خوما صاير شيء

أزهار ـ جاوبتها يم خوالي سالفه طويله من أرجع أسولفلج

ـ تمام أنتظرج اني هم عندي كومة سوالف

ـ تمام كلبي دزيتها ورجعت كعدت يم أمي كتلها بابا كال الصبح تعالوا ما إهتمت لكلامي ورجعت تحجي ويه حبوبه لابستني ولا عبالك بنتها عشتوا
________

أسيل

ـ أختي وجهالها يمنا يعني البيت مگلوب والألعاب مطشره والكراج صاير مزبله والاندومي كل شوي على الطباخ وتعالي أسيل نظفي وراهم ادري مخلفتهم وناسيتهم من تجين تذبينهم وتكعدين ولا عبالك امهم تشيل ايدها منهم وتكعد برأسي لما يرحون صوتي يطبك .

خلصت غسل المواعين ونزعت الجفوف وسمعت صوت ركضت لكيته كاسر مزهره ولك حمزززززززه من غضب عـــلىٰ يومك وعلى صوتي اجت أمي وأختي من الغرفه عدهن إجتماع سري على العيال والجناين

جنان ـ ولطما شكووو صوتج يلعع يااا يا جده ليش سكرتها

هديل ـ حمزه وتالي وياك ما خلصانه من بيت جدك نوب بيت اهلي شو ولي اطلع برا انجلبتوا ما تخلون الواحد يكعد يرتاح يفتهم من طلعته شيء

أسيل ـ ما سوتله شيء طردته برا شو بس من تجين يمنا تصيرين حنينه على جهالج من اخابرج كلشي ما افتهم منج بس عياط والصونده تركع

هديل ـ أسيل جوزي مني رأسي يوجعني من وراهم جايه أرتاح لو اركض وراهم يمه رايحه اتمدد حمزه حرك دمي

ـ مشت وأمي عاطت بيه

جنان ـ يله لمي الكسره وغسلي البيت ودربالج لا كزيره تفوت برجل واحد منهم شيخلصنه من اهلهم

أسيل ـ هو هذا شغل أسيل بس لو اعرف جنتج ليش من تسمع بـ هديل تجي تمشي لأهلها خل تتنظر تروح وتروح وياها الا كلشي يوكع برأسي والله تعبت

جنان ـ أشتغلي ولا تضلين تلغين ومرت اخوج هم بشر تروح تشوف أهلها اخواتها وتكول بناتها بالبيت وتمشي ما الج شغل بيها ولا تسويلنا مشاكل لا انفشلج عطوبج

ـ شمسويه قابل راحت ولميت الكزاز وغسلت ونشفت وكملت واجه حمزه كمز كمزه امشي ولي برا لما ينشف الحوش لا تضل بس تلوف متكولي شلون الكاع شايلتك من وكاحتك

حمزه ـ مثل ما شايتلج أنتِ هم وكحه

أسيل ـ ركضت وراه وفلت لشارع نزلت ثوبي ودخلت عليهن لكيت امي بيدها فلوس وهديل هم انطتها مصرف وضمت ٢٥ بصدرها وين وين جيبيها أني هم اريد خلصت مصرف

جنان ـ دولي شسوين بالمصرف أعرفج انطيهن الج بس تخلصيهن على الأندومي والحلويات عبالج ما اعرف سوالفج وشبسرعه خلصتي هذاك الأسبوع أبوج انطاج ٢٥

ـ هسه شعليج بيه وين أودين مهم أنطيني حقوقي الواجبه عليكم وفضيها نفضت ايدها وهديل تحسب وتضم شكوو عليج كل رأس شهر الوالده تخزن الج الاكو والماكو ما راحت بس عليه المسكينه اجدي منها جدواه

جنان ـ مخليه عينج عليها منين الها رجلها على كده بدال ما أنتِ تنطينها واكفه مثل الشرطي تحاسبينها

ـ شنطي هو اني منو منطيني شو يله طلعي الـ ٢٥

ـ ما انطيج عود على رأس الشهر هاي أريدها لـ رباب بنت فاضل جابت وعيب ما رحنا الهم ابوج كال جايه يم اهلها بلكي أخوج حسن يجي ويودينه عليهم

هديل ـ منو يروح وياج

جنان ـ أنتِ غير منو قابل مرت اخوج مشت لأهلها اخذج أنتِ

هديل ـ أني ما اروح روحي أنتِ وابويه

جنان ـ وليش ما تروحين

هديل ـ كتلج ما اروح وخلص

أسيل ـ يمه لاتلحين ما تريد تروح فهمي عاد

جنان ـ السالفه صارلها سنين على شُــــــنو ما تروحين تزوجتوا وخلفتوا بعد شکوو

أسيل ـ أخاف تروح وتلكاه موجود ترى صعبه عليها

هديل ـ سدن الموضوع كايمه اشوف جهالي

جنان ـ اختج فلا تجني عقل وبعدين هو بيت اهله شيجيبه بيت عمه وسمعت من إبوج هو ومرته أسيا مو على صلح ويا ظنتي يطلكها

هديل ـ شعلينا بيهم رجال ومرته

جنان ـ لعد أمشي وياي دام هذا حجيج شعلينا بيهم

أسيل ـ خلص اني اروح وياج حبابه اخذيني وياج

جنان ـ هو اخذج بس جهال وين نعوفهم ضلي يمهم ساعتين ونرجع على كد الواجب عيب تأخرنا صارلها شكثر من ولدت

أسيل ـ ما مفتحه حضانه تبقين الجهال يمي أخذيهم وياج والله ما اضل يمهن افطسهم كلهم لو اشربهم الرمين وانومهم واخلص من هوستهم

جنان ـ اخبل من أختج ولج هديل جهالج شلون امي وكاح وين نأخذهم يفضحونا والله بنتج روان جنها مكوك حمزه مصراع

هديل ـ خلف الله عليج

أسيل ـ ليش تزعلين ترى صدك وكحين مال نأخذهم عيب ناس أتكيت

هديل ـ أجفص على الأتكيت مالهم دولي أنتِ وسوالفج نأخذهم ويانا وين اوديهم جهالي قابل اذبهم هاي هيه اهل البيت يتحمل الخطار

جنان ـ اي هاي هيه يمه عود وصيهم لايسون وكاحه

أسيل ـ لا ربحنه ضحكت وخزرتني خلص يله صاعده اجهز نفسي دام العشه حسن يجيبه

هديل ـ خوما تحفين يمه أسيل تحف وجهه

جنان ـ بس وجهه حواجبها لا ما حافتهن

هديل ـ شو بدوري لا وجه ولا حواجب الا تزوجت يله حفيتهن هسه كله على حل شعرها

جنان ـ شسويلها خلت مشقر وجه تحسس وكامت تحف

هديل ـ والله اذا حفيتي حواجبج اخلي حسن يشلعهن بالبلايس

أسيل ـ العقد النفسيه عشتيها لا اطلعينها برأسي خليني عايشه حياتي عفتها وصعدت غرفتي فوك جانت هديل وياي من تزوجت بقيت لوحدي ومن تجي زيارات تصعد هي وجهالها ينامون يمي مرات بالاستقبال حسب مزاجها واخويه ومرته جوه

احنه عائلة تتكون من أب إسمه علوان عسكري متقاعد وأمي جنان ربة بيت واخوان اثنين الجبير حارث متزوج وعازل محامي وزوجته أسراء مدرسه بس وكحه نار اكرهه اموت منها عدها ولد وبنات اثنين ريم رهف ورامي

واخويه حسن الحنين معلم متزوج زوجته اسمها نسرين هم معلمه حبوا بعض وتزوجوا وعندهم ولدين مصطفى ومرتضى
وأختي هديل متزوجه وزوجها حالتهم الماديه على كدهم عدها حمزه وروان

هديل جانت خطيبة عصام سابقاً طبعاً بيت عمو كمال يصيرون ولد عم هو وابويه يعني عصام ابن عم ابويه
أنخطبوا وجانت علاقتهم حلوه وعلى ابواب الزواج بس انفصلوا طلب من هديل بسبب عصبيته وللسانه وتحكمه الزايد بيها كالت واحد نرجسي ومتملك ما اكدر أكمل وياه يموتني ناقصة عمر
" هو ما قبل عـــلىٰ الأنفصال وتعارك عرگه شكبرها بس بعدين فضوها بينهم والأهل أتفقوا واتخذوا القرار الأنفصال وإنفصلوا وكلمن بطريقه
" وبابا من نوع ما يحب يجبر عـــلىٰ الزواج وهديل من انفصلت منه هو ما طول فتره وخطب وكالوا يحبها وعلاقه حب كلنا ضلينا مصدومين شلون علاقه حب وهو جان خاطب هديل كالت همزين ما ورطت عمري وياه الله يحبني وخلصني منه وماكو نصيب والله سهل اله بس سالفة علاقة الحب كذبه إخترعها عصام علمود يقهر أختي هديل لن أقل من سنه خطب شبسرعه لحك يحب

" إهنا هديل إول قسمه أجتها كبل وافقت وتزوجت وما سألت عن حالته ماديه ولا عقلت تزوجت سيف بس كلش يحبها ما يرفضلها طلب وهي كذلك صابره ومتحمله لعيونه ولحبه الها

ومن هذاك هديل اليوم ما تروح الهم رغم بابا ما قطع العلاقات بس اكو حاجز انكسر يعني فقط بالمناسبات والواجبات .

" فتحت كنتوري شلبس والله حايره ماكو شي حلو على الرغم الكنتور مليان ملابس هسه شختار خلي انسقلي لبسه محترمه بلكي الحلو يجي لبيت عمه كبر شبيه اني اختي واخوه ما تراهموا عود يعني اني وياه نتراهم لا عمي بعيده يله عاد بس هما حلوين قحط زلم اكيد هسه صاير مو حلو واجبات والشمس حاركته والشكل يتغيير

" جنت معجبه بمروان كـ شكل حب عابر ما اسمي حب مجرد اعجاب وبس يله خل نعوف السوالف ونفرغ هالكنتور كلبتهن عـــلىٰ الجربايه وكعدت انسق بنطلون كابوي وقميص عريض لون برتقالي احب الوان الصارخه لاحد يعيب حضرتهن ونزلت

" لكيت حسن جايب المشويات وهديل ثارمه سلطه بس كعدت اصب السلطه وهي تاخذ لـ الاستقبال باوعتلي وكالت

هديل ـ إكولج خوما حرام

أسيل ـ عـــلىٰ شُــــــنو حرام

ـ اذا رحت وياكم وصخيم موجود أهناك شلون

ـ شنو شلون شمسويه قابل تنامين وياه ضربتني عـــلىٰ رأسي

ـ كبر عـــلىٰ هذه الحجايه شنو هالكلام المنحرف وأنتِ بنية بيت صايره فلا تنجرعين حيوانه

ـ شبيج شگلت قابل يا حجايه ارجعي لمكانج اي هسه تروحين لا لن احسج دايخه

ـ والله ما ادري ما اريد اخون ثقة سيف حتى لو بنظره بس غير أمي لحت عليه والا اني هالروحه كلها مو بعيني بالي يم سيف شنو تعشّى .

ـ يا عيني فدوه لحنينه عادي يمعوده روحي واذا موجود طنشي خيولي أصلاً أنتِ كسرتي خشمه هاليابس متحجر

ـ يله صبي صبي هسه ارجع اخذهن

ـ راحت وكملنا وكعدنا نتعشى وبابا كالعاده عايف روحه وملتهي بأحفاده ويخلي كدام هديل حتى حسن من حصته يوزع عليها وعلى جهالها كلما تجي يدلونها دلال ومن تروح حسن يتسوك الها سياره اشكال والوان ما عدا الفلوس امي تنطيها والملابس تشتريلها .

" خلصنه هديل اخذت جهالها وصعدت والمواعين وكعت براسي كمت غسلتهن ونظفت البيت علمود من نرجع كبل انام ولو حمزه وروان يخلون بيت نظيف .

" صعدت لكيتها مخبوصه وجهالها متعاركين وهي تنبش بالكنتور عرفتها ادور شيء تلبسه

هديل ـ ما عندج شي مستور البس من مالاتي

أسيل ـ لبست وكعدت ترتب روحها وحجابها واني ادور على القميص والحذاء وين شمروهن يعني وتالي راح اشمركم من السطح شو اكعدوا هديل جهالج يمعوده

هديل ـ فدواتج غيرلهم ملابس بين ما اخلص ملابسهم يمج عـــلىٰ الجربايه

أسيل ـ تخصرت وجاوبتها عيني واني شوكت

ـ ملابسج وحاضرات شعندج قابل وبنية بيت هسه تجهزين يله يله تأخرنا

ـ هلاو هلاو، اووووف مو وضعيه هاي نفضت ملابس ولكيتهن طلعتهم والله يدك باب الا اعلگه بالبنگه وبدلت وهي لبستهم ونزلوا خلصت كعدت اخلي مكياج شنو هاي عزا كرهت الجهال والخلفه من ورا جهالنا

" كملت ونزلت لكيت امي شايله علب هدايا ما اعرف شبيها وبابا انطاها ورقه باوعتلها انطاج ورقه انطيني ٢٥

جنان ـ شو ولي وامشي يله تأخرنا

أسيل ـ اني أعلمج جنانوا من نرجع اصبريلي اذا غسلتلج المواعين بعد من عيني، بطلعتنا دخلوا بيت حارث وأسماء لابسه كعب ادري وين جايه حظي الكواد

حارث ـ شُــــــنو طالعين

أسيل ـ حسن ضل يحجي وياه وأسماء نبصت الا تروح عاد حارث عاط بيها

حارث ـ وين تروحين والجهال وين تعوفيهم لاتكوليلي تاخذيهم تردن تفضحنا ويه العالم

إسماء ـ اي شگوو بيها خل أروح

حارث ـ عمي طبي داخل يله هما ساعة زمان ويرجعون يمه لاتطولون نتتظركم

جنان ـ اي يمه دخلوا أبوكم بالاستقبال كاعد

أسيل ـ دخلوا واحنه توكلنا وصلنا بيتهم دك هورن وانفتح الباب مروان فتحلنا وكف السياره وتسلاموا هو وحسن عزا ولا عرفته هذا شلون صاير كرصت هديل شوفي حماج

هديل ـ تسكتين لا اشمرج من السياره

ـ شاورتها علواه علمود اوكع بحضنه

ـ عـــلىٰ هذا انحرافج الا أخلي امي تكعدلج گلب متسجلبه

ـ عمي سگتنا يله ننزل شمنتظرين خزرتني نزلت وراها جان يسلم عـــلىٰ أمي ويرحب بينا وأني من صلافتي ما كدرت اشيل عيني عنه مو بيدي هو يخلي الواحد يباوعله

" انكرصت قوي ومشينا لداخل وراهم طبعاً راح هو وحسن ما شفته بعد دخلنا يم الحجيه سلمنا عليها وعـلى زينب وزوجة فاضل وبدأ الكلام والمباركات هديل جانت كلش مستحيه بالكوه كاعده من شافت مروان تخربط وضعها يعني اذا مروان اهنا اكيد عصام هم حجت بهمس

هديل ـ ما باوعتي بالكراج شفتي سيارته

أسيل ـ شمدريني شايفتني قناص ناظور اضل أستكشف وأباوعلج اكعدي وسكتي وتبسسمي ترى يباعن ويحسسن

ـ كتلجن ما اجي لا الأ تجين من ورا عناد إمي ساعة السوده طاوعتجن واجيت

أسيل ـ الحجيه تباوعلنا وتبتسم

الجده نعيمه ـ يا هلا من زارنا يا هلأ شلونجن يالحلوات شلونج هديل ولج اسيل ما عرفتج كبرانه

زينب ـ العمر يركض ركض هذاك اليوم جانوا يلعبون سوا

فريال زوجة فاضل ـ يا هلأ بجيتكم جيتكم عزيزه وغاليه والله دائماً اسأل فاضل عليكم كل فتره جيبي البنات وتعالي هو من اكو بس اني وفاضل وعمتي وزينب

جنان ـ والله اشغال وملتهين وتعرفين عيال وكلمن وهمه واعذرينا ان شاء الله على المجال

أسيل ـ امي تعذرت وأني باوعت يمين يسار اكو شي داخلي تجدد من ساعة شفته لابس تراكسود أسود شاك گلبه وطالع يموت شوي وسمعنا صوته من كال

مروان ـ عمه زينب چاي چاي

أسيل ـ شفته يمه گلبي تصركع رجعت درت وجهي خفت أحد يلاحظ عليه عيب شيكولون عليه ما شايفه حلوين وانوب ضابط
" يحجن بينهن وناس تعاتب ناس بسبب الكطع ورباب اجت وجابت بنتها تخبل يباعن وأمي انطت الفضل واني عقلي طفر من رأسي راح لـ الأستقبال كاعد يشرب جاي وياهم صار نفر يباوعله .

" قدموا الضيافه وسمعنا هورن سياره والصوت شال البيت شيل ومروان طلع من الأستقبال سريع ويصيحح

مروان ـ جايك يمعووووود جايك

الحجيه نعيمه ـ هذا أكيد عصام أدري بي متخبل وكاعد

أسيل ـ هديل شركت بالعصير وكع عـــلىٰ ملابسها بس أنذكر اسمه كلها باوعت الها خرب بيومج تجيبين الشبهه لنفسج كوه شجاج طلعت كلنكس امسح

زينب ـ يله ما صار شيء .

أسيل ـ انخبصت خطيه حسيتها فشلت وتلفونها وكع وأتصل يمكن سيف رادت تجاوبه وسمعنا الصوت

عصام ـ الله يساعدكم .

يتبع
____

#الحلقه_الرابعه
___



ملاحظه / صار تغير أسماء بسيط فالخربطه الصارت عدكم انحلت اتمنى تفهمتوا لن أسم مناسب أكثر وف عائله أسيل ما تربطهم علاقه بعائله أسيا نهائي مجرد اخذت أسم أسيل واقتضى التنويه .









أزهار

ـ مرت هالليله بسلام وأمي أبداً ما تحاجيني وتتوعدلي واجوا خالاتي عليها وسوالف وضحكه وسألوني كم سؤال وعرفوا شاهين يريدني عاد خالتي منى كالت

منى ـ وصال من كل عقلج موافقه عـــلىٰ هذا الزواج

وصال ـ أي ليش ما أوافق شاهين زلمه بي حظ لاتخربين عقلها بحاجيتج فدوه رحتلج هي بدون شيء متخبله وكاعده
ـ شخرب منها هي خربانه بس كوليلي شلون قنعتي تنطين بنتج وحيدتج وتعبانه عـــلىٰ روحها ومدرستها تزوجينها بالقريه وشاهين ما كلنا بي عيب بس يا اختي خل ياخذ من ثوبه شعجب بنات عماته الباقيات صارن كخا بس بنت عمته وصال خيل عليها

الجده وضحى ـ أنتِ مقهوره لن ما اخذ من بناتج وجاي تخبلين عگل البت

منى ـ لا عشتوا بناتي ما نايمات عـــلىٰ کلبي أشمرهن عـــلىٰ شاهين الحمدلله اثنين تزوجن بالمدينه والباقيات الله يكتب الهن البي خير ما وكفت قسمتهن عـــلىٰ شاهين شنهي خلصت النسوان لو قلة الزلم .

إمنه ـ والله كلام منى صدك خطيه بنتج جنها جماره تجيبيها وتخليها بوسط كومة نسوان وكلهن وكحات وسهيله ما تريديها تريد من بنت اخوها اكيد هسه تشد وياها واذا ما تردين تهضمين أخويه سلمان طلعي نفسج لاتحجين شيء خلي ابوها واخوانه هم يقررون

الجده وضحى ـ خايبات شو ما تعرفن تحجن كاتلجن القهر تردنا بس الجن ولحلالجن بس اله ازوجنه زهيره واسويله عرس كل عرب تسولف بي مو زهيره

أزهار ـ هزيت رأسي اذا اسمي من إولها انگلب الله يستر من تاليها يله خليها تبني أحلام وتفرح لن متيقينه هذا الشي ما يصير .

" خطيه خالاتي حاسات بيه وبوسني ويحجن على إمي ما راضيات عليها ودعتهن وراحن الله وياهن وسندس جابت النا فراش كمت ساعدتها ونمت وعفتهن كاعدات ويه أمي .

" الثاني اليوم العصر قررنا نتوكل الصبح أمي ما رضت سكتت وتحملت هالكم ساعه ، لبست وشلت جنطتي وطلعت برا انتظر إمي أشتاقيت لبيتنا ولبابا هواي أهنا أختنكت خاصه بعد هالسالفه طلعوا الونسه من عيني

" أجت مزعوجه وحاده سنونها عليه تجاهلت الوضع ومشيت واجت تحجي بعصبيه

وصال ـ تستنكفين حضرة جنابج قبل لاتمشين تفوتين تسلمين على جديتج والبنات طبعاً بنت أبوج شيطلع منج

ـ ترى سلمت على جديتي وبنات أخوج هنا كلبن وجوهن بوجهي شسويلهن يعني

ـ خو أنتِ ما قصرتي بس خل نوصل البيت يصير خير يا أزهار

ـ ما جاوبتها صعدت ليورا صرت ورا عصام ضل يباوعلي بالجامه ومركز نظراته عليه صديت وجهي مزعوجه واجت امي وشغل وخوالي ودعونا يم الباب وسلام .

" تمشي السياره وعصام عيونه عليه وصاح بيه

عصام ـ شبيچ

أزهار ـ ما بيه شي

عصام ـ يمه أزهار شبيها

وصال ـ شبيها يعني عرچ ما يطگها رأس سليمه

عصام ـ لعد شبيها خلقتها مكلوبه

أزهار ـ كتلك ما بيه شي

عصام ـ لا تتنريين كم مره منبه عليج لا أنزلج أجفصج جوه تاير السياره .

أزهار ـ كتلك ما بيه شيء انت لحيت

عصام ـ لعد شعندج مبوزه وخلقتج أنكلبت ليكون عندج علم بالسالفه

وصال ـ يا سالفه

عصام ـ مسويه روحج ما تدرين سالفة أبن اخوج شاهين وخوالي حاجوني عـــلىٰ أزهار

وصال ـ أي وأنت شگلت الهم

عصام ـ شگول يعني كتلهم الله كريم بس والله يا يمه تغشمين نفسج

ـ أحجي عدل ولك

ـ يمه يعني من كل عقلج نوافق على هذا الزواج أنتِ مو تعرفين عيشتهم والوضع كله كدامج بعد عـــلىٰ شنو مغشمه نفسج

ـ ليكون ما عاجبك ابن خالك ولك

ـ منو گال ما عاجبني زلمه خوش زلمه ما بي عيب بس ماله نصيب عدنا خل يأخذ من ثوبه وحده توالمه واني اختي مو رخيصه عندي أشمرها هالشمره ولا عندي عشر أخوات وبزعان من همهن وعيشتهن شو بس هل الأخت بعد شكو مستعجلين عـــلىٰ زواجها عود لو اجتها قسمه زينه وكتها يصير خير

وصال ـ ما هذا عشمي بيك يا جبيري

عصام ـ هذا مو بس كلامي كلام اخواني وكلام سيد الوالد خو تعرفينه شكثر يحبها وما يرفضلها طلب ف لاتكعدين تبنيين احلام العصر ولاتزعلين البنت ما موافقه مو أزهار لو الج رأي ثاني

أزهار ـ أي ما موافقه ومستحيل أوافق

وصال ـ ولا توافقين بالجهنم الحمره عساج لاتزوجتي عبالي يصير برأسج خير تضلي ورا قرارت ابوج وأخوانج

عصام ـ لا أله الأ الله هسه شحجينا وزعلتي ترى ما بيها شيء نحجي ونتناقش هذا زواج مو لعب جهال جايه وتريدين تزوجيها الواحد شهاده ثالث ما عنده لا راتب لا شغله لا عمله وما فاتح بيت وما عنده مصدر عيشه يعيشها ادري العميان مأكله وجهي ازوجها اله

وصال ـ خلص سدوا الموضوع جرمت فكرت بمصلحة بنتي كلكم تردون مستويات ومن طبقتكم عبالك ما اعرفكم دومكم تستصغرون خوالكم

ـ منو جاب المستويات والطبقات بالنص ليش تصغرين بأهلج كوه كوه ترى هذا الاحساس أنتِ زارعته بدماغخ مشكلتج مو مشكلتنا كل كلمه وكالت مستويات

ـ لاتضل تصيح عليه

ـ شمصيح لخاطر محمد يمه أنتِ حجايتج يجفصن بالبطن

أزهار ـ صار عصبي وإمي سگتت ما جاوبته بعد لن نعرفه من يعصب ينزل عـــلىٰ الترابي ويكوم يركع بالاوادم رفع تلفونه وكام يخابر وسمعته گال

عصام ـ أتعشى وأجي أخذج مشگلتج والله أنتِ مو مال عين وأغاتي مال ركع بالقندره ضلي ضلي طبج ستين مرض

أزهار ـ شمر التلفون بعصبيه وأمي تهز بيدها رجع عاط بيها

عصام ـ شگوو تهزين بإيدج شايفتني خبل

وصال ـ حشا الخبل منك

عصام ـ يمممممممه كسري الشر وسكتي يرحم جدج السابع لا اطلعه وانبش صفاح أهله

أزهار ـ دزيت رساله لـ أسيا شگوو شبيكم گبل جاوبت

أسيا ـ ما أعرف سألي أخوج راح يخبلني وياه نوب يدزلي اخذ ابني وأتزوج وهسه يكولي اجي أخذج ما فهمت عليه شنو يريد أخوج

ـ وما عرفتي تطيبين خاطره وتكوليله اي تعال هلا بيك طبعج هذا شوكت تبدلينه وشوكت تتعلمين عـــلىٰ أطباعه دام كالج اجي اخذج يعني كلبه صفى ومشتاقلكم وكلامه هيج راد يخوفج وبس

ـ عصام ما يكول كلام اذا ما متيقين منه ويسوي

ـ عمرج ما راح تعرفين عصام وضلي زعلانه أنتِ الخسرانه وهو هسه عصبي نار اذا تتصلين عليه كبل يطلكچ ههه عوفي احسن خل تبرد أعصابه

ـ تمام عود راسيلني من تشوفينه هادئ

ـ تمام نهيت المراسله رجعت التلفون ومر وقت هواي باوعت أمي نايمه والدنيا ليل وغير الأتجاه الشارع عصام وين رايحيين .

عصام ـ بيت جدي هسه البيت يصفر ماكو لكمة أكل

أزهار ـ تمام ادري بي ميحب الجاهز وأمي زعلانه ما راح تطبخ وصلنا وشال البيت شيل بالهورن مال السياره وامي كامت تصيح عليه

وصال ـ عـــلىٰ كيفك تخبلت يارب ثبت علينا العقل والدين يارب عقل هالرجال

عصام ـ يمممممه

وصال ـ وجعة أبو أمي تنام بگلب امك خبالك لا راح لا اجه تعارك ذبان وجهك

أزهار ـ أجه مروان فتح الباب ويصيح وعصام بعيطه وحده سكته

عصام ـ أنتَ أسگتتت

أزهار ـ نزلنا تعبانين ومروان مشه وما حجه شيء وعصام وكف ما اعرف شُنو كتب برساله رفعت نفسي اشوف وخزرني

عصام ـ عينج لا اطلعها حركاتج الطفوليه والتافهه بطليها

أزهار ـ ما جاوبته دخل كدامي وأني وراه وبدخولنا لكينا بيت عمي علوان موجودين هديل وأسيل امي سلمت ومباوس هي وياهن وهو سلم وتفاجئ بيها بس تصرف طبيعي دنگ بوس رأس جديتي وكال

عصام ـ شلونج

الحجيه نعيمه ـ زينه

عصام ـ أشو تحاجيني من ورا خشمج خيرر

الحجيه نعيمه ـ مرتك وأبنك شوكت ناوي ترجعهم ترى طولت خلگي وياك هواي

عصام ـ بالبيت موجودين

الحجيه نعيمه ـ عليمن تجذب ولك

عصام ـ حجيه مو وكته الحجي شكد تحبين تبحرين بالسالفه كتلج بالبيت وخلص وباجر اجيبهم يتغدون يمج خوش حجي

الحجيه نعيمه ـ خوش حجي انتظرهم

عصام ـ عمه ام حارث شلونج عمي علوان شلونه والولد

جنان ـ الحمدلله بخير الله يسلمك ويعزك كلهم زينين

عصام ـ الله يجعلكم بالخير أسيل شلونج شلونها الدراسه

أسيل ـ الحمدلله ماشيه

عصام ـ بالتوفيق

أسيل ـ تسلم

عصام ـ يله عن أذنكم عميمه ما تصغرين جهزيلنا العشه بلا أمر عليج

زينب ـ من عيوني تدلل دام رجعت أسيا اسويلك قوزي

أزهار ـ عصام راح الاستقبال ومن بعد ما سلمت عليهن ومباوس كعدت بصف جديتي مقابلهن وأباوع لـ هديل ركبتها انكسرت من كثر ما مندكتها رفعت رأسها وتنفست براحه ربع ساعه وكامن عرفت ما تريد تتواجد لن عصام اجه

فريال ـ بعد وكت بعد الليل باوله ضلوا خل نتعلل

جنان ـ لا حبيبه ما نكدر والله جهالها وكحين وأبني حارث ومرته يمنا وأسيل عدها دوام باجر وطبتنا خير عليكم تصبحون على الف خير مع السلامه حجيه

الحجيه نعيمه ـ الله وياكم عيني الف بيجن .

أزهار ـ طلعت وياهن وامي وعمتي فريال واخوها حسن طلع ومروان وعصام تسلاموا وياه يم الباب وعصام رجع الاستقبال ومروان اجه وياه لسياره صعدوا وطلعوا وأني رجعت وكفت يم باب الأستقبال وحاجيته صدك أسيا بالبيت

عصام ـ خو أنتِ ما تفوتج فايته ولا أكله بايته أمشي شوفي العشه وين صار أريد ارجع البيت

أزهار ـ ما كلتلي عاط بيه

عصام ـ كتلج أمشششششي

مروان ـ شكد صايره تلحين .

أزهار ـ هلا بسيادتك شلونك

مروان ـ زين خلصان منكم

أزهار ـ عوذه

مروان ـ يله دكافي تلغين شوفي العشه وبطريقج كهوه لأخوج

أزهار ـ تدلل أنت، رحت المطبخ وعبرت من يمهن امي تباوعلي بحقد هاي شبيها كاتله أهلها وما ادري شذبحتي عـــلىٰ شاهين لخاطر الله

" لكيت رباب تساعد عمتي زينب رباب شلونج

رباب ـ شلوني سهر وتعب وجهال وهوسه شلعان گلب الله وكيلج بس شنسوي مسؤوليات وواجبه علينا ، أنتِ شلونج بالوظيفه زين سويتي توظفتي والله من سمعت فرحتلج تستاهلين

أزهار ـ بعد روحي تسلميلي نسولف ونشتغل كملت الگهوه وهنأ كملن العشه اخذت صينية لـ الأستقبال ولكيت عمو فاضل موجود شلونك عمو

فاضل ـ يا هلأ بزهرتنا بخير يبعد عمج أنتِ شلونج

أزهار ـ زينه بشوفتك خليت الأكل كدام عصام ومروان اخذ الكهوه وكعدت بصفه يراسل ومبتسم ويكتب بكل حب

مروان ـ مشتاقلج أشرب الكهوه واروح البيت ونتخابر

أزهار ـ ضربته عـــلىٰ كتفه منو هاي !

مروان ـ عمي كاعد كومي كعدي يم النسوان شعندج كاعده يمنا

أزهار ـ اكوم بس تحجيلي حباب

مروان ـ خصوصيات ليش تحبين تنهانين امشي ولي.

ـ أشكرك زعلت وهو ضحك زعلت والله

ـ ميخالف عود بعدين

ـ ماشي أنتظر شگو عندي

عصام ـ أزهار كومي طلعي عندي حجايه ويه عمي فاضل

أزهار ـ حجايتيش ؟

ـ شعليج أنتِ امشي طلعي وبلا لغوه

أزهار ـ تمام طالعه كمت ومروان ذب التلفون واني وكفت يم الباب أسمعهم وعصام بلش يحجي

عصام ـ عمي أزهار اجوا خطابه

فاضل ـ خير أن شاءالله ومنين الأهل

عصام ـ شاهين ابن خالي سلمان

مروان ـ كوله ما اله عدنا مره لزواج

فاضل ـ هو الولد ما بي عيب بس عيشتهم صعبه وأختكم متعيش هناك لو ساكن اهنا بيها باب وجواب بس رأي من رأي مروان ارفض بالحسنى

عصام ـ ما كلت شيء خل أبلغ سيد الوالد وأردلهم الجواب ونوب أمي زعلت مني

مروان ـ تزعل يومين وترضى شنو گوه قابل

أزهار ـ تنفست براحه وكعدت گبال امي مبتسمه وأرفع بحواجبي الها وشوي وصاحت الهم

وصال ـ عصاااااااااام مروااااااااان

أزهار ـ كمزت بخوف طفرت عـــلىٰ جديتي

الحجية نعيمه ـ يمه أسم الله الرحمٰن شبيج

أزهار ـ لا جده ما بيه شي شوي واجوا رادت تحجي وعمي فاضل وراهم وسگتت

وصال ـ يله يمه نكوم نروح وأخوكم مجد من ساعة اجينا نايم وراه مدرسه أزهار كومي كعدي.

أزهار ـ كعدته بطلعان الروح يله كعد مشه يتطوحح بمشيته ومروان ضربه عـــلىٰ رأسه

مروان ـ امشي عدل ولك صير رجال ليش رخي طايح الحظ

عصام ـ عال گلبي بمشيته خل يخلص الا اكظبه التدريب

وصال ـ يمعودين عوفوا الولد نعسان ما يدري بروحه امشي امي انت

مجد ـ يمه سگتي ولدج

وصال ـ شسكت منهم درچه ما تسد حلوكم ليش أكدرلهم

ازهار ـ صعدنا بسياره عصام وصاح علينا

عصام ـ وين وين صعدوا ويه مروان اني عندي شغل

وصال ـ شغليش بهل الليل وين مولي

ـ وين اولي قابل شغل وخلص الا تعرفين

ـ والله رجال مرته مو يمه وين يولي

ـ لكواويد يلعب شناوا

ـ ليا ساقط ولك أختك واكفه استحي شويه

ـ والله سألي روحج يله صعدوا ويه مروان ولو الافندي مطفي ساحلته بنت خوش أوادم

ازهار ـ مشوا وأمي ما مرتضيه صعد ومن جام حاجيته رايح تجيب أسيا

عصام ـ ميخصج

أزهار ـ أبتسمت وعفته وصعدت ويه مروان وطلعنا للبيت
______

أسيــــا

ـ من بعد رسالته واللي صار أخر مره اخواني هادئين ونهائي ما فتحوا الموضوع وياي بعد ، بس اني ضليت أتحرمص ما متعوده عـــلىٰ هالهدوء علمني عـــلىٰ الصياح والخبال صار الوضع زلاطه عندي

جاي اسوي حليب لأبني واجت براء تباوعلي محتاجه شي

براء ـ شصار عـــلىٰ سالفتج شو زلمتج ما عاد بين

أسيا ـ هو بين وين يروح ابنه يمي

ـ لحد الان ضامنه يرجعلج ولج خلي كرامه لنفسج هذا واحد ما يستحي الله يدري وراج شعمل جم وحده كلب حضنها

ـ هو وربه

ـ يمه شلون الج نفس تتقبلين الوضع لو منج أكلف اخواني وخل يطلكوني منه وأنعل والديه

ـ سمعتيهم شگالوا حالي من حالج

ـ سمعت بس بعد ما حجوا وأبراهيم ما ظنتي يوافق لن ما مقتنع وسمعته يحجي هو ودره وتكوله لاتطلكها وتشيل خطيتها وراها طفل وبطنها مليانه منو يعيشهم تضل خدامه لنسواين شفتي والله شبعت قهر من كلامها شقصدها

ـ ما تقصد شيء واشوف كلامها صدك دره عمرها ما رادتلي الشر سگتت واجت رسل أخت براء

رسل ـ براء لادخلين نفسج رجال ومرته احنه شکو

براء ـ لا يبوي أحنه شگو بس مقهوره منه لن مستصغرنا وكلمته أدك بگلبي شنو بس هو متمكن محد عنده فلوس

أسيا ـ ما جاوبتها مشيت لغرفة امي شفت الخط مالتي اخويه مخلي عـــلىٰ الميز يمكن توصلوا لحل الطلاك مو حل لهذا رجعوا الشريحه اخذتها وخليتها بتلفون أمي ولكيته حاظرني هذا ليش حظرني عفته وعمتي مغلق تالي راسلت أزهار وفهمت منها

" للمغرب كاعده أصلي بغرفه أمي ودخل منذر خله تلفون جديد بحضن كرم وطلع كملت صلاتي وشفته جديد ومن الراقيات يبووه خله العنده وجابلي لن هو كسر تلفوني واكيد ميقبل ياخذ فلوس اجت امي وشافته ضلت ساكته
فتحت جنطتي وخليت بيدها قيمة التلفون الفلوس هذن لو رحت انطيهن اله هو شكو عنده

فوزيه ـ أخوانج نفسهم عزيزه ما يأخذون رجعيهن لجنطتج

أسيا ـ رجعتهن بيدي وكلش انقهرت زعلتي لأهلي قهر فوك قهرهم انزعجت وتعصبت وعصام لو يمي أشرب من دمه طلعت امي وضليت اني وكرم وأيدي على بطني كسرتوا ظهري فوك قهر ابوكم

" بقيت بغرفتي حتى ما تعشيت ولا امي دزت عليه وكرم يلعب يمي صافنه وشابعه قهر ورن تلفوني هو ما ردت اجاوبه وتالي جاوبته نعم

ـ أتعشى وأجي أخذج

ـ لاتجي احسن

ـ مشگلتج والله أنتِ مو مال عين وأغاتي مال ركع بالقندره ضلي ضلي طبج ستين مرض

ـ قطعت الخط بوجهه وشوي ودزلي رساله

ـ أخليج تدفعين ثمنها غالي تسدين الخط بوجهي سهله أسيا سهله يصير خير

ـ تجاهلته شيريد يسوي بعد طلعت بالوجه الاسود كدام أخواني بسببه واحد ما يحسب حساب لحجايته شگد مقهوره وشبعت قهر لن حجيت لأخواني حجايته بنت الفگر گالها وبعد كل قساوة بالكلام ارجعله وترجع نفس الطاسه ونفس الحمام ونفس عصام لا راح لا اجه

" نومت أبني وتمددت بس كاعده والقاهرني أكثر زعل أمي مني حتى ما تباوعلي اني شبيه اجيت وحملتها بحملي وقهري كافي عليها شايله هم ولدها وشلون يعيشون عيالهم وشلون يستقلون اجييت وكحلتها، كله منك يا عصام انت وازيتني على هالشيء .

" مر وقت هواي وصافنه وأسمع صوت بالصاله صوت زلم أخواني يمكن نزلوا وأمي كعدت على صوتهم لبست حجاب صلاتها وكامت وتأخرت رفعت الغطا وكمت وراها قبل لا اطلع اجت

فوزيه ـ زلمتج اجه يرجعج وكاعد ويه اخوانج شگول عليج أسيا الرجال منزل رأسه بالكاع ويحاجيهم ما رفع رأسه ركبته أنكسرت جن حاس بذنبه يا يمه المره تستر على الرجال وعيوبه وبيهن يعدلن زلمن ليش أنتِ تمشين عكسهن .

أسيا ـ يستاهل والله حيل وابو زايد علمود يتوب يحجي عامي شامي شُنو ما وراي اهل وأخوان

فوزيه ـ أمشي مو وكت لسانج يلعع ، أخوج أبراهيم يريد يسألج

ـ شيسأل أذا على الرجعه ما ارجع وياه خيولي خل يتأدب

ـ أنت تأدبينه

ـ أي

ـ وامي بهاي الطريقه تأدبين الرجال

ـ أي

ـ يأدبج ويأدب عشره من أمثالج ومو سأل عنج زين منه جاي يرجعج وأنتِ نشرتي على الحبل كدام نسوان اخوانج ما خليتي لصلح مطرح ضلي ضلي بهذا يابس رأسج لما يجيبلج ضره عكبها بيش خير ويبسي رأسج

ـ راحت ورديت الباب وقبل لا أرجع اجاني صوت أخويه أبراهيم

أبراهيم ـ أسيا خويه تعالي

أسيا ـ والله فشلانه منهم لبست شالي وطلعت هاا خويه

أبراهيم ـ خويه رجلج جاي وتعذر من عدنا ويريد يرجعج شتكولين تردين ترجعين وياه لو تردين تضلين البيت بيتج العتبه النا والبيت الج هذا بيت ابوج واخوانج كولي ويجرالج بس اكولها الج مو لن متعاجز منج لا والله انتي خيتي بس يا اسيا المره مردها بيت زلمتها مو على كل حجايه نوصلها الطلاك ورجال ومرته تصير بينهم والمشاكل ما تخلص ماكو حياة تضل حلوه طول العمر لازم حلو ومر

أسيا ـ والله خويه فشلانه منكم وحقكم عليه

أبراهيم ـ لا يمعوده تصير فدوه الج المهم عندي اشوف مرتاحه
هاا شقررتي اذا توافقين علمود تسويلنا جاي

أسيا ـ هزيت رأسي وطبطب على أكتافي وگال

أبراهيم ـ بيها الخير يله سويلنا چاي واذا كرم كاعد جيبي ابوه يريد يشوفه خطيه

ـ ماشي لا والله نام من زمان هز رأسه وراح ورحت المطبخ وسويت الچاي وصبيته ومشيت دگيت الباب وأجاني صوت أبراهيم

أبراهيم ـ تعالي أسيا

أسيا ـ يبووه فتحت الباب وصاير گبالي رفع عيونه وصار بوجهي خايفه ومستحيه منه ما ادري شصارلي جسمي كله لزمته الرجفه ادري قباض أرواح، قدمت لاخوي أبراهيم وأشرلي اضيفه بالاول عاد ابراهيم كال

أبراهيم ـ لا والله أبو كرم بالأول

أسيا ـ عصام غمض عيونه ويفرك بيده بتوتر وصلت لعنده اخذه مني وساكت وما باوع نهائي ضيفتهم ومنذر مبتسم وهز رأسه يقهر وهمس

ـ لو ضابه لسانج مو أحسن فشلتي الرجال كعدي خيتي كعدي .

ـ كعدت بصف أمي ومتوتره من وجوده شرب الجاي شربه وحده يمه يصمط والله هذا شبي

عصام ـ مشكورين والله حقكم عليه وساعة شيطان وو

منذر ـ لاتكمل ابو كرم تصير وكل رجال من يتعصب يخرط الاول والتالي عمي النسوان ما ينجرعن يبطن الگلب هذا هو جن ما صاير شي والرجال ومرته تصير بينهم والله يصلح الحال احسن شيء

أسيا ـ منذر رغم شگد جان مقهور وعصبي وتوعد وحجه وعصب جان اكثر واحد متفهم وكاعد يطيب الجو بقيت ساكته وهما يحجون بس اللي وكف بعيني عصام ما جاب طاريي ولا حجه شيء يخصني حزت بکلبي وسگتت وباوعلي ابراهيم وكال

أبراهيم ـ أسيا بويه كومي جهزي نفسج أنتِ وأبنج تتوكلين ويه زلمتج وسمعي الكلمه ولا تعاندين ديري بالج على زلمتج تررى ازعل منج وزعلي ثكيل خو تعرفين أخوج

عصام ـ لا عاد ام كرم معدله والنعم من تربيتكم وعلى رأسي كلكم وأن شاءلله الصار ما ينعاد وأعتذر مره ثانيه عن اللي صار وعلى كل كلمة بدرت مني بدون قصد الله شاهد .

اسيا ـ يحجون واني ما كدرت اتحمل كبل طلعت للغرفه ولحكتني أمي

فوزيه ـ شفتي زلمتج شلون ما كسر بيج بكد الذره كدامي وكدام أخوانج وكل شوي معتذر يله بلكي تصيرلج عبره وتحفظين سر غرفتج ، ديله كعدي أبنج وتحضري والله يهديج .

أسيا ـ ما جاوبتها طلعت جنطتي وجمعت ملابسي ولبست وشلت كرم وشافني أبراهيم اخذه مني وداه لابوه جان كاعد وشاف ابوه وركض لحضن ابوه شاله ويبوس بي ، طلعت واعصر بالجنطه واخواني طبطبوا على كتفي ومشيت لبرا ودعنا اهلي وتوكلنا للبيت بس امي ضلت على موقفها .

" يسوق وكرم بحضنه حاضنه من ركبته تعال كرم خلي ابوك يسوق

عصام ـ عووووفي

أسيا ـ سحبت أيدي وخليتها على بطني حامل ٦ أشهر بقينا ساكتيين او بالاحرى ما ضل كلام نحجي هو غلطان بحقي وحق أهلي ويستاهل

" وصلنا جان الوقت متأخر ما دك هورن هو نزل فتح الباب ودخلنا نزلت وهو طبك السياره بالكراج وبيده كرم اجه عبرني سحب الجنطه من ايدي لن ثكيله بيها ملابسنا ومشه لغرفتنا فتح الباب جانت مقفوله هو من النوع ما يحب احد يدخل غرفتنا كلش يحب الخصوصيه بفتره الخطوبه وبداخل البيت سوه سويت كامل يعني صاله صغيره بيها تخم وبلازما وبالبنص غرفتنا وغرفة كرم وحمامات داخليه .

" دخل وقفل الباب وراح الغرفه بقيت بالصاله ذبيت جنطتي وكعدت اخذ نفس اسمعه يحجي هو ابنه انتظرته ينام يله ادخل هسه يضل يحاسب وتعالي شيخلصني من لسانه مالي خلگه .

" مرت نص ساعه وخف الصوت ولا هو سأل عليه ليكون مرجعني علمود ابنه شمرت الجنطه وتعصبت شلتها ودخلت الغرفه لكيتهم نايمين حاضن كرم ونايم عفت ملابسنا وغيرت ملابسي بقيت واكفه ردت اعزل فراشي انام بالكاع بس تذكرت حجاية امي

فوزيه ـ المره تزعل على الرجلها ما تزعل على فراشها ديري بالج تعزلين فراشج هو يسوي اللي يسوي مرده الج بس اذا ركبتي راسج برأسه ما يجرالج خير لن أنتِ مره وهو رجال زرعي هذا الشي براڛج

أسيا ـ شلت الفكره من رأسي وتمددت بصفهم بينا كرم جنت صاده عليهم وهو مغمض كال

عصام ـ لايدفرج على بطنج نومه وسخ

أسيا ـ خايف على البطني ما خايف عليه ما جاوبني رجعت حجيت وأنت الزعلان ضل بزعلك ما ارضي احد اني عود انت ارضى لوحدك
ما جاوبني شعوطني متت قهر انطيتهم ظهري واجتني دفره قويه كمزت الدفره هذا مو كرم لن كرم نايم باوعت اله هو هم منطيني ظهره معقوله يتهألي بس حسيت بيها ليكون يتحارش هذا شوي وشفت كرم دفر ابوه وخله رجله عليه اجتني الضحكه على نومته

عصام ـ كرم بابا ليش تخليني اوديك لغرفتك

أسيا ـ عدل نومته بدون ما يباوع لوجهي جنت مرتجيه على تاج الجربايه وأباوعلهم ورجع نام ومخلي ايده عـــلىٰ رأسه ظنيت بي السؤء عبالي هو دفرني طلع ابنه بقيت صافنه شوي رجع كلب نومته وصاح ابوه

عصام ـ لا اله الا الله على هالليله الكشره متكولي شجاك مرغلت روحك شو امشي انومك بغرفتك انت مو مال عيني واغاتي .

أسيا ـ شاله ويبوس بي واخذه الغرفته وكرم يحجي

كرم ـ ماما

عصام ـ وين تطير أمك موجوده بابا موجوده نونو بطنها ما يصير باباتي اخاف تدفرها وتسويلي سالفه يله تنام بفراشك انت زلمه خوش زلمه سبع

كرم ـ ما اريد ماما

عصام ـ شلون اكوم اعدلك انت وامك بنص الليل شو نام وعوفلي امك هسه نام وليدي نام أبنييييي نام زلمتي

أسيا ـ متلاغين هو وياه بس صوتهم يوصلني وسمعته كام يبجي هو جان يحب غرفته العابه وفراشه بس من بقيت يم اهلي تعود علىٰ حضني وراح يشلع كلبنه وياه تخربط نظامه

كرم ـ مامااااا مامااااا

عصام ـ والله من أنعل أبوك لابو امك تكفرون الواحد قسم بالله، شو تعاااااالي عـــلىٰ أبنج .

أسيا ـ مشيت ويه طلعتي إنضربت بصدره وهو أنلطخ ضربني بهوا ايده وعلى رأسي

عصام ـ وثول وثول عمه الدبب كاع الله شگدها شكپرها

أسيا ـ أنت متشوف ما جاوبني عبرته ورحت عليه لكيته يبجي هاا حبيبي هاا كلبي ليش ماماتي عادي ولا يهمك هسه انام يمك شعندي غيرك أحبل اجيب

عصام ـ لا يبوووي

أسيا ـ ضحكت هذا منو وياه ، نومته بحضني وسكت وكبل نام هدأ الوضع وغطيته وطفيت الأضويه ورجعت لكيته نايم وشگله غافي بعدت الغطا ونمت بصفه بس بعد مسافه نايم مستقيم عـــلىٰ ظهره جسمه وطوله مسطره وقالب

" ضليت أتكلب بفراشي وطار النوم من عيوني عكسه هو غرق بالنوم من صوت انفاسه انطيته ظهري ونمت

" كعدت الصبح اسمع صوت الدوش بالحمام يسبح
رفعت الغطا وشلت شعري بقيت كاعده على حافة الجربايه وطلع هو بس لاف منشفه عـــلىٰ خصره وشعره ينكط ماي وفتح الكنتور وطلع ملابسه غير ولبس كدامي بقيت اباوعله بكل صلافه ما نزلت عيني عنه وهو يباوعلي بحقد بالمرايا مال الكنتور ما شال عينه عني كمل لبس وصل ليمي شال ساعته وخله عينه بنص عيني ومشه بدون اي كلام سمعت الباب انفتح وراح

" تجاهلت الوضع ورجعت كملت نومتي وتوسطت الجربايه ومر وقت هواي وأني نايمه كعدت عـــلىٰ صوت بالغرفه كعدت لكيته هم يبدل لبس ملابس بيت بجامه وفانيلا نص ردن لونها اسود كمت عبرته للحمام سبحت وطلعت لابسه برنص حمام ولا اهتميت لوجوده جان واكف يخلي عطورات ويرتب بروحه سويت نفس حركته لبست ملابسي كدامه وهو عكسي ما باوعلي ولا أهتز يا كاع أنشكي وبلعيني عادي غرفتي وين اغيرهن يعني كملت لبس وكفت بصفه لطشت يم الميز وأباوع عـــلىٰ شكلي ورشيت من عطوراتي كدامه وهو ثابت وكلش عاقل مو عادته هو وكح .

" اࢪفع خصلات شعري واخلي عطر وسويت حركه مغريه كلش رفعت ثوبي اسمه ثوب رشيت عطر عـــلىٰ افخاذي وهو صافن وعاكد الحواجب ومصغر العيون ومخليه أيده بجيوبه ويباو؏ جاوبته شبيك ما جاوبني بس على نظرته وموقفه كملت ومشيت وهو واكف يباوعلي بالمرايا

" كملت ترتيب ومشه كدامي شغل التلفزيون وكعد بالصاله يباوع أفلام وشفت جايب كومه أكياس متسوك ما مخلي ما جايب عصائر وكيك وبقلاوه وفواكهه من كل الانواع وحلويات منوعه النفس وماتشتهي .
" كعدت ارتب المسواك واني كاعده احس ثوبي طاير من ورا بطني مرفوع فوك تجاهلت الوضع كملت كلشي وصلت جيس فتحته ملابس لكرم صحت كرم ماما يله اكعد الدنيا ظهر

عصام ـ كاعد يم أمي بالمطبخ .

أسيا ـ ما جاوبته شلت الملابس الجايبهن لأبنه وحسيته يريدني أني أعتذر لا والله شايف نفسه ليكون عباله اني غلطت بحقه لن الاخ دأكها نظرات وبرود وتجاهل عود أني زعلان تعالي راضيني عشتوا منو يراضي الثاني

" دخلت فتحت شبابيك ونظفت الغرفه ورتبت الجربايه وغيرت الجراجف لن مليانه ريحة دخان جگاير وعطرتها وغسلت ملابسنه نشرتهن ، مديت ࢪأسي أشوفه بعده موجود لو رايح باوعت نظره خطف لكيته يراسل بتلفونه
مُباشرةً صديت وجهي تجاهلته شيريد يسوي مثلاً خيولي مو مال اكعد اقهر بروحي علموده وهو شالع گلبي من ورا لسانه تالي رجعني اله واني فشلانه من إخواني وأمي زعلانه وجهه ثكيل من عندي شحصلت غير القهر ما وكعت بس برࢪأسي .
____.

أزهار

ـ كعدت الصبح عـــلىٰ صوت المنبه طفيته ورجع دك فتحت عيوني ما ضل وكت عليه ركض طفرت الحمام غسلت ولبست وكفت خليت مكياج خفيف ورشيت عطر

" نزلت بيدي جنطتي وكعبي وأغراضي شمرتهن باب المطبخ فتحت الثلاجه اخذت بطل ماي شربته كله وقرص نعناع وعلج واجت امي وعثرت بيهن وكامت تصيح عليه ودفرتهن برجلها

وصال ـ شكو وين ما تجين تشمرين بأغراضج شويه ترتبي يالمخربطه الله بلاني بيج ابرد من الثلج .

أزهار ـ ما جاوبتها اخذت أغراضي وطلعت مهضمومه منها عاد راح تعاديني لن رفضت أبن اخوها هي گوه ما أريده

" باوعت بالكراج سيارة عصام موجوده يعني بالبيت صعدت بسيارتي اشغل بيها ما تشتغل شلون قهر أتصلت عـــلىٰ عصام ورفضني هذا نايم شيكعده يضل يغرد عليه أتصلت عـــلىٰ مروان وجاوب بسرعه سيادتك وين أنت

مروان ـ هاا خير بالمعرض

ـ ليش ما عندك دوام

ـ لا كولي شتردين يله عندي شغل

ـ سيارتي يمكن عطلت ما تشتغل وما اعرف شبيها واريد أروح لدوام وتأخرت شلون .

ـ عوفيها هسه أجي اوصلج .

ـ مشكور سيادتك

ـ العفوا

أزهار ـ بقيت انتظره وطلعت أمي تباوعلي وصاحت وراي

وصال ـ شعندج تفترين ليش ما موليه لدوامج

ـ سيارتي عطلت ومروان راح يجي يوصلني أنتظره

ـ عسا لا أشتغلت ومروان عاف المعرض علمودج والله عمي دلال خلي يطلعون عينج خلي

ـ تجاهلتها اعرف بيها تريد تقهرني بس ميخالف أمي اتحملها أسبو؏ أسبوعين وترجع طبيعيه ودك هورن وصل طلعت وهي واكفه لكيته ينتظرني صعدت وطلع كل سرعته يربي تأخرت

مروان ـ ليش متأخره بالكعده شوكت تتعلمين عـــلىٰ النظام هذا دوام مو لعبه منا ورايح ضبطي وگتج

أزهار ـ أن شاء الله وصلني وراح دخلت الدائره مزعوجه اليوم من اوله عاكس وياي الله يستر من تاليه

" بلش شغلي ودوخه رأس شكد احب وظيفتي بس من بعد تعامل امي طلعت الدنيا من عيني كله من ورا شاهين اشتغل وعصبيه وأجت رشا فوك رأسي خير شعندج واكفه روحي شوفي شغلج

رشا ـ لو تدرين منو جان أهنـا

أزهار ـ جاوبتها وأني أشتغل منو ؟

ـ تذكرين الشخص اللي كلب الدائره علينا

ـ يا شخص

ـ ياا شبيج صايره تنسسين هذا اللي علمود معامله مالته كام يحجي ويعيط ويغلط بوكتها خبصنا

ـ أي تذكرت شبي مات

ـ يا بيش طالبه الرجال

ـ اي شمدريني اذا كل واحد يجي الدائره احفظ شكله وشسوه تطلع طويله روحي رشا عندي شغل مو فاضيه لتفاهتج.

ـ يالعوبه انطي مجال احجي بعدين احكمي

ـ ما جاوبتها

ـ أجه لدائره وسأل عنج

ـ وأني أشتغل جاوبتها شسأل

ـ كال الموظفه جانت اهنا نقلت لو شنو

ـ وهو شعليه

ـ ما اعرف والله بس كلتلج يعني اكو من يسأل عنج

ـ كثر الله خيرج يله توكلي عـــلىٰ شغلج باوعت عـــلىٰ الساعه قبل لا يخلص الدوام خل اشوف مروان اتصلت مروان

مروان ـ هاا عيني

أزهار ـ تسلم عيونك خيي أنتَ تجي تأخذني مو علمود أعرف أخاف عندك شغل

ـ ميخالف اخلص شغلي وأجي اخذج

ـ قطع الخط خلصت من سالفه الرجعه كملت شغلي والموظفين طلعوا أتصلت عـــلىٰ مروان رفض وطلعت لكيته ينتطرني صعدت وتوكلنا للبيت .

" وصلني يم الباب شُنو ما تنزل

مروان ـ عندي شغل نزلي

أزهار ـ عـــلىٰ راحتك نزلت ولكيت البيت يلمع وشفت أسيا لابسه ثوب احمر صارخ وشعرها لونه نحاسي نازل عـــلى خصرها شادته بگدر وتفتر وتنظف وصلت لعندها عزا بعينج عـــلىٰ هاالون اليموت اني مره انغرمت بي تسرسح گلبي شُنو هالأغراءت عمي

أسيا ـ تعالي ولج مشتاقتلج

أزهار ـ بوستها شلونج الاوضاع الامور سولفيلي

ـ ماشيه ينراد النا كعده ومزه معدله عـــلىٰ کولة عصام ونسولف ونحش بي شتكولين

ـ غمزتلي وضحكت وهو عبرنا لا سلام لا كلام

أسيا ـ والله لو تدرين شكثر اشتاقتلج أصلاً البيت حلو بوجودج هسه عصام يروح وتعالي بغرفتي

عصام ـ راحت روحج وين رايح بس تردين تخلصين مني

أزهار ـ عبرنا وراح الغرفه خرب بيومج طكيتها بوجه هسه عـــلىٰ عنادنا ما يطلع من الغرفه

ـ ولا يروح مو فد مشكله اجي بغرفتج

ـ تراضيتوا أخاف انكتلتي

ـ أني أنكتل

ـ ما عرفتج ولج

ـ منا وهيج أني اعلمه كافي وصلت خشمي خل اكعدله گلب

ـ اخاف ينكلب عليج غوريلا بعدين

ـ وينگلب عليه شنو الجديد يله صعدي غيري ملابسج ما متغدين لحد الان

ـ تمام كلبي صعدت لكيت امي تنظف بطابق الثاني بغرفة مروان وغرفه عمار تنظف بيهن وفاتحه شبيابكهن ودخلت غرفتي ولا منظفتها ميخالف اني انظفها مهم تفك عني لاتسسمني بعيشتي .

نزلت لكيت أسيا صابه الغده عـــلىٰ الميز وعصام كاعد عيونه بالتلفون شكله يراسل، بس يباوعلها من جوه ليجوه وهي تباوعله يغير نظراته لواحد مزعوج وحاقد والله شعدكم سوالف هم اتزوج واصير مثلهم كون يشبه شخصيه عصام واذا ضابط اكون ممنونه هيج نفس عصام الخالق الناطق حتّى لو عصبي ميخالف راضيه مهم يكون عسكري ويشبه أخواني بكل أطباعهم الحلوه عـــلىٰ گلبي مثل العسل .

" اجت أمي ومجد هم وكعدنا وأسيا كعدت بصفي جان عصام مترأس الميز لن بابا ما موجود هو ومروان باوعلها بنظره ما عاجبه الوضع ذب الخاشوكه وكام

وصال ـ شبي رجلج

أسيا ـ شبي قابل أبنج ما تعرفينه

ـ لا أعرفه بس أنتن مستجلبات شكوو كعدتي بصف حماتج ! وزلمتج شنو موضوعه راكنته شنو متزوجه حماتج لو متزوجته اله رجال شكده شكبره ما مهمتله شتردين أنتِ

ـ ما اريد شيء بس يفك عني ياخه ويضب لسانه

ـ هو علينا احنه أهله ما ضاب لسانه ويانا تردين يضب لسانه وياج وين صايره هاي امي داري زلمتج لايطير وكتها عود يبسي رأسج

ـ رايحه اشوف كرم

ـ لاتروحين هسه تتعاركون وتصير مشكله هو أنزعج من تصرفج عوفي بعدين من تبرد أعصابه روحيله

ـ والله عمه أبنج شالع گلبي

ـ الله يساعدني لعد أني شگول الكل شالع گلبي

أزهار ـ في متصف الجبهه تقصف ولا تبالي كملت الغده وكمت لغرفتي وضليت عـــلىٰ هذا الحال أيام مرت وأمي مشوفتني نجوم الظهر بس من يجي أبويه تسكت من يروح تلزمني حجي وبطريقه مبطنه وأسيا نفس حالها وحسيتها متغيره وعصام اليوم ينزل ومن رجعت من الدوام هي تنظف بغرفتها ومعطرتها وهي كاشخه عـــلىٰ الاخير عروس مو مثلها لك شُنو هالجمال درينا حلوه

أسيا ـ أخوج اليوم ينزل مشتاقتله أبن الاوادم .

أزهار ـ يروحي الله يدومكم لبعض يله صاعده أغير ملابسي أخذي راحتج اخاف عصام يجي

أسيا ـ تمام حبيبتي

أزهار ـ صعدت غيرت ملابسي ونزلت لكيت عصام موجود يلعب بكرم ويضحكون هاا الله يساعدك

عصام ـ ويساعدج شلونج ويه أمي

ـ زوينه

ـ شو زوينه لازم الأمور بعدها مو تمام

ـ أي والله وكلش هم صدك أنتَ كلت لـ بابا

ـ أي كلتلته ولا تدخلين بهذا الموضوع هذا شغلنا دام أنتِ ما موافقه خلص

ـ هزيت رأسي صدك شصار عـــلىٰ سيارتي ما صلحوتها بدلتوها

ـ ما عندي مجال ومو تدرين جنت بالدوم وين نبدلها مو بعدها لوز شنو هالتبذير

ـ لعد شلون هذا مروان راح تخلص إجازته هو بدون شيء ما يتفاهم وبس يعيط منو يوديني ويرجعني

ـ سواق الج شمدريني خل يصيرلي مجال واوديها لتصليح

ـ ماشي انتظرك تصلحها ما رد ومشه لغرفته وباوع عـــلىٰ أسسيا ما كدرت أفسر نظراته مرته وهي اعرف وافهم بي واجت اسيا هاا شعندج

أسيا ـ شتكولين اروحله احس طوختها وياه

ـ والله صاركم أيام من رجعتي وحالكم نفسه والى متى روحيله ولاتخلين مكانج فارغ لاتجي وحده وتترسه

ـ تمام اروح أشوف الأوضا؏ وأنتِ صبي غده اذا جينا نتغدا سوا تأخرنا تغدي لاتتنظرين

ـ تمام روحي على رجلج عوفي الأكل هسه تلحكين عليه ضحكت وراحت الله يصلح حالكم
___

أسيا

ـ لحكته الغرفه كرم يكمز ويلعب أبوه جابله سياره جديده دخلت الغرفه ملابسه عـــلىٰ الجربايه والدوش مشتغل جاي يسبح ، جمعت ملاببسه وفرغت الجنطه وفتحت الكنتور أطلع اله ملابس نظيفه يلبسهم

واني واكفه رافعه رجلي اجيب تيشرت بالرف الفوك أجه هو صار بظهري وجسمه رطب التصق بجسمي رفع ايده ويه أيدي مُباشرةً وأثنينا لزمنا التيشرت بقيت ساكنه وهادئه بس أنفاسه برگبتي تعبر عن حاله
ورجفة جسمي الملاصق بحرارة جسمه تعبر عن حالي اخاف أندار وما اكدر افلت منه متاكده گبل يأخذ شفايفي حتّى حجايه ما يخليني أحجي خايفه منه ومستحيه كلبي نبضاته سريعه ، طول هالمده احنه ساكتين والتيشرت يكول تهدوني لو اهدكم .

" نزلت أيدي وأنداريت ردت امشي خله أيده كدام بطني ومنعني أعبر من كدامه وصار حاجز بس ارفع رأسي يعرف شغله وشيسوي ويتفنن باللوحه مالته رفعت خصلات شعري ورأسي ولكيته مبتسم ..... 🙂

يتبع ...
_

الحلقه الخامسه
____

أسيا

ـ سحبني اله بدون مقدمات حضني وبدالته الحضن وبجيت مسحت دمعتي عـــلىٰ السريع تدري بروحك شكثر قهرتني عصام

عصام ـ أدري والمن هالبجي هسه شحجينا

ـ مقهوره منك والله

ـ خلاص سدي السالفه لا اعاتبج ولا تعاتبيني

ـ ماشي بس ياريت منا وهيج تحترم وما تضل تغلط وتفشر لا عليه ولا على أهلي

ـ طلباتج تعجيزيه

ـ ليش حرام

ـ لا يابه حلال حلال منو يكولج حرام، وهسه عوفينا من الزعل والعتاب اريد اتمتع بحلالي أشتاقيتلج لو حرام

ـ لا حلالك

ـ دتعالي لحضنج فارغ عايفته صارلج شكثر الزعل بيش فادچ متكوليلي عفتي عصامج المن .

ـ عفتك لروحك كلت بلكي تراجع نفسك

ـ أني اعرف بروحي وتصرفاتي ما يحتاج احد يعلمني

ـ كمل كلامه وسگت وسگوته بسُكر وهيام رفع أيده ومسح دمعتي وقرب شفايفه وباسني من رأسي وهل البوسه احبها كلش أحس بقيمتي عنده كلش ألها معنى عميق بداخلي .
" أبتعد وهو يأخذ نفس كأنما نفذ الوقت عنده صافن ويتمتع بتفاصيل وجهي يحب يعيش التفاصيل برومانسيه أكثر من العلاقه نفسها باسني بعمق من خدي وشدني لصدره وأني ذبت بطغيان رجولته عـــلىٰ أنثوتي وكبريائي وأخذني بين أيديه مليانات قساوه وحنيه في أن واحد

" أكمل بوساته عـــلىٰ أنحاء رقبتي بخفه ولطافه وقساوه الى وصل المحطه الأخيره شفايفي صفن بيهن كأنما يسوي أحماء بلحظه جنون ألتهم شفايفي وبادلته بكل حب الكون أعشق رجولته ورومانسيته من تتمرد عليه و؏ كبريائي وحبيت أكون جريئه هالمره وبوسته من رقبته بعمق ورجعت ابوس بوجهه وأتلمس بظهره بقساوه وهو يتملل بين أيديه انتهى عـــلىٰ الاخير لحظات جانت مثل الجنون أبتعد ولزمني من وجهي بأيده الأثنين وكال

ـ أشسويتي جنيتي عـــلىٰ عمرج اليوم

ـ متفاجئ مني لن أني بطبيعتي خجوله كلش وبالأخص بعلاقه أستحي منه بعض الاحيان وهو ما يحب الخجل بالفراش يحب أتمرد عـــلىٰ رجولته ورومانسيته .

" مبتسمه عـــلىٰ تفاصيله نفسه عالي وشعره مخربط وجهه تغيرت ملامحه الى ملامح ذايبه وهايمه أخذني من ايدي لمملكتنا ولحُبنا .

أسيا ـ منومني بحضنه مثل العصفوره ضعت بين أيديه وبدواخلنا كلام بس ما نحجي بي وأثنينا ساكتين جنت متوقعته يعاتب ويرزلني عـــلىٰ اللي الصار بس أكتفى وكال .

عصام ـ زعل ما أريد بعد هالمره غفرتلج لن أحبج ورايدج

أسيا ـ رفعت رأسي من حضنه وجاوبته لعد ليش كلت أتزوج ومرتي هي تربيهم جهالي

ـ أتزوج

ـ أي

ـ شسوي بالزواج ليش أني مو متزوج كافي ومكتفي الحمدلله

ـ أنت ما تكول شيء اذا ما متيقن منه

ـ وأنت أخذتيها طابو وراح تأكلين رأسي بيها كلتها وخلص بس زين جابت نتيجه

ـ كالها وغمزلي دنگت رأسي خجلانه وهو ضحك وغمرني بحضنه حضنته ونمنا ورمينا ورانا كل اللي صار وصار ماضي وما يعود أن شاء الله .
__

أسيل

ـ من بعد ما رجعنا من يمهم هديل تخربط عقلها وكامت تحجي على أمي وعصبيه وما تتفاهم

هديل ـ كله منج أنتِ لحيتي تأخذيني وياج كتلج ما اريد أروح وأشوفه لن متوقعه الكاه اهناك تضيعينه تلكينه بيت جده هيج أحسسن هسه أرتاح گلبج

جنان ـ وشصاار قابل الرجال ما شفنه منه تصرف مو زين سلم وراح ما شفناه طوله بعد لو مقهوره لن ما سلم عليج هذا كاتلج قهر شلون عبرج من دون الكل ولبسج ادري ك
هذا المخبلج
ـ وبالطكاك سلم والما سلم عاد شكد يهمني رايحه انوم جهالي والصبح اروح بيت عيالي احسسن

ـ وين تروحين بعد أجازتج ما خلصانه

ـ أروح أحسسن شگو باقيه

ـ أختج تخبلت عـــلىٰ عمرها واكص ايدي اذا ما بعدها تحبه والا شجاها كامت تزاكط علينا وتنكز تشعوطت من ساعة شافته .

ـ شتحبه يمه وهي متزوجه صدك تحجين بس لن جان بينهم حب قوي وتجمعهم ذكريات حلوه أكيد تنفعل وتعصب خطيه حقها عوفيها عـــلىٰ راحتها وبعد لاتفتحين وياها الموضوع .

" مشت أمي مزعوجه منها وبعد ما حجينا وياها عفناها عـــلىٰ راحتها وثاني يوم خابرت سيف وراحت مأخذه الأمور أكثر من حجمها بعدين صفنت هي جانت تعشق عصام حد الجنون علاقتهم جانت كلش قويه وعميقه بتفاصيل ما تنحجي طبعاً من جانوا مخطوبين وبحلال وعلى التلفون جنت اشوف رسائلهم لبعض وهو من نوع الجريئ ورومانسي كلش يمكن الذكريات هي خلتها تعصب وتنفعل أكثر من طاقتها .

" كاعده أدرس وخطر عـــلىٰ بالي خطف عقلي وسرحت بي وتفاصيله وصوته من طلب الچاي عقلي طار لهذيج الليله الشفته بيها أكتب ومبتسمه وأنفتح الباب بقوه يمه هاي أنتِ فززتيني تحممي دگي الباب

جنان ـ خلصتي كومي البيت جايف واني يا دوب الحك ملابس وطبخ وجهال حارث اجو يردون تغسل وتبدل واريگهم واغديهم وادزهم المدرسهوورجليه يوجعني ما بيه اغسل كومي غسلي الكراج

ـ يمه شخصلت بعدني توني فتحت الكتاب وهذا رابع يرادله دراسه مو قشمره مثل كل سنه من ورا جنانيج وشغلج الما يخلص ترى طكت روحي قسم بالله على ساعه أهج من البيت وأفتك منكم

" اشيل واركع بالكتاب واجتني كفخه طيرت الدرسته كله لاتضربيني اوووف عوفينييي شُـــــــــــــنوْ الواحد ما يدرس يصخم ترى غبت لن عندي أمتحان علمود ادرسه زين موو علمود أخدم جنانيج واربيلهن جهالهن والله ما صارت

جنان ـ شنو هذا الحجيتي صايره تحجين كلام اكبر من عمرج والله افصم ركبتج شو كومي شغل عمل بس هالدراسه عاد شيطلع منج أنطيج تأكلين وتنامين صايره بكد الفيل

ـ يمه مشاعر مو جيس حب

ـ اتفل عـــلىٰ مشاعرج شو كومي وغرفتج عود بعدين نظفيها يله نزلي اروح اشوفهم شسوا

ـ راحت وركعت الباب وراها باااااب من ينكسر تاكلين رأسي

ـ وكسرت عين جدي كومي عاااد والله اذا نزلت وما لحكتيني اصعدلج اهلس عطوبح عطب عطب يله

ـ هسه روحي على احفادج تلاحكليهم هسه تلكينهم حاركين البيت عـــلى رأسي ورأس الخلفوني من انعل هيج عيشه زقنبوت يخلفن ويشمرن عـــلىٰ العيال وحايرات بوظيفتهن ويكتللك القهر لو راضيات بس يتبجنن ويتشكن من العيال من انعل ابوجن لابو الحواجن سواجن جناين بيت علوان شلون عيشه زفره حظ الكواد

" شلت شعري كبايه لن نثر ما يوالمنا جهالنا وحوش كفيلك العباس يأكلونك أنت وملابسك .
" نزلت ولكيت رهف جيفتها تارسه البيت وريم الشعر منثور والوجه كله دبس وراشي كرهت الدبس من وراج سويده راح يصير بيج سكر ام دبك امشي غسسلي لا اسحلج المغسله وسخج كاتلج.

ريم ـ ما أنتِ وسخه

أسيل ـ تربات أسماء شتطلعهن الخلف عـــلىٰ الخلفوه اكيد هي معلمتجن ؏ هذا الحجي امشيي جريتها وغسلت الها وتنكز صفكتها براجدي ركدي بمكانج لا اشيلج واذبج بالبلوه ما صارت هاي بس امجن متوظفه .

جنان ـ اسيل والله اجي اصبغ جلدج عوفي البنات هنا جهال شمفهمن والله ايدج اكسرها د خل يجي ابوج اني اعرف شلون يربيج ولج جهال اخوانج مو جهال كواويد ما بكلبج رحمه عليهم

ـ والله ياريت جهال كواويد ولا جهال ابنج مو جهال حشا واحدهم سليمه كل واحد ناتفله للسان هطوله وفشار اني ما اعرف افشر بي ولدج مو مال خلفه بس مال نسوان وفراش كلت هيج واجتني جرتني من شعري كسرت الماسحه عـــلىٰ ظهري وطلبت من جهال يتفلون بوجهي اليوم متخبله كالبه جنيتها عليه مسحت وجهي وصعدت ركعت باب الغرفه دتشوف شلون دبرينها أنتِ وياهم

ـ ولج أسيل أسيل سليمه الكبور تلفج من بين البنات انزلي لا اصعد اخلص عـــلىٰ عمرج شجاج اليوم تخبلتي عليهم منو يتحملهم وين يولون تردين تعوف وظيفتها وتكابلهم لعد المن درست وتعبت موزين حصلت وظيفه حرامات

ـ فتحت الباب وجاوبتها والله مشكلتها شكوو تزوجت وتخلف وتشمر وتعالي اسيل ربي الها خلفتها وداري وغسلي وشطفي وكلي ونظفي وراهم كله براسي شنو مخلفتهم وناسيتهم لا رجال لا ولد لا تلد ما سالمه عـــلىٰ عمري فكييي عني أنتِ وجناينج من كطيعه كطعتهن

ـ خل يجي حارث وأني أعلمج اصبريلي أسيل تردين رجال والله ما ازوجج لو تموتين

ـ ساعة السوده صارت بيها أسيل بهل البيت الأكشر والله لو يجيني واحد حافي منتف اوافق عليه والله عسا ما جلب اجرب راضيه مهم اتزوج وافتك منج ومن جناينج
ما جاوبتني وتالي نزلت لن خفت تكول لـ حارث وحارث ما يتفاهم گبل ياخذني للبيت يمهم واضل اخدم بجهاله ومرته وأمي لا حس ولا نفس ما ادري هالجناين شمسويات الها ولعقلها اكص ايدي اذا ما طاكتها بسحر وفارات رأسها ومخليتها متشوف دربها لن هالفتره مثوله فدمره ساعه تحبني ساعة جنها جنيه سوده ولا عبالك أمي ، كطيعه تكطعجن يا نسوان أخواني

" دخلت سبحتهن ورامي كسر الباب يريد يدخل اخذت نفس وفتحت الباب وجع مو كتلك أسبحك ورا اخواتك شنو امك ما معلمتك حرام تسبح وياهن او كبالهن كديش انت كسرت الباب شو وخر اهناك اريد ابدلهن .

رامي ـ ما ما اسبح وياكم بيبي بيبي

أسيل ـ بيابه كملت عليه كملتهن ومشط وتعطير ونوب سبحت رامي والله زلمه واكفه اني بنية بيت اسبحه شگول عليج يمه ، زلمه وعاقل ما جاني من امداج يا اسماء يله امشي تغدى علمود ترحون المدارسكم واخلص من هوستكم شويه يله فضضني

" تغدوا وراحوا ضلت بس رهف الصغيره امي نومتها وغسلت المواعين هلكت قسم بالله صرت جنازه كعدت اشرب جاي والبيت نظيف وهدوء واهلي تغدوا وناموا وحسن ما تغدى راح يجيب مرته تكمل عاد تضل بس تحجي وتسمع حجي لامي بخصوص جهال وناسيه نفسها من تولي لدوام حالها من حال اسماء نفس الاسطوانه صايره مربيه الهن اغسل واشطف واوكل وانوم وادرس

" أنفتح الباب ودخلوا حارث وأسماء سلموا وحارث راح الأستقبال وأسماء وكفت تلقي الانظار

أسماء ـ ما شاء الله البيت نظيف جهالي ما مسوخين لعد ليش تتشگين منهم

أسيل ـ اي ما يوسخون لن اكو فلبينيه تفتر وراهم ريبورت مو مثلي

ـ يلة شصار قابل لما جهال أخوانج عوذه حتى المحنه تكاطعت هاي عود أنتِ عمتهم

ـ ما جاوبتها لن اذا احجي ابدع فخلوني ساكته وساتره عـــلىٰ رياشتي لا يتهلسن ريشه ريشه

" اجانا صوت حارث من الاستقبال وهو يكول

حارث ـ أسماء صيبلنا غده من هالموجود شوكت تلحكين تطبخين واني جوعان

أسيل ـ فاتت عـــلىٰ الجدر وين وين هذا غده وحصة حسن تردين غده طبخي محد مانعج

ـ لا والله وحسن عنده مره تطبخله

ـ وأنتِ اطبخي لرجلج

ـ هاا هيج صصار الحجي

ـ اي ليش حجيي بي شيء وحسن ساكن اهنا مو طالع فايت ياكل ويمسح ايده بالحايط .

حارث ـ أسماء جيبي رهف ولحكيني السياره وأسيل امشي ويانا

أسماء ـ والغده

حارث ـ بعدين نتسمم يله تحركيييي أسيل مو وياج

أسيل ـ بس باجر عندي دوام

ـ بالجنهم الحمرا عاد شكد مهتمه لدوامج اخذلج اجازه أسبوع حاب أستضيفج كم يوم عندج مانع

ـ ما اكدر عندي دوام ما حسيت غير اجه جرني من شعري وفتح باب سسيارته وشمرني بيها وصاح عليها هي ورهف اخذني حته اهلي ما بلغهم كله من امي هي مكبره رأسهم واذا احجي والله يقضي عليه شلون أهل طايح حظهم

" وصلنا البيت وهي التهت بنتها واني دخلت البيت افر بأذاني وعاط بيه

حارث ـ يله سويلي غده نص ساعه اذا ما جهز ما يجرالج خير

أسيل ـ اريد اكوله عندك مره خل تطبخلك بس سكتت لن مره كلتها وشبعت طن كتل ما يتفاهم مرته غاسله مخه غسل الزوالي اني شجاني ومنعتها خل يتغدون ويمشون ما اعرف اكظ لساني عنهم كبر وكعت برأسي انوب تعالي طبخي ونظفي أسبوع كامل اضل اخدم بيهم بس يا حسافه عـــلىٰ هيج اخوه يعاقب أخته تخدم مرته وجهاله

" طلعت دجاجه سلكتها وتبلتها وخليتها بالفرن ميت سم خليت بيها حته لو اخوي الاخ شابع اخته طن تكفخ ويهين بيها شسوي بي

" مكابله الفرن بس على أعصابي روحي مسحونه سحن قهر واجت الخاتون لابسه قصير والزنود طالعه هاي تسويلي أغراءت لو توصلي صوره عن الزواج حاجيتها عفيه شهل هالجراءه شوي استحي كولي حماتي بنيه

أسماء ـ ما شاءلله عليج كلشي تعرفين ام بيت من طبخ ونفخ وتنظيف فحرمات ما تعرفين المره شتلبس لزوجها كلت اعلمج بطريقتي مو تضلين مثوله وباجر عكبه تزوجين وتكابلين خلقته بثوب البيت مثل اختج هديل كلما نروحلهم نفس الدشداشه عفيه رجلها شلون ما يتزوج عليها ما ادري .

ـ شعليج بيها شدعوه هلكد مندقه منها لا يمج لا صوبج الحمدلله أهلي شابعيني تربيه وثكل مو بس خبز

ـ لا هواي شابعينج تربيه من لسانج الطويل وما تحترمين لا اخ ولا مرته وتالي اجيتي تطبخين بنفسج يله وين صار الغده حارث حبيبي تريد اسويلك مندي اصفر ويه دجاجه

حارث ـ لا

ـ هسه اجيب الغده كلبي

أسيل ـ فتحت الفرن واخذتها وراحت واني وراها عـــلىٰ زلاطه وخضروات وبيبسي واجيب واخلي كدامهم وانهضمت حيل دمعتي بطارف عيوني بس عاندت وكابرت ما بحيت رجعت المطبخ مكلوب عفته والله فلا اغسل هو راد غده وسويتله بعد شكوو ما اله وليه عليه بعد كافي راح يغيبني من المدرسه أسبو؏ .

" رحت غرفة الجهال اعرف مكاني لن متعلمه على سوالفه هو ومرته من يشوفني أعاند لو ارادد كبل ياخذني لبيته وأهلي لا حس ولا نفس والله بيت اخوج وما بيها شي ما يدرون الاخ مسويني فلبينيه لمرته وجهاله الواحد يحير شيحجي عـــلىٰ هالاخوه

" بقيت لليل نايمه ومنطيتهم ظهري وأسمع هوستهم وخبصتهم هي وجهالها بس ما أهتميت كملت نومتي وكعدت ولكيتهم طالعين وقافلين الباب عليه بالجذب ما كالي تعالي ويانا الحمدلله والشكر رحت المطبخ أكل لكيته مهجوم طابخه عشه الافنديه وكالبته سويتلي لفة جبن وكلاص جاي ورحت الغرفه .

" بقيت صافنه بلا هسه لو متزوجه جان رجلي يطلعني اني وياه ونفتر ونحب ونسولف مو مسجونه بين اربع حياطين وحاطيني ويه الجهال لاعبين بخقلتي مسويني دوشك كلياتي جفصوهن
لو بيت اهلي غسلي طبخي نظفي الجهال عينج عليهم اسيل جاي اسيل اكوي ملابسي اسيل جهال عينج عليهم مبتليه بالكل ودارستي باالزقنبوت والدفرات يله أطلع من الصف ما خلولي واهسس .

" تذكرته أخر مره شفته مروان الله أسمك شكد حلو ؏ گلبي فدوه لطوله شحلو ما توقعت روحي هلكد راح اتأثر بي .
"خرب بيكم اهلي أشتعلوا صفاح أهلكم ما تخلون واحد يفكر كله أسيل ركضي ركضي حتى نفسي ما منطيتها مساحه عود الصغيره ومدلله لا والله الصغير مجفوص ومنعول والد والديه .

" فزيت عـــلىٰ صوت الباب أنركع بقوه وصوت حارث عصبي الظاهر طلعوا وتعاركوا الله يدري شمسويه من مصيبه .

حارث ـ مو مال طالعه لا والله كتلج لاتلبسين هيج لبس لا عانديتني الا البس امشي نومي جهال لا ابتلي بعمرج والمطبخ ليش هيج وسخ ليش ما منظفته

أسماء ـ شلحك مو انت خبصتنا نطلع ونطلع وركض بدلتهم وطلعنا وبعدين اسيل مو موجوده جان غسلتهن شكو بيها المساعده حلوه شصصار عليها تموت قابل

حارث ـ أسسسسسيل ومرض طلعي نظفي المطبخ يله

أسيل ـ ما جاوبته عبرته بديت أغسل بالمواعين ونظفته وجلفته طلعت روحي كملت والبيت صار هدوء همزين نومتهم ما يضلون يلغون عـــلىٰ رأسي راديوا مو مثلهم

" مشيت للمغاسل وقبل لا اوصلها غرفة حارث بابها كبالي ومفتوح وأنصدمت باللي شفته حتى أطرافي تجمدت حارث وأسماء بوضع العين تستحي تباوع ما اعرف شصارلي باوعتلهم لن صايرين كبالي يبوس بشفتها وهي حاضنته كبل معدتي كلبت ركضت المغاسل وأسمع صوت حارث يحجي عليها

حارث ـ شفتيييي سوالفج وين وصلتنا شفتييييي خرب بعقلج أسماااااء

أسيل ـ أستفرغت كل الأكلته وغسلت أخذت الخاولي وأسماء واكفه فوك رأسي وتباو؏ بشك !

أسماء ـ مستشرفه حضرتج شعندج تباعين النا لازم عجبج المنظر

ـ أستغفر الله شتحجين أنتِ اكيد تخبلتي مشيت ولزمتني من ايدي

ـ شوفي لج سوالفج ما تعبر عليه هذا الأستشراف عاجبته وخابزته اكيد تباعين افلام وعجبج الشفتي وضليتي تباعين لن من شفتينا ماجان تمشين شگوو ضليتي واكفه

ـ يا مره خافي الله وعوفيني بحالي تخبلتي شهل الكلام بحقي عيب عليج أني بنية بيت وأنتِ صاحبة بنات خلي الله بين عيونج ودام ما تردين اباوعلكم عدكم غرفه وبيها باب قفلوا بابها متخافين بناتج شايفات اللي اني شفته شنو يكون موقفج ولو كبرن تترسخ الفكره أبالهن هاي اني موجوده وهيج لو ما موجوده جان شلون

ـ شوفي لج سوالفج ما يعبرن عليه وبناتي مربيبات مو مثلج مفلفه عـــلىٰ الرجال وتردين تزوجين علمود تخلصين من الخدامه بس لو تموتين ريحة الرجال ما تشمينها عبالج ما ادري شتسوين بجهالي وتعذبينهم وشابعتهم ضرب والله لا يرحمني اذا أرحمج وحده حقيره وحقوده

ـ الكلام وياج فارغ عفتها ومتت قهر أكيد امي حاجيتلها وعبالهم صدك كاتله نفسسي عـــلىٰ الرجال اوف يمه بس لو ادري جنانيج شمسويات الج هيج تعبديهن عباده كلشي تخلينه بلسانهن .
أي واني اكول هديل ليش وافقت بسرعه على الزواج علمود تخلص من الخدامه وما وكعت بس برأسي عاد بس اسلم بس على دراستي هالزواج هم مو أبالي
____

أزهار

ـ نزلت كاشخه وحسيت كشختي مالت مافيات ضحكت ويه روحي وأني نازله صادفتني امي بيدها بدله مروان تكويها لن راح يلتحق مشت وتهز بيدها

وصال ـ لا شغله لا عمله انوب علينا الوظيفه

أزهار ـ شتردين أسويلج مثلاً أغسل وانظف وأطبخ
وعلمود بعدين أصير مثلج اركض ورا الرجال علمود يرضى عليه وهو مو بحالي كاظي حياته شغل سفر وطلعات وأصدقاء ولقاءات عمل وتطوير أعمال

ولاتخافين عليه لن أذا أريد اصير ما اصير مثلج أصير مثل بابا وأخواني طموحين ويحبون نفسسهم وحياتهم وأعمالهم مو علمود رضا الناس !

" تفأجات من كلامي وضلت ساكته وقبل لاتمشي

وصال ـ هو تاليتج توكعين بواحد مثل أبوج لن يرفع ركبته زايد تنكسر وضلي رافعه خشمج اشوف تاليتج شلون وسفه تعبي بيج كمتي تعييرين بأمج وسفه

ـ أنتِ وصلتينا لهل المرحله مشيت المطبخ لكيت مروان ومجد وبابا يتريكون صباح الخير حضنت بابا مشتاقين صايرين ما نشوفك

كمال ـ أعمال باباتي شلونه الدوام سولفيلي

أزهار ـ عادي ماكو شي جديد حالي حال الموظفين وكلش حابه عملي لن باباتي حبيبي بطلي هو اختاره اله

كمال ـ الله ينطيني العمر ما اقصر وياج يله اكعدي تريكي علمود أوصلج بطريقي وسيارتج عصام تكفل يصلحها اذا ما تتصلح خل يجيبج المعرض اختاري اللي تعجبج

أزهار ـ فديتك أني ليش أحبك كعدت بصفه واجت امي كعدت وجهه مزعوج باوعلي بابا وغمزلي

كمال ـ شبيها أمج

مجد ـ بابا الافضل أنتَ تسألها شبيها

كمال ـ بيني وبين أمك لاتتدخل يله بابا أزهار اوصلج ومروان عود انت رجعها البيت مو تخلون أختكم

مروان ـ ان شاءالله

مجد ـ بابا مصروف

كمال ـ تدلل مجد أفندي بس شد حيلك بدراستك بابا وراك مشوار صعب يرادله زلم

وصال ـ زلم هه القبله شسوا عاد هو ما ادري ش عاشك من هالعسكريه طيحت حظهم بيها

كمال ـ كرت عينج حجايه ما تعرفين تحجين امشي بابا

أزهار ـ مشيت وياه وشكله عصب وانزعج امي أبداً ما تعرف تحتوي ومن سالفه شاهين كلبت عـــلىٰ الكل ما طلع شاهين هذا الملك سليمان

" وصلني الدائره وجنت أشعر بفخر كلش جبير وهو الوصلني نزلت وبوسته

كمال ـ ديري بالج على نفسج بنيتي ومن تطلعين أتصلي عـــلىٰ مروان وأني هم اكد عليه

أزهار ـ أن شاءلله راح الله وياه ودخلت الدائره وبلشت شغل ورشا كومه تحجي والله رشا راتبج حرامات بيج

رشا ـ ليش عوذه

ـ ما تحللين خبزتج كاظيتها سوالف وجاي بين الموظفين وشغل من ورا خشمج لا عبالج ما ملاحظه عليج

ـ وأنتِ شعليج خوما بس شغل شوي واحد يرفه عن نفسه عفيه شنو من وحده أنتِ عندج شغلج أهم من كلشي بالحياة بس عمي عائلتج كلكم صاحبين أعمال حقج .

ـ ما جاوبتها رجعت كملت شغلي الى خلص الدوام وأتصلت عـــلىٰ بابا رفضني معناها عنده شغل مهم اعرف هالحركه
طلعت وباوعت مروان ما موجود دزيتله رساله وين صرت مو عـــلىٰ أس أنتَ تمرلي تأخذني .

انتظرته ما رد رجعت اتصلت رفضني بسرعه انتظرته هواي ما بين عاد عصام روحه شكد طويله شوكت يصلح سيارتي واخلص من هالسالفه اروح اجر تكسي واروح هذا ما يجي وبابا تلفونه كله مشغول خل اروح احسن مشيت اوكف تكسي وطبكت تكسي كبالي والشكل مو غريب عليه وتذكرته انت ابو المعامله اجيتنا لدائره

ـ اي أني ليش مستغربه اصعدي اوصلج

ـ ليش يابه شكالولك عليه اصعد وياك

ـ ترى سايق تكسي مو كواد

ـ أستغفر الله روح ما اصعد وياك، انتظر اخوي يجي ياخذني تكدر تروح

ـ ياهو منهم مروان لو عصام !!!

ـ بتفاجئ وأنتَ شمعرفك بيهم

ـ سألت عليكم طلعتوا عائله عسكريه عمي دوله أثاري صدك أنتِ حكومة ابوج واخوانج كلهم عسكرين

ـ اي الحمدلله يزيدني فخر ويطلع من الاذاني هم

ـ دربالج لاتنفجرين لا يكوم يطكلج عرج

ـ شعليك أنتَ شكد فضولي مشيت وسمعت الباب انركع نزل وشكله عصبي كال

ـ منو الفضولي ولج شايفتني كاتل نفسي عليج وعـــلىٰ أهلج

ـ والله گول لنفسك رايح سأل عليهم هاي شيسموها بله وبعدين بتعبهم مو بتعب احد شكوو مضغوط منهم بيك خير روح صير مثلهم

ـ هيييي لسانج شو كمتي تلوصين بصف الأستكان احجي عدل لا انزع المستحى وياج وانعل اهاليتج كلهم شُــــــنو شايفه نفسج شوفه طبج ستين مرض عساج لاوصلتي بيت أهلج فوك زييتي اوصلج وهي الما راضيه كطيعه تكطعج من بين النسوان بنت الگلب .

ـ لاتغلط عـــلىٰ بابا خوش

ـ وأنتِ كظبي لسانج عن الاوادام مو خدم عند الخلفوج .

ـ أكلني بلسانه مو لسان حشه خبل قسم بالله شغل سيارته وطار بيها واني تعصبت واتصلت على مروان وجاوب عطت بي متكولي وين أنت ساعه علما تجي

مروان ـ مو اشتغل سايق عندج لاتصييحن خوش من انعل ابوج لابو وظيفتج يلة اخذي سياره وانكلعي للبيت والكواد يخليج اداومين بعد

أزهـــــــــــار ـ قطع الخط بوجهي هذا شبي الثاني هم أنكلب عليه خرب بيكم لسانهم متبري منهم حتى ابويه ينعلون أهل اهله بالغلط مالتهم
" رجعت اوكف سياره طبكت تكسي صعدت وانطيته الگروه وعنوان بيتنا وتذكرت عصبيته وكلامه هذا طالع من النسل بدفره عـــلىٰ هاللسان الشايله عزا لا اخواني ولا خبرهم خبال لايروح ولا يجي .

يتبع
____

الحلقه السادسه
_

أزهار

وصلت البيت مزعوجه وسيارة عصام بالبيت الافندي ما طالع من البيت وسيارتي على حطتها يابه شكد روحه طويله يشلع كلبي ويكرهوني بالوظيفه بهاي تصرفاتهم التجلط صارلي أسبوع أنشعل أهل اهلي من ساعة عطلت سيارتي شكد روحك طويله يا عصام اليوم اشكيهم لبابا والزلمه الما يصلحها

وصال ـ شبيج حاميه وأشو لوحدج أخوج مروان وين

أزهارـ شمدريني بي واجيت بتكسي

ـ أجيتي لوحدج بتكسي أزهــار مو عبالك مستجلبه شلون تجين لوحدج ابوج مو نبه عليج تجين ويه أخوج مروان

ـ مروان عنده شغل مو فاضيلي والله كولي لولدج خل يصلحون سيارتي وبابا اكد عليهم وهما ولا عبالك

ـ شتسوين بالسيارة منو صعدت قبلج سياره بس أنتِ بنت عم بنت خال ما شاءالله ابوج حتى سياره صعدج باجر عكبه يسلمج المعرض

ـ وليش مقهوره بدال ما تفرحيلي بابا مدللني واكفه تحاسبني والله يا يمه صايره ما اعرفج يوم عن يوم أنصدم بيج وكله بسبب شاهين اعرف دگج ومگدوج وين

ـ عشتوا شاهين الله حباه ما أخذج ولا ناسب أبوج

ـ ما جاوبتها واجه عصام باوعتلها وهزيت رأسي وهمست الها لاتكولين اله اجت بتكسي والله يكلب البيت على رأسج ورأسي .

عصام ـ هاا الگوه

ازهار ـ هلا بسيادتك

عصام ـ مروان وين

وصال ـ ما موجود طالع

أزهار ـ ما رد السلام لابسني حسيت روحي لوگيه خرب انسحبت وصلت الدرج وصاح وراي

عصام ـ أزهار منو جابج

أزهار ـ أجيت

ـ ادري اجيتي مو واكفه كدامي شُـــــــــــــنوْ خيالج هذا مـــــنو جابج شبيج أنلطمتي

ـ أي وشکووو تصيح منو جابني قابل اجيت ويه صديقتي رشا وهيج مهتم صلح سيارتي وفضني من هالسالفه

ـ لاتتنرررررين لا اكسر حلگج نشتغل عندج بنت الزفره وأنعل أهلج لابو سيارتج أكلتي روسنا بيها أمشي ولي

وصال ـ خلف الله عليك

عصام ـ لااااا ست الوالده ترى والعباس ما أقصدج بس الحجايه يله رهمت هيج، وأنتِ عاد لاتصيرين حساسه فدمره شدعواج من عصام جبيرج تتتحسسين شو سيد الوالد داخله وياه بسبات جليدي .

وصال ـ الأحترام أحترام

عصام ـ صايره تحجين بالجمل القائمه يرادلج تحيه مضاعفه ابوس رأسج وحقج عـــلىٰ هالخشم.

أزهار ـ عفتهم ويحاول يرأضيها وصعدت غرفتي طفرت وخلصت من للسانه وشوي وصعدت أسييا تضحك همزين شفناج عمي شدعوه .

أسيــا ـ تراضينا ولو أحجيلج شصار أخوج متغير ولا عرفته صاير فد حنيين فدووه لعيونه

ـ ترى هو حنين بس أنتِ بسلامتج ما ملاحظه عليه اي من تراضيتوا هم تعاتبتوا بينكم وياريت بعد ما تزعلين

ـ اي خل اسولفج

ـ تربعت وكعدت تسولف ومبتسمه وصلت السوالف ما تنحجي ولج هوووب هوووب خففي كولي اني بنية عيب شهل السوالف خرب بيومج أسيا لسانج فالته براغيه

ـ اي شگو بيها غير أنتِ صديقتي المقربه وأجي أسولفلج

ـ ميخالف ضحكنه واجانا صوت عصام يعيط

عصام ـ أسيــــــــا ومرض أسيــــــــا وصمخ

أسيــــــــا ـ هاا حبيبي أجييت نزلت ركض عـــلىٰ الدرج محتاج شي گبل جرني من ايدي أخذني الغرفتنا وركع باب شجاك توني عفتك كلشي بيك تقرب عليه وصاك على سنونه يحجي بعصبيه

عصام ـ شُـــــــــــنو جنتي تحجـــــــــين ويه أزهـــــار أحجيلي لا ومحمد اقضي على حياتج

ـ شحجي يعني سوالف بينا مو تعرف علاقتنا مقربه ومثل الأخوات وضايجه وصعدت سولفنا سوه هاي كل السالفه

ـ سولفتوا

ـ أي

ـ وبشُـــــــــنوْ سولفتوا ؟ .

ـ سوالف نسوان ليش تسأل

ـ سوالف نسوان كلتيلي هسه إذا احطج وأصير واحد أبن سطعش كلب وازورك جلدج احد يگولي لا اكو كواد يمنعني

ـ گـــــــافي عاد عصام حتى على أختك لاحكتني فوك ما متفاهمين وعلاقتنا حلوه وانت الما راضي شتريد لخاطر الله ترى أنت تحير اكبر واحد والله راح تخبلني وياك

ـ ليش ما تحبين الخصوصيه ترى الله ورسوله وصوا وذكروا بس أريد أعرف أنتِ شُنــــــوْ من طينه طينتج متوبين متجوزين ما تصيرلج چاره

ـ هو شکووو اكلتني حاصل فاصل شمسويه يمعود

ـ ما مسويه شي بس اللي صار بينا عند أختي هسه لو متزوجه ما يكتلني قهر أنلطم عـــلىٰ حلكي واسكت لن متعلم عـــلىٰ سوالفج ما برأسج خير وما تجنين عقل بس أختي بعدها بنية بيت تفتحين عينها عـــلىٰ هالسوالف مو أبتلي بعمرج

ـ عـــلىٰ هاي يمعوده اول تالي تزوج تعرف عـــلىٰ أساس متشوف مسلسلات وأفلام كبل ضربني كف ويحجي بعصبيه

ـ أستحي شويه وگولي أخوها واگف كبالي هذا عرضي من الله ياخذج كوه ترجعيني أقسملج وأعدلج أنتِ مو مال عيني وأغاتي ما دك بالقندره .

ـ طلع وركع الباب بكل قوته غمضت عيوني مقهوره منه ولازمه خدي مكانه الكف عـــلىٰ شُنو ضربتني عصام عـــلىٰ سالفه متسوه صاير واحد ما تنفهم وراح تموتني ناقصة عمر

" بقيت بغرفتي ما طلعت وهو ما شفته بعد ولأ أتصل لليل عمتي صاحتني

وصال ـ وينج لحد الان نايمه صار الليل جيبي كرم وتعالي تعشي الاكل برد

أسيا ـ جايه شلت كرم وطلعت لكيته كاعد يتعشى وعمي موجود وأزهار تأكل بهدوء باوعتلي ولاحظت صاير شي گبل غمزتلي وعصام باوعلي نزلت رأسي شويه وكامت

" عمي راح على التلفزيون وعمتي لحكته بالجاي بس اني وياه بقينا كاعدين بالمطبخ كرم اكل وغسلت اله وطفر عـــلىٰ أجداده .
"كمت الم المواعين وهو ما يأكل بس ساكت وكفت عـــلىٰ السنك أغسل بهدوء التفت ما لكيته رجعت كملت غسل ونظفت المطبخ ورحت الغرفتي حتى كرم عفته يمهم

دخلت الغرفه مغير ملابسه وطالع جمعت ملابسه الوسخه ورتبت الجربايه وتذكرت العشناه ليش يخلي ذكرى حلوه بينا ، لا والله مو مال ذكريات .

" بقيت أباو؏ التلفزيون مسلسل مصري وڛمعت صوت الباب دخلوا هو وأبنه نومه بغرفته وأجه غير ملابسه وضل بالداخليات وطفه التلفزيون والاضويه ونام ردت اكوله ليش طفيته بس سگتت ونمت والهدوء عم الغرفه

" أعتذر لا ما أعتذر لا اعتذر لا ليش أعتذر قابل أشسويت لا اعتذر شُـنـو أشسويت هو من نوع يقدس الخصوصيه أني فعلاً ما أتوب شمدريني حاسبتها مثل أختي وأكثر ونسولف هسه أعتذر اي أعتذر لا لازم هو يعتذر لن ضربني غمضت عيوني وأنداريت عليه لكيته صافن قربت رأسي عـــلىٰ مخدته وتلمست صدره وكال بهدوء

عصام ـ وخري أيدج

أسيا ـ حقك عليه

ـ شعجب خشمج يابس أعرفج ما تنزلين نفسج شصار واجيتي لو تعرفين بنفسج غلطانه ولو عادي عندج !

ـ لا مو عادي عندي خلص أني أعتذر منك وحقك عليه

ـ نامي نامي

ـ أنطاني ظهره ونام تقربت حضنته وابوس بظهره وكتوفه أموت عليك من تشيل خشمك عليه

ـ ما ينطالج عين تنجلبين

ـ أشكرك عفته ورجعت نمت لوحدي قهرني بكلمته أعتذرت اله وما أهتملي أني صوجي عـــلىٰ شُنو أعتذر ليش شمسويه عفته ونمت والصبح كعدت لكيته يغير ملابسه رتبت الجرجف ورحت غسلت وغيرت ملابسي وهو يرتب بروحه خلص وطلع شُـــــنو تطلع

عصام ـ لا باقي بالبيت

أسيا ـ لعد شو كاشخ

ـ كاشخ لنفسي الا أطلع كعدي كرم وخل يتريك زين

ـ طلع من الغرفه وكعدت كرم غسلتله عـــلىٰ السريع ولحكته هذا وين راح شفتي عمه وين عصام

وصال ـ ليش شمسويه

أسيا ـ هسه كوليلي وينه

ـ بالأستقبال

ـ ليش اكو احد جاي عليه

ـ لا منو يجينا من صباحيات الله

ـ كرم ضل يم بيبي هسه اجي مشيت وصاحت وراي عمتي

ـ وين موليه

ـ ما جاوبتها رحت الأستقبال وفتحت الباب بدون ما أدگه رفع رأسه متفاجئ من دخولي عكد الجواجب وشگله أنزعج من وجودي حجيت اجيت أتفقد ممتلكاتي هز رأسه وابتسم بأستهزاء أنوب خبلني بهاي الحركه

عصام ـ أول وأخر مره تتدخلين وما أدكين الباب

ـ وكفت متخصره وجاوبته شتسوي مثلاً گبل طبگ الحاسبه وكام بهدوء من يمشي هدوءه يخوف لزم الباب وصرت بحضنه يعني بنص صدره ضليت أباو؏ بعيونه مليانات شر مشكلته الموحلوه من يزعل يحقد صك عـــلىٰ سنونه وجاوبني بقله صبر

ـ شوفي وأمير المؤمنين أذا متغيرين تصرفاتج رأسج يتكسر أمشي طلعي برا وخليني أكفي شغلي

ـ ماشي رايحه

ـ روحي منو لازمج

ـ مو حاصرني بيديك وين اروح أنتبه عـــلىٰ نفسه وتأفف وكال

ـ روحي على أبنج وشكلج ما اريد اشوفه

ـ ماشي رايحه لبيت أهلي من تحب تشوفني تتندل البيت

ـ أنتِ روحي وشوفي يا كواد اليرجعج بعد كل مشكله ركضتيلي على أهلج .

ـ عفته ومشيت ولا مهتملي ولا رايدني اني شُـنـو موقعي بحياته مسويني مكفخه اله ولكلامه مثل السم هسه حجيت لاختك كلمتين خوما انطيت أسرار العسكريه مالتك يا زعلك الما يفض بيوم ويومين تشلع كلبي وما يكفيك بس سهله ابقى بزعلك شوف من يرضيك بعد احجي ويه روحي وهو بالأستقبال مية الف فكره اجت أبالي تالي أستغفرت ربي ومشيت

" الثاني يوم هو ساگت وهل الهدوء أخاف منه حتى ويه أهله ما يحجي كاعدين اني وعمتي وهو ومجد وأزهار وعمي يم بيت أخوه ومروان بالدوام نسولف وأزهار بصفي حجت

أزهار ـ عصام شوكت تصلح سيارتي فدوه

عصام ـ باجر

ـ وأذا ما تتصلح

ـ يصير خير .

وصال ـ أكول يمه عصام عبالي تأخذني للبيت أهلي أمي شوي صحتها تعبانه أريد أشوفها

عصام ـ قبل لا التحق أوديج

وصال ـ ماشي أبني أسيا ما تجين وياي هم تغيرين جو

أسيا ـ ضليت ساكته وهو جان يباوع التلفزيون عـــلىٰ مسلسله سوريه عيني عليه وعمتي تحاجيني بالي مو يمها

وصال ـ مو أحاجيج شو ساكته تروحين وياي

أسيا ـ بكيف عصام

وصال ـ يمه شتكول أنتَ

عصام ـ شکول عـــلىٰ شُـنـو

وصال ـ شُـنـو ما سمعتني شحجيت سألت أسيا تروحين وياي تكول كيف عصام شتكول يمه

ـ خل تروح

ـ ماشي لعد تحضري لن نبات يومين ونرجع وهم كرومي يتونس خطيه

أسيا ـ أنزعجت واحس نار أشتعلت بگلبي يعني باله مو يمي ولا يهمه أمري اروح اجي مو هامته جاوبتها لا عمه ما أروح أحسسن تصبحون عـــلىٰ خير يله كرم ماما كوم انومك بفراشك شلته وعاط وكام يبجي شمر الريمونت وعاط بيه

عصام ـ شــــــو عوفيييي ما يريد ينام هي كوه يله ولي

أسيا ـ نزلته ومشيت وعمتي كامت تحجي عليه

وصال ـ شجاك انهديت عليها ابنها وتريد تنومه