12





أسيل

ـ مسحت وجهي ونزلت وراها جايبين كومة لحم والمطبخ مليوص ونسرين نفسها تلعب من ريحة اللحم عود ما تحبه عشتوا بس يم العيال نفسهم تلعب ببيوتهم يأكلن الاخضر واليابس هيج فنود ما شايفه ، رفعت ردان ثوبي وبلشت اكطع ويه امي وحارث وحسن يسهمون بالاكياس شفافه

حارث ـ نوزع عـــلىٰ الجوارين والاقارب وعمامي ونسوي عزيمه بين الاهل مو هيج أحسسن

علوان ـ لاتعزم هواي بس النعرفهم عمامك وخوالك

حسن ـ اي هذا هو نسرين سجين من يمج

أسيل ـ كاموا يوزعون وخلصوا واتفقوا يسوون عزيمه جبيره وكاموا يعدون الاقارب وذكروا بيت عمي كمال

حارث ـ لازم نعزمه هو وعائلته

علوان ـ ماشي اني اخابر كمال وانت خابر الولد خاف بالدوام ملتحقين شوفهم علمود نعزمهم كلهم

حارث ـ ماشي يابه

اسيل ـ فرحت لن راح يجون بيتنا بلكي ترجع العلاقات مثل الأول ويجون لبيتنا ونروح بيتهم وهيج ونلتقي اني ومروان بس ما اظن لو يريد جان باوعلي من هذاك اليوم بس الاخ مبين عليه عاشك

" كملنا الهوسه وطبخنا الغده وصعدت لغرفتي سبحت وتمددت بفراشي حتّى تلفوني سحبوا مني لازم ارجع احسن علاقتي بامي واطلب منها تلفوني هيج أطك والله ولا شفته شنو نشر عـــلىٰ حساباته صار ايام ما شايفته أشتاقيتله يله راح يجي لبيتنا هو وأهله وأشوفه باالواقع أحلى يمتى تجي وتنور بيتنا بطولك الحلو يروحها أسيل

" ضليت بغرفتي وماخذتني الصفنه لبعيد هيج واصير زوجة مروان وأم مثل الامهات اللي رجلها بالدوام وبيتها نظيف ودافي وجهالها يكمزون يمها وتسوي فطائر ومعجنات كاعدين ومكابلينها علما تستوي وبهل الاثناء يجي ابوهم من الدوام ويركضون عليه يستقبلوا وينسون الفطائر اللي بالفرن اكلوا رأسي يمتى تسوي بس شافوا ابوهم نسوها ونسوني وياها واني واكفه على صفحه منتظرته يجي يبوسني وعبر عن الشوق بعد غياب مطول وننسى هموم الدنيا بعيون بعض هو اني نسيت العالم بتفكيري المنحرف هذا من طاح صبغج اسيل .

" واجه يوم حفله ختان مصطفى أبن حسن وكلب الدنيا بصراخه ونسرين خلته بحضنها وتخشبت هاي هي بعد وهاي رادتها يموتن عـــلىٰ الكعده شگو عليهن أسيل تكفي وتوفي .

" ظهر ما ضل عندي من الشغل والركض وجهال حارث يمنا من الصبح شمروهم وراحوا دوامهم رهف بوسخها وحفاظتها مليانه وملابسها ناكعه جايفه وريحتها تكتل ادري أممكم شُنو شغلها ياربي يخلفون واني مبتليه اخذتهم سبحت رهف ورضعتها ونامت وانوب ريم ورامي رامي كمز للاستقبال وريم كعدت امشطلها شعرها طويل وشالع گلبي طالعه على عماتها شعرهن طويل وحظ ماكو

جنان ـ صارلج ساعه خلصي عاد ورانا كومة شغل وتنظفين الاستقبال بيت عمج كمال يجون عيب نظفته الصبح ولا بين انتِ نظفي ورتبي شغلج مرتب يله امي

أسيل ـ انظفه واعطره من عيوني بس اريد منج شغله

جنان ـ خيرر شغلاتج ما تخلص اذا فلوس ما عندي راس الشهر وموشله ما ضل عندي يله جامعتهن اريدهن لاختج شو عـــلىٰ اساس تجي ما اجت

ـ لا مو فلوس اريد تلفوني حبابه ماما

ـ ميخالف تخلص العزيمه وتدللي يله كومي شوفي شغلج علمود تحفين وجهي هسه تجي وصال وجنتها وبنتها يلمعن ما ادري شيخلن لوجوهن اني هالايام ولا مخليه شيء لوجهي من ورا هالمزعطه

ـ همزين حسيتي

ـ وين يولون يا امي بيت جدهم وخطيه

ـ يله من تخلص العزيمه نروح الصالون سجى خابريها

ـ الله كريم ميخالف نروح من زمان مارايحيين يله كومي خذتنا السوالف

ـ ماشي كملت مشط شعرها وراحت وكمت على الاستقبال بكل همه ونشاط جلفت من كل گلبي ولمعته وعطرته وسمعت صوت هديل اجت طلعت من باب الخارجي لك هلا حضنتها وابوس بيها شتاقيتلج

هديل ـ واني اكثر والله شلونج شخبارج

أسيل ـ شلوني بعدين نسولف تطولين لو تروحين

ـ لا باقيه يومين

ـ اي زين وطلعت امي تبوس بيها وبجهالها طارت بيهم باوعتلها هم تحبين جهالي مثلها كفختني وكالت

ـ انجبي خفت رأسج أنتِ وجهالج كملتي شغلج غسلي الحوش

ـ ماشي هما شوكت يجون علمود ليش اغسله من هسه ويتوسخ

ـ يجون عـــلىٰ العشه

هديل ـ منو

جنان ـ بيت عمج كمال

أسيل ـ تغيرت ملامحها وسگتت عاد امي كالت

جنان ـ بس كمال ولده مروان وعصام وصال خابرتني وتعذرت جنتها اسيا تعبانه حملها مخطر وما تكدر تعوفها كالت غير مره يجن

أسيل ـ لا حرامات

جنان ـ يله يمه هديل اتفضلي رجلج لعد وينه

هديل ـ وصلني وراح گال المغرب يجي على العزيمه

جنان ـ هلا بي يله يمه فوتي أسيل غسلي الحوش ونشفي زين

أسيل ـ اي ماشيي دخلن واني غسلت الحوش ونشفته ولحكتهن لكيت هديل كاعده تغير ملابسها وامي تبحوش بالكنتور وطلعت الفلوس الضامتهن خلتهن بيدها

جنان ـ هاج يمه همزين جيتي جان انصرفن اخذي مصرفج

هديل ـ مشكوره منو ومنو عازمين لعد غير بيت كمال

جنان ـ ما ادري ابوج واخوانج عزموا بس العرفته فاضل وكمال وولده ورجلج وخوالج هاي هيه والله ما بيه حيل عزايم ولما اسيل وياي اوكع على صفحه ساتره عليه

هديل ـ هاا وأسيا مرت عصام شبيها كلتي وضعها مخطر

جنان ـ عدها ولاده مبكره ولازم تضل نايمه يخافون تولد قبل اوانها شوي حملها صعب ولادتها أصعب لهل السبب يله يمه غيري ملابسج ولحكيني تساعديني

هديل ـ ماشي يمه هسه الحكج

اسيل ـ طلعت وضلينا لوحدنا لو تدرين يجي لبيتنا ما تجين

هديل ـ اي والله ما اجي بس صارت ونوب راح يلتقون هو وسيف

اسيل ـ شعليج أنتِ قابل بكيفج وسيف ما يدري بي هو خطيبج السابق مو

سيف ـ لا والله ما كايلتله عوفينا من سالفته خل نكوم نساعد امي دام اجيت امي راح تذب عليه الطبخ متاكده ههه

اسيل ـ اكيد ماكو مهرب كمنا اني وياها وصارلي واهس اشتغل ولا تعاجزت لن كظيانها بس نسولف وما رضت على تصرفات أهلي بس شطالع بيدها عليه

هديل ـ هما هذول أهلي من يوم يومهم هيج وأمي عوفج منها ترى بس وياج وكحه هي فقيره ومغلوب على أمرها وحارث مستقوي من يومه تذكرين من فسخت الخطوبه شسوا بيه كرهني بعيشتي خلاني أتمنى الموت وما احصله كلمه والثانيه عصام رجال هم ينرفض ليش ما ينرفض على راسه ريشه مثلاً

أسيل ـ عليج الله هديل ما متندمه عليه لن جان حبج الأول ويجمعكم حب قوي صفنت وكامت تشتغل سريع

هديل ـ لا يبووه عـــلىٰ شــــــــــنو أتندم خلصت منه ومن خشمه العالي فارض حكمه عـــلىٰ الكل لا حارث ولا خبره
مرضى نفسسسيين .

ـ اهاا هيج الحجيي

ـ اي هيج ولاتضلين كل شوي ناطه بسالفته لاتسمعج نسرين ويكومن يفسسرن عـــلىٰ هواهن محد يرحم حال احد وكلها صايره تخوف تزوجنا وكلمن شاف حياته والله يوفقه ويسعده .

- ماشي خيتي سگتنا ورجعت اكمل شغلي سوينا مقبلات وكلها هديل جهزتهن بس أني عـــلىٰ ايدها ساعدتها اكلنا كم لكمه وكمنا نطبخ وهديل لزمت الطبخ وامي يمها أشراف توجهه هيج وهيج بس هديل معدله ما شاءلله عليها .

" جهزت كلشي على الكاونتر واريد يصيرلي مجال اطفر ارتب نفسيي ماكو البيت لوصه من الجهال واسماء اجت وكعدت بغرفة نسرين وسدن بابهن وعافن جهالهن تكمز مثل القروده ولا اجت كالت خل اساعدهن شكد حقيره بس ياكلن على الحاضر .

" جنا نطبخ بالحوش عـــلىٰ جهه وهديل كاعده تشخل التمن وسمعنا صوت وحارث طلعهم شمدرينا جوا واكفين نشتغل ودخلوا علينا حارث وسيف وبابا وحسن طلعوا
يستقبلوهم وامي تقدمت تسلم عليهم يبووه شافته عيني طالع هيبه شهل الجمال ياربي فدوه لخلقتك وعطاياك

" نسيت الكل وضليت صافنه وتقدم سلم عليهم كلهم و؏ امي وهديل وكفت على صفحه وتوترت وتعصر بيدها وتقدم عصام على امي باسها من رأسها وكاموا يسولفون ما اعرف شكالتله وكام يضحك وباوعلنا وهديل اجت عينها بعينه كبل صدت وجهه كامت تموت

عصام ـ شلونج أسيل

أسيل ـ الحمدلله بخير الله يسلمك أنتَ شلونك

عصام ـ بخير الف الحمدلله شــــــــــنو هذا عمه مسويه أكل لـ الاوادم كلها الظاهر عمي مثخنها وياج بالعزايم

أسيل ـ يحجون ويضحكون ونزع حذاءه ودخلوا ومروان سلم على امي واني وراها عفيه من ثكل شايله ولا يباوع ولا يسلم انقهرت شدعوه عليك نزع حذاءه ودخل وراهم
وأستلمتنا امي يله ويله دتنطينا مجال خل نشوف نعمة الله خوما حرام علينا

جنان ـ يله يله يمه بسرعه هسه اخوانجن يخبصونا يله أسيل شبيج تخشبتي ولج تحركييي

أسيل ـ اي تحركت شبيج انكرصتي وكرص عبرتها ومشيت للمطبخ باب الاستقبال مفتوح كبالي عزا يمه گلبي عاد حسن كام رد الباب خلي مفتوح شبيك يحظي خل يتنفسون هوا نقي عـــلىٰ حظي خل نشوف هالحلو .

" واجه وكت الخبصه وكاموا يصبون العشه وحارث خبصنا يله ويله والله ثولنا ثول لما كملنا صب كعدت تعبانه وهديل كعدت توكل جهالها باوعتلها وهمست شفتي شلون تسلاموا هو وسيف

هديل ـ أسيل مو وكت هالحجي اسماء اجت سگتي

اسماء ـ خلصتوا

أسيل ـ اي

اسماء ـ منو ومنو جاي من بيت كمال

جنان ـ بس كمال وولده

اسماء ـ شعجب وزوجه عصام ووصال ما اجن

حنان ـ مرته حامل وحملها مخطر وتعبانه غير مره يجن

اسماء ـ اي ما تتحمل ناعمه وحيلوه هذيج المره شفتها خطيه عمي حقها ما تحمل ماخذتلها واحد دنگه خوما فريخ دجاج مهلس

اسيل ـ عرفناها تبسمر وتقصد سيف لن قصير وضعيف هديل غمضت عيونها تطلب الصبر واني بالكوه متحمله وساكته عـــلىٰ ساعه اشيلها واجظعها بالجدر

جنان ـ كولي ما شاءلله لا اطكينا بعين الولد عـــلىٰ سلامته

أسماء ـ لا يبووه عـــلىٰ شــــــــــنو اطكه عين عندي مثله هو وحارث نفس الشي سبحان الله اني هم دومي حملي مخطر وضعي يتعب كلش بالحمل

هديل ـ بصوت ناصي أستغفر الله هاي وين تريد توصل بحجيها زودتها هواي ما ضل عيب ولا مستحى

اسيل ـ سگتي بالكوه ساگته عبرتنا وفتحت الجدر وكامت تصب الها اخذت صينيه ومشت لغرفه نسرين وهديل عافت الاكل من ايدها وكالت

هديل ـ يمه جنتج زايعه المستحى متكول هاي بنية بيت شــــــــــنو ما اتحمل مو عيب شكوو تبسمر بكلامها ترى سكتت وعبرتها لن خطار كاعدين

جنان ـ عوفيها ختولي تحجي تحجي وتمشي شعلينا منها تكول اللي تگوله وشتبسمر خلقة الله هاي كلمن انطاه وفصله لا كيفها ولا كيفي وكيفج اخلاق سيف تعادل كننوز الدنيا وما بيها يكفي شايلج بالصلولات لا زعلانه لا شاكيه لا يضربج لا يغلط عليج لا متجاوز عـــلىٰ اهلج محترمج ومحترمنا رجال بي حظ عيني هو وعيني طوله تروحله فدوه من خفت وجهها ختولي ما عليجن منها ولا تردنها خلنها تحجي وتنجب لوحدها

أسيل ـ هديل سكتت خطيه وامي ما قصرت لن تحب سيف هواي وتعزه حاله من حال اخواني هو خوش رجال ومرضي ومحترم الله يحفظه واحنه نحجي بي دخل علينا المطبخ وباوع لجهاله ومرته

سيف ـ هاا عيني تعيشتوا هديل تعشيتي روان بابا اكلتي

هديل ـ اي عيني تعشينا الحمدلله وأنت شو كمت

سيف ـ اكلت الحمدلله وكلت اشوفكم

جنان ـ تعشوا يمه داز جثير

سيف ـ عاشت ايدج عمه الزاد طيب لن نفسج طيبه

جنان ـ بعد عيني عليك بالف عافيه

أسيل ـ مشه المغاسل يغسل وامي ردت الباب لن عصام طلع وراه يغسل هديل مدت راسها باوعت ورجعت تكمل اكلها وتوكل جهالها وأني باوعت هذا لحد الان ما كايم جن جوعان بعده سوده عليه اكل عليك بالف عافيه

" غسلوا واجوا وعصام رن تلفونه وراح عـــلىٰ صفحه ضل يحجي شوي واجه لـ الاستقبال وطلع الحلو راح يغسل اريد اباوع وامي طردتني ورزلتني ما خلتني اشوف كلشي غسل ورجع

حسن ـ يله جاي جاي

أسيل ـ اي هسه محضره الاستكاين كبل صبيتلهم واخذه وبدأ الهوسه عـــلىٰ اصولها وتكربست برأسي رفعت ردان ثوبي وبلشت اغسل المواعين كملنا وتعشينا وشربنا جاي حتى الحوش امي جلفته وغسلته طلع يلمع ما خلينا هوسه أبداً وهما بعدهم كاعدين بس اسمع صوتهم وضحكهم الظاهر الكعده حلوه كعدوا عمي البيت بيتكم .

" بالمطبخ واكفه وسمعنا صوتهم كاموا راح يرحون هديل جانت برأ واجت وجهها مخطوف نوميه شبيج كمتي تموتين

هديل ـ ليش ما كلتي راح يكومون سوده بوجهج

أسيل ـ شگوو شبيج

هديل ـ طلعوا وهو طلع أول واحد وشافني وعكد الحواجب موو حواجب ولا نظرات عبالك ملك موت وقبض روحي باوعلي لو موتنييي ما اريد نلتقي ما اريد لو ادري معزومين وهو بينهم موجود فلا اوصلكم .

أسيل ـ شمدريني يطلعون وأنتِ لحكتي ابنج للمغاسل قابل متقصده تشوفينه طولج ونظراته أحتمال مو بقصد هو هيج يباوع للكل بس أنتِ كمتي تخبطبين وتفسرين عـــلىٰ كيفج من نار گلبج منه وعليه

ـ سسگتي أسيل سسگتي

ـ سگتنااا عمي اخذت بنتها ومشت لغرفة أمي واجت اسماء هي ونسرين هسه طلعن من الكهف بعد خلصت العزيمة والمواعين انغسلت والحوش انجلف طلعن روسهن وكامن يصبن الجاي ويشربن عفتهن واجه حسن شايل مصطفى وبحضنه كومة فلوس كلها اوراق انطاه لامه ورجع الاستقبال يمهم .

رحت يم هديل وعصبيه عـــلىٰ جهالها شجاج تخبلتي شكووو قابل شصار شافج لو اخذ روحج خوما حاجاج

هديل ـ لا يمعوده يحاجيني انوب هاي العايزه اووف ساعه السوده الجيت بيها لو ادري سليمه يجي اكسر رجلي وما اوصلكم

ـ سليمه نوب بابا شبيج تخبلتي هو شعليه حاله من حال اهله الرجال بحاله ما شفنه منه شي موزين بس أنتِ كمتي تموتين شجاج ما ادري بعدين هو نساج ومن زمان ويكولون يحب مرته يموت عليها جن ماكو نسوان غيرها

ـ وشمدريج أنتِ يحب مرته يموت عليها

ـ شــــــــــنو شمدريني أمي بس تسولف بيهم من زعلت وزعلهم صعب ولن يحبها رجعها ما اعرف هي شمجفصها بكلامها بس كالوا هي السبب ما تعرف اطباعه بس مع ذلك يحبها ويريدها ورجعها .

ـ واحنه شعلينا رجال ومرته سدي سالفته

ـ اي شعلينا والله سالفته مسدوده بس أنتِ فتحتيها هديل تخطي فدواتج ترى أنتِ عفتي وهنتي رجولته وتخبل وراج ونكز بإيده ورجليه بس علمود الخطوبه لاتنفسخ وتالي فرضتي كلمتج عليه وعفتي وخليتي مثل المذبوح عـــلىٰ النص ترى أنتِ اذيتي وتركتي والرجال مابي عيب ولا ذنبه الذنب منج أنتِ ما تحملتي أطباعه وقساوة رجولته وفرض حكمه ما تحبين هيج وعفتي

" لهذا هو عايش حياته ومن هذاك اليوم لهل اليوم ما حاجاج ولا كرب كرباج لاترجعين عليه وسليمه وحجيج مدري شلونه كل اثنين ما تفاهموا وهاي هي كلمن شاف حياته ، سگتت ما جاوبتني حسسيتها انقهرت وأني يمكن طوختها عليه اسفه مو قصدي

هديل ـ لا يمعوده عادي ولا يهمني أصلاً اي سولفيلي عليج

أسيل ـ بعدين نسولف غير يوم أنتِ اليوم تعبتي واني هم الله وكيلج ماكو عظم بجسمي صاحي نحجي وصاحوا عـــلىٰ جاي اي اجييت عفتها ورحت صبيت الهم الجاي وضليت بالمطبخ كاعده حضرت الفواكهه والحلويات وانتظر يجون يأخذونها وبالي وتفكيري يمه انوب كل ما اشوفه هالحب يتضاعف وكمت اموت على الكاع يمشي عليها سحلت نفسي سحله اخت الصدك وكعت بحبك يا مروان وشلون تكون نهاية هالحب ما اعرف
____

أزهار

ـ يوم الاحد يوم الدوام من الصبح كاعده ونشيطه عكس باقي اليوم والليل ما نمته لما صبح الصباح هيج لحالي بالي مو صافي وأفكاري مشوشه ساعه يخطر ؏ بالي وأضل هايمه بصوته وسكرانه بنبراته ورجولته وعصبيته وساعه أكعد أعقل ؏ نفسي وأنفض هالافكار من راسي بس شعور مو بالأيد من يتغلل داخلك وشوي شوي يبدأ يتملك كل جزء من خلايا عقلك وكل ما تحاول تحارب هالشعور يتمرد أكثر .

" كملت مكياجي ورتبت شكلي وحجابي ضبطته القيت نظره أخيره كلشي تمام ولبست الستره مالتي وشلت جنطتي وأغراضي ونزلت شعور فرح خوف أرتباك مرافقني.

" صباح الخير

وصال ـ صباح النور ماما كعدي تريگي

كمال ـ تأخرتي بابا أخاف الولد يجي وأنتِ لحد الان ما متريكه عيب من أول يوم تأخير

أزهار ـ أبتسمت وكعدت وياهم واجه عصام شكله مزعوج سوه كهوه مره وكعد يشربها وصافن ماما وبابا صافنين عليها لن وضعه ما يعجب ، بهل الاثناء رن تلفون بابا

كمال ـ أي ابني اجتي يله بابا أزهار الخط اجه يم الباب

أزهارـ كمت وبابا صاح المجد يوصلني وخفت عصام يكوم بس أبداً ما تتدخل ولا حجه يشرب كهوته بهدوء مميت
يله ماما باي

وصال ـ الله وياج حبيبتي

أزهارـ طلعت ومجد كدامي فتح الباب الحوش ماكو احد سلم عليه واني صعدت بدون سلام وشغل وطلعنا وراه مُباشرةً باوعلي بالمرايا وگال

هشام ـ شــــــــــنو ما نعجب حضرتج تصبحين علينا

أزهارـ لا العفوا بس جنت مستعجله

ـ أطلبج أعتذار من هالخشم اليابس

ـ ؏ شــــــــــنو أعتذر يابه.

ـ ؏ موقفج القديم شــــــــــنو نسيتي

ـ لا ما نسيت شگد قديم لحد الأن أبالك

ـ ولا انسى ليش هيج يوم ينسي

ـ أبتسمت كيفك لاتنسى وأعتذار ما معتذره أنتِ هم دعمتني وخسرت سيارتي بسببك ، ضحك وضحكته شگت گلبي وابتسمت وياه عـــلىٰ الواهس

ـ لاتعتذرين عمي على راحتج

ـ وصلنا فرع وطبك يم بيت وشوي وطلع أستاذ احمد سلم علينا وكعد بالصدر وباوعلي متفاجى ومصدوم

أحمد ـ بحلم بعلم هشام اخاف فاقد الوعي هاي الوكحه ام خشم شجابها وياك شلون تصعدها سيارتك بابا نطلبها فصل عـــلىٰ سالفتها ويانا

أزهار ـ ليش يابه ضحكوا بالاخص هو يحجي وعيونه ما يشيلهن عني أستاذ احمد ضحك وكال

احمد ـ عمي أنتوا بلابل حب بس تبييعون ثكل برؤوسنا

أزهار ـ سکتت وأستحيت يبوووه هو هم سکت وصلنا رقيه واجت وطلعنا اكثر شي منطلق ويه احمد سوالفهم عـــلىٰ الشغل والدوام والتزامات وعرفت هو وحيد أهله والمعين الهم وعنده أخوات يدرسن من خلال حديثهم أستسرقت هالمعلومات

" وصلنا الدائره وبدخولي رشا صارت بوجهي وأستغربت شكلها كالبه خلقتها مكياج طوخ صفنت بوجهه وهي حسيته أدور على شيء وتلفت وراي

رشا ـ شلونج أزهار أخبارج

أزهار ـ زينه وأنتِ شو ما تتصلين أختفيتي فدمره

ـ والله ملتهيه تعرفين دوام وبيت مليان جنايين وشغل وطبخ ونفخ يا دوب الحك اكمل شغلاتي اي هسه ما علينا منو جابج اقصد منو وصلج لدائره

ـ شــــــــــنو هو تحقيق من صباحيات الله

ـ شــــــــــبيج هو سؤال شدعوه عليج

ـ ما يعجبني اجاوبج شــــــــــيئ خاص بيه عن أذنج اروح اشوف شغلي مشيت بس حسيتها راح تنفجر لن سؤالها عن منو وصلني ما مرتاحتلها وطريقه مكياجها والتموع مو راحه هالبنت عجيبه غريبه متغييره فدمره ولا عبالك رشا عرفتها وصادقتها بالبدايه .
كعدت وبلشت شغلي وأني اشتغل وصلتني رساله من هشام كاتب بيها

هشام ـ أزهار رشا أبتعدي عنها وحده ما مرحمنه خليج بعيده عنها أثناء الدوام وبعد الدوام أنتِ أكبر من هل النماذج التعبانه

جاوبته ـ ليش شــــــــــتعرف عنها

هشام ـ شــــــــــنو ما مصدكتني

ـ لا مو هيج القصد بس المعنى من تحذيري منها شــــــــــنو سببه

ـ وحده تركض وره الزلم شتترجين منها ترهم تكون صديقه وتمشين وياها سحلت نفسها بالقندره بس علمود أباوعلها

ـ شيءخاص بيك أنتَ وياها ليش جاي تحجيلي بعدين هي فعلاً تحبك ومعجبه بيك

ـ بس أني گلبي مو يمها ولا أبالي ولا باوعتلها ولا انطيتها أمل اني من احب احب ناس مثقفين واعيين وعاقلين

ـ سحبت نفسي وما جاوبته بعد رجع دز

ـ أكولها كدام عيونج وخشمج اليابس تطلع أحلى

ـ أبتسمت وخجلت نوعاً ما وضحت الصوره كامله بس احاول ما أباوعلها بنظره اوضح أستغبيت هيج أفضل .

" خلص الدوام وطلعت ورشا وراي وكفت بصفي عود زعلانه ضربتني على كتفي وضحكت

رشا ـ شــــــــــبيج يمعوده شو صايره خشم علينا

أزهار ـ أنتِ شــــــــــبيج متغيره عن قبل ما اعرف گلشي بيج متغير طريقه مكياجج لبسج هواي امور

ـ شــــــــــنو حرام أتغير حالي من حالج لو بس أنتِ يحقلج تتونسين وتروحين صالونات راقيه حلال عليج وحرام علينا والله عمي أبوج مدللج وهذا الدلال مخليج هيج رافعه خشمج على الاوادم

ـ مو هيج القصد تجاهلتها رجعت عادت حركتها أستفزازيه

ـ أي عوفينا هسه ما كلتي منو يجي يأخذج للبيت

ـ محد

ـ شــــــــــنو أبوج ما يجيج لعد ويامن اجيتي

ـ ويه هشام اروح وياهم بالخط يله باي اجه

ـ شــــــــــنو شــــــــــنو شــــــــــنو ويه هشششام شو ما كلتيلي وهشام شــــــــــلون قبل يأخذج وياه مو عـــلىٰ أساس ما يأخذ موظفين وياه ورفضني وأنتِ دعمتي سسيارته شجاي يصيررر أزهار

ـ يمعوده شــــــــــبيج شيصير مثلاً بابا حجه وياه وأتفقوا وحلوا الموضوع وأني ما ضابطه السياقه هواي وقبل اروح وياهم شــــــــــبيج كبيتي

ـ لن تعرفين أحبه وأموت عليه وتالي يأخذج وياه بالخط وأني رفضني ويتحجج مية الف حجه طلعلي بيها

ـ ما أعرف مشكلتج أنتِ اني مالي شغل يله هشام ينتظر من رخصتج مشيت وهي ؏ نار فتحت الباب وصعدت جنت أول وحده اجه مرحبا

هشام ـ شــــــــــنو حجيت أني

أزهار ـ عفواً

ـ ليــــــــــش ما تأخذين حجايه

ـ منو أنتَ أخذ بحجايتك

ـ هاا منو أني هم صدك.

ـ شغل السياره ولفها سريع صحت بي عـــلىٰ كيفك لاتكلبنا يمعود

ـ لاتخافين أني مو مثل سياقتج أنتِ ضبي لسانج ما تموتين

ـ أسم الله عـــلىٰ عمري.

ـ الف مره اسم الله

ـ بعدت نظراتي

ـ باوعيني لاتبسلين وجهج بالمگلوبي

ـ عصبت وجاوبته اهووو عفيه هشام شتريد ترى بزعتني

ـ رايدج تحسسين من عساج لا حسيتي هذااااا احمد وين وله اريددددد انكبر بيتي

ـ صار عصبي وأنزعج وأجه احمد ورقيه وشغل وطلعنا حتى بالطريق ما حجوا وصلهم وأني بالاخير وصلني ونزلت وباوعلي بنظره حقد مشيت وهو ضل واكف تجاهلته ودخلت بعدني ما وصله وصلتني رساله

هشام ـ الله ياخذج يالخبله

أزهار ـ أبتسمت ورجعت التلفون ودخلت البيت هدوء كبل صعدت غرفتي سبحت وتمددت وبالي كل اللي صار بهذا اليوم جان يوم لطيف خفيف رغم تقلبات مزاجه وعصبيته الحلوه .
_______

أسيا

مرت أيام وكل كلام ماكو بينا مثل الغربه ويحتاج شيء هو يسوي بنفسه ولا كأنما اللي وجود بحياته حزت بکلبي وسگتت.
متمدده بفراشي وكرم نايم بصفي دخل اخذ ملابسه ودخل الحمام سبح وطلع رتب روحه خله عطورات وكشخ عـــلىٰ أخر حبايه وكف ويرشش عطورات نكع روحه اخر شي شال السويج والتلفون وطلع كسرت الصمت بينا وحجيت وين تروح مشه بدون جواب ولا حتّى نظره بس ردة الباب وراه جان بيها صوت وخفيف عيشني الهدوء بكل تفاصيله المميته .

" سحبت تلفوني شاشته متكسره بالكوه تبين أتصلت عليه ورفضني ورجعت اتصلت مره ثانيه وغلق التلفون متت قهرر يمه شصار بيه تشعوط دفرت الغطا وكمزت وراه بدون حجاب الصاله فارغه فتحت الباب وكفت بالطرمه أباوعله هو وعمي واكفين يحجون ومروان يشغل السياره يارب لك الحمدلله يعني رايح وياهم عدهم طلعه سوه مو لوحده واني أباوع لمحني وجه نظراته ناحيتي عبالك سهم وصوبني بنص گلبي اخذ روحي بجيت دموعي هي جانت تعبر عن حالي اني لما احبه واخاف النسوان تاخذه مني ما اسوي هييييج شجاريلي لما حبك وغيرتي عليك .

مسحت دموعي وهزلي رأسه معناها طبي داخل هزيت رأسي برفض عاف أهله واجاني واني حافيه وشعري نازل عـــلىٰ ظهري ودموعي تجري مثل الشلال تقرب لزمني من ايدي وسحبني لداخل ورد الباب وراه حجه بثكل

عصام ـ متكوليلي شمطلعج وحافيه وبدون حجاب

أسيا ـ بس أبجي حسس بيه ميته عليه وبعده موتني

ـ روحي الغرفه يله كدامي

ـ وين تروح جاوبني بعصبيه

ـ وين رايح معزومين اني وابويه ومروان عـــلىٰ عشه

ـ صفن بوجهي ومروان صاح عليه

مروان ـ يله عصام راح نتتأخر عيب ينتظرونا

عصام ـ اجيت يله روحي الغرفتج

أسيا ـ متطول مو

ـ فيمالاا

أسيا ـ راح وضليت صافنه عـــلىٰ طوله لما فتح باب السياره وصعد تمنيته يباوعلي ما باوع رديت الباب ورجعت وصارت عمتي بوجهي

وصال ـ شمطلعج وحافيه وشعرج وبدون حجاب ومدلعه ولج حموينج بالبيت تخبلتي عـــلىٰ عمرج

أسيا ـ لحكت عصام جان رايح

وصال ـ اي معزومين عـــلىٰ عشه ليش لحد الان متزاعلين

ـ ما حجيت

ـ لمي زلمتج وأحتويي لا يروح منج من ورا مشاكلج والنگ مالتج يله ما صار شي روحي الغرفتج ارتاحي انتبهي لنفسج امي

ـ ماشي عمه

ـ رجعت الغرفه وأتصلت عليه مغلق ليش ما تفتحه تريد تموتنييي قهر كمت غيرت ملابسي وطلعت ولكيت ازهار تراسل ومبتسمه كعدت بصفها يم منو معزومين ما عرفتي جاوبتني وهي تكتب بالتلفون

ازهار ـ يم بيت عمي علوان

أسيا ـ منو هذا

ـ بيت ابن عم ابويه هاي المره اجو اسيل وجنتهم اسماء وخالتي جنان ما تذكرين

ـ اهاا هذول وهاي اسيل متزوجه عزابيه

ـ اسيااااا ترى صايره فدمره مكروهه شدعوه مو لهل الدرجه عاااد غيرتج هواي صايره مفرطه خففي راح تنخنكين الرجال ويهج من وراج

ـ شنو مناسبة عزيمتهم

ـ كالوا حفله ختان أبن حسسن .

ـ وشعجب خاله ما راحت وياهم

ـ علمودج ما راحت عصام ما قبل كال منو يضل بالبيت يمها اذا تروح اني ما اروح عاد امي كالتله روحوا عود اني وازهار غير مره نرروحلهم خابرت خاله جنان وشرحتلها وضعج وتعذرت منها

ـ نهضت بفرح صدك هو هيج گال

ـ اي شبيج انخرعتي؟

ـ متزاعلين وطاكني الجفاف وقلة الاهتمام

ـ علمود اتوبيين خوش يكعدلج گلب عصام عاشت أيده

ـ عابت، اكول ويامن تحجين

ـ هاا لا هيج مو ويه احد ويه صديقاتي

ـ وصديقاتج توزعين أبتسامات اثناء المراسله !

ـ اي شگو بيها يله اني صاعده غرفتي من يجهز العشه صيحوني

ـ اكص ايدي اذا مو البالي

ـ مو ابالك حبيبي يله بااييي

ـ وجعااا ضحكت وطلعت تركض عـــلىٰ الدرج وسم راح توكعين وتتكسرين ونحير بيج من يشيلج هم اني ابتلي بيج

ـ فدوه الك

ـ وسم

ـ بگلبج السم

ـ ضحكت ونوعاً ما ارتاحيت من مهتم لأمري وتعشينا ومر وقت وهما ما اجو شدعوه هلكثر طولوا ما تحملت كمت أتصلت عليه جان مفتوح مو مغلق جاوبني بسرعه الو عصام

عصام ـ هاا

أسيا ـ وين صرتوا

ـ بعدنا

ـ شوكت تجون

ـ ما ادري يله فيمالاا

ـ وين رايح مو جاي احجي وياك

ـ شتردين هسه

ـ ما اريد شيء يله روح

ـ تعيشتوا

ـ اي الحمدلله

ـ يله فيمالاا

ـ الله وياك مو تتاخر قطع الخط هذا شبي سد الخط بوجهي هيج صاير ما تطيق تسمع صوتي ماشي عصام اعاملك نفس ما تعاملني شگوو بيها تدلل على أسيا.

" ضليت كاعده ويه عمتي وصال تباوع مسلسله ومجد يلعب وازهار بغرفتها وسمعنا صوت عـــلىٰ الدرج نزلت والوجه مورد هااا نزلتي

أزهار ـ شــــــــــنو ممنو؏ أسيا خانم

أسيا ـ لا العفوا أكولج مو عبالك تأخروا.

ـ لا عادي أحتمال راحوا بيت جدي وصلوا عمي فاضل لن العرفته رايح وياهم عـــلىٰ العشه هسه يجون لاتخافين محد يتغزل بي ولا احد يأخذه منج هنا عافنه هاا شسمه يمه اكوو عصير بالثلاجه

ـ كامت وصحت وراها تعاالي احاجيج شو ذبيتي الحجايه وانهزمتي كملي الحجيتي شــــــــــنو عافنه منو هنا

ـ يمعوده سمعج ثكيل منو قابل عفيه اسيا الله يساعد عصام عليج شلون متحملج

ـ غير احبه اي غيري السالفه غيرها

ـ يمعووووده ماكو شي

ـ أكيد

ـ اكيد

ـ سممعنا صوت سسيارتهم اجوو شوي ودخلهم ثلاثتهم كعد بصفي عود يبين لأهله ماكو شي بينا لا واضح كلش
حجيت بصوت ناصي مو عبالك تأخرتوا يم بيت عمك. ما جاوبني وتجاهلني باوع لعمتي وگال

عصام ـ يمه باقي حلو بالثلاجه نحلي

مروان ـ حقك عمي اذا انت دست زايد بالاكل ومسحت مسح وانوب الطبخ والطعم يرد الروح اكيد هديل الطابخته عمي فنانه بالطبخ بس شـــــــــسويلك

اسيا ـ حجه مروان وغمزله وعصام صك عـــلىٰ سنونه بغضب مروان حس وسگت هسه عرفت السالفه وهاي هديل وراها شيء أزهار كالت وطمطت سالفتها وهسه مروان اكو شي وعصام ضامه عني يصير خير .

" ضلوا يحجون ويمدحون من الأكل والاستقبال عصام ما شارك ضل ساكت وبصفي يگلب بالفيسبوك ضربته بخفه عـــلىٰ كتفه منو هاي هديل باوعلي بنظره هادئه ومشه للغرفه ولحكته ورديت الباب بهدوء لكيته ينزع الستره والساعه ويباو؏ عـــلىٰ روحه وكشخته بالمرايا الكنتور تتمثل بروحك ومعجب بشخصك ولبسك ما جاوبني بس هز رأسه اريد احجي وياك

عصام ـ تعبان وأريد انام مو وكته الحجي أجلي هسه رحمه لابوج

أسيا ـ نخلص حجي وروح نام

ـ حجيج ما يخلص كولي شعندج

ـ منـــــــو هاي هديل !؟ .

يتبع ...

13





أسيا

ـ شــــــــــو ساگت مو احاجيك منو هاي هديل إفندي ومروان من ذكر اسمها انت وجهك انكلب الوان وصگيت عـــلىٰ سنونك وشدعوه هالكد اكلها طيب شطلعت منال العالم نزع سترته وفتح الكنتور رجعها بالتعلاكه بهدوء وكفت وراه عصام اظن جاي احاجيك شو ساكت

ـ شتردين أسسسسيا

ـ منووو هاي هديل

ـ محد

ـ لا احد وتعرفها ليش غمزتله هااا ليششش

ـ كرم نايم صوتج نصيييي

ـ لعد من احجيييي وياك لاتتهرب عوفلي كرررم هسه

ـ لاتعيطيييين بوجهي حتّى الاحترامات ضيعيتها شجاج ناكزه ومتخبله عليه متكوليلي شصايرلج

ـ اذا متكولي منو هاي ما اعوفك ليش ما تحجي ليكون زوجتك السابقه متزوج قبلي عصام مو اي متزوج وتريد ترجعها لن اسيا اكلت راسك وحنيت الها اي اكيد حنيت اعرف بيك گلبك رهيف عـــلىٰ النسوان تموت على دينهن
ضل صافن بوجهي وجاوبني بكل هدوء

ـ خلصتي اريد اروح انام

ـ من قوة الهدوء الـ يعاملني بي أحس صرت عاصفه ثائره صرخت بوجهه ليششششش ما تحجيييي أني مرتك من حقي أسال واعرررررف تقرب لوجهي بحيث خشمه طخ بخشمي وغمض عيونه وهمس بصوت مليان تعب

ـ أسيا تعبان حد كطع النفس بس راح اجاوبج هديل حبي الأول وخطيبتي السابقه أرتاحيتي وهسه برد گلبج .

ـ حبك الاول وخطيبتك السابقه

ـ أي ومات بساعتها

ـ شــــــــــنو يضمن حبك الها مات بساعتها

ـ وجودج بحياتي وحبي الج هذا احسن ضمان وأفضلهن شوفي أني ما ردت أجاوبج مو لن مو شايفج كدامي بس شيء من الماضي وخلص وما معتبر اله اي أهميه

ـ أمانه ما حنيت ألها

ـ أسيا رحمه لتراب أبوج گافي

ـ مشه لغرفه كرم وصحت وراه عصام جاوبني وريح گلبي عاط بيه بعلو صوته

ـ شجاوبج مثلاً عـــلىٰ اسألتج التافهه حنينت شحن الها مره تزوجت وانسترت بيت زلمتها وعدها جهال خلص كل اثنين ما توفقوا بحياتهم وكلمن بدربه لاتسوينها سالفه طويله عريضه ترى بزعت من المشاكل وياج .
" بس ادري بيج وادري بعقلج المتبن راح تاخذينها سالفه وتضلين تنكين بيها عـــلىٰ رأسي فد سنه سنتين يله تفض شيخلصني منج جلبتي عاااااد جلبتيييي بس مووصوجج صوج مروان الطايح حظه يجفصون بالبطن خرب حظ الكواد

ـ طيب ليـــــــــش ما حجيتلي عليها ولا كلتلي خاطب وفاصخ قبلي ليش ضميت عني

ـ شــــئ خاص بيه وأنتهى وصفحه وطويتها من حياتي لا أنتِ ولا غيرج يحقله يتدخل بماضيي اني شلته من رأسيّ

ـ مشه وصحت وراه وين تروح

ـ رايح انام رأسي راح ينفجر

ـ عصام

ـ عوفينييي اسيا رحمه لذاك الاب الطيب فکي عني .

ـ دخل غرفة كرم وقفل الباب وكفت ورا الباب عصام

ـ روحي نامي أسياااااا.

ـ رجعت لغرفتنا فارغه وتوحش من غيابه عن فراشه ومسكنه وراحته شفت ملابسه عـــلىٰ الجربايه جريت قيمصه وشميته وحضنته لصدري والله شكلي راح اموت من وراك شيء كلشي بيه مهوس بيك بس انت مو مقدره
ميخالف أسيا تحملي هما هذول الزلم شتترجين منهم.

" كمت خليتهن بالحمام وتمددت بفراشي وفتحت التلفون ما فاتح نت احتمال يحجي اتصال مو شرط مراسله كمت اشوف وقبل لا اوصل شفت تلفونه بالصاله ؏ ميز التلفزيون معقوله اكون ظالمته وخانگته بالشك مالتي حاولت افتحه ما انفتح مغير كلمة المرور ليش غيرتها سمعت صوته عصبي

عصام ـ نام يا أبني بس تتكلب زرفت صفحتي اركد بفراشك يا بابا

أسيا ـ رجعت تلفونه لمكانه وخليت اذني يم الباب اشتاقيت لوجودك بصفي ولانفاسك بوجهي اشتاقيتلك كلك مسحت دموعي ورجعت تمددت بفراشي وافكاري كلها متناقضه اشبه بمرض بالعقل والقلب .

" تالي خليت وطلعت كلت بلكي اشوف ازهار لكيتهم بالمطبخ يحجون بصوت ناصي وكفت اسمعهم بدون قصد

وصال ـ الصوج منك يا يمه هسه شـــــگو تجيب طاريها شيء من الماضي لو الا تسونله سالفه هي بدون شيء طگه ونص من حبها اله عقل ما ضال برأسها وحقها زلمتها وأنتِ أزهار هم جفصتي وانوب اللي يجيب طاريها ما يلوم الا نفسه المره تزوجت وخلفت وهو هم كلمن شاف حياته كافي ما ناقصين مشاكل

مروان ـ شمدريني تكبر حجيت بدون قصد وهو ليش ما حجالها قبل لايتزوجون من حقها تعرف شكو ضم عليها

وصال ـ شعليكم منه شيء خاص بي يا امي

مروان ـ يعني هسه تعاركوا من وراي

وصال ـ لعد من ورا جدي طبعاً من وراك

مروان ـ اهوووو

أسيا ـ رجعت الغرفه قبل لايحسون عليها وقررت موضوع هديل اسده لن فعلاً شيء خاص بي شعليه منها دام هي متزوجه ومخلفه اتجاهلها احسسن ما اضل اذكرها ويحن الها واكون بشي واصير بشيء ثاني نفضت الافكار ورجعت لفراشي تمددت وأحاول انام من دونه من دون حبه وحنانه وعاطفته .
_

أزهار ـ صعدت لغرفتي وشفت تلفوني ما شفت شي منه وحزت بگلبي ومزاجي تغيرر تكأبت أتعودت ؏ رسائله واهتمامه بيه وهيج فجأه أختفى وزعل من كيفه

" باوعت رقمه ردت اتصل وتراجعت وتالي عفت التلفون ونمت وكل افكاري سارحه بي معقوله حببيته بهل الوقت وهذا الشي صح بس أني ما عبرت حدودي وياه ولا هو
فقط يجمعنا الكلام وأقل من العادي واسئله روتيينه طيب هو ليش زعل ، زعل لن مطنشته اووف احس گلبي يوجعني خل انام وكتها يصير خير..

" مر شهر وطول هالايام علاقتنا رسميه واكثر من الرسميه خله حدود بينا وأحترمت هالشيء يتصرف بأحترام اكثر من احمد ورقيه كلشي رسمي وياي وما يجمعنا الكلام مثل قبل لا اعجاب ولا هم يحزنون فقط سايق خط وموظفه عنده لا غير وهذا الشي المفروض يكون احسن اليه لا بالعكس مرض يأكل بروحي حتى ضعفت وروحي هلكت ومن اشوفه اموت وروحي تنعصر بصدري بس احترمت حدوده اللي فرضها عليه وهيج افضل النا أثنينا..
"هو أبتعد عني لن عرف مكانته ويمكن عرف اني وياه صعب نحب بعض وعلاقتنا متوتره وحساسه وفرق شاسع بينا ما اعرف الحب ما يعرف هاي الامور والمستويات والعرقلات الصعبه.
كعدت من وكت باوعت بالمرايا وجهي طافي لونته بالمكياج ولبست مستعجله ومالي واهسس ولازمتني الطنكيره اذا يحاجيني انفجر بوجهه الحلوو

"٠ طلعت بدون ريوك لن محد كاعد الكل نايمين ولكيته منتظرني فتحت الباب وصعدت بدون سلام وشغلها وطلعنا ورجع باوعلي جنت صافنه على الشار؏

هشام ـ أهلج هواي تعبانين بتربيتج وحقهم ونعم ما ربوا

أزهار ـ شكراً سكتنا شوي وكف السياره ونزل واجه واندار عليه بيده لفه مال صمون كهوه جاهزه

هشام ـ تريكي اليوم ريوكج عليه

أزهار ـ ما اريد

ـ خلقتج مكلوبه عـــلىٰ شــــــــــنو شبيج من صباحيات الله

ـ ما بيه شي والافضل ارجع نفس ما أنتَ لاتغير معاملتك وياي عـــلىٰ مزاجك

ـ مو هيج تردين مو أنتِ خليتي الحدود بينا وأني احترمتها شکوو بعد

ـ سلامتك ماكو شي

ـ أنتِ جبرتيني احترمج غصب عـــلىٰ رأس أهلي كلهم تصرفاتج وطبيعتج وكلامج ولبسج وگلشي بيج يخليني أسكت واحترم نفسي .

ـ ما حجيت يسوق ويحجي مد ايده وكال

ـ يا بنت الناس اخذيهن من ايدي واحترمي النعمه الكدامج طنكري عليه عادي اتحملج أنتِ وطناكرج وخشم اليابس

ـ صفن بوجهي ما كدرت اقاوم نظراته اخذتهن منه ويباوعلي بالمرايا

ـ راح امشي عـــلىٰ كيفك علمود لما نوصلهم تخلصين ريوكج بس عوفيلي النزاكه عـــلىٰ صفحه ودوسي باللفه مو فركزتي گلبي بمياعتج .

ـ أكلتهن وضلت من اللفه شويه باوعلي وكال

ـ جيبيها

ـ مديتها اله والكهوه هم شربت منها والباقي هو تريكنا سوه بس بزعل انطاني كلنكس مسحت شفايفي ولكيته صافن بوجهي وجاوبني

ـ حمرتج خربت عدليها زين العالم تتنبه عليج

ـ أنتبهت بمرايا وهو يتأفف طلعت المرايا ومسحت شفتي وطبك السياره واجه احمد واخذنا رقيه وطلعنا وصلنا وراح دخلت الدائره ورشا تكلب بالمكتب مالتي صباح الخير فزت من شافتني خير مضيعه شيء عـــلىٰ شنو أدورين

رشا ـ هلا حبيبتي صباح النور لا هيج ادور عـــلىٰ ملف ما موجود يله اخذي راحتج راحت واني بديت اكمل شغلي وقبل لا يخلص الدوام اجتني رساله منه

هشام ـ اليوم الدوام ما ناوي يخلص

أزهار ـ أبتسمت وجاوبته ساعه انوب ليش عندك شغل

ـ لا بس شتاقيتلج وهالشوق عبر الحدود ما اكدر اسيطر عليه اعذرينا يا بنت الاكابر

ـ وكع التلفون وگلبي ينبض بكل ما يملك من سرعته كمت وكفت عـــلىٰ صفحه وايدي ترجف حرت شكتب سحب گلبي ابن اللذين احس فراشات تطير بكل مكان جاوبته بكل حب واني هم إشتاقيتلك

ـ يا روحي أنتِ

ـ يمه شعور يموت بقيت صافنه وابتسم وفرحانه رجع دز

ـ والحدود البينا هي شاهده عـــلىٰ هالشوك مشكلتها مو مشكلتنا ما مسوين شيء غلط

ـ جاوبته اي صح

ـ هواي ضاملج حجي

ـ صافنه بكلامه ومبتسمه وما حسيت غير احد فوك رأسي رشا وگبل سحبت تلفوني ومشت صحت وراها شــــــــــنو هالتصرف مو عيب جيبي تلفوني مشت وتقرأ الرسائل و؏ وجهه صدمه وخيبة أمل عيب منج هالتصرف رجعيلي تلفونييي

رشا ـ عيب مني هالتصرف ليش ما كلتي عيب عليه أحب شخص صديقتي تحبه وتريده

أزهار ـ شــــــــــنو تحجين أنتِ شو جيبي تلفوني

ـ مع الاسف عليج أزهار وثقت بيج وحجيتلج عنه وبالاخير تسويلنا دراما ومشهد تمثيلي وتدعمين سيارته ويجي ابوج ويحلها تتحقق رغبتج وغايتج الخبيثه وتروحين وياه بالخط وتكملين حبج اللي بنيتي عـــلىٰ حسابي و؏ حساب ثقتنا بعض وصداقتنا الي حرام تسمى صداقه يا خاينه يا حقيره ما توقعت تطلعين تخطفين زلم

ـ خلت تلفوني بيدي ومشت تبجي اني شجاني ما أنتبهت بعدين هو ما حبها ولا أملها بشيء ولا بينهم اي كلام عـــلىٰ شــــــــــنو موتها نفسها والحب مو غصب اووي اني شلي دخل بيج روحي عليه هو حبني اليه قابل كيفي لو كيفه عبالها الحب نستله وتتوزع ، تجاهلتها ورجعت كملت شغلي وخلص الدوام وطلعت بدون ما اشوفها هيج احسسن نبتعد عن بعض تهدأ واحجي وياها مهما يكون خطيه جانت تحبه هو هم صوجه اكيد شافت منه نظره
وضلت تتامل

" طلعت ولكيتهم موجودين واني اخر وحده صعدت وسلمت عاد احمد كال

احمد ـ اليوم رشا خطيه شگلها ما عجبني أزهار هم فهمتي منها شبيها

أزهار ـ لا

رقيه ـ شعجب أنتِ وياها صديقات مقربات

أزهار ـ ما اجه عـــلىٰ بالي اسألها سگتوا وهو عيونه أكلتني وصلهم وكف السياره وأندار عليه

هشام ـ شــــــــــبيها وياج وجه الطركه

أزهار ـ لاتحجي عليها

ـ ليش حبيبي

ـ نزلت رأسي مستحيه من جراءته رجع شغل السياره ومشه وهو يحجي

ـ شــــــــــنو تزاعتلن

ـ عرفت بيني وبينك

ـ شــــــــــنو عرفت

ـ هشام

ـ عيونه

ـ ارتبكت وحجيت شسمه هي تحبك وشافت الرساله وتخبلت من عرفت احنه

ـ احنه شــــــــــنو

ـ شمدريني

ـ شــــــــــنو شمدريج أحنه شــــــــــنو أزهار

ـ أنتَ شتشوف

ـ ما اشوف غير أنتِ حبيبتي ومرتي وأم بيتي وجهالي

ـ نزلت رأسي غركت بهدومي وافرك بيديه متوتره وعركت وگلبي راح يوكف من سرعته بالكلام والمشاعر الجياشه طلقها بوقت مو مناسب

ـ الحب مو عيب أزهار ليش خايفه تنحبين

ـ بقيت منزله رأسي وما حجيت بس جسمي كله يرتجف

ـ اعرفج أنتِ شــــــــــنو وأعرف تربيتج وكلشي يخصج من الابره للخيط

ـ بقيت ساكته وكف السياره عـــلىٰ الشارع العام شوي مكان بي سيارات قليله وإندار عليه ونظراته فاضحته

ـ أعذريني وكفت السياره وحقج عـــلىٰ رأسيّ بس أريد أكول كلام بداخلي ياكل ويشرب وياي من ساعة الشفتج بيها اكوله ألج وأرتاح واريح هالگلب المحترك عليج

ـ بقيت ساكته وافرك بيدي

ـ أكول العندي ونمشي يا بنية الناس اني حابج ورايدج ومن شفتج حبيتج من عقلج ورزانتج وثكلج هذن متربعات بگلبي رفعي عينج وباوعيني خليني احس بطعم كلامي بشوفتهن احبهن واحب نظراتهن المليانه وكاحه
وكبرياء البين عيونج هذا ناعل شيب اهل أهلي باوعيني يا زهرة العمر وتعبي اللي من اشوفج ينزاح قسم بالله ارجع طفل بشوفتج .

ـ رفعت عيوني وصفنت بوجهه اني حبيته رجع همس

ـ أحبج

ـ صديت وجهي عنه خل نمشي هشام تاخرنا

ـ يرحولج فدوه هشام الج ولحبج المايع خل اوصلج هسه اهلج يحركون عشيرتي

ـ ابتسمت وخليت ايدي عـــلىٰ شفايفي

ـ حتّى وأنتِ مبتسمه تستحين وتخفينها بأصابعج جنهن خرز ليلوو وتعال هشام احترم الحدود يا حدود مو شيب أهلي احترك كلبي متعلعل ومحترك عليمن .

ـ وصلنا ولكيت عصام واكف يم الباب وكفته ما توحي بالخير شكله ينتظرني وهشام لاحظ الخوف بعيوني

ـ أخوج مو قباض أرواح ترى

ـ ما جاوبته نزلت ومنزله رأسي ومشيت سريع وميته خوف وصلت يمه مرحبا عصام

عصام ـ هــــــــلأ شعندج متأخره اليوم

أزهار ـ لا وين بينما خلص الدوام واجيت

ـ فوتييي ساعة السوده توظفتي بيها انوب عليه الخطوط

أزهار ـ مشيت بدون ما التفت وراي دخلت الصاله لكيت امي مخبوصه خير شگوو يمه

وصال ـ ماكو شي يمه مرت اخوج هم تعبت واخذناها الدكتوره مالتها كالت خل ترتاح تشلع گلبي لما تولد بالسلامه

ـ هاا خطيه وهسه شلونها

ـ زينه هي ما ادير بالها عـــلىٰ نفسها راكضتلي وراه عصام وناسيه روحها وطفلتها اسيا عقلها صغير وفلا تصير ادامي لا والله

ـ هو خوما لحد الان ما يحجي وياها

ـ اي وتستاهل من لسانها جاي يعاقبها عباله بهل المعامله والتصرفات تصير ادامي ما يدري نوب تزيد خبال عليه ما تنقص اخوج هم مو قصر هي لما تحبك شجاريلها يحظي

ـ اي هو هم ما ينجرع دام ما عندك شيء ليش تخليها تحترك بنارها برر إلها خطيه يوميه متخربطه وما سأله عـــلىٰ حمله وضعها بسببك

ـ سگتي اجه وراج ديري بالج تتدخلين ولا تفتحين حلكج بأي كلمه هو ما يحب أحد يتدخل بحياته عوفي عـــلىٰ راحته حجيت اني وكام يصيحح وأنوب رجع عـــلىٰ اسيا شطالع بيدنا غير ندعيلهم بالصلح والهدايه

ـ سگتت توني ردت أمشي جر الگرسي وكعد مقابلي وعيونه تتفحصني باو؏ لأمي وگال

عصام ـ يمه

وصال ـ هاا يمه

ـ أكول

ـ كول يمه

ـ هذا السايق شسمه ومنين أهله وشنو تحصليه الدراسي وواقعه الاجتماعي ومن وين

وصال ـ ليش يمه

ـ شــــــــــنو ليش غير نعرف عنه گلشي ويامن دازين الخاتونه لو عامي شامي ياهو اليجي ادزونها وياه بله طلع كواد طلع ساقط طلع شراب عرك طلع ابو نسوان وسوالي سالفه ويصخم وجهي بيها لو هاي متفكرون بيها

ـ شــــــــــنو هالحجي يمه عيب عليك الولد مبين من أهل الله وطيب وما شفنه منه موزين شهل الحجي سد حلگك عن الاودام وكف شرك عنهم ابني

ـ شــــــــــنو اسد حلگي ترى ما كلتلج اريد اناسبه سألتج عليه اسأله عاديه شــــــــــبيج أنكرصتي وحميتي عليه

ـ لا أله الا الله شد ويه الزلمه عاد

ـ يمه لاتكبرينها وهي صغيره ترى سألت ما جرمت بأهله
شتعرفون عنا مو احجييييي وياجن

ـ اسمه هشام مو ازهار هاشم لو هشام

أزهار ـ أي اسمه هشام

عصام ـ وحافظه أسمه بعد

أزهار ـ غير أنتَ سألتني عـــلىٰ أسمه

عصام ـ أنجبي محد طلع عينج غير أبوج

أزهار ـ سگتت ليش اكدر احجي

عصام ـ أريد رقمه هذا اللي اسمه هشام

وصال ـ شتسوي بي

عصام ـ أخابره ويه الـ ١٢ اتغزل بي شسوي بي يعني

وصال ـ يجي ابوك واخذ رقمه

عصام ـ يعني ما عدكم رقمه

أزهار ـ امي خافت وجاوبت بسرعه تتلافى لسانه واسئلته الصعبه ومميته

وصال ـ لا ما عدنا يجي ابوك واخذه منه

عصام ـ لعد شلون مره اجيتوا وياه من السوك ترى ما ناسي شگله أذكره نفس الجهره هو الوصلكم

وصال ـ شــــــــــنو تحقيق يا امي مية الف واحد غيره شمدرينا عندي بال اكعد اتذكرلك

عصام ـ لا يبووه شمدريج يعني هسه رقمه ما موجود

وصال ـ لاااا ما موجود

ـ خوش يجي سيادة الوالد ونأخذ الرقم ونكبل وياه لن شگله محبوب وسبحان الله شگد حبيته

وصال ـ اي والله خوش ولد وگلبه طيب

ـ منو هو

أزهار ـ زلكها بالكلام غمضت عيوني وأمي وجهه كام ينطي الوان خلت نفسها بموقف كلش عادي وصعبت الامر هو بدون شيء شگاك. نوب يخلي هشام برأسه لا ربحنا

عصام ـ گلبي من ينكز من شخص لو يصبلي روحه بالذهب ما أتقبله لو يصيرلي ملاك وعنده جناحيين ما ارتاحله والله من انعل وظيفتج وساعه الداومتي بيها ادري ابويه شلون قابل ودازج ويه ولد شاب بس سهله عصام مفتلحكم بالماء العگر يصير خير .

وصال ـ يا سالفه خلاها برأسه شد ويه الزلمه دام هيج وصلها انت شكوو مصعب الامر

عصام ـ هي لو عليه جان بطلتها من وظيفتها والكواد اليوصلها بعد، شــــــــــنو أشتغل سايق عند الخلفوها لا هاي العايزه اوصلها انوب

أزهار ـ مشه لغرفته وباوعت لامي ليش صعبتي الامر تصرفي عادي شگوو قابل شمسوين احنه

وصال ـ شمدريني دمي جمد والله هو اخوج شيطان محيل ما شفتي شلون وكعني بلسانه واني عبالي هذاك اليوم خلصنا طلع اثاري ضامها ويطبخ بيها .

ـ يطبخ اللي يطبخه شــــــــــنو هالحجي عيب عليه وعنده شگوك يروح يسأل عليه ويفضها لا يسويلي سالفه ويفضحني كدام الموظفين حليها ويه بابا فدواتج لن عصام كلش ما يتفاهم خلصوني من لسانه واسئلته

ـ ماشي امي الله كريم يله صعدي غيري ملابسج وتعالي تغدي ما عليج منه يحجي يحجي ويسگت هو وابوه ما النا شغل وهشام الولد مبين هذاك وينه شــــــــــنو من طينه طينته ما يحتاج احد يسأل عنه اني من گلبي يرتاح لبشر هاي هي ومن ينكز من بشر هم هاي هي

ـ أبتسمت وأستبشرت بكلامها خير وصعدت غرفتي غيرت ملابسي واتصلت وحجيت بصوت هشام

هشام ـ هاا عيني

أزهار ـ نهائي لاتراسل ولا ادز اي حرف الا اني احاجيك

ـ يجرالج جنج ما طلبتي

ـ فدوه لتفهمك

ـ فدوه الج أكول حبيبتي صاير شي ولو تتدخل مني بس ضل بالي يمج ونظرات اخوج مو راحه يباو؏ لواحد بنظره مو مقياس عبالك الناس عبيد عنده شدعوه هلكد شايف نفسه

ـ لا مو شايف نفسه بس هو هيج طبيعته ونظراته

ـ ما محبوب ما حبيته ولا دخل رأسي واحد مغرور

ـ تحبه مع الوكت

ـ شسوي بي أحبه أحبج الج

ـ يله لازم اروح

ـ ماشي حبيبي راسليني على مجالج وديري بالج ؏ نفسج

ـ تمام قطعت الخط وتنفست براحه فتحت الباب باوعت ماكو احد ونزلت شفت اسيا طالعه من غرفتها لازمه بطنها شلونج

أسيا ـ الحمدلله

أزهار ـ عصام وين

ـ يگلب بتلفونه

ـ شــــــــــبيج شو مختنكه

ـ لا هيج ما بيه شي رايحه اصبله غده طلب يتغده بالغرفه

ـ ماشي روحي صدك بعدكم متزاعلين

ـ ماكو فرق يله من رخصتج

ـ مشت المطبخ وباوعت لغرفتهم ولحتكها ماما مجهزتلهم الاكل بس اخذته وجهه نوميه حيل تعبانه ومن يم الباب طلع هو اخذ الصينيه منها وباوعلي يمه گلبي وكف من نظراته رحت تغديت ويه امي بس اني وياها لن الباقين بالدوام
______

أسيل

ـ من بعد هالايام المرت جنت أفكر ومية فكره متربعه برأسي واخيراً نويت وين توكف خل توكف وشيصير خل يصير
من بعد ما انطتني تلفوني وكلت اراسله واجس نبضه بس ما اراسله بحسابي لن راح يعرفني وتصيرلي سالفه ويتصخم وجهي لن هو عنده صداقه بأخواني وهديل ونوب يراسلها ويبووه شيخلصنيي لا حسابي وشخصيتي بعيده كل البعد عن هالشيء اجي من غير درب استخدم شخصيه ثانيه ومزيفه هيج أحسن ومع الوقت يحلها الف حلال .
ضليت يومين دايخه ومتردده وبالاخير قررت وسويت حساب جديد وسميته زينب ودخلت عليه دزيت لايك يوم كامل ما فتح المحادثه كلت أشوفه وأختبر مشاعره حتّى لو أضطر الامر اكون صديقته بس مهم أدخل قبله وأعرف مشاعره المن ويا سعيده حظ يا بختج ياليحبج يا بختج تسمعين صوته ويتغزل بيج واني باقيه اتحسر عـــلىٰ النظره وشمسويتله هيج عاميه عيونه ما يباوعلي ولا عبالك وحده كدامه صار كم مره نتشاوف هو هو بس ميخالف أصبر عليك شعندي شغل عمل شو دراسه وماكو عمري وقتي كله الك يا مروان

" رجعت دزيت اكثر من مره لايكات ولا يفتحهن اخر شيء دزيتله مرحبا شلونك كتبتها بكل حب ولهفه ورجفه تارستني مرت ساعتين واني انحمست حمس نزلت غسلت المواعين وكملت شغلي حتّى غده ما تغديت نفسي مسدوده وبالي يم المحادثه مليار مره دخلت ماكو هذا ليش هيج خرب بحظي جاوب زاحفه يمعوده زاحفه زحفت عليك واحبك

خلصت وصعدت ركض واللهفه تارستني اريد اشوف المحادثه جاوبني لو لا وامي عاطت

جنان ـ ولكف شعندج مطيوره اذا وكعتي وتكسرتي نوب اضل حايره بيج

اسيل ـ ضحكت وحجيت ويه روحي راح أخلصج مني ومن همي ومن جناينج الحيايا دخلت غرفتي جريت تلفوني من الشحن ودخلت المحادثه شايفها يمه گلبي اذا جاوبني شيصير بيه گلبي حيوكف شويه وودز

مروان ـ هلا بيج

أسيل ـ فدوات لهلا مالتك احمم جاوبته دومك ما شافها يمكن مرت عشر دقايق حركني حرك وشافها ورد

مروان ـ يدومج ورده

ـ عيعع شگد اكرهه كلمه ورده جاوبته شدعوه هلكد مغرور متجاوب راسلتك هواي ينراد نحجز قبل بوقت

ـ بصفتج منو اجاوبج

ـ اله بصفتي منو يله تجاوب

ـ اي نعم

ـ شــــــــــنو عصبت

ـ لا يابه شسالفه شعندي وياج قابل

ـ تمام مبين عليك حباب

ـ شكراً كلج ذوق

ـ لغه الحوار ما احبها احسك رسمي هواي

ـ شتردين انزعلج

ـ عزاا يمه غطيت وجهي بقيت ساكته من الفشله

ـ شــــــــــنو أستحيتي وسگتي

ـ اي انت سخيف

ـ مو شفتج شريفه كلت أنزعلج

ـ شــــــــــنو هالحجي عيب عليك الشرف ما ينحجي بي شو كلامك ما اعرف شلونه واني اشرف من الشرف اوك

ـ هههه شريفه وانزعلج بابا الشريفات ما يلزمن هاي الدروب ساحله نفسج بالقندره عليمن

ـ احترم نفسك

ـ محترم نفسي وكاعد وساكت بس عاجبني ما احترم هيج نماذج

ـ وشبيها هالنماذج عفيه شگد مغرور

ـ ما تعجبني ومغرور كيفي

ـ شــــــــــنو يعجبك

ـ وأنتِ شعليج عبالك اخذتي وجه

ـ لا شحجيت أني

ـ بابا ولي عن وجهي ناقص عطلات بحياتي

ـ اوكف اوكف لاتروح

ـ شتردين

ـ ما اريد شيء بس نسولف

ـ بشنو نسولف ليله الدخله مثلاً احب هيج سوالف

ـ عفيه شكد سخيف

ـ عجبني أتسخف وياج لن أحسج مو راحه

ـ ضحكت وفرحانه لن يحجي وياي وسوالفه تنكع بالگلب رجعت جاوبته شعرفت مني وأشتغل احساسك عليه وعرفتني مو راحه شــــــــــنو شايل خرزه

ـ من لايكاتج واحد ورا الثاني مال مستعجل ووحده مشتهيه ومستحيه

ـ صخام الصخمك لطمت عـــلىٰ وجهي وطفيت الواي فاي عزا مو لسان حشا فضاحه وربي شــــــــــنو هذا داهيه طلع ونعرفه هادئ وسگوتي عزا عزا

" بقيت صافنه عـــلىٰ المحادثه واحسس روحي تورطت وياه ونفس الوقت شعور حلو نحجي اني وياه رجعت شغلت النت ولكيته داز

ـ وين رحتي شــــــــــنو دانشتي فكرج

ـ لا النت فصل وشدعوه هلكد ثكيل

ـ عاجبني ادك ثكل بࢪاسج

ـ ضحكت وحجيت تمام بس سؤال

ـ جواب

ـ شلون هيج تحجي متخاف عـــلىٰ نفسك

ـ ليش شحاجي

ـ سوالفك سخيفه

ـ منو گال

ـ شــــــــــنو تحجي بدون متشوف

ـ لا اشوف نظري سته ؏ سته بس سؤالج كلتي تخاف على نفسك شتقصدين؟

ـ ما اقصد شيء والله هيج مجرد سؤال

ـ المفروض أخاف منج يعني

ـ لا يمعود مو هيج قصدي

ـ متخوفين جلبي بنت الگلب لا تتعيقلين بࢪاسي

ـ لاتغلط ما كلت شيء

ـ شتردين ادگلج تحيه بنت ال***

ـ ليش تفشررر

ـ ليش تفشررر بابا امشييي ولي

ـ كبل حظرني يبووه ليش هيج ما تتفاهم اني انطلقت وياه وشكلنا تفاهمنا من خلال لغه الحوار وأسلوب الكلام
ابقي بلكي كم يوم ويفتحه ومتأكده منك راح ترجع واني انتظرك .

عفت التلفون وحضنت مخدتي وكلني فرح شحلو كلامه ياريت العمر كله نبقي هيج نحجي هههه خرب سوالفه السخيفه تفشل بس ميخالف مقبوله منك ابن عمي .
______

أسيا

ـ مر شهر وعلاقتنا للأسوء وحياتنا بالغرفه فقط كلام رسمي و؏ كد السؤال والجواب وهدوئنا قاتل والشياطين تكمز بࢪاسي من أبتعاده عني ينزل ويتلحق هو مبتعد عني وهالشي ما مرتاحتله لن رجلي وأعرفه روحه بالمره وسوالف الفراش شلون كدر يفاركني لا حضن لا بوسه ولا شمه شلون مصبر روحه عـــلىٰ هالبعد ما يشتاق ما يحن

" دخل أخذ ملابسه بدون ما يگولي ودخل الحمام كمت دورت عـــلىٰ تلفونه ماكو گلبت الصاله والغرفه ماكو وين وداه معقوله اخذه وياه للحمام لا صخام شيسوي وياه بالحمام
مشيت للحمام وباب الكنتور مفتوح وشفت ضوه فتحته مخلي تلفونه فوك التيشريات مالته رفعته رقم غريب يتصل انقطع الاتصال واني ايدي ترجف عـــلىٰ صدمه عـــلىٰ خيبة أمل معقوله يخوني وهاي هي تتصل عليه صافنه على باب الحمام ورجع رقم أتصل وفتحت الخط واجاني الصوت

ـ .... يتبع

14






أسيا

ـ فتحت الخط وأجاني الصوت

ـ الو حبيبي

ـ جاوبتها حبيبج !! كبل قطعت الخط ضليت صافنه بالرقم ودمعتي نزلت بحراره لسعت گلبي قبل خدي بالگوه لازمه التلفون رجعته بهدوء وحيلي يرجف أريد اوصل الجريايه اسند حيلي وأتقبل الصدمه.
" وصلت وتمددت وجسمي برد مثل قطع الثلج وذابت وشيء بداخلي سكن وهدأ بعد الغضب المحتم والمعارك العارمه شيء بداخلي توقف عن الصراع هدأت نفسسي وفرغ عقلي من جميع الافكار وتيقين گلبي من جميع الشگوك هسه ثبت أنُ اني مو مريضه ولا شأكه عبث ما اجاني الشك من دون سبب .

" بقيت هادئه وأتصرف طبيعي وياه ولا كأنما اعرف شي عن خيانته الحقيره حبيبج وأني اهل اهلي مشتعلين بسبب حبي وغيرتي عليه زلمتي وتعبت وتحملت كلشي وبالاخير تجين على الحاضر ويصير حبيبج من حبتج حيه ام رأسين .

" أنفتح الباب وطلع يغني ويه روحه اي غني شگو عليك متونس بالحب الجديد وماخذ راحتك لا هم ولا غم وشك ونكد من أسسيا.

" باوعتله لبس ملابسه وكف برتب بروحه ويعدل بشورابه بالمقص كاشخ عـــلىٰ أخر حبايه خلص وسحب تلفونه كام يگلب بي باوعلي گبل صديت نظراتي لغير مكان .

تقرب لي وخله ايده عـــلىٰ كصتي اريد اعيط بي بس تمالكت نفسي الزم عليه دليل وأني اعلمه الا اشرب من دمه عـــلىٰ كل كلمه يحجي بيها وياها .

" مشه وسمعت صوت الباب انرد طلع لـ برى نهضت بتعب وطلعت اشوفه وين راح سمعت صوت سيارته باوعت طلع لازم عندك طلعه مهمه ماشي يا عصام جاي تتنقم مني بهل التصرفات والكل يلومني عـــلىٰ خبله ومرتك عقلها طگه ونص ما يدرون ابنهم الشريف العفيف شـمسوي بعمره بس ماششي وبسيطه .
_____

أزهار

ـ اروح لدوامي واجي عادي نفس الروتين أما هشام علاقتنا تزهو بالحب وحياتي تلونت بألوان الحياة صار الي واهس لدنيا كلها حبيبته بكل صفاته وقابله وراضيه بي دام يجمعنا حُب .

" بالدوام وأفكر بي دزيتله رساله هلا حبيبي

هشام ـ هاا عيني

ـ شو ماكو مو بالعاده

ـ بالكراج وصارت مشكله يعني

ـ خوما تعاركت

ـ لا مو صاحب مشاكل بس اكو بشريه ما تفاهم كواويد يطلعونك عن طورك كوه كوه عاملهم بالقندره حشاج

ـ ميخالف حبيبي تحملهم

ـ فدوه اروح لـ حبيبتي الـ تخفف عني همي جعل هالهم يخف بحضن المج وتلميني

ـ أبتسمت وما جاوبته

ـ فدوه لـ الخلقج اموت على خجلج

ـ حبيبي

ـ هاا حبيبي

ـ شــــــــــنو الخلاك تحبني

ـ خشمج وكبريائج الما حد

ـ بس هاي الصفه ما تنحب

ـ أني حبيتها وتولعت بشراره حبها أحب الثكيل

ـ فدوه لحبك

ـ فدوه ألج حبيبتي بعد ساعتين وينتهي الدوام واجيج

ـ اي

ـ مشگلتي ما جاي أشبع شوف ومناظره من هالعيون

ـ اباوع لرسائله ومبتسمه ورفعت رأسي رشا تباوعلي بحقد عفت التلفون عـــلىٰ صفحه وهي تقدمت وشكلها ما ناويه عـــلىٰ خير

رشا ـ عـــلىٰ الخير مبين عليج متونسه عـــلىٰ حساب أذيتي ونار گلبي متطوره الامور بينكم ما شاءالله تدرين اللي يشوف أبتسامتج ووجهج المورد ما يكول حبته من كم شهر لا كولي علاقتكم اقدم من هيج يمكن من جنت احجيلج عنه جنتي تحبينه وتبيعين ثكل وشرف ومثاليات بࢪاسي طلعتي داهيه ياما تحت السواهي دواهي ينخاف منج عمي

ازهار ـ رشا احترمي نفسج والمكان البي والزمج حدودج بالكلام عيب عليج هالحجي مهما يكون جانت بينا صداقه وايام حلوه لاتخربينها

ـ أخربها ليش شضل منها ومنو خربها شو هواي عايشه الدور ومتمكنه بي بابا ترى أنتِ غلطتي بحقي وغلطج جبير وما ينغفر ولا عبالج أنساها الج ونار گلبي عساها بحظج وبختج عـــلىٰ الحاضر والمستريح اخذتي بدون وجع گلب

ـ ما أخذت احد هو من يومه لابسج وما باوعلج ولا املج بنظره عـــلىٰ شــــــــــنو كاتله نفسج وساحله نفسج وراه وواكفه تحاسبيني هيج گلبج محترك روحي حاسبي وسألي شگو ملاحكتني اليه والله خوش

ـ هذا حجيج وتحجين بكل ثقه وما خايفه من احد

ـ شــــــــــنو هالحجي شتقصدين؟

ـ سهله ازهار واللي صار بيه ارجعه الج أضعاف

ـ مشت وصحت وراها شتقصدين؟

ـ أقصد اللي اقصده الج العين التنظر الا اطلع هالحب من بين عيونج يا أزهار بنت العز والشرف يا ساقطه

ـ أشرف منج ومن أمثالج احجي عدل لا اشوهلج خلقتج يا تافهه ومنحطه شيطلع منج مثلاً ومع الاسف عـــلىٰ الايام الجمعتني بيج وكل ساعه كظيتها ويه هيج حثاله وزبايل وسخه وما تكول كلمة ساقطه الا الساقطه تقربت وحجت بكل حقد متغلل بداخلها

ـ ماشي ازهار من عيني مثل ما اخذتي هشام مني وعشتي قصة حب ؏ حسابي الا اخذ ابوج من حضن امج واحرك گلبها وگلبج وأخلي هالحب هذا شلون يتم

ـ تعالي ولج شهل الكلام الخايس مثلج يا خايسه ابويه شدخله طلعتي أنتِ اللي تتصلين عليه مو سبحان الله الكوكب كله حذرني منج وما اهتميت ولا سمعت من احد لن جنت اكول صديقتي ما تغدر بيه بس طلعتي صديقه حقيرهه وصلت بيج المواصيل تتتقمين بيه بـ بابا من عابتلج أنتِ وشكلج عبالج بابا يباوع لـ أمثالج يا قذره

ـ اي ليش ما يباو؏ مو هو الاخذ امج غصب عنه وحده عجوز وبس تنك شيسوي بيها وهو اشب من الشباب واني اولى بي والايام بيناتنا والج العين التنظر سهله يا أزهار

ـ مشت وحركتني حرك الحقيره طلعت مخيله عـــلىٰ بابا ومخليته برأسها واني الثوله والارعنه وثقت بيها واعتبرتها أخت قبل الصديقه وأمنت بيها وحجيت الها اسراري وعائلتي وبيدي صعدتها سيارته واخذتها لبيتنا أشسويت بيج يا يمه يا خوفي تسويها لا لااا مستحيل ما تكدر بابا أكبر من هالشيء ختولي هاي شــــــــــنو وحده ساقطه الله ياخذج يا رشا .

" كعدت دمي محترك روحي ذابت وصخنت واعصابي قبطت عـــلىٰ گلبي بينما خلص الدوام طلعت أول وحده جانت شايله التلفون وتحجي وتضحك كأنما تكولي جاي احجي ويه أبوج !!
معقوله بابا يسسويها وهالساقطه تضحك على عقله لا لا بابا ما يعترف بهيج نماذج تعبانه وذابه نفسها هالذبه بابا عزيز نفس ويحب النفسه عزيزه ما يروح لرخيصات لازم اتأكد من گلشي وابعد هالسوسه عن عائلتنا كبل لاتعم الخراب بيها واني اكون السبب لن رافقت هيج نماذج بأعتبار الصداقه يربي حتى الصديق صاير ما يتأمن بي ياكل من زادك وبعدين يغدر بيك .

" صعدت وسلمت بعصبيه حسسوا عليه مو تمام باوعلي ويحاجيني بعيونه شــــــــــبيج شــــــــصايرلج غمضت عيني يعني بعدين نوعاً ما فهم ، وصلناهم وباوعلي بالمرايا وگال

هشام ـ شبي حبيبي ضايج

أزهار ـ هشام واكعه بمشكله

ـ شــــــــــنو هي گلبي

ـ حجيتله گلشي وضرب الاستيرن وعصب بالزايد

ـ بنت الگلب هالساقطه سحلت نفسها سحلة الچلب وبالاخير ما لكت الأ الابوج بس خل تطبخ حصو عمي مو مال هيج سوالف مزعطه

ـ أي والله بس اخاف تلعب بعقله

ـ رجال عسكري وفاهم الحياة لاتخافين ما تاثر بي هيج نماذج تعبانه واذا تردين ترتاحين وطمنين گلبج تاكدي ولو اني متاكد ما تكدر تسوي شيء

ـ الله يطمن گلبك والله شغلت بالي

ـ الله لا يشغلج بال حبيبي عادي تصير مواقف وتبين معدن الشخص وهالساقطه بين معدنها خايس ومزنجر علمود تاخذين حذرج وما تصادقين كل وحده ولا تثقين باي شخص ديري بالج منا وهيج

ـ أن شاءالله وصلنا وطبك السياره يله باي

ـ في امان الله

ـ دخلت بيتنا وسيارة بابا موجوده ومروان هم نازل بس عصام ما موجود دخلت عليهم لكيتهم مجموعين وبابا منطلق ويضحك ومروان ناصب عليهم مرحبا شلونكم

كمال ـ هلا بابا الحمدلله

مروان ـ بدلي وتعالي ترى انحمسنا حمس من الجوع

أزهار ـ دقايق واجي تقربت بست بابا اشتاقيتلك

وصال ـ بس لابوج تشتاقين

كمال ـ امج كامت تغار من عدنا غوريها غوريها

أزهار ـ حقها تغار زلمتها وشمعتها وخيمتها وابو بيتها

كمال ـ الله يخليكم الي بابا

أزهار ـ مشيت وامي غمزتلي شــــــگو خطيه كبل حست عفتهم وصعدت غيرت ملابسي ودزيت رساله لـ بابا اريد احجي وياك بموضوع لوحدنا شوكت عندك مجال

كمال ـ كولي بابا شصاير وياج احد مضايقج

أزهار ـ اي وسالفه شاغله بالي محد يحلها غيرك

ـ ولا يهمج نتغدا ونحجي

ـ ماشي حبيبي عفت التلفون عـــلىٰ الشاحن وتمددت وسمعت صوت مروان

مروان ـ ديله عاد وين صرررتي

أزهار ـ أجييت نزلت مروان عينه بالتلفون متكولي شبيك مستعجل منو راكض وراك ما نشوفك بهل البيت

مروان ـ عندي شغل ما احب كعدة البيت سيادتك اني اتغدا واطلع للمعرض هم تجي

كمال ـ لا بابا اليوم ما اجي تعبان واريد ارتاح

مروان ـ عـــلىٰ راحتك

أزهار ـ ناكل ويحجون عـــلىٰ الدوام والشغل كملنا وامي صبتلهم الجاي واني شطفت المواعين عـــلىٰ السريع واجت اسيا خلت الصينيه ومشت أسيا شــــــــــبيج

أسيا ـ تعبانه رايحه انام

أزهار ـ صايرين ما نشوفج كله نوم

ـ تعبانه ولازم ارتاح من رخصتج

ـ عـــلىٰ راحتج وعصام وين

ـ طلع ما اعرف وين راح

ـ مشت بتعب وبابا هز رأسه بأنزعاج وباو؏ لامي

كمال ـ عصام وين مولي

وصال ـ طلع

ـ ناوي يجلطني هالولد ليش هيج مسوي بالبنيه وهي حامل وتحتاج مدارات شــــــــــو مستجلب هالايام

ـ هما من يومهم هيج يتزاعلون فتره ويرجعون وتعرفه ما يحب احد يتدخل بحياته

أزهار ـ يحجون واني ما شاركت لن الطرفين غلطانين مروان شال السويج والتلفون وطلع وبابا مشه للغرفه ولحكته بابا اريد احجي وياك

كمال ـ گولي بابا

أزهار ـ مو اهنا وما اريد ماما تسمع حديثنا

ـ خير ان شاءلله شصاير بابا امشي

ـ مشينا ورد الباب وراه بابا ما اعرف شلون احجي وياك بهل الموضوع

ـ گولي بابا اسمعج

ـ أنتَ تعرف صديقتي رشا

ـ يا رشا

ـ هاي وياي بالدائره ومره عزمتها للبيت عـــلىٰ الغده تذكرتها مو

ـ هاا اي بابا تذكرتها واجت تشكرتني بوكتها ليش شبيها

ـ موخوش بنيه

ـ ليش شبيها احجيلي بابا

ـ حجيتله گلشي وضل صافن بوجهي اني كلني ثقه بيك بس ما معلوم منها شتسوي كلت احذرك منها

ـ صدك تحجين بابا وحده زعطوطه وزباله مثل هاي تاثر بيه وجايه تحذريني منها شــــــــــنو ما تعرفين ابوج شــــــــــنو ومنو اني رجل عسكري والعمر اله دور هالنماذج ما اشتريهن بكشر بصل صحيح علاقتنا اني وامج مرات انزعج وأعصب عليها بس الشاهد الله احبها وأعزها لن دره ثمينه وبنت بيوت وعز وشرف وأهلها تعبانين بتربيتها ورشا تروح فدوه لأظافر امج

ـ بعد روحي

ـ وهاي الادبسزز اشلفها من الدائره وانعل والديها

ـ لا بابا عوفها ختولي انوب تسويلنا سالفه ما ناقصين مشاكل

ـ وأنتِ ليش خايفه واني ابوج باتصال واحد انهي امرها واكعدها بالبيت واعلمها بيمن تندك وتخلي راسها ويامن

ـ لا ختولي أحنه أكبر من هالشيء

ـ ديري بالج لعد منها وابتعدي عنها واني هالايام أخلص شغلي والتفت الها لو انقلها لو أنقلج لغير دائره مهم ما اخليها حواليج بنت الگلب

ـ ماشي بابا حبيبي بوسته شكراً لتفهمك

ـ ولا يهمج باباتي يله رايح انام وارتاح ولاتجبيين طاري لامج وتضل تخاف وتوهسس على شيء تافهه من ورا منحطه وقليلة تربيه

ـ لا أبداً

ـ سبحان الله اول ما دخلت بيتنا امج ما ارتاحت الها وحجتلي عنها بس شمدريني تطلع خسيسه الناس انجاس يله زين انكشفت عـــلىٰ حقيقتها وانتبهي لنفسج باباتي بنيتي الاحبها

ـ أن شاءالله بابا راح واطمئنت وأستبشرت خير صعدت الغرفتي وراسلته كلامك طلع صحيح بابا أكبر من هالشيء

هشام ـ أبوج رجال معدل خوش زلمه لاتخافين عليه

أزهار ـ اي فدوه لطوله

ـ مبين تحبين ابوج هواي

ـ هواي كلش هواي بابا هو بطلي بهل الحياة احبه واعزه اكثر ما تتصور صديقي وحبيبي ودنيتي كلها

ـ الله يحفظكم لبعض ؏ فكره أنتِ وأبوج تتشابهون نسخه طبق الاصل

ـ شلون يعني

ـ بگلشي بـ لغة الحوار المشيه الخشم اليابس والتعامل الكبرياء شيء أساسي بشخصياتكم كلكم من ابوج لاخوج مجد

ـ أي كلنا طالعين عـــلىٰ بابا بس عمار يشبه امي

ـ الله يحفظكم

ـ ويحفظك الي

ـ ياروحي أكول حبيبتي

ـ گول گلبي

ـ اليوم حجيت للوالده عنج وهواي فرحت وحبتج گبل لاتشوفج

ـ أمك يا عيني

ـ أي والله وكالت أستعجل لا تطير هالطيره من أيدك لن اول مره تشوفني فرحان وحست بيه مرتاح وياج

ـ دمعت عيني وجاوبته أحبك انت وأمك

ـ وأحنه هم نحبج

ـ عمري

ـ أزهار.

ـ هاا عيني

ـ أهلج يوافقون اذا اتقدملج

ـ ما أعرف

ـ ليش ما تعرفين محد متقدملج قبلي علمود عـــلىٰ هالاساس تعرفين

ـ بلي من خلصت دراسه تقدملي صديق عصام ضابط بس بابا رفض كاله بعدها صغيره مو مال زواج ومن يومها سدوا الموضو؏ وابن خالي شاهين هم تقدملي بس رفضته

ـ هاا ليش رفضتي

ـ هيج ما نتوالم اني وياه

ـ اكدر اعرف

ـ هو من بيئه واني من بيئه الفرق شاسع بينا عقليته تختلف عني بهواي امور

ـ ليش من وين هو

ـ ساكنين بالريف وبيوت طين وزرع وحلال يعني هالامور

ـ ورفضتي لهل السبب

ـ هواي أسباب واولهن ما ارتاحله گلبي انسان متحكم

ـ خير أن شاء الله

ـ ليش سألت

ـ أحتمال اني هم انرفض مثله لـ اسباب

ـ بس اني احبك مو مهمه عندي الاسباب

ـ والفرق الطبقي البينا ما اعرف اذا أهلج يوافقون عـــلىٰ زواجنا وبالاخص أخوانج مبيين انفه وخشومهم عاليه وحتى بالدوام هيج

ـ منين تعرفهم بالدوام

ـ ابن عمي ضابط وياهم وسألته عنهم

ـ اهاا تمام لا ان شاءلله يوافقون المهم اني موافقه

ـ أتقدملج وشصير خل يصير

ـ مو عبالك بعد وكت علاقتنا ما صارلها كم شهر

ـ من تطول محلوه وأني رايدج بالحلال ما اريد اخسرج تجين يمي وتعرفين شكثر احبج الزلم لو حبت بأفعالها واني زلمه رايدج مريتي

ـ أبتسمت وجاوبته واني موافقه

ـ موافقه عـــلىٰ گلشي ظروفي وحالتي الماديه يعني هواي أمور تتغير بحياتج ولازم أخليج كدام الامر الواقع أنتِ مدلله وبنت عز

ـ عادي حبيبي

ـ شوفي حبيبي أني وحيد أهلي تعرفين هالشيءمو

ـ اي اعرف

ـ شتحبين تعرفين بعد

ـ أحجيلي عن اهلك

ـ أمي مريضه من بعد أختفاء ابويه واخويه الجبير وراهم تمرضت وعندي أخوات ثلاثه وحده سادس أعدادي وحده كليه مرحله ثانيه وأختي الجبيره أيمان ارمله عدها أطفال اثنين كلنا كاعدين بيت واحد واني المسؤول عنهم وعن عيشتهم يعني كلهم بركبتي

ـ بقيت ساكته

ـ انصدمتي مو

ـ لا عادي

ـ أحجيلي أزهار

ـ شحجيلك حبيبي

ـ أني رايدج والشاهد الله وخليتهن كدامج وحده اثنين

ـ عادي حبيبي شگو بيها اعيش وياكم حالي من حالكم

ـ هاا

ـ اي والله

ـ بنت أوصول وأن شاءلله ما اقصر وياج وادللج فوك دلال أهلج وازود

ـ يكفيني حبك اليه

ـ ياروحي أن شاء الله ارتب اموري كلها واجي اخطبج .

ـ على راحتك گلبي.

ـ. يله حبيبي لازم اروح من ارجع احجي وياج

ـ أخذ راحتك حبيبي راح الله وياه ضليت خايفه وكعدت اقارن بيني وبينه عـــلىٰ الرغم حبه افرض من هالاشياء بس اكو اختلافات كثيره بيني وبينه يا ترى يوافقون اهلي واذا عاندتهم وتزوجنا شيصير كومه افكار تربعت بعقلي ودخت هواي أخر شيء وصلتني رساله منه كأنما عارف بشنو كاعد أفكر

هشام ـ خليها عـــلىٰ الله هي تدبر دام أنتِ موافقه وراضيه مو مهم عندي الباقين المهم أنتِ حبيبتي

أزهار ـ فدوه الكلبك هاي هيه گلبي عفت التلفون عـــلىٰ الشحن ونزلت ولكيت عصام موجود ومخبوص بكرم جايبله سياره ويعلم بي عفتهم ورحت عـــلىٰ أسيا اشوفها من زمان ما حاجين اني وياها دخلت الصاله نظيفة تلمع والغرفه كذلك وهي ما موجوده بس صوت الدوش مشتغل اسيا جاي تسبحين .

أسيا ـ اي هسه طالعه

أزهار ـ انتضرج لعد كعدت انتظرها شوي وطلعت كوه تمشي الحمل متعبها هاا شلونج

أسيا ـ زينه تمام وأنتِ

ـ الحمدلله شخبارج أنتِ وعصام رفعت شعرها تريد تسشوره وركبتها بينت كدامي عزا شــــــــــنو هالحجي

ـ شـــــــگو شـــــــــبيج

ـ ركبتج ما شفتيها بالمرايا شگد عيب

ـ بلي شفتها

ـ جاوبتني بقهر ولج شويه استحي وكولي أني حديقه

ـ تلحكين عـــلىٰ هالسوالف شلج بيها

ـ خرب بغيرتج أسيا ، هسه يعني متراضين

ـ يعني

ـ دام تراضيتوا لعد شــــــــــبيج كوه تحجين

ـ هـــــــــيج ما بيه شي

ـ عبالي احجي وياج بس الظاهر مزاجج مو تمام

ـ اي والله كلش موتمام

ـ دام تراضيتوا شـــــــگو بعد رادت تحجي ودخل عصام

عصام ـ كرم جوعان طكيله بيضه وكلاص حليب

أسيا ـ هــسه أمشط شعري وأسويله

أزهار ـ من رخصتكم طلعت من يمهم ورديت الباب وراي وسمعت صوته وهو يغازلها

عصام ـ حبيبي ليش سبحتي مو گتلج انتظريني

أزهار ـ طلعت من يمهم اسيا مو طبيعيه دام يحبج ورضاج بعد شگوو ياعيني مشتريه وجع الرأس لنفسج گوه الله يصلح حالكم احسسن شي.
_______

أسيل

ـ مرت الايام ومروان ما رفع الحظر وحياتي بهل البيت مثل الخدامه غسل ملابس ومواعين وطبخ وتنظيف انوب نسرين حملت وتتوحم ولعبتها لنفسي بس مجطوله بفراشها واسيل جيبي الاكل اسيل اخذي الاكل اسيل عينج عـــلىٰ الجهال أسيل غسلي ملابسهم عـــلىٰ ساعه أشيل راسي باليله ما بيها ضو گمر لعبوها لروحي مو وضعيه قسم بالله.

صعدت غرفتي جريت التلفون وشفته لحد الان محظوره لابسني ولا معبرني لو يريد جان رفعه الحظر بس هو عاملني معاملة العاهرات واني مصخمة الوجه كاعده اتأمل عـــلىٰ الفاضي يله شگو ورانا
وبهل الاثناء راسلتني تقى ردت احجيلها بعدين تراجعت وكلت لا انوب تروح تحجي لاهلي لن متوقعه منها راح ترفض وخاصه اذا عرفت طريقه كلامه الحجه بيها وياي لا ما ادخل احد .

" أنتظرته أسبو؏ وتالي رحت سويت حساب ثاني وراسلته كتبت اله ضروري احجي وياك بلكي يجاوب عباله شي مهم..

" مر يوم كامل وهو ما مجاوب رجعت دزيتله لايك مرتين ورا بعض وشافها واخيراً كتب

مروان ـ نعم

أسيل ـ شلونك

ـ الحمدلله منو أنتِ .

ـ معجبه بيك

ـ اي وشتردين

ـ ما اريد شيء

ـ شــــــــــنو تعرفيني أنتِ

ـ لا ما أعرفك

ـ لعد منين أنعجبتي بيه ؟

ـ من حسابك شفتك وانعجبت بشخصيتك

ـ اهاا

ـ اي والله

ـ حاجين قبل

ـ ما فهمت

ـ حاجين اني وياج قبل هالمره

ـ لا هاي اول مره

ـ جذابه

ـ عـــلىٰ شــــــــــنو اجذب

ـ أنتِ نفسج راسلتيني قبل فتره

ـ لا متوهم أحتمال غيري مبين عندك هواي معجبات ويراسلونك وكمت تخربط

ـ اي بس اعرف الشخص من يراسلني من اول مره متاكد أنتِ نفسج لاتغشمين نفسج مو عليه هالدروب كولي اني وفضيها

ـ لا مو اني

ـ راح اركعج بحظر اذا ما تحجين وانعل والديه اليجاوبج بعد

ـ ليش بسرعه تتعصب اني ما حجيت شيء يخليك تنفعل

ـ بس اريد اعرف وين تردين توصلين قبلها سحلتي نفسج وحظرتج وهسه هم جايه بغير درب شسالفتج يا بنت الناس من وين أنتِ؟ .

ـ شــــــــــبيك لزكلتي بابا اول مره اراسلك

ـ يابه دروحي

ـ لااا لااا اوكف

ـ هاا شگلنا

ـ أي أني

ـ ليش سويتي حساب ثاني

ـ لن أنتَ حظرتني

ـ لابستج بصطالي هم مو بس حظرتج

ـ ميخالف

ـ هيج واصله مرحله

ـ مرحله شــــــــــنو

ـ هيج سلامتج وهسه الحظر شلون تردينه افشرلج لو انسحاب تكتيكي

ـ ليش تحظرني ما مسويتلك شيء

ـ ما عاجبني احجي وياج

ـ بس اني عاجبني احجي وياك حتّى لو نكون أصدقاء

ـ أنتِ لوتيه وين اكوو صداقه بين رجال وبنيه لازم مصادقه قبلي وترديني صديق، لا الظاهر الوضع منزوع عندج

ـ لا والله وغلاتك بگلبي ما حاجيه ويه احد بس أنتَ

ـ وشلون أصدگج عـــلىٰ گلن ما يهمني روحي بابا مالي خلگج

ـ امانه لاتحظرني

ـ ساحله نفسج مثل الجلبه عـــلىٰ شــــــــــنو

ـ لن أحبك

ـ عابت هيج وبلت أهلج وين

ـ شعليك من أهلي

ـ يله عندي شغل

ـ ما تحظرني

ـ لا

ـ كول والله

ـ كتلج لا ولاتلحين زايد

ـ تمام اخذ راحتك شافها وما رد عليه ، دخلت على حسابه وضليت صافنه بصوره واتمعن شوف بيهن وشفت التعليقات جذبني تعليق بنت كله تعليقاتها قلوب وهو راد عليها بقلب أكيد هاي حبيبته شفت كل التعليقات وانطيت اعجاب ونفس اللحظه اجتني رساله منه

ـ لاتعلقين عـــلىٰ صوري

ـ ليش ممنو؏

ـ اي ممنو؏

ـ تمامم مثل ما تريد

ـ شــــــــــنو طول الوقت فاتحه أنترنت؟

ـ لا حسب مجالي

ـ اهاا تمام

ـ جان فاتح نت واني صافنه بالمحادثه وتالي خرجت منها عـــلىٰ صوت امي تصيحني عفت التلفون اي يوم اجيت

جنان ـ متكليلي شوكت تشبعين من هالنوم نزلي غسلي الحوش وسوي عشه أني رايحه بيت أخوج حارث اذا ما اجيت صبي العشه وتعشوا وغسلي المواعين وعينج عـــلىٰ جهال اخوج

اسيل ـ بعد أكو أوامر ثانيه

جنان ـ أنجبي غصباً عليج تشتغلين هذا بيت ابوج يله لاتلهيني رايحه ونزلي ورايه مو ترجعين تنخمدين اصعدلج انعنع عظامج واطلع هالنوم من خشمج

اسيل ـ لبست عبايتها ومشت الله يدري شوكت ترجع اكيد اسماء لكت جذبه من جذباتها وعبرتها عـــلىٰ امي
وكالعاده الشغل يتكربس برأس أسيل نزلت نظفت البيت كالبينا مسوينا مزبله ولا يجرن جاهل ولا يعلمن ويربن
كملت غسل وسويت عشه مخمله وتعشوا وغسلت المواعين ظهر ما ضل عندي واجه حسن

حسن ـ أسيل عيني سبحي مصطفى ومرتضى امهم تعبانه وريحتهم تكتل

أسيل ـ ماشي جابهم عليه واخذتهم سبحت وبدلت وطفروا على أهلهم وباوعت ملابسهم شمرتهن بالغساله بزعت قسم بالله ظهر ما ضال عندي راح اسكط .

" فرشت لابويه بالاستقبال وعرفت امي ما تجي تبات هسه تجيني طنطل غاسله عقلها غسل بقاصر وتايت
كملت گلشي وصعدت لغرفتي وتمددت وجريت تلفوني دخلت على حسابه فاتح نت راسلته دزيت قلب احمر

مروان ـ شــــــــــتردين

أسيل ـ ما اريد شيء مجرد قلب ورسلته شــــــبيك متحمل عليه وگوه تحاجيني كاتله أهلك لو شــــــــــنو السالفه بالضبط .

ـ بعد تعالي اخذيلج راجدي

ـ لا شعندي اني مو مثلك

ـ وشتعرفين عني مو مثلي

ـ مبين من طبيعه كلامك انفه وخشمك عالي

ـ شعليج روحي بابا

ـ ما جاوبته بس نار بصدري من وراه تجاهله وقساوة كلامه وبروده بالردود شفته نشر منشور محد معلق انطيت اعجاب وعلقت بقلب احمر بقيت اراقب التعليقات كلهم جماعته علقوا اله وشوي واجاني اعجاب لتعليقي من حساب وبهل الاثناء اجتني رساله عـــلىٰ الخاص من نفس الحساب انطتني أعجاب فتحتها

ـ شوفي لج لو تصيرين ورا الشمس انبش اهل اهلج واطلعج أنتِ وخيستج يا ساقطه !!!

يتبع .
__

15





.

أسيل ـ خفت وكل جسمي يترجف يربي منو بعدني ما مجاوبه وصلتني رساله ثانيه

ـ خفتي ياساقطه

ـ منــــــــو

ـ تعالي ولج شعندج بحساب مروان شوفي اذا ما تحذفين تعليقج وتلغين الصداقه البينكم صدكيني ما تشوفين خير لنفسج وقد أعذر من أنذر اوديج ورا الشمس .

ـ غير اعرف بالأول منو

ـ حبيبته وزوجته

ـ صفنت اهاا طلعت العينتين حبيبته جاوبتها ليش مروان متزوج شوكت تزوج شــــــــــو ما نشر

ـ عن قريب نتروج يله ولي عنه

ـ وتهددين حضرتج

ـ كيفج حبيبتي شتردين اني حاضره

ـ شتسوين سوي وأني ومروان عـــلىٰ علاقه ونحب بعض وعلاقتنا قويه أكثر ما تتصورين، حجيت بدون وعي من نار گلبي من عرفتها حبيبته أشتعلت من القهر والغيره أحس اني اولى بي هذا أبن عمي رجعت جاوبتني بتهديد

ـ شوفي أني بابا مسؤول بالدوله وهسه بثانيه وحده اشيلج أنتِ وأهلج ف الافضل أتعامل وياج بالحسنى لن خطيه مبين عليج الحليب بعده بخشمج وزعطوطه ومراهقه ما عليج العتب ف ما اريد اكبر الامر وادوسج بالرجلين مطولين خلك وياج

ـ يعني أنتِ جاي تخوفيني بهذا كلامج عشتوا ولج شعره ما تهزين مني وكولي أنتِ خايفه مني لا أخذه منج واخليج بقهرج

ـ لاتضحكيني حبابه هذن سوالفج ما يعبرن عليه عبريهن على غيري مروان عينه ما يرفعها عـــلىٰ ضل بنيه مو عاد وحده ساحله نفسها بالقندره ولابسج بالبصطال مالته ويعاملج معامله العاهرات وأنتِ مجلبلته عـــلىٰ أحبك ومعجبه بيك بابا شتحسين كرامتج من هالحب وين شــــــــــنو ما عندج قدر وقيمه لنفسج وين ماخذه عمرج بهل التصرفات الطايشه اهلج ما انطوج تربيه أمج ابوج أخوج اختج الكواد الحاويج بيته وينهم عنج

ـ شعليج أنتِ صرتي شريفه بࢪاسي عـــلىٰ أساس أنتِ ماكو هيج ، تحجي وتغلط وأني ابجي على روحي أشسويت بعمري يعني حجيت وياك ليش رحت كلتلها اعاملها معامله العاهرات والظاهر علاقتهم قويه وما يضم عنها شيء مسحت دموعي وبعدها تكتب وانطيتها حظر

بهل الاثناء هو دز رساله فتحتها وكاتب

مروان ـ بنت الگلب شــــــــــنو هذ هالحجي اني وياج على علاقه منين تجيبين هالاوهام بابا أنتِ صاحيه لو شاربه، بيج شي

أسيل ـ واصحى منك أنت وهاي الحقيره حبيبتك دازها عليه

ـ هاا هيج الحجي

ـ اي هيج الحجي عندك مانع

ـ لا يبوووي شعندي وياج قابل ادبسزز *** ولج قذره روحي شوفي نفسج بالمرايا يا بلا كرامه حيوانه

ـ خليت الكرامه الك

ـ لا الظاهر أنتِ تريدين تبليني بيج وراج سالفه مصخمه گولي من الاخير منو دازج عليه واذا تردين غير شي اني حاضر ساعه زمان وافضلج السالفه كلها وكلمن بدربه

ـ گبل حظرته لن كام يجفص بكلامه أنقهرت حيل ونار وشبت بصدري هيج مروان ما حجيت حجي موزين وياك انت نزلت تفشرر وسوالفك سخيفه الظاهر هذا طبعك تتعامل بي ولسانك وسخ والتحبها انكس منك إثنينكم وجه لعمله واحده .

رجعت اقرا كلامهم وركزت عـــلىٰ كلامها هي بالبذات وشعور الانتقام سكن داخلي وغضب عارم توسطني ماشي كلتيلي حبيبته اني مو بنت امي وابويه أذا اخلي الج وهذا كلامكم اليه اذا اندمكم عليه اضعاف جنكم عـــلىٰ أسيل من عيني بس مو هسه أخليكم تنسوني وأفاجأكم بمفاجأه تسوه عمركم
" تريدلك واحد شريف ماكو كلها داكتني بالنعال ناعلين شيب أهلي كمت ابجبييي بقهررر وأشهك تمنيت احد يحاجيني ويطبطب على أكتافي ويعلمني ويرشدني لو امي تصعدلي تسأل عني وعن أحوالي تكولي شـــــــــبيج ماما منو وياج منو مضايقج راحت بنفسي اشوف أهتمامها بيه حايرتلي بس بولدها وجناينها واحفادها ولا جني بنتها مسمتتني بعيشتي خلتني أتقبل الذل والاهانه والغلط والفشار وما حاسه بعمري بأي تصرف أسوي "تصرفاتي تصرفات بنت شورا؏ ولا جني بنت بيوت وناس معروفه ويشهدلهم بالتربيه والاخلاق العاليه والهم إسمهم ومكانتهم بالمجمتع وشفايده البنت جافصين عليها ومسوينها خدامه لنسواين وتكرف وسخهم وسخ جهالهم وكرهوني بالعيشه وياهم عـــلىٰ ساعه اشيل رأسي بس ما اعرف وين اهج وين انطي وجهي . __

أزهار

ـ كعدت عـــلىٰ صوت المنبه وطفيته وضليت كلما يدك اطفي وارجع اكمل نومتي كل ظني بعد وكت لما افز عـــلىٰ صوت اتصال رفعت الشاشه هشام فزيت مخروعه فتحت الخط هلا حبيبي

هشام ـ وينج گلبي ترى صارلي نص ساعه أنتظرج تأخرنا

أزهار ـ هشام توني كعدت ما اعرف راحت عليه النومه

ـ ماشي حبيبي ميخالف نوم العافيه انتظرج وحاولي تستعجلين لن بعد وراي استاذ احمد ورقيه عيب تاخرت عليهم .

ـ ماشي قطعت الخط عـــلىٰ السريع غسلت وبدلت ورتبت شكلي شلون ماجان واندك الباب عـــلىٰ السريع اييي اجييت

مروان ـ مو عندج دوام وسايق ينتظر نزلي عاد شعندج متاخره لهل الوقت

أزهار ـ هسه أجييت باوع عـــلىٰ التلفون گبل كلبته لن جان مفتوح عـــلىٰ سجل المكالمات خله وطلع شلت جنطتي واغراضي ونزلت متوتره وعصام يفتر عنده صفاره انذار من صباحيات الله

عصام ـ فضيناااا عاااد

أزهار ـ اي مشه كدامي عزا هو يوصلني فتح الباب وخنزر بوجه هشام مشيت وصعدت ورا هشام جان عصام يگلب عينه عليه كمت نزلت صعدت من ذيج الصفحه وهو سلم عليه من ورا خشمه عبالك گاتل اهله

عصام ـ شعندك من الصباحيات الله واكف بالباب

هشام ـ شــــــــــنو شعندي غير انتظر اختك

ـ احجي عدل

ـ ما حاجي شيء اني، اشتغل خط وطالع عـــلىٰ رزقي مو بس هي وراي موظفين غيرها

ـ وشگو تجي علينا بالاول اخذ الموظفين الوياها وبعدين تعال

أزهار ـ ما جاوبه شغل ومشه سريع بس حسيت عصام انفجرر وراي والله ما راح يعديها اليه عـــلىٰ خير من ارجع الكاه ناصبلي حفله ويهلهل عليه، باوعت على هشام ساگت حبيبي خوما ضجت

هشام ـ لا عادي ليش اضوج

ازهار ـ أني صوجي تأخرت عليك

ـ ما صار شيء عيني لاتخلينها أبالج

ـ يسوق وأني عيوني عليه شگله رجولي وشخصيته ملفته لنظر بـ طيبة گلبه بتصرفاته وهدوءه وتعامله ويه الناس لطف أخلاقه عقله الرزن حبه وحنيته وخوفه عليه گلشي بي خلاني احبه وأتعلق بي بوقت قصير خلال شهرين وهالفتره عرض عليه الزواج يعني لو نيته مو شريفه جان طولنا بالعلاقه فززني من صفنتي

هشام ـ وين بالج حبيبي

ازهار ـ بالي يمك

ـ فدوه لهل العيون لاتنزلين عيونج خليهن اتمعن شوف بيهن مو عيون خشف سابيات گلبي سبي .

ـ نزلت رأسي مستحيه غركني بهدومي بغزله وحنيته وطبك السياره واخذنا احمد ورقيه ووتوجهنا الدائره نفس الروتين وأني كاعده أشتغل اجت وحده ويانا اسمها انفال هاا انفال محتاجه شيء

أنفال ـ اي والله اريد اخابر على امي بالي يمها عفتها مريضه ومالي واهس أشتغل واريد اخابرها ورصيد ما عندي وما على احد غيرج من البنات

ازهار ـ أي يمعوده صدك جذب هسه اخابرلج واحولج كارت والف سلامه ما بيها غير العافيه

ـ تسلمين حبيبتي لا لا تحولين كارت مو حاجه اني اشد كارت بس هسه شغل وملتهيه تعرفين ف كلت اخابرها بس وبلكي تنطيني تلفونج دقايق بس اطمئن عليها وارجعه الج

ـ لا شسالفه حبيبي خل اشوفلج اذا عندي رصيد احولج علمود تحجين وياها براحتج

ـ لا حبابه دتخجليني بكرمج بس اخابرها وهاي هيه

ـ تمام على راحتج فتحت الرمز وانطيته الها هاج گلبي اخذته

ـ تسلمين حبيبتي ما تقصرين هسه ارجعه الج

ـ اخذته وراحت عيني عليها بس اجه موظف طلب ملف والتهيت وياه وسالفه التلفون شغلت بالي شوي واجت انطته اليه هاا خلصتي شلونها الوالده

ـ تسلمين حبيبتي اي خلصت الحمدلله زينه وكلتلها عليج هواي دزتلج سلام مشكوره ازهار يله اني اروح اخذي راحتج

ـ الله وياج رجعت اكمل شغلي باوعتلها وشفت رشا لحكتها خلصت مصلتحها يمي ورافگت انفال يربي الواحد صاير ما يأمن ولا يثق بهل البشريه من اصفن واتذكر علاقتنا ولسانها اكول مستحيل يطلع منها هالشيء

" اشتغل بواهس واجاني مسج منه فتحته

هشام ـ شتاقيتلج يبنيه

ازهار ـ واني هم والله وين أنتَ هسه

ـ بالشغل والله أنتظر واحد يريد ياخذ عائلته لبيت اهله
وكلت احاجيج لن شتاقيتلج ينيتي.

ـ تمام عيني دير بالك على نفسك لاتسوق بسرعه من توصلهم حاجيني

ـ ماشي حبيبتي

ـ راح وبالي يمه ونفس الوقت انقهر عليه حياته كلها شغل يطلع من الصبح ما يرجع غير المغرب حتى من يوصلنا ما يرجع البيت يضل يشتغل وهالشي شاغل بالي يا ترى من نتزوج هم هيج يضل طول الوقت يشتغل وغايب عني شيء اكيد والمسؤوليه تكبر اكثر عليه لا هيج ما ترهم لازم اشوفله وظيفه بس نتزوج احاجي بابا يلكيلي تعيين مرتب ويرتاح بحياته واني هم ارتاح من ناحيته .

" خلص الدوام وهو ما موجود اتصلت عليه وهوسه يمه حبيبي وين أنتَ

هشام ـ بالمستشفى أمي تخربطت وخابروني ورحت البيت اخذتها وديتها ادعيلها ازهار فدواتج

ازهار ـ لاتخاف عيني ما بيها شي ان شاءلله صحه وعافيه

ـ بس اطمئن عـــلىٰ وضعها ويجي أبن عمي واجيكم

ـ ماشي على راحتك قطع الخط وطلعت برا انتظره واسمع احمد يحجي وياه بس اني گلبي مثل النار عليه مر وقت واجه سريع وطبك سيارته صعدنا وسلمنا وعيوني تباوعلها بلهفه وخوف

احمد ـ الوالده شلون صارت ان شاءلله احسسن

هشام ـ الحمدلله

ازهار ـ وصل أستاذ احمد بالطريق يتصلون عليه ومخبوص ومن خلال كلامه يدلي اخته عـــلىٰ الفلوس وين ضامهن

هشام ـ موجودات بالبوفيه مالت امي دوريهن زين ياعيني هاا لكيتهن ماشي راح يمرلكم بارق وروحوا وياه هسه اجي اني هاااي شبيها تبجي شكوو ياعيني ما بيها شي والله هسه يسولها فحوصات و؏ العلاجات يرجع وضعها طبيعي يله سكتيها الله وياج

ازهار ـ باوعلي بلهفه شلون صارت خاله

هشام ـ عـــلىٰ الله لزمتها رجفه ما جانت عدها ابداً كامت ما تسيطر عـــلىٰ ايديها، انشلع كلبج يا يمه عمت عيني