ودام دمك محروك على أختك خابر ابن عمك خل يجي يأخذها ويخلصني من همها بعدها طالبه شديت وياها وبطلتها من مدرستها وحرمتها من مستقبلها نشبت وياهها خليت ࢪاسك وعقلك يمها حاربتها بلكمتها يوميه تضرب بيها وتسلحها لبيتك سويتها خدامه الكم ولنسوانكم تكرف وسخكم وتداري جهالكم واسب واغلط وأضرب بيها وادعي عليها وهي ساكته الرايح والجاي يكفخ بيها سويتوها خدامه لنسوانكم والكم ومكفخه جوه ايدكم وهسه واكف تحاسبني وتكولي شنو من ام تطعن بإمموتي
اني خسرت بنتي علمود ارضيكم واداري جهالكم هسه صايرلي الاخ الحنين هسه بعد وكت يمه بعد وكت بس الصوج مو منكم الصوج مني اني فرقت بينكم اني السبب الصوج بيه الصوج بيه ..

ـ شــنو هالحجي هذا يعني أخ ما يضرب أخته وهي هم لاتنسين لسانها شطوله وما تحترم أحد وبس تتذمر وتتبطر احاجيها كلمه تردها بعشره تلزم الجهال تضربهم وتجاوز على نسوان أخوانها شوفيها هسه من خطبها مروان صارت أدامي واحترمت نفسها حتى اسماء صارت زينه عليها لن المحترم نفسه منو ما يحترمه بس الما محترم روحه ومو ادامي ينركع بالقندره
. لاتذبين الصوج بس بينا بنتج اسيل هم مو ادامي مو بس أنتِ شايله همها اني هم شايل همها وانطيتها المروان أريد أرتاح منها دراسه وماكو شگو كاعده وتششكى من شغل بيت أهلها وتالي طلعتي أنتِ تكولين مسوينها خدامه شطلعت هاي انوب شنو البنات ما يشتغلن بيوت اهاليهن .

ـ هاي هي خل تزوج ونخلص منها ومن همها .

أسيل ـ نزلت دمعتي شلت جنطتي وعبرتهم وضلوا صافنين عليه گبل صعدت الغرفه بدون أي كلام طفيت الأضويه ونمت بفستاني ودمعتي على خدي .

" ما أعرف شكثر مر وقت كعدت ࢪاسي مصد؏ فتحت الگلوب باوعت الساعه بـ ٢ ونص كمت غيرت فستاني وجريت جنطتي فتحت التلفون ولكيته دازلي رساله على واتساب فتحتها

مروان ـ نايمه من وگت؟

أسيل ـ جاوبته محتاج شيء مُباشِرةً رد عليه

ـ هسه كعدتي

ـ أي

ـ أمي رادت تحجي وياج

ـ الصبح أتصل عليها

ـ إسبو؏ اليجي أعرس عليچ

ـ ماشي

ـ شو ماشي فرحانه حضرتج

ـ شجاوبك لعد

ـ هم صح

ـ اخذ راحتك

ـ وين تولين ليش كعدتي لعد شعندج؟

ـ لاتخاف ما عندي غيرك مارد فصلت الأنترنت ونمت بس يانوم يجيني مية مره أنگلبت مية فكره بࢪاسي الصبح كعدت على صوت أتصال رفعت التلفون عمتي وصال باوعت الساعه بـ ٩ جاوبتها هلأ عمه

وصال ـ هلأ حبيبتي خوما نايمه وازعجتج

أسيل ـ لا عادي عمه

ـ فدوة لهل الصوت حتى صوتج يجيب العافيه ولك مروان نيالك دتصلي صلاة شكر شبيك صاير ملحد

مروان ـ سويتني مُلحد الحمدلله والشكر .

وصال ـ اي يمه أسيل عرسكم قدمناه مو علمود مروان احنه نريدج بيتنا والبارحه من رجعت ولكيت البيت مرايا غسلت مروان غسله من هاي التبرد الگلب أدري مبقينج تنظفين عود وصيته وگلتله زايد تسويلكم الجاي ما اقبل بعد

ـ لا عمه ما مسويه شيء أحسن ما اضل كاعده

ـ فدوة لبنيتي أمج وين

ـ موجوده جوه أني بغرفتي فوك

ـ البارحه ما رضيت عليها وحجيت لاتزعلين

ـ لا هي خطيه علمود الجهال رجعت رادت تبقى بس خابروها ونسرين حامل ما بيها وضعها وحملها تعبها ف راحت واني بقيت

ـ هاا اذا هيج خطيه حقها لعد واحنه هم كلفنا عليكم بس الشغله صارت ركض بركض لو ادري هيج جان دزيت على زينب بس صارت و أعتذريلي من امج حبيبتي

ـ لا عادي عمه تدللي ما صار شيءإحنه أهل

ـ اي والله أهل وهسه لازم نبلش بجهازج هم يله نلحك وعلى كيفنا وما ننخبص مثل ازهار اني راح اخابر أمج اجي عليكم ونطلع سوه نجهزلج أو تحبين أنتِ وامج وأختج كيفج اللي يناسبج ويريحج حبيبتي .

ـ كيفكم عمه ماكو فرق .

ـ اخابر امج واتفاهم وياها وأنتِ هم كوليلها

ـ أن شاءالله عمه

ـ يله عيني أخذي راحتج .

ـ الله وياج نهيت الأتصال ونزلت لكيت أمي تطبخ الغده يمه عمتي وصال خابرتني ..

جنان ـ اي وشگالتلج

أسيل ـ علمود جهازي تكول تحبون أجي وياكم نطلع سوه نجهزلج أو أنتِ وأمج وأختج كيفج الي يريحج

ـ لا گوليلها خل تجي تأخذج وروحي أنتِ وياها جهزي !!

ـ أني وياها وأنتِ يمه؟

ـ أني شبيه

ـ مو لازم أنتِ تجهزيلي

ـ ما بيه رجليه يوجعني وجدج مريض اريد اروحله ومرت أخوج تعبانه وين أعوفها والبيت ما بي أحد يجينا خطار أحد منو يضل

ـ يعني جدي ونسرين والبيت والخطار ضروريات هسه

ـ شسويلج يا امي ظروف بعد قابل بكيفي وشگو بيها مو وصال حسبة أمج

ـ بس أنتِ أمي

ـ أسيل لاتسوينها سالفه

ـ لعد خلي هديل تجي ونجهز اني وياها

ـ عمتها مريضه ومتعارگه هي ورجلها مشاكلها گابه لستار وينها ووينج

ـ أسماء نسرين اي وحده

ـ زعلانات مني من حجيت ويه اخوج حارث

ـ سديتها بوجهي فدمره ما جاوبتني اللي أعرفه البنيه أمها لو اخواتها يجهزنها مو عيالها وعمتها عاطت بيه

ـ لاتضلين بس تلطمين شسويلج كتلج ما اكدر وعمتج هي تريد تجهزج روحي وياهن وخلصيني عاد

ـ بس اني اريدج أنتِ تجهزيلي مو هنا

ـ خرب بيج وبجهازج زين لو لا ولي عن وجهي مية الف شغله وراي جاي أكولج ما اكدر زوملتي فوك ࢪاسي مثل الثور

ـ ماشي هاي هي يمه يجرالج صعدت الغرفه وبجيت أتصلت على هديل ما جاوبتني دزيتلها رساله اريد احجي وياج فدوه

هديل ـ ما الي خلگج بعدين .

أسيل ـ يا يوم الج خلگي حتى بعدين

ـ دنجبي ناقصتج أني .

ـ حظرتني من الواتساب هاي شبيها خبال أي والله اي واحد يغثها گبل تحظره اني صوجي أجيتج عبالي أختي وتفهمني وتقنع أمي طلعتي حرامات بيج الاخت

" صفنت وبجيت حتى عيب ابلغ عمتي وصال هما يجهزوني ومحد من أهلي يمشي وياي بالجهاز بقيت كاعده وحصره بگلبي نار نار تلهب مختنگه حيل ..
____

أزهار ـ كعدت على بوساته بخدي هشام عوفني نايمه

هشام ـ يله حبيبي أكعدي گافي نوم تدرين الساعه بيش

ـ حتى لو نعسانه

ـ ما جعتي

ـ لا رفعت نفسي بسته من خده شعندك كاعد

ـ كاعد لن ما مصدك مخليج بغرفتي خاف بحلم بوسيني علمود اصدك

ـ أنت تبوسني

ـ ليش مو أنتِ

ـ لا أنتَ

ـ خشمج نزلي عوفيلي كبريائج هسه

ـ ما ينزل باقي شامخ

ـ نعله على روحه شو تعالي

ـ سحبني وكلبني على بطنه ويلعب بشعري واني العب برجليه انت فد واحد كلش حلو ولطيف

ـ وأنتِ فد وحده كلش عرمه وخشمها فد يابس

ـ فديته خشمي

ـ طالعه على اخوانج

ـ فخري وأفتخاري

ـ اي افتهمنا

ـ تغار

ـ على شنو أغار

ـ منهم

ـ أنجبي

ـ هشام لاتجاوز

ـ شبيج حميتي شحجيت

ـ ما احب الغلط افتهمها هاي

ـ اي على كيفج عيني

ـ نزلت رايحه أسبح

ـ أوكفي اجي وياج أخاف تضيعين

ـ ليش يمه أضيع

ـ أدليج شبيج بابا دتعالي اني اسبحج

ـ لا استحي

ـ فديته اليستحي غير اموت على ربه والله اسبحج بيدي أنتِ ناعمه جنج لعابه .

ـ هشام استحي والله ما أكدر

ـ روحه لهشام بنيته حبيبته

ـ حضني ويبوس بيه من ࢪاسي بس متباوع

ـ ميخالف

ـ متفقين

ـ متفقين يله امشي خل اشوف الصاله فارغه واجيج حضري مناشف منشفتي تلكينها بالمجرات .

ـ تمام طلع واني رحت دورت منشفته ولكيتها قديمه حيل تعبانه وتذكرت امي اخذتله جديده طلعتها اله وداخليات مالته كلهن قديمات انقهرت عليه من اروح لاهلي اشتريله، فتحت الكنتور زين تراكسودات زينات طلعتله واحد وملابسي ومديت ࢪاسي وفتح الباب اشرلي وركضت وجرني وقفل الباب ...

" طلعنا سوه وأخته شافتنا وهو استعجل وكبل قفلنا الغرفه ويفرك بوجهه

هشام ـ شافتنا طلعنا سوه من الحمام مو

ازهار ـ اي ليش

ـ شنــو ليش عيب بنات بيت يله اخر مره

ـ ما حجيت لبست وشسورت شعري وخليت عطورات ومرطبات عنايه وهو حاضني ويباوعلي

ـ فديت النظيف خليلي من هذا المرطب

ـ جيب ايدك اخذت المرطب وكعد على حافة الجربايه وخليتله ورجليه ولبسته جواريب

ـ تعلميني على الدلال واني ما متعلم

ـ اني أدللك لعد شنو شغلي أنت حبيبي وزوجي

ـ عسى من انحرم منج

ـ أكوم أسوي ريوك

ـ يا ريوك وگت غده هسه كعدي لاتطلعين الأكل هو يجيج من حقج تدللين عروستي

ـ كرصني من خدي وطلع وشويه ورجع وكعدنا بالكاع دوشك أسفنج مفرش ومخاد اثنين سحبني جوه ايده ويعدل بشعري واندك الباب

ـ أدخلي .

ـ دخلت إيمان بيدها صينية خلتها كدامنه وهشام باوع الأكل ما مرتضي

ـ وين الغده

إيمان ـ هذا خويه

هشام ـ شـنو هذا ليش ما طابخات

ازهار ـ حسيتها منحرجه مني باوعت الاكل مركة لحم وتمن بايت ودجاج مبين مال غده العرس باقي وياه طرشي وخضروات حجيت يله حبيبي عادي شگو بيها مرگة وتمن نعمة الله عاشت ايدج ايمان

أيمان ـ الله عافيه عيني يله اروح اسويلكم جاي

أزهار ـ مديت ايدي واخذت الخاشوكه يله أكل

هشام ـ لا رايح اجيب غده من برى واجيج عوفي

ازهار ـ لا والله متكوم قابل غريبه عنكم مو صرت زوجتك هاي هي بعد حالي من حالكم شتأكلون أكل وقابل ما مأكله لحم لو مشاوي اني أصلاً مشتهيه تمن ومرگه يله مد ايدك بسم الله .

هشام ـ فدوه لهل الحلك ينكط عسل شو بوسه

ـ باسني من شفتي ورجعنا كملنا أكلنا جنت جوعانه وأكلت وهو صافن عليه شلت الصينيه ما قبل هو شالها ومشيت وراه للمطبخ خلاها عالسنك .

ـ غسلي وتعالي وراي

ـ تمام شفت الجاي محضرات الكوابه عالسنك بصينيه نظيفات بس شعور غريب أباوع عالمطبخ تعبان والرطوبه مأكله الحايط والكاونتر قديم بس نظيف ومرتب ما بي هوسه والسنك فارغ ما بي ولا ماعون لن اول يوم اجاني هيج شعور مع الايام اتعود

" صبيت الجاي واجت افراح خبطت زاهي وكفت تغسل المواعين وگالت بحديه

أفراح ـ ياريت اللي صار اليوم ما ينعاد مره ثانيه لن موو لوحدج ساكنه وياج بنات بيت ثلاثه واني شفت وغلست ولو الصوج مو منج لن طبيعتج تختلف الصوج لاخوي المسحول وراج .

أزهار ـ عفواً شتقصدين

ـ أقصد طلعتكم من الحمام تسبحين أنتِ وياه عيب هاي مو من أصول التربيه وحمواتج بنات بيت ويلاحظن ليش الرجال يسبح ويه مرته انتبهي لتصرفاتج ومنو عايش وياج أوك .

إيمان ـ هاا فار الجاي اصبلكم

أزهار ـ لا اني اصب صبيت واخذته ورجعت الغرفه مصدومه بكلامها وطريقه صياغة إسلوبها ما عجبني تقلل إحترام بطريقة مبطنه بصوره غير مُباشِره .

" كاعد يتصفح انطيته كوب الجاي

هشام ـ شبي حبيبي

أزهار ـ ما بيه شي عيني اشرب جايك كعدت بصفه اشرب ونباوع مقاطع سوه وصارصوت صياحهن عالي عاف الكوب على الميز وكام

هشام ـ لا اله الا الله ما نخلص احنه .

ازهار ـ طلع ورجعت أباوع المقطع بتلفونه وصوته علىٰ عفت الكوب وگفت وراه الباب

افراح ـ شسويلها يعني

هشام ـ أفراح لسانج يعني ما خلصان من مشاكلج أنتِ واخواتج انوب تشدين وياها ليش هضمتيها اني مو نبهت عليج وكلتلج ايمان مهضومه وخط احمر اذا غثتيها اكسرلج ࢪاسج ليش تجبريني أقسى عليج

أيمان ـ هذا هو خويه روح على مرتك عيب شتگول علينا من اول يوم مشاكلنا اني واخواتي شسوي هاي هي تعلمت وتعودت عليهن مو جديده عليه هنا هم خطيه عاذرتهن..

هشام ـ لا ما اسمح لاحد يغثج وغصباً عليهن يحترمجن وينجبن والا استخدم اسلوب ثاني بالمعامله والمو ادامي اركعها بالقندره على حلكها وامشيها على صراط المستقيم وهذا الكلام موجه للكل بدون أستثاء

أفراح ـ ومرتك هم

هشام ـ انجبي مرتي ما الج شغل بيها اني كلامي وياجن ومرتي محد اله حكم وسلطه عليها عداي اني وبس وهي تعرف نفسها شلون تتصرف ما يحتاج احد يفرض حكمه عليها .

ازهار ـ رجعت كعدت وأجه مزعوج شافني وأبتسم
احميلك الجاي مره لخ.

ـ ما يحتاج حضنج يكفي ويوفي تعالي

ـ لمني بحضنه وروحه مليانه تعب تمسكت بي ميخالف حبيبي عادي تصير بإغلب العوائل هونها تهون صعبها تصعب سهلها تسهل .

ـ فدوة لحلكج ونعم ما أختاريت ازهار أنتِ عالمي الكه بي راحتي من تعب دنياي أنتِ مسكني وراحتي

ـ حضنني بإحضانه دافئة، وقلبه يخفق بقرب قلبي ونبضاتنا تتواصل في وحدته، روحانا متقاربتان، جسدانا متضامنان في دفء وحنية العميقة وكلمات الحب والغزل تتراقص على شفتيك، بينما تتمرد رجولته على أنوثتي، تدلّ على عطاياه وحبه وتستوحذ منحنياتي بلمسات حنينية وقبلات نارية تنتقل من شفتيّ إلى رقبتي، تنتهي بقبلة خفيفة على راسي وننغمر في نوم عميق، محاطًا بهدوء الحب."

" مرت تلك الأيام كانت أجملها عشتها بكل تفاصيلها وساعاتها وثوانيها ولحظاتها من الحب والغزل والحنيه عالمنا كان مليئًا بالاطمئنان والأمن والأمان،حبيبان، روحانا متقاربتان، بجسد واحد نفهم بعضنا البعض من نبرة ومن نظرة. عيناه تنظرلي وعيناي تفهمه
حبينا بعضنا، وعانينا المشاكل معًا، في كل الظروف والمراحل من الحياة قررنا نساند ونعاضد ونواجه معًا الحلوه والمره. وما نخسر لو كل الظروف والعقبات تواجهنا
كتفًا على كتف، يدًا بيد، نمشي معًا في درب الحياة، نستمتع بجمال الحب، ونستمر في رحلتنا معًا، بثبات وعزيمة."

اليوم سبعتي كعدت من الفجر صلينا وسويتله ريوك وراح الشغل الله وياه كعدت نظفت غرفتي وعطرتها وغسلت ملابسنا ونشرتها على الرغم المجفف كوه يجفف بس ميخالف، رجعت شطفت الحمام والمغاسل والاستقبال مفروش مدات ما بي تخم كنسته بالمكنسه ما تشفط كوه واير كل اشوي يفلت شمرتها وتكأبت واختنكت وصفنت على الوضع مزري والوسخ بكل مكان هوسه كعدت اخذت نفس وبقيت صافنه بحدود الساعه...

" استغفرت ربي وكمت اكنس ويفلت وارجع اكمل واضغط على روحي وصلت بيه اريد اعيط تالي تحملت وكملته وجبت معطر من غرفتي عطرته وضل الحوش نعالات مشمره والماي المغسله يجري والصابون ملزك لعبت روحي من الوضعيه لفيت شعري ورفعت ردان التراكسود

.. وبديت اشتغل جبت السطل وخليته جوه البوري وبشلت تنظيف وغسل وساده خشمي ميخالف تتعودين ازهار غسلت المغاسل بس تقيأت ما تحملت ما متعوده اغسل اول مره والمكان مختلف واجهت صعوبه بشكل ما ينوصف ولا ينطاق بس سكتت وما بينت وتحملت وكلت ميخالف اتعود .

افراح ـ شكوو ساده خشمج

ازهار ـ فزيت على صوتها لا هيج

ـ المكان مو مكانج تواجهين صعوبه حقج

ـ لا عادي ماكو صعوبه

ـ لا واضح من الفجر تنظفين ولحد الان ما مخلصه

ـ نظفي وياي ونخلص سوه

ـ الشغل نوبه حبيبي واليوم نوبتج يوميه التنظيف على وحده يله وخري افوت المغاسل .

ـ عبرت ودخلت شمرت الماسحه واستغفرت ربي رجعت اكمل غسل الحوش كملته ورجعت المطبخ ايمان منظفته ومسويه ريوك كاعده هي وخاله وسجى وصبا صباح الخير

الحجيه ـ صباح العافيه كعدي بنيتي تريكي ويانا

ازهار ـ لا خاله تريگت اني وهشام

ايمان ـ الف عافيه عيني .

ازهار ـ الله يعافيج عفتهن ورحت الغرفتي لكيت اسيا متصله عليه اتصلت عليها هاا حب

أسيا ـ هلا حبيبي وينج اتصلت ماكو

ـ جنت انظف واغسل وهسه اجيت اسبح

ـ فدوة صايره ام بيت والله ناعمه مو مال تنظيف خوما تعبتي

ـ لا عادي بالعكس الشغل حلو

ـ فديتك خلصتي هسه

ـ اي والله شوكت تجون

ـ ازهار العصر نجي عليج .

ـ هاا ليش

ـ نكلف عليكم غده هي مباركه العصر افضل علمود لاتنبخصين أنتِ هشام ومصاريف زايده

ـ هاا والله ما ادري عادي يمعوده

ـ لا حبيبي مو عادي هو هم خطيه عمتي خابرت نسوان عمامج عالعصر ننجمع ونجيكم

ـ تمام حبيبي هذا هو

ـ يله اخذي راحتج حبيبتي روحي سبحي

ـ ماشي عيني نهيت الاتصال وأتصلت على هشام هاا حبيبي

هشام ـ عيون حبيبج گملتي كعدن ساعدنج

ـ هاا اي كعدن وكملت

ـ خابرتي أهلج شوكت يجون

ـ كالوا عالعصر

ـ ليش مو عالغده هسه وصلت الكصاب اجيبلكم لحم طبخون غده

ـ لا حبيبي لاتكلف على نفسك ما يحتاج العصريه مباركه وهاي هي .

ـ ما يصير ازهار

ـ لا يصير يله كلبي اروح اسبح

ـ الصبح سبحتي لاتتمرضين ليش تسبحين هسه

ـ نظفت البيت وغسلت الحوش لازم اسبح

ـ هاا ماشي حبيبي الظهر اشوفج

ـ لاتتاخر

ـ بعيني بوسه لشفايفج الاحبهن

ـ وصلت

ـ باي حبيبي

ـ الله وياك گلبي نهيت الاتصال واخذت ملابسي دخلت الحمام ماكو الطشت طلعت حبت سطل
وسبحت وغسلت ملابسي ومجفف شلع گلبي بالكوه نشفن نشرتهن وللظهر اجه اخذت منه الضيافه خليتها بالثلاجه صبن الغده ورحت اساعدهن كلهن بالمطبخ شمسويات غده

صبا ـ ما مسوين مركة البارحه بايته وتمن

افراح ـ ما تاكلينها مو حقج ما متعلمه على الأكل البايت ومركة ناشفه اكلج كل كسور لحم ودجاج يله مع الايام تتعودين هاي اذا تعودتي .

صبا ـ خطيه والله يله امشن الاكل راح يبرد يله الاكل جهز تعالوا تغدوا سجى سليمه تعالي ايمان جبيبي صراكعيج وتعالي .

ازهار ـ ضليت صافنه وفزيت على صوت هشام

هشام ـ شو واكفه امشي نتغده

ازهار ـ اي مشيت وياه فارشات سفره بالاستقبال كعدت بصفه باو؏ المرگه وحجه

هشام ـ مرگة البارحة ليش ما طابخات

أفراح ـ مرتك اليوم الطبخ عليها ما طبخت

ـ وانتن شنو شغلجن

ـ حالنا من حالها وهذا الموجود شنطبخ يعني مو دائماً هذا اكلنا لو نغيره علمود مرتك ما متعلمه عليه .

ـ شو لسانج طولان افراح راسج يتكسر

الحجيه ـ كملوا اكلكم يمه أفراح سكتي ضبي لسانج

ازهار ـ بالكوه ضبط اعصابه وسگتلها مديت أيدي اكل وهو يباوعلي اشرتله اكل عيني اكل لكمتين وراح الغرفه
وقررت منا وهيج اني اطبخ عالرغم ما اعرف كل الاكلات بس اخلي ايمان تعلمني ميخالف اصبر واتحمل لخاطره

ايمان ـ أهلج اليوم يجون مو

ازهار ـ اي عالعصر يله عليكم بالف عافيه كمت غسلت ولحكته لكيته نايم غيرت ملابسي وحضنته ونمت للعصر كعدت على الاتصال يبوه راحت عليه نومه هشام طالع لشغل جاوبتها الو اسيا

اسيا ـ وينكم يمعودين كسرنا الباب شنو نايمين

ازهار ـ راحت عليه نومه محد كعدني هسه كمزت لبست ثوبي ولفيت شعري ركض وطلعت الاستقبال هوسه والسنك مواعين الغده ضاله ردت ابجي عود صبح منظفه خرب هسه شسووي والباب يدك طلعت ايمان فدوه اهلي اجو بس الاستقبال رتبي عالسريع

ايمان ـ والله نظفته ونمت اني وجهالي منو وسخه اووف روحي عيني فتحيلهم هسه الملم.

ازهار ـ نعالات مشمره فتحت الباب واسيا صفنت على شكلي اتفضلوا عيني بوستني ونسوان عمامي كلهن كشخات ولبس فاخر والكعب سلمت عليهن ودخلن وايمان والحجيه طلعن استقبلهن واني افرك بإيدي وامي صافنه عليه

" ركضت رديت باب المطبخ ودخلن الاستقبال ونزلن الهدايا بالحوش اشكال وانوا؏ اجتني اسيا

اسيا ـ ليش ما مرتبه ما متحضره مو بلغتج

ازهار ـ راحت عليه نومه

ـ يله ميخالف امشي هسه اطلعج عروس يله حبي

ـ دخلنا من باب المطبخ وصفنت عالمطبخ امشي لغرفتي دخلنا وبلشت مكياج ولبست وكشخت واجتي امي

وصال ـ شنو عيالج ما يدرون نجي عليكم

ازهار ـ بلي يدرون

ـ لعد حمواتج وين

ـ بغرفتهن هزت ࢪاسها وباوعت لغرفتي غيرتلي الجرجف وشالت ملابس هشام خلتهن بالكنتور
وطلعنا اني واسيا لكينه ايمان غاسله المواعين ومنظفه المطبخ مسويته يلمع واسيا طلعت ضيافه جايبتها وياه فدوة لروحج هشام جاب بالثلاجه

اسيا ـ مو كتلج اني اجيب وياي يله خير زايد

ازهار ـ كعدنا وايمان ساعدتنا وضيفنه الهن وكعدت بصف الحجيه وتباوعلي مبتسمه

الحجيه ـ ونعم منكم شلون بنيه ذهب ذهب

ازهار ـ تمدح بيه وامي عيونها تلمع بالدموع وتباوع البيت وضلينا كاعدين وهشام اجه باس امي وسلم عليهن وباركن اله ويهلي ويرحب بيهن وطلع ولحكته لغرفه بس لكيته مزعوج شبيك

هشام ـ اهلج دازيلج ثلاجه وغساله وبلازما وميز بلازما واوتي شنو هاي شله داعي ما عندي اثاث لو مجدي بابهم عيب هالسوالف ليش يستصغروني

ازهار ـ منو مستصغرك وين العيب بالموضوع ترة كل الاهل من تتزوج بنتهم هيج الهدايا تكون حسب الامكانيه بعد ليش تتحسس وتاخذ على نفسك وتخلي بيها النا

ـ يعني عادي عندج تاخذيهن

ـ اي عادي هدايا من اهلي ليش ما اخذهن وانت كلتها دازيلج يعني الي مو الكم دام تتحسسون لاتاخذوهن

ـ ماشي

ـ حسيته زعل عفته ورجعت يمهم وصار لازم يكومن ترخصن وسلمن وطلعن كلهن انطن فلوس اوراق وامي خلت بيدي ظرف وكالت .

وصال ـ هذا مليون ابوج دزلج ٥٠٠ الف من اخوج مروان ومجد دزلج كارتون اندومي كال تجوع بالليل تاكله اعرفها روحها بالاندومي.

ازهار ـ عيني سلميلي عليهم كلهم وبابا شكر خاص

وصال ـ يوصل شلونج أنتِ حمواتج ما بيين زينات وياج لو

ـ الف الحمدلله زينه لا زينات خطيه عدهن دراسه ملتهيات بغرفتهن هزت راسها واسيا خلت بيدي ظرف وگالت

اسيا ـ مليون من اخوج عصام واني كلاده ذهب وكرم دزلج كارتون حلويات وعصائر مشكل اخذ ابوه واختاروا الج من كل الانواع ويسلمون عليج هواي

ازهار ـ فدوة اروحلكم والله هواي

وصال ـ تدللي يمه والثلاجه وبقية الاثاث ابوج واخوانج اشتركوا بيهن ودزوهن الج وهاا صدك عمار يكول زعلان عليها ما ادزلها هديه خابري وراضي خطيه مقهور حيل سوده عليه هالايام يجي يحضر عرس مروان ويرجع

ازهار ـ تمام اخابره ليش مروان راح يتزوج

اسيا ـ اي غير خليناه يشد غرفته هو وعصام ورافع وناجح وخالد مخبوصين وياه وباليل نروح السوك نكمل جهازها بعد ما مخلصينه

ـ هاا بيها الخير يمه عود اعزموا هشام عالعرس

وصال ـ الله كريم يله يمه اسيا تاخرنا ورانا كومة شغل يله ازهار بنيتي ديري بالج على نفسج شنو تحتاجين خابرينا وتعالي خل يجيبيج هوسة العرس لاتفوتينها وابوج وعصام اكدوا كالوا خل تجي ..

ـ ماشي ودعتهن وراحن واخذت الفلوس ضمتهن بالكنتور وجريت تلفوني دزيت رساله لـ اسيا

" أسيا حبيبي اخاف اهلي عصام وبابا او مروان يسالونج على الوضع والبيت يعني هالامور امانه امانه حسني الصوره كولي كلشي تمام واني راضيه بكلشي الحمدلله مهم الله يستر عليه وعلى هشام ما اريد گلشي عيني مليانه بي، دزيتها الها وباوعت عليه
كاعد يباوع تلفون بعدك زعلان

ـ لا

ـ لعد كوم دخل الثلاجه بالغرفه

ـ عوفيها هسه

ـ وين اعوفها بالحوش أخاف توكع عالجهال .

ـ گتلج عوفيها ياعيني لاتلحين .

ـ عفته ودخلت الهدايا والفواكهه قسمتها بالنص واجن يباعن كلشي قسمته بالنص خليته عالكاونتر ايمان هاي حصتكم

ايمان ـ ياعيني ليش كلفتي على نفسج

ـ لا عيني ما بيها شي احنه بيت واحد وأني ما عندي أخت انتوا أخواتي

ـ فدوة لهل الوجه

ـ هشام جان واكف وابتسملي تجاهلته ومشيت منعني عوفني

ـ زعلان حبيبي

ـ لا

ـ حقج عليه يله اني اعتذرلج

ـ هالمره مقبول اعتذراك بس اتمنى ما يتكرر .

ـ ماشي حبيبتي .

ـ عفته ودخلت غرفتي وكعدت ارتب الاغراض جايبتهن اليه أسيا شغلات وصيتها مواد تنظيف وسائل ومعطرات غسل ملابس وشغلات احتاجهن
وهو دخل الثلاجه ورتبت الفواكهه بيها والحلويات
والعصائر مالت كرم حبيب عمته كملت كلشي وهو كمل البلازما وشغلها والاوتي خليته بالصاله والغساله خلاها بصف القديمه .

هشام ـ أخوج مروان الخميس يتزوج مو

ازهار ـ اي تأخذني الهم

ـ ما تطولين مو

ـ فترة العرس

ـ كم يوم

ـ أسبوع

ـ واني وين تعوفيني

ـ حضنته ما اعوفك بس هذا اخويه خوما يوميه يتزوج

ـ طلباتج مجابه تدللي عليه تبقين وياي على اتصال

ـ من عيني

ـ ابوسهن عيونج

ـ فدوة اروحلك باجر توديني

ـ باجر

ـ اي

ـ بالليل

ـ غمزلي تمام ادللك

ـ راح اشتاقلج فراكج يهد الحيل شيسكنها الغرفه ولج وين انطي وجهي من دونج .

ـ لاتبجيني

ـ ما عاش ولا انخلق ينزلج دمعه بعد روحي

ـ غمرني بحنيته ما عافني ولا ثانيه بس اطلع يلحكني لن باجر اروح ما يريد يفوت دقيقه لما اجه الليل سهرني للصبح وكعدت قبله وجهزت وهو لبس وكشخ فديته حبيبي شكد حلو وانيق

ـ لعد ليش حبيتني

ـ حبيت رجولتك

ـ اعشقها اني اعشقها هسه وكتك مروان تعرس دصبر كم سنه

ـ دمشي وديني يله

ـ لاتستوكحين بدللي

ـ استوكح عليك عليمن قابل

ـ كلشي بيج ينحب

ـ حضني ويبوس بيه ودعته بكومة بوسات وطلعنا لبيت أهلي وبلغت أسيا وفرحت دزتلي سمايل يركص شخبله واحبها .
طول الطريق نصور فيديو وصور نضحك ونسولف ونتذكر ايام حبنا ولقاءنا الاول شلون جان نخرب ضحك ..

وصلنا البيت ودك هورن خل ننزل

هشام ـ لا وين غير يطلعون النا

ازهار ـ خوما غربه هما أهلي

ـ أزهار أدوس على كرامتي علمود كلمة أهلي اصبري هسه يطلعون بعدين مو كاميرات كبالهم ما معقوله ما شافونا ومن طلعتي بلغتي مرت أخوج بعد شگو .

ـ سگتت ودك هورن مرتين وأتصلت على أسيا وجاوبتني أحنه بالباب

ـ هسه عيني

ـ قطعت الاتصال وأنفتح الباب طلع مجد وأمي وراه ونزل هشام سلم على مجد وأمي وبوستني

هشام ـ عمي موجود

وصال ـ لا طالع اتفضل يمه

هشام ـ لا عمه مشكوره وبالخير عليكم مع السلامه

ازهار ـ شغل وطلع ليش ما طلعوا عليه

وصال ـ ما تعرفيهم قابل وملتهين بعرس أخوج يله فوتي يمه لاتنقهرين هسه بالعرس اخليهم يخابرون ويعزمونه هو وأهله

ازهار ـ هزيت ࢪاسي. ودخلت وشفت سيارة بابا وعمي فاضل وسيارات أثنين منو يمنا

ـ ولد عمج داوود ناجح وخالد اجوا على مروان

ـ هاا خير أن شاءالله دخلت الصاله وعصام طلع من الاستقبال وضحك تقدمت وحضنته وحضني بقوه ويبوس بيه أشتاقيتلك خيي

عصام ـ مو بگدي شلونج أخبارج زينه

ازهار ـ الف الحمدلله وصرت زينه اكثر بشوفتك

ـ الله يسلمج يله فوتي كرم عمتك اجتي اركض لك

كرم ـ عمه حبيبتي

ازهار ـ يروح عمتك شلته ابوس بي واجتي اسيا حبيب روحي حضنتها واخذت جود منها وابوس بيها ونزلوا ولد عمي وياهم مروان سلموا من بعيد يستحون ودخلوا الاستقبال ومروان رفعلي ايده وهاي هي ودخل ولا گالي شلونج عصام حك شاربه

وصال ـ يله تضلين واكفه امشي يمه .

ازهار ـ مشيت وياها وصعدت جنطتي بغرفتي وغيرت ملابسي ونزلت اسيا تحضر العصير والكيك كعدت يمها وصلتني رساله من هشام

هشام ـ عيب عليهم أهلج هذا التصرف مو مال ناس حموله شتلوني يم الباب ماكو زلمه يطلع يسلم عليه وياخذج دازيلي مجد وامج وعذرهم ملتهين بعرس مروان هذا مو عذر وادري كلش زين بيتكم مليان زلم كلهم يمكم بس هاي هي بعد صارت .

ازهار ـ قريتها وأختنكت وسكتت حتى ما جاوبته شجاوبه وزواجي صار غصب عنهم وهما سابقا وضحوا وكالولي وبلغوني وهذا الشيء مو بس هو ما يقبله وينقهر اني انقهر اضعافه بس ما بيدي شيء.

فزيت على صوت امي تحاجي أسيا .

وصال ـ متشوفيلي مروان وين خل يجيني يروح يجيب أسيل علمود بالليل نروح نكمل باقي جهازها
شوكت نلحك

أسيا ـ وين أكوله ما شفتي شسوه بيها من راحت ويانا طلع الطلعه من عيونها سواها سم وزقنبوت
حارث اخوها خاف ما يقبل ما شفتي هذاك اليوم شسوه بيها بالسوك كل شوي مخابرها وثولها
ومن تأخرنا كام يحجي على مروان يعني منا اخوها منا مروان تكسر الگلب هالبنيه

وصال ـ لعد شلون شو هنا ما جهزنها ما كافي الخطوبه لغاها بس والله الا اسويلها حفلة حنه بالقاعه الا اخلي العشيره تتباهر بيها والا اخلي يفر بࢪاسه بكيفه يقرر من ࢪاسه ويلغي ادري يوميه تزوج بنيه شوكت تفرح غير فرحتها بجهازها بخطوبتها وحنتها وعررسها لا الافندي يريد كلشي على مزاج حضرته

ـ والله عمه ما ادري بس مروان صاير ما يتفاهم وروحه بخشمه عبالك مغصوب

ـ خيولي امشي صيحلياه خل يروح يجيبها هي هم حلك الفطيمه لاتحجي ولا تفتح حلكها رايحه خلصانه انفخ عليها اطير ادري امها ما تتنبهين على بنتج والله جنان مال دك بالصونده

ازهار ـ راحت دزت كرم واجه حتى ما كالي شلونج عذرته كلت يمكن مخبوص بعرسه ودايخ

مروان ـ هاا خير دازه عليه

وصال ـ روح جيب أسيل

ـ شسوي اجيبها دتخلييني اشتاقلها منا الخميس يوميه جايبتها مخليتها بوجهي

ـ انهجم بيتك دتروح يله وكولولها خل تجيب جهازها الجنط اليمها بالليل اني وازهار واسيا نرتبه الها

ـ ليش اجيبها خو اجيب جهازها وانتن رتبنه

ـ نروح نكمل جهازها

ـ ماكو روحه شگو رايحه أنتِ وأسيا كملن الباقي

ـ شنو ماكو روحه مو امشي على كيفك

ـ گلت ما تروح وخلص لاتلحين يا يمه

ـ لا الح وأكسر ࢪاسك هم بنيه هي تجهز نفسها خطيه يله تحرك

ـ يممممه

ـ ولا كلمه واذا غثيتها بالطريق اغضب عليك والله

ـ يعني عندتي

ـ أي يله امشي تحرك

ـ ماشي بعد

ـ هاي هي

ـ هم تتاخرون

ـ ما ادري

ـ يله اذا تأخرتوا خليها تبات

ـ شعندي مخبله ابيتها ما وراها اهل امشي لاتتسخف دتحرك يله

ـ ماشي رايح أمري لله ...

يتبع ...

33





أسيا ـ من عرس أزهار وأني نفسي گوه متحملتها وشاگه نفسي حامل بس بعدني ما متأكده انتظر موعدها وأحلل وان شاءلله خربطة هرمونات لن اني الحمل ممنوع عليه شلون ما أنتبهت وأخذت حذري شلون سالفه طلعتلي صفح .

" هو بالدوام راسلته هلا حبيبي فاتح نت ميجاوب عصبت منه أتصلت على الرصيد وجاوبني

عصام ـ هاا عيني

أسيا ـ ليش متجاوبني على الرساله

ـ يا رساله

ـ ماسنجر فاتح نت

ـ ما ادري ما شفتها جاي أشتغل ليش أكو شيء

ـ هاا لا هيج

ـ شبيج كولي

ـ ما بيه باي

ـ أسيا الباي متكوليها واني جاي اصخم وياج احجي شبيج مطنگره من صباحيات الله

ـ گتلك ما بيه

ـ ما بيج شگوو متصله لعد لو سوالفج بس لنگد وشلعان الگلب لگلبي بس هذن الفالحه بيهن .

ـ أني سوالفي بس لنگد ماشي عصام

ـ وين موليه اذا قطعتي الأتصال ما يجرالج خير والله جلابه لاتنجلبين عليه واني بالدوام لا احرك أبهاتج

ـ كام يعيط واني بالگوه متحمله يله روح مو عندك شغل ومشغول

ـ عندي صخام وعفته وجاوبتج وطلعتي گلشي ما بيج مثل الحصان

ـ اني حصان

ـ وتروحليه فدوه

ـ قطعت الأتصال بوجهه ورحت حظرته من كل الارقام والمواقع دتشوف الحصان شلونه وياك اني أعلمك فوك سالفتك المصخمه وياي هو ما عاجبه يحجي بنفس طيبه مكلف على نفسه عايف الشغل وجاينني لا والله زحمه عليك .

" بهل الأثناء الباب يدك كمت أشوف منو طلعت عمي واكف بالباب هاا عمو انطاني تلفونه

كمال ـ عصام عالتلفون ليش غالقين تلفوناتكم عمي هاج احجي وياه .

أسيا ـ هاا اي مخلصين شحن أخذته وعمي واسمع صوته يصيح عزا هذا على الاتصال

عصام ـ سليمه جاوبي اضل مشتول علمود زعلج الما يخلص فضيني عاد اريد اولي على شغلي

ـ اي دتروح منو لازمك

ـ ليش حظرتيني من كل المواقع هاا وارقامي هم اذا الزمج هسه منو يخلصج مني تدرين شسوي بيج اذا وكعتي بيدي

ـ ما تسوي شيء

ـ ما اسوي شي ما خايفه مني مو

ـ لا ما اخاف

ـ بس انزل الا ادبج عليج واطيح حظج قنادر

ـ شتريد شگوو متصل لعد

ـ متصل اتنعم بصوتج لج هذا الحظر مالتج ادفعج ثمنه غالي ام خبالات عقلج طگه ونص ارعنه جاهله

ـ خلصت

ـ دنجبين وتسمعيني لما أكمل وࢪاسج اكسسره اذا تسدين الخط بوجهي مره لخ دماغ زز حيوانه

ـ جهال يبجون اريد اروح

ـ اذا ما أحظرج من الواقع اني مو عصام شاربي ازينه
ديله ولي واذا اتصلتي مية قندرة اركعج مولي لشغلي اجتماع مهم والله بلوه أنتِ بلوه وابتليت بيج

ـ باي

ـ اني اسد الخط ديله ولي

ـ قطع الخط ورجعت ادور على عمي ما لكيته عمه عمو وين

وصال ـ طلع بالحوش تلكينه

ـ هاا ماشي عفت تلفونه بالصاله ورجعت كعدت الجهال وغيرتلهم ملابسهم وطلعت كرم عمتي كعدت تريكه وجود خليتها بالكرسي مالتها واجه مروان شالها يبوس بيها

مروان ـ ريحتها مو طيبه

أسيا ـ ياا هسه غسلتها وغيرتلها ملابسها وعطرتها

ـ لا اقصد لاتخلين الها عطر هي طفله خليها على خيستها وحموضتها بالاخص من تكعد اووف تناكل

ـ ضحكت عليه وهو يبوس بيها شالها وطلع وين

ـ نديح اني وياها ادورلها على رجال صاك مثل عمها

ـ يمه كلشي ولا يشبه عمها

ـ يصحلج نسيب مثل عمها وين تلكين مثلي

ـ يمه الغرور كام يطلع من اذانك

ـ عمله نادره شبيج مميز أني

ـ اي الله يخليك ويدوم النوادر المميزين

ـ اي عفيه هيج أريدج

ـ تدلل عليه ضحك وطلع وجودي وياه وعمتي صاحت وراه

وصال ـ اذا ما عندك شيء روح جيب أسيل من اهلها.

مروان ـ ليش

ـ شــنو ليش نبلش نجهزها

ـ ما يحتاج أهلها يجهزونها

ـ لا اني وأسيا خابرت إمها وكالت انتوا جهزوها

ـ لعد ما تروح أنتِ واسيا جهزنها شگو رايحه هي

ـ ليش شگو رايحه مو عروس من حقها تجهز نفسها وعلى ذوقها

ـ لا ما تروح

ـ لا تروح

ـ يمـــــه گلت ما تروح وخلص لاتناقشيني فدواتج

ـ هو ما أناقشك وتروح تجيبها وغصباً عليك

ـ يمـــــه گلت ما تروح

ـ وأني أكول تروح مو أمشي على كلام حضرة جنابك الموقر الباشا مروان دتحرك جيبها وتعال .

ـ ليش تعاندين ترى مرتي واني امنع وبكيفي

ـ لا مو كيفك مو تحت سلطتك من تجي يمك امنعها وبعدين على شنو تمنعها تجهز نفسها طفله خطيه حرام عليك هالتصرف بحقها خاف ربك بيها .

ـ شوكت تروحون وشوكت ترجعون

ـ هذا الشيء اني اقرره

ـ دكولي

ـ گتلك اني اقرره جيبها وما عليك

ـ بعد وكت دنيا صبح

ـ شعليك أنتَ

ـ سويلي ريوك لعد

ـ هسه جعت تعال تريك وفضني

ـ يمـــــه معاملتج وياي لاتسوء ما احبها

ـ صير أدامي شوف منو يسوء معاملته وياك

ـ اللهم الهمني الصبر على عبادك الصالحين .

اسيا ـ عوفي عمه اني اسويله حميتله الجاي

مروان ـ نسكافيه وكرواسون بس

ـ تمام سويتله خليته كدامه صدك عمه شوكت نروح

وصال ـ خل تجي أسيل يله

مروان ـ الحكومه تقرر من هسه اجلبيها عليه

وصال ـ عيني هي

مروان ـ أسيا ديري بالج لاتطفوين.

وصال ـ لاتتدخل أنتَ

أسيا ـ ضحكت عليهم وكمل غسلت المواعين عالسنك وعمتي تطبخ الغده وكرم طلع على عمي ومروان صعد يغير ملابسه وجودي بحضنه عوفها يمي خاف تضايقك

مروان ـ اذا استوكحت اشمرها من طابق .

أسيا ـ يمـــــه بنيتي اشمرك وراها والله ضحك بقوه وتضحك على ضحكة عمها وهي بحضنه فدوه الحلوه مالتي عفتهم دخلت رتبت غرفتي وفتحت الابواب والشبابيك وباوعت التلفون ما رفعت الحظر لحد الان ما ارفعه ابقي اشوفه هم يسأل عليه بعد علمود لا يرجع يغلط بعد مشكلته لسانه متبري منه .

وطلعت عمه مروان راح

وصال ـ اي واخذ جود وياه ردت قنعت قفل الا ياخذها .

أسيا ـ خل ياخذها بس اخاف تشلع گلبه يالسياقه لو تضل تبجي

ـ مشكلته بعد، متشوفيلي تلفوني كرم مخليه صامت بس يهز واني جاي اشتغل ايدي كلها ماي .

ـ هسه شفته عصام متصل عشر مرات وداز رسائل على حساب عمتي فتحتهن

عصام ـ يمـــــه وينج اليوم مختفيه عليه مو اني ابنج
يمـــــه رحمه لجدج السابع تلفونج ليش تخلينه صامت من اشتعلوا اهلج واحد واحد هم كولي كرم يلعب بي وسواه صامت ذبيها براسه لا والله انتِ

أسيا ـ ضحكت عليه وكتبت اله هاا يمه شتريد

عصام ـ وجع

ـ ضحكت ياا عليمن وجع اني امك ولك

ـ هو لن أنتِ امي متحملج من لا جاره رضا الوالدين واجب مقدس علينا

ـ كتبت بدون ادراك والزوجين

ـ نعل مكطعه عليهم

ـ هاا هيج صايره بينكم

ـ بالنعل صايره

ـ غير انت تزعلها

ـ عيني اخذج الواهس دمشي فتحي الحظر لا اصمط ابهاتج وانعل شيب اهاليتهم

ـ شو أنت بس تصمط وتنعل وتحرك وتجمع ذنوب على اساس ذنونك قليله

ـ ما عندي ذنوب ذنوبي بس وياج

ـ حبيت

ـ خفت جهرتج الزفره امشي فتحي الحظر ومسحي المحادثه مو تبقينها ونصير فرجه ومضحكه لامة محمد .

ـ هو بالاخير نصير ترند

ـ علمود أعدمج أنتِ والترند مالتج أكول على طاري الترند ليكون زعلج هذا ترند من سوالفج الخايسه مو

ـ لا وين اكو هيج ترند الترند يكون اغاني حب وغزل وانت مو مال هيج سوالف ناشف

ـ هاا صرت ناشف

ـ اي

ـ اصبريلي لعد

ـ ضحكت يله اروح اساعد عمه

ـ عوفيلي عمتج تعالي على ابنها فتحي الحظر يله

ـ ما افتحه

ـ لاتفتحينه طبج مرض

ـ هاا هيج شافها وما رد دزيتله سمايل يبجي ما فتحه كمت مسحت المحادثه وعفت التلفون وساعدت عمتي ودخلت علينا اسيل شايله جود كمت سلمت عليها وعمتي كذلك لعد مروان وين

أسيل ـ بالحوش واكف هو وعمو كمال

أسيا ـ فتحت جنطتها طلعت جيس وخلته كدام عمتي وكالت

أسيل ـ عمه هذه الفلوس أمي گالت انطيهن لعمتج وگالت الـ ٥ ما اخذناهن علمود تعب الام.

وصال ـ ماشي عيني كيفها بعد بقيهن الج لعد والفلوس ضميهن يمج مهرج ويضل عندج .

أسيل ـ عادي حتّى لو يمج ماكو فرق

وصال ـ لا حبيبتي خلي يمج وأمج اهلج شلونهم

ـ الحمدلله زينين يسلمون وأمي جدو تعبان والعصر يرحون عليه .

ـ هاا خطيه عنده العافيه يارب

ـ الله يعافيج عيني عمه

ـ يله كومي غيري ملابسج نصب غده أسيا انطيها ثوب من عندج جديد بس لا خل تصعد غرفة ازهار تلبس من ملابسها لن هي وياها نفس الطول أنتِ طويله يسحلن وراها صعدي وياها طلعليها لبسه جديده اكو ما ملبوسات خل تلبس منهن لن بعدها عروس .

ـ لا عمه عادي خليني بملابسي

ـ لا عمه ما تريدين تأخذين راحتج يله أسيا صعدي وياها ونزلي وياها لاتعوفينها لوحدها بالاخص كدام مروان

أسيا ـ ماشي عمه يله أسيل اجت وياي دخلنا غرفة ازهار خنكتني العبره سريرها والهيتفون مالتها والمرجوحه والعابها وكلشي بيها بي ريحتها عيني هي كعدي اسيل حبيبي فتحت الكنتور واكلب بكنتورها طلعت الها ثوب ماروني بي علامه اي هذا حلو بس عقل مروان يطير ضحكت يله لبسي حبي واني انتظرج برا

ـ ماشي عيني تسلميلي .

ـ طلعت برا ومروان صعد احمم الكاع محظوره شمصعدك

ـ ليش شگو

ـ ماكو شيء سلامتك

ـ أسيل وين

ـ ما أدري

ـ وأنتِ شعندج واكفه يم باب غرفة أزهار؟ حنيتي آلها

ـ أي والله حنيتلها وأريد ابجي هم

ـ اي دنزلي أبجي جوه اني ما احب الحزن والطابق يتلبس بالطاقه السلبيه اني عريس ولازم كلني ايجابيه

ـ ماشي مشيت وتذكرت أسيل ورجعت هاا لا

ـ وين شو رجعتي مو تردين تبجين

ـ راحت البجيه

ـ والله نسوان عدجن سوالف فلا ينكدرلجن

ـ راح الغرفته خبيث راح يضحك على عقلي ويفوت عليها عليمن على اسيا يا مروان شويه وفتحت الباب طالعه تخبلين شنو هالجمال تضوين ابتسمت وخجلت وطلع مروان اجه ناحيتنا وباوع عليها واخذله صفنه وكال

مروان ـ هاي شلابسه

اسيا ـ حب الرمان يا مروان

مروان ـ اي نزلي ساعدي امي وصبيلنا الغده

أسيا ـ صحت عمه اجي اساعدج

وصال ـ أسيل وين

أسيا ـ بحمايتي

وصال ـ خل تنزل وياج

اسيل ـ طلباتك اوامر حكومتنا يله أسيل ننزل مروان تضل واكف تاخذ قياسات للباب.

مروان ـ منين الله سلطج عليه

أسيا ـ اني صالحه والله يسلطني على اشخاص نواياهم السيئه ماحجه ونزل قبلنا عود ما مهتم لوجودها لكينه عمتي صابه الغده بالكاع وعمي كاعد ومخلي جود بحضنه وكرم بصفه واشر لـ أسيل تكعد يمه
كمال ـ تعالي اسيل تعاي عمي كعدي يمي

أسيا ـ واني باوعتله هاا عمي مكانتي وين

كمال ـ مكانتج محفوظه بالگلب كلجن بناتي

أسيا ـ يا عيني الله يخليك النا،اخذت جود من عمو ومجد اجه ومروان راح غسل وكعد گبال أسيل حسيتها ما مرتاحه متوتره من وجوده راعبها المسكينه هذا شبي متخبل على عمره .

وصال ـ يله بسم الله اسيل يمه أكلي لاتستحين أحنه هم أهلج يله مدي ايدج مروان انطيني السلطه من يمك انت متحبها ويه دجاج شكو مخليها كدامك

مروان ـ اي زفر يصير وانتوا شتحبون منها ما ادري هاج اخذيها .

اسيا ـ ناكل وهي بالگوه تبلع اللكمه ومروان عيونه تراقبها على كل حركه منها كرصت عمتي وباوعتله هي گبل كامت بسرعه حاولت وياها عمتي ما اقتنعت راحت تغسل .

وصال ـ ما اكلت سوده عليه

أسيا ـ اجتي رفع عينها وهي تتهرب من نظراته كعدت بصفي اخذت مني جودي وكملنا الغده غسلت المواعين وعمتي صبت الجاي

مروان ـ شوكت ترحون

وصال ـ إحنه ندز عليك روح نام هسه

مروان ـ ماشي

اسيا ـ صعد الغرفته أسيل جيبي جنطتج وملابسج تعالي يمي بغرفتي نلبس ونمكيج ماكو احد عصام بالدوام وكرم نام بحضن عمي .

أسيل ـ ماشي جنطتي فوك بغرفة ازهار هي وملابسي

أسيا ـ جيبيهن وتعالي بينما انوم جود

أسيل ـ ماشي عيني .

أسيا ـ صعدت وأني رحت الغرفتي وعمتي صاحت وراي

وصال ـ أسيل وين راحت

أسيا ـ راحت تجيب جنطتها وملابسها من فوك

أسيل ـ صعدي وراها هذا ما بي أمان لا يكرصها وياخذها قبل العرس مبين متحلفلها وهي فقيره ركضي وراها شلون ادزينها واني امنتج عليها ركضي

اسيا ـ هاج جود صعدت ركض وصلت الغرفه وجان مفتوح شوي طابگها على الحايط ما يبين بس ࢪاسها حاضنها بجسمه ويحجي وياها بعصبيه

مروان ـ قطرة مكياج على جهرتج الخايسه ما اريد عيونج اشلعهن اذا رفعتيهن على احد تلفونج تبقينه يمي ويا ويلج مني اذا شفتج مخليه نقطه مكياج .

أسيا ـ دگيت الباب وفزوا هي دفعته وارتبكت وترجف ادور على جنطتها وهو حسيته فشل مني گبل طلع راح الغرفته تقربت عليها خوما سوالج شيء اسفه دزيتج لوحدج وما يصير لن هو موجود والشيطان ما مختلين منه حقج عليه

أسيل ـ لا عيني عادي ولا يهمج يله ننزل ولاتكولين لعمتي وصال اخاف تزعل

ـ تمام على راحتج نزلنا واخذت جود من عمتي واجت باوعتلها وكالت يله جهزيها تحضرن واني هم اروح البس هم يله نطلع من وكت..

ـ تمام عمه اجتي وياي غيرت ملابس بنتي ونومتها وكعدت اخليها مكياج

ـ لاتخلين طوخ

ـ لا شيء خفيف ما عليج منه كلهم هيج بفترات الخطوبه

ـ اي

ـ كملت الها مكياجها هسه تمام كومي غيري ملابسج بالحمام بينما اني اكمل مكياجي رجعت اخلي وكملت ولبست وهي كذلك وطلعنا وهو جان ينتظرنا وعمتي اجت وطلعنا ..

" طول الطريق هو مزعوج يباوعلها بالمرايا هي متجاهلته وهيج احسن لن الرضوخ ما يجيب غير طيحان الحظ وصلنا السوك وهي منعها ضلوا بالسياره يحجون وانتظارها واجتي ..

" أفترينا هواي محلات واخذنا كلشي تحتاجه وهواي انقهرت عليها ما تطلب ولا تكول تستحي وموقفها صعب كلشي اشوفه اخلي وعمتي تدفع ما خلينا ما اخذنا وعمتي تسالها هي بس تهز براسها وساكته وتلفون عمتي يتصل منو

وصال ـ هذا حارث

أسيل ـ خاف علمودي

وصال ـ احجي شوفي شيريد

اسيل ـ هاا عيني حارث

حارث ـ المهجوم مالتج وين مخليته اتصل محد يجاوبني كواويد احنه كواويد وينج الدنيا مغرب
لحد الان حضرتج ما تشرفين البيت .

أسيل ـ بعدني بالسوك

ـ لحد الان بالسوك ادري شتاخذين يله رجعي للبيت بابا عيب العالم تخزينا من وراج عيب

ـ هسه راح اجي

ـ ** عليج وعلى جيتج يله استعجلي

وصال ـ لا حول لا قوة الا بالله امشي

أسيا ـ لليل احنه ما مخلصين وجود بالعربانه تعبت وعمتي خابرت مروان يجي واسيل عيونها مليانات دموع موقفها يبجي اجه مروان ساعدنا وصعدنا وحارث يخابر على مروان ويرفضه

وصال ـ جاوبه

مروان ـ شجاوبه ليش يتفاهم ادري هيج محروك دمك ما جان انتوا تجهزونها طالعه ويه كواويد غير مرتي وعمتها ومرت حماها

وصال ـ شتسويله عقليته بعد امشي وصلها بعدين احنه لا انوب يحط بيها النا ويضل يرعد عليها وهي خطيه كافي بالسوك اتصل عليها

حارث ـ منين حجه وياها

وصال ـ من تلفوني

مروان ـ اي وشنو حجه وياج

وصال ـ هي واخوها لا تتدخل انت ما الك شغل يله امشي وصلها واذا حجه لاتحجي وتقلل ادب احترمه عيب مهما يكون ابن عمك وهي اخته حقه انوب يعوفك يرجع عليها

مروان ـ خل يفتح حلكه وياها الا اشكه بالنص .

وصال ـ مروان امي هدي إعصابك .

أسيا ـ الجو مشحون وهو مزعوج وهي ساكته وتفرك بإيدها ومر الوقت ووصلنا وحارث واكف يم سيارته ينتظرنا طبگنا كدامه ونزل مروان سلم من بعيد وحارث گبل كام يصيح

حارث ـ ليش متجاوب حضرة جنابك ليش ترفضني

مروان ـ أنت ما تحترم شسويلك يعنى

ـ أختي من ساعه گتلك جيبها وهسه دنيا الليل شهل الاستهتار وين عايشين عيني الضابط مروان .

ـ ماله داعي الحجي حبيبي أختك صارت مرتي واني المسؤول عنها وأنت تبقى أخوها واخليك على ࢪاسي بس مال تغلط بحقي وتجاوز لا هاي واكفه، يله نزلي

ـ تلفونج وين ليش متجاوبين

ـ وأنت شعليك بتلفونها اسيل فوتي داخل

ـ احاجيج جاوبي

ـ عوفها داكولك اسيل امشي داخل .

أسيا ـ مشت مستعجله وهو وراها نزل الأغراض للحوش ودخلت وحارث يحجي ومروان يحاجي برود اعصاب وتالي فضت من اجه حسن حجوا ومروان گبل عافهم واجه شغل وطلعنا

مروان ـ زمال كل أحترامات ما عنده .

وصال ـ وأنت خوما قللت أحترامات وياه عيب أمي

ـ لا هيج نماذج فارغه ما أخلي مستواي وياهم .

أسيا ـ طلعنا للبيت واني ميته تعب حتّى ما تعشيت غيرتلها ورضعتها ونامت بسريرها تعبانه واني اخذت دوش ولبست تراك خفيف وطفيت الاضويه الغرفه صارت ظلمه وتمددت بفراشي وحتى كرم ما ادري عنه ضليت نايمه ما ادري بيش ساعه كعدت على واحد نايم بصفي منو صرخت بعلو صوتـي يمـــــه يمـــــه يمـــــه عمـــــه عمـــــه عمــــوكمال مروان لحكووووولي حــرامي حـــرامي وما احسس غير هجم عليه وصم حلكي واني انكزز واصرخ وادفر بي واريد اعيط وانقذ روحــي منه وهــدأت روحــــــي استقرت من ركزت بعيونه هذا أنت ووكعت بالكاع

" اسمع اصواتهم وصوته وهو يصيح عليه ويضرب بوجهي ضربات خفيفه واني ما بيه افتح عيني عبالك مبنجه وگلبي نبضاته سريعه .

كمال ـ مروان ماي بارد من الثلاجه جيب بطل بارد انت صوجك شلون تفوت الغرفه وهي ما تدري بيك تنزل خرعتها بهل الليل والله عندك سوالف

عصام ـ هي خبله خبلتني وياها انطتني مجال افهمها اجيت لكيتها نايمه واني تعبان نمت بملابسي كلت الصبح تكعد وتشوفني شمدريني تخترع هيج ولج اصحي عاد مروان جيبلي ࢪاس بصل

مروان ـ شستوي بي

عصام ـ اششمها بلكي تصحى

وصال ـ اي من المطبخ بالسله تلكاه ركض يمه ولج اسيا عيني يمه شو فتحي عيونج ولج هذا عصام سوده عليه انخرعت والله انهبطت البنيه مدري جلطتها ولك

عصام ـ لاتكولينها يمـــــه انوب جلطه وين جانتلي هاي مروان شغل السياره بسرعه

مروان ـ هسه تريد راس بصل لو سياره حيرتوني استقر عالشيء يمعود خرب بعقلك

كمال ـ لا ما يحتاج هي تتحرك بس بعدها ما مستوعبه الصدمه بعدها مرعوبه وخايفه حقها
عيني عمو اسيا حبيبتي شو فتحي عينج اني ابوج كمال هاي امج وصال وهذا الخرعج زلمتج عصام نازل وتعبان ونام بدون ما يكولج شو فتحي عينج .

أسيا ـ بلعت ريگي وشفتهم هو وعمتي فوك ࢪاسي عصام وينه

كمال ـ راح بالصاله يتحمدلج وتشكر عباله انجلطتي

وصال ـ هو صوجه

مروان ـ هاج جبتلج ࢪاس بصل بس يحتاجلج باميه وكسور

كمال ـ اي والله شهيتنا بالباميه باجر سولنا عالغده

أسيا ـ ضحكوا وترخصوا وعمتي ضلت يمي وهو ماكو عمه وينه خاف حرامي وكلتوا عصام لن عصام بالدوام

وصال ـ لا والله عصام ادري الحرامي شيسوي ينام بصفج يبتلي على عمره غير .

أسيا ـ شمدريني وعصام وينه لعد

ـ موجود جاي يصلي والله هسه يجيج عصام ما خلصت صلاتك تعال تريدك ماطول تتغايث بإسمك كلشي ما بيها جانت تدلل عليك شويه .

عصام ـ أجــــــيت .

أسيا ـ بس سمعت صوته ردتلي روحي نهضت من الفراش روحي هو كبل اجه حضني حضنته وبجيت عبالي حــرامي والله تخبلت

عصام ـ أسف عيني أنتِ أسف

وصال ـ يله اني أترخص أخليكم أنتوا والحرامي

أسيا ـ ضحكنا وطلع عصام وياها ورجع وكف وصفن عليه كمت واني حيلي بالكوه يعيني حضنته أحبك

ـ يا بعدي ياروحي موتيني من وكعتي من إيدي لحد الان گلبي يرجف عليج

ـ حضنته من وجهه وبسته من شفايفه مشتاقتلك

ـ ماكو كلشي والحظر مالتج خصم بينا

ـ ابتعد عني وصحت وراه عصام

ـ خلصت الدراما والفنون التمثيليه يله كلمن لفراشه

ـ شـــو هيج

ـ أسترد كرامي وحقوقي المنهوبه

ـ يا كرامه يا حقوق اليسمعك يكول معنفتك!

ـ معنفه گلبي بإجرامج .

ـ يمـــــه يا أجرام شمسويتلك عيني

ـ حظرتيني هاي شنــــو معناها

ـ وأذا شگو قابل

ـ هاا عادي عندج

ـ اي

ـ أني مو عادي

ـ عصام

ـ طفي الضوء أريد انام

ـ تمدد بملابسه كوم غير ملابسك

ـ ما الج شغل بيه اني وياج متخاصمين ياريت ما تتحرشين وتحترمين وتتلزمين حدودج وياي .

ـ يله عادي گاتله نفسي عليك طفيت الاضويه ونمت بدون غطى وانطيته ظهري دفرته برجليه ما أهتز رجعت دفرته بخاصرته ما اهتز أخر شيء دفرته دفرة قويه الا كمز

ـ أخ وجع مو رجل جادوم زرفتي خاصرتي

ـ أنتَ ماخذ كل الجربايه ما مخليلي مكان واني أنثى تحب تحتل الساحه وتطغى بإنثوتها لازم جسمي مستىريح على فراش النعام .

ـ مو اكوم انعنع عظامج أنتِ والانوثه والطغيان مالتج
انوب تستريح على فراش النعام

ـ أي ليش مضغوط

ـ انضغط منج شبيه خبل

ـ اي متخبل عليه بس هيهيات تصحلك لمسه مني

ـ لا هواي واثقه من حالج دنامي احسن واحظني النعام زين خل يدفيج لن مبين عليج مستبرده

ـ انطيته ظهري ونمت بس أحوص ما اكدر هو يمي واني مسالمه لا باطل عليج اسيا والله باطل والله الا اجرم بيك وأهلك وعشيرتك كلهم شمرت الغطا وهو مستغرب حركتي جريت ايده ونمت على صدره وحضنته وخليت شفايفي على رگبته

ـ من سمحلج تتقربين عليه

ـ عزيزي المواطن اني محد يسمحلي املاكي
واني حرة التصرف بيها اعمل بها ما شئت واشاء

" صافن عليه رفعت نفسي بسته من عيونه ابوس هالعيون تناظرلي رفعني من خصري صعدني على صدره وحضنته من وجهه عاجبني أعنفك

ـ كدامج

ـ واجرم بيك

ـ سلاحي عالميز سوي اليريحج

ـ وأعذبك

ـ عذبيني أستمتع بعذابج .

ـ ما استخدم سلاح إلا عينيكَ، وما استخدم دفاع إلا قلبك أنتَ سلاحي ودفاعي، وأنا مستسلمه لك بكل شيء
مسحت على وجهه وهو صافن بدون اي كلام يتمتع بالنظر والمشاهده بسته من شفايفه بعمق، ونزلت على رقبته وتركت أثاري، وهو انتهى بين أيديه، ما اتحمل كسر غروره والخصام، واتمرد وغلب الساحة واحتلها بتمرده عليه أطبع قبلاته بكل جنون وشوق مميت واشتعلت نيران عشقه في صدره، ولمساته الحنونة وانتهت بحضن دافي، ولعب بخصلات شعري، واستقرت الأرواح بإحضان بعضنا

ـ ما خليتي عقل بࢪاسي بعشقج وأنثونتج أسيا أنت دمار .

ـ أنا حبيبتك وعشيقتك ودمارك وهلاكك وعذابك وكل شيء بحياتك، كل بصمة أتركها بيك، احتلك بكاملك واستولي على كل خلاياك أنت مالكي ملكي وأملاكي أنتَ تغمرني بكل جمال كلماتك، وتجذبني إلى عالم من الرومانسيه انت قدستني وجعلتني ملكه وتمردت عليك بعشقي لمساتكَ تجعلني أتجرد من كبريائي وأصبح عبداً لحبكَ، أحب أكون تحت سيطرتك دائمًا .

ـ هسه شدوس صايره تبدعين وتتفنين بغزلج واشاعرج

ـ دوس على گلبي اغركك بإشعاري

ـ ادوس على گلبي وگلبج ما ادوس عليه تدرين صرت احب أن أكون تحت سيطرتج، وأكون عبداً لحبج، وأكون ملكاً لگلبج، لن أنتِ الملكة التي تحكم علي، لن أنتِ الحبيبة التي تملكيني أنتِ أحتليتني بكاملي اعشكج يا ملكتي .

ـ التهم شفايفي وأبدع بكلمات الحب التي قدسني بها ويجعلني بحضرته ملكه وهذا يزيدني عشقاً له.

" الصبح واكفه وامشط شعري وهو وراي ينشف شعره بالمنشفه ويباوعلي ومركزه كل نظراته ناحيتي

ـ معجب بحضرتج أشد الإعجاب

ـ شكراً سيدي تقرب همس يم أذني

ـ سيدج راضي عليج دنيا وأخره .

ـ وهو المطلوب

ـ أحبج

ـ أريد فعل تقرب باسني من خدي بحنيه

ـ هيج لو اقوى

ـ لا حالياً بس هيج لن ورانا اعمال كثيره

ـ شنو هي أعمالج حبيبي

ـ نروح السوك باجر مباركة ازهار

ـ هاا ماشي شنو أبالج تاخذيلها

ـ ما أعرف والله دايخه

ـ ولا ادوخين اني اجيبلج على ذوقي

ـ ذوقك يفوز بكلشي

ـ لن أنتِ حابته

ـ كالها ومشه يغير ملابسه وكتها عرفت الرجال كلما تبالغين بعطاياه يكثر منها مثلاً يجيبلج حاجه وتقدسينها وتبين هو ذوقه حلو هذا الشيء يزيد حبه الج ويحب شنو يشوفه يجيبه علمود يسمع كلامج وتقديرج اله ولتعبه .

" رحنا السوك اني وعمتي وعصام اخذنا واخذنا الها شغلات هي وصتني عليها وعمتي اخذتلها هدايا وفواكهه وضيافه ورجعنا ولكيت عالميز علبه فتحتها عقد ذهب كلش حلو صافنه عليه وانحضنت من خصري كلش حلو عشت وعاش ذوقك وربي يبارك بيك ويخليك الي .

ـ وهذا الظرف انطي الها وسلميلي عليها

ـ تمام حبيبي يوصل شنو تطلع

ـ اي حبيبي رايح يم رافع

ـ العلاقه صايره قويه أنتَ ورافع

ـ ابن عمي ومشاغل هواي نلتقي بس مو دائماً بس هالفتره هو كام يجيني يعني تطورت العلاقه أكثر من قبل .

ـ الله يدومكم تمام حبيبي اخذ ࢪاحتك راح الله وياه واني كملت شغلي من غسل ملابسه وكويهن وتعطيرهن والغرفه كذلك وسرحت شعري ورتبت شكلي ما خليت اي نقص من ناحيتي ومسوؤلياتي ولو جود يمي كلشي متخليني اسوي الخيسه تطلع من الباب وابوها من الصبح يتزوج عليه ضحكت على افكاري وكمت رحت على عمتي كاعده هي وجوارينه اجن يباركن لـ أزهار ودزن الها فضل ودعناهن وعفت جود ورحت كملت العشه بمكان عمتي وعمي ومروان جابوا الهدايا مالت ازهار الج وحشه يروحي ..

" رجعنا من يمها وبالطريق دزتلي رساله قريتها ومسحتها ومن رجعت سألني عليها وعلى احوالها

عصام ـ مرتاحه بحياتها كلشي تمام

أسيا ـ اي الحمدلله

ـ أكيد

ـ يعني اذا گلتلك شتسويلها بعد

ـ لا يبوي شطالع بيدي ولو ادري عنده أمكانيه جان قبل لا يعقد عليها كسرت رگبته وحكمت عليه بيت لوحدها بس الولد حاله على گده وهي حجيت وياها كالت راضيه بكل الظروف شسويلها بعد الله يسعدها شوكت تجي ما كالتلج

ـ گلنا الها ما ادري خل تشوف هشام بالأول

ـ هاا ماشي شبيج شو مخنوگه

ـ عليها كاسره گلبي

ـ فديت الحنين مليان حب حبيب روحي

ـ ما تتصور شكثر أحبها

ـ وأني أحبج لن تحبينها وأحبج اكثر تحبين أهلي واحبج أكثر تحبيني واحبج فوك حبج أضعاف مضاعفه بشكل ميتخيله ولا يتصوره عقلج .

ـ من أشوفك مقدر هالحب ومنطيني قيمتي وأحترامي بين أهلك اني اقدرك أنت واهلك فوك تقديرك وحبك اليه أضعاف وصدكني هالشيء أنتَ فرضته للمقابل ما اجه عبث لن المرأه تقديرها وأحترامها من زوجها اذا زوجها ما محترمها وما مقدرها وما مخليلها قيمه بين المجمتع واهله وناسه صدكني راح يجفصونها ويعاملونها مثل معاملتك وأكثر لن الكرامة المرأه واحترامها
من كرامة زوجها
يعني الفضل الأول والأخير يعود الك ويعود الي أيضاً بحكم تربيتي وتعامل بإصلي واخلاقي وأهلك هما ينحبون وغصباً على ࢪاسي احبهم مو بس لخاطرك لن هما فرضوا حبهم لمقابل بدون مقابل بدون عطاء واللي مثلكم نادر الوجود .

ـ احبج

ـ فدوة لحبك

ـ وصيتلج على فستاتين لعرس مروان هالأيام يوصلن وهاا صدك كم مسؤول يحضرون عرس مروان هما وعوائلهم زوجاتهم وبناتهم يعني تحضري وهسه هم ابلغ امي هم لن راح يكون حضور واسع

ـ تمام حبيبي هلا بيهم هما وعوائلهم

ـ فديت المعدله يله اني طالع عندي أتصالات مهمه

ـ ويامن

ـ بالدوله

ـ امان حبيبي روح والهوا بظهرك

ـ فديت الواثق بيه ابوس گلبج يابه

ـ شال تلفوناته وراح وطلعت رحت على عمتي لكيتهم كلهم مجموعين ومروان هم موجود وگال

مروان ـ عمار باجر يوصل هسه بلغني وزعلان شنسويله حتى المطار كال لاحد يوصلني .

كمال ـ لعد شگوو جاي هو بالخارج ويزعل مو گتله تعال احضر مشية أختك اجلها لما توصل للعراق هو كال امشوا بفالكم شنسويله بعد ونروح كلنا نجيبه وحضرلي كم سيارة حمايه اخاف عليه

عصام ـ لا سيادتك شگوو قابل

كمال ـ كلشي نتوقع وطلبت بالعرس أخوك مروان حمايات وكم سياره حوالين البيت

مروان ـ خلوها عليه

كمال ـ ماشي معتمد عليكم والعرس ما يتأجل بعد انطيت خبر للكل يوم الخميس مو تغير الموعد

مروان ـ لا هذا هو واني هم بلغت الكل الخميس

عصام ـ واني هم يله من رخصتكم عندي كم اتصال واشوف المسؤول يجي لا كالي اردلك خبر علمود نرتب وضعنا على هالاساس

كمال ـ ماشي يله كملوا شغلكم ما اريد قصور العين علينا ويجونا مسؤولين واريد كلشي من احسنه

عصام ـ ان شاءالله سيادتك ماكو كل قصور

مروان ـ أوامرك مجابه سيادتك .

مجد ـ على هل الهيبه والفخر يطلع من أذاني وبالمدرسه اصداقائي يكوللي أنتوا بيت الدوله وشكد ما احب اقدم على العسكريه بس هسه لا اني على نهجكم وخطاكم وحبكم للوطن اني ابصم الكم بالعشره اني عسكري لنخاع .

كمال ـ كفو من سبعي بطل أنتَ

عصام ـ عفيه بزلمتي تعجبني

مروان ـ غصباً على ࢪاسك عسكري لنخاع

أسيا ـ عصام ترخّص وراح يحجي أتصال مهم ومروان هو وعمي راحوا الأستقبال وكعدت يمي عمتي جانت تحجي أتصال خلصت منزعجه هاا شبيج

وصال ـ أهلي عزمتهن ولا وحده تحضر وزلم هم وبعرس شاهين اني وعصام حضرنا شيسمونها ما تحضرون شكد قهروني .

أسيا ـ شتسويلهم لاتزعلين فدوه عمه.

وصال ـ لا يبوي على شنو ازعل بعد أهلج نروحلهم اني وعصام للبيت نعزمهم عيب مو عالتلفون .

أسيا ـ ماشي عيني عمه على راحتكم حسيت بفخر واريد اطير من الفرحه اريد اكوم وابوسها بس لزمت روحي بعدين ابوسها خاف تكولي شبيج وكت بوس هسه عدنا كومة شغل ..

بالليل بس تعشينا وام شامل اجتنا وبلشنا تنظيفات وتعزيلات والطابق الثاني كله وغرفة عمار استلمتها تنظيف عميق كملتها على الاخير وعطرتها وطلعت ونزلت الوقت تأخر والصاله تلمع وضل بعد ما خلصنا على باجر هم .

وصال ـ تعبتي روحي أرتاحي وجهالج ناموا نومهم عصام ومروان جود بحضن عمها وكرم بحضن ابوه

أسيا ـ ماشي عمه تصبحين على خير

وصال ـ وأنتِ بالف خير .

أسيا ـ دخلت غرفتي أخذت دوش ولبست ملابس نوم ورتبت نفسي رغم تعبانه واجه عصام شايل كرم اشرلي مروان وراه ركضت لبست ازرار الصلاة غطيت كل جسمي ودخل مروان خلاها بالسرير ويبوس بيها

مروان ـ يله عيني تصبحون على الخير .

عصام ـ تلاكي الخير عيني .

أسيا ـ نمت وقفل الأبواب وطفه الأضويه واجه حضني ونمنا تعبانين والصبح بسرعه اجه لكيته مغير ملابسه وبالصاله يحجي أتصال ويه عمار

عصام ـ تاجلت طيارتك وأكيد باجر ماشي نبقى على أتصال مو توصل المطار بدون ما تبلغنا .

أسيا ـ غيرت ملابسي ورتبت غرفتي وجود ماكو وينها

عصام ـ يم مروان كرم طفر على مجد راح الاسواق
أكلج ازهار تجي اليوم

ـ اي حبيبي دزتلي رساله

ـ خير ان شاءالله يله اني طالع .

ـ طلع وطلعت وراه وللعصر اجوا ولد عمامهم والبيت انخبص وصعدوا الغرفة مروان وشغلوا اغاني فوك وحركوا الجوا وكرم بس اجه من الباب طفر ركض ويهز هو وعمه مجد تكابلوا يم الدرج فدوة لزمتي ..

" دخلوا البلازما وميز مالته وثلاجه صعدوهن لغرفته طبعاً ولد عمهم داوود وكفوا وكفة ابن عم لابن عمه أبداً ما قصروا حتى مادياًّ .

" واجتي ازهار ولا واحد طلع عليها بس عمتي وصال ومجد واني شفتها طارت روحي بشوفتها ابوس بيها وعصام بعد عيني عيونه تلمع فرح بشوفتها بس مروان ما عجبني أبداً عمه مروان ليش ما يسلم عليها شيسموها هاي .

وصال ـ عود يستحي لن تزوجت فاهم الزواج من.. استغفرالله لاتخليني اصير مثلهم واكوم افشر اني لساني صاينته .

أسيا ـ لا دخيلج ضحكنا ودزت على مروان وجهه يلطم بالكوه راح وغمزت لـ ازهار امشي نسولف

ازهار ـ خبيث شنسولف

ـ ماذا حصل

ـ حصل حصل

ـ دمشي وياي

ـ ما احجي اسراري الله شغلوا اغاني بالاستقبال اريد اركص عفيه شوكت يجي الاربعاء الا نذب لحم بالحنه

ـ اي والله نسويها ىالقاعه ومروان شرط يخلي وحده يم الباب تسحب التلفونات من الكل حتى احنه كال الكل بدون أستثناء حتى امي منع منعاً بتاتاً

ـ وأحسسن شيء علمود ناخذ راحتنا

ـ الله دسكتي تحمسست تعالي نقرر شنو نختار تسريحات ومكياج وهواي سوالف وأمور ورانا وبعدلي الجهال خل اشوف بيج يوفر ملابس حلوه

ـ امشي يله بس شغلي النا اغنيه

ـ تدللي صحت على مجد تعال

مجد ـ هاا عيني

ـ جيبلنا هذا ام بي ثري البارحه جبته نشغله بالغرفه

ـ هسه

ـ جابه وشغلناه وبدعنه اني ووياها ركص وسوالف واختاريت ملابس لجهالي ووصيتلهم وانطيتهم رقم مجد لتوصيل واني عصام وصالي وازهار هم وصيت الها على فساتين وضلينا كاعدين لوحدنا نسولف.

واندك الباب عمتي هاا عمه

وصال ـ طفي گلبي احترك

أسيا ـ طفيته شگوو يا ساتر

وصال ـ مروان أجاني دمه محترك حارث متعارك وياه لن راح يجيب اسيل وهسه اتصل عليها مغلق بس لا توصل لـ موزينه الله يستر هسه عصام يتصل على حارث وزومل ما يجاوب احد ومروان يشيل ويركع بروحه تخبل اطلعن وشوفن شسوا ..

أسيل ـ يمه اسم الله طلعنا ومروان يغلط ويتهدد وناجح لازمه بالكوه وهو صاير دم ودماراته ركبته وايديه يريدن يطكن شجاهم وياه هذا حارث متسرع هواي

ازهارـ سكتي الله سلط حارث على مروان مثل ما هو تسلط على هشام

أسيا ـ الحوبه تبطي بس ما تخطي خرب سكتي لايسمعنا ويتوجه علينا ووربي يسوينا مندي

مروان ـ شايف روحه يحاجيني برفعة خشم ويتجاوز والله اخذ اخته لا يلوح السما اسيل اخذها واريده يفتح حلكه وياي اشكه بالنص واتمزمز بي

ناحج ـ دكافي لسانك يمعود فضحتنا لسان كح**

رافع ـ كل واحد يغلط من صوب ياهو بيكم عنده عقل دسكت وتحترم نفسك وتضم لسانك لا اجي احشه الك

عصام ـ ميجاوب ترى تجاوز حده

رافع ـ هاا انعديت من اخوك اسم الله الرحمن عليكم متكوليلي خاله من خلفتيهم ليش ما سميتي عليهم ليش ولدج مصركعين .

أسيا ـ رافع اخذ عصام وطلع برا ومروان يتصل عليها مغلق اخر شيء كام يغلط عليها

مروان ـ شكو تغلقينه كلبه بنت گلب .

أسيا ـ الله يستر الله يساعدج اسيل منين تلكينها من اخوج من رجلج ...
____

أسيل ـ أصعب شعور مريت بي عشت تفاصيل عرسي لوحدي يمكن اليتيمه أحسن من حالي أمي حايرتلي بجدي مريض وجنتها حامل وكتها عرفت أمي بعمرها ما حبتني وأهلي بعمرهم ما كانوا الي أهل فقط مسميات لا أكثر ولا أقل .

" الموقف الصعب واجهته من اجه أخذني من البيت همزين جايب جود وياه اخذتها منه بحضني طول الطريق ضل ساكت ما بدر منه اي كلام وهذا الشي ريحني بلكي يبتعد عني ويخليني بحالي لن كلش ما ناقصه كافي عليه اهلي وتخليهم عني بوقت اني محتاجتهم اكثر من اي أحد .

" وصلنا وگبل اخذت جود واستقبلوني احلى أستقبال من عمو كمال لعمتي وصال حتى أسيا حسيتها بمثابة أخت عطفت عليه وحنتلي حسسيت الي قيمه مهمه عدهم بس خرب واهسي وطلعت الدنيا من عيني من صعدت الغرفه اجيب الجنطه وملابسي وجنت خايفه حتى من صعدت امشي بطئ

" فتحت الباب على كيف توني دخلت الباب انرد فزيت بخوف بدون كلام سحبني من أيدي التصقت بجسمه وأيده مثبتها على إنحاء خصري وعيونه بنص عيني نظرات مليان شر وحقد ما جنت اشوف نفسي بيهن نظرات خاليه من الحب كسرت حاجز الصمت وحجيت

ـ كافي مروان

ـ كافي على شنو

ـ تعذبني

ـ بعدني ما معذبج

ـ حرام عليك

ـ تحرم لشتج اذا حرام عليه

ـ ما اكتفيت

ـ قطرة مكياج على جهرتج الخايسه ما اريد عيونج اشلعهن اذا رفعتيهن على احد تلفونج تبقينه يمي ويا ويلج مني اذا شفتج مخليه نقطه مكياج .

ـ فزينا على صوت أسيا وحيل أفتشلت منها ونفس الوقت جانت اليه انقاذ وراح وتجهزنا وطلعنا لسوك ومن نزلنا اشرلي ابقى

مروان ـ مبايلج جيبي يمي

أسيل ـ انطيته اله ونزلت بدون كلام وافترينا بالسوك وگلبي ملجوم شعور صعب ما اكدر اوصفه هواي احتاجيت امي أختي حتى لو زوجة أخوي مهم احد من أهلي يجهزني بس وين كلمن جهزله عذر

لـ أسيل وانسحب ونفس الوقت شفت الحنيه من عمتي وأسيا دره ما قصرن وياي كلشي اخذن بدون ما احجي اسيا تشتريلي جانت كلشي تعرف وذوقها عالي ومميز وراقي بالأخص بسوالف المتزوجين وملابس النوم وشنو يحب الرجال كلشي من احسنه اخذتلي ما قصرت ونعم منها
و احس گلبي يبجي مو بس العيون تنزل الدموع عبرتي تذبح بيه غصه خنكتني وأكتملت من اتصل عليه حارث من تلفون عمتي وصال وانقهرت حيل ورجعنا البيت وبالطريق عمتي تهدي بمروان لن جان عصبي ومزعوج وكال كلمه كل مشاعري اهتزت اله

مروان ـ أريده يفتح حلكه وياها الا أشكه بالنص

ـ نفرت أفكاري ونظراتي بعيد عنه وحسيت بلمساته قريبه من رجلي لن جنت وراه باوعت شفته مادلي التلفون سحبته من ايده خليته بالجنطه وأسيا جانت ملتهيه بنتها ما انتبهت النا .
ووصلنا وحارث ما قصر كبل نزلت ودخلت البيت ودخل أغراضي واني وكفت بالمطبخ وماكو بس نسرين وحسن وأهلي رايحين بيت جدي هي وابويه

والله اليوم حارث يعدمني ومر وقت ودخل حارث يعيط عليه.

حارث ـ أدبسزز الله يأخذج ما تكولين وراي أهل أفكر أرجع البيت وراي أخوان يسألون عني لو ما صدكتي تزوجين وتخلصين من عدنا لن طلعنا ظالمينج وما ندري .

أسيل ـ بقيت ساكته وعاط بيه

حارث ـ ما تحجــــــين جلب وينبح كدامج

أسيل ـ ما جاوبته تقرب لزمني من شعري بقوه وينفض بيه والله يله لحكنا

حارث ـ تلفونج وين كابرته طلعي طلعي

أسيل ـ ينفض بيه وكلب جنطتي ونثرها بالكاع واخذ تلفوني وركعه ىالكاع وتكسر وحسن كام يحجي عليه

حسن ـ التلفون شعليه شجاك تخبلت

حارث ـ الافندي اتصل وترفضني الادبسزز امشي انكلعي من خلقتي لا بارك الله بيج .

أسيل ـ كعدت لميت مكياجي وأغراضي
وصعدت غرفتي وبجيت شبعت من البجي .

" ضليت بغرفتي تالي كمت نزلت جهازي بالحوش كمت صعدته الغرفه كله هسه يتصل ويلكاه مغلق شيخلصني منه ، نزلت دورت عالتلفون لكيته بصف الشباك فتحته اشتغل بس شاشه صايره فدمره .

" صعدت غرفتي وخليته عالشحن ونمت بدون عشه ولصبح امي أجتي وعود صعدت شافت الجهاز

جنان ـ عرسج الخميس عبالي هديل تجي انوب تعاركت هي وزلمتها

أسيل ـ ليش شبيها

ـ سيف شايف محادثات هي ومروان ومتعاركين اختج هديل هم أدامي دكعدي واستقري هيج احسن الج .

ـ خوما عرف السالفه

ـ لا بس ما قابل تحجي ويه مروان كايلها مو ابن عمج لاح وهيج ميانه وياه حتى لو زوج اختج هذا الشي غلط وحقه والله

ـ اي وهسه

ـ ماكو شي بس اختج بعدها مطنكره

ـ موخوش سالفه يله تنحل ان شاءالله

ـ الله كريم .

ـ نزلت وتلفوني ما يبين منه گلشي شاشته مدمره
ولليل اتصل وبالكوه فتح خط جاوبته هاا مروان

مروان ـ جايج تحضري

أسيل ـ وين

ـ تروحين وياي للبيت تكملين جهازج امي دزت عليج

ـ ما أكدر والله حارث ما يقبل

ـ وحارث شگو يله تحضري وحضري جهازج اخذه وياي يرتبنا الج راح اوصل نقاش ما اريد

ـ قطع الاتصال وعفت التلفون ونزلت بلغت امي وگالت
جنان ـ شعليج من حارث قابل وين رايحه بيت عيالج وترتبين جهازج يله روحي لبسي ونزلي جهازج يله

أسيل ـ وحارث

ـ وحارث شبي

ـ إذا اجه وكام يحجي

ـ لا اني احجي وياه ما عليه بيج.

ـ ماشي صعدت غيرت ملابسي ونزلت جهازي بالصالة وطلعت بالحوش واندك الباب طلع ابويه فتحله وتسلاموا ودخل الاستقبال طلعت جهازي بالحوش ودخل حارث انرعبت من شفته عاط بيه

حارث ـ وين موليه

أسيل ـ بيت عمي كمال

حارث ـ يا سلام واني رجل گرسي دمشي انكبري روحه ماكو انوب عينك عينك بدون مستحى

أسيل ـ يحجي وياي وطلع مروان وباوعلي رجع جاوبه

مروان ـ بدون مستحى عليــــــمن

حارث ـ على كل واحد ما يحترم روحه

مروان ـ هاا هيج صار الحجي

ـ اي عندك مانع وأسيل ما تروح وياك لن مصختوها رايحين جايين ونوب بالليل هم تجون تأخذونها وصلت وياكم لهنا

ـ وين وصلت وين وين

ـ شو تستهئزا حضرتك

ـ ما مستهزأ بس ما اريدها تكبر يله أسيل امشي وياي

ـ شو زعت المستحى فدمره متكول أخوها واكف وتأمر بكيفك واسيل امشي أنتَ شـــنو من صنف البشريه شايف نفسسك فد قندره مثلاً

ـ أخلاقك وراح أسكتلك لن دايس كاع بيتك وخلينا عمام ولاتخرب العلاقه بكم كلمه وزلة لسان وعيب أنتَ ابن عمي واختك حرمتي وعرضي وشرفي يعني كلامك كله ماله داعي واظن حلالي وتمشي وياي تروح ترتب جهازها وتكمل نقوصاتها يعني ما رايحه تتونس؟

ـ تتونس؟ والله اليوم اكلب عاليها واطيها على ࢪأسك ورأس الخلفوك يا مروان

أسيل ـ امي سحبتني لداخل المطبخ وحارث تجاوز حدوده وابويه تعارك وياه ومروان طلع بس حسيت هذا هدوءه ما يعدي على خير وسكت لن دايس بيتنا بقيت خايفه وامي ادك وتلطم من الخوف ودخل عليه وصدمني .

حارث ـ تحجين وياه أنتِ كلتليه تعال اخذني تلفونج مو كسسرته شلون اشتغل جيبي

أسيل ـ سحب جنطتي وطلعه وكسره وجفص عليه بحذاءه.

حارث ـ شوفي لج هذا شاربي ازينه اذا ما طلگتج منه مثل ما طلگت أختج عبالي ادامي طلع خيسة البشريه كلها بي واحد شايف روحه شوفه وما يحترم احد البارحه اتعارك وياه ما اريدج تضلين رايحه جايه منا لما تزوجون كلت خل يحترم ويلتزم عيب كدام العالم وما يصير بس الافندي جايني ويريدج تروحين وياه والدنيا الليل ادري هالكواده هاي ويه صايره بس عندي ليش هما عرضهم وشرفهم غالي بس شرف العالم لا مو غالي عادي عنده مروان العار

بس خل يصبرلي واذا ما كسرت خشمك يا مروان وفشلتك كدام ربعك والمسؤولين مالتك اني ابن زنا واكود على عرضي وشرفي لو يبوس قنادر ما ابقيج على ذمته .

أسيل ـ طلع ودفر الجنط مالتي واغراضي بالحوش يدفر بيهن وامي تصيح عليه وابويه تعارك وياه وحسن يحجي أتصالات الظاهر سالفتي طشت علكها مروان ويتصلون على حارث وما يجاوبهم اخر شيء فتح الخط..

حارث ـ ماشي جيب سيد وطلگها منه وأنت أعقد عليها كبعها واخذها وياك .

يتبع .. ..
____

34






أسيل ـ يطلگلني ويزوجني! والمن ياربي هذا شبي وأني شــنو موقعي من هالمشاكل كلها خوما لعبه بيدكم أنتهى الأتصال ويتحلف ويتوعد لو بس أعرف شجاك هيج قلبت عليهم وگلبك صار اسود ناحية مروان وجنت تموت عليه وتمجد بي ومروان ...

" بقيت كاعده بمكاني وتلفوني بالكاع متكسر وأمي راحتله وأبويه قطع الاتصال يمكن عمامي يحجون وياه وحسن كام يحجي ويصيح على حارث ما رضى

حسن ـ شبيك تخبلت أنتَ شهل التصرفات مال جهال تغلط وتجاوز وتسب وتلعن وتطلك وتزوج شنهي بكيفك مروان عاقد عليها بالمحكمه رجل دوله يشحطك انت ووياها السالفه زواج مو لعب جهال وعنتره وهوبزه واعرض عضلاتك
وين عايشين كلمن اله .

حارث ـ لاحد يتدخل ومروان اذا ما أخليله حد وانطي حجمه وقدره يستفحل علينا شاف روحه احترامنه وقدرناه واستجلب بكيفه يمتى ما يعجبه يفوت يجر اسيل يله امشي وياي امي دزت عليج وجهاز وسوالف وأعذار تافهه شــنو مفتح بيت كواده شاد كرون ستيل بكيفه يتعدى حدوده ويانا .

جنان ـ شنو أطلك وازوج المن تزوجها يالفهيم

حارث ـ لـ ابو الحسن مو يريد يتزوج على مرته ليش يروح يدور يم الغرب خل يجي ياخذها واتشرف بي وبنسبه على اقل ما شايف نفسه مثل مروان .

حسن ـ دباع العقل شيفكر انت خبل تطلكها من مروان اعزب وتزوجها لواحد متزوج وهو لو بي خير ما ياخذ على مرته ام الحسن ويكسر بختها .

علوان ـ هذا الشيء ما يصير ولاتصير حيوان وتطلع حيوينتك بولد عمامك وتزرع الفتنه بينهم اكعد على عقلك وبس مشاكل وخل اختك تمشي بقسمتها

حارث ـ لا والله ما تمشي ويطلگها وما يشرفني نسبهم وشنو نسيتوا عصام هذاك اليوم شلون هد علينا من ورا مرته وبعدين فهمت السالفه من هديل طلعت مالها ذنب واكلت مني كتله من وراهم حاشرين نفسسهم بسوالف النسوان بس اني دواهم

أسيل ـ كام يطلع سوالف دفاتر قديمه وطلع حشو بطنه وما سكت أبداً ولا ياخذ كلام لا من ابويه الفقير ولا من حسن ولا من امي حتى .

أختنكت من الصياح وكلامه كمت اشرب ماي وشفت تلفون امي صامت يتصل عمتي وصال سحبته وطلعت الصاله نسرين شافتني كامت تهز بيدها هاي شبيها منو وياها ردت أجاوبها اجتني امي سحبته مني وضربتني ليش تضربين أشسويت

جنان ـ صدك ما تستحين وعينج صلفه يعني اخوج دمه محترك ويشب لسما وينزل للكاع ومخبوصين من وراج وأنتِ تختلين تخابرينه طاح حظج من البنات تف على هالخلقه امشي كدامي يالسكط

أسيل ـ اريد اصرخ بيهم كلهم بس كاتمه عبرتي واعرف يكسرون ركبتي وانسحل بالنعل اذا حجيت
كعدت بالمطبخ وأندك الباب وامي انخبصت رتبت الاستقبال وخلت القوري عالنار ودخلت هديل وراها سيف وكف يحجي ويه حارث وهي اجتي تحجي ويه امي تريد تفهم السالفه وباوعت لتلفون وباوعتلي وكالت .

هديل ـ تطلگي من هسه أحسن الج والله طلعوا حقراء اني نزلوا من عيني من هدوا على حارث من ورا اسيا وسوالف نسوان حاشرين خشموهم بالنص واسيا ناشفه ريشها بتباهي عبالك بس هي رجلها رجل دوله وصاحب مركز مهم بيها شنو بس هما دوله عابت هيج نسب اي والله لا يمه خل يطلگ

جنان ـ أنتِ انجبي وخليج محضر خير عبالج الطلاك بالسوالف مثلج من گلبتي خلقتج وكمتي تتأمرين على عصام تردين أنتِ الزلمه وتحكمينه وتفرضين نفسج عليه أسترجلتي وركعج بقندره على حلكج وانطانج قدرج ومكانج وتالي تزوجتي شلون ما جان وهسه صرتيلي خوش مره وتنطين رأيج بزواج أختج والله لن مغثوثه منهم لو تحجين حجايه بيها خير لو تنصلمين على حلكج اذا تطلگت تضل برگبتي واني اريد ازوجها واخلص من لسانها ومن لسان حارث لا يوم يسكطها .

هديل ـ اني حجيت هيج لن مروان ما احترم نفسه

جنان ـ لاتتدخلين ولد عم بينهم وهسه يجون هما ولد عمج داوود ويفضونها عالخير يله فوتي غيري ملابسج وبعدين منو كال الكم شمدريج

هديل ـ حارث خابرني وكالي ورجع خابر سيف گاله اكو كعده تعال اريد تحضر وسيف كالي نروحلهم وجهال عفتهم يم حماتي واجينا وهسه شوكت الكعده ومنو ومنو يحضر .

جنان ـ هسه بالطريق جايين سمعت رافع وناجح وعصام ومروان

هديل ـ مروان هم يجي

جنان ـ اي لعد شلون مو رجل أختج .

أسيل ـ ما حجيت بس أباوع لـ حارث يحجي ويه سيف حسيته يتشيم بي وجايبه يغثهم لن المشكله عائليه وهو رجال غريب واكفه ادز عليه واشوف تاليها تنلاص علينا .

" أندك الباب وأمي ردت باب المطبخ وكمت باوعت من الشباك طبگت سيارتين يم الباب ونزلوا رافع وعصام وناجح ومروان باوع واشرلهم بإشاره رجعوا وكفوا ما دخلوا ليش شگوو

هديل ـ ليش رجعوا شبيهم

جنان ـ الله يستر بس

أسيل ـ حارث ما تحرك وجاب الكرسي وكعد كبالهم ورجل على رجل!! شنو هالحركات هاي وهما صعدوا سياراتهم وطلعوا كلهم ورجع ابويه يصيح على حارث ويغلط عليه

علوان ـ شنو هالحركات الخايسه يالطايح الحظ اشسويت مو عيب كدام عمامك.

حارث ـ انطيتهم قدرهم وحجمهم يله يالنسيب يمه جاي جاي مهيل اكعد ࢪاسي زين وضيافه معدله .

أسيل ـ أمي فتحت الباب بعصبيه وهدت عليه
لـ لاستقبال وأني بقيت كاعده بس صوتهم عالي وحسن بالطرمه گبالي ورن تلفونه وفتح سبيكر وابويه وكف يسمع .

رافع ـ أفتح سبيكر

حسن ـ فتحت احجي ابو الحسن

رافع ـ تصرف أخوك مو مال ناس حموله عيب عليه وتنحسب عليه واحنه ولد عم واللي صار كدامنه اطلعه من عيونه واجفص عليه بسطالي صايرلي زلمه علمود مره وهالمره أخته اني مو سالفتي مروان واللي صار بينهم من مناوشات لن عارف ومتقين الاثنين يتصرفون بدون عقل بس اخوك ما محترم والما محترم نفسه يأكل وحل .

حسن ـ رافع نريدك محضر خير

رافع ـ واني جايب ولد عمي وجايكم محضر خير ما اريدها تكبر ويدخل الشيطان ويخرب خوتنا واحنه ولد عم وابن العم حزام الظهر ومو يوميه امهاتنا تخلف النا زلم
بس مال إنهان اني وولد عمي لا ما صارت ولا تصير
مو ابو الحسن يسكت عن الاهانه ولا ابو كرم يقبلها لو مو جان اخوه بس اخوك راكبه الشيطان ويريد يعيد الشر ومسويلي بيها هيبه وتفاخر وتشيم جايبلي نسيبكم عمي اني ما عندي مانع يحضر أخلي على ࢪاسي هو وأهله بس السالفه سالفة اهل وبينه نحلها وما نريد الغريب يتفرج على خياسنا

ـ والله كلامك ذهب

ـ فهم أخوك حركته الناقصه أحرك *** عليها واعلمه شلون يكعد عالكرسي مثل الاوادم وشهاداة المحاماة خلي يتبرع بيها لزلمه ابو الحقوق والعدل

أسيل ـ قطع الخط ودخل حسن وصار الحجي خشن وعفتهم وصعدت غرفتي وهديل صعدتلي جهازي وشويه ودز عليها سيف وراحت ضليت بغرفتي، وامي صاحتلي ونزلت هاا

جنان ـ راح يطلگج انلاصت من رافع خشن كلامه عليهم انوب ولد عمج داوود صفوا ضده لن اعوج وكله من وراج تخاربنا مو رحتي مره شعندج يوميه موليه .

أسيل ـ يعني هسه عفتي ابنج الاعوج اجيتي عليه ليش مو الصوج كله منج لو ماشيه وياي ومجهزتلي جان ما وصلنا لهل المواصيل ليش ما تكولين كله من وراج تذبينها بࢪاسي ضربتني كف ومشت كعدت لازمه خدي منين اتلكاها من اهلي من مروان .

" الثاني يوم طالبين الكعده بيت عمي كمال رافع مقترح هالاقتراح وحارث يشيل روحه ويركعها بالكاع
واحد يرفع والثاني يكبس ورافع واحد ما يسكت عن حقه وما يتفاهم وحسن يحجي بالصاله وعرفت يحجي ويه عصام

حسن ـ ابو كرم رحمه لـ أهلك حلها من يمك هدي رافع لن توجه علينا واني شايفه العاقل يحلها انوب سوالي بيها كرامه والسالفه جاي تكبر ما تصغر .

عصام ـ هذا هو ساعة زمان واحنه يمكم واني احلها

حسن ـ مو رافع طلب الكعده بيتكم

عصام ـ لا حبيبي الكعده بيتكم احنه مو مثل اخوك واختكم زوجة اخوي ما نبيع بهل السهوله علمود كم حجايه نگالت وكرامتنا مو رخيصه علينا بس السالفه بيها بنيه مو من شيم الزلم نسترجل على النسوان وهاي تلكاها عندك اخوك المحامي يله فيمالاا .

أسيل ـ حسن دخل الاستقبال وبلغ حارث وحارث تخبل كام يغلط على عصام يبووه لزمهم كلهم يعدلهم طلعهم صفر ومر وقت واندك بابنا وراح حسن يفتحلهم كمت رديت الباب وامي واكفه بالطرمه ودخلوا عمي كمال وعمي فاضل ورافع وعصام وناجح ومروان سلموا على حسن وابويه سلام حار وحارث ما طلع الهم ضل كاعد

عصام ـ شلونج عمه صحتج شلونها

جنان ـ بخير الحمدلله يمه ابوس شاربك حلها

عصام ـ سهله عمه سهله هو وينه ليش طلع النا شنو خايف ترة ما اسويله شي لن ما اخلي عقلي ويه واحد يحجي حجي ما بي معنى بس رافع متحلف اله اني واخويه متنازلين عنه.

أسيل ـ عصام واكف وباوعلي وابتسم وتقدموا ومروان يمشي بثكل وعاكد الحواجب وجهه ما يكصه سيف وناجح يدفع بي وهو معصب

عصام ـ تحرك وكلمتي ما تنكسر اللي كلته يصير

مروان ـ رافع ما ناوي على خير هدي لايسولنا سالفه وتنكلب عليه .

عصام ـ سيادته وعمي موجود ما يكدر يسوي شيء وانت ما الك شغل وما تقلل أحترامات نهائي يله سيادتك عمي فاضل ابو العز تفضلوا عمه جاي جاي

أسيل ـ دخلوا كلهم بس رافع ما اجه والباب ضل مفتوح ودخل وبيده عصه عزاا نزع حذاءه ودخل عليهم ركضت اباوع باب الاستقبال الداخلي مفتوح شوي باوعت عصام گبالي شافني وضحك
" حارث كاعد ما متحرك ورافع دخل وحارث نهض وعصام وعمي كمال وعمي فاضل ما قبلوا ومنعوا رافع بس مااهتم الهم وصفكه بضربه على *** وحارث راد يضرب بس عمي كمال منعه ورافع شمرها برا ومد ايده لحارث وصفكها بقوه ونفضه نفض وگاله

رافع ـ حلفت وما بيه اصوم ثلاثة ايام وگلبي جمر عليك وكلت الا اطفي ناري بط*** وتستاهل يا هلا ابن عمي العلم يله ارجع أكعد واحجي عدل مثل الزلم ومره ثانيه ما تستقبل اليجيك بهل الطريقه لا اعيد امجاد امجادك واشوفك واعلمك الزلم شلونها، الله بالخير يابه شلونكم عمي وين جايكم جاي من ايد جنتنا .

أسيل ـ كعد بصف عمي كمال وعصام بس مروان وعمي فاضل وناجح وحسن وابويه من هالصفحه

" رجعت الجاي خدران بس صبيته واجه حسن اخذه الهم باوعت الباب مفتوح حارث كاعد ووجه سماد وصافن وبإيده جكارته انقهرت عليه ما حبيت تصرف رافع مهما يكون يضل اخويه بعد هدوء حجه حارث

حارث ـ مروان راح أجيك من الأخير وما اطولها عليك أختصرها علينا وأرمي الطلاك على أختي

مروان ـ طلاك ما أطلك

رافع ـ لا خلي يكمل اي وتطلكها تزوجها اليه مو

حارث ـ لا الك ولا لغيرك

عصام ـ لحظه يزوجها الك شــنو هالخريط هذا انتوا من تحجون تفكرون بحجايتكم هاي لو بس كلام فارغ .

رافع ـ أبن عمك يريد يتزوج الثانيه ويكثر النسل

مروان ـ وزوجتي شعليها شهل التمسلت اللي جاي نسمعه .

عصام ـ نسوانكم جواري ليش تجبروني اكوم اجفصكم اثنيكم .

كمال ـ هدوا ولدي خل نسمع السالفه وبعدها احجوا لن الظاهر الوضع صاير فلت وبكيفهم يحجون

رافع ـ عصام شبيك حميت وبعدين شگو بيها الشرع حلل اربعه وين الغلط بالموضوع هذا شرع الله وجاي نطبقه.

عصام ـ تطبقه اذا جانت عندك أسبابك وام الحسن ذهب صافي تكسر بختها ليش بغض النظر عن سالفة حارث العوجه .

رافع ـ شيء راجع اليه اي حارث بعدك على قرارك

مروان ـ قرار شــنو هالخريط هذا انتوا صاحين

رافع ـ حاجي ابن عمك الناقص اخته على ذمتك وعرضها لزواج تكول نعجه وجايبها لجوبه مو طفله

حارث ـ طلعت مثل ولد عمك أنذال.

كمال ـ شو أنتَ ما تحترم احد ومحامي وخابص نفسك هاي اخلاقك وقيمك

عصام ـ سيادتك اسمحلي شوف حارث اني ساكت مو خوف بس المشكله ما تريد لسان يهلهل ولا اتكابح وياك واردك لا اتعامل بأخلاقي تبعاً لأخلاقك واني دايس فراش بيت عمي ومخلي قدر وقيمه للكاعدين واحترامهم واجب عليه ولن اللي بالنص أختك وما نريد نكسر بختها وتنظلم بهل المععه كلها.
.. ومن شيم الزلم نسترجل على النسوان ونطلك منا ونزوج منا اذا ماكو احد يردك ويوكفك عند حدك اني اطب بعينك واختك صارت على ذمة اخوي شرعاً وقانوناً يعني هسه نكدر نأخذها ويانا بس هذا مو من شيمنا ولا اخلاقنا وأختك تطلع
من بيت اهلها عروس بدلتها وبفرحتها .
ف أحترم نفسك وأحترم الكاعدين وحاجيني مثل الزلم واذا الك حق انطي الك مربع ومن هالشارب

فاضل ـ رد اذا عندك لسان وانت محاني المفروض اكثر واحد ينصف النساء ويعرف الحق والعداله مو تريد تطلگها وتزوجها عالكيفك .

كمال ـ شوف ابني طلاك ماكو شيلها من ࢪاسك واظن احنه ما غلطنا بحقك واذا مروان تجاوز عليك يكوم يبوسك من شاربك .

حارث ـ كلامكم على عيني وࢪاسي بس مروان ما أحترم كلامي وما التزم بي منعته وگتله خفف رجلك بس هو ما اهتم يفوت البيت ويجر اختي ويمشي ولا كأنما وراها اهل وزلم ادري كواويد احنه

كمال ـ حشه قدرك ابني وحقك علينا مروان كوم اعتذر وبوس شاربه وتراضوا وفگوا هالنزاع وخلينا نكمل الفرح بدون مزاعل.

رافع ـ ماكو بوس شوراب لاتدخلون الشارب بهيج مواضيع رجاء وتخربون سمعته هو بس شاربي ضال وجاي اطكك بي .

فاضل ـ عمي مروان بوس ࢪاسه عوف الشارب هسه

مروان ـ ما ابوس اني ما تجاوزت ولا تعديت حدودي

عصام ـ كوم وصير أنت احسن منه ولا عبالك اليعتذر هو الغلطان الاعتذار فوز مو هزيمه وقوه مو ضعف

مروان ـ لخاطرك والله لن أعرف اليمشي وراك ما يخسر .

أسيل ـ ما كدرت اشوف بس سمعت صفك ايد بقوه وحارث كام سلم عليهم كلهم واحد واحد ومروان طلع يشرب جگاره وصار بوجهي بلعت ريگي وغمزلي بخبث گبل رجعت الصاله وضليت وسمعت اصواتهم يرحون وسمعت صوت حارث يضحك باوعت عصام حاضنه وباسه من ࢪاسه

عصام ـ لك شايفك بعين جبيره

حارث ـ أخوك تجاوز

أسيل ـ صوتهم ما ينسمع وكلهم وكفوا بالطرمه وامي تسولف ويه رافع انطلقت ومروان حجه ويه عصام وتقدم دك الباب فتحته

مروان ـ تلفونج وين فتحي

أسيل ـ تكسسر

ـ بعد أحسن أمنية حياتي تحققت جيبي جهازج اخذه وياي يله تحركي.

ـ ماشي صعدت نزلته لوحدي ظهري انكسر خليته بالطرمه وهو اخذه لسياره كله وامي ساعدته واخر شيء اخذ علاكه ولزم ايدي سحبتها وكال .

ـ عبالج تخلصين مني

ـ ما جاوبته غمزلي ومشه وراحوا وكلهم راحو بس عصام وحارث ضلوا واكفين يسولفون ويضحكون وبالاخير رفع النا ايده وراح الله وياه .

جنان ـ الحمدلله عدت على خير

أسيل ـ رجع حارث باوعلي صديت وجهي خايفه منه مشه الاستقبال يم أهلي وكف ما عرفت شنو حجه وياها عفتهم وسويت العشه وبالليل عمتي وصال خابرتنا وبلغتنا حاجزين اليه يم الصالون امي توديني