Hozir qaysi asar(lar) mutolaasi bilan bandsiz?

@panda_books

#sarhisob #yanvar

Oy Sarhisobi.

Bu oy, umuman, bu yil qiyin boshlandi. Eng katta yangilik Buyuk Britaniyaga magistratura o'qishga keldim. Londonda bir muddat bo'lib, endi mana Lester city'da o'qishimni boshladim. Yangi mamlakat, yangi taassurotlar..

Ammo shu bilan birga bu oson bo'lmadi, tayyorgarlik, yugur-yugurlar bilan fikrimni ko'pam jamlolmadim. Undan tashqari eng yomoni - oilamdan bir muddat olisda bo'lishim bo'ldi. Bunga ko'nikish eng qiyini. Ikki tomonga ham.

Bu oy uncha sermahsul bo'lolmadim. Atigi 3 ta kitob, ammo o'ylaymanki, keyingi oydan yana tempga tushib olamiz. Albatta, endi o'qishim bor va sohamga doir o'qishlardan ortsamgina..

O'zim bilan tugatishim kerak kitoblarni olib kelganman va missiyani bajarishim kerak:)

O'qilgan kitoblar:
♻️ Jahongir Azimov — "O'zbekistonda yana bir kun"
Taqriz 👉 ko'k yozuvni bosing

♻️ Fredrik Bakman — "Britt-Marie Was Here"
Taqriz 👉 ko'k yozuvni bosing

♻️ Enso Ferrari — "Memuar: Mening dahshatli shodliklarim"
Taqriz 👉 ko'k yozuvni bosing

Oyning eng qiziqarli postlari:
👉 2025-yil boshida oʻqib chiqmoqchi boʻlgan badiiy kitoblarim roʻyxati
👉 Taqdir xazili yoxud Qushdek yengil bo'ling
👉 Baydenning so‘nggi kuni
👉 Til bilish
👉 DNK barmoq izlarining kashf etilishi
👉 Adabiyotdagi mashhur tushunmovchiliklar
👉 Enso Ferrariga xat

Siz-chi, bu oy qaysi kitoblarni mutolaa qildingiz?

@panda_books

Instagram | Youtube | Tiktok

Bir-birini sevish uchun o‘zi bilan kurashmoq kerak.

Fyodor Dostoyevskiy

@panda_books

Agar biror kitobga qiziqib yursangiz va u haqida internetda negativ taqriz oʻqib qolsangiz, keyin qanday yoʻl tutasiz?

@panda_books

​​Ko‘rdum yuzingni, qolmadi bir zarra toqatim,
Tun-kechalarda yo‘q mani bir dam farog‘atim,
Zahr o‘ldi shakkar og‘zima, ketti halovatim,
Bilmas kishi g‘aming bila chekkan nadomatim,
Hajringda dardu g‘am bilan hasratda dog‘man.

Sensan parivash ahlini sho‘xi zamonasi,
Menman sening g‘aming bila olam fasonasi,
Ko‘ngul qushini boisi changu taronasi,
Zulfungni domi-yu, yana xolingni donasi,
Hajringda dardu g‘am bilan hasratda dog‘man.

Rahm ayla holi zorima, oromi jonim o‘l,
Yetkur visol bog‘iga, jonu jahonim o‘l,
Bog‘i bahorim o‘lg‘ilu ham bo‘stonim o‘l,
Jonim fido qudumingga, kel, nuktadonim ul,
Hajringda dardu g‘am bilan hasratda dog‘man.

O‘lsam edi visolingga parvonadek kuyub,
Jon bersam erdi, boshimi ostonangga qo‘yub,
Maxmurlikda bodai vasling bila to‘yub,
Noqisligimda ko‘ksimi tiyri mijang o‘yub,
Hajringda dardu g‘am bilan hasratda dog‘man.

— Noqis

@panda_books

#haqida

Kursdoshlarim (ularda, albatta, bunaqa tushuncha yo'q, men sizlarga tushunarli bo'lsin deb aytayapman) qiziq. O'z navbatida, ularni o'rganish menga qiziq.

Demak, bugun seminarda bitta turk yigit va mening o'rtamizga amerikalik (ularni Buyuk Britaniyada o'qishi menga noyob hodisadek tuyuldi) qiz o'tirib qoldi. Bu orada bizning turk bilan suhbatimiz qizib ketdi. Hammasi turkning ismi Mard ekanligidan boshlandi. U Jasur bilan sinomimku. Shunday qilib, biz turk bilan tilimizni solishtirdik, buyog'ini tushundingiz men turkchani yaxshi anglayapman, u o'zbekchani unchamas. Ajdodlarimiz bitta joydanligini ta'kidladik. Shu joyida oraga orqamizda o'tirgan saudiyalik yigit ham qo'shildi, uyam buni bilmas ekan: hayron bo'ldi, keyin mendan kurdchaniyam bilasanmi deb so'radi, men o'yladim "Bu ketishda hozir uchalamiz Yaqin Sharq muammosini hal qilib qo'yamizov". Uzr to'rttalamiz, amerikans ham oramizdaku:)

Xullas, jiddiy oladigan bo'lsam, amerikalik qizda bu dunyo qanday tuzilgan, nega orasida bir necha minglab km bor xalqlar bir-birini bunchalar yaxshi tushunyapti, nega mana bu arab va turkic (men unga biz turkiylarmiz dedim) ismlari o'xshash, qanday dini bir bilmaydiyam, qiziqmaydiyam, umuman olganda, "po barabanu". Men buni bilsamda, unga gapirishda davom etaverdim, chunki mening maqsadim uning menga kiprik qoqmasdan tikilib turgan, biror ifoda anglatmaydigan marmardek yuzida oniy lahza zohir bo'ladigan taajjub alomatini ko'rish edi. Va unga erishdim ham.

Ismi Eve ekan. Bu Evaning boshqacha shakli. Bu ism Injildagi Momo Havo ekanligini tushuntira oldim. Va nihoyat yuzida hayrat ifodasini ko'rganimdan keyin. xotirjam tortdim.

Xullas, amerikaliklardek pofigist xalq boshqa bo'lmasa kerak, lekin ularga bir o'rgatsangiz, umrbod esida qoladi. Har holda shunga umid qilaman, axir, nima bo'lgandayam, bekorga dunyoning eng rivojlangan davlati fuqarosi emasku:)

@panda_books

​​#review #taqriz

📙Toni Morrison — "Eng moviy ko'zlar"

1993-yil u "Amerika voqeligining muhim jihatiga hayot baxsh etuvchi, bashoratgo'y kuch va she’riy mazmun bilan ajralib turadigan romanlari uchun" gi Adabiyot bo‘yicha Nobelga loyiq ko'rilgan. Xo'sh, biz ushbu romanida o'sha bashoratsifat qudrat va she'riy mazmunni ko'ramizmi?

"Eng moviy ko'zlar" uning 1-romani. U barcha 1-romanlar kabi yorqin, go'zal va shu bilan bilan birga, mukammal emas. Asar Ogayo shtatida yashovchi qora tanli, o‘n bir yoshli Pekola Bridlou ismli qizcha haqida so‘zlaydi. Pekola ko‘zlarining moviy rangga aylanishini, Amerikadagi barcha mallasoch, moviy ko‘zli bolalardek chiroyli va sevimli bo‘lishni orzu qiladi.

Kitob o'sha paytlarda qora tanli insonlarning qanchalik g'arib va bechora yashaganini ta'sircham ko'rsatib beradi. Shuningdek, biz opa-singil Frida va Klodiya kabi qizlar orqali asar syujetini olib boramz, muallif ular orqali go'yo bizga o'sha davrdagi ijtimoiy holatni, ""odamlar nima deydi?" iborasini bolalar tilidan taqdim etadi. Ular boshida Pekolani yoqtirishmaydi, keyin dugona tutinishadi, ammo oxir-oqibat unga nisbatan shafqatsizroq bo'lishadi nazarimda.

Asar nafaqat moliyaviy yetishmovchiliklar, balki doimiy kamsitilish natijasida insonlarni ma'naviy tubanlikka yuz burishi haqida ham so'zlanadi. Masalan, Pekolalarning tepa qavatida yashovchi uchta fohishalar hayoti, ularning "cho'pchaklari", orzulari, qora tanli erkaklarning shaxvoniy harakatlari, oilasiga qayg'urmasliklari, o'z qizlari oldida yalang'och yurishlari - hammasi bizga oilaviy qadriyatlar qay darajada ekanini tushunishimizga yordam beradi. Kulminatsiya shu bo'ladiki, Pekola o'z otasi tomonidan zo'rlanadi. Ammo jamiyat oyisidan tortib barcha-barcha Pekolani ayblaydi, uradi-so'kadi. Biz jamiyatning naqadar adolatsiz va qahriqattiq bo'lishi mumkinligiga yana bir bor amin bo'lamiz.

Morrison har bir personajning ruhiy holati va o'tmishini batafsil tasvirlaydi. Ularning hayotida bo'lib o'tgan muhim voqealarni fleshbak yoki hayoliy xatlar ko'rinishida namoyish etarkan, biz aslida inson ruhiyati biz o'ylagandanda murakkabroq va moslashuvchan bo'lishini tushunib yetamiz. Kitob ham asli shu haqida. Vaziyat qanchalik qiyin va boshi berk bo'lmasin, insonlarning unga ko'nib yashashda davom etishlari haqida. Kitob yana umid haqida. Pekola hech qachon ko'zlari moviyga aylanib qolmasligini o'zi ham biladi. U shunchaki odamlar moviy ko'zli qizaloqlarga ko'proq yaxshi munosabatda bo'lishlarini, ularning qanchalik baxtli va yaxshi umr kechirayotganlarini ko'radi. Moviy ko'zlar mana shu farovon, tinch va baxtli hayotning metaforasidir. U erkinlik va tenglikka da'vatdir. U mazlumlarning abadiy orzusini o'zida mujassam etgan go'zal moviy ko'zlardir..

Agar hozir menga o'xshab G'arbga kelsangiz, bu yerda hammasi qanchalar o'zgarib ketganini ko'rishingiz mumkin. Kitobdagi voqealar qandaydir 50-60 yil bo'lganiga ishonish qiyin. Hozir qora tanlilarni hech kim kamsitmaydi, ajratmaydi, qo'li bilan ko'rsatmaydi. Ammo... lekin bir muddat shu muhitda yashagach, yillar emas, balki asrlar davomida ularga nisbatan terisining rangi va irqi sabab ko'rsatib kelingan barcha zulmlar va adolatsizliklar darrov yo'qolib ketmasligini sezish mumkin. Bu yerda eng qimmatbaho mashinalarni qoralar minadi. Eng brend kiyimlarni kiyadi. Hech bir tungi klub, ko'ngilochar bazm ularsiz o'tmaydi. Ular o'zlarini guruhiga uncha-buncha oq tanli qo'shmaydi, janjaldan qochmaydi, qoni qaynoq. Ular yo'qotilgan narsalarni o'rnini to'ldirishga urinashayotgandek ko'rinadi menga. Axir, bu tuyg'u bizga ham tanish, shunday emasmi?

Toni Morrison o'qishga arziydigan yozuvchi. Endi menimcha, uning yanada yaxshi hisoblanadigan "Sula" va "Beloved" kitoblari ham o'zbekchaga o'girilsa, turkum qilinsa yaxshi bo'lardi. Va muharrirlardan ba'zi 18+ joylarni silliqlashda juda oshirib yuborishgani va ba'zi so'zlarga izoh berganda, aniq ta'rif yozishni so'ragan bo'lardim. Aytgancha, muqova menga yoqdi.

Yoqimli mutolaa!

@panda_books

#haqida

Kolumb haqida haqiqat

To'g'risi, maktabda bizga tarix darsini juda mujmal o'qitishgan. Buni faqat yillar o'tib, ko'plab tarixiy-ilmiy adabiyotlarni o'qiganingdan keyingina tushunib yetasan. Masalan, Kolumbni olaylik.

Kolumb haqida maktabda noto'g'ri tasavvur beriladi.

Hamma biladiki, dengizchi Xristofor Kolumb o'z dengiz sayohatini uyushtirishda boshida katta moliyaviy qiyinchiliklarga uchragan. Ya'ni hech kim u uchun moliyaviy homiy bo'lishni istamaydi.

Bu odamlarning "Yer - tekis" deb o'ylashgani va G'arbga qarab suzib sharqdagi Hindistonga bora olmaydi deb o'ylaganlarida emas. Yo'q.

U vaqtga kelib, Kolumb pul so'rab murojaat qilgan ziyoli yevropaliklar orasida Yer - sharsimon ekanligi yaxshi ma'lum edi. Shunchaki, potensial investorlar Yer Kolumb hisoblaganidan ko'ra kattaroq deya hisoblashgan va ekspeditsiya o'zi bilan olib chiqqan oziq-ovqat zaxiralari okean o'rtasiga borib tugaydi deb o'ylashgan.

Aslida ham shunday bo'ladi. Faqat Xristofor Kolumbning baxtiga, ular bu paytda Karib dengizi orollarigacha yetib olishadi. U esa “Mana Hindistonga keldim” deb oʻylaydi va bu dunyodan Amerikani kashf qilganini bilmay o'tib ketadi.

Bor gap shu.

@panda_books

​​#review #taqriz

✅ Tomas Mor - "Utopiya"

XVI asr boshlarida yashagan angliyalik yurist va davlat arbobi Tomas Mor qoldirgan bu adabiy yodgorlik hozirga qadar kitobxonlar orasida juda mashhur hisoblanadi.

Men ilk bora hafta davomida o'qigan asarim haqida emas, balki oldinroq, universitet davrida o'qigan kitobimni qayta varaqlab chiqqan holda taqriz yozyapman. Bu asar mening kutubxonamda ingliz tilida copybook shaklida mavjud.

U ikki qismda iborat bo'lib, 1-qismda Angliyadagi ijtimoiy muammolar haqida gap borsa, 2-qismda Utopiya deb ataluvchi xayoliy davlat hayotida to'g'risida so'zlanadi. "Utopiya" so'zi grekchadan tarjima qilinganda "mavjud bo'lmagan joy" deya ataladi. Chunki Tomas Mor Utopiyadagi hayot orqali aslida ideal jamiyat qanday bo'lishi kerakligi haqida fikr yuritgan. Binobarin, ushbu mavzuga tarixda antik davr mutafakkiri Platon ham "Atlantida" shahri haqidagi kitobida to'xtalib o'tgan.

Kitobdagi afsonaviy orol ideal holatda joylashgan, agar mahalliy bo'lsangiz kemada portga kira olasiz, begona bo'lsangiz, yo'lni topa olmay riflarga borib urilasiz. Orolda yagona davlat yo'q. Aniqrog'i 50 dan ortiq shaharlar konfederatsiyasidan tashkil topgan desak xato bo'lmaydi. Aholi shaharlarda teng taqsimlangan va asosiy qismi dehqonchilik bilan shug'ullanadi. Har bir utopiyalik umrida 2 yil majburiy dalada ishlash majburiyatini oladi. Kasblar otadan bolaga meros o'tadi. Baqqolning o'g'li baqqol, novvoyning o'g'li novvoy bo'ladi. Kasbni o'zgartirish mumkin, buning uchun boshqa oilaga ko'chib o'tishingiz lozim. Ish kuniga 6 soat, ovqatlanish umumiy oshxonada bo'ladi, ishdan tashqari vaqtda san'at, e'tiqod va ilm-fan bilan shug'ullanish mumkin.

Xalq orasidan chiqqan obro'li, mehnatkash erkak boshliq etib saylanadi. Aholi 10 ga yaqin oilalarni birlashtirgan kommunalarda yashaydilar. Ishsizlik darajasi 0. Barcha nima bilandir mashg'ul. Dam olish va ta'til mavjud emas. Lekin ish vaqti oz bo'lgani uchun bemalol hordiq chiqarishga vaqt yetadi.

Insonlar shaxsiy mulkka ega emas. Boylikka hirs qo'yishmasligi uchun odamlar har 10 yilda uy-joyini almashib yashashadi. Nima kerakli buyum bo'lsa, oila boshlig'i o'ziga yetarli miqdorda bozordan borib oladi. Hamma narsa tekin. Pul tushunchasi mavjud emas. Hamma birdek ishlagani va samaradorlik katta bo'lgani uchun 2 yilga yetadigan zaxira va to'kin-sokinchilik muhayyo.

Agar urush kelib chiqadigan bo'lsa, tog'da yashovchi qabilalardan yollanma jangchilar yollanadi. O'zlarida armiya shakllantirilganiga qaramay, Utopiyaliklar uchun har bir fuqarosining hayoti o'ta qadrli. Utopiya hayotida diniy bag'rikenglik o'rnatilgan. Istagan kishi istagan diniga e'tiqod qilishi yoki hech qaysi dinga e'tiqod qilmasligi mumkin. Bu yerda na diniy, na irqiy, na mahalliy konfliktlar mavjud. Barchasi juda to'g'ri yo'lga qo'yilgan. Gender tengligi ta'minlangan, masalan uy ishlari va bola tarbiyasi bilan utopiyada alohida kishilar shug'ullanadi.

"Utopiya" o'z navbatida, ideal jamiyat qanday bo'lishini ko'rsatib beruvchi qo'llanma o'laroq yozilgan. O'zingiz ham payqangingizdek, hayotda bu qadar mukammal socium paydo qilish deyarli imkonsiz. Shunday ekan, vaqtlar o'tib bu janrda yoziladigan kitoblar soni kamayib, faqat falsafashunoslar ta'sir doirasida qoldi. Ammo bu boshqa bir yangi yo'nalish asosini belgilab berdi. Bu siz yuqorida tanishgangiz Anti-Utopiya janridir.

Menda bu asarda eng manzur bo'lgan jihat- bu jamiyat va davlat eng avvalo inson qadrini birinchi o'ringa qo'ygani va uning hayotini maksimal komfortligini ta'minlagani bo'ldi. Albatta bunga ular tinimsiz mehnat evaziga erishishganini hech kim inkor etmaydi.

Yoqimli mutolaa!

@panda_books

Sizdan ikkalasidan birini tanlashingizni talab qilishdi deylik: Qaysi birini tanlardingiz?

Baxtli bo‘lmagan erkinlik yoki erkinligi bo‘lmagan baxtnimi?

@panda_books

#tavsiya

Expendables (Sarflanuvchilar) o‘lishadi. Juda ko‘p. Ular tana tuzilishi va ongi saqlanib qolib, kerak bo‘lganda qayta tiklanadigan odamlardir. Ular boshqalar bajara olmaydigan xavfli ishlarga yuboriladi. Havaskor tarixchi, ammo dangasa Mikki Barns o‘z sayyorasidagi muammolardan qochish uchun yangi ekspeditsiya kosmik kemasida Sarflanuvchi bo‘lishga rozilik beradi. Kunlarning birida u yettinchi marta qayta tiklanganida, yana bir kloni (nusxasi)ga duch kelib qoladi. Biroq, nusxalar taqiqlangan, shuning uchun ular buni yashirishlari kerak edi. Shuningdek, faqat Mikki7 mahalliy hayot shakllari aslida ongli mavjudot ekanligini biladi va u keng ko‘lamli urushning oldini olishi mumkin.

Edward Ashton ning "Mickey7" - bu tez sur’atli va qiziqarli sarguzasht roman. Yaqinda "Parazitlar" filmini suratga olgan Pon Jun Xo ushbu roman asosida film suratga olganini eshitib qiziqib qoldim. Asar g‘oyasi menga juda jozibali va puxta ishlangandek ko'rindi. O'zim ham o'qib chiqishni maqsad qildim.

@panda_books

​​#tavsiya

Fevral oyida o‘qish uchun 5 ta kitob

Bu safar faqat badiiy janrlardagi oʻzim oʻqiyotgan turli janrdagi kitoblarni tanladim, bu orqali har bir kitobxon oʻz kayfiyati va qiziqishlariga mos keladiganini topadi deb oʻylayman.

1. “1984” – Jorj Oruell

Totalitar tuzum, nazorat va erkinlik mavzularini o‘rganmoqchi bo‘lsangiz, bu klassik distopiya siz uchun. Haqiqat va manipulyatsiya haqida o‘ylashga majbur qiladigan asar.

2. “Jinoyat va jazo” – Fyodor Dostoyevskiy

Psixologik jihatdan eng kuchli asarlardan biri. Ushbu roman insonning oʻz vijdoni oldidagi eng katta bahslardan biriga sababchi boʻladi. Uni oʻqish davomida sizni axloqiy qarorlar va ijtimoiy tengsizlik haqida o‘ylashga undaydi.

3. “Qor” – Orhan Pamuk

Turkiyadagi shaxsiyat, din va zamonaviylik mavzularini tadqiq etuvchi siyosiy va falsafiy asardir. Pamukning betakror uslubi va murakkab qahramonlari sizni o‘ziga rom qiladi.

4. “Notre-Dame de Paris” – Viktor Gyugo

Parijning mashhur Bibi Maryam sobori atrofida kechadigan fojeali tugaydigan sevgi hikoyasi haqida. O‘rta asr jamiyati va insoniy tuyg‘ular toʻgʻrisidagi chuqur falsafiy asar.

5. “Kirka” - Madlen Miller

Quyosh ma’budi va eng qudratli Titan – Heliosning xonadonida g‘alati bir farzand dunyoga keladi - Kirka. U na otasidek kuchli, na onasidek vasvasaga soluvchi edi. Foniy dunyodan oʻziga umryoʻldosh izlab, u kutilmaganda yashirin qobiliyatini kashf etadi: bu shunchalik qudratli kuch ediki, u bir kun kelib, eng kuchli ma’budlarga ham tahdid sola olardi.

Qaysi biri sizga qiziqroq tuyuldi? Yoki boshqa janrlar bo‘yicha ham tavsiyalar beraymi?

@panda_books

Manavi do'kon bilan meni oramizni atigi 489 km ajratib turibdi ekan.

Qachondir "hayyohayt" deb yo'lga chiqib, bir borib ko'rsammikan?

@panda_books

#meme

Bilgichlarning aytishicha, bugungi trendlar shu emish…

@panda_books

#reading

Bu qiziq dialog haqida gaplashamiz hali.

@panda_books

Bu bolamiz shoir ekanda demak:)

(Bugun kayfiyatimizni sal ko'taramiz)

@panda_books