السعي شي أساسي بحياتك،
ما تگدر تحقق شي تريده بدون ما تسعاله،
وكلشي يحتاج سعي وخطوة ومحاولة منك،
ماكو شي يجيك علىٰ الحاضر وأنت گاعد،
ولا أكو شي يتحقق وأنت واگف ومنتظر،
كلّ الأمور محتاجة سعيك،
حتّىٰ الدعاء يحتاج منك التسليم والتوكّل والصبر،
واليقين يحتاج حسن ظنك بالله ورضاك بقضائه،
شفت؟ من الأمور الروحيّة للأمور المادية هيَ محتاجة حركتك.

صح صعبة ومؤذية اللحظة الّي تنكشف بيها الحقيقة، ومتعبة فكرة إنك چنت معمي كلّ هذا الوقت الّي فات وهسّة الغمامة نشالت من عيونك وگدرت تشوف بوضوح،
تعيش شعور يوجع مليان بالـ "ليش" الّي تحِسّها تنهش بروحك،
بس من زاوية ثانية الموضوع يختلف تمامًا ومو بلاء ولا عقاب مثل ما متصوره، تشوفها علىٰ اساس إنها نعمة ومحبة من ربّ العالمين علمود لا تبقىٰ معمي علىٰ طول وتگدر تتلاحگ روحك وتساعدها بوقت أبكر.

دائمًا أذيّتك تجي من الجهة القريبة الك،
الّي تراهن عليها إنّها تختلف وتميّزها،
تالي هيَ أكثر جهة راح تأذيك وتجي عليك،
لأن شنو يهمّك بالغريب؟ ما هوَ غريب ما يهتمّ أنت منو وإذا يخاف الله يراعيك،
بس القريب الّي يحبّك ويعرفك من يأذيك ... هاي شتحطلها وتطيب؟
ما أعرف.

أريد أرفع الراية البيضا
وأنهي كلّ شعور/شخص يخلّيني أحِسّ أني بمعركة أو بمحكمة
يحتاج بيها أقاتل وأدافع عن نفسي دائمًا تجاه أي كلمة وفعل يصدر مني؛ لأن تعبت ... تعبت أنطي فرص من بعد كلّ سوء ظن وتبرير، تعبت وأني لازم أشرح كلّ حرف يطلع مني حتّىٰ لا ينفهم غلط، وبالمقابل أطلع أني الّي ما تحمّلت ولا عرفت تصبر وتحتوي.
گلبي ما يستاهل هالأذية والتعب ولا همَّ يستاهلون گلب مثل گلبي.

الله يدري،
الله يدري كلشي،
محاولتك وسعيك وتعبك،
حزنك ومشكلتك وظرفك،
مرضك وبلائك ودعاء گلبك،
يدري بخطواتك الثگيلة الّي خطيتها وأنت مليان خوف من الفشل،
يدري بشعورك الّي خافية عن الكلّ بس ما مخفي عنده،
يدري بكلّ مرّة حسّيت بيها الدنيا ضدّك وضيّعتك،
يدري بكلّ فكرة ومحاولة منك حتّىٰ ترجعله وترضيه،
والحَمدلله لأنّه يدري.

مرّة د.نُور گالتلي:
"كلما تخافين وتصفنين
گولي استغل هذا الوقت بالدراسة
وهيچ يمشي الوقت وأنتِ مستفادة."

وفعلًا الواحد يضيع وقته ومجهوده بالتفكير بطريقة مرعبة بسبب الخوف،
وبالمرّات الّي خليت خوفي يمشيني بطريق السعي لگيته أكثر نفع من خليته ياكل بيه ويخليني بس أفكر،
فَ أنسب شي إنو الواحد يسوي الّي عليه والّي يگدرله للنهاية وبالمقابل ربّ العالمين مدبرله أمره وسعيه سوف يُرىٰ.

تخطأ اليوم عادي،
بس لا تخطأ ويَّ المريض.

ـ د. رائد.

مُمتنّة للحظات ...
استيقاظي بصحّةٍ وعافية،
والمزاج الجيّد لتحمّل مشقّة دوام الجامعة،
وللأحاديث العشوائيّة والضحك حدَّ البكاء مع الأصدقاء،
وتقاسم الطعام الحلو والمالح في آنٍ واحد،
وتلك النظرة التي نتبادلها في اللحظةِ ذاتها حين لا يُعجبُنا شيء.

مُمتنّةٌ للقصائد التي تُهوِّنُ تعبَ الطريق،
ولعودتي إلىٰ البيت،
ولروائحِ طعام أمّي اللذيذ،
وفي المساءِ لأصواتِهم الدافئة،
وصولًا إلىٰ مكتبي الصغير ومحاولتي للسعي مرّةً أخرىٰ.

أدعوكَ يا الله،
ألّا يَمسَّ قلوبَ أَحبّتي حُزنٌ ولا جَزعٌ،
وألّا تَغرِسَ مَخالبَ الدُّنيا أنيابها في عُمقِ روحهم،
وألّا تَترُكهم لِحيرةِ المَصير والقرار،
وأن تَغزو حياتهم شَمسٌ دافئةٌ تُشعِرُهم بالأمانِ الكافي لِلعيش.
أدعوكَ أن يُهاجِمهم السُّرورُ مِن كُلِّ الجِهاتِ وممّن يُحبّون،
وألّا يبقىٰ في قُلوبِهم نارٌ تَتلظّىٰ وتُحرِقُهم.
أدعوكَ أن يكونوا في أمانتِكَ وحِصنِكَ الحصين الآمن مِن كُلِّ شَرٍّ وضُرٍّ.

تصغر أمنياته الماديّة وتكبر أمنياته الرّوحيّة،
ويطمع بمشاعر ملموسة تخلّي داخله هادئ بدون ضجّة،
تصغر دائرة علاقاته ويخفض سقف توقّعاته،
ويصير كلّ همّه إنّه يلگه الأمان ويعيشه،
متطلّباته من بعيد سهلة ومن قريب تحتاج يفلت إيده من كلشي يأذيه علمود تتحقّق.

المُلّا بَاسم الكربلائي بقصيدة "حلم شاعر" يگول:

عجيبة شلون يا حسين جمعت ضدّين
صرت هَم دمعتي وهَم بسمة أفراحي!. ✨

كلّ مرّة تحاول بيها تصدگ وتثق يصير موقف يرجعك خطوات، يخلّيك تعيد التفكير وي نفسك ومن قرارك، ما تعرف المشكلة بالشي نفسه لو بيك، بس الّي تعرفه إنو أنت ما مرتاح؛ لأنك متأذي منه وشايل بگلبك عليه بس ما تگدر تحچي.

قبل شويّة تذكّرت كم موقف وتساءلت:
كَم مرّة گلت ما راح تعدّي وبعدين عدّت،
وكم مرّة گلت هاي آخر مرّة وما أعيدها وعدّتها،
وكم مرّة ومرّة گلت هالسالفة ما راح تخلص، وهالشعور ما راح ينتهي، وهالموقف راح يسوي حاجز، وبالأخير كلشي خلص وانتهىٰ وتغيّر،
وكم مرّة حسّيت وگعتي راح تجيب فشلي، وتالي أكتشف وراها سعي مُكثّف،
وكم مرّة گلت مو گدها ومو قوية وما أگدر، وتالي أطلع سباعيّة وسوبر هيرو،
وكَم مرّة أحِسّ من البداية إنو ما راح أنجح بشي، وبآخر خطوة الهزيمة ما تعرف طريقها إليّ وأنجح،
وبكلّ ظرف وامتحان ووعكة صحّية ومشكلة، أكتشف إنّ خوفي مو دائمي، والموضوع كلّه چان محتاج بس تسليم وتوكّل وسعي.

ما أحچي هالكلام علمود أگلك ها شوفني وأبرّز نفسي گدامك،
لا أبد هالشي مو أبالي ولا حتّىٰ آخر شي أفكّر بيه،
بس أحچي علمود أگلك إنو فعلًا هيَ راح تعدّي وتصير سوالف،
وتمشيها بـ ميخالف وصبري يا روحي وهواي سعي،
وبعدها راح يجي اليوم الّي بيه تلگه نفسك گاعد تتذكّر وتتساءل نفس تساؤلاتي، واسأل مجرّب.

ينكسر خاطرك علىٰ نفسك من تشوف وضعك شلون صار نتيجة اختيارك،
تحِسّ الوجع ياكل بيك وأنت واگف بالمنتصف ما تعرف شتسوي،
تحِسّ من جهة ورطت نفسك ومن جهة ثانية تشكك بحقيقة اختيارك،
وبنص هالدوامة ... أملك بالله يدليك للطريق الصحيح الّي يطلعك من كلشي ممكن يكسرك ويبهت الحياة بعيونك.

أنت ما خسرت كلّ جولاتك،
أنت تعثّرت بجولة،
ووگعت بالثانية،
وخسرت بغيرها،
بس ما انتهت الجولات،
ومستمرة طول ما النّفس موجود.
إذا تفكّر وتضوچ علىٰ النتيجة،
فَ هوّنها علىٰ نفسك وشوفها علىٰ إنّك خسرت جزء من الكلّ، مو الكلّ كله،
ومو دائمًا عثرة الخسارة تكون النهاية، أحيانًا تكون بداية للتسهيل بوصولك ونجاحك.

الشخص المؤذي ما راح يشوف فعل أذيّته ونتيجته عليك، راح يشوف بس استجابتك إله الّي هيَ ردّة فعلك، وراح يحاسبك عليها أو أساسًا ما يوليها أهميّة لأن ما يشوف نفسه غلط بحقّك ولا مقصّر،
الموضوع يصير أشبه بتصرّفات الأمّهات وي الجمادات من ينضرب ابنها، تگعد تضرب بيهن وتشمر علمود ابنها يرضىٰ ويحِسّ إنو أكو شخص أخذ حقّه من بعد الأذيّة الّي تعرّض إلها،
بس الحقيقة إنّ الجماد يبقىٰ جماد لا يحِسّ ولا يتأثّر، فاهمين قصدي مو؟. ‌‌^⁠‿⁠^

تبطل عتب وتسكت وتخلّي السفينة بكيف موج البحر تمشي؛ لأن تحِسّ نفسك قدّمت كلشي عندك بهالرحلة، بس الّي بيها ما نصفوك ولا قدّروا تعبك، تترك الأشرعة وتخلّي الريح والموج يكمّلون الّي بقىٰ، عسىٰ ولعلّ يحِسّون إنو محاولاتك هيَ الّي چانت مسيرة هالسفينة، وبسكوتك ضيعوا الوجهة وفقدوا السيطرة عليها.

"أني يمچ"
بهيئة حضن يلملم وحدتچ، ويطبطب علىٰ سكوتچ، ويخليچ تگدرين تشاركين أفكارچ بدون ما تبقىٰ بعقلچ وتستهلكچ، كلمتين بكلّ مرادفاتها هيَ حنونة ودافية علينا، تخلينا نحِسّ إنو أكو جهة نگدر نقصدها بوحشتنا، وأكو إضافة هينة بوسط الظرف الصعب الّي نعيشه ويگدر يهون علينا.

شخص يراعي گلبي،
أصغر تعب بيه يشيل همّه ويخاف عليه منه،
يداري خاطري ويخاف من أثر الكلمة عليه،
أصغر مخاوفي عنده چبيرة،
هوسة أفكاري يحِسّ نفسه مسؤول عنها ويحاول يرتّبها،
شخص يشبه دفو شمس الشتا،
ووجوده بخفّة النسمة، بس حاضر بكلّ شعور وزمان ومكان،
الأمان مَقرون بيه، وأفعاله الرجولية الطيّبة تحچي عنه.

شجاعة حزينة
من تدور وجهك عن الجهة الّي راهنت عليها هواي إنها تختلف عن الكلّ وبعدين طلعت حالها حال الكلّ.

شجاعة حزينة
من تسد باب الشكوك وتصدگ إنو حقيقتهم ويانا چانت تمثيل ونجحوا إنهم يخدعونا بكلامهم.

شجاعة حزينة
من تبطل تحاولهم لأن شفت شگد أنت ما تسوا عدهم ولا قدروا نتفة من محاولاتك.

شجاعة حزينة وغريبة يمتلكها الإنسان من گلبه ينلچم حيل ويصير عادي يبدي يومه ويسعىٰ وينجز بيه وهوَ من داخله أبد مو طبيعي، تشوفه يواجه مية ألف شغلة تصادفه وهوَ شايل هموم وأفكار ومسؤولية چبيرة مو الكلّ يستوعبها ويگدر عليها.

شجاعة حزينة
من تغادر كلشي وما تلتفت بعد، لأن خلص شتنطي بعد من روحك حتّىٰ تنشاف ويرضون عنك؟.

شجاعة ... أجت من بعد ألف محاولة وحسن ظن وتحمل وصبر وكظم غيظ وصفح ... وما نسىٰ الفضل بينهم، بس خلص هالميدان بعد مو ميدانه ولازم يترك الساحة لغيره.

علىٰ أمل إنو تكون هالشجاعات مأجور عليها، وصاحبها يتعوض عن كلّ هذا.